[
 {
  "type": "HEADER",
  "value": "І҆аннꙋа́рїа и҃і"
 },
 {
  "type": "HEADER",
  "value": "Па́мѧть и҆́же во ст҃ы́хъ ѻ҆тца̀ на́шегѡ а҆рхїепⷭ҇кпа маѯі́ма но́вагѡ бы́вшагѡ де́спота се́рбѡмъ."
 },
 {
  "type": "HEADER",
  "value": "На ма́лѣй вече́рни, стїхи̑ры маѯі́мꙋ. Гла́съ а҃:"
 },
 {
  "type": "TEXT",
  "value": "Подо́бенъ: Небе́сныхъ чинѡ́въ:"
 },
 {
  "type": "TEXT",
  "value": "Но́въ са́дъ ꙗ҆ви́лсѧ є҆сѝ на́мъ, ѻ҆́тче, насажде́нъ во дворѣ́хъ до́мꙋ бг҃а на́шегѡ, веселѧ́щъ ча̑да твоѧ̑ а҆́ки новора́сльми ма́слиннагѡ дре́ва: мы́ же тѝ прино́симъ ѻ҆́тче вѣнцы̀ многоплетє́нныѧ во и҆́мѧ ᲂу҆се́рдїѧ къ чадолюби́вомꙋ ѻ҆тцꙋ̀. Два́жды."
 },
 {
  "type": "TEXT",
  "value": "Благочести́вагѡ ко́рене блага́ѧ ѿра́сль, ѿ неѧ́ же прозѧбѐ цвѣ́тъ благоꙋха́нный: мѡ́щи бо твоѧ̑ проѧвлѧ́ютъ добродѣ̑тели, и҆̀хъ же мы̀ ѡ҆благоꙋха́юще, восхвалѧ́емъ бг҃а, тебѐ просла́вльшаго, маѯі́ме достоблаже́нне."
 },
 {
  "type": "TEXT",
  "value": "Въ ю҆до́ли ꙗ҆́кѡ крі́нъ процвѣ́лъ є҆сѝ, свѧти́телю, и҆ ꙗ҆́кѡ шипо́къ благоꙋха́еши, се́рдца вѣ́рныхъ ѡ҆благоꙋха́ѧ, и҆ ра́достїю и҆сполнѧ́ѧ. И҆̀же во весе́лїи воспѣва́юще глаго́лютъ: ди́венъ бг҃ъ въ свѧты́хъ свои́хъ."
 },
 {
  "type": "HEADER",
  "value": "Сла́ва, гла́съ ѕ҃."
 },
 {
  "type": "TEXT",
  "value": "Хрⷭ҇то́ва і҆ера́рха воспои́мъ всѝ маѯі́ма, тро́ицы бо свѧты́ѧ держа́вꙋ во свое́мъ ро́дѣ ꙗ҆́снѡ возвѣща́етъ, є҆ди́наго бг҃а въ трїе́хъ ли́цѣхъ нераздѣ́льна: є҆го́же и҆ мо́литъ ѡ҆ на́съ, вѣ́рою соверша́ющихъ па́мѧть є҆гѡ̀."
 },
 {
  "type": "HEADER",
  "value": "И҆ нн҃ѣ, бг҃оро́диченъ."
 },
 {
  "type": "TEXT",
  "value": "А҆рха́гг҃льское сло́во прїѧ́ла є҆сѝ, и҆ херꙋві́мскїй престо́лъ показа́лсѧ є҆сѝ, и҆ на ѡ҆б̾ѧ́тїѧхъ свои́хъ носи́ла є҆сѝ, бцⷣе, наде́ждꙋ дꙋ́шъ на́шихъ."
 },
 {
  "type": "HEADER",
  "value": "На стїхо́внѣ стїхи́ры: гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Ѡ҆ста́вивъ до́мъ земна́гѡ ца́рствїѧ, преблаже́нне маѯі́ме, до́мъ свѧты́ѧ тро́ицы бы́лъ є҆сѝ."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀:"
 },
 {
  "type": "TEXT",
  "value": "Вои́стиннꙋ, ѻ҆́тче, ꙗ҆ви́лсѧ є҆сѝ кꙋпе́цъ предо́блїй, є҆́же стѧжа́въ хрⷭ҇та̀, би́серъ многоцѣ́нный, и҆ того̀ положи́въ во ᲂу҆мѣ̀, дꙋ́шꙋ просвѣти́лъ є҆сѝ."
 },
 {
  "type": "TEXT",
  "value": "Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ."
 },
 {
  "type": "TEXT",
  "value": "Свѣ́тлагѡ и҆ свѧта́гѡ ко́рене, цвѣ́тъ соверше́нїѧ и҆ свѣ́тлости ты̀ бы́лъ є҆сѝ, новоѧвле́нне маѯі́ме, преблаже́нне."
 },
 {
  "type": "HEADER",
  "value": "Сла́ва, гла́съ и҆ подо́бенъ то́йже."
 },
 {
  "type": "TEXT",
  "value": "Маѯі́ма просла́вимъ, ꙗ҆́кѡ слꙋжи́телѧ свѧты́ѧ тро́ицы."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Дв҃о преблаже́ннаѧ, ᲂу҆блажа́емъ тѧ̀ ро́ди человѣ́честїи, ꙗ҆́кѡ роди́ла є҆сѝ сп҃си́телѧ дꙋ́шъ на́шихъ."
 },
 {
  "type": "HEADER",
  "value": "Тропа́рь, гла́съ г҃."
 },
 {
  "type": "TEXT",
  "value": "Стра́нное рожде́нїе и҆ воспита́нїе бы́лъ є҆сѝ ѻ҆́тче, но па́ки водвори́сѧ во вла́сти ᲂу҆ своегѡ̀ наро́да: небе́снагѡ ца́рствїѧ жела́ѧ, земно́е ца́рствїе ѡ҆ста́вилъ є҆сѝ и҆ смире́нїемъ вы́шнее сокро́вище полꙋчи́лъ є҆сѝ, преблаже́нне маѯі́ме: молѝ, мо́лимсѧ, ѿ дꙋша́хъ на́шихъ."
 },
 {
  "type": "HEADER",
  "value": "И҆ нн҃ѣ, бг҃оро́диченъ, по гла́сꙋ."
 },
 {
  "type": "HEADER",
  "value": "На вели́цѣй вече́рни, Пое́мъ: Блаже́нъ мꙋ́жъ, а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ, стїхи́ры на ѕ҃, гла́съ а҃."
