[
 {
  "type": "HEADER",
  "value": "Мѣ́сѧца феѵрꙋа́рїа въ к҃д-й де́нь. Пе́рвое и҆ второ́е ѡ҆брѣ́тенїе честны́ѧ главы̀ прⷣте́чевы."
 },
 {
  "type": "TEXT",
  "value": "ⷤ На вели́цѣй вече́рни ⷤ На ᲂу҆́трени ⷤ На лїтꙋргі́и"
 },
 {
  "type": "HEADER",
  "value": "На вели́цѣй вече́рни."
 },
 {
  "type": "TEXT",
  "value": "А҆́ще не є҆́сть по́стъ: ве́черъ пое́мъ, Блаже́нъ мꙋ́жъ: а҃-й а҆нтїфѡ́нъ. А҆́ще же по́стъ, стїхологисꙋ́емъ ѻ҆бы́чнꙋю каѳі́смꙋ, и҆ пое́тсѧ слꙋ́жба прⷣте́чи съ трїѡ́дїю."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на ѕ҃. Гла́съ є҃. Подо́бенъ: Ра́дꙋйсѧ:"
 },
 {
  "type": "TEXT",
  "value": "Р а́дꙋйсѧ, сщ҃е́ннаѧ главо̀, и҆ свѣтоно́снаѧ, / и҆ а҆́гг҃лѡмъ говѣ́йнаѧ, / ꙗ҆́же мече́мъ ѿсѣ́чена дре́вле, / и҆ ѻ҆́стрыми ѡ҆бличе́ньми нечистоты̀ стꙋ́дъ посѣ́кшаѧ, / и҆сто́чникъ чꙋде́съ, вѣ̑рныѧ напаѧ́юща, / и҆ ꙗ҆́же сп҃сово спаси́тельное прише́ствїе возвѣсти́вшаѧ, / и҆ наи́тїе дх҃а дре́вле ᲂу҆ви́дѣвшаѧ, / къ семꙋ̀ все́льшаѧсѧ, / ве́тхой же и҆ но́вой хода́тайствовавшаѧ бл҃года́ти: / хрⷭ҇та̀ ᲂу҆молѝ дꙋша́мъ на́шымъ дарова́ти ве́лїю ми́лость. [Два́жды.]"
 },
 {
  "type": "TEXT",
  "value": "В ъ сосꙋ́дѣ скꙋде́льнѣ сокрове́ннаѧ и҆ногда̀, / прⷣте́чева глава̀ ꙗ҆ви́сѧ, / ѿ земны́хъ нѣ́дръ и҆зда́вшаѧсѧ ꙗ҆́вственнѣ, / и҆ чꙋде́съ стрꙋи̑ и҆сточа́ющаѧ: / и҆́бо въ вода́хъ главꙋ̀ ѡ҆мы̀, / превы́спрєннѧѧ ны́нѣ покрыва́ющагѡ вода́ми, / и҆ ѡ҆дождѧ́ющагѡ человѣ́кѡмъ бжⷭ҇твенное ѡ҆ставле́нїе. / сїю̀ ᲂу҆̀бо ᲂу҆блажи́мъ и҆́стиннѡ пресла́внꙋ, / и҆ въ сеѧ̀ ѡ҆брѣ́тенїи ра́достнѡ пра́зднꙋемъ, / хрⷭ҇та̀ молѧ́ще, дарова́ти дꙋша́мъ на́шымъ ве́лїю ми́лость. [Два́жды.]"
 },
 {
  "type": "TEXT",
  "value": "Г лава̀, ꙗ҆́же а҆́гнца бж҃їѧ проповѣ́давшаѧ / пло́тїю ꙗ҆́вльшагосѧ, / и҆ всѣ̑мъ покаѧ́нїѧ спасє́нныѧ пꙋти̑ бжⷭ҇твенными заповѣдьмѝ и҆звѣсти́вшаѧ, / ꙗ҆́же пре́жде и҆́рѡдово законопрестꙋпле́нїе ѡ҆бличи́вшаѧ, / и҆ сегѡ̀ ра́ди ѿсѣ́чена ѿ тѣлесѐ, / и҆ на вре́мѧ под̾е́мшаѧ сокрове́нїе, / ꙗ҆́коже свѣтоѧвле́нное на́мъ возсїѧ̀ сл҃нце, / пока́йтесѧ, вопїю́щаѧ, и҆ ко хрⷭ҇тꙋ̀ ны́нѣ предложи́тесѧ во ᲂу҆миле́нїи дꙋше́внѣмъ, / подаю́щемꙋ мі́рꙋ ве́лїю ми́лость. [Два́жды.]"
 },
 {
  "type": "TEXT",
  "value": "Сла́ва, гла́съ ѕ҃: Сокро́вище бжⷭ҇твенныхъ дарѡ́въ, / бг҃охрани́маѧ глава̀ твоѧ̀, прⷣте́че, / ѿ земны́хъ нѣ́дръ возсїѧ̀, / ю҆́же мы̀ вѣ́рнѡ прїе́млюще, / и҆ покланѧ́ющесѧ, сла́вне, / ѡ҆богаща́емсѧ ѿ тебє̀, хрⷭ҇то́въ крⷭ҇ти́телю, / чꙋдесы̀ пресла́вными, и҆ согрѣше́нїй проще́нїемъ."
 },
 {
  "type": "HEADER",
  "value": "И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ, прест҃а́ѧ дв҃о, / кто́ ли не воспое́тъ твоегѡ̀ пречⷭ҇тагѡ ржⷭ҇тва̀; / безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный: / то́йже ѿ тебє̀ чⷭ҇тыѧ про́йде, / неизрече́ннѡ вопло́щсѧ: / є҆стество́мъ бг҃ъ сы́й, / и҆ є҆стество́мъ бы́въ чл҃вѣ́къ на́съ ра́ди, / не во двою̀ лицꙋ̑ раздѣлѧ́емый, / но во двою̀ є҆стєствꙋ̀ несли́тнѡ познава́емый. / того̀ молѝ, чⷭ҇таѧ, всеблаже́ннаѧ, / поми́ловатисѧ дꙋша́мъ на́шымъ."
 },
 {
  "type": "TEXT",
  "value": "Вхо́дъ. Прокі́менъ днѐ, и҆ чтє́нїѧ."
 },
 {
  "type": "HEADER",
  "value": "Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "[Главы̑ м҃, м҃а, м҃є, м҃и и҆ н҃д] Та́кѡ глаго́летъ гдⷭ҇ь: ᲂу҆тѣша́йте, ᲂу҆тѣша́йте лю́ди моѧ̑, гл҃го́летъ бг҃ъ: свѧще́нницы, глаго́лите въ се́рдцы і҆ерꙋсали́мꙋ, ᲂу҆моли́те є҆го̀, ꙗ҆́кѡ ᲂу҆мно́жисѧ смире́нїе є҆гѡ̀: разрѣши́сѧ бо грѣ́хъ є҆гѡ̀, ꙗ҆́кѡ прїѧ́тъ и҆з̾ рꙋкѝ гдⷭ҇ни сꙋгꙋ̑ба согрѣшє́нїѧ своѧ̑. гла́съ вопїю́щагѡ въ пꙋсты́ни, ᲂу҆гото́вайте пꙋ́ть гдⷭ҇ень, пра̑вы твори́те стєзѝ бг҃ꙋ на́шемꙋ. на го́рꙋ высокꙋ̀ взы́ди, бл҃говѣствꙋ́ѧй сїѡ́нꙋ, возвыша́й крѣ́постїю гла́съ сво́й, бл҃говѣствꙋ́ѧй і҆ерꙋсали́мꙋ: возвы́сите, не бо́йтесѧ. а҆́зъ гдⷭ҇ь бг҃ъ, а҆́зъ ᲂу҆слы́шꙋ ᲂу҆бо́гихъ і҆и҃лєвъ, и҆ не ѡ҆ста́влю тѣ́хъ. но ѿве́рзꙋ ѿ го́ръ рѣ́ки, и҆ посредѣ̀ по́лѧ и҆сто́чники: сотворю̀ пꙋсты́ню въ лꙋ́гъ, и҆ жа́ждꙋщꙋю зе́млю во и҆сто́чники водны̑ѧ. да возвесели́тсѧ не́бо свы́ше, и҆ ѻ҆́блацы да кропѧ́тъ пра́вдꙋ: да возсїѧ́етъ землѧ̀, и҆ да прозѧ́бнетъ ми́лость, и҆ пра́вда да возсїѧ́етъ вкꙋ́пѣ. гла́съ весе́лїѧ возвѣсти́те, и҆ ᲂу҆слы́шано да бꙋ́детъ: возвѣсти́те да́же до конє́цъ землѝ. глаго́лите, ꙗ҆́кѡ и҆зба́ви гдⷭ҇ь раба̀ своего̀ і҆а́кѡва: и҆ а҆́ще вжа́ждꙋтъ въ пꙋсты́ни, и҆сточи́тъ и҆̀мъ во́дꙋ и҆зъ ка́мене. возвесели́сѧ непло́ды неражда́ющаѧ, расто́ргни и҆ возопі́й неболѣ́вшаѧ: ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа."
