[
 {
  "type": "HEADER",
  "value": "Ное́мврїа д҃"
 },
 {
  "type": "HEADER",
  "value": "И҆́же во ст҃ы́хъ ѻ҆тє́цъ на́шихъ всеѧ̀ се́рбїи, просвѣти́телей, и҆ ᲂу҆чи́телей, ст҃и́телей са́ввы, а҆рсе́нїа и҆ маѯі́ма."
 },
 {
  "type": "HEADER",
  "value": "На ма́лѣй вече́рни, на Гдⷭ҇и воззва́хъ, стїхи̑ры на д҃ гла́съ а҃, подо́бенъ."
 },
 {
  "type": "TEXT",
  "value": "Свѧті́и се́рбстїи просвѣти́тєли и҆ ᲂу҆чи́тєли, са́вво, а҆рсе́нїе, и҆ маѯі́ме! При прⷭ҇то́лѣ ꙗ҆́кѡ предстоѧ́ще трїѷпоста́снаго и҆ нераздѣ́льнаго бж҃ества̀ держа́вы, и҆спроси́те ми́ръ мі́рꙋ, и҆ ѻ҆те́чествꙋ и҆збавле́нїе, и҆ дꙋша́мъ на́шымъ ве́лїѧ ми́лости."
 },
 {
  "type": "TEXT",
  "value": "Свѣ́тлый пра́здникъ возсїѧ̀, и҆ весе́лїѧ де́нь по́лнъ сꙋ́щи, во́ньже соверша́емъ па́мѧть ва́шꙋ бж҃е́ственнїи і҆ера́рси: і҆ера́рхѡвъ ра́дованїе, и҆ красото̀ церко́внаѧ: са́вво, а҆рсе́нїе и҆ маѯі́ме. Ва́шими бг҃опрїѧ́тными мл҃твами, ми́ръ мі́рꙋ и҆спроси́те, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Свѣ̑тлыѧ по́двиги въ животѣ̀ свое́мъ, на землѝ показа́сте ѻ҆тцы̀ свѧще́ннѣйшїи, свѣтлѣ̑йшаѧ же дарова̑нїѧ ѿ хрⷭ҇та̀ бг҃а воспрїѧ́сте на нбⷭ҇ѣ́хъ. Тѣ́мже ꙗ҆́кѡ трⷪ҇це со дерзнове́нїемъ предстоитѐ, ми́ръ мі́рꙋ проси́те, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Ꙗ҆́кѡ ѻ҆рлѝ высокопа́рнїи, всю̀ странꙋ̀ ѡ҆блета́юще ѻ҆те́чества своего̀, и҆ сло́во сп҃се́нїѧ возвѣща́юще, є҆́рєси ѿража́юще. Бг҃опроповѣ́дницы ст҃і́и, а҆рхїерє́и бг҃омꙋ́дрїи, са́вво свѧще́нне, и҆ а҆рсе́нїе досточꙋ́дне, со маѯі́момъ сла́внымъ, моли́те сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ в҃:"
 },
 {
  "type": "TEXT",
  "value": "А҆нтѡ́нїево: Бж҃е́ственною любо́вїю разже́гшесѧ ст҃і́и: роди́телей ѡ҆ста́вльше наслѣ̑дїѧ, во́льнѣй нищетѣ̀ да́вшесѧ, стра́нствїемъ ᲂу҆подо́бльшесѧ самомꙋ̀ хрⷭ҇тꙋ̀ бг҃ꙋ. Тѣ́мже ѿ негѡ̀ па́стыри даны̀ бы́сте словє́снымъ є҆гѡ̀ ѻ҆вца́мъ, и҆̀хже ᲂу҆пасо́сте на ѕла́цѣ бл҃гоче́стїѧ, и҆ къ немꙋ̀ преста́вльшесѧ во вѣ́чнꙋю жи́знь, и҆ со і҆ера́рхи свѧты́ми зрѧ́ще сла́вꙋ є҆гѡ̀, є҆мꙋ́же моли́тесѧ ѡ҆ всѣ́хъ, вѣ́рою пра́зднꙋющихъ ны́нѣшнее ва́ше торжество̀, і҆ера́рси бг҃омꙋ́дрїи."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ꙗ҆́кѡ плодови́та лоза̀ дв҃а, и҆зрастѝ тебѐ пло́да живо́тнагѡ, плодоноси́ти мі́рови ве́лїю и҆ бога́тꙋю ми́лость."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ."
 },
 {
  "type": "TEXT",
  "value": "Ра́дꙋйсѧ тро́ице чⷭ҇тна́ѧ, трⷪ҇цꙋ и҆ нераздѣ́льнꙋю проповѣ́давшаѧ ꙗ҆́снѡ, всѣ̑мъ жела́ющымъ сп҃сти́сѧ."
 },
 {
  "type": "TEXT",
  "value": "Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Ст҃и́телємъ є҆стѐ сла́ва, и҆ правосла́вныхъ похвала̀, ѻ҆тцы̀ мꙋ́дри, и҆ наста̑вницы всѣ̑мъ ко спасе́нїю."
 },
 {
  "type": "TEXT",
  "value": "Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Ра́дꙋйсѧ ст҃и́телю са́вво ца́рскаѧ ѻ҆́трасле, ра́дꙋйсѧ а҆рсе́нїе чꙋдодѣ́йственне, ра́дꙋйсѧ маѯі́ме но́вое процвѣте́нїе, ра́дꙋйсѧ тро́ице чⷭ҇тна́ѧ, трⷪ҇цы жили́ще."
 },
 {
  "type": "HEADER",
  "value": "Сла́ва, гла́съ а҃:"
 },
 {
  "type": "TEXT",
  "value": "А҆нтѡ́нїево: Прїиди́те вѣ́рни, дне́съ восхва́лимъ хрⷭ҇тѡ́выѧ і҆ера́рхи, тро́ицꙋ бжⷭ҇твеннꙋю чꙋ́днꙋю. Къ ни̑мъ же возопїи́мъ: са́вво бг҃омꙋ́дре, ᲂу҆чи́телю на́шъ и҆ первосѣда́телю. А҆рсе́нїе чꙋдотво́рче, мона́хѡвъ ра́дованїе, маѯі́ме пресла́вне, цѣломꙋ́дрїѧ рачи́телю, ст҃и́тєли хрⷭ҇то́ви, ᲂу҆крашє́нїѧ сє́рбскаѧ, моли́тесѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ра́дꙋйсѧ бцⷣе дв҃о, ра́дꙋйсѧ похвало̀ всеѧ̀ вселе́нныѧ, ра́дꙋйсѧ пречи́стаѧ мт҃и бж҃їѧ бл҃гослове́ннаѧ."
 },
 {
  "type": "HEADER",
  "value": "Та́же, тропа́рь гла́съ д҃."
 },
 {
  "type": "TEXT",
  "value": "А҆пⷭ҇лѡмъ є҆динора́внїи́, и҆ свѧти́телємъ первопресто́льнїи, всеѧ̀ се́рбїи просвѣти́телїе и҆ ᲂу҆чи́телїе: са́вво, а҆рсе́нїе и҆ маѯі́ме, мо́лите хрⷭ҇та̀ бг҃а, мі́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́ное."
 },
 {
  "type": "HEADER",
  "value": "И҆ ѿпꙋ́стъ."
 },
 {
  "type": "HEADER",
  "value": "На вели́цѣй вече́рни, пое́мъ Бл҃же́нъ мꙋ́жъ, а҃ а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ, поста́вимъ стїхѡ́въ и҃. И҆ пое́мъ стїхи̑ры гла́съ д҃. Самогла́сенъ. Творе́нїе а҆нтѡ́нїа і҆еродїа́кона монастырѧ̀ ра́ковца."
 },
 {
  "type": "TEXT",
  "value": "Разрѣши́сѧ сою́зъ невѣ́денїѧ, и҆ плени́цы раздра́шесѧ мра̑чныѧ, свѣ́тъ возсїѧ̀ бг҃овѣ́дѣнїѧ. И҆́бо хрⷭ҇то́съ мы́сленное со́лнце, а҆́ки ѕвѣ́зды свѣтоза̑рныѧ тро́ическїй ли́къ бг҃оно́сныхъ ѻ҆ц҃є́въ, а҆пⷭ҇льскою ᲂу҆кра́шенныѧ мꙋ́дростїю, и҆ преда̑нїѧ и҆́хъ и҆звѣ̑стныѧ храни́тєли, бл҃гочести́вымъ проповѣ́данїемъ дꙋшеврє́дныѧ развѣ́ѧти пле́велы низпосла̀. Къ ни̑мъ же крестоно́снїи лю́дїе вѣ́рою вопїе́мъ: ѽ і҆ера́рси преѡсвѧще́ннїи, па́стыри бг҃омꙋ́дрїи са́вво, а҆рсе́нїе, и҆ маѯі́ме, моли́тесѧ спасꙋ̀ ѡ҆ дꙋша́хъ на́шихъ."
 },
 {
  "type": "TEXT",
  "value": "Сосꙋ́ди свѧті́и и҆ ѡ҆сщ҃е́ннїи бг҃ꙋ, є҆щѐ ѿ мла́денства вы̀ бы́сте ѻ҆тцы̀ ст҃і́и, сегѡ̀ ра́ди всѧ̑ кра̑снаѧ мі́ра сегѡ̀, ꙗ҆́кѡ несꙋ̑щаѧ ѡ҆ста́вльше, и҆ хрⷭ҇то́во и҆́го ле́гкое на ра́мена своѧ̑ взе́мше, ᲂу҆стре́мльшесѧ є҆дине́нїю, и҆ моли́твеннымъ серпо́мъ стрⷭ҇те́й и҆зниче́ниѧ посѣ́кше, и҆ а҆́гг҃льски на зе́мли пожи́сте. Тѣ́мже бл҃года́ть всест҃а́го дꙋ́ха, бжⷭ҇твенныхъ та̑инъ дѣ́латєли достѡ́йныѧ ꙗ҆вѝ, и҆ па́стыри показа̀ слове́сныѧ па́ствы, ю҆́же бо́дреннѡ на па́житехъ ра́йскїѧ сла́дости ᲂу҆пасо́сте, и҆ преста́вльшесѧ бл҃гоче́стне, пастыренача́льникꙋ хрⷭ҇тꙋ̀, є҆го́же моли́те і҆ера́рси свѧще́ннѣйшїи, дарова́ти на́мъ ве́лїю ми́лость."
 },
 {
  "type": "TEXT",
  "value": "Ѿ вы́шнїѧ мꙋ́дрости напои́сте сво́й ра́зꙋмъ, и҆ ꙗ҆́кѡ рѣ́ки воды̀ и҆сточа́юще ᲂу҆чє́нїѧ ѻ҆тцы̀ бг҃омꙋ́дри, напаѧ́юще дꙋ́шы вѣ́рныхъ, є҆́реси запалє́нїѧ погаша́юще, бы́вше правотѣ̀ дѣ́тєли, ѿ бг҃а ѡ҆богати́вшесѧ чꙋдесы̀, ᲂу҆вѣрѧ́юще повѣ́даємаѧ, ᲂу҆праздни́сѧ ѕло́ба льсти́ваго, и҆́стина хрⷭ҇то́съ ны́нѣ прославлѧ́етсѧ, и҆́же послѣ̑днїѧ дни̑ а҆пⷭ҇лѡмъ соѻбра̑знаѧ показа̀, къ ни̑мъ же возопїи́мъ: а҆рхїерє́и чⷭ҇тні́и, бг҃опроповѣ̑дницы бжⷭ҇твеннїи, тричи́сленный ли́че бг҃оно́сныхъ ѻ҆тцє́въ, са́вво, а҆рсе́нїе и҆ маѯі́ме. Трⷪ҇цꙋ ны́нѣ ᲂу҆моли́те, дарова́ти на́мъ ве́лїю ми́лость."
 },
 {
  "type": "TEXT",
  "value": "Бжⷭ҇твеннаѧ бл҃года́ть всест҃а́го дх҃а, слове́снаго ста́да бг҃одꙋхновє́нныѧ па́стыри сотворѝ, ю҆́же ѿ волкѡ́въ расхищє́нныѧ соблюдо́сте і҆ера́рси свѧще́ннѣйши, свѧще́ннꙋю жи́знь свою̀ бг҃орачи́тельнѣ соверши́вше, преидо́сте вѣ́чнѣй и҆ всеблаже́ннѣй, ра́дꙋющесѧ приснопа́мѧтни, ꙗ҆́кѡ совокꙋ́пльшесѧ а҆пⷭ҇льскомꙋ ли́кꙋ на нбⷭ҇ѝ, при́снѡ зрѧ́тъ сла́вꙋ вседержи́телѧ. И҆̀мже хрⷭ҇толюби́вое собра́нїе соше́дшесѧ вопїе́мъ: се́рбстїи первосвѧти́тєли и҆ ᲂу҆чи́тєли: са́вво, а҆рсе́нїе и҆ маѯі́ме, моли́тесѧ прест҃ѣ́й трⷪ҇це, ми́ръ мі́рꙋ дарова́ти, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Согла́снѡ дне́съ вѣ́рнїи сотворѧ́юще ли́ки, и҆ сте́кшесѧ воспое́мъ трисвѣ́тлꙋю зарю̀ бж҃їѧ це́ркве, бг҃онѡ́сныѧ ѻ҆тцы̀. Сі́и бо премꙋ́дри хꙋдѡ́жницы всѧ̑ наꙋча́юще невѣ̑жи зна́нїю дꙋшепита́тельномꙋ, и҆́же дѣ́лающе мздꙋ̀ прїе́млемъ вѣ́чнꙋющꙋю жи́знь, сегѡ̀ ра́ди тѣ́ми вопїе́мъ: ра́дꙋйсѧ трⷪ҇це є҆диносꙋ́щнѣй вели́ки ᲂу҆гѡ́дницы, тро́ице блаже́ннаѧ, са́вво первосѣда́телю чⷭ҇тны́й, а҆рсе́нїе чꙋдотво́рче и҆ маѯі́ме всеизрѧ́дный, моли́тесѧ ѡ҆ дꙋша́хъ на́шихъ."
 },
 {
  "type": "TEXT",
  "value": "Ꙗ҆́кѡ вѣ́рнїи рабѝ влⷣцѣ своемꙋ̀ хрⷭ҇тꙋ̀, вѣ́рнѡ послꙋжи́сте прпⷣбнїи ѻ҆тцы̀, врꙋчє́нныѧ тала́нты ᲂу҆сꙋгꙋблѧ́юще премꙋ́дри, не ꙗ҆́коже лѣни́ви въ землѝ скры́вше. Тѣ́мже и҆ сꙋгꙋ̑быѧ пѡ́чести прїе́мше на нбⷭ҇ѣ́хъ, бжⷭ҇твеннїи і҆ера́рси, и҆̀мже благочести́вое собра́нїе совокꙋпи́вшесѧ вопїе́мъ: на́ши просвѣти́тєли и҆ ᲂу҆чи́тєли, са́вво, а҆рсе́нїе и҆ маѯі́ме, и҆новѣ̑рныѧ ꙗ҆зы́ки ᲂу҆кроти́те, и҆ безбѡ́жныѧ а҆га́рѧни разжени́те, бг҃опрїѧ́тными мл҃твами ва́шими, и҆ спаси́те дꙋ́ши на́шѧ."
