[
 {
  "type": "HEADER",
  "value": "Мѣ́сѧца і҆ꙋ́лїа въ к҃з-й де́нь. Ст҃а́гѡ великомч҃ника и҆ цѣли́телѧ пантелеи́мона."
 },
 {
  "type": "TEXT",
  "value": "ⷤ На вели́цѣй вече́рни ⷤ На ᲂу҆́трени ⷤ На лїтꙋргі́и"
 },
 {
  "type": "HEADER",
  "value": "На вели́цѣй вече́рни."
 },
 {
  "type": "TEXT",
  "value": "Пое́мъ, Блаже́нъ мꙋ́жъ: а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на и҃, гла́съ д҃. Подо́бенъ: Зва́нный свы́ше:"
 },
 {
  "type": "TEXT",
  "value": "И҆́ же по достоѧ́нїю / зва́нъ бы́въ пантелеи́монъ, / є҆гда̀ чл҃вѣколю́бное всѣ̑мъ просте́рлъ є҆сѝ дꙋ́шъ попече́нїе, / и҆ тѣле́съ и҆сцѣле́нїе показꙋ́ѧ. / тогда̀ тезоиме́ннымъ зва́нїемъ ѡ҆богати́лсѧ є҆сѝ, / добродѣ́тели воздаѧ́нїе, / и҆ благоче́стїѧ возме́здїе, мч҃ниче, ѡ҆брѣ́тъ, / вѣнцено́сецъ и҆ непобѣди́мь во́инъ ꙗ҆́вльсѧ / хрⷭ҇та̀ бг҃а на́шегѡ. / є҆го́же молѝ, спастѝ и҆ просвѣти́ти дꙋ́шы на́шѧ. [Два́жды.]"
 },
 {
  "type": "TEXT",
  "value": "И҆́ же ѿ невеще́ственныхъ и҆стѡ́чникъ сп҃си́телѧ, / бжⷭ҇твенныхъ и҆сцѣле́нїй при́снѡ бл҃года́ть почерпа́ѧ, / и҆ бога́тнѡ и҆злива́ѧ, / и҆ подава́ѧ пристꙋпа́ющымъ къ тебѣ̀, всеблаже́нне, / всѣ́хъ сла́вное твоѐ и҆ всесвѧще́нное / и҆ свѣтоно́сное торжество̀ вѣ́рнѡ соверша́ющихъ, / бл҃года́тїю бжⷭ҇твенною си́хъ ѡ҆зарѝ, / бг҃оподо́бнымъ пома́занъ и҆менова́нїемъ, / ꙗ҆́вѣ и҆ бла́гостїю: / є҆́йже молѝ, всѣ̑мъ дарова́тисѧ пою́щымъ тѧ̀. [Два́жды.]"
 },
 {
  "type": "TEXT",
  "value": "М ꙋ́ками мно́гими и҆скꙋси́сѧ, / твоѧ̀ ны́нѣ ѻ҆гнепа́льнаѧ любо́вь, / ко є҆́же сꙋ́щемꙋ жела́нїю, / мо́ремъ и҆ ѻ҆гне́мъ зави́стнѡ бори́мь. / тѣ́мже ѕлонача́льнаго и҆спрове́ргъ, / живоно́сное дѣ́йство ᲂу҆тѣ́шителѧ / ꙗ҆́вѣ прїѧ́тъ богатода́тельное. / є҆́юже и҆ жи́ва пресла́внѡ ᲂу҆ме́ршаго, / бг҃омꙋ́дре, показа́лъ є҆сѝ, / и҆ разли̑чнаѧ и҆сцѣлє́нїѧ содѣ́лалъ є҆сѝ, пребл҃же́нне."
 },
 {
  "type": "HEADER",
  "value": "И҆́ны стїхи̑ры, гла́съ в҃. Самогла́сны."
 },
 {
  "type": "TEXT",
  "value": "А҆нато́лїево: Безме́зднѡ бл҃года́ть дае́ши человѣ́кѡмъ, / пантелеи́моне мч҃ниче сла́вне, / и҆ дꙋ́хи ѿго́ниши призыва́нїемъ хрⷭ҇то́вымъ, / и҆ слѣпы̑мъ ви́дѣти да́рꙋеши, / ꙗ҆́кѡ тогѡ̀ ᲂу҆го́дникъ и҆́скреннїй. / но молѝ врачꙋ̀, всебл҃же́нне, / дарова́ти мі́рꙋ ми́ръ тве́рдъ, / и҆ тѧ̀ лю́бѧщымъ ве́лїю ми́лость."
 },
 {
  "type": "TEXT",
  "value": "М а́тере благочести́выѧ возжела́лъ є҆сѝ вѣ́рꙋ, / ѻ҆́ч҃ее и҆спра́вилъ є҆сѝ нече́стїе: / є҆рмола́а бо ᲂу҆тве́рждсѧ ᲂу҆че́нїи, / си́мъ и҆ креще́нїе соверши́лъ є҆сѝ, / пантелеи́моне мꙋ́чениче сла́вне, / ми́лостивагѡ бг҃а, / недꙋ́гꙋющихъ врачꙋ̀, и҆ страсте́й ѿгони́телю, / молѝ и҆зба́витисѧ ѿ напа́стей / вѣ́рою творѧ́щымъ пречестнꙋ́ю па́мѧть твою̀."
 },
 {
  "type": "TEXT",
  "value": "Ѿ ри́нꙋлъ є҆сѝ пре́лесть ѻ҆тца̀, всесла́вне, / и҆ словеса̀ ма́тернѧ смы́сленнѡ прїе́мь, / па́че зла́та пло́дъ прине́слъ є҆сѝ, по гдⷭ҇ню гла́сꙋ: / и҆ вра́чь и҆зрѧ́денъ ꙗ҆ви́лсѧ є҆сѝ, / пантелеи́моне мꙋ́чениче сла́вне. / ше́ствꙋѧ же бл҃года́ти пꙋте́мъ, / ѡ҆брѣ́лъ є҆сѝ лежа́ща ни́зꙋ младе́нца, є҆хі́дною ᲂу҆грызе́на: / и҆ къ бг҃ꙋ моли́твꙋ сотвори́въ и҆ прилѣ́жнѡ помоли́всѧ, / а҆́бїе ѻ҆́трока воскреси́лъ є҆сѝ, / и҆ ѕвѣ́рѧ растерза́лъ є҆сѝ. / тѣ́мже помина́й на́съ, вѣ́рою творѧ́щихъ твою̀ па́мѧть, / ꙗ҆́кѡ да ѡ҆брѧ́щемъ ми́лость въ де́нь сꙋ́дный."
 },
 {
  "type": "TEXT",
  "value": "Сла́ва, гла́съ ѕ҃. Вѷзанті́ево: Возсїѧ̀ дне́сь честна́ѧ па́мѧть безсре́бреника, / вѣ̑рныѧ созыва́ющи на трапе́зꙋ та́йнꙋю, / и҆ къ торжествꙋ̀ пра́зднественномꙋ водѧ́щи празднолю́бныхъ составлє́нїѧ: / наста́ бо ны́нѣ на́мъ чꙋдодѣ́йственный вра́чь, / недꙋ́ги всѣ̑мъ и҆сцѣлѧ́ѧй, / пантелеи́монъ тве́рдый страда́лецъ, / и҆ мо́литсѧ прилѣ́жнѡ гдⷭ҇еви, / спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ прест҃а́ѧ дв҃о; / кто́ ли не воспое́тъ твоегѡ̀ пречⷭ҇тагѡ рождества̀; / безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, / то́йже ѿ тебѐ чⷭ҇тыѧ про́йде, / неизрече́ннѡ вопло́щсѧ, / є҆стество́мъ бг҃ъ сы́й, / и҆ є҆стество́мъ бы́въ чл҃вѣ́къ на́съ ра́ди, / не во двою̀ лицꙋ̑ раздѣлѧ́емый, / но во двою̀ є҆стествꙋ̑ / несли́тнѡ познава́емый. / того̀ молѝ, чⷭ҇таѧ, всебл҃же́ннаѧ, / поми́ловатисѧ дꙋша́мъ на́шымъ."
 },
 {
  "type": "HEADER",
  "value": "Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ. кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑, и҆ ѡ҆правдѧ́тсѧ: и҆ да ᲂу҆слы́шатъ, и҆ да рекꙋ́тъ и҆́стинꙋ. бꙋ́дите мѝ свидѣ́тели, и҆ а҆́зъ свидѣ́тель, гл҃го́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете, и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь, пре́жде менѐ не бы́сть и҆́нъ бг҃ъ, и҆ по мнѣ̀ не бꙋ́детъ. а҆́зъ є҆́смь бг҃ъ, и҆ нѣ́сть ра́звѣ менѐ сп҃са́ѧй. а҆́зъ возвѣсти́хъ и҆ сп҃со́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь: и҆ нѣ́сть ѿ рꙋ́къ мои́хъ и҆збавлѧ́ѧй. сотворю̀, и҆ кто̀ ѿврати́тъ то̀; си́це гл҃го́летъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆и҃левъ."
