[
 {
  "type": "HEADER",
  "value": "І҆анꙋа́рїа є҃і"
 },
 {
  "type": "HEADER",
  "value": "Преподо́бнагѡ и҆ бг҃оно́снагѡ ѻ҆тца̀ на́шегѡ гаврїи́ла ле́сновскагѡ."
 },
 {
  "type": "HEADER",
  "value": "На вели́цѣй вече́рни, Блаже́нъ мꙋ́жъ, а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ, стїхи̑ры на и҃, гла́съ а҃, самогла́сны:"
 },
 {
  "type": "TEXT",
  "value": "Ѻ҆́тче гаврїи́ле преподо́бне, житїѐ твоѐ въ мі́рѣ се́мъ ꙗ҆ви́сѧ па́че є҆стества̀, и҆́бо на землѝ живѧ̀, безстра́стенъ пребы́лъ є҆сѝ, ми́ръ и҆ безмо́лвїе возлюби́лъ є҆сѝ, хрⷭ҇тꙋ̀ послѣ́дꙋѧ пꙋте́мъ тѣ́снымъ и҆ приско́рбнымъ, къ небє́снымъ ѻ҆би́телемъ возше́лъ є҆сѝ, и҆дѣ́же мо́лишисѧ непреста́ннѡ ѡ҆ спасе́нїи всѣ́хъ на́съ."
 },
 {
  "type": "TEXT",
  "value": "Ѻ҆́тче гаврїи́ле преблаже́нне, досто́йнѡ полꙋчи́лъ є҆сѝ че́сть равноа́гг҃льнꙋю, и҆ предстоѧ̀ бг҃ꙋ со безпло́тными, не забꙋ́ди и҆ на́съ, честнꙋ́ю твою̀ па́мѧть сла́вѧщыѧ, но при́зри съ небесѐ и҆ возсїѧ́й свѣ́тъ тво́й, ꙗ҆́кѡ да ра́достнѡ просла́вимъ твоѧ̑ чꙋдеса̀."
 },
 {
  "type": "TEXT",
  "value": "Ѻ҆́тче гаврїи́ле чꙋдотво́рче, ви́дѧ бг҃ъ мнѡ́гїѧ по́двиги и҆ трꙋды̀ твоѧ̑, и҆́миже просїѧ́лъ є҆сѝ на свѣ́щницѣ хрⷭ҇то́ва сїѧ́нїѧ, да́ромъ чꙋде́съ ѡ҆богати́ тѧ, и҆ ꙗ҆ви́ тѧ всѣ́мъ зна́ема, ра́ди чꙋде́съ и҆сцѣле́нїѧ, сегѡ̀ ра́ди и҆ мы̀ вопїе́мъ тѝ: молѝ хрⷭ҇та̀ бг҃а ѡ҆ всѣ́хъ чтꙋ́щихъ ст҃ꙋ́ю па́мѧть твою̀, и҆ ѿ грѣхо́вныхъ страсте́й и҆зба́ви на́съ."
 },
 {
  "type": "HEADER",
  "value": "И҆́ны стїхи̑ры, гла́съ ѕ҃."
 },
 {
  "type": "TEXT",
  "value": "Дне́сь торжествꙋ́ютъ мона́хѡвъ мно́жества, въ па́мѧть преставле́нїѧ преподо́бнагѡ ѻ҆тца̀ на́шегѡ гаврїи́ла, ле́сновскꙋю похвалꙋ̀ и҆ на́ше ᲂу҆добре́нїе, и҆́же земны́й є҆стество́мъ, ра́венъ бы́сть мы́слєннымъ сꙋществѡ́мъ. Тѣ́мже и҆ моли́твенникъ на́мъ быва́етъ предъ престо́ломъ всевы́шнѧгѡ, ꙗ҆́кѡ да ᲂу҆лꙋчи́мъ вѣ́чныхъ бла̑гъ въ де́нь сꙋ́дный."
 },
 {
  "type": "TEXT",
  "value": "Дне́сь па́че со́лнца возсїѧ̀ на тве́рди вѣ́ры, па́мѧть бг҃оно́снагѡ ѻ҆тца̀ на́шегѡ гаврїи́ла, и҆́же вѣ́рныхъ собра́нїе къ добродѣ́тели наста́ви: ѻ҆́во ᲂу҆́бѡ бг҃одꙋхнове́нными ᲂу҆чє́нїи и҆ равноа́гг҃льнымъ житїе́мъ, и҆ ѻ҆боѧ̀ пресла́вно, ꙗ҆́коже во́ждь и҆зрѧ́денъ бг҃оподо́бнѡ показꙋ́ѧ. Тогѡ̀ моли́твами хрⷭ҇тѐ бж҃е на́шъ, поми́лꙋй и҆ спасѝ на́съ."
 },
 {
  "type": "TEXT",
  "value": "Дне́сь собира́ютсѧ всѝ концы̀ се́рбскїѧ землѝ, и҆ благоче́стнѡ воспѣва́ютъ ѱалмы̀ и҆ пѣ́сньми, пребл҃же́ннаго ѻ҆тца̀ на́шего гаврїи́ла, и҆́же ѡ҆ста́ви мїрскꙋ́ю пре́лесть, ꙗ҆ре́мъ же хрⷭ҇то́въ на ра́мо взѧ́тъ, и҆ полкѝ бѣсѡ́въ мꙋ́жески побѣдѝ, и҆ дѣ́тельнѡ показа̀ на́мъ и҆зрѧ́дный пꙋ́ть бж҃е́ственныѧ любвѐ, и҆ мо́литсѧ непреста́ннѡ во є҆́же спастѝ дꙋ́шы на́шѧ."
 },
 {
  "type": "HEADER",
  "value": "Сла́ва гла́съ ѕ҃."
