[
 {
  "type": "HEADER",
  "value": "Въ сре́дꙋ свѣ́тлыѧ седми́цы."
 },
 {
  "type": "TEXT",
  "value": "ⷤ На вели́цѣй вече́рни ⷤ На ᲂу҆́трени ⷤ На лїтꙋргі́и"
 },
 {
  "type": "HEADER",
  "value": "Во вто́рникъ свѣ́тлыѧ седми́цы ве́чера."
 },
 {
  "type": "TEXT",
  "value": "По ѳ҃-мъ часѣ̀, во свѣти́льничномъ, ѡ҆блачи́тсѧ настоѧ́тель во всю̀ свѧще́ннꙋю ѻ҆де́ждꙋ. И҆ ста́въ пред̾ ст҃о́ю трапе́зою съ кади́льницею, зна́менꙋетъ крⷭ҇тови́днѡ, и҆ возглаша́етъ глаго́лѧ:"
 },
 {
  "type": "TEXT",
  "value": "Б лагослове́нъ бг҃ъ на́шъ всегда̀, ны́нѣ и҆ при́снѡ и҆ во вѣ́ки вѣкѡ́въ."
 },
 {
  "type": "TEXT",
  "value": "И҆ на́мъ ѿвѣща́ющымъ: А҆ми́нь."
 },
 {
  "type": "TEXT",
  "value": "И҆ то́й начина́етъ: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ. три́жды. И҆ мы̀ то́йжде ѿвѣща́емъ три́жды."
 },
 {
  "type": "HEADER",
  "value": "И҆ глаго́летъ настоѧ́тель преждеречє́нныѧ стїхѝ:"
 },
 {
  "type": "TEXT",
  "value": "а҃-й сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀, / и҆ да бѣжа́тъ ѿ лица̀ є҆гѡ̀ ненави́дѧщїи є҆го̀."
 },
 {
  "type": "TEXT",
  "value": "И҆ на кі́йждо сті́хъ мы̀ пое́мъ тропа́рь: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ. Ве́сь по є҆ди́ножды."
 },
 {
  "type": "TEXT",
  "value": "в҃-й сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, / ꙗ҆́кѡ та́етъ во́скъ ѿ лица̀ ѻ҆гнѧ̀. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "г҃-й сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "д҃-й сті́хъ: Се́й де́нь є҆го́же сотворѝ гдⷭ҇ь, / возра́дꙋемсѧ и҆ возвесели́мсѧ во́нь. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Сла́ва: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "И҆ ны́нѣ: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Та́же настоѧ́тель: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ."
 },
 {
  "type": "TEXT",
  "value": "Мы́ же: И҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Та́же є҆ктенїа̀ вели́каѧ ѿ дїа́кона: Ми́ромъ гдⷭ҇ꙋ помо́лимсѧ."
 },
 {
  "type": "TEXT",
  "value": "[зрѝ] Подоба́етъ вѣ́дати, ꙗ҆́кѡ по внегда̀ нача́ти і҆ере́ю, кади́тъ ст҃ꙋ́ю трапе́зꙋ по ѻ҆бы́чаю и҆ ве́сь ѻ҆лта́рь, ве́черъ, на Гдⷭ҇и воззва́хъ: на ᲂу҆́трени, въ нача́лѣ канѡ́на и҆схо́дитъ и҆ кади́тъ хра́мъ и҆ ли́ки и҆ бра́тїю по ѻ҆быкнове́нномꙋ чи́нꙋ."
 },
 {
  "type": "HEADER",
  "value": "На Гдⷭ҇и воззва́хъ: поста́вимъ стїхѡ́въ ѕ҃. И҆ пое́мъ стїхи̑ры воскре́сны, гла́съ д҃:"
 },
 {
  "type": "TEXT",
  "value": "Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть."
 },
 {
  "type": "TEXT",
  "value": "Ж ивотворѧ́щемꙋ твоемꙋ̀ крⷭ҇тꙋ̀, / непреста́ннѡ кла́нѧющесѧ хрⷭ҇тѐ бж҃е, / тридне́вное воскрⷭ҇нїе твоѐ сла́вимъ: / тѣ́мъ бо ѡ҆бнови́лъ є҆сѝ и҆стлѣ́вшее человѣ́ческое є҆стество̀ всеси́льне, / и҆ и҆́же на нб҃са̀ восхо́дъ ѡ҆бнови́лъ є҆сѝ на́мъ, / ꙗ҆́кѡ є҆ди́нъ бл҃гъ и҆ чл҃вѣколю́бецъ."
 },
 {
  "type": "TEXT",
  "value": "Сті́хъ: И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ, ᲂу҆пова̀ дꙋша̀ моѧ̀ на гдⷭ҇а."
 },
 {
  "type": "TEXT",
  "value": "Д ре́ва преслꙋша́нїѧ запреще́нїе / разрѣши́лъ є҆сѝ сп҃се, / на дре́вѣ крⷭ҇тнѣмъ во́лею пригвозди́всѧ, / и҆ во а҆́дъ соше́дъ си́льне, / смє́ртныѧ ᲂу҆́зы ꙗ҆́кѡ бг҃ъ растерза́лъ є҆сѝ. / тѣ́мже кла́нѧемсѧ є҆́же и҆з̾ ме́ртвыхъ твоемꙋ̀ воскрⷭ҇нїю, / ра́достїю вопїю́ще: / всеси́льне гдⷭ҇и, сла́ва тебѣ̀."
 },
 {
  "type": "TEXT",
  "value": "Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а."
 },
 {
  "type": "TEXT",
  "value": "В рата̀ а҆́дѡва сокрꙋши́лъ є҆сѝ гдⷭ҇и, / и҆ твое́ю сме́ртїю сме́ртное ца́рство разрꙋши́лъ є҆сѝ: / ро́дъ же человѣ́ческїй ѿ и҆стлѣ́нїѧ свободи́лъ є҆сѝ, / живо́тъ и҆ нетлѣ́нїе мі́рꙋ дарова́въ, / и҆ ве́лїю млⷭ҇ть."
 },
 {
  "type": "HEADER",
  "value": "И҆ восто́чны г҃:"
 },
 {
  "type": "TEXT",
  "value": "Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀."
 },
 {
  "type": "TEXT",
  "value": "П рїиди́те воспои́мъ лю́дїе, / сп҃сово тридне́вное воста́нїе, / и҆́мже и҆зба́вихомсѧ а҆́довыхъ нерѣши́мыхъ ᲂу҆́зъ: / и҆ нетлѣ́нїе и҆ жи́знь всѝ воспрїѧ́хомъ зовꙋ́ще: / распны́йсѧ, и҆ погребы́йсѧ, и҆ воскр҃сы́й, / сп҃си́ ны воскрⷭ҇нїемъ твои́мъ / є҆ди́не чл҃вѣколю́бче."
 },
 {
  "type": "TEXT",
  "value": "Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе."
 },
 {
  "type": "TEXT",
  "value": "А҆́ гг҃ли и҆ человѣ́цы сп҃се, / твоѐ пою́тъ тридне́вное воста́нїе, / и҆́мже ѡ҆зари́шасѧ вселе́нныѧ концы̀, / и҆ рабо́ты вра́жїѧ всѝ и҆зба́вихомсѧ, зовꙋ́ще: / животво́рче всеси́льне сп҃се / сп҃си́ ны воскрⷭ҇нїемъ твои́мъ, / є҆ди́не чл҃вѣколю́бче."
 },
 {
  "type": "TEXT",
  "value": "Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ."
 },
 {
  "type": "TEXT",
  "value": "В рата̀ мѣ̑днаѧ сте́рлъ є҆сѝ, / и҆ верєѝ сокрꙋши́лъ є҆сѝ хрⷭ҇тѐ бж҃е, / и҆ ро́дъ человѣ́ческїй па́дшїй воскр҃си́лъ є҆сѝ. / сегѡ̀ ра́ди согла́снѡ вопїе́мъ: / воскр҃сы́й и҆з̾ ме́ртвыхъ гдⷭ҇и, сла́ва тебѣ̀."