 },
 {
  "type": "TEXT",
  "value": "Ѿ младе́нства цѣломꙋ́дрїе возлюби́въ ѻ҆́тче, возрастѐ це́ркви свѣтоза́ренъ цвѣ́тъ, і҆ѡ́сифꙋ подража́ѧ прекра́сне. Живы́й же во и҆ноплеме́нныхъ, соблю́лъ є҆сѝ вѣ́рꙋ цѣ́лꙋ ꙗ҆́кѡ го́лꙋбь, ꙗ҆ви́лсѧ премꙋ́дръ и҆ бг҃оꙋго́денъ. Тѣ́мже и҆ ᲂу҆дивлѧ́емь бы́лъ є҆сѝ ѿ всѣ́хъ, маѯі́ме достоблаже́нне. Два́жды."
 },
 {
  "type": "TEXT",
  "value": "Свѣ́тъ лица̀ твоегѡ̀ ѻ҆́тче, проѧвлѧ́етъ твою̀ дꙋхо́внꙋю благода́ть, красе́нъ бы́въ ко видѣ́нїю, кра́снѣйшїй же дꙋше́ю: твоѧ̑ бо мо́щи ѡ҆благоꙋха́ютъ чꙋ̑вства и҆ ᲂу҆дивлѧ́ютъ, всѧ́къ ра́зꙋмъ, и҆ прославлѧ́ютъ бг҃а просла́вльшаго тѧ̀, ѻ҆́тче на́шъ маѯі́ме: Два́жды."
 },
 {
  "type": "TEXT",
  "value": "Бг҃олюби́вое твоѐ ста́до и҆ вѣ́рныхъ собо́ри, восхвалѧ́емъ тѧ̀, свѧти́телю, занѐ премꙋ́дрымъ свои́мъ ᲂу҆че́нїемъ ѻ҆боѧ̀ ᲂу҆диви́лъ є҆сѝ, по сме́рти же точи́ши и҆сцѣлє́нїѧ. Тѣ́мже и҆сцѣлѝ дꙋ́шы и҆ тѣлеса̀ на̑ша хрⷭ҇то́въ слꙋжи́телю, маѯі́ме преблаже́нне."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Во и҆схо́дѣ ди́внагѡ твоегѡ̀ представле́нїѧ и҆ преселе́нїѧ чи́стыѧ дꙋ́ши твоеѧ̀ честнѣ́йшїй ѻ҆́тче, ᲂу҆зрѣ́лъ є҆сѝ благолѣ̑пна два̀ мꙋ̑жа, сїѧ́юща красото́ю ѻ҆де́ждъ свои́хъ, тѣ́мже лице́мъ свѣ́тлымъ и҆ ѻ҆чи́ма ра́достныма глаго́лалъ є҆сѝ къ ма́тери и҆ ᲂу҆ченикѡ́мъ свои̑мъ: ѿкꙋ́дꙋ прїидо́ша къ на́мъ кра́снїи сі́и мꙋ́жїе; ѻ҆ни́ же разꙋмѣ́вше, бы́вшее посѣще́нїе бж҃їе, возра́довашасѧ, ꙗ҆́кѡ посла̀ бг҃ъ а҆́гг҃лы во ѻ҆́бразѣ а҆ѳана́сїа и҆ кѷрі́лла, ти́хѡ взѧ́ти дꙋ́шꙋ твоѧ̀ ѿ чи́стагѡ тѣ́ла твоегѡ̀, ст҃е свѧти́телю пребл҃же́нне маѯі́ме досточꙋ́дне."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Кто̀ тебѐ не ᲂу҆блажи́тъ, прест҃а́ѧ дв҃о: кто́ ли не воспое́тъ твоегѡ̀ пречи́стагѡ рождества̀, безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, то́йже ѿ тебѐ чи́стыѧ про́йде неизрече́ннѡ вопло́щсѧ, є҆стество́мъ бг҃ъ сы́й, и҆ є҆стество́мъ бы́въ, человѣ́къ на́съ ра́ди, не во двою̀ лицꙋ̀ раздѣлѧ́емый, но во двою̀ є҆стєствꙋ̀ несли́тнѡ познава́емый. Того̀ молѝ чи́стаѧ, всеблаже́ннаѧ, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "Вхо́дъ, прокі́менъ днѐ, и҆ чте́нїѧ г҃."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "Па́мѧть пра́веднагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ чл҃вѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́це є҆ѧ̀: въ шꙋ́йцѣ же є҆ѧ̀ бога́тство и҆ сла́ва. Ѿ ᲂу҆́стъ є҆ѧ̀ и҆схо́дитъ пра́вда, закѡ́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менѐ, ѡ҆ ча̑да, честна̑ѧ бо рекꙋ̀: и҆ бл҃же́нъ чл҃вѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ блгⷣть. Разꙋмѣ́йте ᲂу҆́бѡ неѕло́бивїи кова́рство, ненака́заннїи же, прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̀ лжи̑выѧ. Съ пра́вдою всѝ глагѡ́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "Оу҆ста̀ пра́веднагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ благода̑ти, ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ, ме́рзость пред̾ господє́мъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мо и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрѡсти. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ смє́рти. Оу҆́меръ пра́ведный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Првⷣникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же првⷣныхъ бл҃госпѣ́шное. Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во благослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ."
 },
 {
  "type": "HEADER",
  "value": "Премꙋ́дрѡсти соломѡ́ни чте́нїе."
 },
 {
  "type": "TEXT",
  "value": "Пра́ведникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ жи́вый посредѣ̀ грѣ̑шникъ преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ: Сконча́всѧ вма́лѣ и҆спо́лни лѣ́та дѡ́лга: Оу҆гѡ́дна бо бѣ̀ гдⷭ҇еви дꙋша̀ є҆гѡ̀, сегѡ̀ ра́ди потща́сѧ ѿ сре́ды лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышлє́нїи таково́е, ꙗ҆́кѡ бл҃года́ть и҆ ми́лость въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "На лїті́и стїхи́ры самогла́сны, гла́съ а҃."
 },
 {
  "type": "TEXT",
  "value": "Въ честнѣ́мъ преставле́нїи твое́мъ, ѻ҆́тче на́шъ маѯі́ме собира́етсѧ мно́жество наро́да, стека́ютсѧ и҆́ноцы и҆ всѝ ѿ церко́внагѡ ли́ка та́кожде и҆ въ мїрски́хъ тебѣ̀ послꙋжи́вши и҆ совоинствова́вшїи съ тобо́ю: ѻ҆́бщїй бо пла́чь громогла́сенъ сотвори́ша ѡ҆ тебѣ̀, преподо́бне."
