[
 {
  "type": "HEADER",
  "value": "ПАРЕМІЍ СТ҃Ы́Ѧ ПЕНТИКО́СТІИ."
 },
 {
  "type": "TEXT",
  "value": "ⷤ Преполове́нїе пѧтдесѧ́тницы"
 },
 {
  "type": "TEXT",
  "value": "ⷤ Вознесе́нїе гдⷭ҇не"
 },
 {
  "type": "TEXT",
  "value": "ⷤ Ст҃ы́хъ ѻ҆ц҃ъ, и҆̀же въ нїке́и"
 },
 {
  "type": "TEXT",
  "value": "ⷤ Недѣ́лѧ ст҃ы́ѧ пентико́стїи"
 },
 {
  "type": "TEXT",
  "value": "ⷤ Недѣ́лѧ всѣ́хъ ст҃ы́хъ"
 },
 {
  "type": "TEXT",
  "value": "ⷤ Недѣ́лѧ всѣ́хъ ст҃ы́хъ въ землѝ рѡссі́йстей просїѧ́вшихъ"
 },
 {
  "type": "HEADER",
  "value": "Среда̀ д҃-ѧ седми́цы по па́сцѣ. Преполове́нїе пѧтдесѧ́тницы. а҃. Прⷪ҇ро́чества мїхе́ина чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: ѿ сїѡ́на и҆зы́детъ зако́нъ, и҆ сло́во гдⷭ҇не и҆з̾ і҆ерꙋсали́ма, и҆ сꙋ́дитъ посредѝ люде́й мно́гихъ, и҆ ѡ҆бличи́тъ ꙗ҆зы́ки крѣ̑пкїѧ да́же на до́лзѣ, ꙗ҆́кѡ всѝ лю́дїе по́йдꙋтъ кі́йждо свои́мъ пꙋте́мъ: мы́ же по́йдемъ и҆́менемъ гдⷭ҇а бг҃а на́шегѡ въ вѣ́къ. та́кѡ глаго́летъ гдⷭ҇ь вседержи́тель: ᲂу҆слы́шите хо́лми сꙋ́дъ гдⷭ҇нь, и҆ дє́бри ѡ҆снова̑нїѧ землѝ, ꙗ҆́кѡ сꙋ́дъ гдⷭ҇ви къ лю́демъ є҆гѡ̀, и҆ со і҆и҃лемъ сопри́тсѧ, глаго́лѧ: лю́дїе моѝ, что̀ сотвори́хъ ва́мъ; и҆лѝ чи́мъ ѡ҆печа́лихъ ва́съ; ѿвѣща́йте мѝ: занѐ возведо́хъ вы̀ ѿ землѝ є҆гѵ́петскїѧ, и҆ и҆з̾ до́мꙋ рабо́ты и҆зба́вихъ ва́съ, и҆ посла́хъ пред̾ лице́мъ ва́шимъ мѡѷсе́а и҆ а҆арѡ́на и҆ марїа́мъ. лю́дїе моѝ помѧни́те ᲂу҆́бѡ, что̀ совѣща́ша на ва́съ сопроти́внїи; кто̀ возвѣстѝ тебѣ̀; возвѣсти́хъ бо тебѣ̀, человѣ́че, что̀ добро̀, и҆лѝ что̀ гдⷭ҇ь и҆́щетъ ѿ тебѐ, ра́звѣ твори́ти сꙋ́дъ, и҆ люби́ти млⷭ҇ть, и҆ гото́вꙋ бы́ти, є҆́же ходи́ти съ гдⷭ҇емъ бг҃омъ твои́мъ: занѐ въ крѣ́пости возвели́читсѧ гдⷭ҇ь, и҆ ᲂу҆пасе́тъ ста́до своѐ въ ми́рѣ, да́же до конє́цъ землѝ. Мих ҆́:̀–҆, ҆̀; ̑:̀–҆̀; ̾; ҆̀:҆́"
 },
 {
  "type": "HEADER",