 },
 {
  "type": "HEADER",
  "value": "Премꙋ́дрости соломѡ́новы чте́нїе."
 },
 {
  "type": "TEXT",
  "value": "[Глава̀ г҃] Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка: непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. и҆́бо пред̾ лице́мъ человѣ́ческимъ, а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено: и҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ досто́йны себѣ̀. ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. и҆ во вре́мѧ посѣще́нїѧ и҆́хъ возсїѧ́ютъ: и҆ ꙗ҆́кѡ и҆́скры по сте́блїю потекꙋ́тъ: сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀. ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "Премꙋ́дрости соломѡ́ни чте́нїе."
 },
 {
  "type": "TEXT",
  "value": "[Главы̑ є҃ и҆ ѕ҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. сегѡ̀ ра́ди прїи́мꙋтъ ца́рствїе благолѣ́пїѧ и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. и҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе: и҆ ѕлодѣ́йство преврати́тъ престо́лы си́льныхъ. слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
 },
 {
  "type": "HEADER",
  "value": "На лїті́и стїхи̑ры, гла́съ а҃."
 },
 {
  "type": "TEXT",
  "value": "Вѷзанті́ево: По́двигомъ до́брымъ подвиза́лсѧ є҆сѝ, / и҆ тече́нїе сконча́лъ є҆сѝ мꙋче́нїѧ твоегѡ̀, / мꙋ́чениче пантелеи́моне: / тѣ́мже въ вы́шнихъ со а҆́гг҃лы ликꙋ́еши, / досто́йнѡ болѣ́зней твои́хъ прїе́мъ вы́шнее црⷭ҇тво. / молѝ ᲂу҆́бѡ, врачꙋ̀ всеблаже́нне, / дарова́ти на́мъ ве́лїю ми́лость."
 },
 {
  "type": "TEXT",
  "value": "Гла́съ в҃: Кі́ими пѣ́сненными добро́тами / тебѣ̀, пантелеи́моне, почти́мъ: / тѣле́сною красото́ю и҆ дꙋше́вною добро́тою свѣ́тлѡ просїѧва́юща, / ᲂу҆́мнымъ раче́нїемъ просвѣще́нна / и҆ ра́зꙋма хи́тростїю ᲂу҆кра́шена, / ю҆́на во́зрастомъ, / вѣ́дца же смы́сломъ, / возра́сшаго бж҃е́ственными ᲂу҆че́нїи, / и҆ стѧжа́вшаго хрⷭ҇та̀ ᲂу҆се́рдною любо́вїю;"
 },
 {
  "type": "TEXT",
  "value": "К і́ими пѣ́сньми тебѣ̀, пантелеи́моне, возвели́чимъ, / є҆го́же па́че є҆стества̀ словесы̀ и҆ дѣ́лы просла́ви гдⷭ҇ь, / и҆ мно́жествомъ возвы́си чꙋде́съ, / є҆го́же заре́ю мно́гихъ дарѡ́въ просвѣтѝ, / и҆ сла́вою вѣнце́въ бж҃е́ственныхъ ᲂу҆красѝ, / є҆го́же въ бѣда́хъ предста́телѧ тре́бꙋющымъ / дарова̀ хрⷭ҇то́съ бг҃ъ на́шъ, / и҆мѣ́ѧй ве́лїю ми́лость;"
 },
 {
  "type": "TEXT",
  "value": "К і́ими похва́льными пѣ́сньми / тебѣ̀, пантелеи́моне, возвели́чимъ, / хрⷭ҇топодо́бною бл҃госты́нею ѡ҆заре́нна, / и҆ подаю́ща всѣ́мъ просѧ́щымъ ве́лїю млⷭ҇ть, / бж҃е́ственнымъ тезоимени́тствомъ ᲂу҆кра́шена, / и҆ дѣ̑лы всеми́лостиваго показа́нна, / ꙗ҆́кѡ прⷭ҇нотекꙋ́щаѧ рѣка̀ воды̀ живы́ѧ, / и҆сцѣлє́нїѧ пролива́юща притека́ющымъ къ тебѣ̀ съ вѣ́рою;"
 },
 {
  "type": "TEXT",
  "value": "Гла́съ є҃. Самогла́сенъ: Всесвѣ́тлаѧ мч҃нка па́мѧть / сїѧ́етъ, ꙗ҆́кѡ со́лнце концє́мъ, / и҆ непреста́ннѡ подава́етъ вѣ́рнымъ и҆сцѣлє́нїѧ, / недꙋ́ги ѿгонѧ́ющи, и҆ стра̑сти и҆сцѣлѧ́ющи, / мо́литсѧ бо при́снѡ пантелеи́монъ хрⷭ҇тꙋ̀ бг҃ꙋ, / дарова́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Сла́ва, гла́съ то́йже. Вѷзанті́ево: Прїиди́те мꙋчениколю́бцы, / є҆диномꙋ́дреннѡ всѝ восхва́лимъ страстоте́рпца хрⷭ҇то́ва, / по благоче́стїи до́брѣ подви́гшасѧ, / и҆ по́честїю побѣ́дною ѡ҆дѣ́ѧвшасѧ, / свѣти́льника вселе́нныѧ, и҆ присносїѧ́ющꙋю ѕвѣздꙋ̀ цр҃кве. / тѣ́мже и҆ къ немꙋ̀ вопїю́ще рце́мъ: / пантелеи́моне, мꙋ́чениче сла́вне, / бꙋ́ди на́мъ дꙋша́мъ же и҆ тѣ́лѡмъ спасе́нїе, / и҆ покро́въ недви́жимь, / молѧ́сѧ ко гдⷭ҇ꙋ ѡ҆ на́съ непреста́ннѡ, / во є҆́же спастѝ на́съ."
 },
 {
  "type": "HEADER",
  "value": "И҆ ны́нѣ, бг҃оро́диченъ: Блажи́мъ тѧ̀, бцⷣе дв҃о, / и҆ сла́вимъ тѧ̀ вѣ́рнїи по до́лгꙋ, / гра́дъ непоколеби́мый, стѣ́нꙋ неѡбори́мꙋю, / тве́рдꙋю предста́тельницꙋ / и҆ прибѣ́жище дꙋ́шъ на́шихъ."
 },
 {
  "type": "HEADER",
  "value": "На стїхо́внѣ стїхи̑ры, гла́с а҃:"
 },
 {
  "type": "TEXT",
  "value": "Д о́блѧго страда́льца пантелеи́мона, / по бл҃гоче́стїи подвиза́вшасѧ, / прїиди́те, лю́дїе, воспои́мъ гл҃юще: / ра́дꙋйсѧ, тве́рдый вѣ́ры побо́рниче по прⷪ҇ро́цѣхъ и҆ а̑пⷭ҇толѣхъ, / ра́дꙋйсѧ, хрⷭ҇та̀ въ себѣ̀ и҆мѣ́вый, подо́бѧсѧ дѣ́лы па́ѵлꙋ, / ра́дꙋйсѧ, пла́вающымъ небꙋ̀рное приста́нище, / ра́дꙋйсѧ, на́ша похвало̀ и҆ цр҃кве вѣ́рных ра́дованїе."
 },
 {
  "type": "TEXT",
  "value": "Сті́хъ: Првⷣникъ ꙗ҆́кѡ фі́нїѯъ процвѣте́тъ, / и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
 },
 {
  "type": "TEXT",
  "value": "Ѿ младе́нчества до́брꙋю стезю̀ ѡ҆брѣ́тъ, / млⷭ҇тїю хрⷭ҇то́вою пома́завъ се́рдце, / бѡлѣ́зни цѣли́ши просѧ́щымъ ᲂу҆се́рднѡ, / ѿтню́дꙋже и҆ ᲂу҆ме́ршаго воздви́глъ є҆сѝ моли́твами твои́ми, / и҆ воспрїѧ́лъ є҆сѝ нб҃е́сное црⷭ҇твїе, пантелеи́моне всебл҃же́нне."
 },
 {
  "type": "TEXT",
  "value": "Сті́хъ: Насажде́ни въ домꙋ̀ гдⷭ҇ни / во дво́рѣхъ бг҃а на́шегѡ процвѣтꙋ́тъ."
 },
 {
  "type": "TEXT",
  "value": "С трастоте́рпца хрⷭ҇то́ва похва́лимъ, / мꙋ́драго пантелеи́мона, / и҆́же змі́ѧ ᲂу҆бѝ си́лою крⷭ҇тною, / и҆ моли́твами е҆рмола́евыми о҆́трока воскресѝ, / и҆ несвѧще́нной посрамѝ мꙋ́дрости словеса̀, / и҆́же и҆ мо́литсѧ непреста́ннѡ, / всѣ́мъ пода́ти согрѣше́нїй проще́нїе."
