[
 {
  "type": "HEADER",
  "value": "А҆́ѵгꙋста к҃а"
 },
 {
  "type": "HEADER",
  "value": "Преставле́нїе прпⷣбнагѡ ѻ҆тца̀ на́шегѡ а҆враа́мїа а҆рхїмандрі́та, смоле́нскагѡ чꙋдотво́рца."
 },
 {
  "type": "HEADER",
  "value": "Стїхи̑ры на и҃: пра́здника г҃, и҆ ст҃а́гѡ є҃. Гла́съ є҃."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ꙗ҆ви́сѧ гора̀ ᲂу҆́мнаѧ на́мъ ты̀, прпⷣбне ѻ҆́ч҃е а҆вра́мїе, на ню́же возше́дъ, бг҃оно́се, ꙗ҆́кѡ на нб҃о, сла́вне, ꙗ҆́кѡ но́вый мѡѷсе́й, скрижа̑ли ѿ бг҃а, свѧ́те, хрⷭ҇то́во є҆ѵⷢ҇лїе прїе́мъ, ꙗ҆ви́сѧ ꙗ҆́кѡ трꙋба̀ наро́чита, всѣ̑мъ возвѣща́ющи концє́мъ, ᲂу҆твержда́ѧ и҆ просвѣща́ѧ всѣ́хъ дꙋ́шы къ бг҃оразꙋ́мїю, глаго́лѧ: пока́йтесѧ и҆ ѡ҆брати́тесѧ: ᲂу҆же́ бо прибли́жисѧ де́нь гдⷭ҇ень сꙋ́дный и҆ гро́зный, хрⷭ҇тꙋ̀ бг҃ꙋ безпреста́ни моли́тесѧ, дарова́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Ꙗ҆ви́сѧ, преподо́бне ѻ҆́ч҃е, лѣ́ствица высо́каѧ добродѣ́тели дꙋхо́вныѧ, бл҃года́ти восхо́дъ: по не́йже возше́дъ, свѧ́те, зри́ши бжⷭ҇твеннꙋю добро́тꙋ, и҆ сла́вꙋ бж҃їю, и҆ ст҃ы́хъ а҆́гг҃лъ нбⷭ҇ныхъ ликостоѧ́нїѧ свѣ́тлости, и҆ гла́съ бг҃олѣ́пныхъ пѣ́нїй наслажда́ѧсѧ, бл҃же́нне: съ ни́миже пое́ши веселѧ́сѧ ра́достнѡ, бг҃оно́се а҆вра́мїе, хрⷭ҇тꙋ̀ бг҃ꙋ моли́сѧ, дарова́ти дꙋша́мъ на́шымъ ве́лїю млⷭ҇ть."
 },
 {
  "type": "TEXT",
  "value": "Ꙗ҆ви́лсѧ є҆сѝ, прпⷣбне ѻ҆́ч҃е, вои́стиннꙋ бж҃їе возлюбле́нїе, и҆ ѡ҆сщ҃е́нъ ѿ ᲂу҆тро́бы ма́терни, и҆ ст҃и́тель ѿ бг҃а по́сланный къ на́мъ, наставлѧ́ѧ на пꙋ́ть блгⷣти хрⷭ҇то́ва смире́нїѧ. По немꙋ́же возше́дъ, свѧ́те, водворѧ́ешисѧ въ свѣ́тлости бл҃же́ннагѡ раѧ̀, и҆дѣ́же всѣ́хъ ст҃ы́хъ дꙋ́шы ра́дꙋющесѧ веселѧ́тсѧ. Съ ни́миже на́съ помина́й, бг҃оно́се а҆вра́мїе, хрⷭ҇тꙋ̀ бг҃ꙋ молѧ́сѧ, дарова́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Ра́дꙋйсѧ, по́стническихъ вои́стиннꙋ подвигѡ́въ благово́нный сосꙋ́де, крⷭ҇тъ на ра́мꙋ ᲂу҆́бѡ взе́мъ, и҆ влⷣцѣ хрⷭ҇тꙋ̀ себѐ, пребл҃же́нне, возложи́въ, пло́ти попра́лъ є҆сѝ до́лꙋ влекꙋ́щее мꙋдрова́нїе, добродѣ́тельми же дꙋ́шꙋ просвѣти́лъ є҆сѝ, и҆ къ бжⷭ҇твенномꙋ впери́лсѧ є҆сѝ жела́нїю. Тѣ́мже всест҃ꙋ́ю твою̀ ѡ҆крꙋжи́вше ра́кꙋ, прехва́льне а҆вра́мїе, бжⷭ҇твеннагѡ чл҃вѣколю́бїѧ про́симъ, полꙋчи́ти твои́ми моли́твами, и҆ мі́рꙋ дарова́ти ве́лїю ми́лость."
