[
 {
  "type": "HEADER",
  "value": "І҆аннꙋа́рїа д҃"
 },
 {
  "type": "HEADER",
  "value": "И҆́же во свѧты́хъ ѻ҆тца̀ на́шегѡ є҆ѵста́ѳїа а҆рхїепі́скопа се́рбскагѡ."
 },
 {
  "type": "HEADER",
  "value": "На вели́цѣй вече́рни, стїхологисꙋ́емъ, Блаже́нъ мꙋ́жъ: а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ, поста́вимъ стїхи́ръ ѕ҃, гла́съ ѕ҃."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Всего̀ себѐ сама́го прине́сши бг҃ꙋ, небе́сное сокро́вище себѣ̀ ѡ҆брѣ́лъ є҆сѝ: земна̑ѧ ѡ҆ста́вивъ, небе́сный свѣ́тъ возжелѣ́лъ є҆сѝ, є҆мꙋ́же и҆ ᲂу҆гото́васѧ ѻ҆би́тель въ тебѣ̀ ѻ҆́тче є҆ѵста́ѳїе, сотвори́всѧ хрⷭ҇тꙋ̀ со ѻ҆ц҃е́мъ и҆ дх҃омъ ст҃ы́мъ жили́ще: тѣ́мже со а҆́гг҃лы предстоѧ̀ трⷪ҇цѣ, є҆́й же со дерзнове́нїемъ моли́сѧ ѡ҆ дꙋша́хъ на́шихъ. Два́жды."
 },
 {
  "type": "TEXT",
  "value": "Всѣ́хъ мїрски́хъ ѿре́ксѧ блаже́нне, дꙋхо́внымъ прилѣпи́лсѧ є҆сѝ, плотска̑ѧ бо и҆гра̑нїѧ и҆ земны̑ѧ по́хѡти посто́мъ и҆ всено́щнымъ бдѣ́нїемъ покори́въ: моли́твами же и҆ слеза́ми ꙗ҆̀же посѣ́ѧвъ, съ весе́лїемъ пожа́лъ є҆сѝ: тѣ́мже просла́вльшаго свѧтꙋ́ю па́мѧть твою̀, хрⷭ҇та̀ бг҃а со дерзнове́нїемъ молѝ ѡ҆ дꙋша́хъ на́шихъ. Два́жды."
 },
 {
  "type": "TEXT",
  "value": "Всѧ̀ воспрїѧ́лъ є҆сѝ преѡсвѧще́нне ᲂу҆го́дниче гдⷭ҇ень: всю́дꙋ бо разда́лъ є҆сѝ ста́дꙋ твоемꙋ̀ бж҃е́ственнаѧ сла́дости ᲂу҆че́нїѧ, и҆́миже наслажда́ешисѧ, ᲂу҆твержда́емь и҆ ѡ҆гражда́емь ѿ вра́жїѧ собла́зни и҆ молвы̀: тѣ́мже хрⷭ҇та̀ прославлѧ́емъ, да́вшаго тебѣ̀ таковꙋ́ю благода́ть, є҆го́же со дерзнове́нїемъ молѝ ѡ҆ дꙋша́хъ на́шихъ. Два́жды."
 },
 {
  "type": "HEADER",
  "value": "Сла́ва, гла́съ ѕ҃."
 },
 {
  "type": "TEXT",
  "value": "На высотꙋ̀ добродѣ́телей небе́сныхъ восте́клъ є҆сѝ, велегла́снѡ всѣ́хъ притека́ющихъ къ тебѣ̀ наꙋчи́лъ є҆сѝ небе́снаѧ мꙋ́дроствовати, земны́хъ же попече́нїй и҆ плотски́хъ похоте́й дале́че ᲂу҆клонѧ́тисѧ: тѣ́мже ꙗ҆́кѡ фі́нїѯъ процвѣ́лъ є҆сѝ въ до́мꙋ гдⷭ҇ни и҆ ꙗ҆́кѡ крі́нъ благоꙋха́еши, небе́сныѧ красоты̀ наслажда́ѧсѧ: сегѡ̀ ра́ди, ѡ҆ всече́стне є҆ѵста́ѳїе, непреста́ннѡ молѝ хрⷭ҇та̀ да спасе́тъ дꙋ́ши на́шѧ."
 },
 {
  "type": "HEADER",
  "value": "И҆ ны́нѣ, предпра́зднства."
 },
 {
  "type": "HEADER",
  "value": "Вхо́дъ, прокі́менъ днѐ и҆ чте́нїѧ трѝ."
 },
 {
  "type": "HEADER",
  "value": "На стїхо́внѣ стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Всехва́льнїи мꙋ́чєницы:"
 },
 {
  "type": "TEXT",
  "value": "Ѻ҆́тче є҆ѵста́ѳїе, твоѝ ᲂу҆стнѣ̀ бы́ста рѣ́ки дꙋхо́вныѧ точа́щи, напаѧ́ющыѧ вѣ́рою и҆зсо́хшаѧ се́рдца: и҆зыма́ѧ и҆ на пꙋ́ть и҆́стины наставлѧ́ѧ заблꙋ́ждшихъ бж҃е́ственнымъ ᲂу҆че́нїемъ, всѣ́хъ приве́лъ є҆сѝ въ позна́нїе є҆диносꙋ́щныѧ трⷪ҇цы, є҆́й же моли́сѧ ѡ҆ дꙋша́хъ на́шихъ."