 },
 {
  "type": "HEADER",
  "value": "Прⷪ҇ро́чества малахі́ина чте́нїе."
 },
 {
  "type": "TEXT",
  "value": "[Глава̀ г҃] Та́кѡ гл҃го́летъ гдⷭ҇ь вседержи́тель: сѐ а҆́зъ посыла́ю а҆́гг҃ла моего̀ предъ лице́мъ твои́мъ, и҆́же ᲂу҆гото́витъ пꙋ́ть тво́й предъ тобо́ю, и҆ прїи́детъ во хра́мъ сво́й гдⷭ҇ь, є҆гѡ́же вы̀ и҆́щете. и҆ кто̀ стерпи́тъ де́нь вхо́да є҆гѡ̀; зане́же томꙋ̀ прїитѝ ꙗ҆́кѡ ѻ҆́гнь въ горни́лѣ, и҆ ꙗ҆́коже бы́лїе перꙋ́щихъ. и҆ ѡ҆чи́ститъ, поѧда́ѧ и҆ ѡ҆чища́ѧ ꙗ҆́кѡ сребро̀ и҆ зла́то. и҆ прїи́детъ къ ва́мъ сꙋдо́мъ, и҆ бꙋ́детъ свидѣ́тель ско́ръ на лꙋка̑выѧ, и҆ на прелюбодѣ̑йцы, и҆ на кленꙋ́щыѧсѧ и҆́менемъ мои́мъ во лжꙋ̀, и҆ на лиша́ющыѧ мзды̀ нае́мника, и҆ на наси́льствꙋющыѧ вдови̑цы, и҆ пха́ющыѧ си̑рыѧ, и҆ на ᲂу҆клонѧ́ющыѧ сꙋ́дъ прише́льца, и҆ на небоѧ́щыѧсѧ є҆гѡ̀, гл҃го́летъ гдⷭ҇ь вседержи́тель. занѐ а҆́зъ гдⷭ҇ь бг҃ъ ва́шъ, и҆ не и҆змѣню́сѧ. и҆ вы̀ сы́нове і҆а́кѡвли, ᲂу҆клони́стесѧ ѿ зако́на, и҆ не сохрани́сте. сегѡ̀ ра́ди ѡ҆брати́тесѧ ко мнѣ̀, и҆ ѡ҆бращꙋ́сѧ къ ва́мъ, гл҃го́летъ гдⷭ҇ь вседержи́тель, и҆ ᲂу҆блажа́тъ ва́съ всѝ ꙗ҆зы́цы. и҆ разꙋмѣ́йте ꙗ҆́кѡ а҆́зъ гдⷭ҇ь, смотрѧ́ѧй посредѝ пра́веднагѡ, и҆ посредѝ беззако́нника въ де́нь ѻ҆́нъ, въ ѻ҆́ньже сотворю̀ снабдѣ́нїе лю́бѧщымъ мѧ̀. позна́йте ᲂу҆́бѡ, и҆ помѧни́те зако́нъ мѡѷсе́овъ раба̀ моегѡ̀, ꙗ҆́коже заповѣ́да ва́мъ въ хѡри́вѣ, ко всемꙋ̀ і҆и҃лю повелѣ́нїе и҆ ѡ҆правда́нїе. и҆ сѐ а҆́зъ послю̀ ва́мъ и҆лїю̀ ѳесві́тѧнина, пре́жде да́же не прїитѝ дню̀ гдⷭ҇ню вели́комꙋ и҆ просвѣще́нномꙋ, и҆́же напра́витъ се́рдце ѻ҆тца̀ къ сы́нꙋ, и҆ се́рдце человѣ́ка ко и҆́скреннемꙋ своемꙋ̀, да не прише́дъ поражꙋ̀ зе́млю вско́рѣ, гл҃го́летъ гдⷭ҇ь вседержи́тель, бг҃ъ ст҃ы́й і҆и҃левъ."
 },
 {
  "type": "HEADER",
  "value": "Премꙋ́дрости соломѡ́новы чте́нїе."
 },
 {
  "type": "TEXT",
  "value": "[Главы̑ д҃ и҆ є҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. ѡ҆сꙋ́дитъ же пра́ведникъ ᲂу҆мира́ѧй живꙋ́щыѧ нечести̑выѧ. ᲂу҆́зрѧтъ бо кончи́нꙋ пра́веднагѡ, и҆ не разꙋмѣ́ютъ, что̀ совѣща́ша ѡ҆ не́мъ: ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ: и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆̀хъ сопроти́въ беззако́нїѧ и҆́хъ. тогда̀ ста́нетъ въ дерзнове́нїи мно́зѣ пра́ведникъ предъ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. ви́дѣвше же є҆го̀ смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ спасе́нїи є҆гѡ̀. рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ и҆ въ при́тчꙋ поноше́нїѧ, безꙋ́мнїи. житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. ка́кѡ вмѣни́сѧ въ сынѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. беззако́нныхъ и҆спо́лнихомсѧ сте́зь, и҆ поги́бели, и҆ ходи́хомъ стєзѝ непрохѡ́дны, пꙋти́ же гдⷭ҇нѧ не разꙋмѣ́хомъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "П рїиди́те, честнꙋ́ю главꙋ̀ ѿсѣ́ченнꙋю мече́мъ крⷭ҇ти́телевꙋ, / вѣ́рнїи, дне́сь почти́мъ, / во ѡ҆брѣ́тенїи є҆ѧ̀ срѣта́юще пѣ́сньми, / чтꙋ́ще ѿ любвѐ, бл҃года́ть пролива́ющꙋю и҆сцѣле́нїй на́мъ, / ю҆́же бꙋесло́вѧщий и҆́рѡдъ дре́вле пред̾ѿсѣчѐ, / неи́стовствомъ и҆рѡдїа́дѣ спле́тсѧ."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ / сме́рть преподо́бныхъ є҆гѡ̀."
 },
 {
  "type": "TEXT",
  "value": "Ꙗ҆́ коже ѿ рꙋды̀ зла́то, / та́кѡ ѿ землѝ прⷣте́чева глава̀ просїѧва́етъ, / въ сосꙋ́дѣ скꙋде́льнѣмъ свѣтѧ́щисѧ, и҆ вѣща́ющи ꙗ҆́снѡ, / и҆́рѡдово ѡ҆блича́ющи прелюбодѣ́йство и҆ ᲂу҆бі́йство, / зарю́ же просвѣща́ющꙋю помышлє́нїѧ на̑ша. / ю҆́же ѡ҆блобыза́юще, вѣ́рнїи, дне́сь почти́мъ пѣ́сньми, / ꙗ҆́кѡ ѡ҆ на́съ бг҃ꙋ молѧ́щꙋюсѧ."
 },
 {
  "type": "TEXT",
  "value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, / ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
 },
 {
  "type": "TEXT",
  "value": "Д ре́вле ꙗ҆́коже бжⷭ҇твенное сокро́вище, / въ сосꙋ́дѣ сокрове́ннаѧ глава̀ крⷭ҇ти́телева въ землѝ, / дне́сь концє́мъ ѿкрыва́етсѧ: / ꙗ҆́коже бога́тство пролива́ющаѧ и҆сто́чники и҆сцѣле́нїй, / болѣ̑зни и҆сцѣлѧ́ющаѧ, дꙋ́шы просвѣща́ющаѧ. / тѣ́мже ᲂу҆тѣше́нїѧ всѧ́кагѡ бл҃года́ть воспрїе́млюще, / пѣ́сньми сїю̀ бл҃гоговѣ́йнѡ похва́лимъ."
 },
 {
  "type": "TEXT",
  "value": "Сла́ва, гла́съ в҃: Ꙗ҆́коже бжⷭ҇твенныхъ ᲂу҆мышле́нїй, всечестна́ѧ ра́ка, / неизрече́ннагѡ сꙋщества̀, ꙗ҆́снѡ прови́дѣвшаѧ та́инство глава̀ твоѧ̀, / ꙗ҆́кѡ ѿ ложе́снъ ма́тернихъ, ѿ сокро́вищъ земны́хъ дне́сь возсїѧ̀, / і҆ѡа́нне всехва́льне, / и҆ ѡ҆благово́ни всю̀ подсо́лнечнꙋю, ѡ҆свѧще́нїѧ пролива́ющаѧ мѵ́ро, / и҆ мы́сленнѡ проповѣ́дающаѧ пꙋ́ть покаѧ́нїѧ, / и҆ сп҃сꙋ всѣ́хъ молѧ́щаѧсѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ: Ѽ чꙋдесѐ но́вагѡ, всѣ́хъ дре́внихъ чꙋде́съ! / кто́ бо позна̀ ма́терь безъ мꙋ́жа ро́ждшꙋю, / и҆ на рꙋкꙋ̀ носѧ́щꙋю всю̀ тва́рь содержа́щаго; / бж҃їе є҆́сть и҆зволе́нїе ро́ждшеесѧ. / є҆го́же ꙗ҆́кѡ младе́нца, пречⷭ҇таѧ, твои́ми рꙋка́ма носи́вшаѧ, / и҆ ма́терне дерзнове́нїе къ немꙋ̀ и҆мꙋ́щаѧ, / не преста́й молѧ́щи ѡ҆ чтꙋ́щихъ тѧ̀, / ᲂу҆ще́дрити и҆ спастѝ дꙋ́шы на́шѧ."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Ѿ землѝ возсїѧ́вши прⷣте́чева глава̀, / лꙋчы̀ и҆спꙋща́етъ нетлѣ́нїѧ, вѣ̑рнымъ и҆сцѣле́нїй: / свы́ше собира́етъ мно́жество а҆́гг҃лъ, / до́лѣ же созыва́етъ человѣ́ческїй ро́дъ, / є҆диногла́снꙋю возсыла́ти сла́вꙋ хрⷭ҇тꙋ̀ бг҃ꙋ."