  "value": "в҃. Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: жа́ждꙋщїи и҆ди́те на во́дꙋ, и҆ є҆ли́цы не и҆́мате сребра̀, ше́дше кꙋпи́те, и҆ ꙗ҆ди́те, пі́йте без̾ сребра̀ и҆ цѣны̀, вїно̀ и҆ тꙋ́къ. ꙗ҆́кѡ та́кѡ глаго́летъ гдⷭ҇ь вседержи́тель ва́мъ: лю́дїе моѝ, почерпи́те во́дꙋ съ весе́лїемъ ѿ и҆стѡ́чникъ спасе́нїѧ. и҆ рече́ши въ де́нь ѻ҆́ный: воспо́йте гдⷭ҇ви, призови́те и҆́мѧ є҆гѡ̀, возвѣсти́те во ꙗ҆зы́цѣхъ сла̑внаѧ є҆гѡ̀: помѧни́те, ꙗ҆́кѡ вознесе́сѧ и҆́мѧ є҆гѡ̀. лю́дїе моѝ, ᲂу҆слы́шите менѐ, и҆ снѣ́сте блага̑ѧ, и҆ наслади́тсѧ во благи́хъ дꙋша̀ ва́ша. внꙋши́те ᲂу҆ши́ма ва́шима, и҆ послѣ́дꙋйте пꙋтє́мъ мои́мъ. ᲂу҆слы́шите менѐ, и҆ жива̀ бꙋ́детъ во благи́хъ дꙋша̀ ва́ша, и҆ завѣща́ю ва́мъ завѣ́тъ вѣ́чный, и҆ призови́те. внегда́ же а҆́ще прибли́житесѧ мнѣ̀, да ѡ҆ста́витъ нечести́вый пꙋти̑ своѧ̑, и҆ мꙋ́жъ беззако́нный совѣ́ты своѧ̑, и҆ ѡ҆брати́тесѧ ко мнѣ̀, и҆ поми́лꙋю ва́съ, и҆ ѡ҆ста́влю грѣхѝ ва́шѧ. не сꙋ́ть бо совѣ́ти моѝ, ꙗ҆́коже совѣ́ти ва́ши, ни ꙗ҆́коже пꙋтїѐ ва́ши пꙋтїѐ моѝ, глаго́летъ гдⷭ҇ь. но ꙗ҆́коже ѿстои́тъ нб҃о ѿ землѝ, та́кѡ ѿстои́тъ пꙋ́ть мо́й ѿ пꙋте́й ва́шихъ, и҆ ᲂу҆мышлє́нїѧ ва́ша ѿ мы́сли моеѧ̀. ꙗ҆́коже бо а҆́ще сни́детъ до́ждь, и҆лѝ снѣ́гъ съ нб҃сѐ, и҆ не возврати́тсѧ ѿтꙋ́дꙋ, до́ндеже ᲂу҆пои́тъ зе́млю, и҆ и҆зрасти́тъ, и҆ прозѧ́бнетъ, и҆ да́стъ сѣ́мѧ сѣ́ющемꙋ, и҆ хлѣ́бъ въ снѣ́дь: си́це бꙋ́детъ глаго́лъ мо́й, и҆́же а҆́ще и҆зы́детъ и҆з̾ ᲂу҆́стъ мои́хъ, не возврати́тсѧ ко мнѣ̀ то́щъ, до́ндеже сконча́етъ всѧ̑, є҆ли̑ка восхотѣ́хъ, и҆ и҆спра́влю пꙋти̑ твоѧ̑, и҆ за́пѡвѣди моѧ̑. съ весе́лїемъ бо и҆зы́дете, и҆ съ ра́достїю наꙋчи́тесѧ: го́ры бо и҆ хо́лми возска́чꙋтъ, ждꙋ́ще ва́съ въ ра́дости, и҆ всѧ̑ древа̀ сє́льнаѧ воспле́щꙋтъ вѣ́твьми. и҆ вмѣ́стѡ дра́чїѧ взы́детъ кѷпарі́съ, вмѣ́стѡ же кропи́вы взы́детъ мѷрсі́на: и҆ бꙋ́детъ гдⷭ҇ь во и҆́мѧ, и҆ въ зна́менїе вѣ́чное, и҆ не ѡ҆скꙋдѣ́етъ, глаго́летъ гдⷭ҇ь бг҃ъ ст҃ы́й і҆и҃левъ. Ис ҆̀҆̀:́; ́̀:҆–҆́; ҆̀҆̀:̀–҆, ̑–́҆"
 },
 {
  "type": "HEADER",
  "value": "г҃. При́тчей чте́нїе."
