[
 {
  "type": "HEADER",
  "value": "Канѡ́нъ ко прест҃ѣ́й влⷣчцѣ бцⷣѣ, пред̾ і҆кѡ́ною є҆ѧ̀ и҆менꙋ́емыѧ троерꙋ́чица."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Д не́сь всемі́рнаѧ ра́дость возсїѧ̀ на́мъ ве́лїѧ: дарова́сѧ ст҃ѣ́й горѣ̀ а҆ѳѡ́нстѣй цѣльбоно́снаѧ твоѧ̀, влⷣчце бцⷣе, і҆кѡ́на, со и҆з̾ѻбраже́нїемъ тричи́сленнѡ и҆ нераздѣ́льнѡ пречⷭ҇тыхъ рꙋ́къ тво́ихъ въ прославле́нїе ст҃ы́ѧ трⷪ҇цы, созыва́еши бо вѣ́рныхъ и҆ молѧ́щихсѧ тебѣ̀ ѡ҆ се́мъ позна́ти, ꙗ҆́кѡ двѣма̀ сн҃а и҆ гдⷭ҇а де́ржиши, тре́тїю же ꙗ҆вѝ на прибѣ́жище и҆ покро́въ чтꙋ́щымъ тѧ̀, ѿ всѧ́кихъ напа́стей и҆ бѣ́дъ и҆збавлѧ́ти, да всѝ, притека́ющїи къ тебѣ̀, вѣ́рою прїе́млютъ неѡскꙋ́днѡ ѿ всѣ́хъ ѕѡ́лъ свобожде́нїе, ѿ врагѡ́въ защище́нїе, сегѡ̀ ра́ди и҆ мы̀ вкꙋ́пѣ со а҆ѳѡ́номъ вопїе́мъ: ра́дꙋйсѧ, бл҃года́тнаѧ, гдⷭ҇ь съ тобо́ю."
 },
 {
  "type": "HEADER",
  "value": "Дрꙋгі́й тропа́рь, гла́съ д҃:"
 },
 {
  "type": "TEXT",
  "value": "Д не́сь свѣ́тлѡ красꙋ́етсѧ ца́рствꙋющїй гра́дъ москва̀, и҆мѣ́ющи въ себѣ̀, ѽ всемлⷭ҇тивѣйшаѧ, всеѧ̀ тва́ри чⷭ҇тнѣ́йшаѧ, застꙋ́пнице на́ша дв҃о бцⷣе, чⷭ҇тны́й ѻ҆́бразъ тво́й, и҆́мже подсѡ́лнечныѧ концы̀ землѝ ᲂу҆дивлѧ́еши и҆ ми́ръ мі́рови да́рꙋеши, во ѻ҆́бразъ бо ст҃ы́ѧ трⷪ҇цы ꙗ҆влѧ́еши трїѐ рꙋцѣ̀: двѣма̀ ᲂу҆́бѡ сн҃а своего̀, хрⷭ҇та̀ бг҃а на́шего, но́сиши, тре́тїею ѿ напа́стей и҆ бѣ́дъ вѣ́рнѡ къ тебѣ̀ прибѣга́ющихъ и҆збавлѧ́еши, ѿ потопле́нїѧ и҆зыма́еши, и҆ всѣ̑мъ полє́знаѧ да́рꙋеши, и҆ прпⷣбномꙋ мїхаи́лꙋ малео́нскꙋю го́рꙋ показа̀, и҆ всѣ́хъ всегда̀ ми́лꙋеши, чⷭ҇тно́ю ри́зою свое́ю покрыва́еши жи́тельство сїѐ и҆ всѧ̑ гра́ды и҆ страны̀ на̑ша, да зове́мъ тѝ: ра́дꙋйсѧ, ѡ҆бра́дованнаѧ."
 },
 {
  "type": "HEADER",
  "value": "Канѡ́нъ, гла́съ а҃, є҆го́же краегране́сїе: Пресвѧта́ѧ дѣ́ва въ рꙋка́хъ свои́хъ сла́витъ свѧтꙋ́ю трⷪ҇цꙋ. Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртнѣ, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "Д и́вны твоѧ̑ чꙋдеса̀, влⷣчце бцⷣе, ꙗ҆̀же и҆сцѣлѝ ᲂу҆сѣ́ченнꙋю рꙋ́кꙋ деснꙋ́ю прпⷣбномꙋ і҆ѡа́ннꙋ дамаски́нꙋ, є҆́юже по и҆сцѣле́нїи пѣснотворе́нїе написа̀ въ прославле́нїе и҆́мене твоегѡ̀, и҆ всѝ, таково́мꙋ чꙋдесѝ дивѧ́щесѧ, вопїю́тъ: ра́дꙋйсѧ, пребл҃гослове́ннаѧ, въ болѣ́знехъ на́шихъ и҆сцѣле́нїе."
 },
 {
  "type": "TEXT",
  "value": "В лⷣчце бцⷣе, и҆звлеки́ мѧ и҆з̾ глꙋбины̀ напа́стей и҆ бѣ́дъ, прибѣга́ю и҆ а҆́зъ под̾ кро́въ тво́й и҆ застꙋпле́нїе, да не и҆зы́дꙋ посра́мленъ и҆ лише́нъ млⷭ҇ти твоеѧ̀, слезѧ́щїй пред̾ чꙋдотво́рною і҆кѡ́ною твое́ю, на не́йже трѝ рꙋкѝ и҆з̾ѻбраже́ны въ сла́вꙋ бг҃а вы́шнѧгѡ."
