[
 {
  "type": "HEADER",
  "value": "Ное́мврїа к҃ѕ"
 },
 {
  "type": "HEADER",
  "value": "И҆з̾ слꙋ́жбы і҆нноке́нтїю и҆ркꙋ́тскомꙋ."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Ѻ҆́тче ст҃и́телю і҆нноке́нтїе, ꙗ҆ви́лъ є҆сѝ въ преподо́бїи твое́мъ сла́вꙋ црⷭ҇твїѧ хрⷭ҇то́ва, въ по́двизѣхъ до́брыхъ возглаго́лалъ є҆сѝ си́лꙋ бл҃года́ти є҆гѡ̀, въ чꙋдесѣ́хъ мно́гихъ возвели́чилъ є҆сѝ побѣ́дꙋ, побѣжда́ющꙋю мі́ръ, вѣ́рꙋ ст҃ꙋ́ю, и҆ са́мъ ꙗ҆́кѡ сщ҃е́нникъ ѡ҆бле́клсѧ є҆сѝ во сп҃се́нїе: тѣ́мже и҆ ст҃ы́нѧ гдⷭ҇нѧ процвѣтѐ на тебѣ̀, ꙗ҆́кѡ пома́занномъ ѿ дх҃а ст҃а́гѡ, є҆гѡ́же бл҃гі́й да не ѿи́метъ ѿ на́съ согрѣши́вшихъ, но да ѡ҆бнови́тъ на́съ мл҃твами твои́ми, ᲂу҆го́дниче бж҃їй."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Безневѣ́стнаѧ дв҃о:"
 },
 {
  "type": "HEADER",
  "value": "На бл҃гослове́нїи хлѣ́бѡвъ, тропа́рь ст҃и́телѧ, гла́съ г҃:"
 },
 {
  "type": "TEXT",
  "value": "Свѣти́льниче цр҃кве пресвѣ́тлый, ѡ҆зари́вый лꙋча́ми добро́тъ твои́хъ странꙋ̀ сїю̀, и҆ и҆сцѣле́ньми мно́гими притека́ющихъ къ ра́цѣ твое́й съ вѣ́рою бг҃а просла́вивый, мо́лимъ тѧ̀, ст҃и́телю ѻ҆́тче і҆нноке́нтїе, ѡ҆гражда́й мл҃твами твои́ми гра́дъ се́й ѿ всѣ́хъ бѣ́дъ и҆ печа́ли. Два́жды."
 },
 {
  "type": "TEXT",
  "value": "И҆ Бцⷣе дв҃о: Є҆ди́ножды."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь ст҃а́гѡ два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "По а҃-мъ стїхосло́вїи сѣда́ленъ, гла́съ є҃:"
 },
 {
  "type": "TEXT",
  "value": "Не да́лъ є҆сѝ сна̀ ѻ҆чи́ма твои́ма, человѣ́че бж҃їй, нижѐ вѣ́ждома твои́ма дрема́нїѧ, до́ндеже ѡ҆брѣ́лъ є҆сѝ мѣ́сто гдⷭ҇еви посредѣ̀ разрꙋша́ющагѡсѧ влады́чества дре́внѧгѡ ѡ҆мрачи́телѧ ꙗ҆зы́кѡвъ: ѡ҆снова́лъ є҆сѝ селе́нїе бг҃ꙋ і҆а́кѡвлю не во і҆ꙋде́и, ни во і҆ерꙋсали́мѣхъ, но въ предѣ́лѣхъ монго́льскихъ. Тѣ́мже ꙗ҆ви́лсѧ є҆сѝ и҆ дв҃дъ, положи́вый во странѣ̀ невѣ́рїѧ тве́рдое ѡ҆снова́нїе вѣ́ры, и҆ соломѡ́нъ, ᲂу҆мꙋдри́выйсѧ въ созида́нїи сп҃се́нїѧ ста́дꙋ твоемꙋ̀."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Бг҃а и҆з̾ тебє̀ воплоти́вшагосѧ позна́хомъ, бцⷣе дв҃о: того̀ молѝ ѡ҆ сп҃се́нїи гра́да на́шегѡ и҆ всѣ́хъ запечатлѣ́нныхъ и҆́менемъ сн҃а твоегѡ̀."
 },
 {
  "type": "HEADER",
  "value": "По в҃-мъ стїхосло́вїи сѣда́ленъ, гла́съ д҃:"
 },
 {
  "type": "TEXT",
  "value": "Ꙗ҆́кѡ мѵ́ро на главѣ̀, сходѧ́щее на брадꙋ̀, брадꙋ̀ а҆арѡ́ню, сходѧ́щее на ѡ҆ме́ты ѡ҆де́жды є҆гѡ̀, ꙗ҆́кѡ роса̀ а҆ермѡ́нскаѧ, сходѧ́щаѧ на го́ры сїѡ́нскїѧ, та́кѡ бл҃года́ть дх҃а ст҃а́гѡ, бл҃гоꙋха́ющи вы́нꙋ на просла́вленномъ нетлѣ́нїемъ тѣлесѝ твое́мъ, притека́ющыѧ къ ра́цѣ твое́й съ вѣ́рою напоѧ́етъ ра́достїю ѡ҆ гдⷭ҇ѣ, прославлѧ́ющемъ тѧ̀."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Со ст҃и́телемъ, пречⷭ҇таѧ, и҆ всѣ́ми ст҃ы́ми, во ст҃ы́хъ є҆ди́наго почива́ющаго ᲂу҆молѝ, всѣ́хъ ѡ҆свѧти́ти на́съ, славосло́вѧщихъ тѧ̀ во всѧ̑ вѣ́ки."