 },
 {
  "type": "TEXT",
  "value": "Кто̀ тебѐ не ᲂу҆блажи́тъ, преподо́бне ѻ҆́тче, кто́ ли не воспое́тъ равноа́гг҃льное житїѐ твоѐ, свѧ́тостїю на землѝ возсїѧ́вый ꙗ҆́кѡ ᲂу҆чени́къ хрⷭ҇то́въ, то́йже и҆ тебѐ прїи́мъ въ ца́рствїе, со всѣ́ми свѧты́ми тѧ̀ вчинѝ, є҆стество́мъ человѣ́ка и҆ земна́гѡ сꙋщества̀, показа́ тѧ дрꙋ́га а҆́гг҃лѡвъ ѿ всѣ́хъ родѡ́въ познава́ема. Того̀ молѝ гаврїи́ле пребл҃же́нне, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Кто̀ тебѐ не ᲂу҆блажи́тъ:"
 },
 {
  "type": "HEADER",
  "value": "Вхо́дъ, прокі́менъ днѐ. Чтє́нїѧ г҃, преподо́бномꙋ."
 },
 {
  "type": "HEADER",
  "value": "Премꙋ́дрости соломѡ́новы чте́нїе. (Глава̀ г҃.)"
 },
 {
  "type": "TEXT",
  "value": "Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша въ ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь, разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "Премꙋ́дрости соломѡ́новы чте́нїе. (Главы̑ є҃ и҆ ѕ҃.)"
 },
 {
  "type": "TEXT",
  "value": "Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ: и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѡрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе. Поѡстри́тъ же напра́сный гнѣ́въ во ѡ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды. Вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆́бѡ ца́рїе, и҆ разꙋмѣ́йте, навы́кните сꙋдїи̑ концє́въ землѝ. Внꙋши́те держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы́кѡвъ, ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
 },
 {
  "type": "HEADER",
  "value": "Премꙋ́дрости соломѡ́новы чте́нїе. (Глава̀ д҃.)"
 },
 {
  "type": "TEXT",
  "value": "Првⷣникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ немноголѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "На лїті́и стїхи́ра хра́ма, и҆ преподо́бнагѡ, гла́съ а҃:"
 },
 {
  "type": "TEXT",
  "value": "Наста̀ дне́сь па́мѧть преставле́нїѧ твоегѡ̀, приснопа́мѧтне ѻ҆́тче гаврїи́ле, и҆ сѐ честно́е ста́до твоѐ, пое́тъ тебѐ благоче́стнѡ, ᲂу҆блажа́юще болѣ̑зни и҆ трꙋды̀ твоѧ̑, ꙗ҆̀же под̾ѧ́лъ є҆сѝ, ꙗ҆́кѡ гра́дъ въ пꙋсты́ни прекра́сенъ."
 },
 {
  "type": "TEXT",
  "value": "Дне́сь торжествꙋ́етъ се́рбїа и҆ всѧ̀ страна̀ славѧ́нскаѧ, и҆зрѧ́днѣе же хра́мъ свѧта́гѡ а҆рхїстрати́га мїхаи́ла въ ле́сновѣ, є҆го́же ты̀ ᲂу҆стро́илъ є҆сѝ, благодарѧ́ще бг҃ꙋ, и҆̀же дарова̀ на́мъ тебѐ, крѣ́пкаго предста́телѧ и҆ те́пла моли́твенника ко ст҃ѣ́й трⷪ҇цѣ, ю҆́же непреста́ннѡ молѝ ѡ҆ дꙋша́хъ на́шихъ."
 },
 {
  "type": "HEADER",
  "value": "Сла́ва, гла́съ д҃."
 },
 {
  "type": "TEXT",
  "value": "Весели́тесѧ небеса̀, торжествꙋ́йте лю́бѧщїи благоче́стїе, ле́снѡвскїѧ гѡ́ры взыгра́йте, се́ бо предстои́тъ хрⷭ҇тꙋ̀ непобѣди́мъ побо́рникъ и҆ те́плый предста́тель ро́да на́шегѡ, и҆́же страсте́й ко́рень ѿсѣчѐ, и҆ бѣсѡ́въ стремлє́нїѧ, и҆ ꙗ҆вѝ на́мъ непобѣди́мꙋю си́лꙋ и҆ дѣ́йство крⷭ҇та̀ сп҃сова, є҆мꙋ́же кла́нѧѧсѧ мо́литсѧ хрⷭ҇тꙋ̀, дꙋша́мъ на́шымъ пода́ти ве́лїю ми́лость."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Прест҃а́ѧ дв҃о бцⷣе, мт҃и ми́лостиваѧ, сѐ прибѣга́емъ къ твое́й бла́гости, воздвиза́юще ѻ҆́чи серде́цъ на́шихъ къ тебѣ̀, и҆ колѣ̑на преклонѧ́юще съ пла́чемъ мо́лимъ тѧ̀, не пре́зри на́шегѡ воздыха́нїѧ, и҆ бꙋ́ди на́мъ покро́въ и҆ помо́щница въ де́нь сꙋ́дный."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "На высотꙋ̀ добродѣ́телей восте́клъ є҆сѝ, попра́въ кѡ́зни вра̑жїѧ, преподо́бне ѻ҆́тче гаврїи́ле, побѣ́ды вѣне́цъ воспрїѧ́лъ є҆сѝ."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Ца́рства ра́ди небе́снагѡ подвиза́лсѧ є҆сѝ на землѝ, бг҃облаже́нне гаврїи́ле, хрⷭ҇тꙋ̀ послѣ́довавъ, дарова́нїй ст҃а́гѡ дх҃а сподо́билсѧ є҆сѝ."
