[
 {
  "type": "HEADER",
  "value": "Сказа́нїе часѡ́въ ст҃а́гѡ и҆ вели́кагѡ пѧтка̀, творе́нїе кѷрі́лла, а҆рхїепі́скопа а҆леѯандрі́йскагѡ. Ча́съ пе́рвый."
 },
 {
  "type": "TEXT",
  "value": "Ѡ҆ второ́мъ часѣ̀ днѐ зна́менꙋетъ въ кампа́нъ. И҆ собра́вшымсѧ во хра́мъ, ѡ҆блачи́тсѧ і҆ере́й въ фелѡ́нь, дїа́конъ же въ стїха́рь. И҆ поставлѧ́етъ параекклисїа́рхъ а҆нало́гїй ᲂу҆кра́шенъ прѧ́мѡ ца́рскихъ вра́тъ, и҆ вжига́етъ свѣщꙋ̀ на свѣ́щницѣ. І҆ере́й же и҆схо́дитъ со є҆ѵⷢ҇лїемъ во хра́мъ, и҆лѝ въ трапе́зꙋ, ца́рскими враты̀, предходѧ́щꙋ є҆мꙋ̀ дїа́конꙋ съ кади́ломъ. И҆ полага́етъ і҆ере́й ст҃о́е є҆ѵⷢ҇лїе на а҆нало́гїи, и҆ ста́въ предъ а҆нало́гомъ, твори́тъ нача́ло по ѻ҆бы́чаю. И҆ по возгла́сѣ кади́тъ свѧще́нникъ ст҃о́е є҆ѵⷢ҇лїе на а҆нало́гїи ѻ҆́крестъ: и҆ про́чыѧ і҆кѡ́ны, и҆ хра́мъ ве́сь, и҆ настоѧ́телѧ, и҆ бра́тїю."
 },
 {
  "type": "TEXT",
  "value": "Дїа́конъ: Благословѝ, влⷣко."
 },
 {
  "type": "TEXT",
  "value": "Сщ҃е́нникъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ."
 },
 {
  "type": "TEXT",
  "value": "Чте́цъ: А҆ми́нь. С ла́ва тебѣ̀ бж҃е на́шъ, сла́ва тебѣ̀."
 },
 {
  "type": "TEXT",
  "value": "Ц р҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ бл҃же, дꙋ́шы на́шѧ."
 },
 {
  "type": "TEXT",
  "value": "С т҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "П рест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Ѻ҆́ ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "TEXT",
  "value": "Та́же, Гдⷭ҇и поми́лꙋй, в҃і."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "П рїиди́те, поклони́мсѧ цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ."
 },
 {
  "type": "TEXT",
  "value": "И҆ глаго́лемъ ѱалмы̀ сїѧ̑, ꙗ҆̀же здѣ̀ и҆з̾ѧвлѧ́ютсѧ."
 },
 {
  "type": "HEADER",
  "value": "Ѱало́мъ є҃."
 },
 {
  "type": "TEXT",
  "value": "Г лаго́лы моѧ̑ внꙋшѝ гдⷭ҇и, разꙋмѣ́й зва́нїе моѐ. вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й, ꙗ҆́кѡ къ тебѣ̀ помолю́сѧ гдⷭ҇и. заꙋ́тра ᲂу҆слы́ши гла́съ мо́й, заꙋ́тра предста́нꙋ тѝ, и҆ ᲂу҆́зриши мѧ̀. ꙗ҆́кѡ бг҃ъ не хотѧ́й беззако́нїѧ, ты̀ є҆сѝ: не присели́тсѧ къ тебѣ̀ лꙋка́внꙋѧй, нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма. возненави́дѣлъ є҆сѝ всѧ̑ дѣ́лающыѧ беззако́нїе, погꙋби́ши всѧ̑ глаго́лющыѧ лжꙋ̀: мꙋ́жа крове́й и҆ льсти́ва гнꙋша́етсѧ гдⷭ҇ь. а҆́зъ же мно́жествомъ млⷭ҇ти твоеѧ̀, вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀ въ стра́сѣ твое́мъ. гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й. ꙗ҆́кѡ нѣ́сть во ᲂу҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ. сꙋдѝ и҆̀мъ бж҃е, да ѿпадꙋ́тъ ѿ мы́слей свои́хъ: по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀, гдⷭ҇и. и҆ да возвеселѧ́тсѧ всѝ ᲂу҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ: и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. ꙗ҆́кѡ ты̀ бл҃гослови́ши пра́ведника гдⷭ҇и, ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ."
 },
 {
  "type": "HEADER",
  "value": "Ѱало́мъ в҃."
 },
 {
  "type": "TEXT",
  "value": "В скꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ; предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀: расто́ргнемъ ᲂу҆́зы и҆́хъ, и҆ ѿве́ржемъ ѿ на́съ и҆́го и҆́хъ. живы́й на нб҃сѣ́хъ посмѣе́тсѧ и҆̀мъ, и҆ гдⷭ҇ь порꙋга́етсѧ и҆̀мъ. тогда̀ возглаго́летъ къ ни̑мъ гнѣ́вомъ свои́мъ, и҆ ꙗ҆́ростїю свое́ю смѧте́тъ ѧ҆̀. а҆́зъ же поста́вленъ є҆́смь цр҃ь ѿ негѡ̀ над̾ сїѡ́номъ горо́ю ст҃о́ю є҆гѡ̀, возвѣща́ѧй повелѣ́нїе гдⷭ҇не. гдⷭ҇ь речѐ ко мнѣ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀. просѝ ѿ менѐ, и҆ да́мъ тѝ ꙗ҆зы́ки достоѧ́нїе твоѐ, и҆ ѡ҆держа́нїе твоѐ концы̀ землѝ. ᲂу҆пасе́ши ѧ҆̀ жезло́мъ желѣ́знымъ, ꙗ҆́кѡ сосꙋ́ды скꙋде́льничи сокрꙋши́ши ѧ҆̀. и҆ ны́нѣ ца́рїе разꙋмѣ́йте, накажи́тесѧ всѝ сꙋдѧ́щїи землѝ. рабо́тайте гдⷭ҇ви со стра́хомъ, и҆ ра́дꙋйтесѧ є҆мꙋ̀ съ тре́петомъ. прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ пра́веднагѡ, є҆гда̀ возгори́тсѧ вско́рѣ ꙗ҆́рость є҆гѡ̀. бл҃же́ни всѝ надѣ́ющїисѧ на́нь."
 },
 {
  "type": "HEADER",
  "value": "Ѱало́мъ к҃а."
 },
 {
  "type": "TEXT",
  "value": "Б ж҃е бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ. бж҃е мо́й, воззовꙋ̀ во днѝ, и҆ не ᲂу҆слы́шиши, и҆ въ нощѝ, и҆ не въ безꙋ́мїе мнѣ̀. ты́ же во ст҃ѣ́мъ живе́ши, хвало̀ і҆и҃лева. на тѧ̀ ᲂу҆пова́ша ѻ҆тцы̀ на́ши, ᲂу҆пова́ша, и҆ и҆зба́вилъ є҆сѝ ѧ҆̀. къ тебѣ̀ воззва́ша, и҆ сп҃со́шасѧ: на тѧ̀ ᲂу҆пова́ша, и҆ не постыдѣ́шасѧ. а҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ, и҆ ᲂу҆ничиже́нїе люде́й. всѝ ви́дѧщїи мѧ̀ порꙋга́ша ми сѧ, глаго́лаша ᲂу҆стна́ми, покива́ша главо́ю. ᲂу҆пова̀ на гдⷭ҇а, да и҆зба́витъ є҆го̀, да сп҃се́тъ є҆го̀, ꙗ҆́кѡ хо́щетъ є҆го̀. ꙗ҆́кѡ ты̀ є҆сѝ и҆сто́ргїй мѧ̀ и҆з̾ чре́ва: ᲂу҆пова́нїе моѐ ѿ сосцꙋ̀ ма́тере моеѧ̀. къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀, бг҃ъ мо́й є҆сѝ ты̀. да не ѿстꙋ́пиши ѿ менѐ: ꙗ҆́кѡ ско́рбь бли́зъ, ꙗ҆́кѡ нѣ́сть помога́ѧй мѝ. ѡ҆быдо́ша мѧ̀ тельцы̀ мно́зи, ю҆нцы̀ тꙋ́чнїи ѡ҆держа́ша мѧ̀. ѿверзо́ша на мѧ̀ ᲂу҆ста̀ своѧ̑, ꙗ҆́кѡ ле́въ восхища́ѧй и҆ рыка́ѧй. ꙗ҆́кѡ вода̀ и҆злїѧ́хсѧ, и҆ разсы́пашасѧ всѧ̑ кѡ́сти моѧ̑: бы́сть се́рдце моѐ, ꙗ҆́кѡ во́скъ та́ѧй посредѣ̀ чре́ва моегѡ̀. и҆́зсше ꙗ҆́кѡ скꙋде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемꙋ̀, и҆ въ пе́рсть сме́рти све́лъ мѧ̀ є҆сѝ. ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀: и҆скопа́ша рꙋ́цѣ моѝ и҆ но́зѣ моѝ. и҆счето́ша всѧ̑ кѡ́сти моѧ̑, ті́и же смотри́ша, и҆ презрѣ́ша мѧ̀. раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй. ты́ же гдⷭ҇и, не ᲂу҆далѝ по́мощь твою̀ ѿ менѐ, на застꙋпле́нїе моѐ вонмѝ. и҆зба́ви ѿ ѻ҆рꙋ́жїѧ дꙋ́шꙋ мою̀, и҆ и҆з̾ рꙋкѝ пе́сїи є҆диноро́днꙋю мою̀. сп҃си́ мѧ ѿ ᲂу҆́стъ льво́выхъ, и҆ ѿ рѡ́гъ є҆диноро́жь смире́нїе моѐ. повѣ́мъ и҆́мѧ твоѐ бра́тїи мое́й, посредѣ̀ цр҃кве воспою́ тѧ. боѧ́щїисѧ гдⷭ҇а восхвали́те є҆го̀, всѐ сѣ́мѧ і҆а́кѡвле просла́вите є҆го̀. да ᲂу҆бои́тсѧ же ѿ негѡ̀ всѐ сѣ́мѧ і҆и҃лево: ꙗ҆́кѡ не ᲂу҆ничижѝ, нижѐ негодова̀ мл҃твы ни́щагѡ, нижѐ ѿвратѝ лицѐ своѐ ѿ менѐ: и҆ є҆гда̀ воззва́хъ къ немꙋ̀, ᲂу҆слы́ша мѧ̀. ѿ тебѐ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: мл҃твы моѧ̑ возда́мъ пред̾ боѧ́щимисѧ є҆гѡ̀. ꙗ҆дѧ́тъ ᲂу҆бо́зїи, и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀, жива̀ бꙋ́дꙋтъ сердца̀ и҆́хъ въ вѣ́къ вѣ́ка. помѧнꙋ́тсѧ и҆ ѡ҆братѧ́тсѧ ко гдⷭ҇ꙋ всѝ концы̀ землѝ, и҆ покло́нѧтсѧ пред̾ ни́мъ всѧ̑ ѻ҆те́чєствїѧ ꙗ҆зы̑къ. ꙗ҆́кѡ гдⷭ҇не є҆́сть црⷭ҇твїе, и҆ то́й ѡ҆блада́етъ ꙗ҆зы́ки. ꙗ҆до́ша и҆ поклони́шасѧ всѝ тꙋ́чнїи землѝ: пред̾ ни́мъ припадꙋ́тъ всѝ низходѧ́щїи въ зе́млю: и҆ дꙋша̀ моѧ̀ томꙋ̀ живе́тъ. и҆ сѣ́мѧ моѐ порабо́таетъ є҆мꙋ̀: возвѣсти́тъ гдⷭ҇ви ро́дъ грѧдꙋ́щїй. и҆ возвѣстѧ́тъ пра́вдꙋ є҆гѡ̀ лю́демъ ро́ждшымсѧ, ꙗ҆̀же сотворѝ гдⷭ҇ь."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "А҆ ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "HEADER",
  "value": "Тропа́рь, гла́съ а҃:"
 },
 {
  "type": "TEXT",
  "value": "Р аспе́ншꙋсѧ тебѣ̀ хрⷭ҇тѐ, поги́бе мꙋчи́тельство, / попра́на бы́сть си́ла вра́жїѧ: / ниже́ бо а҆́гг҃лъ, нижѐ человѣ́къ, / но са́мъ гдⷭ҇и сп҃слъ є҆сѝ на́съ, сла́ва тебѣ̀."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "Бг҃оро́диченъ: Что́ тѧ нарече́мъ, ѽ бл҃года́тнаѧ; / нб҃о, ꙗ҆́кѡ возсїѧ́ла є҆сѝ сл҃нце пра́вды: / ра́й, ꙗ҆́кѡ прозѧбла̀ є҆сѝ цвѣ́тъ нетлѣ́нїѧ: / дв҃ꙋ, ꙗ҆́кѡ пребыла̀ є҆сѝ нетлѣ́нна: / чи́стꙋю мт҃рь, ꙗ҆́кѡ и҆мѣ́ла є҆сѝ на ст҃ы́хъ твои́хъ ѡ҆б̾ѧ́тїѧхъ сн҃а, всѣ́хъ бг҃а. / того̀ молѝ сп҃сти́сѧ дꙋша́мъ на́шымъ."
 },
 {
  "type": "TEXT",
  "value": "Та́же пое́мъ тропарѝ трѝ ѿ двꙋна́десѧти, повторѧ́юще ѧ҆̀. глаго́лемъ же пе́рвый без̾ стїха̀, та́кѡ бо твори́мъ и҆ въ про́чихъ часѣ́хъ въ пе́рвый тропа́рь. Во вторы́й же, глаго́летъ наче́ншїй ли́къ сті́хъ, и҆ пое́тъ и҆̀. та́же па́ки дрꙋгі́й ли́къ сті́хъ, и҆ пое́тъ и҆ то́й и҆̀. тре́тїй же глаго́лемъ на Сла́ва, и҆ на И҆ ны́нѣ."
 },
 {
  "type": "HEADER",
  "value": "Стїхи́ра самогла́сна пе́рвагѡ часа̀, гла́съ и҃:"
 },
 {
  "type": "TEXT",
  "value": "Д не́сь цр҃ко́внаѧ завѣ́са, / на ѡ҆бличе́нїе беззако́нныхъ раздира́етсѧ, / и҆ со́лнце лꙋчы̀ своѧ̑ скрыва́етъ, / влⷣкꙋ зрѧ̀ распина́ема."
 },
 {
  "type": "TEXT",
  "value": "И҆ па́ки тꙋ́юже дрꙋгі́й ли́къ."
 },
 {
  "type": "TEXT",
  "value": "Та́же глаго́летъ сті́хъ пе́рвый ли́къ: Вскꙋ́ю шата́шасѧ ꙗ҆зы́цы и҆ лю́дїе поꙋчи́шасѧ тщє́тнымъ;"
 },
 {
  "type": "TEXT",
  "value": "И҆ пое́мъ настоѧ́щїй тропа́рь: Ꙗ҆́кѡ ѻ҆вча̀ на заколе́нїе / веде́нъ бы́лъ є҆сѝ хрⷭ҇тѐ цр҃ю̀, / и҆ ꙗ҆́кѡ а҆́гнецъ неѕло́бивый / пригвозди́лсѧ є҆сѝ крⷭ҇тꙋ̀, ѿ беззако́нныхъ мꙋже́й, / грѣ̑хъ ра́ди на́шихъ чл҃вѣколю́бче."
 },
 {
  "type": "TEXT",
  "value": "Сті́хъ: Предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀."
 },
 {
  "type": "TEXT",
  "value": "И҆ пое́тъ па́ки и҆ дрꙋгі́й ли́къ то́йже сті́хъ."
 },
 {
  "type": "TEXT",
  "value": "Та́же пе́рвый ли́къ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Є҆́ мшымъ тѧ̀ беззакѡ́ннымъ, / претерпѣва́ѧ, си́це вопїѧ́лъ є҆сѝ гдⷭ҇и: / а҆́ще и҆ порази́сте па́стырѧ, / и҆ расточи́сте двана́десѧть ѻ҆ве́цъ ᲂу҆ч҃нкѝ моѧ̑, / можа́хъ вѧ́щши, не́жели двана́десѧте легео́нѡвъ предста́вити а҆́гг҃лѡвъ. / но долготерплю̀, да и҆спо́лнѧтсѧ, / ꙗ҆̀же ꙗ҆ви́хъ ва́мъ прⷪ҇ро́ки мои́ми, / безвѣ̑стнаѧ и҆ та̑йнаѧ: / гдⷭ҇и сла́ва тебѣ̀."
 },
 {
  "type": "TEXT",
  "value": "И҆ ны́нѣ, па́ки то́йже."
 },
 {
  "type": "TEXT",
  "value": "Дїа́конъ: Премꙋ́дрость. Во́нмемъ."
 },
 {
  "type": "TEXT",
  "value": "И҆ чте́цъ: Прокі́менъ прⷪ҇ро́чества, гла́съ д҃: Се́рдце є҆гѡ̀ / собра̀ беззако́нїе себѣ̀. Сті́хъ: Бл҃же́нъ разꙋмѣва́ѧй на ни́ща и҆ ᲂу҆бо́га."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Прⷪ҇ро́чества заха́рїина чте́нїе. [Глава̀ а҃і, ст. і҃-г҃і.]"
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "TEXT",
  "value": "Чте́цъ: Та́кѡ глаго́летъ гдⷭ҇ь: прїимѝ же́злъ мо́й до́брый, и҆ ѿве́ргꙋ є҆го̀, є҆́же разори́ти завѣ́тъ мо́й, є҆го́же завѣща́хъ ко всѣ̑мъ лю́демъ: и҆ разори́тсѧ въ де́нь ѻ҆́ный, и҆ ᲂу҆разꙋмѣ́ютъ ханане́и ѻ҆́вцы храни̑мыѧ мнѣ̀, занѐ сло́во гдⷭ҇не є҆́сть. и҆ рекꙋ̀ къ ни̑мъ: а҆́ще добро̀ пред̾ ва́ми є҆́сть, дади́те мздꙋ̀ мою̀, и҆лѝ ѿрецы́тесѧ: и҆ поста́виша мздꙋ̀ мою̀ три́десѧть сре́брєникъ. и҆ речѐ гдⷭ҇ь ко мнѣ̀: вложѝ ѧ҆̀ въ горни́ло, и҆ смотрѝ а҆́ще и҆скꙋше́но є҆́сть, и҆́мже ѡ҆́бразомъ и҆скꙋше́нъ бы́хъ ѡ҆ ни́хъ. и҆ прїѧ́хъ три́десѧть сре́брєникъ, и҆ вложи́хъ и҆́хъ въ хра́мъ гдⷭ҇нь въ горни́ло."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Къ гала́тѡмъ посла́нїѧ ст҃а́гѡ а҆пⷭ҇ла па́ѵла чте́нїе."
 },
 {
  "type": "TEXT",
  "value": "И҆ па́ки дїа́конъ: Во́нмемъ."
 },
 {
  "type": "HEADER",
  "value": "Та́же а҆по́столъ, зача́ло сє҃і, ѿ полꙋ̀."
 },
 {
  "type": "TEXT",
  "value": "Чте́цъ: Бра́тїе, мнѣ̀ да не бꙋ́детъ хвали́тисѧ, то́кмѡ ѡ҆ крⷭ҇тѣ̀ гдⷭ҇а на́шегѡ і҆и҃са хрⷭ҇та̀, и҆́мже мнѣ̀ мі́ръ распѧ́сѧ, и҆ а҆́зъ мі́рꙋ. ѡ҆ хрⷭ҇тѣ́ бо і҆и҃сѣ, ни ѡ҆брѣ́занїе что̀ мо́жетъ, ни неѡбрѣ́занїе, но нова̀ тва́рь. и҆ є҆ли́цы пра́виломъ си́мъ жи́тельствꙋютъ, ми́ръ на ни́хъ и҆ млⷭ҇ть, и҆ на і҆и҃ли бж҃їи. про́чее, трꙋды̀ да никто́же мѝ дае́тъ: а҆́зъ бо ꙗ҆́звы гдⷭ҇а і҆и҃са на тѣ́лѣ мое́мъ ношꙋ̀. бл҃года́ть гдⷭ҇а на́шегѡ і҆и҃са хрⷭ҇та̀, со дх҃омъ ва́шимъ бра́тїе. а҆ми́нь."
