[
 {
  "type": "HEADER",
  "value": "І҆аннꙋа́рїа ѳ҃"
 },
 {
  "type": "HEADER",
  "value": "И҆́же во ст҃ы́хъ ѻ҆тца̀ на́шегѡ фїлі́ппа, митрополі́та моско́вскагѡ и҆ всеѧ̀ рѡссі́и, но́вагѡ и҆сповѣ́дника."
 },
 {
  "type": "HEADER",
  "value": "На ᲂу҆́трени. На Бг҃ъ гдⷭ҇ь: тропа́рь, гла́съ и҃:"
 },
 {
  "type": "TEXT",
  "value": "Первопресто́льникѡвъ прее́мниче, сто́лпе правосла́вїѧ, и҆́стины побо́рниче, но́вый и҆сповѣ́дниче, ст҃и́телю фїлі́ппе, положи́вый дꙋ́шꙋ за па́ствꙋ твою̀. Тѣ́мже ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, молѝ за первопресто́льный гра́дъ же и҆ лю́ди, чтꙋ́щыѧ досто́йнѡ ст҃ꙋ́ю па́мѧть твою̀."
 },
 {
  "type": "HEADER",
  "value": "Велича́нїе ст҃и́телѧ:"
 },
 {
  "type": "TEXT",
  "value": "Велича́емъ тѧ̀, ст҃и́телю ѻ҆́тче фїлі́ппе, и҆ чти́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. Бл҃говѣсти́хъ пра́вдꙋ в̾ цр҃кви вели́цѣй. Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. Бл҃же́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀."
 },
 {
  "type": "HEADER",
  "value": "Сѣда́ленъ, гла́съ и҃:"
 },
 {
  "type": "TEXT",
  "value": "Проповѣ́дꙋетъ, ѻ҆́тче, тебѐ ны́нѣ рѡссі́йскаѧ митропо́лїѧ, ю҆́же ѿ болѣ́зней и҆ скорбе́й и҆збавлѧ́еши, бг҃обл҃же́нне фїлі́ппе, а҆́гг҃лѡвъ собесѣ́дникъ ꙗ҆ви́всѧ. Тѣ́мже со а҆пⷭ҇лы и҆ мч҃нки ликꙋ́ѧ, помо́щникъ быва́еши въ ско́рбехъ, всеизрѧ́дне, пла́чꙋщихъ ᲂу҆тѣше́нїе, па́стырь и҆ наста́вникъ заблꙋ́ждшихъ, фїлі́ппе бл҃же́нне: и҆ на́съ твои́ми мл҃твами и҆зба́ви ѿ бѣ́дъ и҆ моли́сѧ хрⷭ҇тꙋ̀ бг҃ꙋ, да ѡ҆ставле́нїе пода́стъ, вѣ́рою и҆ любо́вїю чтꙋ́щымъ ст҃ꙋ́ю па́мѧть твою̀."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, заⷱ҇ к҃д."
 },
 {
  "type": "HEADER",
  "value": "Стїхи́ра по н҃-мъ ѱалмѣ̀, гла́съ и҃:"
 },
 {
  "type": "TEXT",
  "value": "А҆пⷭ҇лѡвъ ревни́телѧ фїлі́ппа, пребл҃же́ннаго ѻ҆тца̀ и҆ ᲂу҆чи́телѧ соше́дшесѧ восхва́лимъ, глаго́люще: ра́дꙋйсѧ ст҃и́телю, тве́рдый ᲂу҆мо́мъ, бл҃года́тїю и҆ и҆́стиною ѡ҆сщ҃е́нне, ѿню́дꙋже и҆ прїѧ́телище бы́лъ є҆сѝ дх҃а всест҃а́гѡ. И҆ ны́нѣ со а҆рхїерє́и предстоѧ̀ прⷭ҇то́лꙋ хрⷭ҇то́вꙋ, моли́сѧ при́снѡ ѡ҆ рабѣ́хъ твои́хъ."
 },
 {
  "type": "HEADER",
  "value": "Канѡ́нъ ст҃и́телѧ, глаⷭ҇ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль. Пѣ́снь же воспѣва́шесѧ: гдⷭ҇ви пои́мъ, сла́внѡ бо просла́висѧ."