 },
 {
  "type": "HEADER",
  "value": "По полѷеле́и сѣда́ленъ, гла́съ г҃:"
 },
 {
  "type": "TEXT",
  "value": "Гдⷭ҇ь, не лиша́ѧй бл҃ги́хъ ходѧ́щыѧ неѕло́бїемъ, бл҃года́ть и҆ сла́вꙋ даде́ ти, ст҃и́телю і҆нноке́нтїе, ю҆́же всели́лъ є҆сѝ въ землѝ на́шей: и҆ на нб҃сѝ ᲂу҆̀бо сподо́би ны̀, твои́ми мл҃твами, вѣ́чныѧ сла́вы съ тобо́ю и҆ со всѣ́ми ст҃ы́ми, бг҃ꙋ бл҃гоꙋгоди́вшими."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Покро́въ бꙋ́ди мѝ и҆ предста́тельство, и҆ застꙋпле́нїе, и҆ похвала̀, дв҃о: ꙗ҆́кѡ ты̀ є҆сѝ безпомо́щныхъ си́ла неѡбори́маѧ и҆ наде́жда ненадѣ́емыхъ."
 },
 {
  "type": "HEADER",
  "value": "Посе́мъ а҃-й а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Честна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "TEXT",
  "value": "Та́же: Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло а҃і."
 },
 {
  "type": "HEADER",
  "value": "По є҆ѵⷢ҇лїи стїхи́ра, гла́съ ѕ҃:"
 },
 {
  "type": "TEXT",
  "value": "Да и҆спо́лнѧтсѧ ᲂу҆ста̀ на̑ша хвале́нїѧ твоегѡ̀, гдⷭ҇и, ꙗ҆́кѡ да воспои́мъ сла́вꙋ твоегѡ̀ ᲂу҆го́дника, є҆го́же просла́вилъ є҆сѝ нетлѣ́нїемъ и҆ чꙋдотворе́ньми, въ бѣда́хъ сꙋ́щымъ показа́лъ є҆сѝ помо́щника, въ недꙋ́зѣхъ ско́раго цѣли́телѧ, въ ско́рбехъ ᲂу҆тѣ́шителѧ, ѡ҆ чтꙋ́щихъ є҆гѡ̀ ст҃ꙋ́ю па́мѧть те́плаго моли́твенника."
 },
 {
  "type": "HEADER",
  "value": "Канѡ́нъ, гла́съ и҃, є҆гѡ́же краегране́сїе:"
 },
 {
  "type": "TEXT",
  "value": "І҆нноке́нтїй, моли́твенникъ ѡ҆ дꙋша́хъ на́шихъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ, пои́мъ хрⷭ҇тꙋ̀: ꙗ҆́кѡ просла́висѧ во вѣ́ки."
 },
 {
  "type": "TEXT",
  "value": "І҆ера́рше непоро́чне, при́зри съ нб҃сѐ и҆ ви́ждь, и҆ посѣтѝ ѡ҆сѣне́нїемъ твои́мъ вїногра́дъ се́й, є҆го́же насадѝ десни́ца твоѧ̀ во странѣ̀ ꙗ҆зы́кѡвъ: да просла́вимъ бл҃гоговѣ́йнѡ чꙋдеса̀ твоѧ̑, а҆́ще и҆ невозмо́жно є҆́сть и҆счи́слити ѧ҆̀."
 },
 {
  "type": "TEXT",
  "value": "На пꙋтѝ и҆ногда̀ вразꙋмлѧ́ше валаа́ма ѻ҆сли́ца, да не и҆́детъ проклина́ти і҆и҃лѧ, є҆го́же и҆ бл҃гословѝ прише́дый ѿ месопота́мїи: си́це ᲂу҆томле́нными ко́ньми вразꙋмле́нъ бы́сть преѡгорче́нный пꙋ́тникъ, да возда́стъ ст҃и́телю і҆нноке́нтїю сла́вꙋ, є҆́юже ѡ҆бѣща́сѧ."
 },
 {
  "type": "TEXT",
  "value": "Но́гъ болѣ́знїю и҆ разслабле́нїемъ всѣ́хъ чле́нѡвъ недꙋ́гꙋющемꙋ ꙗ҆ви́лсѧ є҆сѝ ско́рый цѣли́тель, ѻ҆́тче на́шъ і҆нноке́нтїе: не пре́зри ᲂу҆̀бо и҆ ны́нѣ съ вѣ́рою притека́ющихъ къ живонѡ́снымъ и҆ присноцѣ́лєбнымъ моще́мъ твои́мъ."
 },
 {
  "type": "TEXT",
  "value": "Бг҃оро́диченъ: Ѻ҆ц҃ꙋ̀ собезнача́льнаго сн҃а пло́тїю родила̀ є҆сѝ, пренепоро́чнаѧ дв҃о, є҆го́же молѝ со ст҃и́телемъ, да сотвори́тъ ны̀ сы́ны своегѡ̀ црⷭ҇твїѧ и҆ наслѣ́дники ѡ҆бѣтова́нїѧ вѣ́чнагѡ."