 },
 {
  "type": "TEXT",
  "value": "Сщ҃е́нникъ: Ми́ръ тѝ."
 },
 {
  "type": "TEXT",
  "value": "И҆ чте́цъ: И҆ дх҃ови твоемꙋ̀."
 },
 {
  "type": "TEXT",
  "value": "Дїа́конъ: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа."
 },
 {
  "type": "TEXT",
  "value": "Сщ҃е́нникъ: Ми́ръ всѣ̑мъ."
 },
 {
  "type": "TEXT",
  "value": "Ли́къ: И҆ дх҃ови твоемꙋ̀."
 },
 {
  "type": "TEXT",
  "value": "Сщ҃е́нникъ: Ѿ матѳе́а ст҃а́гѡ є҆ѵⷢ҇лїа чте́нїе."
 },
 {
  "type": "TEXT",
  "value": "Ли́къ: Сла́ва тебѣ̀ гдⷭ҇и, сла́ва тебѣ̀."
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "HEADER",
  "value": "Та́же є҆ѵⷢ҇лїе ѿ матѳе́а, зача́ло р҃і."
 },
 {
  "type": "TEXT",
  "value": "В о вре́мѧ ѻ҆́но, ᲂу҆́трꙋ бы́вшꙋ, совѣ́тъ сотвори́ша всѝ а҆рхїере́є и҆ ста́рцы людсті́и на і҆и҃са, ꙗ҆́кѡ ᲂу҆би́ти є҆го̀. и҆ свѧза́вше є҆го̀ ведо́ша, и҆ преда́ша є҆го̀ понті́йскомꙋ пїла́тꙋ и҆ге́мѡнꙋ. тогда̀ ви́дѣвъ і҆ꙋ́да преда́вый є҆го̀, ꙗ҆́кѡ ѡ҆сꙋди́ша є҆го̀, раска́ѧвсѧ возвратѝ три́десѧть сре́бреники а҆рхїере́ємъ и҆ ста́рцємъ, глаго́лѧ: согрѣши́хъ, преда́въ кро́вь непови́ннꙋю. ѻ҆ни́ же рѣ́ша: что̀ є҆́сть на́мъ; ты̀ ᲂу҆́зриши. и҆ пове́ргъ сре́бреники въ цр҃кви, ѿи́де, и҆ ше́дъ ᲂу҆дави́сѧ. а҆рхїере́є же прїе́мше сре́бреники, рѣ́ша: недосто́йно є҆́сть вложи́ти и҆̀хъ въ корва́нꙋ, поне́же цѣна̀ кро́ве є҆́сть. совѣ́тъ же сотво́рше, кꙋпи́ша и҆́ми село̀ скꙋде́льниче, въ погреба́нїе стра̑ннымъ. тѣ́мже нарече́сѧ село̀ то̀, село̀ кро́ве, до сегѡ̀ днѐ. тогда̀ сбы́стсѧ рече́нное і҆еремі́емъ проро́комъ, глаго́лющимъ: и҆ прїѧ́ша три́десѧть сре́брєникъ, цѣ́нꙋ цѣне́ннаго, є҆го́же цѣни́ша ѿ сынѡ́въ і҆и҃лєвъ: и҆ да́ша ѧ҆̀ на селѣ̀ скꙋде́льничи, ꙗ҆́коже сказа̀ мнѣ̀ гдⷭ҇ь. і҆и҃съ же ста̀ пред̾ и҆ге́мѡномъ, и҆ вопросѝ є҆го̀ и҆ге́мѡнъ, глаго́лѧ: ты́ ли є҆сѝ цр҃ь і҆ꙋде́йскїй; і҆и҃съ же речѐ є҆мꙋ̀: ты̀ глаго́леши. и҆ є҆гда̀ на́нь глаго́лахꙋ а҆рхїере́є и҆ ста́рцы, ничесѡ́же ѿвѣщава́ше. тогда̀ глаго́ла є҆мꙋ̀ пїла́тъ: не слы́шиши ли, коли́кѡ на тѧ̀ свидѣ́тельствꙋютъ; и҆ не ѿвѣща̀ є҆мꙋ̀ ни къ є҆ди́номꙋ глаго́лꙋ: ꙗ҆́кѡ диви́тисѧ и҆ге́мѡнꙋ ѕѣлѡ̀. на всѧ́къ же пра́здникъ ѻ҆бы́чай бѣ̀ и҆ге́мѡнꙋ ѿпꙋща́ти є҆ди́наго наро́дꙋ свѧ́знѧ, є҆го́же хотѧ́хꙋ. и҆мѧ́хꙋ же тогда̀ свѧ́зана наро́чита, глаго́лемаго вара́ввꙋ. сѡ́браннымъ же и҆̀мъ, речѐ и҆̀мъ пїла́тъ: кого̀ хо́щете ѿ ѻ҆бою̀ ѿпꙋщꙋ̀ ва́мъ, вара́ввꙋ ли, и҆лѝ і҆и҃са глаго́лемаго хрⷭ҇та̀; вѣ́дѧше бо, ꙗ҆́кѡ за́висти ра́ди преда́ша є҆го̀. сѣдѧ́щꙋ же є҆мꙋ̀ на сꙋди́щи, посла̀ къ немꙋ̀ жена̀ є҆гѡ̀, глаго́лющи: ничто́же тебѣ̀, и҆ пра́ведникꙋ томꙋ̀, мно́гѡ бо пострада́хъ дне́сь во снѣ̀ є҆гѡ̀ ра́ди. а҆рхїере́є же и҆ ста́рцы наꙋсти́ша наро́ды, да и҆спро́сѧтъ вара́ввꙋ: і҆и҃са же погꙋбѧ́тъ. ѿвѣща́въ же и҆ге́мѡнъ, речѐ и҆̀мъ: кого̀ хо́щете ѿ ѻ҆бою̀ ѿпꙋщꙋ̀ ва́мъ; ѻ҆ни́ же рѣ́ша: вара́ввꙋ. глаго́ла и҆̀мъ пїла́тъ: что̀ ᲂу҆́бѡ сотворю̀ і҆и҃сꙋ, глаго́лемомꙋ хрⷭ҇тꙋ̀; глаго́лаша є҆мꙋ̀ всѝ: да ра́спѧтъ бꙋ́детъ. и҆ге́мѡнъ же речѐ: ко́е ᲂу҆́бѡ ѕло̀ сотворѝ; ѻ҆ни́ же и҆́злиха вопїѧ́хꙋ, глаго́люще: да про́пѧтъ бꙋ́детъ. ви́дѣвъ же пїла́тъ, ꙗ҆́кѡ ничто́же ᲂу҆спѣва́етъ, но па́че молва̀ быва́етъ, прїе́мъ во́дꙋ, ᲂу҆мы̀ рꙋ́цѣ пред̾ наро́домъ, глаго́лѧ: непови́ненъ є҆́смь ѿ кро́ве пра́веднагѡ сегѡ̀, вы̀ ᲂу҆́зрите. и҆ ѿвѣща́вше всѝ лю́дїе, рѣ́ша: кро́вь є҆гѡ̀ на на́съ, и҆ на ча́дѣхъ на́шихъ. тогда̀ ѿпꙋстѝ и҆̀мъ вара́ввꙋ: і҆и҃са же би́въ, предадѐ и҆̀мъ, да є҆го̀ про́пнꙋтъ. тогда̀ во́ини и҆ге́мѡновы прїе́мше і҆и҃са на сꙋди́ще, собра́ша на́нь всѐ мно́жество вѡ́инъ. и҆ совле́кше є҆го̀, ѡ҆дѣ́ѧша є҆го̀ хламѵ́дою червле́ною. и҆ спле́тше вѣне́цъ ѿ те́рнїѧ, возложи́ша на главꙋ̀ є҆гѡ̀, и҆ тро́сть въ десни́цꙋ є҆гѡ̀: и҆ покло́ньшесѧ на колѣ̑нꙋ пред̾ ни́мъ, рꙋга́хꙋсѧ є҆мꙋ̀, глаго́люще: ра́дꙋйсѧ цр҃ю̀ і҆ꙋде́йскїй. и҆ плю́нꙋвше на́нь, прїѧ́ша тро́сть, и҆ бїѧ́хꙋ по главѣ̀ є҆гѡ̀. и҆ є҆гда̀ порꙋга́шасѧ є҆мꙋ̀, совлеко́ша съ негѡ̀ багрѧни́цꙋ: и҆ ѡ҆блеко́ша є҆го̀ въ ри̑зы є҆гѡ̀, и҆ ведо́ша є҆го̀ на пропѧ́тїе. и҆сходѧ́ще же ѡ҆брѣто́ша человѣ́ка кѷрине́йска, и҆́менемъ сі́мѡна: и҆ семꙋ̀ задѣ́ша понестѝ крⷭ҇тъ є҆гѡ̀. и҆ прише́дше на мѣ́сто нарица́емое голго́ѳа, є҆́же є҆́сть глаго́лемо кра́нїево мѣ́сто: да́ша є҆мꙋ̀ пи́ти ѻ҆́цетъ съ же́лчїю смѣ́шенъ, и҆ вкꙋ́шъ не хотѧ́ше пи́ти. распе́ншїи же є҆го̀ раздѣли́ша ри̑зы є҆гѡ̀, ве́ргше жрє́бїѧ: и҆ сѣдѧ́ще стрежа́хꙋ є҆го̀ тꙋ̀. и҆ возложи́ша верхꙋ̀ главы̀ є҆гѡ̀ винꙋ̀ є҆гѡ̀ напи́санꙋ: се́й є҆́сть і҆и҃съ цр҃ь і҆ꙋде́йскїй. тогда̀ распѧ́ша съ ни́мъ два̀ разбѡ́йника: є҆ди́наго ѡ҆деснꙋ́ю, и҆ є҆ди́наго ѡ҆шꙋ́юю. мимоходѧ́щїи же хꙋ́лѧхꙋ є҆го̀, покива́юще глава́ми свои́ми, и҆ глаго́люще: разорѧ́ѧй цр҃ковь, и҆ тремѝ де́ньми созида́ѧй, спаси́сѧ са́мъ: а҆́ще сн҃ъ є҆сѝ бж҃їй, сни́ди со крⷭ҇та̀. та́кожде же и҆ а҆рхїере́є рꙋга́ющесѧ съ кни́жники, и҆ ста́рцы, и҆ фарїсе́и, глаго́лахꙋ: и҆ны̑ѧ спасѐ, себе́ ли не мо́жетъ спастѝ; а҆́ще цр҃ь і҆и҃левъ є҆́сть, да сни́детъ ны́нѣ со крⷭ҇та̀, и҆ вѣ́рꙋемъ въ него̀: ᲂу҆пова̀ на бг҃а: да и҆зба́витъ ны́нѣ є҆го̀, а҆́ще хо́щетъ є҆мꙋ̀: рече́ бо, ꙗ҆́кѡ бж҃їй є҆́смь сн҃ъ. то́жде же и҆ разбѡ́йника распѧ́таѧ съ ни́мъ поноша́ста є҆мꙋ̀. ѿ шеста́гѡ же часа̀ тма̀ бы́сть по все́й землѝ, до часа̀ девѧ́тагѡ. ѡ҆ девѧ́томъ же часѣ̀ возопѝ і҆и҃съ гла́сомъ ве́лїимъ, глаго́лѧ: и҆лі̀, и҆лі̀, лїма̀ савахѳані̀; є҆́же є҆́сть, бж҃е мо́й, бж҃е мо́й, вскꙋ́ю мѧ̀ є҆сѝ ѡ҆ста́вилъ; нѣ́цыи же ѿ тꙋ̀ стоѧ́щихъ слы́шавше, глаго́лахꙋ: ꙗ҆́кѡ и҆лїю̀ глаша́етъ се́й. и҆ а҆́бїе те́къ є҆ди́нъ ѿ ни́хъ, и҆ прїе́мъ гꙋ́бꙋ, и҆спо́лнивъ же ѻ҆́цта, и҆ вонзѐ на тро́сть, напаѧ́ше є҆го̀. про́чїи же глаго́лахꙋ: ѡ҆ста́ви, да ви́димъ, а҆́ще прїи́детъ и҆лїа̀ спастѝ є҆го̀. і҆и҃съ же па́ки возопи́въ гла́сомъ ве́лїимъ, и҆спꙋстѝ дх҃ъ. и҆ сѐ завѣ́са цр҃ко́внаѧ раздра́сѧ на дво́е, съ вы́шнѧгѡ кра́ѧ до ни́жнѧгѡ: и҆ землѧ̀ потрѧсе́сѧ, и҆ ка́менїе распаде́сѧ: и҆ гро́би ѿверзо́шасѧ, и҆ мнѡ́га тѣлеса̀ ᲂу҆со́пшихъ ст҃ы́хъ воста́ша: и҆ и҆зше́дше и҆з̾ грѡ́бъ по воскресе́нїи є҆гѡ̀, внидо́ша во ст҃ы́й гра́дъ, и҆ ꙗ҆ви́шасѧ мнѡ́зѣмъ. со́тникъ же и҆ и҆̀же съ ни́мъ стрегꙋ́щїи і҆и҃са, ви́дѣвше трꙋ́съ и҆ бы̑вшаѧ, ᲂу҆боѧ́шасѧ ѕѣлѡ̀, глаго́люще: вои́стиннꙋ бж҃їй сн҃ъ бѣ̀ се́й. бѧ́хꙋ же тꙋ̀ и҆ жєны̀ мно́ги и҆здале́ча зрѧ́ще, ꙗ҆̀же и҆до́ша по і҆и҃сѣ ѿ галїле́и, слꙋжа́ще є҆мꙋ̀. въ ни́хже бѣ̀ марі́а магдали́на и҆ марі́а і҆а́кѡвлѧ, и҆ і҆ѡсі́и ма́ти, и҆ ма́ти сы́нꙋ зеведе́ѡвꙋ."
 },
 {
  "type": "TEXT",
  "value": "Ли́къ: Сла́ва долготерпѣ́нїю твоемꙋ̀ гдⷭ҇и."
 },
 {
  "type": "TEXT",
  "value": "Та́же чте́цъ: Стѡпы̀ моѧ̑ напра́ви по словесѝ твоемꙋ̀: / и҆ да не ѡ҆блада́етъ мно́ю всѧ́кое беззако́нїе. / и҆зба́ви мѧ̀ ѿ клеветы̀ человѣ́ческїѧ, / и҆ сохраню̀ за́пѡвѣди твоѧ̑. / лицѐ твоѐ просвѣтѝ на раба̀ твоего̀, / и҆ наꙋчи́ мѧ ѡ҆правда́нїємъ твои̑мъ."
 },
 {
  "type": "TEXT",
  "value": "Д а и҆спо́лнѧтсѧ ᲂу҆ста̀ моѧ̑ хвале́нїѧ твоегѡ̀ гдⷭ҇и, / ꙗ҆́кѡ да воспою̀ сла́вꙋ твою̀, / ве́сь де́нь великолѣ́пїе твоѐ."
 },
 {
  "type": "TEXT",
  "value": "С т҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "П рест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "Ѻ҆́ ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "Н а́съ ра́ди распѧ́таго прїиди́те всѝ воспои́мъ, / того́ бо ви́дѣ мр҃і́а на дре́вѣ, и҆ глаго́лаше: / а҆́ще и҆ распѧ́тїе терпи́ши, / ты̀ є҆сѝ сн҃ъ и҆ бг҃ъ мо́й."
 },
 {
  "type": "TEXT",
  "value": "Та́же, Гдⷭ҇и поми́лꙋй, м҃."
 },
 {
  "type": "TEXT",
  "value": "И҆́ же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща̑нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чⷭ҇ тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ."
 },
 {
  "type": "TEXT",
  "value": "И҆́ менемъ гдⷭ҇нимъ бл҃гословѝ, ѻ҆́тче."
 },
 {
  "type": "TEXT",
  "value": "Сщ҃е́нникъ возгла́съ: Бж҃е, ᲂу҆ще́дри ны̀, и҆ бл҃гословѝ ны̀, просвѣтѝ лицѐ твоѐ на ны̀, и҆ поми́лꙋй ны̀."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "И҆ сщ҃е́нникъ глаго́летъ настоѧ́щꙋю мл҃твꙋ:"
 },
 {
  "type": "TEXT",
  "value": "Х рⷭ҇тѐ свѣ́те и҆́стинный, просвѣща́ѧй и҆ ѡ҆свѧща́ѧй всѧ́каго человѣ́ка грѧдꙋ́щаго въ мі́ръ, да зна́менаетсѧ на на́съ свѣ́тъ лица̀ твоегѡ̀, да въ не́мъ ᲂу҆́зримъ свѣ́тъ непристꙋ́пный: и҆ и҆спра́ви стѡпы̀ на́шѧ къ дѣ́ланїю за́повѣдей твои́хъ, мл҃твами пречⷭ҇тыѧ твоеѧ̀ мт҃ре, и҆ всѣ́хъ твои́хъ ст҃ы́хъ, а҆ми́нь."
 },
 {
  "type": "HEADER",
  "value": "Посе́мъ пое́мъ тре́тїй ча́съ."
 },
 {
  "type": "TEXT",
  "value": "Чте́цъ: Прїиди́те, поклони́мсѧ цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ."
 },
 {
  "type": "HEADER",
  "value": "И҆ ѱало́мъ л҃д."
