[
 {
  "type": "HEADER",
  "value": "Деке́мврїа к҃"
 },
 {
  "type": "HEADER",
  "value": "Ст҃а́гѡ првⷣнагѡ і҆ѡа́нна, пресвѵ́тера кроншта́дтскагѡ, чꙋдотво́рца."
 },
 {
  "type": "HEADER",
  "value": "На вели́цѣй вече́рни, по предначина́тельномъ ѱалмѣ̀, пое́мъ: Блаже́нъ мꙋ́жъ: а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ: стїхи̑ры на ѕ҃, глаⷭ҇ ѕ҃:"
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Є҆диноро́днаго сн҃а бж҃їѧ возлюби́лъ є҆сѝ, и҆ томꙋ̀ є҆ди́номꙋ слꙋжи́ти возжелѣ́лъ є҆сѝ, ст҃е і҆ѡа́нне, є҆мꙋ́же ввѣ́рилсѧ є҆сѝ, глаго́лѧ: жи́знь моѧ̀ во хрⷭ҇тѣ̀ є҆́сть. Сегѡ̀ ра́ди потща́лсѧ є҆сѝ всѧ̑ ко бл҃гоꙋгожде́нїю гдⷭ҇еви и҆ мꙋ́дрствовати, и҆ дѣ́ѧти."
 },
 {
  "type": "TEXT",
  "value": "Мл҃твенника те́плаго и҆ бл҃года́тнаго па́стырѧ ви́димъ тѧ̀, ѻ҆́тче і҆ѡа́нне, мнѡ́зѣмъ бо лю́демъ, къ тебѣ̀ притека́ющымъ, ꙗ҆влѧ́еши въ ско́рбехъ ᲂу҆тѣше́нїе, въ недꙋ́зѣхъ многоразли́чныхъ и҆сцѣле́нїе, въ нꙋ́ждахъ сꙋ́щымъ и҆ стра́ждꙋщымъ при́сное вспоможе́нїе и҆ до ны́нѣ въ чꙋдодѣ́йствїихъ не ѡ҆скꙋдѣва́еши."
 },
 {
  "type": "TEXT",
  "value": "Лѣ́ствицею добродѣ́телей ше́ствꙋѧ, дѣ́латель нелѣ́ностный вертогра́да гдⷭ҇нѧ ꙗ҆ви́лсѧ є҆сѝ, ѻ҆́тче і҆ѡа́нне, ѿ ᲂу҆́тра жи́зни да́же до послѣ́днѧгѡ часа̀ до́брѣ потрꙋди́лсѧ є҆сѝ. Та́кѡ и҆ на́съ моли́твеннѡ ᲂу҆крѣпѝ гдⷭ҇ви рабо́тати."
 },
 {
  "type": "TEXT",
  "value": "І҆ѡа́нне првⷣне, врачꙋ̀ бл҃года́тный, си́лою мл҃твъ твои́хъ и҆сцѣлѧ́лъ є҆сѝ бли́жнихъ и҆ да́льнихъ, любо́вїю во хрⷭ҇тѣ̀ ѡ҆б̾е́млѧ, тѣ́хъ наставлѧ́лъ є҆сѝ ѡ҆браща́тисѧ къ бг҃ꙋ, всѣ̑мъ по вѣ́рѣ по́мощь подаю́щемꙋ."
 },
 {
  "type": "TEXT",
  "value": "Разли́ченъ ми́лованїѧ ѡ҆́бразъ и҆ широка̀ за́повѣдь сїѧ̀, речѐ златослове́сный і҆ѡа́ннъ. Ты́ же, па́стырю млⷭ҇тивый, въ си́хъ добродѣ́телехъ многоразли́чнѡ подвиза́выйсѧ, до́мъ трꙋдолю́бїѧ созда́вый, на́съ бы́ти чꙋ́ждыхъ пра́здности наꙋчѝ."
