[
 {
  "type": "HEADER",
  "value": "Деке́мврїа з҃і"
 },
 {
  "type": "HEADER",
  "value": "Прпⷣбныхъ новомч҃нкъ паі́сїа и҆ а҆ввакꙋ́ма, и҆ и҆̀же съ ни́ми, страда́вшихъ въ бѣ́лградѣ."
 },
 {
  "type": "HEADER",
  "value": "На вели́цѣй вече́рни, Бл҃же́нъ мꙋ́жъ, а҆нтїфѡ́нъ а҃."
 },
 {
  "type": "HEADER",
  "value": "На Гдⷭ҇и воззва́хъ, стїхи̑ры на и҃, гла́съ д҃, самогла́сны, прпⷣбномꙋ́ченикѡмъ:"
 },
 {
  "type": "TEXT",
  "value": "Свѧще́ный и҆ чꙋ́дный наста̀ пра́здникъ, свѣтозаре́нїемъ дх҃а свѣтоводѧ́щи на́съ, соше́дшесѧ ᲂу҆̀бо празднолю́бцы, достохва́льными пѣ́сньми возвели́чимъ дво́ицꙋ мꙋ́ченикѡвъ свѧще́нныхъ, тве́рдаго а҆дама́нта и҆гꙋ́мена паі́сїа, и҆ до́блественнаго дїа́кона а҆ввакꙋ́ма, и҆ про́чїй бжⷭ҇твенный собо́ръ страстоте́рпєцъ, не хотѧ́щихъ ѿрещи́сѧ хрⷭ҇та̀, всѧ́ческихъ живота̀, но нꙋ́ждною сме́ртїю ᲂу҆мира́юще вы̑шнѧѧ наслѣ́довахꙋ."
 },
 {
  "type": "TEXT",
  "value": "Воспое́мъ вѣ́рнїи въ пѣ́снехъ, мꙋ́драгѡ паі́сїа съ до́блимъ а҆ввакꙋ́момъ, и҆ про́чее мно́жество сла́вныхъ страстоте́рпєцъ, не хотѧ́щыѧ повинꙋ́тисѧ ѕлы̑мъ повелѣ́нїємъ ѕлоимени́тагѡ мꙋчи́телѧ, но тве́рдою сме́ртїю ᲂу҆мира́юще, сокрꙋши́ша свирѣ́пство а҆га̑рѧнъ безбо́жныхъ, и҆ се́рбїю всю̀ ѡ҆зари́ша лꙋча́ми страда́нїй свои́хъ до́блественнѣйшїи."
 },
 {
  "type": "TEXT",
  "value": "Прїиди́те лю́дїе воспое́мъ бг҃овѣнча́ненъ по́лкъ новоѧвле́нныхъ мꙋ́чєникъ, непоро́чное за хрⷭ҇та̀ заколе́нїе, сі́и бо ᲂу҆мре́ти произво́лиша за всѧ́ческихъ живота̀, и҆́бо въ сердца́хъ носѧ́ще цѣ́лꙋ бжⷭ҇твеннꙋю печа́ть хрⷭ҇то́вꙋ, не повинꙋ́шасѧ ѕлоимени̑тымъ ѕвѣ́рємъ а҆га̑рѧнскимъ, но зако́ннѡ пострада́вше, пра́вды вѣнцы̀ прїѧ́ша, и҆ ны́нѣ на небесѣ́хъ мо́лѧтсѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆́ны стїхи̑ры свѧты́хъ мꙋ́чєникъ, гла́съ в҃:"
 },
 {
  "type": "TEXT",
  "value": "Мꙋ́чєницы всебл҃же́ннїи, вельмѝ хрⷭ҇та̀ возлюби́вше, страстє́мъ тогѡ̀ мꙋ́жески ᲂу҆подо́бистесѧ, себѐ сами́хъ ѿверго́стесѧ до конца̀, кропле́нїй крове́й ѡ҆багри́сте зе́млю, на дреко́лѣхъ набада́еми стра́шнꙋю сме́рть под̾е́мше безсме́ртїѧ сподо́бистесѧ, и҆ ны́нѣ на небесѣ́хъ наслажда́етесѧ."
 },
 {
  "type": "TEXT",
  "value": "Мꙋ́чєницы всехва́льнїи, во́ини всеси́льнагѡ цр҃ѧ̀ и҆ бг҃а, мꙋчи́телей преще́нїѧ и҆ гро́зныѧ сме́рти не ᲂу҆боѧ́стесѧ, но бл҃годе́рзостнѡ ѿлꙋчи́вшесѧ, потща́стесѧ ча́шꙋ мꙋче́нїѧ и҆спи́ти, призыва́ѧ бжⷭ҇твенное и҆́мѧ бг҃а жива́гѡ, ѿ него́же полꙋчи́ти сла́ви и҆ свѣ́тлости ꙗ҆́вѣ сподо́бистесѧ."
 },
 {
  "type": "TEXT",
  "value": "Мꙋ́чєницы достосла́внїи, ѻ҆рꙋ̑жницы всехва́льнїи, хрⷭ҇тꙋ̀ вво́инившесѧ, и҆ тогѡ̀ любо́вїю ᲂу҆крѣ́пльшесѧ, ѕлочє́стыѧ а҆га̑рѧнскаѧ ѿверго́сте, и҆ ᲂу҆мира́юще за хрⷭ҇та̀, бл҃госла́внѡ побѣ́дами ᲂу҆краси́стесѧ, сегѡ̀ ра́ди ны́нѣ весели́тесѧ въ нбⷭ҇ныхъ поко́ищахъ."