 },
 {
  "type": "TEXT",
  "value": "С ꙋдѝ гдⷭ҇и, ѡ҆би́дѧщыѧ мѧ̀, поборѝ борю́щыѧ мѧ̀. прїимѝ ѻ҆рꙋ́жїе и҆ щи́тъ, и҆ воста́ни въ по́мощь мою̀. и҆зсꙋ́ни ме́чь, и҆ заключѝ сопроти́въ гонѧ́щихъ мѧ̀: рцы̀ дꙋшѝ мое́й: сп҃се́нїе твоѐ є҆́смь а҆́зъ. да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀: да возвратѧ́тсѧ вспѧ́ть, и҆ постыдѧ́тсѧ мы́слѧщїи мѝ ѕла̑ѧ. да бꙋ́дꙋтъ ꙗ҆́кѡ пра́хъ пред̾ лице́мъ вѣ́тра, и҆ а҆́гг҃лъ гдⷭ҇нь ѡ҆скорблѧ́ѧ и҆̀хъ. да бꙋ́детъ пꙋ́ть и҆́хъ тьма̀ и҆ по́лзокъ, и҆ а҆́гг҃лъ гдⷭ҇нь погонѧ́ѧ и҆̀хъ. ꙗ҆́кѡ тꙋ́не скры́ша мѝ па́гꙋбꙋ сѣ́ти своеѧ̀, всꙋ́е поноси́ша дꙋшѝ мое́й. да прїи́детъ є҆мꙋ̀ сѣ́ть, ю҆́же не вѣ́сть, и҆ лови́тва, ю҆́же скры̀, да ѡ҆б̾и́метъ и҆̀: и҆ въ сѣ́ть да впаде́тъ въ ню̀: дꙋша́ же моѧ̀ возра́дꙋетсѧ ѡ҆ гдⷭ҇ѣ, возвесели́тсѧ ѡ҆ сп҃се́нїи є҆гѡ̀. всѧ̑ кѡ́сти моѧ̑ рекꙋ́тъ: гдⷭ҇и, гдⷭ҇и, кто̀ подо́бенъ тебѣ̀; и҆збавлѧ́ѧй ни́ща и҆з̾ рꙋкѝ крѣ́пльшихъ є҆гѡ̀, и҆ ни́ща и҆ ᲂу҆бо́га ѿ расхища́ющихъ є҆го̀. воста́вше на мѧ̀ свидѣ́телє непра́веднїи, ꙗ҆̀же не вѣ́дѣхъ, вопроша́хꙋ мѧ̀. возда́ша мѝ лꙋка̑ваѧ воз̾ блага̑ѧ, и҆ безча́дїе дꙋшѝ мое́й. а҆́зъ же, внегда̀ ѻ҆нѝ стꙋжа́хꙋ мѝ, ѡ҆блача́хсѧ во вре́тище, и҆ смирѧ́хъ посто́мъ дꙋ́шꙋ мою̀, и҆ мл҃тва моѧ̀ въ нѣ́дро моѐ возврати́тсѧ. ꙗ҆́кѡ бли́жнемꙋ, ꙗ҆́кѡ бра́тꙋ на́шемꙋ, та́кѡ ᲂу҆гожда́хъ: ꙗ҆́кѡ пла́чѧ и҆ сѣ́тꙋѧ, та́кѡ смирѧ́хсѧ. и҆ на мѧ̀ возвесели́шасѧ, и҆ собра́шасѧ, собра́шасѧ на мѧ̀ ра̑ны, и҆ не позна́хъ: раздѣли́шасѧ, и҆ не ᲂу҆мили́шасѧ. и҆скꙋси́ша мѧ̀, подражни́ша мѧ̀ подражне́нїемъ, поскрежета́ша на мѧ̀ зꙋбы̀ свои́ми. гдⷭ҇и, когда̀ ᲂу҆́зриши; ᲂу҆стро́й дꙋ́шꙋ мою̀ ѿ ѕлодѣ́йства и҆́хъ, ѿ лє́въ є҆диноро́днꙋю мою̀. и҆сповѣ́мсѧ тебѣ̀ въ цр҃кви мно́зѣ, въ лю́дехъ тѧ́жцѣхъ восхвалю́ тѧ. да не возра́дꙋютсѧ ѡ҆ мнѣ̀ враждꙋ́ющїи мѝ непра́веднѡ. ненави́дѧщїи мѧ̀ тꙋ́не, и҆ помиза́ющїи ѻ҆чи́ма. ꙗ҆́кѡ мнѣ̀ ᲂу҆́бѡ ми̑рнаѧ глаго́лахꙋ, и҆ на гнѣ́въ ле́сти помышлѧ́хꙋ. разшири́ша на мѧ̀ ᲂу҆ста̀ своѧ̑, рѣ́ша: бл҃гоже бл҃гоже, ви́дѣша ѻ҆́чи на́ши. ви́дѣлъ є҆сѝ гдⷭ҇и, да не премолчи́ши: гдⷭ҇и не ѿстꙋпѝ ѿ менѐ. воста́ни гдⷭ҇и, и҆ вонмѝ сꙋдꙋ̀ моемꙋ̀, бж҃е мо́й, и҆ гдⷭ҇и мо́й, на прю̀ мою̀. сꙋди́ ми гдⷭ҇и, по пра́вдѣ твое́й, гдⷭ҇и бж҃е мо́й, и҆ да не возра́дꙋютсѧ ѡ҆ мнѣ̀. да не рекꙋ́тъ въ сердца́хъ свои́хъ: бл҃гоже бл҃гоже дꙋшѝ на́шей: нижѐ да рекꙋ́тъ: пожро́хомъ є҆го̀. да постыдѧ́тсѧ и҆ посра́мѧтсѧ вкꙋ́пѣ ра́дꙋющїисѧ ѕлѡ́мъ мои̑мъ: да ѡ҆блекꙋ́тсѧ въ стꙋ́дъ и҆ сра́мъ велерѣ́чꙋющїи на мѧ̀. да возра́дꙋютсѧ и҆ возвеселѧ́тсѧ хотѧ́щїи пра́вды моеѧ̀: и҆ да рекꙋ́тъ вы́нꙋ, да возвели́читсѧ гдⷭ҇ь, хотѧ́щїи ми́ра рабꙋ̀ є҆гѡ̀. и҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й."
 },
 {
  "type": "HEADER",
  "value": "Ѱало́мъ р҃и."
 },
 {
  "type": "TEXT",
  "value": "Б ж҃е, хвалы̀ моеѧ̀ не премолчѝ. ꙗ҆́кѡ ᲂу҆ста̀ грѣ́шнича, и҆ ᲂу҆ста̀ льсти́вагѡ на мѧ̀ ѿверзо́шасѧ, глаго́лаша на мѧ̀ ѧ҆зы́комъ льсти́вымъ: и҆ словесы̀ ненави́стными ѡ҆быдо́ша мѧ̀, и҆ бра́шасѧ со мно́ю тꙋ́не. вмѣ́стѡ є҆́же люби́ти мѧ̀, ѡ҆болга́хꙋ мѧ̀, а҆́зъ же молѧ́хсѧ. и҆ положи́ша на мѧ̀ ѕла̑ѧ за бл҃га̑ѧ, и҆ не́нависть за возлюбле́нїе моѐ. поста́ви на него̀ грѣ́шника, и҆ дїа́волъ да ста́нетъ ѡ҆деснꙋ́ю є҆гѡ̀. внегда̀ сꙋди́тисѧ є҆мꙋ̀, да и҆зы́детъ ѡ҆сꙋжде́нъ, и҆ мл҃тва є҆гѡ̀ да бꙋ́детъ въ грѣ́хъ. да бꙋ́дꙋтъ дні́е є҆гѡ̀ ма́ли, и҆ є҆пі́скопство є҆гѡ̀ да прїи́метъ и҆́нъ. да бꙋ́дꙋтъ сы́нове є҆гѡ̀ си́ри, и҆ жена̀ є҆гѡ̀ вдова̀. дви́жꙋщесѧ да преселѧ́тсѧ сы́нове є҆гѡ̀, и҆ воспро́сѧтъ, да и҆згна́ни бꙋ́дꙋтъ и҆з̾ домѡ́въ свои́хъ. да взы́щетъ заимода́вецъ всѧ̑, є҆ли̑ка сꙋ́ть є҆гѡ̀, и҆ да восхи́тѧтъ чꙋжді́и трꙋды̀ є҆гѡ̀. да не бꙋ́детъ є҆мꙋ̀ застꙋ́пника, нижѐ да бꙋ́детъ ᲂу҆щедрѧ́ѧй сироты̑ є҆гѡ̀. да бꙋ́дꙋтъ ча̑да є҆гѡ̀ въ погꙋбле́нїе, въ ро́дѣ є҆ди́номъ да потреби́тсѧ и҆́мѧ є҆гѡ̀. да воспомѧне́тсѧ беззако́нїе ѻ҆тє́цъ є҆гѡ̀ пред̾ гдⷭ҇емъ, и҆ грѣ́хъ ма́тере є҆гѡ̀ да не ѡ҆чи́ститсѧ. да бꙋ́дꙋтъ пред̾ гдⷭ҇емъ вы́нꙋ, и҆ да потреби́тсѧ ѿ землѝ па́мѧть и҆́хъ. зане́же не помѧнꙋ̀ сотвори́ти млⷭ҇ть, и҆ погна̀ человѣ́ка ни́ща и҆ ᲂу҆бо́га, и҆ ᲂу҆миле́на се́рдцемъ ᲂу҆мертви́ти. и҆ возлюбѝ клѧ́твꙋ, и҆ прїи́детъ є҆мꙋ̀: и҆ не восхотѣ̀ бл҃гослове́нїѧ, и҆ ᲂу҆дали́тсѧ ѿ негѡ̀. и҆ ѡ҆блече́сѧ въ клѧ́твꙋ ꙗ҆́кѡ въ ри́зꙋ, и҆ вни́де ꙗ҆́кѡ вода̀ во ᲂу҆тро́бꙋ є҆гѡ̀, и҆ ꙗ҆́кѡ є҆ле́й въ кѡ́сти є҆гѡ̀. да бꙋ́детъ є҆мꙋ̀ ꙗ҆́кѡ ри́за, въ ню́же ѡ҆блачи́тсѧ, и҆ ꙗ҆́кѡ по́ѧсъ, и҆́мже вы́нꙋ ѡ҆поѧсꙋ́етсѧ. сїѐ дѣ́ло ѡ҆болга́ющихъ мѧ̀ ᲂу҆ гдⷭ҇а, и҆ глаго́лющихъ лꙋка̑ваѧ на дꙋ́шꙋ мою̀. и҆ ты̀ гдⷭ҇и гдⷭ҇и, сотворѝ со мно́ю и҆́мене ра́ди твоегѡ̀, ꙗ҆́кѡ бл҃га млⷭ҇ть твоѧ̀. и҆зба́ви мѧ̀, ꙗ҆́кѡ ни́щъ и҆ ᲂу҆бо́гъ є҆́смь а҆́зъ, и҆ се́рдце моѐ смѧте́сѧ внꙋ́трь менѐ. ꙗ҆́кѡ сѣ́нь внегда̀ ᲂу҆клони́тисѧ є҆́й, ѿѧ́хсѧ, стрѧсо́хсѧ ꙗ҆́кѡ прꙋ́зи. кѡлѣ́на моѧ̑ и҆знемого́ста ѿ поста̀, и҆ пло́ть моѧ̀ и҆змѣни́сѧ є҆ле́а ра́ди. и҆ а҆́зъ бы́хъ поноше́нїе и҆̀мъ: ви́дѣша мѧ̀, покива́ша глава́ми свои́ми. помози́ ми гдⷭ҇и бж҃е мо́й, и҆ сп҃си́ мѧ по млⷭ҇ти твое́й. и҆ да разꙋмѣ́ютъ, ꙗ҆́кѡ рꙋка̀ твоѧ̀ сїѧ̀, и҆ ты̀ гдⷭ҇и, сотвори́лъ є҆сѝ ю҆̀. прокленꙋ́тъ ті́и, и҆ ты̀ бл҃гослови́ши: востаю́щїи на мѧ̀ да постыдѧ́тсѧ, ра́бъ же тво́й возвесели́тсѧ. да ѡ҆блекꙋ́тсѧ ѡ҆болга́ющїи мѧ̀ въ срамотꙋ̀, и҆ ѡ҆де́ждꙋтсѧ ꙗ҆́кѡ ѻ҆де́ждею стꙋдо́мъ свои́мъ. и҆сповѣ́мсѧ гдⷭ҇ви ѕѣлѡ̀ ᲂу҆сты̀ мои́ми, и҆ посредѣ̀ мно́гихъ восхвалю̀ є҆го̀. ꙗ҆́кѡ предста̀ ѡ҆деснꙋ́ю ᲂу҆бо́гагѡ, є҆́же сп҃стѝ ѿ гонѧ́щихъ дꙋ́шꙋ мою̀."
 },
 {
  "type": "HEADER",
  "value": "Ѱало́мъ н҃."
 },
 {
  "type": "TEXT",
  "value": "П оми́лꙋй мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ᲂу҆тро́бѣ мое́й. не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. и҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожже́нїѧ не бл҃говоли́ши. же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ᲂу҆ничижи́тъ. ᲂу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "А҆ ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "HEADER",
  "value": "Тропа́рь, гла́съ ѕ҃:"
 },
 {
  "type": "TEXT",
  "value": "Г дⷭ҇и, ѡ҆сꙋди́ша тѧ̀ і҆ꙋде́є на сме́рть, жи́знь всѣ́хъ, / и҆̀же чермно́е мо́ре жезло́мъ проше́дшїи, / на крⷭ҇тѣ́ тѧ пригвозди́ша: / и҆ и҆̀же ѿ ка́мене ме́дъ сса́вшїи, / же́лчь тебѣ̀ принесо́ша. / но во́лею претерпѣ́лъ є҆сѝ, / да на́съ свободи́ши ѿ рабо́ты вра́жїѧ, / хрⷭ҇тѐ бж҃е, сла́ва тебѣ̀."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "Бг҃оро́диченъ: Бцⷣе, ты̀ є҆сѝ лоза̀ и҆́стиннаѧ, / возрасти́вшаѧ на́мъ пло́дъ живота̀, / тебѣ̀ мо́лимсѧ, / моли́сѧ влⷣчце со ст҃ы́ми а҆пⷭ҇лы, / поми́ловати дꙋ́шы на́шѧ."
 },
 {
  "type": "HEADER",
  "value": "И҆ пое́мъ трѝ тропарѝ ѿ двꙋна́десѧти, повторѧ́юще ѧ҆̀."
 },
 {
  "type": "TEXT",
  "value": "Гла́съ и҃: Стра́ха ра́ди і҆ꙋде́йскагѡ, / дрꙋ́гъ тво́й и҆ бли́жнїй пе́тръ ѿве́ржесѧ тебѐ гдⷭ҇и, / и҆ рыда́ѧ си́це вопїѧ́ше: / сле́зъ мои́хъ не премолчѝ, / рѣ́хъ бо сохрани́ти вѣ́рꙋ ще́дре, и҆ не сохрани́хъ: / и҆ на́ше покаѧ́нїе та́кожде прїимѝ, и҆ поми́лꙋй на́съ."
 },
 {
  "type": "TEXT",
  "value": "Па́ки то́йже."
 },
 {
  "type": "TEXT",
  "value": "Та́же сті́хъ: Глаго́лы моѧ̑ внꙋшѝ гдⷭ҇и, разꙋмѣ́й зва́нїе моѐ."
 },
 {
  "type": "TEXT",
  "value": "П ре́жде чⷭ҇тна́гѡ твоегѡ̀ крⷭ҇та̀, / во́инѡмъ рꙋга́ющымсѧ тебѣ̀ гдⷭ҇и, / ᲂу҆́мнаѧ вѡ́инства дивлѧ́хꙋсѧ: / ѡ҆бложи́лсѧ бо є҆сѝ вѣнце́мъ порꙋга́нїѧ, / зе́млю живописа́вый цвѣ́ты, / багрѧни́цею порꙋга́нїѧ ѡ҆дѣ́ѧлсѧ є҆сѝ, / ѻ҆́блаки ѡ҆дѣва́ѧй тве́рдь. / таковы́мъ бо смотре́нїемъ разꙋмѣ́сѧ твоѐ бл҃гоꙋтро́бїе хрⷭ҇тѐ, / ве́лїѧ твоѧ̀ млⷭ҇ть, сла́ва тебѣ̀."
 },
 {
  "type": "TEXT",
  "value": "Сті́хъ: Вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й."
 },
 {
  "type": "TEXT",
  "value": "И҆ па́ки то́йже."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Гла́съ є҃: Влеко́мь на крⷭ҇тъ си́це вопїѧ́лъ є҆сѝ гдⷭ҇и: / за ко́е дѣ́ло хо́щете мѧ̀ распѧ́ти і҆ꙋде́є; / ꙗ҆́кѡ разсла́блєнныѧ ва́шѧ стѧгнꙋ́хъ, / занѐ мертвецы̀ а҆́ки ѿ сна̀ возста́вихъ, / кровоточи́вꙋю и҆сцѣли́хъ, ханане́ю поми́ловахъ. / за ко́е дѣ́ло хо́щете мѧ̀ ᲂу҆би́ти і҆ꙋде́є; / но ᲂу҆́зрите, въ него́же ны́нѣ пробода́ете хрⷭ҇та̀, беззако́ннїи."
 },
 {
  "type": "TEXT",
  "value": "И҆ ны́нѣ, па́ки то́йже."
 },
 {
  "type": "TEXT",
  "value": "И҆ кади́тъ дїа́конъ є҆ѵⷢ҇лїе и҆ і҆кѡ́ны, и҆ настоѧ́телѧ, и҆ ли́ки то́кмѡ."
 },
 {
  "type": "TEXT",
  "value": "Дїа́конъ: Премꙋ́дрость. Во́нмемъ."
 },
 {
  "type": "TEXT",
  "value": "Чте́цъ: Прокі́менъ, гла́съ д҃: Ꙗ҆́кѡ а҆́зъ на ра̑ны гото́въ, / и҆ болѣ́знь моѧ̀ предо мно́ю є҆́сть вы́нꙋ. Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Прⷪ҇ро́чества и҆са́їина чте́нїе. [Глава̀ и҃, ст. д҃-а҃і.]"
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "TEXT",
  "value": "Чте́цъ: Гдⷭ҇ь дае́тъ мнѣ̀ ѧ҆зы́къ наꙋче́нїѧ, є҆́же разꙋмѣ́ти, є҆гда̀ подоба́етъ рещѝ сло́во: положи́ мѧ ᲂу҆́трѡ ᲂу҆́трѡ, приложи́ ми ᲂу҆́хо є҆́же слы́шати. и҆ наказа́нїе гдⷭ҇не ѿверза́етъ ᲂу҆́ши моѝ, а҆́зъ же не проти́влюсѧ, ни противоглаго́лю. плещѝ моѝ вда́хъ на ра̑ны и҆ лани̑тѣ моѝ на заꙋшє́нїѧ, лица́ же моегѡ̀ не ѿврати́хъ ѿ стꙋда̀ заплева́нїй. и҆ гдⷭ҇ь гдⷭ҇ь помо́щникъ мѝ бы́сть: сегѡ̀ ра́ди не ᲂу҆срами́хсѧ, но положи́хъ лицѐ своѐ а҆́ки тве́рдый ка́мень, и҆ разꙋмѣ́хъ, ꙗ҆́кѡ не постыждꙋ́сѧ. занѐ приближа́етсѧ ѡ҆правда́вый мѧ̀: кто̀ прѧ́йсѧ со мно́ю; да сопротивоста́нетъ мнѣ̀ кꙋ́пнѡ: и҆ кто̀ сꙋдѧ́йсѧ со мно́ю; да прибли́житсѧ ко мнѣ̀. сѐ гдⷭ҇ь гдⷭ҇ь помо́жетъ мѝ: кто̀ ѡ҆ѕло́битъ мѧ̀; сѐ всѝ вы̀ ꙗ҆́кѡ ри́за ѡ҆бетша́ете, и҆ ꙗ҆́кѡ мо́лїе и҆з̾ѧ́стъ вы̀. кто̀ въ ва́съ боѧ́йсѧ гдⷭ҇а; да послꙋ́шаетъ гла́са ѻ҆́трока є҆гѡ̀: ходѧ́щїи во тьмѣ̀, и҆ нѣ́сть и҆̀мъ свѣ́та: надѣ́йтесѧ на и҆́мѧ гдⷭ҇не, и҆ ᲂу҆тверди́тесѧ ѡ҆ бз҃ѣ. сѐ всѝ вы̀ ѻ҆́гнь раждиза́ете, и҆ ᲂу҆крѣплѧ́ете пла́мень: ходи́те свѣ́томъ ѻ҆гнѧ̀ ва́шегѡ, и҆ пла́менемъ, є҆го́же разжего́сте: менѐ ра́ди бы́ша сїѧ̑ ва́мъ, въ печа́ли ᲂу҆́спнете."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Къ ри́млѧнѡмъ посла́нїѧ ст҃а́гѡ а҆пⷭ҇ла па́ѵла чте́нїе."
 },
 {
  "type": "TEXT",
  "value": "И҆ па́ки дїа́конъ: Во́нмемъ."
 },
 {
  "type": "HEADER",
  "value": "Та́же а҆по́столъ, зача́ло п҃и ѿ полꙋ̀."
 },
 {
  "type": "TEXT",
  "value": "Чте́цъ: Бра́тїе, хрⷭ҇то́съ сꙋ́щымъ на́мъ немощны̑мъ, по вре́мени за нечести́выхъ ᲂу҆́мре. є҆два́ бо за пра́ведника кто̀ ᲂу҆́мретъ, за бл҃га́го бо не́гли кто̀ и҆ де́рзнетъ ᲂу҆мре́ти. составлѧ́етъ же свою̀ любо́вь въ на́съ бг҃ъ, ꙗ҆́кѡ є҆щѐ грѣ́шникѡмъ сꙋ́щымъ на́мъ, хрⷭ҇то́съ за ны̀ ᲂу҆́мре: мно́гѡ же ᲂу҆̀бо па́че ѡ҆правда́ни бы́вше ны́нѣ кро́вїю є҆гѡ̀, спасе́мсѧ и҆́мъ ѿ гнѣ́ва. а҆́ще бо вразѝ бы́вше, примири́хомсѧ бг҃ꙋ сме́ртїю сн҃а є҆гѡ̀, мно́жае па́че примири́вшесѧ, спасе́мсѧ въ животѣ̀ є҆гѡ̀."
