[
 {
  "type": "HEADER",
  "value": "Феврꙋа́рїа ѕ҃"
 },
 {
  "type": "HEADER",
  "value": "Ст҃а́гѡ ѻ҆ц҃а̀ на́шегѡ и҆ равноапⷭ҇ла фѡ́тїа патрїа́рха кѡнстантїно́польскагѡ и҆сповѣ́дника."
 },
 {
  "type": "HEADER",
  "value": "На ма́лѣй вече́рни, На Гдⷭ҇и, воззва́хъ, стїхи̑ры на д҃."
 },
 {
  "type": "HEADER",
  "value": "Стїхи̑ры, гла́съ а҃:"
 },
 {
  "type": "TEXT",
  "value": "Подо́бенъ: Небе́сныхъ чинѡ́въ:"
 },
 {
  "type": "TEXT",
  "value": "Ст҃и́телѧ гдⷭ҇нѧ восхвалѧ́емъ тѧ̀, патрїа́рхѡвъ сла́вꙋ, хрⷭ҇то́вы це́ркве вели́каго предста́телѧ и҆ свѣ́тлаго, свѧще́ннѣйшїй фѡ́тїе, твои́ми ᲂу҆̀бо ѻ҆́ч҃е моли́твами покрыва́й на́съ, чествꙋ́ющихъ па́мѧть твою̀."
 },
 {
  "type": "TEXT",
  "value": "Въ небе́сныхъ селе́нїихъ въ весе́лїи ѡ҆бита́ѧ и҆ со а҆́гг҃лы ѻ҆́ч҃е предстоѧ̀ дерзнове́ннѡ престо́лꙋ гдⷭ҇ню и҆́же на землѝ соверша́ющымъ па́мѧть твою̀ прегрѣше́нїй разрѣше́нїю и҆ страсте́й дарова́тисѧ молѝ."
 },
 {
  "type": "TEXT",
  "value": "Чи́стомꙋ твоемꙋ̀ се́рдцꙋ бж҃е́ственнагѡ дх҃а просвѣти́тельными зарѧ́ми ѡ҆зари́вшꙋсѧ бога́тнѡ, треблаже́нне бг҃оглаго́ливе, свѣтови́денъ вои́стиннꙋ бы́лъ є҆сѝ и҆ є҆ресе́й темнотꙋ̀ лю́тꙋю бж҃е́ственною бл҃года́тїю разгна́лъ є҆сѝ."
 },
 {
  "type": "TEXT",
  "value": "Съ небе́сными а҆́гг҃лы ны́нѣ сочисле́нъ бы́лъ є҆сѝ и҆ предстоѧ̀ трⷪ҇цѣ свѧтѣ́й треблаже́нне сїю̀ мо́лиши ѡ҆ на́съ, вѣ́рою почита́ющихъ твою̀ всечестнꙋ́ю па́мѧть и҆ лю́тыхъ просѧ́щихъ и҆збавле́нїѧ."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Прїиди́те всѝ вѣ́рнїи ст҃и́телѧ и҆ дрꙋ́га гдⷭ҇нѧ фѡ́тїа пречꙋ́днаго бл҃гоче́стнѡ восхва́лимъ, то́й бо а҆пⷭ҇льскагѡ ᲂу҆че́нїѧ бы́въ и҆спо́лненъ и҆ ст҃а́гѡ дх҃а жили́ще добродѣ́тельнымъ житїе́мъ ꙗ҆ви́всѧ ѿ собо́рныѧ це́ркве догма́тами во́лки ѿгна̀, и҆ правосла́внꙋю вѣ́рꙋ свѣ́тлѡ ᲂу҆ѧсни́въ сто́лпъ показа́сѧ и҆ бл҃гоче́стїѧ побо́рникъ тѣ́мъ и҆ по сме́рти предстоѧ̀ ближа́е хрⷭ҇тꙋ̀ непреста́ннѡ мо́литсѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ пра́здника."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃:"
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Грѧдѝ ны́нѣ вѣ́рныхъ собра́нїе бж҃е́ственное, восхва́лимъ ᲂу҆се́рднѡ вели́каго свѧщеннонача́льника церко́внаго фѡ́тїа."
 },
 {
  "type": "TEXT",
  "value": "Сті́хъ: Оу҆ста̀ моѧ̑ возгл҃го́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
 },
 {
  "type": "TEXT",
  "value": "Ꙗ҆ви́лсѧ є҆сѝ ѿ ма́тернихъ пеле́нъ ѡ҆свѧще́нъ сосꙋ́дъ бг҃оно́се ѻ҆́ч҃е на́шъ и҆ до́мъ всесвѧта́гѡ дх҃а."
 },
 {
  "type": "TEXT",
  "value": "Сті́хъ: Оу҆ста̀ првⷣнагѡ поꙋча́тсѧ премⷣрости, и҆ ѧ҆зы́къ є҆гѡ̀ возглаго́летъ сꙋ́дъ."
 },
 {
  "type": "TEXT",
  "value": "Пѣ̑сни тебѣ̀ провозглаша́етъ твоѧ̀ ѻ҆би́тель, бг҃омꙋ́дре сїѡ́на но́вагѡ, ю҆́же сохранѧ́й твои́ми ко гдⷭ҇ꙋ всегда̀ моли́твами."
 },
 {
  "type": "HEADER",
  "value": "Сла́ва гла́съ в҃:"
 },
 {
  "type": "TEXT",
  "value": "Свѧти́телей бж҃е́ственное ᲂу҆краше́нїе, фѡ́тїе ѻ҆́ч҃е приснопа́мѧтне, по и҆́мени твоемꙋ̀, та́кѡ и҆ житїѐ твоѐ: жи́знь твоѧ̀ сла́вна, и҆ ᲂу҆спе́нїе со ст҃ы́ми, моли́сѧ ᲂу҆̀бо ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ пра́здника."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Ꙗ҆́кѡ а҆по́столѡвъ є҆динонра́вный, и҆ вселе́нныѧ ᲂу҆чи́тель, влады́кꙋ всѣ́хъ фѡ́тїе молѝ, ми́ръ вселе́ннѣй дарова́ти, и҆ дꙋша́мъ на́шимъ ве́лїю ми́лость."
 },
 {
  "type": "HEADER",
  "value": "Сла́ва и҆ ны́нѣ пра́здника. И҆ ѿпꙋ́стъ."
 },
 {
  "type": "HEADER",
  "value": "На вели́цѣй вече́рни, По предначина́тельномъ ѱалмѣ̀ стїхосло́вимъ: Бл҃же́нъ мꙋ́жъ. На Гдⷭ҇и, воззва́хъ, стїхи̑ры на ѕ҃. И҆ пое́мъ стїхи̑ры подѡ́бны пра́здника г҃, и҆ ст҃а́гѡ г҃, гла́съ в҃:"
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва."
 },
 {
  "type": "TEXT",
  "value": "Є҆гда̀ манове́нїемъ бж҃е́ственнымъ, ве́лїй це́ркве хрⷭ҇то́вы поста́вленъ бы́лъ є҆сѝ па́стырь, и҆ є҆́реси низложи́лъ є҆сѝ горды́ню, и҆з̾ѡбличи́въ же є҆́же въ сѷмво́лѣ приложе́нїе, тогда̀ собра́нїе вѣ́рныхъ восплеска̀ рꙋка́ми, ра́достїю вопїю́ще: сла́ва тебѣ̀ трⷪ҇це пресвѧта́ѧ, сла́ва тебѣ̀ трⷪ҇це є҆диносꙋ́щнаѧ."