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ воскрⷭ҇нъ: Є҆́же ѿ вѣ́ка ᲂу҆тае́нное, / и҆ а҆́гг҃лѡмъ несвѣ́домое та́инство, / тобо́ю бцⷣе, сꙋ́щымъ на землѝ ꙗ҆ви́сѧ бг҃ъ, / въ несли́тномъ соедине́нїи воплоща́емь, / и҆ крⷭ҇тъ во́лею на́съ ра́ди воспрїи́мъ, / и҆́мже воскреси́въ первозда́ннаго, / спасѐ ѿ сме́рти дꙋ́шы на́шѧ."
 },
 {
  "type": "HEADER",
  "value": "На ᲂу҆́трени."
 },
 {
  "type": "HEADER",
  "value": "На Бг҃ъ гдⷭ҇ь, тропа́рь, два́жды, гла́съ д҃:"
 },
 {
  "type": "TEXT",
  "value": "Ѿ землѝ возсїѧ́вши прⷣте́чева глава̀, / лꙋчы̀ и҆спꙋща́етъ нетлѣ́нїѧ, вѣ̑рнымъ и҆сцѣле́нїй: / свы́ше собира́етъ мно́жество а҆́гг҃лъ, / до́лѣ же созыва́етъ человѣ́ческїй ро́дъ, / є҆диногла́снꙋю возсыла́ти сла́вꙋ хрⷭ҇тꙋ̀ бг҃ꙋ."
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ воскрⷭ҇нъ: Є҆́же ѿ вѣ́ка ᲂу҆тае́нное, / и҆ а҆́гг҃лѡмъ несвѣ́домое та́инство, / тобо́ю бцⷣе, сꙋ́щымъ на землѝ ꙗ҆ви́сѧ бг҃ъ, / въ несли́тномъ соедине́нїи воплоща́емь, / и҆ крⷭ҇тъ во́лею на́съ ра́ди воспрїи́мъ, / и҆́мже воскреси́въ первозда́ннаго, / спасѐ ѿ сме́рти дꙋ́шы на́шѧ."
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:"
 },
 {
  "type": "TEXT",
  "value": "Ꙗ҆́ кѡ бжⷭ҇твенное сокро́вище сокрове́но въ землѝ, / хрⷭ҇то́съ ѿкры̀ главꙋ̀ твою̀ на́мъ, прⷪ҇ро́че и҆ прⷣте́че: / всѝ ᲂу҆̀бо соше́дшесѧ въ сеѧ̀ ѡ҆брѣ́тенїе, / пѣ́сньми бг҃огла́сными сп҃са воспои́мъ, / спаса́ющаго на́шꙋ жи́знь моли́твами твои́ми. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Пое́мъ тѧ̀, бг҃оневѣ́сто мт҃и хрⷭ҇та̀ бг҃а: / сла́вѧще ржⷭ҇тво̀ твоѐ непостижи́мое, / и҆́мже и҆зба́вихомсѧ ѿ ле́сти дїа́воли, и҆ всѧ́кїѧ бѣды̀, бцⷣе влⷣчце, / и҆ вѣ́рнѡ вопїе́мъ: / поми́лꙋй ста́до твоѐ, є҆ди́на всепѣ́таѧ."
 },
 {
  "type": "HEADER",
  "value": "По в҃-мъ стїхоло́гїи сѣда́ленъ, гла́съ д҃. Подо́бенъ: Вознесы́йсѧ:"
 },
 {
  "type": "TEXT",
  "value": "И҆ зда́вшисѧ ꙗ҆́кѡ зла́то ѿ рꙋды̀, / свѧще́ннаѧ твоѧ̀ глава̀ пресла́внѡ, / ѿ незаходи́мыхъ нѣ́дръ земны́хъ, / ѡ҆богатѝ вѣ́рныхъ всѧ̑ мы̑сли разꙋмѣ́нїемъ бжⷭ҇твеннымъ, / ны́нѣ пока́йтесѧ, вопїю́ще ѻ҆бы́чнѡ: / є҆́йже покланѧ́ющесѧ, прⷣте́че, хрⷭ҇та̀ велегла́снѡ вѣ́рою сла́вимъ. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Никогда́же премолчи́мъ, бцⷣе, / бл҃года́рнѡ пѣ́ти ѿ дꙋшѝ твоѧ̑ ми́лѡсти, влⷣчце, / рабѝ твоѝ, зовꙋ́ще и҆ глаго́люще: / прест҃а́ѧ дв҃о, предварѝ, / и҆ и҆зба́ви ѿ вра̑гъ ви́димыхъ и҆ неви́димыхъ и҆ всѧ́кагѡ преще́нїѧ: / ты́ бо є҆сѝ на́мъ застꙋпле́нїе."
 },
 {
  "type": "HEADER",
  "value": "Полѷеле́й и҆ велича́нїе:"
 },
 {
  "type": "TEXT",
  "value": "В елича́емъ тѧ̀, / крⷭ҇ти́телю сп҃совъ і҆ѡа́нне, / и҆ почита́емъ всѝ / чⷭ҇тны́ѧ твоеѧ̀ главы̀ / ѡ҆брѣ́тенїе."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "а҃ Бл҃же́нъ мꙋ́жъ боѧ́йсѧ гдⷭ҇а: в҃ Въ за́повѣдехъ є҆гѡ̀ восхо́щетъ ѕѣлѡ̀. а҃ Сла́ва и҆ бога́тство въ домꙋ̀ є҆гѡ̀. в҃ и҆ пра́вда є҆гѡ̀ пребыва́етъ въ вѣ́къ вѣ́ка. а҃ Въ па́мѧть вѣ́чнꙋю бꙋ́детъ првⷣникъ. в҃ Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. а҃ Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. в҃ Сѐ ᲂу҆стна́мъ мои̑мъ не возбраню̀, гдⷭ҇и. а҃ Ты̀ разꙋмѣ́лъ є҆сѝ пра́вдꙋ мою̀ и҆ и҆́стинꙋ мою̀: в҃ и҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й. а҃ Свѣ́тъ возсїѧ̀ првⷣникꙋ, и҆ пра̑вымъ се́рдцемъ весе́лїе. в҃ Ро́дъ пра́выхъ бл҃гослови́тсѧ. а҃ Сла́вою и҆ че́стїю вѣнча́лъ є҆сѝ є҆го̀. в҃ Ꙗ҆́кѡ ты̀ бл҃гослови́ши првⷣника гдⷭ҇и. а҃ Ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ. в҃ Въ ни́хже посѣтѝ на́съ восто́къ съ высоты̀: а҃ Ꙗ҆ви́тисѧ во тьмѣ̀ и҆ сѣ́ни сме́ртнѣй сѣдѧ́щымъ: в҃ Напра́вити но́ги на́шѧ на пꙋ́ть ми́ренъ."
 },
 {
  "type": "TEXT",
  "value": "Сла́ва, и҆ ны́нѣ: А҆ллилꙋ́їа, три́жды."
 },
 {
  "type": "HEADER",
  "value": "По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:"
 },
 {
  "type": "TEXT",
  "value": "К рⷭ҇ти́телева глава̀ кры́ѧшесѧ ꙗ҆́кѡ би́серъ въ землѝ вла́жнѣй, / и҆ ꙗ҆́кѡ свѣ́щникъ бг҃освѣ́телъ ᲂу҆кра́шена, / ѡ҆зарѧ́етъ чꙋдотворѧ́щи мі́ръ ве́сь: / ꙗ҆́кѡ ᲂу҆́тро возсїѧ̀ всебл҃голѣ́пнѡ сл҃нцꙋ прⷣте́ча, / и҆ невече́рнимъ свѣ́томъ возвѣща́ѧ па́ки на́мъ, / сѐ, взыва́ѧ, а҆́гнецъ бж҃їй. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Бл҃годари́мъ тѧ̀ при́снѡ, бцⷣе, / и҆ велича́емъ, чⷭ҇таѧ, и҆ покланѧ́емсѧ, / воспѣва́юще ржⷭ҇тво̀ твоѐ, бл҃года́тнаѧ, вопїю́ще непреста́ннѡ: / спасѝ ны, дв҃о всеми́лостиваѧ, ꙗ҆́кѡ бл҃га́ѧ, / и҆ де́мѡнѡвъ и҆схитѝ словоположе́нїѧ стра́шнагѡ, въ ча́съ и҆спыта́нїѧ, / да не посрами́мсѧ рабѝ твоѝ."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са, и҆́хже стїхѝ повторѧ́юще пое́мъ:"
 },
 {
  "type": "TEXT",
  "value": "Ѿ ю҆́ности моеѧ̀ / мно́зи бо́рютъ мѧ̀ стра̑сти, / но са́мъ мѧ̀ застꙋпѝ, / и҆ сп҃сѝ сп҃се мо́й."