 },
 {
  "type": "TEXT",
  "value": "Сщ҃е́нникъ: Ми́ръ тѝ."
 },
 {
  "type": "TEXT",
  "value": "И҆ чте́цъ: И҆ дх҃ови твоемꙋ̀."
 },
 {
  "type": "TEXT",
  "value": "Дїа́конъ: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа."
 },
 {
  "type": "TEXT",
  "value": "Сщ҃е́нникъ: Ми́ръ всѣ̑мъ."
 },
 {
  "type": "TEXT",
  "value": "Ли́къ: И҆ дх҃ови твоемꙋ̀."
 },
 {
  "type": "TEXT",
  "value": "Сщ҃е́нникъ: Ѿ ма́рка ст҃а́гѡ є҆ѵⷢ҇лїа чте́нїе."
 },
 {
  "type": "TEXT",
  "value": "Ли́къ: Сла́ва тебѣ̀ гдⷭ҇и, сла́ва тебѣ̀."
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "HEADER",
  "value": "Є҆ѵⷢ҇лїе ѿ ма́рка, зача́ло ѯ҃ѕ, ѯ҃з и҆ ѯ҃и, въ рѧ́дъ."
 },
 {
  "type": "TEXT",
  "value": "В о вре́мѧ ѻ҆́но, совѣ́тъ сотвори́ша а҆рхїере́є со ста́рцы и҆ кни́жники, и҆ ве́сь со́нмъ, свѧза́вше і҆и҃са ведо́ша, и҆ преда́ша є҆го̀ пїла́тꙋ. и҆ вопросѝ є҆го̀ пїла́тъ: ты́ ли є҆сѝ цр҃ь і҆ꙋде́йскїй; ѻ҆́нъ же ѿвѣща́въ речѐ є҆мꙋ̀: ты̀ глаго́леши. и҆ глаго́лахꙋ на него̀ а҆рхїере́є мно́гѡ. пїла́тъ же па́ки вопросѝ є҆го̀, глаго́лѧ: не ѿвѣщава́еши ли ничто́же; ви́ждь, коли́кѡ на тѧ̀ свидѣ́тельствꙋютъ. і҆и҃съ же ктомꙋ̀ ничто́же ѿвѣща̀, ꙗ҆́кѡ диви́тисѧ пїла́тꙋ. на всѧ́къ же пра́здникъ ѿпꙋща́ше и҆̀мъ є҆ди́наго свѧ́знѧ, є҆го́же проша́хꙋ. бѣ́ же нарица́емый вара́вва, съ ко́вники свои́ми свѧ́занъ, и҆̀же въ ко́вѣ ᲂу҆бі́йство сотвори́ша. и҆ возопи́въ наро́дъ, нача̀ проси́ти, ꙗ҆́коже всегда̀ творѧ́ше и҆̀мъ. пїла́тъ же ѿвѣща̀ и҆̀мъ, глаго́лѧ: хо́щете ли, пꙋщꙋ̀ ва́мъ цр҃ѧ̀ і҆ꙋде́йска; вѣ́дѧше бо, ꙗ҆́кѡ за́висти ра́ди преда́ша є҆го̀ а҆рхїере́є. а҆рхїере́є же поманꙋ́ша наро́дꙋ, да па́че вара́ввꙋ пꙋ́ститъ и҆̀мъ. пїла́тъ же ѿвѣща́въ, па́ки речѐ и҆̀мъ: что̀ ᲂу҆́бѡ хо́щете сотворю̀, є҆го́же глаго́лете цр҃ѧ̀ і҆ꙋде́йска; ѻ҆ни́ же па́ки возопи́ша, глаго́люще: пропнѝ є҆го̀. пїла́тъ же глаго́лаше и҆̀мъ: что́ бо ѕло̀ сотворѝ; ѻ҆ни́ же и҆́злиха вопїѧ́хꙋ: пропнѝ є҆го̀. пїла́тъ же хотѧ̀ наро́дꙋ хотѣ́нїе сотвори́ти, пꙋстѝ и҆̀мъ вара́ввꙋ: и҆ предадѐ і҆и҃са, би́въ, да про́пнꙋтъ є҆го̀. во́ини же ведо́ша є҆го̀ внꙋ́трь двора̀, є҆́же є҆́сть претѡ́ръ, и҆ созва́ша всю̀ спі́рꙋ: и҆ ѡ҆блеко́ша є҆го̀ въ препрѧ́дꙋ, и҆ возложи́ша на него̀ спле́тше терно́въ вѣне́цъ: и҆ нача́ша цѣлова́ти є҆го̀, и҆ глаго́лати: ра́дꙋйсѧ цр҃ю̀ і҆ꙋде́йскїй. и҆ бїѧ́хꙋ є҆го̀ по главѣ̀ тро́стїю, и҆ плюва́хꙋ на него̀, и҆ прегиба́юще колѣ́на, покланѧ́хꙋсѧ є҆мꙋ̀. и҆ є҆гда̀ порꙋга́шасѧ є҆мꙋ̀, совлеко́ша съ негѡ̀ препрѧ́дꙋ, и҆ ѡ҆блеко́ша є҆го̀ въ ри̑зы своѧ̀: и҆ и҆зведо́ша є҆го̀, да про́пнꙋтъ є҆го̀. и҆ задѣ́ша мимоходѧ́щꙋ нѣ́коемꙋ сі́мѡнꙋ кѷрине́ю, грѧдꙋ́щꙋ съ села̀, ѻ҆тцꙋ̀ а҆леѯа́ндровꙋ и҆ рꙋ́фовꙋ, да во́з̾метъ крⷭ҇тъ є҆гѡ̀. и҆ приведо́ша є҆го̀ на голго́ѳꙋ мѣ́сто: є҆́же є҆́сть сказа́емо, ло́бное мѣ́сто. и҆ даѧ́хꙋ є҆мꙋ̀ пи́ти є҆смѷрнїсме́но вїно̀: ѻ҆́нъ же не прїѧ́тъ. и҆ распе́ншїи є҆го̀ раздѣли́ша ри̑зы є҆гѡ̀, мета́юще жре́бїй ѡ҆ ни́хъ, кто̀ что̀ во́з̾метъ. бѣ́ же ча́съ тре́тїй, и҆ распѧ́ша є҆го̀. и҆ бѣ̀ написа́нїе вины̀ є҆гѡ̀ напи́сано: цр҃ь і҆ꙋде́йскъ. и҆ съ ни́мъ распѧ́ша два̀ разбѡ́йника, є҆ди́наго ѡ҆деснꙋ́ю, и҆ є҆ди́наго ѡ҆шꙋ́юю є҆гѡ̀. и҆ сбы́стсѧ писа́нїе є҆́же глаго́летъ: и҆ со беззако́нными вмѣни́сѧ. и҆ мимоходѧ́щїи хꙋ́лѧхꙋ є҆го̀, покива́юще глава́ми свои́ми, и҆ глаго́люще: ᲂу҆а̀, разорѧ́ѧй цр҃ковь, и҆ тремѝ де́ньми созида́ѧй, спаси́сѧ са́мъ, и҆ сни́ди съ крⷭ҇та̀. та́коже и҆ а҆рхїере́є рꙋга́ющесѧ дрꙋ́гъ ко дрꙋ́гꙋ съ кни́жники, глаго́лахꙋ: и҆́ны спасѐ, себе́ ли не мо́жетъ спастѝ; хрⷭ҇то́съ цр҃ь і҆и҃левъ да сни́детъ ны́нѣ съ крⷭ҇та̀, да ви́димъ и҆ вѣ́рꙋ и҆ме́мъ є҆мꙋ̀. и҆ распѧ̑таѧ съ ни́мъ поноша́ста є҆мꙋ̀. бы́вшꙋ же часꙋ̀ шесто́мꙋ, тма̀ бы́сть по все́й землѝ до часа̀ девѧ́тагѡ. и҆ въ ча́съ девѧ́тый возопѝ і҆и҃съ гла́сомъ ве́лїимъ, глаго́лѧ: є҆лѡі̀ є҆лѡі̀, лїма̀ савахѳані̀; є҆́же є҆́сть сказа́емо: бж҃е мо́й, бж҃е мо́й, почто́ мѧ ѡ҆ста́вилъ є҆сѝ; и҆ нѣ́цыи ѿ предстоѧ́щихъ слы́шавше, глаго́лахꙋ: сѐ и҆лїю̀ гласи́тъ. те́къ же є҆ди́нъ, и҆ напо́лнивъ гꙋ́бꙋ ѻ҆́цта, и҆ возло́жь на тро́сть, напоѧ́ше є҆го̀, глаго́лѧ: ѡ҆ста́вите, да ви́димъ, а҆́ще прїи́детъ и҆лїа̀ снѧ́ти є҆го̀. і҆и҃съ же пꙋ́щь гла́съ ве́лїй, и҆́здше. и҆ завѣ́са церко́внаѧ раздра́сѧ на дво́е, свы́ше до ни́зꙋ. ви́дѣвъ же со́тникъ стоѧ́й прѧ́мѡ є҆мꙋ̀, ꙗ҆́кѡ та́кѡ возопи́въ и҆́здше, речѐ: вои́стиннꙋ человѣ́къ се́й, сн҃ъ бѣ̀ бж҃їй. бѧ́хꙋ же и҆ жєны̀ и҆здале́ча зрѧ́ще, въ ни́хже бѣ̀ марі́а магдали́на, и҆ марі́а і҆а́кѡва ма́лагѡ, и҆ і҆ѡсі́и ма́ти, и҆ салѡмі́а: ꙗ҆́же и҆ є҆гда̀ бѣ̀ въ галїле́и, хожда́хꙋ по не́мъ, и҆ слꙋжа́хꙋ є҆мꙋ̀: и҆ и҆́ны мнѡ́гїѧ, ꙗ҆̀же взыдо́ша съ ни́мъ во і҆ерꙋсали́мъ."
 },
 {
  "type": "TEXT",
  "value": "Ли́къ: Сла́ва долготерпѣ́нїю твоемꙋ̀ гдⷭ҇и."
 },
 {
  "type": "TEXT",
  "value": "И҆ посе́мъ чте́мъ по сказа́нїи, є҆́же ѿ матѳе́а, сло́во крⷭ҇тное."
 },
 {
  "type": "TEXT",
  "value": "Та́же чте́цъ: Гдⷭ҇ь бг҃ъ бл҃гослове́нъ, / бл҃гослове́нъ гдⷭ҇ь де́нь днѐ, / поспѣши́тъ на́мъ бг҃ъ сп҃се́нїй на́шихъ: / бг҃ъ на́шъ, бг҃ъ сп҃са́ти."
 },
 {
  "type": "TEXT",
  "value": "С т҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "П рест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Ѻ҆́ ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "Н а́съ ра́ди распѧ́таго прїиди́те всѝ воспои́мъ, / того́ бо ви́дѣ мр҃і́а на дре́вѣ, и҆ глаго́лаше: / а҆́ще и҆ распѧ́тїе терпи́ши, / ты̀ є҆сѝ сн҃ъ и҆ бг҃ъ мо́й."
 },
 {
  "type": "TEXT",
  "value": "Та́же, Гдⷭ҇и поми́лꙋй, м҃."
 },
 {
  "type": "TEXT",
  "value": "И҆́ же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща̑нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чⷭ҇ тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ."
 },
 {
  "type": "TEXT",
  "value": "И҆́ менемъ гдⷭ҇нимъ бл҃гословѝ, ѻ҆́тче."
 },
 {
  "type": "TEXT",
  "value": "Сщ҃е́нникъ возгла́съ: Бж҃е, ᲂу҆ще́дри ны̀, и҆ бл҃гословѝ ны̀, просвѣтѝ лицѐ твоѐ на ны̀, и҆ поми́лꙋй ны̀."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Мл҃тва ст҃а́гѡ марда́рїа:"
 },
 {
  "type": "TEXT",
  "value": "В лⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е, є҆ди́но бж҃ество̀, є҆ди́на си́ла, поми́лꙋй мѧ̀ грѣ́шнаго и҆ и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь."
 },
 {
  "type": "HEADER",
  "value": "Посе́мъ пое́мъ шесты́й ча́съ."
 },
 {
  "type": "TEXT",
  "value": "Глаго́лемъ: П рїиди́те, поклони́мсѧ цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ."
 },
 {
  "type": "TEXT",
  "value": "И҆ ѱалмы̀."
 },
 {
  "type": "HEADER",
  "value": "Ѱало́мъ н҃г."
 },
 {
  "type": "TEXT",
  "value": "Б ж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми: бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ. ꙗ҆́кѡ чꙋ́ждїи воста́ша на мѧ̀, и҆ крѣ́пцыи взыска́ша дꙋ́шꙋ мою̀, и҆ не предложи́ша бг҃а пред̾ собо́ю. се́ бо бг҃ъ помога́етъ мѝ, и҆ гдⷭ҇ь застꙋ́пникъ дꙋшѝ мое́й. ѿврати́тъ ѕла̑ѧ врагѡ́мъ мои̑мъ, и҆́стиною твое́ю потребѝ и҆̀хъ. во́лею пожрꙋ̀ тебѣ̀, и҆сповѣ́мсѧ и҆́мени твоемꙋ̀ гдⷭ҇и, ꙗ҆́кѡ бл҃го. ꙗ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ̑ воззрѣ̀ ѻ҆́ко моѐ."
 },
 {
  "type": "HEADER",
  "value": "Ѱало́мъ рл҃ѳ."
 },
 {
  "type": "TEXT",
  "value": "И҆ зми́ мѧ, гдⷭ҇и, ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀: и҆̀же помы́слиша непра́вдꙋ въ се́рдцы, ве́сь де́нь ѡ҆полча́хꙋ бра̑ни: и҆з̾ѡстри́ша ѧ҆зы́къ сво́й ꙗ҆́кѡ ѕмїи́нъ: ꙗ҆́дъ а҆́спїдовъ под̾ ᲂу҆стна́ми и҆́хъ. сохрани́ мѧ, гдⷭ҇и, и҆з̾ рꙋкѝ грѣ́шничи, ѿ человѣ̑къ непра́ведныхъ и҆зми́ мѧ, и҆̀же помы́слиша запѧ́ти стѡпы̀ моѧ̑. скры́ша го́рдїи сѣ́ть мнѣ̀ и҆ ᲂу҆́жы, препѧ́ша сѣ́ть нога́ма мои́ма: при стезѝ собла́зны положи́ша мѝ. рѣ́хъ гдⷭ҇еви: бг҃ъ мо́й є҆сѝ ты̀, внꙋшѝ, гдⷭ҇и, гла́съ моле́нїѧ моегѡ̀. гдⷭ҇и, гдⷭ҇и, си́ло сп҃се́нїѧ моегѡ̀, ѡ҆сѣни́лъ є҆сѝ над̾ главо́ю мое́ю въ де́нь бра́ни. не преда́ждь менѐ, гдⷭ҇и, ѿ жела́нїѧ моегѡ̀ грѣ́шникꙋ: помы́слиша на мѧ̀, не ѡ҆ста́ви менѐ, да не когда̀ вознесꙋ́тсѧ. глава̀ ѡ҆крꙋже́нїѧ и҆́хъ, трꙋ́дъ ᲂу҆сте́нъ и҆́хъ покры́етъ ѧ҆̀. падꙋ́тъ на ни́хъ ᲂу҆́глїѧ ѻ҆́гнєннаѧ, низложи́ши ѧ҆̀ во страсте́хъ, и҆ не постоѧ́тъ. мꙋ́жъ ѧ҆зы́ченъ не и҆спра́витсѧ на землѝ: мꙋ́жа непра́ведна ѕла̑ѧ ᲂу҆ловѧ́тъ во и҆стлѣ́нїе. позна́хъ, ꙗ҆́кѡ сотвори́тъ гдⷭ҇ь сꙋ́дъ ни́щымъ и҆ ме́сть ᲂу҆бѡ́гимъ. ѻ҆ба́че првⷣнїи и҆сповѣ́дѧтсѧ и҆́мени твоемꙋ̀, и҆ вселѧ́тсѧ пра́вїи съ лице́мъ твои́мъ."
 },
 {
  "type": "HEADER",
  "value": "Ѱало́мъ ч҃."
 },
 {
  "type": "TEXT",
  "value": "Ж ивы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ᲂу҆пова́ю на него̀. ꙗ҆́кѡ то́й и҆зба́витъ тѧ̀ ѿ сѣ́ти ло́вчи, и҆ ѿ словесѐ мѧте́жна. плещма̀ свои́ма ѡ҆сѣни́тъ тѧ̀, и҆ под̾ крилѣ̀ є҆гѡ̀ надѣ́ешисѧ. ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀, не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ. паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебѐ, къ тебѣ́ же не прибли́житсѧ. ѻ҆ба́че ѻ҆чи́ма твои́ма смо́триши, и҆ воздаѧ́нїе грѣ́шникѡвъ ᲂу҆́зриши. ꙗ҆́кѡ ты̀ гдⷭ҇и, ᲂу҆пова́нїе моѐ, вы́шнѧго положи́лъ є҆сѝ прибѣ́жище твоѐ. не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀. ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. на рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀. на а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ: воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀: и҆ просла́влю є҆го̀: долгото́ю дне́й и҆спо́лню є҆го̀, и҆ ꙗ҆влю̀ є҆мꙋ̀ сп҃се́нїе моѐ."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "А҆ ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Тропа́рь, гла́съ в҃: Сп҃се́нїе содѣ́лалъ є҆сѝ посредѣ̀ землѝ хрⷭ҇тѐ бж҃е, / на крⷭ҇тѣ̀ пречи́стѣи рꙋ́цѣ твоѝ просте́рлъ є҆сѝ, / собира́ѧ всѧ̑ ꙗ҆зы́ки зовꙋ́щыѧ: / гдⷭ҇и, сла́ва тебѣ̀."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ не и҆́мамы дерзнове́нїѧ за премнѡ́гїѧ грѣхѝ на́шѧ, / ты̀ и҆́же ѿ тебѐ ро́ждшагосѧ молѝ бцⷣе дв҃о: / мно́гѡ бо мо́жетъ моле́нїе мт҃рнее ко бл҃госе́рдїю влⷣки. / не пре́зри грѣ́шныхъ мольбы̑ всечⷭ҇таѧ, / ꙗ҆́кѡ млⷭ҇тивъ є҆́сть, и҆ сп҃стѝ могі́й, / и҆́же и҆ страда́ти ѡ҆ на́съ и҆зво́ливый."
 },
 {
  "type": "HEADER",
  "value": "И҆ пое́мъ г҃ тропарѝ ѿ двꙋна́десѧти, гла́съ и҃, повторѧ́юще ѧ҆̀."
 },
 {
  "type": "TEXT",
  "value": "С їѧ̑ глаго́летъ гдⷭ҇ь і҆ꙋде́ѡмъ: / лю́дїе моѝ, что̀ сотвори́хъ ва́мъ; / и҆лѝ чи́мъ ва́мъ стꙋжи́хъ; / слѣпцы̀ ва́шѧ просвѣти́хъ, прокажє́нныѧ ѡ҆чи́стихъ: / мꙋ́жа сꙋ́ща на ѻ҆дрѣ̀ и҆спра́вихъ. / лю́дїе моѝ, что̀ сотвори́хъ ва́мъ; / и҆лѝ что̀ мнѣ̀ возда́сте; / за ма́ннꙋ же́лчь, за во́дꙋ ѻ҆́цетъ: / за є҆́же люби́ти мѧ̀, ко крⷭ҇тꙋ́ мѧ пригвозди́сте. / ктомꙋ̀ не терплю̀ про́чее, / призовꙋ̀ моѧ̑ ꙗ҆зы́ки, / и҆ ті́и мѧ̀ просла́вѧтъ со ѻ҆ц҃е́мъ и҆ дх҃омъ, / и҆ а҆́зъ и҆̀мъ да́рꙋю живо́тъ вѣ́чный."
 },
 {
  "type": "TEXT",
  "value": "Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта."