 },
 {
  "type": "TEXT",
  "value": "Оу҆́гль бг҃осїѧ́ненъ, ѻ҆гню̀ прибли́живсѧ, бг҃оно́се, дх҃а, показа́лсѧ є҆сѝ въ мі́рѣ, а҆вра́мїе, просвѣща́ѧ дꙋ́шы на́шѧ, вѣ́рнѡ, бг҃омꙋ́дре, пристꙋпа́ющихъ къ тебѣ̀ къ свѣ́тꙋ наставлѧ́ѧ тѣ́хъ невече́рнемꙋ, преподо́бне, ѡ҆роша́емꙋ свы́ше бжⷭ҇твенною благода́тїю. Тѣ́мже и҆ побѣ́ды тебѣ̀ проѧвле́ннѡ дарова̀ вѣне́цъ, бл҃же́нне, пра́вды смотри́тель хрⷭ҇то́съ: є҆го́же молѝ, дꙋша́мъ на́шымъ дарова́ти ве́лїю ми́лость."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ а҆вра́мїе: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, пра́здника. Вхо́дъ. Прокі́менъ днѐ. Та́же парємїѝ, сегѡ̀ мѣ́сѧца въ г҃ де́нь."
 },
 {
  "type": "HEADER",
  "value": "На стїхо́внѣ стїхи̑ры, пра́здника. Та́же ст҃а́гѡ самогла́сенъ, гла́съ а҃."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Лѣ́ствица нб҃сѝ подо́бна, ꙗ҆́вѣ житїѐ твоѐ, бг҃омꙋ́дре, бы́сть, є҆́юже на высотꙋ̀ возвы́сивсѧ дне́сь, влⷣцѣ хрⷭ҇тꙋ̀ бесѣ́довати, бл҃же́нне, сподо́билсѧ є҆сѝ. ᲂу҆́мъ просвѣ́щь та́мѡ сꙋ́щими сїѧ́ньми, лꙋча́ми же тогѡ̀ просвѣща́емь, ра́внѡ а҆́гг҃лѡмъ прїѧ́лъ є҆сѝ свѣ́тлость. Є҆мꙋ́же ны́нѣ предстоѧ̀, моли́сѧ, прпⷣбне, творѧ́щымъ бжⷭ҇твеннꙋю и҆ свѧще́ннꙋю па́мѧть твою̀ съ тобо́ю предста́ти, и҆ мі́рꙋ да́ти ве́лїю ми́лость."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Прїиди́те, всеꙋсе́рднѡ всѝ бг҃олюби́вїи лю́дїе, соше́дшесѧ похва́лимъ честно́е прпⷣбнагѡ ѻ҆тца̀ ᲂу҆спе́нїе: се́й бо ѿ ю҆́ности возлю́бленъ, и҆ ѿ ᲂу҆тро́бы ма́терни ѡ҆ст҃и́сѧ бг҃ꙋ, и҆ тогѡ̀ стопа́мъ послѣ́довати и҆зво́лилъ є҆́сть, тѣ́мже мо́лимъ того̀, хрⷭ҇та̀ бг҃а моли́ти непреста́ннѡ ѡ҆ ста́дѣ свое́мъ, и҆ ᲂу҆мири́ти мі́ръ, и҆ спастѝ дꙋ́шы на́шѧ."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Дне́сь возсїѧ̀ на́мъ па́мѧть твоѧ̀, сла́вне, ꙗ҆́кѡ со́лнце, свѣтоза́рнѡ лꙋча́ми ѡ҆зарѧ́ющаѧ мі́ръ, и҆ тмꙋ̀ но́щи ѕлы́хъ дꙋхѡ́въ ѿ на́съ ѿгонѧ́ющаѧ. Дне́сь нбⷭ҇ныѧ си̑лы ст҃ы́хъ а҆́гг҃лъ и҆ дꙋ́шы пра́ведныхъ мы́сленнѡ торжествꙋ́ютъ, ра́дꙋющесѧ. Дне́сь и҆ мы̀ грѣ́шнїи припа́дающе мо́лимсѧ: ѻ҆́ч҃е прпⷣбне а҆вра́мїе, хрⷭ҇та̀ бг҃а молѝ непреста́ннѡ, спастѝ гра́дъ и҆ лю́ди, любе́знѡ тебѐ почита́ющыѧ."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "На ᲂу҆́трени, по а҃-й стїхоло́гїи сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ли́къ а҆́гг҃льскїй:"
 },
 {
  "type": "TEXT",