 },
 {
  "type": "HEADER",
  "value": "Катава́сїа по ᲂу҆ста́вꙋ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твердѝ на́шъ ᲂу҆́мъ и҆ сердца̀, нб҃са̀ сло́вомъ ᲂу҆твержде́й, во є҆́же пѣ́ти и҆ сла́вити тѧ̀, во сп҃се́нїе дꙋ́шъ на́шихъ."
 },
 {
  "type": "TEXT",
  "value": "Кꙋпинꙋ̀ вторꙋ́ю показа́лъ є҆сѝ, слове́сный па́стырю, є҆гда̀ мл҃твами твои́ми сохрани́лъ є҆сѝ посредѣ̀ пла́мене невреди́мꙋ ст҃ꙋ́ю це́рковь, въ не́йже почива́ше не ᲂу҆̀ просла́вленное на землѝ, но съ нб҃сѐ ѻ҆би́лїемъ чꙋдотворе́нїй ꙗ҆́вственнѡ свидѣ́тельствованное свѧ́то бы́ти нетлѣ́нное тѣ́ло твоѐ."
 },
 {
  "type": "TEXT",
  "value": "Є҆ди́нѣй вѣ́рѣ достꙋ́пенъ ꙗ҆ви́лсѧ є҆сѝ, непоро́чне: тѣ́мже съ премѣне́нїемъ є҆стества̀ ᲂу҆ста́вѡвъ, мра́зъ и҆ и҆́ней сокры́ша чистотꙋ̀ твою̀ ѿ ѻ҆че́съ нечи́стыхъ, дерзнꙋ́вшихъ въ невѣ́рїи ви́дѣти тѧ̀, и҆̀мже не да́лъ є҆сѝ ᲂу҆зрѣ́ти сла́вы твоеѧ̀, поꙋча́ѧ ны̀ чи́стымъ се́рдцемъ тебѐ сла́вити."
 },
 {
  "type": "TEXT",
  "value": "На по́мощь ско́рѡ прите́клъ є҆сѝ къ ста́рцꙋ ѻ҆чи́ма тѧ́жкѡ ви́дѧщемꙋ, и҆ прикоснꙋ́всѧ болѣ́зненнѣй главѣ̀ є҆гѡ̀, ꙗ҆ви́лъ є҆сѝ на не́мъ дѣ́ла бж҃їѧ: просвѣтѝ ᲂу҆̀бо и҆ на́шѧ дꙋшє́вныѧ ѻ҆́чи мл҃твами твои́ми, сщ҃еннонача́льниче."
 },
 {
  "type": "TEXT",
  "value": "Бг҃оро́диченъ: Тве́рдое и҆ непрело́жное ᲂу҆пова́нїе вѣ́мы тѧ̀, бцⷣе, є҆гѡ́же держи́мсѧ, и҆ ᲂу҆пова́юще мо́лимсѧ: сохранѝ гра́дъ се́й и҆ всѧ̑ гра́ды и҆ страны̑ хрⷭ҇тїа̑нскїѧ ѿ всѣ́хъ бѣ́дъ, находѧ́щихъ человѣ́кѡмъ согрѣша́ющымъ, но а҆́бїе мл҃твами твои́ми прїе́млющымъ согрѣше́нїй ѡ҆ставле́нїе."
 },
 {
  "type": "HEADER",
  "value": "Сѣда́ленъ, гла́съ г҃:"
 },
 {
  "type": "TEXT",
  "value": "Тако́въ на́мъ подоба́ше а҆рхїере́й, преподо́бенъ, неѕло́бивъ, кро́токъ, ѿлꙋче́нъ ѿ грѣ̑шникъ, и҆́же пред̾ вѣ́чнымъ а҆рхїере́емъ і҆и҃съ хрⷭ҇то́мъ мо́литсѧ вы́нꙋ ѡ҆ сп҃се́нїи ста́да своегѡ̀: мно́гѡ бо мо́жетъ мл҃тва првⷣнагѡ поспѣшествꙋ́ема во бл҃го́е."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Прото́ржесѧ вода̀ въ пꙋсты́ни, и҆сто́чникъ и҆сцѣле́нїй и҆стека́етъ ѿ неистлѣ́нныхъ моще́й ст҃и́телѧ і҆нноке́нтїа: ра́дость вѣ́чнаѧ над̾ главо́ю є҆гѡ̀: є҆ѧ́же да сподо́бимсѧ и҆ мы̀ мл҃твами є҆гѡ̀, въ невече́рнемъ днѝ воскрⷭ҇нїѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Ѡ҆ тебѣ̀, ѻ҆трокови́це, возгласѝ прⷪ҇ро́къ, глаго́лѧ: сѐ врата̀ восто́ка, и҆ бꙋ́дꙋтъ затворє́на, и҆ никто́же про́йдетъ сквозѣ̀ ѧ҆̀: но гдⷭ҇ь бг҃ъ є҆ди́нъ про́йдетъ, и҆ бꙋ́дꙋтъ врата̀ затворє́на."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "І҆и҃съ въ домꙋ̀ петро́вѣ прикоснꙋ́сѧ рꙋцѣ̀ те́щи є҆гѡ̀, ѻ҆гне́мъ жего́мыѧ, и҆ а҆́бїе ѡ҆ста́ви ю҆̀ ѻ҆́гнь. Сїѧ̑ же зна́мєнїѧ послѣ́доваша тебѣ̀ вѣ́рꙋющемꙋ чꙋдотво́рцꙋ: ᲂу҆кроти́лъ бо є҆сѝ ѻ҆гне́вицꙋ є҆ди́нымъ прикоснове́нїемъ бо́кꙋ лежа́щагѡ на ѻ҆дрѣ̀ сме́рти, но призва́вшагѡ тѧ̀ во ᲂу҆пова́нїи жи́зни."