 },
 {
  "type": "TEXT",
  "value": "Твоѝ лю́дїе преподо́бне маѯі́ме, сле́зы точа́ще надгро́бнаѧ тебѣ̀ глаго́лахꙋ: ѿ премꙋ́драгѡ твоегѡ̀ ра́зꙋма, ѻ҆́тче на́шъ преблаже́нне. Помина́ѧ се́й ча́съ, ѡ҆ста́вилъ є҆сѝ на́съ, и҆ ни во что̀ вмѣни́въ сла́вꙋ и҆ красотꙋ̀ житїѧ̀ сегѡ̀ прилѣпи́лсѧ є҆сѝ хрⷭ҇тꙋ̀ Бо́гꙋ, и҆ томꙋ̀ послѣ́довавъ, ѿ негѡ̀ просла́вленъ бы́лъ є҆сѝ."
 },
 {
  "type": "TEXT",
  "value": "Ꙗ҆́кѡ лꙋна̀ заше́дъ въ подзє́мнаѧ, преподо́бне и҆ ꙗ҆́кѡ би́серъ кры́емь въ землѝ вла́жной, ꙗ҆ви́лсѧ є҆сѝ свѧти́телю свѣ́томъ благода́ти дх҃а свѧта́гѡ просвѣще́нъ, и҆сцѣлѧ́ѧ и҆ ѡ҆свѧща́ѧ дꙋ́шы и҆ тѣлеса̀ на́шѧ, новоѧ́вленне маѯі́ме, достосла́вне."
 },
 {
  "type": "HEADER",
  "value": "Сла́ва, гла́съ в҃."
 },
 {
  "type": "TEXT",
  "value": "Ко́ль кра́сное видѣ́нїе и҆мѣ́лъ є҆сѝ пре́дъ и҆схо́домъ дꙋшѝ твоеѧ̀, ѽ преблаже́нне маѯі́ме, предста́ша бо тебѣ̀ пресвѣ́тлїи свѧти́тели и҆ богомꙋ́дрїи ѻ҆тцы̀ а҆ѳана́сїй и҆ кѷрі́ллъ, и҆́мже видѣ́нїемъ ᲂу҆жаси́лъ є҆сѝ ма́терь и҆ ᲂу҆ченикѝ твоѧ̑, лю́демъ же твои̑мъ всенеконе́чнꙋю жа́лость ѡ҆ста́вилъ є҆сѝ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "HEADER",
  "value": "На стїхо́внѣ стїхи́ры самогла́сны, гла́съ а҃."
 },
 {
  "type": "TEXT",
  "value": "Во все́мъ подража́лъ є҆сѝ прароди́телємъ твои̑мъ, свѧти́телю: сѷмеѡ́нꙋ преподо́бномꙋ и҆ са́ввѣ свѧще́нномꙋ. Ѻ҆нѝ бо ца́рство ѡ҆ста́вльше, бога́тство въ рꙋ́цѣ ни́щихъ да́ша, и҆ стра́нствовати и҆зво́ливше, ми́лостива бг҃а себѣ̀ ѡ҆брѣто́ша: тѣ́мже и҆ ѿ хрⷭ҇та̀ бг҃а сла́вꙋ и҆ вѣ́чный поко́й полꙋчи́ша, тебѐ, преподо́бне маѯі́ме совсе́льника и҆мꙋ́ще, и҆́же съ ни́ми и҆ соца́рствꙋеши въ ца́рствїи небе́снѣмъ."
 },
 {
  "type": "TEXT",
  "value": "Сті́хъ: Честна̀ пре́дъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Ве́сь ѡ҆свѧще́нъ бг҃ови, бы́лъ є҆сѝ ѻ҆́тче, трꙋдо́мъ и҆ посто́мъ себѐ ᲂу҆краша́ѧ. Милосты́нѧми же вже́гъ и҆ ᲂу҆ѧсни́въ свѣщꙋ̀ предвари́лъ є҆сѝ жениха̀ хрⷭ҇та̀: съ ни́мже въ черто́зѣ веселѧ́сѧ, всехва́льне свѧти́телю маѯі́ме, молѝ спасти́сѧ дꙋша́мъ на́шымъ."
 },
 {
  "type": "TEXT",
  "value": "Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ."
 },
 {
  "type": "TEXT",
  "value": "Свѧ́те свѧти́телю маѯі́ме, посѣща́й ста́до своѐ, и҆ соблюда́й є҆̀ невреди́мо ѿ волкѡ́въ напа́дающихъ, загражда́ѧ и҆́хъ ѕлокова́рнаѧ ᲂу҆ста̀, ꙗ҆́кѡ да въ ми́рѣ воспѣва́емъ сла́вꙋ твою̀."
 },
 {
  "type": "HEADER",
  "value": "Сла́ва, гла́съ г҃."
 },
 {
  "type": "TEXT",
  "value": "Па́ки на́мъ златоте́чный ні́лъ, лѣ́тною па́мѧтїю прише́дъ, до́брыми восхожде́ньми наводнѧ́етъ златострꙋ́йнаѧ безсме́ртїѧ лїѧ́нїѧ, плододаѧ̀ сла́дкꙋю пи́щꙋ высо́кимъ благовѣща́нїемъ, трⷪ҇цы нераздѣ́льнѣй держа́вѣ ᲂу҆чи́тъ покланѧ́тисѧ, и҆сточа́етъ бж҃е́ственнаѧ ᲂу҆че́нїѧ, вѣ́рныхъ напаѧ́етъ помышле́нїѧ, и҆ мо́литсѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Безъ сѣ́мене ѿ боже́ственнагѡ."
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь, тропа́рь свѧто́мꙋ маѯі́мꙋ, два́жды: Сла́ва, и҆ ны́нѣ, бг҃оро́диченъ гла́са."
 },
 {
  "type": "HEADER",
  "value": "По а҃-й каѳі́смѣ: сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Оу҆диви́сѧ і҆ѡ́сифъ."
 },
 {
  "type": "TEXT",
  "value": "Цѣломꙋ́дрїе і҆ѡ́сифово стѧжа́лъ є҆сѝ, свѧти́телю, и҆ кро́тость дв҃довꙋ. І҆ѡ́сифъ соблю́дъ дѣ́вства цвѣ́тъ, ца́рства сподо́бисѧ, даві́дъ же голїа́ѳа ᲂу҆би́въ, пома́занникъ свѣ́телъ ꙗ҆ви́сѧ. Ты́ же преподо́бне, во все́мъ и҆скꙋше́нъ бы́въ, крѣ́постїю тве́рдагѡ твоегѡ̀ ра́зꙋма неврежде́нъ пребы́лъ є҆сѝ, и҆ потопи́въ мы́сленнаго фараѡ́на, себѐ чи́ста бг҃ꙋ предста́вилъ є҆сѝ. Тѣ́мже и҆ бг҃ъ, ви́дѣвъ чистотꙋ̀ дꙋшѝ твоеѧ̀, преблаже́нне маѯі́ме, на свѣ́щникъ свѧти́тельства возведѐ тѧ̀, просвѣща́ти и҆ ѡ҆свѧща́ти дꙋ́шы на́шѧ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель свѧще́нникѡмъ взыва́ше: дв҃а ражда́етъ, и҆ по рождествѣ̀ па́ки дв҃ою пребыва́етъ."