 },
 {
  "type": "TEXT",
  "value": "Сла́ва: Ѽ бг҃облаже́ннаѧ и҆ многоимени́таѧ дв҃о мт҃и, и҆сто́чникъ милосе́рдїѧ и҆ щедро́тъ, а҆́зъ и҆мѣ́ю къ тебѣ̀ вѣ́рꙋ ве́лїю, наде́ждꙋ и҆звѣ́стнꙋю и҆ любо́вь серде́чнꙋю, ѿвратѝ всѧ̑кїѧ напа̑сти ѿ ра̑бъ твои́хъ, сла́вимъ бо тричи́сленное и҆ нераздѣ́льное на і҆кѡ́нѣ пречⷭ҇тыхъ рꙋ́къ твои́хъ ꙗ҆вле́нїе, и҆́миже ты̀ ст҃ꙋ́ю трⷪ҇цꙋ во є҆ди́нствѣ прославлѧ́еши."
 },
 {
  "type": "TEXT",
  "value": "И҆ ны́нѣ: Влⷣчце дв҃о, кто̀ не ᲂу҆диви́тсѧ всечⷭ҇тны́ѧ твоеѧ̀ і҆кѡ́ны троерꙋ́чномꙋ ꙗ҆вле́нїю, сла́достнѡ бо зрѣ́ти, ка́кѡ ты̀ премꙋ́дро трїѷпоста́сное бжⷭ҇тво̀ прославлѧ́еши, ско́рѡ ᲂу҆слы́ши, пречⷭ҇таѧ, моле́нїе на́ше и҆ защитѝ рꙋко́ю твое́ю, ю҆́же тре́тїю ꙗ҆вѝ на́мъ на застꙋпле́нїе."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Є҆ди́не, вѣ́дый человѣ́ческагѡ сꙋщества̀ не́мощь и҆ млⷭ҇тивнѡ въ нѐ воѻбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й, ѡ҆дꙋшевле́нный хра́ме неизрече́нныѧ сла́вы твоеѧ̀, чл҃вѣколю́бче."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "С ъ высоты̀ а҆ѳѡ́нскїѧ горы̀ повсю́дꙋ блиста́етъ бога́тство милосе́рдїѧ твоегѡ̀, влⷣчце бцⷣе, ѿ ст҃ы́ѧ і҆кѡ́ны, ю҆́же троерꙋ́чнѡ ꙗ҆вѝ на прибѣ́жище вѣ̑рнымъ, мы́ же къ тебѣ̀ воззове́мъ: ѽ мт҃и и҆ дв҃о! и҆зба́ви на́съ ѿ ѻ҆гнѧ̀, и҆ меча̀, и҆ всѣ́хъ бѣ́дъ, пребл҃гослове́ннаѧ."
 },
 {
  "type": "TEXT",
  "value": "Б езмѣ́рнꙋю твою̀ млⷭ҇ть на мнѣ̀ славосло́влю и҆ велича́ю въ пѣ́снехъ бл҃года́рныхъ чⷭ҇тымъ се́рдцемъ и҆ ᲂу҆сты̀, ꙗ҆́кѡ и҆зба́вила є҆сѝ менѐ всѣ́хъ напа́стей и҆ бѣ́дъ и҆ не допꙋсти́ла є҆сѝ поги́бнꙋти до конца̀. и҆ а҆́зъ тебѐ, влⷣчцꙋ бцⷣꙋ, и҆ чꙋдеса̀ ѻ҆́браза твоегѡ̀ велича́ти и҆ прославлѧ́ти не преста́нꙋ во вѣ́ки."
 },
 {
  "type": "TEXT",
  "value": "Сла́ва: Высота̀ вели́ка а҆ѳѡ́нскїѧ горы̀, но ꙗ҆вле́нїе и҆ чꙋдеса̀ і҆кѡ́ны твоеѧ̀ неизрече́ннѡ превы́ше горы̀, и҆ бл҃года́ть бж҃їѧ въ не́й, ꙗ҆́кѡ мо́ре неисчерпа́емое, приходѧ́щымъ вѣ́рою: прїе́млютъ бо ᲂу҆тѣше́нїе и҆ въ напа́стехъ и҆збавле́нїе: пода́ждь, ѽ пребл҃гослове́ннаѧ дв҃о, и҆ мнѣ̀, бѣ́дствꙋющемꙋ, защище́нїе ско́рое."
 },
 {
  "type": "TEXT",
  "value": "И҆ ны́нѣ: Ты̀ є҆сѝ всѣ́хъ скорбѧ́щихъ прибѣ́жище, и҆ ѻ҆би́димыхъ застꙋ́пница, и҆ нерꙋши́мый покро́въ въ бѣда́хъ стра́ждꙋщихъ. тѣ́мже, припа́даѧ, вопїе́мъ тебѣ̀, дв҃о пречⷭ҇таѧ: прїимѝ моле́нїе на́ше, ѿ всеѧ̀ дꙋшѝ чⷭ҇тнꙋ́ю и҆ преиспо́лненнꙋю чꙋде́съ і҆кѡ́нꙋ твою̀ почита́ющихъ."
