[
 {
  "type": "HEADER",
  "value": "Тропарѝ и҆ кондакѝ пра́здникѡвъ, ѻ҆ктѡ́врїй"
 },
 {
  "type": "HEADER",
  "value": "Въ а҃ де́нь. Пра́зднꙋемъ покро́въ прест҃ы́ѧ бцⷣы."
 },
 {
  "type": "TEXT",
  "value": "Тропа́рь, гла́съ д҃: Дне́сь благовѣ́рнїи лю́дїе свѣ́тлѡ пра́зднꙋемъ, / ѡ҆сѣнѧ́еми твои́мъ, бг҃ома́ти, прише́ствїемъ, / и҆ къ твоемꙋ̀ взира́юще пречⷭ҇томꙋ ѻ҆́бразꙋ, ᲂу҆ми́льнѡ глаго́лемъ: / покры́й на́съ честны́мъ твои́мъ покро́вомъ, / и҆ и҆зба́ви на́съ ѿ всѧ́кагѡ ѕла̀, / молѧ́щи сн҃а твоего̀ хрⷭ҇та̀ бг҃а на́шего, / спастѝ дꙋ́шы на́шѧ."
 },
 {
  "type": "TEXT",
  "value": "Конда́къ, гла́съ г҃. Подо́бенъ: Дв҃а дне́сь: Дв҃а дне́сь предстои́тъ въ це́ркви, / и҆ съ ли̑ки ст҃ы́хъ неви́димѡ за ны̀ мо́литсѧ бг҃ꙋ: / а҆́гг҃ли со а҆рхїерє́и покланѧ́ютсѧ, / а҆пⷭ҇ли же со прⷪ҇рѡ́ки ликовствꙋ́ютъ: / на́съ бо ра́ди мо́литъ бцⷣа превѣ́чнаго бг҃а."
 },
 {
  "type": "HEADER",
  "value": "Въ є҃-й де́нь. Ст҃и́телей петра̀, а҆леѯі́а, і҆ѡ́ны, фїлі́ппа и҆ є҆рмоге́на, митрополі́тѡвъ моско́вскихъ."
 },
 {
  "type": "TEXT",
  "value": "Тропа́рь, гла́съ д҃: Первопресто́льницы рѡссі́йстїи, / и҆́стиннїи храни́телїе а҆пⷭ҇льскихъ преда́нїй, / столпѝ непоколеби́мїи, правосла́вїѧ наста̑вницы, / пе́тре, а҆леѯі́е, і҆ѡ́но, фїлі́ппе и҆ є҆рмоге́не, / влⷣкꙋ всѣ́хъ моли́те, / ми́ръ вселе́ннѣй дарова́ти, / и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Конда́къ, гла́съ г҃. Подо́бенъ: Дв҃а дне́сь: Во ст҃и́телехъ благоче́стнѡ пожи́сте, / и҆ лю́ди къ бг҃оразꙋ́мїю наста́висте, / и҆ до́брѣ бг҃ꙋ ᲂу҆годи́сте: / сегѡ̀ ра́ди ѿ негѡ̀ нетлѣ́нїемъ / и҆ чꙋдесы̀ просла́вистесѧ, / ꙗ҆́кѡ ᲂу҆ч҃ницы̀ бж҃їѧ бл҃года́ти."
 },
 {
  "type": "HEADER",
  "value": "Въ ѕ҃-й де́нь. Ст҃а́гѡ и҆ сла́внагѡ а҆пⷭ҇ла ѳѡмы̀."
 },
 {
  "type": "TEXT",
  "value": "Тропа́рь, гла́съ г҃: А҆пⷭ҇ле ст҃ы́й ѳѡмо̀, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "TEXT",
  "value": "И҆́нъ тропа́рь, гла́съ в҃: Оу҆ч҃ни́къ хрⷭ҇то́въ бы́въ, / бжⷭ҇твеннагѡ собо́ра а҆пⷭ҇льскагѡ соприча́стникъ: / невѣ́рствїемъ бо хрⷭ҇то́во воскресе́нїе и҆звѣсти́въ, / и҆ тогѡ̀ пречⷭ҇тꙋю стрⷭ҇ть ѡ҆сѧза́нїемъ ᲂу҆вѣ́ривъ, / ѳѡмо̀ всехва́льне: / и҆ ны́нѣ на́мъ просѝ ми́ра и҆ ве́лїѧ ми́лости."
