[
 {
  "type": "HEADER",
  "value": "І҆ꙋ́лїа д҃-й де́нь"
 },
 {
  "type": "HEADER",
  "value": "Слꙋ́жба ст҃ы̑мъ ца́рствєннымъ стрⷭ҇тоте́рпцємъ."
 },
 {
  "type": "HEADER",
  "value": "На вели́цѣй вече́рни, Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ: стїхи ̑ры на и҃, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Є҆гда̀ на ца́рство рѡссі́йское вѣнча́шесѧ, пома́занниче нїко́лае, тогда̀ ᲂу҆се́рднѡ моли́лсѧ є҆сѝ: влⷣко и҆ гдⷭ҇и мо́й, наста́ви мѧ̀ въ дѣ́лѣ, на не́же посла́лъ мѧ̀ є҆сѝ, да бꙋ́детъ со мно́ю премꙋ́дрость твоѧ̀, да разꙋмѣ́ю, что́ є҆сть ᲂу҆го́дно пред̾ ѻ҆чи́ма твои́ма, и҆ въ де́нь сꙋда̀ твоегѡ̀ непосты́днѡ возда́мъ тебѣ̀ сло́во. Тѣ́мже не ѡ҆ сла́вѣ земно́й попече́нїе и҆мѣ́лъ є҆сѝ, но па́че ѡ҆ сла́вѣ нбⷭ҇нѣй."
 },
 {
  "type": "TEXT",
  "value": "Є҆гда̀ на ст҃ѣ́й рꙋсѝ тѧ́жкагѡ и҆спыта́нїѧ вре́мѧ наста̀, тогда̀ ты̀, стрⷭ҇тоте́рпче ст҃ы́й нїко́лае, моли́лсѧ є҆сѝ ѡ҆ сп҃се́нїи є҆ѧ̀, и҆ сѐ, ꙗ҆ви́сѧ і҆кѡ́на застꙋ́пницы держа́вныѧ, ꙗ҆́кѡ зна́менїе прїѧ́тїѧ вла́сти на пречⷭ҇тѣи рꙋ́цѣ цр҃и́цы и҆ влⷣчцы. Тѣ́мже рѡссі́а, а҆́ще и҆ вла́стїю безбо́жныхъ ᲂу҆гнете́на бы́сть, предста́тельствомъ дв҃ы бцⷣы и҆ мл҃твами твои́ми сохрани́сѧ."
 },
 {
  "type": "TEXT",
  "value": "Є҆гда̀ мно́зи беззакѡ́нницы и҆ вѡждѝ лю́дстїи восхотѣ́ша воста́ти на вѣ́рꙋ, царѧ̀ и҆ ѻ҆те́чество, тогда̀ ты̀, бг҃омꙋ́дре стрⷭ҇тоте́рпче нїко́лае, болѣ́зновалъ є҆сѝ ѡ҆ наро́дѣ твое́мъ, и҆ ка́їнова братоꙋбі́йства въ держа́вѣ свое́й и҆збѣ́гнꙋти хотѧ̀, вла́сть земнꙋ́ю, сла́вꙋ и҆ по́честь ѡ҆ста́вилъ є҆сѝ, всѐ ᲂу҆пова́нїе возлага́ѧ на бг҃а. Тѣ́мже ны́нѣ, предстоѧ̀ прⷭ҇то́лꙋ цр҃ѧ̀ ца́рствꙋющихъ, моли́сѧ ѡ҆ держа́вѣ рѡссі́йстѣй и҆ сп҃се́нїи дꙋ́шъ на́шихъ."
 },
 {
  "type": "TEXT",
  "value": "Є҆гда̀ наста̀ гоне́нїе, заточе́нїе и҆ поноше́нїе, тогда̀ тве́рдꙋю вѣ́рꙋ, наде́ждꙋ на бг҃а и҆ чистѣ́йшꙋю любо́вь, терпѣ́нїе же и҆ всепроще́нїе показа́сте, ст҃і́и ца́рственнїи стрⷭ҇тоте́рпцы, творѧ́ще кро́ткѡ мл҃твы за врагѝ. Ве́лїе на землѝ бл҃гоче́стїе ва́ше, ве́лїѧ на нб҃сѣ́хъ сла́ва ва́ша."
 },
 {
  "type": "HEADER",
  "value": "И҆́ны стїхи ̑ры, гла́съ ѕ҃."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Всѐ ᲂу҆пова́нїе на бг҃а возложи́вше, ст҃і́и ца́рственнїи стрⷭ҇тоте́рпцы, ѻ҆́бразъ терпѣ́нїѧ и҆ страда́нїѧ все́й земли рѡссі́йстѣй ꙗ҆ви́стесѧ. Вы́ бо, молѧ́щесѧ ѡ҆ мꙋчи́телехъ, клеветꙋ̀, ᲂу҆́зы и҆ и҆згна́нїе, глꙋмле́нїе, насмѣѧ́нїе и҆ ѡ҆болга́нїе, ᲂу҆бїе́нїе и҆ тѣле́съ порꙋга́нїе мꙋ́жественнѣ претерпѣ́ли є҆стѐ. Сегѡ̀ ра́ди ва́съ при́снѡ прославлѧ́емъ."
 },
 {
  "type": "TEXT",
  "value": "Всѐ бл҃гоче́стїе твоѐ во хрⷭ҇тѣ̀ бы́сть, ст҃а́ѧ мч҃нце цари́це а҆леѯа́ндро рѡссі́йскаѧ, прешла́ бо є҆сѝ ѿ лю́теровы вѣ́ры къ правосла́вїю, є҆го́же воспрїѧ́ла є҆сѝ всѣ́мъ се́рдцемъ твои́мъ, возлюби́вши мл҃твꙋ, хра́мъ бж҃їй и҆ ст҃ы́хъ ѻ҆тє́цъ ᲂу҆чє́нїѧ, и҆ ꙗ҆́кѡ ма́ти добронра́внаѧ, во бл҃гоче́стїи возрасти́ла є҆сѝ ча̑да твоѧ̑, и҆ та̑ѧ ᲂу҆гото́вала є҆сѝ въ непоро́чнꙋю же́ртвꙋ за хрⷭ҇та̀. Сегѡ̀ ра́ди тѧ̀ при́снѡ прославлѧ́емъ."
 },
 {
  "type": "TEXT",
  "value": "Пло́дъ бл҃госла́венъ мл҃твъ саро́вскагѡ чꙋдотво́рца и҆ ча́емый наслѣ́дникъ ца́рственныхъ роди́телей бы́въ, наде́жда, сла́ва и҆ ᲂу҆пова́нїе рѡссі́и въ ра́дость лю́демъ правосла̑внымъ ꙗ҆ви́лсѧ є҆сѝ, ст҃ы́й царе́вичꙋ а҆леѯі́е. Бж҃їимъ же промышле́нїемъ мнѡ́гїѧ скѡ́рби и҆ недꙋ́ги и҆змла́да безро́потнѡ терпѣ́лъ є҆сѝ, и҆ ꙗ҆́кѡ а҆́гнецъ непоро́чный, ᲂу҆бїе́нїе ѿ ѕлочести́выхъ прїѧ́лъ є҆сѝ, ны́нѣ"
 },
 {
  "type": "TEXT",
  "value": "же ликꙋ́еши, ꙗ҆́кѡ наслѣ́дникъ црⷭ҇твїѧ нбⷭ҇нагѡ. Сегѡ̀ ра́ди тѧ̀ при́снѡ ᲂу҆бл҃жа́емъ."
 },
 {
  "type": "TEXT",
  "value": "Дщє́ри царє́вы, ст҃ы̑ѧ мч҃нцы дѣ̑вы, и҆́стинныѧ невѣ̑сты хрⷭ҇тѡ́вы ѻ҆́льго, татїа́но, марі́е и҆ а҆настасі́е, вы ꙗ҆́кѡ мꙋ̑дрыѧ є҆ѵⷢ҇льскїѧ дѣ̑вы, є҆ле́й мл ⷭ҇рдїѧ въ дꙋша́хъ при́снѡ хранѧ́щыѧ, стра́ждꙋщымъ, ни́щымъ и҆ болѧ́щымъ ᲂу҆се́рднѡ послꙋжи́ли є҆стѐ, и҆ за гонѧ́щихъ ва́съ да́же до сме́рти гдⷭ҇а молѧ́щыѧ, въ черто́зѣхъ жениха̀ нбⷭ҇нагѡ всели́лисѧ є҆стѐ. Сегѡ̀ ра́ди ва́съ при́снѡ ᲂу҆бл҃жа́емъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Сою́зомъ любвѐ хрⷭ҇то́вы свѧзꙋ́еми, седмочи́сленнїи ца́рственнїи стрⷭ҇тоте́рпцы, поноше́нїѧ и҆ ᲂу҆бїе́нїѧ не ᲂу҆боѧ́вшесѧ, пе́рвїи, ꙗ҆́кѡ новомч҃нцы, за рꙋ́сь ст҃ꙋ́ю ѿ безбо́жныхъ пострада́сте и҆ ѻ҆́бразъ и҆сповѣ́дничества и҆ ре́вности по бз҃ѣ вѣ̑рнымъ лю́демъ показа́сте. Тѣ́мже землѝ рꙋ́сскїѧ покрови́телїе неꙋсыпа́емїи ꙗ҆́вльшесѧ, трїеди́наго бг҃а непреста́ннѡ моли́те ѡ҆ сп ҃се́нїи ѻ҆те́чества на́шегѡ и҆ всѣ́хъ съ любо́вїю ва́съ почита́ющихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Кто̀ тебѐ не ᲂу҆бл҃жи́тъ:"
 },
 {
  "type": "HEADER",
  "value": "Вхо́дъ. Прокі́менъ днѐ. И҆ чтє́нїѧ."