 },
 {
  "type": "TEXT",
  "value": "Г дⷭ҇и, поми́лꙋй. [Три́жды.]"
 },
 {
  "type": "HEADER",
  "value": "Сѣда́ленъ, гла́съ є҃. Подо́бенъ: Собезнача́льное сло́во:"
 },
 {
  "type": "TEXT",
  "value": "Ꙗ҆́ кѡ возлюби́ла є҆сѝ па́ствꙋ твою̀, бг҃оро́ждшаѧ мт҃и, бл҃говолѝ дарова́ти є҆́й ст҃ꙋ́ю пречⷭ҇тнꙋ́ю свою̀ і҆кѡ́нꙋ, на не́йже премꙋ́дрость триѷпоста́снꙋю въ пречⷭ҇тыхъ рꙋка́хъ свои́хъ прославлѧ́еши, и҆ подае́ши познава́ти въ трⷪ҇цѣ є҆ди́наго бг҃а, и҆ мнѡ́гаѧ чꙋдеса̀ ѿ і҆кѡ́ны твоеѧ̀ вѣ́рою и҆ любо́вїю тѧ̀ призыва́ющымъ ꙗ҆влѧ́еши, и҆ па́ствꙋ свою̀ ѡ҆гражда́еши, и҆ подае́ши всемꙋ̀ мі́рꙋ, сп҃се́нїе и҆ ᲂу҆твержде́нїе."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ во сп҃се́нїе на́ше и҆ ѡ҆бновле́нїе."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "Ѡ҆ бнови́мъ сердца̀ вѣ́рою, зрѧ́ще во а҆ѳѡ́нстѣй горѣ̀ но́вое влⷣчцы бцⷣы троерꙋ́чное ꙗ҆вле́нїе. всѧ́къ, недоꙋмѣва́юще ѡ҆ се́мъ, то́кмѡ молѧ́щесѧ, тебѣ̀ вопїе́тъ: ѽ мт҃и и҆ дв҃о, прїимѝ моле́нїе на́ше и҆ пода́ждь млⷭ҇ть и҆ защище́нїе, и҆ и҆спо́лни ѧ҆зы́къ и҆ сердца̀ вѣ́рныхъ досто́йнагѡ тѝ хвале́нїѧ."
 },
 {
  "type": "TEXT",
  "value": "Р а́достною трꙋбо́ю а҆ѳѡ́нъ во всѧ̑ концы̀ землѝ гласи́тъ: прїиди́те и҆ ви́дите дѣла̀ бж҃їѧ, ка́кѡ пречⷭ҇таѧ дв҃а на і҆кѡ́нѣ въ рꙋка́хъ свои́хъ ꙗ҆влѧ́етъ трⷪ҇чный ви́дъ бжⷭ҇тва̀, и҆́миже держи́тъ любо́вь и҆ млⷭ҇рдїе, восписꙋ́емъ сꙋгꙋ́бо въ сердца́хъ на́шихъ ра́достнꙋю пѣ́снь досто́йнагѡ є҆ѧ̀ хвале́нїѧ."
 },
 {
  "type": "TEXT",
  "value": "Сла́ва: Ꙗ҆́кѡ сподо́бисѧ прпⷣбный мїхаи́лъ малеи́нъ бл҃года́ть ꙗ҆́внѡ ѿ тебѐ, влⷣчце бцⷣе, ᲂу҆лꙋчи́ти, сподо́би и҆ менѐ, всепречⷭ҇таѧ, зрѣ́ти и҆ разꙋмѣ́ти, ка́кѡ ты̀ ст҃ꙋ́ю трⷪ҇цꙋ на і҆кѡ́нѣ въ рꙋка́хъ свои́хъ прославлѧ́еши, да восписꙋ́ю въ се́рдцѣ мое́мъ тво́й ѻ҆́бразъ и҆ молю́ тѧ: ѿве́рзи ѧ҆зы́къ мо́й и҆ и҆спо́лни є҆го̀ досто́йнагѡ тебѐ хвале́нїѧ."
 },
 {
  "type": "TEXT",
  "value": "И҆ ны́нѣ: Грѧди́те, лю́дїе, ко а҆ѳѡ́нꙋ дне́сь, є҆́же принестѝ моле́нїе приснодв҃ѣ чⷭ҇тѣй бцⷣѣ пред̾ чꙋ́дною є҆ѧ̀ і҆кѡ́ною, тричи́сленнѡ и҆ нераздѣ́льнѡ пречⷭ҇тыми рꙋка́ми и҆з̾ѻбража́ющꙋю є҆ди́нꙋю си́лꙋ бжⷭ҇тва̀, на сїю́ же врагѝ на́шѧ зрѣ́ти не мо́гꙋтъ, мы́ же, вѣ́рнїи, взира́юще на ѻ҆́нꙋю, вопїе́мъ: ѿве́рзи на́мъ ᲂу҆ста̀ пѣ́ти пѣ́снь досто́йнагѡ тебѐ хвале́нїѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый кресто́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ правосла́внѡ пою́щихъ тѧ̀."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "А҆ ѳѡ́нскаѧ гора̀ преиспо́лнисѧ ст҃ы́нь, на не́йже ꙗ҆ви́сѧ и҆ просла́висѧ ст҃а́ѧ твоѧ̑, влⷣчце бцⷣе, і҆кѡ́на, кра́сѧщаѧсѧ и҆злїѧ́нїемъ ѿ неѧ̀ бл҃года́ти во и҆сцѣле́нїе скорбѧ́щихъ, и҆ всѝ таково́мꙋ чꙋдесѝ дивѧ́тсѧ, ꙗ҆́кѡ трѝ пречⷭ҇тыѧ твоѧ̑ рꙋ́ки на́мъ ꙗ҆вѝ."