  "value": "Житїѐ на землѝ благоче́стнѡ сконча́въ, прїѧ́телище чистоты̀ и҆ дх҃а ꙗ҆ви́лсѧ є҆сѝ, просвѣща́ѧ къ тебѣ̀ вѣ́рою притека́ющыѧ, бл҃же́нне. Тѣ́мже молѝ твоего̀ влⷣкꙋ хрⷭ҇та̀ бг҃а, просвѣти́ти дꙋ́шы на́шѧ, воспѣва́ющихъ тѧ̀, а҆вра́мїе бг҃омꙋ́дре ѻ҆́ч҃е на́шъ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Всѣ́хъ творца̀ и҆ гдⷭ҇а и҆ зижди́телѧ, всенепоро́чнаѧ, чⷭ҇таѧ, дх҃омъ бжⷭ҇твеннымъ въ ложесна́хъ заче́нши, безъ и҆стлѣ́нїѧ родила̀ є҆сѝ, є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ всѣ́хъ цр҃ѧ̀ и҆ мі́рови спасе́нїе."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь:"
 },
 {
  "type": "TEXT",
  "value": "Возсїѧ́въ ꙗ҆́кѡ со́лнце, зари̑ ѡ҆блиста́еши, прпⷣбне, всемꙋ̀ мі́рꙋ и҆здале́ча ᲂу҆че́нїй твои́хъ, чꙋ́дный а҆вра́мїе свѣтоно́сче, прпⷣбныхъ похвало̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Въ кро́въ тво́й, пречⷭ҇таѧ дв҃о, прибѣга́ющихъ на́съ мольбꙋ̀ прїе́мши, не преста́й молѧ́щи чл҃вѣколю́бца, спастѝ рабы̑ твоѧ̑."
 },
 {
  "type": "HEADER",
  "value": "По полѷеле́и сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ѿ ᲂу҆тро́бы ѡ҆свѧти́лсѧ є҆сѝ ꙗ҆́кѡ вои́стиннꙋ, свѧще́нне а҆вра́мїе, и҆ на землѝ ꙗ҆́кѡ а҆́гг҃лъ пожи́лъ є҆сѝ: пло́ть бо ᲂу҆мертви́въ воздержа́нїемъ, трⷪ҇цы ᲂу҆го́дникъ показа́лсѧ є҆сѝ, бл҃же́нне. Тѣ́мже и҆ къ ре́вности бжⷭ҇твеннагѡ твоегѡ̀ житїѧ̀, ли́ки совокꙋпи́лъ є҆сѝ мона́шествꙋющихъ, сла́вне, бг҃оно́се ѻ҆́ч҃е на́шъ, молѝ хрⷭ҇та̀ бг҃а, согрѣше́нїй ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. Сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀."
 },
 {
  "type": "HEADER",
  "value": "Степє́нна, а҃ а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло м҃г."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ."
 },
 {
  "type": "HEADER",
  "value": "Канѡ́нъ пра́здника со і҆рмосо́мъ на ѕ҃: и҆ прпⷣбнагѡ на и҃. Гла́съ ѕ҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
 },
 {
  "type": "TEXT",
  "value": "Ꙗ҆́кѡ возсїѧ́въ всѣ̑мъ концє́мъ, хрⷭ҇тѐ, пра́ведное сл҃нце, пречⷭ҇тыѧ твоеѧ̀ мт҃ре мольба́ми, покаѧ́нїе и҆ ᲂу҆миле́нїе и҆ сле́зы да́ждь мѝ, бж҃е, и҆ моле́нїемъ прпⷣбнагѡ спаси́ мѧ."
 },
 {
  "type": "TEXT",
  "value": "А҆́гг҃льскїѧ безплѡ́тныѧ чи́ны приво́димъ тѝ, хрⷭ҇тѐ, на моле́нїе, си́хъ мольба́ми и҆зба́ви и҆ сохранѝ ста́до твоѐ, бл҃же, ѿ всѣ́хъ бѣ́дъ: и҆ моли́твами прпⷣбнагѡ спаси́ мѧ."
 },
 {
  "type": "TEXT",
  "value": "Съ ли́ки прⷪ҇рѡ́къ и҆ а҆пⷭ҇лъ, и҆ мꙋ́чєникъ, и҆ ст҃и́телей и҆ прпⷣбныхъ, и҆ со всѣ́ми ст҃ы́ми молѝ, свѧ́те ѻ҆́ч҃е, молѧ́щымсѧ тебѣ̀ прилѣ́жнѡ, и҆зба́витисѧ ѿ всѧ́кїѧ бѣды̀, и҆ спасти́ ны."