 },
 {
  "type": "TEXT",
  "value": "Є҆гда̀ ѿ беззако́нныхъ сꙋде́й, ѻ҆́ч҃е непра́веднѡ ѿгна́лсѧ є҆сѝ ѿ твоегѡ̀ ста́да, мꙋ́дре фѡ́тїе пречꙋ́дне, и҆ вои́стиннꙋ преве́лїй, ст҃и́телю всеизрѧ́дне и҆ дрꙋ́же гдⷭ҇ень, тогда̀ почꙋди́шасѧ терпѣ́нїю твоемꙋ̀, ᲂу҆́жасомъ и҆ содрогнꙋ́тїемъ се́рдца всѝ правосла́внїи, взѧ́тсѧ, глаго́люще, ѿ среды̀ ны́нѣ пра́ведный."
 },
 {
  "type": "TEXT",
  "value": "Є҆гда̀ ᲂу҆снꙋ́лъ є҆сѝ свѧще́ннѡ свѧты̑мъ подоба́ющимъ сно́мъ, фѡ́тїе сла́вне, тогда̀ бг҃осло́вѡвъ тѧ̀ собо́ри препроводи́ша, ꙗ҆́кѡ тѣ́хъ тве́рдагѡ побо́рника, и҆ всѝ а҆́гг҃льстїи чи́ни возра́довашасѧ въ восхожде́нїи твое́мъ: тогда̀ и҆ трⷪ҇ца ст҃а́ѧ, ѡ҆ не́йже крѣ́пкѡ подвиза́лсѧ є҆сѝ, сла́вы тѧ̀ вѣнцы̀ ᲂу҆вѣнча̀."
 },
 {
  "type": "HEADER",
  "value": "И҆́ны стїхи̑ры гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Бл҃года́ти ѻ҆рга́нъ цѣвни́цꙋ дх҃а, сто́лпъ непоколеби́мый бж҃е́ственныѧ вѣ́ры правосла́вїѧ побо́рника вели́каго ᲂу҆чи́телѧ, свѧти́телѧ сла́внаго, це́ркве ᲂу҆твержде́нїе, свѣтлѣ́йшаго храбо́рника гдⷭ҇нѧ, пѣснопѣ́нїи восхва́лимъ бж҃е́ственнѣ свѧтѣ́йшаго фѡ́тїа."
 },
 {
  "type": "TEXT",
  "value": "Ѻ҆гнедꙋхнове́ннаго ри́тора вселе́нныѧ ᲂу҆чи́телѧ, кѡнстантїнопо́лѧ бж҃е́ственнаго предсѣда́телѧ, а҆рхїере́а велича́йшаго, па́стырѧ всеизрѧ́днаго це́ркве хрⷭ҇то́вы, свѣтлѣ́йшаго фѡ́тїа, воспои́мъ правосла́внїи всѝ є҆диногла́снѡ свѧще́нными пѣснопѣ́нїи, патрїа́рхѡвъ первопресто́льнаго."
 },
 {
  "type": "TEXT",
  "value": "Беззако́ннымъ повелѣ́нїемъ ѿгна́нъ бы́лъ є҆сѝ ѿ ста́да твоегѡ̀, ско́рбемъ и҆ мꙋ́камъ причасти́лсѧ є҆сѝ ѡ҆ вѣ́рѣ сла́вне, твердѣ́йшїй фѡ́тїе, і҆ера́рше свѣ́тлый, це́ркве ᲂу҆твержде́нїе, сто́лпе непоколеби́мый: тѣ́мже вси́ тѧ почита́емъ ᲂу҆се́рднѡ, ꙗ҆́кѡ ᲂу҆чи́телѧ и҆ таи́нника правосла́вїѧ приснопа́мѧтне."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Преподо́бне треблаже́нне свѧтѣ́йшїй ѻ҆́ч҃е па́стырю до́брый и҆ началопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ за ѻ҆́вцы: са́мъ и҆ ны́нѣ всехва́льне свѧще́ннѣйшїй фѡ́тїе, и҆спросѝ моли́твами твои́ми дарова́ти на́мъ ве́лїю ми́лость."
 },
 {
  "type": "HEADER",
  "value": "И҆ ны́нѣ пра́здника."
 },
 {
  "type": "HEADER",
  "value": "Вхо́дъ, Свѣ́те ти́хїй, прокі́менъ днѐ и҆ чте́нїѧ."
 },
 {
  "type": "HEADER",
  "value": "На лїті́и стїхи̑ры самогла́сны, гла́съ а҃:"
 },
 {
  "type": "TEXT",
  "value": "Весели́сѧ ѡ҆ гдⷭ҇ѣ гра́де кѡнстанті́новъ, и҆ всѧ́кїй гра́де и҆ ѻ҆́строве и҆ страно̀, въ честнѣ́й па́мѧти ѻ҆́бщагѡ пастыренача́льника, и҆ собо́рныѧ це́ркве свѣти́льника и҆ ᲂу҆чи́телѧ фѡ́тїа треблаже́ннаго: то́й бо є҆щѐ жи́въ сы́й велмѝ подвиза́сѧ ѡ҆ вѣ́рѣ є҆ѵⷢ҇льской, и҆ ны́нѣ на небесѣ́хъ воспрїе́млетъ трꙋдѡ́въ свои́хъ пѡ́чести честны̑ѧ, молѧ́сѧ непреста́ннѡ хрⷭ҇тꙋ̀ бг҃ꙋ ѡ҆ дꙋша́хъ на́шихъ."
 },
 {
  "type": "HEADER",
  "value": "Гла́съ в҃:"
 },
 {
  "type": "TEXT",
  "value": "Тебѐ вели́каго а҆рхїере́а и҆ па́стырѧ, неѕло́биваго и҆ преподо́бнаго, бл҃гоче́стїѧ проповѣ́дника, ѻ҆гнедохнове́ннаѧ ᲂу҆ста̀ дх҃а, восхвалѧ́юще любо́вїю мо́лимъ: препода́ждь на́мъ ѿ твои́хъ моли́твъ, ѻ҆́ч҃е въ возме́здїе дꙋша́мъ на́шимъ."
 },
 {
  "type": "HEADER",
  "value": "Гла́съ ѕ҃:"
 },
 {
  "type": "TEXT",
  "value": "Человѣ́че бж҃їй, и҆ вѣ́рный ᲂу҆го́дниче, слꙋжи́телю гдⷭ҇ень, мꙋ́жꙋ жела́нїй, сосꙋ́де и҆збра́нный, сто́лпе и҆ ᲂу҆твержде́нїе це́ркве, ца́рствїѧ наслѣ́дниче, не премолчѝ вопїѧ̀ за ны̀ ко гдⷭ҇ꙋ."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Бл҃гі́й ра́бе и҆ вѣ́рный бл҃гі́й дѣ́лателю вїногра́да хрⷭ҇то́ва, ты̀ и҆ тѧготꙋ̀ дневнꙋ́ю поне́слъ є҆сѝ, ты̀ и҆ да́нный тебѣ̀ тала́нтъ ᲂу҆мно́жилъ є҆сѝ, и҆ по тебѣ̀ прише́дшымъ не позави́дѣлъ є҆сѝ. Тѣ́мъ врата̀ тебѣ̀ небе́снаѧ ѿверзо́шасѧ: вни́ди въ ра́дость гдⷭ҇а твоегѡ̀: и҆ молѝ ѡ҆ на́съ ѻ҆́ч҃е свѧтѣ́йшїй."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "На стїхо́внѣ стїхи̑ры гла́съ є҃:"
 },
 {
  "type": "TEXT",
  "value": "Подо́бенъ: Ра́дꙋйсѧ по́стникѡвъ:"
 },
 {
  "type": "TEXT",
  "value": "Ра́дꙋйсѧ ст҃и́телю хрⷭ҇то́въ, ра́дꙋйсѧ ѻ҆ц҃є́въ свѣ́тлаѧ похвало̀, и҆́же дѣѧ́нїемъ и҆ видѣ́нїемъ ᲂу҆краше́нный свѣ́тлѡ, добродѣ́телей бж҃е́ственныхъ сокро́вищствованїе: кро́тости жили́ще, моли́твы ѻ҆би́телище непреста́нныѧ, премꙋ́дрости сокро́вище, смире́нїѧ кра́снаѧ ѻ҆би́тель, со́лнце разсꙋжде́нїѧ, ми́ра хра́ме, сꙋгꙋ́быѧ любвѐ до́ме, ꙗ҆̀же къ бг҃ꙋ и҆ къ бли́жнемꙋ: хрⷭ҇та̀ ᲂу҆молѝ дарова́ти мі́рꙋ ве́лїю ми́лость."