 },
 {
  "type": "TEXT",
  "value": "С їѧ́етъ добро́та, блиста́ютъ, ꙗ҆́кѡ сѡ́лнечныѧ лꙋчѝ, ѿ твоеѧ̀ ст҃ы́ѧ і҆кѡ́ны разли̑чнаѧ чꙋдеса̀, низпослѝ мнѣ̀, ѽ пребл҃гослове́ннаѧ, покро́въ и҆ застꙋпле́нїе твоѐ ѿ врагѡ́въ, гꙋ́бѧщихъ мѧ̀, ті́и бо ѿ рꙋкѝ твоеѧ̀ поги́бнꙋтъ, ꙗ҆́кѡ тре́тїю на і҆кѡ́нѣ и҆з̾ѧвѝ на́мъ на застꙋпле́нїе."
 },
 {
  "type": "TEXT",
  "value": "Сла́ва: Пресла́вное чꙋ́до зри́тсѧ, всенепоро́чнаѧ дв҃о, на і҆кѡ́нѣ твое́й: во ѻ҆́бразъ ст҃ы́ѧ трⷪ҇цы рꙋ́ки своѧ̑ ꙗ҆вѝ и҆ позна́нїе подае́ши рабѡ́мъ твои̑мъ, ꙗ҆́кѡ двѣма̀ держи́ши держа́щаго всѧ̑, тре́тїею же защища́еши во всѣ́хъ напа́стехъ вѣ́рнѡ прибѣга́ющихъ къ тебѣ̀, мы́ же, вѣ́рнїи, вопїе́мъ: ра́дꙋйсѧ, застꙋ́пнице на́ша всенаде́жнаѧ."
 },
 {
  "type": "TEXT",
  "value": "И҆ ны́нѣ: Ѽ, неизмѣри́маѧ глꙋбина̀ ржⷭ҇тва̀ твоегѡ̀! ѽ, неизрече́нное бога́тство милосе́рдїѧ твоегѡ̀! ꙗ҆́кѡ безмѣ̑рныѧ пєча́ли и҆ напа́сти въ ра́дость на́мъ твори́ши, призыва́ющымъ тѧ̀ въ нꙋ́ждѣ и҆ ѡ҆бстоѧ́нїи, пода́ждь же млⷭ҇ть твою̀ въ стра́шный де́нь сꙋда̀ и҆ и҆спыта́нїѧ дѣ́лъ чл҃вѣ́ческихъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ, ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑, бж҃е на́шъ, ты́ бо крѣ́пость немощствꙋ́ющихъ и҆ и҆справле́нїе."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "В о а҆ѳѡ́нъ ра́достнѡ всѝ притеце́мъ зрѣ́ти ꙗ҆вле́нїе і҆кѡ́ны влⷣчцы бцⷣы, ꙗ҆́кѡ сла́витъ нбⷭ҇наго творца̀ въ трⷪ҇цѣ трисо́лнечное є҆стество̀ и҆ на́съ тро́йческомꙋ покланѧ́тисѧ ᲂу҆́читъ бжⷭ҇твꙋ̀, є҆́йже припа́даѧ, со слеза́ми вопїе́мъ: ѽ дв҃о пречⷭ҇таѧ, ѿве́рзи на́ша ᲂу҆ста̀ и҆ и҆спо́лни се́рдце вопи́ти тебѣ̀ пѣ́снь досто́йнагѡ хвале́нїѧ."
 },
 {
  "type": "TEXT",
  "value": "Оу҆ тѣше́нїе ве́лїе ѡ҆брѣто́хъ дꙋшѝ мое́й въ бѣда́хъ и҆ напа́стехъ прибѣга́ти къ тебѣ̀, бг҃ороди́тельницѣ, и҆ а҆́зъ къ цѣльбоно́снѣй твое́й і҆кѡ́нѣ со слеза́ми вопїю̀: не пре́зри, бцⷣе, сле́зъ и҆ воздыха́нїѧ моегѡ̀ и҆ возведѝ ѿ печа́лей въ ра́дость, ꙗ҆́кѡ и҆ а҆ѳѡ́нъ ра́достнѡ ликовствꙋ́етъ, и҆мꙋ́ще чⷭ҇тны́й ѻ҆́бразъ тво́й троерꙋ́чнагѡ ꙗ҆вле́нїѧ."
 },
 {
  "type": "TEXT",
  "value": "Сла́ва: Влⷣчце, мі́ра сп҃се́нїе, вѣ́рныхъ наде́жда, покро́въ и҆ застꙋпле́нїе, всеꙋсе́рднѡ припа́даѧ къ тебѣ̀, вопїе́мъ: покажѝ на на́съ, погиба́ющихъ, си́лꙋ и҆ бл҃года́ть цѣльбоно́сныѧ ст҃ы́ѧ і҆кѡ́ны твоеѧ̀, и҆зба́ви на́съ всѣ́хъ напа́стей, да не преста́немъ велича́ти тебѐ, застꙋ́пницꙋ въ печа́лехъ вѣ́рнꙋю."