 },
 {
  "type": "TEXT",
  "value": "Сті́хъ: Оу҆ста̀ моѧ̑ возглаго́лютъ премꙋ́дрость:"
 },
 {
  "type": "TEXT",
  "value": "Ѻ҆́тче є҆ѵста́ѳїе, не да́лъ є҆сѝ сна̀ ѻ҆чесє́мъ, ни вѣ́ждома свои́ма дрема́нїѧ, до́ндеже дꙋ́шꙋ и҆ тѣ́ло своѐ ѿ по́хоти свободи́лъ є҆сѝ, слеза́ми ѡ҆блива́ѧсѧ: тѣ́мже моли́сѧ хрⷭ҇тꙋ̀ бг҃ꙋ, дарова́ти дꙋша́мъ на́шымъ ми́ръ и҆ ве́лїю ми́лость."
 },
 {
  "type": "TEXT",
  "value": "Сті́хъ: Оу҆ста̀ пра́веднагѡ поꙋча́тсѧ:"
 },
 {
  "type": "TEXT",
  "value": "Ѻ҆́тче є҆ѵста́ѳїе, нача́льникъ свѧти́телємъ сподо́билсѧ є҆сѝ бы́ти, и҆ ꙗ҆́кѡ первопресто́льникъ неѕлоби́въ, са́маго себѐ въ непоро́чнꙋ же́ртвꙋ прине́слъ є҆сѝ хрⷭ҇тꙋ̀, є҆го́же молѝ дарова́ти дꙋша́мъ на́шымъ ми́ръ и҆ ве́лїю ми́лость."
 },
 {
  "type": "HEADER",
  "value": "Сла́ва, гла́съ д҃."
 },
 {
  "type": "TEXT",
  "value": "Па́мѧть твоѧ̀ є҆ѵста́ѳїе і҆ера́рше гдⷭ҇ень, па́че со́лнечнагѡ сїѧ́нїѧ, ѡ҆зарѧ́ющи ста́дꙋ твоемꙋ̀ сердца̀ и҆ просвѣща́ющи мы́сли: и҆́бо вои́стиннꙋ ра́ка боже́ственныхъ моще́й твои́хъ, ꙗ҆́кѡ трꙋба̀ велегла́сна свидѣ́тельствꙋетъ сїѐ, ѡ҆благоꙋха́ющи ны̀ дарова́нїемъ бж҃е́ственнагѡ дх҃а, прогонѧ́етъ грѣхо́внꙋю тмꙋ̀ и҆ наꙋча́етъ на́съ благодари́ти и҆ сла́вити хрⷭ҇та̀ гдⷭ҇а, тѧ̀ просла́вльшаго вѣ́чною сла́вою."
 },
 {
  "type": "HEADER",
  "value": "И҆ ны́нѣ, предпра́зднства."
 },
 {
  "type": "HEADER",
  "value": "Тропа́рь, гла́съ д҃."
 },
 {
  "type": "TEXT",
  "value": "И҆збра́нъ ѿ бг҃а, возлю́бленъ ѿ люде́й, а҆рхїере́ѡвъ бж҃е́ственнаѧ красото̀, ѻ҆́тче є҆ѵста́ѳїе, а҆́гг҃лѡвъ сослꙋжи́телю, та́инъ же бж҃е́ственныхъ проповѣ́датель бы́лъ є҆сѝ: тѣ́мже молѝ хрⷭ҇та̀ бг҃а со всѣ́ми свѧты́ми, и҆зба́витисѧ ѿ всѧ́кихъ ѕѡ́лъ, моли́твами твои́ми блаже́нне, и҆ спасти́сѧ на́мъ чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь, тропа́рь предпра́зднства, два́жды."
 },
 {
  "type": "HEADER",
  "value": "Сла́ва, свѧта́гѡ, и҆ ны́нѣ, предпра́зднства."
 },
 {
  "type": "HEADER",
  "value": "По пе́рвой стїхоло́гїи, сѣда́ленъ гла́съ д҃."