 },
 {
  "type": "TEXT",
  "value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "И҆мѣ́ѧ въ дꙋшѝ свое́й сокрове́нно бога́тство, до́мъ дх҃а ст҃а́гѡ бы́лъ є҆сѝ, молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ ѕ҃."
 },
 {
  "type": "TEXT",
  "value": "Прино́симъ дне́сь похва́льнꙋю пѣ́снь, въ па́мѧти твое́й ѻ҆́тче гаврїи́ле, прїимѝ и҆ предварѝ къ бг҃ꙋ твои́ми моли́твами, и҆ и҆зба́ви на́съ шꙋ́їѧгѡ стоѧ́нїѧ и҆ сподо́би десна́гѡ предстоѧ́нїѧ: да тѧ̀ всѝ ꙗ҆́кѡ те́пла застꙋ́пника досто́йнѡ ᲂу҆блажа́емъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Творе́цъ и҆ и҆зба́витель мо́й, пречи́стаѧ, хрⷭ҇то́съ гдⷭ҇ь, и҆з̾ твои́хъ ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. Тѣ́мже тѝ, всечи́стаѧ, ꙗ҆́кѡ бж҃їи ма́тери же и҆ дв҃ѣ вои́стиннꙋ, вопїе́мъ немо́лчнѡ: ра́дꙋйсѧ а҆́гг҃льски, ра́дꙋйсѧ влады́чице, предста́тельство и҆ покро́ве, и҆ спасе́нїе дꙋ́шъ на́шихъ."
 },
 {
  "type": "HEADER",
  "value": "На благослове́нїи хлѣ́бѡвъ, тропа́рь, гла́съ и҃:"
 },
 {
  "type": "TEXT",
  "value": "Возлюби́въ хрⷭ҇та̀ ᲂу҆се́рднѡ па́че всѣ́хъ, и҆ ᲂу҆краси́всѧ кро́тостїю, смире́нїемъ и҆ терпѣ́нїемъ, всѐ житїѐ своѐ на землѝ предложи́лъ є҆сѝ є҆мꙋ̀. Тѣ́мъ бо небє́сныѧ ѻ҆би́тели наслѣ́довавъ, пра́ведныхъ ча́сти сподо́билсѧ є҆сѝ, съ ни́миже моли́сѧ, спасти́сѧ дꙋша́мъ на́шымъ. Два́жды."
 },
 {
  "type": "TEXT",
  "value": "И҆ Бцⷣе дв҃о: Є҆ди́ножды."
 },
 {
  "type": "HEADER",
  "value": "На ᲂу҆́трени, По шестоѱа́лмїи, є҆ктенїа̀ и҆ посе́мъ: Бг҃ъ гдⷭ҇ь, тропа́рь преподо́бнагѡ, два́жды. Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "По а҃ стїхосло́вїи, сѣда́ленъ, гла́съ а҃."
 },
 {
  "type": "TEXT",
  "value": "Возлюби́въ и҆змла́да мона́шеское житїѐ, хрⷭ҇тꙋ̀ ѿ дꙋшѝ послѣ́довалъ є҆сѝ, бг҃облаже́нне гаврїи́ле, просїѧ́въ добродѣ́тельнымъ житїе́мъ твои́мъ, въ моли́твахъ, поще́нїихъ и҆ бдѣ́нїихъ, ѡ҆́бразъ бы́лъ є҆сѝ мона́хѡвъ. Тѣ́мже вопїе́мъ тѝ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дарова́вшемꙋ тобо́ю всѣ̑мъ и҆сцѣле́нїе."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "Оу҆пова́нїе хрⷭ҇тїа́нъ, прест҃а́ѧ дв҃о, бг҃а, є҆го́же родила̀ є҆сѝ па́че ᲂу҆ма́ же и҆ сло́ва, молѝ непреста́ннѡ съ вы́шними си́лами, дарова́ти на́мъ ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ."
 },
 {
  "type": "HEADER",
  "value": "По в҃ стїхосло́вїи, сѣда́ленъ, гла́съ д҃."
 },
 {
  "type": "TEXT",
  "value": "Житїѐ твоѐ, преблаже́нне ѻ҆́тче гаврїи́ле, мона́шествꙋющымъ ꙗ҆ви́сѧ пра́вило и҆звѣ́стнѡ, є҆мꙋ́же ны́нѣ ревнꙋ́юще спаса́емсѧ, послѣ́дꙋюще твои̑мъ бж҃е́ственнымъ ᲂу҆че́нїємъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "Жела́ѧ ви́дѣти неизрече́ннꙋю сла́вꙋ сн҃а твоегѡ̀ и҆ бг҃а, всеблаже́нный гаврїи́лъ бцⷣе, взе́мъ на ра́мо честны́й крⷭ҇тъ є҆гѡ̀, живонѡ́снымъ є҆гѡ̀ стопа́мъ послѣ́дова."
 },
 {
  "type": "HEADER",
  "value": "Полѷеле́й. Велича́нїе и҆ ѱало́мъ и҆збра́нный преподо́бномꙋ."
 },
 {
  "type": "HEADER",
  "value": "По полѷеле́и, сѣда́ленъ, гла́съ и҃."
 },
 {
  "type": "TEXT",
  "value": "Простира́ѧ дла̑ни твоѧ̑ къ небесѝ, преподо́бне ѻ҆́тче на́шъ гаврїи́ле премꙋ́дре, и҆ возсыла́ѧ моли̑твы твоѧ̑ вы́шнемꙋ, зрѣ́лъ є҆сѝ ꙗ҆вле́ннѡ цр҃ѧ̀ сла́вы хрⷭ҇та̀ со а҆́гг҃лы, и҆ въ пꙋсты́нѧхъ непрохо́дныхъ водворѧ́ѧсѧ, сла́вилъ є҆сѝ гдⷭ҇а бж҃е́ственною благода́тїю тѧ̀ соблюда́юща."