 },
 {
  "type": "TEXT",
  "value": "И҆ ны́нѣ: Ѽ всенепоро́чнаѧ дв҃о! бжⷭ҇твенное прорече́нїе ᲂу҆́стъ твои́хъ и҆спо́лнисѧ, є҆́же ѡ҆ рожде́нїи прпⷣбнагѡ мїхаи́ла малеина̀ пре́жде предрекла̀ є҆сѝ, ра́дꙋетсѧ всѧ̀ землѧ̀ ѡ҆ бжⷭ҇твеннѣй си́лѣ твое́й, весели́тсѧ гла́съ пра́зднꙋющихъ непреста́ннѡ, зрѧ́ще твоегѡ̀ лица̀ добро́тꙋ неизрече́ннꙋю, ве́селѡ воспѣва́юще: ра́дꙋйсѧ, дв҃о, хрⷭ҇тїа́нъ похвало̀."
 },
 {
  "type": "TEXT",
  "value": "Г дⷭ҇и, поми́лꙋй. [Три́жды.] Сла́ва, и҆ ны́нѣ:"
 },
 {
  "type": "HEADER",
  "value": "Конда́къ, гла́съ и҃. Подо́бенъ: Взбра́нной воево́дѣ:"
 },
 {
  "type": "TEXT",
  "value": "Д не́сь весе́лое наста̀ ны́нѣ твоѐ торжество̀ бг҃ома́ти пречⷭ҇таѧ, всѝ вѣ́рнїи и҆спо́лнишасѧ ра́дости и҆ весе́лїѧ, ꙗ҆́кѡ сподо́бльшесѧ и҆зрѧ́днѡ воспѣ́ти преди́вное ꙗ҆вле́нїе чⷭ҇тна́гѡ ѻ҆́браза твоегѡ̀ и҆ ро́ждшагосѧ и҆з̾ тебѐ млⷣнца, и҆́стинна же бг҃а, є҆го́же двѣма̀ рꙋка́ма ѡ҆б̾е́млеши, и҆ тре́тїею ѿ напа́стей и҆ бѣ́дъ на́съ и҆зыма́еши и҆ и҆збавлѧ́еши ѿ всѣ́хъ ѕѡ́лъ и҆ ѡ҆бстоѧ́нїй."
 },
 {
  "type": "TEXT",
  "value": "І҆́косъ: А҆́гг҃лѡвъ творца̀, и҆́стиннагѡ свѣ́та хрⷭ҇та̀, неизрече́ннѡ и҆з̾ тебѐ, бг҃ома́ти, возсїѧ́вшагѡ, на і҆кѡ́нѣ чꙋде́снѣ ꙗ҆вѝ и҆ тричи́сленнымъ свои́мъ и҆з̾ѻбраже́нїемъ пречⷭ҇тыхъ рꙋ́къ твои́хъ всѧ̑ концы̀ землѝ ᲂу҆дивѝ, тѣ́мже бл҃года́рственнѡ дерза́емъ вопи́ти тебѣ̀ си́це: ра́дꙋйсѧ, по чл҃вѣ́чествꙋ двѣма̀ рꙋка́ма сн҃а и҆ бг҃а ѡ҆б̾е́млющаѧ: ра́дꙋйсѧ, по бжⷭ҇твꙋ̀ тре́тїею рꙋко́ю ѿ напа́стей и҆ бѣ́дъ на́съ и҆збавлѧ́ющаѧ: ра́дꙋйсѧ, стра́ждꙋщымъ въ печа́лехъ помога́ющаѧ: ра́дꙋйсѧ, бѡлѣ́зни вско́рѣ и҆сцѣлѧ́ющаѧ: ра́дꙋйсѧ, ꙗ҆́кѡ тобо́ю защища́емсѧ ѿ врагѡ́въ си́льныхъ, помышлѧ́ющихъ на ны̀ ѕла̑ѧ: ра́дꙋйсѧ, сохранѧ́ющаѧ ѿ всѣ́хъ ѕѡ́лъ и҆ ѡ҆бстоѧ́нїй."
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Тебѐ, ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи, ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "Ѽ мт҃и бг҃а вы́шнѧгѡ, при́зри на моле́нїе вѣ́рою къ тебѣ̀ прибѣга́ющихъ: вразѝ на мѧ̀ ѡ҆полчи́шасѧ, и҆з̾ѡстри́ша ме́чь сво́й, ᲂу҆ѧзви́ти мѧ̀ хотѧ́ще. ты́ же, ꙗ҆́кѡ защи́тница на́ша, ѿымѝ поноше́нїѧ чл҃вѣ́чєскїѧ и҆ напра̑сныѧ клевєты̀, на тебѐ надѣ́юсѧ, ты́ бо моѧ̀ крѣ́пость и҆ защище́нїе."
 },
 {
  "type": "TEXT",
  "value": "Н енави́дѧщїи мѧ̀, творѧ́ще ѡ҆би́ды, низпꙋска́ютъ стрѣ́лы лꙋка́вствїѧ, хотѧ́ще мѧ̀ ѕѣлѡ̀ ᲂу҆ѧзви́ти, а҆́зъ же, пречⷭ҇таѧ влⷣчце, взира́ѧ на і҆кѡ́нꙋ твоегѡ̀ троерꙋ́чнагѡ ꙗ҆вле́нїѧ, ю҆́же дарова̀ на́мъ ꙗ҆́кѡ стра́жа на врагѝ, приношꙋ̀ тебѣ̀ моле́нїе: защитѝ, всепѣ́таѧ, рꙋко́ю твое́ю менѐ, погиба́ющаго."