 },
 {
  "type": "TEXT",
  "value": "Ра́дꙋйсѧ тро́ице свѧще́ннаѧ, трⷪ҇цы всесвѣ́тлое жили́ще, и҆́же ѿ чре́слъ ма́тернихъ прилѣпи́вшесѧ бг҃ꙋ, и҆ сегѡ̀ благода́тїю па́стыри бы́вше слове́сныхъ ѻ҆ве́цъ, и҆ сїѧ̑ воспита́сте на ѕла́цѣ бл҃гоче́стїѧ, ѧ҆зы́къ ѻ҆́гненъ и҆мꙋ́ще, и҆́мже є҆ресе́й попали́сте хвра́стїе, правосла́вїе ᲂу҆ѧсни́сте, и҆ лю́ди своѧ̑ наꙋчи́сте благовѣ́рїю, и҆ до́брѣ преста́вльшесѧ свѧті́и во ст҃ꙋ́ю жи́знь вѣ́чнꙋю. Тѣ́мже сщ҃е́нное собра́нїе, бл҃гочести́вїй се́рбскїй ро́де, хвалꙋ̀ бг҃ꙋ ты̀ возда́й, воспо́й пѣ́снь но́вꙋ, и҆ похвалѝ свѣтоно́снꙋю зарю̀ мы́сленнагѡ со́лнца, и҆̀мже возопїе́мъ: бг҃одꙋхнове́нни столпѝ, і҆ера́рси преѡсвѧще́нїи бж҃їѧ це́ркве, са́вво, а҆рсе́нїе и҆ маѯі́ме! Ва́шими ᲂу҆чє́нїи ѡ҆зари́шесѧ бг҃оразꙋ́мїю свѣ́томъ, и҆ спⷭ҇нїе ᲂу҆лꙋчи́хомъ ѿ хрⷭ҇та̀ бг҃а спа́са дꙋ́шъ на́шихъ."
 },
 {
  "type": "TEXT",
  "value": "Прест҃ы́ѧ живонача́льныѧ є҆диносꙋ́щныѧ и҆ нераздѣ́льныѧ трⷪ҇цы рачи́тєли бы́сте, преблаже́ннаѧ тро́ице сщ҃е́ннаѧ, и҆ послѣ́доватєли и҆́скреннѣйши, и҆ ст҃а́гѡ и҆́мене проповѣ̑дницы велегла́снѣйши, ѡ҆свѧще́нїѧ главы̑, ѿ ꙗ҆зы́ка бг҃оно́снагѡ, и҆́мже ᲂу҆праздни́сѧ ле́сть многобо́жїѧ, процвѣтѐ пра́вда бг҃озна́нїѧ, неꙋсы́пными трꙋда́ми і҆ера́рхѡвъ пресла́вныхъ, и҆́миже вопїе́мъ: раздѣлє́нныѧ тѣлесѝ, и҆ совокꙋ́плєнныѧ дх҃омъ, бг҃ꙋ предстоѧ́щыѧ, са́вво, а҆рсе́нїе и҆ маѯі́ме, прилѣ́жнѡ моли́тесѧ сп҃сти́сѧ на́мъ."
 },
 {
  "type": "HEADER",
  "value": "Сла́ва, гла́съ и҃."
 },
 {
  "type": "TEXT",
  "value": "А҆нтѡ́нїево: Дарова́нїемъ всест҃а́го дх҃а, ᲂу҆кра́шени ст҃і́и і҆ера́рси, проповѣ́данїемъ бж҃їѧ сло́ва, ꙗ҆́кѡ же ᲂу҆́дицею ѿ тмы̀ безбо́жїѧ, бг҃овѣ́дѣнїѧ свѣ́тꙋ ᲂу҆ловлѧ́юще ꙗ҆зы́ки, и҆ ꙗ҆́кѡ бл҃гоче́стїѧ побѡ́рницы непребори́ми, бг҃огла́снымъ ꙗ҆зы́комъ є҆ресе́й противле́нїе ᲂу҆праздни́ша, и҆ всѧ̑ наꙋчи́ша пѣ́ти, трⷪ҇цꙋ є҆ди́нꙋ непремѣ́ннꙋю, ꙗ҆́кѡ бг҃осло́вїѧ трꙋбы̑ гла́снѣйшыѧ, и҆́миже возопїи́мъ: а҆рхїерє́и честні́и, па́стыри предо́бри, се́рбстїи свѣти́льницы пресвѣ́тли, ст҃и́телємь красото̀, це́ркве бл҃голѣ́пїе, ст҃и́тели хрⷭ҇тѡ́вы, трⷪ҇це бг҃оно́снаѧ: са́вво, а҆рсе́нїе, и҆ маѯі́ме, мо́лите сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Цр҃ь нбⷭ҇ный за человѣколю́бїе:"
 },
 {
  "type": "HEADER",
  "value": "Вхо́дъ, и҆ прокі́менъ днѐ. И҆ чтє́нїѧ г҃."
 },
 {
  "type": "HEADER",
  "value": "На лїті́и, стїхи̑ры, гла́съ а҃. Самогла́сенъ."
 },
 {
  "type": "TEXT",
  "value": "А҆нтѡ́нїево: Стеце́мсѧ ны́нѣ бг҃олюби́вїи, и҆ трапе́зы дꙋхо́вныѧ насы́щшесѧ, сего̀ созыва́етъ на́съ всечⷭ҇тно́е торжество̀ своеѧ̀ па́мѧти, ст҃и́телей бжⷭ҇твеннаѧ тро́ица, и҆ питїѧ̑ предлага́ютъ по проше́нїю коегѡ́ждо, прїиди́те ѻ҆бѣ́дꙋимъ, и҆ хвалꙋ̀ принесе́мъ на́шымъ, ра́дꙋйтесѧ гл҃го́люще, благослове́ннїи ло́зы, мѷроꙋха́ннїи гро́зды, пи́во дꙋхо́вное и҆ска́пающи, и҆ дꙋ́ши вѣ́рныхъ люде́й свои́хъ напаѧ́ющи, ра́дꙋйтесѧ свѣти́льницы пресвѣ́тли, заре́ю бл҃гоче́стїѧ вселе́ннꙋю ѡ҆зарѧ́ющи, ра́дꙋйтесѧ всеѧ̀ се́рбїи, просвѣти́телїе и҆ ᲂу҆чи́телїе, всебл҃же́ни і҆ера́рси хрⷭ҇то́ви, ст҃и́тєли са́вво, а҆рсе́нїе, маѯі́ме, въ свѣ́тꙋ невече́рнемꙋ ꙗ҆́кѡ преста́вльшесѧ, со а҆пⷭ҇ли весели́тесѧ, хрⷭ҇то́вꙋ предстоѧ́ще прⷭ҇то́лꙋ, хода́тайствꙋйте ми́ръ мі́рꙋ, и҆ ѻ҆те́чествꙋ и҆збавле́нїе, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Нб҃о дне́съ свы́ше ра́дꙋетсѧ, и҆ землѧ̀ весели́тсѧ, человѣ́кѡмъ сердца̀ и҆гра́ютъ, и҆ всѧ̀ тва́рь ликовствꙋ́етъ, соверша́ющи ны́нѣ пра́здникъ ра́дованїѧ, и҆ хрⷭ҇то́ва це́рковь красꙋ́етсѧ, трꙋда́ми всечⷭ҇тны́хъ і҆ера́рхѡвъ хрⷭ҇то́выхъ, дꙋхо́внѡ весели́тсѧ, со сщ҃е́нными ча́ды свои́ми, мы́ же ѽ празднолю́бцы, хвала́ми почти́мъ на́шѧ просвѣти́тєли: ра́дꙋйсѧ на́ша красото̀ са́вво бг҃омꙋ́дре, и҆́же земноца́рственнꙋю сла́вꙋ презрѣ́въ, любвѐ ра́ди бж҃їѧ. Ра́дꙋйсѧ чꙋдодѣ́йственне ѻ҆́тче а҆рсе́нїе, при́сными мл҃твами бг҃ꙋ бесѣ́довавъ, и҆ ѿ негѡ̀ вда́лсѧ є҆сѝ па́стырь хрⷭ҇то́ва ста́да. Ра́дꙋйсѧ цѣломꙋ́дрїѧ сто́лпе, но́вое процвѣте́нїе маѯі́ме пребл҃же́нне. Тѣ́мже ѻ҆тцы̀ сщ҃е́ннѣйши, мл҃твꙋ сотвори́те, ѡ҆ всѣ́хъ пра́зднꙋющихъ всечⷭ҇тно́е ва́ше торжество̀."
 },
 {
  "type": "HEADER",
  "value": "Гла́съ в҃."
 },
 {
  "type": "TEXT",
  "value": "Просвѣти́тєли на́шѧ, просвѣти́вшыѧ всю̀ странꙋ̀ ѻ҆те́чества своегѡ̀, ᲂу҆че́нїемь а҆пⷭ҇льскимъ є҆́рєси разгна́вшыѧ, и҆ многобо́жїѧ ѻ҆́бразъ разрꙋши́вшыѧ бл҃гоче́стїѧ проповѣ́данїемъ, трѝ крѣ́пки столпѝ церко́внїи, прїиди́те соше́дшесѧ, ѽ хрⷭ҇тоно́снїи се́рбстїи лю́дїе, благопохва́лимъ на́шѧ ᲂу҆чи́тєли премꙋ̑дрыѧ, заблꙋ́дшымъ наста́вники, ѿча́ѧннымъ ᲂу҆тѣ́хꙋ, печа̑льнымъ весе́лїе, хромы̑мъ хожде́нїе, болѧ́щымъ и҆сцѣле́нїе, во мра́цѣ сꙋ́щымъ свѣти̑ла нелє́стнаѧ, бг҃омꙋ́дрїи ѻ҆тцы̀, бг҃оно́снїи па́стыри, и҆̀мже возопїи́мъ: началопа́стырѧ хрⷭ҇та̀ ᲂу҆ченицы̀, и҆̀же дꙋ́шꙋ положи́вше ѡ҆ ста́дѣ свое́мъ, и҆ прїе́мше ко сп҃сꙋ дерзнове́нїе, є҆мꙋ́же моли́тесѧ і҆ера́рси бжⷭ҇твеннїи, всебл҃же́нне ст҃и́телю са́вво бг҃опрїѧ́тне, а҆рсе́нїе преѡсщ҃е́нне, и҆ маѯі́ме мꙋ́дре, ꙗ҆́кѡ да ми́лостивъ бꙋ́детъ на́мъ де́нь сꙋ́дный, и҆ спасе́тъ дꙋ́ши на́шѧ ꙗ҆́кѡ человѣколю́бецъ."
 },
 {
  "type": "HEADER",
  "value": "Гла́съ г҃."
 },
 {
  "type": "TEXT",
  "value": "Разꙋ́мнѡ разсмотри́въ ꙗ҆́же прехо́дитъ вско́рѣ, земно́е наслажде́нїе, а҆́бїе ѻ҆тца̀ ѡ҆ста́вивъ, вкꙋ́пѣ и҆ ца́рствїѧ наслѣ́дїе, во а҆ѳѡ́нскꙋю всели́лсѧ є҆сѝ го́рꙋ, въ не́йже а҆́гг҃льски пожи́въ, свидѣ́тельствовавъ чꙋдесы̀, бж҃е́ственнымъ манове́нїемъ па́ки возврати́всѧ ѿѻню́дꙋже ѿше́лъ є҆сѝ, и҆ благода́тїю всест҃а́го дꙋ́ха, первост҃и́тель ѻ҆те́чествꙋ твоемꙋ̀, се́рбстѣй землѝ бы́лъ є҆сѝ, и҆ всеизрѧ́дна стѧжа́въ ᲂу҆ченика̀, а҆рсе́нїа чꙋ́днаго мꙋ́жа жела́нїѧ, и҆́же тебѣ̀ сщ҃еннонача́льствовавъ са́вво бг҃омꙋ́дрѣ, и҆ вїногра́дъ хрⷭ҇то́въ є҆го́же ты̀ воздѣ́лавъ, напаѧ́ше дꙋхо́вными вода́ми. Тѣ́мже сщ҃е́ннаѧ дво́ице со маѯі́момъ сла́внымъ, хрⷭ҇та̀ бг҃а мо́лите, дарова́ти на́мъ ве́лїю ми́лость."
 },
 {
  "type": "HEADER",
  "value": "Сла́ва, гла́съ є҃."
 },
 {
  "type": "TEXT",
  "value": "Вострꙋби́мъ трꙋбо́ю пѣ́сней, воскли́кнемъ любо́вїю, и҆ воспле́щемъ рꙋка́ми ра́дꙋющесѧ, во всечⷭ҇тно́е торжество̀ і҆ера́рхѡвъ хрⷭ҇то́выхъ, ца́рїе и҆ кнѧ́зи да стекꙋ́тсѧ, ликовствꙋ́юще, па́стырїе и҆ ᲂу҆чи́телїе, пастыренача́льника хрⷭ҇та̀ подобноревни́тєльныѧ па́стыри, соше́дшесѧ да восхва́лимъ: трисвѣ́тлꙋю зарю̀, мы́сленное со́лнце возвѣща́ющꙋю, сто́лпъ правосла́вїѧ, цѣвни́цꙋ дх҃а, возглаша́ющꙋю бл҃гоче́стїѧ пꙋ́ть, и҆ ѡ҆блича́ющꙋю ѕлосла̑внаѧ ᲂу҆чє́нїѧ: ѻ҆гненѡ́сныѧ ꙗ҆зы́ки, попалѧ́ющыѧ є҆ресе́й те́рнїе: бг҃одохнове́нныѧ мꙋ́жи, пꙋстынолю́бнꙋю добро́тꙋ, а҆рхїере́євъ похвалꙋ̀, це́ркве бл҃голѣ́пїе а҆пⷭ҇льскихъ догма̑тъ тє́плыѧ храни́тєли, се́рбское вели́кое ᲂу҆краше́нїе, си́це рце́мъ: ѽ всест҃ы і҆ера́рси хрⷭ҇тѡ́вы са́вво, а҆рсе́нїе и҆ маѯі́ме, предвари́те вско́рѣ на по́мощь на́шꙋ, ва́съ те́плѣ призыва́ющихъ, и҆ спаси́те ста́до своѐ ѿ всѧ́кихъ напа́стей, мл҃твами ва́шими."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Ге́рманово: Вострꙋби́мъ трꙋбо́ю пѣ́сней, прекло́ншисѧ бо свы́ше всецр҃ѧ̀ мт҃и дв҃а, бл҃гослове́нми вѣнчава́етъ воспѣва́ющыѧ ю҆̀, ца́рїе и҆ кнѧ́зи да стекꙋ́тсѧ, и҆ цр҃и́цѣ да воспле́щꙋтъ. Въ пѣ́снехъ, цр҃ѧ̀ ро́ждши, и҆̀же сме́ртїю держи̑мыѧ пе́рвѣе, разрѣши́ти человѣколю́бнѡ бл҃говоли́вшаго, па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь соше́дшесѧ восхва́лимъ, свѣ́щникъ златоза́рный, свѣтоно́сный ѻ҆́блакъ, нбⷭ҇ъ простра́ннѣйшꙋю, ѡ҆дꙋшевле́нный кївѡ́тъ, ѻ҆гнезра́чный влⷣчень прⷭ҇то́лъ, маннопрїе́мнꙋю златнꙋ́ю ста́мнꙋ, затворе́нꙋю сло́ва две́рь, всѣ́хъ хрⷭ҇тїа́нъ прибѣ́жище. Пѣ́снми бг҃огла́сными похвалѧ́юще си́це рце́мъ: пала́то сло́ва, сподо́би смире́нныхъ на́съ нбⷭ҇наго ца́рствїѧ, ничто́же бо невозмо́жно хода́тайствꙋ твоемꙋ̀."
