[
 {
  "type": "HEADER",
  "value": "Деке́мврїа в҃"
 },
 {
  "type": "HEADER",
  "value": "И҆́же во ст҃ы́хъ бл҃же́ннагѡ млада́гѡ цр҃ѧ̀ и҆ мч҃ника ᲂу҆́роша."
 },
 {
  "type": "HEADER",
  "value": "На ма́лѣй вече́рни, стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Зако́ннѡ вѣ́нчанъ бы́лъ є҆сѝ мч҃нче, стражда̀ сегѡ̀ свѣ́та лише́нїе, ᲂу҆́роше всече́стне и҆ пребл҃же́нне, не ѡ҆скꙋдѣ́й молѧ́сѧ ѡ҆ на́съ ко гдⷭ҇ꙋ, и҆ сро́дство твоѐ назира́й, творѧ́щее ст҃ꙋ́ю па́мѧть твою̀."
 },
 {
  "type": "TEXT",
  "value": "Ѿ ли́ка и҆збра́нъ бы́лъ мч҃нче, ра́дость подава́еши на́мъ дне́сь видѣ́нїемъ чⷭ҇тны́хъ моще́й твои́хъ, и҆ веселѧ́щесѧ торжествꙋ́емъ: страстоте́рпче моли́сѧ ѡ҆ на́съ, творѧ́щихъ ст҃ꙋ́ю твою̀ па́мѧть."
 },
 {
  "type": "TEXT",
  "value": "Мѵ̑рныѧ вони̑ и҆ бл҃гоꙋха̑нїѧ пролива́еши, вселе́ннаѧ же да́ръ воспрїе́мши мощмѝ твои́ми, ᲂу҆́роше всече́стне, и҆ превожделѣ́нне, возлетѣ̀ къ любвѝ хрⷭ҇то́вой прехва́льне, и҆ ны́нѣ моли́сѧ ѡ҆ на́съ, творѧ́щихъ па́мѧть твою̀."
 },
 {
  "type": "TEXT",
  "value": "Ѻ҆снова́нїе бж҃е́ственное и҆́сткано ѿ вы́шнїѧ премꙋ́дрости, тве́рдости твоеѧ̀ ᲂу҆́мъ непоколеба̀, ни ᲂу҆бїе́нїѧ ᲂу҆бі́йственнагѡ ᲂу҆боѧ́сѧ: є҆ди́нꙋ вѣ́рꙋ къ бг҃ꙋ и҆мѣ́ѧ, и҆ томꙋ̀ предстои́ши во сла́вѣ."
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "Дне́сь весна̀ бл҃гоꙋха́етъ, ꙗ҆вле́нїемъ моще́й твои́хъ, и҆ нова̀ тва́рь ликꙋ́етъ, и҆ ра́дꙋетсѧ зрѧ́щи дне́сь чꙋ́до пресла́вное: ли́цы пою́ще ᲂу҆дивлѧ́хꙋсѧ, весе́лїе неизрече́нное показꙋ́юще ᲂу҆́роше всечⷭ҇тне и҆ превожделѣ́нне, си́лѣ твое́й сла́ва чл҃колю́бче."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ѻ҆бра́дованнаѧ хода́тайствꙋй твои́ми мл҃твами: и҆ и҆спросѝ дꙋша́мъ на́шимъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃:"
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Хвала́ми вѣнча́имъ, мч҃нка ᲂу҆́роша, є҆го́же вѣнча̀, бж҃їѧ блгⷣть: бж҃е́ственными мл҃твами, низложѝ врагѝ на́шѧ."
 },
 {
  "type": "TEXT",
  "value": "Сті́хъ: Првⷣникъ ꙗ҆́кѡ фі́нїѯъ процвѣте́тъ:"
 },
 {
  "type": "TEXT",
  "value": "На столпѣ́хъ мч҃нческихъ водворѧ́ешисѧ, ꙗ҆́кѡ до́бръ во́инъ ѡ҆брѣ́тсѧ на землѝ: и҆ возлетѣ́лъ є҆сѝ къ вы́шнемꙋ престо́лꙋ."
 },
 {
  "type": "TEXT",
  "value": "Сті́хъ: Насажде́ни къ домꙋ̀ гдⷭ҇ни, во дворѣ́хъ:"
 },
 {
  "type": "TEXT",
  "value": "До́ма земна́гѡ лиши́лсѧ є҆сѝ, до́мъ нбⷭ҇ный наслѣ́довалъ є҆сѝ, мч҃нче бл҃же́нне, ᲂу҆́роше сла́вне."
 },
 {
  "type": "HEADER",
  "value": "Сла́ва, гла́съ и҃. Подо́бенъ то́йже:"
 },
 {
  "type": "TEXT",
  "value": "Мч҃нче ᲂу҆́роше многострада́льне, мл҃твами твои́хъ прароди́телей, ᲂу҆́мъ на́шъ ѡ҆зарѝ, воспѣ́ти сла́вꙋ твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Две́ри нбⷭ҇ныѧ возми́тесѧ, зрѧ́ще две́рь вы́шнѧгѡ, свѣ́тлыми зарѧ́ми ѡ҆зарѧ́ющи влⷣчцꙋ."
 },
 {
  "type": "HEADER",
  "value": "Тропа́рь ст҃а́гѡ, гла́съ г҃:"
 },
 {
  "type": "TEXT",
  "value": "Ю҆́ношески процвѣ́лъ є҆сѝ во ѻ҆те́чествїи твое́мъ добро́тою ᲂу҆краше́нъ, и҆ непра́веднꙋю и҆ безвре́меннꙋю сме́рть под̾ѧ́лъ є҆сѝ, ᲂу҆́роше всечⷭ҇тне: црⷭ҇кагѡ ко́рене пло́дъ сла́докъ, а҆́ще и҆ не во вре́мѧ созрѣ́въ, въ гдⷭ҇ню жи́тницꙋ всели́лсѧ є҆сѝ, и҆ жа́лость ве́лїю сро́дствꙋ твоемꙋ̀ ѡ҆ста́вилъ є҆сѝ. Моли́сѧ ѡ҆ на́съ творѧ́щихъ ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "На вели́цѣй вече́рни, Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры, на и҃, гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "Свѣ́тлаѧ дне́сь па́мѧть наста̀, се́рбское ᲂу҆краше́нїе, ѡ҆б̾ѧвле́нїемъ чⷭ҇тны́хъ моще́й твои́хъ, на просвѣще́нїе и҆ похвалꙋ̀ сро́дства твоегѡ̀, ᲂу҆́роше всебл҃же́нне: да́ры добродѣ́тельными ѡ҆богати́лсѧ є҆сѝ. Моли́сѧ ѡ҆ на́съ ко гдⷭ҇ꙋ, творѧ́щихъ па́мѧть твою̀."