 },
 {
  "type": "HEADER",
  "value": "Сла́ва то́йже, и҆ ны́нѣ, бг҃оро́диченъ, гла́съ и҃."
 },
 {
  "type": "TEXT",
  "value": "Прино́симъ тѝ гаврїи́ловъ гла́съ бг҃облагода́тнаѧ, ра́дꙋющесѧ и҆ глаго́люще: ра́дꙋйсѧ, мѣ́сто свѧще́нїѧ. Ра́дꙋйсѧ, преподо́бныхъ сла́во и҆ всѣ́хъ вѣ́рныхъ спасе́нїе. Ра́дꙋйсѧ, є҆ѧ́же ра́ди ѡ҆божи́хомсѧ, бцⷣе приснодв҃о."
 },
 {
  "type": "HEADER",
  "value": "Степе́нна, а҃-й а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ ꙗ҆̀же воздаде́ ми."
 },
 {
  "type": "TEXT",
  "value": "Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло м҃г."
 },
 {
  "type": "HEADER",
  "value": "По н҃ ѱалмѣ̀, стїхи́ра гла́съ ѕ҃."
 },
 {
  "type": "TEXT",
  "value": "Преподо́бне ѻ҆́тче гаврїи́ле, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на небесѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. Дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ."
 },
 {
  "type": "HEADER",
  "value": "Канѡ́нъ бцⷣы со і҆рмосо́мъ на ѕ҃, и҆ преподо́бнагѡ, на и҃."
 },
 {
  "type": "HEADER",
  "value": "Канѡ́нъ преподо́бнагѡ, гла́съ г҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ди́внѡ, сла́внѡ, творѧ́й чꙋдеса̀ ты̀ є҆сѝ, бж҃е, бе́зднꙋ ѡ҆землени́вый, и҆ колесни́цы потопи́вый, и҆ лю́ди спасы́й пою́щыѧ тебѣ̀, ꙗ҆́кѡ царю̀ на́шемꙋ и҆ бг҃ꙋ."
 },
 {
  "type": "TEXT",
  "value": "Гдⷭ҇а ᲂу҆се́рднѡ возлюби́вый и҆ подвиза́ѧсѧ жела́тельнѡ дости́гнꙋти ца́рства небе́снагѡ, просвѣти́лсѧ є҆сѝ бж҃е́ственною благода́тїю, ѡ҆зари́ ми ᲂу҆́мъ воспѣ́ти житїѐ твоѐ."
 },
 {
  "type": "TEXT",
  "value": "Никто́же мо́жетъ и҆зчестѝ по́двиги и҆ трꙋды̀ твоѧ̑, всенѡ́щнаѧ бдѣ̑нїѧ и҆ къ си̑мъ и҆ны́хъ мно́жєства добродѣ́телей; и҆̀мже возме́здїе ѿ бг҃а прїѧ́лъ є҆сѝ."
 },
 {
  "type": "TEXT",
  "value": "Ди́вное на землѝ житїѐ пожи́лъ є҆сѝ, бдѧ̀, молѧ́сѧ и҆ трꙋжда́ѧсѧ, сегѡ̀ ра́ди всели́лсѧ є҆сѝ во ѻ҆би́тєли небє́сныѧ."
 },
 {
  "type": "TEXT",
  "value": "Бг҃оро́диченъ: И҆зба́ви дꙋ́шꙋ мою̀ ѿ сѣ́ти дїа́воли, пречи́стаѧ бцⷣе, ты́ бо є҆сѝ всѣ́хъ земны́хъ крѣ́пкое поможе́нїе и҆ те́плое застꙋпле́нїе."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твердѝ, гдⷭ҇и, сердца̀ на̑ша, и҆ просвѣтѝ къ твоемꙋ̀ пѣснопѣ́нїю, є҆́же сла́вити тѧ̀ сп҃се, во вѣ́къ вѣ́ка."
 },
 {
  "type": "TEXT",
  "value": "Благода́тїю бж҃їѧ про́мысла ѡ҆зари́всѧ, стра́ненъ ꙗ҆ви́лсѧ є҆сѝ ѿ всѣ́хъ срѡ́дникъ и҆ зна́емыхъ, прилѣпи́всѧ къ сро́дствꙋ небе́сномꙋ, и҆ ны́нѣ живе́ши жи́знь безконе́чнꙋю."
 },
 {
  "type": "TEXT",
  "value": "Оу҆ме́тїе вмѣни́лъ є҆сѝ всѧ̑ кра̑снаѧ мі́ра сегѡ̀, ничто́же бо па́че хрⷭ҇то́вы любвѐ и҆зво́лилъ є҆сѝ, жела́ѧ насы́титисѧ сегѡ̀ сла́вы, и҆ весе́лїѧ присносꙋ́щнагѡ въ нѧ́же и҆ а҆́гг҃ли жела́ютъ прини́кнꙋти."
 },
 {
  "type": "TEXT",
  "value": "И҆мѣ́ѧ въ дꙋшѝ вѣ́рꙋ неѡскꙋ́днꙋ, да́нный тебѣ̀ тала́нтъ трꙋдолю́бнѡ воздѣ́лалъ є҆сѝ, и҆ прїѧ́лъ є҆сѝ вла́сть на дꙋ́сѣхъ нечи́стыхъ, не забꙋ́ди на́съ творѧ́щихъ ст҃ꙋ́ю па́мѧть твою̀."