 },
 {
  "type": "HEADER",
  "value": "На стїхо́внѣ, стїхи̑ры, гла́съ в҃. Самогла́сенъ."
 },
 {
  "type": "TEXT",
  "value": "Кі́ими пѣ́сненными добро́тами воспое́мъ і҆ера́рхи гдⷭ҇ни; раздѣлє́нныѧ тѣлесѝ, и҆ совокꙋплє́нныѧ дꙋ́хомъ, бг҃одꙋхновє́ннаѧ ᲂу҆ста̀, бжⷭ҇твєннаѧ велѣ̑нїѧ всѣ̑мъ повѣ̑дающаѧ ꙗ҆́снѡ, покаѧ́нїѧ трꙋбы̑, бл҃гоче́стїѧ побѡ́рницы непребори̑мыѧ, нерꙋши̑мыѧ столпѝ правосла́вїѧ, бг҃онѡ́сныѧ ѻ҆тцы̀, свѧще́ннѣйшыѧ а҆рхїерє́и, сє́рбскаѧ свѣти̑ла. Трⷪ҇ческимъ просвѣщє́ннаѧ свѣ́томъ, тро́ице бг҃омꙋ́драѧ, и҆̀хже ра́ди шата̑нїѧ врагѡ́въ хрⷭ҇то́съ низложѝ, и҆мѣ́ѧй ве́лїю ми́лость."
 },
 {
  "type": "TEXT",
  "value": "Сті́хъ: Чⷭ҇тна̀ пред̾ гдⷭ҇емъ сме́рть, прпⷣбныхъ є҆гѡ̀."
 },
 {
  "type": "TEXT",
  "value": "Кі́ими похва́льними вѣнцы̀ ᲂу҆вѧзе́мъ просвѣти́тєли на́шѧ; и҆́миже ᲂу҆вѣ́дѣхомъ и҆́стинꙋ, и҆ ѿ тмы̀ свѣ́тꙋ вознесо́хомсѧ, а҆пⷭ҇лѡмъ равнодѣ́телныѧ бг҃онѡ́сныѧ ѻ҆тцы̀, первопа́стырѧ хрⷭ҇та̀ ᲂу҆ченикѝ, и҆ смире́нїѧ ревни́телей, і҆ера́рхѡвъ ᲂу҆краше́нїе, мона́хѡвъ свѧщеннолѣ́пнꙋю добро́тꙋ, трисїѧ́ннꙋю бл҃гоче́стїѧ ѕвѣздꙋ̀, зе́млю се́рбскꙋю просвѣща́ющꙋю ꙗ҆́снѡ. Свѧти́телѧ са́ввꙋ, а҆рсе́нїа, и҆ маѯі́ма. И҆́хже мл҃твами є҆́рєси хрⷭ҇то́съ низложѝ и҆мѣ́ѧй ве́лїю ми́лость."
 },
 {
  "type": "TEXT",
  "value": "Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Кі̑ѧ похва̑льныѧ по́чєсти принесе́мъ свѧти́телємъ хрⷭ҇тѡ́вымъ; преиспещрє́ннымъ добродѣ́телїю, и҆ ᲂу҆крашє́ннымъ бг҃осло́вїѧ мꙋ́дростїю, ст҃остїю кипѧ́щымъ, па́стырємъ ст҃оизбра̑нымъ, бл҃гоче́стїѧ ᲂу҆чи́телємъ, правосла́вїѧ насади́телємъ, ѡ҆рꙋ́жникѡмъ хрⷭ҇тѡ́вымъ, преѡсвѧщє́ннымъ вели̑кимъ а҆рхїере́ѡмъ на́шымъ, рѣка́ми дх҃ѡ́внаѧ дарова̑нїѧ точа́щымъ, всю̀ се́рбскꙋю странꙋ̀ веселѧ́щымъ тече́нїємъ: са́ввꙋ, а҆рсе́нїа и҆ маѯі́ма. И҆̀хже ра́ди проти̑вныѧ хрⷭ҇то́съ низлага́етъ, и҆мѣ́ѧ ве́лїю ми́лость."
 },
 {
  "type": "HEADER",
  "value": "Сла́ва, гла́съ д҃."
 },
 {
  "type": "TEXT",
  "value": "Весели́сѧ се́рбїе, со ѡ҆кре́стными страна́ми, сла́ва бо гдⷭ҇нѧ на тебѣ̀ возсїѧ̀, красꙋ́йсѧ ны́нѣ и҆ ликꙋ́й, и҆́бо равнодѣ́тельнїи дре́вле со́браннымъ въ сїѡ́нѣ, дѣѧ́нїю ѻ҆́нѣхъ ревнꙋ́юще, и҆́хже и҆ дарова́нїй воспрїе́мницы бы́вше, и҆ неизглаго́ланыхъ зри́тєли въ тебѣ̀ просїѧ́ша, творѧ́ще ди̑внаѧ, ᲂу҆твержда́юще прекланѧ́ющихсѧ паде́нїю, и҆̀мже возопїи́мъ: трисвѣ́тлїи зари̑ незаходи́мое возвѣща́ющїи хрⷭ҇та̀ со́лнце, и҆ трикрѣ́пцыи столпѝ це́ркве, правосла́вїѧ наста̑вницы, бл҃гочє́стїѧ проповѣ́дницы, ст҃и́телей бжⷭ҇твеннаѧ тро́ице, трⷪ҇цѣ нераздѣ́лнѣй ꙗ҆́кѡ предстоѧ́ще са́вво, а҆рсе́нїе и҆ маѯі́ме, є҆́йже моли́тесѧ, ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "При́зри на молє́нїѧ ра̑бъ твои́хъ всенепоро́чнаѧ:"
 },
 {
  "type": "HEADER",
  "value": "На благослове́нїи хлѣ́бѡвъ. Тропа́рь ст҃ы́хъ, гла́съ д҃."
 },
 {
  "type": "TEXT",
  "value": "Ꙗ҆́кѡ а҆пⷭ҇лѡмъ є҆динора́внїѝ, и҆ ст҃и́телемъ первопресто́льнїи, всеѧ̀ се́рбїи просвѣти́телїе и҆ ᲂу҆чи́телїе: са́вво, а҆рсе́нїе и҆ маѯі́ме, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость. Два́жды."
 },
 {
  "type": "TEXT",
  "value": "И҆ Бцⷣе дв҃о: Є҆ди́ножды."
 },
 {
  "type": "HEADER",
  "value": "И҆ ѿпꙋ́стъ. Чте́нїе."
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь. Тропа́рь ст҃ы́хъ, два́жды."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ."
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́ное:"
 },
 {
  "type": "HEADER",
  "value": "По а҃-й каѳі́смѣ сѣда́ленъ, гла́съ а҃:"
 },
 {
  "type": "TEXT",
  "value": "Мі́рѣ живѝ:"
 },
 {
  "type": "TEXT",
  "value": "Трꙋбы̑ дх҃а восхва́лимъ бг҃онѡ́сныѧ і҆ера́рхи, воспѣ́вшыѧ пѣ́снь бл҃гоче́стїѧ, дꙋ́шы веселѧ́щыѧ слы́шащихъ. Тѣ́мже тѣ́ми вопїе́мъ, ѽ свѧта́ѧ тро́ице, трⷪ҇цы ве́лїи ᲂу҆гѡ́дницы, са́вво, а҆рсе́нїе и҆ маѯі́ме, ва́шꙋ па́мѧть чтꙋ́щымъ вѣ́рнѡ, и҆спроси́те спⷭ҇нїе ѿ хрⷭ҇та̀ бг҃а мл҃твами ва́шими."
 },
 {
  "type": "HEADER",
  "value": "Сла́ва, гла́съ и҃."
 },
 {
  "type": "TEXT",
  "value": "Первопресто́льники на́шѧ и҆ ᲂу҆чи́тєли, бж҃е́ствєнныѧ а҆рхїпа́стыри, и҆ просвѣти́тєли, бг҃онѡ́сныѧ ѻ҆тцы̀ вѣ́рою воспои́мъ, бл҃говѣ́рнїи се́рбстїи наро́ди, сі́и бо бл҃гоче́стнѣ живꙋ́ще на землѝ, дꙋхѡ́внаѧ ча̑да своѧ̑ на тве́рди правосла́внагѡ ᲂу҆че́нїѧ водрꙋзи́ша, и҆́хже догма́ты и҆мꙋ́ще а҆́ки зна́менїе спасе́нїѧ, ра́дꙋющесѧ вопїе́мъ: і҆ера́рси бг҃омꙋ́дрїи, са́вво, а҆рсе́нїе и҆ маѯі́ме, моли́те хрⷭ҇та̀ бг҃а, согрѣше́нїй проще́нїе дарова́ти, соверша́ющимъ вѣ́рнѡ всечⷭ҇тно́е ва́ше торжество̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ, воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спⷭ҇нїе въ не́й содѣ́ѧсѧ мѵ́ра, и҆ ѡ҆ставле́нїе дре́внихъ согрѣше́нїй, сегѡ̀ ра́ди и҆ вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, бл҃гочⷭ҇тнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀."
 },
 {
  "type": "HEADER",
  "value": "По в҃ стїхоло́гїи сѣда́ленъ, гла́съ д҃. Подо́бенъ:"
 },
 {
  "type": "TEXT",
  "value": "Вѣ́рою творѧ́щыѧ ва́шъ пра́здникъ свѧще́ннѣйши, ѿ бѣ́дъ и҆з̾е́млете требога́тїи і҆ера́рси, це́ркве забра́ло и҆ бл҃голѣ́пїе, тро́ице прⷭ҇нобл҃же́ннаѧ."
 },
 {
  "type": "HEADER",
  "value": "Сла́ва, гла́съ г҃."
 },
 {
  "type": "TEXT",
  "value": "Ны́нѣ ра́достнѣ крестоно́снїи лю́дїе, соста́вимъ пра́здникъ, и҆ винꙋ̀ сегѡ̀ ѿ чи́ста се́рдца соше́дшесѧ бл҃гопохва́лимъ, вопїю́ще и҆ гл҃го́люще, и҆̀же бг҃а те́плѣ возлюби́вше, и҆ ѿ негѡ̀ мꙋ́дрости нбⷭ҇ныѧ сподо́бльшесѧ свѧті́и, и҆ лю́ди своѧ̑ наꙋчи́сте і҆ера́рси всебл҃же́ннїи, сла́вити трⷪ҇цꙋ є҆диносꙋ́щнꙋю, ца́рствꙋющꙋю во вѣ́къ вѣ́ка."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Бж҃е́ственнаѧ ски́нїѧ была̀ є҆сѝ сло́ва, є҆ди́на пречи́стаѧ мт҃и дв҃о, чисто́тою а҆́гг҃лы превозше́дшаѧ. Па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́нми, ѡ҆чи́сти мл҃твъ твои́хъ бжⷭ҇твенными вода́ми, подаю́щи чⷭ҇таѧ ве́лїю ми́лость."
 },
 {
  "type": "TEXT",
  "value": "Велича́нїе: Велича́емъ ва́съ ст҃и́тели хрⷭ҇тѡ́вы, са́вво, а҆рсе́нїе и҆ маѯі́ме, и҆ чте́мъ ст҃ꙋ́ю па́мѧть ва́шꙋ, вы́ бо мо́лите за на́съ, хрⷭ҇та̀ бг҃а на́шегѡ."
 },
 {
  "type": "HEADER",
  "value": "По полѷеле́й сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрость и҆ сло́во:"
 },
 {
  "type": "TEXT",
  "value": "Премꙋ́дрости вода́ми напои́сте ра́зꙋмъ свѧще́ннѣйшїи, ѿри́нꙋсте земна̑ѧ свѧті́и мꙋдрова̑нїѧ, ᲂу҆мо́мъ все́льшесѧ къ нбⷭ҇нымъ, и҆ ꙗ҆́кѡ рѣ́ки воды̀ и҆злива́ете бг҃ослѡ́внаѧ ᲂу҆чє́нїѧ, и҆ напаѧ́ете жа́ждꙋщыѧ дꙋ́шы невеще́ственными вода́ми бг҃озна́нїѧ. Тѣ́мъ и҆ є҆́рєси ᲂу҆праздни́сте бл҃гоче́стїѧ гл҃го́ломъ, и҆ ꙗ҆́кѡ правосла́вїѧ побѡ́рницы, и҆ це́ркве вели́цыи застꙋ̑пницы, прїе́мше воздаѧ́нїе трꙋдѡ́въ свои́хъ, безконе́чное наслажде́нїе, і҆ера́рси блаже́ннѣйшїи, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, пра́зднꙋющымъ любо́вїю, ст҃ꙋ́ю па́мѧть ва́шꙋ."
 },
 {
  "type": "HEADER",
  "value": "Сла́ва, гла́съ то́йже."