 },
 {
  "type": "HEADER",
  "value": "По в҃-й каѳі́смѣ, сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ дѣ́вства:"
 },
 {
  "type": "TEXT",
  "value": "Ꙗ҆́коже пред̾ѡпредѣлѝ предвоззва́вый тѧ̀, безсме́ртїѧ ты̀ пред̾ѡбраже́нїе бы́лъ є҆сѝ, низложи́въ благоче́стїю проти̑внаѧ мꙋдрова̑нїѧ, ѻ҆́тче маѯі́ме, правосла́вныхъ похвало̀: тѣ́мже тѧ̀ до́лгꙋ пою́ще, соверша́емъ боже́ственнꙋю па́мѧть твою̀."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ."
 },
 {
  "type": "TEXT",
  "value": "Красотѣ̀ дѣ́вства твоегѡ̀ и҆ пресвѣ́тлой чистотѣ̀ твое́й гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀, недоꙋмѣва́ю и҆ ᲂу҆жаса́юсѧ. Тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ бл҃года́тнаѧ."
 },
 {
  "type": "HEADER",
  "value": "По полѷеле́и сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости сло́ва."
 },
 {
  "type": "TEXT",
  "value": "Премꙋ́дрости рачи́телѧ, маѯі́ма восхва́лимъ, сла́вꙋ земнꙋ́ю ѿло́жша и҆ хрⷭ҇тꙋ̀ цр҃ю̀ послѣ́довавша, вы́шнихъ возжела́вша, ни̑жнѧѧ же ѡ҆ста́вивша, мнѡ́гїѧ ско́рби и҆ бѣ́ды под̾ѧ́вша, и҆згна́нїѧ же и҆ чꙋжестра́нствїѧ всегда̀ любо́вь ко хрⷭ҇тꙋ̀ соблю́дша и҆ томꙋ̀ ᲂу҆подо́бившасѧ, во дворы́ же є҆гѡ̀ все́льшасѧ, мо́лимсѧ, ѻ҆́тче преподо́бне, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ вѣ́рою и҆ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Помышлѧ́ю сꙋ́дъ и҆ бою́сѧ и҆стѧза́нїѧ, трепещꙋ̀ мꙋ́ки и҆ ᲂу҆жаса́юсѧ ѻ҆́гненныѧ болѣ́зни, тмы́ же и҆ та́ртара: ᲂу҆вы̀ что̀ сотворю̀. Стꙋ́дъ ка́кѡ претерплю̀; є҆гда̀ кни̑ги ѿве́рзꙋтсѧ и҆ дѣѧ̑нїѧ ѡ҆блича́тсѧ. Сегѡ̀ ра́ди припа́даю тѝ бцⷣе пречи́стаѧ, тогда̀ предста́ни мѝ, нꙋ́жды ѻ҆́ныѧ и҆з̾има́ющи: тебѐ бо и҆́мамы прибѣ́жище влады́чице."
 },
 {
  "type": "TEXT",
  "value": "Та́же степе́нна пе́рвый а҆нтїфѡ́нъ д҃ гла́са. Прокі́менъ, гла́съ д҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ. Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Всѧ́кое дыха́нїе: Є҆ѵⷢ҇елїе ѿ і҆ѡа́нна, зача́ло л҃ѕ."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра гла́съ ѕ҃."
 },
 {
  "type": "TEXT",
  "value": "Дне́сь весели́тсѧ хрⷭ҇то́ва це́рковь, въ па́мѧти блаже́ннагѡ ѻ҆тца̀ на́шегѡ маѯі́ма. Ѻ҆́нъ бо сла́вꙋ ѡ҆ста́вивъ и҆ кре́стъ взе́мь, послѣ́дова хрⷭ҇тꙋ̀."
 },
 {
  "type": "HEADER",
  "value": "Канѡ́нъ свѧто́мꙋ маѯі́мꙋ, гла́съ д҃, є҆гѡ́же краегране́сїе сїѐ:"
 },
 {
  "type": "TEXT",
  "value": "Восхва́лимъ свѧти́телѧ, хорꙋ́гвꙋ це́ркве."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль крестоѡбра́зныма мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Воспою̀ тебѐ гдⷭ҇и бж҃е мо́й, ꙗ҆́кѡ просла́вилъ є҆сѝ тебѐ просла́вльшаго, маѯі́ма всѣ́ми хвали́маго, са́мъ бо себѐ ѿ младе́нства, ꙗ҆́кѡ ма́слиннꙋю вѣ́твь тебѣ̀ хрⷭ҇тѐ принесѐ, и҆ тебѣ̀ ꙗ҆́кѡ Бо́гꙋ: ѡ҆са́нна вопїе́тъ."
 },
 {
  "type": "TEXT",
  "value": "Воспою̀ тѧ̀, блаже́нне маѯі́ме, ꙗ҆́кѡ є҆ле́емъ ми́лостыни и҆ по́томъ трꙋдѡ́въ свои́хъ ᲂу҆ма́стилъ є҆сѝ себѐ, ѻ҆́тче, и҆ свѣти́льникъ вже́гъ съ мꙋ́дрыми дѣ́вами, въ срѣ́тенїе хрⷭ҇тꙋ̀ женихꙋ̀ во весе́лїе вѣ́чное восте́клъ є҆сѝ."
 },
 {
  "type": "TEXT",
  "value": "Сѷмеѡ́на преподо́бнагѡ и҆ свѧти́телѧ са́ввы ты̀ ꙗ҆ви́лсѧ є҆сѝ, ѻ҆́тче лоза̀ и҆́стиннаѧ, и҆сточа́ѧ вїно̀, спасе́нїѧ, всѣ́хъ вѣ́рныхъ дꙋ́шы веселѧ́ющее, свѧти́телю ѻ҆́тче на́шъ, преблаже́нне маѯі́ме досточꙋ́дне."
 },
 {
  "type": "TEXT",
  "value": "Бг҃оро́диченъ: Совѣ́та превѣ́чнагѡ хра́мъ воздви́глъ є҆сѝ свѧти́телю, а҆рхїстрати́га гаврїи́ла ра́достное провѣща́нїе бцⷣѣ вседне́внѡ воспѣва́ѧ: ра́дꙋйсѧ невѣ́сто неневѣ́стнаѧ."