 },
 {
  "type": "TEXT",
  "value": "Бг҃оро́диченъ: Влады́чице, мт҃и бж҃їѧ, благослове́ннаѧ и҆ пренепоро́чнаѧ, дꙋшѝ моеѧ̀ стрꙋ́пы и҆сцѣлѝ, и҆ стра̑сти плотскі̑ѧ ᲂу҆мертвѝ, ᲂу҆́мъ мо́й ѿ всѧ́кагѡ вре́да вра́жїѧ и҆ напа́стей и҆змѝ, молю́ тѧ."
 },
 {
  "type": "HEADER",
  "value": "Сѣда́ленъ, гла́съ в҃."
 },
 {
  "type": "TEXT",
  "value": "Смире́нїемъ и҆ жесто́кимъ подвиза́нїемъ сы́нъ свѣ́та показа́лсѧ є҆сѝ: и҆ ны́нѣ въ ца́рствїи небе́снѣмъ ꙗ҆́снѡ зри́ши ст҃ꙋ́ю трⷪ҇цꙋ, преблаже́нне гаврїи́ле, ю҆́же молѝ, согрѣше́нїй ѡ҆ставле́нїе дарова́ти, пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "Красотѣ̀ твое́й, бг҃ора́дованнаѧ, а҆рха́гг҃лъ гаврїи́лъ предстоѧ̀ дивлѧ́шесѧ, и҆ вопїѧ́ше тѝ: ѽ невѣ́сто неискꙋсобра́чнаѧ, ѻ҆трокови́це небла́зненнаѧ, ка́кѡ тѝ и҆зрекꙋ̀ пре́жде вѣ̑къ сокрове́ннꙋю та́йнꙋ; ты́ бо є҆сѝ небє́снымъ и҆ зємны́мъ соедине́нїе. Ра́дꙋйсѧ ѡ҆бра́дованнаѧ, гдⷭ҇ь съ тобо́ю."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Стра́нна и҆ неизрече́нна рождества̀ твоегѡ̀ та́йна, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, и҆ веселѧ́сѧ вопїю́ ти: си́лѣ твое́й сла́ва, человѣколю́бче."
 },
 {
  "type": "TEXT",
  "value": "Бы́лъ є҆сѝ сы́нъ послꙋша́нїѧ, и҆ страстны̑ѧ по́мыслы покори́въ ᲂу҆мꙋ̀ влады́цѣ, вопїѧ́лъ є҆сѝ хрⷭ҇тꙋ̀: си́лѣ твое́й сла́ва, человѣколю́бче."
 },
 {
  "type": "TEXT",
  "value": "Въ пꙋсты́ни живы́й ꙗ҆́кѡ во гра́дѣ, преподо́бне ѻ҆́тче гаврїи́ле, ни ѿ чегѡ́же смꙋща́ѧсѧ, но ра́ди трꙋдѡ́въ твои́хъ вѣнча́лсѧ є҆сѝ ѿ хрⷭ҇та̀ бг҃а, є҆мꙋ́же пое́ши немо́лчнѡ: си́лѣ твое́й сла́ва, человѣколю́бче."
 },
 {
  "type": "TEXT",
  "value": "Грѣхо́вное ѡ҆мраче́нїе возненави́дѣвъ, и҆ свѣ́тъ а҆́гг҃льскїѧ чистоты̀ возлюби́въ, возлетѣ́лъ є҆сѝ ꙗ҆́кѡ златы́ми крила́ми на небеса̀, непреста́ннѡ поѧ̀: си́лѣ твое́й сла́ва, человѣколю́бче."
 },
 {
  "type": "TEXT",
  "value": "Бг҃оро́диченъ: Кро́въ и҆ застꙋпле́нїе и҆ прибѣ́жище, бꙋ́ди мѝ рабꙋ̀ твоемꙋ̀, бцⷣе, и҆ ѿ безмѣ́рныхъ ѕѡ́лъ и҆сцѣли́ мѧ да пою́ ти пречи́стаѧ: сла́ва рождествꙋ̀ твоемꙋ̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́томъ твои́мъ невече́рнимъ хрⷭ҇тѐ, ѡ҆зарѝ, бж҃е, смире́ннꙋю мою̀ дꙋ́шꙋ, и҆ наста́ви на стра́хъ тво́й, занѐ свѣ́тъ повелѣ̑нїѧ твоѧ̑."
 },
 {
  "type": "TEXT",
  "value": "На горѣ̀ ле́сновстѣй процвѣ́лъ є҆сѝ ꙗ҆́кѡ кѷпарі́съ, преподо́бне ѻ҆́тче гаврїи́ле, и҆ плоды̀ дх҃а прине́слъ є҆сѝ во мно́зѣ терпѣ́нїи, тѣле́сное ᲂу҆дрꙋче́нїе, и҆ ѿ бѣсѡ́въ и҆ ѕлы́хъ человѣ̑къ ѡ҆ѕлобле́нїе, сегѡ̀ ра́ди прїѧ́лъ є҆сѝ вѣ́чное ᲂу҆тѣше́нїе."
 },
 {
  "type": "TEXT",
  "value": "Не ѿ человѣ̑къ бы́сть твоѐ зва́нїе, но ѿ бг҃а, премꙋ́дре гаврїи́ле, и҆ ꙗ҆́кѡ є҆ле́нь жаждѧ̀ на и҆сто́чникъ воды̀ живы́ѧ поте́клъ є҆сѝ, напитава́ѧ дꙋ́шꙋ хрⷭ҇то́вою любо́вїю, ᲂу҆крѣпи́ бо тѧ̀ на сїѐ цр҃ь ми́ра."
 },
 {
  "type": "TEXT",
  "value": "Просвѣще́нъ бы́въ бж҃їею премꙋ́дростїю, веще́ственный ѻ҆́гнь невеще́ственнымъ ᲂу҆гаси́лъ є҆сѝ, и҆ чистото́ю житїѧ̀ твоегѡ̀, безтѣле́снагѡ во́инства ли́кꙋ сподо́билсѧ є҆сѝ."