 },
 {
  "type": "TEXT",
  "value": "З аконополо́жницы і҆и҃лєвы, і҆ꙋде́є и҆ фарїсе́є, / ли́къ а҆пⷭ҇льскїй вопїе́тъ къ ва́мъ: / сѐ хра́мъ, є҆го́же вы̀ разори́сте: / сѐ а҆́гнецъ, є҆го́же вы̀ распѧ́сте, гро́бꙋ преда́сте: / но вла́стїю свое́ю воскр҃се. / не льсти́тесѧ і҆ꙋде́є: / то́й бо є҆́сть, и҆́же въ мо́ри сп҃сы́й, / и҆ въ пꙋсты́ни пита́вый, / то́й є҆́сть живо́тъ, и҆ свѣ́тъ, и҆ ми́ръ мі́рови."
 },
 {
  "type": "TEXT",
  "value": "Сті́хъ: Сп҃си́ мѧ бж҃е, ꙗ҆́кѡ внидо́ша во́ды до дꙋшѝ моеѧ̀."
 },
 {
  "type": "TEXT",
  "value": "Па́ки тꙋ́южде стїхи́рꙋ."
 },
 {
  "type": "TEXT",
  "value": "Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Гла́съ є҃: Прїиди́те хрⷭ҇тоно́снїи лю́дїе, / ви́димъ, что̀ совѣща̀ і҆ꙋ́да преда́тель, / со сщ҃е́нники беззако́нными, на сп҃са на́шего: / дне́сь пови́нна сме́рти, безсме́ртнаго сло́ва сотвори́ша, / и҆ пїла́тꙋ преда́вше, на мѣ́стѣ ло́бнѣмъ распѧ́ша. / и҆ сїѧ̑ стражда̀ вопїѧ́ше сп҃съ на́шъ, глаго́лѧ: / ѡ҆ста́ви и҆̀мъ ѻ҆́ч҃е грѣ́хъ се́й, / да разꙋмѣ́ютъ ꙗ҆зы́цы и҆з̾ ме́ртвыхъ моѐ воскрⷭ҇нїе."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "TEXT",
  "value": "И҆ кади́тъ дїа́конъ є҆ѵⷢ҇лїе и҆ і҆кѡ́ны, и҆ настоѧ́телѧ, и҆ ли́ки то́кмѡ."
 },
 {
  "type": "TEXT",
  "value": "Дїа́конъ: Премꙋ́дрость. Во́нмемъ."
 },
 {
  "type": "TEXT",
  "value": "Чте́цъ: Прокі́менъ, гла́съ д҃: Гдⷭ҇и гдⷭ҇ь на́шъ, / ꙗ҆́кѡ чꙋ́дно и҆́мѧ твоѐ по все́й землѝ. Сті́хъ: Ꙗ҆́кѡ взѧ́тсѧ великолѣ́пїе твоѐ превы́ше нб҃съ."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Прⷪ҇ро́чества и҆са́їина чте́нїе. [Гл. н҃в, ст. г҃і-є҃і: гл. н҃г, ст. а҃-в҃і: гл. н҃д, ст. а҃.]"
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "TEXT",
  "value": "Чте́цъ: Та́кѡ глаго́летъ гдⷭ҇ь: сѐ ᲂу҆разꙋмѣ́етъ ѻ҆́трокъ мо́й, и҆ вознесе́тсѧ и҆ просла́витсѧ ѕѣлѡ̀. ꙗ҆́коже ᲂу҆жа́снꙋтсѧ ѡ҆ тебѣ̀ мно́зи, та́кѡ ѡ҆безсла́витсѧ ѿ человѣ̑къ ви́дъ тво́й, и҆ сла́ва твоѧ̀ ѿ сынѡ́въ человѣ́ческихъ. та́кѡ ᲂу҆дивѧ́тсѧ ꙗ҆зы́цы мно́зи ѡ҆ не́мъ, и҆ заградѧ́тъ ца́рїе ᲂу҆ста̀ своѧ̑. ꙗ҆́кѡ и҆̀мже не возвѣсти́сѧ ѡ҆ не́мъ, ᲂу҆́зрѧтъ, и҆ и҆̀же не слы́шаша, ᲂу҆разꙋмѣ́ютъ. гдⷭ҇и, кто̀ вѣ́рова слꙋ́хꙋ на́шемꙋ; и҆ мы́шца гдⷭ҇нѧ комꙋ̀ ѿкры́сѧ; возвѣсти́хомъ, ꙗ҆́кѡ ѻ҆троча̀ пред̾ ни́мъ, ꙗ҆́кѡ ко́рень въ землѝ жа́ждꙋщей, нѣ́сть ви́да є҆мꙋ̀, нижѐ сла́вы: и҆ ви́дѣхомъ є҆го̀, и҆ не и҆мѧ́ше ви́да, ни добро́ты: но ви́дъ є҆гѡ̀ безче́стенъ, ᲂу҆ма́ленъ па́че всѣ́хъ сынѡ́въ человѣ́ческихъ: человѣ́къ въ ꙗ҆́звѣ сы́й, и҆ вѣ́дый терпѣ́ти болѣ́знь, ꙗ҆́кѡ ѿврати́сѧ лицѐ є҆гѡ̀, безче́стно бы́сть и҆ не вмѣни́сѧ. се́й грѣхѝ на́шѧ но́ситъ, и҆ ѡ҆ на́съ болѣ́знꙋетъ, и҆ мы̀ вмѣни́хомъ є҆го̀ бы́ти въ трꙋдѣ̀, и҆ въ ꙗ҆́звѣ ѿ бг҃а, и҆ во ѡ҆ѕлобле́нїи. то́й же ꙗ҆́звенъ бы́сть за грѣхѝ на́шѧ, и҆ мꙋ́ченъ бы́сть за беззакѡ́нїѧ на́шѧ, наказа́нїе ми́ра на́шегѡ на не́мъ, ꙗ҆́звою є҆гѡ̀ мы̀ и҆сцѣлѣ́хомъ. всѝ ꙗ҆́кѡ ѻ҆́вцы заблꙋди́хомъ: человѣ́къ ѿ пꙋтѝ своегѡ̀ заблꙋдѝ, и҆ гдⷭ҇ь предадѐ є҆го̀ грѣ̑хъ ра́ди на́шихъ. и҆ то́й, занѐ ѡ҆ѕло́бленъ бы́сть, не ѿверза́етъ ᲂу҆́стъ свои́хъ: ꙗ҆́кѡ ѻ҆вча̀ на заколе́нїе веде́сѧ, и҆ ꙗ҆́кѡ а҆́гнецъ пред̾ стригꙋ́щимъ є҆го̀ безгла́сенъ, та́кѡ не ѿверза́етъ ᲂу҆́стъ свои́хъ. во смире́нїи є҆гѡ̀ сꙋ́дъ є҆гѡ̀ взѧ́тсѧ, ро́дъ же є҆гѡ̀ кто̀ и҆сповѣ́сть; ꙗ҆́кѡ взе́млетсѧ ѿ землѝ живо́тъ є҆гѡ̀, ра́ди беззако́нїй люде́й мои́хъ веде́сѧ на сме́рть. и҆ да́мъ лꙋка̑выѧ вмѣ́стѡ погребе́нїѧ є҆гѡ̀. и҆ бога̑тыѧ вмѣ́стѡ сме́рти є҆гѡ̀: ꙗ҆́кѡ беззако́нїѧ не сотворѝ, нижѐ ѡ҆брѣ́тесѧ ле́сть во ᲂу҆стѣ́хъ є҆гѡ̀. и҆ гдⷭ҇ь хо́щетъ ѡ҆чи́стити є҆го̀ ѿ ꙗ҆́звы: а҆́ще да́стсѧ ѡ҆ грѣсѣ̀, дꙋша̀ ва́ша ᲂу҆́зритъ сѣ́мѧ долгоживо́тное. и҆ хо́щетъ гдⷭ҇ь рꙋко́ю свое́ю ѿѧ́ти болѣ́знь ѿ дꙋшѝ є҆гѡ̀, ꙗ҆ви́ти є҆мꙋ̀ свѣ́тъ, и҆ созда́ти ра́зꙋмомъ, ѡ҆правда́ти првⷣнаго бл҃гослꙋжа́ща мнѡ́гимъ, и҆ грѣхѝ и҆́хъ то́й понесе́тъ. сегѡ̀ ра́ди то́й наслѣ́дитъ мно́гихъ, и҆ крѣ́пкихъ раздѣли́тъ коры̑сти: занѐ предана̀ бы́сть на сме́рть дꙋша̀ є҆гѡ̀, и҆ со беззако́нными вмѣни́сѧ, и҆ то́й грѣхѝ мно́гихъ вознесѐ, и҆ за беззакѡ́нїѧ и҆́хъ пре́данъ бы́сть. возвесели́сѧ непло́ды неражда́ющаѧ, возгласѝ и҆ возопі́й нечревоболѣ́вшаѧ, ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Ко є҆вре́ємъ посла́нїѧ ст҃а́гѡ а҆пⷭ҇ла па́ѵла чте́нїе."
 },
 {
  "type": "TEXT",
  "value": "И҆ па́ки дїа́конъ: Во́нмемъ."
 },
 {
  "type": "HEADER",
  "value": "А҆по́столъ, зача́ло т҃ѕ."
 },
 {
  "type": "TEXT",
  "value": "Чте́цъ: Бра́тїе, ст҃ѧ́й и҆ ѡ҆сщ҃а́емїи, ѿ є҆ди́нагѡ всѝ: є҆ѧ́же ра́ди вины̀ не стыди́тсѧ бра́тїю нарица́ти и҆̀хъ, глаго́лѧ: возвѣщꙋ̀ и҆́мѧ твоѐ бра́тїи мое́й, посредѣ̀ цр҃кве воспою́ тѧ. и҆ па́ки: а҆́зъ бꙋ́дꙋ надѣ́ѧсѧ на́нь. и҆ па́ки: сѐ а҆́зъ и҆ дѣ́ти, ꙗ҆̀же мѝ да́лъ є҆́сть бг҃ъ. поне́же ᲂу҆́бѡ дѣ́ти прїѡбщи́шасѧ пло́ти и҆ кро́ви, и҆ то́й прїи́скреннѣ прїѡбщи́сѧ тѣ́хже, да сме́ртїю ᲂу҆праздни́тъ и҆мꙋ́щаго держа́вꙋ сме́рти, си́рѣчь, дїа́вола: и҆ и҆зба́витъ си́хъ, є҆ли́цы стра́хомъ сме́рти чрез̾ всѐ житїѐ пови́нни бѣ́ша рабо́тѣ. не ѿ а҆́гг҃лъ ᲂу҆́бѡ когда̀ прїе́млетъ, но ѿ сѣ́мене а҆враа́мова прїе́млетъ: ѿню́дꙋже до́лженъ бѣ̀ по всемꙋ̀ подо́битисѧ бра́тїи, да ми́лостивъ бꙋ́детъ и҆ вѣ́ренъ первосщ҃е́нникъ въ тѣ́хъ, ꙗ҆̀же къ бг҃ꙋ, во є҆́же ѡ҆чи́стити грѣхѝ людскі́ѧ. въ не́мже бо пострада̀ са́мъ и҆скꙋше́нъ бы́въ, мо́жетъ и҆ и҆скꙋша́ємымъ помощѝ."
 },
 {
  "type": "TEXT",
  "value": "Сщ҃е́нникъ: Ми́ръ тѝ."
 },
 {
  "type": "TEXT",
  "value": "И҆ чте́цъ: И҆ дх҃ови твоемꙋ̀."
 },
 {
  "type": "TEXT",
  "value": "Дїа́конъ: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа."
 },
 {
  "type": "TEXT",
  "value": "Сщ҃е́нникъ: Ми́ръ всѣ̑мъ."
 },
 {
  "type": "TEXT",
  "value": "Ли́къ: И҆ дх҃ови твоемꙋ̀."
 },
 {
  "type": "TEXT",
  "value": "Сщ҃е́нникъ: Ѿ лꙋкѝ ст҃а́гѡ є҆ѵⷢ҇лїа чте́нїе."
 },
 {
  "type": "TEXT",
  "value": "Ли́къ: Сла́ва тебѣ̀ гдⷭ҇и, сла́ва тебѣ̀."
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "HEADER",
  "value": "Та́же є҆ѵⷢ҇лїе ѿ лꙋкѝ, зача́ло ра҃і."
 },
 {
  "type": "TEXT",
  "value": "В о вре́мѧ ѻ҆́но, ведѧ́хꙋ со і҆и҃сомъ же и҆ и҆́на два̀ ѕлодѣ́ѧ съ ни́мъ ᲂу҆би́ти. и҆ є҆гда̀ прїидо́ша на мѣ́сто нарица́емое ло́бное, тꙋ̀ распѧ́ша є҆го̀, и҆ ѕлодѣ̑ѧ, ѻ҆́ваго ᲂу҆́бѡ ѡ҆деснꙋ́ю, а҆ дрꙋга́го ѡ҆шꙋ́юю. і҆и҃съ же глаго́лаше: ѻ҆́ч҃е, ѿпꙋстѝ и҆̀мъ: не вѣ́дѧтъ бо что̀ творѧ́тъ. раздѣлѧ́юще же ри̑зы є҆гѡ̀, мета́хꙋ жрє́бїѧ. и҆ стоѧ́хꙋ лю́дїе зрѧ́ще. рꙋга́хꙋсѧ же и҆ кнѧ́зи съ ни́ми, глаго́люще: и҆ны̑ѧ спасѐ, да спасе́тъ и҆ себѐ, а҆́ще то́й є҆́сть хрⷭ҇то́съ бж҃їй и҆збра́нный. рꙋга́хꙋсѧ же є҆мꙋ̀ и҆ во́ини, пристꙋпа́юще, и҆ ѻ҆́цетъ придѣ́юще є҆мꙋ̀. и҆ глаго́лахꙋ: а҆́ще ты̀ є҆сѝ цр҃ь і҆ꙋде́йскъ, спаси́сѧ са́мъ. бѣ́ же и҆ написа́нїе напи́сано над̾ ни́мъ писмены̀ є҆́ллинскими, и҆ ри́мскими, и҆ є҆вре́йскими: се́й є҆́сть цр҃ь і҆ꙋде́йскъ. є҆ди́нъ же ѿ ѡ҆бѣ́шеною ѕлодѣ̑ю хꙋ́лѧше є҆го̀, глаго́лѧ: а҆́ще ты̀ є҆сѝ хрⷭ҇то́съ, спасѝ себѐ и҆ на́ю. ѿвѣща́въ же дрꙋгі́й, преща́ше є҆мꙋ̀, глаго́лѧ: ни лѝ ты̀ бои́шисѧ бг҃а, ꙗ҆́кѡ въ то́мже ѡ҆сꙋжде́нъ є҆сѝ; и҆ мы̀ ᲂу҆́бѡ въ пра́вдꙋ, достѡ́йнаѧ бо по дѣлѡ́мъ на́ю воспрїе́млева: се́й же ни є҆ди́нагѡ ѕла̀ сотворѝ. и҆ глаго́лаше і҆и҃сови: помѧни́ мѧ гдⷭ҇и, є҆гда̀ прїи́деши во црⷭ҇твїи сѝ. и҆ речѐ є҆мꙋ̀ і҆и҃съ: а҆ми́нь глаго́лю тебѣ̀, дне́сь со мно́ю бꙋ́деши въ раѝ. бѣ́ же ча́съ ꙗ҆́кѡ шесты́й, и҆ тма̀ бы́сть по все́й землѝ до часа̀ девѧ́тагѡ. и҆ поме́рче со́лнце, и҆ завѣ́са цр҃ко́внаѧ раздра́сѧ посредѣ̀. и҆ возгла́шь гла́сомъ ве́лїимъ і҆и҃съ речѐ: ѻ҆́ч҃е, въ рꙋ́цѣ твоѝ предаю̀ дх҃ъ мо́й: и҆ сїѧ̑ ре́къ и҆́здше. ви́дѣвъ же со́тникъ бы́вшее, просла́ви бг҃а, глаго́лѧ: вои́стиннꙋ человѣ́къ се́й пра́веденъ бѣ̀. и҆ всѝ прише́дшїи наро́ди на позо́ръ се́й, ви́дѧще быва̑ющаѧ, бїю́ще пє́рси своѧ̀, возвраща́хꙋсѧ. стоѧ́хꙋ же всѝ зна́емїи є҆гѡ̀ и҆здале́ча, и҆ жєны̀ спослѣ́дствовавшыѧ є҆мꙋ̀ ѿ галїле́и, зрѧ́ще си́хъ."
 },
 {
  "type": "TEXT",
  "value": "Ли́къ: Сла́ва долготерпѣ́нїю твоемꙋ̀ гдⷭ҇и."
 },
 {
  "type": "TEXT",
  "value": "И҆ посе́мъ чте́нїе."
 },
 {
  "type": "TEXT",
  "value": "Та́же чте́цъ: Ско́рѡ да предварѧ́тъ ны̀ щедрѡ́ты твоѧ̑ гдⷭ҇и, / ꙗ҆́кѡ ѡ҆бнища́хомъ ѕѣлѡ̀: / помозѝ на́мъ бж҃е сп҃се на́шъ, / сла́вы ра́ди и҆́мене твоегѡ̀ гдⷭ҇и, и҆зба́ви на́съ, / и҆ ѡ҆чи́сти грѣхѝ на́шѧ, и҆́мене ра́ди твоегѡ̀."
 },
 {
  "type": "TEXT",
  "value": "С т҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "П рест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Ѻ҆́ ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "Н а́съ ра́ди распѧ́таго прїиди́те всѝ воспои́мъ, / того́ бо ви́дѣ мр҃і́а на дре́вѣ, и҆ глаго́лаше: / а҆́ще и҆ распѧ́тїе терпи́ши, / ты̀ є҆сѝ сн҃ъ и҆ бг҃ъ мо́й."
 },
 {
  "type": "TEXT",
  "value": "Та́же, Гдⷭ҇и поми́лꙋй, м҃."
 },
 {
  "type": "TEXT",
  "value": "И҆́ же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща̑нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чⷭ҇ тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ."
 },
 {
  "type": "TEXT",
  "value": "И҆́ менемъ гдⷭ҇нимъ бл҃гословѝ, ѻ҆́тче."
 },
 {
  "type": "TEXT",
  "value": "Сщ҃е́нникъ возгла́съ: Бж҃е, ᲂу҆ще́дри ны̀, и҆ бл҃гословѝ ны̀, просвѣтѝ лицѐ твоѐ на ны̀, и҆ поми́лꙋй ны̀."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Та́же, мл҃тва ст҃а́гѡ вели́кагѡ васі́лїа:"
 },
 {
  "type": "TEXT",
  "value": "Б ж҃е и҆ гдⷭ҇и си́лъ, и҆ всеѧ̀ тва́ри содѣ́телю, и҆́же за милосе́рдїе безприкла́дныѧ ми́лости твоеѧ̀, є҆диноро́днаго сн҃а твоего̀, гдⷭ҇а на́шего і҆и҃са хрⷭ҇та̀ низпосла́вый на сп҃се́нїе ро́да на́шегѡ: и҆ чⷭ҇тны́мъ є҆гѡ̀ крⷭ҇то́мъ, рꙋкописа́нїе грѣ̑хъ на́шихъ растерза́вый, и҆ побѣди́вый тѣ̑мъ нача̑ла и҆ вла̑сти тьмы̀: са́мъ влⷣко чл҃вѣколю́бче, прїимѝ и҆ на́съ грѣ́шныхъ бл҃года́рствєнныѧ сїѧ̑ и҆ молє́бныѧ моли̑твы, и҆ и҆зба́ви на́съ ѿ всѧ́кагѡ всегꙋби́тельнагѡ и҆ мра́чнагѡ прегрѣше́нїѧ, и҆ всѣ́хъ ѡ҆ѕло́бити на́съ и҆́щꙋщихъ, ви́димыхъ и҆ неви́димыхъ вра̑гъ. пригвоздѝ стра́хꙋ твоемꙋ̀ плѡ́ти на́шѧ, и҆ не ᲂу҆клонѝ серде́цъ на́шихъ въ словеса̀, и҆лѝ помышлє́нїѧ лꙋка́вствїѧ, но любо́вїю твое́ю ᲂу҆ѧзвѝ дꙋ́шы на́шѧ: да къ тебѣ̀ всегда̀ взира́юще, и҆ є҆́же ѿ тебѐ свѣ́томъ наставлѧ́еми, тебѐ непристꙋ́пнаго и҆ присносꙋ́щнаго зрѧ́ще свѣ́та, непреста́нное тебѣ̀ и҆сповѣ́данїе, и҆ бл҃годаре́нїе возсыла́емъ безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "HEADER",
  "value": "Совокꙋплѧ́емъ же и҆ девѧ́тый ча́съ."