 },
 {
  "type": "TEXT",
  "value": "Сла́ва, гла́съ и҃. Вѷзанті́ево: Ма́тернее возлюби́въ благоче́стїе, / ѻ҆́тчимъ же безбо́жїемъ возгнꙋша́всѧ, / врачꙋ̀ дꙋ́шъ во́инъ бы́въ, / враче́бнѣ себѣ̀ наказа́лъ є҆сѝ: / и҆ бжⷭ҇твенною бл҃года́тїю во ѻ҆бои́хъ благоискꙋ́сенъ, / страсте́й всегꙋби́тель, и҆ дꙋ́шъ вра́чь показа́лсѧ є҆сѝ: / но ꙗ҆́коже во страда́нїихъ тве́рдое, / и҆ въ моли́твахъ приснопребыва́тельное стѧжа́въ, / пантелеи́моне мꙋ́чениче хрⷭ҇то́въ, / прилѣ́жнѡ молѝ, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ: Безневѣ́стнаѧ дв҃о, / ꙗ҆́же бг҃а неизрече́ннѡ заче́нши пло́тїю, / мт҃и бг҃а вы́шнѧгѡ, / твои́хъ рабѡ́въ мольбы̑ прїимѝ, всенепоро́чнаѧ, / всѣ̑мъ подаю́щи ѡ҆чище́нїе прегрѣше́нїй: / ны́нѣ на̑ша молє́нїѧ прїе́млющи, / молѝ спасти́сѧ всѣ̑мъ на́мъ."
 },
 {
  "type": "HEADER",
  "value": "Тропа́рь ст҃а́гѡ два́жды, гла́съ г҃:"
 },
 {
  "type": "TEXT",
  "value": "С трастоте́рпче ст҃ы́й и҆ цѣле́бниче пантелеи́моне, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "TEXT",
  "value": "И҆ Бцⷣе дв҃о: є҆ди́ножды."
 },
 {
  "type": "HEADER",
  "value": "На ᲂу҆́трени."
 },
 {
  "type": "HEADER",
  "value": "На Бг҃ъ гдⷭ҇ь: тропа́рь ст҃а́гѡ два́жды, гла́съ г҃:"
 },
 {
  "type": "TEXT",
  "value": "С трастоте́рпче ст҃ы́й и҆ цѣле́бниче пантелеи́моне, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю спасе́нїе ро́да на́шегѡ / воспѣва́емъ, бцⷣе дв҃о: / пло́тїю бо ѿ тебє̀ воспрїѧ́тою сн҃ъ тво́й, и҆ бг҃ъ на́шъ, / кресто́мъ воспрїи́мъ стра́сть, / и҆зба́ви на́съ ѿ тлѝ, ꙗ҆́кѡ чл҃вѣколю́бецъ."
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ а҃:"
 },
 {
  "type": "TEXT",
  "value": "М а́тернее бл҃гоче́стїе соблю́лъ є҆сѝ, бл҃же́нне, / о҆́тчее же нече́стїе благоче́стнѡ и҆спра́вилъ є҆сѝ, / сегѡ̀ ра́ди и҆ бл҃года́ть прїѧ́лъ є҆сѝ ѿ бг҃а вседержи́телѧ, / врачева́ти немощствꙋ́ющихъ бѡлѣ́зни, мч҃нче сла́вне пантелеи́моне, / всѣ́хъ съ вѣ́рою и҆ любо́вїю къ тебѣ̀ прибега́ющихъ. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Наде́ждо хрⷭ҇тїа́нъ, всест҃а́ѧ дв҃о, / є҆го́же родила̀ є҆сѝ бг҃а, па́че ᲂу҆ма̀ и҆ сло́ва, / непреста́ннѡ молѝ съ нб҃е́сными си́лами / дарова́ти ѿпꙋще́нїе согрѣше́нїй всѣ́мъ на́мъ, и҆ и҆справле́нїе житїѧ̀, / вѣ́рою и҆ любо́вїю тѧ̀ сла́вѧщымъ."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ д҃:"
 },
 {
  "type": "TEXT",
  "value": "Ꙗ҆́ кѡ во́ина хрⷭ҇то́ва непобѣди́маго, и҆ борца̀ мꙋ́жественнѣйшаго, / тѧ̀ всѝ вѣ́рнїи восхвалѧ́емъ, мч҃нкѡвъ добро́то, / вѣ́рою пра́зднꙋѧ ст҃ꙋ́ю па́мѧть твою̀, мч҃нче всехва́льне: / честны́ѧ же по́двиги согла́снѡ славосло́вимъ, мꙋ́дре, / и҆ спаси́телѧ хрⷭ҇та̀ велича́ем. [Два́жды.]"
 },
 {
  "type": "TEXT",
  "value": "Сла́ва: Пострада́лъ є҆сѝ мꙋ́жественнѣ за хрⷭ҇та̀, / и҆ вѣ́рꙋ проповѣ́давъ о҆тцꙋ̀ твоемꙋ̀, и҆звле́клъ є҆сѝ того̀, всехва́льне, и҆зъ ро́ва нече́стїѧ, / и҆ мꙋчи́телей не ᲂу҆боѧ́всѧ безбо́жнагѡ ᲂу҆мышле́нїѧ, / де́монѡвъ посрами́лъ є҆сѝ безси́льнꙋю де́рзость. / сегѡ̀ ра́ди бл҃года́ть ѿ хрⷭ҇та̀ стѧжа́л є҆сѝ, врачева́ти бѡлѣ́зни и҆ и҆згони́ти дꙋ́хи вра́жїѧ, / пантелеи́моне всехва́льне, моли́сѧ хрⷭ҇тꙋ̀ бг҃ꙋ прегреше́нїй ѡ҆ставле́нїе дарова́ти, / пра́зднꙋющым любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ: Родила̀ є҆сѝ неизрече́ннѡ бг҃а, пре́жде вѣ́къ ѿ ѻ҆ц҃а̀ возсїѧ́вшаго, / и҆ в послѣ́днѧѧ времена̀ ѿ чре́ва твоегѡ̀ бцⷣе ꙗ҆́вльшагосѧ: / свѣ́тъ во ѿткрове́нїе ꙗ҆зы́кѡвъ и҆ спасе́нїе всегѡ̀ мі́ра, / в просвѣще́нїе во тмѣ̀ сѣдѧ́щымъ и҆ ᲂу҆тѣше́нїе вѣ́рою пою́щымъ тѧ̀. / сегѡ̀ ᲂу҆бѡ молѝ просвѣти́ти мѧ̀ влⷣчце свѣ́том ра́зꙋма, / и҆ пода́ти се́рдцꙋ моемꙋ̀ ᲂу҆миле́нїе, да ѡ҆мы́ю слеза́ми грѣхѝ моѧ̀."
 },
 {
  "type": "HEADER",
  "value": "Полѷеле́й и҆ велича́ние:"
 },
 {
  "type": "TEXT",
  "value": "В елича́емъ тѧ̀, / страстоте́рпче ст҃ы́й великомч҃нче и҆ цѣле́бниче пантелеи́моне, / и҆ чте́мъ честна̑ѧ страда̑нїѧ твоѧ̑, / ꙗ҆́же за хрⷭ҇та̀ / претерпѣ́лъ є҆сѝ."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "а҃ Бг҃ъ на́мъ прибѣ́жище и҆ си́ла: в҃ Помо́щникъ въ ско́рбехъ ѡ҆брѣ́тшихъ ны̀ ѕѣлѡ̀. а҃ Сегѡ̀ ра́ди не ᲂу҆бои́мсѧ, внегда̀ смꙋща́етсѧ землѧ̀. в҃ Бж҃е, кто̀ ᲂу҆подо́битсѧ тебѣ̀; да не премолчи́ши, нижѐ ᲂу҆кроти́ши, бж҃е. а҃ Ꙗ҆кѡ сѐ вразѝ твоѝ возшꙋмѣ́ша, и҆ ненави́дѧщїи тѧ̀ воздвиго́ша главꙋ̀. в҃ На лю́ди твоѧ̑ лꙋка́вноваша во́лею, и҆ совѣща́ша на свѧты̑ѧ твоѧ̀. а҃ Положи́ша трꙋ̑пїѧ рабѡ́въ твои́хъ, бра̑шна пти́цамъ небє́снымъ. в҃ Плѡ́ти прпⷣбныхъ твои́хъ ѕвѣрє́мъ земны́мъ. а҃ Пролїѧ́ша кро́вь и҆́хъ ꙗ҆́кѡ во́дꙋ. в҃ Ꙗ҆кѡ тебѐ ра́ди ᲂу҆мерщвлѧ́емсѧ е҆смы̀ ве́сь де́нь: а҃ Вмѣни́хомсѧ ꙗ҆́кѡ ѻ҆́вцы заколе́нїѧ. в҃ Положи́лъ є҆сѝ на́съ въ при́тчꙋ во ꙗ҆зы́цѣхъ. а҃ И҆ бы́хъ ꙗ҆́звенъ ве́сь де́нь. в҃ Разже́глъ є҆си ны̀̀, ꙗ҆́коже разжиза́етсѧ сребро̀. а҃ Проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ є҆сѝ на́съ въ поко́й. в҃ Весели́тесѧ ѡ҆ гдⷭ҇ѣ и҆ ра́дꙋйтесѧ првⷣнїи. а҃ Ꙗ҆кѡ гдⷭ҇ь въ ро́дѣ првⷣныхъ. в҃ И҆ наслѣ́дїе и҆́хъ въ вѣ́къ бꙋ́детъ. а҃ Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. в҃ Свѣ́тъ возсїѧ̀ првⷣникꙋ, и҆ пра̑вымъ срⷣцемъ весе́лїе. а҃ Въ па́мѧть вѣ́чнꙋю бꙋ́детъ првⷣникъ. в҃ Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̀ въ ни́хъ. а҃ Ди́венъ бг҃ъ во ст҃ы́хъ свои́хъ. в҃ Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. а҃ Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀. в҃ И҆ похва́лѧтсѧ всѝ пра́вїи срⷣцемъ."