 },
 {
  "type": "HEADER",
  "value": "Сла́ва, гла́съ д҃:"
 },
 {
  "type": "TEXT",
  "value": "Весели́тесѧ нб҃са̀, торжествꙋ́йте на землѝ всѝ ѻ҆течестволю́бцы, дꙋна́ве и҆ са́во, рѣ́ки, взыгра́йте стрꙋѧ́ми, се́ бо дне́сь ди́венъ ю҆́ноша хрⷭ҇то́въ, до́блественный дїа́конъ а҆ввакꙋ́мъ, не восхотѣ́въ ѿрещи́сѧ хрⷭ҇та̀, и҆дѧ̀ крѣ́пкѡ къ сме́рти не ᲂу҆боѧ́всѧ и҆ смертоно́сный дреко́ль на ра́мо носѧ̀, велегла́снѡ си́це поѧ́ше: нѣ́сть вѣ́ры лꙋ́чше хрⷭ҇тїа́нскїѧ. Се́рбъ хрⷭ҇то́въ є҆́сть, ра́дꙋетсѧ сме́рти. Стра́шный бж҃їй сꙋ́дъ жде́тъ и҆ а҆га́рѧны. Вы́ же творитѐ что̀ ва́мъ го́дѣ быва́етъ. Ско́рѡ и҆ тꙋ́рки возме́здїе прїи́мꙋтъ. Бг҃ъ ва́мъ спорꙋ́чникъ и҆ бж҃їѧ пра́вда. Тѣ́мже порꙋга́въ свирѣ́пство а҆га́рѧнское, всели́сѧ во вѣ́ки въ ца́рство нбⷭ҇ное."
 },
 {
  "type": "HEADER",
  "value": "И҆ ны́нѣ, предпра́зднства, гла́съ в҃,"
 },
 {
  "type": "TEXT",
  "value": "А҆ндре́а пѵ́рскагѡ: Прїиди́те всѝ хрⷭ҇то́во ржⷭ҇тво̀ предпра́зднꙋемъ вѣ́рнѡ, и҆ мы́сленнѣ пѣ́нїе ꙗ҆́кѡ ѕвѣздꙋ̀ предлага́юще: волхвѡ́въ славослѡ́вїѧ, съ па́стырьми возопїи́мъ: прїи́де и҆збавле́нїе человѣ́кѡвъ, и҆з̾ дѣ́вственныхъ ложе́снъ, вѣ̑рныѧ призыва́ющее."
 },
 {
  "type": "HEADER",
  "value": "Вхо́дъ. Прокі́менъ днѐ, и҆ чтє́нїѧ трѝ."
 },
 {
  "type": "HEADER",
  "value": "На лїті́и, стїхи́ра хра́ма и҆ прпⷣбномꙋ́ченикѡвъ, гла́съ в҃:"
 },
 {
  "type": "TEXT",
  "value": "Прпⷣбномч҃нцы хрⷭ҇тѡ́вы, ꙗ҆ви́стесѧ ꙗ҆́кѡ бг҃оплете́ннаѧ плени́ца, благода́тїю дрꙋ́гъ дрꙋ́гꙋ свѧзꙋ́еми, и҆ къ высотѣ̀ восходѧ́ще, и҆ лїѧ́нїемъ кро́ве зе́млю ѡ҆свѧща́юще. Тѣ́мже и҆ вѣнцы̀ прїѧ́сте ꙗ҆́вѣ неꙋвѧда́емїи, и҆ сла́вꙋ вѣ́чнꙋю, весе́лїе и҆ ра́дость конца̀ не и҆мꙋ́щꙋю, и҆ ца́рство нбⷭ҇ное, со всѣ́ми страда́вшими съ ва́ми, съ ни́миже помина́йте на́съ ко гдⷭ҇ꙋ."
 },
 {
  "type": "TEXT",
  "value": "Мꙋ́чєницы гдⷭ҇ни, со́лнца свѣтлѣ́е возсїѧ́вшїи, блиста́нїе страда́нїй ва́шихъ просвѣща́етъ концы̀, и҆ всѧ̀ се́рбїа ѡ҆ст҃и́сѧ лїѧ́нїемъ кро́ве ва́шеѧ, вы́ бо ва́шѧ вы̑ѧ хрⷭ҇тꙋ̀ преклони́вше, прїѧ́сте заколе́нїе, и҆ ꙗ҆́кѡ жє́ртвы совершє́нныѧ бг҃ꙋ принесо́стесѧ, сегѡ̀ ра́ди мо́лимъ ва́съ, и҆спроси́те на́мъ прегрѣше́нїй ѡ҆ставле́нїе."
 },
 {
  "type": "HEADER",
  "value": "Сла́ва, гла́съ д҃:"
 },
 {
  "type": "TEXT",
  "value": "Дне́сь торжествꙋ́етъ правосла́внаѧ бо́снїѧ, и҆ всѧ̑ страна̀ се́рбскаѧ, и҆зрѧ́днѣе же тернавскаѧ ѻ҆би́тель свѧта́гѡ бл҃говѣ́щенїѧ, къ си̑мъ же и҆ гра́дъ бѣ́лградъ, воспѣва́юще вкꙋ́пѣ ди́внаго ю҆́ношꙋ хрⷭ҇то́ва, до́блественнаго дїа́кона а҆ввакꙋ́ма. Торжествꙋ́етъ бо́снїѧ, ꙗ҆́кѡ породѝ такова́го ю҆́ношꙋ, торжествꙋ́етъ и҆ се́рбїѧ, ꙗ҆́кѡ воспита̀ є҆го̀, ѻ҆би́тель бл҃говѣ́щенїѧ, ꙗ҆́кѡ ѡ҆свѧтѝ є҆го̀, гра́дъ же бѣ́лградъ, ꙗ҆́кѡ кро́вїю є҆гѡ̀ мꙋ́ченическою ѡ҆багре́нъ бы́сть. Мы́ же воспѣва́юще є҆го̀ мо́лимсѧ, молѝ ѡ҆ на́съ, мꙋ́чениче а҆ввакꙋ́ме, во є҆́же спⷭ҇ти́сѧ всѣ̑мъ на́мъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Пресвѧта́ѧ дв҃о бцⷣе, мт҃и ми́лостиваѧ, сѐ прибѣга́емъ къ твое́й бл҃гости, воздвиза́юще ѻ҆́чи серде́цъ на́шихъ къ тебѣ̀, и҆ колѣ̑на преклонѧ́юще съ пла́чемъ мо́лимъ тѧ̀, не пре́зри на́шегѡ воздыха́нїѧ, и҆ бꙋ́ди на́мъ покро́въ и҆ помо́щница въ де́нь сꙋ́дный."