 },
 {
  "type": "TEXT",
  "value": "Стрꙋю̀ и҆сцѣле́нїй и҆сточа́еши приходѧ́щымъ съ вѣ́рою, и҆ подае́ши дарова́нїѧ просѧ́щымъ ᲂу҆ тебѐ, хода́тайствомъ прароди́телей твои́хъ: не ѡ҆скꙋдѣ́й молѧ́сѧ ко гдⷭ҇ꙋ, ѡ҆ творѧ́щихъ ст҃ꙋ́ю па́мѧть твою̀."
 },
 {
  "type": "TEXT",
  "value": "А҆́ще и҆ за́вистїю ᲂу҆бїе́нъ бы́лъ є҆сѝ ѿ твои́хъ при́сныхъ, но прⷭ҇нѡ въ раѝ водворѧ́ешисѧ съ прароди́тели твои́ми. А҆́ще и҆ непра́веднꙋю сме́рть под̾ѧ́лъ є҆сѝ, но ликовствꙋ́еши со ст҃ы́ми: ᲂу҆бі̑йцы же твоѝ вско́рѣ погибо́ша."
 },
 {
  "type": "TEXT",
  "value": "Є҆щѐ не во вре́мѧ созрѣ́въ, въ гдⷭ҇ню жи́тницꙋ всели́лсѧ є҆сѝ, и҆ ско́рбь ве́лїю ѡ҆ста́вивъ сро́дствꙋ твоемꙋ̀, невѣ́дꙋщꙋ ѡ҆ сме́рти твое́й: на лови́твꙋ и҆схо́диши, и҆ та́мѡ ᲂу҆бі́йственнꙋ ꙗ҆́звꙋ под̾ѧ́лъ є҆сѝ многострада́льне, ᲂу҆́роше."
 },
 {
  "type": "HEADER",
  "value": "Сла́ва, гла́съ г҃."
 },
 {
  "type": "TEXT",
  "value": "Во свѣ́тлости ст҃ы́хъ добродѣ́телей просїѧ́лъ є҆сѝ, свѣтлѣ́ѧсѧ ꙗ҆́кѡ сл҃нце, и҆ ѡ҆сїѧва́ѧ всѣ́хъ првⷣнымъ сїѧ́нїемъ, дне́сь ра́дꙋютсѧ всѧ̀ ѻ҆те́чествїѧ ꙗ҆зы́къ се́рбскагѡ сро́дства, моще́й твои́хъ ꙗ҆вле́нїемъ: всю́дꙋ и҆спо́лнилъ є҆сѝ бл҃гоꙋха́нїѧ, и҆ просвѣти́лъ є҆сѝ твоѐ ѻ҆те́чество всѧ́кими добро́тами, манове́нїемъ бж҃їѧ дх҃а, всѧ̀ воспрїе́мъ многострада́льне ᲂу҆́роше. Моли́сѧ ѡ҆ на́съ чтꙋ́щихъ ст҃ꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ка́кѡ не диви́мсѧ, бг҃омꙋ́жномꙋ ржⷭ҇твꙋ̀ твоемꙋ̀ пречⷭ҇тна́ѧ, и҆скꙋше́нїѧ бо мꙋ́жескагѡ не прїе́мши всенепоро́чнаѧ, родила̀ є҆сѝ безъ ѻ҆ц҃а̀ сн҃а пло́тїю: пре́жде вѣ̑къ ѿ ѻ҆ц҃а̀ рожде́ннагѡ безъ мт҃ре. Ника́коже претерпѣ́вшагѡ и҆змѣне́нїѧ, и҆лѝ смѣше́нїѧ, и҆лѝ раздѣле́нїѧ: но ѻ҆бою̀ сꙋществꙋ̑ сво́йство цѣ́лѡ сохра́ншаго: тѣ́мже мт҃и дв҃о влⷣчце, того̀ молѝ спасти́сѧ дꙋша́мъ, правосла́внѡ бцⷣꙋ и҆сповѣ́дающихъ тѧ̀."
 },
 {
  "type": "HEADER",
  "value": "Вхо́дъ, прокі́менъ днѐ, и҆ чтє́нїѧ трѝ."
 },
 {
  "type": "HEADER",
  "value": "На лїті́и стїхи́ра хра́ма. И҆ ст҃а́гѡ, гла́съ а҃:"
 },
 {
  "type": "TEXT",
  "value": "Ве́селѡ дне́сь цр҃ковь бж҃їѧ ѡ҆дѣва́етсѧ, ꙗ҆вле́нїемъ моще́й твои́хъ: се́рбскаѧ землѧ̀ красꙋ́етсѧ въ бж҃е́ственнѣй па́мѧти твое́й, ᲂу҆бі̑йцы же твоѝ стꙋда̀ и҆спо́лнени, посрами́шасѧ, ты́ же въ пи́щи ра́йстѣй водворѧ́ешисѧ, ᲂу҆́роше всебл҃же́нне."
 },
 {
  "type": "TEXT",
  "value": "Прароди́телїе твоѝ мольбꙋ̀ творѧ́тъ ко гдⷭ҇ꙋ, напослѣ́докъ, ѡ҆бнови́ти сро́дство своѐ, въ похвалꙋ̀ и҆ просвѣще́нїе, и҆ на ѡ҆бличе́нїе ᲂу҆бі́йцамъ твои̑мъ: тебѣ́ же на сла́вꙋ и҆ похвалꙋ̀, ᲂу҆́роше пребл҃же́нне, моли́сѧ спасти́сѧ дꙋша́мъ на́шимъ."
 },
 {
  "type": "TEXT",
  "value": "Стезе́ю тѣ́сною ше́ствовавъ, раѧ̀ широтꙋ̀ дости́глъ є҆сѝ, и҆ сро́дство твоѐ просвѣти́лъ є҆сѝ: чꙋде́сными дѣ́лы ѡ҆сїѧ́нъ, всю̀ подсо́лнечнꙋю ѡ҆богати́лъ є҆сѝ, да́ръ и҆сцѣле́нїѧ прїе́мъ, ᲂу҆́роше достобл҃же́нне."