 },
 {
  "type": "TEXT",
  "value": "Сла́ва: Гдⷭ҇и, є҆́же ѿ ѻ҆ц҃а̀ твоѐ ржⷭ҇тво̀, / безлѣ́тно є҆́сть и҆ присносꙋ́щно: / є҆́же ѿ дв҃ы воплоще́нїе, / неизрече́нно человѣ́кѡмъ и҆ несказа́нно: / и҆ є҆́же во а҆́дъ соше́ствїе стра́шно дїа́волꙋ и҆ а҆́ггелѡмъ є҆гѡ̀: / сме́рть бо попра́въ, тридне́венъ воскрⷭ҇лъ є҆сѝ, / нетлѣ́нїе подава́ѧ человѣ́кѡмъ, / и҆ ве́лїю млⷭ҇ть."
 },
 {
  "type": "TEXT",
  "value": "И҆ ны́нѣ: бг҃оро́диченъ: И҆́же тебѐ ра́ди бг҃оѻте́цъ прⷪ҇ро́къ дв҃дъ / пѣ́сненнѡ ѡ҆ тебѣ̀ провозгласѝ, / вели̑чїѧ тебѣ̀ сотво́ршемꙋ: / предста̀ цр҃и́ца ѡ҆деснꙋ́ю тебѐ. / тѧ́ бо мт҃рь, хода́таицꙋ живота̀ показа̀, / без̾ ѻ҆ц҃а̀ и҆з̾ тебѐ вочеловѣ́читисѧ бл҃говоли́вый бг҃ъ, / да сво́й па́ки ѡ҆бнови́тъ ѡ҆́бразъ, и҆стлѣ́вшїй страстьмѝ, / и҆ заблꙋ́ждшее горохи́щное ѡ҆брѣ́тъ ѻ҆вча̀, / на ра́мо воспрїи́мъ, ко ѻ҆ц҃ꙋ̀ принесе́тъ, / и҆ своемꙋ̀ хотѣ́нїю, съ нбⷭ҇ными совокꙋпи́тъ си́лами, / и҆ сп҃се́тъ бцⷣе, мі́ръ, / хрⷭ҇то́съ и҆мѣ́ѧй ве́лїю и҆ бога́тꙋю млⷭ҇ть."
 },
 {
  "type": "TEXT",
  "value": "Вхо́дъ съ кади́ломъ: Свѣ́те ти́хїй: Прокі́менъ, гла́съ и҃: Гла́сомъ мои́мъ ко гдⷭ҇ꙋ воззва́хъ, / гла́сомъ мои́мъ къ бг҃ꙋ, и҆ внѧ́тъ мѝ. Сті́хъ: Въ де́нь ско́рби моеѧ̀ бг҃а взыска́хъ. Сті́хъ: Ѿве́ржесѧ ᲂу҆тѣ́шитисѧ дꙋша̀ моѧ̀. Сті́хъ: Бж҃е, во ст҃ѣ́мъ пꙋ́ть тво́й. И҆ па́ки: Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ къ бг҃ꙋ, и҆ внѧ́тъ мѝ."
 },
 {
  "type": "TEXT",
  "value": "Посе́мъ є҆ктенїа̀: Рце́мъ всѝ: и҆ Сподо́би гдⷭ҇и въ ве́черъ се́й: Та́же: И҆спо́лнимъ вече́рнюю мл҃твꙋ:"
 },
 {
  "type": "HEADER",
  "value": "На стїхо́внѣ стїхи́ра воскре́сна, гла́съ д҃:"
 },
 {
  "type": "TEXT",
  "value": "Г дⷭ҇и, возше́дъ на крⷭ҇тъ, / пра́дѣднюю на́шꙋ клѧ́твꙋ потреби́лъ є҆сѝ, / и҆ соше́дъ во а҆́дъ, / вѣ̑чныѧ ᲂу҆́зники свободи́лъ є҆сѝ, / нетлѣ́нїе да́рꙋѧ человѣ́ческомꙋ ро́дꙋ: / сегѡ̀ ра́ди пою́ще сла́вимъ / животворѧ́щее и҆ сп҃си́тельное твоѐ воста́нїе."
 },
 {
  "type": "HEADER",
  "value": "Та́же стїхи̑ры па́схи, гла́съ є҃:"
 },
 {
  "type": "TEXT",
  "value": "Сті́хъ: Да воскре́снетъ бг҃ъ, / и҆ расточа́тсѧ вразѝ є҆гѡ̀."
 },
 {
  "type": "TEXT",
  "value": "П а́сха / сщ҃е́ннаѧ на́мъ дне́сь показа́сѧ: / па́сха но́ва ст҃а́ѧ: / па́сха та́инственнаѧ: / па́сха всечестна́ѧ: / па́сха хрⷭ҇то́съ и҆зба́витель: / па́сха непоро́чнаѧ: / па́сха вели́каѧ: / па́сха вѣ́рныхъ: / па́сха двє́ри ра̑йскїѧ на́мъ ѿверза́ющаѧ: / па́сха всѣ́хъ ѡ҆свѧща́ющаѧ вѣ́рныхъ."
 },
 {
  "type": "TEXT",
  "value": "Сті́хъ: Ꙗ҆́кѡ и҆счеза́етъ ды́мъ, / да и҆сче́знꙋтъ."
 },
 {
  "type": "TEXT",
  "value": "П рїиди́те / ѿ видѣ́нїѧ жєны̀ бл҃говѣ̑стницы, / и҆ сїѡ́нꙋ рцы́те: / прїимѝ / ѿ на́съ ра́дости бл҃говѣ́щенїѧ, воскресе́нїѧ хрⷭ҇то́ва: / красꙋ́йсѧ, ликꙋ́й, / и҆ ра́дꙋйсѧ і҆ерꙋсали́ме, / цр҃ѧ̀ хрⷭ҇та̀ ᲂу҆зрѣ́въ и҆з̾ гро́ба, / ꙗ҆́кѡ жениха̀ происходѧ́ща."
 },
 {
  "type": "TEXT",
  "value": "Сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ."
 },
 {
  "type": "TEXT",
  "value": "М ѷронѡ́сицы жєны̀, / ᲂу҆́трꙋ глꙋбокꙋ̀, / предста́вшѧ гро́бꙋ живода́вца, / ѡ҆брѣто́ша а҆́гг҃ла / на ка́мени сѣдѧ́ща, / и҆ то́й провѣща́въ и҆̀мъ / си́це глаго́лаше: / что̀ и҆́щете жива́гѡ съ ме́ртвыми; / что̀ пла́чете нетлѣ́ннагѡ во тлѝ; / ше́дше проповѣ́дите ᲂу҆ченикѡ́мъ є҆гѡ̀."
 },
 {
  "type": "TEXT",
  "value": "Сті́хъ: Се́й де́нь, є҆го́же сотворѝ гдⷭ҇ь, / возра́дꙋемсѧ и҆ возвесели́мсѧ во́нь."
 },
 {
  "type": "TEXT",
  "value": "П а́сха кра́снаѧ, / па́сха, гдⷭ҇нѧ па́сха, / па́сха всечестна́ѧ / на́мъ возсїѧ̀. па́сха, / ра́достїю дрꙋ́гъ дрꙋ́га ѡ҆б̾и́мемъ. / ѽ па́сха! / и҆збавле́нїе ско́рби, / и҆́бо и҆з̾ гро́ба дне́сь / ꙗ҆́кѡ ѿ черто́га / возсїѧ́въ хрⷭ҇то́съ, / жєны̀ ра́дости и҆спо́лни глаго́лѧ: / проповѣ́дите а҆пⷭ҇лѡмъ."