 },
 {
  "type": "TEXT",
  "value": "Бг҃оро́диченъ: Всѝ мо́лимъ тѧ̀ прилѣ́жнѡ, гпⷭ҇жѐ дв҃о мт҃и ст҃а́ѧ, и҆збавле́нїе ѿ всѣ́хъ бѣ́дъ пода́ждь на́мъ, молѧ́щисѧ прилѣ́жнѡ сн҃ꙋ и҆ бг҃ꙋ, поми́ловати же и҆ спасти́ ны."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Моле́нїѧ послꙋ́шавъ, гдⷭ҇и, и҆ногда̀ а҆́нны, пода́лъ є҆сѝ прⷪ҇ро́ка, и҆ тебѣ̀ ѿдадѐ слꙋжи́телѧ: та́кѡ и҆ на́ше ᲂу҆слы́ши моле́нїе, моли́твами прпⷣбнагѡ, и҆ спаси́ ны."
 },
 {
  "type": "TEXT",
  "value": "Прїимѝ ѿ дꙋшѝ молѧ́щыѧсѧ тебѣ̀, хрⷭ҇тѐ, и҆ да́ждь на́мъ по́мощь твою̀ свы́ше, ꙗ҆́кѡ и҆ногда̀ ᲂу҆ч҃никѡ́мъ твои̑мъ, хрⷭ҇тѐ, на мо́ри, и҆ ѿ бѣ́дъ и҆зба́ви на́съ моле́нїемъ прпⷣбнагѡ."
 },
 {
  "type": "TEXT",
  "value": "Моли́сѧ прилѣ́жнѡ за ны̀, и҆збавле́нїе пода́ти, ѻ҆́ч҃е а҆вра́мїе, ѿ всѣ́хъ бѣ́дъ, ꙗ҆̀же на ны̀ прихо́дѧтъ, ᲂу҆скорѝ, свѧ́те, на по́мощь на́шꙋ."
 },
 {
  "type": "TEXT",
  "value": "Бг҃оро́диченъ: Бж҃їѧ рождества̀ твоегѡ̀, чⷭ҇таѧ, всѧ́ка сꙋщества̀ чи́нъ прехо́дитъ чꙋдесы̀: бг҃а бо па́че є҆стества̀ зачала̀ є҆сѝ во чре́вѣ, и҆ ро́ждши пребыва́еши приснодв҃а."
 },
 {
  "type": "HEADER",
  "value": "Конда́къ и҆ і҆́косъ пра́здника, и҆ сѣда́ленъ ст҃а́гѡ, гла́съ д҃."
 },
 {
  "type": "TEXT",
  "value": "Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Оу҆диви́сѧ, прпⷣбне и҆ бг҃оно́се а҆вра́мїе, во все́мъ мі́рѣ житїѐ твоѐ, ꙗ҆́кѡ ѿ ᲂу҆тро́бы ма́терни воззва́нъ бы́лъ є҆сѝ, свѧ́те, ꙗ҆́кѡ самꙋи́лъ сла́вне. Веселѧ́тсѧ цр҃кви хрⷭ҇то́вы, и҆ ра́дꙋютсѧ мона́хѡвъ стада̀ и҆ ве́сь мі́ръ пра́зднꙋетъ, хрⷭ҇тꙋ̀ бг҃ꙋ молѧ́щесѧ прилѣ́жнѡ: гдⷭ҇и, спасѝ гра́дъ и҆ лю́ди, моли́твами влⷣчцы, и҆ прпⷣбнагѡ ра́ди поми́лꙋй на́съ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Хрⷭ҇то́въ слꙋга̀ вои́стиннꙋ ꙗ҆ви́лсѧ є҆сѝ, свѧ́те, ꙗ҆́кѡ ѿ ᲂу҆тро́бы ма́терни ѡ҆свѧти́всѧ бг҃ꙋ, ꙗ҆́кѡ же́ртва прине́слсѧ є҆сѝ честна̀ гдⷭ҇еви, ѿ со́вѣсти чи́сты молѧ́сѧ є҆мꙋ̀."
 },
 {
  "type": "TEXT",
  "value": "Вои́стиннꙋ хрⷭ҇то́въ слꙋга̀ бы́лъ є҆сѝ, ѻ҆́ч҃е а҆вра́мїе, ꙗ҆́кѡ прⷪ҇рѡ́къ и҆ а҆пⷭ҇тѡлъ, ст҃и́телей и҆ прпⷣбныхъ всѣ́хъ подража́тель бы́въ, напоѧ́ѧ бл҃года́ти ᲂу҆миле́нїѧ сердца̀ на̑ша."