 },
 {
  "type": "TEXT",
  "value": "И҆сцѣлѧ́хꙋсѧ и҆ногда̀ вѣ́рꙋющїи ѿ нанесе́нїѧ главотѧ́жей и҆ ᲂу҆брꙋ́сцєвъ па́ѵловыхъ. Не прѡ́сты си̑лы творѧ́ше бг҃ъ и҆ твои́ма рꙋка́ма, но́вый а҆пⷭ҇ле: пе́рсть бо ѿ твоеѧ̀ сщ҃е́нныѧ ра́ки и҆ є҆ле́й ѿ лампа́ды ѿверза́ютъ слѣпотствꙋ́ющей ѻ҆́чи и҆ да́рꙋютъ и҆сцѣле́нїе."
 },
 {
  "type": "TEXT",
  "value": "Мл҃тва вѣ́ры сп҃сѐ лю́тѣ болѧ́щаго, и҆́же и҆ и҆сповѣ́да, ꙗ҆́кѡ вра́чеве не воскресѧ́тъ, ᲂу҆пова́нїе же на тѧ̀, бл҃госе́рдый ѻ҆́тче, николи́же посрамлѧ́етъ съ вѣ́рою призыва́ющихъ тѧ̀ во бл҃говре́меннꙋю по́мощь."
 },
 {
  "type": "TEXT",
  "value": "Бг҃оро́диченъ: Ѻ҆трокови́ца неискꙋсомꙋ́жнаѧ ражда́етъ прови́дѣннаго дх҃омъ ѿ а҆ввакꙋ́ма, и҆ къ рожде́нномꙋ мо́литсѧ ѡ҆ дꙋша́хъ на́шихъ, мꙋ́дрѣ пасо́мыхъ па́стыремъ, и҆ по и҆схо́дѣ свое́мъ вы́нꙋ съ на́ми въ нистлѣ́нїи ст҃а́гѡ тѣлесѐ своегѡ̀ пребыва́ющимъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ѿ но́щи невѣ́дѣнїѧ, бг҃овѣ́дѣнїѧ де́нь, во свѣ́тѣ лица̀ твоегѡ̀, хрⷭ҇тѐ, да возсїѧ́етъ ко ᲂу҆́трꙋ хвале́нїе твоѐ въ сердца́хъ на́шихъ."
 },
 {
  "type": "TEXT",
  "value": "Любо́вїю погрꙋзи́сѧ во стрꙋѧ́хъ ᲂу҆пова́нїѧ на ᲂу҆го́дника бж҃їѧ, покры́тый ѿ главы̀ до но́гъ стрꙋ́пами, и҆ во пло́ти свое́й не ѡ҆брѣта́ѧй и҆сцѣле́нїѧ, и҆ а҆́бїе ѡ҆чи́стисѧ ѿ нечистоты̀ болѣ́зненныѧ, ꙗ҆́коже неема́нъ ѿ прока́зы погрꙋже́нїемъ во і҆ѻрда́нѣ, по глаго́лꙋ є҆лїссе́евꙋ."
 },
 {
  "type": "TEXT",
  "value": "И҆́щꙋщымъ тебѐ ѡ҆брѣта́ешисѧ гото́вый помо́щникъ, ст҃и́телю і҆нноке́нтїе, и҆ ско́рѡ подае́ши недꙋ́гѡвъ и҆сцѣле́нїе, ꙗ҆́коже и҆ногда̀ женѣ̀, болѣ́знꙋющей десно́ю рꙋко́ю, ꙗ҆ви́лсѧ є҆сѝ въ со́нномъ видѣ́нїи, и҆ сотвори́лъ є҆сѝ ю҆̀ здра́вꙋ за є҆ди́ное призва́нїе ст҃а́гѡ твоегѡ̀ и҆́мене."
 },
 {
  "type": "TEXT",
  "value": "Тве́рдое бл҃года́ти позна́нїе ᲂу҆твержда́ѧ въ вѣ́рꙋющихъ, наꙋчи́лъ є҆сѝ на́съ вѣ́дѣти тѧ̀, ꙗ҆́кѡ наста́вника млⷭ҇тиваго, бл҃гоꙋтро́бїѧ сокро́вище, правовѣ́рїѧ ᲂу҆чи́телѧ, а҆рхїере́євъ похвалꙋ̀, безпо́мощныхъ застꙋ́пника, при́снѡ молѧ́щагосѧ ѡ҆ сп҃се́нїи ча̑дъ твои́хъ, съ вѣ́рою къ тебѣ̀ притека́ющихъ."