 },
 {
  "type": "TEXT",
  "value": "Сла́ва и҆ ны́нѣ, гла́съ є҃: Воскрⷭ҇нїѧ де́нь, / и҆ просвѣти́мсѧ торжество́мъ, / и҆ дрꙋ́гъ дрꙋ́га ѡ҆б̾и́мемъ. / рце́мъ бра́тїе, / и҆ ненави́дѧщымъ на́съ, / прости́мъ всѧ̑ воскрⷭ҇нїемъ, / и҆ та́кѡ возопїи́мъ: / хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Х рⷭ҇то́съ воскре́се: три́жды, кромѣ̀ конца̀ стїхи́ры."
 },
 {
  "type": "TEXT",
  "value": "Та́же дїа́конъ: Премꙋ́дрость. Мы́ же: Бл҃гословѝ. Настоѧ́тель: Сы́й бл҃гослове́нъ хрⷭ҇то́съ бг҃ъ на́шъ: И҆ мы̀: Оу҆твердѝ бж҃е: Та́же настоѧ́тель, вмѣ́стѡ: Сла́ва тебѣ̀ хрⷭ҇тѐ бж҃е: Хрⷭ҇то́съ воскре́се и҆з̾ ме́ртвыхъ / сме́ртїю сме́рть попра́въ. И҆ мы̀: И҆ сꙋ́щымъ во гробѣ́хъ живо́тъ дарова́въ. И҆ а҆́бїе глаго́летъ ѿпꙋ́стъ со крⷭ҇то́мъ: Хрⷭ҇то́съ воскресы́й и҆з̾ ме́ртвыхъ: И҆ про́чее, ꙗ҆́коже и҆з̾ѧви́сѧ въ коне́цъ ᲂу҆́трени."
 },
 {
  "type": "TEXT",
  "value": "[зрѝ] И҆ цѣлꙋ́емъ ст҃ы́ѧ і҆кѡ́ны. И҆ вхо́димъ въ трапе́зꙋ, и҆ глаго́лемъ: Хрⷭ҇то́съ воскре́се: три́жды. Сла́ва, и҆ ны́нѣ: Настоѧ́тель: Хрⷭ҇тѐ бж҃е бл҃гословѝ: По воста́нїи же ѿ трапе́зы, глаго́лемъ: Хрⷭ҇то́съ воскре́се: три́жды. Сла́ва, и҆ ны́нѣ: Настоѧ́тель: Съ на́ми бг҃ъ свое́ю бл҃года́тїю:"
 },
 {
  "type": "HEADER",
  "value": "Въ сре́дꙋ свѣ́тлыѧ седми́цы, на ᲂу҆́трени."
 },
 {
  "type": "TEXT",
  "value": "Пре́жде нача́ла, вжига́етъ канди̑ла и҆ свѣщы̀ параекклисїа́рхъ. Та́же кле́плетъ въ вели́кїй кампа́нъ, и҆ въ про́чыѧ. И҆ собра́вшымсѧ на́мъ во хра́мъ, і҆ере́й полага́етъ ѻ҆бы́чный покло́нъ настоѧ́телю, и҆ ѿхо́дитъ во ст҃ы́й ѻ҆лта́рь, и҆ взе́мъ кади́льницꙋ стои́тъ пред̾ ст҃о́ю трапе́зою, кромѣ̀ ᲂу҆́бѡ сщ҃е́нническїѧ ѻ҆де́жды, є҆пїтрахи́лїй то́чїю возло́жь све́рхъ ма́нтїи, кади́тъ крⷭ҇тоѻбра́знѡ, глаго́лѧ:"
 },
 {
  "type": "TEXT",
  "value": "С ла́ва ст҃ѣ́й, и҆ є҆диносꙋ́щнѣй, и҆ животворѧ́щей, и҆ нераздѣли́мѣй трⷪ҇цѣ, всегда̀, ны́нѣ и҆ при́снѡ и҆ во вѣ́ки вѣкѡ́въ."
 },
 {
  "type": "TEXT",
  "value": "И҆ на́мъ ѿвѣща́ющымъ: А҆ми́нь."
 },
 {
  "type": "HEADER",
  "value": "Начина́етъ настоѧ́тель, съ про́чими слꙋжи́тели, велегла́снѡ настоѧ́щїй тропа́рь, во гла́съ є҃:"
 },
 {
  "type": "TEXT",
  "value": "Х рⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "И҆ мы̀ то́йжде пое́мъ подо́бнѣ, со сладкопѣ́нїемъ. Пое́тсѧ же се́й тропа́рь три́жды ѿ настоѧ́телѧ, и҆ три́жды ѿ на́съ."
 },
 {
  "type": "HEADER",
  "value": "Та́же настоѧ́тель глаго́летъ стїхѝ:"
 },
 {
  "type": "TEXT",
  "value": "Пе́рвый сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀, / и҆ да бѣжа́тъ ѿ лица̀ є҆гѡ̀ ненави́дѧщїи є҆го̀."
 },
 {
  "type": "TEXT",
  "value": "И҆ на кі́йждо сті́хъ мы̀ пое́мъ тропа́рь: Хрⷭ҇то́съ воскр҃се: ве́сь по є҆ди́ножды."
 },
 {
  "type": "TEXT",
  "value": "Вторы́й сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, / ꙗ҆́кѡ та́етъ во́скъ ѿ лица̀ ѻ҆гнѧ̀. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Тре́тїй сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Четве́ртый сті́хъ: Се́й де́нь є҆го́же сотворѝ гдⷭ҇ь, / возра́дꙋемсѧ и҆ возвесели́мсѧ во́нь. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Сла́ва: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "И҆ ны́нѣ: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Та́же настоѧ́тель: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ."
 },
 {
  "type": "TEXT",
  "value": "Мы́ же: И҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Въ мїрски́хъ же хра́мѣхъ ѡ҆блачи́тсѧ і҆ере́й въ ри́зы. Та́же є҆ктенїа̀ вели́каѧ. И҆ по возгла́сѣ а҆́бїе пое́мъ канѡ́нъ, і҆рмо́съ: Воскрⷭ҇нїѧ де́нь: по два́жды, тропари́ же на і҃, съ припѣ́вы: Хрⷭ҇то́съ воскре́се: Въ Сла́ва, и҆ ны́нѣ: глаго́лемъ бг҃оро́дичны гдⷭ҇и́на ѳеофа́на, и҆ гдⷭ҇и́на і҆ѡ́сифа. Катава́сїа ѻ҆́ба ли́ка вкꙋ́пѣ: Воскрⷭ҇нїѧ де́нь: И҆ послѣдѝ: Хрⷭ҇то́съ воскре́се: три́жды. И҆ глаго́лемъ сїѐ во всю̀ седми́цꙋ вкꙋ́пѣ съ і҆рмосы̀ на д҃і."
 },
 {
  "type": "HEADER",
  "value": "Канѡ́нъ, гла́съ а҃. Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Воскресе́нїѧ де́нь, / просвѣти́мсѧ лю́дїе: / па́сха, гдⷭ҇нѧ па́сха! / ѿ сме́рти бо къ жи́зни, / и҆ ѿ землѝ къ нб҃сѝ, / хрⷭ҇то́съ бг҃ъ на́съ преведѐ, / побѣ́днꙋю пою́щыѧ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Ѡ҆ чи́стимъ чꙋ̑вствїѧ, и҆ ᲂу҆́зримъ / непристꙋ́пнымъ свѣ́томъ / воскресе́нїѧ, хрⷭ҇та̀ блиста́ющасѧ, / и҆ ра́дꙋйтесѧ, рекꙋ́ща / ꙗ҆́снѡ да ᲂу҆слы́шимъ, / побѣ́днꙋю пою́ще."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Н б҃са̀ ᲂу҆̀бо досто́йнѡ да веселѧ́тсѧ, / землѧ́ же да ра́дꙋетсѧ, / да пра́зднꙋетъ же мі́ръ, / ви́димый же ве́сь и҆ неви́димый: / хрⷭ҇то́съ бо воста̀, / весе́лїе вѣ́чное."
 },
 {
  "type": "HEADER",
  "value": "И҆́ный канѡ́нъ бг҃оро́диченъ, подо́бенъ. Є҆гѡ́же краестро́чїе на пе́рвыхъ тропарѣ́хъ: Ѳеофа́нꙋсъ. Гла́съ то́йже."