 },
 {
  "type": "TEXT",
  "value": "Катава́сїѧ: Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀: лю́демъ пѣшемореходѧ́щымъ и҆ бг҃оꙋго́днѡ пою́щымъ, пои́мъ гдⷭ҇е́ви, сла́внѡ бо просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ це́рковь твоѧ̀ хрⷭ҇тѐ зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе."
 },
 {
  "type": "TEXT",
  "value": "Хвала́ми да почти́мъ преблаже́ннаго ѻ҆тца̀, и҆́же небе́снаѧ жела́ѧ ѡ҆ста́ви земна̑ѧ. И҆ ꙗ҆́коже є҆ле́нь тече́тъ жела́ѧ водна́гѡ и҆сто́чника: си́це ᲂу҆се́рднѡ послѣ́довалъ є҆сѝ, ѻ҆́тче, стопа́мъ, прароди́телей свои́хъ."
 },
 {
  "type": "TEXT",
  "value": "Ве́сь ᲂу҆́мъ впери́въ къ высотѣ̀, земна̑ѧ ни во что́ же вмѣни́лъ є҆сѝ, и҆ смире́нїемъ достоблаже́нне маѯі́ме, высѡ́каѧ воспрїѧ́лъ є҆сѝ."
 },
 {
  "type": "TEXT",
  "value": "А҆́ще и҆ и҆згна́нъ бы́лъ є҆сѝ маѯі́ме преподо́бне, ѻ҆би́тели твоегѡ̀ ѻ҆те́чества: но пресла́вный ᲂу҆́бѡ ра́дꙋлъ воево́да, любе́знѡ тебѐ ѻ҆́тче, прїе́млетъ, ра́дꙋѧсѧ дꙋше́ю и҆ красѧ́сѧ вели́чїемъ, ꙗ҆́кѡ дадѐ є҆мꙋ̀ бг҃ъ ѻ҆тца̀ и҆ ᲂу҆чи́телѧ, и҆ спаси́телѧ дꙋше́внаго."
 },
 {
  "type": "TEXT",
  "value": "Бг҃оро́диченъ: Ка́ѧ сїѧ̀ ꙗ҆́же вои́стиннꙋ бли́зъ бг҃а, ꙗ҆́кѡ превозше́дши всѧ̀ а҆́гг҃льскїѧ чи́ны, є҆ди́на добро́тою дѣ́вства сїѧ́ющи, ꙗ҆́кѡ мт҃и вседержи́телѧ."
 },
 {
  "type": "TEXT",
  "value": "Катава́сїа: Оу҆твержде́нїе на тѧ̀ надѣ́ющихсѧ, ᲂу҆твердѝ гдⷭ҇и це́рковь, ю҆́же стѧжа́лъ є҆сѝ че́стною твое́ю кро́вїю."
 },
 {
  "type": "HEADER",
  "value": "Сѣда́ленъ гла́съ и҃:"
 },
 {
  "type": "TEXT",
  "value": "Премꙋ́дрости сло́ва."
 },
 {
  "type": "TEXT",
  "value": "Роди́телѧ и҆ сро́дники, сла́вꙋ же и҆ и҆́же въ сла́вѣ тебѣ̀ слꙋжа́щихъ ѡ҆ста́вилъ є҆сѝ, же́ртвꙋ жи́вꙋ бг҃ови себѐ предста́вивъ, и҆ мно́гихъ вразꙋми́лъ є҆сѝ, пꙋ́ть покаѧ́нїѧ показа́вый, маѯі́ме всеблаже́нне: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва и҆ нн҃ѣ, бг҃оро́диченъ."
 },
 {
  "type": "TEXT",
  "value": "Недомы́сленно и҆ непости́жимо є҆́сть влады́чице бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство, и҆́бо неѡб̾име́ннаго заче́нши родила̀ є҆сѝ пло́тїю ѡ҆бложе́нна ѿ пречⷭ҇тыхъ крове́й твои́хъ є҆го́же всегда̀ чⷭ҇таѧ ꙗ҆́кѡ сн҃а своегѡ̀ молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́нна тѧ̀ ви́дѣвши це́рковь на крестѣ̀, со́лнце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Лю́ди бж҃їѧ возмꙋща́етъ ненави́дѧй добро̀ и҆ ѻ҆бою̀ стратила́тꙋ ра́дꙋла и҆ бо́гдана бли́зъ бы́вшꙋ къ сраже́нїю, ты̀ преподо́бне ѻ҆́тче маѯі́ме, ꙗ҆́кѡ крила́тъ предста́въ ѻ҆бои́мъ полкѡ́мъ ми́ръ да́лъ є҆сѝ. Ѻ҆ни́ же возвраща́ютсѧ во своѧ̑ си, сла́вѧща бг҃а и҆ ᲂу҆го́дника є҆гѡ̀."
 },
 {
  "type": "TEXT",
  "value": "И҆дѣ́же бо дꙋ́хъ хо́щетъ ды́шетъ, ꙗ҆́коже речѐ хрⷭ҇то́съ во є҆ѵⷢ҇лїи и҆ а҆пⷭ҇лъ: и҆дѣ́же любо́вь, та́мѡ побѣжда́етсѧ мно́жество грѣхѡ́въ: дх҃омъ ѻ҆́тче провозвѣсти́лъ є҆сѝ бж҃е́ственнаѧ твоѧ̑ словеса̀."
 },
 {
  "type": "TEXT",
  "value": "Маѯі́ме всехва́льне, кто̀ по достоѧ́нїю возмо́жетъ восхвали́ти кро́ткїй тво́й взо́ръ и҆ медотѡ́чныѧ твоѧ̑ глаго́лы; ѧ҆зы́къ тво́й бы́сть тро́сть кни́жника, дх҃омъ ст҃ы́мъ подвиза́емь. Мно́гихъ бо привлечѐ къ вѣ́рѣ, мно́жайшихъ же къ покаѧ́нїю."
 },
 {
  "type": "TEXT",
  "value": "Бг҃оро́диченъ: И҆́же ѿ не сꙋ́щихъ всѧ́ческаѧ божество́мъ содѣва́ѧ, роди́сѧ и҆зъ тебѐ бг҃мт҃и, мі́ръ просвѣща́ѧ свѣ́тлыми зарѧ́ми боже́ственными, и҆ бг҃оразꙋ́мїѧ свѣ́тлостми."