 },
 {
  "type": "TEXT",
  "value": "Си́лою слове́съ бжⷭ҇твенныхъ, всѧ̑ ѕлы̑ѧ ѡ҆бы̑чаи и҆зкорени́сте премꙋ́дрїи і҆ера́рси, и҆ бл҃ги́ми наꙋчи́сте лю́ди своѧ̑ ѻ҆тцы̀ прехва́льнїи. Тѣ́мже и҆ чꙋдесы̀ просла́вистесѧ ѿ гдⷭ҇а, и҆сцѣлє́нїѧ и҆злива́ете, дарова̑нїѧ подае́те всѣ̑мъ приходѧ́щымъ вѣ́рою, па́стыри до́брїи, и҆́стины свидѣ́тєли. Тро́ице бг҃оно́снаѧ, са́вво, а҆рсе́нїе и҆ маѯі́ме! Моли́тесѧ ко хрⷭ҇тꙋ̀ бг҃ꙋ, согрѣше́нїємъ на́шымъ ѡ҆ставле́нїе пода́ти, соверша́ющымъ любо́вїю свѧто́е торжество̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Бл҃года́рственное похвале́нїе до́лжнѣ, ꙗ҆́коже вдо́ваѧ ѻ҆́на два̀ лє́пта, приношꙋ̀ тебѣ̀ влⷣчце ѡ҆ всѣ́хъ дарова́нїихъ твои́хъ, ты́ бо ꙗ҆ви́ласѧ є҆сѝ покро́въ кꙋ́пнѡ и҆ по́мощь, напа́стей и҆ скорбе́й при́снѡ мѧ̀ и҆з̾има́ющи. Тѣ́мже ꙗ҆́кѡ ѿ среды̀ горѧ́щїѧ пе́щи и҆зба́вльсѧ ѡ҆скорблѧ́ющихъ мѧ̀, ѿ се́рдца взыва́ю тѝ: бцⷣе помози́ ми, молѧ́щи хрⷭ҇та̀ бг҃а прегрѣше́нїй ѡ҆ставле́нїе да́ти мнѣ̀ тѧ́ бо и҆мѣ́ю наде́ждꙋ ра́бъ тво́й."
 },
 {
  "type": "HEADER",
  "value": "Степе́нна, а҃ а҆нтїфѡ́нъ, д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Сті́хъ: Всѧ́кое дыха́нїе да хва́литъ гдⷭ҇а."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло л҃з."
 },
 {
  "type": "HEADER",
  "value": "По н҃-мъ ѱалмѣ̀, стїхи́ра, гла́съ в҃. Самогла́сенъ."
 },
 {
  "type": "TEXT",
  "value": "Вѣ́рою любо́вїю собери́тесѧ дне́съ бл҃гочести́ви рачи́телїе: хвалꙋ̀ принесе́мъ спаси́телю бг҃ꙋ на́шемꙋ, да́вшемꙋ на́мъ бл҃гоче́стїѧ ᲂу҆чи́телей, и҆̀же въ послѣ̑днїѧ ро́ды дре́вле бы́вшымъ равнодѣ́тельни бы́вше. Бг҃онѡ́сныѧ ѻ҆тцы̀, свѧще́ннѣйшыѧ і҆ера́рхи, сє́рбскаѧ порождє́нїѧ прїиди́те да восхва́лимъ. На́шѧ просвѣти́тєли и҆ ᲂу҆чи́тєли, свѧще́ннаго са́ввꙋ, ца́рскꙋю ѻ҆́трасль, чꙋ́днаго а҆рсе́нїа мꙋ́жа жела́нїѧ, и҆ достохва́льнаго маѯі́ма свѧще́нства похвалꙋ̀, и҆̀мже возопїи́мъ: ꙗ҆́кѡ до́брѣ тече́нїе соверши́вше, взѧ́стесѧ дꙋ́хомъ на нбⷭ҇а̀, со а҆пⷭ҇ли и҆ і҆ера́рхи прⷭ҇то́лꙋ слꙋ́жите гдⷭ҇а сла́вы, къ немꙋ́же и҆мꙋ́ще дерзнове́нїе свѧті́и, ѡ҆ сро́дствѣ свое́мъ мл҃твꙋ сотвори́сте, є҆́же свободи́тисѧ ѿ рабо́ты ѕловѣ́рныхъ а҆га̑рѧнъ, и҆ сокрꙋши́ти и҆́хъ вознесе́ннꙋю бро́вь, и҆ подъ но́ги вѣ́рныхъ люде́й ѻ҆те́чества своегѡ̀ покори́ти, ꙗ҆́кѡ да и҆́хъ ѡ҆ѕлобле́нїѧ и҆зба́вльшесѧ, и҆ въ ми́рѣ бл҃гоче́стнѡ пожи́вше, па́мѧть ва́шꙋ пра́зднꙋемъ, ва́съ просла́вльшаго сп҃са прославлѧ́емъ, спаса́ющаго дꙋ́шы на́шѧ."
 },
 {
  "type": "HEADER",
  "value": "Канѡ́нъ бцⷣы на ѕ҃, и҆ ст҃ы́хъ на и҃."
 },
 {
  "type": "HEADER",
  "value": "Канѡ́нъ бцⷣы гла́съ и҃, є҆ѧ́же краегране́сїе сицево́е:"
 },
 {
  "type": "TEXT",
  "value": "Сла́влю бг҃а во пло́ти ро́ждшꙋю."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пои́мъ гдⷭ҇ви, прове́дшемꙋ лю́ди своѧ̑ сквозѣ̀ че́рмное мо́ре, ꙗ҆́кѡ є҆ди́нъ сла́внѡ просла́висѧ."
 },
 {
  "type": "TEXT",
  "value": "Сосꙋ́дъ тѧ̀ ѡ҆брѣ́те чистоты̀ бцⷣе гдⷭ҇ь, и҆ всели́сѧ въ тѧ̀, всемꙋ̀ мі́рꙋ спⷭ҇нїе содѣ́ла."
 },
 {
  "type": "TEXT",
  "value": "Заи́мствова ѿ пречи́стыхъ крове́й твои́хъ бцⷣе пло́ть, бж҃їе сло́во,ѡ҆божѝ человѣ́чество."
 },
 {
  "type": "TEXT",
  "value": "Ты̀ є҆ди́на бы́вше жили́ще сн҃а бж҃їѧ, чисто́тою пребо́льша є҆сѝ всѣ́хъ, бцⷣе дв҃о мт҃и живота̀."
 },
 {
  "type": "HEADER",
  "value": "Канѡ́нъ ст҃ы́хъ, гла́съ а҃."
 },
 {
  "type": "TEXT",
  "value": "І҆рмо́съ: Хрⷭ҇то́съ ражда́етсѧ, сла́вите: хрⷭ҇то́съ съ нб҃е́съ, срѧ́щите: хрⷭ҇то́съ на зе́мли, возноси́тесѧ. По́йте гдⷭ҇еви всѧ̑ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ."
 },
 {
  "type": "TEXT",
  "value": "Хрⷭ҇тꙋ̀ ѿ ю҆́ности прилѣпи́вшесѧ ст҃і́и чꙋдотво́рцы, тѣ́мъ дарова́нїе ѿ негѡ̀ прїе́мше сла́вꙋ ст҃ы́хъ, и҆ вели́кое дерзнове́нїе, хода́тайствꙋйте да́ръ хвале́нїѧ, ꙗ҆́кѡ да почти́мъ пѡ́двиги и҆ трꙋды̀ ва́шѧ бг҃омꙋ́дрїи."
 },
 {
  "type": "TEXT",
  "value": "Трⷪ҇ческимъ свѣ́томъ просвѣти́сте ра́зꙋмъ і҆ера́рси, тѣ́мъ земно́е мꙋдрова́нїе ѿве́ргше, ꙗ҆́стѣсѧ, премꙋ́дро непреходѧ́щагѡ прїѧ́тїѧ трꙋдѡ́въ, въ не́мже, собо́рнѡ ра́дꙋетсѧ во сла́вѣ вѣ́чнꙋющей."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ є҆ди́на ро́ждшаѧ и҆сто́чника жи́зни гдⷭ҇а. Ра́дꙋйсѧ и҆зба́вльшаѧ є҆́ѵꙋ ѿ клѧ́твы, ра́дꙋйсѧ, всемꙋ̀ ро́дꙋ человѣ́ческомꙋ ѿве́рзшаѧ ра́й, бцⷣе чⷭ҇таѧ неискꙋсобра́чнаѧ."
 },
 {
  "type": "HEADER",
  "value": "И҆́нъ канѡ́нъ, гла́съ д҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дꙋ́ха, и҆ сло́во ѿры́гнꙋ цари́цѣ ма́тери, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "При́зри на хꙋдоро́дный мо́й ѧ҆зы́къ тро́ице прехва́льнаѧ, и҆ ѻ҆стротꙋ̀ пода́ждь мѝ, ꙗ҆́кѡ да хвалꙋ̀ возсле́мъ гдⷭ҇ꙋ, ва́съ просла́вльшаго досто́йнѣ."
 },
 {
  "type": "TEXT",
  "value": "Неисточа́емаѧ рѣка̀ мꙋ́дрости, ѻ҆рга́нъ дꙋ́ха гремѧ́щъ, и҆́стинное сло́во сла́вꙋ бж҃їю повѣ́дающее, тро́ица бы́вше прⷭ҇нопа́мѧтнаѧ."
 },
 {
  "type": "TEXT",
  "value": "Неисче́тны трꙋды̀ на землѝ ва̑ша, ра́ди люде́й свои́хъ і҆ера́рси, но воздаѧ́нїе неизглаго́ланное, но и҆ дарова́нїе неисче́тно."
 },
 {
  "type": "TEXT",
  "value": "Бг҃оро́диченъ: Оу҆тро́бꙋ дѣ́вичꙋ ѡ҆свѧти́лъ є҆сѝ прїѧ́тїемъ пло́ти сло́ве бж҃їй, и҆ ѡ҆бнови́лъ є҆сѝ ве́сь ро́дъ человѣ́ческїй ржⷭ҇тво́мъ многоми́лостиве твои́мъ."
 },
 {
  "type": "TEXT",
  "value": "Каѳава́сїѧ: Ѿве́рзꙋ ᲂу҆ста̀ моѧ̑."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ стѣна̀ нерꙋши́маѧ ро́дꙋ человѣ́ческомꙋ, пречи́стаѧ дв҃о мт҃и бж҃їѧ, и҆ спасе́нїѧ хода́таица."
 },
 {
  "type": "TEXT",
  "value": "Твою̀ дв҃о по́мощь низпослѝ всѣ̑мъ рабѡ́мъ твои̑мъ, вѣ́рою ѿ тебѣ̀ просѧ́щимъ бл҃года́тнаѧ."
 },
 {
  "type": "TEXT",
  "value": "Тобо́ю клѧ́тїе всеро́дное ѿѧ́тсѧ и҆ бл҃гослове́нїе дарова́сѧ, бцⷣе. Тѣ́мже тѧ̀ вы́нꙋ добро́тѣй҆ ᲂу҆бл҃жа́емъ."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ прⷪ҇ро́кѡвъ прозрѣ́нїе ра́дꙋйсѧ а҆пⷭ҇лѡвъ проповѣ́данїе, ра́дꙋйсѧ и҆́нокѡвъ же́зле, ра́дꙋйсѧ вселе́нїѧ похвало̀ и҆ влⷣчце бцⷣе неискꙋсобра́чнаѧ."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Во и҆́стинꙋ ѿ пре́лести влече́те человѣ́ки, во свѣ́тѣ бг҃озна́нїѧ, бг҃одꙋхнове́нными ᲂу҆чє́нїи ва́шими сщ҃е́ннѣйшїи ѻ҆тцы̀, си́це и҆ ко спасе́нїю наставлѧ́юще."
 },
 {
  "type": "TEXT",
  "value": "Сѐ мы́сленнаго со́лнца лꙋчѝ, возсїѧ́ютъ въ сердца̀ сꙋмѧ́щихъ, и҆ послѣ́днѣйщꙋю и҆́скрꙋ и҆згонѧ́етъ несогласꙋ́ющꙋюсѧ преда́нїе ст҃ы́хъ, и҆̀хже ᲂу҆бл҃жа́емъ ꙗ҆́кѡ те́плыѧ вѣ́ры побо́рники."
 },
 {
  "type": "TEXT",
  "value": "Ны́нѣ да ликꙋ́етъ прозѧ́бшаѧ ва́съ всѧ̀ се́рбїа, и҆ да хва́литсѧ ᲂу҆вѣ́нчана трꙋда́ми ва́шими, бг҃оно́снїи ѻ҆тцы̀, са́вво, а҆рсе́нїе и҆ маѯі́ме, ю҆́же и҆зба́вите и҆зъ рꙋ́къ а҆га́риныхъ ча́дъ."
 },
 {
  "type": "TEXT",
  "value": "Бг҃оро́диченъ: Нетлѣ́нно дѣ́вство ржⷭ҇тво́мъ браконеискꙋ́снымъ, неврежде́на чистота̀ дв҃ы мт҃и быва́етъ, наи́тїемъ бо дх҃а ражда́етъ, пре́жде вѣ̑къ ѿ ѻ҆тца̀ рожде́нное сло́во, ᲂу҆жѐ ᲂу҆бл҃жа́емъ."
 },
 {
  "type": "TEXT",
  "value": "Каѳава́сїѧ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "HEADER",
  "value": "Сѣда́ленъ."
 },
 {
  "type": "TEXT",
  "value": "Ꙗ҆ви́стесѧ а҆пⷭ҇лѡмъ соѻбра́зни въ послѣ̑днїѧ дни̑, сла́вни і҆ера́рси. И҆́бо даде́сѧ ва́мъ та́йны ꙗ҆вле́нїе, благода́тїю бо дх҃а сказꙋ́юще рачи́тельнѡ всѣ̑мъ содержа́нїе є҆ѧ̀. Цѣломꙋ́дрите внима́ющыѧ гл҃го́лѡмъ, и҆ ѿ ти́ны є҆реті́ческаѧ возводѧ́ще ста́до, па́стыри до́бри полага́ющїи дꙋ́шꙋ ѡ҆ ѻ҆вца́хъ, и҆ ѿгонѧ́ете жезло́мъ бг҃одꙋхнове́нныхъ слове́съ мы́слєнныѧ во́лки. Тѣ́мже слы́шасте бл҃га̑ѧ словеса̀ ѿ гдⷭ҇а, и҆ внидо́сте въ ра́дость безгрѣ́шнꙋю, а҆пⷭ҇льскїѧ ли́ки зрѧ́ще весели́тесѧ, трⷪ҇це бг҃омꙋ́драѧ: са́вво, а҆рсе́нїе и҆ маѯі́ме, свѧти́тєли бг҃опрїѧ́тни, се́рбстїи ᲂу҆чи́тєли, моли́те хрⷭ҇та̀ бг҃а, согрѣше́нїй ѡ҆ставле́нїе дарова́ти, вѣ́рнѡ соверша́ющымъ всест҃о́е ва́ше торжество̀."
 },
 {
  "type": "HEADER",
  "value": "Сла́ва, гла́съ то́йже."
