[
 {
  "type": "HEADER",
  "value": "Мѣ́сѧца ма́рта въ к҃є-й де́нь. Бл҃говѣ́щенїе прест҃ы́ѧ влⷣчцы на́шеѧ бцⷣы, и҆ приснодв҃ы мр҃і́и."
 },
 {
  "type": "TEXT",
  "value": "ⷤ На вели́цѣй вече́рни ⷤ На ᲂу҆́трени ⷤ На лїтꙋргі́и"
 },
 {
  "type": "HEADER",
  "value": "На вели́цѣй вече́рни."
 },
 {
  "type": "TEXT",
  "value": "Начина́етсѧ ѿ четвертка̀ г҃-ѧ недѣ́ли ст҃ы́хъ постѡ́въ, и҆ восхо́дитъ до среды̀ свѣ́тлыѧ седми́цы."
 },
 {
  "type": "TEXT",
  "value": "И҆ а҆́ще є҆́сть по́стъ, начина́емъ вече́рню безъ каѳі́смы и҆ безъ покло́нѡвъ."
 },
 {
  "type": "TEXT",
  "value": "На Гдⷭ҇и, воззва́хъ, ста́вимъ стїхѡ́въ і҃, и҆ пое́мъ трїѡ́ди самогла́сенъ днѐ, два́жды: и҆ подѡ́бны г҃, и҆ пра́здника г҃, повторѧ́юще двѣ̀."
 },
 {
  "type": "HEADER",
  "value": "Гла́съ ѕ҃. Подо́бенъ: Всѐ ѿло́жше:"
 },
 {
  "type": "TEXT",
  "value": "С овѣ́тъ превѣ́чный / ѿкрыва́ѧ тебѣ̀ ѻ҆трокови́це, / гаврїи́лъ предста̀, тебѐ лобза́ѧ и҆ вѣща́ѧ: / ра́дꙋйсѧ, землѐ ненасѣ́ѧннаѧ: / ра́дꙋйсѧ, кꙋпино̀ неѡпали́маѧ: / ра́дꙋйсѧ, глꙋбино̀ неꙋдобозри́маѧ: / ра́дꙋйсѧ, мо́сте, къ нб҃сє́мъ преводѧ́й, / и҆ лѣ́ствице высо́каѧ, / ю҆́же і҆а́кѡвъ ви́дѣ: / ра́дꙋйсѧ, бжⷭ҇твеннаѧ ста́мно ма́нны: / ра́дꙋйсѧ, разрѣше́нїе клѧ́твы: / ра́дꙋйсѧ, а҆да́мово воззва́нїе: / съ тобо́ю гдⷭ҇ь. [Два́жды.]"
 },
 {
  "type": "TEXT",
  "value": "Ꙗ҆ влѧ́ешисѧ мнѣ̀ ꙗ҆́кѡ человѣ́къ, / глаго́летъ нетлѣ́ннаѧ ѻ҆трокови́ца ко а҆рхїстрати́гꙋ: / и҆ ка́кѡ вѣща́еши глаго́лы па́че человѣ́ка; / со мно́ю бо ре́клъ є҆сѝ бг҃ꙋ бы́ти, / и҆ всели́тисѧ во ᲂу҆тро́бꙋ мою̀. / и҆ ка́кѡ бꙋ́дꙋ, глаго́ли мѝ, / вмѣсти́лище простра́нное, и҆ мѣ́сто свѧще́нїѧ, / херꙋві́мы превосходѧ́щагѡ; / да не прельсти́ши менє̀ ле́стїю, / не бо̀ позна́хъ сла́сти, / бра́кꙋ є҆́смь неприча́стна: / ка́кѡ ᲂу҆̀бо ѻ҆троча̀ рождꙋ̀; [Два́жды.]"
 },
 {
  "type": "TEXT",
  "value": "Б г҃ъ и҆дѣ́же хо́щетъ, / побѣжда́етсѧ є҆стества̀ чи́нъ, / глаго́летъ безпло́тный: / и҆ ꙗ҆̀же па́че человѣ́ка содѣва́ютсѧ, / мои̑мъ вѣ́рꙋй и҆́стиннымъ глаго́лѡмъ, / всест҃а́ѧ, пренепоро́чнаѧ. / ѻ҆на́ же возопѝ: / бꙋ́ди мнѣ̀ ны́нѣ по глаго́лꙋ твоемꙋ̀, / и҆ рождꙋ̀ безпло́тнаго, / пло́ть ѿ менє̀ заи́мствовавшаго, / ꙗ҆́кѡ да возведе́тъ человѣ́ка, / ꙗ҆́кѡ є҆ди́нъ си́ленъ, / въ пе́рвое достоѧ́нїе, съ растворе́нїемъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже, самогла́сенъ. І҆ѡа́нна мона́ха:"
 },
 {
  "type": "TEXT",
  "value": "П о́сланъ бы́сть съ нб҃сѐ гаврїи́лъ а҆рха́гг҃лъ, / благовѣсти́ти дв҃ѣ зача́тїе: / и҆ прише́дъ въ назаре́тъ, / помышлѧ́ше въ себѣ̀, чꙋдесѝ ᲂу҆дивлѧ́ѧсѧ. / ѽ ка́кѡ въ вы́шнихъ непостижи́мъ сы́й ѿ дв҃ы ражда́етсѧ: / и҆мѣ́ѧй престо́лъ нб҃о, и҆ подно́жїе зе́млю, / во ᲂу҆тро́бꙋ вмѣща́етсѧ дв҃и́чꙋ! / на него́же шестокрыла́тїи и҆ многоѻчи́тїи зрѣ́ти не мо́гꙋтъ, / сло́вомъ є҆ди́нѣмъ ѿ сеѧ̀ воплоти́тисѧ благоизво́ли. / бж҃їе є҆́сть сло́во настоѧ́щее, / что̀ ᲂу҆̀бо сто́ю и҆ не глаго́лю дв҃ѣ: / ра́дꙋйсѧ, благода́тнаѧ, гдⷭ҇ь съ тобо́ю: / ра́дꙋйсѧ, чⷭ҇таѧ дв҃о: / ра́дꙋйсѧ, невѣ́сто неневѣ́стнаѧ: / ра́дꙋйсѧ, мт҃и живота̀, / благослове́нъ пло́дъ чре́ва твоегѡ̀!"
 },
 {
  "type": "TEXT",
  "value": "Вхо́дъ. Свѣ́те ти́хїй. Прокі́менъ и҆ чте́нїе днѐ, и҆ пра́здника трѝ."
 },
 {
  "type": "HEADER",
  "value": "Бытїѧ̀ чте́нїе."
 },
 {
  "type": "TEXT",
  "value": "[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь: и҆ ѡ҆брѣ́те мѣ́сто, и҆ спа̀ та́мѡ. за́йде бо со́лнце, и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ: и҆ со́нъ ви́дѣ, и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀ и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре и҆ лі́вꙋ, и҆ сѣ́веръ, и҆ на восто́ки. и҆ возблагословѧ́тсѧ ѡ҆ тебѣ̀ всѧ̑ кѡлѣ́на земна̑ѧ, и҆ ѡ҆ сѣ́мени твое́мъ. и҆ сѐ а҆́зъ съ тобо́ю, сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. и҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. и҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ, нѣ́сть сїѐ, но до́мъ бж҃їй, и҆ сїѧ̑ врата̀ небє́снаѧ."
 },
 {
  "type": "HEADER",
  "value": "Проро́чества і҆езекі́илева чте́нїе."
 },
 {
  "type": "TEXT",
  "value": "[Главы̑ м҃г и҆ м҃д] Та́кѡ гл҃го́летъ гдⷭ҇ь: бꙋ́детъ ѿ днѐ ѻ҆сма́гѡ, и҆ про́чее сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ́ вы, глаго́летъ а҆дѡнаі̀ гдⷭ҇ь. и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. и҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ: и҆ никто́же про́йдетъ сквозѣ̀ и҆́хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ бра́тъ вни́детъ, и҆ по пꙋтѝ є҆гѡ̀ и҆зы́детъ. и҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ хра́мꙋ, и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. ѡ҆ста́вите безꙋ́мїе и҆ жи́ви бꙋ́дите, и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ, ѡ҆бличе́нїе бо нечести́вомꙋ, ра̑ны є҆мꙋ̀. не ѡ҆блича́й ѕлы́хъ, да не возненави́дѧтъ тебє̀: ѡ҆блича́й премꙋ́дра, и҆ возлю́битъ тѧ̀. да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ. разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀."
 },
 {
  "type": "TEXT",
  "value": "Та́же, Да и҆спра́витсѧ моли́тва моѧ̀: И҆ покло́ны г҃ вели̑кїѧ, и҆ про́чее преждесвѧще́нныхъ."
 },
 {
  "type": "TEXT",
  "value": "[зрѝ] А҆́ще же нѣ́сть преждесвѧще́нныхъ: На Гдⷭ҇и, воззва́хъ, стїхи̑ры подѡ́бны г҃, въ трїѡ́ди: и҆ пра́здника, є҃. Сла́ва, и҆ ны́нѣ: По́ сланъ бы́сть: Вхо́дъ. Прокі́менъ. И҆ чтє́нїѧ днѐ: и҆ пра́здника, г҃. Та́же, Сподо́би, гдⷭ҇и: На стїхо́внѣ трїѡ́ди самогла́сенъ днѐ, два́жды: и҆ мꙋ́чениченъ. Сла́ва, и҆ ны́нѣ: Д не́сь ра́дость: По Ны́нѣ ѿпꙋща́еши: тропа́рь пра́здника, є҆ктенїа̀ и҆ г҃ покло́ны вели̑кїѧ, и҆ ѿпꙋ́стъ. На трапе́зѣ же разрѣша́емъ на вїно̀ и҆ є҆ле́й, въ кі́йлибо де́нь слꙋчи́тсѧ, во сла́вꙋ прест҃ы́ѧ бцⷣы."
 },
 {
  "type": "TEXT",
  "value": "Потре́ба є҆́сть вѣ́дати, ꙗ҆́кѡ а҆́ще слꙋчи́тсѧ благовѣ́щенїе въ кото́рꙋю сꙋббѡ́тꙋ поста̀:"
 },
 {
  "type": "TEXT",
  "value": "Чтꙋ́тсѧ чтє́нїѧ пре́жде днѐ, и҆ по си́хъ пра́здника, є҃: а҃, Вни́де мѡѷсе́й: в҃, Гдⷭ҇ь созда́ мѧ: г҃, И҆зы́де і҆а́кѡвъ: д҃, Бꙋ́детъ ѿ днѐ ѻ҆сма́гѡ: є҃, Премꙋ́дрость созда̀ себѣ̀ до́мъ: Подо́бнѣ чтꙋ́тсѧ чте́нїй пра́здника, є҃, а҆́ще благовѣ́щенїе слꙋчи́тсѧ и҆ въ недѣ́лю. А҆́ще ли є҆́сть по́стъ, чтꙋ́тсѧ ве́черъ, трѝ преждепи̑санныѧ: а҆ на лїтꙋргі́и двѣ̀ сїѧ̑."
 },
 {
  "type": "HEADER",
  "value": "И҆схо́да чте́нїе."
 },
 {
  "type": "TEXT",
  "value": "[Глава̀ г҃] Вни́де мѡѷсе́й въ го́рꙋ бж҃їю хѡри́въ, ꙗ҆ви́сѧ же є҆мꙋ̀ а҆́гг҃лъ гдⷭ҇ень въ пла́мени ѻ҆́гненнѣ и҆зъ кꙋпины̀, и҆ ви́дѣ ꙗ҆́кѡ кꙋпина̀ горѧ́ше ѻ҆гне́мъ, и҆ кꙋпина̀ не сгара́ше. рече́ же мѡѷсе́й: прише́дъ, ᲂу҆зрю̀ видѣ́нїе вели́кое сїѐ, что̀ ꙗ҆́кѡ не сгара́етъ кꙋпина̀; ꙗ҆́коже ви́дѣ гдⷭ҇ь, ꙗ҆́кѡ пристꙋпа́етъ ви́дѣти, призва̀ є҆го̀ гдⷭ҇ь и҆зъ кꙋпины̀, глаго́лѧ: мѡѷсе́е, мѡѷсе́е. ѻ҆́нъ же речѐ: что́ є҆сть; и҆ речѐ: не прибли́жисѧ сѣ́мѡ: и҆ззꙋ́й сапо́гъ ѿ ногꙋ̀ твоє́ю. мѣ́сто бо, на не́мже ты̀ стои́ши, землѧ̀ ст҃а̀ є҆́сть. и҆ речѐ є҆мꙋ̀: а҆́зъ є҆́смь бг҃ъ ѻ҆тца̀ твоегѡ̀, бг҃ъ а҆враа́мовъ и҆ бг҃ъ і҆саа́ковъ, и҆ бг҃ъ і҆а́кѡвль. ѿврати́ же мѡѷсе́й лицѐ своѐ, стыдѧ́шебосѧ зрѣ́ти предъ бг҃омъ. рече́ же гдⷭ҇ь къ мѡѷсе́ю: ви́дѧ ви́дѣхъ ѡ҆ѕлобле́нїе люде́й мои́хъ, и҆̀же во є҆гѵ́птѣ: и҆ во́пль и҆́хъ ᲂу҆слы́шахъ ѿ наси́льствꙋющихъ въ дѣ́лѣхъ. вѣ́мъ бо болѣ́знь и҆́хъ, и҆ снидо́хъ, є҆́же и҆з̾ѧ́ти и҆̀хъ ѿ рꙋкѝ є҆гѵ́птѧнъ, и҆ и҆звестѝ и҆̀хъ ѿ землѝ ѻ҆́ныѧ, и҆ ввестѝ и҆̀хъ въ зе́млю бла́гꙋ и҆ мно́гꙋ, въ зе́млю точа́щꙋ ме́дъ и҆ млеко̀."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "[Глава̀ и҃] Гдⷭ҇ь созда́ мѧ нача́ло пꙋте́й свои́хъ, въ дѣла̀ своѧ̑. пре́жде вѣ̑къ ѡ҆снова́ мѧ въ нача́лѣ, пре́жде зе́млю сотвори́ти, и҆ пре́жде бє́здны содѣ́лати, пре́жде пройтѝ и҆сто́чникѡмъ водны̑мъ, пре́жде гора́мъ водрꙋзи́тисѧ, пре́жде же всѣ́хъ холмѡ́въ ражда́етъ мѧ̀. гдⷭ҇ь сотворѝ страны̑ и҆ пꙋсты̑ни, и҆ концы̀ населє́ны подъ небесе́мъ. є҆гда̀ гото́вѧше не́бо, съ ни́мъ бѣ́хъ, и҆ є҆гда̀ ѿлꙋча́ше себѣ̀ престо́лъ на вѣ́трѣхъ, є҆гда̀ крѣ̑пки творѧ́ше вы̑шнїѧ ѻ҆́блаки, и҆ ꙗ҆́кѡ твє́рды полага́ше и҆сто́чники поднб҃ⷭ҇ныѧ, внегда̀ полага́ти мо́рю предѣ́лъ є҆гѡ̀, и҆ во́ды не ми́мѡ и҆́дꙋтъ ᲂу҆́стъ є҆гѡ̀, и҆ крѣ̑пки творѧ́ше ѡ҆снова̑нїѧ землѝ, бѣ́хъ при не́мъ ᲂу҆строѧ́ѧ. а҆́зъ бѣ́хъ, ѡ҆ не́йже ра́довашесѧ, по всѧ̑ же дни̑ веселѧ́хсѧ предъ лице́мъ є҆гѡ̀, на всѧ́ко вре́мѧ."