 },
 {
  "type": "TEXT",
  "value": "Сті́хъ: Оу҆ста̀ моѧ̑ возгл҃го́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
 },
 {
  "type": "TEXT",
  "value": "Ра́дꙋйсѧ ст҃и́телей пра́вило, и҆ ᲂу҆чи́телей предста́телю сла́вный, ᲂу҆ста̀ бг҃осло́вѡвъ це́ркве хрⷭ҇то́вы, свѣ́тлый сло́вомъ и҆ догма́тами, па́стырю досточꙋ́дный, а҆по́столѡвъ є҆динонра́вный, доброглаго́ливый ꙗ҆зы́че, всѧ́кꙋю є҆́ресь посѣца́ющїй ꙗ҆́коже ме́чь ѻ҆стрѣ́йшїй и҆ ѻ҆боюдꙋѻ́стрый, ѻ҆рга́не сладковѣща́нный, ᲂу҆́ме небе́сный, церко́вный сто́лпе, вѣ́рныхъ ᲂу҆твержде́нїе, хрⷭ҇та̀ мо́ли, низпосла́ти дꙋша́мъ на́шимъ ве́лїю ми́лость."
 },
 {
  "type": "TEXT",
  "value": "Сті́хъ: Оу҆ста̀ првⷣнагѡ поꙋча́тсѧ премⷣрости, и҆ ѧ҆зы́къ є҆гѡ̀ возглаго́летъ сꙋ́дъ."
 },
 {
  "type": "TEXT",
  "value": "Ра́дꙋйсѧ патрїа́рхѡвъ красото̀, ра́дꙋйсѧ всѣ́хъ свѧще́нникѡвъ похвало̀, догма́тѡвъ и҆сто́чниче бж҃е́ственный, це́ркве тве́рдый сто́лпе же и҆ ѡ҆снова́нїе непревра́тное, пра́вило и҆звѣ́стнѣйшее, тайнопи́сче премꙋ́дрѣйшїй, фѡ́тїе ѻ҆́ч҃е, и҆́стины ᲂу҆твержде́нїе, свѣтлѣ́йшїй храбо́рниче и҆ правосла́вный, человѣ́че небе́сный, земны́й а҆́гг҃ле, правосла́вныхъ сла́во, хрⷭ҇та̀ не преста́й моли́ти ѡ҆ всѣ́хъ восхвалѧ́ющихъ тѧ̀."
 },
 {
  "type": "HEADER",
  "value": "Сла́ва, гла́съ д҃:"
 },
 {
  "type": "TEXT",
  "value": "Подоба́ше ца́рствꙋющемꙋ гра́дꙋ и҆ фѡ́тїемъ хвали́тисѧ а҆рхїере́емъ, ꙗ҆́коже нѣ́коею ᲂу҆́тварїю ца́рскою и҆ свѣтлогла́сною трꙋбо́ю, всѧ̑ ѡ҆глаша́ющь концы̀ спаси́тельными догма́ты, и҆ всѣ́хъ собира́ющею къ совокꙋпле́нїю пѣ́сней бг҃олѣ́пныхъ, къ немꙋ́же возопїи́мъ: свѣтосло́ве и҆ свѣтоимени́те, хрⷭ҇та̀ бг҃а молѝ, спасти́сѧ дꙋша́мъ на́шимъ."
 },
 {
  "type": "HEADER",
  "value": "И҆ ны́нѣ пра́здника."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Ꙗ҆́кѡ а҆по́столѡвъ є҆динонра́вный, и҆ вселе́нныѧ ᲂу҆чи́тель, влады́кꙋ всѣ́хъ фѡ́тїе молѝ, ми́ръ вселе́ннѣй дарова́ти, и҆ дꙋша́мъ на́шимъ ве́лїю ми́лость."
 },
 {
  "type": "HEADER",
  "value": "Сла́ва и҆ ны́нѣ пра́здника."
 },
 {
  "type": "HEADER",
  "value": "На ᲂу҆́трени, По а҃ стїхосло́вїи, сѣда́ленъ, гла́съ д҃:"
 },
 {
  "type": "TEXT",
  "value": "Подо́бенъ: Гро́бъ тво́й сп҃се:"
 },
 {
  "type": "TEXT",
  "value": "Сѐ возсїѧ̀ дꙋшѝ моеѧ̀ весна̀: сѐ ꙗ҆ви́сѧ мꙋ́драгѡ і҆ера́рха фѡ́тїа всебл҃же́ннагѡ свѣ́тлаѧ па́мѧть дне́сь. Тѣ́мже всѝ восхва́лимъ того̀, ꙗ҆́кѡ ᲂу҆тверди́вшаго правосла́вныхъ вѣ́рꙋ си́лою дх҃а."
 },
 {
  "type": "HEADER",
  "value": "Сла́ва и҆ ны́нѣ пра́здника."
 },
 {
  "type": "HEADER",
  "value": "По в҃ стїхосло́вїи, сѣда́ленъ, гла́съ г҃:"
 },
 {
  "type": "TEXT",
  "value": "Подо́бенъ: Бж҃е́ственныѧ вѣ́ры:"
 },
 {
  "type": "TEXT",
  "value": "Бж҃е́ственное ѡ҆сїѧ́нїе прїе́мъ въ животѣ̀ бж҃е́ственнѣмъ ѡ҆бꙋчи́всѧ, тезоиме́ннымъ сщ҃е́нничествомъ просїѧ́лъ є҆сѝ: преесте́ственнѡ бо и҆з̾ѧсни́въ догма́ты, правосла́вїемъ це́рковь ᲂу҆тверди́лъ є҆сѝ ѻ҆́ч҃е преподо́бне, хрⷭ҇та̀ бг҃а молѝ, дарова́ти на́мъ ве́лїю ми́лость."
 },
 {
  "type": "HEADER",
  "value": "Сла́ва и҆ ны́нѣ пра́здника."
 },
 {
  "type": "HEADER",
  "value": "По полѷеле́и, сѣда́ленъ, гла́съ д҃:"
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Сщ҃еннонача́льниче и҆ честны́й бг҃оглаго́льниче, це́ркве свѣ́тлый ᲂу҆ѧсни́телю, мы̑сли вѣ́рныхъ бл҃года́тїю напаѧ́еши, є҆реті́чествꙋющихъ же попалѧ́еши смы́слы: бл҃года́ть же и҆сточа́ѧ чꙋде́съ, ѡ҆мыва́еши всѧ́ческихъ страсте́й скве́рнꙋ вои́стиннꙋ, прпⷣбне ѻ҆́ч҃е, всесла́вне фѡ́тїе."