 },
 {
  "type": "TEXT",
  "value": "А҆́ще и҆ безвре́менꙋ сме́рть под̾ѧ́лъ є҆сѝ, за́вистїю ратобо́рца ᲂу҆бива́емъ непови́ннѡ. Ѽ непра́веднагѡ ᲂу҆бі́йства! Но ѻ҆нѝ ᲂу҆́бѡ сꙋ́ть во тмѣ̀ и҆ мра́цѣ, ты́ же съ прароди́тели во црⷭ҇твїи водворѧ́ешисѧ достобл҃же́нне."
 },
 {
  "type": "TEXT",
  "value": "Ны́нѣ дне́сь свѣти́ло вели́кое ꙗ҆ви́сѧ се́рбскомꙋ ро́дꙋ, цр҃ковь бо коне́чнѣ запꙋстѣ́вшаѧ, па́ки бж҃їимъ манове́нїемъ, ѡ҆бновлѧ́етсѧ на похвалꙋ̀ твою̀ пребл҃же́нне ᲂу҆́роше: моли́сѧ ѡ҆ на́съ творѧ́щихъ ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, гла́съ є҃."
 },
 {
  "type": "TEXT",
  "value": "Красꙋ́йсѧ и҆ ликꙋ́й ве́селѡ цр҃кви бж҃їѧ, въ да́ры бо тебѣ̀ цр҃ь ᲂу҆́рошъ прино́ситсѧ, ѡ҆б̾ѧвле́нїемъ чⷭ҇тны́хъ моще́й свои́хъ. Ли́къ а҆́гг҃льскїй весели́тсѧ. Съ ни́миже моли́сѧ непреста́ннѡ хрⷭ҇тꙋ̀ за ны̀, и҆зба́вити ѿ бѣ́дъ, творѧ́щыѧ пречⷭ҇тно́е и҆ свѣтоно́сное твоѐ и҆́мѧ, многострада́льне ᲂу҆́роше пребл҃же́нне."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ра́дꙋйсѧ мт҃и хрⷭ҇та̀ бг҃а: и҆ є҆го́же родила̀ є҆сѝ молѝ, согрѣше́нїй ѡ҆ставле́нїе дарова́ти, вѣ́рою воспѣва́ющымъ тѧ̀."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Съ премі́рными чи́нми ны́нѣ водворѧ́ѧсѧ съ нб҃сѐ прїе́мъ бг҃оразꙋ́мїе, моле́бныѧ гла́сы тебѣ̀ возсыла́емъ: подви́гни сро́дство твоѐ, и҆ за ны̀ моли́сѧ прⷭ҇нѡ ко гдⷭ҇ꙋ, сохрани́ти на́съ ᲂу҆́роше достобл҃же́нне."
 },
 {
  "type": "TEXT",
  "value": "Сті́хъ: Првⷣникъ ꙗ҆́кѡ фі́нїѯъ процвѣте́тъ:"
 },
 {
  "type": "TEXT",
  "value": "Бг҃оразꙋ́мїѧ свѣ́тлостїю сїѧ́ѧ, мі́ра красотꙋ̀ презрѣ́лъ є҆сѝ: а҆враа́ма въ ло́нѣ почива́еши. Не пре́зри на́съ молѧ́щихсѧ тебѣ̀ многострада́льне, и҆ приснопа́мѧтне ᲂу҆́роше всечⷭ҇тне."
 },
 {
  "type": "TEXT",
  "value": "Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ:"
 },
 {
  "type": "TEXT",
  "value": "И҆́стиннымъ вѣнце́мъ вѣнча́вшимъ тѧ̀, и҆ црⷭ҇кою дїади́мою ѡ҆дѣва́ѧсѧ, вѣне́цъ добро́ты прїѧ́лъ є҆сѝ досточꙋ́дне: не пре́зри бл҃же́нне пѣвцы̀ твоѧ̑ почита́ющыѧ тѧ̀, предстоѧ̀ со а҆́гг҃лы во сла́вѣ."
 },
 {
  "type": "HEADER",
  "value": "Сла́ва, гла́съ ѕ҃."
 },
 {
  "type": "TEXT",
  "value": "Мы́сленныма ѻ҆чи́ма зрѧ̀ чꙋде́снѣ, а҆́гг҃лѡмъ соприча́стникъ бы́лъ є҆сѝ; просвѣща́еши всѧ̑ приходѧ́щыѧ съ вѣ́рою къ ра́цѣ твое́й чⷭ҇тнѣй, и҆ ревнꙋ́еши прароди́телємъ твои̑мъ, и҆зрѧ́денъ въ све́рстницѣхъ ꙗ҆ви́всѧ, добродѣ́телїю и҆ ра́зꙋмомъ всѣ́хъ ᲂу҆диви́лъ є҆сѝ, многострада́льне ᲂу҆́роше превожделѣ́нне: моли́сѧ, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Мт҃рнее дерзнове́нїе, є҆́же къ сн҃ꙋ твоемꙋ̀ и҆мꙋ́щи пречⷭ҇таѧ, къ рожде́нїю по́мощи: на́шѧ мольбы̑ не пре́зри мо́лимъ тѧ̀, ꙗ҆́кѡ тебѐ є҆ди́нꙋ ко влⷣцѣ ѡ҆чище́нїе и҆́мамы."
 },
 {
  "type": "HEADER",
  "value": "На бл҃гослове́нїи хлѣ́бѡвъ: Тропа́рь, гла́съ г҃:"
 },
 {
  "type": "TEXT",
  "value": "Ю҆́ношески процвѣ́лъ є҆сѝ во ѻ҆те́чествїи твое́мъ добро́тою ᲂу҆краше́нъ, и҆ непра́веднꙋю и҆ безвре́меннꙋю сме́рть под̾ѧ́лъ є҆сѝ, ᲂу҆́роше всечⷭ҇тне: црⷭ҇кагѡ ко́рене пло́дъ сла́докъ, а҆́ще и҆ не во вре́мѧ созрѣ́въ, въ гдⷭ҇ню жи́тницꙋ всели́лсѧ є҆сѝ, и҆ жа́лость ве́лїю сро́дствꙋ твоемꙋ̀ ѡ҆ста́вилъ є҆сѝ. Моли́сѧ ѡ҆ на́съ творѧ́щихъ ст҃ꙋ́ю па́мѧть твою̀. Два́жды."