 },
 {
  "type": "TEXT",
  "value": "Бг҃оро́диченъ: И҆сточа́еши и҆сцѣле́нїй стрꙋи̑ болѧ́щымъ всю́дꙋ. Тѧ́ бо показа̀, ми́лости гдⷭ҇ь, рожде́йсѧ и҆зъ тебѐ па́че ᲂу҆ма̀, и҆сто́чника милосе́рдїѧ, влⷣчце."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ̀ ты̀ спасѝ сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ проро́ка."
 },
 {
  "type": "TEXT",
  "value": "Дх҃омъ бж҃їимъ наставлѧ́емъ бг҃облаже́нне, соблю́лъ є҆сѝ чистотꙋ̀ є҆стества̀ твоегѡ̀, а҆гг҃лоподо́бное житїѐ и҆мѣ́лъ є҆сѝ. Тѣ́мже молѝ спасти́сѧ на́мъ ѿ вра̑гъ на́шихъ."
 },
 {
  "type": "TEXT",
  "value": "Оу҆́мъ сво́й всегда̀ къ бг҃ꙋ и҆мѣ́въ, ко всѣ̑мъ житє́йскимъ бы́лъ є҆сѝ нечꙋ́вственъ, всѧ̑ же кова̑рства лꙋка́вагѡ, ꙗ҆́кѡ сѣ́ть расто́ргнꙋлъ є҆сѝ, и҆ ны́нѣ мо́лишисѧ непреста́ннѡ ѡ҆ всѣ́хъ на́съ."
 },
 {
  "type": "TEXT",
  "value": "Мо́лимъ тѧ̀, бг҃облаже́нне ѻ҆́тче гаврїи́ле, молѝ хрⷭ҇та̀ бг҃а на́шего за ѻ҆те́чество на́ше правосла́вное, и҆ всѣ̑мъ вѣ̑рнымъ и҆спросѝ ѿ грѣ̑хъ свобожде́нїе и҆ спасе́нїе и҆ ми́ръ мі́рови."
 },
 {
  "type": "TEXT",
  "value": "Бг҃оро́диченъ: Рꙋ́ки твоѧ̑ пречⷭ҇тыѧ, просте́рши, покры́й на тѧ̀ надѣ́ющыѧсѧ, и҆ сн҃ꙋ твоемꙋ̀, бцⷣе зовꙋ́щыѧ: пода́ждь хрⷭ҇тѐ всѣ̑мъ ми́лости твоѧ̀."
 },
 {
  "type": "HEADER",
  "value": "Конда́къ, гла́съ ѕ҃."
 },
 {
  "type": "TEXT",
  "value": "А҆́гг҃льски на землѝ пожи́лъ є҆сѝ, житїе́мъ же є҆ѵⷢ҇лїе ᲂу҆ѧсни́лъ є҆сѝ, ᲂу҆́мъ тво́й къ небесѝ впери́лъ є҆сѝ, лю́ди же благоче́стїю ᲂу҆чи́лъ є҆сѝ, сегѡ̀ ра́ди ᲂу҆блажа́емъ тѧ̀, ра́дꙋйсѧ, преподо́бне гаврїи́ле, ле́сновскаѧ похвало̀."
 },
 {
  "type": "TEXT",
  "value": "І҆́косъ: Оу҆вы̀ мнѣ̀ скве́рномꙋ и҆ всегрѣ́шномꙋ, ꙗ҆́кѡ дерзнꙋ́хъ пѣ́ти тебѣ̀ чи́стомꙋ и҆ свѧто́мꙋ, преподо́бне ѻ҆́тче гаврїи́ле, но надѣ́ѧсѧ на милосе́рдїе и҆ по́мощь твою̀ ѻ҆ба́че дерза́ю воспѣва́ти: ты́ бо земны́й а҆́гг҃лъ и҆ небе́сный человѣ́къ бы́лъ є҆сѝ, хрⷭ҇тꙋ̀ ѿ дꙋшѝ послѣ́довалъ є҆сѝ, на земли́ бо ѿ тлѣ́нныхъ небре́глъ є҆сѝ, болѣ́зньми и҆ трꙋды̀, и҆ ѕѣ́льнымъ воздержа́нїемъ, ѕлострада́нїемъ и҆ на землѝ лега́нїемъ, посто́мъ, бдѣ́нїемъ и҆ моли́твами ѡ҆́бразъ бы́лъ є҆сѝ твои̑мъ ᲂу҆ченикѡ́мъ, хра́мъ же тѣ́ла твоегѡ̀ непоро́ченъ соблю́лъ є҆сѝ, бы́въ до́мъ бж҃їй и҆ жили́ще ст҃а́гѡ дх҃а, сегѡ̀ ра́ди прише́дъ всели́сѧ въ тѧ̀ ѻ҆ц҃ъ, и҆ сн҃ъ, и҆ ст҃ы́й дх҃ъ, и҆ дарова̀ тебѣ̀ наслѣ́дїе небе́сное, тѣ́мъ тѧ̀ чти́мъ, ра́дꙋйсѧ преподо́бне гаврїи́ле, ле́сновскаѧ похвало̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пе́щи пла́мень ᲂу҆гаси́ша ѻ҆́троцы, и҆ небе́снꙋю ро́сꙋ прїѧ́ша вѣ́рою: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Зрѧ̀ всегда̀ предъ ѻ҆чи́ма де́нь гдⷭ҇ень, послꙋжи́лъ є҆сѝ влⷣцѣ твоемꙋ̀ во мно́зѣ терпѣ́нїи, воспѣва́ѧ: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ничто́же ѿ кра́сныхъ мі́ра сегѡ̀ разлꙋчи́ тѧ ѿ любвѐ хрⷭ҇то́вы, и҆́бо па́че