 },
 {
  "type": "TEXT",
  "value": "Н енави́дѧщїи сїѡ́на, / посрами́тесѧ ѿ гдⷭ҇а, / ꙗ҆́кѡ трава́ бо ѻ҆гне́мъ / бꙋ́дете и҆зсо́хше."
 },
 {
  "type": "TEXT",
  "value": "Сла́ва: Ст҃ы́мъ дх҃омъ / всѧ́ка дꙋша̀ живи́тсѧ, / и҆ чистото́ю возвыша́етсѧ, / свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Т а́мѡ возращꙋ̀ ро́гъ дв҃дꙋ, / ᲂу҆гото́вахъ свѣти́льникъ пома́занномꙋ моемꙋ̀. Сті́хъ: Помѧнѝ гдⷭ҇и, дв҃да, и҆ всю̀ кро́тость є҆гѡ̀."
 },
 {
  "type": "TEXT",
  "value": "Дрꙋгі́й прокі́менъ: Всѧ́кое дыха́нїе / да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋки́, зача́ло л҃а."
 },
 {
  "type": "TEXT",
  "value": "В о вре́мѧ ѻ҆́но, и҆зы́де сло́во ѡ҆ і҆и҃сѣ по все́й і҆ꙋде́и, и҆ по все́й странѣ̀. и҆ возвѣсти́ша і҆ѡа́ннꙋ ᲂу҆ченицы̀ є҆гѡ̀ ѡ҆ всѣ́хъ си́хъ. и҆ призва́въ два̀ нѣ́каѧ ѿ ᲂу҆чєни́къ свои́хъ і҆ѡа́ннъ, посла̀ ко і҆и҃сꙋ, глаго́лѧ: ты́ ли є҆сѝ грѧды́й, и҆лѝ и҆но́гѡ ча́емъ; прише́дша же къ немꙋ̀ мꙋ̑жа, рѣ́ста: і҆ѡа́ннъ крести́тель посла̀ на́съ къ тебѣ̀, глаго́лѧ: ты́ ли є҆сѝ грѧды́й, и҆лѝ и҆но́гѡ ча́емъ; въ то́й же ча́съ и҆сцѣлѝ мнѡ́ги ѿ недꙋ̑гъ, и҆ ра́нъ, и҆ дꙋ̑хъ ѕлы́хъ: и҆ мнѡ́гимъ слѣпы̑мъ дарова̀ прозрѣ́нїе. и҆ ѿвѣща́въ і҆и҃съ речѐ и҆́ма: ше́дша возвѣсти́та і҆ѡа́ннꙋ, ꙗ҆̀же ви́дѣста и҆ слы́шаста: ꙗ҆́кѡ слѣпі́и прозира́ютъ, хро́мїи хо́дѧтъ, прокаже́ннїи ѡ҆чища́ютсѧ, глꙋсі́и слы́шатъ, ме́ртвїи востаю́тъ, ни́щїи благовѣствꙋ́ютъ. и҆ блаже́нъ є҆́сть, и҆́же а҆́ще не соблазни́тсѧ ѡ҆ мнѣ̀. ѿше́дшема же ᲂу҆ченико́ма і҆ѡа́нновома, нача́тъ глаго́лати къ наро́дѡмъ ѡ҆ і҆ѡа́ннѣ: чесѡ̀ и҆зыдо́сте въ пꙋсты́ню ви́дѣти; тро́сть ли вѣ́тромъ коле́блемь; но чесѡ̀ и҆зыдо́сте ви́дѣти; человѣ́ка ли въ мѧ́кки ри̑зы ѡ҆дѣ́ѧна; сѐ и҆́же во ѻ҆де́жди сла́внѣй, и҆ пи́щи сꙋ́щїи, во ца́рствїи сꙋ́ть. но чесѡ̀ и҆зыдо́сте ви́дѣти; проро́ка ли; є҆́й, глаго́лю ва́мъ, и҆ ли́шше проро́ка. се́й бо є҆́сть, ѡ҆ не́мже пи́сано є҆́сть: сѐ а҆́зъ послю̀ а҆́гг҃ла моего̀ пред̾ лице́мъ твои́мъ, и҆́же ᲂу҆стро́итъ пꙋ́ть тво́й пред̾ тобо́ю. глаго́лю бо ва́мъ: бо́лїй въ рожде́нныхъ жена́ми проро́къ і҆ѡа́нна крести́телѧ никто́же є҆́сть: мні́й же, во црⷭ҇твїи бж҃їи бо́лїй є҆гѡ̀ є҆́сть. и҆ всѝ лю́дїе слы́шавше, и҆ мытарі́е ѡ҆правди́ша бг҃а кре́щшесѧ креще́нїемъ і҆ѡа́нновымъ. фарїсе́є же и҆ зако́нницы совѣ́тъ бж҃їй ѿверго́ша въ себѣ̀, не кре́щшесѧ ѿ негѡ̀."
 },
 {
  "type": "HEADER",
  "value": "По н҃-мъ ѱалмѣ̀:"
 },
 {
  "type": "TEXT",
  "value": "Сла́ва: Мл҃твами ст҃а́гѡ сла́внагѡ прⷪ҇ро́ка, предте́чи и҆ крести́телѧ гдⷭ҇нѧ і҆ѡа́нна, / ми́лостиве, ѡ҆чи́сти / мно́жєства согрѣше́нїй на́шихъ."
 },
 {
  "type": "TEXT",
  "value": "И҆ ны́нѣ: Мл҃твами бцⷣы, / ми́лостиве, ѡ҆чи́сти / мно́жєства согрѣше́нїй на́шихъ."
 },
 {
  "type": "TEXT",
  "value": "И҆ посе́мъ: Поми́лꙋй мѧ̀ бж҃е, / по вели́цѣй ми́лости твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ."
 },
 {
  "type": "HEADER",
  "value": "И҆ стїхи́ра самогла́сна, гла́съ ѕ҃:"
 },
 {
  "type": "TEXT",
  "value": "Ꙗ҆́ же пе́рвѣе на блю́дѣ, / и҆́рѡдовꙋ беззако́ннꙋю нечистотꙋ̀ ѡ҆бличи́вшаѧ, / покаѧ́нїе же всѣ̑мъ проповѣ́давшаѧ вѣ̑рнымъ, / честна́ѧ глава̀ крⷭ҇ти́телѧ хрⷭ҇то́ва, / ѿ сокро́вищъ земны́хъ ꙗ҆́вльшаѧсѧ предлежи́тъ, / вѣ́рнѡ притека́ющымъ къ не́й, / и҆ прикаса́ющымсѧ со стра́хомъ, / и҆ покланѧ́ющымсѧ любо́вїю дꙋше́вною, / да́рꙋющаѧ разрѣше́нїе прегрѣше́нїй, / проше́нїємъ подае́тъ потрє́бнаѧ, и҆ ве́лїю ми́лость."
 },
 {
  "type": "HEADER",
  "value": "Канѡ́нъ бцⷣы со і҆рмосо́мъ на ѕ҃: и҆ прⷣте́чи на и҃. Гла́съ ѕ҃. Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ꙗ҆́кѡ по сꙋ́хꙋ пѣшеше́ствовавъ і҆и҃ль, / по бе́зднѣ стопа́ми, / гони́телѧ фараѡ́на / ви́дѧ потоплѧ́ема, / бг҃ꙋ побѣ́днꙋю пѣ́снь пои́мъ, вопїѧ́ше."
 },
 {
  "type": "TEXT",
  "value": "Г рѧди́те, бл҃гохва́льнымъ ѧ҆зы́комъ / и҆ всеси́льнымъ пле́щꙋще дꙋ́хомъ и҆зъ ᲂу҆сте́нъ нечи́стыхъ, / гла́съ сло́ва прⷣте́чꙋ пѣ́сньми дꙋхо́вными, вѣ́рнїи, просла́вимъ."
 },
 {
  "type": "TEXT",
  "value": "М и́рнымъ ᲂу҆строе́нїемъ ᲂу҆тиша́етсѧ, / и҆ безмѣ́рными мно́жествы хрⷭ҇то́ва цр҃ковь, бл҃гостоѧ́тельнѣ ᲂу҆паса́етсѧ, / тебѣ̀ лѣ́тнюю пѣ́снь вопїю́щи, прⷣте́че."
 },
 {
  "type": "TEXT",
  "value": "Ю҆́ же ѿ бг҃а да́рꙋемꙋю ꙗ҆́кѡ сокро́вище на́мъ неѿе́млемо, / бг҃оно́снꙋю главꙋ̀ прⷣте́чевꙋ, всѝ пѣ́сньми досто́йнѡ соше́дшесѧ, вѣ́рнїи, почти́мъ."
 },
 {
  "type": "TEXT",
  "value": "Бг҃оро́диченъ: Твоего̀ прїе́мши содѣ́телѧ, / ꙗ҆́кѡ са́мъ восхотѣ̀ и҆зъ безсѣ́меннагѡ твоегѡ̀ чре́ва, па́че ᲂу҆ма̀ воплоща́ема, чⷭ҇таѧ, / тва́рей вои́стиннꙋ ꙗ҆ви́ласѧ є҆сѝ влⷣчца."