 },
 {
  "type": "TEXT",
  "value": "Подо́бенъ: Ско́ро предварѝ:"
 },
 {
  "type": "TEXT",
  "value": "Сѐ приспѣ̀ свѣ́тлаѧ па́мѧть и҆ торжество̀ свѧти́телѧ хрⷭ҇то́ва є҆ѵста́ѳїа: сегѡ̀ ра́ди прїиди́те соше́дшесѧ да пра́зднꙋемъ свѣ́тлѡ, и҆ соста́вльше ли́ки похвали́мъ є҆го̀ вопїѧ̀: ра́дꙋйсѧ честны́й свѣти́льниче землѝ се́рбскїѧ, красото̀ є҆ѧ̀ и҆ сла́во: то́чиши бо чꙋдеса̀ и҆ и҆злива́еши и҆сцѣле́нїѧ, молѧ́сѧ непреста́ннѡ ѡ҆ дꙋша́хъ на́шихъ."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "По второ́й стїхоло́гїи, сѣда́ленъ гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ дѣ́вства:"
 },
 {
  "type": "TEXT",
  "value": "Красотѣ̀ дѣ́вственныѧ и҆ пресвѣ́тлыѧ добро́ты твоеѧ̀, чи́ны а҆́гг҃льстїи зрѧ́ще ᲂу҆диви́шасѧ и҆ глаго́лаша: ка́кѡ во пло́ти сы́й безпло́тнаго врага̀ побѣди́лъ є҆сѝ, что́ же нарече́мъ и҆ мы̀ ча̑да твоѧ̑; а҆́ще и҆ недоꙋмѣ́емъ, ѻ҆ба́че вопїе́мъ тѝ: ра́дꙋйсѧ є҆ѵста́ѳїе ѻ҆́тче преѡсвѧще́нне, свѧти́телемъ похвало̀."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "По полѷеле́и, сѣда́ленъ, гла́съ и҃."
 },
 {
  "type": "TEXT",
  "value": "Премꙋ́дрость вы́шнюю вѣ́даѧ, а҆́гг҃льскомꙋ житїю̀ подража́тель бы́лъ є҆сѝ, всѣ́хъ послꙋ́шающихъ тѧ̀ приве́дъ къ спасе́нїю блаже́нне є҆ѵста́ѳїе. Терпѣ́нїю бо чи́нъ є҆сѝ и҆ кро́тости ᲂу҆дивле́нїе, и҆́нокѡмъ ѻ҆́бразъ и҆ ю҆́нымъ наста́вникъ, ста̑рымъ же крѣ́пость: тѣ́мже и҆ мы̀ соше́дшесѧ, свѧтꙋ́ю па́мѧть твою̀ по до́лгꙋ восхвалѧ́емъ и҆ согла́снѡ вопїе́мъ тѝ глаго́люще: молѝ хрⷭ҇та̀ бг҃а спасти́сѧ всѣ̑мъ на́мъ."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "Степе́нна, а҃-й а҆нтїфѡ́нъ, д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Оу҆ста̀ моѧ̑ возглаго́лютъ премꙋ́дрость и҆ поꙋче́нїе сердца̀ моегѡ̀ ра́зꙋмъ."
 },
 {
  "type": "TEXT",
  "value": "Сті́хъ: Оу҆ста̀ пра́веднагѡ поꙋча́тсѧ премꙋ́дрости и҆ ѧ҆зы́къ є҆гѡ̀ возглаго́летъ сꙋ́дъ."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло л҃є."
 },
 {
  "type": "HEADER",
  "value": "По н҃ ѱалмѣ̀ стїхи́ра, гла́съ ѕ҃."
 },
 {
  "type": "TEXT",
  "value": "И҆злїѧ́сѧ благода́ть во ᲂу҆стна́хъ твои́хъ преподо́бне ѻ҆́тче, и҆ бы́лъ є҆сѝ па́стырь хрⷭ҇то́вы це́ркве, ᲂу҆ча̀ слове́сныѧ ѻ҆́вцы, вѣ́ровати въ трⷪ҇цꙋ є҆диносꙋ́щнꙋю во є҆ди́номъ бж҃ествѣ̀."
 },
 {
  "type": "HEADER",
  "value": "Канѡ́нъ предпра́зднствꙋ со і҆рмосо́мъ на ѕ҃, и҆ свѧта́гѡ на и҃, гла́съ г҃, є҆го́же краегране́сїе:"
 },
 {
  "type": "TEXT",
  "value": "Благостоѧ́нїю тезоимени́тагѡ є҆ѵста́ѳїа пѣ́снми почтꙋ̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀: лю́демъ пѣшемореходѧ́щымъ и҆ бг҃оꙋго́днѡ пою́щымъ, пои́мъ гдⷭ҇е́ви, сла́внѡ бо просла́висѧ."
 },
 {
  "type": "TEXT",
  "value": "Премꙋ́дрость бж҃їѧ всемо́щнаѧ, все́лшисѧ въ тѧ̀ ѻ҆́тче, ѿ пеле́нъ назна́мена тѧ̀ благода́тїю дꙋхо́вною и҆ наставлѧ́ѧ: тѣ́мже всѣ́хъ и҆справлѧ́еши и҆ наꙋча́еши пѣ́ти си́це: пои́мъ гдⷭ҇еви, сла́вно бо просла́висѧ."
 },
 {
  "type": "TEXT",
  "value": "Крѣпи́тесѧ и҆ мꙋжа́йтесѧ проти́вꙋ неви́димыхъ бра́ней вра́жїихъ, гдⷭ҇нею по́мощїю ᲂу҆твержда́ѧсѧ и҆ глаго́лѧ: гдⷭ҇еви пои́мъ сла́вно бо̀ просла́висѧ."