 },
 {
  "type": "TEXT",
  "value": "Сла́ва: Оу҆мерщвле́нїѧ предѣ́лъ сломи́ла є҆сѝ, / вѣ́чнꙋю жи́знь ро́ждшаѧ хрⷭ҇та̀, и҆з̾ гро́ба возсїѧ́вшаго дне́сь, / дв҃о всенепоро́чнаѧ, и҆ мі́ръ просвѣти́вшаго."
 },
 {
  "type": "TEXT",
  "value": "И҆ ны́нѣ: Воскре́сшаго ви́дѣвши сн҃а твоего̀ и҆ бг҃а, / ра́дꙋйсѧ со а҆пⷭ҇лы бг҃обл҃года́тнаѧ чⷭ҇таѧ: / и҆ є҆́же ра́дꙋйсѧ пе́рвѣе, ꙗ҆́кѡ всѣ́хъ ра́дости вина̀, / воспрїѧ́ла є҆сѝ, бг҃омт҃и всенепоро́чнаѧ."
 },
 {
  "type": "TEXT",
  "value": "Катава́сїа ѻ҆́ба ли́ка вкꙋ́пѣ: Воскрⷭ҇нїѧ де́нь: И҆ послѣдѝ: Хрⷭ҇то́съ воскре́се: три́жды."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Прїиди́те пи́во пїе́мъ но́вое, / не ѿ ка́мене непло́дна чꙋдодѣ́емое, / но нетлѣ́нїѧ и҆сто́чникъ, / и҆з̾ гро́ба ѡ҆дожди́вша хрⷭ҇та̀, / въ не́мже ᲂу҆твержда́емсѧ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Н ы́нѣ всѧ̑ и҆спо́лнишасѧ свѣ́та, / нб҃о же и҆ землѧ̀ и҆ преиспѡ́днѧѧ: / да пра́зднꙋетъ ᲂу҆̀бо всѧ̀ тва́рь / воста́нїе хрⷭ҇то́во, / въ не́мже ᲂу҆твержда́етсѧ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "В чера̀ спогребо́хсѧ тебѣ̀ хрⷭ҇тѐ, / совостаю̀ дне́сь / воскрⷭ҇шꙋ тебѣ̀, / сраспина́хсѧ тебѣ̀ вчера̀, / са́мъ мѧ̀ спросла́ви сп҃се во црⷭ҇твїи твое́мъ."
 },
 {
  "type": "TEXT",
  "value": "Сла́ва: На нетлѣ́ннꙋю жи́знь / прихождꙋ̀ дне́сь бл҃гостїю ро́ждшагѡсѧ и҆з̾ тебѐ чи́стаѧ, / и҆ всѣ̑мъ концє́мъ свѣ́тъ ѡ҆блиста́вшагѡ."
 },
 {
  "type": "TEXT",
  "value": "И҆ ны́нѣ: Бг҃а є҆го́же родила̀ є҆сѝ пло́тїю, и҆з̾ ме́ртвыхъ, / ꙗ҆́коже речѐ, воста́вша ви́дѣвши чⷭ҇таѧ, ликꙋ́й, / и҆ сегѡ̀ ꙗ҆́кѡ бг҃а пречи́стаѧ возвелича́й."
 },
 {
  "type": "TEXT",
  "value": "Катава́сїа: Прїиди́те пи́во пїе́мъ но́вое: И҆ тропа́рь: Хрⷭ҇то́съ воскре́се: три́жды."
 },
 {
  "type": "TEXT",
  "value": "Та́же, є҆ктенїа̀."
 },
 {
  "type": "HEADER",
  "value": "Ѵ҆пакоѝ, гла́съ д҃:"
 },
 {
  "type": "TEXT",
  "value": "П редвари́вшыѧ ᲂу҆́тро ꙗ҆̀же ѡ҆ марі́и, / и҆ ѡ҆брѣ́тшыѧ ка́мень ѿвале́нъ ѿ гро́ба, / слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, / съ ме́ртвыми что̀ и҆́щете ꙗ҆́кѡ человѣ́ка; / ви́дите грѡ́бныѧ пелєны̀, тецы́те, и҆ мі́рꙋ проповѣ́дите, / ꙗ҆́кѡ воста̀ гдⷭ҇ь, ᲂу҆мертви́вый сме́рть, / ꙗ҆́кѡ є҆́сть сн҃ъ бг҃а, спаса́ющагѡ ро́дъ человѣ́ческїй."
 },
 {
  "type": "TEXT",
  "value": "И҆ чте́нїе."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "На бж҃е́ственнѣй стра́жи, / бг҃оглаго́ливый а҆ввакꙋ́мъ / да ста́нетъ съ на́ми, и҆ пока́жетъ / свѣтоно́сна а҆́гг҃ла, / ꙗ҆́снѡ глаго́люща: / дне́сь спасе́нїе мі́рꙋ, / ꙗ҆́кѡ воскре́се хрⷭ҇то́съ, / ꙗ҆́кѡ всеси́ленъ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "М ꙋ́жескїй ᲂу҆́бѡ по́лъ, / ꙗ҆́кѡ разве́рзый дѣ́вственнꙋю ᲂу҆тро́бꙋ, / ꙗ҆ви́сѧ хрⷭ҇то́съ: / ꙗ҆́кѡ чл҃вѣ́къ же, / а҆́гнецъ нарече́сѧ: / непоро́ченъ же, / ꙗ҆́кѡ невкꙋ́сенъ скве́рны, / на́ша па́сха, / и҆ ꙗ҆́кѡ бг҃ъ и҆́стиненъ / соверше́нъ рече́сѧ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Ꙗ҆́ кѡ є҆динолѣ́тный а҆́гнецъ, / бл҃гослове́нный на́мъ вѣне́цъ хрⷭ҇то́съ, / во́лею за всѣ́хъ закла́нъ бы́сть, / па́сха чисти́тельнаѧ, / и҆ па́ки и҆з̾ гро́ба кра́сное / пра́вды на́мъ возсїѧ̀ со́лнце."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Б г҃оѻц҃ъ ᲂу҆́бѡ дв҃дъ / пред̾ сѣ́ннымъ ковче́гомъ скака́ше и҆гра́ѧ, / лю́дїе же бж҃їи ст҃і́и, / ѻ҆бразѡ́въ сбытїѐ зрѧ́ще, / весели́мсѧ бж҃е́ственнѣ, / ꙗ҆́кѡ воскре́се хрⷭ҇то́съ, / ꙗ҆́кѡ всеси́ленъ."
 },
 {
  "type": "TEXT",
  "value": "Сла́ва: Созда́вый а҆да́ма твоего̀ пра́ѻц҃а чи́стаѧ, / зи́ждетсѧ ѿ тебѐ, и҆ сме́ртное жили́ще разорѝ свое́ю сме́ртїю дне́сь, / и҆ ѡ҆зарѝ всѧ̑ / бж҃е́ственными блиста́ньми воскрⷭ҇нїѧ."
 },
 {
  "type": "TEXT",
  "value": "И҆ ны́нѣ: Є҆го́же родила̀ є҆сѝ хрⷭ҇та̀, / прекра́снѡ и҆з̾ ме́ртвыхъ возсїѧ́вша чи́стаѧ зрѧ́щи, / до́браѧ и҆ непоро́чнаѧ въ жена́хъ и҆ кра́снаѧ, / дне́сь во спасе́нїе всѣ́хъ, со а҆пⷭ҇лы ра́дꙋющисѧ / того̀ прославлѧ́й."