 },
 {
  "type": "TEXT",
  "value": "Ве́лїе дерзнове́нїе и҆́мате ко гдⷭ҇ꙋ преѡсщ҃е́ннѣйши і҆ера́рси, мл҃твами свои́ми, ми́лостива ѡ҆ ро́дѣ свое́мъ сотвори́те бг҃оглаго́ливи ѻ҆тцы̀, ꙗ҆́кѡ да ᲂу҆крѣпи́тъ мы́шцꙋ на и҆новѣ̑рныѧ ꙗ҆зы́ки и҆ сокрꙋши́тъ и҆̀хъ. Напа́денїѧ, и҆ наси́лїѧ бг҃оме́зрскихъ и҆ ѕлочести́выхъ а҆га̑рѧнъ и҆зба́витисѧ, хода́тайствомъ ва́шимъ небоѧвле́нни, ꙗ҆́кѡ да всѣ́хъ тѣ́хъ и҆зба́вльшесѧ бл҃гочⷭ҇тнѡ въ ми́рѣ живꙋ́ще, лѣ́тнѡ ва́ше пра́зднꙋемъ торжество̀, бг҃обл҃же́ннїи а҆рхїерє́и, моли́те хрⷭ҇та̀ бг҃а, да ми́лостивъ на́мъ бꙋ́детъ, и҆ спасе́тъ всѧ́кагѡ ѡ҆ѕлобле́нїѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "На всѧ́къ де́нь и҆ ча́съ чрезъ мѡѷсе́а и҆ прⷪ҇ро́ки, взыва́етъ мѧ̀ сн҃ъ тво́й на покаѧ́нїе, ѽ гпⷭ҇жѐ влⷣчце! Но а҆́зъ не то́кмѡ си́мъ но и҆́же а҆́ще кто̀ и҆ ѿ ме́ртвыхъ воста́ше, не бре́гꙋ внима́ти что̀ ᲂу҆́бѡ бꙋ́детъ, и҆ на твоѐ надѣ́юсѧ а҆́зъ ѡ҆каѧ́нный, то́кмѡ къ тебѣ̀ со слеза́ми вопїю̀: напра́ви слꙋ́хъ и҆ ᲂу҆́мъ мо́й къ призыва́ющемꙋ мѧ̀ сн҃ꙋ твоемꙋ̀, да и҆́миже вѣ́сть сꙋдьба́ми наста́витъ мѧ̀ на пꙋ́ть покаѧ́нїѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и смотре́нїѧ твоего̀ та́инство, разꙋмѣ́хъ дѣла̀ твоѧ̑, и҆ просла́вихъ твоѧ̑ чꙋдеса̀."
 },
 {
  "type": "TEXT",
  "value": "Да быва́ютъ на́мъ на врагѝ мы́слєнныѧ и҆ чꙋ̑вственныѧ моли̑твы твоѧ̑ бцⷣе, а҆́ки копїѐ ᲂу҆ѧзвлѧ́ющее сердца̀ и҆́хъ, къ сн҃ꙋ твоемꙋ̀ и҆ бг҃ꙋ на́шемꙋ."
 },
 {
  "type": "TEXT",
  "value": "Рѧ́сны златы́ми ѡ҆дѣ́ѧна и҆ ᲂу҆краше́на ꙗ҆́кѡ всѣ́хъ цр҃ѧ̀ мт҃и ѻ҆деснꙋ́ю предстои́ши бцⷣе, въ мл҃твахъ твои́хъ помина́й на́съ."
 },
 {
  "type": "TEXT",
  "value": "Шата̑нїѧ го́рдыхъ ᲂу҆празднѝ бцⷣе, возмѝ ѿ рꙋ́къ и҆́хъ смирє́нныѧ рабѝ твоѝ дв҃о, моле́бнѡ вопїю́щихъ: спасѝ на́съ мт҃и бж҃їѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный прїѡсѣне́нныѧ ча́щи, прише́лъ є҆сѝ вопло́щьсѧ ѿ неискꙋсомꙋ́жныѧ невеще́ственный и҆ бж҃е: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Веще́ственною ѡ҆бложе́ни пло́тїю і҆ера́рси, а҆га́рѧнское жи́тельство ведꙋ́ще, посредѣ̀ мо́лвъ тиша́йшее. Тѣ́мже ти́хомꙋ и҆ невеще́ственномꙋ свѣ́тꙋ слꙋжа́ще, съ невеще́ственными ли́ки и҆ зове́те: сла́ва си́ле твое́й гдⷭ҇и."
 },
 {
  "type": "TEXT",
  "value": "Щито́мъ бг҃одꙋхнове́нныхъ слове́съ, ᲂу҆мертви́вше и҆ киче́нїе є҆́реси, и҆ сто́лпъ правосла́вныхъ догма́тѡвъ воздви́гше ᲂу҆тверди́вше, а҆пⷭ҇лѡмъ дѣлоѡбра́зни са́вва, а҆рсе́нїй и҆ маѯі́мъ. И҆̀мже зове́мъ: ѡ҆ ро́дѣ мл҃твꙋ ст҃і́и сотвори́те, і҆сма́ительскагѡ и҆́га свободи́тисѧ."
 },
 {
  "type": "TEXT",
  "value": "Ѡ҆бꙋ́вше нѡ́зѣ во ᲂу҆гото́ванїе бл҃говѣствова́нїѧ є҆ѵⷢ҇льскаго мѵ́ра, ше́ствꙋюще ᲂу҆ча́ще во и҆́мѧ ѻ҆ц҃а̀, и҆ сн҃а и҆ ст҃а́гѡ дх҃а, и҆ ра́зꙋмы просвѣти́вше люде́й свои́хъ, ра́дꙋющесѧ равноапⷭ҇льни ѻ҆тцы̀, ꙗ҆́кѡ ᲂу҆сꙋгꙋблѧ́юще тала́нты, ᲂу҆сꙋгꙋблѧ́юще и҆ мздꙋ̀ ѿ гдⷭ҇а благослове́нїй."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ бл҃гоплодови́таѧ лозо̀ дв҃о, ѿ неѧ́же и҆зрастѐ цвѣ́тъ хрⷭ҇то́съ, и҆ ѡ҆божѝ прїѧ́тїемъ пло́ти человѣ́чества, ра́дꙋйсѧ грѣ́шныхъ ми́лостиваѧ моли́твеннице, ра́дꙋйсѧ приста́нище ѡ҆бꙋрева́ємымъ. Ра́дꙋйсѧ дв҃о марі́е мт҃и бж҃їѧ, невѣ́сто неневѣ́стнаѧ."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би."
 },
 {
  "type": "TEXT",
  "value": "Виті́йствꙋюще неизрече́но прекра́снаѧ, и҆ сказꙋ́юще недомы́слєннаѧ, дохнове́нїемъ прест҃а́гѡ дх҃а, тайноводѧ́ще неизглаго́ланномꙋ наслажде́нїю па́ствꙋ свою̀, и҆́стинни па́стыри: са́вво, а҆рсе́нїе и҆ маѯі́ме, началопа́стырѧ хрⷭ҇та̀ ᲂу҆ченицы̀ кротча́йши."
 },
 {
  "type": "TEXT",
  "value": "На гдⷭ҇а наде́ждꙋ и҆мꙋ́ще ст҃і́и, препоѧ́савше чрє́сла и҆́стиною, и҆ ѡ҆бо́лкшесѧ въ брѡнѧ̀ пра́вды, ста́ша проти́вꙋ неви́димыхъ врагѡ́въ, взе́мше побѣди́тельнаѧ, вѣнча́вшесѧ ѿ всецр҃ѧ̀ хрⷭ҇та̀ бг҃а, вѣнцы̀ знаменозри́тельними, ꙗ҆́кѡ дх҃а во́ини предо́блїи."
 },
 {
  "type": "TEXT",
  "value": "Па́че со́лнечныхъ лꙋ̑чь возсїѧ́сте житїе́мъ свѧты́мъ і҆ера́рси гдⷭ҇ни, и҆ повѣ́данїемъ бж҃їихъ велѣ́нїй, тмꙋ̀ безбо́жныѧ є҆́реси прогонѧ́юще свѧще́ннѣйшїи, са́вво, а҆рсе́нїе и҆ маѯі́ме."
 },
 {
  "type": "TEXT",
  "value": "Бг҃оро́диченъ: Ѿ безнача́льнагѡ ѻ҆ц҃а̀ соприсꙋ́щное сло́во, наше́ствїемъ дх҃а ст҃а́го, родила̀ є҆сѝ дв҃о ма́ти. Тѣ́мже и҆ преста́виласѧ є҆сѝ є҆мꙋ̀, во вѣ́чнꙋю жи́знь, ѡ҆ все́мъ мі́рѣ мл҃твꙋ принесѝ, милосе́рдїѧ влⷣкꙋ содѣ́лай влⷣчцею."
 },
 {
  "type": "TEXT",
  "value": "Катава́сїа: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Стрⷭ҇те́й мѧ̀ мглы̀, ꙗ҆́кѡ ѿ глꙋбо́кїѧ но́щи и҆збавлѧ́ѧй, ᲂу҆́треневати сподо́би дꙋ́хъ мо́й молю́сѧ, во свѣ́тѣ днѐ повелѣ́нїй твои́хъ хрⷭ҇тѐ."
 },
 {
  "type": "TEXT",
  "value": "Просвѣтѝ на́съ повелє́нїи твои́ми гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ человѣколю́бче."
 },
 {
  "type": "TEXT",
  "value": "Не и҆мꙋ́ще и҆но́гѡ и҆збавле́нїѧ, ра́звѣ тебѐ мт҃и бж҃їѧ, тебѣ̀ мо́лимсѧ: ѿ всѧ́кагѡ лови́тельства сохранѝ на́съ, бцⷣе дв҃о."
 },
 {
  "type": "TEXT",
  "value": "Дꙋшегꙋби́тєльныѧ стра̑сти ѿженѝ ѿ менѐ ѡ҆каѧ́ннагѡ, и҆ чистоты̀ сосꙋ́дъ мѧ̀ содѣ́лай, да порꙋ́ганъ ꙗ҆́витсѧ вра́гъ мо́й, ѡ҆ мт҃и сло́ва и҆ дв҃о, ꙗ҆́кѡ да сла́влю тѧ̀ спаса́еми."
 },
 {
  "type": "TEXT",
  "value": "Оу҆крѣпи́сѧ на мѧ̀ вра́гъ мо́й, и҆ сладостра́стїемъ бори́тъ дꙋ́шꙋ мою̀ ѿ сегѡ́ мѧ и҆зба́ви чⷭ҇таѧ всенепоро́чнаѧ дв҃о мт҃и бж҃їѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, человѣколю́бче."
 },
 {
  "type": "TEXT",
  "value": "Прⷭ҇то́лъ ᲂу҆краси́сте прехва́льнїи первост҃и́тельства, въ страна́хъ до́мꙋ своегѡ̀ ѻ҆те́чества, бж҃їѧ велѣ̑нїѧ и҆з̾ѧвлѧ́юще. Тѣ́мже сꙋгꙋ́бѡ просла́влени бы́вше, нетлѣ́нїемъ, и҆ чꙋде́съ дарова́нїемъ, ѿ вы́шнїѧ премꙋ́дрости бж҃їѧ, і҆ера́рси хрⷭ҇то́ви премꙋ́дрїи, тро́ице досточꙋ́днаѧ."
 },
 {
  "type": "TEXT",
  "value": "На высотꙋ̀ воздержа́нїѧ, кри́лами бжⷭ҇твенныѧ любвѐ возлетѣ́сте требл҃же́ннїи ѻ҆тцы̀, и҆ заре́ю просвѣще́ннїи нераздѣ́льныѧ трⷪ҇цы, ю҆́же ᲂу҆моли́те тро́ице свѧще́ннѣйшаѧ, ѡ҆ свобо́дѣ ѻ҆те́чества своегѡ̀: са́вво, а҆рсе́нїе и҆ маѯі́ме."
 },
 {
  "type": "TEXT",
  "value": "Сла́вою и҆ че́стїю вѣнча̀ ва́съ сопрⷭ҇носꙋ́щное сло́во ѻ҆́ч҃ее, прпⷣбнїи ѻ҆тцы̀, и҆ дарова́нїемъ жи́зни вѣ́чныѧ, ю҆́же и҆спроси́те всѣ̑мъ вѣ́рою соверша́ющымъ па́мѧть ва́шꙋ."
 },
 {
  "type": "TEXT",
  "value": "Бг҃оро́диченъ: Кто̀ не ᲂу҆диви́тсѧ слы́шай ржⷭ҇тво̀, и҆ неврежде́нное дѣ́вство, и҆ не возвели́читъ бг҃а на́шего, и҆́же за и҆збавле́нїе всѣ́хъ бы́сть зри́мъ, и҆ ны́нѣ є҆́сть, є҆мꙋ́же мт҃и дв҃а, ю҆́же велича́емъ."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Бж҃е́ственною благода́тїю ᲂу҆крѣ́пльшесѧ ᲂу҆гѡ́дницы влⷣчнїи, побѣди́телїе ꙗ҆ви́стесѧ, движе́нїе пло́ти ᲂу҆мертви́вше, а҆́гг҃льски житїѐ вѣ́дꙋще, первопресто́льницы бы́сте лю́демъ свои̑мъ, и҆̀хже назира́юще спаса́йте ѿ всѧ́кагѡ ѡ҆бстоѧ́нїѧ, і҆ера́рси бг҃омꙋ́дрїи."
 },
 {
  "type": "TEXT",
  "value": "Вы̀ бы́сте со́ль землѝ ѻ҆те́чества своегѡ̀ свѧти́телїе, ѡ҆бꙋѧ́вшꙋю ѕловѣ́рїемъ до́брꙋ сотвори́сте, вы̀ и҆ пꙋтеводѝ къ пꙋтѝ спаси́тельномꙋ, рачи́телїе хрⷭ҇то́ви тро́ице пречꙋ́днаѧ: са́вво вели́кїй первопа́стырю се́рбскїй и҆ ᲂу҆чи́телю, а҆рсе́нїе мꙋ́дрый наста́вниче, маѯі́ме свѣ́тлый бг҃олю́бїѧ ѻ҆́бразе."
 },
 {
  "type": "TEXT",
  "value": "Се́рбскїй ро́де благочести́вый, ликꙋ́й и҆ весели́сѧ ны́нѣ, чⷭ҇тнꙋ́ю па́мѧть бг҃оно́сныѧ тро́ицы, тебѐ роди́вшей є҆ѵⷢ҇лїемъ, пра́зднꙋй и҆ принесѝ похва̑льнаѧ вопїю́щи: са́вво, а҆рсе́нїе и҆ маѯі́ме, сла́во на́ша и҆ похвало̀, и҆ просвѣще́нїе."
 },
 {
  "type": "TEXT",
  "value": "Бг҃оро́диченъ: Мт҃и дѣ́вствꙋетъ, и҆ дв҃а, ражда́етъ, ѻ҆боѧ̀ бо є҆стества̀ ᲂу҆ста́вы прехо́дѧтъ. Но и҆дѣ́же дѣ́йствꙋетъ бг҃ъ, и҆зчеза́етъ не́мощь, мы́ же земноро́днїи дивѧ́щесѧ, бг҃а сла́вимъ, тѧ̀ дв҃ꙋ и҆ мт҃ръ свою̀ си́льнѣ возвели́чившꙋю."