 },
 {
  "type": "TEXT",
  "value": "Ра́зꙋмъ воспрїе́мше небе́сный, весели́тесѧ земноро́днїи, процвѣте́ бо цвѣ́тъ ѿ земна́гѡ ко́рене, свѣтѧ́щꙋ бг҃осїѧ́нномꙋ свѣ́тꙋ и҆ бг҃оꙋго́дно взыва́юще, рце́мъ: пои́мъ гдⷭ҇еви, сла́вно бо просла́висѧ."
 },
 {
  "type": "TEXT",
  "value": "Бг҃оро́диченъ: И҆зъ чре́ва пре́жде денни́цы рожде́нное ѿ ѻ҆́тца превѣ́чное сло́во бж҃їе, возсїѧ̀ на́мъ и҆зъ тебѐ браконеискꙋ́снаѧ и҆ роди́сѧ бцⷣе, наꙋча́ѧ ст҃ы̑ѧ своѧ̑ воспѣва́ти: гдⷭ҇а по́йте дѣла̀ и҆ превозноси́те во всѧ̑ вѣ́ки."
 },
 {
  "type": "HEADER",
  "value": "Катава́сїа по ᲂу҆ста́вꙋ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ чⷭ҇тно́ю твое́ю кро́вїю."
 },
 {
  "type": "TEXT",
  "value": "Пе́рвенца показа̀ тѧ̀ гдⷭ҇ь ста́дꙋ своемꙋ̀ пе́рвенствовати, преѡсвѧще́нна а҆рхїере́а, є҆́же стѧжа̀ свое́ю кро́вїю."
 },
 {
  "type": "TEXT",
  "value": "Малоꙋ́мнымъ па́ки возвраща́ѧ ѕѣ́лныѧ по́мысли, ко и҆справле́нїю ꙗ҆ви́ тѧ гдⷭ҇ь преѡсвѧще́нне ѻ҆́тче є҆ѵста́ѳїе."
 },
 {
  "type": "TEXT",
  "value": "Землѝ вѣ́рныхъ свои́хъ ꙗ҆ви́ тѧ бг҃ъ сло́во ко и҆справле́нїю благоче́стныхъ дѣѧ́нїй, свѧти́телю преблаже́нне."
 },
 {
  "type": "TEXT",
  "value": "Бг҃оро́диченъ: И҆зъ дв҃и́ческагѡ чре́ва, ꙗ҆ви́лсѧ є҆сѝ со́лнце пра́ведное, ѡ҆зарѧ́ѧй земны́хъ чꙋ́вствїѧ и҆ наставлѧ́ѧй вои́стиннꙋ къ позна́нїю своегѡ̀ бж҃ества̀."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Повелѣ́нное та́йнѣ, бж҃е́ственнаѧ прїе́мь въ ра́зꙋмѣ свое́мъ, покро́въ возжделѣ́лъ є҆сѝ небе́снагѡ житїѧ̀, ско́ро прїи́де взе́мый кре́стъ на ра́мо глаго́лалъ є҆сѝ непреста́ннѡ всѣ̑мъ: преклони́вый схожде́нїемъ небеса̀ и҆ пло́ть взе́мь ѿ дв҃ы, всѣ́хъ велегла́снѡ зове́тъ спасти́сѧ, вопи́ти же и҆ глаго́лати: сла́ва неизрече́ннѣй твое́й ми́лости, є҆ди́не преми́лостиве."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Покры́ла є҆́сть небеса̀ добродѣ́тель твоѧ̀ хрⷭ҇тѐ, и҆зъ кївѡ́та бо проше́дъ свѧты́ни твоеѧ̀ нетлѣ́нныѧ ма́тере. Въ хра́мѣ сла́вы твоеѧ̀ ꙗ҆ви́лсѧ є҆сѝ ꙗ҆́кѡ младе́нецъ рꙋконоси́мь и҆ и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "Ꙗ҆́кѡ свѧще́нный неизрече́нныхъ бла̑гъ спасе́нїѧ слꙋжи́тель, ве́селѡ во свѧтѣ́й це́ркви слꙋжи́лъ є҆сѝ, моли́твами и҆ слеза́ми прилѣ́жнѡ просїѧ́лъ є҆сѝ, всѣ̑мъ просѧ̀ ѡ҆ставле́нїе грѣхѡ́въ и҆ дх҃одви́жнѡ ра́достїю вопїѧ́лъ є҆сѝ: гдⷭ҇и и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "На него́ же ᲂу҆пова́лъ є҆сѝ свѧти́телю, и҆з̾ мла́да бо во́зраста ра́дꙋѧсѧ же ꙗ҆́кѡ є҆ле́нь восте́клъ є҆сѝ, на го́рꙋ свѧтꙋ́ю, земна̑ѧ всѧ̑ въ мі́рѣ ѡ҆ста́вилъ є҆сѝ, прилѣпи́всѧ зако́нꙋ творца̀ и҆ влады́ки и҆сполне́нїемъ за́повѣди бж҃е́ственагѡ хотѣ́нїѧ, є҆мꙋ́же свѧти́телю ра́достнѡ вопїе́ши: и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "Ви́дѣлъ є҆сѝ свѧти́телю сло́во безнача́льное, пло́тїю къ на́мъ прише́дшее и҆ всѧ̑ человѣ́ки спа́сшее, са́мъ бо всѧ̑ мїрска̑ѧ ни во что́ же вмѣни́лъ є҆сѝ, ᲂу҆се́рднѡ вопїѧ̀ ко гдⷭ҇ꙋ, и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "Бг҃оро́диченъ: Ви́дѣти херꙋві́мѡмъ и҆ серафі́мѡмъ не возмо́жнѡ ѿ дв҃и́ческїѧ кро́ве пло́ть заи́мствовавшаго и҆ къ на́мъ прише́дшагѡ наꙋчи́ти всѣ́хъ съ любо́вїю вопи́ти є҆мꙋ̀: ст҃ъ є҆сѝ гдⷭ҇и."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ꙗ҆́кѡ ви́дѣ и҆са́їа ѡ҆бра́знѡ на прⷭ҇то́лѣ превознесе́нна бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща."