 },
 {
  "type": "TEXT",
  "value": "Катава́сїа: На бж҃е́ственнѣй стра́жи: И҆ тропа́рь: Хрⷭ҇то́съ воскре́се: три́жды."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Оу҆́тренюемъ ᲂу҆́треннюю глꙋбокꙋ̀, / и҆ вмѣ́стѡ мѵ́ра пѣ́снь принесе́мъ влⷣцѣ, / и҆ хрⷭ҇та̀ ᲂу҆́зримъ / пра́вды со́лнце, / всѣ̑мъ жи́знь возсїѧ́юща."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Б езмѣ́рное твоѐ бл҃гоꙋтро́бїе / а҆́довыми ᲂу҆́зами содержи́мїи зрѧ́ще, / къ свѣ́тꙋ и҆дѧ́хꙋ хрⷭ҇тѐ, / весе́лыми нога́ми, / па́схꙋ хва́лѧще вѣ́чнꙋю."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "П ристꙋ́пимъ свѣщено́снїи, / и҆сходѧ́щꙋ хрⷭ҇тꙋ̀ и҆з̾ гро́ба ꙗ҆́кѡ женихꙋ̀, / и҆ спра́зднꙋимъ любопра́зднственными чи́нми / па́схꙋ бж҃їю спаси́тельнꙋю."
 },
 {
  "type": "TEXT",
  "value": "Сла́ва: Просвѣща́етсѧ бж҃е́ственными лꙋча́ми и҆ живоно́сными / воскресе́нїѧ сн҃а твоегѡ̀, бг҃омт҃и пречи́стаѧ, / и҆ ра́дости и҆сполнѧ́етсѧ / бл҃гочести́выхъ собра́нїе."
 },
 {
  "type": "TEXT",
  "value": "И҆ ны́нѣ: Не разве́рзлъ є҆сѝ врата̀ дѣ́вства въ воплоще́нїи, / гро́ба не разрꙋши́лъ є҆сѝ печа́тей цр҃ю̀ созда́нїѧ: / ѿѻнꙋ́дꙋже воскре́сшаго тѧ̀ зрѧ́щи / мт҃и, ра́довашесѧ."
 },
 {
  "type": "TEXT",
  "value": "Катава́сїа: Оу҆́тренюемъ ᲂу҆́треннюю глꙋбокꙋ̀: И҆ тропа́рь: Хрⷭ҇то́съ воскре́се: три́жды."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Снизше́лъ є҆сѝ въ преиспѡ́днѧѧ землѝ, / и҆ сокрꙋши́лъ є҆сѝ верєѝ вѣ́чныѧ, / содержа́щыѧ свѧ̑занныѧ хрⷭ҇тѐ, / и҆ тридне́венъ ꙗ҆́кѡ ѿ ки́та і҆ѡ́на, / воскре́слъ є҆сѝ ѿ гро́ба."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "С охрани́въ цѣ́ла зна́мєнїѧ хрⷭ҇тѐ, / воскре́слъ є҆сѝ ѿ гро́ба, / ключѝ дв҃ы не вреди́вый въ ржⷭ҇твѣ̀ твое́мъ, / и҆ ѿве́рзлъ є҆сѝ на́мъ ра̑йскїѧ двє́ри."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "С п҃се мо́й, / живо́е же и҆ неже́ртвенное заколе́нїе, / ꙗ҆́кѡ бг҃ъ са́мъ себѐ / во́лею приве́дъ ѻ҆ц҃ꙋ̀, / совоскреси́лъ є҆сѝ всеро́днаго а҆да́ма, / воскре́съ ѿ гро́ба."
 },
 {
  "type": "TEXT",
  "value": "Сла́ва: Возведе́сѧ дре́вле держи́мое сме́ртїю и҆ тлѣ́нїемъ, / воплоти́вшимсѧ ѿ твоегѡ̀ пречⷭ҇тагѡ чре́ва, / къ нетлѣ́ннѣй, и҆ присносꙋ́щнѣй жи́зни, / бцⷣе дв҃о."
 },
 {
  "type": "TEXT",
  "value": "И҆ ны́нѣ: Сни́де въ преиспѡ́днѧѧ землѝ, / въ ложесна̀ твоѧ̑ чⷭ҇таѧ сше́дый, / и҆ всели́выйсѧ и҆ воплоти́выйсѧ па́че ᲂу҆ма̀, / и҆ воздви́же съ собо́ю а҆да́ма, / воскре́съ ѿ гро́ба."
 },
 {
  "type": "TEXT",
  "value": "Катава́сїа: Снизше́лъ є҆сѝ въ преиспѡ́днѧѧ землѝ: И҆ тропа́рь: Хрⷭ҇то́съ воскре́се: три́жды."
 },
 {
  "type": "TEXT",
  "value": "Є҆ктенїа̀."
 },
 {
  "type": "HEADER",
  "value": "Та́же конда́къ, гла́съ и҃:"
 },
 {
  "type": "TEXT",
  "value": "А҆́ ще и҆ во гро́бъ снизше́лъ є҆сѝ безсме́ртне, / но а҆́довꙋ разрꙋши́лъ є҆сѝ си́лꙋ, / и҆ воскре́слъ є҆сѝ ꙗ҆́кѡ побѣди́тель хрⷭ҇тѐ бж҃е, / жена́мъ мѷроно́сицамъ вѣща́вый: ра́дꙋйтесѧ, / и҆ твои́мъ а҆пⷭ҇лѡмъ ми́ръ да́рꙋѧй, / па́дшымъ подаѧ́й воскресе́нїе."
 },
 {
  "type": "TEXT",
  "value": "І҆́косъ: Є҆́же пре́жде со́лнца сл҃нце заше́дшее и҆ногда̀ во гро́бъ, / предвари́ша ко ᲂу҆́трꙋ, и҆́щꙋщыѧ ꙗ҆́кѡ днѐ мѷронѡ́сицы дѣ̑вы, / и҆ дрꙋга̀ ко дрꙋзѣ́й вопїѧ́хꙋ: / ѽ дрꙋги́ни! прїиди́те, вонѧ́ми пома́жемъ тѣ́ло живоно́сное и҆ погребе́ное, / пло́ть воскреси́вшагѡ па́дшаго а҆да́ма, лежа́щꙋю во гро́бѣ. / и҆́демъ, потщи́мсѧ ꙗ҆́коже волсвѝ, и҆ поклони́мсѧ, / и҆ принесе́мъ мѵ̑ра ꙗ҆́кѡ да́ры, не въ пелена́хъ, но въ плащани́цѣ ѡ҆бви́томꙋ, / и҆ пла́чимъ, и҆ возопїи́мъ: ѽ влⷣко, воста́ни, / па́дшымъ подаѧ́й воскресе́нїе."
 },
 {
  "type": "TEXT",
  "value": "И҆ чте́нїе."
 },
 {
  "type": "HEADER",
  "value": "Та́же глаго́лемъ:"
 },
 {
  "type": "TEXT",
  "value": "В оскресе́нїе хрⷭ҇то́во ви́дѣвше, / поклони́мсѧ ст҃о́мꙋ гдⷭ҇ꙋ і҆и҃сꙋ, / є҆ди́номꙋ безгрѣ́шномꙋ. / крⷭ҇тꙋ̀ твоемꙋ̀ покланѧ́емсѧ хрⷭ҇тѐ, / и҆ ст҃о́е воскресе́нїе твоѐ пое́мъ и҆ сла́вимъ: / ты́ бо є҆сѝ бг҃ъ на́шъ, / ра́звѣ тебѐ и҆но́гѡ не зна́емъ, / и҆́мѧ твоѐ и҆менꙋ́емъ. / прїиди́те всѝ вѣ́рнїи, / поклони́мсѧ ст҃о́мꙋ хрⷭ҇то́вꙋ воскресе́нїю: / се́ бо прїи́де крⷭ҇то́мъ ра́дость всемꙋ̀ мі́рꙋ. / всегда̀ бл҃гословѧ́ще гдⷭ҇а, / пое́мъ воскресе́нїе є҆гѡ̀: / распѧ́тїе бо претерпѣ́въ, / сме́ртїю сме́рть разрꙋшѝ. [Три́жды.]"