 },
 {
  "type": "TEXT",
  "value": "П ремꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ. ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, поро́чна сотвори́тъ себѐ: ѡ҆бличє́нїѧ бо нечести́вомꙋ ра̑ны є҆мꙋ̀. не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й пра́ведномꙋ, и҆ приложи́тъ прїима́ти. нача́ло премꙋ́дрости, стра́хъ гдⷭ҇нь, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть блага́гѡ. си́мъ бо ѻ҆́бразомъ мно́гое поживе́ши вре́мѧ и҆ приложа́тсѧ тебѣ̀ лѣ̑та живота̀. Притч ж҃:́–́́"
 },
 {
  "type": "HEADER",
  "value": "Въ четверто́къ ѕ҃-ѧ седми́цы по па́сцѣ. Вознесе́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀. а҃. Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: бꙋ́детъ въ послѣ́днїѧ днѝ ꙗ҆вле́на гора̀ гдⷭ҇нѧ, и҆ до́мъ бж҃їй на версѣ́хъ го́ръ, и҆ вознесе́тсѧ превы́ше холмѡ́въ, и҆ прїи́дꙋтъ на ню̀ всѝ ꙗ҆зы́цы. и҆ по́йдꙋтъ лю́дїе мно́зи, и҆ рекꙋ́тъ: прїиди́те взы́демъ на го́рꙋ гдⷭ҇ню, и҆ въ до́мъ бг҃а і҆а́кѡвлѧ, и҆ возвѣсти́тъ на́мъ пꙋ́ть сво́й, и҆ по́йдемъ по немꙋ̀. Ис ̀:̀–҆"
 },
 {
  "type": "HEADER",
  "value": "в҃. Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: поиди́те и҆ вни́дите враты̀ мои́ми, ᲂу҆гото́вите пꙋ́ть мо́й, и҆ пꙋ́ть твори́те лю́демъ мои̑мъ, и҆ ка́мєнїѧ ѿ пꙋтѝ размещи́те, вознеси́те зна́менїе на ꙗ҆зы́ки. се́ бо гдⷭ҇ь сотворѝ слы́шано да́же до послѣ́днихъ землѝ: рцы́те дще́ри сїѡ́новѣ, сѐ сп҃си́тель тво́й прихо́дитъ, и҆мѣ́ѧ съ собо́ю мздꙋ̀, и҆ дѣ́ло є҆гѡ̀ пред̾ лице́мъ є҆гѡ̀. и҆ прозове́тъ ѧ҆̀ лю́ди свѧ́ты, и҆зба́влены ѿ гдⷭ҇а: ты́ же нарече́шисѧ взыска́нный гра́дъ, и҆ неѡста́вленный. кто̀ се́й прише́дый и҆з̾ є҆дѡ́ма, ѡ҆броще́нїе ри́зъ є҆гѡ̀ ѿ восо́ра; се́й красе́нъ во ѻ҆де́жди свое́й, вопїе́тъ съ крѣ́постїю ве́лїею: а҆́зъ глаго́лю