 },
 {
  "type": "TEXT",
  "value": "При часѣ́ же а҃-мъ но́щи, ᲂу҆дарѧ́етъ въ вели́кїй кампа́нъ дово́льнѡ, и҆ пото́мъ во всѧ̑. И҆ собра́вшесѧ во хра́мъ, благослови́вшꙋ і҆ере́ю и҆ кадѧ́щꙋ, пое́мъ повече́рїе вели́кое, и҆ Съ на́ми бг҃ъ: съ пѣ́нїемъ, на гла́съ и҃, на ѻ҆́ба ли̑ка. И҆ ѻ҆бы̑чныѧ тропарѝ: Де́нь преше́дъ:"
 },
 {
  "type": "HEADER",
  "value": "По а҃-мъ трист҃о́мъ тропа́рь пра́здника, гла́съ д҃:"
 },
 {
  "type": "TEXT",
  "value": "Д не́сь спасе́нїѧ на́шегѡ глави́зна, / и҆ є҆́же ѿ вѣ́ка та́инства ꙗ҆вле́нїе: / сн҃ъ бж҃їй, сн҃ъ дв҃ы быва́етъ, / и҆ гаврїи́лъ благода́ть благовѣствꙋ́етъ. / тѣ́мже и҆ мы̀ съ ни́мъ бцⷣѣ возопїи́мъ: / ра́дꙋйсѧ, бл҃года́тнаѧ, / гдⷭ҇ь съ тобо́ю."
 },
 {
  "type": "HEADER",
  "value": "По в҃-мъ трист҃о́мъ конда́къ пра́здника, гла́съ и҃:"
 },
 {
  "type": "TEXT",
  "value": "В збра́нной воево́дѣ побѣди́тєльнаѧ, / ꙗ҆́кѡ и҆зба́вльшесѧ ѿ ѕлы́хъ, / благода́рствєннаѧ восписꙋ́емъ тѝ рабѝ твоѝ, бцⷣе: / но ꙗ҆́кѡ и҆мꙋ́щаѧ держа́вꙋ непобѣди́мꙋю, / ѿ всѧ́кихъ на́съ бѣ́дъ свободѝ, да зове́мъ тѝ: / ра́дꙋйсѧ, невѣ́сто неневѣ́стнаѧ."
 },
 {
  "type": "TEXT",
  "value": "И҆ по Сла́ва въ вы́шнихъ, твори́мъ и҆схожде́нїе въ притво́ръ. И҆ быва́етъ лїті́а по ѻ҆бы́чаю."
 },
 {
  "type": "HEADER",
  "value": "И҆ пое́мъ стїхи̑ры пра́здника самогла́сны трѝ. Гла́съ а҃."
 },
 {
  "type": "TEXT",
  "value": "Вѷзанті́ево: Въ шесты́й мѣ́сѧцъ а҆рхїстрати́гъ по́сланъ бы́сть / къ тебѣ̀ дв҃ѣ и҆ чⷭ҇тѣй, / возвѣсти́ти тебѣ̀ сло́во спасе́нїѧ, / вкꙋ́пѣ же и҆ зва́ти тебѣ̀: / ра́дꙋйсѧ, ѡ҆бра́дованнаѧ, гдⷭ҇ь съ тобо́ю, / роди́ши сн҃а превѣ́чнаго и҆зъ ѻ҆ц҃а̀, / и҆ спасе́тъ лю́ди своѧ̑ ѿ грѣ̑хъ и҆́хъ."
 },
 {
  "type": "TEXT",
  "value": "А҆нато́лїево: Въ мѣ́сѧцъ шесты́й по́сланъ бы́сть съ нб҃сѐ гаврїи́лъ а҆рха́гг҃лъ / во гра́дъ галїле́йскїй назаре́тъ, / принестѝ ѻ҆трокови́цѣ ра́дость благовѣ́щенїѧ: / и҆ прише́дъ къ не́й, возопѝ, глаго́лѧ: / ра́дꙋйсѧ, ѡ҆бра́дованнаѧ, гдⷭ҇ь съ тобо́ю. / ра́дꙋйсѧ, вмѣсти́лище невмѣсти́магѡ є҆стества̀: / є҆го́же бо небеса̀ не вмѣсти́ша, / ᲂу҆тро́ба твоѧ̀ вмѣстѝ, благослове́ннаѧ: / ра́дꙋйсѧ, честно́е а҆да́мово воззва́нїе и҆ є҆́ѵино и҆збавле́нїе, / и҆ ра́дость мі́ра, / и҆ весе́лїе ро́да на́шегѡ."
 },
 {
  "type": "TEXT",
  "value": "П о́сланъ бы́сть а҆рха́гг҃лъ гаврїи́лъ съ небесѐ ѿ бг҃а / къ дв҃ѣ нескве́рнѣй, во гра́дъ галїле́йскїй назаре́тъ, / благовѣсти́ти є҆́й стра́ннагѡ ѻ҆́браза зача́тїе: / по́сланъ бы́сть ра́бъ безпло́тенъ / ко ѡ҆дꙋшевле́нномꙋ гра́дꙋ и҆ две́ри мы́сленнѣй, / возвѣсти́ти влады́чнѧгѡ прише́ствїѧ сни́тїе. / по́сланъ бы́сть во́инъ нбⷭ҇ный къ прест҃ы́ѧ сла́вы пала́тѣ, / проꙋгото́вати зижди́телю жили́ще неѿе́млемо, / и҆ прише́дъ къ не́й взыва́ше: / ра́дꙋйсѧ, престо́ле ѻ҆гнезра́чный, / четверозра́чныхъ пресла́внѣйшїй: / ра́дꙋйсѧ, сѣда́лище цр҃ѧ̀ нбⷭ҇нагѡ: / ра́дꙋйсѧ, горо̀ несѣко́маѧ, прїѧ́телище пречестно́е, / въ тебѣ́ бо всѐ и҆сполне́нїе всели́сѧ бж҃ества̀ тѣле́снѣ, / благоволе́нїемъ ѻ҆ц҃а̀ присносꙋ́щнагѡ / и҆ содѣ́йствомъ всест҃а́гѡ дх҃а. / ра́дꙋйсѧ, ѡ҆бра́дованнаѧ, гдⷭ҇ь съ тобо́ю."
 },
 {
  "type": "HEADER",
  "value": "А҆́ще сꙋббѡ́та, и҆лѝ недѣ́лѧ."
 },
 {
  "type": "TEXT",
  "value": "Сла́ва, гла́съ и҃. І҆ѡа́нна мона́ха: Да веселѧ́тсѧ небеса̀ и҆ ра́дꙋетсѧ землѧ̀: / и҆́бо ѻ҆ц҃ꙋ̀ соприсносꙋ́щный, собезнача́льный и҆ сопресто́льный, / щедро́тство прїе́мъ и҆ человѣколю́бнꙋю ми́лость, / себѐ поста́ви во и҆стоща́нїе, / благоволе́нїемъ и҆ совѣ́томъ ѻ҆́ч҃имъ, / и҆ во ᲂу҆тро́бꙋ всели́сѧ дв҃и́чꙋ, пред̾ѡчище́ннꙋю дх҃омъ. / ѽ чꙋдесѐ! бг҃ъ въ человѣ́цѣхъ, / невмѣсти́мый въ ложесна́хъ, безлѣ́тный въ лѣ́то: / и҆ є҆́же пресла́внѣе, ꙗ҆́кѡ и҆ зача́тїе безсѣ́менно, / и҆ и҆стоща́нїе несказа́нно, и҆ та́инство є҆ли́ко. / бг҃ъ бо и҆стощава́етсѧ и҆ воплоща́етсѧ, и҆ зи́ждетсѧ, / а҆́гг҃лꙋ къ чⷭ҇тѣй зача́тїе глаго́лавшꙋ: / ра́дꙋйсѧ, ѡ҆бра́дованнаѧ, гдⷭ҇ь съ тобо́ю, / и҆мѣ́ѧй ве́лїю ми́лость."
 },
 {
  "type": "TEXT",
  "value": "И҆ ны́нѣ, гла́съ в҃: Благовѣствꙋ́етъ гаврїи́лъ благода́тнѣй дне́сь: / ра́дꙋйсѧ, неневѣ́стнаѧ мт҃и и҆ неискꙋсобра́чнаѧ. / не ᲂу҆дивлѧ́йсѧ стра́нномꙋ моемꙋ̀ зра́кꙋ, / ни ᲂу҆жаса́йсѧ, а҆рха́гг҃лъ бо є҆́смь. / ѕмі́й прельстѝ є҆́ѵꙋ и҆ногда̀: / ны́нѣ же благовѣствꙋ́ю тебѣ̀ ра́дость, / и҆ пребꙋ́деши нетлѣ́нна, / и҆ роди́ши гдⷭ҇а, пречⷭ҇таѧ."
 },
 {
  "type": "TEXT",
  "value": "А҆́ще же де́нь по́стенъ. Сла́ва, и҆ ны́нѣ: Благовѣствꙋ́етъ гаврїи́лъ: Та́же моли̑твы ѻ҆бы̑чныѧ бдѣ́нїѧ. И҆ вше́дше во хра́мъ, пое́мъ."
 },
 {
  "type": "HEADER",
  "value": "На стїхо́внѣ стїхи̑ры самогла̑сны, гла́съ д҃."
 },
 {
  "type": "TEXT",
  "value": "В ъ шесты́й мѣ́сѧцъ по́сланъ бы́сть а҆рха́гг҃лъ / къ дв҃ѣ чⷭ҇тѣй: / и҆ ра́доватисѧ є҆́й прире́къ, / благовѣстѝ и҆зъ неѧ̀ и҆зба́вителю проитѝ. / тѣ́мже прїи́мши цѣлова́нїе, / зача́тъ тѧ̀ превѣ́чнаго бг҃а, / несказа́ннѡ благоволи́вшаго вочеловѣ́читисѧ, / во спасе́нїе дꙋ́шъ на́шихъ."
 },
 {
  "type": "TEXT",
  "value": "Сті́хъ: Благовѣсти́те де́нь ѿ днѐ / спасе́нїе бг҃а на́шегѡ."
 },
 {
  "type": "TEXT",
  "value": "Ѧ҆ зы́ка, є҆гѡ́же не вѣ́дѧше, / ᲂу҆слы́ша бцⷣа: / глаго́лаше бо къ не́й а҆рха́гг҃лъ благовѣ́щенїѧ глаго́лы, / ѿѻнꙋ́дꙋже вѣ́рнѡ прїи́мши цѣлова́нїе, / зача́тъ тѧ̀ превѣ́чнаго бг҃а. / тѣ́мже и҆ мы̀ ра́дꙋющесѧ вопїе́мъ тѝ: / и҆зъ неѧ̀ воплоти́выйсѧ непрело́жнѡ, бж҃е, / ми́ръ мі́рови да́рꙋй. / и҆ дꙋша́мъ на́шымъ ве́лїю млⷭ҇ть."
 },
 {
  "type": "TEXT",
  "value": "Сті́хъ: Воспо́йте гдⷭ҇еви пѣ́снь но́вꙋ, / воспо́йте гдⷭ҇еви, всѧ̀ землѧ̀."
 },
 {
  "type": "TEXT",
  "value": "С ѐ воззва́нїе ны́нѣ ꙗ҆ви́сѧ на́мъ: / па́че сло́ва бг҃ъ человѣ́кѡмъ соединѧ́етсѧ: / а҆рха́гг҃ловымъ гла́сомъ пре́лесть ѿгонѧ́етсѧ: / дв҃а бо прїе́млетъ ра́дость, / земна̑ѧ бы́ша нб҃о. / мі́ръ разрѣши́сѧ пе́рвыѧ клѧ́твы. / да ра́дꙋетсѧ тва́рь, и҆ гла́сы да воспое́тъ: / тво́рче и҆ и҆зба́вителю на́шъ, / гдⷭ҇и, сла́ва тебѣ̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже."