 },
 {
  "type": "TEXT",
  "value": "В оскре́съ і҆и҃съ ѿ гро́ба, / ꙗ҆́коже проречѐ, / дадѐ на́мъ живо́тъ вѣ́чный / и҆ ве́лїю ми́лость. [Три́жды.]"
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Ѻ҆́троки ѿ пе́щи и҆зба́вивый, / бы́въ человѣ́къ, / стра́ждетъ ꙗ҆́кѡ сме́ртенъ, / и҆ стра́стїю сме́ртное / въ нетлѣ́нїѧ ѡ҆блачи́тъ благолѣ́пїе, / є҆ди́нъ бл҃гослове́нъ / ѻ҆ц҃є́въ бг҃ъ, и҆ препросла́вленъ."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Ж єны̀ съ мѵ́ры бг҃омꙋ̑дрыѧ въ слѣ́дъ тебѐ теча́хꙋ: / є҆го́же ꙗ҆́кѡ ме́ртва со слеза́ми и҆ска́хꙋ, / поклони́шасѧ ра́дꙋющыѧсѧ живо́мꙋ бг҃ꙋ, / и҆ па́схꙋ та́йнꙋю / твои́мъ хрⷭ҇тѐ ᲂу҆ченикѡ́мъ бл҃говѣсти́ша."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "С ме́рти пра́зднꙋемъ ᲂу҆мерщвле́нїе, / а҆́дово разрꙋше́нїе, / и҆но́гѡ житїѧ̀ вѣ́чнагѡ нача́ло, / и҆ и҆гра́юще пое́мъ вино́внаго, / є҆ди́наго бл҃гослове́ннаго / ѻ҆ц҃є́въ бг҃а, и҆ препросла́вленнаго."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "Ꙗ҆́ кѡ вои́стиннꙋ сщ҃е́ннаѧ, / и҆ всепра́зднственнаѧ сїѧ̀ спаси́тельнаѧ но́щь, / и҆ свѣтоза́рнаѧ, / свѣтоно́снагѡ днѐ, / воста́нїѧ сꙋ́щи провозвѣ́стница: / въ не́йже безлѣ́тный свѣ́тъ и҆з̾ гро́ба пло́тски всѣ̑мъ возсїѧ̀."
 },
 {
  "type": "TEXT",
  "value": "Сла́ва: Оу҆мертви́въ сн҃ъ тво́й сме́рть, всенепоро́чнаѧ / дне́сь, всѣ̑мъ смє́ртнымъ пребыва́ющїй живо́тъ во вѣ́ки вѣкѡ́въ дарова̀, / є҆ди́нъ бл҃гослове́нный / ѻ҆тцє́въ бг҃ъ и҆ препросла́вленный."
 },
 {
  "type": "TEXT",
  "value": "И҆ ны́нѣ: Всѣ́мъ црⷭ҇твꙋѧй созда́нїемъ, / бы́въ человѣ́къ, / всели́сѧ во твою̀ бг҃облагода́тнаѧ ᲂу҆тро́бꙋ, / и҆ распѧ́тїе претерпѣ́въ и҆ сме́рть, / воскре́се бг҃олѣ́пнѡ, / совозста́вивъ на́съ ꙗ҆́кѡ всеси́ленъ."
 },
 {
  "type": "TEXT",
  "value": "Катава́сїа: Ѻ҆́троки ѿ пе́щи и҆зба́вивый̀: И҆ тропа́рь: Хрⷭ҇то́съ воскре́се: три́жды."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Се́й нарече́нный и҆ ст҃ы́й де́нь, / є҆ди́нъ сꙋббѡ́тъ цр҃ь и҆ гдⷭ҇ь, / пра́здникѡвъ пра́здникъ, / и҆ торжество̀ є҆́сть торже́ствъ: / во́ньже благослови́мъ хрⷭ҇та̀ во вѣ́ки."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "П рїиди́те но́вагѡ вїногра́да рожде́нїѧ, / бж҃е́ственнагѡ весе́лїѧ, / въ наро́читомъ днѝ воскрⷭ҇нїѧ, / црⷭ҇твїѧ хрⷭ҇то́ва прїѡбщи́мсѧ, / пою́ще є҆го̀ / ꙗ҆́кѡ бг҃а во вѣ́ки."
 },
 {
  "type": "TEXT",
  "value": "Припѣ́въ: Хрⷭ҇то́съ воскре́се и҆з̾ ме́ртвыхъ."
 },
 {
  "type": "TEXT",
  "value": "В озведѝ ѻ҆́крестъ ѻ҆́чи твоѝ сїѡ́не и҆ ви́ждь: / се́ бо прїидо́ша къ тебѣ̀ / ꙗ҆́кѡ бг҃освѣ̑тлаѧ свѣти̑ла, / ѿ за́пада, и҆ сѣ́вера, и҆ мо́рѧ, / и҆ восто́ка ча́да твоѧ̑, / въ тебѣ̀ благословѧ̑щаѧ хрⷭ҇та̀ во вѣ́ки."
 },
 {
  "type": "TEXT",
  "value": "Припѣ́въ: Прест҃а́ѧ трⷪ҇це, бж҃е на́шъ, сла́ва тебѣ̀."
 },
 {
  "type": "TEXT",
  "value": "Трⷪ҇ченъ: Ѻ҆́ч҃е вседержи́телю, и҆ сло́ве, и҆ дш҃е, / тремѝ соединѧ́емое во ѵ҆поста́сѣхъ є҆стество̀, / пресꙋ́щественне и҆ пребж҃е́ственне, / въ тѧ̀ крⷭ҇ти́хомсѧ, / и҆ тѧ̀ бл҃гослови́мъ во всѧ̀ вѣ́ки."
 },
 {
  "type": "TEXT",
  "value": "Бл҃гослови́мъ ѻ҆ц҃а̀ и҆ сн҃а и҆ ст҃а́го дх҃а, гдⷭ҇а."
 },
 {
  "type": "TEXT",
  "value": "П рїи́де тобо́ю въ мі́ръ гдⷭ҇ь / дв҃о бцⷣе, / и҆ чре́во а҆́дово расто́ргъ, / смє́ртнымъ на́мъ воскресе́нїе дарова̀: / тѣ́мже бл҃гослови́мъ є҆го̀ во вѣ́ки."
 },
 {
  "type": "TEXT",
  "value": "И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "В сю̀ низложи́въ сме́рти держа́вꙋ / сн҃ъ тво́й дв҃о, свои́мъ воскресе́нїемъ, / ꙗ҆́кѡ бг҃ъ крѣ́пкїй совознесѐ на́съ и҆ ѡ҆божѝ: / тѣ́мже воспѣва́емъ є҆го̀ во вѣ́ки."
 },
 {
  "type": "TEXT",
  "value": "Катава́сїа: Се́й нарече́нный и҆ ст҃ы́й де́нь: И҆ тропа́рь: Хрⷭ҇то́съ воскре́се: три́жды."
 },
 {
  "type": "TEXT",
  "value": "Честнѣ́йшꙋю: не пое́мъ до ѿда́нїѧ па́схи."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "Дїа́конъ: Вели́читъ дꙋша̀ моѧ̀ / воскре́сшаго тридне́внѡ ѿ гро́ба, / хрⷭ҇та̀ жизнода́вца."
 },
 {
  "type": "TEXT",
  "value": "И҆ пе́рвый ли́къ пое́тъ і҆рмо́съ: Свѣти́сѧ, свѣти́сѧ / но́вый і҆ерꙋсали́ме: / сла́ва бо гдⷭ҇нѧ / на тебѣ̀ возсїѧ̀. / ликꙋ́й ны́нѣ, / и҆ весели́сѧ сїѡ́не. / ты́ же чи́стаѧ красꙋ́йсѧ бцⷣе, / ѡ҆ воста́нїи рождества̀ твоегѡ̀."