 },
 {
  "type": "TEXT",
  "value": "Катава́сїа: Покры́ла є҆́сть небеса̀ добродѣ́тель твоѧ̀ хрⷭ҇тѐ, и҆зъ кївѡ́та бо проше́дъ свѧты́ни твоеѧ̀ нетлѣ́нныѧ ма́тере. Въ хра́мѣ сла́вы твоеѧ̀ ꙗ҆ви́лсѧ є҆сѝ ꙗ҆́кѡ младе́нецъ рꙋконоси́мь и҆ и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀ гдⷭ҇и мо́й свѣ́тъ въ мі́ръ прише́лъ є҆сѝ, свѣ́тъ свѧты́й, ѡ҆браща́ѧ и҆зъ мра́чна невѣдѣ́нїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Само́вольнѣ ѡ҆ста́вивъ ѻ҆́тче на́шъ маѯі́ме, всѧ̑ сла̑внаѧ и҆ срѡ́днаѧ, и҆ подрꙋ́жнаѧ, по глаго́лꙋ є҆ѵⷢ҇льскомꙋ, хрⷭ҇тꙋ̀ бг҃ꙋ послѣ́довалъ є҆сѝ и҆ стра́нствовати и҆зволи́лъ є҆сѝ."
 },
 {
  "type": "TEXT",
  "value": "Тлѣ́ннаѧ ѡ҆ста́вль, треблаже́нне, нетлѣ́ннаѧ воспрїѧ́лъ є҆сѝ, насыща́ѧсѧ свѣ́томъ боже́ственныѧ свѣ́тлости, въ дворѣ́хъ гдⷭ҇а твоегѡ̀ маѯі́ме премꙋ́дре."
 },
 {
  "type": "TEXT",
  "value": "Лю́дїе твоѝ, ѽ ѻ҆́тче, и҆ ча́да дх҃омъ ст҃ы́мъ порожде́нна, плаче́внаѧ ѿве́ргше, ра́дѡстнаѧ тебѣ̀ воспѣва́ютъ пѣ̑нїѧ, вопїю́ще: не ѡ҆ста́ви на́съ свѧ́те въ ра́дости гдⷭ҇а твоегѡ̀, молѧ̀ є҆го̀ ѡ҆ дꙋша́хъ на́шихъ."
 },
 {
  "type": "TEXT",
  "value": "Бг҃оро́диченъ: Свы́ше тебѣ̀ гла́съ ра́достенъ возопѝ а҆́гг҃лъ бцⷣе: неизрече́нное влады́ки возвѣща́ѧ тебѣ̀ зача́тїе."
 },
 {
  "type": "TEXT",
  "value": "Катава́сїа: Ꙗ҆́кѡ ви́дѣ и҆са́їа ѡ҆бра́знѡ на прⷭ҇то́лѣ превознесе́нна бг҃а, ѿ а҆́гг҃лъ сла́вы дорѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ, и҆ ми́ромъ влады́чествꙋюща."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ гдⷭ҇и, це́рковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Ꙗ҆́кѡ шипо́къ въ те́рнїи, преподо́бне маѯі́ме, во и҆ноплеме́нныхъ возра́слъ є҆сѝ, вѣ́рꙋ же и҆ чистотꙋ̀ тве́рдѡ соблю́лъ є҆сѝ: по вѣ́рѣ чи́стагѡ се́рдца твоегѡ̀ вседомо́внѡ преселѧ́етъ тебѐ бг҃ъ въ землю̀ люде́й твои́хъ, ꙗ҆́коже и҆ногда̀ а҆враа́ма въ зе́млю ѡ҆бѣтова́нїѧ."
 },
 {
  "type": "TEXT",
  "value": "Хорꙋ́гвь хрⷭ҇то́ва, хрⷭ҇тїа́нѡмъ похвала̀, ѻ҆́тче на́шъ маѯі́ме, ю҆́же носѧ̀, ничи́мже по а҆по́столꙋ хвали́лсѧ є҆сѝ, то́чїю кресто́мъ гдⷭ҇а на́шегѡ і҆исꙋ́са хрⷭ҇та̀."
 },
 {
  "type": "TEXT",
  "value": "Ѽ премꙋ́драгѡ твоегѡ̀ ра́зꙋма, всехва́льне свѧти́телю, є҆гда̀ ᲂу҆таи́всѧ всѣ́хъ свои́хъ си, и҆ посредѣ̀ мѧте́жа и҆ молвы̀ кре́стъ взе́мь, послѣ́довалъ є҆сѝ хрⷭ҇тꙋ̀."
 },
 {
  "type": "TEXT",
  "value": "Бг҃оро́диченъ: Тѧ̀ є҆ди́нꙋ посредѣ̀ те́рнїѧ ѡ҆брѣ́тъ, ꙗ҆́кѡ пречестны́й крі́нъ и҆ ᲂу҆до́лїѧ цвѣ́тъ, ѽ бг҃мт҃и, же́нихъ сло́во и҆зъ ᲂу҆тро́бы твоеѧ̀ про́йде."
 },
 {
  "type": "TEXT",
  "value": "Катава́сїа: Возопѝ къ тебѣ̀, ви́дѣвъ ста́рецъ ѻ҆чи́ма спасе́нїе, є҆́же лю́де́мъ прїи́де ѿ бг҃а, хрⷭ҇тѐ, ты̀ бг҃ъ мо́й."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆ща̀:"
 },
 {
  "type": "TEXT",
  "value": "Кре́стъ взе́мь мнѡ́гїѧ ско́рби и҆ и҆згна́нїѧ под̾ѧ́лъ є҆сѝ свѧти́телю, маѯі́ме всеѡсвѧще́нне, ѻ҆те́чества твоегѡ̀ и҆ бг҃омъ врꙋ́ченнагѡ ста́да лиша́емъ: всѧ̑ бо до́блественнѣ терпѣ́лъ є҆сѝ, дꙋше́внагѡ ра́ди твоегѡ̀ просвѣще́нїѧ."