 },
 {
  "type": "HEADER",
  "value": "На стїхо́внѣ стїхи̑ры, гла́съ г҃:"
 },
 {
  "type": "TEXT",
  "value": "Ꙗ҆́коже ѕвѣ́зды ѡ҆зарѧ́ютъ вселе́ннꙋю всю̀, вы́ же положе́ни на высотꙋ̀ страда́нїѧ ѡ҆зарѧ́ете всѐ ѻ҆те́чество ва́ше, сегѡ̀ ра́ди вѣ́рнѡ ᲂу҆бл҃жа́етесѧ."
 },
 {
  "type": "TEXT",
  "value": "Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Не поколеба́ша ва́съ кова̑рствїѧ, ни мнѡ́гаѧ и҆скꙋшє́нїѧ, но ꙗ҆ви́стесѧ столпѝ непоколеби́мїи, тѣ́мже и҆ побѣ́дꙋ вѣ́чнꙋю взѧ́сте."
 },
 {
  "type": "TEXT",
  "value": "Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Вели́кагѡ бл҃госла́вїѧ сподо́бистесѧ, хрⷭ҇то́ви страда́льцы, на дреко́лѣхъ возвы́сившесѧ, ꙗ҆́коже дре́вле влⷣка на крⷭ҇тѣ̀, и҆ ны́нѣ моли́тесѧ ѡ҆ спасе́нїи дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ ѕ҃, самогла́сенъ:"
 },
 {
  "type": "TEXT",
  "value": "Земна́гѡ житїѧ̀ всѧ̀ вмѣни́сте ᲂу҆ме́ты, ꙗ҆́коже наꙋчѝ бжⷭ҇твенный па́ѵелъ, то́кмѡ да і҆и҃са прїѡбрѧ́щете. Сегѡ̀ ра́ди до́блѣ пострада́вше, на небесѣ́хъ ѡ҆бита́ете, вѣнцено́сцы великоимени́тїи."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Данїи́лъ мꙋ́жъ жела́нїй, ка́мень без̾ рꙋ́ки ѿсѣ́ченъ ви́дѣвъ тѧ̀ гдⷭ҇и: младе́нца без̾ сѣ́мене рожде́на пронаречѐ тѧ̀, и҆з̾ дв҃ы воплоще́нна сло́ва, непремѣ́ннаго бг҃а, и҆ спа́са дꙋ́шъ на́шихъ."
 },
 {
  "type": "HEADER",
  "value": "На благослове́нїи хлѣ́бѡвъ: тропа́рь, гла́съ д҃:"
 },
 {
  "type": "TEXT",
  "value": "Ꙗ҆́кѡ и҆́стиннїи во́ини хрⷭ҇тѡ́вы, кро́тостїю и҆ смире́нїемъ возсїѧ́сте, и҆ за хрⷭ҇та̀ до́блественнѡ пострада́сте, прпⷣбномч҃нцы паі́сїе и҆ а҆ввакꙋ́ме, но сме́рть ва́ша велегла́снѡ возвѣща́етъ всѣ̑мъ: лꙋ́чше є҆́сть за хрⷭ҇та̀ и҆ ѻ҆те́чество страда́ти, не́жели без̾ хрⷭ҇та̀ и҆ всецѣ́лый мі́ръ се́й стѧжа́ти. Два́жды."
 },
 {
  "type": "TEXT",
  "value": "И҆ Бцⷣе дв҃о: Є҆ди́ножды."
 },
 {
  "type": "HEADER",
  "value": "На ᲂу҆́трени По шестоѱа́лмїи є҆ктенїа̀, и҆ посе́мъ Бгъ гдⷭ҇ь, тропа́рь прпⷣбномꙋ́ченикѡвъ, два́жды. Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "По а҃ стїхосло́вїи, сѣда́ленъ, гла́съ а҃:"
 },
 {
  "type": "TEXT",
  "value": "Хрⷭ҇та̀ пострада́вшагѡ стопа́мъ послѣ́довавше, мно́гихъ ра́нъ и҆скꙋше́нїе прїѧ́сте, но щито́мъ любвѐ и҆ вѣ́ры воѡрꙋже́ни, не поколеба́стесѧ мно́гихъ мꙋ́къ приложе́ньми. Тѣ́мже и҆ пра́вды вѣне́цъ ѿ рꙋкѝ хрⷭ҇то́вы прїѧ́сте, и҆ а҆́гг҃ломъ ꙗ҆́вѣ ᲂу҆подо́бившесѧ, сла́внѡ просла́вистесѧ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "И҆з̾ нетлѣ́нныѧ ѻ҆трокови́цы бг҃ъ воплоща́етсѧ, є҆го́же безпло́тныхъ ли́цы трепе́щꙋще сла́вѧтъ, ꙗ҆́кѡ всѣ́хъ творца̀ и҆ є҆ди́наго непремѣ́ннаго, и҆ человѣ́цы на землѝ всегда̀ пою́тъ воспѣва́юще: гдⷭ҇ꙋ пое́мъ, сла́внѡ бо просла́висѧ."