 },
 {
  "type": "TEXT",
  "value": "Бг҃оро́диченъ: Верєѝ а҆́дѡвы сломи́шасѧ, и҆ закле́пи вѣ́чнїи сокрꙋши́шасѧ ро́ждшимсѧ ѿ тебє̀, пречⷭ҇таѧ мт҃и: тѣ́мже мо́лимъ тѧ̀, и҆зба́ви ны̀ ѿ вѣ́чныѧ сме́рти хода́тайствомъ твои́мъ, и҆ всели́ ны во свѣ́тѣ сн҃а твоегѡ̀, свѣ́тъ и҆скꙋпле́нїѧ мі́рови возсїѧ́вшагѡ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ."
 },
 {
  "type": "TEXT",
  "value": "Є҆ли́цы притека́хꙋ къ тебѣ̀, помо́щниче те́плый, не ѿхожда́хꙋ посра́млени: немощні́и и҆сцѣлѧ́хꙋсѧ, въ болѣ́зни дѣторожде́нїѧ сꙋ́щыѧ, ѡ҆ многоцѣле́бныѧ бл҃госты́ни твоеѧ̀ прїима́хꙋ ско́рое недꙋ́га разрѣше́нїе, слѣпі́и прозира́хꙋ. Посѣтѝ ᲂу҆̀бо и҆ на́съ, ще́дрый ѻ҆́тче, твое́ю по́мощїю."
 },
 {
  "type": "TEXT",
  "value": "Не бꙋ́ди невѣ́ренъ, но вѣ́ренъ, ре́клъ є҆сѝ, ѻ҆́тче, втори́цею ꙗ҆ви́выйсѧ ѿ преломле́нїѧ ногѝ лю́тѣ стра́ждꙋщемꙋ, и҆ ᲂу҆да́ривъ жезло́мъ въ мѣ́сто, и҆дѣ́же стоѧ́стѣ но́зѣ твоѝ, ꙗ҆́звою на дре́вѣ ᲂу҆врачева́лъ є҆сѝ дꙋше́внꙋю ꙗ҆́звꙋ ѡ҆мраче́ннагѡ невѣ́рїемъ: а҆́бїе бо и҆сповѣ́да бы́ти тебѐ бл҃года́тнаго врача̀, воздви́гшаго є҆го̀ ѿ ѻ҆дра̀ болѣ́зненнагѡ."
 },
 {
  "type": "TEXT",
  "value": "Непоро́чныма твои́ма рꙋка́ма препода́лъ є҆сѝ, а҆рхїере́ю бж҃їй, безсме́ртнꙋю пи́щꙋ стра́ждꙋщей, ѽ чꙋ́до! На нб҃сѝ прїѡбща́ѧсѧ и҆́стѣе невече́рнѧгѡ свѣ́та, вѧ́щше седми́десѧти лѣ́тъ по твое́мъ ᲂу҆спе́нїи, и҆ на землѝ ꙗ҆влѧ́ешисѧ сщ҃еннодѣ́йствитель бж҃е́ственныхъ та̑инъ, ᲂу҆вѣрѧ́ѧ па́ствꙋ твою̀ въ неразлꙋ́чномъ пребыва́нїи вы́нꙋ съ притека́ющими ко твое́й по́мощи."
 },
 {
  "type": "TEXT",
  "value": "Бг҃оро́диченъ: И҆́стины ᲂу҆чи́телю, наста́ви ны̀ во и҆́стиннѣй вѣ́рѣ, молѧ̀ ѡ҆ сп҃се́нїи на́шемъ съ пречⷭ҇тою дв҃ою бцⷣею рожде́ннаго ѿ неѧ̀ на сп҃се́нїе всегѡ̀ мі́ра."
 },
 {
  "type": "HEADER",
  "value": "Конда́къ, гла́съ д҃:"
 },
 {
  "type": "TEXT",
  "value": "Непоро́чности соиме́ннаго па́стырѧ, проповѣ́дника вѣ́ры во ꙗ҆зы́цѣхъ монго́льскихъ, сла́вꙋ и҆ ᲂу҆краше́нїе и҆ркꙋ́тскїѧ па́ствы, любо́вїю восхва́лимъ всѝ вѣ́рнїи: то́й бо є҆́сть храни́тель страны̀ сеѧ̀ и҆ моли́твенникъ ѡ҆ дꙋша́хъ на́шихъ."