 },
 {
  "type": "HEADER",
  "value": "Сла́ва и҆ ны́нѣ пра́здника."
 },
 {
  "type": "HEADER",
  "value": "Степе́нна, а҃ а҆нтїфѡ́нъ д҃ гла́са."
 },
 {
  "type": "HEADER",
  "value": "Прокі́менъ гла́съ д҃:"
 },
 {
  "type": "TEXT",
  "value": "Оу҆ста̀ моѧ̑ возгл҃го́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
 },
 {
  "type": "TEXT",
  "value": "Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй."
 },
 {
  "type": "HEADER",
  "value": "Є҆ѵⷢ҇лїе ст҃и́телю."
 },
 {
  "type": "HEADER",
  "value": "Ѱало́мъ н҃."
 },
 {
  "type": "TEXT",
  "value": "Сла́ва: Моли́твами ст҃и́телѧ:"
 },
 {
  "type": "TEXT",
  "value": "И҆ ны́нѣ: Моли́твами бцⷣы:"
 },
 {
  "type": "TEXT",
  "value": "Та́же сті́хъ: Поми́лꙋй мѧ̀ бж҃е:"
 },
 {
  "type": "HEADER",
  "value": "И҆ самогла́сенъ, гла́съ ѕ҃:"
 },
 {
  "type": "TEXT",
  "value": "И҆злїѧ́сѧ бл҃года́ть во ᲂу҆стна́хъ твои́хъ, прпⷣбне ѻ҆́ч҃е, и҆ бы́лъ є҆сѝ па́стырь хрⷭ҇то́вы це́ркве, ᲂу҆ча̀ слове́сныѧ ѻ҆́вцы, вѣ́ровати въ трⷪ҇цꙋ є҆диносꙋ́щнꙋю, во є҆ди́номъ бж҃ествѣ̀."
 },
 {
  "type": "HEADER",
  "value": "Канѡ́нъ пра́здника на д҃. И҆ ст҃а́гѡ на д҃. Катава̑сїи же глаго́лемъ пра́здника. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Свѣти́ло бг҃оза́рнѣйшее, свѣ́тꙋ тезоимени́те свѧ́те тмꙋ̀ ѿженѝ ᲂу҆ма̀ моегѡ̀, сїѧ́нми мѧ̀ свѣ́та бж҃е́ственнагѡ ѡ҆зари́въ, ꙗ҆́кѡ да восхвалю̀ твоѧ̑ и҆справлє́нїѧ."
 },
 {
  "type": "TEXT",
  "value": "Вѣ́ры ᲂу҆твержде́нїе, це́ркве ᲂу҆чи́телѧ и҆ сто́лпъ незы́блемъ и҆сповѣ́данїѧ, и҆ многосвѣ́телъ бл҃года́ти свѣти́льникъ, и҆ ᲂу҆ста̀ бг҃одꙋхновє́ннаѧ тѧ̀ фѡ́тїе позна́хомъ."
 },
 {
  "type": "TEXT",
  "value": "Зако́ннѡ подвиза́лсѧ є҆сѝ, предбѣ́дствꙋѧ чꙋ́дне ѡ҆ бж҃е́ственнѣмъ проповѣ́данїи ꙗ҆́кѡ, свѧти́тель вѣ́ренъ: и҆ подави́лъ є҆сѝ жи́лами твои́хъ догма́тѡвъ, ꙗ҆́коже ѕвѣ́рѧ, нїкола́а сꙋемꙋ́дреннагѡ."
 },
 {
  "type": "TEXT",
  "value": "Бг҃оро́диченъ: Мр҃і́ю пречи́стꙋю, прїиди́те воспои́мъ всѝ, є҆ди́нꙋ ᲂу҆краси́вшꙋю человѣ́чество, ро́ждшꙋю бг҃а воплоще́на, и҆ дв҃ꙋ пребы́вшꙋю неврежде́нꙋ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "TEXT",
  "value": "Глаго́лавый на высотꙋ̀ хꙋлꙋ̀ за́падный ѕмі́й лю́тый, словесы̀ твои́ми заꙋсти́сѧ, свѣти́льниче бг҃ови́днѣйшїй: тѣ́мже и҆ правосла́внїи достодо́лжнѡ тѧ̀ почита́емъ."
 },
 {
  "type": "TEXT",
  "value": "Оу҆мерщвлѧ́етсѧ є҆ресе́й ѕмі́й словесы̀ твои́ми, ѻ҆́ч҃е, премꙋ́дрыми, ꙗ҆́коже ка́менїемъ поража́емь, и҆ во главꙋ̀ сокрꙋша́емь: тѣ́мже и҆ це́рковь достодо́лжнѡ тѧ̀ почита́етъ."
 },
 {
  "type": "TEXT",
  "value": "Писа́нїй представле́нми до́блественными бл҃года́ти дх҃а мꙋ́дре, ѻ҆́бщей бы́ти доказа́лъ є҆сѝ, и҆ дх҃ꙋ и҆менова́тисѧ, сегѡ́ же ѵ҆поста́си ѿ ѻ҆ц҃а̀ и҆сходи́ти."
 },
 {
  "type": "TEXT",
  "value": "Бг҃оро́диченъ: Безнача́льнагѡ роди́телѧ сло́во, и҆́же всѧ́кагѡ вы́шшїй нача́ла, нача́ло ны́нѣ воплоща́емь ѿ тебѐ чи́стаѧ прїѧ́тъ, и҆ подъ вре́менемъ бы́сть, време́нъ всѣ́хъ превы́шшїй."
 },
 {
  "type": "HEADER",
  "value": "Сѣда́ленъ гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Проро́кꙋ и҆лїѝ ревнꙋ́ѧ, и҆ і҆ѡа́ннꙋ та́кожде крести́телю мꙋ́жески и҆з̾ѡбличи́лъ є҆сѝ царѝ беззако́нновавшыѧ. Сщ҃еннонача́лїѧ престо́лъ бж҃е́ственнѣ ᲂу҆краси́лъ є҆сѝ, и҆ ᲂу҆че́нїй мно́жествомъ мі́ръ. Ѡ҆богати́лъ є҆сѝ, тѣ́мже и҆ бж҃е́ственна списа̑нїѧ ᲂу҆потреби́въ, вѣ̑рныѧ подтверди́лъ є҆сѝ, и҆ невѣ̑рныѧ ѡ҆брати́лъ є҆сѝ, ст҃и́телю чꙋ́дне: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва и҆ ны́нѣ пра́здника."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Въ ю҆́ности цѣломꙋ́дрїе, въ ста́рости ра́зꙋмъ, и҆ во все́мъ житїѝ тве́рдость и҆ долготерпѣ́нїе, и҆ ко всѣ̑мъ любо́вь показа́лъ є҆сѝ, зовꙋ́щымъ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Свѣтлѣ́йшее твоѐ житїѐ, ꙗ҆́коже пра́вило и҆звѣ́стнѣйшее, всѧ́кою ѻ҆́ч҃е бж҃е́ственною добродѣ́телїю показа́сѧ, въ моли́твахъ, въ поще́нїихъ, бдѣ́нїихъ же и҆ моле́нїихъ, и҆́же къ бг҃ꙋ человѣколю́бцꙋ."