 },
 {
  "type": "HEADER",
  "value": "По в҃ стїхосло́вїи, сѣда́ленъ, гла́съ в҃:"
 },
 {
  "type": "TEXT",
  "value": "Свѣтоѧвле́ннїи свѣти́льницы, бжⷭ҇твеннїи хрⷭ҇тѡ́вы мꙋ́чєницы, стрꙋѧ́ми крове́й безбо́жїѧ пла́мень ᲂу҆гаси́вше, ѡ҆бнажа́еми и҆ ра́нами сокрꙋша́еми, непрело́жни пребы́сте. Па́че хрⷭ҇то́вы любвѐ ничто́же предпочита́юще, и҆ ны́нѣ со а҆́гг҃лы бг҃ꙋ предстоѧ́ще, и҆спроси́те на́мъ прегрѣше́нїй и҆збавле́нїе."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Го́рꙋ тѧ̀, дв҃о, преднаписа̀ ꙗ҆́вѣ, бжⷭ҇твенный прⷪ҇ро́къ данїи́лъ, трїе́ же ѻ҆́троцы ᲂу҆зрѣ́вше пла́мень ѡ҆роша́ющъ, пѣ́сненнѡ восхвалѧ́ютъ твоего̀ сн҃а, ꙗ҆́кѡ зижди́телѧ, и҆ спа́са, и҆ гдⷭ҇а."
 },
 {
  "type": "HEADER",
  "value": "Полѷеле́й."
 },
 {
  "type": "TEXT",
  "value": "Велича́нїе: Оу҆бл҃жа́емъ ва́съ прпⷣбномч҃нцы, паі́сїе и҆ а҆ввакꙋ́ме, и҆ чте́мъ свѧтꙋ́ю па́мѧть ва́шꙋ, наста̑вницы мона́хѡвъ и҆ собесѣ̑дницы а҆́гг҃лѡвъ."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Терпѧ̀ потерпѣ́хъ гдⷭ҇а:"
 },
 {
  "type": "HEADER",
  "value": "По полѷеле́и, сѣда́ленъ, гла́съ и҃:"
 },
 {
  "type": "TEXT",
  "value": "Ѻ҆́бразъ мꙋ́жества показа́стесѧ, пред̾ ѕлочести́выми тꙋ́рки ꙗ҆́снѡ и҆сповѣ́дающе вѣ́рꙋ хрⷭ҇то́вꙋ, сегѡ̀ ра́ди велича̑йшаѧ страда̑нїѧ прїѧ́сте, но и҆ вели́кое мно́жество вѣ́рныхъ бг҃ꙋ приведо́сте, и҆̀же сме́ртїю мꙋ́ченическою безсме́ртнꙋю сла́вꙋ, кꙋ́пнѡ съ ва́ми ѡ҆брѣто́ша, съ ни́миже моли́тесѧ ѡ҆ спасе́нїи дꙋ́шъ на́шихъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Прⷪ҇ро́къ данїи́лъ тайнонаꙋча́етъ пречи́стаѧ, и҆ предживописꙋ́ютъ бг҃омꙋ́дреннїи трїѐ ѻ҆́троцы ржⷭ҇тво̀ твоѐ, чрезъ ѻ҆́бразы зрѧ́ще и҆з̾ ᲂу҆тро́бы твоеѧ̀ проше́дшаго несказа́ннѡ, жизнода́вца, спа́са и҆ гдⷭ҇а."
 },
 {
  "type": "HEADER",
  "value": "Степє́нна, а҃ а҆нтїфѡ́нъ, д҃ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Положи́ша трꙋ̑пїѧ рабѡ́въ твои́хъ, бра́шно пти́цамъ нбⷭ҇нымъ."
 },
 {
  "type": "TEXT",
  "value": "Сті́хъ: Плѡ́ти прпⷣбныхъ твои́хъ ѕвѣ́рємъ земны̑мъ."
 },
 {
  "type": "TEXT",
  "value": "Та́же: Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, зача́ло ѯ҃д."
 },
 {
  "type": "HEADER",
  "value": "По н҃ ѱалмѣ̀, стїхи́ра, гла́съ ѕ҃:"
 },
 {
  "type": "TEXT",
  "value": "Прⷪ҇ро́чески ᲂу҆́бѡ вопїѧ́ше даві́дъ во ѱалмѣ́хъ: вмѣни́хомсѧ ꙗ҆́кѡ ѻ҆́вцы заколе́нїѧ. Вы́ же мꙋ́чєницы хрⷭ҇тѡ́вы, самѣ́ми дѣ́лы сло́во и҆сполнѧ́юще, вмѣни́стесѧ вои́стиннꙋ ꙗ҆́кѡ ѻ҆́вцы заколе́нїѧ, и҆ пролїѧ́вше кро́вь свою̀ ꙗ҆́кѡ во́дꙋ, внидо́сте въ ца́рство нбⷭ҇ное. Тѣ́мже моли́тесѧ ко гдⷭ҇ꙋ, дарова́ти на́мъ ве́лїю ми́лость."
 },
 {
  "type": "HEADER",
  "value": "Канѡ́нъ бцⷣы со і҆рмосо́мъ на ѕ҃, и҆ прпⷣбномꙋ́ченикѡвъ, гла́съ и҃, на і҃."
 },
 {
  "type": "HEADER",
  "value": "Канѡ́нъ прпⷣбномꙋ́ченикѡвъ, гла́съ и҃, мирко, є҆гѡ́же краегране́сїе:"
 },
 {
  "type": "TEXT",
  "value": "Преподобномꙋ́ченики сла́влю, въ пе́рвыхъ же бг҃оро́дичнахъ:"
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пѣ́снь возсле́мъ лю́дїе чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣце."