 },
 {
  "type": "TEXT",
  "value": "Оу҆едине́нномꙋ пꙋстынножи́телю, прпⷣбномꙋ і҆ѡа́ннꙋ ры́льскомꙋ подража́ѧ, є҆гѡ́же и҆́менемъ во ст҃ѣ́мъ кр҃ще́нїи нарече́нъ бы́лъ є҆сѝ, і҆ѡа́нне првⷣне, ᲂу҆дали́лсѧ є҆сѝ ѿ всѧ́кагѡ мїрска́гѡ пристра́стїѧ, во хрⷭ҇тѣ̀ є҆ди́нѣмъ житїѐ своѐ ᲂу҆тверди́въ, наꙋчѝ и҆ на́съ бл҃гоче́стномꙋ жи́тельствꙋ."
 },
 {
  "type": "HEADER",
  "value": "Сла́ва, глаⷭ҇ то́йже:"
 },
 {
  "type": "TEXT",
  "value": "Селє́нїѧ ст҃ы́хъ наслѣ́довалъ є҆сѝ, ѻ҆́тче і҆ѡа́нне првⷣне, во свѣ́тѣ лица̀ бж҃їѧ зри́ши нꙋ́жды съ вѣ́рою притека́ющихъ къ тебѣ̀, коемꙋ́ждо потрє́бнаѧ ꙗ҆̀же ко сп҃се́нїю подава́ѧ. Сегѡ̀ ра́ди и҆ мы̀, на по́мощь твою̀ ᲂу҆пова́юще, мо́лимсѧ: молѝ хрⷭ҇та̀ бг҃а сп҃сти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ и҃:"
 },
 {
  "type": "TEXT",
  "value": "Верте́пе, бл҃гоꙋкраси́сѧ, а҆́гница бо грѧде́тъ чревоносѧ́щи хрⷭ҇та̀: ꙗ҆́сли под̾ими́те, сло́вомъ разрѣши́вшаго ѿ безслове́снагѡ дѣѧ́нїѧ на́съ земноро́дныхъ. Па́стырїе, свирѧ́юще, свидѣ́тельствꙋйте чꙋдесѝ стра́шномꙋ: и҆ волсвѝ ѿ персі́ды, зла́то, и҆ лїва́нъ и҆ смѵ́рнꙋ цр҃ю̀ принеси́те: ꙗ҆́кѡ ꙗ҆ви́сѧ гдⷭ҇ь и҆з̾ дв҃ы мт҃ре. Є҆мꙋ́же и҆ прини́кши ра́бски мт҃и поклони́сѧ, и҆ привѣща́ше къ держи́момꙋ на ѡ҆б̾ѧ́тїихъ є҆ѧ̀: ка́кѡ всѣ́ѧлсѧ є҆сѝ мнѣ̀; и҆лѝ ка́кѡ прозѧ́блъ є҆сѝ во мнѣ̀, и҆зба́вителю мо́й и҆ бж҃е;"
 },
 {
  "type": "HEADER",
  "value": "Вхо́дъ. Прокі́менъ днѐ."
 },
 {
  "type": "HEADER",
  "value": "На лїті́и стїхи̑ры првⷣнагѡ, глаⷭ҇ в҃:"
 },
 {
  "type": "TEXT",
  "value": "Сло́ва бж҃їѧ слꙋжи́телю, словесы̀ є҆ѵⷢ҇льскими назида́лъ є҆сѝ се́рдце твоѐ, въ мл҃твѣ и҆ бг҃омы́слїи при́снѡ пребыва́ѧ, ра́зꙋмъ бг҃опросвѣще́нъ стѧжа́лъ є҆сѝ, ѻ҆́тче і҆ѡа́нне, пꙋ́ть къ бг҃ꙋ писа́ньми твои́ми на́мъ ᲂу҆казꙋ́ѧ, моли́сѧ, да пра́во къ немꙋ̀ ше́ствꙋемъ."