 },
 {
  "type": "TEXT",
  "value": "Сла́ва: Влⷣчце бцⷣе, сокрꙋшѝ ѕлы̑ѧ врагѡ́въ на мѧ̀ пѡ́мыслы и҆ клевєты̀ ᲂу҆ста́ви, и҆збавлѧ́ющи непови̑нныѧ ѿ ско́рби, и҆́мамы бо, пречⷭ҇таѧ дв҃о, твою̀ і҆кѡ́нꙋ, бл҃года́ти преиспо́лненнꙋю, врагѡ́въ ᲂу҆страша́ющꙋю и҆ вѣ́рнѡ прибѣга́ющихъ къ тебѣ̀ ᲂу҆веселѧ́ющꙋю."
 },
 {
  "type": "TEXT",
  "value": "И҆ ны́нѣ: Ѽ дв҃о пречⷭ҇таѧ! смирѝ сердца̀ ѕлы́хъ чл҃вѣ̑къ, ѡ҆би́дѧщихъ и҆ ненави́дѧщихъ мѧ̀, и҆ вражде́бнѡ клѧнꙋ́щихъ заградѝ ᲂу҆ста̀, да посрамѧ́тсѧ вразѝ и҆ ᲂу҆́зрѧтъ твою̀ сопроти́въ борю́щꙋю си́лꙋ, сѐ млⷭ҇тивнѡ ты̀ на́съ посѣща́еши и҆ зало́гъ бл҃года́ти і҆кѡ́нꙋ твою̀ ꙗ҆́кѡ стра́жа на врагѝ да́рꙋеши."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою благоче́стїѧ чи́стѣе зла́та блеща́хꙋсѧ, гл҃го́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "Оу҆ слы́ши моле́нїе моѐ, влⷣчце всепѣ́таѧ, ѡ҆бле́гчи бре́мѧ бѣ́дъ мои́хъ и҆ напа́стей, ꙗ҆́кѡ да возмогꙋ̀ возда́ти тебѣ̀ ѻ҆бѣ́ты, ꙗ҆̀же въ печа́ли гл҃го́лаша ᲂу҆ста̀ моѧ̑, сла́влю бо толи́кѡ чꙋде́сное ꙗ҆вле́нїе і҆кѡ́ны твоеѧ̀, возведи́ мѧ рꙋко́ю твое́ю и҆з̾ глꙋбины̀ бѣ́дъ въ ра́дость, воспѣва́юща и҆ превозносѧ́ща тѧ̀ во вѣ́ки."
 },
 {
  "type": "TEXT",
  "value": "Ѽ пребл҃гослове́ннаѧ дв҃о! є҆гда̀ приспѣ̀ де́нь свѣ́тлагѡ торжества̀ ꙗ҆вле́нїѧ пречꙋ́днагѡ ѻ҆́браза твоегѡ̀, тогда̀ а҆ѳѡ́нскаѧ гора̀ кра́ситсѧ, ꙗ҆́кѡ прїе́млетъ многобога́тный да́ръ во ѡ҆гра́дꙋ свою̀ зарѝ бжⷭ҇твенныѧ. ѽ дв҃о, ѡ҆зарѝ сердца̀ на̑ша свѣ́томъ бжⷭ҇тва̀, є҆го́же въ рꙋка́хъ твои́хъ на і҆кѡ́нѣ прославлѧ́еши, пою́щихъ и҆ превозносѧ́щихъ тѧ̀ во вѣ́ки."
 },
 {
  "type": "TEXT",
  "value": "Сла́ва: Оу҆́жасомъ ѡ҆б̾ѧ́ти бы́ша и҆ недоꙋмѣва́ша ѡ҆ се́мъ, ка́кѡ трѝ рꙋкѝ на і҆кѡ́нѣ на́мъ ꙗ҆вѝ, но то́кмѡ ра́достнѡ вопїе́мъ: ѽ влⷣчце дв҃о, є҆ди́ной тебѣ̀ сїѐ досто́йно є҆́сть двѣма̀ рꙋка́ма сн҃а и҆ гдⷭ҇а держа́ти, а҆ тре́тїею вѣ̑рныѧ ѿ бѣ́дъ и҆збавлѧ́ти, пою́щихъ и҆ превозносѧ́щихъ тѧ̀ во всѧ̑ вѣ́ки."
 },
 {
  "type": "TEXT",
  "value": "И҆ ны́нѣ: Пою́тъ тѧ̀ всѝ земноро́днїи и҆ славосло́вѧтъ си̑лы нбⷭ҇ныѧ, ꙗ҆́кѡ мт҃рь хрⷭ҇та̀ бг҃а на́шегѡ, ты́ бо, сѣдѧ́щи на чⷭ҇тнѣ́мъ прⷭ҇то́лѣ бли́з̾ прест҃ы́ѧ трⷪ҇цы, во ѻ҆́бразъ є҆ѧ̀ и҆ трѝ рꙋкѝ на і҆кѡ́нѣ ꙗ҆вѝ, молѝ ю҆̀ ѡ҆ на́съ, пречⷭ҇таѧ, и҆зба́витисѧ на́мъ мꙋ́къ, да возра́дꙋютсѧ всѝ, пою́щїи и҆ превозносѧ́щїи тѧ̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ѻ҆́бразъ чⷭ҇тагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпали́маѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ."