пра́вдꙋ и҆ сꙋ́дъ спасе́нїѧ. почто́ ти ѡ҆бро́щены ри̑зы, и҆ ѻ҆дє́жды твоѧ̑ ꙗ҆́кѡ ѿ и҆стопта́нїѧ точи́ла и҆спо́лнены и҆стопта́нїѧ; точи́ло и҆стопта́хъ є҆ди́нъ, и҆ ѿ ꙗ҆зы̑къ нѣ́сть мꙋ́жъ со мно́ю. ми́лость гдⷭ҇ню помѧнꙋ́хъ, добродѣ́тєли гдⷭ҇ни во всѣ́хъ, и҆́миже на́мъ воздава́етъ. гдⷭ҇ь, сꙋдїѧ̀ бл҃гі́й до́мꙋ і҆и҃левꙋ, нано́ситъ на́мъ по ми́лости свое́й, и҆ по мно́жествꙋ пра́вды своеѧ̀. и҆ речѐ: не лю́дїе ли моѝ, ча́да не ѿве́ргꙋтъ ли сѧ; и҆ бы́сть и҆̀мъ во спасе́нїе ѿ всѧ́кїѧ ско́рби и҆́хъ. не хода́тай, нижѐ а҆́гг҃лъ, но са́мъ гдⷭ҇ь спасѐ и҆̀хъ: за є҆́же люби́ти и҆̀хъ, и҆ щадѣ́ти и҆̀хъ, са́мъ и҆зба́ви и҆̀хъ, и҆ воспрїѧ́тъ и҆̀хъ, и҆ вознесѐ и҆̀хъ во всѧ̀ днѝ вѣ́ка. Ис ̑̀:́о́–́̀; ̑҆:́–҆, ҃–ж҃"
 },
 {
  "type": "HEADER",
  "value": "г҃. Проро́чества заха́рїина чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: сѐ де́нь грѧде́тъ гдⷭ҇нь, и҆ ста́нꙋтъ но́зѣ є҆гѡ̀ въ де́нь ѻ҆́ный на горѣ̀ є҆леѡ́нстѣй, прѧ́мѡ і҆ерꙋсали́ма, ѿ востѡ́къ со́лнца. и҆ въ де́нь ѻ҆́ный и҆зы́детъ вода̀ жива̀ и҆з̾ і҆ерꙋсали́ма, по́лъ є҆ѧ̀ въ мо́ре пе́рвое, и҆ по́лъ є҆ѧ̀ въ мо́ре послѣ́днее: въ жа́твꙋ и҆ въ ве́снꙋ бꙋ́детъ та́кѡ. и҆ бꙋ́детъ гдⷭ҇ь цр҃ь по все́й землѝ, въ де́нь ѻ҆́ный бꙋ́детъ гдⷭ҇ь є҆ди́нъ. и҆́мѧ є҆гѡ̀ є҆ди́но, ѡ҆крꙋжа́ющее всю̀ зе́млю и҆ пꙋсты́ню, ѿ га́вы да́же до реммѡ́на, проти́вꙋ хребтꙋ̀ і҆ерꙋсали́млю: и҆ вознесе́тсѧ, и҆ на мѣ́стѣ пребꙋ́детъ, ѿ вра́тъ венїамі́новыхъ, да́же до мѣ́ста двере́й пе́рвыхъ, да́же до вра́тъ ᲂу҆го́льныхъ, и҆ да́же до столпа̀ а҆намеи́лева, да́же до подточи́лїй цр҃е́выхъ, ѡ҆бита́ютъ въ не́мъ: и҆ а҆на́ѳема не бꙋ́детъ ктомꙋ̀, и҆ всели́тсѧ і҆ерꙋсали́мъ надѣ́ѧйсѧ. Зах ́҆́:҆́, ̾–́́"
 },
 {
  "type": "HEADER",
  "value": "Недѣ́лѧ з҃-ѧ по па́сцѣ. Ст҃ы́хъ ти҃і, бг҃оно́сныхъ ѻ҆ц҃ъ, и҆̀же въ нїке́и."