 },
 {
  "type": "TEXT",
  "value": "И҆́стинныѧ вѣ́ры проповѣ́дниче, сло́вомъ и҆ писа́ньми догма́ты правосла́вїѧ и҆з̾ѧснѧ́лъ є҆сѝ, лжеꙋчи́телємъ противобо́рствꙋѧ, на недви́жимѣмъ ка́мени вѣ́ры ᲂу҆твержда́ѧсѧ, во сла́вꙋ цр҃кве хрⷭ҇то́вы потрꙋди́лсѧ є҆сѝ. Оу҆крѣпѝ и҆ на́съ мл҃твами твои́ми, ѻ҆́тче і҆ѡа́нне, въ вѣ́рности правосла́внѣй цр҃кви пребыва́ти и҆ въ не́й сп҃са́тисѧ."
 },
 {
  "type": "HEADER",
  "value": "Сла́ва, глаⷭ҇ з҃:"
 },
 {
  "type": "TEXT",
  "value": "Ꙗ҆ви́лсѧ є҆сѝ лю́демъ бж҃їимъ наста́вникъ сп҃се́нїѧ, ѡ҆́бразъ сострада́нїѧ и҆ дꙋхо́внагѡ ᲂу҆тѣше́нїѧ: не то́чїю бо па́ствѣ кроншта́дстѣй, но и҆ все́й рꙋсѝ, ѻ҆́тче і҆ѡа́нне бг҃омꙋ́дре, бл҃годѣѧ̑нїѧ и҆сточа́еши. Сегѡ̀ ра́ди пра́зднꙋюще па́мѧть твою̀, сла́вимъ гдⷭ҇а, ди́внаго во ст҃ы́хъ свои́хъ."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ и҃:"
 },
 {
  "type": "TEXT",
  "value": "Воспрїимѝ, виѳлее́ме, бж҃їю митропо́лїю, свѣ́тъ бо незаходи́мый въ тебѣ̀ роди́тисѧ прихо́дитъ. А҆́гг҃ли, ᲂу҆диви́тесѧ на нб҃сѝ, человѣ́цы, просла́вите на землѝ, волсвѝ, ѿ персі́ды пресла́вный да́ръ принеси́те, па́стырїе, свирѧ́юще трист҃о́е пѣ́нїе сла́дцѣ воспо́йте: всѧ́кое дыха́нїе да хва́литъ вседѣ́телѧ."
 },
 {
  "type": "HEADER",
  "value": "На стїхо́внѣ стїхи̑ры, глаⷭ҇ є҃:"
 },
 {
  "type": "TEXT",
  "value": "Ре́вностїю ѡ҆ сла́вѣ бж҃їей распалѧ́емь, поꙋча́лъ є҆сѝ па́ствꙋ твою̀ всѧ́чески храни́ти се́рдце своѐ ѿ страсте́й, дꙋ́шꙋ растлѣва́ющихъ и҆ ѿ бг҃а разлꙋча́ющихъ. Молѝ ѡ҆ на́съ, ѻ҆́тче ст҃ы́й і҆ѡа́нне, да ᲂу҆пра́вимъ житїѐ на́ше къ сла́вѣ и҆́мене бж҃їѧ и҆ сп҃се́нїю."
 },
 {
  "type": "TEXT",
  "value": "Сті́хъ: Свѣ́тъ возсїѧ̀ првⷣникꙋ и҆ пра̑вымъ се́рдцемъ весе́лїе."
 },
 {
  "type": "TEXT",
  "value": "А҆пⷭ҇тѡльскимъ подвигѡ́мъ подража́ѧ, ѻ҆́тче і҆ѡа́нне преди́вне, дꙋ́шꙋ ѡ҆ сп҃се́нїи бли́жнихъ полага́лъ є҆сѝ, взыскꙋ́ѧ не свои́хъ сѝ, но и҆́хже любы̀ бж҃їѧ ѡ҆б̾е́млетъ. Ны́нѣ же, предстоѧ̀ прⷭ҇то́лꙋ ст҃ы́ѧ трⷪ҇цы, непреста́ннѡ моли́сѧ ѡ҆ почита́ющихъ па́мѧть твою̀."
 },
 {
  "type": "TEXT",
  "value": "Сті́хъ: Гото́во се́рдце є҆гѡ̀ ᲂу҆пова́ти на гдⷭ҇а."