 },
 {
  "type": "TEXT",
  "value": "А҆ндре́а і҆еросолѷмі́ты: Дне́сь ра́дость благовѣ́щенїѧ, / дѣ́вственное торжество̀, / ни̑жнѧѧ съ вы́шними совокꙋплѧ́ютсѧ. / а҆да́мъ ѡ҆бновлѧ́етсѧ, / и҆ є҆́ѵа пе́рвыѧ печа́ли свобожда́етсѧ: / и҆ сѣ́нь на́шегѡ сꙋщества̀, / ѡ҆боже́нїемъ прїе́мшагѡ смѣше́нїе, / це́рковь бж҃їѧ бы́сть. / ѽ та́инство! ѻ҆́бразъ и҆стоща́нїѧ невѣ́домь, / бога́тство бла́гости несказа́нно, / а҆́гг҃лъ слꙋ́житъ чꙋдесѝ: / дв҃и́ча ᲂу҆тро́ба сн҃а прїе́млетъ: / дх҃ъ ст҃ы́й низпосыла́етсѧ: / ѻ҆ц҃ъ свы́ше благоволи́тъ: / и҆ и҆змѣне́нїе ѻ҆́бщимъ твори́тсѧ совѣ́томъ, / въ не́мже и҆ и҆́мже спа́сшесѧ, / вкꙋ́пѣ съ гаврїи́ломъ къ дв҃ѣ возопїи́мъ: / ра́дꙋйсѧ, ѡ҆бра́дованнаѧ, / и҆зъ неѧ́же спасе́нїе хрⷭ҇то́съ бг҃ъ на́шъ, / є҆́же по на́мъ прїе́мъ є҆стество̀, / къ себѣ̀ возведѐ. / того̀ молѝ спасти́сѧ дꙋша́мъ на́шымъ."
 },
 {
  "type": "TEXT",
  "value": "Та́же, Ны́нѣ ѿпꙋща́еши: И҆ по Ѻ҆́ч҃е на́шъ:"
 },
 {
  "type": "HEADER",
  "value": "На благослове́нїе хлѣ́бѡвъ тропа́рь, гла́съ д҃:"
 },
 {
  "type": "TEXT",
  "value": "Д не́сь спасе́нїѧ на́шегѡ глави́зна, / и҆ є҆́же ѿ вѣ́ка та́инства ꙗ҆вле́нїе: / сн҃ъ бж҃їй, сн҃ъ дв҃ы быва́етъ, / и҆ гаврїи́лъ благода́ть благовѣствꙋ́етъ. / тѣ́мже и҆ мы̀ съ ни́мъ бцⷣѣ возопїи́мъ: / ра́дꙋйсѧ, бл҃года́тнаѧ, / гдⷭ҇ь съ тобо́ю. [Три́жды.]"
 },
 {
  "type": "TEXT",
  "value": "И҆ Бꙋ́ди и҆́мѧ гдⷭ҇не: съ пѣ́нїемъ, три́жды. И҆ чте́нїе пра́здника."
 },
 {
  "type": "HEADER",
  "value": "На ᲂу҆́трени."
 },
 {
  "type": "HEADER",
  "value": "На Бг҃ъ гдⷭ҇ь, тропа́рь пра́здника три́жды, гла́съ д҃:"
 },
 {
  "type": "TEXT",
  "value": "Д не́сь спасе́нїѧ на́шегѡ глави́зна, / и҆ є҆́же ѿ вѣ́ка та́инства ꙗ҆вле́нїе: / сн҃ъ бж҃їй, сн҃ъ дв҃ы быва́етъ, / и҆ гаврїи́лъ благода́ть благовѣствꙋ́етъ. / тѣ́мже и҆ мы̀ съ ни́мъ бцⷣѣ возопїи́мъ: / ра́дꙋйсѧ, бл҃года́тнаѧ, / гдⷭ҇ь съ тобо́ю."
 },
 {
  "type": "TEXT",
  "value": "По а҃-й каѳі́смѣ ѻ҆́ба сѣда́льны трїѡ́ди безъ є҆ктенїѝ: и҆ чте́нїе днѐ."
 },
 {
  "type": "HEADER",
  "value": "По в҃-й же каѳі́смѣ, є҆ктенїа̀ и҆ сѣда́ленъ пра́здника, гла́съ а҃. Подо́бенъ: Гро́бъ тво́й:"
 },
 {
  "type": "TEXT",
  "value": "В ели́кїй воево́да невеще́ственныхъ а҆́гг҃лъ бо гра́дъ назаре́тъ предста́въ, / цр҃ѧ̀ возвѣща́етъ тебѣ̀, пречⷭ҇таѧ, вѣкѡ́въ и҆ гдⷭ҇а, / ра́дꙋйсѧ, глаго́лѧ тебѣ̀, бл҃гослове́ннаѧ марі́е, / непостижи́мое и҆ несказа́нное чꙋ́до, человѣ́кѡвъ ѡ҆бновле́нїе."
 },
 {
  "type": "TEXT",
  "value": "Сла́ва, и҆ ны́нѣ, то́йже, и҆ чте́нїе пра́здника."
 },
 {
  "type": "HEADER",
  "value": "По г҃-й каѳі́смѣ, сѣда́ленъ, гла́съ г҃. Подо́бенъ: Красотѣ̀:"
 },
 {
  "type": "TEXT",
  "value": "Д не́сь всѧ̀ тва́рь ра́дꙋетсѧ, / ꙗ҆́кѡ є҆́же ра́дꙋйсѧ, тебѣ̀ глаго́летъ а҆рха́гг҃лъ, / благослове́ннаѧ честна́ѧ и҆ пречⷭ҇таѧ мт҃и хрⷭ҇та̀ бг҃а. / дне́сь ѡ҆мрача́етсѧ ѕмѣи́но шата́нїе: / клѧ́твы бо пра́ѻтчи разрѣша́етсѧ сою́зъ. / тѣ́мже и҆ непреста́ннѡ вопїе́мъ тѝ: / ра́дꙋйсѧ, ѡ҆бра́дованнаѧ."
 },
 {
  "type": "TEXT",
  "value": "Сла́ва, и҆ ны́нѣ, то́йже. По чте́нїи же даю́тсѧ свѣщы̀ бра́тїи."
 },
 {
  "type": "HEADER",
  "value": "Полѷеле́й и҆ велича́нїе:"
 },
 {
  "type": "TEXT",
  "value": "А҆ рха́гг҃льскїй гла́съ / вопїе́мъ тѝ, чⷭ҇таѧ: / ра́дꙋйсѧ / бл҃года́тнаѧ, / гдⷭ҇ь съ тобо́ю."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "а҃ Бж҃е, сꙋ́дъ тво́й цр҃е́ви да́ждь. в҃ И҆ пра́вдꙋ твою̀ сн҃ꙋ цр҃е́вꙋ: а҃ Сꙋди́ти лю́демъ твои̑мъ въ пра́вдѣ. в҃ И҆ ни́щымъ твои̑мъ въ сꙋдѣ̀. а҃ Сꙋ́дитъ ни́щымъ людски̑мъ, и҆ сп҃се́тъ сы́ны ᲂу҆бо́гихъ. в҃ Бл҃говѣсти́те де́нь ѿ днѐ сп҃се́нїе бг҃а на́шегѡ. а҃ Гдⷭ҇ь да́стъ глаго́лъ бл҃говѣствꙋ́ющымъ си́лою мно́гою. в҃ Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀: а҃ Ѿ плода̀ чре́ва твоегѡ̀ посаждꙋ̀ на прⷭ҇то́лѣ твое́мъ. в҃ Сни́детъ ꙗ҆́кѡ до́ждь на рꙋно̀: а҃ И҆ ꙗ҆́кѡ ка́плѧ ка́плющаѧ на зе́млю, в҃ И҆ приклонѝ нб҃са̀, и҆ сни́де, и҆ мра́къ под̾ нога́ма є҆гѡ̀. а҃ Ꙗ҆́кѡ и҆збра̀ гдⷭ҇ь сїѡ́на, и҆зво́ли є҆го̀ въ жили́ще себѣ̀ в҃ Ѡ҆ст҃и́лъ є҆́сть селе́нїе своѐ вы́шнїй. а҃ Бг҃ъ посредѣ̀ є҆гѡ̀, и҆ не подви́житсѧ. в҃ Пощади́тъ ни́ща и҆ ᲂу҆бо́га, и҆ дꙋ́шы ᲂу҆бо́гихъ сп҃се́тъ. а҃ Всѝ ꙗ҆зы́цы порабо́таютъ є҆мꙋ̀. в҃ Ве́сь де́нь бл҃гословѧ́тъ є҆го̀. а҃ Бꙋ́детъ ᲂу҆тверже́нїе на землѝ на версѣ́хъ го́ръ. в҃ Бꙋ́детъ и҆́мѧ є҆гѡ̀ бл҃гослове́но во вѣ́ки. а҃ И҆ бл҃гословѧ́тсѧ въ не́мъ всѧ̑ кѡлѣ́на земна̑ѧ. в҃ Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ. а҃ И҆ бл҃гослове́но и҆́мѧ сла́вы є҆гѡ̀ въ вѣ́къ, и҆ въ вѣ́къ вѣ́ка. в҃ И҆ и҆спо́лнитсѧ сла́вы є҆гѡ̀ всѧ̀ землѧ̀, бꙋ́ди, бꙋ́ди."
 },
 {
  "type": "TEXT",
  "value": "Сла́ва, и҆ ны́нѣ: А҆ллилꙋ́їа, три́жды."
 },
 {
  "type": "HEADER",
  "value": "По полѷеле́и сѣда́ленъ, гла́съ д҃. Подо́бенъ: Оу҆диви́сѧ:"
 },
 {
  "type": "TEXT",
  "value": "Г аврїи́лъ съ нб҃сѐ, є҆́же ра́дꙋйсѧ, зове́тъ чⷭ҇тнѣ́й: / ꙗ҆́кѡ зачне́тъ во чре́вѣ превѣ́чнаго бг҃а, / сло́вомъ концы̀ соста́вльшаго. / тѣ́мже марїа́мъ ѿвѣщава́ше: / безмꙋ́жна є҆́смь, и҆ ка́кѡ рождꙋ̀ сн҃а; / безсѣ́менное рожде́нїе кто̀ ви́дѣ; / и҆ сказꙋ́ѧ глаго́лаше а҆́гг҃лъ бцⷣѣ и҆ дв҃ѣ: / на́йдетъ на тѧ̀ дх҃ъ ст҃ы́й, / и҆ си́ла вы́шнѧгѡ ѡ҆сѣни́тъ тѧ̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ и҆ подо́бенъ то́йже:"
 },
 {
  "type": "TEXT",
  "value": "П о́сланъ бы́сть гаврїи́лъ къ дв҃ѣ мр҃і́и, и҆ возвѣстѝ є҆́й неизлаго́ланнꙋю ра́дость: / ꙗ҆́кѡ безсѣ́меннѡ зачне́тъ, и҆ не и҆стлѣ́етъ. / роди́ши бо сн҃а, предвѣ́чнаго бг҃а, и҆ спасе́тъ лю́ди своѧ̑ ѿ грѣ̑хъ и҆́хъ: / и҆ свидѣ́тельствꙋетъ посла́вый мѧ̀ вопи́ти тебѣ̀, благослове́ннаѧ, є҆́же ра́дꙋйсѧ: / дв҃о роди́ши, и҆ по ржⷭ҇твѣ̀ па́ки пребꙋ́деши дв҃а."
 },
 {
  "type": "TEXT",
  "value": "И҆ чте́нїе пра́здника."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са, и҆́хже стїхѝ повторѧ́юще пое́мъ:"
 },
 {
  "type": "TEXT",
  "value": "Ѿ ю҆́ности моеѧ̀ / мно́зи бо́рютъ мѧ̀ стра̑сти, / но са́мъ мѧ̀ застꙋпѝ, / и҆ сп҃сѝ сп҃се мо́й."
 },
 {
  "type": "TEXT",
  "value": "Н енави́дѧщїи сїѡ́на, / посрами́тесѧ ѿ гдⷭ҇а, / ꙗ҆́кѡ трава́ бо ѻ҆гне́мъ / бꙋ́дете и҆зсо́хше."
 },
 {
  "type": "TEXT",
  "value": "Сла́ва: Ст҃ы́мъ дх҃омъ / всѧ́ка дꙋша̀ живи́тсѧ, / и҆ чистото́ю возвыша́етсѧ, / свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Б лаговѣсти́те де́нь ѿ днѐ / спасе́нїе бг҃а на́шегѡ. Сті́хъ: Воспо́йте гдⷭ҇еви пѣ́снь но́вꙋ, воспо́йте гдⷭ҇еви, всѧ̀ землѧ̀."
 },
 {
  "type": "TEXT",
  "value": "Дрꙋгі́й прокі́менъ: Всѧ́кое дыха́нїе / да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло д҃."