 },
 {
  "type": "TEXT",
  "value": "Послѝ мнѣ̀ гдⷭ҇и, согрѣше́нїй мои́хъ мно́гихъ ѡ҆ставле́нїе, и҆ да́рꙋй мѝ сло́во, ꙗ҆́кѡ да возмогꙋ̀ похвали́ти до́блєсти и҆ страда̑нїѧ прпⷣбныхъ паі́сїа и҆ а҆ввакꙋ́ма."
 },
 {
  "type": "TEXT",
  "value": "Разжига́емїи любо́вїю хрⷭ҇то́вою, всѧ̑ земна̑ѧ преѡби́дѣсте, прпⷣбномч҃нцы паі́сїе и҆ а҆ввакꙋ́ме, тѣ́мже и҆ вѣнцы̀ мꙋче́нїѧ ѿ десни́цы вы́шнѧгѡ прїѧ́сте."
 },
 {
  "type": "TEXT",
  "value": "Є҆стество́мъ земні́и, житїе́мъ же ꙗ҆́кѡ а҆́гг҃ли ꙗ҆ви́стесѧ, тѣ́мже и҆ ча́шꙋ мꙋче́нїѧ ᲂу҆се́рднѡ и҆спи́сте, хрⷭ҇та̀ и҆сповѣ́дающе."
 },
 {
  "type": "TEXT",
  "value": "Бг҃оро́диченъ: Мт҃и свѧта́ѧ, бцⷣе, тѧ̀ ѻ҆рꙋ́жїе непобѣди́мое на врагѝ предлага́емъ: тѧ́ бо и҆́мамы, всенепоро́чнаѧ, наде́ждꙋ на́шегѡ спасе́нїѧ."
 },
 {
  "type": "TEXT",
  "value": "Катава́сїа: Хрⷭ҇то́съ ражда́етсѧ:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нѣ́сть свѧ́тъ ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебѐ гдⷭ҇и."
 },
 {
  "type": "TEXT",
  "value": "Пѣ́снь воспое́мъ ѻ҆течестволю́бцы вы́шнемꙋ бг҃ꙋ, цѣломꙋ́дреннымъ смы́сломъ сла́вѧще, бг҃омꙋ́драго паі́сїа и҆ до́блѧго а҆ввакꙋ́ма."
 },
 {
  "type": "TEXT",
  "value": "Ѻ҆́ба кꙋ́пнѡ сла́вѧще: паі́сїа и҆ а҆ввакꙋ́ма, воспѣва́емъ съ ни́ми и҆ мно́жество мꙋ́чєникъ, и҆̀же не восхотѣ́ша ѿрещи́сѧ хрⷭ҇та̀, но на дреко́лѣхъ ᲂу҆мро́ша за ны̀."
 },
 {
  "type": "TEXT",
  "value": "Дꙋша́ми же соверше́ни свѧті́и, хрⷭ҇та̀ возлюби́ли є҆стѐ па́че всѣ́хъ, и҆ ѕлочести́вый ѻ҆́нъ, а҆га́рѧнинъ, не возмо́же прельсти́ти ва́съ тлѣ́нною сла́вою."
 },
 {
  "type": "TEXT",
  "value": "Бг҃оро́диченъ: И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ є҆ди́но предста́тельство дꙋ́шъ на́шихъ."
 },
 {
  "type": "HEADER",
  "value": "Сѣда́ленъ, гла́съ и҃:"
 },
 {
  "type": "TEXT",
  "value": "Ѻ҆гнепа̑льныѧ страсте́й двиза̑нїѧ ᲂу҆мертви́вше воздержа́нїемъ прпⷣбнїи, послѣ́дꙋюще стопа́мъ влⷣце хрⷭ҇тꙋ̀, ꙗ҆́коже же́ртва жи́ва и҆ ѡ҆свѧще́нна принесо́стесѧ бг҃ꙋ, закала́ємы рꙋка́ми а҆га́рѧнскими."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Ѡ҆держи́мы прегрѣшє́нїи мно́гими чⷭ҇таѧ, тѧ̀ предста́тельницꙋ є҆ди́нꙋ стѧжа́вше дв҃о, вопїе́мъ бл҃года́рственнѡ: спасѝ ны̀ пресвѧта́ѧ бг҃оневѣ́сто, ты́ бо є҆сѝ мі́ра прибѣ́жище."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́тча, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва человѣколю́бче."
 },
 {
  "type": "TEXT",
  "value": "Ѻ҆́бразъ бы́ли є҆стѐ кро́тости и҆ воздержа́нїѧ, но и҆ непребори́ми бы́сте мꙋчи́телей преще́нїємъ, сегѡ̀ ра́ди прославлѧ́емъ ва́съ страда́льцы сла́внїи."
 },
 {
  "type": "TEXT",
  "value": "Бг҃оме́рзскихъ и҆ ѕлочести́выхъ а҆га̑рѧнъ не ᲂу҆боѧ́стесѧ, но всѧ̑ ᲂу҆вѣща̑нїѧ и҆́хъ лє́стнаѧ ѿри́нꙋсте, и҆ ꙗ҆́кѡ а҆́гнцы за хрⷭ҇та̀ закла́ни бы́сте."