 },
 {
  "type": "TEXT",
  "value": "Сла́ва, и҆ ны́нѣ: А҆ллилꙋ́їа, три́жды."
 },
 {
  "type": "HEADER",
  "value": "По полѷеле́и сѣда́ленъ, гла́съ д҃:"
 },
 {
  "type": "TEXT",
  "value": "Т оржествꙋ́ютъ дне́сь собо́ри вѣ́рныхъ, / честны̑ѧ по́двиги твоѧ̑, пантелеи́моне страстоте́рпче, / прославлѧ́ѧ животода́вца, ꙗ҆ви́вшаго тебѣ̀ крѣ́пкаго на́мъ предста́телѧ. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Мт҃рь бж҃їю тѧ̀ свѣ́мы всѝ, дв҃ꙋ вои́стиннꙋ и҆ по рождествѣ̀ ꙗ҆́вльшꙋюсѧ, / любо́вїю притека́ющїи къ твое́й бл҃гости: / тебѐ бо и҆́мамы грѣ́шнїи предста́тельницꙋ, / тебѐ стѧжа́хомъ въ напа́стехъ спасе́нїе, е҆ди́нꙋ всенепоро́чнꙋю."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са, и҆́хже стїхѝ повторѧ́юще пое́мъ:"
 },
 {
  "type": "TEXT",
  "value": "Ѿ ю҆́ности моеѧ̀ / мно́зи бо́рютъ мѧ̀ стра̑сти, / но са́мъ мѧ̀ застꙋпѝ, / и҆ сп҃сѝ сп҃се мо́й."
 },
 {
  "type": "TEXT",
  "value": "Н енави́дѧщїи сїѡ́на, / посрами́тесѧ ѿ гдⷭ҇а, / ꙗ҆́кѡ трава́ бо ѻ҆гне́мъ / бꙋ́дете и҆зсо́хше."
 },
 {
  "type": "TEXT",
  "value": "Сла́ва: Ст҃ы́мъ дх҃омъ / всѧ́ка дꙋша̀ живи́тсѧ, / и҆ чистото́ю возвыша́етсѧ, / свѣтлѣ́етсѧ трⷪ҇ческимъ є҆ди́нствомъ сщ҃еннота́йнѣ."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "П рвⷣникъ ꙗ҆́кѡ фі́нїѯъ процвѣте́тъ, / и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́т."
 },
 {
  "type": "TEXT",
  "value": "Дрꙋгі́й прокі́менъ: Всѧ́кое дыха́нїе / да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋки́, зача́ло р҃ѕ."
 },
 {
  "type": "TEXT",
  "value": "Р ечѐ гдⷭ҇ь свои́мъ ᲂу҆ченикѡ́мъ: внемли́те ѿ человѣ̑къ возложа́тъ на вы̀ рꙋ́ки своѧ̀, и҆ и҆жденꙋ́тъ, предаю́ще на сѡ́нмища и҆ темни́цы, ведо́мы къ царє́мъ и҆ влады́камъ, и҆́мене моегѡ̀ ра́ди. прилꙋчи́тсѧ же ва́мъ во свидѣ́тельство: положи́те ᲂу҆́бѡ на сердца́хъ ва́шихъ, не пре́жде поꙋча́тисѧ ѿвѣщава́ти. а҆́зъ бо да́мъ ва́мъ ᲂу҆ста̀ и҆ премꙋ́дрость, є҆́йже не возмо́гꙋтъ проти́витисѧ, и҆лѝ ѿвѣща́ти всѝ противлѧ́ющїисѧ ва́мъ. пре́дани же бꙋ́дете и҆ роди́тели, и҆ бра́тїею, и҆ ро́домъ, и҆ дрꙋ́ги, и҆ ᲂу҆мертвѧ́тъ ѿ ва́съ. и҆ бꙋ́дете ненави́дими ѿ всѣ́хъ и҆́мене моегѡ̀ ра́ди. и҆ вла́съ главы̀ ва́шеѧ не поги́бнетъ. въ терпѣ́нїи ва́шемъ стѧжи́те дꙋ́шы ва́шѧ."
 },
 {
  "type": "HEADER",
  "value": "По н҃-мъ ѱалмѣ̀:"
 },
 {
  "type": "TEXT",
  "value": "Сла́ва: Мл҃твами ст҃а́гѡ великомꙋ́ченика пантелеи́мона, / ми́лостиве, ѡ҆чи́сти / мно́жєства согрѣше́нїй на́шихъ."
 },
 {
  "type": "TEXT",
  "value": "[Стїхи́ра, гла́съ в҃: Млⷭ҇тиваго хрⷭ҇та̀, пантелеи́моне, / молѝ ны́нѣ, врачꙋ̀ бо́жїй, / и҆зба́вити мѧ̀ страсте́й / и҆ поми́ловати мѧ̀. ]"
 },
 {
  "type": "TEXT",
  "value": "И҆ ны́нѣ: Мл҃твами бцⷣы, / ми́лостиве, ѡ҆чи́сти / мно́жєства согрѣше́нїй на́шихъ."
 },
 {
  "type": "TEXT",
  "value": "И҆ посе́мъ: Поми́лꙋй мѧ̀ бж҃е, / по вели́цѣй ми́лости твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ."
 },
 {
  "type": "HEADER",
  "value": "И҆ стихира самогласна, глас г҃:"
 },
 {
  "type": "TEXT",
  "value": "В озсїѧ̀ дне́сь сла́внаѧ па́мѧть твоѧ̀, / пантелеи́моне многострада́льне, / созыва́ющи на́съ, празднолю́бцевъ, / на хвалꙋ̀ и҆ сла́вꙋ хрⷭ҇тꙋ̀ бг҃ꙋ на́шемꙋ, / въ тебѣ̀ и҆сто́чникъ чꙋде́съ на́мъ ꙗ҆́вльшемꙋ, / тѣ́мъ притека́юще къ ра́цѣ моще́й твои́хъ, / и҆сцѣле́нїй дарова̑нїѧ прїе́млемъ, / вѣнча́вшаго тебѣ̀ сп҃са хрⷭ҇та̀ воспѣва́ѧ во вѣ́ки, / непреста́нно сла́вѧще."
 },
 {
  "type": "HEADER",
  "value": "Канѡ́нъ бцⷣы со и҆рмосо́мъ на ѕ҃. И҆҆ ст҃а́гѡ на и҃. Творе́нїе Ѳеофа́ново, є҆гѡ́же краегране́сїе: Пантелеи́мона всеизрѧ́днаго мꙋ́ченика пою̀. Гла́съ в҃. Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Во глꙋбинѣ̀ постла̀ и҆ногда̀ / фараѡни́тское всево́инство преѡрꙋже́ннаѧ си́ла, / вопло́щшеесѧ же сло́во всеѕло́бный грѣ́хъ потреби́ло є҆́сть: / препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "П ристꙋ́пль ᲂу҆се́рднѡ ко хрⷭ҇тꙋ̀, / пре́жде сконча́нїѧ є҆́же ѡ҆ хрⷭ҇тѣ̀, мертвеца̀ пе́рвѣе воздви́глъ є҆сѝ, / ны́нѣ же мѧ̀, пребога́те, ᲂу҆мерщвле́на грѣхо́внымъ ᲂу҆грызе́нїемъ, / твои́ми моли́твами, ѽ пантелеи́моне, ѡ҆животворѝ."
 },
 {
  "type": "TEXT",
  "value": "В озсїѧ̀ ꙗ҆́коже ѕвѣзда̀, носѧ̀ во ю҆́ности ста́ростный и҆ бг҃омꙋ́дрый ра́зꙋмъ: / добро́тою же тѣ́ла благолѣ́пїе дꙋшѝ стѧжа́въ, / препросла́вленномꙋ сло́вꙋ ꙗ҆ви́лсѧ є҆сѝ прекра́сенъ."
 },
 {
  "type": "TEXT",
  "value": "Оу҆ мертви́всѧ мі́рꙋ, и҆ во хрⷭ҇та̀, блаже́нне, ѡ҆дѣ́ѧвсѧ ба́нею креще́нїѧ, / бы́лъ є҆сѝ бг҃оно́сенъ ѻ҆рга́нъ, и҆ прїѧ́телище дѣ́йства дх҃ꙋ, / всѣ̑мъ ᲂу҆гожда́ѧ, всѣ́хъ ᲂу҆врачꙋ́ѧ недꙋ́ги."
 },
 {
  "type": "TEXT",
  "value": "П ремꙋ́дрость сестрꙋ̀ себѣ̀ притвори́въ, и҆ прича́стникъ жи́зни ведо́мь, / ѿ неѧ̀ почти́лсѧ є҆сѝ, / и҆ вѣнце́мъ дарова́нїй ᲂу҆краси́лсѧ є҆сѝ, / бжⷭ҇твенныѧ зарѝ, блаже́нне, ѡ҆блиста́ѧ свѣ́тлостїю."