 },
 {
  "type": "TEXT",
  "value": "І҆ко́съ: Ѽ, кто̀ ѿ земны́хъ похвали́ти возмо́жетъ бг҃омъ просла́вленнагѡ, мы́ же ра́достными гла́сы а҆́ки вѣ́твми сїѧ̀ тебѣ̀ ѻ҆́тче сыно́внѣ глаго́лемъ: ра́дꙋйсѧ, благочести́вагѡ ко́рене ѿра́сли. Ра́дꙋйсѧ, благоꙋха́нный, цвѣ́те, прозѧ́бшїй на ни́вѣ чи́стагѡ житїѧ̀ твоегѡ̀, ра́дꙋйсѧ, до́блественнагѡ воздержа́нїѧ сокро́вище. Ра́дꙋйсѧ, ꙗ҆́кѡ ца́рство земно́е ѡ҆ста́вивъ воево́да царѧ̀ хрⷭ҇та̀ бы́лъ є҆сѝ, ра́дꙋйсѧ, ꙗ҆́кѡ мно́гїѧ трꙋды̀ и҆ бѣды̀ под̾ѧ́лъ є҆сѝ: ра́дꙋйсѧ, ꙗ҆́кѡ слеза́ми твои́ми мно́гихъ ᲂу҆диви́лъ є҆сѝ, пꙋ́ть покаѧ́нїѧ показа́вый: ра́дꙋйсѧ. Ꙗ҆́кѡ мнѡ́гаѧ ча̑да дх҃омъ ст҃ы́мъ породи́лъ є҆сѝ. Ра́дꙋйсѧ ꙗ҆́кѡ крі́нъ въ ю҆до́ли процвѣ́лъ є҆сѝ, ра́дꙋйсѧ маѯі́ме пребл҃же́нне, дꙋше́вное просвѣще́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы, персі́дстѣй, любо́вїю па́че не́же ли пла́менемъ ѡ҆палѧ́еми взыва́хꙋ: благослове́нъ є҆сѝ въ хра́мѣ сла́вы твоеѧ̀ гдⷭ҇и."
 },
 {
  "type": "TEXT",
  "value": "Ра́дꙋлъ воево́да, благоче́стїѧ и҆спо́лнь, ра́достнѡ бг҃а похвалѧ́ше, ꙗ҆́кѡ прїѧ́тъ ѿра́сль благочести́вагѡ ко́рене, па́че же бж҃їе ѻ҆би́телище и҆ цвѣ́тъ чистоты̀. Тѣ́мже и҆ вопїѧ́ше: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Гдⷭ҇ь дадѐ, гдⷭ҇ь ѿѧ́тъ, по і҆ѡ́вꙋ бг҃а бл҃годарѧ̀, глаго́лалъ є҆сѝ, свѧще́нне маѯі́ме, хва́льнаго воспѣва́ѧ бг҃а и҆ препросла́вленнаго."
 },
 {
  "type": "TEXT",
  "value": "Воздꙋ́хъ ᲂу҆́бѡ ѡ҆свѧти́сѧ благово́нїемъ моще́й твои́хъ маѯі́ме, хрⷭ҇то́въ свѧти́телю: це́рковь же веселѧ́щисѧ вопїе́тъ: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: И҆́стиннꙋю бцⷣꙋ и҆сповѣ́дающе тѧ̀ ꙗ҆́кѡ а҆́гг҃лъ, ра́дꙋйсѧ, вѣ́рою вопїе́мъ тѝ: є҆ди́на бо ра́дость родила̀ є҆сѝ ѡ҆бра́дованнаѧ и҆ при́снѡ благослове́ннаѧ."
 },
 {
  "type": "TEXT",
  "value": "Катава́сїѧ: Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ бг҃а сло́ва пое́мъ, благоче́стнѡ пою́ще: благослове́нъ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша добродѣ́телїю препоѧ́савшесѧ, благоче́стїѧ рачи́тели, ѻ҆́троцы взыва́юще: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Оу҆се́рднѡ взе́мь кре́стъ и҆ хрⷭ҇тꙋ̀ послѣ́довавъ маѯі́ме преблаже́нне, скѡ́рби мно́ги и҆ и҆згна̑нїѧ претерпѣ́лъ є҆сѝ, вопїѧ̀: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Ѿрѣ́шсѧ сою́за мїрска́гѡ, свѧза́лъ є҆сѝ себѐ любо́вїю бж҃їею: и҆́го бо взе́мь, ꙗ҆ре́мъ хрⷭ҇то́въ, и҆ то́й носѧ̀ взыва́лъ є҆сѝ, благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Бг҃оро́диченъ: Неисто́вства ѕлотворѧ́щихъ тѧ̀ не ᲂу҆страши́лсѧ є҆сѝ, бж҃е́ственный маѯі́ме: вы́шнѧгѡ бо и҆зъ дв҃ы возсїѧ́вшагѡ всеѻрꙋ́жїемъ кре́стнымъ тѧ̀ ѡ҆дѣ́ѧ, вопи́ти: благослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Катава́сїа: Нестерпи́момꙋ ѻ҆гню̀ соедини́вшесѧ благоче́стїѧ предстоѧ́ще ю҆́ноши. Пла́менемъ же неврежде́ни боже́ственнꙋю пѣ́снь поѧ́хꙋ: благослови́те всѧ̑ дѣла̀ гдⷭ҇нѧ гдⷭ҇а, и҆ превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ, дѣ́во, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧсѧ є҆стества̀, тѣ́мъ веселѧ́щесѧ тѧ̀ бцⷣе велича́емъ."
 },
 {
  "type": "TEXT",
  "value": "Кра́снѡ ᲂу҆̀бо це́рковь весели́тсѧ въ па́мѧти, твое́й, ѡ҆ свѧти́телю преблаже́нне маѯі́ме. Се́рбстїи же лю́дїе стека́ютсѧ, пра́зднствєннаѧ тебѣ̀ приносѧ́ще восхвалѧ́юще хрⷭ҇та̀, тебѐ просла́вльшаго."
 },
 {
  "type": "TEXT",
  "value": "Въ печа́ли ѻ҆́тче ѡ҆ста́вилъ є҆сѝ бг҃олюбє́знаѧ твоѧ̑ ча̑да, въ ра́дость же дꙋше́внꙋю претвори́лъ є҆сѝ вѣ́рныхъ мнѡ́жества ꙗ҆вле́нїемъ благово́нныхъ моще́й твои́хъ. Тѣ́мже и҆ похва̑льнаѧ тебѣ̀ прино́сѧтъ наро́да твоегѡ̀ сѡбра́нїѧ."
 },
 {
  "type": "TEXT",
  "value": "И҆́хже ѻ҆́ко не ви́дѣ и҆ ᲂу҆́хо не слы́ша, и҆ ꙗ҆̀же на се́рдце человѣ́кꙋ не взыдо́ша, такѡва́ѧ ѻ҆тчѐ ѿ бг҃а полꙋчи́лъ є҆сѝ блага̑ѧ: си́хъ наслажда́ѧсѧ, молѝ ѡ҆ ста́дѣ твое́мъ, є҆́же къ бг҃ꙋ собра́лъ є҆сѝ, и҆ ѡ҆ лю́дехъ твои́хъ восхвалѧ́ющихъ тѧ̀, грѣха̀ и҆зба́витисѧ и҆ сподо́битисѧ ра́дости и҆ весе́лїѧ вѣ́чнагѡ."