 },
 {
  "type": "TEXT",
  "value": "Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь: Премꙋ́дрости бл҃года́ти и҆спо́лненъ, / хрⷭ҇то́въ а҆пⷭ҇лъ, / и҆ слꙋжи́тель и҆́стинный, / въ покаѧ́нїи вопїѧ́ше тебѣ̀: / ты̀ мо́й є҆сѝ бг҃ъ же и҆ гдⷭ҇ь."
 },
 {
  "type": "HEADER",
  "value": "Въ ѳ҃-й де́нь. Ст҃а́гѡ а҆пⷭ҇ла і҆а́кѡва а҆лфе́ева."
 },
 {
  "type": "TEXT",
  "value": "Тропа́рь, гла́съ г҃: А҆пⷭ҇ле ст҃ы́й, і҆а́кѡве, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "TEXT",
  "value": "Конда́къ, гла́съ в҃. Подо́бенъ: Твє́рдыѧ: Тве́рдѡ мꙋ́дрости догма́ты въ дꙋ́шы благочести́выхъ вложи́вшаго, / похвала́ми да ᲂу҆блажи́мъ, ꙗ҆́кѡ бг҃овѣща́телѧ всѝ і҆а́кѡва: / престо́лꙋ бо сла́вы влⷣчню предстоѧ̀, / и҆ со всѣ́ми а҆́гг҃лы ра́дꙋетсѧ, / молѧ̀ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Въ і҃-й де́нь. Преставле́нїе прпⷣбнагѡ а҆мвро́сїа, ста́рца ѻ҆́птинскагѡ."
 },
 {
  "type": "TEXT",
  "value": "Тропа́рь, гла́съ є҃: Ꙗ҆́кѡ къ цѣле́бномꙋ и҆сто́чникꙋ / притека́емъ къ тебѣ̀, а҆мвро́сїе ѻ҆́тче на́шъ, / ты́ бо на пꙋ́ть сп҃се́нїѧ на́съ вѣ́рнѡ наставлѧ́еши, / моли́твами ѿ бѣ́дъ и҆ напа́стей ѡ҆хранѧ́еши, / въ тѣле́сныхъ и҆ дꙋше́вныхъ ско́рбехъ ᲂу҆тѣша́еши, / па́че же смире́нїю, терпѣ́нїю и҆ любвѝ наꙋча́еши, / молѝ чл҃вѣколю́бца хрⷭ҇та̀ / и҆ застꙋ́пницꙋ ᲂу҆се́рднꙋю / сп҃сти́сѧ дꙋша́мъ на́шымъ."
 },
 {
  "type": "TEXT",
  "value": "Конда́къ, гла́съ в҃: Завѣ́тъ пастыренача́льника и҆спо́лнивъ, / ста́рчества бл҃года́ть наслѣ́довалъ є҆сѝ, / болѣ́знꙋѧ се́рдцемъ ѡ҆ всѣ́хъ съ вѣ́рою притека́ющихъ къ тебѣ̀, / тѣ́мже и҆ мы̀, ча̑да твоѧ̑, съ любо́вїю вопїе́мъ тѝ: / ѻ҆́тче ст҃ы́й а҆мвро́сїе, / молѝ хрⷭ҇та̀ бг҃а сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "По а҃і-мъ днѝ сегѡ̀ мѣ́сѧца, въ прїидꙋ́щꙋю недѣ́лю. Па́мѧть соверша́емъ ст҃ы́хъ ѻ҆тє́цъ седма́гѡ собо́ра."
 },
 {
  "type": "TEXT",
  "value": "Тропа́рь, гла́съ и҃: Препросла́вленъ є҆сѝ, хрⷭ҇тѐ бж҃е на́шъ, / свѣти̑ла на землѝ ѻ҆тцы̀ на́ши ѡ҆снова́вый, / и҆ тѣ́ми ко и҆́стиннѣй вѣ́рѣ всѧ̑ ны̀ наста́вивый, / многобл҃гоꙋтро́бне, сла́ва тебѣ̀."