 },
 {
  "type": "TEXT",
  "value": "Вои́стиннꙋ хрⷭ҇то́съ бг҃ъ на́шъ показа́ тѧ въ напа́стехъ ти́хое приста́нище, свѧ́те, и҆ забра́ло, сирота́мъ же всѣ̑мъ ᲂу҆тѣше́нїе."
 },
 {
  "type": "TEXT",
  "value": "Бг҃оро́диченъ: Неизглаго́ланно и҆ непостижи́мо є҆́сть твоегѡ̀, бцⷣе, бг҃олѣ́пнагѡ вои́стиннꙋ ржⷭ҇тва̀ та́инство, нбⷭ҇нымъ и҆ земны̑мъ: и҆́мже всѝ вѣ́рнїи спа́сшесѧ, тѧ̀ хва́лимъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Оу҆́треневалъ є҆сѝ къ бг҃ꙋ ѿ ю҆́ности, блаже́нне ѻ҆́ч҃е а҆вра́мїе, ꙗ҆́кѡ славі́й мꙋ́дре сладкоглаго́ливъ, ꙗ҆́кѡ ла́стовица многогла́сна, свѧ́те, приносѧ̀ моли́твꙋ бг҃ꙋ."
 },
 {
  "type": "TEXT",
  "value": "Оу҆краси́лсѧ є҆сѝ свѧщеннолѣ́пнѡ, бг҃оно́се ѻ҆́ч҃е а҆вра́мїе, і҆ере́йскою лѣ́потою, ꙗ҆́кѡ и҆ а҆арѡ́нъ и҆ самꙋи́лъ, бг҃олѣ́пнѡ по всѧ̑ дни̑ слꙋжѧ̀ бг҃ꙋ, и҆ молѧ́сѧ є҆мꙋ̀."
 },
 {
  "type": "TEXT",
  "value": "Вои́стиннꙋ ѿ ᲂу҆тро́бы позна́нъ бы́лъ є҆сѝ, ѻ҆́ч҃е, ѿ бг҃а вѣ́ренъ слꙋжи́тель: при́званъ же бы́въ, ꙗ҆́кѡ дрꙋгі́й проро́къ, свѧ́те, дх҃омъ бж҃їимъ, ᲂу҆чи́лъ є҆сѝ лю́ди бг҃оразꙋ́мїю."
 },
 {
  "type": "TEXT",
  "value": "Бг҃оро́диченъ: Бцⷣꙋ тѧ̀ ѿ дꙋшѝ, влⷣчце мі́рꙋ бл҃га́ѧ, и҆сповѣ́дающыѧ спаса́й: тѧ́ бо застꙋпле́нїе и҆́мамы вои́стиннꙋ, всечⷭ҇таѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Жите́йскагѡ, бл҃же́нне, ᲂу҆бѣжа́въ ѕла́гѡ волне́нїѧ, въ тишинꙋ̀ доше́дъ бж҃їѧ поко́ѧ и҆ наслажде́нїѧ, моли́сѧ пода́ти и҆ на́мъ ѡ҆ хрⷭ҇тѣ̀ тогѡ̀ наслажде́нїѧ."
 },
 {
  "type": "TEXT",
  "value": "Бꙋ́рно приста́нище потоплѧ́етъ мѧ̀, пода́ждь мѝ рꙋ́кꙋ твою̀, влⷣко гдⷭ҇и, ꙗ҆́кѡ и҆ногда̀ петрꙋ̀ ᲂу҆топа́ющꙋ, и҆ спаси́ мѧ во ѡ҆ти́шїе твоѐ прпⷣбнагѡ а҆вра́мїа моле́нїемъ."
 },
 {
  "type": "TEXT",
  "value": "Помоли́сѧ прилѣ́жнѡ за ны̀, ѻ҆́ч҃е прпⷣбне а҆вра́мїе, къ бг҃ꙋ, и҆зба́витисѧ вско́рѣ ѿ всѣ́хъ бѣ́дъ же и҆ скорбе́й, и҆ пода́ти ми́ръ и҆ спасе́нїе."