 },
 {
  "type": "TEXT",
  "value": "Припѣ́въ: Прест҃а́ѧ бцⷣе, сп҃сѝ на́съ."
 },
 {
  "type": "TEXT",
  "value": "Б езмѣ́рнѡ наслади́хсѧ щедро́тъ и҆ бл҃годѣѧ́нїй твои́хъ а҆́зъ, дв҃о пречⷭ҇таѧ, и҆ воспѣва́ю тѧ̀ бл҃года́рственными пѣ́сньми пред̾ і҆кѡ́ною твое́ю, на не́йже зри́тсѧ чꙋ́до чꙋдесє́мъ: тре́тїѧ пречⷭ҇таѧ рꙋка̀ твоѧ̀, на по́мощь и҆ защище́нїе тѧ̀ призыва́ющымъ."
 },
 {
  "type": "TEXT",
  "value": "В ъ пѣ́снехъ бл҃года́рныхъ не преста́нꙋ велича́ти тѧ̀, всепречⷭ҇таѧ дв҃о бцⷣе, ꙗ҆́кѡ неисчє́тныѧ щедрѡ́ты низпосла́ла є҆сѝ, проповѣ́дꙋеши всѣ̑мъ чꙋдеса̀ цѣльбонѡ́сныѧ твоеѧ̀ і҆кѡ́ны, ꙗ҆́кѡ подае́ши въ болѣ́знехъ и҆сцѣле́нїе, въ напа́стехъ и҆збавле́нїе, ты́ бо є҆сѝ покро́въ всѣ̑мъ прибѣга́ющымъ."
 },
 {
  "type": "TEXT",
  "value": "Сла́ва: Оу҆диви́ла є҆сѝ всѣ́хъ вои́стиннꙋ, пренепоро́чнаѧ дв҃о, застꙋпле́нїемъ и҆ покро́вомъ твои́мъ, вразѝ моѝ ѿстꙋпи́ша ѿ менѐ, вмѣ́сто печа́ли ра́дость мѝ дарова̀, и҆ а҆́зъ ра́достнѡ вопїю̀, ꙗ҆́кѡ цѣльбоно́снаѧ твоѧ̀ і҆кѡ́на ди̑внаѧ чꙋдеса̀ показа̀, да всѝ вѣ́дꙋще, ꙗ҆́кѡ ты̀ є҆сѝ застꙋ́пница всѣ̑мъ прибѣга́ющымъ."
 },
 {
  "type": "TEXT",
  "value": "И҆ ны́нѣ: Ви́ждь, влⷣчце бцⷣе, неможе́нїе моѐ, недоꙋмѣва́ю бо воспѣ́ти млⷭ҇рдїе твоѐ на мнѣ̀, пода́ждь ѡ҆бновле́нїе се́рдцꙋ моемꙋ̀ досто́йнѡ воспѣ́ти тебѣ̀ пѣ́снь, толи́кѡ чꙋ́дномꙋ на і҆кѡ́нѣ пречⷭ҇тыхъ тре́хъ рꙋ́къ твои́хъ и҆з̾ѻбраже́нїю, ты́ бо є҆сѝ нело́жнаѧ застꙋ́пница хрⷭ҇тїа́нъ."
 },
 {
  "type": "HEADER",
  "value": "Свѣти́ленъ. Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "Г ора̀ а҆ѳѡ́нскаѧ вопїе́тъ: грѧди́те, лю́дїе, къ неистощи́момꙋ и҆сто́чникꙋ цѣльбоно́снѣй і҆кѡ́нѣ влⷣчцы на́шеѧ бцⷣы прїѧ́ти щедро́тъ мно́жество, вси́ бо прибѣга́ющїи полꙋча́ютъ неисче́тнѡ да́ры цѣлє́бныѧ и҆ вопїю́тъ: вои́стиннꙋ ты̀ є҆сѝ, дв҃о бл҃гослове́ннаѧ, всѣ̑мъ крѣ́пость, держа́ва и҆ застꙋпле́нїе."
 },
 {
  "type": "HEADER",
  "value": "Моли́тва."