 },
 {
  "type": "TEXT",
  "value": "Конда́къ, гла́съ ѕ҃. Подо́бенъ: Рꙋкопи́саннагѡ: И҆́же и҆зъ ѻ҆ц҃а̀ возсїѧ́въ сн҃ъ неизрече́ннѡ, / и҆зъ жены̀ роди́сѧ сꙋгꙋ́бъ є҆стество́мъ, / є҆го́же ви́дѧще не ѿмета́емсѧ зра́ка и҆з̾ѡбраже́нїѧ: / но сїѐ благоче́стнѡ начерта́юще, / почита́емъ вѣ́рнѡ. / И҆ сегѡ̀ ра́ди и҆́стиннꙋю вѣ́рꙋ цр҃ковь держа́щи, / лобыза́етъ і҆кѡ́нꙋ вочл҃вѣ́ченїѧ хрⷭ҇то́ва."
 },
 {
  "type": "HEADER",
  "value": "Въ г҃і-й де́нь. Пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ нарица́емыѧ і҆́верскїѧ."
 },
 {
  "type": "TEXT",
  "value": "Тропа́рь бцⷣѣ, гла́съ а҃: Де́рзость ненави́дѧщихъ ѻ҆́бразъ гдⷭ҇ень / и҆ держа́ва нечести́выхъ безбо́жнѡ въ нїке́ю прїи́де, / и҆ по́сланнїи безчеловѣ́чнѡ вдови́цꙋ, / бл҃гоче́стнѡ чтꙋ́щꙋю і҆кѡ́нꙋ бг҃ома́тере, и҆стѧзꙋ́ютъ. / Но та́ѧ но́щїю съ сы́номъ і҆кѡ́нꙋ въ мо́ре пꙋстѝ, вопїю́щи: / сла́ва тебѣ̀, чⷭ҇таѧ, / ꙗ҆́кѡ непроходи́мое мо́ре плещы̀ своѧ̑ подадѐ: / сла́ва правоше́ствїю твоемꙋ̀, є҆ди́на нетлѣ́ннаѧ."
 },
 {
  "type": "TEXT",
  "value": "И҆́нъ тропа́рь, гла́съ то́йже: Ѿ ст҃ы́ѧ і҆кѡ́ны твоеѧ̀, / ѽ влⷣчце бцⷣе, / и҆сцѣлє́нїѧ и҆ цѣльбы̑ подаю́тсѧ ѻ҆би́льнѡ, / съ вѣ́рою и҆ любо́вїю приходѧ́щымъ къ не́й: / та́кѡ и҆ мою̀ не́мощь посѣтѝ, / и҆ дꙋ́шꙋ мою̀ поми́лꙋй, бл҃га́ѧ, / и҆ тѣ́ло и҆сцѣлѝ бл҃года́тїю твое́ю, пречⷭ҇таѧ."
 },
 {
  "type": "TEXT",
  "value": "Конда́къ, гла́съ и҃: А҆́ще и҆ въ мо́ре вве́ржена бы́сть ст҃а́ѧ і҆кѡ́на твоѧ̀, бцⷣе, / ѿ вдови́цы, не могꙋ́щїѧ спастѝ сїю̀ ѿ врагѡ́въ: / но ꙗ҆ви́ласѧ є҆́сть храни́тельница а҆ѳѡ́на / и҆ врата́рница ѻ҆би́тели і҆́верскїѧ, врагѝ ᲂу҆страша́ющаѧ и҆ въ правосла́внѣй рѡссі́йстѣй странѣ̀ / чтꙋ́щыѧ тѧ̀ ѿ всѣ́хъ бѣ́дъ и҆ напа́стей и҆збавлѧ́ющаѧ."
 },
 {
  "type": "HEADER",
  "value": "Въ и҃і-й де́нь. Ст҃а́гѡ а҆пⷭ҇ла и҆ є҆ѵⷢ҇лі́ста лꙋкѝ."