всѣ́хъ возлюби́лъ є҆сѝ і҆и҃са сла́дкагѡ, є҆мꙋ́же и҆ вопїе́ши: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Безстра́стенъ пребыва́ѧ бг҃облаже́нне, показа́лсѧ є҆сѝ дꙋше́ю тве́рдый а҆дама́нтъ, и҆ ны́нѣ предстоѧ̀ хрⷭ҇тꙋ̀ взыва́еши: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Смире́нныѧ моеѧ̀ дꙋшѝ не пре́зри всечи́стаѧ, но вско́рѣ ᲂу҆ще́дри, и҆ ѿ мно́жества содѣ́ѧнныхъ мно́ю лю́тыхъ спаси́ мѧ, и҆ ѡ҆бно́вльши благода́ть твою̀, просвѣти́ мѧ дв҃о чи́стаѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: На престо́лѣ херꙋві́мстѣ носи́маго, свѧще́нницы по́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Просїѧ́лъ є҆сѝ на свѣ́щницѣ хрⷭ҇то́ва сїѧ́нїѧ, и҆ гдⷭ҇ь хрⷭ҇то́съ чꙋде́съ да́ромъ ѡ҆богати́ тѧ, и҆ ꙗ҆ви́ тѧ вселе́ннѣй зна́ема, и҆ ны́нѣ съ тобо́ю всѝ вопїю́тъ: благослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "И҆зрѧ́денъ ꙗ҆ви́лсѧ є҆сѝ мно́гими трꙋды̀ и҆ пѡ́двиги, и҆ та́йными къ бг҃ꙋ моли́твами, а҆́ще человѣ́кѡмъ и҆ невѣ́домы, но бг҃омъ всѧ̑ зри́мы и҆ вѣ́домы, є҆мꙋ́же вопїе́ши: благослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Земны́хъ ничто́же возлюби́лъ є҆сѝ, ᲂу҆́мъ сво́й во глꙋбинꙋ̀ смире́нїѧ погрꙋзи́лъ є҆сѝ, жела́ѧ всели́тисѧ въ ца́рство небе́сное, є҆́же и҆ полꙋчи́въ вопїе́ши: благослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Благослови́те всѧ̑ дѣла̀ гдⷭ҇нѧ гдⷭ҇а, ро́ждшагосѧ ѿ дв҃ы мр҃і́и, и҆ возне́сшаго па́ки человѣ́чество на высотꙋ̀ небе́снꙋю, є҆мꙋ́же вопїю́тъ всѝ а҆́гг҃ли: да благослови́тъ всѧ̀ тва́рь гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Тебѐ неѡпали́мꙋю кꙋпинꙋ̀, и҆ ст҃ꙋ́ю дв҃ꙋ, ма́терь свѣ́та, и҆ бцⷣꙋ, наде́ждꙋ всѣ́хъ на́съ, велича́емъ."
 },
 {
  "type": "TEXT",
  "value": "Бы́лъ є҆сѝ сы́нъ и҆ наслѣ́дникъ ца́рствїѧ бж҃їѧ, є҆́же скры́лъ є҆сѝ внꙋ́трь себѐ добродѣ́тельми, сегѡ̀ ра́ди ᲂу҆блажа́емъ тѧ̀, хрⷭ҇та̀ велича́юще."
 },
 {
  "type": "TEXT",
  "value": "Всѝ собо́ри се́рбстїи, ю҆́нѡши и҆ дѣ́ви, ста́рцы и҆ ста̑рицы, не́мощни и҆ крѣ́пцы, покланѧ́ютсѧ честны̑мъ моще́мъ твои̑мъ, и҆ ᲂу҆блажа́ютъ тѧ̀ хрⷭ҇та̀ велича́юще."
 },
 {
  "type": "TEXT",
  "value": "Па́мѧть твою̀ свѣтоно́снꙋю похвалѧ́юще, мо́лимъ тѧ̀ преподо́бне ѻ҆́тче, и҆спо́лни и҆ на́съ ра́дости и҆ весе́лїѧ дꙋхо́внагѡ."
 },
 {
  "type": "TEXT",
  "value": "Бг҃оро́диченъ: Возвели́чимъ ма́терь бг҃а на́шегѡ, ю҆́же пою́тъ всѧ̑ небє́сныѧ си̑лы свѧты́хъ а҆́гг҃лъ и҆ а҆рха́гг҃лъ, и҆ всѝ ро́ди и҆ кѡлѣ́на покланѧ́ютсѧ и҆ блажа́тъ вопїю́ще: ра́дꙋйсѧ благода́тнаѧ, гдⷭ҇ь съ тобо́ю."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Свѣ́томъ хрⷭ҇то́вымъ просвѣти́всѧ, показа́лсѧ є҆сѝ свѣти́льникъ всемꙋ̀ ро́дꙋ на́шемꙋ, и҆́бо горѧ̀ дꙋ́хомъ по за́повѣди хрⷭ҇то́вѣ, всѣ́хъ просвѣща́лъ є҆сѝ є҆ѵⷢ҇лїемъ, и҆ ны́нѣ предстоѧ̀ во свѣ́тѣ ст҃ы́ѧ трⷪ҇цы, молѝ ѡ҆ є҆́же спасти́сѧ на́мъ."