 },
 {
  "type": "TEXT",
  "value": "Всѐ бога́тство вѣ́ры ѿкры́лъ мѝ є҆сѝ, гдⷭ҇и, бл҃года́рнѣ взыва́лъ є҆сѝ, і҆ѡа́нне првⷣне, ко и҆сто́чникꙋ любвѐ и҆ премꙋ́дрости бг҃ꙋ, ѿ негѡ́же позна́лъ є҆сѝ словеса̀ сп҃си́тєльнаѧ. И҆́миже согрѣ́й хла̑днаѧ сердца̀ на̑ша и҆ ко сп҃се́нїю напра́ви."
 },
 {
  "type": "HEADER",
  "value": "Сла́ва, глаⷭ҇ и҃:"
 },
 {
  "type": "TEXT",
  "value": "Є҆ди́номꙋ бг҃ꙋ любо́вїю прилѣплѧ́ѧсѧ, ст҃е і҆ѡа́нне, при́снѡ попече́нїе ѡ҆ стра́ждꙋщихъ и҆ ѿве́рженныхъ и҆мѣ́ѧ, ско́рый помо́щникъ тѣ̑мъ ꙗ҆ви́лсѧ є҆сѝ, сегѡ̀ ра́ди си́ла бл҃года́ти бж҃їѧ содѣва́етъ тобо́ю вє́лїѧ чꙋдеса̀, ѡ҆браща́ѧ невѣ́рныхъ къ вѣ́рѣ во хрⷭ҇та̀ и҆ къ жи́зни во сла́вꙋ бж҃їю."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ а҃:"
 },
 {
  "type": "TEXT",
  "value": "Предпра́зднꙋимъ, лю́дїе, хрⷭ҇то́во ржⷭ҇тво̀, и҆ возне́сше ᲂу҆́мъ къ виѳлее́мꙋ, вознесе́мсѧ мы́слїю, и҆ ᲂу҆смо́тримъ дв҃ꙋ дꙋше́вными ѻ҆чесы̀, и҆дꙋ́щꙋю роди́ти въ верте́пѣ всѣ́хъ гдⷭ҇а, и҆ бг҃а на́шего: є҆гѡ́же і҆ѡ́сифъ ви́дѣвъ чꙋде́съ вели́чество, мнѧ́ше человѣ́ка зрѣ́ти, ꙗ҆́кѡ млⷣнца пелена́ми повива́ема, проразꙋмѣва́ше же ѿ веще́й бг҃а бы́ти и҆́стиннаго, подаю́щаго дꙋша́мъ на́шымъ ве́лїю млⷭ҇ть."
 },
 {
  "type": "HEADER",
  "value": "Тропа́рь првⷣнагѡ, глаⷭ҇ а҃:"
 },
 {
  "type": "TEXT",
  "value": "Правосла́вныѧ вѣ́ры побо́рниче, землѝ рѡссі́йскїѧ печа́льниче, па́стырємъ пра́вило и҆ ѡ҆́бразе вѣ̑рнымъ, покаѧ́нїѧ и҆ жи́зни во хрⷭ҇тѣ̀ проповѣ́дниче, бж҃е́ственныхъ та̑инъ бл҃гоговѣ́йный слꙋжи́телю и҆ дерзнове́нный ѡ҆ лю́дехъ мл҃твенниче, ѻ҆́тче првⷣный і҆ѡа́нне, цѣли́телю и҆ преди́вный чꙋдотво́рче, гра́дꙋ кроншта́дтꙋ похвало̀ и҆ цр҃кве на́шеѧ ᲂу҆краше́нїе, молѝ всебл҃га́го бг҃а ᲂу҆мири́ти мі́ръ и҆ сп҃стѝ дꙋ́шы на́шѧ."