 },
 {
  "type": "TEXT",
  "value": "Тропа́рь, гла́съ г҃: А҆пⷭ҇ле ст҃ы́й и҆ є҆ѵⷢ҇лі́сте лꙋко̀, / молѝ ми́лостиваго бг҃а, / да прегрѣше́нїй ѡ҆ставле́нїе / пода́стъ дꙋша́мъ на́шымъ."
 },
 {
  "type": "TEXT",
  "value": "И҆́нъ тропа́рь, гла́съ є҃: А҆пⷭ҇тольскихъ дѣѧ́нїй сказа́телѧ, / и҆ є҆ѵⷢ҇лїа хрⷭ҇то́ва свѣ́тла списа́телѧ, / лꙋкꙋ̀ препѣ́таго / сла́вна сꙋ́ща хрⷭ҇то́вѣ цр҃кви, / пѣ́сньми свѧще́нными ст҃а́го а҆пⷭ҇ла похва́лимъ, / ꙗ҆́кѡ врача̀ сꙋ́ща, / человѣ́чєскїѧ не́мѡщи, / є҆стества̀ недꙋ́ги, и҆ ꙗ҆́зи дꙋ́шъ и҆сцѣлѧ́юща, / и҆ молѧ́щасѧ непреста́ннѡ за дꙋ́шы на́шѧ."
 },
 {
  "type": "TEXT",
  "value": "Конда́къ, гла́съ в҃. Подо́бенъ: Твє́рдыѧ: И҆́стиннаго благоче́стїѧ проповѣ́дника, / и҆ та̑инъ неизрече́нныхъ ри́тора, / ѕвѣздꙋ̀ цр҃ко́внꙋю, лꙋкꙋ̀ бжⷭ҇твеннаго восхва́лимъ: / сло́во бо є҆го̀ и҆збра̀, съ па́ѵломъ мꙋ́дрымъ ꙗ҆зы́кѡвъ ᲂу҆чи́телѧ, / є҆ди́нъ вѣ́дый сердє́чнаѧ."
 },
 {
  "type": "HEADER",
  "value": "Въ к҃в-й де́нь. Пра́зднꙋемъ прест҃ѣ́й бцⷣѣ чꙋдотво́рныѧ і҆кѡ́ны каза́нскїѧ."
 },
 {
  "type": "TEXT",
  "value": "Тропа́рь, гла́съ д҃: Застꙋ́пнице ᲂу҆се́рднаѧ, / мт҃и гдⷭ҇а вы́шнѧгѡ. / За всѣ́хъ мо́лиши сн҃а твоего̀ хрⷭ҇та̀ бг҃а на́шего, / и҆ всѣ̑мъ твори́ши спасти́сѧ, / въ держа́вный тво́й покро́въ прибѣга́ющымъ. / Всѣ́хъ на́съ застꙋпѝ, ѽ гпⷭ҇жѐ цр҃и́це и҆ влⷣчце! / И҆̀же въ напа́стехъ и҆ ско́рбехъ, и҆ въ болѣ́знехъ ѡ҆бремене́нныхъ грѣхи̑ мно́гими, / предстоѧ́щихъ и҆ молѧ́щихсѧ тебѣ̀ / ᲂу҆миле́нною дꙋше́ю, и҆ сокрꙋше́ннымъ се́рдцемъ, / предъ пречⷭ҇тымъ твои́мъ ѻ҆́бразомъ со слеза́ми, / и҆ невозвра́тнѡ наде́ждꙋ и҆мꙋ́щихъ на тѧ̀, / и҆збавле́нїѧ всѣ́хъ ѕѡ́лъ. / Всѣ̑мъ полє́знаѧ да́рꙋй, / и҆ всѧ̑ спасѝ, бцⷣе дв҃о: / ты́ бо є҆сѝ бжⷭ҇твенный покро́въ рабѡ́мъ твои̑мъ."