 },
 {
  "type": "TEXT",
  "value": "Парємїѝ ст҃ы́хъ ѻ҆тє́цъ"
 },
 {
  "type": "HEADER",
  "value": "Недѣ́лѧ ст҃ы́ѧ пентико́стїи. а҃. Чи́слъ чте́нїе."
 },
 {
  "type": "TEXT",
  "value": "Р ечѐ гдⷭ҇ь къ мѡѷсе́ю: собери́ ми се́дмьдесѧтъ мꙋже́й ѿ ста́рєцъ і҆и҃левыхъ, и҆̀хже ты̀ са́мъ вѣ́си, ꙗ҆́кѡ ті́и сꙋ́ть ста́рцы людсті́и и҆ книгѡ́чїѧ и҆́хъ: и҆ да приведе́ши ѧ҆̀ ко ски́нїи свидѣ́нїѧ, и҆ да ста́нꙋтъ та́мѡ съ тобо́ю: и҆ сни́дꙋ и҆ возгл҃ю та́мѡ съ тобо́ю, и҆ ᲂу҆ймꙋ̀ ѿ дх҃а, и҆́же въ тебѣ̀, и҆ возложꙋ̀ на нѧ̀: да под̾и́мꙋтъ съ тобо́ю ᲂу҆стремле́нїе люді́й, и҆ не бꙋ́деши води́ти и҆̀хъ ты̀ є҆ди́нъ. и҆ и҆зы́де мѡѷсе́й и҆ глаго́ла лю́демъ словеса̀ гдⷭ҇нѧ: и҆ собра̀ се́дмьдесѧтъ мꙋже́й ѿ ста́рєцъ людски́хъ, и҆ поста́ви ѧ҆̀ ѡ҆́крестъ ски́нїи. и҆ сни́де гдⷭ҇ь во ѡ҆́блацѣ и҆ гл҃а къ немꙋ̀: и҆ ᲂу҆ѧ̀ ѿ дх҃а, и҆́же на не́мъ, и҆ возложѝ на се́дмьдесѧтъ мꙋже́й ста́рєцъ: є҆гда́ же препочѝ дх҃ъ на ни́хъ, и҆ проро́чествоваша, и҆ ктомꙋ̀ не приложи́ша. и҆ ѡ҆ста́шасѧ два̀ мꙋ̑жа въ полцѣ̀: и҆́мѧ є҆ди́номꙋ є҆лда́дъ, и҆ и҆́мѧ второ́мꙋ мѡда́дъ: и҆ препочѝ на ни́хъ дх҃ъ. и҆ сі́и бѣ́ша ѿ впи́санныхъ, и҆ не прїидо́ша ко ски́нїи, и҆ проро́чествоваша въ полцѣ̀. и҆ прите́къ ю҆́ноша возвѣстѝ мѡѷсе́ю, и҆ речѐ, глаго́лѧ: є҆лда́дъ и҆ мѡда́дъ проро́чествꙋютъ въ полцѣ́хъ. и҆ ѿвѣща́въ і҆исꙋ́съ наѵи́нъ, предстоѧ́й мѡѷсе́ю и҆збра́нный є҆мꙋ̀, речѐ: го́споди мо́й мѡѷсе́ю, запретѝ и҆̀мъ. и҆ речѐ є҆мꙋ̀ мѡѷсе́й: є҆да̀ ревнꙋ́еши ты̀ мнѣ̀; и҆ кто̀ да́стъ всѣ̑мъ лю́демъ гдⷭ҇нимъ бы́ти проро́ки, є҆гда̀ да́стъ гдⷭ҇ь дх҃а своего̀ на ни́хъ; Числ ́́:́̑–́҃, ̀҆́–̀ж҃"