 },
 {
  "type": "TEXT",
  "value": "Дрема́нїе твои́ма вѣ́ждома бг҃оно́се не да́лъ є҆сѝ, до́ндеже, ѻ҆́ч҃е, до́мъ себѐ самаго̀ соверши́лъ є҆сѝ всеви́дцꙋ влады́цѣ краснѣ́йшїй, къ немꙋ́же взыва́лъ є҆сѝ:сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Бг҃оро́диченъ: Оу҆мерщвлє́нныѧ, всесвѧта́ѧ, человѣ́ки ѡ҆живи́ла є҆сѝ, па́дшыѧ ты́ѧ ко и҆стлѣ́нїю возста́вила є҆сѝ, жизнода́вца ро́ждши, и҆збавлѧ́ющаго зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й, ты̀ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ роди́ла є҆сѝ безлѣ́тнагѡ сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Бл҃года́ть прїе́мъ всест҃а́гѡ дх҃а, бж҃е́ственное жили́ще показа́лсѧ є҆сѝ, бж҃е́ственнѣ наꙋчи́въ бг҃озна́нїѧ свѣ́тꙋ, фѡ́тїе всечꙋ́дне мꙋ́дре, ѻ҆́ч҃е ст҃ѣ́йшїй, це́ркве ᲂу҆твержде́нїе."
 },
 {
  "type": "TEXT",
  "value": "Ꙗ҆зы́къ тво́й тро́сть ᲂу҆тѣ́шителѧ бы́сть, ско́рѡ и҆збавле́нїе даю́щагѡ позна́вшымъ влады́чество є҆гѡ̀, и҆ дꙋша́мъ и҆́хъ вдыха́юща ра́зꙋмъ небе́сный, сщ҃е́ннѣйшїй фѡ́тїе."
 },
 {
  "type": "TEXT",
  "value": "Блиста́ющасѧ слове́съ же и҆ ᲂу҆че́нїй бл҃года́тми, тѧ̀ хрⷭ҇то́съ показа̀ мі́рови є҆реті́чествꙋющихъ ѿража́юща стремлє́нїѧ, и҆ дꙋ́шы просвѣща́юща вѣ́рныхъ, всѣ́хъ пою́щихъ тѧ̀ вѣ́ры проповѣ́дника."
 },
 {
  "type": "TEXT",
  "value": "Бг҃оро́диченъ: Дв҃а родѝ сн҃а превѣ́чнаго въ є҆стество̀ ѡ҆бле́кшасѧ человѣ́ческое ꙗ҆́коже наꙋча́ѧ ст҃и́тель глаго́летъ, и҆ спа́сшаго сїѐ ѿ тлѣ́нїѧ стра́стїю тѣ́ла, и҆ дв҃ою пребы́сть."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бж҃е́ственное сїѐ и҆ всечестно́е соверша́юще пра́зднство, бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Вели́каго воспои́мъ фѡ́тїа, трꙋбꙋ̀, ꙗ҆́снѡ проповѣ́давшꙋю бж҃е́ственнагѡ дх҃а ѿ ѻ҆ц҃а̀ и҆схожде́нїе, ꙗ҆́коже гро́мовъ сы́нъ бг҃осло́вствова."
 },
 {
  "type": "TEXT",
  "value": "Расте́рзано бы́сть всѐ шата́нїе, твои́ми, сщ҃е́ннѣйшїй фѡ́тїе, словесы̀ є҆реті́ческое: тѣ́мже вѣ́рныхъ собра́нїе, свѣтлосоверша́тельнѡ почита́етъ па́мѧть твою̀ свѧ́те."
 },
 {
  "type": "TEXT",
  "value": "И҆гра́етъ и҆ всѐ весели́тсѧ собра́нїе вѣ́рныхъ правосла́вное, всечестны́й фѡ́тїе, григо́рїа зрѧ́ тѧ и҆ златоꙋ́стагѡ вои́стиннꙋ че́стна прее́мника."
 },
 {
  "type": "TEXT",
  "value": "Бг҃оро́диченъ: Пою̀ твоѐ ѻ҆трокови́це зача́тїе, пою̀ твоѐ несказа́нное рождество̀, пою̀ покро́въ тво́й, и҆́мже вре́да всѧ́кагѡ и҆збавлѧ́юсѧ, и҆́же къ твое́й ти́хости то́щнѡ притека́ющїй."
 },
 {
  "type": "HEADER",
  "value": "Конда́къ гла́съ и҃:"
 },
 {
  "type": "TEXT",
  "value": "Подо́бенъ: Возбра́нной:"
 },
 {
  "type": "TEXT",
  "value": "Церко́вный свѣти́льникъ свѣтоза́рнѣйшїй, и҆ правосла́вныхъ наста́вникъ бж҃е́ственнѣйшїй, да ᲂу҆вѣнча́етсѧ ны́нѣ цвѣ́ты пѣ́сненными, бг҃овѣща́ннаѧ цѣвни́ца дх҃а, крѣпча́йшїй є҆ресе́мъ противобо́рецъ, є҆мꙋ́же и҆ зове́мъ: ра́дꙋйсѧ всечестны́й фѡ́тїе."
 },
 {
  "type": "TEXT",
  "value": "І҆́косъ: А҆́гг҃лъ ѿ человѣ̑къ показа́лсѧ є҆сѝ ѽ ѻ҆́ч҃е, ѿ землѝ къ нбⷭ҇нымъ дости́гъ: тѣ́мже безплѡ́тнымъ ликѡ́мъ и҆зравнѧ́ема тѧ̀ зрѧ̀ преподо́бне, ᲂу҆жаса́юсѧ и҆ любо́вїю зовꙋ́ ти бл҃гоговѣ́йнѡ такова̑ѧ: ра́дꙋйсѧ и҆́мже трⷪ҇ца покланѧ́ема быва́етъ, ра́дꙋйсѧ и҆́мже бг҃ъ воспѣва́етсѧ, ра́дꙋйсѧ правосла́вныхъ пра́вило пра́вѣйшее, ра́дꙋйсѧ беззако́ннꙋющыѧ и҆з̾ѡблича́ѧй твердѣ́йше, ра́дꙋйсѧ высото̀ смире́нїѧ неꙋдобовосходи́маѧ мно́гими, ра́дꙋйсѧ глꙋбино̀ разсꙋжде́нїѧ неꙋдобозри́маѧ сме́ртными, ра́дꙋйсѧ ꙗ҆́кѡ бы́лъ є҆сѝ бг҃ꙋ бж҃е́ственный жре́цъ: ра́дꙋйсѧ ꙗ҆́кѡ приво́диши бг҃ꙋ спасе́нныхъ, ра́дꙋйсѧ бж҃їимъ мꙋ́ченикѡмъ є҆диновсе́льниче, ра́дꙋйсѧ честны̑мъ преподѡ́бнымъ собесѣ́дниче, ра́дꙋйсѧ и҆́мже ѕлочести́вїи потреблѧ́ютсѧ: ра́дꙋйсѧ и҆́мже вѣ́рнїи ᲂу҆вѣрѧ́ютсѧ, ра́дꙋйсѧ всечестны́й фѡ́тїе."
 },
 {
  "type": "TEXT",
  "value": "Мѣ́сѧца тогѡ́жде въ ѕ҃ де́нь па́мѧть и҆́же во ст҃ы́хъ ѻ҆ц҃а̀ на́шегѡ и҆ равноапⷭ҇ла фѡ́тїа патрїа́рха кѡнстантїнопо́льскагѡ и҆сповѣ́дника."