 },
 {
  "type": "TEXT",
  "value": "Та́же, вторы́й ли́къ пое́тъ припѣ́въ: Вели́читъ дꙋша̀ моѧ̀ / во́лею страда́вша, и҆ погребе́на, / и҆ воскре́сшаго тридне́внѡ ѿ гро́ба. И҆ і҆рмо́съ: Свѣти́сѧ:"
 },
 {
  "type": "TEXT",
  "value": "Та́же, пе́рвый ли́къ пое́тъ припѣ́въ: Хрⷭ҇то́съ но́ваѧ па́сха, / же́ртва жива́ѧ, / а҆́гнецъ бж҃їй / взе́млѧй грѣхѝ ми́ра."
 },
 {
  "type": "TEXT",
  "value": "Ѽ бж҃е́ственнагѡ, ѽ любе́знагѡ, / ѽ сладча́йшагѡ твоегѡ̀ гла́са! / съ на́ми бо нело́жнѡ / ѡ҆бѣща́лсѧ є҆сѝ бы́ти, / до сконча́нїѧ вѣ́ка хрⷭ҇тѐ: / є҆го́же вѣ́рнїи, / ᲂу҆твержде́нїе наде́жди и҆мꙋ́ще, ра́дꙋемсѧ."
 },
 {
  "type": "TEXT",
  "value": "И҆ вторы́й ли́къ пое́тъ то́йже припѣ́въ, и҆ тропа́рь."
 },
 {
  "type": "TEXT",
  "value": "Та́же, пе́рвый ли́къ пое́тъ припѣ́въ: А҆́гг҃лъ вопїѧ́ше бл҃года́тнѣй: / чи́стаѧ дв҃о, ра́дꙋйсѧ, / и҆ па́ки рекꙋ̀, ра́дꙋйсѧ: / тво́й сн҃ъ воскре́се / тридне́венъ ѿ гро́ба, / и҆ мє́ртвыѧ воздви́гнꙋвый, / лю́дїе весели́тесѧ. И҆ тропа́рь: Ѽ бж҃е́ственнагѡ, ѽ любе́знагѡ:"
 },
 {
  "type": "TEXT",
  "value": "И҆ вторы́й ли́къ пое́тъ то́йже припѣ́въ, и҆ тропа́рь."
 },
 {
  "type": "TEXT",
  "value": "Та́же, пе́рвый ли́къ: Возбꙋди́лъ є҆сѝ ᲂу҆снꙋ́въ мє́ртвыѧ ѿ вѣ́ка, / ца́рски рыка́вый ꙗ҆́кѡ ѿ і҆ꙋ́ды ле́въ. И҆ тропа́рь: Ѽ бж҃е́ственнагѡ, ѽ любе́знагѡ:"
 },
 {
  "type": "TEXT",
  "value": "Вторы́й ли́къ: Магдали́на марі́а притечѐ ко гро́бꙋ, / и҆ хрⷭ҇та̀ ви́дѣвши, / ꙗ҆́кѡ вертогра́дарѧ вопроша́ше."
 },
 {
  "type": "TEXT",
  "value": "Ѽ па́сха ве́лїѧ и҆ сщ҃е́ннѣйшаѧ, хрⷭ҇тѐ! / ѽ мꙋ́дросте, и҆ сло́ве бж҃їй, и҆ си́ло! / подава́й на́мъ и҆́стѣе тебѐ причаща́тисѧ, / въ невече́рнѣмъ днѝ црⷭ҇твїѧ твоегѡ̀."
 },
 {
  "type": "TEXT",
  "value": "Та́же, пе́рвый ли́къ: А҆́гг҃лъ ѡ҆блиста́ѧй жена́мъ вопїѧ́ше: / преста́ните ѿ сле́зъ, ꙗ҆́кѡ хрⷭ҇то́съ воскре́се. И҆ тропа́рь: Ѽ па́сха ве́лїѧ и҆ сщ҃е́ннѣйшаѧ:"
 },
 {
  "type": "TEXT",
  "value": "Вторы́й ли́къ: Хрⷭ҇то́съ воскре́се, сме́рть попра́вый, / и҆ мє́ртвыѧ воздви́гнꙋвый, / лю́дїе весели́тесѧ. И҆ тропа́рь: Ѽ па́сха ве́лїѧ и҆ сщ҃е́ннѣйшаѧ:"
 },
 {
  "type": "TEXT",
  "value": "Та́же, пе́рвый ли́къ: Дне́сь всѧ́ка тва́рь весели́тсѧ и҆ ра́дꙋетсѧ: / ꙗ҆́кѡ хрⷭ҇то́съ воскре́се, и҆ а҆́дъ плѣни́сѧ. И҆ тропа́рь: Ѽ па́сха ве́лїѧ и҆ сщ҃е́ннѣйшаѧ:"
 },
 {
  "type": "TEXT",
  "value": "Вторы́й ли́къ: Дне́сь влⷣка плѣнѝ а҆́да, / воздви́гнꙋвый ю҆́зники, ꙗ҆̀же ѿ вѣ́ка и҆мѧ́ше лю́тѣ ѡ҆держи̑мыѧ. И҆ тропа́рь: Ѽ па́сха ве́лїѧ и҆ сщ҃е́ннѣйшаѧ:"
 },
 {
  "type": "TEXT",
  "value": "Пе́рвый ли́къ: Вели́читъ дꙋша̀ моѧ̀ / трїѷпоста́снагѡ и҆ нераздѣ́льнагѡ бж҃ества̀ держа́вꙋ."
 },
 {
  "type": "TEXT",
  "value": "Бг҃оро́диченъ: Согла́снѡ дв҃о, тебѐ бл҃жи́мъ вѣ́рнїи: / ра́дꙋйсѧ две́ре гдⷭ҇нѧ: / ра́дꙋйсѧ гра́де ѡ҆дꙋшевле́нный: / ра́дꙋйсѧ, є҆ѧ́же ра́ди на́мъ ны́нѣ возсїѧ̀ свѣ́тъ, / и҆з̾ тебѐ рожде́ннагѡ и҆з̾ ме́ртвыхъ воскресе́нїѧ."
 },
 {
  "type": "TEXT",
  "value": "Вторы́й ли́къ: Ра́дꙋйсѧ дв҃о, ра́дꙋйсѧ, / ра́дꙋйсѧ бл҃гослове́ннаѧ, / ра́дꙋйсѧ препросла́вленнаѧ: / тво́й бо сн҃ъ воскре́се тридне́венъ ѿ гро́ба."
 },
 {
  "type": "TEXT",
  "value": "Бг҃оро́диченъ: Весели́сѧ и҆ ра́дꙋйсѧ бжⷭ҇твеннаѧ две́ре свѣ́та: / заше́дый бо і҆и҃съ во гро́бъ возсїѧ̀, / просїѧ́въ со́лнца свѣтлѣ́е, / и҆ вѣ̑рныѧ всѧ̑ ѡ҆зари́въ, / бг҃ора́дованнаѧ влⷣчце."
 },
 {
  "type": "TEXT",
  "value": "Та́же ѻ҆́ба ли́ка, соше́дшесѧ вкꙋ́пѣ, пою́тъ припѣ́въ: Вели́читъ дꙋша̀ моѧ̀ / воскре́сшаго тридне́внѡ ѿ гро́ба, / хрⷭ҇та̀ жизнода́вца."
 },
 {
  "type": "TEXT",
  "value": "И҆ і҆рмо́съ: Свѣти́сѧ, свѣти́сѧ / но́вый і҆ерꙋсали́ме: / сла́ва бо гдⷭ҇нѧ / на тебѣ̀ возсїѧ̀. / ликꙋ́й ны́нѣ, / и҆ весели́сѧ сїѡ́не. / ты́ же чи́стаѧ красꙋ́йсѧ бцⷣе, / ѡ҆ воста́нїи рождества̀ твоегѡ̀."
 },
 {
  "type": "TEXT",
  "value": "И҆ тропа́рь: Хрⷭ҇то́съ воскре́се: три́жды. И҆ є҆ктенїа̀."