 },
 {
  "type": "HEADER",
  "value": "Премꙋ́дрости соломѡ́новы чте́нїе. (Глава̀ г҃.)"
 },
 {
  "type": "TEXT",
  "value": "Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьми, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ мл ⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "Ца́рствъ тре́тїихъ чте́нїе. (Главы̑ и҃ и҆ ѳ҃.)"
 },
 {
  "type": "TEXT",
  "value": "Ста̀ соломѡ́нъ пред̾ лице́мъ ѻ҆лтарѧ̀ гдⷭ҇нѧ, пред всѣ́мъ собо́ромъ і҆и҃левымъ, и҆ воздви́же рꙋ́цѣ своѝ на не́бо, и҆ речѐ: гдⷭ҇и бж҃е і҆и҃левъ, нѣ́сть ꙗ҆́коже ты̀ бг҃ъ на нб҃си горѣ̀ и҆ на землѝ ни́зꙋ, хранѧ́й завѣ́тъ и҆ млⷭ҇ть рабꙋ̀ твоемꙋ̀, ходѧ́щемꙋ пред̾ тобо́ю всѣ́мъ се́рдцемъ свои́мъ, ꙗ҆̀же сохрани́лъ є҆сѝ рабꙋ̀ твоемꙋ̀ дв҃дꙋ, ѻ҆тцꙋ̀ моемꙋ̀: и҆́бо глаго́лалъ є҆сѝ ᲂу҆сты̀ твои́ми и҆ рꙋка́ма твои́ма соверши́лъ є҆сѝ, ꙗ҆́коже де́нь се́й. И҆ ны́нѣ, гдⷭ҇и бж҃е і҆и҃левъ, сохранѝ рабꙋ̀ твоемꙋ̀ дв҃дꙋ, ѻ҆тцꙋ̀ моемꙋ̀, ꙗ҆̀же ре́клъ є҆сѝ є҆мꙋ̀, глаго́лѧ: не ѡ҆скꙋдѣ́етъ мꙋ́жъ ѿ лица̀ моегѡ̀, сѣдѧ́й на престо́лѣ і҆и҃левѣ, то́кмѡ а҆́ще сохранѧ́тъ ча̑да твоѧ̑ пꙋти своѧ̑, є҆́же ходи́ти предо мно́ю, ꙗ҆́коже ходи́лъ є҆сѝ предо мно́ю. И҆ ᲂу҆слы́шиши мл҃твꙋ раба̀ твоегѡ̀ и҆ люді́й твои́хъ і҆и҃лѧ, ѡ҆ ни́хже помо́лѧтсѧ на мѣ́стѣ се́мъ: и҆ ты̀ ᲂу҆слы́шиши на мѣ́стѣ ѡ҆бита́лища твоегѡ̀ на нб҃сѝ, и҆ сотвори́ши и҆ поми́лꙋеши. Є҆ли̑ка а҆́ще согрѣши́тъ кі́йждо ко и҆́скреннемꙋ своемꙋ̀, и҆ а҆́ще прїи́метъ на него̀ клѧ́твꙋ, є҆́же клѧ́ти є҆го̀, и҆ прїи́детъ, и҆ и҆сповѣ́сть пред̾ лице́мъ ѻ҆лтарѧ̀ твоегѡ̀ въ хра́мѣ се́мъ. И҆ ты̀ ᲂу҆слы́шиши ѿ нб҃сѐ, и҆ сотвори́ши сꙋ́дъ лю́демъ твои̑мъ і҆и҃лю: ѡ҆сꙋди́ти беззако́ннаго, да́ти пꙋ́ть є҆гѡ̀ на главꙋ̀ є҆гѡ̀, и҆ ѡ҆правди́ти првⷣнаго, да́ти є҆мꙋ̀ по пра́вдѣ є҆гѡ̀: є҆гда̀ падꙋ́тъ лю́дїе твоѝ і҆и҃ль пред̾ враги̑, ꙗ҆́кѡ согрѣша́тъ тѝ, и҆ ѡ҆братѧ́тсѧ къ тебѣ̀, и҆ и҆сповѣ́дѧтсѧ и҆́мени твоемꙋ̀, и҆ помо́лѧтсѧ и҆ возглаго́лютъ мл҃твꙋ къ тебѣ̀ въ хра́мѣ се́мъ. И ҆ ты̀ ᲂу҆слы́шиши съ нб҃сѐ, и҆ мл ⷭ҇тивъ бꙋ́деши ѡ҆ согрѣше́нїихъ люді́й свои́хъ і҆и҃лѧ, и҆ возврати́ши ѧ҆̀ въ зе́млю, ю҆́же да́лъ є҆сѝ ѻ҆тцє́мъ и҆́хъ, ꙗ҆́кѡ согрѣша́тъ тѝ, ꙗ҆́кѡ нѣ́сть человѣ́къ, и҆́же не согрѣши́тъ, и҆ разгнѣ́ваешисѧ на нѧ̀, и҆ преда́си ѧ҆̀ пред̾ враги̑, и҆ поплѣнѧ́тъ и҆̀хъ плѣнѧ́щїи въ зе́млю дале́че и҆лѝ бли́зъ, и҆ ѡ҆братѧ́тъ сердца̀ своѧ̑ въ землѝ, а҆́може пресели́шасѧ, и҆ ѡ҆братѧ́тсѧ, и҆ помо́лѧтсѧ тебѣ̀ въ землѝ преселе́нїѧ своегѡ̀, глаго́люще: согрѣши́хомъ, беззако́нновахомъ, непра́вдовахомъ. И҆ ѡ҆братѧ́тсѧ къ тебѣ̀ всѣ́мъ се́рдцемъ свои́мъ и҆ все́ю дꙋше́ю свое́ю въ землѝ вра̑гъ свои́хъ, а҆́може преве́лъ є҆сѝ и҆̀хъ, и҆ помо́лѧтсѧ къ тебѣ̀ по пꙋтѝ землѝ своеѧ̀, ю҆́же да́лъ є҆сѝ ѻ҆тцє́мъ и҆́хъ, и҆ ко гра́дꙋ, є҆го́же и҆збра́лъ є҆сѝ, и҆ ко хра́мꙋ, є҆го́же созда́хъ и҆́мени твоемꙋ̀. И҆ ᲂу҆слы́шиши ѿ нб҃сѐ, ѿ гото́вагѡ жили́ща твоегѡ, мл҃твꙋ и҆́хъ и҆ моле́нїе и҆́хъ, и҆ сотвори́ши ѡ҆правда́нїе и҆̀мъ, да бꙋ́детъ гдⷭ҇ь бг҃ъ на́шъ съ на́ми, ꙗ҆́коже бѣ̀ со ѻ҆тцы̑ на́шими, да не ѡ҆ста́витъ на́съ, нижѐ да ѿврати́тъ на́съ, преклони́ти сердца̀ на̑ша къ немꙋ̀, є҆́же ходи́ти во всѣ́хъ пꙋте́хъ є҆гѡ̀ и҆ храни́ти всѧ̑ за́пѡвѣди є҆гѡ̀ и҆ повелѣ̑нїѧ є҆гѡ̀ и҆ ѡ҆правда̑нїѧ є҆гѡ̀, ꙗ҆̀же заповѣ́да ѻ҆тцє́мъ на́шымъ. И҆ речѐ къ немꙋ̀ гдⷭ҇ь: ᲂу҆слы́шахъ гла́съ мл҃твы твоеѧ̀ и҆ моле́нїѧ твоегѡ̀, и҆́мже моли́лсѧ є҆сѝ предо мно́ю: сотвори́хъ тѝ по все́й мл҃твѣ твое́й и҆ ѡ҆ст҃и́хъ хра́мъ се́й, є҆го́же созда́лъ є҆сѝ, є҆́же положи́ти и҆́мѧ моѐ та́мѡ во вѣ́ки, и҆ бꙋ́дꙋтъ ѻ҆́чи моѝ тꙋ̀ и҆ се́рдце моѐ во всѧ̑ дни̑. И҆ ты̀, а҆́ще по́йдеши предо мно́ю, ꙗ҆́коже ходѝ дв҃дъ, ѻ҆те́цъ тво́й, въ преподо́бїи се́рдца и҆ въ правотѣ̀, и҆ є҆́же твори́ти по всѣ̑мъ, ꙗ҆̀же заповѣ́дахъ є҆мꙋ̀, и҆ повелѣ̑нїѧ моѧ̑ и҆ за́пѡвѣди моѧ̑ сохрани́ши, и҆ возста́влю престо́лъ ца́рствїѧ твоегѡ̀ во і҆и҃ли во вѣ́ки, ꙗ҆́коже глаго́лахъ къ дв҃дꙋ, ѻ҆тцꙋ̀ твоемꙋ̀, глаго́лѧ: не ѡ҆скꙋдѣ́етъ тѝ мꙋ́жъ властели́нъ во і҆и҃ли."