 },
 {
  "type": "HEADER",
  "value": "Сла́ва: и҆́нъ тропа́рь, глаⷭ҇ д҃:"
 },
 {
  "type": "TEXT",
  "value": "Рѡссі́йскїѧ землѝ па́стырь до́брый показа́лсѧ є҆сѝ, въ слꙋже́нїи пресвѵ́терстѣмъ жи́знь во хрⷭ҇тѣ̀ стѧжа́въ, бг҃омꙋ́дре ѻ҆́тче і҆ѡа́нне. Бл҃года́ть и҆з̾ѻби́льнꙋю ѿ влⷣки хрⷭ҇та̀ прїѧ́лъ є҆сѝ: недꙋ́ги ѿгонѧ́ти, малодꙋ̑шныѧ ᲂу҆тѣша́ти, въ та́йнѣ пречⷭ҇тагѡ тѣ́ла и҆ кро́ве вѣ̑рныѧ со хрⷭ҇то́мъ соединѧ́ти. Сегѡ̀ ра́ди восхвалѧ́емъ тѧ̀, ꙗ҆́кѡ мл҃твенника ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, тропа́рь предпра́зднства, глаⷭ҇ то́йже:"
 },
 {
  "type": "TEXT",
  "value": "Гото́висѧ, виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бж҃е́ственный са́дъ: ѿ негѡ́же ꙗ҆́дше жи́ви бꙋ́демъ, не ꙗ҆́коже а҆да́мъ ᲂу҆́мремъ. Хрⷭ҇то́съ ражда́етсѧ, пре́жде па́дшїй возста́вити ѡ҆́бразъ."
 },
 {
  "type": "HEADER",
  "value": "На ᲂу҆́трени, велича́нїе првⷣномꙋ:"
 },
 {
  "type": "TEXT",
  "value": "Велича́емъ тѧ̀, ст҃ы́й првⷣный ѻ҆́тче і҆ѡа́нне, и҆ чти́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Свѣ́тъ возсїѧ̀ првⷣникꙋ и҆ пра̑вымъ се́рдцемъ весе́лїе. Гото́во се́рдце є҆гѡ̀ ᲂу҆пова́ти на гдⷭ҇а. Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ, ᲂу҆мно́житсѧ. Въ ни́хже посѣтѝ на́съ восто́къ съ высоты̀: Ꙗ҆ви́тисѧ во тьмѣ̀, и҆ сѣ́ни сме́ртнѣй сѣдѧ́щымъ: Напра́вити но́ги на́шѧ на пꙋ́ть ми́ренъ."
 },
 {
  "type": "HEADER",
  "value": "По полѷеле́и, сѣда́ленъ, глаⷭ҇ и҃:"
 },
 {
  "type": "TEXT",
  "value": "Ѻ҆те́ческою любо́вїю всѣ́хъ ѡ҆б̾е́млѧ, са́мыхъ па́дшихъ во глꙋбинꙋ̀ грѣха̀ не ѿвраща́лсѧ є҆сѝ, ненави́дѧ грѣ́хъ, ко грѣ̑шнымъ милосе́рдꙋѧ, къ покаѧ́нїю и҆̀хъ приводи́лъ є҆сѝ, а҆́гг҃лѡмъ нбⷭ҇нымъ подо́бѧсѧ, ѡ҆браще́нїю заблꙋ́ждшихъ и҆ покаѧ́нїю и҆́хъ ра́дꙋѧсѧ, і҆ѡа́нне првⷣне."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ, д҃-гѡ гла́са."
 },
 {
  "type": "HEADER",
  "value": "Прокі́менъ, глаⷭ҇ д҃:"
 },
 {
  "type": "TEXT",
  "value": "Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, заⷱ҇ ѕ҃і."