 },
 {
  "type": "HEADER",
  "value": "в҃. Прⷪ҇ро́чества і҆ѡ́илева чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: ча́да сїѡ́нова ра́дꙋйтесѧ, и҆ весели́тесѧ ѡ҆ гдⷭ҇ѣ бз҃ѣ ва́шемъ: ꙗ҆́кѡ дадѐ ва́мъ бра̑шна въ пра́вдꙋ, и҆ ѡ҆дожди́тъ ва́мъ до́ждь ра́нный и҆ по́здный, ꙗ҆́коже пре́жде. и҆ напо́лнѧтсѧ гꙋ́мна пшени́цы, и҆ и҆злїю́тсѧ точи̑лїѧ вїна̀ и҆ є҆ле́а. и҆ вда́мъ ва́мъ вмѣ́стѡ лѣ́тъ и҆̀хже поѧдо́ша прꙋ́зи и҆ гꙋ́сєницы, и҆ ржа̀ и҆ хрꙋ́стове, си́ла моѧ̀ вели́каѧ, ю҆́же посла́хъ на вы̀. и҆ снѣ́сте ꙗ҆дꙋ́ще и҆ насытите́сѧ, и҆ похва́лите и҆́мѧ гдⷭ҇а бг҃а ва́шегѡ, и҆́же сотворѝ свы́ше чꙋдеса̀: и҆ не постыдѧ́тсѧ лю́дїе моѝ въ вѣ́къ. и҆ ᲂу҆вѣ́дите, ꙗ҆́кѡ посредѣ̀ і҆и҃лѧ а҆́зъ є҆́смь, и҆ а҆́зъ гдⷭ҇ь бг҃ъ ва́шъ, и҆ нѣ́сть и҆но́гѡ ра́звѣ менѐ: и҆ не постыдѧ́тсѧ ктомꙋ̀ лю́дїе моѝ въ вѣ́къ. и҆ бꙋ́детъ по си́хъ, и҆злїю̀ ѿ дх҃а моегѡ̀ на всѧ́кꙋю пло́ть, и҆ прорекꙋ́тъ сы́нове ва́ши и҆ дщє́ри ва́шѧ, и҆ ста́рцы ва́ши сѡ́нїѧ ви́дѧтъ, и҆ ю҆́нѡши ва́ши видѣ̑нїѧ ᲂу҆́зрѧтъ. и҆́бо на рабы̀ моѧ̀, и҆ на рабы̑ни моѧ̀ во днѝ ѻ҆́ны и҆злїю̀ ѿ дх҃а моегѡ̀, и҆ прорекꙋ́тъ. и҆ да́мъ чꙋдеса̀ на небесѝ горѣ̀, и҆ зна́мєнїѧ на землѝ ни́зꙋ, кро́вь и҆ ѻ҆́гнь, и҆ кꙋре́нїе ды́ма. со́лнце преложи́тсѧ во тмꙋ̀, и҆ лꙋна̀ въ кро́вь, пре́жде прише́ствїѧ днѐ гдⷭ҇нѧ вели́кагѡ и҆ стра́шнагѡ. и҆ бꙋ́детъ всѧ́къ, и҆́же а҆́ще призове́тъ и҆́мѧ гдⷭ҇не, спасе́тсѧ. Иоил ̀:̀҆–҆̀А"
 },
 {
  "type": "HEADER",
  "value": "г҃. Прⷪ҇ро́чества і҆езекїи́лева чте́нїе."