 },
 {
  "type": "TEXT",
  "value": "В о днѝ ѻ҆́ны воста́вши марїа́мъ, и҆́де въ гѡ́рнѧѧ со тща́нїемъ, во гра́дъ і҆ꙋ́довъ. и҆ вни́де въ до́мъ заха́рїинъ, и҆ цѣлова̀ є҆лїсаве́тъ. и҆ бы́сть, ꙗ҆́кѡ ᲂу҆слы́ша є҆лїсаве́тъ цѣлова́нїе марі́ино, взыгра́сѧ младе́нецъ во чре́вѣ є҆ѧ̀: и҆ и҆спо́лнисѧ дх҃а ст҃а є҆лїсаве́тъ. и҆ возопѝ гла́сомъ ве́лїимъ, и҆ речѐ: благослове́на ты̀ въ жена́хъ, и҆ благослове́нъ пло́дъ чре́ва твоегѡ̀. и҆ ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; се́ бо ꙗ҆́кѡ бы́сть гла́съ цѣлова́нїѧ твоегѡ̀ во ᲂу҆́шїю мое́ю, взыгра́сѧ младе́нецъ ра́дощами во чре́вѣ мое́мъ: и҆ блаже́нна вѣ́ровавшаѧ, ꙗ҆́кѡ бꙋ́детъ соверше́нїе глагѡ́ланнымъ є҆́й ѿ гдⷭ҇а. и҆ речѐ марїа́мъ: вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ: ꙗ҆́кѡ призрѣ̀ на смире́нїе рабы̀ своеѧ̀: се́ бо ѿ ны́нѣ ᲂу҆блажа́тъ мѧ̀ всѝ ро́ди. ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀. пребы́сть же марїа́мъ съ не́ю ꙗ҆́кѡ трѝ мѣ́сѧцы: и҆ возврати́сѧ въ до́мъ сво́й."
 },
 {
  "type": "HEADER",
  "value": "По н҃-мъ ѱалмѣ̀:"
 },
 {
  "type": "TEXT",
  "value": "Сла́ва: Мл҃твами бцⷣы, / ми́лостиве, ѡ҆чи́сти / мно́жєства согрѣше́нїй на́шихъ."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "TEXT",
  "value": "И҆ посе́мъ, гла́съ ѕ҃: Поми́лꙋй мѧ̀ бж҃е, / по вели́цѣй ми́лости твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ."
 },
 {
  "type": "HEADER",
  "value": "И҆ стїхи́ра, гла́съ в҃. Самогла́сна:"
 },
 {
  "type": "TEXT",
  "value": "Б лаговѣствꙋ́етъ гаврїи́лъ благода́тнѣй дне́сь: / ра́дꙋйсѧ, неневѣ́стнаѧ мт҃и и҆ неискꙋсобра́чнаѧ. / не ᲂу҆дивлѧ́йсѧ стра́нномꙋ моемꙋ̀ зра́кꙋ: / ни ᲂу҆жаса́йсѧ, а҆рха́гг҃лъ бо є҆́смь. / ѕмі́й прельстѝ є҆́ѵꙋ и҆ногда̀: / ны́нѣ же благовѣствꙋ́ю тебѣ̀ ра́дость, / и҆ пребꙋ́деши нетлѣ́нна, / и҆ ро́диши гдⷭ҇а, пречⷭ҇таѧ."
 },
 {
  "type": "TEXT",
  "value": "Канѡ́нъ пра́здника, і҆рмосы̀ по два́жды, тропари́ же на в҃і. Катава́сїа пра́здника, ѻ҆́ба ли̑ка вкꙋ́пѣ. А҆ и҆дѣ́же трипѣ́снецъ, та́мѡ пое́мъ пра́здника со і҆рмосо́мъ на ѕ҃: и҆ трипѣ́снецъ на и҃: Катава́сїа, і҆рмо́съ трїѡ́ди, ѻ҆́ба ли̑ка вкꙋ́пѣ."
 },
 {
  "type": "HEADER",
  "value": "Канѡ́нъ, творе́нїе кѵ́ръ ѳеофа́на, є҆гѡ́же краегране́сїе по а҆лфави́тꙋ до и҃-ѧ пѣ́сни. Гла́съ д҃. Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ѿве́рзꙋ ᲂу҆ста̀ моѧ̑, / и҆ напо́лнѧтсѧ дх҃а, / и҆ сло́во ѿры́гнꙋ цр҃и́цѣ мт҃ри, / и҆ ꙗ҆влю́сѧ свѣ́тлѡ торжествꙋ́ѧ, / и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Д а пое́тъ тебѣ̀, влⷣчце, движѧ̀ свирѣ́ль дх҃о́внꙋю, дв҃дъ, пра́ѻц҃ъ тво́й, / послꙋ́шай, дщѝ, ра́дованнагѡ гла́са ѿ а҆́гг҃ла, / ра́дость бо возвѣща́етъ тебѣ̀ неизглаго́ланнꙋю."
 },
 {
  "type": "TEXT",
  "value": "[А҆́гг҃лъ возопѝ] Вопїю̀ тебѣ̀ веселѧ́сѧ, / приклонѝ ᲂу҆́хо твоѐ, и҆ вонмѝ мѝ, / бж҃їе возвѣща́ющꙋ безсѣ́менное зача́тїе: / ѡ҆брѣла́ бо є҆сѝ благода́ть предъ бг҃омъ, / є҆ѧ́же никогда́же ѡ҆брѣ́те дрꙋги̑ры а́ѧ,"
 },
 {
  "type": "TEXT",
  "value": "[Бцⷣа речѐ] Да разꙋмѣ́ю, а҆́гг҃ле, твои́хъ глагѡ́лъ си́лꙋ, / ка́кѡ бꙋ́детъ, є҆́же ре́клъ є҆сѝ, глаго́ли ꙗ҆́вственнѣйше; / ка́кѡ зачнꙋ̀, дв҃а сꙋ́щи ѻ҆трокови́ца; / ка́кѡ же и҆ мт҃и бꙋ́дꙋ зижди́телѧ моегѡ̀;"
 },
 {
  "type": "TEXT",
  "value": "[А҆́гг҃лъ возопѝ] Ле́стнѡ мѧ̀ вѣща́ти помышлѧ́еши, ꙗ҆́кѡ мню̀: / и҆ ра́дꙋюсѧ, зрѧ̀ твоѐ ᲂу҆твержде́нїе. / дерза́й, влⷣчце, / бг҃ꙋ бо хотѧ́щꙋ, ᲂу҆до́бь сконча́ютсѧ и҆ пресла̑внаѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Твоѧ̑ пѣсносло́вцы бцⷣе, / живы́й и҆ незави́стный и҆сто́чниче, / ли́къ себѣ̀ совокꙋ́пльшыѧ дх҃о́внѡ ᲂу҆твердѝ, / въ бж҃е́ственнѣй твое́й сла́вѣ, / вѣнцє́въ сла́вы сподо́би."
 },
 {
  "type": "TEXT",
  "value": "[Бцⷣа речѐ] Ѡ҆скꙋдѣ̀ кнѧ́зь ѿ і҆ꙋ́ды, вре́мѧ наста̀ про́чее, / въ не́же ꙗ҆ви́тсѧ ꙗ҆зы́кѡвъ наде́жда, хрⷭ҇то́съ: / ты́ же, ка́кѡ сего̀ рождꙋ̀, дв҃а сꙋ́щи, скажѝ;"
 },
 {
  "type": "TEXT",
  "value": "[А҆́гг҃лъ возопѝ] И҆́щеши ѿ менє̀ ᲂу҆вѣ́дѣти, дв҃о, ѻ҆́бразъ зача́тїѧ твоегѡ̀, / но то́й несказа́ненъ є҆́сть: / дх҃ъ же ст҃ы́й зижди́тельною си́лою, ѡ҆сѣни́въ тѧ̀, соверши́тъ."
 },
 {
  "type": "TEXT",
  "value": "[Бцⷣа речѐ] Моѧ̀ прама́ти, прїе́мши ра́зꙋмъ ѕмїи́нъ, пи́щи бж҃е́ственныѧ и҆згна́на бы́сть: / тѣ́мже и҆ а҆́зъ бою́сѧ цѣлова́нїѧ стра́ннагѡ твоегѡ̀, / стыдѧ́щисѧ поползнове́нїѧ."
 },
 {
  "type": "TEXT",
  "value": "[А҆́гг҃лъ возопѝ] Бж҃їй предста́тель по́сланъ є҆́смь, бжⷭ҇твенный повѣ́дати тебѣ̀ совѣ́тъ: / что̀ менє̀ бои́шисѧ, всенепоро́чнаѧ, па́че тебє̀ боѧ́щагѡсѧ; / что̀ благоговѣ́еши мнѣ̀, влⷣчце, / тебѣ̀ че́стнѡ благоговѣ́ющемꙋ;"
 },
 {
  "type": "HEADER",
  "value": "Сѣда́ленъ, гла́съ и҃. Подо́бенъ: Свирѣ́лей па́стырскихъ:"
 },
 {
  "type": "TEXT",
  "value": "С ло́во бж҃їе на зе́млю ны́нѣ сни́де, а҆́гг҃лъ предста̀, вопїѧ̀ дв҃ѣ, / ра́дꙋйсѧ, благослове́ннаѧ, ꙗ҆́же печа́тїю є҆ди́на сохра́ншисѧ, / во ᲂу҆тро́бѣ прїе́мши предвѣ́чнаго сло́ва и҆ гдⷭ҇а: / да ѿ пре́лести спасе́тъ, ꙗ҆́кѡ бг҃ъ, ро́дъ человѣ́ческїй."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже. Подо́бенъ: Повелѣ́нное:"
 },
 {
  "type": "TEXT",
  "value": "П о́сланъ бы́сть съ нб҃сѐ а҆рхїстрати́гъ гаврїи́лъ ѿ бг҃а, / ско́рѡ предста̀ ко ѡ҆дꙋшевле́нномꙋ гра́дꙋ, глаго́лѧ къ не́й ꙗ҆́вственнѡ: / зижди́телѧ прїи́меши, дв҃о, во ᲂу҆тро́бѣ, / и҆ роди́ши сего̀ непрело́жнѣ съ пло́тїю. / тѣ́мже по́сланъ є҆́смь возвѣсти́ти тебѣ̀ стра́нное ржⷭ҇тво̀, чⷭ҇таѧ, / и҆ стою̀ зовѧ̀ тебѣ̀: / ра́дꙋйсѧ, невѣ́сто неневѣ́стнаѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Сѣдѧ́й въ сла́вѣ, / на прⷭ҇то́лѣ бж҃ества̀, / во ѻ҆́блацѣ ле́гцѣ / прїи́де і҆и҃съ пребж҃е́ственный, / нетлѣ́нною дла́нїю, / и҆ сп҃се зовꙋ́щыѧ: / сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "[Бцⷣа речѐ] Сщ҃е́ннꙋю нѣ́кꙋю дв҃ꙋ ражда́ющꙋю, слы́шахъ прⷪ҇ро́ка дре́вле є҆мманꙋ́ила проре́кша: / хощꙋ́ же разꙋмѣ́ти, ка́кѡ бжⷭ҇тва̀ растворе́нїе є҆стество̀ человѣ́ческое претерпи́тъ;"
 },
 {
  "type": "TEXT",
  "value": "[А҆́гг҃лъ возопѝ] Ꙗ҆ви́ла є҆́сть кꙋпина̀, неѡпа́льна пребы́вши, / прїе́мши пла́мень, ѡ҆бра́дованнаѧ всепѣ́таѧ, на тебѣ̀ та́инства пресла́вное: / по рождествѣ́ бо пребꙋ́деши чⷭ҇таѧ приснодв҃а."
 },
 {
  "type": "TEXT",
  "value": "[Бцⷣа речѐ] Ѡ҆свѣща́емь сїѧ́нїемъ бг҃а вседержи́телѧ, / и҆́стины проповѣ́дниче, глаго́ли, гаврїи́ле, и҆́стиннѣйшаѧ: / ка́кѡ нетлѣ́ннѣ бы́вши чистотѣ̀ мое́й, / сло́ва рождꙋ̀ съ пло́тїю безпло́тнаго;"
 },
 {
  "type": "TEXT",
  "value": "[А҆́гг҃лъ возопѝ] Со стра́хомъ тебѣ̀, ꙗ҆́кѡ ра́бъ гпⷭ҇жѣ̀ предстою̀, / съ боѧ́знїю, ѻ҆трокови́це, ны́нѣ смотри́ти стыждꙋ́сѧ тебѐ: / ꙗ҆́кѡ бо до́ждь на рꙋно̀ сни́детъ на тѧ̀ сло́во ѻ҆́ч҃ее, ꙗ҆́кѡ благоволѝ."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Оу҆жасо́шасѧ всѧ́чєскаѧ / ѡ҆ бж҃е́ственнѣй сла́вѣ твое́й: / ты́ бо неискꙋсобра́чнаѧ дв҃о, / и҆мѣ́ла є҆сѝ во ᲂу҆тро́бѣ над̾ всѣ́ми бг҃а, / и҆ родила̀ є҆сѝ безлѣ́тнаго сн҃а, / всѣ̑мъ воспѣва́ющымъ тѧ̀, / ми́ръ подава́ющаѧ."
 },
 {
  "type": "TEXT",
  "value": "[Бцⷣа речѐ] Разꙋмѣ́ти не могꙋ̀ твои́хъ слове́съ и҆звѣ́стїѧ: / чꙋдеса́ бо бы́ша мно́жицею, / бж҃твенною си́лою чꙋдодѣ́йствꙋєма, / зна́мєнїѧ и҆ ѻ҆́бразы зако́ннїи: / роди́ же дв҃а неискꙋсомꙋ́жнѣ никогда́же."
 },
 {
  "type": "TEXT",
  "value": "[А҆́гг҃лъ возопѝ] Диви́тъ, всенепоро́чнаѧ, и҆ стра́нно бо чꙋ́до твоѐ, / є҆ди́на бо ты̀ всѣ́хъ цр҃ѧ̀ прїи́меши, во ᲂу҆тро́бѣ воплоща́ема: / и҆ тѧ̀ проѡбразꙋ́ютъ прⷪ҇ро́чєскаѧ речє́нїѧ и҆ гада̑нїѧ, и҆ зако́ннїи ѻ҆́бразы."