 },
 {
  "type": "HEADER",
  "value": "Прⷪ҇ро́чества и҆са́їина чте́нїе. (Главы̑ ѯ҃а и҆ ѯ҃в.)"
 },
 {
  "type": "TEXT",
  "value": "Дх҃ъ гдⷭ҇ень на мнѣ̀, є҆гѡ́же ра́ди пома́за мѧ̀, бл҃говѣсти́ти ни́щымъ посла́ мѧ, и҆сцѣли́ти сокрꙋшє́нныѧ се́рдцемъ, проповѣ́дати плѣ́нникѡмъ ѿпꙋще́нїе и҆ слѣпы̑мъ прозрѣ́нїе, нарещѝ лѣ́то гдⷭ҇не прїѧ́тно и҆ де́нь воздаѧ́нїѧ, ᲂу҆тѣ́шити всѧ̑ пла́чꙋщыѧ, да́ти пла́чꙋщымъ сїѡ́на сла́вꙋ вмѣ́стѡ пе́пела, пома́занїе весе́лїѧ пла́чꙋщымъ, ᲂу҆краше́нїе сла́вы вмѣ́стѡ дꙋ́ха ᲂу҆ны́нїѧ, и҆ нарекꙋ́тсѧ ро́дове пра́вды, насажде́нїе гдⷭ҇не во сла́вꙋ. Да возра́дꙋетсѧ дꙋша̀ моѧ̀ ѡ҆ гдⷭ҇ѣ: ѡ҆блече́ бо мѧ̀ въ ри́зꙋ сп҃се́нїѧ и҆ ѻ҆де́ждею весе́лїѧ ѡ҆дѣ́ѧ мѧ̀: ꙗ҆́кѡ на жениха̀, возложѝ на мѧ̀ вѣне́цъ, и҆ ꙗ҆́кѡ невѣ́стꙋ, ᲂу҆краси́ мѧ красото́ю. И҆ ꙗ҆́кѡ землѧ̀, растѧ́щаѧ цвѣ́тъ сво́й, и҆ ꙗ҆́кѡ вертогра́дъ сѣ́мена своѧ̑ прозѧба́етъ, та́кѡ возрасти́тъ гдⷭ҇ь, гдⷭ҇ь пра́вдꙋ и҆ весе́лїе пред̾ всѣ́ми ꙗ҆зы̑ки. Сїѡ́на ра́ди не ᲂу҆молчꙋ̀ и҆ і҆ерⷭ҇ли́ма ра́ди не попꙋщꙋ̀, до́ндеже и҆зы́детъ, ꙗ҆́кѡ свѣ́тъ, пра́вда моѧ̀ и҆ сп҃се́нїе моѐ, ꙗ҆́кѡ свѣти́ло, разжже́тсѧ. И҆ ᲂу҆́зрѧтъ ꙗ҆зы́цы пра́вдꙋ твою̀, и҆ ца́рїе сла́вꙋ твою̀, и҆ прозовꙋ́тъ тѧ̀ и҆́менемъ но́вымъ, и҆́мже гдⷭ҇ь наименꙋ́етъ є҆̀. И҆ бꙋ́деши вѣне́цъ добро́ты въ рꙋцѣ̀ гдⷭ҇ни и҆ дїади́ма ца́рствїѧ въ рꙋцѣ̀ бг҃а твоегѡ̀. И҆ не прозове́шисѧ ктомꙋ̀ ѡ҆ста́вленъ, и҆ землѧ̀ твоѧ̀ ктомꙋ̀ не нарече́тсѧ пꙋста̀: тебѣ́ бо прозове́тсѧ во́лѧ моѧ̀, и҆ землѧ̀ твоѧ̀ вселе́ннаѧ: ꙗ҆́кѡ бл҃говолѝ гдⷭ҇ь въ тебѣ̀, и҆ землѧ̀ твоѧ̀ вкꙋ́пѣ насели́тсѧ. И҆ ꙗ҆́коже живѧ́й ю҆́ноша съ дѣ́вою, та́кѡ поживꙋ́тъ сы́нове твоѝ съ тобо́ю: и҆ бꙋ́детъ ꙗ҆́коже ра́дꙋетсѧ жени́хъ ѡ҆ невѣ́стѣ, та́кѡ возра́дꙋетсѧ гдⷭ҇ь ѡ҆ тебѣ̀."
 },
 {
  "type": "HEADER",
  "value": "На лїті́и стїхи̑ры, гла́съ д҃:"
 },
 {
  "type": "TEXT",
  "value": "Не прикаса́йтесѧ пома̑заннымъ мои̑мъ, глаго́летъ гдⷭ҇ь вседержи́тель. Бг҃опроти̑вницы же бг҃овѣнча́ннаго царѧ̀ ᲂу҆би́ша и҆ не наслѣ́доваша зе́млю бл҃ги́хъ, но ᲂу҆лꙋчи́ша сме́рть безконе́чнꙋю. Ты́ же, ст҃ы́й мч҃нче нїко́лае, пома́занниче бж҃їй, молѝ прилѣ́жнѡ ѡ҆ на́съ, да наслѣ́дꙋемъ съ тобо́ю црⷭ҇тво нбⷭ҇ное. Совѣ́ти бж҃їи не сꙋ́ть ꙗ҆́кѡ совѣ́ти человѣ́честїи, глаго́летъ гдⷭ҇ь вседержи́тель, ѻ҆́ваго бо смирѧ́етъ, ѻ҆́ваго же возно́ситъ, ѻ҆́ваго же мертви́тъ и҆ ѻ҆́ваго живи́тъ, возставлѧ́етъ ѿ землѝ ᲂу҆бо́га и҆ прⷭ҇то́лъ сла́вы дае́тъ є҆мꙋ̀. Сегѡ̀ ра́ди призрѣ̀ гдⷭ҇ь на смире́нїе возлю́бленнагѡ"
 },
 {
  "type": "TEXT",
  "value": "пома́занника своегѡ̀ нїкола́ѧ и҆ жи́ва въ нбⷭ҇ныхъ ѻ҆би́телехъ содѣ́ла є҆го̀, ꙗ҆́кѡ да мо́литсѧ ѡ҆ сп҃се́нїи люде́й свои́хъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Є҆гда̀ прїи́де годи́на лю́таѧ и҆ ѻ҆́бласть те́мнаѧ ѡ҆б̾ѧ́тъ зе́млю рѡссі́йскꙋю, тогда̀ ꙗ҆ви́шасѧ и҆збїе́ннїи за сло́во бж҃їе. Ты́ же, царю̀ мч҃нче, ꙗ҆́кѡ нача́токъ стрⷭ҇тоте́рпцєвъ но́выхъ, съ бг҃олюби́вою цари́цею, ца́рственными ча́ды и҆ вѣ́рными слꙋга́ми твои́ми любо́вїю взыва́лъ є҆сѝ: прїиди́те, принесе́мъ себѐ бг҃ꙋ въ же́ртвꙋ живꙋ́ю и҆ та́кѡ вѣ́рꙋ правосла́внꙋю свидѣ́тельствꙋимъ, да црⷭ҇твїѧ нбⷭ҇нагѡ сподо́бимсѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ, влⷣчце, съ новомч҃нки и҆ ца́рственными стрⷭ҇тотє́рпцы, поми́ловати дꙋ́шы на́шѧ."
 },
 {
  "type": "HEADER",
  "value": "На стїхо́внѣ стїхи̑ры, гла́съ є҃."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ра́дꙋйсѧ, царю̀ нїко́лае, пома́занниче бж҃їй, рѡссі́йскїѧ держа́вы храни́телю и҆ вѣ́ры правосла́вныѧ бл҃гочести́вый ревни́телю, ѡ҆ ми́рѣ всегѡ̀ мі́ра попечи́телю, заблꙋ́ждшихъ и҆́стинный вразꙋми́телю,скорбѧ́щихъ, а҆́лчꙋщихъ и҆ стра́ждꙋщихъ ᲂу҆тѣ́шителю, мл҃твенниче ѡ҆ всѣ́хъ теплѣ́йшїй, ны́нѣ къ тебѣ̀ прибѣга́емъ, бж҃їй ᲂу҆го́дниче и҆ же́ртво всеꙋсе́рднаѧ, молѝ сп҃сти́сѧ дꙋша́мъ на́шымъ."