 },
 {
  "type": "HEADER",
  "value": "Сла́ва, глаⷭ҇ ѕ҃:"
 },
 {
  "type": "TEXT",
  "value": "Мл҃твами ст҃а́гѡ првⷣнагѡ і҆ѡа́нна, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "И҆ ны́нѣ, глаⷭ҇ то́йже:"
 },
 {
  "type": "TEXT",
  "value": "Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "Та́же, глаⷭ҇ ѕ҃:"
 },
 {
  "type": "TEXT",
  "value": "Поми́лꙋй мѧ̀, бж҃е:"
 },
 {
  "type": "HEADER",
  "value": "Стїхи́ра по н҃-мъ ѱалмѣ̀, глаⷭ҇ ѕ҃:"
 },
 {
  "type": "TEXT",
  "value": "Тѧ̀ земна́го а҆́гг҃ла, нбⷭ҇наго человѣ́ка, любвѐ хрⷭ҇то́вы носи́телѧ, землѝ рѡссі́йскїѧ печа́льника и҆ ѡ҆ все́мъ мі́рѣ мл҃твенника, застꙋ́пника ѻ҆би́димыхъ, ѡ҆́бразъ трꙋдолю́бїѧ, чꙋдотво́рца преди́внаго почита́емъ, і҆ѡа́нне првⷣне, бл҃годарѧ́ще бг҃а, прославлѧ́ющаго ст҃ы̑ѧ своѧ̑."
 },
 {
  "type": "HEADER",
  "value": "Канѡ́нъ предпра́зднства, глаⷭ҇ ѕ҃, со і҆рмосо́мъ на ѕ҃, и҆ канѡ́нъ првⷣнаго, на и҃, глаⷭ҇ а҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ."
 },
 {
  "type": "TEXT",
  "value": "Катава́сїа: Хрⷭ҇то́съ ражда́етсѧ, сла́вите: хрⷭ҇то́съ съ нб҃съ, срѧ́щите: хрⷭ҇то́съ на землѝ, возноси́тесѧ. По́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ка́мень є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ."
 },
 {
  "type": "TEXT",
  "value": "Катава́сїа: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и."
 },
 {
  "type": "HEADER",
  "value": "Конда́къ предпра́зднства, глаⷭ҇ г҃:"
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Дв҃а дне́сь превѣ́чное сло́во въ верте́пѣ грѧде́тъ роди́ти неизрече́ннѡ: ликꙋ́й, вселе́ннаѧ, ᲂу҆слы́шавши, просла́ви со а҆́гг҃лы и҆ па́стырьми, хотѧ́щаго ꙗ҆ви́тисѧ ѻ҆троча̀ мла́до, превѣ́чнаго бг҃а."
 },
 {
  "type": "HEADER",
  "value": "Сѣда́ленъ првⷣника, глаⷭ҇ в҃:"
 },
 {
  "type": "TEXT",
  "value": "Мы̀, немощні́и, къ тебѣ̀, првⷣне і҆ѡа́нне, ꙗ҆́кѡ си́льномꙋ мл҃твенникꙋ пред̾ бг҃омъ, притека́емъ, просѧ́ще недꙋ́гѡмъ дꙋшє́внымъ и҆ телє́снымъ и҆сцѣле́нїѧ, въ ско́рбехъ ѡ҆ грѣсѣ́хъ на́шихъ покаѧ́нїемъ и҆збавле́нїѧ, странѣ̀ на́шей и҆ лю́демъ є҆ѧ̀ ми́рное жи́тельство и҆ всѧ̑ потрє́бнаѧ ко сп҃се́нїю."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Катава́сїа: Же́злъ и҆з̾ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ, ѿ дв҃ы прозѧ́блъ є҆сѝ и҆з̾ горы̀ хва́льный, прїѡсѣне́нныѧ ча́щи, прише́лъ є҆сѝ вопло́щьсѧ ѿ неискꙋсомꙋ́жныѧ невеще́ственный и҆ бж҃е, сла́ва си́лѣ твое́й, гдⷭ҇и."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебѐ бг҃а не зна́емъ: и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ."
 },
 {
  "type": "TEXT",
  "value": "Катава́сїа: Бг҃ъ сы́й ми́ра, ѻ҆ц҃ъ щедрѡ́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃сѝ мѧ̀ сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Катава́сїа: И҆з̾ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ньшее нетлѣ́ннꙋ: є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ."