 },
 {
  "type": "TEXT",
  "value": "Бцⷣе дв҃о:"
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь: тТропа́рь ст҃а́гѡ, гла́съ г҃:"
 },
 {
  "type": "TEXT",
  "value": "Ю҆́ношески процвѣ́лъ є҆сѝ во ѻ҆те́чествїи твое́мъ добро́тою ᲂу҆краше́нъ, и҆ непра́веднꙋю и҆ безвре́меннꙋю сме́рть под̾ѧ́лъ є҆сѝ, ᲂу҆́роше всечⷭ҇тне: црⷭ҇кагѡ ко́рене пло́дъ сла́докъ, а҆́ще и҆ не во вре́мѧ созрѣ́въ, въ гдⷭ҇ню жи́тницꙋ всели́лсѧ є҆сѝ, и҆ жа́лость ве́лїю сро́дствꙋ твоемꙋ̀ ѡ҆ста́вилъ є҆сѝ. Моли́сѧ ѡ҆ на́съ творѧ́щихъ ст҃ꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Тѧ̀ хода́тайствовавшꙋю:"
 },
 {
  "type": "HEADER",
  "value": "По а҃-мъ стїхосло́вїи, сѣда́ленъ: гла́съ є҃."
 },
 {
  "type": "TEXT",
  "value": "Подо́бенъ: Собезнача́льное сло́во:"
 },
 {
  "type": "TEXT",
  "value": "Мы́сленныма ѻ҆чи́ма, прозрѣ́въ бꙋ̑дꙋщаѧ, совѣ́томъ ма́тернимъ пожи́лъ є҆сѝ, и҆ цр҃кви воздви́глъ є҆сѝ въ похвалꙋ̀ прароди́телей твои́хъ, и҆ въ сла́вꙋ пречⷭ҇тыѧ бг҃ома́тере, є҆ѧ́же мл҃твами хрⷭ҇тѐ поми́лꙋй на́съ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Тꙋ́чами дх҃а ст҃а́гѡ, пречⷭ҇таѧ мою̀ мы́сль ѡ҆росѝ, ꙗ҆́же ка́плю ро́ждши безмѣ́рнꙋю хрⷭ҇та̀; и҆зсꙋшѝ и҆сто́чникъ страсте́й мои́хъ, и҆ пото́ка пи́щи мѧ̀ напо́й мл҃твою твое́ю."
 },
 {
  "type": "HEADER",
  "value": "По в҃-мъ стїхосло́вїи, сѣда́ленъ: гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ двⷭ҇тва:"
 },
 {
  "type": "TEXT",
  "value": "Кра́сенъ бы́въ во видѣ́нїи въ животѣ̀ твое́мъ, краснѣ́йшїй же показа́лсѧ є҆сѝ по сме́рти твое́й, ѡ҆б̾ѧвле́нїемъ честны́хъ моще́й твои́хъ, и҆ всѣ́хъ зрѧ́щихъ ᲂу҆диви́лъ є҆сѝ, многострада́льне ᲂу҆́роше всебл҃же́нне. Два́жды."
 },
 {
  "type": "HEADER",
  "value": "Сла́ва, и҆ ны́нѣ: Бг҃оро́диченъ:"
 },
 {
  "type": "TEXT",
  "value": "Под̾ земле́ю низве́рженъ бы́хъ грѣхмѝ, ᲂу҆мертви́хсѧ дш҃е́вными страстмѝ и҆ тѣле́сными: тѣ́мже тмо́ю покрыва́юсѧ ѿча́ѧнїѧ. Но воздви́гни мѧ̀ ны́нѣ къ покаѧ́нїю, и҆ сп҃си́ мѧ: мо́жеши бо є҆ли́ка хо́щеши."
 },
 {
  "type": "HEADER",
  "value": "По полѷеле́и, сѣда́ленъ: гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Є҆гда̀ тѧ̀ сегѡ̀ свѣ́та лише́нїю преда́ша, ѿнесе́нꙋ бы́вшꙋ тѣ́лꙋ твоемꙋ̀ во хра́мъ, ᲂу҆спе́нїѧ пречⷭ҇тыѧ, и҆спрѧ́товаютъ та́йнѡ въ гробни́цѣ внꙋ́трь, и҆дѣ́же бж҃е́ственнаѧ соверша́ютсѧ: и҆ никомꙋ̀ ѡ҆ се́мъ вѣ́домѡ бы́сть, то́чїю ѻ҆би́тели предста́телю, до́ндеже бг҃ꙋ ѡ҆б̾ѧвле́нна тѧ̀ сотво́ршꙋ. Оу҆бі̑йцы же твоѝ стꙋда̀ и҆спо́лнени вско́рѣ сконча́шасѧ: ты́ же въ ра́йстѣй пи́щи водворѧ́ешисѧ многострада́льне ᲂу҆́роше, и҆ всебл҃же́нне, молѝ хрⷭ҇та̀ бг҃а грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Ꙗ҆́кѡ во глꙋбинꙋ̀ мно́гихъ согрѣше́нїй впадо́хъ, ѿ лѣ́ности моеѧ̀ и҆ ᲂу҆ны́нїѧ ѻ҆каѧ́нный и҆ невѣ́дѣнїѧ, и҆ ѿча́ѧнїемъ ны́нѣ ѡ҆держи́мъ є҆́смь. Бꙋ́ди мѝ по́мощь и҆ ѡ҆чище́нїе, и҆ сп҃се́нїе пречⷭ҇таѧ, и҆ ᲂу҆тѣше́нїе бл҃гопремѣ́нно подаю́щи мѝ, тѧ̀ молю̀ и҆ тебѣ̀ ми́лсѧ дѣ́ю и҆ припа́даю, и҆ вѣ́рою зовꙋ́ ти, да не ꙗ҆влю́сѧ до конца̀ льсти́вомꙋ ѡ҆бра́дованїе."
 },
 {
  "type": "HEADER",
  "value": "Степе́нна, а҃-й а҆нтїфѡ́нъ, д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Чтⷭ҇на̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇ви ѡ҆ всѣ́хъ ꙗ҆̀же воздаде́ ми;"
 },
 {
  "type": "TEXT",
  "value": "Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло р҃ѕ:"
 },
 {
  "type": "TEXT",
  "value": "Речѐ гдⷭ҇ь свои̑мъ ᲂу҆ченикѡ́мъ: внемли́тесѧ ѿ чл҃къ, возложа́тъ на вы̀ рꙋ́ки."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃."