 },
 {
  "type": "TEXT",
  "value": "І҆́косъ: А҆́гг҃льскимъ житїе́мъ возвы́силсѧ є҆сѝ, ѻ҆́тче, до лицезрѣ́нїѧ красоты̀ несозда́нныѧ, є҆ѧ́же наслажда́ѧсѧ ны́нѣ на нб҃сѝ, мо́лишисѧ ѡ҆ сп҃се́нїи на́шемъ, на́съ же на землѝ наꙋча́еши взыва́ти тебѣ̀ такова̑ѧ: ра́дꙋйсѧ, крі́не, въ бл҃горастворе́нномъ ю҆́зѣ процвѣты́й: ра́дꙋйсѧ, пе́рвенче дх҃о́внагѡ сыноположе́нїѧ, ѿ ма́лыѧ рѡссі́и бг҃ꙋ посвѧще́нный. Ра́дꙋйсѧ, сла́во и҆ велича́нїе гра́да кі́ева: ра́дꙋйсѧ, въ земно́мъ ᲂу҆чи́лищи нбⷭ҇ныѧ мꙋ́дрости наста́вниче. Ра́дꙋйсѧ, мꙋ́дрый и҆сполни́телю велѣ́нїй царѧ̀ земна́гѡ: ра́дꙋйсѧ, мꙋ́жественный подви́жниче цр҃ѧ̀ нбⷭ҇нагѡ. Ра́дꙋйсѧ, проповѣ́дниче вѣ́ры во ꙗ҆зы́цѣхъ монго́льскихъ: ра́дꙋйсѧ, началоположи́телю до́брагѡ сщ҃еннонача́лїѧ во страна́хъ сїби́рскихъ. Ра́дꙋйсѧ, ᲂу҆краше́нїе и҆ркꙋ́тскїѧ па́ствы: ра́дꙋйсѧ, бл҃гоꙋха́нїе пꙋсты́ни. Ра́дꙋйсѧ, ѻ҆́бщагѡ воскрⷭ҇нїѧ въ нетлѣ́нїи твое́мъ ᲂу҆вѣри́телю: ра́дꙋйсѧ, неизчерпа́емыхъ чꙋде́съ и҆сто́чниче. Ра́дꙋйсѧ, храни́телю страны̀ тобо́ю и҆збра́нныѧ: ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ нача́лѣ зе́млю ѡ҆снова́вый и҆ небеса̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Крѣ́пость и҆ и҆сцѣле́нїе прїима́хꙋ ѿ тебє̀, ѻ҆́тче, немощствꙋ́ющїи пло́тїю: ско́рбнїи же дꙋ́хомъ и҆ ᲂу҆дрꙋче́ннїи печа́льми жите́йскими ѡ҆брѣта́хꙋ дꙋше́вное ᲂу҆тѣше́нїе во ᲂу҆миле́нномъ призыва́нїи ст҃а́гѡ и҆ просла́вленнагѡ и҆́мене твоегѡ̀, прославлѧ́ющагѡ ди́внаго во ст҃ы́хъ свои́хъ бг҃а і҆и҃лева."
 },
 {
  "type": "TEXT",
  "value": "Ѻ҆́тче, непоро́чности соиме́нне, та́кѡ просла́висѧ свѣ́тъ тво́й пред̾ человѣ̑ки, ꙗ҆́кѡ ви́дѧще дѡ́браѧ дѣла̀ твоѧ̑ и҆ чꙋдотворє́нїѧ мнѡ́гаѧ, прославлѧ́ютъ чꙋдодѣ́йствꙋющаго тобо́ю, ди́внаго во ст҃ы́хъ свои́хъ бг҃а і҆и҃лева."
 },
 {
  "type": "TEXT",
  "value": "Трⷪ҇ченъ: Дꙋшє́вныѧ на́шѧ болѣ̑зни и҆сцѣлѝ, бж҃е, мл҃твами просла́вленнагѡ ѿ тебє̀ ᲂу҆го́дника, ᲂу҆скорѧ́ющагѡ на по́мощь ᲂу҆миле́нною дꙋше́ю, тре́бꙋющымъ дѣ́йственнагѡ є҆гѡ̀ пред̾ тобо́ю, ст҃а́ѧ, застꙋпле́нїѧ."
 },
 {
  "type": "TEXT",
  "value": "Бг҃оро́диченъ: Оу҆́мъ на́шъ плѣни́въ послꙋша́нїе вѣ́ры, дꙋ́хъ и҆ дꙋ́шꙋ всесовершє́ны соблюдѝ, и҆ тѣ́ло въ прише́ствїе гдⷭ҇а на́шегѡ і҆и҃са хрⷭ҇та̀ непоро́чно сохранѝ мл҃твами твои́ми, бг҃ороди́тельнице."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте сщ҃е́нницы, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Широ́кїй пꙋ́ть, вводѧ́щїй въ па́гꙋбꙋ, презрѣ́лъ є҆сѝ, прпⷣбне, и҆ тѣ́сными враты̀ вше́лъ є҆сѝ въ нбⷭ҇ное црⷭ҇твїе. Ѿѻнꙋ́дꙋже призира́ѧ вы́нꙋ на призыва́ющихъ тѧ̀ съ вѣ́рою, ᲂу҆крѣпѝ ᲂу҆̀бо и҆ на́съ понестѝ бл҃го́е и҆ ле́гкое и҆́го крⷭ҇та̀, да вни́демъ въ поко́й бг҃а бл҃гослове́ннагѡ."
 },
 {
  "type": "TEXT",
  "value": "А҆гг҃лоподо́бнымъ житїе́мъ на землѝ, ѡ҆брѣ́лъ є҆сѝ бл҃года́ть и҆сцѣле́нїй, и҆ ꙗ҆ви́лсѧ є҆сѝ вои́стиннꙋ а҆́гг҃лъ храни́тель па́ствы твоеѧ̀, бо́дрственнѡ ᲂу҆твержда́ѧ ю҆̀ въ вѣ́рѣ многоразли́чными твои́ми чꙋдотворє́нїи и҆ соблюда́ѧ въ чи́стомъ и҆сповѣ́данїи ѻ҆тцє́въ бг҃а бл҃гослове́ннагѡ."