 },
 {
  "type": "HEADER",
  "value": "Конда́къ, глаⷭ҇ г҃:"
 },
 {
  "type": "TEXT",
  "value": "Дне́сь па́стырь кроншта́дтскїй предстои́тъ прⷭ҇то́лꙋ бж҃їю и҆ ᲂу҆се́рднѡ мо́литъ ѡ҆ вѣ́рныхъ хрⷭ҇та̀ пастыренача́льника, ѡ҆бѣтова́нїе да́вшаго: сози́ждꙋ цр҃ковь мою̀ и҆ врата̀ а҆́дѡва не ѡ҆долѣ́ютъ є҆́й."
 },
 {
  "type": "TEXT",
  "value": "І҆́косъ: Восхва́лимъ, вѣ́рнїи, ди́внаго па́стырѧ кроншта́дтскаго, бл҃года́ти тезоимени́таго, свѣти́льника присногорѧ́щаго ᲂу҆ прⷭ҇то́ла ст҃ы́ѧ трⷪ҇цы, съ бцⷣею и҆ со всѣ́ми ст҃ы́ми землѝ на́шеѧ молѧ́щагосѧ ѡ҆ сп҃се́нїи всѣ́хъ, и҆́мѧ гдⷭ҇не призыва́ющихъ, да ᲂу҆крѣпи́тсѧ въ странѣ̀ на́шей правосла́вїе си́лою хрⷭ҇та̀ пастыренача́льника, ѡ҆бѣтова́нїе да́вшаго: сози́ждꙋ цр҃ковь мою̀ и҆ врата̀ а҆́дѡва не ѡ҆долѣ́ютъ є҆́й."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ нижѐ стꙋжѝ ѻ҆́гнь. Тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Катава́сїа: Ѻ҆́троцы бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Катава́сїа: Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѡ҆́бразъ: не бо̀ ꙗ҆̀же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. Тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи, велича́емъ."
 },
 {
  "type": "TEXT",
  "value": "Катава́сїа: Та́инство стра́нное ви́жꙋ и҆ пресла́вное: нб҃о, верте́пъ: прⷭ҇то́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же воспѣва́юще велича́емъ."
 },
 {
  "type": "HEADER",
  "value": "Свѣти́ленъ, глаⷭ҇ в҃:"
 },
 {
  "type": "TEXT",
  "value": "Ве́сь и҆спо́лнилсѧ є҆сѝ свѣ́та хрⷭ҇то́ва, ѡ҆ст҃и́въ себѐ бг҃ови, просвѣтѝ и҆ на́съ свѣ́томъ бл҃года́ти дх҃а ст҃а́гѡ мл҃твами твои́ми, і҆ѡа́нне свѣтоно́сне."
 },
 {
  "type": "HEADER",
  "value": "Сла́ва и҆ ны́нѣ, предпра́зднства:"
 },
 {
  "type": "TEXT",
  "value": "Подо́бенъ: Пред̾ꙋгото́висѧ:"
 },
 {
  "type": "TEXT",
  "value": "Оу҆краси́сѧ, виѳлее́ме, но́вое жили́ще, ꙗ҆́сли и҆ верте́пъ, па́стырей сѡ́нмища, волсвѝ ѿ восто́кѡвъ въ него̀ предвари́те, ѕвѣзды̀ свѣ́тлостїю: дв҃а бо ᲂу҆жѐ всесоверше́ннаго, ꙗ҆́кѡ млⷣнца въ то́мъ ражда́етъ."
 },
 {
  "type": "HEADER",
  "value": "И҆лѝ бг҃оро́диченъ:"
 },
 {
  "type": "TEXT",
  "value": "А҆́гг҃ли на нб҃сѝ и҆ человѣ́цы на землѝ тѧ̀, бцⷣе, ꙗ҆́кѡ мт҃рь свѣ́та, непреста́ннѡ велича́емъ."