 },
 {
  "type": "TEXT",
  "value": "Оу҆́рошъ ди́вный бж҃е́ственныѧ тишины̀ жела́ѧ, за́вистїю лише́нъ свѣ́та сегѡ̀ быва́етъ и҆ безвре́меннꙋю сме́рть прїе́млетъ, вѣнце́мъ добродѣ́телей ᲂу҆вѧзе́сѧ, и҆ съ премі́рными ли́ки ра́дꙋетсѧ, и҆ дерзнове́ннѡ предстои́тъ влⷣцѣ, со преподо́бнымъ сѷмеѡ́номъ, и҆ са́ввою преѡсщ҃е́ннымъ, ꙗ҆́кѡ хода́таи при́снїи, и҆ мл҃твенницы ѡ҆ дꙋша́хъ на́шихъ."
 },
 {
  "type": "HEADER",
  "value": "Канѡ́нъ бцⷣы со і҆рмо́сомъ на ѕ҃, и҆ ст҃а́гѡ ᲂу҆́роша на и҃."
 },
 {
  "type": "HEADER",
  "value": "Канѡ́нъ мч҃ника, гла́съ д҃, є҆го́же краегране́сїе:"
 },
 {
  "type": "TEXT",
  "value": "Паі́сїй недосто́йный, пою́ тѧ бл҃же́нне ᲂу҆́роше."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а: и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Пе́рвѣе грѣхо́внымъ неприѡбщи́всѧ жела́нїемъ, зла́та чⷭ҇тнѣ́йшїй показа́лсѧ є҆сѝ: ꙗ҆́кѡ ѿ ко́рене бл҃горо́дна и҆зра́слъ є҆сѝ бл҃же́нне."
 },
 {
  "type": "TEXT",
  "value": "А҆́ще и҆ гони́тель тво́й бы́сть волкаши́нъ, но ра́венъ произше́лъ є҆сѝ роди́телемъ твои́мъ, дѣ́лы и҆ словесы̀ подо́бѧсѧ: и҆ ꙗ҆́коже ѕвѣзда̀ просїѧ́лъ є҆сѝ бл҃же́нне."
 },
 {
  "type": "TEXT",
  "value": "И҆́же зако́ннꙋю сѣ́нь преминꙋ́въ, ᲂу҆́роше къ ше́ствїю небе́сномꙋ возше́лъ є҆сѝ ра́дꙋѧсѧ, и҆ трⷪ҇цѣ предстои́ши: сегѡ̀ ра́ди блажи́мъ па́мѧть твою̀."
 },
 {
  "type": "TEXT",
  "value": "Бг҃оро́диченъ: А҆́гницꙋ тѧ̀ посредѣ̀ те́рнїѧ ѡ҆брѣ́тъ, не вла́емое приста́нище, и҆ къ бг҃ꙋ рꙋководи́тельницꙋ крѣ́пкꙋю мт҃и дв҃о влⷣчце."
 },
 {
  "type": "TEXT",
  "value": "Катава́сїа: Хрⷭ҇то́съ ражда́етсѧ, сла́вите."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ. Въ бж҃е́ственнѣй твое́й сла́вѣ, вѣнцє́въ сла́вы сподо́би."
 },
 {
  "type": "TEXT",
  "value": "Сѣ́мене бл҃горо́днагѡ цвѣ́тъ прекра́сенъ показа́лсѧ є҆сѝ, напослѣ́докъ ꙗ҆вле́нїемъ чⷭ҇тны́хъ моще́й твои́хъ, въ похвалꙋ̀ сро́дствꙋ твоемꙋ̀ всебл҃же́нне ᲂу҆́роше."
 },
 {
  "type": "TEXT",
  "value": "Є҆щѐ ѿ рожде́нїѧ бл҃га́ѧ ѿра́сль показа́лсѧ є҆сѝ, всѣ́ми ви́ды добродѣ́телїю: ревнꙋ́ѧ прароди́телємъ твои̑мъ, цр҃кви воздвиза́ѧ, и҆ и҆́нны потвержда́ѧ."
 },
 {
  "type": "TEXT",
  "value": "И҆зъ нача́ла ѡ҆ бз҃ѣ пѣва́емыѧ пѣ́сни, всю́дꙋ прослꙋ́сѧ и҆́мѧ твоѐ, ꙗ҆вле́нїемъ чⷭ҇тны́хъ моще́й твои́хъ, многострада́льне ᲂу҆́роше всемꙋ́дре, назира́й на́съ."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ чⷭ҇таѧ дв҃о, и҆ незабꙋ́ди на́съ молѧ́щихтисѧ, въ тꙋ́зѣ сꙋ́щихъ и҆ ско́рбехъ: твою̀ млⷭ҇ть и҆зле́й на на́съ мо́лимтисѧ влⷣчце."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости на перⷭ҇:"
 },
 {
  "type": "TEXT",
  "value": "Премꙋ́дре досто́инъ бы́лъ є҆сѝ и҆́менемъ и҆ дѣ́ломъ роди́телємъ твои̑мъ подо́бѧсѧ, и҆ сро́дствꙋ твоемꙋ̀ ѡ҆бновле́нїе твори́ши, бг҃ꙋ просла́вльшꙋ тѧ̀ въ животѣ̀, и҆́же и҆ по сме́рти просла́вилъ тѧ̀ є҆́сть, въ похвалꙋ̀ сро́дствꙋ твоемꙋ̀ многострада́льне и҆ пребл҃же́не ᲂу҆́роше всече́стне: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю ст҃ꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Нбⷭ҇нꙋю две́рь, и҆ кївѡ́тъ всест҃ꙋ́ю го́рꙋ, свѣтоза́рный ѻ҆́блакъ воспои́мъ, нбⷭ҇нꙋю лѣ́ствицꙋ, слове́сный ра́й, є҆́ѵино и҆збавле́нїе, вселе́нныѧ всеѧ̀ вели́кое сокро́вище: ꙗ҆́кѡ сп҃се́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. Сегѡ̀ ра́ди вопїе́мъ тѝ: молѝ сн҃а твоегѡ̀ и҆ бг҃а, прегрѣше́нїй ѡ҆ставле́нїе дарова́ти, бл҃гоче́стнѡ покланѧ́ющесѧ прест҃о́мꙋ ржⷭ҇твꙋ̀ твоемꙋ̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й во сла́вѣ на прⷭ҇то́лѣ бжⷭ҇тва̀ во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Неизгла́гѡланнаѧ твоѧ̑ чꙋдодѣ̑йствїѧ, ꙗ҆̀же напослѣ́докъ показа́шасѧ, ᲂу҆́роше всемꙋ́дре: незабꙋ́ди сро́дства твоегѡ̀, и҆ поми́лꙋй на́съ молѧ́щихтисѧ."