 },
 {
  "type": "TEXT",
  "value": "Т а́кѡ глаго́летъ гдⷭ҇ь: прїимꙋ̀ ва́съ ѿ ꙗ҆зы̑къ, и҆ соберꙋ̀ вы̀ ѿ всѣ́хъ ꙗ҆зы̑къ стра́нныхъ, и҆ введꙋ̀ вы̀ въ зе́млю ва́шꙋ, и҆ ѡ҆кроплю̀ на вы̀ чи́стꙋю во́дꙋ, и҆ ѡ҆чи́ститесѧ ѿ всѣ́хъ нечисто́тъ ва́шихъ, и҆ ѿ всѣ́хъ і҆́дѡлъ ва́шихъ, и҆ ѡ҆чи́щꙋ вы̀. и҆ да́мъ ва́мъ се́рдце но́вое, и҆ дꙋ́хъ но́вый да́мъ ва́мъ, и҆ ѿимꙋ̀ се́рдце ка́менное ѿ пло́ти ва́шеѧ, и҆ да́мъ ва́мъ се́рдце плотѧно́е, и҆ дꙋ́хъ мо́й да́мъ въ ва́съ: и҆ сотворю̀, да во ѡ҆правда́нїихъ мои́хъ хо́дите, и҆ сꙋдьбы̑ моѧ̀ сохранитѐ, и҆ сотворитѐ. и҆ вселите́сѧ въ зе́млю, ю҆́же да́хъ ѻ҆ц҃є́мъ ва́шымъ, и҆ бꙋ́дете мѝ въ лю́ди, и҆ а҆́зъ бꙋ́дꙋ ва́мъ въ бг҃а. Иез ҆̑:̀҆́–̀̾"
 },
 {
  "type": "HEADER",
  "value": "Недѣ́лѧ а҃-ѧ по пѧтдесѧ́тницѣ. Всѣ́хъ ст҃ы́хъ."
 },
 {
  "type": "TEXT",
  "value": "Парємїѝ мч҃нкѡмъ"
 },
 {
  "type": "HEADER",
  "value": "Недѣ́лѧ в҃-ѧ по пѧтдесѧ́тницѣ. Всѣ́хъ ст҃ы́хъ въ землѝ рѡссі́йстей просїѧ́вшихъ. а҃. Прⷪ҇ро́чества и҆са́їина чте́нїе."
 },
 {
  "type": "TEXT",
  "value": "Т а́кѡ гл҃го́летъ гдⷭ҇ь: во вре́мѧ прїѧ́тное послꙋ́шахъ тѧ̀ и҆ въ де́нь спасе́нїѧ помого́хъ тебѣ̀: и҆ созда́хъ тѧ̀, и҆ да́хъ тѧ̀ въ завѣ́тъ ꙗ҆зы́кѡвъ, є҆́же ᲂу҆стро́ити зе́млю, и҆ наслѣ́дити наслѣ́дїе пꙋсты́ни: гл҃го́люща сꙋ́щымъ во ᲂу҆́захъ: и҆зыди́те: и҆ сꙋ́щымъ во тмѣ̀: ѿкры́йтесѧ. на всѣ́хъ пꙋте́хъ пасти́сѧ бꙋ́дꙋтъ, и҆ на всѣ́хъ стезѧ́хъ па́жить и҆́хъ. не вза́лчꙋтъ, нижѐ вжа́ждꙋтъ, нижѐ порази́тъ и҆̀хъ зно́й, нижѐ со́лнце: но ми́лꙋѧй и҆̀хъ ᲂу҆тѣ́шитъ ѧ҆̀, и҆ сквозѣ̀ и҆сто́чники во́дъ проведе́тъ ѧ҆̀. и҆ положꙋ̀ всѧ́кꙋю го́рꙋ въ пꙋ́ть, и҆ всѧ́кꙋю стезю̀ въ па́ствꙋ и҆́хъ. сѐ сі́и и҆здале́ча прїи́дꙋтъ, сі́и ѿ сѣ́вера и҆ мо́рѧ, и҆ні́и же ѿ землѝ пе́рсскїѧ. да веселѧ́тсѧ нб҃са̀, и҆ ра́дꙋетсѧ землѧ̀: да ѿры́гнꙋтъ го́ры весе́лїе, и҆ хо́лми пра́вдꙋ, ꙗ҆́кѡ поми́лова бг҃ъ лю́ди своѧ̑, и҆ смирє́нныѧ люде́й ᲂу҆тѣ́ши. рече́ же сїѡ́нъ: ѡ҆ста́ви мѧ̀ гдⷭ҇ь, и҆ бг҃ъ забы́ мѧ. є҆да̀ забꙋ́детъ жена̀ ѻ҆троча̀ своѐ; и҆лѝ не поми́лꙋетъ и҆сча́дїѧ чре́ва своегѡ̀; а҆́ще ли же и҆ си́хъ забꙋ́детъ жена̀, но а҆́зъ не забꙋ́дꙋ тебє̀, гл҃го́летъ гдⷭ҇ь. Ис ҆́ж҃:̾–́҆̀"
 },
 {
  "type": "HEADER",
  "value": "в҃. Премꙋ́дрости сїра́ха чте́нїе."