 },
 {
  "type": "TEXT",
  "value": "Бг҃оро́диченъ: Благослове́нми, прест҃а́ѧ чⷭ҇таѧ, / є҆стество̀ ᲂу҆да́лено преслꙋша́нїемъ бы́вшее ѿ зижди́телѧ, / хрⷭ҇та̀ ро́ждши вѣнча́ла є҆сѝ, и҆ тлѣ́нїѧ свободи́ла є҆сѝ. / тѣ́мже ра́дꙋющисѧ, всѝ вѣ́рнїи тѧ̀ ᲂу҆блажа́емъ."
 },
 {
  "type": "TEXT",
  "value": "Катава́сїа: Ѿве́рзꙋ ᲂу҆ста̀ моѧ̑, / и҆ напо́лнѧтсѧ дх҃а, / и҆ сло́во ѿры́гнꙋ цр҃и́цѣ мт҃ри, / и҆ ꙗ҆влю́сѧ свѣ́тлѡ торжествꙋ́ѧ, / и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Процвѣла̀ є҆́сть пꙋсты́нѧ, ꙗ҆́кѡ крі́нъ гдⷭ҇и, / ꙗ҆зы́ческаѧ неплодѧ́щаѧ цр҃ковь, / прише́ствїемъ твои́мъ, / въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "С ловеса̀ дх҃а ᲂу҆слы́шавъ, / бы́лъ є҆сѝ ꙗ҆́кѡ землѧ̀ до́браѧ и҆ благопло́днаѧ, / прїе́мый сѣ́мѧ многоцѣ́нно, / и҆ роди́вый, треблаже́нне, спасе́нїе дꙋша́мъ."
 },
 {
  "type": "TEXT",
  "value": "Оу҆ мертви́лъ є҆сѝ мꙋдрова́нїе ѕмїи́на ᲂу҆грызе́нїѧ, и҆ дꙋ́шꙋ ѡ҆живи́лъ є҆сѝ, / бг҃одохнове́ннѡ возроди́всѧ, и҆ цр҃ю̀ всѣ́хъ предстоѧ̀."
 },
 {
  "type": "TEXT",
  "value": "П осрами́лъ є҆сѝ безбо́жное мꙋчи́телей повелѣ́нїе, и҆ ко хрⷭ҇тꙋ̀ прите́клъ є҆сѝ: / вмѣ́стѡ всѣ́хъ сего̀ стѧжа́въ, / и҆ бы́лъ є҆сѝ, бг҃омꙋ́дре, вели́кїй кꙋпе́цъ."
 },
 {
  "type": "TEXT",
  "value": "М а́тере твоеѧ̀ благоче́стїе возлю́бль, сла́вне, / ѻ҆́ч҃ее же возненави́дѣлъ є҆сѝ безбо́жїе многомѧте́жное, / ꙗ҆́кѡ и҆мѣ́ѧ ра́зꙋмъ, лꙋ́чшее и҆збра́лъ є҆сѝ."
 },
 {
  "type": "TEXT",
  "value": "Бг҃оро́диченъ: Носѧ́й бжⷭ҇твеннымъ манове́нїемъ всю̀ тва́рь гдⷭ҇ь, / на рꙋкꙋ̀ но́ситсѧ твоє́ю, дв҃о. / є҆го́же ны́нѣ молѝ, и҆зба́вити ѿ бѣ́дъ пою́щыѧ тѧ̀."
 },
 {
  "type": "TEXT",
  "value": "Катава́сїа: Твоѧ̑ пѣсносло́вцы бцⷣе, / живы́й и҆ незави́стный и҆сто́чниче, / ли́къ себѣ̀ совокꙋ́пльшыѧ дх҃о́внѡ ᲂу҆твердѝ, / въ бж҃е́ственнѣй твое́й сла́вѣ, / вѣнцє́въ сла́вы сподо́би."
 },
 {
  "type": "HEADER",
  "value": "Сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Д о́блѧго страда́льца благоче́стїѧ хрⷭ҇то́ва восхва́лимъ свѣ́тлѡ, пантелеи́мона вѣ́рнїи, / ѱалмы̑ и҆ пѣ́ньми и҆ пѣ́сньми дꙋхо́вными, / и҆́мже мꙋчи́тельство неви́димагѡ врага̀ си́лою бжⷭ҇твенною попра́сѧ, / и҆ недꙋ́гѡвъ и҆сцѣле́нїе бога́тнѡ ѿ гдⷭ҇а дарова́сѧ / творѧ́щымъ вѣ́рнѡ бжⷭ҇твенный и҆ честны́й пра́здникъ є҆гѡ̀."
 },
 {
  "type": "HEADER",
  "value": "Сла́ва, дрꙋгі́й, гла́съ и҆ подо́бенъ то́йже:"
 },
 {
  "type": "TEXT",
  "value": "Є҆ рмола́а мꙋ́драгѡ, мꙋ́чениче, слове́съ послꙋ́шалъ є҆сѝ, / и҆ ѡ҆ста́вилъ є҆сѝ а҆́бїе хꙋдо́жество земно́е, ꙗ҆́кѡ ме́рзско, ꙗ҆́кѡ некрѣ́пко, ꙗ҆́кѡ гꙋби́тельно, / и҆мѣ́ѧ хрⷭ҇то́вы стра̑сти, ᲂу҆чє́нїѧ жи́зни въ се́рдцы твое́мъ, / неисцѣ́льнѡ стра́ждꙋщымъ здра́вїе, пантелеи́моне, да́рꙋѧ. / тѣ́мже моли́сѧ ѡ҆ творѧ́щихъ любо́вїю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ: Треволне́нїи страстны́ми, безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: / да не пре́зриши менѐ ѻ҆каѧ́ннаго поги́бнꙋти, бе́зднꙋ милосе́рдїѧ ро́ждши: / ра́звѣ бо тебє̀ наде́жды не и҆́мамъ. / да не врагѡ́мъ ᲂу҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ, / и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Прише́лъ є҆сѝ ѿ дв҃ы не хода́тай, ни а҆́гг҃лъ, / но са́мъ гдⷭ҇и, вопло́щсѧ, / и҆ спа́слъ є҆сѝ всего́ мѧ человѣ́ка. / тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "П ослѣ́дꙋѧ влⷣцѣ любо́вїю, / расточи́лъ є҆сѝ бога́тство ни́щымъ, / себѣ̀ ѡ҆бнажа́ѧ къ страда́нїю, / є҆́же и҆ проше́лъ є҆сѝ, вѣ̑чныѧ надє́жды прови́дѣвъ."
 },
 {
  "type": "TEXT",
  "value": "Х вале́нїѧ бг҃ꙋ же́ртвꙋ прине́слъ є҆сѝ, ꙗ҆́вѣ возгнꙋша́всѧ і҆́дѡльскихъ тре́бъ: / все́ же шата́нїе нечести́выхъ, страстоте́рпче, попра́лъ є҆сѝ."
 },
 {
  "type": "TEXT",
  "value": "С нѣда́ємымъ за́вистїю, и҆ гнѣ́вомъ бори̑мымъ, / непобори́мꙋю си́лꙋ си̑мъ предста́вилъ є҆сѝ, мꙋ́чениче, / и҆ побѣди́лъ є҆сѝ ѕлочести́вое томле́нїе воѡрꙋжи́всѧ."
 },
 {
  "type": "TEXT",
  "value": "И҆́ же ста́рца сѷмеѡ́на рꙋка́ми держи́мый, / ста́рца тѧ̀ глагѡ́лы, пантелеи́моне, ᲂу҆ловѝ къ бжⷭ҇твенномꙋ разꙋмѣ́нїю, / и҆ ко мно́гихъ спасе́нїю, и҆ и҆збавле́нїю."
 },
 {
  "type": "TEXT",
  "value": "Бг҃оро́диченъ: Ю҆́ныѧ и҆ дѣ̑вы во слѣ́дъ тебє̀ потеко́ша, / дв҃ꙋ и҆ ѻ҆трокови́цꙋ тѧ̀ и҆ мт҃рь зрѧ́ще: / є҆ди́на бо ѻ҆боѧ̑ во є҆ди́но собрала̀ є҆сѝ неска́заннѡ, бг҃оневѣ́сто."
 },
 {
  "type": "TEXT",
  "value": "Катава́сїа: Сѣдѧ́й въ сла́вѣ, / на прⷭ҇то́лѣ бж҃ества̀, / во ѻ҆́блацѣ ле́гцѣ / прїи́де і҆и҃съ пребж҃е́ственный, / нетлѣ́нною дла́нїю, / и҆ сп҃се зовꙋ́щыѧ: / сла́ва хрⷭ҇тѐ си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Просвѣще́нїе во тмѣ̀ лежа́щихъ, / спасе́нїе ѿча́ѧнныхъ, хрⷭ҇тѐ сп҃се мо́й: / къ тебѣ̀ ᲂу҆́тренюю, цр҃ю̀ ми́ра, / просвѣти́ мѧ сїѧ́нїемъ твои́мъ: / и҆но́гѡ бо ра́звѣ тебє̀ бг҃а не зна́ю."