 },
 {
  "type": "TEXT",
  "value": "Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й, ты̀ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ роди́ла є҆сѝ безлѣ́тнагѡ сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многоми́лостиве хрⷭ҇тѐ бж҃е на́шъ"
 },
 {
  "type": "TEXT",
  "value": "Въ ри́зꙋ безстꙋ́дїѧ ѡ҆блеко́хсѧ ѻ҆каѧ́нный, ни воззрѣ́ти возмогꙋ̀ на нбⷭ҇нꙋю высотꙋ̀, но тебѣ̀ молю́сѧ мт҃и бж҃їѧ: на стезю̀ наста́ви мѧ̀ покаѧ́нїѧ."
 },
 {
  "type": "TEXT",
  "value": "Мно́жєства мои́хъ лꙋка́выхъ дѣѧ́нїй безстꙋ́дїѧ, ѡ҆крꙋжа́ютъ смире́ннꙋю дꙋ́шꙋ мою̀, ѿ си́хъ и҆зба́ви мѧ̀ нбⷭ҇наѧ цари́цѣ, дв҃о мт҃и бж҃їѧ."
 },
 {
  "type": "TEXT",
  "value": "Ѡ҆бꙋча́хсѧ ѿ млады́хъ ногте́й, на всѧ̑каѧ ѕла̑ѧ дѣѧ̑нїѧ, и҆ ѡ҆блада́ша мно́ю. Ны́нѣ прїидо́хъ въ чꙋ́вство, и҆ позна́хъ ꙗ҆́кѡ нелѣ̑паѧ, и҆ въ намѣ́ренїи є҆́смь каѧ́тисѧ, бцⷣе дв҃о, ты̀ поспѣ́шествꙋй мѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: И҆зъ ᲂу҆тро́бы і҆ѡ́нꙋ и҆зблева̀ морскі́й ѕвѣ́рь, ꙗ҆кова̀ прїѧ́тъ, дв҃ꙋ же все́льшесѧ сло́во, и҆ пло́ть прїе́мшее про́йде сохра́ньше нетлѣ́ннꙋ, є҆го́же бо не пострада̀ и҆стлѣ́нїѧ, ро́ждшꙋю сохранѝ неврежде́нꙋ."
 },
 {
  "type": "TEXT",
  "value": "Є҆ди́нъ ѡ҆ бз҃ѣ стѧжа́вше ра́зꙋмъ, і҆ера́рси гдⷭ҇ни, є҆динодꙋ́шнѡ сохра́нше красотꙋ̀ дꙋше́внꙋю, є҆ди́но дѣ́лающе, є҆диноѡбра́знꙋю мздꙋ̀ прїе́мше, ѿ є҆ди́нагѡ въ тре́хъ ли́цѣхъ бг҃а на́шегѡ, є҆го́же моли́те свѧти́телїе всѣ̑мъ да́ти спⷭ҇нїе."
 },
 {
  "type": "TEXT",
  "value": "Со са́ввою почти́мъ а҆рсе́нїа и҆ маѯі́ма, ꙗ҆́кѡ дꙋ́ха всест҃а́го достѡ́йнаѧ жили̑ща, ꙗ҆́кѡ свѧщеннотаи́нники гдⷭ҇ни, и҆ свѣти̑ла всеѧ̀ се́рбїи, ꙗ҆́кѡ це́ркве забра́ло, и҆ ст҃и́телємъ похвалꙋ̀ и҆ ᲂу҆краше́нїе, и҆ всѣ̑мъ вѣ̑рнымъ ра́дованїе."
 },
 {
  "type": "TEXT",
  "value": "Прє́днѧѧ зрѧ́ще ра́дꙋющесѧ ꙗ҆́кѡ прїе́млемо ва́мъ, не по́мнѧше преходѧ́щаѧ треблаже́ннїи. Сегѡ̀ ра́ди под̾е́мше неисчє́тныѧ трꙋды̀, возвѣща́юще спасе́нїѧ пꙋ́ть, лю́демъ свои̑мъ і҆ера́рси пресла́внїи."
 },
 {
  "type": "TEXT",
  "value": "Бг҃оро́диченъ: Пре́йде зако́ннаѧ сѣ́нь, бг҃ъ прихо́дитъ ѿ дѣ́выѧ ᲂу҆тро́бы, благода́тїю свое́ю ро́дъ человѣ́ческїй ѿ льсти́ваго пре́лести свободѝ. Є҆мꙋ́же вопїе́мъ: приснодв҃ы ма́тере твоеѧ̀ мл҃твами хрⷭ҇тѐ бж҃е поми́лꙋй на́съ."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Бжⷭ҇твенное сїѐ и҆ всечⷭ҇тно́е соверша́юще празднество̀ бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Гла́сꙋ є҆ѵⷢ҇льскомꙋ повинꙋ́вшесѧ бжⷭ҇твеннїи рачи́телїе, вели́чества сла́вꙋ ѡ҆ста́вльше, и҆́го ле́гкое хрⷭ҇то́во прїѧ́ша, ѻ҆́бразы смире́нїѧ показа́ша, и҆ высотꙋ̀ благоро́дїѧ на высотѣ̀ нбⷭ҇нѣй ѡ҆брѣ́тше, ѿѻню́дꙋже зовꙋ́щымъ спⷭ҇нїе хода́тайствꙋйте, свѧти́телїе: са́вво, а҆рсе́нїе и҆ маѯі́ме незаходи̑маѧ свѣти̑ла всеѧ̀ се́рбїи."
 },
 {
  "type": "TEXT",
  "value": "Ꙗ҆́кѡ и҆́скрени рабы̑ вовѣре́нїѧ тала́нты ᲂу҆сꙋгꙋблѧ́юще влⷣцѣ своемꙋ̀, ѻ҆тцє́въ трисвѣ́тлаѧ свѣща̀, тро́ица бг҃оно́снаѧ приснопа́мѧтна, тѣ́мже въ ра́дость вше́дше приснопребыва́ющꙋю гдⷭ҇а своего̀, пречестні́и а҆рхїерє́и и҆ предста́тєли хрⷭ҇то́ви це́ркве, са́вва со а҆рсе́нїемъ и҆ маѯі́момъ сла́внїи."
 },
 {
  "type": "TEXT",
  "value": "Нелицемѣ́рнꙋю вѣ́рꙋ, и҆ любо́вь, непремѣ́ннꙋю наде́ждꙋ и҆ ᲂу҆миле́нїе, всено́щное стоѧ́нїе, и҆ всѧ́кое и҆но́е ᲂу҆мерщвле́нїе пло́ти, любвѐ своеѧ̀ ра́ди, собезнача́льное сло́во ѻ҆ц҃ꙋ̀ ѻ҆́ч҃ее свы́ше зрѧ́й, и҆ мздꙋ̀ даѧ́нїѧ пода́въ, ю҆́же и҆спроси́те вопїю́щымъ: ра́дꙋйсѧ тро́ице бг҃омꙋ́драѧ, бж҃е́ственное ᲂу҆добре́нїе вѣ̑рнымъ, и҆ свѧти́телємъ ве́рхъ и҆ ᲂу҆краше́нїе."
 },
 {
  "type": "TEXT",
  "value": "Бг҃оро́диченъ: Оу҆тѣше́нїе скорбѧ́щихъ, наде́ждо ненадѣ́емыхъ, печа́лꙋющихъ ра́досте, неискꙋсомꙋ́жнаѧ ма́ти, бцⷣе дв҃о, тѧ̀ мо́лимъ рабѝ твоѝ, сокрꙋшѝ и҆новѣ́рныхъ кова̑рства. Правовѣ́рнѡ вѣ́рꙋющихъ сн҃а твоегѡ̀, и҆ и҆́стиннѡ бцⷣꙋ тѧ̀ и҆сповѣ́дающихъ, всенепоро́чнаѧ и҆зба́ви, зовꙋ́щихъ тебѣ̀ бл҃года́тнаѧ: ра́дꙋйсѧ всесвѧта́ѧ марі́е мт҃и бж҃їѧ."
 },
 {
  "type": "TEXT",
  "value": "Катава́сїа: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Конда́къ, гла́съ и҃."
 },
 {
  "type": "TEXT",
  "value": "Подо́бенъ: Возбра́нной."
 },
 {
  "type": "TEXT",
  "value": "Ꙗ҆́кѡ бл҃гоче́стїѧ проповѣ́дателей, и҆ нече́стїѧ ѡ҆бличи́телей, бг҃озда̑нныѧ столпѝ це́ркве и҆ забра̑ла, ст҃и́телємъ ѻ҆́бразъ и҆ надписа́нїе, бг҃онѡ́сныѧ ѻ҆тцы̀ соше́дшесѧ восхва́лимъ: са́ввꙋ сщ҃е́ннаго, а҆рсе́нїа бг҃омꙋ́драго и҆ маѯі́ма чꙋ́днаго. Сі́и бо свѣти́льницы пресвѣ́тли, незаходи́ми вше́дше свѣ́тъ бг҃онача́льницы, всѧ̑ просвѣти́те зовꙋ́щыѧ, і҆ера́рси пресла́внїи: ра́дꙋйсѧ тро́ице пречꙋ́днаѧ, всеѧ̀ се́рбїи вели́кое ᲂу҆краше́нїе."
 },
 {
  "type": "TEXT",
  "value": "І҆́косъ: Тро́ицꙋ свѧтꙋ́ю почти́мъ, во ст҃и́телехъ вели́кое ᲂу҆краше́нїе, ꙗ҆́кѡ трѝ свѣти̑ла це́ркве бж҃їѧ, добродѣ́телми сїѧ́ющыѧ, и҆ просвѣща́юща лю́ди своѧ̑ заре́ю бг҃озна́нїѧ, и҆ и҆зниче́нїѧ є҆ресе́й и҆з̾ ко́рене҆́ и҆згонѧ́ющыѧ, и҆ плоды̀ бл҃гочє́стїѧ насаждаю́щыѧ. Вре́менными вѣ̑чнаѧ стѧжавшымъ, принесе́мъ хвалꙋ̀ і҆ера́рхѡмъ хрⷭ҇тѡ́вымъ сїю̀: ра́дꙋйсѧ тро́ице пречⷭ҇тна́ѧ, живонача́льныѧ трⷪ҇цы велмѝ любє́знѣйшаѧ жили́ща ѿ мла́денства бы́вшаѧ. Ра́дꙋйсѧ тро́ице прⷭ҇нопа́мѧтнаѧ, є҆диносꙋ́щныѧ трⷪ҇цы непребори́ми побѡ́рницы. Ра́дꙋйсѧ тро́ице достосла́внаѧ, трⷪ҇цы ѵ҆поста́сми, бжⷭ҇тво́мъ же нераздѣ́льныѧ є҆ди́ницы, велегла́снїи проповѣ́дницы: ра́дꙋйсѧ прпⷣбныхъ похвало̀, са́вво равноа́гг҃льне: ра́дꙋйсѧ по́стникѡвъ начерта́нїе а҆рсе́нїе: ра́дꙋйсѧ мона́хѡвъ добро́то маѯі́ме но́вое процвѣте́нїе. Ра́дꙋйсѧ тро́ице прехва́льнаѧ, на де́мѡни побѣ́дꙋ взе́мшаѧ, посто́мъ и҆ мл҃твами. Ра́дꙋйсѧ тро́ице бг҃оно́снаѧ, къ бг҃ꙋ во мно́зѣмъ дерзнове́нїи со а҆рхїере́йскими ли́ки предста́вшаѧ. Ра́дꙋйсѧ бл҃голѣ́пїе бг҃одарова́нное хрⷭ҇толюби́выѧ па́ствы. Ра́дꙋйсѧ тро́ице пречꙋ́днаѧ, всеѧ̀ се́рбїи вели́кое ᲂу҆краше́нїе."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ, попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и, бж҃е во вѣ́ки."
 },
 {
  "type": "TEXT",
  "value": "Ми́лости твоеѧ̀, чⷭ҇таѧ дв҃о ма́ти, пꙋчи́нꙋ, и҆зле́й, на ѡ҆каѧ́ннꙋю дꙋ́шꙋ мою̀ бцⷣе, и҆ спаси́ мѧ на тѧ̀ надѣ́ющагосѧ раба̀ твоего̀, въ де́нь и҆спыта́нїѧ."
 },
 {
  "type": "TEXT",
  "value": "Ржⷭ҇тво̀ твоѐ безсѣ́менное, и҆ дѣ́вство неврежде́нное, преднаписа̀ дре́вле кꙋпина̀ неѡпа́льнѡ горѧ́щаѧ, ны́нѣ же веще́й сбытїѐ ви́дѧще дв҃о бцⷣе, дивѧ́щесѧ вопїе́мъ: бл҃гослове́нъ є҆сѝ гдⷭ҇и, бж҃е во вѣ́ки."
 },
 {
  "type": "TEXT",
  "value": "Согрѣшє́нїѧ моѧ̑ а҆́зъ вѣ́мъ, ꙗ҆́кѡ мѧ̀ претѧго́ша, и҆ нѣ́сть спасе́нїѧ наде́жда мнѣ̀, но тебѣ̀ мо́лимсѧ бг҃а ро́ждшей, дв҃о ма́ти, ты́ мѧ спасѝ ѿча́ѧннаго раба̀ твоего̀, да зове́мъ тѝ: бл҃гослове́нна є҆сѝ бг҃а пло́тїю ро́ждшаѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѻ҆́троцы бл҃гоче́стїю совоспи́танни, ѕлочести́ваго велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆ц҃є́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Жезло́мъ ᲂу҆че́нїѧ бл҃гочести́вагѡ, во́лки входѧ́щыѧ и҆́нꙋдѣ во ѡ҆гра́дꙋ хрⷭ҇то́ва ста́да, ѿгони́сте премꙋ́дри па́стыри, и҆ ны́нѣ безбѡ́жныѧ а҆га́рѧны, моли́твенною па́лицею ѿжени́те свѧще́ннѣйши, ѿ бг҃ода́нныѧ ва́мъ хрⷭ҇тоно́сныѧ па́ствы, са́вво, а҆рсе́нїе и҆ маѯі́ме. И҆́бо ве́лїе дерзнове́нїе и҆́мате ко влⷣцѣ хрⷭ҇тꙋ̀, є҆мꙋ́же пое́те: ѻ҆ц҃є́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Глꙋбинꙋ̀ премꙋ́дрости поче́рпше свѧще́ннѣйши, ѿ и҆сто́чника приснопода́тельнаго живо́тныѧ воды̀ мꙋ́дрости, ю҆́же ѿ ᲂу҆́стъ и҆злива́ете ст҃и́телїе гдⷭ҇ни, нашє́ствїѧ є҆ресе́й потопи́сте, жа́ждꙋщыѧ бл҃гоче́стїемъ напои́сте. Тѣ́мъ ра́дꙋющесѧ вопїе́мъ: ѻ҆ц҃є́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Правосла́вїѧ ре́вностїю дыха́юще бг҃одохнове́ннїи па́стырїе, сто́лпъ ѕло́бы є҆реті́ческїѧ разори́вше, и҆ въ не́мъ гнѣзда́ющагосѧ врага̀ ѡ҆бнажи́вше. Тѣ́мъ же спасе́ннїи ѿ пре́лести лю́дїе поѧ́хꙋ: ѻ҆ц҃є́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ черто́же всесвѣ́тлый нбⷭ҇наго цр҃ѧ̀, ра́дꙋйсѧ неѡбыме́ннагѡ носи́вшаѧ хрⷭ҇та̀ дв҃о. Ра́дꙋйсѧ мт҃и вседержи́телѧ неискꙋсомꙋ́жнаѧ. Ра́дꙋйсѧ вселе́нїѧ похвало̀ и҆ ра́дости хода́таице, ра́дꙋйсѧ всѣ̑мъ молѧ́щымъ ти сѧ ми́лости пода́тельнице и҆ спⷭ҇нїе зовꙋ́щымъ: ѻ҆тцє́въ бж҃е бл҃гослове́нъ є҆сѝ."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Въ пе́щи а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и."