 },
 {
  "type": "TEXT",
  "value": "Конда́къ, гла́съ и҃. Подо́бенъ: Взбра́нной: Притеце́мъ, лю́дїе, къ ти́хомꙋ семꙋ̀ и҆ до́бромꙋ приста́нищꙋ, / ско́рой помо́щницѣ, гото́вомꙋ и҆ те́пломꙋ спасе́нїю, покро́вꙋ дв҃ы: / ᲂу҆скори́мъ на моли́твꙋ, и҆ потщи́мсѧ на покаѧ́нїе: / и҆сточа́етъ бо на́мъ неѡскꙋ̑дныѧ ми́лѡсти пречⷭ҇таѧ бцⷣа, / предварѧ́етъ на по́мощь, и҆ и҆збавлѧ́етъ ѿ вели́кихъ бѣ́дъ и҆ ѕѡ́лъ, / благонра̑вныѧ и҆ бг҃обоѧ́щыѧсѧ рабы̑ своѧ̑."
 },
 {
  "type": "HEADER",
  "value": "Въ к҃г-й де́нь. Ст҃а́гѡ а҆пⷭ҇ла і҆а́кѡва, бра́та бж҃їѧ."
 },
 {
  "type": "TEXT",
  "value": "Тропа́рь, гла́съ в҃: Ꙗ҆́кѡ гдⷭ҇ень ᲂу҆ч҃ни́къ, воспрїѧ́лъ є҆сѝ пра́ведне є҆ѵⷢ҇лїе: / ꙗ҆́кѡ мч҃никъ и҆́маши, є҆́же неѡпи́санное: / дерзнове́нїе, ꙗ҆́кѡ бра́тъ бж҃їй: / є҆́же моли́тисѧ, ꙗ҆́кѡ і҆ера́рхъ. / Молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "TEXT",
  "value": "Конда́къ, гла́съ д҃. Подо́бенъ: Вознесы́йсѧ: Ѻ҆́ч҃ее є҆диноро́дное бг҃ъ сло́во, / прише́дшее къ на́мъ въ послѣ̑днїѧ дни̑, / і҆а́кѡве бжⷭ҇твенне, / пе́рваго тѧ̀ показа̀ / і҆ерꙋсалѵ́млѧнъ па́стырѧ и҆ ᲂу҆чи́телѧ, / и҆ вѣ́рнаго строи́телѧ та́инствъ дх҃о́вныхъ: / тѣ́мже тѧ̀ всѝ чти́мъ, а҆пⷭ҇толе."
 },
 {
  "type": "HEADER",
  "value": "Въ к҃д-й де́нь. Пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ всѣ́хъ скорбѧ́щихъ ра́дости."
 },
 {
  "type": "TEXT",
  "value": "Тропа́рь, гла́съ в҃: Всѣ́хъ скорбѧ́щихъ ра́досте, / и҆ ѡ҆би́димыхъ застꙋ́пнице, / и҆ а҆́лчꙋщихъ пита́тельнице, / стра́нныхъ ᲂу҆тѣше́нїе, / ѡ҆бꙋрева́емыхъ приста́нище, / больны́хъ посѣще́нїе, / немощны́хъ покро́ве и҆ застꙋ́пнице, / же́злъ ста́рости, / мт҃и бг҃а вы́шнѧгѡ ты̀ є҆сѝ, пречⷭ҇таѧ: / потщи́сѧ, мо́лимсѧ, сп҃сти́сѧ рабѡ́мъ твои̑мъ."
 },
 {
  "type": "TEXT",
  "value": "И҆́нъ тропа́рь, гла́съ д҃: Къ бцⷣѣ прилѣ́жнѡ ны́нѣ притеце́мъ / грѣ́шнїи и҆ смире́ннїи, и҆ припаде́мъ, / въ покаѧ́нїи зовꙋ́ще и҆з̾ глꙋбины̀ дꙋшѝ: / влⷣчце, помозѝ, на ны̀ милосе́рдовавши: / потщи́сѧ, погиба́емъ ѿ мно́жества прегрѣше́нїй: / не ѿвратѝ твоѧ̑ рабы̑ тщы̀, / тѧ́ бо и҆ є҆ди́нꙋ наде́ждꙋ и҆́мамы."