 },
 {
  "type": "TEXT",
  "value": "Бг҃оро́диченъ: Пречⷭ҇таѧ влⷣчце, ро́ждши зємны́мъ прави́телѧ и҆ гдⷭ҇а, похоте́й мѝ ѕлолю́тое ᲂу҆кротѝ смꙋще́нїе, и҆ тишинꙋ̀ пода́ждь се́рдцꙋ моемꙋ̀."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Возсїѧ̀, гдⷭ҇и, гра́дꙋ твоемꙋ̀, па́мѧть твоегѡ̀ ᲂу҆го́дника, ꙗ҆́кѡ свѣ́тлое со́лнце, ра́достнѡ всѣ́хъ ꙗ҆́кѡ лꙋча́ми ѡ҆зарѧ́ющи, па́че же моли̑твы пречⷭ҇тыѧ твоеѧ̀ мт҃ре, ѿ всѣ́хъ бѣ́дъ и҆збавлѧ́ютъ на́съ, и҆ ᲂу҆пражднѧ́ютъ ва̑рварскаѧ шата̑нїѧ. Тѣ́мъ мы̀, лю́дїе твоѝ, и҆ гра́дъ на́шъ, вельмѝ хва́лимсѧ, и҆ спаса́емсѧ моли́твами твоегѡ̀ ᲂу҆го́дника а҆вра́мїа, прпⷣбнагѡ ѻ҆тца̀."
 },
 {
  "type": "TEXT",
  "value": "І҆́косъ: Оу҆ѧсни́ ми ѧ҆зы́къ, и҆ ᲂу҆крѣпи́ ми ᲂу҆́мъ, хрⷭ҇тѐ бж҃е, моли́твами пречⷭ҇тыѧ твоеѧ̀ мт҃ре. ѧ҆зы́къ мѝ бла́гъ глаго́лати пода́ждь на похвалꙋ̀, и҆ на ᲂу҆моле́нїе твоегѡ̀ ᲂу҆го́дника. Свѣщꙋ̀ дꙋшѝ моеѧ̀ ᲂу҆ны́лꙋю, ю҆́же воздрема́всѧ ᲂу҆гаси́хъ, моли́твами прпⷣбнагѡ а҆вра́мїа возжзѝ, и҆ не ѿлꙋчѝ менѐ, хрⷭ҇тѐ, многосогрѣ́шша, ли́ка прпⷣбныхъ твои́хъ. Всѐ ᲂу҆́бѡ ᲂу҆пова́нїе къ тебѣ̀ возлага́ю: ты́ бо и҆ гра́дъ сохранѧ́еши моли́твами прпⷣбнагѡ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Халде́йскꙋю ѡ҆роси́въ ѻ҆трокѡ́въ пе́щь, и҆ прело́жъ на хла́дъ, на ны̀ и҆ноплемє́нникъ нападе́нїе, хрⷭ҇тѐ, погꙋбѝ, моле́нїемъ прпⷣбнагѡ а҆вра́мїа, пою́ща: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Прⷪ҇ро́кꙋ данїи́лꙋ, влⷣко хрⷭ҇тѐ, и҆ногда̀ ди́вїѧ ѕвѣ́ри ᲂу҆кроти́лъ є҆сѝ, ѡ҆бꙋзда́въ: та́коже и҆ ны́нѣ всѣ́хъ проти́вныхъ на ны̀ стремлє́нїѧ ᲂу҆кротѝ, и҆ ѡ҆бꙋзда́й моле́нїемъ, бж҃е, прпⷣбнагѡ а҆вра́мїа."
 },
 {
  "type": "TEXT",
  "value": "Є҆гда̀ прїи́деши, бж҃е, сꙋди́ти на зе́млю, хрⷭ҇тѐ цр҃ю̀, со а҆́гг҃льскими си́лами, тогда̀, ми́лостиве, пощади́ ны пою́щыѧ, моли́твами прпⷣбнагѡ а҆вра́мїа: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Тобо́ю на́мъ, дв҃о, свѣ́тъ возсїѧ̀ тє́мнымъ и҆ ѿпꙋще́нїе, ты́ бо родила̀ є҆сѝ зижди́телѧ всѣ́хъ бг҃а: є҆го́же молѝ, пречⷭ҇таѧ приснодв҃о, посла́ти вѣ̑рнымъ ве́лїю ми́лость."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "Ꙗ҆ви́сѧ ꙗ҆́кѡ рѣка̀ ᲂу҆́мнаѧ, ѿ ᲂу҆́стъ бжⷭ҇твеннагѡ раѧ̀ и҆сходѧ́щи, прпⷣбне ѻ҆́ч҃е а҆вра́мїе, и҆ всѣ́хъ вѣ́рныхъ напаѧ́ѧ дꙋ́шы ᲂу҆миле́нїѧ, и҆ ѡ҆мыва́ѧ всѣ́хъ скве́рнꙋ, превозносѧ́щихъ хрⷭ҇та̀ во вѣ́ки."