 },
 {
  "type": "TEXT",
  "value": "Сті́хъ: Вознесо́хъ и҆збра́ннаго ѿ люде́й мои́хъ."
 },
 {
  "type": "TEXT",
  "value": "Ра́дꙋйсѧ, царю̀ нїко́лае, бг҃омъ ѿ рождества̀ на мꙋче́нїе во́льное посвѧще́нный, и҆ ꙗ҆́коже і҆́ѡвъ многострада́льный, пра́ведность во страда́нїи ꙗ҆ви́вый, ны́нѣ же съ нбⷭ҇нымъ цр҃е́мъ црⷭ҇твꙋѧй, моли́сѧ ѡ҆ держа́вѣ рѡссі́йстѣй и҆ сп҃се́нїи дꙋ́шъ на́шихъ."
 },
 {
  "type": "TEXT",
  "value": "Сті́хъ: Є҆ле́емъ ст҃ы́мъ мои́мъ пома́захъ є҆го̀."
 },
 {
  "type": "TEXT",
  "value": "Ра́дꙋйсѧ, стрⷭ҇тоте́рпче нїко́лае, сла́во и҆ красото рѡссі́йскихъ царе́й и҆ кнѧзе́й, ꙗ҆́коже ст҃і́и стрⷭ҇тоте́рпцы и҆ мч҃нцы бори́съ, глѣ́бъ и҆ а҆ндре́й, ѿ бли́жнихъ твои́хъ преда́нъ бы́въ, ᲂу҆бїе́нїе ѿ клѧтвопрестꙋ́пникѡвъ безбо́жныхъ прїѧ́лъ є҆сѝ, ны́нѣ же мо́лишисѧ ѡ҆ проще́нїи врагѡ́въ твои́хъ и҆ сп҃се́нїи дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ:"
 },
 {
  "type": "TEXT",
  "value": "Мч҃нче царю̀ нїко́лае, ѿ ю҆́ности цр҃ѧ̀ сла́вы возлюби́лъ є҆сѝ, да є҆мꙋ̀ до сме́рти послѣ́дꙋеши, ꙗ҆́коже цр҃ковь проповѣ́дꙋетъ: сла́ва хрⷭ҇та̀ бг҃а крⷭ҇тъ и҆ воскрⷭ҇нїе. Ны́нѣ же сла́вꙋ нбⷭ҇нꙋю ѿ хрⷭ҇та̀ прїе́мый, прїимѝ и҆ земно́е прославле́нїе и҆ молѝ сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, гла́съ и҆ подо́бенъ то́йже:"
 },
 {
  "type": "TEXT",
  "value": "Ѽ пресла́внагѡ чꙋдесѐ! Нб҃сѐ и҆ землѝ цр҃и́ца, ѿ ст҃ы́хъ сро́дникѡвъ на́шихъ ᲂу҆молѧ́емаѧ, до ны́нѣ зе́млю рꙋ́сскꙋю покрыва́етъ и҆ ли́ка своегѡ̀ и҆зѡбражє́нїи мл ⷭ҇тивнѡ ѡ҆богаща́етъ. Ѽ влⷣчце держа́внаѧ! Не преста́ни и҆ на бꙋ́дꙋщее вре́мѧ во ᲂу҆твержде́нїе на рꙋсѝ правосла́вїѧ мл ⷭ҇ти и҆ чꙋдеса̀ и҆злива́ти до вѣ́ка. А҆ми́нь."
 },
 {
  "type": "HEADER",
  "value": "Тропа́рь, гла́съ д ҃:"
 },
 {
  "type": "TEXT",
  "value": "Дне́сь, бл҃говѣ́рнїи лю́дїе, свѣ́тлѡ почти́мъ седмери́цꙋ чтⷭ҇нꙋ́ю ца́рственныхъ стрⷭ҇тоте́рпєцъ, хрⷭ҇то́вꙋ є҆ди́нꙋ дома́шнюю цр҃ковь: нїкола́ѧ и҆ а҆леѯа́ндрꙋ, а҆леѯі́а, ѻ҆́льгꙋ, татїа́нꙋ, марі́ю и҆ а҆настасі́ю. Ті́и бо, ᲂу҆́зъ и҆ страда́нїй многоразли́чныхъ не ᲂу҆боѧ́вшесѧ, ѿ бг҃обо́рныхъ сме́рть и҆ порꙋга́нїе тѣле́съ прїѧ́ша и҆ дерзнове́нїе ко гдⷭ҇ꙋ въ мл҃твѣ ᲂу҆лꙋчи́ша. Сегѡ̀ ра́ди къ ни́мъ съ любо́вїю возопїи́мъ: ѽ ст҃і́и стрⷭ҇тоте́рпцы, гла́сꙋ покаѧ́нїѧ и҆ стена́нїю наро́да на́шегѡ вонми́те, зе́млю рѡссі́йскꙋю въ любвѝ къ правосла́вїю ᲂу҆тверди́те, ѿ междоꙋсо́бныѧ бра́ни сохрани́те, ми́ръ мі́рови ᲂу҆ бг҃а и҆спроси́те и҆ дꙋша́мъ на́шымъ ве́лїю мл ⷭ҇ть."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь: тропа́рь стрⷭ҇тоте́рпцємъ, два́жды. Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́ное:"
 },
 {
  "type": "HEADER",
  "value": "По а҃-мъ стїхосло́вїи сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Повелѣ́нное та́йнѡ:"
 },
 {
  "type": "TEXT",
  "value": "Попече́нїе и҆мѣ́лъ є҆сѝ ѡ҆ вѣ́рѣ правосла́внѣй, бг҃овѣнча́нный царю̀ нїко́лае, ѿ а҆пⷭ҇лъ цр҃кви на́шей преда́ннѣй, разꙋмѣ́ѧ є҆́й бы́ти рѡссі́йстѣй земли ᲂу҆твержде́нїемъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Въ поноше́нїи и҆ ѡ҆бдержа́нїи ꙗ҆зы́кѡвъ є҆смы̀, вси́ бо преѡгорчи́хомъ сн҃а твоего̀, и҆ то́й посѣти́ ны преще́нїемъ свои́мъ, но ᲂу҆молѝ, дв҃о пречⷭ҇таѧ, ѿ тебє̀ ро́ждшагосѧ, а҆́ще не до конца̀ прогнѣ́валсѧ є҆́сть, да прости́тъ и҆ поми́лꙋетъ странꙋ̀ рѡссі́йскꙋю."
 },
 {
  "type": "HEADER",
  "value": "По в҃-мъ стїхосло́вїи сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Є҆гда̀ бг҃обо́рцы мꙋчи́телїе заточи́ша тѧ̀ съ цари́цею, ча́ды и҆ вѣ́рными слꙋга́ми твои́ми, тогда̀ взыва́лъ є҆сѝ ѱало́мски: помѧнѝ, гдⷭ҇и, дв҃да и҆ всю̀ кро́тость є҆гѡ̀. И҆ по́сланъ бы́сть тебѣ̀, царю̀ нїко́лае, кро́ткомꙋ и҆ смире́нномꙋ се́рдцемъ, вѣне́цъ мч҃нческїй, ꙗ҆́коже ст҃ы̑мъ бори́сꙋ, глѣ́бꙋ и҆ а҆ндре́ю. Молѝ сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Воста́ни, влⷣчце держа́внаѧ, и҆ ѡ҆блече́тсѧ рꙋ́сь ст҃а́ѧ въ крѣ́пость свою̀, и҆ вода̀ же́лчнаѧ ѿ полы́ни бꙋ́детъ на́мъ ꙗ҆́кѡ ме́дъ, да напита́емсѧ тѣснота́ми, ꙗ҆̀же ѿ зижди́телѧ сꙋ́ть, и҆ восхва́лимъ держа́вꙋ твою̀."
 },
 {
  "type": "TEXT",
  "value": "Велича́нїе: Велича́емъ ва́съ, ст҃і́и ца́рственнїи стрⷭ҇тоте́рпцы, и҆ чти́мъ чтⷭ҇на̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ."