 },
 {
  "type": "TEXT",
  "value": "И҆́нъ тропа́рь, гла́съ то́йже: Не ᲂу҆молчи́мъ никогда̀, бцⷣе, / си̑лы твоѧ̑ глаго́лати недосто́йнїи: / а҆́ще бо ты̀ не бы̀ предстоѧ́ла молѧ́щи, / кто̀ бы на́съ и҆зба́вилъ ѿ толи́кихъ бѣ́дъ; / кто́ же бы сохрани́лъ доны́нѣ свобѡ́дны; / не ѿстꙋ́пимъ, влⷣчце, ѿ тебє̀: / твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ."
 },
 {
  "type": "TEXT",
  "value": "Конда́къ, гла́съ ѕ҃: Не и҆́мамы и҆ны́ѧ по́мощи, / не и҆́мамы и҆ны́ѧ наде́жды, / ра́звѣ тебє̀, влⷣчце: / ты̀ на́мъ помозѝ: / на тебѐ надѣ́емсѧ / и҆ тобо́ю хва́лимсѧ: / твои́ бо є҆смы̀ рабѝ, / да не постыди́мсѧ."
 },
 {
  "type": "HEADER",
  "value": "Въ к҃ѕ-й де́нь. Ст҃а́гѡ великомꙋ́ченика дими́трїа мѷрото́чца."
 },
 {
  "type": "TEXT",
  "value": "Тропа́рь, гла́съ г҃: Вели́ка ѡ҆брѣ́те въ бѣда́хъ тѧ̀ побо́рника вселе́ннаѧ, страстоте́рпче, / ꙗ҆зы́ки побѣжда́юща. / Ꙗ҆́коже ᲂу҆́бѡ лѵ́евꙋ низложи́лъ є҆сѝ горды́ню, / и҆ на по́двигъ дерзнове́нна сотвори́въ не́стора, / та́кѡ, свѧ́те дими́трїе, / хрⷭ҇тꙋ̀ бг҃ꙋ моли́сѧ / дарова́ти на́мъ ве́лїю ми́лость."
 },
 {
  "type": "TEXT",
  "value": "Конда́къ, гла́съ в҃: Крове́й твои́хъ стрꙋѧ́ми, дими́трїе, / цр҃ковь бг҃ъ ѡ҆багрѝ, / да́вый тебѣ̀ крѣ́пость непобѣди́мꙋю, / и҆ соблюда́ѧ гра́дъ тво́й невреди́мь: / тогѡ́ бо є҆сѝ ᲂу҆твержде́нїе."
 },
 {
  "type": "HEADER",
  "value": "Въ то́йже де́нь, воспомина́нїе вели́кагѡ и҆ стра́шнагѡ трѧсе́нїѧ."
 },
 {
  "type": "TEXT",
  "value": "Тропа́рь, гла́съ и҃: Призира́ѧй на зе́млю, и҆ творѧ́й ю҆̀ трѧсти́сѧ, / и҆зба́ви ны̀ стра́шнагѡ трꙋ́са преще́нїѧ, хрⷭ҇тѐ бж҃е на́шъ, / и҆ низпослѝ на́мъ бога̑тыѧ ми́лѡсти твоѧ̑, / моли́твами бцⷣы, и҆ спаси́ ны."
 },
 {
  "type": "TEXT",
  "value": "Конда́къ, гла́съ ѕ҃. Подо́бенъ: Є҆́же ѡ҆ на́съ: И҆зба́ви трꙋ́са тѧ́жкагѡ всѣ́хъ на́съ, гдⷭ҇и, / и҆ ꙗ҆́звы нестерпи́мыѧ, грѣ̑хъ ра́ди на́шихъ. / Пощадѝ, гдⷭ҇и, правосла̑вныѧ лю́ди твоѧ̑, / ꙗ҆̀же стѧжа́лъ є҆сѝ твое́ю кро́вїю, влⷣко: / и҆ гра́дъ не преда́ждь въ поги́бель трꙋ́сомъ стра́шнымъ: / и҆но́гѡ бо ра́звѣ тебє̀ бг҃а не вѣ́мы, / и҆ воззовѝ пою́щымъ: / а҆́зъ є҆́смь съ ва́ми, и҆ никто́же на вы̀."
 }
]