 },
 {
  "type": "TEXT",
  "value": "Ꙗ҆́кѡ небеса̀ ᲂу҆́мнаѧ, ꙗ҆ви́шасѧ ᲂу҆ста̀ твоѧ̑, свѧ́те, ѧ҆зы́къ же тво́й, ѻ҆́ч҃е, ꙗ҆́кѡ со́тъ ме́двенный сладѧ̀, и҆ всѣ́хъ наꙋча́ѧ вопи́ти: гдⷭ҇а по́йте, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Воздѣжѝ рꙋ́цѣ твоѝ ко влⷣцѣ бг҃ꙋ, свѧ́те, молѝ за ны̀ прилѣ́жнѡ, поми́ловати гра́дъ и҆ лю́ди, и҆зба́витисѧ гла́да же и҆ трꙋ́са, и҆ наше́ствїѧ и҆ноплеме́нныхъ, є҆го́же превозно́симъ во вѣ́ки."
 },
 {
  "type": "TEXT",
  "value": "Бг҃оро́диченъ: А҆рха́гг҃ла гла́сомъ зове́мъ тѝ, пречⷭ҇таѧ дв҃о мт҃и: ра́дꙋйсѧ, ѡ҆бра́дованнаѧ, гдⷭ҇ь съ тобо́ю, а҆́гг҃лѡмъ и҆ человѣ́кѡмъ заче́нши и҆ ро́ждши гдⷭ҇а. Є҆го́же превозно́симъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ."
 },
 {
  "type": "TEXT",
  "value": "Ны́нѣ, бл҃же́нне, водворѧ́ешисѧ, и҆ весели́шисѧ со а҆́гг҃льскими си́лами, прїе́млѧ поко́й проти́вꙋ трꙋдѡ́въ, ѻ҆́ч҃е свѧ́те а҆вра́мїе, и҆ на́съ молѧ́щихсѧ помѧнѝ, бг҃оно́се, че́стнѡ пра́зднꙋющихъ па́мѧть твою̀, и҆ хрⷭ҇та̀ велича́ющихъ."
 },
 {
  "type": "TEXT",
  "value": "Ны́нѣ собо́ръ ст҃ы́хъ а҆́гг҃лъ, и҆ ли́ки ст҃ы́хъ а҆пⷭ҇лъ, прⷪ҇рѡ́къ и҆ мꙋ́чєникъ, ст҃и́телей и҆ прпⷣбныхъ: свѣ́тлѡ торжествꙋ́ютъ ра́дꙋющесѧ, въ па́мѧти твое́й, свѧ́те ѻ҆́ч҃е а҆вра́мїе. Съ ни́миже моли́сѧ, бг҃оно́се, хрⷭ҇тꙋ̀ бг҃ꙋ, всѣ́хъ и҆зба́вити бѣ́дъ, вѣ́рою тѧ̀ блажа́щихъ."
 },
 {
  "type": "TEXT",
  "value": "Прїимѝ, влⷣко хрⷭ҇тѐ цр҃ю̀, моле́нїе ра̑бъ твои́хъ, и҆ ѡ҆братѝ на ра́дость воздыха́нїе на́ше: мо́литъ тѧ̀ собо́ръ а҆рха́гг҃лъ, прⷪ҇рѡ́къ и҆ мꙋ́чєникъ, а҆пⷭ҇лъ и҆ ст҃и́тєль, и҆ прпⷣбный а҆вра́мїй, є҆гда̀ прїи́деши сꙋди́ти всемꙋ̀ мі́рꙋ, тогда̀ спасѝ и҆ поми́лꙋй велича́ющыѧ тѧ̀."