 },
 {
  "type": "HEADER",
  "value": "Катава́сїа, глаⷭ҇ в҃:"
 },
 {
  "type": "TEXT",
  "value": "Глꙋбины̀ ѿкры́лъ є҆́сть дно̀, и҆ сꙋ́шею своѧ̑ влече́тъ: въ не́й покры́въ проти̑вныѧ, крѣ́пкїй во бране́хъ гдⷭ҇ь, ꙗ҆́кѡ просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ: разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ."
 },
 {
  "type": "TEXT",
  "value": "Катава́сїа: Крѣ́пость даѧ́й царє́мъ на́шымъ гдⷭ҇ь, и҆ ро́гъ пома́занныхъ свои́хъ возносѧ́й, ѿ дв҃ы ражда́етсѧ, грѧде́тъ же ко креще́нїю. Томꙋ̀ вѣ́рнїи возопїе́мъ: нѣ́сть ст҃ъ, ꙗ҆́кѡ бг҃ъ на́шъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прⷪ҇ро́къ а҆ввакꙋ́мъ, ᲂу҆́мныма ѻ҆чи́ма прови́дѣ гдⷭ҇и прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. Сла́ва си́лѣ твое́й, сла́ва снизхожде́нїю твоемꙋ̀."
 },
 {
  "type": "TEXT",
  "value": "Катава́сїа: Оу҆слы́шахъ гдⷭ҇и гла́съ тво́й, є҆го́же ре́клъ є҆сѝ, гла́съ вопїю́щагѡ въ пꙋсты́ни, ꙗ҆́кѡ возгремѣ́лъ є҆сѝ над̾ вода́ми мно́гими, твоемꙋ̀ свидѣ́тельствꙋѧй сн҃ꙋ, ве́сь бы́въ соше́дшагѡ дх҃а, возопѝ: ты̀ є҆сѝ хрⷭ҇то́съ, бж҃їѧ мꙋ́дрость и҆ си́ла."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ сло́ве, да ᲂу҆́тренюѧ сла́влю тѧ̀."
 },
 {
  "type": "TEXT",
  "value": "Катава́сїа: І҆и҃съ живота̀ нача́льникъ, разрѣши́ти ѡ҆сꙋжде́нїе грѧде́тъ а҆да́ма первозда́ннагѡ, ѡ҆чище́нїй же ꙗ҆́кѡ бг҃ъ не тре́бꙋѧ, па́дшаго ѡ҆чища́етъ во і҆ѻрда́нѣ: въ не́мже враждꙋ̀ ᲂу҆би́въ, преимꙋ́щъ всѧ́къ ᲂу҆́мъ ми́ръ да́рꙋетъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: І҆ѡ́нꙋ въ ки́тѣ, гдⷭ҇и, є҆ди́наго всели́лъ є҆сѝ, мене́ же свѧ́заннаго мре́жами вра́жїѧми, ꙗ҆́кѡ ѿ тлѝ ѻ҆́наго сп҃сѝ."
 },
 {
  "type": "TEXT",
  "value": "Катава́сїа: Гла́съ словесѐ, свѣти́льникъ свѣ́та, денни́ца сл҃нца, прⷣте́ча, въ пꙋсты́ни пока́йтесѧ, всѣ̑мъ вопїе́тъ лю́демъ, и҆ пред̾ѡчи́ститесѧ: се́ бо предстои́тъ хрⷭ҇то́съ, ѿ тлѝ мі́ръ и҆збавлѧ́ѧй."