 },
 {
  "type": "TEXT",
  "value": "Катава́сїа: Ѿве́рзꙋ ᲂу҆ста̀ моѧ̑, / и҆ напо́лнѧтсѧ дх҃а, / и҆ сло́во ѿры́гнꙋ цр҃и́цѣ мт҃ри, / и҆ ꙗ҆влю́сѧ свѣ́тлѡ торжествꙋ́ѧ, / и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Нѣ́сть ст҃ъ / ꙗ҆́коже ты̀ гдⷭ҇и бж҃е мо́й, / вознесы́й ро́гъ вѣ́рныхъ твои́хъ бл҃же, / и҆ ᲂу҆тверди́вый на́съ на ка́мени / и҆сповѣ́данїѧ твоегѡ̀."
 },
 {
  "type": "TEXT",
  "value": "Оу҆ тро́ба непло́дна прозѧбе́нїе тѧ̀ и҆знесѐ бжⷭ҇твенно, / ꙗ҆́же ѿ ꙗ҆зы̑къ цр҃ковь, сла́вна невѣстово́дца, / хрⷭ҇тꙋ̀ и҆́стинномꙋ бг҃ꙋ и҆ женихꙋ̀ сїю̀ ѡ҆брꙋча́юща."
 },
 {
  "type": "TEXT",
  "value": "Т воегѡ̀ бг҃овѣща́ннагѡ гла́са, прⷣте́че і҆ѡа́нне, / нижѐ мече́мъ ᲂу҆держа̀ ѻ҆каѧ́ннаѧ прелюбодѣ́йца: / бжⷭ҇твеннꙋю бо твою̀ на́мъ ꙗ҆влѧ́еши главꙋ̀ ѿ землѝ."
 },
 {
  "type": "TEXT",
  "value": "Т оржествꙋ́ющїй свѣ́тлѡ жела́ющь тѧ̀ гра́дъ, ᲂу҆чрежда́емь быва́етъ / ꙗ҆́кѡ бога́тство ѡ҆брѣ́тшь та́йное, / и҆ и҆сто́чникъ неѡскꙋ́денъ и҆сцѣле́нїй, прⷣте́че, главꙋ̀ твою̀."
 },
 {
  "type": "TEXT",
  "value": "Бг҃оро́диченъ: Бжⷭ҇твеннагѡ ржⷭ҇тва̀ твоегѡ̀, чⷭ҇таѧ, / всѧ́кїй є҆стества̀ чи́нъ прехо́дитъ чꙋ́до: / бг҃а бо преесте́ственнѡ зачала̀ є҆сѝ во чре́вѣ, / и҆ ро́ждши пребыва́еши при́снѡ дв҃а."
 },
 {
  "type": "TEXT",
  "value": "Катава́сїа: Твоѧ̑ пѣсносло́вцы бцⷣе, / живы́й и҆ незави́стный и҆сто́чниче, / ли́къ себѣ̀ совокꙋ́пльшыѧ дх҃о́внѡ ᲂу҆твердѝ, / въ бж҃е́ственнѣй твое́й сла́вѣ, / вѣнцє́въ сла́вы сподо́би."
 },
 {
  "type": "HEADER",
  "value": "Сѣда́ленъ, гла́съ и҃. Подо́бенъ: Повелѣ́нное та́йнѡ:"
 },
 {
  "type": "TEXT",
  "value": "Ꙗ҆́ кѡ въ храни́лищи сокро́вище вложена̀ прⷣте́чева глава̀ хранѧ́шесѧ, / въ водоно́сѣ кры́ющасѧ гла́съ сло́ва: / ꙗ҆́кѡ пшени́ца покрове́на во глꙋбинѣ̀ землѝ и҆зцвѣтѐ, / плодоносѧ́щи бжⷭ҇твеннꙋю жи́знь. / тоѧ̀ всѝ почита́емъ ѡ҆брѣ́тенїе, хрⷭ҇та̀ сла́вѧще, / пода́вшаго то́й бл҃года́ть и҆сточи́ти и҆сцѣлє́нїѧ. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Повелѣ́нное та́йнѡ прїе́мъ въ ра́зꙋмѣ, / въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: / приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. / є҆го́же и҆ ви́дѧ въ ложесна́хъ твои́хъ, прїе́мша ра́бїй зра́къ, / ᲂу҆жаса́юсѧ зва́ти тебѣ̀: / ра́дꙋйсѧ, невѣ́сто неневѣ́стнаѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Хрⷭ҇то́съ моѧ̀ си́ла, / бг҃ъ и҆ гдⷭ҇ь, / честна́ѧ цр҃ковь / бг҃олѣ́пнѡ пое́тъ взыва́ющи, / ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "В е́тхагѡ бы́лъ є҆сѝ печа́ть, всебога́те, ꙗ҆́вѣ завѣ́та, / и҆ прⷪ҇ро́кѡвъ коне́цъ и҆звѣсти́лъ є҆сѝ: / и҆ чертогокраси́тель же бжⷭ҇твенный, но́вагѡ ꙗ҆ви́лсѧ є҆сѝ, прⷣте́че."
 },
 {
  "type": "TEXT",
  "value": "В ласѧны́ми рꙋ́бы, ѻ҆бы́чнѡ, прⷣте́че, / честнꙋ́ю претерпѣ́лъ є҆сѝ и҆ сла́внꙋю главꙋ̀ твою̀ покры́ти ца́рскою багрѧни́цею, / ꙗ҆́кѡ ри́зою, ра́дꙋѧсѧ."
 },
 {
  "type": "TEXT",
  "value": "Б жⷭ҇твеннꙋю главꙋ̀ твою̀, ѿбѣже́нїемъ ни́щїй и҆ скита́ѧйсѧ, / твои́ми бжⷭ҇твенными наставле́ньми, / ꙗ҆́коже незави́стно бога́тство, і҆ѡа́нне, показꙋ́етъ."
 },
 {
  "type": "TEXT",
  "value": "З аре́ю, прⷣте́че, бжⷭ҇твеннагѡ дх҃а, чтꙋ́щїй тѧ̀ гра́дъ всегда̀, молѝ ᲂу҆ѧсни́ти, / и҆ въ бжⷭ҇твеннѣй па́мѧти твое́й, безплѡ́тнымъ сра́доватисѧ."
 },
 {
  "type": "TEXT",
  "value": "Бг҃оро́диченъ: Ме́ртва мѧ̀ показа̀ са́да вкꙋше́нїе, / живо́тное же дре́во, и҆зъ тебє̀ ꙗ҆́вльшеесѧ, пречⷭ҇таѧ, воздви́же, / и҆ ра́йскїѧ пи́щи наслѣ́дника мѧ̀ сотворѝ."
 },
 {
  "type": "TEXT",
  "value": "Катава́сїа: Сѣдѧ́й въ сла́вѣ, / на прⷭ҇то́лѣ бж҃ества̀, / во ѻ҆́блацѣ ле́гцѣ / прїи́де і҆и҃съ пребж҃е́ственный, / нетлѣ́нною дла́нїю, / и҆ сп҃се зовꙋ́щыѧ: / сла́ва хрⷭ҇тѐ си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Бж҃їимъ / свѣ́томъ твои́мъ бл҃же, / ᲂу҆́тренюющихъ тѝ дꙋ́шы / любо́вїю ѡ҆зарѝ, молю́сѧ, / тѧ̀ вѣ́дѣти сло́ве бж҃їй, / и҆́стиннаго бг҃а, / ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Н е бы́лъ є҆сѝ тро́сть, крⷭ҇ти́телю, и҆скꙋси́тельными ѕлополꙋче́нїѧ вѣ̑тры всегда̀ коле́блемь, / сто́лпъ же бжⷭ҇твенныхъ люде́й непоколеби́мь: / си́лою бо и҆лїино́ю ꙗ҆ви́лсѧ є҆сѝ, и҆ дх҃а."
 },
 {
  "type": "TEXT",
  "value": "И҆́ же бжⷭ҇тво̀ ѿмета́ѧ, и҆ ᲂу҆малѧ́ѧ сла́вꙋ, ѿ тебє̀ кре́щшагѡсѧ хрⷭ҇та̀, / и҆ бжⷭ҇твеннꙋю бл҃года́ть твою̀ ᲂу҆таева́ѧ, / пра́веднѡ ѿ ѡ҆гра́дъ бжⷭ҇твенныхъ возбранѧ́емь є҆́сть."
 },
 {
  "type": "TEXT",
  "value": "Ѿ ве́рзлъ є҆сѝ незави́стнагѡ бжⷭ҇твеннагѡ и҆сто́чника две́рь, / пою́щымъ тѧ̀ любо́вїю, сла́вный прⷣте́че, / бжⷭ҇твенныѧ бл҃года́ти и҆сточа́ющїѧ во́ды, и҆ стрꙋи̑ и҆сцѣле́нїй всѣ́хъ веселѧ́щыѧ."