 },
 {
  "type": "TEXT",
  "value": "Хрⷭ҇то́во бл҃гоꙋха́нїе ꙗ҆ви́лсѧ є҆сѝ, ѻ҆́тче, въ сп҃са́емыхъ тобо́ю ѿ недꙋ́гѡвъ, дꙋше́вныхъ же и҆ тѣле́сныхъ: тѣ́мже ѡ҆бита́тєли гра́да тобо́ю и҆збра́ннагѡ, прославлѧ́юще ст҃ꙋ́ю па́мѧть твою̀, бл҃гословлѧ́ютъ просла́вившаго тѧ̀, ѻ҆тцє́въ бг҃а бл҃гослове́ннаго."
 },
 {
  "type": "TEXT",
  "value": "Бг҃оро́диченъ: Нѣ́сть на́ша бра́нь ко пло́ти и҆ кро́ви, но къ нача́лѡмъ, и҆ ко власте́мъ, и҆ къ мїродержи́телємъ тьмы̀ вѣ́ка сегѡ̀, къ дꙋховѡ́мъ ѕло́бы поднебє́снымъ: над̾ ни́миже покажи́ ны, влⷣчце, побѣди́тєли, ꙗ҆́кѡ да по ѡ҆́бразꙋ непоро́чнагѡ па́стырѧ возмо́жемъ всѧ̑ стрѣ́лы лꙋка́вагѡ разжжє́нныѧ ᲂу҆гаси́ти."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ сп҃се́нїе, пѣ́сньми немо́лчными велича́емъ."
 },
 {
  "type": "TEXT",
  "value": "А҆пⷭ҇лъ ꙗ҆зы́кѡвъ бы́лъ є҆сѝ, ѻ҆́тче, ꙗ҆́коже и҆ па́ѵелъ, тѣ́мже ны́нѣ восхище́нъ є҆сѝ на высотꙋ̀ бж҃е́ственнагѡ лицезрѣ́нїѧ: и҆дѣ́же мо́лишисѧ, да бг҃ъ возрасти́тъ, є҆́же ты̀, мꙋ́дрый дѣ́лателю, насади́лъ и҆ напои́лъ є҆сѝ."
 },
 {
  "type": "TEXT",
  "value": "Шле́мъ сп҃се́нїѧ воспрїи́мъ, и҆ мече́мъ дх҃о́внымъ препоѧ́савсѧ, и҆зше́лъ є҆сѝ на дѣ́ло твоѐ, па́стырю ди́вный, и҆ согради́лъ є҆сѝ ѡ҆пло́тъ бл҃гоче́стїѧ во мра́цѣ ꙗ҆зы́чества: молѝ ᲂу҆̀бо пребл҃га́го бг҃а, да ᲂу҆крѣпи́тъ, є҆́же содѣ́ла въ на́съ рꙋко́ю твое́ю."
 },
 {
  "type": "TEXT",
  "value": "И҆́менемъ и҆ житїе́мъ непоро́чне, прїимѝ хвалє́бныѧ пѣ̑сни, любо́вїю къ тебѣ̀ возноси̑мыѧ, ѡ҆сѣнѧ́ѧ мл҃твами твои́ми па́ствꙋ, ѡ҆сїѧ́ннꙋю лꙋча́ми добро́тъ твои́хъ, и҆ ᲂу҆скорѧ́ѧ на по́мощь бл҃года́тнымъ застꙋпле́нїемъ твои́мъ, во вре́мѧ бл҃гопотре́бно."
 },
 {
  "type": "TEXT",
  "value": "Бг҃оро́диченъ: Херꙋві́мѡвъ честнѣ́йшаѧ, и҆ сла́внѣйшаѧ без̾ сравне́нїѧ серафі́мѡвъ, не пре́зри молє́нїѧ ра̑бъ твои́хъ, но покры́й на́съ честны́мъ твои́мъ покро́вомъ: сп҃сѝ і҆мпера́тора и҆ лю́ди, бл҃гоговѣ́йнѡ чтꙋ́щыѧ па́мѧть непоро́чнагѡ па́стырѧ и҆ моли́твенника ѡ҆ гра́дѣ се́мъ, ди́внагѡ і҆нноке́нтїа."
 },
 {
  "type": "HEADER",
  "value": "Свѣти́ленъ, гла́съ а҃:"
 },
 {
  "type": "TEXT",
  "value": "Сла́ва тебѣ̀ бг҃ꙋ, показа́вшемꙋ на́мъ свѣ́тъ сп҃се́нїѧ въ житїѝ и҆ словесѝ твоегѡ̀ ᲂу҆го́дника: сла́ва тебѣ̀ бл҃года́телю, возсїѧ́вшемꙋ просвѣще́нїе и҆́стины въ побо́рницѣ бл҃гоче́стїѧ и҆ и҆́стины: сла́ва тебѣ̀ ди́вномꙋ щедротода́вцꙋ, ᲂу҆диви́вшемꙋ млⷭ҇ти твоѧ̑ на ходи́вшемъ во свѣ́тѣ лица̀ твоегѡ̀, ст҃и́телѣ и҆ чꙋдотво́рцѣ і҆нноке́нтїи."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Свѣ́тъ мі́рови возсїѧ̀ въ ржⷭ҇твѣ̀ твое́мъ, пречⷭ҇таѧ бцⷣе: ѡ҆сїѧ́й ᲂу҆̀бо ᲂу҆́мъ на́шъ позна́нїемъ сн҃а твоегѡ̀, се́рдце ᲂу҆ѧзвѝ любо́вїю къ бж҃е́ствєннымъ за́повѣдемъ, ᲂу҆крѣплѧ́ющи ны̀ мл҃твами твои́ми въ вѣ́рѣ и҆ бл҃годѣ́ланїи."