 },
 {
  "type": "TEXT",
  "value": "Р а́достнѡ по́двиги под̾ѧ́лъ є҆сѝ мꙋче́нїѧ, ѡ҆гражде́нъ си́лою бжⷭ҇твенною, / и҆ терпѣ́нїемъ тве́рдѡ мꙋчє́нїѧ под̾е́млѧ, ра́дꙋѧсѧ вопїѧ́лъ є҆сѝ: / и҆но́гѡ бо ра́звѣ тебє̀ бг҃а не зна́емъ."
 },
 {
  "type": "TEXT",
  "value": "Ю҆́ ношеско ты̀ противле́нїе и҆мѣ́ѧ, и҆ тве́рдостїю дꙋшѝ возставле́нїе стѧжа́въ, / всѧ́кꙋ ꙗ҆́звꙋ до́блественнѣ претерпѣ́лъ є҆сѝ, / и҆ мꙋ́жескимъ, блаже́нне, ᲂу҆мо́мъ, / благода́тїю бжⷭ҇твеннагѡ креста̀ ᲂу҆крѣплѧ́емь."
 },
 {
  "type": "TEXT",
  "value": "Н есогла́сное ѿри́нꙋ вѣща́нїе заблꙋ́ждшихъ, / небе́снымъ ᲂу҆че́нїемъ страда́лецъ, и҆ мнѡ́гимъ спасе́нїю пресла́внꙋ бы́сть вино́вникъ, / твои́мъ дѣ́йствомъ, хрⷭ҇тѐ, ᲂу҆крѣплѧ́емь."
 },
 {
  "type": "TEXT",
  "value": "Бг҃оро́диченъ: Речє́нїѧ премꙋ́дрыхъ, и҆ гада̑нїѧ всѧ̑ препросла́влєнаѧ, / и҆ прⷪ҇ро́кѡвъ проречє́нїѧ, тѧ̀ проѡбража́хꙋ проѧвле́ннѡ напослѣ́докъ бы́ти бж҃їю роди́тельницꙋ: / и҆ны́ѧ бо ра́звѣ тебє̀ чⷭ҇тыѧ не зна́емъ."
 },
 {
  "type": "TEXT",
  "value": "Катава́сїа: Оу҆жасо́шасѧ всѧ́чєскаѧ / ѡ҆ бж҃е́ственнѣй сла́вѣ твое́й: / ты́ бо неискꙋсобра́чнаѧ дв҃о, / и҆мѣ́ла є҆сѝ во ᲂу҆тро́бѣ над̾ всѣ́ми бг҃а, / и҆ родила̀ є҆сѝ безлѣ́тнаго сн҃а, / всѣ̑мъ воспѣва́ющымъ тѧ̀, / ми́ръ подава́ющаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Въ бе́зднѣ грѣхо́внѣй валѧ́ѧсѧ, / неизслѣ́днꙋю милосе́рдїѧ твоегѡ̀ призыва́ю бе́зднꙋ: / ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "І҆́ дѡлы лє́стныѧ ѡ҆плева́лъ є҆сѝ, / и҆ возноси́мꙋю пре́лесть ᲂу҆праздни́лъ є҆сѝ, / чꙋдодѣ́йствꙋѧ ди̑внаѧ, и҆ творѧ̀ и҆сцѣлє́нїѧ, бг҃омꙋ́дре."
 },
 {
  "type": "TEXT",
  "value": "В ѣне́чникъ показа́лсѧ є҆сѝ, всеизрѧ́дне, / сквозѣ́ бо ѻ҆́гнь ты̀ проше́лъ є҆сѝ и҆ во́дꙋ: / и҆ на колесѝ протѧза́емь, / пресла́внѡ погꙋби́лъ є҆сѝ безꙋ̑мныѧ."
 },
 {
  "type": "TEXT",
  "value": "М ꙋчи́телей сꙋровство̀ низложи́въ, / неꙋдо́бь носи̑маѧ бїє́нїѧ тѣлє́снаѧ дꙋше́вною крѣ́постїю / пострада́лъ є҆сѝ, бг҃омꙋ́дре, благода́тїю."
 },
 {
  "type": "TEXT",
  "value": "Бг҃оро́диченъ: Содержа́й концы̀ землѝ ꙗ҆́кѡ бг҃ъ, / твои́ми рꙋка́ми, чⷭ҇таѧ, держи́тсѧ, ѡ҆писа́нїемъ тѣ́ла, / и҆́же бжⷭ҇твеннымъ зра́комъ неѡпи́санный."
 },
 {
  "type": "TEXT",
  "value": "Катава́сїа: Бж҃е́ственное сїѐ и҆ всечестно́е / соверша́юще пра́зднество, / бг҃омꙋ́дрїи бг҃омт҃ре, / прїиди́те рꙋка́ми воспле́щимъ / ѿ неѧ̀ ро́ждшагосѧ бг҃а сла́вимъ."
 },
 {
  "type": "HEADER",
  "value": "Конда́къ, гла́съ є҃:"
 },
 {
  "type": "TEXT",
  "value": "П одража́тель сы́й ми́лостивагѡ, / и҆ и҆сцѣле́нїй благода́ть ѿ негѡ̀ прїе́мъ, / страстоте́рпче и҆ мч҃ниче хрⷭ҇та̀ бг҃а, / моли́твами твои́ми дꙋшє́вныѧ на́шѧ недꙋ́ги и҆сцѣлѝ, / ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: / спасѝ ны, гдⷭ҇и."
 },
 {
  "type": "TEXT",
  "value": "І҆́косъ: Безсре́бреника па́мѧть, до́блѧгѡ страда́льца, вѣ́рнагѡ цѣле́бника, / благоче́стнѡ воспое́мъ хрⷭ҇толю́бцы, да прїи́мемъ ми́лость, / па́че же ѡ҆скве́рнши, ꙗ҆́коже и҆ а҆́зъ своѧ̑ хра́мы: / дꙋша́мъ бо и҆ тѣ́лѡмъ возлю́бленнїи и҆сцѣлє́нїѧ подава́етъ. / потщи́мсѧ ᲂу҆̀бо, вѣ̑рнаѧ бра́тїѧ, въ сердца́хъ на́шихъ и҆мѣ́ти є҆гѡ̀ крѣ́пость, / и҆збавлѧ́юща ѿ ле́сти вопїю́щыѧ: / спасѝ ны, гдⷭ҇и."
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, / и҆ въ пла́мень са́ми поидо́ша, / и҆ бо́ги и҆́хъ ѡ҆брꙋга́ша, / средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: / ᲂу҆слы́шасѧ ᲂу҆́же ᲂу҆́стъ ва́шихъ моли́тва."
 },
 {
  "type": "TEXT",
  "value": "З ако́ннѡ стражда̀, и҆ побѣди́въ врага̀, / приста́нище благоꙋти́шно сꙋ́щымъ въ мо́ри, сла́вне, ѡ҆бꙋрева́ємымъ бы́лъ є҆сѝ, / свѣ́тъ же сꙋ́щымъ во тмѣ̀ житїѧ̀, / и҆ пѣ́ти наꙋчи́лъ є҆сѝ: / бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Б лаже́нъ є҆сѝ и҆ добро̀ тебѣ̀ є҆́сть ны́нѣ, преблаже́нне, / воспрїи́мшемꙋ пребога́тнꙋю и҆ бл҃же́ннꙋю наде́ждꙋ твою̀, / ᲂу҆гото́ваннꙋю вѣ́рою гдⷭ҇еви зовꙋ́щымъ: / бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "С т҃ы́хъ дꙋ́шы, и҆ пра́ведныхъ ли́цы, / и҆ безпло́тныхъ чи́ни а҆́гг҃льстїи прїѧ́ша, слико́вника тѧ̀, бл҃же́нне. / мече́мъ бо ᲂу҆сѣ́ченъ бы́въ во главꙋ̀, пое́ши ра́дꙋѧсѧ: / бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Ѻ҆рꙋ́жїе є҆́же пре́жде дре́ва живо́тнагѡ на́съ ѿлꙋчи́вшее, / ны́нѣ ѡ҆браща́емо прїе́млетъ, зна́менавшыѧсѧ кро́вїю, и҆зъ ре́бръ сн҃а твоегѡ̀ и҆зше́дшею, пренепоро́чнаѧ: / бл҃гослове́на є҆сѝ бг҃а пло́тїю ро́ждшаѧ."
 },
 {
  "type": "TEXT",
  "value": "Катава́сїа: Не послꙋжи́ша тва́ри бг҃омꙋ́дрїи / па́че созда́вшагѡ, / но ѻ҆́гненное преще́нїе мꙋ́жески попра́вше, / ра́довахꙋсѧ пою́ще: / препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, / и҆ пла́мень въ ро́сꙋ прело́жшаго бг҃а, / по́йте, дѣла̀, ꙗ҆́кѡ гдⷭ҇а, / и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Б лагопрїѧ́тное твоеѧ̀ хи́трости, дꙋше́вное ѡ҆слѣпле́нїе ѻ҆́тчее и҆сцѣлѧ́етъ, / подаю́щее свѣ́тъ вѣ́рою, преблаже́нне, притека́ющымъ, / и҆ ко сп҃сꙋ хрⷭ҇тꙋ̀ наставлѧ́ющи."