 },
 {
  "type": "TEXT",
  "value": "Бг҃оро́диченъ: Носѧ́щи добро́тꙋ мы́сленнꙋю краснѣ́йшїѧ дꙋшѝ твоеѧ̀, / невѣ́ста бж҃їѧ была̀ є҆сѝ, / запеча́тствована дѣ́вствомъ, чⷭ҇таѧ, и҆ заре́ю чистоты̀ мі́ръ просвѣща́ющи."
 },
 {
  "type": "TEXT",
  "value": "Катава́сїа: Оу҆жасо́шасѧ всѧ́чєскаѧ / ѡ҆ бж҃е́ственнѣй сла́вѣ твое́й: / ты́ бо неискꙋсобра́чнаѧ дв҃о, / и҆мѣ́ла є҆сѝ во ᲂу҆тро́бѣ над̾ всѣ́ми бг҃а, / и҆ родила̀ є҆сѝ безлѣ́тнаго сн҃а, / всѣ̑мъ воспѣва́ющымъ тѧ̀, / ми́ръ подава́ющаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Жите́йское мо́ре / воздвиза́емое зрѧ̀ напа́стей бꙋ́рею, / къ ти́хомꙋ приста́нищꙋ твоемꙋ̀ прите́къ вопїю́ ти: / возведѝ ѿ тлѝ живо́тъ мо́й, / многомлⷭ҇тиве."
 },
 {
  "type": "TEXT",
  "value": "П рⷪ҇ро́ка тѧ̀ речѐ и҆́стина хрⷭ҇то́съ, и҆ прⷪ҇ро́кѡвъ превы́шша, / крⷭ҇ти́телѧ же и҆ прⷣте́чꙋ жи́зни: / того́ бо ᲂу҆зрѣ́лъ є҆сѝ, є҆го́же зако́нъ и҆ прⷪ҇ро́цы провозвѣсти́ша."
 },
 {
  "type": "TEXT",
  "value": "Н е терпѧ́ше кры́тисѧ чꙋде́съ и҆сто́чникъ, сокро́вище бл҃года́ти, / сла́внаѧ глава̀ твоѧ̀, крⷭ҇ти́телю, прⷪ҇ро́че и҆ прⷣте́че: / но ꙗ҆́вльшисѧ пролива́етъ и҆сцѣле́нїй и҆сто́чники."
 },
 {
  "type": "TEXT",
  "value": "В себога́тно похвале́нїе, и҆ ᲂу҆краше́нїе свѣ́тло, / и҆ щи́тъ спаси́теленъ, хрⷭ҇толю́бный се́й, / и҆ бл҃госла́вный предлага́етъ гра́дъ тво́й, / честнꙋ́ю и҆ бжⷭ҇твеннꙋю твою̀ главꙋ̀, прⷣте́че."
 },
 {
  "type": "TEXT",
  "value": "Бг҃оро́диченъ: Вели́кїй прописа̀ во прⷪ҇ро́цѣхъ мѡѷсе́й тѧ̀ кївѡ́тъ, и҆ трапе́зꙋ, и҆ свѣ́щникъ, / и҆ ста́мнꙋ ѻ҆бра́знѣ, назна́менꙋѧ воплоще́нїе, / є҆́же и҆зъ тебє̀, вы́шнѧгѡ, мт҃и дв҃о."
 },
 {
  "type": "TEXT",
  "value": "Катава́сїа: Бж҃е́ственное сїѐ и҆ всечестно́е, / соверша́юще пра́зднество, / бг҃омꙋ́дрїи бг҃омт҃ре, / прїиди́те рꙋка́ми воспле́щимъ, / ѿ неѧ̀ ро́ждшагосѧ бг҃а сла́вимъ."
 },
 {
  "type": "HEADER",
  "value": "Конда́къ, гла́съ в҃. Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "П рⷪ҇ро́че бж҃їй, и҆ прⷣте́че бл҃года́ти, / главꙋ̀ твою̀ ꙗ҆́кѡ шипо́къ свѧще́ннѣйшїй ѿ землѝ ѡ҆брѣ́тше, / и҆сцѣлє́нїѧ всегда̀ прїе́млемъ: / и҆́бо па́ки ꙗ҆́коже пре́жде въ мі́рѣ проповѣ́дꙋеши покаѧ́нїе."
 },
 {
  "type": "TEXT",
  "value": "І҆́косъ: Ѿ гдⷭ҇а свидѣ́тельство прїе́мъ, і҆ѡа́нне, па́че всѣ́хъ человѣ̑къ вы́шшїй бы́лъ є҆сѝ: / ѿѻнꙋ́дꙋже похвалы̑ пѣ́сней принестѝ тебѣ̀ ᲂу҆жаса́юсѧ, / но любо́вїю понꙋжде́нъ, пѣ́снь нача́ти дерзнꙋ́хъ. / тѣ́мже да не ᲂу҆недосто́иши споспѣ́шникъ мнѣ̀ бы́ти, всехва́льне, / да возмогꙋ̀ вѣнча́ти тво́й ве́рхъ ст҃ы́й, требога́те: / и҆́бо ты̀ въ мі́рѣ проповѣ́дꙋеши покаѧ́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Росода́тельнꙋ ᲂу҆́бѡ пе́щь / содѣ́ла а҆́гг҃лъ / прпⷣбнымъ ѻ҆трокѡ́мъ, / халде́и же ѡ҆палѧ́ющее / велѣ́нїе бж҃їе / мꙋчи́телѧ ᲂу҆вѣща̀ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ."
 },
 {
  "type": "TEXT",
  "value": "Д в҃ы прозѧбе́нїе, тѧ̀ па́че всѣ́хъ речѐ въ рожде́нныхъ жена́ми: / ꙗ҆́кѡ бо безпло́тенъ и҆ равноа́гг҃ленъ на землѝ томꙋ̀ пожи́лъ є҆сѝ, вопїѧ̀: / бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "В о ᲂу҆тро́бѣ двⷭ҇твеннѣй все́льшасѧ позна́лъ є҆сѝ и҆зъ непло́дна чре́ва, / и҆ ᲂу҆потреби́въ мт҃рнѧ, прⷣте́че, гла́са, и҆гра́ѧ взыва́лъ є҆сѝ є҆мꙋ̀: / бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ѿ пꙋсты́ни прест҃ы́мъ дх҃омъ наꙋче́нъ ꙗ҆ви́лсѧ є҆сѝ, / ꙗ҆́коже ᲂу҆́тро свѣтоно́сно, / а҆́гг҃лъ свѣ́та, на́съ наꙋча́ѧ вопи́ти: / бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Оу҆ блажи́сѧ ꙗ҆́кѡ вои́стиннꙋ во гра́дѣхъ, се́й ны́нѣ, приснопа́мѧтне, / стѧжа́вый тѧ̀ гра́дъ сокро́вище, прⷣте́че хрⷭ҇то́въ. / тѣ́мже пра́зднꙋѧ вопїе́тъ: / бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Тобо́ю, мт҃и дв҃о, свѣ́тъ возсїѧ̀ все́й вселе́ннѣй свѣ́тлый, / ты́ бо зижди́телѧ всѣ́хъ родила̀ є҆сѝ бг҃а: / ᲂу҆ негѡ́же и҆спросѝ, пречⷭ҇таѧ, на́мъ низпосла́ти вѣ̑рнымъ ве́лїю ми́лость."
 },
 {
  "type": "TEXT",
  "value": "Катава́сїа: Не послꙋжи́ша тва́ри бг҃омꙋ́дрїи / па́че созда́вшагѡ, / но ѻ҆́гненное преще́нїе мꙋ́жески попра́вше, / ра́довахꙋсѧ пою́ще: / препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "И҆з̾ пла́мене преподѡ́бнымъ ро́сꙋ и҆сточи́лъ є҆сѝ, / и҆ пра́веднагѡ же́ртвꙋ водо́ю попали́лъ є҆сѝ: / всѧ̑ бо твори́ши хрⷭ҇тѐ то́кмѡ є҆́же хотѣ́ти, / тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "П о́сланъ бы́сть вопїю́щагѡ гла́съ прⷣте́ча, запꙋстѣ́вшымъ сердца́мъ, / сн҃а бж҃їѧ, вѣ́рꙋ бл҃гочести́вꙋю водрꙋжа́ѧй сꙋ́щагѡ бг҃а, / є҆го́же превозно́симъ во всѧ̑ вѣ́ки."
 },
 {
  "type": "TEXT",
  "value": "Оу҆ гото́вите, глаго́летъ и҆ ны́нѣ прⷣте́ча, гдⷭ҇ню стезю̀: / се́й бо ст҃ы́ни ра́ди прише́дъ, со ѻ҆ц҃е́мъ и҆ дх҃омъ, / въ на̑ша сердца̀ всели́тсѧ во вѣ́ки."
 },
 {
  "type": "TEXT",
  "value": "С лꙋ́хомъ ᲂу҆́бѡ гла́сꙋ роди́телевꙋ, ѻ҆чи́ма же бжⷭ҇твеннагѡ дх҃а зрѣ́нїю: / всѧ́чески же ѡ҆сѧза́нїемъ і҆ѡа́ннъ прⷣте́ча на тебѣ̀ рꙋ́кꙋ положи́вый, хрⷭ҇тѐ, / бг҃оно́сецъ быва́етъ."