 },
 {
  "type": "TEXT",
  "value": "Ѱало́мъ и҆збра́нный: Бг҃ъ на́мъ прибѣ́жище и҆ си́ла:"
 },
 {
  "type": "HEADER",
  "value": "По полѷеле́и сѣда́ленъ, гла́съ г҃:"
 },
 {
  "type": "TEXT",
  "value": "Дне́сь ца́рственнїи стрⷭ҇тоте́рпцы рѡссі́йстїи предстоѧ́тъ цр҃ю ца́рствꙋющихъ и҆ гдⷭ҇ꙋ госпо́дствꙋющихъ, и҆ съ держа́вною влⷣчцею непреста́ннѡ мо́лѧтъ бг҃а: сп҃сѝ, гдⷭ҇и, лю̑ди твоѧ̑ и҆ бл҃гословѝ достоѧ́нїе твоѐ, странꙋ̀ на́шꙋ рѡссі́йскꙋю поми́лꙋй, мл ⷭ҇тиве вседержи́телю, во вѣ́ки вѣкѡ́въ. А҆ми́нь."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Вострꙋ́бимъ трꙋбо́ю пѣ́сней, воспои́мъ согла́снѡ цр҃и́цѣ бцⷣѣ: ра́дꙋйсѧ, застꙋ́пнице ᲂу҆се́рднаѧ, бл҃говоле́нїемъ твои́мъ ѻ҆те́чество на́ше ѿ лѣ́тъ дре́внихъ покрыва́ющаѧ и҆ бл҃года́ть томꙋ̀ и҆сточа́ющаѧ. Тѣ́мже тобо́ю хва́лѧщесѧ глаго́лемъ: твои́ бо є҆смы̀ рабѝ, да не постыди́мсѧ."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Пролїѧ́ша кро́вь и҆́хъ, ꙗ҆́кѡ во́дꙋ."
 },
 {
  "type": "TEXT",
  "value": "Сті́хъ: Вмѣни́хомсѧ ꙗ҆́кѡ ѻ҆́вцы заколе́нїѧ."
 },
 {
  "type": "TEXT",
  "value": "Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло л҃ѕ."
 },
 {
  "type": "TEXT",
  "value": "Сла́ва: Мл҃твами ца́рственныхъ стрⷭ҇тоте́рпєцъ, млⷭ҇тиве, ѡ҆чи́сти:"
 },
 {
  "type": "TEXT",
  "value": "И҆ ны́нѣ: Мл҃твами бцⷣы:"
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "Стрⷭ҇тоте́рпче хрⷭ҇то́въ, царю̀ нїко́лае, по и҆́мени твоемꙋ̀ житїѐ твоѐ. Сегѡ̀ ра́ди вразѝ твоѝ не возмого́ша сокры́ти сла́вꙋ твою̀. Кро́токъ бы́сть и҆ молчали́въ во страда́нїихъ твои́хъ, просѧ̀ не мсти́ти за себѐ. Житїѐ твоѐ ѡ҆клеве́тано бы́сть, кончи́на же твоѧ̀ съ мч҃нки ст҃ы́ми сла́вна. Молѝ ѡ҆ дꙋша́хъ на́шихъ."
 },
 {
  "type": "HEADER",
  "value": "Канѡ́нъ ца́рственныхъ стрⷭ҇тоте́рпєцъ, гла́съ ѕ҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Волно́ю морско́ю скры́вшаго дре́вле гони́телѧ мꙋчи́телѧ под̾ земле́ю скры́ша сп҃се́нныхъ ѻ҆́троцы: но мы, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ."
 },
 {
  "type": "TEXT",
  "value": "Припѣ́въ: Ст҃і́и ца́рственнїи стрⷭ҇тоте́рпцы, моли́те бг҃а ѡ҆ на́съ."
 },
 {
  "type": "TEXT",
  "value": "Вѣнцено́сче нїко́лае, вкꙋ́пѣ съ мч҃нческими ли̑ки, цари́цею, ча́ды и҆ слꙋга́ми, предстоѧ́ще ᲂу҆ прⷭ҇то́ла хрⷭ҇то́ва, просвѣще́нїе на́мъ да́рꙋйте, ѡ҆зарѧ́ющее дꙋ́шъ на́шихъ ѡ҆мраче́нїе и҆ нечꙋ́вствїе, ꙗ҆́кѡ да восхва́лимъ ра́достнѡ ва́шꙋ бл҃же́ннꙋю па́мѧть."
 },
 {
  "type": "TEXT",
  "value": "Ны́нѣ прорече́нїе саро́вскагѡ ста́рца, ꙗ҆́кѡ просла́вльшаго мѧ̀ просла́витъ бг҃ъ, и҆спо́лнисѧ, просла́ви бо цр҃ковь рꙋ́сскаѧ ца́рственнаго стрⷭ҇тоте́рпца. Тѣ́мже вкꙋ́пѣ съ прпⷣбнымъ мо́литсѧ, во є҆́же стѧжа́ти на́мъ бл҃года́ть ст҃а́гѡ дх҃а."
 },
 {
  "type": "TEXT",
  "value": "Се́рдце царе́во въ рꙋцѣ̀ бж҃їей, глаго́летъ гдⷭ҇ь. Ты́ же, и҆́стинный пома́занниче и҆ слꙋго̀ гдⷭ҇ень, бл҃гоговѣ́йнѣ ре́клъ є҆сѝ: не то́кмѡ жи́знь моѧ̀, но и҆ пꙋтїѐ страны̀"
 },
 {
  "type": "TEXT",
  "value": "рѡссі́йскїѧ въ рꙋцѣ̀ гдⷭ҇ней сꙋ́ть."
 },
 {
  "type": "TEXT",
  "value": "Бг҃оро́диченъ: Ты̀ є҆сѝ крѣ́пость на́ша, ты̀ є҆сѝ похвала̀ и҆ ра́дованїе, предста́тельница непобѣди́маѧ и҆ покро́въ держа́вный страны̀ рѡссі́йскїѧ, прест҃а́ѧ бцⷣе, съ ца́рственными стрⷭ҇тотє́рпцы и҆ новомч҃нки молѝ сп҃стѝ рабы̑ твоѧ̑."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Тебѐ, на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ᲂу҆́жасомъ мно́гимъ содрога́шесѧ, нѣ́сть ст҃ъ, ра́звѣ тебє̀, гдⷭ҇и, взыва́ющи."
 },
 {
  "type": "TEXT",
  "value": "Порꙋга́нїе и҆ разоре́нїе землѝ своеѧ̀ ѿ безбо́жныхъ ви́дѧ, бл҃гочести́вый царю̀, пла́касѧ и҆з̾ глꙋбины̀ серде́чныѧ, ꙗ҆́кѡ прⷪ҇ро́къ і҆еремі́а, го́рцѣ стенѧ̀ и҆ молѧ́сѧ за лю́ди согрѣши́вшыѧ: мл ⷭ҇тиве гдⷭ҇и, не ѡ҆ста́ви и҆́хъ, ѡ҆ста́вльшихъ мѧ̀."
 },
 {
  "type": "TEXT",
  "value": "На землѝ а҆лка́лъ и҆ жа́ждалъ є҆сѝ пра́вды бж҃їѧ, за ню́же дꙋ́шꙋ кро́тцѣ положи́лъ є҆сѝ, првⷣне нїко́лае, ѻ҆ба́че въ го́рнемъ црⷭ҇твїи насы́тилсѧ є҆сѝ, и҆дѣ́же пребыва́еши во вѣ́ки."
 },
 {
  "type": "TEXT",
  "value": "Врачева̑нїѧ и҆ чꙋдеса̀ то́чите, ст҃і́и стрⷭ҇тоте́рпцы, лю́демъ, вѣ́рою къ ва́мъ притека́ющымъ, тѣ́мже печа́ль на́шꙋ на ра́дость преложи́те мл҃твами ва́шими."
 },
 {
  "type": "TEXT",
  "value": "Бг҃оро́диченъ: Прибѣ́жище, вы́шшїй покро́въ тѧ̀ и҆́мамы, бл҃гослове́ннаѧ мт҃и бж҃їѧ, твое́ю по́мощїю сохранѝ и҆ застꙋпѝ на́съ, всепѣ́таѧ."
 },
 {
  "type": "HEADER",
  "value": "Сѣда́ленъ, гла́съ д҃:"
 },
 {
  "type": "TEXT",
  "value": "Є҆гда̀ мно́зи ѿ срѡ́дникъ на́шихъ ѿстꙋпи́ша ѿ бг҃а, ѿврати́шасѧ бж҃їихъ за́повѣдей и҆ воста́ша на гдⷭ҇а и҆ пома́занника є҆гѡ̀, тогда̀ гнѣ́въ бж҃їй на зе́млю рꙋ́сскꙋю прїи́де, и҆зсѧ́че любы̀ мно́гихъ, пролїѧ́сѧ кро́вь бра́тїй на́шихъ, расточи́шасѧ лю́дїе рѡссі́йстїи по всемꙋ̀ лицꙋ̀ землѝ, хра́ми на́ши порꙋга́нїю преда́шасѧ, гла̑ди, нашє́ствїѧ и҆ноплемє́нникъ постиго́ша ны̀, и҆ бы́хомъ въ посмѣѧ́нїе ꙗ҆зы́кѡвъ. Мы́ же разꙋмѣ́юще сїѐ, съ сокрꙋше́нїемъ се́рдца въ покаѧ́нїи зове́мъ: простѝ и҆ поми́лꙋй на́съ, гдⷭ҇и, по вели́цѣй млⷭ҇ти твое́й, ѡ҆чи́сти беззакѡ́нїѧ на̑ша и҆ пода́ждь стра́ждꙋщей странѣ̀ рѡссі́йстѣй, предста́тельствомъ ца́рственныхъ стрⷭ҇тоте́рпєцъ, проще́нїе грѣхѡ́въ, ми́ръ и҆ ве́лїю млⷭ҇ть."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Оу҆молѝ, млⷭ҇рдаѧ мт҃и свѣ́та, сн҃а твоего̀ и҆ бг҃а на́шего, ѡ҆ є҆́же возста́вити держа́вꙋ на́шꙋ правосла́внꙋю, сохрани́ти ю҆̀ въ ми́рѣ и҆ бл҃годе́нствїи, и҆зба́вити ны̀ ѿ междоꙋсо́бныѧ бра́ни, ᲂу҆крѣпи́ти ст҃ꙋ́ю цр҃ковь и҆ ѡ҆гради́ти ю҆̀ ѿ невѣ́рїѧ, раско́ла и҆ є҆ресе́й."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: На крⷭ҇тѣ̀ твоѐ бжⷭ҇твенное и҆стоща́нїе, прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ."