 },
 {
  "type": "HEADER",
  "value": "Конда́къ, гла́съ г҃:"
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Правосла́вїѧ наста́вника, и҆ и҆́стины провозвѣ́стника, златоꙋ́стаго ревни́телѧ, рѡссі́йскаго свѣти́льника, фїлі́ппа премꙋ́драго восхва́лимъ, пи́щею слове́съ свои́хъ разꙋ́мнѡ ча̑да своѧ̑ пита́юща: то́й бо ѧ҆зы́комъ хвале́нїе поѧ́ше, ᲂу҆стна́ма же пѣ́нїе вѣща́ше, ꙗ҆́кѡ таи́нникъ бж҃їѧ бл҃года́ти."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: На по́лѣ деи́рѣ, и҆ногда̀ мꙋчи́тель пе́щь поста́ви на мꙋче́нїе бг҃оно́сныхъ: въ не́йже трѝ ѻ҆́троки пѣсносло́вѧхꙋ є҆ди́наго бг҃а, трⷪ҇чнѡ воспѣва́хꙋ, глаго́люще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Катава́сїа: Ю҆́ношы бл҃гочести̑выѧ пе́щи ѻ҆́гненнѣй прїѡбщи́вшыѧсѧ, шꙋмѧ́щъ дꙋ́хъ ро́сный невреди̑мы сохранѝ, и҆ бж҃їѧ а҆́гг҃ла снизхожде́нїе. Тѣ́мже въ пла́мени ѡ҆роша́еми бл҃года́рственнѡ воспѣва́хꙋ: препѣ́тый ѻ҆тє́цъ гдⷭ҇и и҆ бж҃е бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки."
 },
 {
  "type": "TEXT",
  "value": "Катава́сїа: Та́йнꙋ пресла́внꙋю вавѷлѡ́нскаѧ показа̀ пе́щь, и҆сточи́вшаѧ ро́сꙋ, ꙗ҆́кѡ стрꙋѧ́ми и҆мѧ́ше невеще́ственный ѻ҆́гнь воспрїѧ́ти і҆ѻрда́нъ, и҆ ѡ҆б̾ѧ́ти пло́тїю креща́ема зижди́телѧ: є҆го́же бл҃гословѧ́тъ лю́дїе, и҆ превозно́сѧтъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ, въ домꙋ̀ даві́довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ направи́лъ ны̀ є҆́сть на пꙋ́ть ми́ра."
 },
 {
  "type": "TEXT",
  "value": "Катава́сїа: Недоꙋмѣ́етъ всѧ́къ ѧ҆зы́къ бл҃гохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе: ѻ҆ба́че бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бж҃е́ственнꙋю на́шꙋ. Ты́ бо хрⷭ҇тїа́нъ є҆сѝ предста́тельница, тѧ̀ велича́емъ."
 },
 {
  "type": "HEADER",
  "value": "На хвали́техъ поста́вимъ стиⷯ в҃, и҆ пое́мъ стїхи̑ры, гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Фїлі́ппе бл҃же́нне, и҆сповѣ́дникѡвъ подража́телю, те́плѣ хва́лѧщымъ тѧ̀ предста́тель бꙋ́ди, и҆ ѿ всѧ́кїѧ бѣды̀, грѣха́ же и҆ бꙋ́ри, и҆ страсте́й мꙋчи́тельства, ѻ҆́тче, и҆зба́ви ны̀, ꙗ҆́кѡ мч҃нкъ неѡсла́бленъ, и҆ ст҃и́тель бг҃опрїѧ́тенъ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, моли́сѧ ѡ҆ воспѣва́ющихъ па́мѧть твою̀."