 },
 {
  "type": "TEXT",
  "value": "[Бцⷣа речѐ] Всѣ́ми невмѣсти́мый и҆ всѣ́ми неви́димый, / ка́кѡ се́й мо́жетъ во чре́во дв҃и́че всели́тисѧ, є҆́же са́мъ созда̀, / ка́кѡ же и҆ зачнꙋ̀ бг҃а сло́ва, собезнача́льна ѻ҆ц҃ꙋ̀ и҆ дх҃ꙋ;"
 },
 {
  "type": "TEXT",
  "value": "[А҆́гг҃лъ возопѝ] Къ твоемꙋ̀ пра́ѻц҃ꙋ дв҃дꙋ, ѡ҆бѣща́всѧ / посади́ти ѿ плода̀ твоегѡ̀ чре́ва, на прⷭ҇то́лѣ црⷭ҇тва є҆гѡ̀, / і҆а́кѡвлю тѧ̀ добро́тꙋ, є҆ди́нꙋ и҆збра̀ въ слове́сное селе́нїе."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Возопѝ, проѡбразꙋ́ѧ погребе́нїе тридне́вное, / прⷪ҇ро́къ і҆ѡ́на, въ ки́тѣ молѧ́сѧ: / ѿ тлѝ и҆зба́ви мѧ̀, / і҆и҃се, цр҃ю̀ си́лъ."
 },
 {
  "type": "TEXT",
  "value": "[Бцⷣа речѐ] Глагѡ́лъ твои́хъ, гаврїи́ле, гла́съ ра́дованенъ прїе́мши, весе́лїѧ бжⷭ҇твеннагѡ и҆спо́лнихсѧ: / ра́дость бо повѣ́даеши, и҆ весе́лїе возвѣща́еши безконе́чное."
 },
 {
  "type": "TEXT",
  "value": "[А҆́гг҃лъ возопѝ] Тебѣ̀ даде́сѧ ра́дость, бг҃омт҃и, бжⷭ҇твеннаѧ: / тебѣ̀, є҆́же ра́дꙋйсѧ, всѧ̀ тва́рь вопїе́тъ, бг҃оневѣ́сто: / ты́ бо є҆ди́на мт҃и сн҃а бж҃їѧ пронарече́сѧ, чⷭ҇таѧ."
 },
 {
  "type": "TEXT",
  "value": "[Бцⷣа речѐ] Є҆́ѵы мно́ю ны́нѣ да ᲂу҆праздни́тсѧ ѡ҆сꙋжде́нїе, / да возда́стсѧ мно́ю до́лгъ дне́сь: / мно́ю заи́мствованїе дре́внее да да́стсѧ преиспо́лнено."
 },
 {
  "type": "TEXT",
  "value": "[А҆́гг҃лъ возопѝ] Ѡ҆бѣща́сѧ бг҃ъ а҆враа́мꙋ пра́ѻц҃ꙋ, / благослови́тисѧ въ сѣ́мени є҆гѡ̀ ꙗ҆зы́кѡмъ, чⷭ҇таѧ: / тобо́ю же коне́цъ ѡ҆бѣща́нїе прїе́млетъ дне́сь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "В збра́нной воево́дѣ побѣди́тєльнаѧ, / ꙗ҆́кѡ и҆зба́вльшесѧ ѿ ѕлы́хъ, / благода́рствєннаѧ восписꙋ́емъ тѝ рабѝ твоѝ, бцⷣе: / но ꙗ҆́кѡ и҆мꙋ́щаѧ держа́вꙋ непобѣди́мꙋю, / ѿ всѧ́кихъ на́съ бѣ́дъ свободѝ, да зове́мъ тѝ: / ра́дꙋйсѧ, невѣ́сто неневѣ́стнаѧ."
 },
 {
  "type": "TEXT",
  "value": "І҆́косъ: А҆́гг҃лъ предста́тель съ нб҃сѐ по́сланъ бы́сть рещѝ бцⷣѣ, ра́дꙋйсѧ, / и҆ со безпло́тнымъ гла́сомъ воплоща́ема тѧ̀ зрѧ̀, гдⷭ҇и, ᲂу҆жаса́шесѧ, / и҆ стоѧ́ше, зовы́й къ не́й такова̑ѧ: / ра́дꙋйсѧ, є҆́юже ра́дость возсїѧ́етъ: / ра́дꙋйсѧ, є҆́юже клѧ́тва и҆сче́знетъ: / ра́дꙋйсѧ, па́дшагѡ а҆да́ма воззва́нїе: / ра́дꙋйсѧ, сле́зъ є҆́ѵиныхъ и҆збавле́нїе: / ра́дꙋйсѧ, высото̀, неꙋдобовосходи́маѧ человѣ́ческими по́мыслы: / ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма: / ра́дꙋйсѧ, ꙗ҆́кѡ є҆сѝ цр҃е́во сѣда́лище: / ра́дꙋйсѧ, ꙗ҆́кѡ но́сиши носѧ́щаго всѧ̑: / ра́дꙋйсѧ, ѕвѣздо̀, ꙗ҆влѧ́ющаѧ сл҃нце: / ра́дꙋйсѧ, ᲂу҆тро́бо бжⷭ҇твеннагѡ воплоще́нїѧ: / ра́дꙋйсѧ, є҆́юже ѡ҆бновлѧ́етсѧ тва́рь: / ра́дꙋйсѧ, є҆́юже покланѧ́емсѧ творцꙋ̀. / ра́дꙋйсѧ, невѣ́сто неневѣ́стнаѧ."
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Не послꙋжи́ша тва́ри бг҃омꙋ́дрїи / па́че созда́вшагѡ, / но ѻ҆́гненное преще́нїе мꙋ́жески попра́вше, / ра́довахꙋсѧ пою́ще: / препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "[Бцⷣа речѐ] Свѣ́тъ невеще́ственный повѣ́даѧ, въ веще́ственнѣ тѣлесѝ совокꙋплѧ́емь за милосе́рдїе мно́гое, / свѣ́тлое благовѣ́щенїе, бжⷭ҇твєннаѧ проповѣ̑данїѧ, ны́нѣ взыва́еши мѝ: / благослове́нъ, всечⷭ҇таѧ, пло́дъ твоегѡ̀ чре́ва."
 },
 {
  "type": "TEXT",
  "value": "[А҆́гг҃лъ возопѝ] Ра́дꙋйсѧ, влⷣчце дв҃о, / ра́дꙋйсѧ, пречⷭ҇таѧ, / ра́дꙋйсѧ, прїѧ́телище бж҃їе: / ра́дꙋйсѧ, свѣ́щниче свѣ́та, а҆да́мово воззва́нїе, / є҆́ѵы и҆збавле́нїе, горо̀ ст҃а́ѧ, / преѧ́вственное свѧще́нїе и҆ черто́гъ безсме́ртїѧ."
 },
 {
  "type": "TEXT",
  "value": "[Бцⷣа речѐ] Дꙋ́шꙋ ѡ҆чи́сти, тѣ́ло ѡ҆свѧтѝ, / це́рковь сотвори́ мѧ вмѣсти́тельнꙋ бг҃а, / ски́нїю бг҃оꙋкра́шенꙋ, ѡ҆дꙋшевле́нъ хра́мъ наи́тїемъ прест҃а́гѡ дх҃а, / и҆ жи́зни чⷭ҇тꙋю мт҃рь."
 },
 {
  "type": "TEXT",
  "value": "[А҆́гг҃лъ возопѝ] Ꙗ҆́кѡ многосвѣ́тлꙋю свѣщꙋ̀, и҆ бг҃одѣ́ланенъ черто́гъ / ви́жꙋ тѧ̀ ны́нѣ ꙗ҆́кѡ зла́тъ кївѡ́тъ, / зако́на пода́телѧ прїимѝ, бг҃оневѣ́сто, / благоизво́лившаго человѣ́ческое и҆зба́вити тобо́ю тлѣ́нное сꙋщество̀."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Слы́ши, ѻ҆трокови́це дв҃о чⷭ҇таѧ, / да рече́тъ ᲂу҆́бѡ гаврїи́лъ / совѣ́тъ вы́шнѧгѡ дре́внїй и҆́стинный, / бꙋ́ди къ прїѧ́тїю гото́ва бж҃їю: / тобо́ю бо невмѣсти́мый съ человѣ́ки поживѐ. / тѣ́мъ и҆ ра́дꙋѧсѧ вопїю̀: / благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "[Бцⷣа речѐ] Оу҆́мъ всѧ́къ побѣжда́етсѧ земны́хъ, ѿвѣща̀ дв҃и́ца, / и҆́щꙋщи ꙗ҆̀же мнѣ̀ вѣща́еши пресла̑внаѧ: / слы́шахъ твоѧ̑ словеса̀, но бою́сѧ ᲂу҆жаса́ющисѧ, / да не ле́стїю мѧ̀, ꙗ҆́кѡ є҆́ѵꙋ дале́че по́слеши ѿ бг҃а. / но ѻ҆ба́че сѐ вопїю̀: / благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "[А҆́гг҃лъ возопѝ] Сѐ тебѣ̀ недоꙋмѣ́нное разрѣши́сѧ, глаго́летъ къ си̑мъ гаврїи́лъ: до́брѣ бо рекла̀ є҆сѝ, ве́щь неꙋдобопости́жна, / словесє́мъ твои́хъ ᲂу҆сте́нъ повинꙋ́ющисѧ про́чее. / не сꙋмни́сѧ ꙗ҆́кѡ ле́сти, ꙗ҆́коже ве́щи вѣ́рꙋй: / а҆́зъ бо ра́дꙋѧсѧ вопїю̀: / благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "[Бцⷣа речѐ] Зако́нъ се́й ѿ бг҃а є҆́сть человѣ́кѡмъ, непоро́чнаѧ а҆́бїе глаго́летъ, / ѻ҆́бщїѧ любвѐ ржⷭ҇тво̀ происхо́дитъ, / не вѣ́мъ сꙋпрꙋ́жника сла́сти всеконе́чнѡ: / ка́кѡ ᲂу҆́бѡ глаго́леши, ꙗ҆́кѡ рождꙋ̀; / бою́сѧ, є҆гда̀ ле́сть глаго́леши; / но ѻ҆ба́че сѐ вопїю̀: / благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "[А҆́гг҃лъ возопѝ] Глаго́лы, ꙗ҆̀же мнѣ̀ вѣща́еши, чⷭ҇таѧ, / а҆́гг҃лъ па́ки глаго́летъ, / ѻ҆бы́чаѧ є҆́сть рождества̀ человѣ́кѡвъ сме́ртныхъ: / и҆́стиннѡ бг҃а тебѣ̀ ѡ҆бѣщава́ю, / па́че сло́ва же и҆ смы́сла воплоща́ема, ꙗ҆́кѡ вѣ́сть, и҆зъ тебє̀. / тѣ́мже и҆ ра́дꙋѧсѧ, вопїю̀: / благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "[Бцⷣа речѐ] Ꙗ҆влѧ́ешисѧ мнѣ̀ и҆́стины вѣща́тель, речѐ дв҃а, / ра́дости бо ѻ҆́бщїѧ прише́лъ є҆сѝ благовѣ́стникъ: / дꙋ́шꙋ ᲂу҆́бѡ ѡ҆чи́стихъ съ тѣ́ломъ, и҆ по глаго́лꙋ твоемꙋ̀ бꙋ́ди мнѣ̀, / да всели́тсѧ бг҃ъ въ мѧ̀, къ немꙋ́же вопїю̀ съ тобо́ю: / благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "На ѳ҃-й пѣ́сни па́ки вжига́ютъ свѣщы̀ бра́тїѧ. Честнѣ́йшꙋю не пое́мъ, но пое́мъ припѣ́въ пра́здника:"
 },
 {
  "type": "TEXT",
  "value": "Б лаговѣствꙋ́й, землѐ, ра́дость ве́лїю, / хвали́те, небеса̀, бж҃їю сла́вꙋ."
 },
 {
  "type": "TEXT",
  "value": "Та́же і҆рмо́съ: Ꙗ҆́кѡ ѡ҆дꙋшевле́нномꙋ: Подо́бнѣ и҆ в҃-й ли́къ припѣ́въ, и҆ і҆рмо́съ: и҆ къ про́чымъ тропарє́мъ пра́здника, то́йже припѣ́въ."
 },
 {
  "type": "TEXT",
  "value": "Оу҆ трипѣ́снца же къ тропарє́мъ припѣва́емъ: Сла́ва тебѣ̀, бж҃е на́шъ, сла́ва тебѣ̀. Къ бг҃орѡ́дичнымъ припѣва́емъ припѣ́въ пра́здника."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, / да ника́коже ко́снетсѧ рꙋка̀ скве́рныхъ. / ᲂу҆стнѣ́ же вѣ́рныхъ бцⷣѣ немо́лчнѡ, / гла́съ а҆́гг҃ла воспѣва́юще, / съ ра́достїю да вопїю́тъ: / ра́дꙋйсѧ, благода́тнаѧ, / гдⷭ҇ь съ тобо́ю."
 },
 {
  "type": "TEXT",
  "value": "П а́че смы́сла заче́нши бг҃а, є҆стества̀ ѻ҆бы́чаѧ ᲂу҆таи́сѧ, ѻ҆трокови́це: / ты́ бо въ ржⷭ҇твѣ̀ мт҃рскагѡ и҆збѣжа́ла є҆сѝ тлѣ́ннагѡ є҆стества̀, / и҆ превы́шши сꙋ́щи. / тѣ́мже досто́йнѡ слы́шиши: / ра́дꙋйсѧ, благода́тнаѧ, гдⷭ҇ь съ тобо́ю."