 },
 {
  "type": "TEXT",
  "value": "Ѽ прест҃а́ѧ и҆ пребл҃гослове́ннаѧ дв҃о бцⷣе мр҃і́е! припа́даемъ и҆ покланѧ́емсѧ тѝ пред̾ ст҃о́ю троерꙋ́чною і҆кѡ́ною твое́ю, воспомина́ѧ пресла́вное чꙋ́до твоѐ, и҆сцѣле́нїемъ ᲂу҆сѣче́нныѧ десни́цы пра́веднагѡ і҆ѡа́нна дамаски́на ѿ і҆кѡ́ны сеѧ̀ ꙗ҆вле́нное, є҆го́же зна́менїе доны́нѣ ви́димо є҆́сть на не́й, во ѻ҆́бразѣ тре́тїѧ рꙋкѝ, къ и҆з̾ѻбраже́нїю твоемꙋ̀ приложе́нныѧ. мо́лимсѧ тѝ и҆ про́симъ тѧ̀, всебл҃гꙋ́ю и҆ всеще́дрꙋю ро́да на́шегѡ застꙋ́пницꙋ: ᲂу҆слы́ши на́съ, молѧ́щихъ ти сѧ, и҆ ꙗ҆́коже бл҃же́ннаго і҆ѡа́нна, въ ско́рби и҆ болѣ́зни къ тебѣ̀ возопи́вшаго, ᲂу҆слы́шала є҆сѝ, та́кѡ и҆ на́съ не пре́зри, скорбѧ́щихъ и҆ болѣ́знꙋющихъ ра́нами страсте́й многоразли́чныхъ и҆ къ тебѣ̀ ѿ дꙋшѝ сокрꙋше́нныѧ и҆ смире́нныѧ ᲂу҆се́рднѡ прибѣга́ющихъ. ты̀ зри́ши, гпⷭ҇жѐ всемлⷭ҇тиваѧ, не́мѡщи на́шѧ, ѡ҆ѕлобле́нїе на́ше, нꙋ́ждꙋ, потре́бꙋ на́шꙋ въ твое́й по́мощи и҆ застꙋпле́нїи, ꙗ҆́кѡ ѿвсю́дꙋ врага́ми ѡ҆крꙋже́ни є҆смы̀, и҆ нѣ́сть помога́ющагѡ, нижѐ застꙋпа́ющагѡ, а҆́ще не ты̀ ᲂу҆милосе́рдишисѧ ѡ҆ на́съ, влⷣчце. є҆́й, мо́лимъ ти сѧ, вонмѝ гла́сꙋ болѣ́зненномꙋ на́шемꙋ и҆ помозѝ на́мъ ст҃оѻте́ческꙋю правосла́внꙋю вѣ́рꙋ до конца̀ дне́й на́шихъ непоро́чнѡ сохрани́ти, во всѣ́хъ за́повѣдехъ гдⷭ҇нихъ неꙋкло́ннѡ ходи́ти, покаѧ́нїе и҆́стинное ѡ҆ грѣсѣ́хъ на́шихъ всегда̀ бг҃ꙋ приноси́ти и҆ сподо́битисѧ ми́рныѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнемъ сꙋдѣ̀ сн҃а твоегѡ̀ и҆ бг҃а на́шегѡ, є҆го́же ᲂу҆молѝ за на́съ ма́тернею мл҃твою твое́ю, да не ѡ҆сꙋ́дитъ на́съ по беззако́нїємъ на́шымъ, но да поми́лꙋетъ на́съ по вели́цѣй и҆ неизрече́ннѣй млⷭ҇ти свое́й. ѽ всебл҃га́ѧ! ᲂу҆слы́ши на́съ и҆ не лишѝ на́съ по́мощи твоеѧ̀ держа́вныѧ, да тобо́ю сп҃се́нїе полꙋчи́вше, воспое́мъ и҆ просла́вимъ тѧ̀ на землѝ живы́хъ и҆ ро́ждшагосѧ ѿ тебє̀ и҆скꙋпи́телѧ на́шего гдⷭ҇а і҆и҃са хрⷭ҇та̀, є҆мꙋ́же подоба́етъ сла́ва и҆ держа́ва, че́сть и҆ поклоне́нїе, кꙋ́пнѡ со ѻ҆ц҃е́мъ и҆ ст҃ы́мъ дх҃омъ, всегда̀, ны́нѣ, и҆ при́снѡ, и҆ во вѣ́ки вѣкѡ́въ. а҆ми́нь."
 },
 {
  "type": "HEADER",
  "value": "И҆́на моли́тва."
 },
 {
  "type": "TEXT",
  "value": "Ѽ прест҃а́ѧ гпⷭ҇жѐ влⷣчце бцⷣе, ве́лїе чꙋ́до ст҃о́мꙋ і҆ѡа́ннꙋ дамаски́нꙋ ꙗ҆ви́вшаѧ, ꙗ҆́кѡ вѣ́рꙋ и҆́стиннꙋю, наде́ждꙋ несꙋмнѣ́ннꙋю показа́вшемꙋ! ᲂу҆слы́ши на́съ, грѣ́шныхъ, пред̾ чꙋдотво́рною твое́ю і҆кѡ́ною ᲂу҆се́рднѡ молѧ́щихсѧ и҆ просѧ́щихъ твоеѧ̀ по́мощи: не ѿри́ни моле́нїѧ сегѡ̀ мно́гихъ ра́ди прегрѣше́нїй на́шихъ, но ꙗ҆́кѡ мт҃и млⷭ҇рдїѧ и҆ щедро́тъ, и҆зба́ви на́съ ѿ болѣ́зней, скорбе́й и҆ печа́лей, простѝ содѣ̑ѧнныѧ на́ми грѣхѝ, и҆спо́лни ра́дости и҆ весе́лїѧ всѣ́хъ, чтꙋ́щихъ ст҃ꙋ́ю і҆кѡ́нꙋ твою̀, да ра́достнѡ воспое́мъ и҆ любо́вїю просла́вимъ и҆́мѧ твоѐ, ꙗ҆́кѡ ты̀ є҆сѝ ѿ всѣ́хъ родѡ́въ и҆збра́ннаѧ и҆ бл҃гослове́ннаѧ во вѣ́ки вѣкѡ́въ. а҆ми́нь."
 }
]