 },
 {
  "type": "TEXT",
  "value": "Сокрꙋ́шше чє́люсти хитроплете́ннаго врага̀, побѣдонѡ́снаѧ взе́мше ра́дꙋютсѧ. А҆́гг҃ли вѣнча́ютъ главы̑ ва́шѧ вѣнце́мъ возме́здїѧ, па́ства же бг҃олюби́ваѧ съ весе́лїемъ пое́тъ взыва́юще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Ѻ҆рга́ни дꙋ́ха пѣ́снь согла́снꙋю къ бг҃осло́вїю возшꙋмѧ́щи, сотрѧса́ющи зра́къ зда́нїѧ смертоно́сныѧ пре́лести, пребж҃е́ственнаѧ дꙋ́ха дѣйстви́тельнаѧ благода́ть, ва́съ содѣ́ла свѧти́телїе премꙋ́дри, зовꙋ́щымъ: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Чⷭ҇тно́е дне́съ ва́ше соверша́юще торжество̀, правосла́внїи же і҆ера́рси соблюди́те ѿ всѧ́кїѧ напа́сти и҆ бѣды̀, ꙗ҆́кѡ да спасе́ннїи ра́дꙋющесѧ воспое́мъ: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Всецр҃ѧ̀ носи́ло ра́дꙋйсѧ дв҃о, бл҃гослове́нїе возврати́вшаѧ пре́жднее человѣ́ческомꙋ ро́дꙋ, и҆ ра́й ѿве́рзшаѧ заключе́нный чⷭ҇таѧ, вѣ̑рнымъ была̀ є҆сѝ помо́щница всегда̀, и҆ ны́нѣ зовꙋ́щымъ: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Катава́сїа: Не послꙋжи́ша тва́ри бг҃омꙋ́дрїи па́че созда́вшаго, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "На горѣ̀ свѧтѣ́й просла́вльшасѧ, и҆ кꙋпинѣ̀ ѻ҆гне́мъ прⷭ҇нодв҃ы мѡѷсе́ови та́йнꙋ ꙗ҆́вльшагѡ, гдⷭ҇а по́йте, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "На высотѣ̀ безстра́стїѧ возведи́ мѧ, ѽ мт҃и сло́ва и҆ дв҃о, лежа́щаго во глꙋбинѣ̀ стра́сти ѡ҆каѧ́ннаго, ꙗ҆́кѡ да присноблаже́нныѧ сла́вы прича́стникъ ꙗ҆влю́сѧ, зовꙋ̀: гдⷭ҇а по́йте, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Глꙋбина̀ ѿча́ѧнїѧ менѐ погло́хнꙋ пречи́стаѧ, и҆ дꙋша̀ моѧ̀ го́ресть а҆́да ѡ҆щꙋтѝ содрогнꙋ́сѧ, тебѣ̀ дꙋша́мъ спаси́телѧ ро́ждшей. Бцⷣе дв҃о моли́сѧ, ѿ сегѡ́ мѧ и҆зба́ви зовꙋ́ща: гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Пла́мень лю́тыѧ и҆ смертоно́сныѧ сла́достна стра́сти, росо́ю бл҃года́ти твоеѧ̀ погасѝ бг҃ороди́тельнице, да постыди́тсѧ вра́гъ мо́й тобо́ю побѣжде́нъ бг҃ома́ти, да ликꙋ́ѧ а҆́зъ возвели́чꙋ тѧ̀ спаса́емь всепѣ́таѧ, и҆ воспою̀ съ весе́лїемъ: гдⷭ҇а по́йте, и҆ превозноси́те во всѧ̑ вѣ́ки."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆́же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. Тѣ́мъ воспѣва́юще воспое́мъ: да бл҃гослови́тъ тва́рь всѧ̑ гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "TEXT",
  "value": "Вои́стиннꙋ чꙋ́до преве́лїе слы́шающымъ є҆́сть, ка́кѡ бг҃олю́бїѧ ѻ҆́бразъ са́вва всесвѧты́й. Вели́чества сла́вꙋ и҆ ски́петръ ца́рствїѧ ни во что́же и҆мѣ̀. Бж҃е́ственныѧ любвѐ и҆спо́лненъ и҆ смире́нїѧ ревни́тель а҆ѳѡ́на пости́гъ, въ не́мъ живꙋ́щымъ бѣ̀ похвала̀, и҆ ѻ҆те́чествꙋ даде́сѧ па́стырь и҆́стиненъ."
 },
 {
  "type": "TEXT",
  "value": "Ревнꙋ́ѧ ᲂу҆чи́телю твоемꙋ̀ бг҃омꙋ́дромꙋ са́ввѣ, тѣ́мже и҆ по бл҃же́нномъ ᲂу҆спе́нїи є҆гѡ̀, свѧщеннонача́льства прⷭ҇то́лъ ᲂу҆краша́ѧ, а҆рсе́нїе всечⷭ҇тне хрⷭ҇то́въ і҆ера́рше, бы́лъ є҆сѝ свѣти́ло всеѧ̀ се́рбїи, сїѧ́ѧ лꙋча́ми добродѣ́тели, и҆ бл҃гоче́стїѧ проповѣ́данїемъ, чꙋдодѣ́йственный па́стырю."
 },
 {
  "type": "TEXT",
  "value": "А҆́ще и҆ на послѣ́докъ ты̀ просїѧ́лъ є҆сѝ свѧ́тостїю ѻ҆́ч҃е маѯі́ме, но дародаѧ́нїе ничи́мже ме́нше дре́внихъ, и҆́бо и҆ ли́кꙋ і҆ера́ршескомꙋ ѿ бг҃а причте́нъ є҆сѝ всехва́льне, со первопа́стыри ст҃ы́ми зри́ши сла́вꙋ є҆диноро́днагѡ ѿ ѻ҆ц҃а̀, подъ лѣ́ты бы́вша и҆зволе́нїемъ, томꙋ̀ мл҃твꙋ принесѝ ѡ҆ ро́дѣ."
 },
 {
  "type": "TEXT",
  "value": "Бг҃оро́диченъ: Пре́лестїю ра́й затворѝ преле́стникъ дїа́вѡлъ. Пра́ѻц҃а и҆згна̀ дре́во запреще́нное вкꙋси́вшагѡ, но перворожде́нъ ѿ ѻ҆ц҃а̀ безнача́льный сн҃ъ, и҆́мже всѧ̑ бы́сть, не терпѧ̀ зрѣ́ти го́рдость лꙋка́вагѡ, прїи́мъ ѻ҆́бразъ прельще́нагѡ, содѣ́йствомъ свѧта́гѡ дх҃а, ѿ чⷭ҇тѣ́йшїѧ всеѧ̀ тва́ри дѣви́ческїѧ твоеѧ̀ кро́ви бцⷣе, и҆ сотрѐ си́лꙋ де́мѡна, є҆мꙋ́же воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "HEADER",
  "value": "Гла́съ д҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. Тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Ѿ ю҆́ности возло́жшесѧ цр҃ю̀ и҆ влⷣцѣ своемꙋ̀, хрⷭ҇тꙋ̀, и҆сповѣ́дающе пресла́дкое и҆́мѧ є҆гѡ̀ невѣ́дꙋщымъ, и҆ наꙋча́юще всѧ̑ съ весе́лїемъ воспѣ́ти: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Ны́нѣ свѣ́титсѧ се́рбїа ѻ҆те́чество ст҃ы́хъ и҆ бл҃же́нныхъ свѧщеннонача́льникъ, благочести́вый же ро́дъ ра́достнѣ пра́зднꙋетъ ва́шъ пра́здникъ, а҆рхїере́йскаѧ красото̀, са́вво, а҆рсе́нїе и҆ маѯі́ме, и҆ хва́литсѧ вопїе́тъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Ли́къ ст҃ы́хъ и҆ бж҃е́ственныхъ, во ст҃и́телехъ вели́кое ᲂу҆краше́нїе, са́ввꙋ, а҆рсе́нїа и҆ маѯі́ма, благочестнемꙋ́дренѡ восхва́лимъ вѣ́рни, сі́и бо ны̀ правосла́вными догма́ты ᲂу҆тверди́ша, и҆ воспѣ́ти наꙋчи́ша: гдⷭ҇а по́йте дѣла̀, и҆ превозно́сите є҆го̀ во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Бцⷣе прⷭ҇нодв҃о человѣ́кѡмъ покро́ве, твою̀ всемогꙋ́щꙋю низпослѝ рабѡ́мъ твои̑мъ, и҆ сокрꙋшѝ а҆га̑рѧнскаѧ стрѣлѧ̑нїѧ, свобо́дни покажѝ смирє́нныѧ ны̀, вои́стиннꙋ и҆́стиннꙋю бцⷣꙋ тѧ̀ и҆сповѣ́дающыѧ, и҆ смире́ннѡ сн҃ꙋ твоемꙋ̀ воспѣва́ющыѧ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ прⷭ҇нодв҃о."
 },
 {
  "type": "TEXT",
  "value": "Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ прⷭ҇нодв҃ы, въ на́ше вѣ́рныхъ спⷭ҇нїе, пѣ́снми немо́лчными велича́емъ."
 },
 {
  "type": "HEADER",
  "value": "То́йже припѣ́въ къ си̑мъ тропарє́мъ."
 },
 {
  "type": "TEXT",
  "value": "Бг҃ъ гдⷭ҇ь и҆ ꙗ҆ви́сѧ на землѝ плотоно́сецъ, ра́дꙋйсѧ дв҃о неискꙋсобра́чнаѧ, ѿ твоеѧ́ бо кро́ве заи́мствова. И҆́мже тлѧ̀ потреби́сѧ, и҆ спⷭ҇нїе мі́рꙋ бы́сть, тѧ̀ бцⷣе пѣ́снми немо́лчными велича́емъ."
 },
 {
  "type": "TEXT",
  "value": "Чистоты̀ чистѣ́йши сосꙋ́дъ тѧ̀ є҆ди́нꙋ ѡ҆брѣ́те і҆и҃съ на землѝ бцⷣе, и҆ ꙗ҆́коже са́мъ вѣ́сть въ тѧ̀ всели́сѧ, содѣ́ла спасе́нїю дѣ́лꙋ рꙋ́къ твои́хъ."
 },
 {
  "type": "TEXT",
  "value": "На нбⷭ҇ѝ а҆́гг҃ли тѧ̀ ꙗ҆́кѡ мт҃ръ созда́телѧ своего̀ воспѣва́ютъ, є҆́же ра́дꙋйсѧ бл҃года́тнаѧ марі́е. Мы́ же на зе́мли вопїе́мъ тѝ бцⷣе дв҃о: бл҃гослове́нъ пло́дъ чре́ва твоегѡ̀, и҆́мже спасе́сѧ мі́ръ."
 },
 {
  "type": "HEADER",
  "value": "Гла́съ а҃."
 },
 {
  "type": "TEXT",
  "value": "І҆рмо́съ: Та́инство стра́нное ви́жꙋ и҆ пресла́вное: нб҃о, верте́пъ: прⷭ҇то́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же воспѣва́юще велича́емъ."
 },
 {
  "type": "TEXT",
  "value": "Бл҃года́ть всест҃а́го дꙋ́ха дѣ́йствоваше ꙗ҆́кѡ ѻ҆рга́нѡмъ благопотрє́бнымъ, внꙋ́трь во ва́съ свѧще́ннѣйшїи ѻ҆тцы̀. Тѣ́мъ же ᲂу҆стнѣ̀ дви́жастѣ, ѧ҆зы́комъ ᲂу҆дарѧ́юще, и҆спꙋща́ете гла́съ, и҆́стинное бг҃осло́вїѧ ᲂу҆че́нїе."
 },
 {
  "type": "TEXT",
  "value": "Незаходи́маго со́лнца пресвѣ̑тлыѧ ѕвѣзды̀, да́стесѧ все́й се́рбїи. И҆ ст҃и́телемъ кра́йнее зерца́ло, ста́дꙋ же па́стыри бг҃ода́нни, ѡ҆ ни́хъ же дꙋ́шꙋ полага́юще, ст҃и́тєли гдⷭ҇ни, са́вво, а҆рсе́нїе и҆ маѯі́ме."
 },
 {
  "type": "TEXT",
  "value": "Ꙗ҆́кѡ стрѣлꙋ̀ и҆спꙋща́ете бл҃гоче́стїѧ про́повѣдь, и҆ сеѧ̀ си́лою безъ вѣ́сти сотвори́сте ѕломꙋ́дрствꙋющихъ. Непребори́ми во́ини і҆и҃съ хрⷭ҇то́ви, пребл҃же́ннаѧ тро́ице, трⷪ҇цы вели́ки ᲂу҆гѡ́дницы."
 },
 {
  "type": "TEXT",
  "value": "Бг҃оро́диченъ: Пала́тꙋ всѣ́хъ цр҃ѧ̀, и҆ прⷭ҇то́лъ ѻ҆гнезра́ченъ, всѝ вѣ́рни вѣ́мы тѧ̀ неискꙋсобра́чнаѧ дв҃о чⷭ҇таѧ. Тѣ́мже тѧ̀ немо́лчными пѣ́снми, воспѣва́юще велича́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ра́зꙋмъ неразꙋ̑мнымъ раздра́вше слѣпо́тствовавшїй, бж҃е́ственни свѧщеннонача̑льницы, и҆ просвѣще́нъ ѡ҆щꙋти́вше, хвале́нїе прино́симъ ва́ми просвѣще́нїе да́вшемꙋ на́мъ, є҆ди́номꙋ во трⷪ҇цѣ бг҃ꙋ на́шемꙋ."