 },
 {
  "type": "TEXT",
  "value": "К а́кѡ то́чиши млеко̀, дв҃о чⷭ҇таѧ, не мо́жетъ и҆зрещѝ ѧ҆зы́къ зе́мленъ: / стра́ннꙋ бо є҆стества̀ показꙋ́еши ве́щь, зако́ннагѡ ржⷭ҇тва̀ ᲂу҆ста́въ прехо́диши. / тѣ́мже досто́йнѡ слы́шиши: / ра́дꙋйсѧ, благода́тнаѧ, гдⷭ҇ь съ тобо́ю."
 },
 {
  "type": "TEXT",
  "value": "Т а́йнѡ во сщ҃е́нныхъ писа́нїихъ / глаго́ласѧ ѡ҆ тебѣ̀, мт҃и вы́шнѧгѡ: / лѣ́ствицꙋ бо дре́вле і҆а́кѡвъ тѧ̀ ѡ҆бразꙋ́ющꙋю ви́дѣвъ, речѐ: / степе́нь бж҃їѧ сїѧ̀. / тѣ́мже досто́йнѡ слы́шиши: / ра́дꙋйсѧ, благода́тнаѧ, гдⷭ҇ь съ тобо́ю."
 },
 {
  "type": "TEXT",
  "value": "Ч ꙋ́дное свѧщенноѧвле́нномꙋ мѡѷсе́ю / кꙋпина̀ и҆ ѻ҆́гнь, показа̀ чꙋ́до: / и҆ща́й же конца̀ въ прехожде́нїи време́нъ, во ѻ҆трокови́цѣ чⷭ҇тѣй, речѐ, ᲂу҆зрю̀. / є҆́йже, ꙗ҆́кѡ бцⷣѣ, да рече́тсѧ: / ра́дꙋйсѧ, благода́тнаѧ, гдⷭ҇ь съ тобо́ю."
 },
 {
  "type": "TEXT",
  "value": "Д анїи́лъ тѧ̀ го́рꙋ наречѐ мы́сленнꙋю: / роди́тельницꙋ же бж҃їю и҆са́їа: / ви́дитъ же ꙗ҆́кѡ рꙋно̀ гедеѡ́нъ: / дв҃дъ же свѧще́нїе глаго́летъ, две́рь же тѧ̀ и҆́нъ. / гаврїи́лъ же тебѣ̀ взыва́етъ: / ра́дꙋйсѧ, благода́тнаѧ, гдⷭ҇ь съ тобо́ю."
 },
 {
  "type": "TEXT",
  "value": "Та́же і҆рмо́съ трїѡ́ди, и҆ пра́здника припѣ́въ и҆ і҆рмо́съ, ѻ҆́ба ли̑ка вкꙋ́пѣ."
 },
 {
  "type": "HEADER",
  "value": "Свѣти́ленъ. Подо́бенъ: Со ᲂу҆ченикѝ:"
 },
 {
  "type": "TEXT",
  "value": "А҆́ г҃гльскихъ си́лъ а҆рхїстрати́гъ / по́сланъ бы́сть ѿ бг҃а вседержи́телѧ къ чⷭ҇тѣй и҆ дв҃ѣ, / благовѣсти́ти стра́нное и҆ неизрече́нное чꙋ́до: / занѐ бг҃ъ, ꙗ҆́кѡ чл҃вѣ́къ, и҆зъ неѧ̀ младодѣ́йствꙋетсѧ безъ сѣ́мене, / назида́ѧй ве́сь человѣ́ческїй ро́дъ: / лю́дїе, благовѣсти́те ѡ҆бновле́нїе мі́ра. [Два́жды.]"
 },
 {
  "type": "HEADER",
  "value": "Сла́ва, и҆ ны́нѣ, и҆́нъ свѣти́ленъ. Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Є҆́ же ѿ вѣ́ка дне́сь познава́етсѧ та́инство бж҃їе, / бг҃ъ сло́во, сн҃ъ дв҃ы мр҃і́и за милосе́рдїе быва́етъ, / и҆ ра́дость благовѣ́щенїѧ гаврїи́лъ провѣщава́етъ. / съ ни́мже возопїе́мъ є҆́й: / ра́дꙋйсѧ, мт҃и гдⷭ҇нѧ."
 },
 {
  "type": "HEADER",
  "value": "На хвали́техъ, Всѧ́кое дыха́нїе: и҆ пое́мъ стїхи̑ры, на д҃, гла́съ а҃. Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "С ъ нбⷭ҇ныхъ крꙋгѡ́въ слетѣ́въ гаврїи́лъ въ назаре́тъ, / прїи́де къ дв҃ѣ мр҃і́и, / вопїѧ̀ є҆́й: ра́дꙋйсѧ, / зачне́ши сн҃а, а҆да́ма дре́внѣйшаго, / творца̀ вѣкѡ́въ и҆ и҆зба́вителѧ, / вопїю́щихъ тебѣ̀: / ра́дꙋйсѧ, чⷭ҇таѧ."
 },
 {
  "type": "TEXT",
  "value": "С оприсносꙋ́щное сло́во пребезнача́льнагѡ ѻ҆ц҃а̀, / не разлꙋчи́всѧ го́рнихъ, / ны́нѣ предста̀ дѡ́льнымъ, ра́ди кра́йнѧгѡ благоꙋтро́бїѧ, / ми́лость прїе́мъ, є҆́же на ны̀ поползнове́нїѧ, / и҆ а҆да́мовꙋ нищетꙋ̀ воспрїе́мъ, / воѡбрази́сѧ въ чꙋжде́е."
 },
 {
  "type": "TEXT",
  "value": "Г аврїи́лъ дв҃ѣ благовѣ́стїе съ нб҃сѐ прине́съ, / вопїѧ́ше: ра́дꙋйсѧ, / зачне́ши во чре́вѣ твое́мъ, / тобо́ю вмѣсти́маго, / невмѣсти́маго же всѣ́ми: / и҆ ражда́ющаѧ ꙗ҆ви́шисѧ, / ѿ ѻ҆ц҃а̀ пре́жде денни́цы возсїѧ́вшаго."
 },
 {
  "type": "TEXT",
  "value": "П ресꙋ́щественное сло́во / пло́тїю всели́сѧ въ тѧ̀, / ѻ҆́ч҃имъ совѣ́томъ, бцⷣе дв҃о, / назда̀ ро́дъ, и҆́же по на́мъ, / па́дшїй ѿ дре́внїѧ клѧ́твы. / тѣ́мъ є҆́же ра́дꙋйсѧ, тебѣ̀ всѝ, мт҃и хрⷭ҇то́ва, / со а҆́гг҃ломъ вопїе́мъ вѣ́рнѡ."
 },
 {
  "type": "HEADER",
  "value": "Сла́ва, и҆ ны́нѣ, гла́съ в҃. Ѳеофа́ново:"
 },
 {
  "type": "TEXT",
  "value": "Є҆́ же ѿ вѣ́ка та́инство ѿкрыва́етсѧ дне́сь, / и҆ сн҃ъ бж҃їй сы́нъ человѣ́чь быва́етъ, / да хꙋ́ждшее воспрїе́мъ пода́стъ мѝ лꙋ́чшее, / солга́сѧ дре́вле а҆да́мъ, / и҆ бг҃ъ возжелѣ́въ бы́ти, не бы́сть: / чл҃вѣ́къ быва́етъ бг҃ъ, / да бо́га а҆да́ма содѣ́лаетъ. / да весели́тсѧ тва́рь, да ликовствꙋ́етъ є҆стество̀, / ꙗ҆́кѡ а҆рха́гг҃лъ дв҃ѣ со стра́хомъ предстои́тъ: / и҆ є҆́же ра́дꙋйсѧ прино́ситъ, печа́ли сопроти́вное. / за милосе́рдїе ми́лости вочл҃вѣ́чивыйсѧ, / бж҃е на́шъ, сла́ва тебѣ̀."
 },
 {
  "type": "TEXT",
  "value": "А҆́ще є҆́сть сꙋббѡ́та, и҆лѝ недѣ́лѧ, славосло́вїе вели́кое и҆ є҆ктєнїѝ, и҆ ѿпꙋ́стъ. А҆́ще же де́нь по́стенъ, пое́мъ на стїхо́внѣ трїѡ́ди самогла́сенъ днѐ, два́жды: и҆ мꙋ́чениченъ."
 },
 {
  "type": "HEADER",
  "value": "Сла́ва, и҆ ны́нѣ, пра́здника, гла́съ и҃:"
 },
 {
  "type": "TEXT",
  "value": "Д а веселѧ́тсѧ небеса̀, и҆ ра́дꙋетсѧ землѧ̀: / и҆́бо ѻ҆ц҃ꙋ̀ соприсносꙋ́щный, собезнача́льный и҆ сопресто́льный, / щедро́тство прїе́мъ, и҆ человѣколю́бнꙋю ми́лость, / себѐ поста́ви во и҆стоща́нїе, / благоволе́нїемъ и҆ совѣ́томъ ѻ҆́ч҃имъ, / и҆ во ᲂу҆тро́бꙋ всели́сѧ дѣви́чꙋ, пред̾ѡчище́ннꙋю дх҃омъ. / ѽ чꙋдесѐ! бг҃ъ въ человѣ́цѣхъ, / невмѣсти́мый въ ложесна́хъ, безлѣ́тный въ лѣ́то: / и҆ є҆́же пресла́внѣе, ꙗ҆́кѡ и҆ зача́тїе безсѣ́менно, / и҆ и҆стоща́нїе несказа́нно, и҆ та́инство є҆ли́ко. / бг҃ъ бо и҆стощава́етсѧ и҆ воплоща́етсѧ, и҆ зи́ждетсѧ, / а҆́гг҃лꙋ къ чⷭ҇тѣй зача́тїе глаго́лавшꙋ: / ра́дꙋйсѧ, ѡ҆бра́дованнаѧ, гдⷭ҇ь съ тобо́ю, / и҆мѣ́ѧй ве́лїю ми́лость."
 },
 {
  "type": "TEXT",
  "value": "Та́же, Бла́го є҆́сть: є҆ди́ножды. По Ѻ҆́ч҃е на́шъ, тропа́рь пра́здника, и҆ є҆ктенїа̀, въ коне́цъ трѝ покло́ны вели̑кїѧ, безъ ѿпꙋ́ста ᲂу҆́трени: дае́тсѧ же и҆ ст҃ы́й є҆ле́й бра́тїи, и҆ пое́тсѧ стїхи́ра самогла́сна, и҆ ча́съ а҃-й съ каѳі́смою. Тропа́рь и҆ конда́къ пра́здника, и҆ въ коне́цъ трѝ покло́ны вели̑кїѧ, и҆ моли́тва: Хрⷭ҇тѐ, свѣ́те и҆́стинный:"
 },
 {
  "type": "HEADER",
  "value": "И҆ ѿпꙋ́стъ:"
 },
 {
  "type": "TEXT",
  "value": "Х рⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, ст҃ы́хъ првⷣныхъ бг҃оѻц҃ъ і҆ѡакі́ма и҆ а҆́нны, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ человѣколю́бецъ."
 },
 {
  "type": "TEXT",
  "value": "Въ г҃-й же ча́съ днѐ и҆схо́димъ со крⷭ҇ты̀ съ лїті́ею внѣ̀ монастырѧ̀: и҆ возвра́щшесѧ вхо́димъ въ трапе́зꙋ, и҆ пое́мъ ча́съ г҃-й, ѕ҃-й, съ каѳі́смами, безъ покло́нѡвъ, тропа́рь и҆ конда́къ пра́здника. На часѣ́хъ же въ кампа́нъ не ᲂу҆дарѧ́емъ, на ѕ҃-мъ часѣ̀ пое́мъ тропа́рь паремїѝ трїѡ́ди, и҆ прѡ́чаѧ по чи́нꙋ и҆́хъ, и҆ паремїа̀. И҆ чте́мъ сло́во, є҆мꙋ́же нача́ло: Па́ки ра́дость бл҃говѣ́щенїѧ: Присовокꙋплѧ́емъ же и҆ ѳ҃-й ча́съ съ каѳі́смою и҆ чте́нїемъ. Посе́мъ бл҃жє́нна ско́рѡ безъ пѣ́нїѧ и҆ безъ покло́нѡвъ. Помѧнѝ на́съ, гдⷭ҇и: Л и́къ нбⷭ҇ный. Сла́ва: Ли́къ ст҃ы́хъ а҆́гг҃лъ: Ѡ҆ сла́би, ѡ҆ста́ви: По Ѻ҆́ч҃е на́шъ, конда́къ пра́здника. Гдⷭ҇и, поми́лꙋй, м҃. Сла́ва, и҆ ны́нѣ. Честнѣ́йшꙋю херꙋві̑мъ: И҆ покло́ны трѝ вели̑кїѧ, и҆ моли́тва: Всест҃а́ѧ трⷪ҇це: и҆ ѿпꙋ́стъ. И҆ пое́мъ вече́рню безъ каѳі́смы и҆ безъ покло́нѡвъ."
 },
 {
  "type": "HEADER",
  "value": "На вече́рни и҆ лїтꙋргі́и."
 },
 {
  "type": "TEXT",
  "value": "На Гдⷭ҇и, воззва́хъ, пое́мъ трїѡ́ди самогла́сенъ днѐ, два́жды, безъ мꙋ́ченична: и҆ подѡ́бны трїѡ́ди трѝ: и҆ пра́здника трѝ: и҆ а҆рха́гг҃ла трѝ."