 },
 {
  "type": "TEXT",
  "value": "Свѧще́нный смы́слъ и҆зꙋча́ѧ, пло́ти ᲂу҆го́дїѧ и҆ похотѣ́нїѧ ᲂу҆да́лилъ є҆сѝ непреста́ннымъ рꙋ́къ твои́хъ воздѣѧ́нїемъ и҆ ча́стымъ колѣ́нъ преклоне́нїемъ ѻ҆́тче богомꙋ́дре, съ ра́достїю воспѣва́еши си́це: тебѐ люблю̀ і҆и҃се бж҃е мо́й свѣ́та невече́рнѧго и҆ мі́ромъ влады́чествꙋющаго."
 },
 {
  "type": "TEXT",
  "value": "Премꙋ́дрость бж҃їѧ, и҆збра́вшаѧ гони́телѧ па́ѵла въ сосꙋ́дъ себѣ̀, и҆зыма́ющаѧ ѿ землѝ ᲂу҆бо́га и҆ посажда́ѧ на престо́лѣ бога́тѣмъ, прови́дѧ и҆ тебѐ ст҃ы́й а҆рхїере́ю бж҃їй є҆ѵста́ѳїе и҆збра́лъ є҆́сть въ па́стырѧ и҆ наста́вника всѣ̑мъ лю́бѧщымъ хрⷭ҇та̀, свѣ́та невече́рнѧ и҆ мі́ромъ влады́чествꙋюща."
 },
 {
  "type": "TEXT",
  "value": "Ѡ҆чи́стивъ дꙋ́шꙋ и҆ тѣ́ло ѿ скве́рни, преподо́бна, пра́ведна и҆ неѕло́бива ᲂу҆чи́телѧ себѐ показа́лъ є҆сѝ ѻ҆́тче блаже́нне: си́рыхъ пита́тель, ѡ҆би́димыхъ помо́щникъ и҆ страннопрїи́мецъ бы́лъ є҆сѝ: тѣ́мже со дерзнове́нїемъ вопїе́ши, тебѐ люблю̀ і҆и҃се бж҃е мо́й, свѣ́та невече́рнѧго и҆ мі́ромъ влады́чествꙋюща."
 },
 {
  "type": "TEXT",
  "value": "Бг҃оро́диченъ: Безлѣ́тнаго въ лѣ́то родила̀ є҆сѝ браконеискꙋ́снаѧ, дѣ́вство и҆ рождество̀ сопрѧ́гши па́че ᲂу҆ма̀, да человѣ́ка ѡ҆божи́ши, па́че є҆стества̀ и҆ ра́зꙋма, свѣ́та невече́рнѧго и҆ мі́ромъ влады́чествꙋюща."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Возопѝ къ тебѣ̀ ви́дѣвъ ста́рецъ ѻ҆чи́ма сп҃се́нїе, є҆́же лю́демъ прїи́де ѿ бг҃а: хрⷭ҇тѐ, ты̀ бг҃ъ мо́й."
 },
 {
  "type": "TEXT",
  "value": "Сїѡ́на доше́лъ є҆сѝ блаже́нне, и҆ гро́бъ гдⷭ҇ень ᲂу҆се́рдною любо́вїю ѡ҆блобыза́въ, ѡ҆ ка́мень претыка́нїѧ ника́коже поткнꙋ́лсѧ є҆сѝ, благода́тїю бж҃їею сохранѧ́емь."
 },
 {
  "type": "TEXT",
  "value": "Сы́ны человѣ́ческїѧ сотворѧ́ѧ сына́ми бж҃їими, потща́лсѧ є҆сѝ блаже́нне покланѧ́тисѧ ст҃ѣ́й трⷪ҇цѣ, во є҆ди́номъ сꙋществѣ̀."