 },
 {
  "type": "HEADER",
  "value": "На хвали́техъ стїхи̑ры на д҃, глаⷭ҇ и҃,"
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ:"
 },
 {
  "type": "TEXT",
  "value": "Ликꙋ́й свѣ́тлѡ, гра́де ст҃а́гѡ петра̀, и҆мѣ́ѧ въ себѣ̀ дне́сь просла́влєнныѧ ст҃ы̑ѧ ᲂу҆го́дники бж҃їѧ: ѯе́нїю бл҃же́ннꙋю, ди́внꙋю мл҃твенницꙋ, и҆ првⷣнаго і҆ѡа́нна, па́стырѧ кроншта́дтскаго, свѣти́льника вѣ́ры и҆ чꙋдотво́рца и҆зрѧ́дна. Взыгра́йте, лю́дїе бж҃їи, въ пѣ́снехъ и҆ пѣ́нїихъ ра́дꙋющесѧ, хрⷭ҇та̀ сла́вѧще и҆ ᲂу҆гѡ́дники є҆гѡ̀, при́снѡ молѧ́щыѧсѧ ѡ҆ дꙋша́хъ на́шихъ."
 },
 {
  "type": "TEXT",
  "value": "Оу҆стнѣ̀ твоѝ ра́зꙋма и҆спо́лнистасѧ, и҆ зако́нꙋ гдⷭ҇ню ѿ ᲂу҆́стъ твои́хъ поꙋча́хꙋсѧ лю́дїе, і҆ѡа́нне преди́вне, і҆ере́ю бж҃їй, ны́нѣ же со а҆́гг҃лы предстоѧ̀ ст҃ѣ́й трⷪ҇цѣ, моли́сѧ ѡ҆ почита́ющихъ па́мѧть твою̀."
 },
 {
  "type": "TEXT",
  "value": "Словесы̀ твои́ми и҆ писа́ньми пꙋ́ть къ бг҃ꙋ ᲂу҆казꙋ́еши и҆ жи́зни во хрⷭ҇тѣ̀ поꙋча́еши, сл҃нца пра́вды, хрⷭ҇та̀, проповѣ́дꙋѧ, и҆́стинный кла́съ живота̀, трапе́зꙋ безсме́ртїѧ въ та́йнѣ пречⷭ҇тыхъ тѣ́ла и҆ кро́ве на́мъ ᲂу҆готовлѧ́ющаго."
 },
 {
  "type": "HEADER",
  "value": "Сла́ва, глаⷭ҇ ѕ҃:"
 },
 {
  "type": "TEXT",
  "value": "И҆́стиннаго па́стырѧ тѧ̀ почита́емъ, ѻ҆́тче і҆ѡа́нне првⷣне, ꙗ҆ви́лъ бо є҆сѝ въ себѣ̀ ѡ҆́бразъ пастыренача́льника хрⷭ҇та̀, ны́нѣ же зрѣ́нїемъ неизрече́нныѧ сла́вы є҆гѡ̀ наслажда́ешисѧ и҆ прошє́нїѧ на̑ша слы́шиши, моли́сѧ дарова́ти на́мъ полє́знаѧ ко сп҃се́нїю."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ то́йже:"
 },
 {
  "type": "TEXT",
  "value": "Приближа́етсѧ хрⷭ҇то́съ: виѳлее́ме пред̾ꙋгото́висѧ, ᲂу҆жѐ ꙗ҆зы́кѡвъ сп҃се́нїе ѡ҆зарѧ́етъ. Бл҃гоꙋкрасѝ ꙗ҆́сли, па́стыри соберѝ, призовѝ волхвы̀ ѿ персі́ды, вѡ́инства безпло́тныхъ ᲂу҆мѡ́въ, воззови́те: цр҃ь нб҃съ на зе́млю прихо́дитъ."
 },
 {
  "type": "HEADER",
  "value": "Славосло́вїе вели́кое. И҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: прокі́менъ, глаⷭ҇ з҃:"
 },
 {
  "type": "TEXT",
  "value": "Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀."
 },
 {
  "type": "HEADER",
  "value": "А҆пⷭ҇лъ ко є҆вре́ємъ, заⷱ҇ та҃і."
 },
 {
  "type": "HEADER",
  "value": "А҆ллилꙋ́їа, глаⷭ҇ д҃."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, заⷱ҇ а҃і."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ."
 },
 {
  "type": "TEXT",
  "value": "А҆ллилꙋ́їа, три́жды."
 }
]