 },
 {
  "type": "TEXT",
  "value": "И҆ зъ чре́ва ѡ҆ст҃и́сѧ бжⷭ҇твеннымъ дх҃омъ, / и҆ прⷪ҇ро́къ ꙗ҆ви́сѧ во чре́вѣ носи́мь: / ны́нѣ же наслажде́нїе, и҆́же въ нѣ́дрѣхъ тѧ̀ и҆мꙋ́щемꙋ гра́дꙋ показа́сѧ, прⷪ҇ро́че."
 },
 {
  "type": "TEXT",
  "value": "Бг҃оро́диченъ: Златоза́рный тѧ̀ свѣ́щникъ пред̾изѡбразѝ, / прїе́мшꙋю неизрече́ннѡ свѣ́тъ непристꙋ́пный, / позна́нїемъ тогѡ̀ ѡ҆зарѧ́ющь всѧ́чєскаѧ: / є҆го́же превозно́симъ во всѧ̑ вѣ́ки."
 },
 {
  "type": "TEXT",
  "value": "Катава́сїа: Ѻ҆́троки бл҃гочєсти́выѧ въ пещѝ / ржⷭ҇тво̀ бг҃оро́дичо сп҃сло̀ є҆́сть, / тогда̀ ᲂу҆́бѡ ѡ҆бразꙋ́емое: / ны́нѣ же дѣ́йствꙋемое, / вселе́ннꙋю всю̀ воздвиза́етъ пѣ́ти тебѣ̀: / гдⷭ҇а по́йте дѣла̀, / и҆ превозноси́те є҆го̀ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Бг҃а / человѣ́кѡмъ невозмо́жно ви́дѣти, / на него́же не смѣ́ютъ чи́ни а҆́гг҃льстїи взира́ти: / тобо́ю же, всечⷭ҇таѧ, ꙗ҆ви́сѧ человѣ́кѡмъ / сло́во воплоще́нно, / є҆го́же велича́юще, / съ нбⷭ҇ными вѡ́и тѧ̀ ᲂу҆блажа́емъ."
 },
 {
  "type": "TEXT",
  "value": "Ꙗ҆́ вѣ и҆сполне́нїѧ десѧти́цы, прⷣте́че, за́повѣдей ты̀ храни́тель крѣ́покъ бы́въ, / прили́чнѣ ѿ хрⷭ҇та̀ почте́нъ бы́лъ є҆сѝ дарова́нїй десѧти́цею. / тѣ́мже тѧ̀ дх҃а таи́нника, и҆ дрꙋ́га сло́вꙋ вѣ́дꙋще, ᲂу҆блажа́емъ."
 },
 {
  "type": "TEXT",
  "value": "Х рⷭ҇то́въ прⷪ҇ро́къ же и҆ а҆пⷭ҇лъ, а҆́гг҃лъ же и҆ прⷣте́ча, / бжⷭ҇твеннагѡ воплоще́нїѧ крⷭ҇ти́тель, / и҆ сщ҃е́нникъ, и҆ мч҃никъ вѣ́ренъ: / проповѣ́дникъ же сꙋ́щымъ во а҆́дѣ ты̀ бы́лъ є҆сѝ, / и҆ дѣ́вствꙋющымъ пра́вило, и҆ пꙋсты́ни прозѧбе́нїе."
 },
 {
  "type": "TEXT",
  "value": "Д ꙋшѝ невѣ́рїе ѡ҆блича́етсѧ, сщ҃еннодѣ́йственныѧ рꙋкѝ ᲂу҆мерщвле́нныѧ чꙋдесе́мъ: / прозѧ́бшей же па́ки вѣ́рѣ, и҆ твое́й ꙗ҆́вльшейсѧ главѣ̀, блаже́нне, / поже́ртаѧ дла́нь ѡ҆бновлѧ́етсѧ."
 },
 {
  "type": "TEXT",
  "value": "Т воѐ ꙗ҆вле́нїе провозвѣща́юще зри́телю, / возвѣща́хꙋ а҆́гг҃льстїи чи́ни нело́жнѡ, / гаврїи́ла подо́бѧщесѧ бжⷭ҇твенномꙋ бл҃говѣ́щенїю, / є҆́же пре́жде рождества̀ твоегѡ̀, свѧще́нный заха́рїа прїе́млетъ."
 },
 {
  "type": "TEXT",
  "value": "Бг҃оро́диченъ: Страсте́й и҆сцѣлє́нїѧ да почерпа́емъ, въ сла́вный хра́мъ прⷣте́чевъ притека́юще: / въ то́й бо прихо́дѧтъ а҆́гг҃льстїи ли́цы, / дꙋ́си же пра́ведныхъ всѣ́хъ, / влⷣчца съ крⷭ҇ти́телемъ і҆ѡа́нномъ, и҆сцѣлє́нїѧ подава́юще."
 },
 {
  "type": "TEXT",
  "value": "Катава́сїа: Всѧ́къ земноро́дный / да взыгра́етсѧ дх҃омъ просвѣща́емь, / да торжествꙋ́етъ же безпло́тныхъ ᲂу҆мѡ́въ є҆стество̀, / почита́ющее сщ҃е́нное торжество̀ бг҃омт҃ре, / и҆ да вопїе́тъ: / ра́дꙋйсѧ всебл҃же́ннаѧ, / бцⷣе чⷭ҇таѧ приснодв҃о."
 },
 {
  "type": "HEADER",
  "value": "Свѣти́ленъ. Подо́бенъ: Оу҆ченикѡ́мъ:"
 },
 {
  "type": "TEXT",
  "value": "С вѣтоѧвле́ннаѧ возсїѧ̀ честна́ѧ твоѧ̀ глава̀ ѿ незаходи́мыхъ нѣ́дръ земны́хъ, прⷣте́че і҆ѡа́нне, / свѣти́льниче свѣ́та невеще́ственнагѡ: / є҆ѧ́же ѡ҆брѣ́тенїе любо́вїю соверша́юще мо́лимъ тѧ̀, / лю́тыхъ ѡ҆брѣстѝ разрѣше́нїе, и҆ вре́мѧ ᲂу҆до́бнѣ соверши́ти воздержа́нїѧ, / моли́твами твои́ми, всехва́льне крⷭ҇ти́телю сп҃совъ. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Оу҆тѣша́етсѧ, всечⷭ҇таѧ, вѣ́рныхъ бг҃омꙋ́дрое собра́нїе слꙋжа́щее, / и҆ вѣ́рнѡ воспѣва́ющее тѧ̀ бцⷣꙋ и҆́стиннѡ. / тѣ́мже моли́твами твои́ми поста̀ тече́нїе да́ждь на́мъ соверши́ти бг҃олѣ́пнѡ, / и҆ крⷭ҇тꙋ̀ честно́мꙋ поклони́тисѧ, и҆ стрⷭ҇те́мъ спаси́тєльнымъ сн҃а и҆ бг҃а твоегѡ̀."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Ѿ ве́рзе преддвє́рїѧ воздержа́нїѧ / всечⷭ҇тна́ѧ глава̀ твоѧ̀, всехва́льне, / и҆ пи́щꙋ предложѝ сладча́йшꙋю всѣ̑мъ бж҃е́ственныхъ дарова́нїй: / и҆̀хже причаща́ющесѧ вѣ́рнѡ, / поста̀ те́рпкое ᲂу҆слажда́емъ, / и҆ вѣ́рою восхвалѧ́емъ тѧ̀, / и҆ вопїе́мъ хрⷭ҇тꙋ̀ бг҃ꙋ: / і҆и҃се всеси́льне, сп҃се дꙋ́шъ на́шихъ. [Два́жды.]"
 },
 {
  "type": "TEXT",
  "value": "М ѵ́ра ꙗ҆́коже во́ды, / глава̀ и҆ска́пающи прⷣте́чева приснотекꙋ́щаѧ, / и҆ на трапе́зѣ дне́сь возло́жшисѧ та́йнѣй и҆ бжⷭ҇твеннѣй, / благоꙋха́етъ мы́сленнѣ / и҆ го́ресть ѿгонѧ́етъ скорбе́й, / и҆ весе́лїѧ всѧ̑ и҆сполнѧ́етъ, любо́вїю зовꙋ́щыѧ: / і҆и҃се всеси́льне, сп҃се дꙋ́шъ на́шихъ."
 },
 {
  "type": "TEXT",
  "value": "П осѣчѐ глава̀ твоѧ̀, ꙗ҆́коже ме́чь ѻ҆стрѣ́йшїй, / главы̑ беззако́ннꙋющихъ вра̑гъ: / и҆ и҆сцѣле́нїѧ и҆сточѝ въ благозако́нїи сꙋ́щымъ всѣ̑мъ, / бжⷭ҇твенныхъ дарова́нїй. / и҆ сегѡ̀ ра́ди тѧ̀ вѣ́рнѡ восхвалѧ́емъ, / дрꙋ́га и҆ прⷣте́чꙋ, і҆ѡа́нне, зижди́телева, / и҆ вопїе́мъ є҆мꙋ̀ прилѣ́жнѡ: / і҆и҃се всеси́льне, сп҃се дꙋ́шъ на́шихъ."