 },
 {
  "type": "TEXT",
  "value": "Стїхѝ: Оу҆мира́ѧ фѡ́тїй не смꙋща́юсѧ глаго́летъ. Къ сконча́нїю сы́й прїꙋгото́вленъ."
 },
 {
  "type": "TEXT",
  "value": "Се́й треблаже́нный и҆ свѣ́тломꙋ своемꙋ̀ житїю̀ тезоимени́тый свѧти́тель вели́кїй и҆ свѣ́тлый це́ркве ѻ҆те́цъ и҆ ᲂу҆чи́тель фѡ́тїй премꙋ́дрый и҆ свѧще́ннѣйшїй и҆сповѣ́дникъ вѣ́ры и҆ равноапⷭ҇лъ поживѐ во времена̀ царе́й и҆ самоде́ржцєвъ мїхаи́ла сы́на ѳео́фїлова, васі́лїа македѡ́на и҆ льва̀ сы́на є҆гѡ̀, сегѡ̀ ѻ҆те́чество ᲂу҆́бѡ земно́е кѡнстантїнопо́ль великоимени́тый и҆ градѡ́въ ца́рствꙋющїй, небе́сное же го́рнїй і҆ерⷭ҇ли́мъ держа́вный и҆ неги́блемый, роди́тели же сла́вни благоро́дїемъ же є҆́же по пло́ти не ме́ньше, ꙗ҆́коже и҆ вѣ́рою правосла́вною. Ѡ҆ не́йже и҆ мꙋ́ченическимъ вѣнце́мъ ᲂу҆краси́шасѧ пострада́вше небомꙋ́дреннїи и҆ крѣпкодꙋ́шнїи ѡ҆ че́сти и҆ поклоне́нїи свѧты́хъ і҆кѡ́нъ, ꙗ҆́коже мни́тсѧ. Пе́рвѣйшими же ца́рскими досто́инствы пре́жде почте́нъ бы́въ и҆ живо́тъ добродѣ́теленъ и҆ боголюби́въ всегда̀ проходѧ̀, церкѡ́внаѧ пото́мъ пастыренача́льническаѧ прїе́млетъ кѡрми́ла, на а҆пⷭ҇льскїй и҆ вселе́нскїй патрїа́ршескїй престо́лъ кѡнстантїнопо́лскїй возведе́нъ бы́въ. И҆́же во свѧты́хъ бо і҆гна́тїю си́лою ца́рскою и҆згна́нꙋ бы́вшꙋ ѿ престо́ла, и҆ це́ркви ѿто́лѣ вдо́вствꙋюшей, нижѐ сꙋ́щꙋ и҆на́че возмо́жнꙋ пребыва́ти є҆́й безъ є҆пі́скопа, и҆́же во свѧты́хъ фѡ́тїй нꙋ́ждею пови́ненъ и҆ ца́рскою си́лою, прее́млетъ пра́вильнѣ свѧще́ннаго і҆гна́тїа, постри́женъ пе́рвѣе въ мона́шество, та́же и҆ прѡ́чїѧ по чи́нꙋ свѧще́нства степе́ни проше́дъ. И ꙗ҆ковы́ѧ по́двиги показа̀ треблаже́нный ѡ҆ правосла́вной вѣ́рѣ проти́вꙋ манїхе́ѡмъ и҆ і҆кѡнобо́рцємъ и҆ и҆ны̑мъ є҆ретїкѡ́мъ, и҆ пре́жде всѣ́хъ проти́вꙋ тогда̀ пе́рвѣе ꙗ҆́вльшейсѧ па́пской є҆́реси є҆ѧ́же нача́льника и҆ латі́нскагѡ раздра́нїѧ раздо́ра ѻ҆тца̀ нїкола́а лю́таго па́пꙋ ри́мскаго пи́сменными и҆ ѻ҆те́ческими доказа́телствы и҆з̾ѡбличи́въ, и҆ пра́веднѡ низложи́въ ѿ каѳолі́ческїѧ це́ркве собо́рнѣ и҆згна̀ а҆на́ѳемѣ преда́въ. Ꙗ҆кѡва́ же гонє́нїѧ и҆ бѣды̑ ꙗ҆ковы́ же навѣ́ты и҆ ѡ҆клевета̑нїѧ ꙗ҆кѡва́ же и҆ ѡ҆ѕлоблє́нїѧ и҆ безчеловѣ̑чнаѧ мꙋчє́нїѧ претерпѣ̀ хрⷭ҇топодража́тельнѣ терпѣливодꙋ́шный бг҃оглаго́льникъ тве́рдый и҆ дꙋше́ю а҆дама́нтовый свѧти́тель ѿ раздо́рныхъ латі́нѡвъ и҆ ѿ є҆́реси па́пской послѣ́дователей человѣ́кѡвъ ѕлодѣ́йственныхъ и҆ лжесло́вныхъ человѣ́кѡвъ беззако́нныхъ непреподо́бныхъ и҆ скверноꙋбі́йственныхъ простра́ннаѧ ѡ҆ не́мъ і҆сто́рїа подро́бнѡ повѣствꙋ́етъ. Толи́ко же то́кмѡ рещѝ здѣ̀ ѡ҆ не́мъ потре́бно, ꙗ҆́кѡ блаже́нный свѧщеннодѣ́йствовавъ ꙗ҆́коже дрꙋгі́й па́ѵелъ є҆ѵⷢ҇лїе, ве́сь ᲂу҆́бѡ мꙋ́жественный наро́дъ бо́лгарскїй съ царе́мъ и҆́хъ въ ꙗ҆́же во хрⷭ҇та̀ непоро́чнꙋю вѣ́рꙋ тайново́дствовавъ, бж҃е́ственнагѡ креще́нїѧ ба́нею породѝ, мнѡ́гїѧ же и҆ ѿ разли́чныхъ є҆ресе́й, а҆рме́ны, і҆кѡнобо́рцы и҆ и҆ны̑ѧ и҆носла̑вныѧ къ правосла́вной хрⷭ҇то́вѣ це́ркви возвратѝ, словеса̀ и҆зложи́въ и҆спо́лнена благода́ти и҆ премꙋ́дрости и҆ и҆́стинны, и҆́миже ѕлосла́вныхъ мꙋдрѡва́нїѧ ꙗ҆́коже гро́момъ поразѝ, и҆ тве́рдостїю ᲂу҆́бѡ мꙋдрова́нїѧ и҆ непрело́жностїю цареꙋбі́йцꙋ и҆ неблагода́рнаго васі́лїа самоде́ржца ᲂу҆жаси́въ, те́плою же и҆ ра́зꙋмꙋ ре́вностїю свое́ю, всѧ́кагѡ и҆ноꙋче́нїѧ пле́велы и҆скорени́въ, и҆спо́лненъ ꙗ҆́кѡ и҆́нъ никто́же ѿ совреме́нныхъ є҆мꙋ̀ а҆пⷭ҇льскагѡ ᲂу҆че́нїѧ показа́сѧ. Си́це ᲂу҆̀бо преподо́бнѡ и҆ є҆ѵⷢ҇льски ᲂу҆па́съ це́рковь хрⷭ҇то́вꙋ, и҆ два́жды ᲂу҆́бѡ возше́дъ на престо́лъ, два́жды же наси́лїемъ мꙋчи́тельскимъ и҆згна́нъ, мнѡ́га же и҆ разли̑чна списа̑нїѧ ѡ҆ста́вль це́ркви и҆ лю́демъ бж҃їимъ, и҆зрѧ̑дна всѧ̑ и҆ премꙋ́дрѣйша и҆ ꙗ҆кѡвы́мъ всѧ́кїй вѣ́къ пра́веднѣ бꙋ́детъ ᲂу҆дивлѧ́тисѧ. Всѧ́кое бо зна́нїе проше́дъ наказа́нїѧ, во всѧ́комъ ᲂу҆держа́нїе стѧжа̀, мно́гѡ же и҆ потрꙋди́всѧ ѡ҆ и҆́стинѣ и҆ пра́вдѣ, ѿи́де свѧ́тѡ ко гдⷭ҇ꙋ многострада́льный, заточе́нъ въ а҆рменїа́нской ѻ҆би́тели, ꙗ҆́коже бж҃е́ственный златоꙋ́стъ въ кома́нѣхъ. Свѧще́нное же и҆ всечестно́е є҆гѡ̀ тѣ́ло положе́но бы́сть во ѻ҆би́тели глаго́лемой пꙋсты́нной или безмо́лвной. И҆ дре́вле ᲂу҆́бѡ соверша́емь бѣ̀ свѧтѣ́йшїй є҆гѡ̀ собо́ръ въ хра́мѣ честн́агѡ предте́чи и҆ крести́телѧ і҆ѡа́нна, сꙋ́щемъ въ рече́нной ѻ҆би́тели безмо́лвїѧ. Ны́нѣ же соверша́етсѧ въ ꙗ҆́же во ѻ҆́стровѣ ха́лки свѧще́нной и҆ патрїа́ршеской ѻ҆би́тели ст҃ы́ѧ трⷪ҇цы, и҆дѣ́же ᲂу҆жѐ соста́влено бы́сть и҆ бг҃осло́вское ᲂу҆чи́лище вели́кїѧ хрⷭ҇то́вы це́ркве"
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшаго: но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ блгⷭ҇ве́нъ є҆сѝ."