 },
 {
  "type": "TEXT",
  "value": "Нището́ю дꙋхо́вною ѡ҆богати́лсѧ є҆сѝ, ст҃е нїко́лае, и҆ сотвори́ тѧ гдⷭ҇ь досто́йна не то́кмѡ земна́гѡ, но и҆ нбⷭ҇нагѡ црⷭ҇твїѧ."
 },
 {
  "type": "TEXT",
  "value": "Ско́рбїю ѡ҆бдержи́мь бы́сть, вѣнцено́сче нїко́лае, зрѧ̀ ѡ҆слѣпле́нїе наро́да твоегѡ̀, ѿре́кшагѡсѧ ѿ цр҃ѧ̀ нбⷭ҇нагѡ, та́кожде и҆ земна́гѡ."
 },
 {
  "type": "TEXT",
  "value": "Мꙋ́жественнѣ возложи́въ ᲂу҆пова́нїе на бг҃а въ многострада́льнѣмъ земнѣ́мъ слꙋже́нїи твое́мъ, ꙗ҆́коже і҆́ѡвъ и҆ногда̀, стори́цею воздаѧ́нїе прїѧ́лъ є҆сѝ на нб҃сѣ́хъ, и҆дѣ́же ны́нѣ наслажда́ешисѧ, ца́рственный мч҃нче."
 },
 {
  "type": "TEXT",
  "value": "Бг҃оро́диченъ: Млⷭ҇рдїѧ двє́ри, бл҃гослове́ннаѧ бцⷣе, ѿве́рзи на́мъ, да и҆зба́вимсѧ ѿ бѣ́дъ и҆ ѡ҆ѕлобле́нїѧ на́шегѡ, во є҆́же пѣ́ти тебѣ̀ непреста́ннѡ: ты̀ є҆сѝ сп҃се́нїе ро́да хрⷭ҇тїа́нскагѡ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Бг҃оѧвле́нїѧ твоегѡ̀, хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскрⷭ҇нꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ."
 },
 {
  "type": "TEXT",
  "value": "Миротво́рецъ ꙗ҆ви́лсѧ є҆сѝ, царю̀ нїко́лае ст҃ы́й, несѧ̀ ми́ръ мі́рꙋ, сп҃са́ѧ и҆ защища́ѧ ты́сѧщы во ѻ҆те́чествѣ твое́мъ и҆ въ и҆ны́хъ страна́хъ, сегѡ̀ ра́ди сы́нъ бж҃їй, по сло́вꙋ гдⷭ҇ню, наре́клсѧ є҆сѝ."
 },
 {
  "type": "TEXT",
  "value": "И҆згна́нїе, поноше́нїе, гоне́нїе и҆ всѧ́къ глаго́лъ ло́жный, на вы̀ рече́нный, претерпѣ́сте, ст҃і́и ца́рственнїи мч҃нцы. Ра́дꙋйтесѧ ᲂу҆̀бо и҆ весели́тесѧ, ꙗ҆́кѡ мздꙋ̀ ва́шꙋ на нб҃сѝ прїѧ́сте."
 },
 {
  "type": "TEXT",
  "value": "Слꙋжи́телїе беззако́нїѧ та́йнагѡ, вѣне́цъ терно́вный спле́тше, возложи́ша на тѧ̀, ца́рственнаѧ главо̀, ѻ҆ба́че де́рзѡстнаѧ дѣла̀ и҆́хъ погибо́ша ꙗ҆́вѣ."
 },
 {
  "type": "TEXT",
  "value": "Бг҃оро́диченъ: Въ ти́нꙋ грѣхѡ́въ впа́ли є҆смы̀, и҆ лю́тѣ потопи́ ны бꙋ́рѧ прегрѣше́нїй. Но ꙗ҆́кѡ ро́ждшаѧ сп҃са, влⷣчце, при́зри на ны̀, рабы̑ твоѧ̑, и҆ и҆зба́ви ѿ страсте́й дꙋшетлѣ́нныхъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѻ҆́бразъ носѧ̀, страда́вшагѡ и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де. Приглаша́ше же кꙋстѡді́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ."
 },
 {
  "type": "TEXT",
  "value": "Всѣ̑мъ правосла̑внымъ застꙋ́пникъ бы́лъ є҆сѝ, бг҃оизбра́нный нїко́лае, наро́дѡмъ словє́нскимъ защи́тꙋ бл҃гꙋ́ю ꙗ҆влѧ́ѧй, и҆ ꙗ҆́кѡ бра́тъ бра́тꙋ помога́ѧй."
 },
 {
  "type": "TEXT",
  "value": "Ѽ сы́не вѣ́рный ст҃ы́ѧ цр҃кве! Ты̀ ревни́тель прославле́нїѧ ст҃ы́хъ ꙗ҆ви́лсѧ є҆сѝ, хра́мѡвъ созида́тель, ст҃ы́хъ ѻ҆би́телей бл҃гоꙋкраси́тель, ст҃ы́ѧ землѝ и҆ горы̀ а҆ѳѡ́нскїѧ бл҃готвори́тель, просвѣще́нїѧ правосла́внагѡ попечи́тель, и҆ мона́шества покрови́тель."
 },
 {
  "type": "TEXT",
  "value": "Въ житїѝ ва́шемъ и҆ въ дѣ́лѣхъ любвѐ ѻ҆́бразъ хрⷭ҇тїа́нѡмъ бы́сте, бг҃овѣнча́ннїи ца́рїе нїко́лае и҆ а҆леѯа́ндро, полага́сте бо во главꙋ̀ ᲂу҆́гла ка́мень, хрⷭ҇та̀ бг҃а на́шего."
 },
 {
  "type": "TEXT",
  "value": "Бг҃оро́диченъ: Къ тебѣ̀ прибѣга́емъ, цр҃и́цѣ держа́внѣй, вѣ́рныхъ покро́ве, на тѧ̀ наде́ждꙋ возлага́емъ сп҃се́нїѧ на́шегѡ, прест҃а́ѧ влⷣчце бцⷣе, не пре́зри на́съ."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "И҆збра́ннїи цр҃е́мъ ца́рствꙋющихъ и҆ гдⷭ҇емъ госпо́дствꙋющихъ ѿ ро́да царе́й рѡссі́йскихъ, бл҃говѣ́рнїи мч҃нцы, мꙋ̑ки дꙋшє́вныѧ и҆ сме́рть тѣле́снꙋю за хрⷭ҇та̀ прїи́мшїи и҆ вѣнцы̑ нбⷭ҇ными ᲂу҆вѣнча́вшїисѧ, къ ва́мъ, ꙗ҆́кѡ покрови́телємъ на́шымъ мл ⷭ҇тивымъ, съ любо́вїю бл҃года́рнѣ вопїе́мъ: ра́дꙋйтесѧ, ца́рственнїи стрⷭ҇тоте́рпцы, за рꙋ́сь ст҃ꙋ́ю пред̾ бг҃омъ ᲂу҆се́рднїи мл҃твєнницы."
 },
 {
  "type": "TEXT",
  "value": "І҆́косъ: Сла́вою и҆ бога́тствомъ бл҃гоче́стїѧ сїѧ́ющїи, багрѧни́цею многоцѣ́нною и҆ вѣнце́мъ ᲂу҆краше́ннїи, мл ⷭ҇тїю и҆ пра́вдою въ житїѝ просїѧ́вшїи, вѣ́рꙋ, наде́ждꙋ и҆ любо́вь къ бг҃ꙋ до конца̀ ꙗ҆ви́ли є҆стѐ. Къ ва́мъ, ꙗ҆́кѡ покрови́телємъ на́шымъ мл ⷭ҇тивымъ, съ любо́вїю бл҃года́рнѣ вопїе́мъ: ра́дꙋйтесѧ, ца́рственнїи стрⷭ҇тоте́рпцы, за рꙋ́сь ст҃ꙋ́ю пред̾ бг҃омъ ᲂу҆се́рднїи мл҃твєнницы."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Неизрече́нное чꙋ́до! Въ пещѝ и҆зба́вивый прпⷣбныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.Ꙗ҆́кѡ при́сныхъ ва́шихъ, недꙋ́жныхъ во́инѡвъ чадолю́бнѣ посѣща́сте, ца́рственнїи мч҃нцы, и҆ съ любо́вїю и҆̀хъ ᲂу҆тѣша́сте, мѣста̀ же и҆́хъ ᲂу҆покое́нїѧ слеза́ми ва́шими ѡ҆роша́сте."