 },
 {
  "type": "TEXT",
  "value": "З а хрⷭ҇та̀ закла́нъ бы́въ, къ вѣ́чнѣй жи́зни преминꙋ́лъ є҆сѝ, / и҆ бг҃озва́ненъ ꙗ҆ви́лсѧ є҆сѝ и҆менова́нїемъ бж҃їимъ, бг҃омꙋ́дре. / тѣ́мъ почита́емъ тѧ̀, и҆ превозно́симъ хрⷭ҇та̀ во вѣ́ки."
 },
 {
  "type": "TEXT",
  "value": "В иті́йское ѿложи́въ лю́тое мꙋ́дрыхъ глꙋмле́нїе, / хрⷭ҇то́вымъ призыва́нїемъ, болѣ́зненныхъ страсте́й корє́нїѧ посѣка́еши, / и҆сцѣлѧ́ѧ превозносѧ́щыѧ хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: Безсме́ртїѧ зарю̀ вѣ́мы и҆сто́чника тѧ̀, бцⷣе, / ꙗ҆́кѡ ро́ждшꙋю сло́ва безсме́ртнагѡ ѻ҆ц҃а̀, всѣ́хъ сме́рти и҆збавлѧ́ющаго, / превозносѧ́щихъ є҆го̀ во вѣ́ки."
 },
 {
  "type": "TEXT",
  "value": "Катава́сїа: Ѻ҆́троки бл҃гочєсти́выѧ въ пещѝ / ржⷭ҇тво̀ бг҃оро́дичо сп҃сло̀ є҆́сть, / тогда̀ ᲂу҆́бѡ ѡ҆бразꙋ́емое: / ны́нѣ же дѣ́йствꙋемое, / вселе́ннꙋю всю̀ воздвиза́етъ пѣ́ти тебѣ̀: / гдⷭ҇а по́йте дѣла̀, / и҆ превозноси́те є҆го̀ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Безнача́льна роди́телѧ сн҃ъ, бг҃ъ и҆ гдⷭ҇ь, / вопло́щсѧ ѿ дв҃ы, на́мъ ꙗ҆ви́сѧ, / ѡ҆мрачє́ннаѧ просвѣти́ти, собра́ти расточє́ннаѧ. / тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "П реста́вилсѧ є҆сѝ ра́дꙋѧсѧ къ жела́нїю коне́чномꙋ, / и҆дѣ́же все́льсѧ, преблаже́нне, блаже́нный коне́цъ прїѧ́ти вои́стиннꙋ сподо́билсѧ є҆сѝ, / сы́й со влⷣкою твои́мъ во вѣ́ки безконє́чныѧ."
 },
 {
  "type": "TEXT",
  "value": "Ж ела́нїе полꙋчи́лъ є҆сѝ, и҆ любвѐ твоеѧ̀ и҆сполне́нїе, / ка́плющей є҆щѐ те́плѣй кро́ви, за хрⷭ҇та̀ и҆злїѧ́вшейсѧ: / ѿ негѡ́же ра́дꙋѧсѧ прїѧ́лъ є҆сѝ вѣнцы̀ по́двигѡвъ твои́хъ."
 },
 {
  "type": "TEXT",
  "value": "Л ьвѡ́въ ᲂу҆ста̀, и҆ ѕвѣре́й зїѧ̑нїѧ, ꙗ҆́коже данїи́лъ дре́вле ты̀ ѡ҆бꙋзда́лъ є҆сѝ: / вѣ́сть бо стыдѣ́тисѧ, мꙋ́чениче, добродѣ́тели и҆ безслове́сное є҆стество̀. / тѣ́мже тѧ̀, пресла́вне, соше́дшесѧ ᲂу҆блажа́емъ."
 },
 {
  "type": "TEXT",
  "value": "Б ога́тнꙋю бла́гость тебѣ̀ хрⷭ҇то́съ да́рꙋетъ, / сокро́вище и҆сцѣле́нїй на́мъ да́рꙋѧ, / и҆ всеми́лостива и҆зволе́нїемъ, тѧ̀ пода́въ всѧ́комꙋ скорбѧ́щемꙋ / и҆ приста́нище ти́хое, и҆ предста́телѧ и҆ защи́тителѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ рꙋно̀, всенепоро́чнаѧ, до́ждь нбⷭ҇ный во ᲂу҆тро́бѣ заче́нши / на́мъ родила̀ є҆сѝ, тишинꙋ̀ даю́щаго, / ꙗ҆́кѡ бг҃а того̀ пою́щымъ, / и҆ тѧ̀ всепѣ́тꙋю бцⷣꙋ проповѣ́дающымъ."
 },
 {
  "type": "TEXT",
  "value": "Катава́сїа: Всѧ́къ земноро́дный / да взыгра́етсѧ дх҃омъ просвѣща́емь, / да торжествꙋ́етъ же безпло́тныхъ ᲂу҆мѡ́въ є҆стество̀, / почита́ющее сщ҃е́нное торжество̀ бг҃омт҃ре, / и҆ да вопїе́тъ: / ра́дꙋйсѧ всебл҃же́ннаѧ / бцⷣе, чⷭ҇таѧ приснодв҃о."
 },
 {
  "type": "HEADER",
  "value": "Свѣти́ленъ. Подо́бенъ: Оу҆ченикѡ́мъ:"
 },
 {
  "type": "TEXT",
  "value": "М и́лостивнꙋю твою̀ дꙋ́шꙋ прови́дѣ бг҃ъ, пантелеи́мона тѧ̀ проповѣ́да: / безсре́бреннѡ бо тре́бꙋющымъ и҆сцѣле́нїе и҆сточа́еши, свѧ́те, / мꙋчи́телей свирѣ́пство терпѣ́пїемъ твои́мъ побѣди́вый. [Два́жды.]"
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Бцⷣꙋ пѣ́сньми немо́лчными благоче́стнѡ пое́мъ, вопїю́ще: / ра́дꙋйсѧ, горо̀ ст҃а́ѧ: / ра́дꙋйсѧ, престо́ле ѻ҆гнено́сный всѣ́хъ цр҃ѧ̀: / ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Д ѣ́ло промышле́нїѧ вы́шнѧгѡ, / є҆́же на тебѣ̀ бы́вшее, / свѣ́тлѡ показа́сѧ: / тѣлє́сныѧ бо стра̑сти цѣли́ти ꙗ҆́вственнѡ, / пантелеи́моне, наꙋча́емь, / дꙋ́шъ ѡ҆брѣ́лсѧ є҆сѝ вра́чь и҆зрѧ́денъ, / сло́вомъ благода́ти ᲂу҆врачꙋ́ѧ всѧ̑, / и҆ мра́чныѧ ле́сти и҆збавлѧ́ѧ, къ тебѣ̀ притека́ющыѧ."
 },
 {
  "type": "TEXT",
  "value": "М и́лости бж҃їи подо́бѧсѧ, / пантелеи́монъ ꙗ҆́вѣ и҆менова́сѧ, / сꙋгꙋ́бо прїе́мъ и҆́мѧ, и҆ подо́бное ве́щи. / ꙗ҆́кѡ сострада́теленъ бо ми́лꙋеши всѣ́хъ, / сꙋгꙋ́бо подаѧ̀ си̑мъ и҆сцѣле́нїе, / пита́ѧ и҆ цѣлѧ̀ / и҆ къ ра́зꙋмꙋ, сла́вне, наставлѧ́ѧ бжⷭ҇твенномꙋ, / и҆ пресвѣ́тломꙋ хрⷭ҇то́вꙋ, пребога́те."
 },
 {
  "type": "TEXT",
  "value": "Д обро́тою, бг҃омꙋ́дре, тѣле́сною / дꙋше́внꙋю добро́тꙋ благодꙋ́шнѡ премѣни́лъ є҆сѝ, / и҆ ᲂу҆́мное благолѣ́пїе плотско́ю красото́ю, / и҆ зрѧ́щыѧ, мч҃ниче, ᲂу҆диви́лъ є҆сѝ, / зна́меньми сїѧ́ѧ и҆ чꙋдесы̀, / цвѣ́томъ ю҆́ности / состарѣ́вшихсѧ ра́зꙋмъ прїе́мъ, / вѣ́рою же и҆ благода́тїю просвѣща́емь."