 },
 {
  "type": "TEXT",
  "value": "Є҆́же ѿ нача́ла безнача́льномꙋ сло́вꙋ вѣ́ровалъ є҆сѝ, и҆ роди́телю є҆диноро́денъ бы́лъ є҆сѝ: и҆ црⷭ҇кою дїади́мою ᲂу҆краша́ютъ тѧ̀. Въ сла́вꙋ и҆ похвалꙋ̀ сро́дствꙋ твоемꙋ̀."
 },
 {
  "type": "TEXT",
  "value": "Добродѣ́тели твоѧ̀ и҆ красотꙋ̀ кто̀ и҆зрещѝ мо́жетъ; ᲂу҆диви́лъ во є҆сѝ всѣ́хъ приходѧ́щихъ къ ра́цѣ моще́й твои́хъ: ра́зꙋмомъ превосходѧ̀ мнѡ́гїѧ."
 },
 {
  "type": "TEXT",
  "value": "Бг҃оро́диченъ: Хвалы̀ моле́бныѧ къ тебѣ̀ воспꙋща́ю пречⷭ҇таѧ влⷣчце, не забꙋ́ди на́съ, но моли́сѧ ѡ҆ на́съ къ ро́ждшемꙋсѧ и҆зъ тебѐ, да сп҃се́тъ тебѐ ра́ди дꙋ́шы на́шѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́ческаѧ ѡ҆ бж҃е́ственнѣй сла́вѣ твое́й. Ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнагѡ сн҃а, всѣ̑мъ воспѣва́ющымъ тѧ̀, ми́ръ подава́ющаѧ."
 },
 {
  "type": "TEXT",
  "value": "Ѽ непра́ведныѧ сме́рти и҆ безвре́менныѧ, ю҆́же под̾ѧ́лъ є҆сѝ ᲂу҆́роше всече́стне! Превы́шше бо въ ра́дости пребыва́еши, съ ли́ки и҆збра́нными."
 },
 {
  "type": "TEXT",
  "value": "Стезе́ю ѻ҆те́ческою ше́ствовалъ є҆сѝ всеизрѧ́дною, чꙋдесы̀ ᲂу҆диви́лъ є҆сѝ сро́дство твоѐ: ра́ка же твоѧ̀ и҆сцѣле́нїѧ подава́етъ ᲂу҆́роше бл҃же́нне."
 },
 {
  "type": "TEXT",
  "value": "Твоѧ̀ па́мѧть дне́сь весе́лїѧ всѣ́хъ и҆сполнѧ́етъ, и҆́же ᲂу҆дивлѧ́ющесѧ, гл҃ютъ: сла́ва бл҃гоꙋтро́бїю твоемꙋ̀ хрⷭ҇тѐ цр҃ю̀, да́вшемꙋ на́мъ сїѐ ᲂу҆краше́нїе."
 },
 {
  "type": "TEXT",
  "value": "Бг҃оро́диченъ: Ты̀ є҆сѝ всѣ́мъ помо́щница, и҆ и҆́стиннаѧ хрⷭ҇тїа́нѡмъ застꙋ́пница, и҆ покрови́тельница, и҆ сп҃се́нїе дꙋ́шъ на́шихъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бж҃е́ственное сїѐ и҆ всечⷭ҇тно́е, соверша́юще пра́зднство бг҃омꙋ́дрїи бг҃ома́тере: прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Ѿра́сли бл҃горо́дныѧ просїѧ́лъ є҆сѝ, мꙋ́дростїю и҆ ра́зꙋмомъ всѣ́хъ превозше́лъ є҆сѝ, и҆ безвре́меннꙋю сме́рть под̾е́мъ, вѣнце́мъ мч҃ническимъ вѣнча́лсѧ є҆сѝ сла́вне."
 },
 {
  "type": "TEXT",
  "value": "Твои́мъ ꙗ҆вле́нїемъ се́рбскаѧ ѻ҆́бласть ра́дꙋетсѧ, и҆ сро́дство твоѐ напослѣ́докъ, твои́мъ ꙗ҆вле́нїемъ просвѣти́лъ є҆сѝ: не забꙋ́ди и҆ на́съ молѧ́щихсѧ тебѣ̀."
 },
 {
  "type": "TEXT",
  "value": "На сп҃се́ннꙋю стезю̀ наста́ви на́съ ходи́ти прⷭ҇нѡ, и҆ почита́ти тѧ̀, и҆ па́мѧть твою̀ соверша́ти, и҆ бг҃оꙋго́дно пожи́ти въ чⷭ҇тнѣ́мъ хра́мѣ твое́мъ."
 },
 {
  "type": "TEXT",
  "value": "Бг҃оро́диченъ: Пречⷭ҇таѧ дв҃о мт҃и і҆и҃съ хрⷭ҇то́ва, поми́лꙋй и҆ спасѝ, и҆́же вѣ́рою къ тебѣ̀ прибѣга́ющыѧ: ꙗ҆́кѡ на тѧ̀ съ бг҃омъ ᲂу҆пова́нїе и҆́мамы."
 },
 {
  "type": "HEADER",
  "value": "Конда́къ, гла́съ ѕ҃."
 },
 {
  "type": "TEXT",
  "value": "Подо́бенъ: Рꙋкопи́саннаго:"
 },
 {
  "type": "TEXT",
  "value": "Ѿра́сли бл҃горо́дныѧ, цвѣ́тъ прекра́сный ꙗ҆ви́лсѧ є҆сѝ ᲂу҆́роше всече́стне: за́вистїю бо ᲂу҆бїе́нъ бы́лъ є҆сѝ ѿ твои́хъ при́сныхъ, бж҃їимъ же дх҃омъ просвѣще́нъ, ст҃оро́днаго пле́мене, ст҃ъ бы́лъ є҆сѝ, и҆ мч҃нческимъ вѣнце́мъ ᲂу҆вѧ́зсѧ, въ черто́зѣ нбⷭ҇нѣмъ водворѧ́ешисѧ: моли́сѧ ѡ҆ на́съ ст҃е, творѧ́щихъ любо́вїю па́мѧть твою̀."