 },
 {
  "type": "TEXT",
  "value": "Бг҃оро́диченъ: Досто́йнѡ тѧ̀ ᲂу҆блажа́емъ вои́стиннꙋ и҆ велича́емъ, пречⷭ҇таѧ дв҃о, мт҃и хрⷭ҇та̀ бг҃а. Ты́ бо є҆сѝ небе́сныхъ си́лъ ра́дость, и҆ всѣ́хъ ст҃ы́хъ добро́та и҆ ᲂу҆краше́нїе, хрⷭ҇тїа́нъ прибѣ́жище и҆ стѣна̀, грѣ́шныхъ пꙋ́ть, и҆ порꙋ́чница тебѐ велича́ющихъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Мїрско́е пристра́стїе ѡ҆ста́вль, и҆ бога́тство мимотекꙋ́щее, и҆ крⷭ҇тъ тво́й взе́мь, ѻ҆́ч҃е, хрⷭ҇то́ви, а҆вра́мїе, ᲂу҆се́рднѡ послѣ́довалъ є҆сѝ: по́стнически же ᲂу҆мертви́лъ є҆сѝ стра̑сти, и҆ къ безстра́стїю прите́клъ є҆сѝ, и҆ мо́лишисѧ ѡ҆ на́съ, бг҃оно́се. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "На хвали́техъ стїхи̑ры на ѕ҃, пра́здника г҃. И҆ ст҃а́гѡ г҃, гла́съ ѕ҃."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Всѐ ᲂу҆пова́нїе ко гдⷭ҇ꙋ возло́жь, всѣ́мъ серде́чнымъ жела́нїемъ горѧ̀ къ бг҃ꙋ, прпⷣбне, ꙗ҆́кѡ ѕвѣзда̀ свѣ́тлаѧ на восто́цѣ, всѣ̑мъ возсїѧ́лъ є҆сѝ, свѧ́те. Возра́дꙋйтесѧ и҆ возвесели́тесѧ мона́хѡмъ со́нмы, торжествꙋ́юще воспое́мъ свѣ́тлѡ въ па́мѧть є҆гѡ̀: хрⷭ҇тꙋ̀ є҆ди́номꙋ бг҃ꙋ, со дерзнове́нїемъ моли́сѧ ѡ҆ дꙋша́хъ на́шихъ. Два́жды."
 },
 {
  "type": "TEXT",
  "value": "Ве́сь ѿ ю҆́ности прибли́жилсѧ є҆сѝ гдⷭ҇еви, прпⷣбне ѻ҆́ч҃е а҆вра́мїе, все́ю дꙋше́ю го́рнихъ жела́ѧ, ви̑димаѧ и҆ земна̑ѧ, свѧ́те, возненави́дѣвъ, хрⷭ҇та̀ є҆ди́наго возлюби́лъ є҆сѝ, прехва́льне, и҆ тогѡ̀ крⷭ҇тъ ᲂу҆се́рднѡ тща́сѧ воспрїѧ́ти, возслѣ́довалъ є҆сѝ є҆мꙋ̀, не ᲂу҆боѧ́сѧ вра́жїихъ стрѣлѧ́нїй, ꙗ҆́кѡ всѣ́хъ по́мощь и҆мѣ́ѧ бг҃а. Є҆мꙋ́же со дерзнове́нїемъ моли́сѧ ѡ҆ дꙋша́хъ на́шихъ."
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "Прпⷣбне ѻ҆́ч҃е, гла́съ є҆ѵⷢ҇лїа гдⷭ҇нѧ ᲂу҆слы́шавъ, мі́ръ ѡ҆ста́вилъ є҆сѝ, бога́тство и҆ сла́вꙋ нивочто́же вмѣни́въ. Тѣ́мъ всѣ̑мъ возопи́лъ є҆сѝ: возлюби́те бг҃а, и҆ ѡ҆брѧ́щете бл҃года́ть вѣ́чнꙋю: ничто́же предпочти́те па́че любвѐ є҆гѡ̀, да є҆гда̀ прїи́детъ въ сла́вѣ свое́й, ѡ҆брѧ́щете поко́й со всѣ́ми ст҃ы́ми, є҆гѡ́же моли́твами, хрⷭ҇тѐ, сохранѝ и҆ спасѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Славосло́вїе вели́кое, и҆ ѿпꙋ́стъ и҆ ча́съ а҃."
 },
 {
  "type": "HEADER",
  "value": "На а҃-мъ часѣ̀ тропа́рь пра́здника. Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трист҃о́мъ, конда́къ пра́здника, и҆ ст҃а́гѡ, премѣнѧ́юще глаго́лемъ."
 },
 {
  "type": "HEADER",
  "value": "На лїтꙋргі́и блажє́нна пра́здника, пѣ́снь з҃-ѧ, на д҃: и҆ ст҃а́гѡ, пѣ́снь ѕ҃-ѧ, на д҃."
 },
 {
  "type": "TEXT",
  "value": "Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло сг҃і."
 },
 {
  "type": "TEXT",
  "value": "А҆ллилꙋ́їа."
 },
 {
  "type": "TEXT",
  "value": "Сті́хъ: Блаже́нъ мꙋ́жъ боѧ́йсѧ гдⷭ҇а:"
 },
 {
  "type": "HEADER",
  "value": "Є҆ѵⷢ҇лїе, лꙋкѝ, зача́ло к҃д."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]