 },
 {
  "type": "TEXT",
  "value": "Сла́ва, гла́съ ѕ҃: Всечестнꙋ́ю главꙋ̀ крⷭ҇ти́телѧ твоегѡ̀ гдⷭ҇и, / ꙗ҆́вльшꙋюсѧ дне́сь ѿ землѝ, / со гла́сомъ хвале́нїѧ прїе́мшїи вѣ́рнѡ, / въ моли́твꙋ, чл҃вѣколю́бче, грѣ́шнїи рабѝ твоѝ приводѧ́ще, мо́лимсѧ, / тоѧ̀ ра́ди ᲂу҆лꙋчи́ти въ де́нь сꙋда̀ ѿ тебє̀ ѡ҆чище́нїе, и҆ ве́лїю ми́лость."
 },
 {
  "type": "HEADER",
  "value": "И҆ ны́нѣ, бг҃оро́диченъ: Бл҃голюби́вый бж҃е и҆ сп҃се, / рабы̑ твоѧ̑ спаса́й ѿ всѧ́кагѡ ѡ҆бстоѧ́нїѧ лю́тагѡ, / моли́твами прⷣте́чи твоегѡ̀ и҆ всѣ́хъ ст҃ы́хъ, / и҆ мт҃ре твоеѧ̀ мольба́ми."
 },
 {
  "type": "TEXT",
  "value": "Славосло́вїе вели́кое, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и."
 },
 {
  "type": "TEXT",
  "value": "Бл҃жє́нна ѿ канѡ́на, пѣ́снь г҃-ѧ на д҃: и҆ ѕ҃-ѧ на д҃."
 },
 {
  "type": "HEADER",
  "value": "Тропа́рь прⷣте́чи, гла́съ д҃:"
 },
 {
  "type": "TEXT",
  "value": "Ѿ землѝ возсїѧ́вши прⷣте́чева глава̀, / лꙋчы̀ и҆спꙋща́етъ нетлѣ́нїѧ, вѣ̑рнымъ и҆сцѣле́нїй: / свы́ше собира́етъ мно́жество а҆́гг҃лъ, / до́лѣ же созыва́етъ человѣ́ческїй ро́дъ, / є҆диногла́снꙋю возсыла́ти сла́вꙋ хрⷭ҇тꙋ̀ бг҃ꙋ."
 },
 {
  "type": "HEADER",
  "value": "Конда́къ прⷣте́чи, гла́съ в҃. Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "П рⷪ҇ро́че бж҃їй, и҆ прⷣте́че бл҃года́ти, / главꙋ̀ твою̀ ꙗ҆́кѡ шипо́къ свѧще́ннѣйшїй ѿ землѝ ѡ҆брѣ́тше, / и҆сцѣлє́нїѧ всегда̀ прїе́млемъ: / и҆́бо па́ки ꙗ҆́коже пре́жде въ мі́рѣ проповѣ́дꙋеши покаѧ́нїе."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "В озвесели́тсѧ пра́ведникъ ѡ҆ гдⷭ҇ѣ, / и҆ ᲂу҆пова́етъ на него̀. Сті́хъ: Оу҆слы́ши бж҃е, гла́съ мо́й, внегда̀ моли́тимисѧ къ тебѣ̀."
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рѻ҃ѕ."
 },
 {
  "type": "TEXT",
  "value": "Б ра́тїе, бг҃ъ рекі́й и҆з̾ тмы̀ свѣ́тꙋ возсїѧ́ти, и҆́же возсїѧ̀ въ срⷣца́хъ на́шихъ, къ просвѣще́нїю ра́зꙋма сла́вы бж҃їѧ, ѡ҆ лицѣ̀ і҆и҃съ хрⷭ҇то́вѣ. и҆́мамы же сокро́вище сїѐ въ скꙋде́льныхъ сосꙋ́дѣхъ, да премно́жество си́лы бꙋ́детъ бж҃їѧ, а҆ не ѿ на́съ. во все́мъ скорбѧ́ще, но не стꙋжа́юще сѝ: не ча́еми, но не ѿчаѧва́еми: гони́ми, но не ѡ҆ставлѧ́еми: низлага́еми, но не погиба́юще. всегда̀ ме́ртвость гдⷭ҇а і҆и҃са въ тѣ́лѣ носѧ́ще, да и҆ живо́тъ і҆и҃совъ въ тѣ́лѣ на́шемъ ꙗ҆ви́тсѧ. при́снѡ бо мы̀ живі́и въ сме́рть предае́мсѧ і҆и҃са ра́ди, да и҆ живо́тъ і҆и҃совъ ꙗ҆ви́тсѧ въ ме́ртвеннѣй пло́ти на́шей. тѣ́мже сме́рть ᲂу҆́бѡ въ на́съ дѣ́йствꙋетъ, а҆ живо́тъ въ ва́съ. и҆мꙋ́ще же то́йже дх҃ъ вѣ́ры, по пи́санномꙋ: вѣ́ровахъ, тѣ́мже возглаго́лахъ, и҆ мы̀ вѣ́рꙋемъ, тѣ́мже и҆ глаго́лемъ: вѣ́дѧще, ꙗ҆́кѡ воздви́гїй гдⷭ҇а і҆и҃са, и҆ на́съ со і҆и҃сомъ воздви́гнетъ, и҆ предпоста́витъ съ ва́ми. всѧ̑ бо ва́съ ра́ди, да благода́ть ᲂу҆мно́жившаѧсѧ, мно́жайшими бл҃годаре́нїи и҆збы́точествитъ въ сла́вꙋ бж҃їю."
 },
 {
  "type": "HEADER",
  "value": "А҆ллилꙋ́їа, гла́съ д҃."
 },
 {
  "type": "TEXT",
  "value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: И҆́стина ѿ землѝ возсїѧ̀, и҆ пра́вда съ нб҃сѐ прини́че."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло м҃."
 },
 {
  "type": "TEXT",
  "value": "В о вре́мѧ ѻ҆́но, слы́шавъ і҆ѡа́ннъ во ᲂу҆зи́лищи дѣла̀ хрⷭ҇то́ва, посла̀ два̀ ѿ ᲂу҆ч҃ни̑къ свои́хъ, речѐ є҆мꙋ̀: ты́ ли є҆сѝ грѧды́й, и҆лѝ и҆но́гѡ ча́емъ; и҆ ѿвѣща́въ і҆и҃съ речѐ и҆̀мъ: ше́дша возвѣсти́та і҆ѡа́ннови, ꙗ҆̀же слы́шита и҆ ви́дита. слѣпі́и прозира́ютъ, и҆ хро́мїи хо́дѧтъ: прокаже́ннїи ѡ҆чища́ютсѧ, и҆ глꙋсі́и слы́шатъ: ме́ртвїи востаю́тъ, и҆ ни́щїи благовѣствꙋ́ютъ. и҆ блаже́нъ є҆́сть, и҆́же а҆́ще не соблазни́тсѧ ѡ҆ мнѣ̀. тѣ́ма же и҆сходѧ́щема, нача́тъ і҆и҃съ наро́дѡмъ глаго́лати ѡ҆ і҆ѡа́ннѣ: чесѡ̀ и҆зыдо́сте въ пꙋсты́ню ви́дѣти; тро́сть ли вѣ́тромъ коле́блемꙋ; но чесѡ̀ и҆зыдо́сте ви́дѣти; человѣ́ка ли въ мѧ́кки ри̑зы ѡ҆блече́нна; сѐ и҆̀же мѧ̑ккаѧ носѧ́щїи, въ домѣ́хъ црⷭ҇кихъ сꙋ́ть. но чесѡ̀ и҆зыдо́сте ви́дѣти; проро́ка ли; є҆́й глаго́лю ва́мъ, и҆ ли́шше проро́ка. се́й бо є҆́сть, ѡ҆ не́мже є҆́сть пи́сано: сѐ а҆́зъ посыла́ю а҆́гг҃ла моего̀ предъ лице́мъ твои́мъ, и҆́же ᲂу҆гото́витъ пꙋ́ть тво́й пред̾ тобо́ю. а҆ми́нь глаго́лю ва́мъ, не воста̀ въ рожде́нныхъ жена́ми бо́лїй і҆ѡа́нна крⷭ҇ти́телѧ: мні́й же во црⷭ҇твїи нбⷭ҇нѣмъ, бо́лїй є҆гѡ̀ є҆́сть. ѿ дне́й же і҆ѡа́нна крⷭ҇ти́телѧ досе́лѣ, црⷭ҇твїе нбⷭ҇ное нꙋ́дитсѧ, и҆ нꙋ́ждницы восхища́ютъ є҆̀. вси́ бо проро́цы и҆ зако́нъ до і҆ѡа́нна прореко́ша. и҆ а҆́ще хо́щете прїѧ́ти, то́й є҆́сть и҆лїа̀ хотѧ́й прїитѝ. и҆мѣ́ѧй ᲂу҆́ши слы́шати, да слы́шитъ."
 },
 {
  "type": "HEADER",
  "value": "Прича́стенъ:"
 },
 {
  "type": "TEXT",
  "value": "В ъ па́мѧть вѣ́чнꙋю бꙋ́детъ првⷣникъ: / ѿ слꙋ́ха ѕла̀ не ᲂу҆бои́тсѧ. / А҆ ллилꙋ́їа, три́жды."
 }
]