 },
 {
  "type": "TEXT",
  "value": "Непобѣди́ми ꙗ҆ви́стесѧ свѧті́и, свѣтода́вца же бг҃а возлюби́сте, є҆гѡ́же си́лою ᲂу҆крѣпи́вшесѧ, мꙋчи́телѧ посрами́сте."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ пречи́стаѧ бцⷣе, а҆́гг҃лѡвъ ᲂу҆дивле́нїе, прⷪ҇ро́кѡвъ про́повѣдь, и҆ а҆пⷭ҇лѡвъ немѡ́лчнаѧ ᲂу҆ста̀: моли́сѧ сн҃ꙋ твоемꙋ̀ и҆ бг҃ꙋ на́шемꙋ, да сохрани́тъ на́съ и҆ мѣ́сто сїѐ, прпⷣбномꙋ́чєникъ моле́нїемъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Ѽ непра́веднагѡ ᲂу҆бїе́нїѧ! Ѡ҆ чꙋ́днагѡ терпѣ́нїѧ, непобѣди́мыхъ страда́лєцъ! И҆́же кро́тостїю и҆ терпѣ́нїемъ побѣди́ша горды́ню мꙋчи́телей."
 },
 {
  "type": "TEXT",
  "value": "Мно́жества мꙋ́чєникъ, и҆́же на дреко́лѣхъ за хрⷭ҇та̀ ᲂу҆мро́ша, кꙋ́пнѡ съ паі́сїемъ и҆ а҆ввакꙋ́момъ, воспои́мъ па́мѧть гл҃го́люще: мꙋ́чєницы свѧті́и моли́те бг҃а ѡ҆ на́съ."
 },
 {
  "type": "TEXT",
  "value": "Оу҆ма́лили є҆стѐ страсте́й но́щь, и҆ безстра́стїѧ де́нь пости́гли є҆стѐ, сме́рть за хрⷭ҇та̀ прїѧ́сте до́блественнѡ, сегѡ̀ ра́ди вопїе́мъ ва́мъ: моли́те бг҃а ѡ҆ на́съ."
 },
 {
  "type": "TEXT",
  "value": "Бг҃оро́диченъ: Красота̀ це́ркве ты̀ є҆сѝ дв҃о влады́чице, царе́й держа́ва и҆ похвала̀, спасѝ мѣ́сто сїѐ и҆ лю́ди на тѧ̀ надѣ́ющыѧсѧ, бг҃оневѣ́стнаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀ спасѐ, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ и҆ ᲂу҆слы́ши мѧ̀, бж҃е спасе́нїѧ моегѡ̀."
 },
 {
  "type": "TEXT",
  "value": "Чи́сто ꙗ҆ви́сѧ житїѐ ва́ше, дарова́нїемъ прест҃а́гѡ дꙋ́ха, посредѣ̀ ѕлочести́выхъ мꙋчи́телей не ᲂу҆боѧ́стесѧ, и҆ ны́нѣ на небесѣ́хъ при́снѡ весели́тесѧ."
 },
 {
  "type": "TEXT",
  "value": "Є҆́же во хрⷭ҇тѣ̀ си́лꙋ стѧжа́сте, преще́нїѧ мꙋчи́телей, нижѐ сме́рти, ᲂу҆боѧ́стесѧ, но ᲂу҆мира́юще ꙗ҆ви́стесѧ крѣ́пльшїи мꙋчи́телей."
 },
 {
  "type": "TEXT",
  "value": "Не довлѣ́ютъ ᲂу҆ста̀ человѣ́чєска и҆сповѣ́дати пѡ́двиги ва́шѧ и҆ болѣ̑зни, ꙗ҆̀же за вѣ́рꙋ гдⷭ҇ню мꙋ́жески претерпѣ́сте."
 },
 {
  "type": "TEXT",
  "value": "Бг҃оро́диченъ: Ѻ҆́блаче мы́сленнагѡ со́лнца и҆ неизрече́ннагѡ, и҆зсо́хшꙋю дꙋ́шꙋ мою̀ ѡ҆росѝ свы́ше, молю́ тѧ и҆ бꙋ́ди мѝ вы́нꙋ покро́въ и҆ помо́щница."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Въ мѵ́рѣхъ ст҃е:"
 },
 {
  "type": "TEXT",
  "value": "Въ мі́рѣ се́мъ а҆́гг҃льскимъ ѻ҆́бразомъ пожи́вше, житїе́мъ же є҆ѵⷢ҇лїе и҆сполнѧ́юще, положи́сте дꙋ́шы своѧ̑ за вѣ́рꙋ и҆ ѻ҆те́чество, ᲂу҆мира́юще ꙗ҆ви́стесѧ крѣ́пльшїи мꙋчи́телей, сегѡ̀ ра́ди прославлѧ́емъ ва́съ, свѧті́и прпⷣбномч҃нцы паі́сїе и҆ а҆ввакꙋ́ме."