 },
 {
  "type": "TEXT",
  "value": "Фїлі́ппе ст҃и́телю, разꙋ́мнагѡ свѣ́та зарѧ̀, цр҃ко́вное свѣти́ло, а҆рхїере́йскаѧ красото̀, мона́шескагѡ по́стническагѡ жи́тельства и҆́стинное пра́вило, на́шъ же застꙋ́пникъ те́плый показа́лсѧ є҆сѝ, свобожда́ѧ ѿ гꙋби́тельства лꙋка́выхъ, моли́сѧ ѻ҆́тче ѡ҆ пою́щихъ па́мѧть твою̀."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Ты̀ є҆сѝ па́стырь до́брый и҆ ᲂу҆чи́тель и҆зрѧ́дный, ст҃и́телю фїлі́ппе, тѧ̀ всегда̀ восхвалѧ́юще вопїе́мъ: тобо́ю бг҃ъ ᲂу҆красѝ цр҃ковь мт҃ре своеѧ̀, и҆ тѣ́ло твоѐ за па́ствꙋ твою̀ во и҆згна́нїи пострада́вшее, многолѣ́тнѡ же въ землѝ сокрове́нное престо́лꙋ твоемꙋ̀ возвратѝ и҆ лю́ди твоѧ̑ возвеселѝ. Тѣ́мже молѧ́сѧ не преста́й ѡ҆ хва́лѧщихъ и҆ чтꙋ́щихъ па́мѧть твою̀, просѧ̀ ѡ҆ставле́нїѧ грѣхѡ́въ и҆ сп҃се́нїѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, пра́здника, гла́съ то́йже:"
 },
 {
  "type": "TEXT",
  "value": "Ꙗ҆́кѡ вредѧ́щихъ земны́хъ ѿве́дшесѧ, прїиди́те мы́сленнѡ, ѡ҆чи́стимъ чꙋ̑вства, и҆ хрⷭ҇та̀ ви́дѣвше пло́тїю кр҃ща́ема ѿ і҆ѡа́нна прⷣте́чи, всѝ съ ни́мъ пѣсносло́вѧще вѣ́рнѡ возопїи́мъ: бл҃гослове́нъ ꙗ҆вле́йсѧ, бж҃е на́шъ, сла́ва тебѣ̀."
 },
 {
  "type": "HEADER",
  "value": "На лїтꙋргі́и. Прокі́менъ ст҃и́телѧ, гла́съ а҃:"
 },
 {
  "type": "TEXT",
  "value": "Оу҆ста̀ моѧ̑ возглаго́лютъ премꙋ́дрость, и҆ поꙋче́нїе срⷣца моегѡ̀ ра́зꙋмъ."
 },
 {
  "type": "HEADER",
  "value": "А҆пⷭ҇лъ ст҃и́телѧ: ко є҆вре́ємъ, заⷱ҇ тл҃є."
 },
 {
  "type": "HEADER",
  "value": "А҆ллилꙋ́їа, гла́съ и҃."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, заⷱ҇ л҃ѕ."
 },
 {
  "type": "HEADER",
  "value": "Прича́стенъ ст҃и́телѧ:"
 },
 {
  "type": "TEXT",
  "value": "Въ па́мѧть вѣ́чнꙋю бꙋ́детъ пра́ведникъ, ѿ слꙋ́ха ѕла̀ не ᲂу҆бои́тсѧ."
 },
 {
  "type": "TEXT",
  "value": "А҆ллилꙋ́їа, три́жды."
 },
 {
  "type": "HEADER",
  "value": "Тропа́рь ст҃и́телѧ, гла́съ и҃:"
 },
 {
  "type": "TEXT",
  "value": "Первопресто́льникѡвъ прее́мниче, сто́лпе правосла́вїѧ, и҆́стины побо́рниче, но́вый и҆сповѣ́дниче, ст҃и́телю фїлі́ппе, положи́вый дꙋ́шꙋ за па́ствꙋ твою̀. Тѣ́мже ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, молѝ за первопресто́льный гра́дъ же и҆ лю́ди, чтꙋ́щыѧ досто́йнѡ ст҃ꙋ́ю па́мѧть твою̀."
 },
 {
  "type": "HEADER",
  "value": "Конда́къ ст҃и́телѧ, гла́съ г҃:"
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Правосла́вїѧ наста́вника, и҆ и҆́стины провозвѣ́стника, златоꙋ́стагѡ ревни́телѧ, рѡссі́йскаго свѣти́льника, фїлі́ппа премꙋ́драго восхва́лимъ, пи́щею слове́съ свои́хъ разꙋ́мнѡ ча̑да своѧ̀ пита́юща: то́й бо ѧ҆зы́комъ хвале́нїе поѧ́ше, ᲂу҆стна́ма же пѣ́нїе вѣща́ше, ꙗ҆́кѡ таи́нникъ бж҃їѧ бл҃года́ти."
 },
 {
  "type": "HEADER",
  "value": "Велича́нїе ст҃и́телѧ:"
 },
 {
  "type": "TEXT",
  "value": "Велича́емъ тѧ̀, ст҃и́телю ѻ҆́тче, фїлі́ппе, и҆ чти́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего."
 }
]