 },
 {
  "type": "TEXT",
  "value": "Бг҃оро́диченъ: Свѣ́тъ ро́ждши дꙋ́шъ на́шихъ бцⷣе, хрⷭ҇та̀ ѿ ѻ҆ц҃а̀ возсїѧ́вшаго, просвѣти́вшаго всѧ̑ вѣ̑рныѧ, и҆ ѿгна́вшаго тмꙋ̀ і҆дѡлобѣ́сїѧ, дарова́вшаго благода́тїю бы́ти ча́дѡмъ бж҃їимъ, водворѧ́тисѧ во свѣ́тѣ присносꙋ́щнѣмъ, и҆ дх҃омъ бж҃їимъ ѡ҆свѧща́тисѧ, тѧ̀ воспѣва́ющымъ."
 },
 {
  "type": "HEADER",
  "value": "На хвали́техъ стїхи̑ры, на д҃, гла́съ ѕ҃."
 },
 {
  "type": "TEXT",
  "value": "Оу҆се́рднѡ рабо́таѧ хрⷭ҇тꙋ̀ бг҃ꙋ на́шемꙋ, прине́слъ є҆сѝ є҆мꙋ̀ по́двиги и҆ трꙋды̀ твоѧ̑, и҆ по́льзꙋ мнѡ́гимъ сотвори́лъ є҆сѝ, ри́зꙋ же твою̀ дꙋше́внꙋю снѣ́га бѣлѣ́йши ᲂу҆бѣли́лъ є҆сѝ, нело́жнѡ послꙋшли́въ бы́въ хрⷭ҇тꙋ̀, є҆го́же со дерзнове́нїемъ молѝ ѡ҆ дꙋша́хъ на́шихъ."
 },
 {
  "type": "TEXT",
  "value": "Презрѣ́въ навсегда̀ плѡтска́ѧ мꙋдрѡва́нїѧ, всѧ̑ блага̑ѧ въ мі́рѣ се́мъ ѡ҆ста́вилъ є҆сѝ, и҆ бы́лъ є҆сѝ и҆зрѧ́дный послꙋ́шникъ хрⷭ҇то́въ, терпѣ́нїемъ, посто́мъ и҆ смире́нїемъ ꙗ҆ви́лсѧ є҆сѝ всѣ̑мъ вѣ̑рнымъ свѣти́льникъ неꙋгаса́емый, себѣ́ же стѧжа́лъ є҆сѝ ца́рство небе́сное. Молѝ ѡ҆ спасе́нїи дꙋ́шъ на́шихъ."
 },
 {
  "type": "TEXT",
  "value": "Кто̀ мо́жетъ и҆зчестѝ всѧ̑ трꙋды̀ и҆ по́двиги твоѧ̑, ꙗ҆̀же за хрⷭ҇та̀ под̾ѧ́лъ є҆сѝ, и҆́бо ты̀ дѣ́лы и҆спо́лнилъ є҆сѝ всѧ̑ ᲂу҆чє́нїѧ хрⷭ҇то́ва, и҆ по преставле́нїи просїѧ̀ свѣ́тлость житїѧ̀ твоегѡ̀, и҆ ны́нѣ во свѣ́тѣ пребыва́еши со свѧты́ми а҆́гг҃ли. Тѣ́мже ны́нѣ мо́лимъ тѧ̀: молѝ спасти́сѧ дꙋша́мъ на́шымъ."
 },
 {
  "type": "TEXT",
  "value": "Воздержа́нїѧ брозда́ми побѣди́лъ є҆сѝ всѧ̑ стра̑сти чꙋ́вствєнныѧ, и҆ во хрⷭ҇та̀ ѡ҆бле́клсѧ є҆сѝ, и҆ ре́вность къ безплѡ́тнымъ на землѝ показа́лъ є҆сѝ, тѣ́мъ и҆ мнѡ́гаѧ врагѡ́въ ѡ҆полчє́нїѧ ѡ҆бличи́лъ є҆сѝ, преподо́бне ѻ҆́тче гаврїи́ле, молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ д҃."
 },
 {
  "type": "TEXT",
  "value": "Да ликꙋ́етъ дне́сь гора̀ ле́сновскаѧ, да торжествꙋ́ютъ всѝ лю́бѧщїи благоче́стїе, и҆ да восхва́лѧтъ бг҃оно́снаго ѻ҆тца̀ на́шего гаврїи́ла, и҆́же є҆щѐ на землѝ, просїѧ̀ свѣ́тлостїю житїѧ̀ своегѡ̀, и҆ воспрїѧ̀ бога́тство благода́тное, и҆ ны́нѣ на небесѣ́хъ мо́литсѧ ѡ҆ спасе́нїи дꙋ́шъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "На́шихъ прегрѣше́нїй плени́цꙋ расто́ргни, дв҃о влⷣчце, молѧ́щи сн҃а твоего̀ и҆ гдⷭ҇а, и҆ томѧ́щїй на́съ грѣ́хъ, приснодв҃о, низложѝ, ꙗ҆́кѡ да воспѣва́емъ тѧ̀ всегда̀ всенепоро́чнаѧ, тобо́ю спаса́емы."
 },
 {
  "type": "HEADER",
  "value": "Славосло́вїе вели́кое. Тропа́рь преподо́бнагѡ. Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "И҆́же на́съ ра́ди:"
 },
 {
  "type": "HEADER",
  "value": "Є҆ктєнїѝ, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Блажє́нна ѿ канѡ́на преподо́бнагѡ пѣ́снь г҃-ѧ и҆ ѕ҃-ѧ."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Честна̀ пред̾ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рѻ҃з:"
 },
 {
  "type": "TEXT",
  "value": "Бг҃ъ рекі́й и҆з̾ тмы̀ свѣ́тꙋ возсїѧ́ти."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, зача́ло ѻ҃з:"
 },
 {
  "type": "TEXT",
  "value": "И҆дѧ́хꙋ съ ни́мъ наро́ди мно́зи:"
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ."
 }
]