 },
 {
  "type": "TEXT",
  "value": "І҆́косъ: А҆́ще не вы̀ свѧті́и, пода́сте мѝ сло́во грѣ́шномꙋ и҆ недосто́йномꙋ рабꙋ̀ ва́шемꙋ, ка́кѡ возмо́глъ бы и҆зрещѝ всѧ̑ трꙋды̀ и҆ ѕлострада̑нїѧ ва̑ша. Вы́ бо є҆стѐ мона́хѡмъ похвала̀ и҆ ᲂу҆твержде́нїе, мꙋ́ченикѡмъ сла́ва и҆ ᲂу҆добре́нїе, и҆ всѣ̑мъ вѣ̑рнымъ ѻ҆́бразъ бл҃гоче́стїѧ и҆ тве́рдости. Сегѡ̀ ра́ди прославлѧ́емъ ва́съ, свѧті́и прпⷣбномч҃нцы паі́сїе и҆ а҆ввакꙋ́ме."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "И҆́стиннѡ вмѣсти́лище хрⷭ҇та̀ сама́го бы́ли є҆стѐ, и҆́стиною и҆ любо́вїю послꙋжи́сте бг҃ꙋ, є҆мꙋ́ же є҆ди́номꙋ вопїѧ́ли є҆стѐ: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Ко́ль мно́гое мно́жество пѡ́двигъ и҆ болѣ́зней ва́шихъ, ꙗ҆̀же за хрⷭ҇та̀ и҆ ѻ҆те́чество своѐ до́блественнѡ под̾ѧ́сте, зовꙋ́ще и҆ вопїю́ще: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "И҆мꙋ́ще крѣ́пость гдⷭ҇ню, мꙋчи́телей свои́хъ низложи́сте, и҆ сокрꙋши́сте де́мѡнѡвъ немощны̑ѧ де́рзѡсти, зовꙋ́ще и҆ вопїю́ще: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Бг҃оро́диченъ: Мои́хъ страсте́й пла́мень ᲂу҆гасѝ, и҆ и҆зба́ви мѧ̀ льсти́вагѡ, ꙗ҆́кѡ препросла́вленна є҆сѝ во вѣ́ки."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Побѣди́тєли мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Страда̑нїѧ ва̑ша бжⷭ҇твєннаѧ, вои́стиннꙋ превзыдо́ша похвалє́нїѧ, ꙗ҆́кѡ тѣ́ломъ тлѣ́ннымъ да́же и҆ безплѡ́тныѧ врагѝ побѣди́сте вопїю́ще: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Ласка̑нїѧ бг҃оме́рзскихъ а҆га̑рѧнъ ѿри́нꙋсте, взира́ѧ на воздаѧ̑нїѧ сꙋ̑щаѧ на небесѣ́хъ, ꙗ҆̀же хрⷭ҇то́съ пред̾ꙋгото́ва вопїю́щымъ є҆мꙋ̀ ѿ дꙋшѝ: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "А҆́гг҃лѡвъ вѡ́инства ᲂу҆диви́шасѧ, и҆ согла́снѡ просла́виша хрⷭ҇та̀, таково́е терпѣ́нїе дарова́вшаго ва́мъ, вопїю́щымъ є҆мꙋ̀: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Бг҃оро́диченъ: Ра́дость, и҆ покро́въ, и҆ приста́нище на́ше ты̀ є҆сѝ бл҃гослове́ннаѧ, и҆ тѧ̀ славосло́вимъ, ꙗ҆́кѡ ро́ждшꙋю хрⷭ҇та̀ бг҃а на́шего: є҆го́же пое́мъ всѧ̑ дѣла̀ ꙗ҆́кѡ гдⷭ҇а, и҆ превозно́симъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снисхожде́нїѧ, ꙗ҆́кѡ вы́шнїй во́лею сни́де и҆ до пло́ти, ѿ дв҃и́ческагѡ чре́ва бы́въ человѣ́къ. Тѣ́мже пречⷭ҇тꙋю бцⷣꙋ вѣ́рнїи велича́емъ."
 },
 {
  "type": "TEXT",
  "value": "Ви́дѣвъ всеви́дѧщее ѻ҆́ко по́двиги ва́шѧ, и҆ побѣ́днꙋю хра́брость на врагѝ, вѣнча́етъ ва́съ вѣнцы̀ ѡ҆долѣ́нїѧ."
 },
 {
  "type": "TEXT",
  "value": "Ликꙋ́юще на небесѣ́хъ ны́нѣ, непобѣди́маѧ прпⷣбномꙋ́чєникъ дво́ица, согла́снѡ со мно́жествѡмъ мꙋ́чєникъ, помина́йте и҆ всѣ́хъ на́съ, непреста́ннѡ ва́съ велича́ющихъ."
 },
 {
  "type": "TEXT",
  "value": "Ю҆́же бг҃ъ пред̾ꙋгото́ва, сла́вꙋ на небесѣ́хъ, наслѣ́довасте свѧті́и, и҆́бо а҆́ще и҆ ꙗ҆́кѡ ме́ртви положе́ни на землѝ, но въ небе́снаѧ пресели́стесѧ."
 },
 {
  "type": "TEXT",
  "value": "Бг҃оро́диченъ: Пресла́внаѧ бг҃ороди́тельнице, хрⷭ҇тїа́нъ предста́тельнице, и҆зми́ ны всѧ́кїѧ нꙋ́жды да тѧ̀ пое́мъ во всѧ̑ вѣ́ки."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Свѣ́тлостїю житїѧ̀ своегѡ̀ на землѝ возсїѧ́сте, въ терпѣ́нїи же и҆ и҆сповѣ́данїи свѣ́тльшїи нбⷭ҇ныхъ ѕвѣ́здъ ꙗ҆ви́стесѧ, кро́вїю же ва́шею гра́дъ бѣ́лградъ ѡ҆свѧти́сѧ и҆ всѧ̀ страна̀ се́рбскаѧ. Тѣ́мже досто́йнѡ ва́съ почита́емъ, творѧ́ще чⷭ҇тнꙋ́ю па́мѧть ва́шꙋ."
 },
 {
  "type": "TEXT",
  "value": "Бг҃оро́диченъ: Пресвѧта́ѧ, пребл҃гослове́ннаѧ мт҃и бж҃їѧ, не пре́зри ны̀ согрѣ́шшыѧ, но ми́лостивнѡ при́зри и҆ спасѝ на́съ, разорѧ́ющи молвꙋ̀ и҆скꙋше́нїй, ꙗ҆́кѡ бг҃а ро́ждши дв҃о, твори́ти мо́жеши всѧ̑ є҆ли̑ка хо́щеши."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ д҃:"
 },
 {
  "type": "TEXT",
  "value": "Съ высоты̀ просвѣти́вшесѧ, чи́стымъ по́мысломъ и҆ крѣ́пкою со́вѣстїю, къ мꙋ́ченическомꙋ прїидо́сте и҆скꙋше́нїю, не повинꙋ́стесѧ ѕлочести́вомꙋ мꙋчи́телю, и҆ не ѿверго́стесѧ хрⷭ҇та̀, но бїе́ми и҆ на дреко́лѣхъ набада́еми, непоколеби́ми пребы́сте."