 },
 {
  "type": "TEXT",
  "value": "Бг҃оро́диченъ: Въ ра́дость бцⷣы водрꙋзи́лъ є҆сѝ ѻ҆би́тель кра́снꙋю, въ не́йже ча̑да твоѧ̑ бг҃олюби̑ваѧ, ѡ҆бстоѧ́ще ра́кꙋ твою̀ честнꙋ́ю, свѧти́телю маѯі́ме преблаже́нне, воспѣва́ютъ гдⷭ҇а, дв҃ꙋ ᲂу҆блажа́юще."
 },
 {
  "type": "TEXT",
  "value": "Катава́сїа: Въ зако́нѣ сѣ́ни, и҆ писа́нїй ѻ҆́бразъ ви́димъ вѣ́рнїи, всѧ́къ мꙋ́жескїй по́лъ, ложесна̀ разверза́ѧ, свѧ́тъ Бо́гꙋ: тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ, ма́терїю неискꙋсомꙋ́жнѡ, велича́емъ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Дꙋ́хомъ во свѧти́лищи."
 },
 {
  "type": "TEXT",
  "value": "Дꙋ́хомъ просвѣща́емъ свѧти́телю треблаже́нне, ѡ҆зарѧ́еши сердца̀ и҆ дꙋ́ши на́съ, воспѣва́ющихъ твою̀ свѣ́тлꙋю па́мѧть, маѯі́ме досточꙋ́дне."
 },
 {
  "type": "HEADER",
  "value": "Сла́ва."
 },
 {
  "type": "TEXT",
  "value": "Тро́ицы проповѣ́дника, па́стырѧ до́блественнаго, премꙋ́драго маѯі́ма восхва́лимъ согла́снѡ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Со дерзнове́нїемъ глаго́лати бцⷣꙋ, и҆ се́й покланѧ́тисѧ вои́стиннꙋ вѣ́рныхъ наꙋчи́лъ є҆сѝ, маѯі́ме всеблаже́нне."
 },
 {
  "type": "HEADER",
  "value": "На хвали́техъ стїхи́ры самогла́сны, гла́съ а҃."
 },
 {
  "type": "TEXT",
  "value": "Стефа́нъ вѣне́цъ добро́ты и҆ красота̀ це́ркве: преподо́бнаѧ же а҆нгели́на лоза̀ честна́ѧ, породи́ста ро́ждїе вїногра́да спасе́ннагѡ, маѯі́ма свѧще́ннаго: ѿ ни́хже и҆сточа́етсѧ на́мъ весе́лїе дꙋше́вное. И҆́хже моли́твами бж҃е, спасѝ дꙋ́шы на́шѧ, ꙗ҆́кѡ милосе́рдъ. Два́жды."
 },
 {
  "type": "TEXT",
  "value": "Возве́дъ ѻ҆́ко дꙋше́вное къ небесѝ, и҆ ᲂу҆́мъ впери́въ къ Бо́гꙋ, пренебре́глъ є҆сѝ всѧ̑ сꙋ́єтнаѧ; лице́ же своѐ слеза́ми ᲂу҆мыва́ѧ, преподо́бне ѻ҆́тче на́шъ маѯі́ме, дꙋ́шꙋ свою̀ чи́стꙋ предста́вилъ є҆сѝ хрⷭ҇тꙋ̀ бг҃ꙋ."
 },
 {
  "type": "TEXT",
  "value": "Дне́сь красꙋ́етсѧ хрⷭ҇то́ва це́рковь, въ па́мѧти треблаже́ннагѡ ѻ҆тца̀ маѯі́ма. Дне́сь ѡ҆бстоѧ́ще ра́кꙋ твою̀ бг҃олюби̑ваѧ твоѧ̑ ча̑да, дх҃омъ ст҃ы́мъ порожде́нное твоѐ ста́до, и҆ хва́лѧще тѧ̀ вопїю́тъ: ди́венъ бг҃ъ во свѧты́хъ свои́хъ, въ це́рквахъ благослови́мъ тѧ̀ гдⷭ҇и."
 },
 {
  "type": "HEADER",
  "value": "Сла́ва гла́съ г҃."
 },
 {
  "type": "TEXT",
  "value": "Вели́кїѧ и҆́стины трꙋбꙋ̀ многострада́льнаго маѯі́ма, восхвали́ти стеце́мсѧ всѝ вѣ́рнїи, є҆диноплеме́ннїи. Ѻ҆́нъ бо на́съ созыва́етъ къ трапе́зѣ дꙋхо́внѣй, взы́демъ ᲂу҆̀бо на сїѐ свѣ́тлое торжество̀ церко́вное и҆ почти́мъ до́браго па́стырѧ пѣ́сньми, восхва́лимъ є҆гѡ̀ свѧще́нныѧ трꙋды̀, ꙗ҆́кѡ да моли́твами є҆гѡ̀ прїи́мемъ ѿ хрⷭ҇та̀ бг҃а проще́нїе грѣхѡ́въ и҆ ве́лїю ми́лость."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "TEXT",
  "value": "Невѣ́стница свѣтоно́снаѧ и҆ чⷭ҇таѧ, дв҃о бы́вши бг҃ꙋ, воспѣва́емъ тѧ̀ любо́вїю и҆ блажи́мъ ꙗ҆́кѡ да свѧти́телѧ маѯі́ма моли́твами спасе́ши дꙋ́шы на́шѧ."
 },
 {
  "type": "HEADER",
  "value": "Славосло́вїе вели́кое и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, Блаже́нна, ѿ канѡ́на пѣ́снь г҃, и҆ ѕ҃-ѧ."
 },
 {
  "type": "HEADER",
  "value": "Прокі́менъ, гла́съ и҃:"
 },
 {
  "type": "TEXT",
  "value": "Восхва́лѧтсѧ преподо́бнїи во сла́вѣ, и҆ возра́дꙋютсѧ на ло́жахъ свои́хъ."
 },
 {
  "type": "TEXT",
  "value": "Сті́хъ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ це́ркви преподо́бныхъ:"
 },
 {
  "type": "HEADER",
  "value": "А҆пⷭ҇лъ ко є҆вре́ємъ, зача́ло тл҃д."
 },
 {
  "type": "TEXT",
  "value": "А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ преподо́бнїи твоѝ возра́дꙋютсѧ."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло а҃і."
 },
 {
  "type": "TEXT",
  "value": "Прича́стенъ: Ра́дꙋйтесѧ пра́веднїи ѡ҆ гдⷭ҇ѣ, пра̑вымъ подоба́етъ похвала̀."
 }
]