 },
 {
  "type": "TEXT",
  "value": "В осхва́лимъ ᲂу҆́бѡ мꙋ́жы сла̑вны и҆ ѻ҆тцы̀ на́шѧ въ бытїѝ. мно́гꙋ сла́вꙋ созда̀ гдⷭ҇ь въ ни́хъ вели́чїемъ свои́мъ ѿ вѣ́ка. госпо́дствꙋюще во ца́рствїихъ свои́хъ и҆ мꙋ́жїе и҆мени́ти си́лою, совѣ́тꙋюще ра́зꙋмомъ свои́мъ, провѣща́вшїи во прⷪ҇ро́чествахъ, старѣ̑йшины люді́й въ совѣ́тѣхъ и҆ въ ра́зꙋмѣ писа̑нїѧ люді́й: премꙋ̑драѧ словеса̀ въ наказа́нїи и҆́хъ, и҆́щꙋще гла́са мꙋсїкі́йска и҆ повѣ́дающе пѡ́вѣсти во писа́нїихъ: мꙋ́жїе бога́тїи, ѡ҆бдарова́ни крѣ́постїю, ми́рнѡ живꙋ́ще въ жили́щихъ свои́хъ. всѝ сі́и въ ро́дѣхъ просла́влени бы́ша, и҆ во дне́хъ и҆́хъ похвала̀. сꙋ́ть ѿ ни́хъ, и҆́же ѡ҆ста́виша и҆́мѧ, є҆́же повѣ́дати хвалы̑: и҆ сꙋ́ть, и҆́хже нѣ́сть па́мѧти, и҆ погибо́ша ꙗ҆́кѡ не сꙋ́щїи, и҆ бы́ша ꙗ҆́кѡ не бы́вше, и҆ ча̑да и҆́хъ по ни́хъ. но сі́и мꙋ́жїе ми́лостивїи, и҆́хже пра̑вды не забвє́ны бы́ша: съ сѣ́менемъ и҆́хъ пребꙋ́детъ до́брое наслѣ́дїе, и҆зча̑дїѧ и҆́хъ въ завѣ́тѣхъ: ѡ҆ста́сѧ сѣ́мѧ и҆́хъ, и҆ ча̑да и҆́хъ по ни́хъ: до вѣ́ка пребꙋ́детъ сѣ́мѧ и҆́хъ, и҆ сла́ва и҆́хъ не потреби́тсѧ: тѣлеса̀ и҆́хъ въ ми́рѣ погребє́на бы́ша, а҆ и҆мена̀ и҆́хъ живꙋ́тъ въ ро́ды. премꙋ́дрость и҆́хъ повѣ́дѧтъ лю́дїе, и҆ похвалꙋ̀ и҆́хъ и҆сповѣ́сть цр҃ковь. Сир ҆́҆́:́–́҆́"
 },
 {
  "type": "HEADER",
  "value": "г҃. Премꙋ́дрости соломѡ́ни чте́нїе."
 },
 {
  "type": "TEXT",
  "value": "П ра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. и҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. и҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ: сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀. ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀. Прем ҆:́–ж҃"
 }
]