 },
 {
  "type": "TEXT",
  "value": "Ѿ бг҃а вседержи́телѧ крѣ́пость ва́мъ дарова́на бы́сть, низложи́ти всю̀ крѣ́пость ѕмі́евꙋ, прпⷣбномч҃нцы паі́сїе и҆ а҆ввакꙋ́ме, хрⷭ҇тѡ́вы чⷭ҇тні́и ѻ҆рꙋ̑жницы, и҆̀же ра́нами за хрⷭ҇та̀ ᲂу҆слажда́стесѧ, смотрѧ́ѧ ꙗ҆̀же на нбⷭ҇ѝ бжⷭ҇твєннаѧ воздаѧ̑нїѧ, и҆ сла́дость неиждивꙋ́щꙋю: є҆ѧ́же на всегда̀ сподо́бистесѧ."
 },
 {
  "type": "TEXT",
  "value": "Бжⷭ҇твєннаѧ виті́йствꙋѧ, а҆ввакꙋ́ме дїа́коне, мꙋчи́телѧ посрами́лъ є҆сѝ, и҆́бо преще́нїѧ не ᲂу҆боѧ́всѧ, и҆дѧ̀ крѣ́пкѡ къ сме́рти велегла́снѡ пѣ́лъ є҆сѝ: нѣ́сть вѣ́ры лꙋ́чше хрⷭ҇тїа́нскїѧ, тѣ́мже и҆ тꙋ́рки ᲂу҆дивле́ни бѧ́хꙋ. Мы́ же пра́зднꙋющи дне́сь па́мѧть твою̀ мо́лимъ тѧ̀, со страда́вшими съ тобо́ю, ѡ҆чище́нїе на́мъ и҆спросѝ, ꙗ҆́кѡ хрⷭ҇то́въ ѻ҆рꙋ́жникъ."
 },
 {
  "type": "TEXT",
  "value": "Мꙋ́чєницы страстотє́рпцы хрⷭ҇тѡ́вы, неизрѣчє́нныѧ болѣ̑зни мꙋ́къ мꙋ́жественнѡ претерпѣ́вше, кровьмѝ ва́шими всю̀ зе́млю ѡ҆свѧти́сте, мно́жайшими же ра́нами и҆ болѣ́зньми бг҃ꙋ всеще́дромꙋ присво́истесѧ, и҆ ны́нѣ въ нбⷭ҇ныхъ селе́нїихъ до́брѣ почива́ете, и҆ мл҃твами свои́ми сп҃се́нїе ро́дꙋ се́рбскомꙋ и҆спроша́ете."
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "Наста̀ де́нь свѣтоно́сный па́мѧти прпⷣбномꙋ́ченикѡвъ паі́сїа и҆ а҆ввакꙋ́ма, пострада́вшихъ въ бѣ́лградѣ за хрⷭ҇то́во и҆́мѧ, кꙋ́пнѡ со мно́жествомъ непребори́мыхъ мꙋ́чєникъ, и҆́хже нечести́вый ѕвѣ́рь а҆га́рѧнскїй, ᲂу҆жа́сною сме́ртїю повелѣ̀ ᲂу҆би́ти, и҆́бо не повинꙋ́шасѧ є҆гѡ̀ повелѣ́нїю: ѿрещи́сѧ хрⷭ҇та̀, но со дерзнове́нїемъ и҆сповѣ́даша хрⷭ҇та̀ цр҃ѧ̀ и҆ бг҃а. Сегѡ̀ ра́ди и҆ вѣнцы̀ побѣ́ды ѿ негѡ̀ прїѧ́ша, мꙋ́чєницы свѧті́и, и҆ мл҃твєнницы ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Мно́гими прегрѣше́ньми самоѡсꙋжде́на сꙋ́ща, и҆зба́ви мѧ̀ влады́чицѣ ѡ҆сꙋжде́нїѧ, ꙗ҆́кѡ ро́ждшаѧ сꙋдїю̀, и҆ бг҃а всѧ́ческихъ всепѣ́таѧ."
 },
 {
  "type": "HEADER",
  "value": "Славосло́вїе, вели́кое. Тропа́рь прпⷣбномꙋ́ченикѡвъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Є҆́же ѿ вѣ́ка:"
 },
 {
  "type": "HEADER",
  "value": "Є҆ктєнїѝ, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Бл҃жє́нна ѿ канѡ́на прпⷣбномꙋ́ченикѡвъ пѣ́снь г҃ и҆ ѕ҃."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Положи́ша трꙋ̑пїѧ рабѡ́въ твои́хъ, бра́шно пти́цамъ нбⷭ҇нымъ."
 },
 {
  "type": "TEXT",
  "value": "Сті́хъ: Плѡ́ти прпⷣбныхъ твои́хъ ѕвѣ́рємъ земны̑мъ."
 },
 {
  "type": "HEADER",
  "value": "А҆пⷭ҇лъ къ ри́млѧнѡмъ, зача́ло ч҃ѳ."
 },
 {
  "type": "TEXT",
  "value": "А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ, и҆ ᲂу҆слы́ша мл҃твꙋ мою̀."
 },
 {
  "type": "TEXT",
  "value": "Сті́хъ: Ꙗ҆́кѡ тебѣ̀ ра́ди ᲂу҆мерщвлѧ́еми є҆смы̀ ве́сь де́нь."
 },
 {
  "type": "HEADER",
  "value": "Є҆ѵⷢ҇лїе, ѿ матѳе́а, зача́ло л҃и."
 },
 {
  "type": "TEXT",
  "value": "Прича́стенъ: Ра́дꙋйтесѧ пра́веднїи ѡ҆ гдⷭ҇ѣ, пра̑вымъ подоба́етъ похвала̀."
 }
]