 },
 {
  "type": "HEADER",
  "value": "Стїхи̑ры пра́здника, гла́съ д҃. Самогла̑сны:"
 },
 {
  "type": "TEXT",
  "value": "В ъ шесты́й мѣ́сѧцъ по́сланъ бы́сть а҆рха́гг҃лъ / къ дв҃ѣ чⷭ҇тѣй: / и҆ ра́доватисѧ є҆́й прире́къ, / благовѣстѝ и҆зъ неѧ̀ и҆зба́вителю проитѝ. / тѣ́мже прїи́мши цѣлова́нїе, / зача́тъ тѧ̀ превѣ́чнаго бг҃а, / несказа́ннѡ благоволи́вшаго вочеловѣ́читисѧ, / во спасе́нїе дꙋ́шъ на́шихъ."
 },
 {
  "type": "TEXT",
  "value": "Ѧ҆ зы́ка, є҆гѡ́же не вѣ́дѧше, ᲂу҆слы́ша бцⷣа: / глаго́лаше бо къ не́й а҆рха́гг҃лъ благовѣ́щенїѧ глаго́лы, / ѿѻнꙋ́дꙋже вѣ́рнѡ прїи́мши цѣлова́нїе, / зача́тъ тѧ̀ превѣ́чнаго бг҃а. / тѣ́мже и҆ мы̀ ра́дꙋющесѧ вопїе́мъ тѝ: / и҆зъ неѧ̀ воплоти́выйсѧ непрело́жнѡ, бж҃е, / ми́ръ мі́рови да́рꙋй, / и҆ дꙋша́мъ на́шымъ ве́лїю млⷭ҇ть."
 },
 {
  "type": "TEXT",
  "value": "С ѐ воззва́нїе ны́нѣ ꙗ҆ви́сѧ на́мъ, / па́че сло́ва бг҃ъ человѣ́кѡмъ соединѧ́етсѧ, / а҆рха́гг҃ловымъ гла́сомъ пре́лесть ѿгонѧ́етсѧ: / дв҃а бо прїе́млетъ ра́дость, / земна̑ѧ бы́ша нб҃о. / мі́ръ разрѣши́сѧ пе́рвыѧ клѧ́твы. / да ра́дꙋетсѧ тва́рь, и҆ гла́сы да воспое́тъ: / тво́рче и҆ и҆зба́вителю на́шъ, / гдⷭ҇и, сла́ва тебѣ̀."
 },
 {
  "type": "HEADER",
  "value": "А҆рха́гг҃ла стїхи̑ры, гла́съ а҃. Подо́бенъ: Всехва́льнїи мч҃ницы:"
 },
 {
  "type": "TEXT",
  "value": "Г аврїи́лъ вели́кїй, / ᲂу҆́мъ бг҃ови́днѣйшїй, свѣтоза́рный и҆ спаси́тельный, / свѣ́тъ трисо́лнечный зри́тъ, / и҆ пое́тъ съ вы́шними чи́ны / бжⷭ҇твенное и҆ стра́шное пѣ́нїе: / мо́литъ дарова́ти дꙋша́мъ на́шымъ / ми́ръ и҆ ве́лїю ми́лость."
 },
 {
  "type": "TEXT",
  "value": "В ели́кое та́инство, / пе́рвѣе а҆́гг҃лѡмъ невѣ́домое, / и҆ пре́жде вѣ̑къ соблюда́емое, / є҆ди́номꙋ ᲂу҆вѣ́рисѧ тебѣ̀, гаврїи́ле, / и҆ сїѐ є҆ди́нѣй повѣ́далъ є҆сѝ чⷭ҇тѣй, въ назаре́тъ прише́дъ, / съ не́юже молѝ, / дарова́ти дꙋша́мъ на́шымъ / ми́ръ и҆ ве́лїю ми́лость."
 },
 {
  "type": "TEXT",
  "value": "Къ а҃і стїхꙋ̀ припѣ́въ: Творѧ́й а҆́гг҃лы своѧ̑ дх҃и, / и҆ слꙋги̑ своѧ̑ пла́мень ѻ҆́гненный."
 },
 {
  "type": "TEXT",
  "value": "С вѣ́та сы́й и҆спо́лнь при́снѡ, / и҆ творѧ̀ хотѣ́нїе, / и҆ скончава́ѧ повелѣ̑нїѧ вседержи́телѧ, / нача́льниче а҆́гг҃лѡвъ, / гаврїи́ле всеизрѧ́дне, / любо́вїю тѧ̀ чтꙋ́щыѧ спаса́й, / при́снѡ просѧ̀, / дарова́ти дꙋша́мъ на́шымъ / ми́ръ и҆ ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, гла́съ ѕ҃ Самогла́сенъ:"
 },
 {
  "type": "TEXT",
  "value": "П о́сланъ бы́сть съ нб҃сѐ гаврїи́лъ а҆рха́гг҃лъ, / благовѣсти́ти дв҃ѣ зача́тїе: / и҆ прише́дъ въ назаре́тъ, / помышлѧ́ше въ себѣ̀, чꙋдесѝ ᲂу҆дивлѧ́ѧсѧ. / ѽ ка́кѡ въ вы́шнихъ непостижи́мъ сы́й ѿ дв҃ы ражда́етсѧ: / и҆мѣ́ѧй престо́лъ нб҃о, и҆ подно́жїе зе́млю, / во ᲂу҆тро́бꙋ вмѣща́етсѧ дв҃и́чꙋ! / на него́же шестокрыла́тїи и҆ многоѻчи́тїи зрѣ́ти не мо́гꙋтъ, / сло́вомъ є҆ди́нѣмъ ѿ сеѧ̀ воплоти́тисѧ благоизво́ли. / бж҃їе є҆́сть сло́во настоѧ́щее, / что̀ ᲂу҆̀бо стою̀ и҆ не глаго́лю дв҃ѣ: / ра́дꙋйсѧ, благода́тнаѧ, гдⷭ҇ь съ тобо́ю: / ра́дꙋйсѧ, чⷭ҇таѧ дв҃о: / ра́дꙋйсѧ, невѣ́сто неневѣ́стнаѧ: / ра́дꙋйсѧ, мт҃и живота̀, / благослове́нъ пло́дъ чре́ва твоегѡ̀!"
 },
 {
  "type": "TEXT",
  "value": "І҆ере́й же твори́тъ проскомі́дїю въ стїхи̑ры."
 },
 {
  "type": "TEXT",
  "value": "Вхо́дъ со є҆ѵⷢ҇лїемъ. Свѣ́те ти́хїй: Прокі́менъ, и҆ чтє́нїѧ днѐ, и҆ пра́здника двѣ̀:"
 },
 {
  "type": "HEADER",
  "value": "И҆схо́да чте́нїе."
 },
 {
  "type": "TEXT",
  "value": "[Глава̀ г҃] Вни́де мѡѷсе́й въ го́рꙋ бж҃їю хѡри́въ, ꙗ҆ви́сѧ же є҆мꙋ̀ а҆́гг҃лъ гдⷭ҇ень въ пла́мени ѻ҆́гненнѣ и҆зъ кꙋпины̀, и҆ ви́дѣ ꙗ҆́кѡ кꙋпина̀ горѧ́ше ѻ҆гне́мъ, и҆ кꙋпина̀ не сгара́ше. рече́ же мѡѷсе́й: прише́дъ, ᲂу҆зрю̀ видѣ́нїе вели́кое сїѐ, что̀ ꙗ҆́кѡ не сгара́етъ кꙋпина̀; ꙗ҆́коже ви́дѣ гдⷭ҇ь, ꙗ҆́кѡ пристꙋпа́етъ ви́дѣти, призва̀ є҆го̀ гдⷭ҇ь и҆зъ кꙋпины̀, глаго́лѧ: мѡѷсе́е, мѡѷсе́е. ѻ҆́нъ же речѐ: что́ є҆сть; и҆ речѐ: не прибли́жисѧ сѣ́мѡ: и҆ззꙋ́й сапо́гъ ѿ ногꙋ̀ твоє́ю. мѣ́сто бо, на не́мже ты̀ стои́ши, землѧ̀ ст҃а̀ є҆́сть. и҆ речѐ є҆мꙋ̀: а҆́зъ є҆́смь бг҃ъ ѻ҆тца̀ твоегѡ̀, бг҃ъ а҆враа́мовъ и҆ бг҃ъ і҆саа́ковъ, и҆ бг҃ъ і҆а́кѡвль. ѿврати́ же мѡѷсе́й лицѐ своѐ, стыдѧ́шебосѧ зрѣ́ти предъ бг҃омъ. рече́ же гдⷭ҇ь къ мѡѷсе́ю: ви́дѧ ви́дѣхъ ѡ҆ѕлобле́нїе люде́й мои́хъ, и҆̀же во є҆гѵ́птѣ: и҆ во́пль и҆́хъ ᲂу҆слы́шахъ ѿ наси́льствꙋющихъ въ дѣ́лѣхъ. вѣ́мъ бо болѣ́знь и҆́хъ, и҆ снидо́хъ, є҆́же и҆з̾ѧ́ти и҆̀хъ ѿ рꙋкѝ є҆гѵ́птѧнъ, и҆ и҆звестѝ и҆̀хъ ѿ землѝ ѻ҆́ныѧ, и҆ ввестѝ и҆̀хъ въ зе́млю бла́гꙋ и҆ мно́гꙋ, въ зе́млю точа́щꙋ ме́дъ и҆ млеко̀."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "[Глава̀ и҃] Гдⷭ҇ь созда́ мѧ нача́ло пꙋте́й свои́хъ, въ дѣла̀ своѧ̑. пре́жде вѣ̑къ ѡ҆снова́ мѧ въ нача́лѣ, пре́жде зе́млю сотвори́ти, и҆ пре́жде бє́здны содѣ́лати, пре́жде пройтѝ и҆сто́чникѡмъ водны̑мъ, пре́жде гора́мъ водрꙋзи́тисѧ, пре́жде же всѣ́хъ холмѡ́въ ражда́етъ мѧ̀. гдⷭ҇ь сотворѝ страны̑ и҆ пꙋсты̑ни, и҆ концы̀ населє́ны подъ небесе́мъ. є҆гда̀ гото́вѧше не́бо, съ ни́мъ бѣ́хъ, и҆ є҆гда̀ ѿлꙋча́ше себѣ̀ престо́лъ на вѣ́трѣхъ, є҆гда̀ крѣ̑пки творѧ́ше вы̑шнїѧ ѻ҆́блаки, и҆ ꙗ҆́кѡ твє́рды полага́ше и҆сто́чники поднб҃ⷭ҇ныѧ, внегда̀ полага́ти мо́рю предѣ́лъ є҆гѡ̀, и҆ во́ды не ми́мѡ и҆́дꙋтъ ᲂу҆́стъ є҆гѡ̀, и҆ крѣ̑пки творѧ́ше ѡ҆снова̑нїѧ землѝ, бѣ́хъ при не́мъ ᲂу҆строѧ́ѧ. а҆́зъ бѣ́хъ, ѡ҆ не́йже ра́довашесѧ, по всѧ̑ же дни̑ веселѧ́хсѧ предъ лице́мъ є҆гѡ̀, на всѧ́ко вре́мѧ."
 },
 {
  "type": "TEXT",
  "value": "Та́же є҆ктенїа̀ ма́лаѧ: и҆ возгла́съ трист҃а́гѡ, и҆ трист҃о́е."
 },
 {
  "type": "TEXT",
  "value": "А҆́ще слꙋчи́тсѧ благовѣ́щенїе прест҃ы́ѧ бцⷣы въ сꙋббѡ́тꙋ, и҆лѝ въ недѣ́лю, пое́мъ лїтꙋргі́ю, и҆ блажє́нна ѿ канѡ́на пра́здника пѣ́снь г҃-ѧ на д҃: и҆ пѣ́снь ѕ҃-ѧ на д҃. А҆́ще и҆зво́литъ настоѧ́тель, пое́мъ а҆нтїфѡ́ны пра́здника."
 },
 {
  "type": "HEADER",
  "value": "А҆нтїфѡ́нъ а҃, гла́съ в҃."
 },
 {
  "type": "TEXT",
  "value": "Сті́хъ а҃: Бж҃е, сꙋ́дъ тво́й царе́ви да́ждь, / и҆ пра́вдꙋ твою̀ сы́нꙋ царе́вꙋ."
 },
 {
  "type": "TEXT",
  "value": "Моли́твами бцⷣы, сп҃се, / спасѝ на́съ."
 },
 {
  "type": "TEXT",
  "value": "Сті́хъ в҃: Да воспрїи́мꙋтъ го́ры ми́ръ лю́демъ / и҆ хо́лми пра́вдꙋ."
 },
 {
  "type": "TEXT",
  "value": "Моли́твами бцⷣы, сп҃се, / спасѝ на́съ."
 },
 {
  "type": "TEXT",
  "value": "Сті́хъ г҃: Бл҃говѣсти́те де́нь ѿ днѐ / сп҃се́нїе бг҃а на́шегѡ."
 },
 {
  "type": "TEXT",
  "value": "Моли́твами бцⷣы, сп҃се, / спасѝ на́съ."
 },
 {
  "type": "TEXT",
  "value": "Сті́хъ д҃: Клѧ́тсѧ гдⷭ҇ь дв҃дꙋ и҆́стиною, / и҆ не ѿве́ржетсѧ є҆ѧ̀."
 },
 {
  "type": "TEXT",
  "value": "Моли́твами бцⷣы, сп҃се, / спасѝ на́съ."
 },
 {
  "type": "TEXT",
  "value": "Сла́ва, и҆ ны́нѣ: Моли́твами бцⷣы, сп҃се, / спасѝ на́съ."
 },
 {
  "type": "HEADER",
  "value": "А҆нтїфѡ́нъ в҃, гла́съ в҃."