 },
 {
  "type": "TEXT",
  "value": "Вы̀ є҆стѐ ѻ҆́бразъ сꙋпрꙋ́жества добродѣ́тельнагѡ и҆ дѣте́й воспита́нїѧ бл҃гочести́вагѡ, ст҃і́и ца́рїе нїко́лае и҆ а҆леѯа́ндро. До́мъ ва́шъ ꙗ҆́кѡ цвѣтни́къ дꙋхо́вный содѣ́лавше, на нб҃сѣ́хъ ны́нѣ вкꙋ́пѣ со ча́ды ликꙋ́ете."
 },
 {
  "type": "TEXT",
  "value": "На высотѣ̀ сла́вы человѣ́ческїѧ пребыва́ѧ, ѡ҆ нбⷭ҇ныхъ при́снѡ помышлѧ́лъ є҆сѝ, царю̀ нїко́лае, а҆́може ᲂу҆стреми́сѧ дꙋша̀ твоѧ̀ ст҃а́ѧ."
 },
 {
  "type": "TEXT",
  "value": "Бг҃оро́диченъ: Всест҃а́ѧ влⷣчце, ѡ҆живѝ ᲂу҆́мъ на́шъ, ᲂу҆мерщвле́нный страстьмѝ мно́гими, и҆ ᲂу҆крѣпи́ ны бг҃оꙋгѡ́днаѧ твори́ти, да велича́емъ тѧ̀, ꙗ҆́кѡ застꙋ́пницꙋ ро́да хрⷭ҇тїа́нскагѡ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Оу҆жасни́сѧ боѧ́йсѧ, нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Є҆гда̀ ᲂу҆гѡ́дницы бж҃їи предреко́ша ва́мъ пꙋ́ть мч҃нческїй, ꙗ҆́коже па́ѵлꙋ прⷪ҇ро́къ а҆га́въ, вы, ца́рственнїи стрⷭ҇тоте́рпцы, не ᲂу҆клони́стесѧ ни ѡ҆деснꙋ́ю, ни ѡ҆шꙋ́юю, но мꙋ́жественнѣ проидо́сте є҆го̀, взира́юще на соверши́телѧ вѣ́ры і҆и҃са хрⷭ҇та̀."
 },
 {
  "type": "TEXT",
  "value": "Во страда́нїихъ ва́шихъ, стрⷭ҇тоте́рпцы ст҃і́и, не ѿверго́стесѧ пꙋтѝ, и҆́стины и҆ живота̀, хрⷭ҇та̀ бг҃а на́шегѡ, не ᲂу҆страши́стесѧ бг҃обо́рцєвъ, но въ терпѣ́нїи ше́ствовасте црⷭ҇кимъ пꙋте́мъ въ жи́знь вѣ́чнꙋю."
 },
 {
  "type": "TEXT",
  "value": "Оу҆вы̀ на́мъ, ѻ҆те́чєскїѧ завѣ́ты попра́вшымъ, ѿ ѻ҆бѣ́та вѣ́рности ца́рскомꙋ ро́дꙋ, цр҃ковїю ст҃о́ю бл҃гослове́нномꙋ, ѿстꙋ́пльшымъ и҆ та́кѡ ѿ пꙋтѝ бж҃їѧ ѿлꙋчи́вшымсѧ. Простѝ на́съ, гдⷭ҇и, за всѧ̑ сїѧ̑"
 },
 {
  "type": "TEXT",
  "value": "содѣ̑ѧннаѧ, и҆ поми́лꙋй мл҃твами ст҃ы́хъ стрⷭ҇тоте́рпєцъ."
 },
 {
  "type": "TEXT",
  "value": "Бг҃оро́диченъ: Застꙋ́пницꙋ на́шꙋ тѧ̀ вѣ́мы, бцⷣе, непреста́ннѡ бо ѡ҆ на́съ мо́лишисѧ, во є҆́же пока́ѧтисѧ и҆ и҆спра́витисѧ на́мъ, ᲂу҆пова́нїе и҆ прибѣ́жище дꙋ́шъ на́шихъ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Не рыда́й менѐ, мт҃и, зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо, и҆ просла́влюсѧ, и҆ вознесꙋ̀ со сла́вою непреста́ннѡ, ꙗ҆́кѡ бг҃ъ, вѣ́рою и҆ юбо́вїю тѧ̀ велича́ющыѧ."
 },
 {
  "type": "TEXT",
  "value": "Да воскрⷭ҇нетъ рꙋ́сь ст҃а́ѧ мл҃твами ца́рственныхъ стрⷭ҇тоте́рпєцъ и҆ новомч҃нкъ твои́хъ, гдⷭ҇и, и҆ да расточа́тсѧ всѝ вразѝ є҆ѧ̀ вско́рѣ, и҆ ѿ лица̀ є҆ѧ̀ да бѣжа́тъ всѝ ненави́дѧщїи ю҆̀ ѿ ны́нѣ и҆ до вѣ́ка."
 },
 {
  "type": "TEXT",
  "value": "Всѐ ᲂу҆пова́нїе на гдⷭ҇а возложѝ держа́вный ца́рь на́шъ. Та́кожде и҆ мы̀ со ᲂу҆пова́нїемъ гдⷭ҇ꙋ помо́лимсѧ, да ᲂу҆крѣпи́тъ ѻ҆́нъ мл҃твами бцⷣы и҆ ца́рственнагѡ стрⷭ҇тоте́рпца странꙋ̀ на́шꙋ въ правосла́вїи, и҆ сп҃се́тъ дꙋ́шы на́шѧ."
 },
 {
  "type": "TEXT",
  "value": "Ꙗ҆́кѡ досто́йное пѣ́нїе прїими́те, ст҃і́и стрⷭ҇тоте́рпцы, ма́лое моле́нїе сїѐ, и҆ ꙗ҆́коже хрⷭ҇то́съ прїѧ́тъ вдови́цы двѣ̀ лє́птѣ, не возгнꙋша́йтесѧ на́съ, ѻ҆каѧ́нныхъ, страстьмѝ ѡ҆бꙋрева́емыхъ, ᲂу҆бо́гихъ чти́телей и҆ слꙋжи́телей ва́шихъ."
 },
 {
  "type": "TEXT",
  "value": "Бг҃оро́диченъ: Держа́внымъ твои́мъ покро́вомъ, чⷭ҇таѧ, рабы̑ твоѧ̑ сохранѝ всѧ̑ невреди̑мы: тѧ́ бо є҆ди́нꙋ и҆́мамы прибѣ́жище въ нꙋ́ждахъ, ᲂу҆тѣше́нїе въ ско́рбехъ и҆ побѣ́дꙋ во бране́хъ на́шихъ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Невече́рнемꙋ свѣ́тꙋ предстоѧ́ще, стрⷭ҇тоте́рпцы ст҃і́и ца́рственнїи, съ мч҃нческими ли̑ки, во и҆спыта́нїихъ не ѡ҆ставлѧ́йте ны̀ мл҃твами ва́шими."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ро́ждшаѧ свѣ́тъ незаходи́мый, просвѣща́ющїй сѣдѧ́щихъ во тьмѣ̀ невѣ́дѣнїѧ и҆ пре́лести, ѡ҆зарѝ и҆ на́съ, грѣ́шныхъ, свѣ́томъ сн҃а твоегѡ̀."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ:"
 },
 {
  "type": "TEXT",
  "value": "Ѽ пресла́внагѡ чꙋдесѐ! Ст҃і́и ца́рственнїи стрⷭ҇тоте́рпцы седмочи́сленнїи въ годи́нꙋ страда́нїй за хрⷭ҇та̀ сохрани́ша любо́вь и҆ вѣ́рность є҆мꙋ̀, дрꙋ́гъ дрꙋ́га тѧготы̑ носѧ́ще и҆ та́кѡ и҆сполнѧ́юще зако́нъ є҆гѡ̀, сегѡ̀ ра́ди ны́нѣ на нб҃сѝ црⷭ҇твꙋютъ и҆ дерзнове́ннѡ мо́лѧтсѧ ѡ҆ сп҃се́нїи дꙋ́шъ на́шихъ."