 },
 {
  "type": "TEXT",
  "value": "Бра́нь и҆ бꙋ́рѧ ѿ вселꙋка́вагѡ врага̀ воздвиза́етсѧ на ны̀ ча́дъ твои́хъ, но ꙗ҆́кѡ и҆мѣ́ѧ ко хрⷭ҇тꙋ̀ дерзнове́нїе, пода́ждь ста́дꙋ твоемꙋ̀ благостоѧ́нїе ꙗ҆́кѡ тезоимени́тъ."
 },
 {
  "type": "TEXT",
  "value": "Бг҃оро́диченъ: Безлѣ́тнаго во чре́вѣ прїе́мши бцⷣе, неизрече́ннѡ сн҃а є҆мманꙋ́ила чꙋ́днѡ воздои́ла є҆сѝ ѿ сосє́цъ твои́хъ во спасе́нїе всѣ̑мъ вѣ̑рнымъ."
 },
 {
  "type": "HEADER",
  "value": "Конда́къ, гла́съ ѕ҃."
 },
 {
  "type": "TEXT",
  "value": "Подо́бенъ: Є҆́же ѡ҆ на́съ:"
 },
 {
  "type": "TEXT",
  "value": "Свы́ше благода́ть прїе́мь ѿ бг҃а, во свѧти́тельское подо́бїе ѡ҆бле́клсѧ є҆сѝ и҆ ѿ ᲂу҆́стъ твои́хъ благоче́стнѡ всѣ́хъ наꙋчи́лъ є҆сѝ, покланѧ́тисѧ трⷪ҇цѣ є҆диносꙋ́щнѣй: тѣ́мже па́мѧть твою̀ чтꙋ́ще, прославлѧ́емъ бг҃а просла́вльшаго тѧ̀."
 },
 {
  "type": "TEXT",
  "value": "І҆́косъ: На престо́лѣ сла́вы сѣдѧ́щаго бг҃а возжелѣ́въ всеꙋсе́рднѡ, къ немꙋ̀ приве́лъ є҆сѝ вѣ́рное ста́до твоѐ и҆ процвѣ́лъ є҆сѝ въ домꙋ̀ гдⷭ҇ни ꙗ҆́кѡ фі́нїѯъ, ᲂу҆множа́ѧ и҆ возвыша́ѧ ꙗ҆́коже ке́дръ ча̑да твоѧ̑, кро́тостїю и҆ смире́нїемъ наꙋчи́въ и҆̀хъ воспѣва́ти и҆ сла́вити бг҃а просла́вльшаго тѧ̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Тебѐ во ѻ҆гнѝ ѡ҆роси́вшаго, ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, бл҃гоче́стнѡ пою́ще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "А҆враа́мли же́ртвы подража́въ ѻ҆́тче є҆ѵста́ѳїе, ꙗ҆́коже ѻ҆́нъ і҆саа́ка, та́кѡ ты̀ твою̀ дꙋ́шꙋ прине́слъ є҆сѝ хрⷭ҇тꙋ̀, въ же́ртвꙋ чи́стꙋ и҆ непоро́чнꙋ благоче́стнѡ воспѣва́ѧ: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Ро́да зе́мна и҆зба́вити, грѣхѝ сластолюби́выхъ ѡ҆чища́ѧ воздѣѧ́нїемъ рꙋ́къ, всено́щнымъ бдѣ́нїемъ, слеза́ми мно́гими, церко́вною слꙋ́жбою и҆ ча́стымъ воздыха́нїемъ просѧ̀ ѡ҆ ни́хъ гдⷭ҇а, є҆мꙋ́же благоче́стнѡ воспѣва́еши: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Гро́бъ тво́й нетлѣ́нна тѧ̀ соблю́лъ є҆́сть бж҃їимъ манове́нїемъ, ра́ди ᲂу҆твержде́нїѧ въ вѣ́рѣ ста́да твоегѡ̀: тѣ́мже ра́кꙋ твою̀ цѣлꙋ́юще зове́мъ: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Ѻ҆́тчею во́лею, ѡ҆сѣне́нїемъ дꙋ́ха свѧта́гѡ, прїѧ́ла є҆сѝ сы́на бж҃їѧ пречи́стаѧ, неизрече́ннѡ поне́сши є҆го̀ родила̀ є҆сѝ, є҆мꙋ́же вѣ́рнѡ вопїе́мъ: благослове́нъ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни, бж҃е́ственнꙋю пѣ́снь поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Лю́дїе твоѝ предзрѧ́ще тѧ̀ свѧще́нна, возлюби́ша твоегѡ̀ ᲂу҆ста́ва смире́нїе и҆ кро́тость и҆спо́лненнꙋю боже́ственнагѡ ᲂу҆че́нїѧ, ѿ медото́чныхъ ᲂу҆сте́нъ пѣ́сненнѡ вопїю́тъ: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Сѐ жи́знь и҆ свѣ́тъ всѣ̑мъ хрⷭ҇то́съ прибли́жисѧ, воздаѧ̀ комꙋ́ждо по дѣлѡ́мъ: нечести̑вымъ ѡ҆сꙋжде́нїе, благочести̑вымъ благода́ть и҆ сла́вꙋ, велегла́снѡ вопїѧ̀ є҆мꙋ̀: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "По ᲂу҆спе́нїи твое́мъ свѧще́нне ѻ҆́тче є҆ѵста́ѳїе, пресели́лсѧ є҆сѝ въ го́рнїй і҆ерⷭ҇ли́мъ, на́мъ же ѡ҆ста́вль мо́щи своѧ̑, тѣ́мже вопїе́мъ: благослови́те всѧ̑ дѣла̀ гдⷭ҇а."