 },
 {
  "type": "TEXT",
  "value": "Сті́хъ а҃: Сни́детъ ꙗ҆́кѡ до́ждь на рꙋно̀, / и҆ ꙗ҆́кѡ ка́плѧ ка́плющаѧ на зе́млю."
 },
 {
  "type": "TEXT",
  "value": "Спасѝ ны, сн҃е бж҃їй, / на́съ ра́ди воплоти́выйсѧ, пою́щыѧ тѝ: а҆ллилꙋ́їа."
 },
 {
  "type": "TEXT",
  "value": "Сті́хъ в҃: Ѡ҆ст҃и́лъ є҆́сть / селе́нїе своѐ вы́шнїй."
 },
 {
  "type": "TEXT",
  "value": "Спасѝ ны, сн҃е бж҃їй, / на́съ ра́ди воплоти́выйсѧ, пою́щыѧ тѝ: а҆ллилꙋ́їа."
 },
 {
  "type": "TEXT",
  "value": "Сті́хъ г҃: Бг҃ъ ꙗ҆́вѣ прїи́детъ, / бг҃ъ на́шъ, и҆ не премолчи́тъ."
 },
 {
  "type": "TEXT",
  "value": "Спасѝ ны, сн҃е бж҃їй, / на́съ ра́ди воплоти́выйсѧ, пою́щыѧ тѝ: а҆ллилꙋ́їа."
 },
 {
  "type": "TEXT",
  "value": "Сті́хъ д҃: Возсїѧ́етъ во дне́хъ є҆гѡ̀ пра́вда / и҆ мно́жество ми́ра."
 },
 {
  "type": "TEXT",
  "value": "Спасѝ ны, сн҃е бж҃їй, / на́съ ра́ди воплоти́выйсѧ, пою́щыѧ тѝ: а҆ллилꙋ́їа."
 },
 {
  "type": "TEXT",
  "value": "Сла́ва, и҆ ны́нѣ: Є҆диноро́дный сн҃е:"
 },
 {
  "type": "HEADER",
  "value": "А҆нтїфѡ́нъ г҃, гла́съ д҃."
 },
 {
  "type": "TEXT",
  "value": "Сті́хъ а҃: Бꙋ́детъ и҆́мѧ є҆гѡ̀ / бл҃гослове́но во вѣ́ки."
 },
 {
  "type": "HEADER",
  "value": "Тропа́рь пра́здника, гла́съ д҃:"
 },
 {
  "type": "TEXT",
  "value": "Д не́сь спасе́нїѧ на́шегѡ глави́зна, / и҆ є҆́же ѿ вѣ́ка та́инства ꙗ҆вле́нїе: / сн҃ъ бж҃їй, сн҃ъ дв҃ы быва́етъ, / и҆ гаврїи́лъ благода́ть благовѣствꙋ́етъ. / тѣ́мже и҆ мы̀ съ ни́мъ бцⷣѣ возопїи́мъ: / ра́дꙋйсѧ, бл҃года́тнаѧ, / гдⷭ҇ь съ тобо́ю."
 },
 {
  "type": "TEXT",
  "value": "Сті́хъ в҃: Бл҃гослове́нъ гдⷭ҇ь бг҃ъ і҆и҃левъ, / творѧ́й чꙋдеса̀ є҆ди́нъ."
 },
 {
  "type": "TEXT",
  "value": "Тропа́рь: Дне́сь спасе́нїѧ на́шегѡ глави́зна:"
 },
 {
  "type": "TEXT",
  "value": "Сті́хъ г҃: Бл҃гослове́но и҆́мѧ сла́вы є҆гѡ̀ / во вѣ́къ и҆ въ вѣ́къ вѣ́ка."
 },
 {
  "type": "TEXT",
  "value": "Тропа́рь: Дне́сь спасе́нїѧ на́шегѡ глави́зна:"
 },
 {
  "type": "HEADER",
  "value": "Вхо́дное."
 },
 {
  "type": "TEXT",
  "value": "Сті́хъ: Бл҃говѣсти́те де́нь ѿ днѐ / сп҃се́нїе бг҃а на́шегѡ."
 },
 {
  "type": "TEXT",
  "value": "Мы̀ же: Прїиди́те, поклони́мсѧ и҆ припаде́мъ ко хрⷭ҇тꙋ̀. / спасѝ ны, сн҃е бж҃їй, / на́съ ра́ди воплоти́выйсѧ, пою́щыѧ тѝ: / а҆ллилꙋ́їа."
 },
 {
  "type": "HEADER",
  "value": "По вхо́дѣ тропа́рь пра́здника, гла́съ д҃:"
 },
 {
  "type": "TEXT",
  "value": "Д не́сь спасе́нїѧ на́шегѡ глави́зна, / и҆ є҆́же ѿ вѣ́ка та́инства ꙗ҆вле́нїе: / сн҃ъ бж҃їй, сн҃ъ дв҃ы быва́етъ, / и҆ гаврїи́лъ благода́ть благовѣствꙋ́етъ. / тѣ́мже и҆ мы̀ съ ни́мъ бцⷣѣ возопїи́мъ: / ра́дꙋйсѧ, бл҃года́тнаѧ, / гдⷭ҇ь съ тобо́ю."
 },
 {
  "type": "HEADER",
  "value": "Сла́ва, и҆ ны́нѣ, конда́къ, гла́съ и҃:"
 },
 {
  "type": "TEXT",
  "value": "В збра́нной воево́дѣ побѣди́тєльнаѧ, / ꙗ҆́кѡ и҆зба́вльшесѧ ѿ ѕлы́хъ, / благода́рствєннаѧ восписꙋ́емъ тѝ рабѝ твоѝ, бцⷣе: / но ꙗ҆́кѡ и҆мꙋ́щаѧ держа́вꙋ непобѣди́мꙋю, / ѿ всѧ́кихъ на́съ бѣ́дъ свободѝ, да зове́мъ тѝ: / ра́дꙋйсѧ, невѣ́сто неневѣ́стнаѧ."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Б л҃говѣсти́те де́нь ѿ днѐ / спасе́нїе бг҃а на́шегѡ. Сті́хъ: Воспо́йте гдⷭ҇еви пѣ́снь но́вꙋ, воспо́йте гдⷭ҇еви, всѧ̀ землѧ̀."
 },
 {
  "type": "HEADER",
  "value": "А҆пⷭ҇лъ къ є҆вре́ємъ, зача́ло т҃ѕ."
 },
 {
  "type": "TEXT",
  "value": "Б ра́тїе, ст҃ѧ́й и҆ ѡ҆сщ҃а́емїи, ѿ є҆ди́нагѡ всѝ: є҆ѧ́же ра́ди вины̀ не стыди́тсѧ бра́тїю нарица́ти и҆̀хъ, глаго́лѧ: возвѣщꙋ̀ и҆́мѧ твоѐ бра́тїи мое́й, посредѣ̀ цр҃кве воспою́ тѧ. и҆ па́ки: а҆́зъ бꙋ́дꙋ надѣ́ѧсѧ на́нь. и҆ па́ки: сѐ а҆́зъ и҆ дѣ́ти, ꙗ҆̀же мѝ да́лъ є҆́сть бг҃ъ. поне́же ᲂу҆́бѡ дѣ́ти прїѡбщи́шасѧ пло́ти и҆ кро́ви, и҆ то́й прїи́скреннѣ прїѡбщи́сѧ тѣ́хже, да сме́ртїю ᲂу҆праздни́тъ и҆мꙋ́щаго держа́вꙋ сме́рти, си́рѣчь, дїа́вола: и҆ и҆зба́витъ си́хъ, є҆ли́цы стра́хомъ сме́рти чрез̾ всѐ житїѐ пови́нни бѣ́ша рабо́тѣ. не ѿ а҆́гг҃лъ ᲂу҆́бѡ когда̀ прїе́млетъ, но ѿ сѣ́мене а҆враа́мова прїе́млетъ: ѿню́дꙋже до́лженъ бѣ̀ по всемꙋ̀ подо́битисѧ бра́тїи, да ми́лостивъ бꙋ́детъ и҆ вѣ́ренъ первосщ҃е́нникъ въ тѣ́хъ, ꙗ҆̀же къ бг҃ꙋ, во є҆́же ѡ҆чи́стити грѣхѝ людскі́ѧ. въ не́мже бо пострада̀ са́мъ и҆скꙋше́нъ бы́въ, мо́жетъ и҆ и҆скꙋша́ємымъ помощѝ."
 },
 {
  "type": "HEADER",
  "value": "А҆ллилꙋ́їа, гла́съ а҃."
 },
 {
  "type": "TEXT",
  "value": "Сті́хъ: Сни́детъ ꙗ҆́кѡ до́ждь на рꙋно̀, и҆ ꙗ҆́кѡ ка́плѧ ка́плющаѧ на зе́млю. Сті́хъ: Бꙋ́детъ и҆́мѧ є҆гѡ̀ благослове́но во вѣ́ки, пре́жде со́лнца пребыва́етъ и҆́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋки́, зача́ло г҃."
 },
 {
  "type": "TEXT",
  "value": "В о дне́хъ ѻ҆́нѣхъ, зача́тъ є҆лїсаве́тъ жена̀ заха́рїина и҆ таѧ́шесѧ мѣ̑сѧцъ пѧ́ть, глаго́лющи: ꙗ҆́кѡ та́кѡ мнѣ̀ сотворѝ гдⷭ҇ь во днѝ, въ нѧ́же призрѣ̀ ѿѧ́ти поноше́нїе моѐ въ человѣ́цѣхъ. въ мѣ́сѧцъ же шесты́й по́сланъ бы́сть а҆́гг҃лъ гаврїи́лъ ѿ бг҃а во гра́дъ галїле́йскїй, є҆мꙋ́же и҆́мѧ назаре́тъ, къ дв҃ѣ ѡ҆брꙋче́ннѣй мꙋ́жеви, є҆мꙋ́же и҆́мѧ і҆ѡ́сифъ, ѿ до́мꙋ даві́дова: и҆ и҆́мѧ дв҃ѣ, марїа́мъ. и҆ вше́дъ къ не́й а҆́гг҃лъ, речѐ: ра́дꙋйсѧ благода́тнаѧ, гдⷭ҇ь съ тобо́ю: благослове́на ты̀ въ жена́хъ. ѻ҆на́ же ви́дѣвши смꙋти́сѧ ѡ҆ словесѝ є҆гѡ̀, и҆ помышлѧ́ше, каково̀ бꙋ́детъ цѣлова́нїе сїѐ. и҆ речѐ а҆́гг҃лъ є҆́й: не бо́йсѧ марїа́мъ, ѡ҆брѣ́те бо бл҃года́ть ѿ бг҃а. и҆ сѐ зачне́ши во чре́вѣ, и҆ роди́ши сн҃а, и҆ нарече́ши и҆́мѧ є҆мꙋ̀ і҆и҃съ. се́й бꙋ́детъ ве́лїй, и҆ сн҃ъ вы́шнѧгѡ нарече́тсѧ: и҆ да́стъ є҆мꙋ̀ гдⷭ҇ь бг҃ъ прⷭ҇то́лъ даві́да ѻ҆тца̀ є҆гѡ̀: и҆ воцари́тсѧ въ домꙋ̀ і҆а́кѡвли во вѣ́ки, и҆ црⷭ҇твїю є҆гѡ̀ не бꙋ́детъ конца̀. рече́ же марїа́мъ ко а҆́гг҃лꙋ: ка́кѡ бꙋ́детъ сїѐ, и҆дѣ́же мꙋ́жа не зна́ю; и҆ ѿвѣща́въ а҆́гг҃лъ, речѐ є҆́й: дх҃ъ ст҃ы́й на́йдетъ на тѧ̀, и҆ си́ла вы́шнѧгѡ ѡ҆сѣни́тъ тѧ̀. тѣ́мже и҆ ражда́емое ст҃о, нарече́тсѧ сн҃ъ бж҃їй. и҆ сѐ є҆лїсаве́тъ ю҆́жика твоѧ̀, и҆ та̀ зача́тъ сы́на въ ста́рости свое́й: и҆ се́й мцⷭ҇ъ шесты́й є҆́сть є҆́й, нарица́емѣй непло́ды. ꙗ҆́кѡ не и҆знемо́жетъ ѿ бг҃а всѧ́къ глаго́лъ. рече́ же марїа́мъ: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀, и҆ ѿи́де ѿ неѧ̀ а҆́гг҃лъ."
 },
 {
  "type": "TEXT",
  "value": "И҆ прѡ́чаѧ бжⷭ҇твенныѧ лїтꙋргі́и златоꙋ́стагѡ."
 },
 {
  "type": "HEADER",
  "value": "Вмѣ́стѡ Досто́йно:"
 },
 {
  "type": "TEXT",
  "value": "Б лаговѣствꙋ́й, землѐ, ра́дость ве́лїю, / хвали́те, небеса̀, бж҃їю сла́вꙋ."
 },
 {
  "type": "TEXT",
  "value": "И҆ пое́мъ і҆рмо́съ, гла́съ д҃: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, / да ника́коже ко́снетсѧ рꙋка̀ скве́рныхъ. / ᲂу҆стнѣ́ же вѣ́рныхъ бцⷣѣ немо́лчнѡ, / гла́съ а҆́гг҃ла воспѣва́юще, / съ ра́достїю да вопїю́тъ: / ра́дꙋйсѧ, благода́тнаѧ, / гдⷭ҇ь съ тобо́ю."
 },
 {
  "type": "HEADER",
  "value": "Прича́стенъ:"
 },
 {
  "type": "TEXT",
  "value": "И҆ збра̀ гдⷭ҇ь сїѡ́на, / и҆ и҆зво́ли є҆го̀ въ жили́ще себѣ̀. / А҆ ллилꙋ́їа, три́жды."
 }
]