 },
 {
  "type": "TEXT",
  "value": "І҆́косъ: Кто̀ досто́инъ ᲂу҆стнѣ̀ ѿве́рзсти, и҆лѝ ѧ҆зы́къ дви́гнꙋти, и҆ похвали́ти, хвали́маго бг҃омъ, ѡ҆ба́че въ толи́ко вре́мѧ въ тимѣ́нїи земно́мъ пребы́въ, ѿ хрⷭ҇та̀ сп҃са вѣне́цъ прїѧ́лъ є҆́сть: и҆ дарова́ньми и҆сцѣле́нїй ѡ҆богати́всѧ, и҆сцѣле́нїѧ да́ръ прїѧ́тъ, и҆ че́стенъ страда́лецъ показа́сѧ, приносѧ̀ моле́нїе бл҃годѣ́телю, и҆ прїе́мъ сла́вꙋ съ нб҃сѐ, и҆ вѣне́цъ добро́ты, и҆ мо́литсѧ ѡ҆ творѧ́щихъ любо́вїю па́мѧть є҆гѡ̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Твою̀ ѻ҆би́тель вскꙋ́ю забы́лъ є҆сѝ: воспрѧнѝ ᲂу҆́бѡ, си́лою пра́родитель твои́хъ: и҆ и҆спросѝ ѿ гдⷭ҇а по́мощь и҆ застꙋпле́нїе твое́й ѻ҆би́тели, ꙗ҆́кѡ да пое́мъ: ѻ҆ц҃ъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Почита́ю мо́щи твоѧ̑, и҆ покланѧ́юсѧ: и҆сцѣле́нїе бо подае́ши вѣ́рою приходѧ́щымъ. Пода́ждь и҆ на́мъ ми́рное житїѐ во ѻ҆би́тели твое́й пою́щымъ: ѻ҆ц҃ъ на́шихъ бж҃е блгⷭ҇ве́нъ є҆сѝ."
 },
 {
  "type": "TEXT",
  "value": "Ѻ҆́трокъ бы́лъ є҆сѝ, нбⷭ҇нагѡ жили́ща хода́тай: всѧ́кими бо добро́тами ᲂу҆кра́шенъ, ᲂу҆бі́йственною ꙗ҆́звою и҆змѣни́лъ є҆сѝ живо́тъ тво́й, ѻ҆нѝ ᲂу҆́бѡ стꙋда̀ и҆спо́лнишасѧ, ты́ же вопїе́ши: ѻ҆ц҃ъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Свѣ́тлыми зарѧ́ми всю̀ зе́млю, возсїѧ́вшее сл҃нце ѿ ст҃а́гѡ чре́ва твоегѡ̀ ѡ҆зарѧ́етъ влⷣчце, и҆́мже и҆ на́съ просвѣтѝ твое́ю млⷭ҇тїю, вопїю́щихъ: препѣ́тый ѻ҆ц҃є́въ гдⷭ҇ь и҆ бг҃ъ, блгⷭ҇ве́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дично спасло̀ є҆́сть, тогда̀ ᲂу҆́бѡ ѻ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆гѡ̀ во всѧ̀ вѣ́ки."
 },
 {
  "type": "TEXT",
  "value": "Ю҆́ношески пожи́въ во ѻ҆те́чествїи твое́мъ, и҆ бл҃жи́тъ тѧ̀ сро́дство твоѐ, и҆ весе́лїемъ ра́дꙋетсѧ, твоемꙋ̀ ѻ҆б̾ѧвле́нїю дивѧ́сѧ гл҃го́летъ: гдⷭ҇а по́йте дѣла̀, и҆ превозноси́те є҆гѡ̀ во всѧ̀ вѣ́ки."
 },
 {
  "type": "TEXT",
  "value": "Треплете́нный воспрїѧ́лъ є҆сѝ вѣне́цъ ѿ вы́шнѧгѡ дарода́телѧ, и҆зрѧ́денъ бы́въ твое́й ѻ҆би́тели: и҆ цр҃ковь просвѣти́въ мощмѝ твои́ми, вопїѧ̀; гдⷭ҇а по́йте дѣла̀, и҆ превозноси́те є҆гѡ̀ во всѧ̀ вѣ́ки."
 },
 {
  "type": "TEXT",
  "value": "Є҆стество̀ премѣни́въ тлѣ́нное, въ вѣ̑чныѧ ѻ҆би́тели вше́лъ є҆сѝ бл҃же́нне: и҆ житїю̀ прест҃о́мꙋ послѣ́довалъ є҆сѝ прароди́телей твои́хъ, вопїѧ̀: гдⷭ҇а по́йте дѣла̀, и҆ превозноси́те є҆гѡ̀ во всѧ̀ вѣ́ки."
 },
 {
  "type": "TEXT",
  "value": "Бг҃оро́диченъ: Коне́цъ бл҃гі́й пода́ти мѝ дв҃о, гдⷭ҇а ᲂу҆молѝ, да и҆збꙋ́дꙋ ѡ҆жида́ющихъ мѧ̀ вѣ́чныхъ мꙋ́къ: ꙗ҆́кѡ да тѧ̀ пою̀ бл҃гослове́ннаѧ во всѧ̀ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ дх҃омъ просвѣща́емъ: да торжествꙋ́етъ же безпло́тныхъ ᲂу҆́мѡвъ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ всебл҃же́ннаѧ бцⷣе чⷭ҇та́ѧ приснодв҃о."
 },
 {
  "type": "TEXT",
  "value": "Бж҃е́ственное селе́нїе ты̀ бы́лъ є҆сѝ пресвѣ́тло просвѣти́всѧ, ᲂу҆́роше всебл҃же́нне, сро́дство твоѐ назира́й, и҆ ѿ недꙋ́гъ и҆ бѣ́дъ и҆збавлѧ́й: да тѧ̀ непреста́ннѡ велича́емъ."
 },
 {
  "type": "TEXT",
  "value": "Ле́сть и҆скорени́лъ є҆сѝ ѕлꙋ́ю, правосла́вїю ревнꙋ́ѧ: прароди́телємъ твои́мъ чꙋдесы̀ подо́бѧсѧ, ᲂу҆диви́лъ є҆сѝ зрѧ́щыѧ твоѧ̀ пресла́внаѧ чꙋдеса̀ бл҃же́нне."
 },
 {
  "type": "TEXT",
  "value": "Жела́ѧ ᲂу҆подо́битисѧ бл҃же́нномꙋ сѷмеѡ́нꙋ, и҆ ст҃и́телю са́ввѣ, и҆ и҆́нымъ сро́дствомъ до́брѣ пожи́вшымъ: и҆ не лиши́лъ тѧ̀ є҆́сть вели́кїй дарода́тель, ᲂу҆́роше всече́стне."