 },
 {
  "type": "HEADER",
  "value": "Гла́съ є҃. Самогла́сенъ. Ге́рманово:"
 },
 {
  "type": "TEXT",
  "value": "В сесвѣ́тлаѧ мч҃ника па́мѧть сїѧ́етъ ꙗ҆́кѡ со́лнце концє́мъ, / и҆ непреста́ннѡ подава́етъ вѣ̑рнымъ и҆сцѣлє́нїѧ, / недꙋ́ги ѿгонѧ́ющи, и҆ стра̑сти и҆сцѣлѧ́ющи: / мо́литсѧ бо при́снѡ пантелеи́монъ хрⷭ҇тꙋ̀, / дарова́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Сла́ва, гла́съ д҃. Вѷзанті́ево: Дне́сь просїѧ̀ страстоно́сца па́мѧть, / прїиди́те вѣ́рнїи, дꙋхо́внѡ возвесели́мсѧ, / и҆ пѣ́сньми сего̀ вѣнча́емъ: / и҆́бо неви́димаго врага̀ си́лою крⷭ҇тною мꙋ́жески побѣди́лъ є҆́сть, / и҆ мꙋчи́телей безмѣ́рныхъ мꙋ́къ не ᲂу҆боѧ́всѧ, / зако́ннѡ по́честь прїѧ́тъ вы́шнѧгѡ зва́нїѧ: / и҆ ны́нѣ со а҆́гг҃лы вѣ́чнѡ почива́етъ. / но, ѽ мꙋ́чениче хрⷭ҇то́въ пантелеи́моне, / врачꙋ̀ недꙋ́гꙋющихъ и҆ приста́нище ѡ҆бꙋрева́емыхъ, / не преста́й молѧ́сѧ ми́лостивомꙋ бг҃ꙋ, / спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже: Бцⷣꙋ пѣ́сньми немо́лчными благоче́стнѡ пое́мъ, вопїю́ще: / ра́дꙋйсѧ, горо̀ ст҃а́ѧ: / ра́дꙋйсѧ, престо́ле ѻ҆гнено́сный всѣ́хъ цр҃ѧ̀: / ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во."
 },
 {
  "type": "HEADER",
  "value": "На лїтꙋргі́и."
 },
 {
  "type": "TEXT",
  "value": "Бл҃жє́нна ѿ канѡ́на ст҃а́гѡ, пѣ́снь г҃-ѧ на д҃: и҆ пѣ́снь ѕ҃-ѧ на д҃."
 },
 {
  "type": "HEADER",
  "value": "Тропа́рь ст҃а́гѡ, гла́съ г҃:"
 },
 {
  "type": "TEXT",
  "value": "С трастоте́рпче ст҃ы́й и҆ цѣле́бниче пантелеи́моне, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "HEADER",
  "value": "Конда́къ ст҃а́гѡ, гла́съ є҃:"
 },
 {
  "type": "TEXT",
  "value": "П одража́тель сы́й ми́лостивагѡ, / и҆ и҆сцѣле́нїй благода́ть ѿ негѡ̀ прїе́мъ, / страстоте́рпче и҆ мч҃ниче хрⷭ҇та̀ бг҃а, / моли́твами твои́ми дꙋшє́вныѧ на́шѧ недꙋ́ги и҆сцѣлѝ, / ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: / спасѝ ны, гдⷭ҇и."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Д и́венъ бг҃ъ во ст҃ы́хъ свои́хъ, / бг҃ъ і҆и҃левъ. Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ."
 },
 {
  "type": "HEADER",
  "value": "А҆пⷭ҇лъ къ тїмоѳе́ю, зача́ло сч҃в."
 },
 {
  "type": "TEXT",
  "value": "Ч а́до тїмоѳе́е, возмога́й ѡ҆ благода́ти, ꙗ҆́же ѡ҆ хрⷭ҇тѣ̀ і҆и҃сѣ: и҆ ꙗ҆̀же слы́шалъ є҆сѝ ѿ менѐ мно́гими свидѣ́тели, сїѧ̑ преда́ждь вѣ̑рнымъ человѣ́кѡмъ, и҆̀же дово́льни бꙋ́дꙋтъ и҆ и҆ны́хъ наꙋчи́ти. ты̀ ᲂу҆̀бо ѕлопостраждѝ ꙗ҆́кѡ до́бръ во́инъ і҆и҃съ хрⷭ҇то́въ. никто́же бо во́инъ быва́ѧ ѡ҆бѧзꙋ́етсѧ кꙋ́плѧми жите́йскими, да воево́дѣ ᲂу҆го́денъ бꙋ́детъ. а҆́ще же и҆ постра́ждетъ кто̀, не вѣнча́етсѧ, а҆́ще не зако́ннѡ мꙋ́ченъ бꙋ́детъ. трꙋжда́ющемꙋсѧ дѣ́лателю пре́жде подоба́етъ ѿ плода̀ вкꙋси́ти. разꙋмѣ́й ꙗ҆̀же глаго́лю: да да́стъ ᲂу҆́бѡ тебѣ̀ гдⷭ҇ь ра́зꙋмъ ѡ҆ все́мъ. помина́й гдⷭ҇а і҆и҃са хрⷭ҇та̀ воста́вшаго ѿ ме́ртвыхъ, ѿ сѣ́мене дв҃дова, по бл҃говѣствова́нїю моемꙋ̀: въ не́мже ѕлостраждꙋ̀ да́же до ᲂу҆́зъ, ꙗ҆́кѡ ѕлодѣ́й: но сло́во бж҃їе не вѧ́жетсѧ. сегѡ̀ ра́ди всѧ̑ терплю̀ и҆збра́нныхъ ра́ди, да и҆ ті́и спасе́нїе ᲂу҆лꙋча́тъ є҆́же ѡ҆ хрⷭ҇тѣ̀ і҆и҃сѣ, со сла́вою вѣ́чною."
 },
 {
  "type": "HEADER",
  "value": "А҆ллилꙋ́їа, гла́съ в҃."
 },
 {
  "type": "TEXT",
  "value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни во дво́рѣхъ бг҃а на́шегѡ процвѣтꙋ́тъ."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло н҃в."
 },
 {
  "type": "TEXT",
  "value": "Р ечѐ гдⷭ҇ь свои́мъ ᲂу҆ченикѡ́мъ: сѝ заповѣ́даю ва́мъ, да лю́бите дрꙋ́гъ дрꙋ́га. а҆́ще мі́ръ ва́съ ненави́дитъ, вѣ́дите, ꙗ҆́кѡ менѐ пре́жде ва́съ возненави́дѣ. а҆́ще ѿ мі́ра бы́сте бы́ли, мі́ръ ᲂу҆́бѡ своѐ люби́лъ бы: ꙗ҆́коже ѿ мі́ра нѣ́сте, но а҆́зъ и҆збра́хъ вы̀ ѿ мі́ра, сегѡ̀ ра́ди ненави́дитъ ва́съ мі́ръ. помина́йте сло́во, є҆́же а҆́зъ рѣ́хъ ва́мъ: нѣ́сть ра́бъ бо́лїй гдⷭ҇а своегѡ̀. а҆́ще менѐ и҆згна́ша, и҆ ва́съ и҆зженꙋ́тъ: а҆́ще сло́во моѐ соблюдо́ша, и҆ ва́ше соблюдꙋ́тъ. но сїѧ̑ всѧ̑ творѧ́тъ ва́мъ за и҆́мѧ моѐ, ꙗ҆́кѡ не вѣ́дѧтъ посла́вшагѡ мѧ̀. а҆́ще не бы́хъ прише́лъ, и҆ глаго́лалъ и҆̀мъ, грѣха̀ не бы́ша и҆мѣ́ли: ны́нѣ же вины̀ не и҆́мꙋтъ ѡ҆ грѣсѣ̀ свое́мъ. ненави́дѧй менѐ, и҆ ѻ҆ц҃а̀ моего̀ ненави́дитъ. а҆́ще дѣ́лъ не бы́хъ сотвори́лъ въ ни́хъ, и҆̀хже и҆́нъ никто́же сотворѝ, грѣха̀ не бы́ша и҆мѣ́ли: ны́нѣ же и҆ ви́дѣша, и҆ возненави́дѣша менѐ, и҆ ѻ҆ц҃а̀ моего̀. но да сбꙋ́детсѧ сло́во пи́санное въ зако́нѣ и҆́хъ: ꙗ҆́кѡ возненави́дѣша мѧ̀ тꙋ́не. є҆гда́ же прїи́детъ ᲂу҆тѣ́шитель, є҆го́же а҆́зъ послю̀ ва́мъ ѿ ѻ҆ц҃а̀, дх҃ъ и҆́стины, и҆́же ѿ ѻ҆ц҃а̀ и҆схо́дитъ, то́й свидѣ́тельствꙋетъ ѡ҆ мнѣ̀. и҆ вы́ же свидѣ́тельствꙋете, ꙗ҆́кѡ и҆сконѝ со мно́ю є҆стѐ. сїѧ̑ глаго́лахъ ва́мъ, да не соблазните́сѧ. ѿ со́нмищъ и҆жденꙋ́тъ вы̀: но прїи́детъ ча́съ, да всѧ́къ и҆́же ᲂу҆бїе́тъ вы̀ мни́тсѧ слꙋ́жбꙋ приноси́ти бг҃ꙋ."
 },
 {
  "type": "HEADER",
  "value": "Прича́стенъ:"
 },
 {
  "type": "TEXT",
  "value": "В ъ па́мѧть вѣ́чнꙋю бꙋ́детъ првⷣникъ: / ѿ слꙋ́ха ѕла̀ не ᲂу҆бои́тсѧ. / А҆ ллилꙋ́їа, три́жды."
 }
]