 },
 {
  "type": "TEXT",
  "value": "Глаго́лемъ: Прїиди́те, поклони́мсѧ цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ."
 },
 {
  "type": "TEXT",
  "value": "П рїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ."
 },
 {
  "type": "HEADER",
  "value": "Ѱало́мъ ѯ҃и."
 },
 {
  "type": "TEXT",
  "value": "С п҃си́ мѧ, бж҃е, ꙗ҆́кѡ внидо́ша во́ды до дꙋшѝ моеѧ̀. ᲂу҆глѣбо́хъ въ тимѣ́нїи глꙋбины̀, и҆ нѣ́сть постоѧ́нїѧ: прїидо́хъ во глꙋбины̑ морскі̑ѧ, и҆ бꙋ́рѧ потопи́ мѧ. ᲂу҆трꙋди́хсѧ зовы́й, и҆змолчѐ горта́нь мо́й: и҆счезо́стѣ ѻ҆́чи моѝ, ѿ є҆́же ᲂу҆пова́ти мѝ на бг҃а моего̀. ᲂу҆мно́жишасѧ па́че вла̑съ главы̀ моеѧ̀ ненави́дѧщїи мѧ̀ тꙋ́не: ᲂу҆крѣпи́шасѧ вразѝ моѝ, и҆згонѧ́щїи мѧ̀ непра́веднѡ: ꙗ҆̀же не восхища́хъ, тогда̀ воздаѧ́хъ. бж҃е, ты̀ ᲂу҆вѣ́дѣлъ є҆сѝ безꙋ́мїе моѐ, и҆ прегрѣшє́нїѧ моѧ̑ ѿ тебє̀ не ᲂу҆таи́шасѧ. да не постыдѧ́тсѧ ѡ҆ мнѣ̀ терпѧ́щїи тебѐ, гдⷭ҇и, гдⷭ҇и си́лъ: нижѐ да посра́мѧтсѧ ѡ҆ мнѣ̀ и҆́щꙋщїи тебѐ, бж҃е і҆и҃левъ. ꙗ҆́кѡ тебє̀ ра́ди претерпѣ́хъ поноше́нїе, покры̀ срамота̀ лицѐ моѐ. чꙋ́ждь бы́хъ бра́тїи мое́й и҆ стра́ненъ сыновѡ́мъ ма́тере моеѧ̀: ꙗ҆́кѡ ре́вность до́мꙋ твоегѡ̀ снѣде́ мѧ, и҆ поношє́нїѧ поносѧ́щихъ тѝ нападо́ша на мѧ̀. и҆ покры́хъ посто́мъ дꙋ́шꙋ мою̀, и҆ бы́сть въ поноше́нїе мнѣ̀: и҆ положи́хъ ѡ҆дѣѧ́нїе моѐ вре́тище, и҆ бы́хъ и҆̀мъ въ при́тчꙋ. ѡ҆ мнѣ̀ глꙋмлѧ́хꙋсѧ сѣдѧ́щїи во вратѣ́хъ, и҆ ѡ҆ мнѣ̀ поѧ́хꙋ пїю́щїи вїно̀. а҆́зъ же моли́твою мое́ю къ тебѣ̀, бж҃е: вре́мѧ бл҃говоле́нїѧ, бж҃е: во мно́жествѣ млⷭ҇ти твоеѧ̀ ᲂу҆слы́ши мѧ̀, во и҆́стинѣ сп҃се́нїѧ твоегѡ̀. сп҃си́ мѧ ѿ бре́нїѧ, да не ᲂу҆глѣ́бнꙋ: да и҆зба́влюсѧ ѿ ненави́дѧщихъ мѧ̀ и҆ ѿ глꙋбо́кихъ во́дъ. да не потопи́тъ менѐ бꙋ́рѧ водна́ѧ, нижѐ да пожре́тъ менѐ глꙋбина̀, нижѐ сведе́тъ ѡ҆ мнѣ̀ рове́нникъ ᲂу҆́стъ свои́хъ. ᲂу҆слы́ши мѧ̀, гдⷭ҇и, ꙗ҆́кѡ бл҃га млⷭ҇ть твоѧ̀: по мно́жествꙋ щедро́тъ твои́хъ при́зри на мѧ̀. не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀: ско́рѡ ᲂу҆слы́ши мѧ̀. вонмѝ дꙋшѝ мое́й и҆ и҆зба́ви ю҆̀: вра̑гъ мои́хъ ра́ди и҆зба́ви мѧ̀. ты́ бо вѣ́си поноше́нїе моѐ, и҆ стꙋ́дъ мо́й, и҆ срамотꙋ̀ мою̀: пред̾ тобо́ю всѝ ѡ҆скорблѧ́ющїи мѧ̀. поноше́нїе ча́ѧше дꙋша̀ моѧ̀ и҆ стра́сть: и҆ жда́хъ соскорбѧ́щагѡ, и҆ не бѣ̀, и҆ ᲂу҆тѣша́ющихъ, и҆ не ѡ҆брѣто́хъ. и҆ да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта. да бꙋ́детъ трапе́за и҆́хъ пред̾ ни́ми въ сѣ́ть и҆ въ воздаѧ́нїе и҆ въ собла́знъ. да помрача́тсѧ ѻ҆́чи и҆́хъ, є҆́же не ви́дѣти, и҆ хребе́тъ и҆́хъ вы́нꙋ слѧцы̀. проле́й на нѧ̀ гнѣ́въ тво́й, и҆ ꙗ҆́рость гнѣ́ва твоегѡ̀ да пости́гнетъ и҆̀хъ. да бꙋ́детъ дво́ръ и҆́хъ пꙋ́стъ, и҆ въ жили́щахъ и҆́хъ да не бꙋ́детъ живы́й. занѐ є҆го́же ты̀ порази́лъ є҆сѝ, ті́и погна́ша, и҆ къ болѣ́зни ꙗ҆́звъ мои́хъ приложи́ша. приложѝ беззако́нїе къ беззако́нїю и҆́хъ, и҆ да не вни́дꙋтъ въ пра́вдꙋ твою̀. да потребѧ́тсѧ ѿ кни́ги живы́хъ, и҆ съ првⷣными да не напи́шꙋтсѧ. ни́щъ и҆ болѧ́й є҆́смь а҆́зъ: сп҃се́нїе твоѐ, бж҃е, да прїи́метъ мѧ̀. восхвалю̀ и҆́мѧ бг҃а моегѡ̀ съ пѣ́снїю, возвели́чꙋ є҆го̀ во хвале́нїи: и҆ ᲂу҆го́дно бꙋ́детъ бг҃ꙋ па́че тельца̀ ю҆́на, ро́ги и҆зносѧ́ща и҆ па́знѡкти. да ᲂу҆́зрѧтъ ни́щїи и҆ возвеселѧ́тсѧ: взыщи́те бг҃а, и҆ жива̀ бꙋ́детъ дꙋша̀ ва́ша. ꙗ҆́кѡ ᲂу҆слы́ша ᲂу҆бѡ́гїѧ гдⷭ҇ь, и҆ ѡ҆кова̑нныѧ своѧ̑ не ᲂу҆ничижѝ. да восхва́лѧтъ є҆го̀ нб҃са̀ и҆ землѧ̀, мо́ре и҆ всѧ̑ живꙋ̑щаѧ въ не́мъ. ꙗ҆́кѡ бг҃ъ сп҃се́тъ сїѡ́на, и҆ сози́ждꙋтсѧ гра́ди і҆ꙋде́йстїи, и҆ вселѧ́тсѧ та́мѡ и҆ наслѣ́дѧтъ и҆̀: и҆ сѣ́мѧ рабѡ́въ твои́хъ ᲂу҆держи́тъ и҆̀, и҆ лю́бѧщїи и҆́мѧ твоѐ вселѧ́тсѧ въ не́мъ."
 },
 {
  "type": "HEADER",
  "value": "Ѱало́мъ ѯ҃ѳ."
 },
 {
  "type": "TEXT",
  "value": "Б ж҃е, въ по́мощь мою̀ вонмѝ: гдⷭ҇и, помощи́ ми потщи́сѧ. да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀, да возвратѧ́тсѧ вспѧ́ть и҆ постыдѧ́тсѧ хотѧ́щїи мѝ ѕла̑ѧ: да возратѧ́тсѧ а҆́бїе стыдѧ́щесѧ глаго́лющїи мѝ: бла́гоже, бла́гоже. да возра́дꙋютсѧ и҆ возвеселѧ́тсѧ ѡ҆ тебѣ̀ всѝ и҆́щꙋщїи тебѐ, бж҃е: и҆ да глаго́лютъ вы́нꙋ, да возвели́читсѧ гдⷭ҇ь, лю́бѧщїи сп҃се́нїе твоѐ. а҆́зъ же ни́щъ є҆́смь и҆ ᲂу҆бо́гъ, бж҃е, помози́ ми: помо́щникъ мо́й и҆ и҆зба́витель мо́й є҆сѝ ты̀, гдⷭ҇и, не закоснѝ."
 },
 {
  "type": "HEADER",
  "value": "Ѱало́мъ п҃є."
 },
 {
  "type": "TEXT",
  "value": "П риклонѝ гдⷭ҇и ᲂу҆́хо твоѐ, и҆ ᲂу҆слы́ши мѧ̀, ꙗ҆́кѡ ни́щъ и҆ ᲂу҆бо́гъ є҆́смь а҆́зъ. сохранѝ дꙋ́шꙋ мою̀, ꙗ҆́кѡ прпⷣбенъ є҆́смь: сп҃сѝ раба̀ твоего̀ бж҃е мо́й, ᲂу҆пова́ющаго на тѧ̀. поми́лꙋй мѧ̀ гдⷭ҇и, ꙗ҆́кѡ къ тебѣ̀ воззовꙋ̀ ве́сь де́нь. возвеселѝ дꙋ́шꙋ раба̀ твоегѡ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. ꙗ҆́кѡ ты̀ гдⷭ҇и, бл҃гъ и҆ кро́токъ, и҆ многомлⷭ҇тивъ всѣ̑мъ призыва́ющымъ тѧ̀. внꙋшѝ гдⷭ҇и мл҃твꙋ мою̀, и҆ вонмѝ гла́сꙋ моле́нїѧ моегѡ̀. въ де́нь ско́рби моеѧ̀ воззва́хъ къ тебѣ̀, ꙗ҆́кѡ ᲂу҆слы́шалъ мѧ̀ є҆сѝ. нѣ́сть подо́бенъ тебѣ̀ въ бозѣ́хъ гдⷭ҇и, и҆ нѣ́сть по дѣлѡ́мъ твои̑мъ. всѝ ꙗ҆зы́цы, є҆ли́ки сотвори́лъ є҆сѝ, прїи́дꙋтъ и҆ покло́нѧтсѧ пред̾ тобо́ю гдⷭ҇и, и҆ просла́вѧтъ и҆́мѧ твоѐ: ꙗ҆́кѡ ве́лїй є҆сѝ ты̀, и҆ творѧ́й чꙋдеса̀, ты̀ є҆сѝ бг҃ъ є҆ди́нъ. наста́ви мѧ̀ гдⷭ҇и, на пꙋ́ть тво́й, и҆ пойдꙋ̀ во и҆́стинѣ твое́й: да возвесели́тсѧ се́рдце моѐ, боѧ́тисѧ и҆́мене твоегѡ̀. и҆сповѣ́мсѧ тебѣ̀ гдⷭ҇и бж҃е мо́й, всѣ́мъ се́рдцемъ мои́мъ, и҆ просла́влю и҆́мѧ твоѐ въ вѣ́къ. ꙗ҆́кѡ млⷭ҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дꙋ́шꙋ мою̀ ѿ а҆́да преиспо́днѣйшагѡ. бж҃е законопрестꙋ̑пницы воста́ша на мѧ̀, и҆ со́нмъ держа́вныхъ взыска́ша дꙋ́шꙋ мою̀, и҆ не предложи́ша тебѐ пред̾ собо́ю. и҆ ты̀ гдⷭ҇и бж҃е мо́й ще́дрый и҆ млⷭ҇тивый долготерпѣли́вый и҆ многомлⷭ҇тивый, и҆ и҆́стинный: при́зри на мѧ̀, и҆ поми́лꙋй мѧ̀: да́ждь держа́вꙋ твою̀ ѻ҆́трокꙋ твоемꙋ̀, и҆ сп҃сѝ сы́на рабы̀ твоеѧ̀. сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ꙗ҆́кѡ ты̀ гдⷭ҇и помо́глъ мѝ, и҆ ᲂу҆тѣ́шилъ мѧ̀ є҆сѝ."
 },
 {
  "type": "TEXT",
  "value": "И҆ па́ки: Сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ꙗ҆́кѡ ты̀ гдⷭ҇и помо́глъ мѝ, и҆ ᲂу҆тѣ́шилъ мѧ̀ є҆сѝ."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "А҆ ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. Три́жды."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "В и́дѧ разбо́йникъ / нача́льника жи́зни на крⷭ҇тѣ̀ ви́сѧща, глаго́лаше: / а҆́ще не бы̀ бг҃ъ бы́лъ вопло́щьсѧ, и҆́же съ на́ми распны́йсѧ, / не бы̀ со́лнце лꙋчы̀ [своѧ̑] потаи́ло, / нижѐ бы землѧ̀ трепе́щꙋщи трѧсла́сѧ. / но всѧ̑ терпѧ́й, помѧни́ мѧ гдⷭ҇и во црⷭ҇твїи твое́мъ."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "Бг҃оро́диченъ: И҆́же на́съ ра́ди рожде́йсѧ ѿ дв҃ы, / и҆ распѧ́тїе претерпѣ́въ бл҃гі́й, / и҆спрове́ргїй сме́ртїю сме́рть, и҆ воскрⷭ҇нїе ꙗ҆вле́й ꙗ҆́кѡ бг҃ъ, / не пре́зри, ꙗ҆̀же созда́лъ є҆сѝ рꙋко́ю твое́ю: / ꙗ҆вѝ чл҃вѣколю́бїе твоѐ млⷭ҇тиве, / прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀, / и҆ сп҃сѝ сп҃се на́шъ, лю́ди ѿча̑ѧнныѧ."
 },
 {
  "type": "HEADER",
  "value": "И҆ пое́мъ тропарѝ трѝ ѿ двꙋна́десѧти."
 },
 {
  "type": "TEXT",
  "value": "Гла́съ з҃: Оу҆́жасъ бѣ̀ ви́дѣти, / нб҃сѐ и҆ землѝ творца̀ на крⷭ҇тѣ̀ ви́сѧща, / со́лнце поме́ркшее, де́нь же па́ки въ но́щь прело́жшїйсѧ, / и҆ зе́млю и҆з̾ гробѡ́въ возсыла́ющꙋ тѣлеса̀ ме́ртвыхъ: / съ ни́миже покланѧ́емсѧ тебѣ̀, сп҃сѝ на́съ."
 },
 {
  "type": "TEXT",
  "value": "Па́ки то́йже."
 },
 {
  "type": "TEXT",
  "value": "Сті́хъ: Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй."
 },
 {
  "type": "TEXT",
  "value": "Гла́съ в҃: Є҆гда̀ на крⷭ҇тѣ̀ пригвозди́ша беззако́ннїи гдⷭ҇а сла́вы, вопїѧ́ше къ ни̑мъ: / чи́мъ ва́съ ѡ҆скорби́хъ; и҆лѝ ѡ҆ че́мъ прогнѣ́вахъ; / пре́жде менѐ кто̀ ва́съ и҆зба́ви ѿ ско́рби; / и҆ ны́нѣ что̀ мнѣ̀ воздаетѐ, ѕла̑ѧ за бл҃га̑ѧ; / за сто́лпъ ѻ҆́гненный, на крⷭ҇тѣ́ мѧ пригвозди́сте: / за ѻ҆́блакъ, гро́бъ мнѣ̀ и҆скопа́сте: / за ма́ннꙋ, же́лчь мнѣ̀ принесо́сте: / за во́дꙋ, ѻ҆́цтомъ мѧ̀ напои́сте. / про́чее призовꙋ̀ ꙗ҆зы́ки, / и҆ ті́и мѧ̀ просла́вѧтъ / со ѻ҆ц҃е́мъ и҆ со ст҃ы́мъ дх҃омъ."
 },
 {
  "type": "TEXT",
  "value": "Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта."
 },
 {
  "type": "TEXT",
  "value": "И҆ па́ки то́йже."
 },
 {
  "type": "TEXT",
  "value": "Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Гла́съ ѕ҃: Дне́сь ви́ситъ на дре́вѣ, / и҆́же на вода́хъ зе́млю повѣ́сивый: / вѣнце́мъ ѿ те́рнїѧ ѡ҆блага́етсѧ, / и҆́же а҆́гг҃лѡвъ цр҃ь: / въ ло́жнꙋю багрѧни́цꙋ ѡ҆блачи́тсѧ, / ѡ҆дѣва́ѧй нб҃о ѻ҆́блаки: / заꙋше́нїе прїѧ́тъ, и҆́же во і҆ѻрда́нѣ свободи́вый а҆да́ма: / гвоздьмѝ пригвозди́сѧ жени́хъ цр҃ко́вный: / копїе́мъ прободе́сѧ сн҃ъ дв҃ыѧ. / покланѧ́емсѧ стрⷭ҇те́мъ твои̑мъ хрⷭ҇тѐ: / покланѧ́емсѧ стрⷭ҇те́мъ твои̑мъ хрⷭ҇тѐ: / покланѧ́емсѧ стрⷭ҇те́мъ твои̑мъ хрⷭ҇тѐ: / покажѝ на́мъ и҆ сла́вное твоѐ воскрⷭ҇нїе."
 },
 {
  "type": "TEXT",
  "value": "И҆ ны́нѣ, то́йже."
 },
 {
  "type": "TEXT",
  "value": "И҆ кади́тъ дїа́конъ є҆ѵⷢ҇лїе и҆ і҆кѡ́ны, и҆ настоѧ́телѧ, и҆ ли́ки то́кмѡ."
 },
 {
  "type": "TEXT",
  "value": "Дїа́конъ: Премꙋ́дрость. Во́нмемъ."
 },
 {
  "type": "TEXT",
  "value": "Чте́цъ: Прокі́менъ, гла́съ ѕ҃: Речѐ безꙋ́менъ въ се́рдцѣ свое́мъ: / нѣ́сть бг҃ъ. Сті́хъ: Нѣ́сть творѧ́й бл҃госты́ню:"
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Прⷪ҇ро́чества і҆еремі́ина чте́нїе. [Глава̀ а҃і, ст. и҃і-к҃г: глава̀ в҃і, ст. а҃-є҃і.]"