 },
 {
  "type": "TEXT",
  "value": "Преше́лъ є҆сѝ бг҃омꙋ́дре ѻ҆́ч҃е къ небе́снымъ селе́нїемъ, и҆ прибли́живсѧ бг҃ꙋ, прича́стїемъ ѡ҆божа́емъ бж҃е́ственъ бы́лъ є҆сѝ, поѧ̀ преподо́бне: ѻ҆ц҃є́въ гдⷭ҇ь, и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Вразꙋмлѧ́еми твои́ми словесы̀ наꙋча́емсѧ, ѻ҆́ч҃е всехва́льне, ꙗ҆́коже въ со́лнцѣхъ трїе́хъ, нераздѣ́лно несѣко́мо почита́ти бж҃е́ство̀, є҆мꙋ́же и҆ пое́мъ: ѻ҆ц҃є́въ гдⷭ҇ь, и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Ко́ль всесвѧще́нно и҆ бж҃е́ственно и҆ бг҃ꙋго́дно и҆сповѣ́данїе твоѐ: ꙗ҆́коже бо зла́то ѡ҆чи́щсѧ, бг҃ꙋ ᲂу҆годи́лъ є҆сѝ, ѻ҆́ч҃е треблаже́нне, веселѧ́сѧ подража́нїемъ, преподо́бне, страсте́й спа́совыхъ."
 },
 {
  "type": "TEXT",
  "value": "Бг҃оро́диченъ: Всѣ̑мъ вино́вна человѣ́кѡмъ ꙗ҆ви́ласѧ є҆сѝ бж҃е́ственнагѡ и҆збавле́нїѧ, и҆зба́вителѧ всѣ́хъ ро́ждшаѧ всенепоро́чнаѧ, є҆мꙋ́же всѝ пое́мъ: превозноси́мый ѻ҆ц҃є́въ гдⷭ҇ь, и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Текꙋ́тъ и҆сто́чницы твои́хъ догма́тѡвъ, и҆ всю̀ це́рковь напаѧ́ютъ, фѡ́тїе пречꙋ́дне, тѣ́мже восхвалѧ́емъ тѧ̀, ꙗ҆́кѡ правосла́вныхъ ᲂу҆твержде́нїе ѻ҆́ч҃е и҆ похвалꙋ̀, гдⷭ҇а пою́ще непреста́ннѡ, и҆ превозносѧ́ще во всѧ̑ вѣ́ки."
 },
 {
  "type": "TEXT",
  "value": "Ко приста́нищꙋ ти́хомꙋ ты̀ приста́лъ є҆сѝ, житє́йскїѧ бꙋ́ри ѿри́нꙋвъ, и҆мѣ́лъ бо є҆сѝ направлѧ́юща всѐ твоѐ ше́ствїе ᲂу҆пра́вителѧ гдⷭ҇а, фѡ́тїе всемꙋ́дре, ма́нїемъ всѧ̑ творѧ́щагѡ: є҆гѡ́же превозно́симъ во всѧ̑ вѣ́ки."
 },
 {
  "type": "TEXT",
  "value": "Свѣ́тъ трїсїѧ́тельный пребж҃е́ственныѧ трⷪ҇цы въ тѧ̀ все́льсѧ, свѣ́тъ тѧ̀ вторы́й показа̀ просвѣща́ющъ собо́ръ правосла́вныхъ, є҆реті́ческое же по́лчище ѻ҆́ч҃е, притꙋплѧ́ющъ, и҆ гдⷭ҇а по́йте зовꙋ́щъ, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Ши́покъ въ те́рнїи тѧ̀ ѡ҆брѣ́тъ, и҆ цвѣ́тъ во ᲂу҆до́лїѧхъ всебл҃гово́нный, крі́нъ же всенескве́рный, влады́чице бг҃оневѣ́сто, тво́й жени́хъ свы́ше въ тѧ̀ всели́сѧ, и҆ мі́ръ ѡ҆благоꙋха̀ ве́сь тѧ̀ превозносѧ́щъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ дꙋ́хомъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере: и҆ да вопїе́тъ, ра́дꙋйсѧ всебл҃же́ннаѧ бцⷣе чи́стаѧ приснодв҃о."
 },
 {
  "type": "TEXT",
  "value": "Велича́й дꙋшѐ моѧ̀ во і҆ера́рсѣхъ пресвѣ́тлаго свѣти́льника."
 },
 {
  "type": "TEXT",
  "value": "Всего̀ себѐ привождꙋ̀ чꙋ́дне, къ бж҃е́ственномꙋ покро́вꙋ твоемꙋ̀: ꙗ҆́кѡ ст҃и́тель же вла́сть рѣши́ти прегрѣшє́нїѧ ѿ хрⷭ҇та̀ прїе́мъ, мои́хъ прегрѣше́нїй вери̑ги расто́ргъ, спаси́ мѧ моли́твами твои́ми и҆ бж҃е́ственнымъ свѣ́томъ просвѣтѝ."
 },
 {
  "type": "TEXT",
  "value": "Велича́й дꙋшѐ моѧ̀ ᲂу҆краси́вшаго це́рковь хрⷭ҇то́вꙋ."
 },
 {
  "type": "TEXT",
  "value": "Взѧ́лсѧ є҆сѝ къ свѣ́тꙋ незаходи́момꙋ сла́вне, земны́хъ ѻ҆́ч҃е и҆зба́вльсѧ, и҆ вседержи́телю и҆ трїсо́лнечномꙋ свѣ́тꙋ предстои́ши съ го́рними чи́нми, и҆ ѿтꙋ́дꙋ посыла́емагѡ сїѧ́нїѧ наслажда́ешисѧ всебл҃же́нне, и҆ на́съ просвѣща́еши восхвалѧ́ющихъ тѧ̀."