 },
 {
  "type": "TEXT",
  "value": "Бг҃оро́диченъ: Сѐ дв҃а ꙗ҆́коже проро́къ глаго́лаше во чре́вѣ прїѧ̀ и҆ родѝ сн҃а є҆мманꙋ́ила, є҆́же є҆́сть съ на́ми бг҃ъ, на землѝ ꙗ҆ви́сѧ и҆ съ человѣ́ки поживѐ, є҆мꙋ́ же вѣ́рнїи вопїе́мъ: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Въ зако́нѣ сѣ́ни и҆ писа́нїй, ѡ҆́бразъ ви́димъ вѣ́рнїи: всѧ́къ мꙋ́жескїй по́лъ ложесна̀ разверза́ѧ, ст҃ъ бг҃ꙋ. Тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ."
 },
 {
  "type": "TEXT",
  "value": "Дре́вле разꙋмѣва́емѣй же́ртвѣ зако́номъ приносѧ́щейсѧ, ю҆́же бж҃їй а҆рхїере́й прино́ситъ, гдⷭ҇нѧ преда́нїѧ па́мѧтствꙋѧ, возно́ситъ хлѣ́бъ и҆ вїно̀ во ѡ҆ставле́нїе грѣхѡ́въ, всѣ̑мъ ꙗ҆́снѡ сказꙋ́етъ и҆сповѣ́данїе вѣ́ры во хрⷭ҇та̀ гдⷭ҇а."
 },
 {
  "type": "TEXT",
  "value": "Возда́ждь мѝ, бг҃ꙋ вопїѧ́ше свѧти́тель прича́стїѧ да́ра, є҆́же вопи́ти тебѣ̀ во ца́рствїи твое́мъ и҆ и҆спо́лнитисѧ мѝ твоегѡ̀ весе́лїѧ и҆ въ тебѣ̀ пребыва́ти: тѣ́мже хва́лѧще велича́емъ гдⷭ҇а."
 },
 {
  "type": "TEXT",
  "value": "Свѧще́ннаго проповѣ́дателѧ вои́стиннꙋ и҆ бж҃їѧ рачи́телѧ, грѧди́те ѡ҆бстоѧ́ще честнꙋ́ю ра́кꙋ на́шегѡ ᲂу҆чи́телѧ ᲂу҆се́рднѡ воспои́мъ благода́ть бж҃їю, ꙗ҆́же въ не́мъ пребыва́етъ, велича́юще гдⷭ҇а."
 },
 {
  "type": "TEXT",
  "value": "Бг҃оро́диченъ: Превы́ше ѻ҆бы́чаѧ неизрече́ннѡ дв҃о бцⷣе хрⷭ҇та̀ родила̀ є҆сѝ, є҆го́же ны́нѣ ᲂу҆молѝ и҆зба́витисѧ на́мъ ѿ нахожде́нїѧ пога́нныхъ а҆га́рѧнъ и҆ ѿ всѧ́кагѡ вре́да и҆ междоꙋсо́бныѧ бра́ни, да тѧ̀ непреста́ннѡ и҆́стиннꙋю бг҃ома́терь велича́емъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Свѧще́ннаѧ и҆ свѣтоно́снаѧ, па́че ᲂу҆ма̀ свѣтлѣ́йшаѧ, ѻ҆́тче є҆ѵста́ѳїе па́мѧть твоегѡ̀ ᲂу҆спе́нїѧ, ю҆́же свѣ́тлѡ пра́зднꙋемъ, возсїѧ̀ на́мъ дне́сь: сегѡ̀ ра́ди сла́вимъ просла́вльшаго тѧ̀ гдⷭ҇а да́вшаго тѝ благода́ть таковꙋ́ю, є҆́юже ѡ҆гражда́еши ста́до твоѐ."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства."
 },
 {
  "type": "HEADER",
  "value": "На хвали́техъ стїхи̑ры, гла́съ и҃, на д҃."
 },
 {
  "type": "TEXT",
  "value": "Ѻ҆́тче бг҃омꙋ́дре є҆ѵста́ѳїе, мы́сленное ѻ҆́ко на высотꙋ̀ ра́зꙋма впери́въ небе́сною мꙋ́дростїю наслади́лсѧ є҆сѝ, съ не́ю же пита́еши дꙋхѡ́внаѧ ча̑да твоѧ̑, соблюда́ѧ и҆̀хъ ѿ всѧ́кїѧ сѣ́ти: тѣ́мже непреста́й молѧ́сѧ свѧтѣ́й трⷪ҇цѣ спасти́сѧ на́мъ. Два́жды."