 },
 {
  "type": "TEXT",
  "value": "Бг҃оро́диченъ: Прїимѝ на́ше ма́лое сїѐ приноше́нїе, ѽ всенепоро́чнаѧ гпⷭ҇жѐ влⷣчце: и҆ є҆́же ѿ недосто́йныхъ ᲂу҆сте́нъ приноси́мое тѝ моле́нїе прїимѝ и҆ не ѿри́ни всенепоро́чнаѧ влⷣчце."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "Ны́нѣшнюю сла́вꙋ презрѣ́лъ є҆сѝ, вы́шнюю сла́вꙋ полꙋчи́лъ є҆сѝ: и҆ земны́ми нбⷭ҇наѧ, наслѣ́довавъ бл҃же́нне. Влⷣцѣ ꙗ҆́кѡ прⷣестоѧ̀, ѡ҆ на́съ всегда̀ моли́сѧ. Два́жды."
 },
 {
  "type": "TEXT",
  "value": "Бг҃оро́диченъ: Є҆ди́на чⷭ҇таѧ и҆ нескве́рнаѧ, ѡ҆скверне́на мѧ̀ всѧ́кими паде́нми лю́тыми, и҆зба́ви лю́тыѧ мꙋ́ки и҆ тмы̀ кромѣ́шнїѧ."
 },
 {
  "type": "HEADER",
  "value": "На хвали́техъ стїхи̑ры, на д҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Оу҆мꙋдрѝ тѧ̀ вы́шнѧѧ си́ла, земна́ѧ всѧ̀ презрѣ́въ, ᲂу҆́мъ впери́въ ко гдⷭ҇ꙋ, ᲂу҆́роше всечⷭ҇тне, ѻ҆те́чество твоѐ назира́й, и҆ ѻ҆би́тель твою̀ незабꙋ́ди, просвѣще́нїе на́мъ подава́ѧ, творѧ́щымъ ст҃ꙋ́ю па́мѧть твою̀."
 },
 {
  "type": "TEXT",
  "value": "Ро́да свѣ́тла бы́лъ є҆сѝ бл҃же́нне, ꙗ҆́кѡ шипо́къ процвѣ́лъ є҆сѝ цр҃кви, и҆ ꙗ҆́кѡ фі́нїѯъ многора́сленный бл҃гоꙋха́нїѧ и҆спо́лнилсѧ є҆сѝ: ле́сть є҆ресе́й разрꙋши́въ неви́димою си́лою, и҆ на́съ незабꙋ́ди молѧ́щихтисѧ, ᲂу҆́роше достобл҃же́нне."
 },
 {
  "type": "TEXT",
  "value": "Ше́ствовалъ є҆сѝ стезе́ю ѻ҆те́ческою, и҆ бл҃же́ннꙋю жи́знь пости́глъ є҆сѝ, прароди́телемъ подо́бѧсѧ всѧ́кими добродѣ́телми: цр҃кви воздвиза́ѧ при животѣ̀ твое́мъ, и҆ и҆́нныѧ подтвержда́ѧ прароди́телей твои́хъ, и҆ по сме́рти твою̀ цр҃ковь мощмѝ ѡ҆бл҃гоꙋха́лъ є҆сѝ, и҆ чꙋдесы̀ всѣ́хъ ᲂу҆диви́лъ є҆сѝ, достоблаже́нне ᲂу҆́роше всечⷭ҇тне."
 },
 {
  "type": "TEXT",
  "value": "Оу҆ма̀ твоегѡ̀ непоколеба̀ тве́рдость, а҆дама́нта твердѣ́йшїй ꙗ҆ви́всѧ а҆́ще и҆ ю҆́нъ бы́лъ є҆сѝ, и҆ недоспѣ́лъ є҆сѝ соверше́ннагѡ во́зраста: но дх҃а ст҃а́гѡ и҆спо́лненъ бы́въ бл҃года́ти. Ди́вѧтсѧ мно́зи зрѧ́ще твоѧ̀ мо́щи кра́сныѧ, цр҃ковь бо твою̀ просвѣти́лъ є҆сѝ разли́чными бл҃гоꙋха́нми, всечⷭ҇тне и҆ пребл҃же́нне."
 },
 {
  "type": "HEADER",
  "value": "Сла́ва, гла́съ д҃."
 },
 {
  "type": "TEXT",
  "value": "Свѣ́тлаѧ дне́сь наста̀ па́мѧть твоѧ̀ ᲂу҆́роше бл҃же́нне: свѣтлѣ́йшїй же є҆́сть приходѧ́й во виѳлее́мѣ роди́тисѧ хрⷭ҇то́съ, и҆́же все́й вселе́ннѣй ра́дость подае́тъ: твоѧ́ же ᲂу҆бі́йственнаѧ и҆ безвре́меннаѧ сме́рть, се́рбстѣй землѝ рыда́нїе неꙋтѣши́мо, и҆ жа́лость ве́лїю. И҆ ны́нѣ бл҃же́нне и҆ досточꙋ́дне непреста́й ѡ҆ на́съ молѧ́сѧ, ꙗ҆́кѡ съ мч҃нческими ли́ки водворѧ́ешисѧ, и҆ ᲂу҆ престо́ла ст҃ы́ѧ трⷪ҇цы предстоѧ̀ съ прароди́тели твои́ми, твоѐ сро́дство помина́й, творѧ́щее любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "И҆мꙋ́ще тѧ̀ бцⷣе ᲂу҆пова́нїе и҆ прⷣеста́тельство, вра́жїихъ навѣ́тъ неꙋбои́мсѧ, ꙗ҆́кѡ спаса́еши дꙋ́шы на́шѧ."
 },
 {
  "type": "HEADER",
  "value": "Славосло́вїе вели́кое и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Бл҃же́нна ѿ канѡ́на ст҃а́гѡ пѣ́снь г҃-й, ѕ҃-ѧ."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на негѡ̀."
 },
 {
  "type": "TEXT",
  "value": "Сті́хъ: Оу҆слы́ши бж҃е гла́съ мо́й."
 },
 {
  "type": "HEADER",
  "value": "А҆пⷭ҇лъ къ тїмоѳе́ю, зача́ло сч҃є."
 },
 {
  "type": "TEXT",
  "value": "А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ:"
 },
 {
  "type": "TEXT",
  "value": "Сті́хъ: Насажде́ни въ домꙋ̀ гдⷭ҇ни."
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, зача́ло ѯ҃г."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ."
 }
]