 },
 {
  "type": "HEADER",
  "value": "Сла́ва:"
 },
 {
  "type": "TEXT",
  "value": "Велича́й дꙋшѐ моѧ̀ трїѷпоста́снагѡ и҆ нераздѣ́льнагѡ бж҃ества̀ держа́вꙋ."
 },
 {
  "type": "TEXT",
  "value": "Ꙗ҆́коже нѣ́кїй храбо́рникъ ꙗ҆ви́лсѧ є҆сѝ и҆з̾ѡбличи́тель преле́стныѧ, є҆́реси: правосла́вїѧ же бж҃е́ственный защи́тникъ со і҆гна́тїемъ фѡ́тїе, є҆гѡ́же и҆ прее́мникъ и҆ нра́вѡвъ и҆ престо́ла бы́лъ є҆сѝ, и҆ мо́лишисѧ съ ни́мъ ко гдⷭ҇ꙋ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Велича́й дꙋшѐ моѧ̀ честнѣ́йшꙋю и҆ сла́внѣйшꙋю го́рнихъ во́инствъ."
 },
 {
  "type": "TEXT",
  "value": "Всего́ мѧ бг҃ъ ѡ҆божи́ти хотѧ̀, ве́сь соединѧ́етсѧ тѝ, и҆ непостижи́мое новосѣче́тсѧ всѣ́мъ та́инство: ражда́еши дв҃а нетлѣ́нна, и҆ пло́ть зри́тсѧ бг҃ъ: є҆гѡ́же воспѣва́юще, тѧ̀ ны́нѣ ᲂу҆блажа́емъ марі́е ꙗ҆́коже сама̀ прорекла̀ є҆сѝ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Же́ны ᲂу҆слы́шите:"
 },
 {
  "type": "TEXT",
  "value": "Предста́телѧ тѧ̀ теплѣ́йша це́рковь и҆мѣ́етъ, и҆ свѣ́тла ᲂу҆чи́телѧ ѻ҆́ч҃е, тѣ́мже свѣ́тлѡ твою̀ па́мѧть торжествꙋ́етъ зовꙋ́щи: при́снѡ покрыва́й ста́до твоѐ, и҆ сохранѧ́й невреди́мо ѿ є҆́реси же и҆ вре́да, сщ҃еннонача́льниче гдⷭ҇ень."
 },
 {
  "type": "HEADER",
  "value": "И҆ пра́здника."
 },
 {
  "type": "HEADER",
  "value": "На хвали́техъ, всѧ́кое дыха́нїе: поста́вимъ стїхѡ́въ на д҃: и҆ пое́мъ стїхи̑ры подѡ́бны, гла́съ а҃."
 },
 {
  "type": "TEXT",
  "value": "Подо́бенъ: Небе́сныхъ чинѡ́въ:"
 },
 {
  "type": "TEXT",
  "value": "Це́ркве бж҃е́ственнаго восхва́лимъ сщ҃еннонача́льника вои́стиннꙋ, и҆ ᲂу҆чи́телѧ вели́каго, проповѣ́дника сло́ва, чꙋ́днаго равноапо́стола фѡ́тїа: и҆́бо наста̀ всесла́внаѧ є҆гѡ̀ па́мѧть, всѣ́хъ вѣ́рныхъ веселѧ́щаѧ."
 },
 {
  "type": "TEXT",
  "value": "Добродѣ́телей тѧ̀ прїѧ́телище нарица́емъ фѡ́тїе, ꙗ҆́кѡ мі́рꙋ дрꙋ́га, любвѐ дѣ́лателѧ, и҆ сто́лпъ цѣломꙋ́дрїѧ, и҆ моли́твы пребыва́лище тве́рдое, и҆ и҆сцѣле́нїй сокро́вище, и҆ моли́твенника почита́ющихъ тѧ̀ бл҃же́нне."
 },
 {
  "type": "TEXT",
  "value": "Со а҆по́столы совокꙋпи́лсѧ є҆сѝ, ꙗ҆́кѡ равноапо́столъ: и҆́бо ты̀ всемꙋ̀ славе́нскомꙋ пле́мени бж҃е́ственный проповѣ́дникъ ꙗ҆ви́всѧ, ко хрⷭ҇тꙋ̀ сїѐ приве́лъ є҆сѝ, возроди́въ креще́нїемъ ст҃ы́мъ, є҆́же и҆ сохранѧ́й правосла́вно."
 },
 {
  "type": "TEXT",
  "value": "Земно́мꙋ денни́цѣ разгордѣ́вщꙋсѧ лю́тѣ, и҆ престо́лъ сво́й поста́вльшꙋ вы́шше ѕвѣ́здъ, пе́рвый ты̀ поревнова́въ ꙗ҆́коже мїхаи́лъ, возопи́лъ є҆сѝ сла́вне: ста́немъ до́брѣ: ста́немъ всѝ въ честны́хъ ѻ҆те́ческихъ преда́нїѧхъ."
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "И҆дѣ́же призове́тсѧ твоѐ и҆́мѧ свѣ́тꙋ тезоимени́те, ѿ тꙋ́дꙋ дїа́волѧ прого́нитсѧ си́ла: не терпи́тъ бо свѣ́та твоегѡ̀ ви́дѣти спады́й денни́ца: тѣ́мъ мо́лимъ тѧ̀, ѻ҆гнено́сныѧ є҆гѡ̀ стрѣ́лы, ꙗ҆̀же на ны̀ дви̑жимыѧ ᲂу҆гасѝ, хода́тайствомъ твои́мъ и҆збавлѧ́ѧ на́съ ѿ собла́знѡвъ є҆гѡ̀, достопѣ́тый і҆ера́рше фѡ́тїе."
 },
 {
  "type": "HEADER",
  "value": "И҆ ны́нѣ пра́здника."
 },
 {
  "type": "HEADER",
  "value": "Славосло́вїе вели́кое, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, и҆з̾ѡбрази́тельна, и҆ ѿ канѡ́на пра́здника пѣ́снь г҃ и҆ ст҃а́гѡ ѕ҃."
 },
 {
  "type": "HEADER",
  "value": "Прокі́менъ, гла́съ а҃:"
 },
 {
  "type": "TEXT",
  "value": "Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
 },
 {
  "type": "TEXT",
  "value": "Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй."
 },
 {
  "type": "HEADER",
  "value": "А҆пⷭ҇лъ, ко є҆вре́ѡмъ зача́ло ти҃і."
 },
 {
  "type": "TEXT",
  "value": "А҆ллилꙋ́їа, гла́съ в҃: Оу҆ста̀ првⷣнагѡ поꙋча́тсѧ премⷣрости, и҆ ѧ҆зы́къ є҆гѡ̀ возглаго́летъ сꙋ́дъ."
 },
 {
  "type": "HEADER",
  "value": "Є҆ѵⷢ҇лїе і҆ѡа́нна, зача́ло л҃ѕ."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ:"
 },
 {
  "type": "TEXT",
  "value": "Велича́нїе: Ра́дꙋйсѧ свѣтлѣ́йшїй хрⷭ҇то́вы це́ркве таи́нниче, правосла́вныхъ защи́тниче, ѕлосла́вныхъ бичꙋ̀, свѧщеннонача́лїѧ сла́во, ве́лїй бг҃оѧвле́нниче, фѡ́тїе свѧ́те."
 }
]