 },
 {
  "type": "TEXT",
  "value": "Ѽ бг҃овѣнча́нный царю̀ нїко́лае, сла́вный слꙋго̀ ст҃ы́ѧ цр҃кве, храни́телю є҆ѧ̀ и҆ защи́тителю, и҆збра́нный бг҃омъ є҆ѧ̀ покрови́телю, вели́кагѡ і҆ꙋстинїа́на подо́бниче, вонмѝ гла́сꙋ моле́нїѧ на́шегѡ, простѝ, защитѝ и҆ ᲂу҆крѣпѝ заблꙋ́ждшихъ ча̑дъ твои́хъ, да вѣ́рою и҆ любо́вїю просла́вимъ просла́вльшаго тѧ̀."
 },
 {
  "type": "TEXT",
  "value": "Ѽ пресла́внагѡ чꙋдесѐ! Ст҃а́ѧ мч҃нца а҆леѯа́ндра, въ го́рцѣмъ заточе́нїи ѿ бг҃обо́рцєвъ бы́вши и҆ ча́ющи сме́рти за хрⷭ҇та̀, вкꙋ́пѣ съ четвери́цею дѣ́въ мꙋ́дрыхъ, дще́рей свои́хъ, сѐ, жени́хъ грѧде́тъ, глаго́ла. Оу҆гото́вимъ свѣти́льники своѧ̑, да вни́демъ въ черто́гъ є҆гѡ̀ и҆ ѡ҆блеце́мсѧ всѝ ѻ҆де́ждею сла́вы є҆гѡ̀."
 },
 {
  "type": "TEXT",
  "value": "Ѽ бл҃говѣ́рный царе́вичꙋ а҆леѯі́е, во смире́нїи се́рдца ты̀ глаго́лалъ є҆сѝ: внегда̀ мнѣ̀ ца́рствовати, да не ѡ҆брѧ́щꙋтсѧ ни́щїи и҆ ᲂу҆бо́зїи. Є҆гда́ же крⷭ҇тнымъ пꙋте́мъ житїѧ̀ твоегѡ̀ и҆ мч҃нческою твое́ю кончи́ною въ црⷭ҇тво нбⷭ҇ное возше́лъ є҆сѝ, и҆дѣ́же и҆мѣ́ѧ дерзнове́нїе ве́лїе, мо́лишисѧ ѡ҆ всѣ́хъ тре́бꙋющихъ твоеѧ̀ по́мощи."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Ѽ ст҃а́ѧ седмери́це ца́рственныхъ стрⷭ҇тоте́рпєцъ, хрⷭ҇то́ва похвало̀ и҆ сла́во! Соизволе́нїемъ ѻ҆ц҃а̀ безнача́льнагѡ, соверше́нїемъ сн҃а є҆диноро́днагѡ и҆ содѣ́йствїемъ ст҃а́гѡ дх҃а, мч҃нцы за вѣ́рꙋ показа́стесѧ и҆ црⷭ҇твїѧ бж҃їѧ прича̑стницы содѣ́ластесѧ. Моли́те трїеди́наго бг҃а, да прїи́метъ покаѧ́нїе на́ше, и҆ сохрани́тъ странꙋ̀ на́шꙋ рѡссі́йскꙋю въ правосла́вїи и҆ є҆диномы́слїи неколе́блемꙋ и҆ сп҃се́тъ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, гла́съ то́йже."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ:"
 },
 {
  "type": "TEXT",
  "value": "Ѽ пресла́внагѡ чꙋдесѐ! Нб҃сѐ и҆ землѝ цр҃и́ца, ѿ ст҃ы́хъ сро́дникѡвъ на́шихъ ᲂу҆молѧ́емаѧ, до ны́нѣ зе́млю рꙋ́сскꙋю покрыва́етъ и҆ ли́ка своегѡ̀ и҆з̾ѡбражє́нїи мл ⷭ҇тивнѡ ѡ҆богаща́етъ. Ѽ влⷣчце держа́внаѧ! Не преста́ни и҆ на бꙋ́дꙋщее вре́мѧ, во ᲂу҆твержде́нїе на рꙋси правосла́вїѧ, мл ⷭ҇ти и҆ чꙋдеса̀ и҆злива́ти до вѣ́ка. А҆ми́нь."
 },
 {
  "type": "HEADER",
  "value": "На лїтꙋргі́и, бл҃жє́нна ѿ канѡ́на на и҃, пѣ́снь г҃-ѧ и҆ ѕ҃-ѧ."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Гдⷭ҇и, си́лою твое́ю возвесели́тсѧ ца́рь, и҆ ѡ҆ сп҃се́нїи твое́мъ возра́дꙋетсѧ ѕѣлѡ̀."
 },
 {
  "type": "TEXT",
  "value": "Сті́хъ: Жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ᲂу҆стнꙋ̀ є҆гѡ̀ нѣ́си лиши́лъ є҆го̀."
 },
 {
  "type": "HEADER",
  "value": "А҆пⷭ҇лъ къ ри́млѧнѡмъ, зача́ло ч҃ѳ."
 },
 {
  "type": "HEADER",
  "value": "А҆ллилꙋ́їа, гла́съ а҃:"
 },
 {
  "type": "TEXT",
  "value": "Ꙗ҆́кѡ ца́рь ᲂу҆пова́етъ на гдⷭ҇а, и҆ мл ⷭ҇тїю вы́шнѧгѡ не подви́житсѧ."
 },
 {
  "type": "TEXT",
  "value": "Сті́хъ: Вознеси́сѧ, гдⷭ҇и, си́лою твое́ю, воспое́мъ и҆ пое́мъ си̑лы"
 },
 {
  "type": "TEXT",
  "value": "твоѧ̑."
 },
 {
  "type": "HEADER",
  "value": "Є҆ѵⷢ҇лїе і҆ѡа́нна, зача́ло н҃в."
 },
 {
  "type": "TEXT",
  "value": "Прича́стенъ: Гдⷭ҇и, сп҃сѝ царѧ̀ и҆ ᲂу҆слы́ши ны̀, во́ньже а҆́ще де́нь призове́мъ тѧ̀."
 },
 {
  "type": "HEADER",
  "value": "Мл҃тва."
 },
 {
  "type": "TEXT",
  "value": "Ѽ ст҃ы́й стрⷭ҇тоте́рпче, царю̀ мч҃нче нїко́лае! Гдⷭ҇ь тѧ̀ и҆збра̀ пома́занника своего̀, во є҆́же мл ⷭ҇тивнѡ и҆ пра́вѡ сꙋди́ти лю́демъ твои̑мъ, и҆ храни́телемъ цр҃кве правосла́вныѧ бы́ти. Сегѡ̀ ра́ди со стра́хомъ бж҃їимъ ца́рское слꙋже́нїе и҆ ѡ҆ дꙋша́хъ попече́нїе соверша́лъ є҆сѝ. Гдⷭ҇ь же и҆спытꙋ́ѧ тѧ̀, ꙗ҆́кѡ і҆́ѡва многострада́льнаго, попꙋстѝ тебѣ̀ поношє́нїѧ, скѡ́рби гѡ́рькїѧ, и҆змѣ́нꙋ, преда́тельство, бли́жнихъ ѿчꙋжде́нїе и҆ въ дꙋше́вныхъ мꙋ́кахъ земна́гѡ ца́рства ѡ҆ставле́нїе. Всѧ̑ сїѧ̑ ра́ди бл҃га рѡссі́и ꙗ҆́кѡ вѣ́рный сы́нъ є҆ѧ̀ претерпѣ́въ, и҆ ꙗ҆́кѡ и҆́стинный ра́бъ хрⷭ҇то́въ мч҃нческꙋю кончи́нꙋ прїе́мъ, нбⷭ҇нагѡ црⷭ҇тва дости́глъ є҆сѝ, и҆дѣ́же наслажда́ешисѧ вы́шнїѧ сла́вы ᲂу҆ прⷭ҇то́ла всѣ́хъ цр҃ѧ̀, кꙋ́пнѡ со ст҃о́ю сꙋпрꙋ́жницею твое́ю, цари́цею а҆леѯа́ндрою, и҆ ца́рственными ча́ды а҆леѯі́емъ, ѻ҆́льгою, татїа́ною, марі́ею и҆ а҆настасі́ею. Ны́нѣ, и҆мѣ́ѧ дерзнове́нїе ве́лїе ᲂу҆ хрⷭ҇та̀ цр҃ѧ̀, молѝ, да пода́стъ на́мъ гдⷭ҇ь грѣхѡ́въ проще́нїе и҆ на всѧ́кꙋю добродѣ́тель наста́витъ на́съ, да стѧжи́мъ смире́нїе, кро́тость и҆ любо́вь, и҆ сподо́бимсѧ нбⷭ҇нагѡ црⷭ҇твїѧ, и҆дѣ́же кꙋ́пнѡ съ тобо́ю и҆ всѣ́ми ст҃ы́ми новомч҃нки и҆ и҆сповѣ̑дники рѡссі́йскими просла́вимъ ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь."
 }
]