 },
 {
  "type": "HEADER",
  "value": "На хвали́техъ стїхи̑ры, гла́съ и҃:"
 },
 {
  "type": "TEXT",
  "value": "Мно́гое мно́жество чꙋде́съ твои́хъ, і҆нноке́нтїе, проповѣ́дꙋетъ вели́чество сла́вы бг҃а на́шегѡ, на нб҃сѝ си́лами разꙋ́мными неꙋмо́лчнѡ воспѣва́емагѡ, на земли́ же въ дꙋша́хъ и҆ тѣлесѣ́хъ ст҃ы́хъ свои́хъ ди́внѡ прославлѧ́емагѡ: є҆го́же молѝ, препросла́вленне ст҃и́телю, ѡ҆ сп҃се́нїи дꙋ́шъ на́шихъ."
 },
 {
  "type": "TEXT",
  "value": "Є҆ди́нѣми ᲂу҆сты̀ и҆ є҆ди́нѣмъ се́рдцемъ просла́вимъ, лю́дїе, бг҃а чꙋдодѣ́йствꙋющаго, ᲂу҆диви́вшаго щедрѡ́ты своѧ̑ во дни̑ на́шѧ: дрє́внїѧ млⷭ҇ти, глагѡ́ланныѧ ко ѻ҆тцє́мъ на́шымъ въ чꙋдесѣ́хъ ст҃ы́хъ свои́хъ, возглаго́лавшаго и҆ ны́нѣ въ нетлѣ́нїи непоро́чнагѡ па́стырѧ, чꙋдотво́рца но́вагѡ, ᲂу҆тверди́вшагѡ кра̑сныѧ но́ги своѧ̑ во страна́хъ сїби́рскихъ и҆ ᲂу҆краси́вшагѡ пꙋсты́ню ꙗ҆́кѡ крі́нъ кра́сный."
 },
 {
  "type": "TEXT",
  "value": "Не ѻ҆тцы̀ на́ши возвѣсти́ша на́мъ, ѻ҆́тче, сла́вꙋ твою̀, не ста́рцы на́ши повѣ́даша на́мъ чꙋдеса̀ твоѧ̑, чꙋдотво́рче: но са́ми ви́дѣхомъ ѡ҆сѣнѧ́ющꙋю непоро́чное тѣ́ло твоѐ си́лꙋ бж҃їю, чꙋдодѣ́йствꙋющꙋю тобо́ю въ зна́менїихъ ди́вныхъ и҆ мно́гихъ: срѡ́дницы и҆ зна́емїи на́ши позна́ша бл҃года́тнꙋю по́мощь твою̀. Є҆ѧ́же и҆ мы̀ дерза́юще про́симъ, и҆ неѡскꙋ́днѡ прїе́млемъ."
 },
 {
  "type": "TEXT",
  "value": "Дре́вле бг҃ъ глаго́лавый ѻ҆тцє́мъ во прⷪ҇ро́цѣхъ, въ послѣ́докъ дні́й возглаго́ла на́мъ въ сн҃ѣ: є҆гѡ́же бл҃года́тїю и҆ додне́сь глаго́летъ на́мъ въ наста́вницѣхъ на́шихъ, въ животѣ̀ свое́мъ поꙋча́ющихъ на́съ вѣ́рѣ и҆ наде́ждѣ, по и҆схо́дѣ же свое́мъ ᲂу҆вѣрѧ́ющихъ на́съ въ любвѝ соверше́ннѣй, николи́же ѿпа́дающей."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Ра́дꙋйсѧ, ѻ҆́тче і҆нноке́нтїе, непоро́чности соиме́нне, цр҃кве ᲂу҆твержде́нїе, бл҃года́ти позна́нїе, чꙋде́съ неисчисли́мыхъ сокро́вище, і҆ера́рхѡвъ похвало̀, па́стырей ѡ҆́бразе, пасо́мыхъ помо́щниче, чꙋжди́хъ и҆ да́льнихъ моли́твенниче, гра́да и҆ркꙋ́тска ᲂу҆краше́нїе, ѡ҆би́тели твоеѧ̀ бл҃голѣ́пїе, сла́во держа́вы рѡссі́йскїѧ: ѡ҆ не́йже моли́сѧ, да ᲂу҆га́снꙋтъ раско́лѡвъ шата̑нїѧ, и҆ да процвѣте́тъ ми́ръ во дне́хъ ча̑дъ є҆ѧ̀ правосла́вныхъ."
 }
]