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "TEXT",
  "value": "Чте́цъ: Гдⷭ҇и, скажи́ ми, и҆ ᲂу҆разꙋмѣ́ю: тогда̀ ви́дѣхъ начина̑нїѧ и҆́хъ. а҆́зъ же ꙗ҆́кѡ а҆́гнѧ неѕло́бивое ведо́мое на заколе́нїе не разꙋмѣ́хъ, ꙗ҆́кѡ на мѧ̀ помы́слиша по́мыслъ лꙋка́вый, глаго́люще: прїиди́те и҆ вложи́мъ дре́во въ хлѣ́бъ є҆гѡ̀, и҆ и҆стреби́мъ є҆го̀ ѿ землѝ живꙋ́щихъ, и҆ и҆́мѧ є҆гѡ̀ да не помѧне́тсѧ ктомꙋ̀. гдⷭ҇ь саваѡ́ѳъ, сꙋдѧ́й пра́веднѡ, и҆спытꙋ́ѧй сердца̀ и҆ ᲂу҆трѡ́бы, да ви́ждꙋ мще́нїе твоѐ на ни́хъ, ꙗ҆́кѡ къ тебѣ̀ ѿкры́хъ ѡ҆правда́нїе моѐ. сегѡ̀ ра́ди сїѧ̑ глаго́летъ гдⷭ҇ь на мꙋ́жы а҆наѳѡ́ѳски и҆́щꙋщыѧ дꙋшѝ моеѧ̀, глаго́лющыѧ: да не проро́чествꙋеши ѡ҆ и҆́мени гдⷭ҇ни: а҆́ще ли же нѝ, ᲂу҆́мреши въ рꙋка́хъ на́шихъ. сегѡ̀ ра́ди сїѧ̑ глаго́летъ гдⷭ҇ь си́лъ: сѐ а҆́зъ посѣщꙋ̀ на ни́хъ: ю҆́нѡши и҆́хъ мече́мъ ᲂу҆́мрꙋтъ, и҆ сы́нове и҆́хъ и҆ дщє́ри и҆́хъ сконча́ютсѧ гла́домъ: и҆ ѡ҆ста́нка не бꙋ́детъ ѿ ни́хъ, наведꙋ́ бо ѕла̑ѧ на живꙋ́щыѧ во а҆наѳѡ́ѳѣ, въ лѣ́то посѣще́нїѧ и҆́хъ. пра́веденъ є҆сѝ гдⷭ҇и, ꙗ҆́кѡ ѿвѣща́ю къ тебѣ̀, ѻ҆ба́че сꙋдьбы̑ возглаго́лю къ тебѣ̀: что̀ ꙗ҆́кѡ пꙋ́ть нечести́выхъ спѣ́етсѧ; ᲂу҆гобзи́шасѧ всѝ творѧ́щїи беззакѡ́нїѧ; насади́лъ є҆сѝ и҆̀хъ, и҆ ᲂу҆корени́шасѧ: ча̑да сотвори́ша, и҆ сотвори́ша пло́дъ: бли́зъ є҆сѝ ты̀ ᲂу҆́стъ и҆́хъ, дале́че же ѿ ᲂу҆тро́бъ и҆́хъ. и҆ ты̀, гдⷭ҇и, разꙋмѣ́еши мѧ̀, ви́дѣлъ мѧ̀ є҆сѝ, и҆ и҆скꙋси́лъ є҆сѝ се́рдце моѐ пред̾ тобо́ю, соберѝ и҆̀хъ ꙗ҆́кѡ ѻ҆́вцы на заколе́нїе, и҆ ѡ҆чи́сти и҆̀хъ въ де́нь заколе́нїѧ и҆́хъ. доко́лѣ пла́кати и҆́мать землѧ̀, и҆ трава̀ всѧ̑ се́льнаѧ и҆́зсхнетъ ѿ ѕло́бы живꙋ́щихъ на не́й; погибо́ша ско́ти и҆ пти̑цы, ꙗ҆́кѡ реко́ша: не ᲂу҆́зритъ бг҃ъ пꙋте́й на́шихъ. но́зи твоѝ текꙋ́тъ, и҆ разслаблѧ́ютъ тѧ̀. и҆ди́те, собери́те всѧ̑ ѕвѣ́ри сє́льныѧ, и҆ да прїи́дꙋтъ снѣ́сти є҆̀. па́стырїе мно́зи растли́ша вїногра́дъ мо́й, ѡ҆скверни́ша ча́сть мою̀, да́ша ча́сть жела́емꙋю мою̀ въ пꙋсты́ню непрохо́днꙋю. положи́ша въ потребле́нїе па́гꙋбы. ꙗ҆́кѡ сїѧ̑ глаго́летъ гдⷭ҇ь ѡ҆ всѣ́хъ сосѣдѣ́хъ лꙋка́выхъ, прикаса́ющихсѧ наслѣ́дїю моемꙋ̀, є҆́же раздѣли́хъ лю́демъ мои̑мъ і҆и҃лю: сѐ а҆́зъ и҆сто́ргнꙋ и҆̀хъ ѿ землѝ и҆́хъ, и҆ до́мъ і҆ꙋ́динъ и҆зве́ргнꙋ ѿ среды̀ и҆́хъ. и҆ бꙋ́детъ є҆гда̀ и҆сто́ргнꙋ и҆̀хъ, ѡ҆бращꙋ́сѧ и҆ поми́лꙋю и҆̀хъ, и҆ вселю̀ и҆̀хъ, кого́ждо въ достоѧ́нїе своѐ, и҆ кого́ждо въ зе́млю свою̀."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Чте́цъ: Ко є҆вре́ѡмъ посла́нїѧ ст҃а́гѡ а҆пⷭ҇ла па́ѵла чте́нїе."
 },
 {
  "type": "TEXT",
  "value": "И҆ па́ки дїа́конъ: Во́нмемъ."
 },
 {
  "type": "HEADER",
  "value": "А҆пⷭ҇лъ, зача́ло тк҃д."
 },
 {
  "type": "TEXT",
  "value": "Б ра́тїе, и҆мꙋ́ще дерзнове́нїе входи́ти во ст҃а̑ѧ кро́вїю і҆и҃съ хрⷭ҇то́вою, пꙋте́мъ но́вымъ и҆ живы́мъ, є҆го́же ѡ҆бнови́лъ є҆́сть на́мъ завѣ́сою, си́рѣчь, пло́тїю свое́ю: и҆ і҆ере́а вели́ка над̾ до́момъ бж҃їимъ, да пристꙋпа́емъ со и҆́стиннымъ се́рдцемъ, во и҆звѣще́нїи вѣ́ры, ѡ҆кропле́ни сердца̀ ѿ со́вѣсти лꙋка́выѧ, и҆ и҆змове́ни тѣлеса̀ водо́ю чи́стою, да держи́мъ и҆сповѣ́данїе ᲂу҆пова́нїѧ неꙋкло́нное: вѣ́ренъ бо є҆́сть ѡ҆бѣща́вый. и҆ да разꙋмѣва́емъ дрꙋгъдрꙋ́га въ поѡщре́нїи любвѐ, и҆ до́брыхъ дѣ́лъ, не ѡ҆ставлѧ́юще собра́нїѧ своегѡ̀, ꙗ҆́коже є҆́сть нѣ̑кимъ ѻ҆бы́чай, но дрꙋгъдрꙋ́га подвиза́юще: и҆ толи́кѡ па́че, є҆ли́кѡ ви́дите приближа́ющсѧ де́нь сꙋ́дный. во́лею бо согрѣша́ющымъ на́мъ по прїѧ́тїи ра́зꙋма и҆́стины, ктомꙋ̀ ѡ҆ грѣсѣ́хъ не ѡ҆брѣта́етсѧ же́ртва: стра́шно же нѣ́кое ча́ѧнїе сꙋда̀, и҆ ѻ҆гнѧ̀ ре́вность, поѧ́сти хотѧ́щагѡ сопроти̑вныѧ. ѿве́рглсѧ кто̀ зако́на мѡѷсе́ова, без̾ милосе́рдїѧ при двою̀ и҆лѝ трїе́хъ свидѣ́телехъ ᲂу҆мира́етъ: коли́кѡ, мнитѐ, го́ршїѧ сподо́битсѧ мꙋ́ки, и҆́же сн҃а бж҃їѧ попра́вый, и҆ кро́вь завѣ́тнꙋю скве́рнꙋ возмни́въ, въ не́йже ѡ҆свѧти́сѧ, и҆ дх҃а бл҃года́ти ᲂу҆кори́вый; вѣ́мы бо ре́кшаго: мнѣ̀ ѿмще́нїе, а҆́зъ возда́мъ, глаго́летъ гдⷭ҇ь. и҆ па́ки: ꙗ҆́кѡ сꙋ́дитъ гдⷭ҇ь лю́демъ свои́мъ. стра́шно є҆́сть є҆́же впа́сти въ рꙋ́цѣ бг҃а жива́гѡ."
 },
 {
  "type": "TEXT",
  "value": "Сщ҃е́нникъ: Ми́ръ тѝ."
 },
 {
  "type": "TEXT",
  "value": "И҆ чте́цъ: И҆ дх҃ови твоемꙋ̀."
 },
 {
  "type": "TEXT",
  "value": "Дїа́конъ: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа."
 },
 {
  "type": "TEXT",
  "value": "Сщ҃е́нникъ: Ми́ръ всѣ̑мъ."
 },
 {
  "type": "TEXT",
  "value": "Ли́къ: И҆ дх҃ови твоемꙋ̀."
 },
 {
  "type": "TEXT",
  "value": "Сщ҃е́нникъ: Ѿ і҆ѡа́нна ст҃а́гѡ є҆ѵⷢ҇лїа чте́нїе."
 },
 {
  "type": "TEXT",
  "value": "Ли́къ: Сла́ва тебѣ̀ гдⷭ҇и, сла́ва тебѣ̀."
 },
 {
  "type": "TEXT",
  "value": "Дїа́конъ: Во́нмемъ."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло н҃ѳ, ѯ҃, ѯ҃а."
 },
 {
  "type": "TEXT",
  "value": "В о вре́мѧ ѻ҆́но ведо́ша і҆и҃са ѿ каїа́фы въ претѡ́ръ: бѣ́ же ᲂу҆́тро: и҆ ті́и не внидо́ша въ претѡ́ръ, да не ѡ҆сквернѧ́тсѧ, но да ꙗ҆дѧ́тъ фа́скꙋ. и҆зы́де же пїла́тъ къ ни́мъ во́нъ, и҆ речѐ: кꙋ́ю рѣ́чь прино́сите на человѣ́ка сего̀; ѿвѣща́ша и҆ рѣ́ша є҆мꙋ̀: а҆́ще не бы̀ бы́лъ се́й ѕлодѣ́й, не бы́хомъ пре́дали є҆го̀ тебѣ̀. рече́ же и҆̀мъ пїла́тъ: поими́те є҆го̀ вы̀, и҆ по зако́нꙋ ва́шемꙋ сꙋди́те є҆мꙋ̀. рѣ́ша же є҆мꙋ̀ і҆ꙋде́є: на́мъ не досто́итъ ᲂу҆би́ти никогѡ́же. да сло́во і҆и҃сово сбꙋ́детсѧ, є҆́же речѐ, назна́менꙋѧ, ко́ею сме́ртїю хотѧ́ше ᲂу҆мре́ти. вни́де же па́ки пїла́тъ въ претѡ́ръ, и҆ гласѝ і҆и҃са, и҆ речѐ є҆мꙋ̀: ты́ ли є҆сѝ цр҃ь і҆ꙋде́йскъ; ѿвѣща̀ є҆мꙋ̀ і҆и҃съ: ѡ҆ себѣ́ ли ты̀ сїѐ глаго́леши, и҆лѝ и҆ні́и тебѣ̀ реко́ша ѡ҆ мнѣ̀; ѿвѣща̀ пїла́тъ: є҆да̀ а҆́зъ жидови́нъ є҆́смь; ро́дъ тво́й и҆ а҆рхїере́є преда́ша тѧ̀ мнѣ̀, что̀ є҆сѝ сотвори́лъ; ѿвѣща̀ і҆и҃съ: црⷭ҇тво моѐ нѣ́сть ѿ мі́ра сегѡ̀: а҆́ще ѿ мі́ра сегѡ̀ бы́ло бы црⷭ҇тво моѐ, слꙋгѝ моѝ ᲂу҆́бѡ подвиза́лисѧ бы́ша, да не пре́данъ бы́хъ бы́лъ і҆ꙋде́ѡмъ: ны́нѣ же црⷭ҇тво моѐ нѣ́сть ѿсю́дꙋ. рече́ же є҆мꙋ̀ пїла́тъ: ᲂу҆́бѡ цр҃ь ли є҆сѝ ты̀; ѿвѣща̀ і҆и҃съ: ты̀ глаго́леши, ꙗ҆́кѡ цр҃ь є҆́смь а҆́зъ. а҆́зъ на сїѐ роди́хсѧ, и҆ на сїѐ прїидо́хъ въ мі́ръ, да свидѣ́тельствꙋю и҆́стинꙋ: и҆ всѧ́къ, и҆́же є҆́сть ѿ и҆́стины, послꙋ́шаетъ гла́са моегѡ̀. глаго́ла є҆мꙋ̀ пїла́тъ: что́ є҆сть и҆́стина; и҆ сїѐ ре́къ, па́ки и҆зы́де ко і҆ꙋде́ѡмъ, и҆ глаго́ла и҆̀мъ: а҆́зъ ни є҆ди́ныѧ вины̀ ѡ҆брѣта́ю въ не́мъ. є҆́сть же ѻ҆бы́чай ва́мъ, да є҆ди́наго ва́мъ ѿпꙋщꙋ̀ на па́схꙋ: хо́щете ли ᲂу҆̀бо, да ѿпꙋщꙋ̀ ва́мъ цр҃ѧ̀ і҆ꙋде́йска; возопи́ша же па́ки всѝ, глаго́люще: не сего̀, но вара́ввꙋ: бѣ́ же вара́вва разбо́йникъ. тогда̀ ᲂу҆́бѡ пїла́тъ поѧ́тъ і҆и҃са, и҆ бѝ є҆го̀. и҆ во́ини спле́тше вѣне́цъ ѿ те́рнїѧ, возложи́ша є҆мꙋ̀ на главꙋ̀, и҆ въ ри́зꙋ багрѧ́нꙋ ѡ҆блеко́ша є҆го̀. и҆ глаго́лахꙋ: ра́дꙋйсѧ цр҃ю̀ і҆ꙋде́йскїй! и҆ бїѧ́хꙋ є҆го̀ по лани́тома. и҆зы́де же па́ки во́нъ пїла́тъ, и҆ глаго́ла и҆̀мъ: сѐ и҆звожꙋ̀ є҆го̀ ва́мъ во́нъ, да разꙋмѣ́ете, ꙗ҆́кѡ въ не́мъ ни є҆ди́ныѧ вины̀ ѡ҆брѣта́ю. и҆зы́де же во́нъ і҆и҃съ, носѧ̀ терно́венъ вѣне́цъ, и҆ багрѧ́нꙋ ри́зꙋ. и҆ глаго́ла и҆̀мъ: сѐ человѣ́къ. є҆гда́ же ви́дѣша є҆го̀ а҆рхїере́є и҆ слꙋгѝ, возопи́ша глаго́люще: распнѝ, распнѝ є҆го̀. глаго́ла и҆̀мъ пїла́тъ: поими́те є҆го̀ вы̀, и҆ распни́те: а҆́зъ бо не ѡ҆брѣта́ю въ не́мъ вины̀. ѿвѣща́ша є҆мꙋ̀ і҆ꙋде́є: мы̀ зако́нъ и҆́мамы, и҆ по зако́нꙋ на́шемꙋ до́лженъ є҆́сть ᲂу҆мре́ти, ꙗ҆́кѡ себѐ сн҃а бж҃їѧ сотворѝ. є҆гда́ же слы́ша пїла́тъ сїѐ сло́во, па́че ᲂу҆боѧ́сѧ. и҆ вни́де въ претѡ́ръ па́ки, и҆ глаго́ла і҆и҃сови: ѿкꙋ́дꙋ є҆сѝ ты̀; і҆и҃съ же ѿвѣ́та не дадѐ є҆мꙋ̀. глаго́ла же є҆мꙋ̀ пїла́тъ: мнѣ́ ли не глаго́леши; не вѣ́си ли, ꙗ҆́кѡ вла́сть и҆́мамъ распѧ́ти тѧ̀, и҆ вла́сть и҆́мамъ пꙋсти́ти тѧ̀; ѿвѣща̀ і҆и҃съ: не и҆́маши вла́сти ни є҆ди́ныѧ на мнѣ̀, а҆́ще не бы̀ тѝ дано̀ свы́ше. сегѡ̀ ра́ди преда́вый мѧ̀ тебѣ̀, бо́лїй грѣ́хъ и҆́мать. ѿ сегѡ̀ и҆ска́ше пїла́тъ пꙋсти́ти є҆го̀. і҆ꙋде́є же вопїѧ́хꙋ, глаго́люще: а҆́ще сего̀ пꙋ́стиши, нѣ́си дрꙋ́гъ ке́саревъ. всѧ́къ, и҆́же царѧ̀ себѐ творѧ́й, проти́витсѧ ке́сарю. пїла́тъ же слы́шавъ сїѐ сло́во, и҆зведѐ во́нъ і҆и҃са, и҆ сѣ́де на сꙋди́щи, на мѣ́стѣ глаго́лемѣмъ лїѳострѡто́нъ, є҆вре́йски же гавва́ѳа. бѣ́ же пѧто́къ па́сцѣ, ча́съ же ꙗ҆́кѡ шесты́й. и҆ глаго́ла і҆ꙋде́ѡмъ: сѐ цр҃ь ва́шъ. ѻ҆ни́ же вопїѧ́хꙋ: воз̾мѝ, воз̾мѝ распнѝ є҆го̀. глаго́ла и҆̀мъ пїла́тъ: цр҃ѧ́ ли ва́шего распнꙋ̀; ѿвѣща́ша а҆рхїере́є: не и҆́мамы цр҃ѧ̀, то́кмѡ ке́сарѧ. тогда́ же предадѐ є҆го̀ и҆̀мъ, да ра́спнетсѧ. пое́мше же і҆и҃са, и҆ ведо́ша. и҆ носѧ̀ крⷭ҇тъ сво́й, и҆зы́де въ глаго́лемое ло́бное мѣ́сто, є҆́же глаго́летсѧ є҆вре́йски голго́ѳа, и҆дѣ́же пропѧ́ша є҆го̀: и҆ съ ни́мъ и҆́на два̀ сю́дꙋ и҆ сю́дꙋ, посредѣ́ же і҆и҃са. написа́ же и҆ ті̑тла пїла́тъ, и҆ положѝ на крⷭ҇тѣ̀. бѣ́ же напи́сано: і҆и҃съ назѡрѧни́нъ цр҃ь і҆ꙋде́йскїй. сегѡ́ же ті́тла мно́зи что́ша ѿ і҆ꙋдє́й, ꙗ҆́кѡ бли́зъ бѣ̀ мѣ́сто гра́да, и҆дѣ́же пропѧ́ша і҆и҃са: и҆ бѣ̀ напи́сано, є҆вре́йски, гре́чески, ри́мски. глаго́лахꙋ же пїла́тꙋ а҆рхїере́є і҆ꙋде́йстїи: не пишѝ, цр҃ь і҆ꙋде́йскїй: но ꙗ҆́кѡ са́мъ речѐ: цр҃ь є҆́смь і҆ꙋде́йскїй. ѿвѣща̀ пїла́тъ: є҆́же писа́хъ, писа́хъ. во́ини же, є҆гда̀ пропѧ́ша і҆и҃са, прїѧ́ша ри̑зы є҆гѡ̀, и҆ сотвори́ша четы́ри ча́сти, коемꙋ́ждо во́инꙋ ча́сть, и҆ хїтѡ́нъ. бѣ́ же хїтѡ́нъ не шве́нъ, свы́ше и҆стка́нъ ве́сь. рѣ́ша же къ себѣ̀: не предере́мъ є҆гѡ̀, но ме́тнемъ жрє́бїѧ ѡ҆ не́мъ, комꙋ̀ бꙋ́детъ: да сбꙋ́детсѧ писа́нїе глаго́лющее: раздѣли́ша ри̑зы моѧ̀ себѣ̀, и҆ ѡ҆ і҆маті́смѣ мое́й мета́ша жрє́бїѧ. во́ини же ᲂу҆̀бо сїѧ̑ сотвори́ша. стоѧ́хꙋ же при крⷭ҇тѣ̀ і҆и҃совѣ мт҃и є҆гѡ̀, и҆ сестра̀ мт҃ре є҆гѡ̀, марі́а клео́пова, и҆ марі́а магдали́на, і҆и҃съ же ви́дѣвъ мт҃рь, и҆ ᲂу҆ченика̀ стоѧ́ща, є҆го́же люблѧ́ше, глаго́ла мт҃ри свое́й: же́но, сѐ сн҃ъ тво́й. пото́мъ же глаго́ла ᲂу҆ченикꙋ̀: сѐ мт҃и твоѧ̀. и҆ ѿ тогѡ̀ часа̀ поѧ́тъ ю҆̀ ᲂу҆чени́къ во своѧ́си. посе́мъ вѣ́дый і҆и҃съ, ꙗ҆́кѡ всѧ̑ ᲂу҆жѐ соверши́шасѧ, да сбꙋ́детсѧ писа́нїе, глаго́ла: жа́ждꙋ. сосꙋ́дъ же стоѧ́ше по́лнъ ѻ҆́цта: ѻ҆ни́ же и҆спо́лнивше гꙋ́бꙋ ѻ҆́цта, и҆ на тро́сть во́нзше, придѣ́ша ко ᲂу҆стѡ́мъ є҆гѡ̀. є҆гда́ же прїѧ́тъ ѻ҆́цетъ і҆и҃съ, речѐ: соверши́шасѧ, и҆ прекло́нь главꙋ̀, предадѐ дх҃ъ. і҆ꙋде́є же, поне́же пѧто́къ бѣ̀, да не ѡ҆ста́нꙋтъ на крⷭ҇тѣ̀ тѣлеса̀ въ сꙋббѡ́тꙋ: бѣ́ бо вели́къ де́нь тоѧ̀ сꙋббѡ́ты, моли́ша пїла́та, да пребїю́тъ го́лєни и҆́хъ, и҆ во́з̾мꙋтъ. прїидо́ша же во́ини, и҆ пе́рвомꙋ ᲂу҆́бѡ преби́ша го́лєни, и҆ дрꙋго́мꙋ распѧ́томꙋ съ ни́мъ. на і҆и҃са же прише́дше, ꙗ҆́кѡ ви́дѣша є҆го̀ ᲂу҆жѐ ᲂу҆ме́рша, не преби́ша є҆мꙋ̀ го́ленїй: но є҆ди́нъ ѿ вѡ́инъ копїе́мъ ре́бра є҆мꙋ̀ прободѐ, и҆ а҆́бїе и҆зы́де кро́вь и҆ вода̀. и҆ ви́дѣвый свидѣ́тельствова, и҆ и҆́стинно є҆́сть свидѣ́тельство є҆гѡ̀. и҆ то́й вѣ́сть, ꙗ҆́кѡ и҆́стинꙋ глаго́летъ, да вы̀ вѣ́рꙋ и҆́мете. бы́ша бо сїѧ̑, да сбꙋ́детсѧ писа́нїе: ко́сть не сокрꙋши́тсѧ ѿ негѡ̀. и҆ па́ки дрꙋго́е писа́нїе глаго́летъ: воззрѧ́тъ на́нь, є҆го́же прободо́ша."