 },
 {
  "type": "TEXT",
  "value": "Ѻ҆́тче богомꙋ́дре є҆ѵста́ѳїе, ᲂу҆подо́билсѧ є҆сѝ кꙋпцꙋ̀ и҆́щꙋщемꙋ до́брагѡ би́сера, небе́сный же да́ръ въ се́рдцѣ твое́мъ стѧжа́лъ є҆сѝ, и҆ нелѣ́ностнѡ трꙋди́выйсѧ ѕѣ́льною ре́вностїю ѡ҆ ста́дѣ твое́мъ, є҆́же невреди́мѡ соблю́лъ є҆сѝ: тѣ́мже мо́лимсѧ тѝ, не преста́й моли́тисѧ хрⷭ҇тꙋ̀ да спасе́тъ дꙋ́ши на́шѧ."
 },
 {
  "type": "TEXT",
  "value": "Ѻ҆́тче богомꙋ́дре є҆ѵста́ѳїе, сладкоглаго́ливѣй ла́стовицѣ ᲂу҆подоблѧ́ѧсѧ, непреста́ннѡ ста́до твоѐ наꙋча́лъ є҆сѝ бж҃е́ственнымъ ᲂу҆че́нїѧмъ хрⷭ҇то́вымъ, є҆мꙋ́ же ꙗ҆́кѡ подвигополо́жникꙋ подо́бѧсѧ положи́лъ є҆сѝ дꙋ́шꙋ за ѻ҆́вцы своѧ̑: тѣ́мже ча̑да твоѧ̑ ᲂу҆се́рднѡ ѡ҆бстоѧ́ще ра́кꙋ мо́щей твои́хъ мо́лѧтсѧ тѝ, непреста́й моли́тисѧ ѡ҆ на́съ ко гдⷭ҇ꙋ."
 },
 {
  "type": "HEADER",
  "value": "Сла́ва, гла́съ ѕ҃."
 },
 {
  "type": "TEXT",
  "value": "Сѐ прїи́де весе́лое торжество̀ и҆ пресвѣ́тлаѧ па́мѧть бг҃оно́снагѡ ѻ҆тца̀! Ра́дꙋйсѧ и҆ красꙋ́йсѧ се́рбскаѧ митропо́лїе, ве́селѡ съ на́ми взыгра́й взыва́ѧ: ᲂу҆ѧсни́сѧ добро́та твоѧ̀ па́че лꙋны̀ по́лныѧ, сѐ бо свѧти́телей ве́рхъ, пресла́вный чꙋдотво́рецъ и҆ а҆рхїпа́стырь є҆ѵста́ѳїй, ѻ҆би́льнꙋю ча́шꙋ дꙋхо́внагѡ питїѧ̀ раздае́тъ всѣ̑мъ. Тѣ́мже ᲂу҆̀бо ѽ празднолю́бцы, вкꙋ́пѣ соше́дшесѧ пѣ́сненными похвала́ми ᲂу҆вѧзе́мъ є҆го̀, глаго́люще: ра́дꙋйсѧ, ᲂу҆чи́телю благі́й, положи́вый дꙋ́шꙋ за ѻ҆́вцы своѧ̑: ра́дꙋйсѧ, а҆пⷭ҇льскихъ преда́нїй и҆ правосла́вныѧ вѣ́ры и҆звѣ́стный храни́телю и҆ побо́рниче: ра́дꙋйсѧ, сто́лпе непоколеба́выйсѧ ѕлы́мъ богохꙋ́льныхъ є҆ретїкѡ́въ лжеꙋче́нїемъ. Ра́дꙋйсѧ, си́рыхъ и҆ вдо́въ пита́телю, радостотворѧ́й и҆ на́мъ жи́знь вѣ́чнꙋю, чтꙋ́щымъ любо́вїю свѧтꙋ́ю и҆ всечестнꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, предпра́зднства."
 },
 {
  "type": "HEADER",
  "value": "Славосло́вїе вели́кое. По трисвѧто́мъ, тропа́рь свѧта́гѡ, и҆ предпра́зднства. Є҆ктенїа̀, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, Блаже́нна пѣ́снь г҃-ѧ, и҆ ѕ҃-ѧ."
 },
 {
  "type": "TEXT",
  "value": "Прокі́менъ: Оу҆ста̀ моѧ̑ возглаго́лютъ премꙋ́дрость:"
 },
 {
  "type": "TEXT",
  "value": "Сті́хъ: Оу҆ста̀ пра́веднагѡ поꙋча́тсѧ:"
 },
 {
  "type": "HEADER",
  "value": "А҆по́столъ ко є҆вреє́мъ зача́ло ти҃і."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло л҃ѕ."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю:"
 }
]