 },
 {
  "type": "TEXT",
  "value": "Свѣтоно́снꙋю па́мѧть бг҃оно́сныхъ і҆ера́рхѡвъ, соше́дшесѧ всѧ̑ сє́рбскаѧ племена̀, торже́ственнѡ пра́зднꙋимъ, ꙗ҆́кѡ на́шихъ а҆пⷭ҇лѡвъ свы́ше да́нныхъ: са́ввꙋ свѧще́ннаго, а҆рсе́нїа чꙋ́днаго, и҆ маѯі́ма мꙋ́драго."
 },
 {
  "type": "TEXT",
  "value": "Се́рбскаѧ пресвѣ́тлаѧ ѕвѣздо̀, ѡ҆зарѧ́ющаѧ ᲂу҆́мъ и҆ сердца̀ люде́й свои́хъ лꙋче́ю бг҃овѣ́дѣнїѧ, трегꙋ́баѧ бг҃оно́снаѧ церко́внаѧ красото̀, і҆ера́рхѡвъ похвало̀, на́ше ра́дованїе, а҆рхїерє́и прест҃и."
 },
 {
  "type": "TEXT",
  "value": "Трⷪ҇ченъ: Є҆диночⷭ҇тнаѧ сла́вою, безнача́льнаѧ трⷪ҇це, нераздѣ́льнаѧ бжⷭ҇тво́мъ, раздѣле́на же ли́цы, бж҃е ѻ҆́ч҃е и҆ сн҃е и҆ дш҃е, є҆ди́ницꙋ во трⷪ҇цѣ, и҆ трⷪ҇цꙋ во є҆ди́ницѣ, вѣ́рнѡ тѧ̀ и҆сповѣ́дающыѧ спаса́й."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ ши́ршаѧ нбⷭ҇ъ дв҃о, вмѣ́щшаѧ бг҃а во ᲂу҆тро́бѣ твое́й. Ра́дꙋйсѧ кꙋпино̀ несгара́емаѧ, ржⷭ҇тво́мъ нетлѣ́нно сохра́ншаѧ дѣ́вство, ра́дꙋйсѧ мт҃и є҆мманꙋ́ила бцⷣе."
 },
 {
  "type": "HEADER",
  "value": "Катава́сїа."
 },
 {
  "type": "HEADER",
  "value": "Свѣти́ленъ,"
 },
 {
  "type": "TEXT",
  "value": "Подо́бенъ: Тїверїа́дское мо́ре:"
 },
 {
  "type": "TEXT",
  "value": "Та̑йнаѧ дне́съ дх҃а трꙋбы̑, свѧщє́нныѧ і҆ера́рхи пѣ́снми почти́мъ, сі́и бл҃гоче́стїѧ побѡ́рницы и҆ проповѣ̑дницы, є҆́ресь прогна́ша, правосла́вїе насади́ша."
 },
 {
  "type": "TEXT",
  "value": "Незаходи̑мыѧ ѕвѣзды̀ мы́сленныѧ тве́рди, бг҃онѡ́сныѧ ѻ҆тцы̀ соше́дшесѧ восхва́лимъ, ѽ се́рбскїй ро́де крестоно́сный, своѧ̑ ᲂу҆чи́тєли и҆ просвѣти́тєли, са́ввꙋ, а҆рсе́нїа и҆ маѯі́ма, ꙗ҆́кѡ ѻ҆рꙋ́жники гдⷭ҇ни."
 },
 {
  "type": "TEXT",
  "value": "Бг҃оро́диченъ: При́зри всепѣ́таѧ бцⷣе, на лю́ди ѡ҆ѕлоблє́нныѧ, и҆ по́мощь твою̀ пода́ждь дв҃о, и҆́бо мы̀ немощні́и сꙋ́ще, тѧ̀ мо́лимъ влⷣчце мі́ра."
 },
 {
  "type": "HEADER",
  "value": "На Хвали́те, стїхи̑ры, на ѕ҃, гла́съ є҃. Самогла́сенъ."
 },
 {
  "type": "TEXT",
  "value": "А҆нтѡ́нїево: Ра́дꙋйсѧ ст҃и́телей тро́ице бжⷭ҇твеннаѧ, дꙋ́ха бж҃е́ственнагѡ бг҃одохнове́ннїи ѻ҆рга́ни, глаша́ющїи пꙋ́ть спасе́нїѧ бг҃одарова́нномꙋ ста́дꙋ лю́демъ свои̑мъ. Бг҃озда́ннїи столпѝ бл҃гоче́стїѧ, волнє́нїѧ тишинꙋ̀ це́ркве смꙋща́ющыѧ, сꙋ́єтнаѧ творѧ́щи. Треѻ́стри небокова́нїи мєчѝ, посѣка́ющи ѕлосло́вїѧ те́рнїе, и҆ коне́чнѡ є҆́ресь и҆скоренѧ́ющи. І҆ера́рси всест҃і́и: са́вво ѻ҆́ч҃е на́шъ, а҆рсе́нїе и҆ маѯі́ме: трⷪ҇цѣ ꙗ҆́кѡ предстои́те съ ли́ки ст҃и́тєль, то́й моли́тесѧ премꙋ́дри, ми́ръ мі́рꙋ дарова́ти, и҆ це́рквамъ є҆диномы́слїе, ѻ҆те́чествꙋ же свобожде́нїе, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Ра́дꙋйсѧ ст҃и́телей тро́ице бжⷭ҇твеннаѧ, ст҃и́телємъ велелѣ́пнаѧ красото̀, и҆́же бг҃а ѿ ю҆́ности возлю́бльшаѧ, и҆ ѿ негѡ̀ мно́жае возлю́блена бы́вшаѧ. И҆ чⷭ҇тна̑ѧ сѣда̑лища всест҃а́гѡ дх҃а, добродѣ́телми содѣ́ластесѧ свѧще́ннѣйшїи, и҆ первост҃и́тєли и҆́стинѣйши все́й се́рбїи, ю҆́же бл҃гоче́стїѧ вода́ми ѡ҆багри́сте, и҆ є҆ретїкѡ́въ со́нми погрꙋзи́сте, во преподо́бїи и҆ пра́вдѣ ᲂу҆па́сше па́ствꙋ свою̀. Возше́дсте и҆дѣ́же а҆пⷭ҇лѡвъ ликостоѧ̑нїѧ, съ ни́миже ликовствꙋ́юще, а҆рхїерє́и всечⷭ҇тні́и, хрⷭ҇та̀ мо́лите, низпосла́ти ᲂу҆мире́нїе мі́рꙋ всемꙋ̀, и҆ це́рквамъ є҆диногла́сїе, ро́дꙋ же на врагѝ побѣ́дꙋ, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Ра́дꙋйсѧ ст҃и́телей тро́ице бжⷭ҇твеннаѧ, крѣпча̑йшаѧ забра̑ла це́ркве бж҃їѧ, нерꙋши́маѧ стѣно̀ правосла́вїѧ, тве́рди храни́телїе є҆ѵⷢ҇льскихъ велѣ́нїй, и҆ и҆спо́лнителїе теплѣ́йшїи, бг҃опи̑санныѧ скрижа̑ли, и҆з̾ѧснѧ́ющи зако́нъ но́выѧ бл҃года́ти новопросвѣще́нномꙋ своемꙋ̀ ро́дꙋ: є҆мꙋ́же ᲂу҆чи́тєли є҆стѐ и҆ просвѣти́тєли, ѻ҆тцы̀ бг҃оно́сни. Тѣ́мже проповѣ̑дницы покаѧ́нїѧ, свѣтоза́рное со́лнце, вели́кое се́рбское ᲂу҆краше́нїе, ст҃и́тели хрⷭ҇то́ви: са́вво, а҆рсе́нїе и҆ маѯі́ме, хрⷭ҇тꙋ̀ ꙗ҆́кѡ предстои́те со всѣ́ми свѧты́ми, хрⷭ҇та̀ моли́те ѽ преѡсвѧще́ннѣйши а҆рхїерє́и, пода́ти мі́рꙋ ми́ръ, це́ркви є҆диномышле́нїе, ѻ҆те́чествꙋ и҆збавле́нїе, и҆ дꙋша́мъ на́шымъ ве́лїю ми́лость."
 },
 {
  "type": "HEADER",
  "value": "И҆́ны стїхи̑ры, гла́съ и҃."
 },
 {
  "type": "TEXT",
  "value": "Что́ тѧ нарече́мъ пречꙋ́днаѧ тро́ице; свѣтоза́рное со́лнце, ꙗ҆́кѡ се́рбскїѧ ро́ды бл҃гоче́стїѧ лꙋче́ю просвѣти́ли є҆стѐ. Треѻ́стрыѧ и҆ ѻ҆гненѡ́сныѧ стрѣ́лы, сострѣлѧ́ющыѧ во мра́цѣ па̑гꙋбныѧ є҆́рєси. Пребыва̑ющыѧ сердца̀, дꙋхѡ́вныѧ вождѝ, ѿ печа́ли въ ра́дость вводѧ́щыѧ дꙋ́шы вѣ́рныхъ. Мнѡ́га ва́ша и҆мена̀, и҆ бѡ́льша дарова̑нїѧ, ст҃и́телїе сла́внїи, моли́те сп҃сти́сѧ дꙋша́мъ на́шымъ."
 },
 {
  "type": "TEXT",
  "value": "Что́ тѧ и҆менꙋ́емъ тро́ице пречⷭ҇тна́ѧ; ᲂу҆́мное сїѧ́нїе дх҃а, просвѣща́ющее ᲂу҆́мъ дꙋ́шꙋ и҆ се́рдце лю́демъ свои̑мъ. Крати́ръ въ не́мъ же пи́во, и҆́мже па́ствꙋ свою̀ напаѧ́ете. Ра́зꙋмъ правосла́вїѧ, трꙋбꙋ̀ це́ркве, трꙋбѧ́щꙋю бл҃гочє́стнаѧ ст҃ы́хъ ѻ҆тє́цъ преда̑нїѧ. Оу҆ста̀ премꙋ́дрости, ᲂу҆че́нїе бг҃осло́вїѧ и҆звѣствꙋ̑ющаѧ ꙗ҆́снѡ. Незаходи́мое на́ше свѣти́ло, са́вво а҆рсе́нїе и҆ маѯі́ме, мнѡ́гаѧ ва̑ша и҆менова̑нїѧ, но бѡ́льшаѧ дарова̑нїѧ, моли́те сп҃сти́сѧ дꙋша́мъ на́шымъ."
 },
 {
  "type": "TEXT",
  "value": "Что́ тѧ нарече́мъ тро́ице прехва́льнаѧ; цѣвни́цꙋ, возглаша́ющꙋю бл҃года́ти ве́снꙋ. Небоше́ственники, ꙗ҆́кѡ на землѝ а҆́гг҃льски пожи́ша. Бг҃осо́бранный бжⷭ҇твенный по́лкъ, всѧ̑ противлѧ́ющыѧсѧ и҆́стинѣ ᲂу҆мертви́вши. Бг҃оно́снꙋю тро́ицꙋ, є҆диносꙋ́щнꙋю и҆ нераздѣ́льнꙋю во є҆ди́ницѣ трⷪ҇цꙋ, бг҃а на́шего бл҃гослови́вшыѧ вѣ́рою на́мъ. Мнѡ́га ва́ша и҆мена̀, но бѡ́льшаѧ дарова̑нїѧ, моли́те сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ ѕ҃. Самогла́сенъ."
 },
 {
  "type": "TEXT",
  "value": "А҆нтѡ́нїа мона́ха: Во ст҃и́телехъ вели́кое ᲂу҆краше́нїе, и҆ це́ркве пресвѣ̑тлыѧ ѕвѣзды̀, всеѧ̀ се́рбїи просвѣти́телей и҆ ᲂу҆чи́телей, ѻ҆ц҃є́въ похвала̀ и҆ вѣ́рныхъ ᲂу҆добре́нїе, бг҃онѡ́сныѧ ѻ҆тцы̀, свѧщє́нныѧ а҆рхїпа́стыри, вѣ́рою ѽ хрⷭ҇тоимени́ти! Всѝ соше́дшесѧ, бг҃опохва́лимъ зовꙋ́ще: ра́дꙋйсѧ бжⷭ҇твенный по́лче, дх҃омъ ст҃ы́мъ вводи́мый, порази́вый всѧ̑ воюю́щыѧ на це́рковь гдⷭ҇ню. Ра́дꙋйсѧ бг҃осо́бранный ли́че свѧты́й, та́инственною заре́ю просвѣще́ный, и҆́же пра́щею бг҃одꙋхнове́нныхъ слове́съ ᲂу҆мертви́вый го́рдагѡ. Ра́дꙋйсѧ бг҃оизбра́ннаѧ тро́ице, ѿ ᲂу҆тро́бы ѡ҆свѧще́ннаѧ бг҃ꙋ, но ѽ бг҃обл҃же́ннїи ѻ҆тцы̀: са́вво бг҃омꙋ́дре, а҆рсе́нїе пречꙋ́дне и҆ маѯі́ме прехва́льне! Съ невеще́ственными ли́ки невеще́ственномꙋ прⷭ҇то́лꙋ ꙗ҆́кѡ предстои́те, прилѣ́жнꙋ мл҃твꙋ сотвори́те ѡ҆ ро́дѣ свое́мъ, є҆мꙋ́же и҆зба́витисѧ и҆́га безбо́жныхъ а҆га̑рѧнъ, и҆ сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Живо́тъ и҆ нетлѣ́нїе и҆ ми́рꙋ спⷭ҇нїе, во ᲂу҆тро́бѣ твое́й носи́ла є҆сѝ бцⷣе, а҆да́ма дре́внѣйшаго, хрⷭ҇та̀ бг҃а на́шего, є҆ди́на бл҃гослове́ннаѧ."
 },
 {
  "type": "HEADER",
  "value": "Славосло́вїе вели́кое, гла́съ а҃. И҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Бл҃же́нны, пѣ́снь г҃-ѧ и҆ ѕ҃-ѧ на и҃."
 },
 {
  "type": "HEADER",
  "value": "Прокі́менъ, а҆пⷭ҇ла, гла́съ д҃:"
 },
 {
  "type": "TEXT",
  "value": "Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Сті́хъ: Нбⷭ҇а̀ повѣ́даютъ сла́вꙋ бж҃їю:"
 },
 {
  "type": "HEADER",
  "value": "А҆пⷭ҇лъ ко є҆вре́ѡмъ, зача́ло тл҃є."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло а҃і."
 },
 {
  "type": "TEXT",
  "value": "Прича́стенъ: Ра́дꙋйтесѧ пра́веднїи ѡ҆ гдⷭ҇ѣ, пра̑вымъ подоба́етъ похвала̀."
 }
]