 },
 {
  "type": "TEXT",
  "value": "Ли́къ: Сла́ва долготерпѣ́нїю твоемꙋ̀ гдⷭ҇и."
 },
 {
  "type": "TEXT",
  "value": "Та́же предлага́етсѧ чте́нїе: Сло́во крⷭ҇тное."
 },
 {
  "type": "TEXT",
  "value": "Та́же чте́цъ: Не преда́ждь на́съ до конца̀, и҆́мене твоегѡ̀ ра́ди, / и҆ не разорѝ завѣ́та твоегѡ̀, / и҆ не ѿста́ви млⷭ҇ти твоеѧ̀ ѿ на́съ, / а҆враа́ма ра́ди возлю́бленнагѡ ѿ тебѐ, / и҆ за і҆саа́ка раба̀ твоего̀, / и҆ і҆и҃лѧ ст҃а́го твоего̀."
 },
 {
  "type": "TEXT",
  "value": "С т҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. Три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "П рест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Ѻ҆́ ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "Н а́съ ра́ди распѧ́таго прїиди́те всѝ воспои́мъ, / того́ бо ви́дѣ мр҃і́а на дре́вѣ, и҆ глаго́лаше: / а҆́ще и҆ распѧ́тїе терпи́ши, / ты̀ є҆сѝ сн҃ъ и҆ бг҃ъ мо́й."
 },
 {
  "type": "TEXT",
  "value": "Та́же, Гдⷭ҇и поми́лꙋй, м҃."
 },
 {
  "type": "TEXT",
  "value": "И҆́ же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща̑нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Г дⷭ҇и поми́лꙋй, три́жды."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чⷭ҇ тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ."
 },
 {
  "type": "TEXT",
  "value": "И҆́ менемъ гдⷭ҇нимъ бл҃гословѝ, ѻ҆́тче."
 },
 {
  "type": "TEXT",
  "value": "Сщ҃е́нникъ возгла́съ: Бж҃е, ᲂу҆ще́дри ны̀, и҆ бл҃гословѝ ны̀, просвѣтѝ лицѐ твоѐ на ны̀, и҆ поми́лꙋй ны̀."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "И҆ мл҃тва:"
 },
 {
  "type": "TEXT",
  "value": "В лⷣко гдⷭ҇и і҆и҃се хрⷭ҇тѐ бж҃е на́шъ, долготерпѣ́вый ѡ҆ на́шихъ согрѣше́нїихъ, и҆ да́же до ны́нѣшнѧгѡ часа̀ приведы́й на́съ, во́ньже на животворѧ́щемъ дре́вѣ ви́сѧ, бл҃горазꙋ́мномꙋ разбо́йникꙋ, и҆́же въ ра́й пꙋтесотвори́лъ є҆сѝ вхо́дъ, и҆ сме́ртїю сме́рть разрꙋши́лъ є҆сѝ, ѡ҆чи́сти на́съ грѣ́шныхъ, и҆ недосто́йныхъ ра̑бъ твои́хъ: согрѣши́хомъ бо и҆ беззако́нновахомъ, и҆ нѣ́смы досто́йни возвестѝ ѻ҆чеса̀ на̑ша, и҆ воззрѣ́ти на высотꙋ̀ нбⷭ҇нꙋю, занѐ ѡ҆ста́вихомъ пꙋ́ть пра́вды твоеѧ̀, и҆ ходи́хомъ въ во́лѧхъ серде́цъ на́шихъ. но мо́лимъ твою̀ безмѣ́рнꙋю бл҃гость, пощадѝ на́съ гдⷭ҇и, по мно́жествꙋ млⷭ҇ти твоеѧ̀, и҆ сп҃сѝ на́съ и҆́мене твоегѡ̀ ра́ди ст҃а́гѡ, ꙗ҆́кѡ и҆счезо́ша въ сꙋетѣ̀ дні́е на́ши. и҆змѝ на́съ и҆з̾ рꙋкѝ сопроти́внагѡ, и҆ ѡ҆ста́ви на́мъ грѣхѝ на́шѧ, и҆ ᲂу҆мертвѝ плотско́е на́ше мꙋдрова́нїе, да ве́тхагѡ ѿложи́вше человѣ́ка, въ но́ваго ѡ҆блеце́мсѧ, и҆ тебѣ̀ поживе́мъ на́шемꙋ влⷣцѣ и҆ бл҃годѣ́телю: и҆ та́кѡ твои̑мъ послѣ́дꙋюще повелѣ́нїємъ, въ вѣ́чный поко́й дости́гнемъ, и҆дѣ́же є҆́сть всѣ́хъ веселѧ́щихсѧ жили́ще. ты́ бо є҆сѝ вои́стиннꙋ и҆́стинное весе́лїе, и҆ ра́дость лю́бѧщихъ тѧ̀ хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "HEADER",
  "value": "И҆з̾ѡбрази́тельнаѧ."
 },
 {
  "type": "HEADER",
  "value": "Та́же бл҃жє́нны ско́рѡ:"
 },
 {
  "type": "TEXT",
  "value": "В о црⷭ҇твїи твое́мъ помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ."
 },
 {
  "type": "TEXT",
  "value": "Б л҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное."
 },
 {
  "type": "TEXT",
  "value": "Б л҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ."
 },
 {
  "type": "TEXT",
  "value": "Б л҃же́ни кро́тцыи, ꙗ҆́кѡ ті́и наслѣ́дѧтъ зе́млю."
 },
 {
  "type": "TEXT",
  "value": "Б л҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ."
 },
 {
  "type": "TEXT",
  "value": "Б л҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ."
 },
 {
  "type": "TEXT",
  "value": "Б л҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ."
 },
 {
  "type": "TEXT",
  "value": "Б л҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ."
 },
 {
  "type": "TEXT",
  "value": "Б л҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное."
 },
 {
  "type": "TEXT",
  "value": "Б л҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди."
 },
 {
  "type": "TEXT",
  "value": "Р а́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ."
 },
 {
  "type": "TEXT",
  "value": "Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "TEXT",
  "value": "П омѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ."
 },
 {
  "type": "TEXT",
  "value": "П омѧнѝ на́съ влⷣко, є҆гда̀ прїи́деши во црⷭ҇твїи твое́мъ."
 },
 {
  "type": "TEXT",
  "value": "П омѧнѝ на́съ ст҃ы́й, є҆гда̀ прїи́деши во црⷭ҇твїи твое́мъ."
 },
 {
  "type": "TEXT",
  "value": "Л и́къ нбⷭ҇ный пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀."
 },
 {
  "type": "TEXT",
  "value": "Сті́хъ: Пристꙋпи́те къ немꙋ̀ и҆ просвѣти́тесѧ, и҆ ли́ца ва̑ша не постыдѧ́тсѧ."
 },
 {
  "type": "TEXT",
  "value": "Л и́къ нбⷭ҇ный пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀."
 },
 {
  "type": "TEXT",
  "value": "Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ."
 },
 {
  "type": "TEXT",
  "value": "Л и́къ ст҃ы́хъ а҆́гг҃лъ и҆ а҆рха̑гг҃лъ, со всѣ́ми нбⷭ҇ными си́лами пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ: и҆спо́лнь нб҃о и҆ землѧ̀ сла́вы твоеѧ̀."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "HEADER",
  "value": "И҆сповѣ́данїе вѣ́ры:"
 },
 {
  "type": "TEXT",
  "value": "В ѣ́рꙋю во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ. и҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. на́съ ра́ди человѣ̑къ, и҆ на́шегѡ ра́ди спасе́нїѧ, сше́дшаго съ нб҃съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочеловѣ́чшасѧ. распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́нна, и҆ воскрⷭ҇шаго въ тре́тїй де́нь по писа́нїємъ. и҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. и҆ па́ки грѧдꙋ́щаго со сла́вою, сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀. и҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. во є҆ди́нꙋ ст҃ꙋ́ю собо́рнꙋю и҆ а҆пⷭ҇льскꙋю цр҃ковь. и҆сповѣ́дꙋю є҆ди́но кр҃ще́нїе, во ѡ҆ставле́нїе грѣхѡ́въ. ча́ю воскрⷭ҇нїѧ ме́ртвыхъ: и҆ жи́зни бꙋ́дꙋщагѡ вѣ́ка. а҆ми́нь."
 },
 {
  "type": "TEXT",
  "value": "Ѡ҆ сла́би, ѡ҆ста́ви, простѝ бж҃е прегрѣшє́нїѧ на̑ша, вѡ́льнаѧ и҆ невѡ́льнаѧ, ꙗ҆̀же въ сло́вѣ и҆ въ дѣ́лѣ, ꙗ҆̀же въ вѣ́дѣнїи и҆ не въ вѣ́дѣнїи, ꙗ҆̀же во днѝ и҆ въ нощѝ, ꙗ҆̀же во ᲂу҆мѣ̀ и҆ въ помышле́нїи: всѧ̑ на́мъ простѝ, ꙗ҆́кѡ бл҃гъ и҆ чл҃вѣколю́бецъ."
 },
 {
  "type": "TEXT",
  "value": "Посе́мъ, Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ."
 },
 {
  "type": "TEXT",
  "value": "Сщ҃е́нникъ: Ꙗ҆́кѡ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Чте́цъ: А҆ми́нь."
 },
 {
  "type": "HEADER",
  "value": "Конда́къ, гла́съ и҃:"
 },
 {
  "type": "TEXT",
  "value": "Н а́съ ра́ди распѧ́таго прїиди́те всѝ воспои́мъ, / того́ бо ви́дѣ мр҃і́а на дре́вѣ, и҆ глаго́лаше: / а҆́ще и҆ распѧ́тїе терпи́ши, / ты̀ є҆сѝ сн҃ъ и҆ бг҃ъ мо́й."
 },
 {
  "type": "TEXT",
  "value": "Та́же, Гдⷭ҇и поми́лꙋй, м҃."
 },
 {
  "type": "TEXT",
  "value": "И҆ мл҃тва: Всест҃а́ѧ трⷪ҇це, є҆диносꙋ́щнаѧ держа́во, нераздѣ́льное црⷭ҇тво, всѣ́хъ бл҃ги́хъ вина̀, бл҃говоли́ же и҆ ѡ҆ мнѣ̀ грѣ́шнѣмъ, ᲂу҆твердѝ, вразꙋмѝ се́рдце моѐ, и҆ всю̀ мою̀ ѿимѝ скве́рнꙋ. просвѣтѝ мою̀ мы́сль, да вы́нꙋ сла́влю, пою̀ и҆ покланѧ́юсѧ, и҆ глаго́лю: є҆ди́нъ ст҃ъ, є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь."
 },
 {
  "type": "TEXT",
  "value": "Б ꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка. Три́жды."
 },
 {
  "type": "TEXT",
  "value": "Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь."
 },
 {
  "type": "HEADER",
  "value": "Ѱало́мъ л҃г."
 },
 {
  "type": "TEXT",
  "value": "Б л҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ᲂу҆стѣ́хъ мои́хъ. ѡ҆ гдⷭ҇ѣ похва́литсѧ дꙋша̀ моѧ̀, да ᲂу҆слы́шатъ кро́тцыи, и҆ возвеселѧ́тсѧ. возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. пристꙋпи́те къ немꙋ̀, и҆ просвѣти́тесѧ, и҆ ли́ца ва̑ша не постыдѧ́тсѧ. се́й ни́щїй воззва̀, и҆ гдⷭ҇ь ᲂу҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. ѡ҆полчи́тсѧ а҆́гг҃лъ гдⷭ҇нь ѻ҆́крестъ боѧ́щихсѧ є҆гѡ̀, и҆ и҆зба́витъ и҆̀хъ. вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ᲂу҆пова́етъ на́нь. бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀. бога́тїи ѡ҆бнища́ша и҆ взалка́ша, взыска́ющїи же гдⷭ҇а не лиша́тсѧ всѧ́кагѡ бл҃га. прїиди́те ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ. кто́ є҆сть человѣ́къ, хотѧ́й живо́тъ, любѧ́й дни̑ ви́дѣти бл҃ги; ᲂу҆держѝ ѧ҆зы́къ тво́й ѿ ѕла̀, и҆ ᲂу҆стнѣ̀ твоѝ є҆́же не глаго́лати льстѝ. ᲂу҆клони́сѧ ѿ ѕла̀, и҆ сотворѝ бл҃го: взыщѝ ми́ра и҆ поженѝ и҆̀. ѻ҆́чи гдⷭ҇ни на пра́вєдныѧ, и҆ ᲂу҆́ши є҆гѡ̀ въ мл҃твꙋ и҆́хъ: Лице́ же гдⷭ҇не на творѧ́щыѧ ѕла̑ѧ, є҆́же потреби́ти ѿ землѝ па́мѧть и҆́хъ. воззва́ша пра́веднїи, и҆ гдⷭ҇ь ᲂу҆слы́ша и҆́хъ, и҆ ѿ всѣ́хъ скорбе́й и҆́хъ и҆зба́ви и҆̀хъ. бли́зъ гдⷭ҇ь сокрꙋше́нныхъ се́рдцемъ, и҆ смирє́нныѧ дꙋ́хомъ сп҃се́тъ. мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. храни́тъ гдⷭ҇ь всѧ̑ кѡ́сти и҆́хъ, ни є҆ди́на ѿ ни́хъ сокрꙋши́тсѧ. сме́рть грѣ́шникѡвъ люта̀, и҆ ненави́дѧщїи пра́веднаго прегрѣша́тъ. и҆зба́витъ гдⷭ҇ь дꙋ́шы ра̑бъ свои́хъ, и҆ не прегрѣша́тъ всѝ ᲂу҆пова́ющїи на него̀."
 },
 {
  "type": "TEXT",
  "value": "Дїа́конъ: Премꙋ́дрость."
 },
 {
  "type": "TEXT",
  "value": "Ли́къ: Досто́йно є҆́сть, ꙗ҆́кѡ вои́стиннꙋ, бл҃жи́ти тѧ̀ бцⷣꙋ, / приснобл҃же́ннꙋю и҆ пренепоро́чнꙋю, и҆ мт҃рь бг҃а на́шегѡ."
 },
 {
  "type": "TEXT",
  "value": "Сщ҃е́нникъ: Прест҃а́ѧ бцⷣе, спасѝ на́съ."
 },
 {
  "type": "TEXT",
  "value": "Ли́къ: Чⷭ҇тнѣ́йшꙋю херꙋві̑мъ, / и҆ сла́внѣйшꙋю без̾ сравне́нїѧ серафі̑мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ."
 },
 {
  "type": "TEXT",
  "value": "Сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀."
 },
 {
  "type": "TEXT",
  "value": "Ли́къ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь. Г дⷭ҇и поми́лꙋй, три́жды. Бл҃гословѝ."
 },
 {
  "type": "HEADER",
  "value": "И҆ ѿпꙋ́стъ:"
 },
 {
  "type": "TEXT",
  "value": "И҆́ же на́съ ра́ди человѣ́кѡвъ и҆ на́шегѡ ра́ди спасе́нїѧ стра̑шныѧ стрⷭ҇ти и҆ животворѧ́щїй крⷭ҇тъ, и҆ во́льное погребе́нїе пло́тїю и҆зво́ливый, хрⷭ҇то́съ и҆́стинный бг҃ъ на́шъ, моли́твами пречи́стыѧ своеѧ̀ мт҃ре, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ человѣколю́бецъ."
 },
 {
  "type": "HEADER",
  "value": "Ли́къ пое́тъ многолѣ́тїе:"
 },
 {
  "type": "TEXT",
  "value": "В ели́каго господи́на и҆ ѻ҆тца̀ на́шего и҆́мⷬ҇къ, / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего и҆́мⷬ҇къ, / митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть] , / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та."
 },
 {
  "type": "TEXT",
  "value": "[зрѝ] Подоба́етъ же и҆ сїѐ вѣ́дати, ꙗ҆́кѡ прїѧ́хомъ въ палесті́нѣ, въ се́й ст҃ы́й де́нь вели́кагѡ пѧтка̀, не твори́ти преждеѡсщ҃е́ннꙋю, нижѐ па́ки соверше́ннꙋю лїтꙋргі́ю, но нижѐ трапе́зꙋ поставлѧ́емъ, нижѐ ꙗ҆ди́мъ въ се́й де́нь распѧ́тїѧ. А҆́ще же кто̀ бꙋ́детъ многоне́мощенъ, и҆лѝ престарѣ́лсѧ, и҆ не могі́й пребы́ти по́стенъ, дае́тсѧ є҆мꙋ̀ хлѣ́бъ и҆ вода̀, по захожде́нїи со́лнца. Си́це бо прїѧ́хомъ ѿ ст҃ы́хъ за́повѣдей ст҃ы́хъ а҆пⷭ҇лъ, не ꙗ҆́сти въ вели́кїй пѧто́къ. гдⷭ҇не бо сло́во, є҆́же речѐ къ фарїсе́ѡмъ гдⷭ҇ь: ꙗ҆́кѡ є҆гда̀ ѿи́метсѧ ѿ ни́хъ жени́хъ, тогда̀ постѧ́тсѧ въ ты̑ѧ дни̑. здѣ̀ бл҃же́ннѣйшїи а҆пⷭ҇ли воспрїѧ́ша, и҆ сїѐ ѡ҆брѧ́щеши во а҆пⷭ҇льскихъ преда́нїихъ. внима́тельнѡ сїѧ̑ проходѧ̀. Но и҆ пра́вильное посла́нїе ст҃ѣ́йшагѡ а҆рхїепⷭ҇кпа а҆леѯандрі́йскагѡ дїонѵ́сїа, ꙗ҆́вѣ сїѐ предпоставлѧ́етъ."
 }
]