 },
 {
  "type": "HEADER",
  "value": "Є҆ѯапостїла́рїй. Самогла́сенъ:"
 },
 {
  "type": "TEXT",
  "value": "П ло́тїю ᲂу҆снꙋ́въ, / ꙗ҆́кѡ ме́ртвъ / цр҃ю̀ и҆ гдⷭ҇и, / тридне́венъ воскре́слъ є҆сѝ, / а҆да́ма воздви́гъ ѿ тлѝ, / и҆ ᲂу҆праздни́въ сме́рть: / па́сха нетлѣ́нїѧ, / мі́ра спасе́нїе. [Три́жды.]"
 },
 {
  "type": "HEADER",
  "value": "На хвали́техъ, поста́вимъ стїхѝ д҃. И҆ пое́мъ стїхи̑ры воскрⷭ҇ны, гла́съ д҃:"
 },
 {
  "type": "TEXT",
  "value": "Сті́хъ: Хвали́те є҆го̀ на си́лахъ є҆гѡ̀, / хвали́те є҆го̀ по мно́жествꙋ вели́чествїѧ є҆гѡ̀."
 },
 {
  "type": "TEXT",
  "value": "К рⷭ҇тъ претерпѣ́вый и҆ сме́рть, / и҆ воскр҃сы́й и҆з̾ ме́ртвыхъ всеси́льне гдⷭ҇и, / сла́вимъ твоѐ воскрⷭ҇нїе."
 },
 {
  "type": "TEXT",
  "value": "Сті́хъ: Хвали́те є҆го̀ во гла́сѣ трꙋ́бнѣмъ, / хвали́те є҆го̀ во ѱалти́ри и҆ гꙋ́слехъ."
 },
 {
  "type": "TEXT",
  "value": "К рⷭ҇то́мъ твои́мъ хрⷭ҇тѐ, / ѿ дре́внїѧ клѧ́твы свободи́лъ є҆сѝ на́съ, / и҆ сме́ртїю твое́ю / є҆стество̀ на́ше мꙋ́чащаго дїа́вола ᲂу҆праздни́лъ є҆сѝ: / воста́нїемъ же твои́мъ ра́дости всѧ̑ и҆спо́лнилъ є҆сѝ. / тѣ́мже вопїе́мъ тѝ: / воскр҃сы́й и҆з̾ ме́ртвыхъ гдⷭ҇и, сла́ва тебѣ̀."
 },
 {
  "type": "TEXT",
  "value": "Сті́хъ: Хвали́те є҆го̀ въ тѷмпа́нѣ и҆ ли́цѣ, / хвали́те є҆го̀ во стрꙋ́нахъ и҆ ѻ҆рга́нѣ."
 },
 {
  "type": "TEXT",
  "value": "Т вои́мъ крⷭ҇то́мъ хрⷭ҇тѐ сп҃сѐ, / наста́ви на́съ на и҆́стинꙋ твою̀, / и҆ и҆зба́ви на́съ ѿ сѣ́тей вра́жїихъ, / воскр҃сы́й и҆з̾ ме́ртвыхъ, / возста́ви ны̀ па́дшыѧсѧ грѣхо́мъ, / просте́ръ рꙋ́кꙋ твою̀ чл҃вѣколю́бче гдⷭ҇и, / мл҃твами ст҃ы́хъ твои́хъ."
 },
 {
  "type": "TEXT",
  "value": "Сті́хъ: Хвали́те є҆го̀ въ кѷмва́лѣхъ доброгла́сныхъ. хвали́те є҆го̀ въ кѷмва́лѣхъ восклица́нїѧ. / всѧ́кое дыха́нїе да хва́литъ гдⷭ҇а."
 },
 {
  "type": "TEXT",
  "value": "Ѻ҆ч҃ ескихъ твои́хъ нѣ́дръ не разлꙋчи́всѧ, / є҆диноро́дный сло́ве бж҃їй, / прише́лъ є҆сѝ на зе́млю за чл҃вѣколю́бїе, / чл҃вѣ́къ бы́въ непрело́женъ, / и҆ крⷭ҇тъ и҆ сме́рть претерпѣ́лъ є҆сѝ пло́тїю, / безстра́стный бж҃ество́мъ: / воскр҃съ же и҆з̾ ме́ртвыхъ, / безсме́ртїе по́далъ є҆сѝ ро́дꙋ человѣ́ческомꙋ, / ꙗ҆́кѡ є҆ди́нъ всеси́ленъ."
 },
 {
  "type": "HEADER",
  "value": "И҆ стїхи̑ры па́схи съ припѣ́вы и҆́хъ, гла́съ є҃."
 },
 {
  "type": "TEXT",
  "value": "Сті́хъ: Да воскре́снетъ бг҃ъ, / и҆ расточа́тсѧ вразѝ є҆гѡ̀."
 },
 {
  "type": "TEXT",
  "value": "П а́сха / сщ҃е́ннаѧ на́мъ дне́сь показа́сѧ: / па́сха но́ва ст҃а́ѧ: / па́сха та́инственнаѧ: / па́сха всечестна́ѧ: / па́сха хрⷭ҇то́съ и҆зба́витель: / па́сха непоро́чнаѧ: / па́сха вели́каѧ: / па́сха вѣ́рныхъ: / па́сха двє́ри ра̑йскїѧ на́мъ ѿверза́ющаѧ: / па́сха всѣ́хъ ѡ҆свѧща́ющаѧ вѣ́рныхъ."
 },
 {
  "type": "TEXT",
  "value": "Сті́хъ: Ꙗ҆́кѡ и҆счеза́етъ ды́мъ, / да и҆сче́знꙋтъ."
 },
 {
  "type": "TEXT",
  "value": "П рїиди́те / ѿ видѣ́нїѧ жєны̀ бл҃говѣ̑стницы, / и҆ сїѡ́нꙋ рцы́те: / прїимѝ / ѿ на́съ ра́дости бл҃говѣ́щенїѧ, воскресе́нїѧ хрⷭ҇то́ва: / красꙋ́йсѧ, ликꙋ́й, / и҆ ра́дꙋйсѧ і҆ерꙋсали́ме, / цр҃ѧ̀ хрⷭ҇та̀ ᲂу҆зрѣ́въ и҆з̾ гро́ба, / ꙗ҆́кѡ жениха̀ происходѧ́ща."
 },
 {
  "type": "TEXT",
  "value": "Сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ."
 },
 {
  "type": "TEXT",
  "value": "М ѷронѡ́сицы жєны̀, / ᲂу҆́трꙋ глꙋбокꙋ̀, / предста́вшѧ гро́бꙋ живода́вца, / ѡ҆брѣто́ша а҆́гг҃ла / на ка́мени сѣдѧ́ща, / и҆ то́й провѣща́въ и҆̀мъ / си́це глаго́лаше: / что̀ и҆́щете жива́гѡ съ ме́ртвыми; / что̀ пла́чете нетлѣ́ннагѡ во тлѝ; / ше́дше проповѣ́дите ᲂу҆ченикѡ́мъ є҆гѡ̀."
 },
 {
  "type": "TEXT",
  "value": "Сті́хъ: Се́й де́нь, є҆го́же сотворѝ гдⷭ҇ь, / возра́дꙋемсѧ и҆ возвесели́мсѧ во́нь."
 },
 {
  "type": "TEXT",
  "value": "П а́сха кра́снаѧ, / па́сха, гдⷭ҇нѧ па́сха, / па́сха всечестна́ѧ / на́мъ возсїѧ̀. па́сха, / ра́достїю дрꙋ́гъ дрꙋ́га ѡ҆б̾и́мемъ. / ѽ па́сха! / и҆збавле́нїе ско́рби, / и҆́бо и҆з̾ гро́ба дне́сь / ꙗ҆́кѡ ѿ черто́га / возсїѧ́въ хрⷭ҇то́съ, / жєны̀ ра́дости и҆спо́лни глаго́лѧ: / проповѣ́дите а҆пⷭ҇лѡмъ."
 },
 {
  "type": "TEXT",
  "value": "Сла́ва и҆ ны́нѣ, гла́съ є҃: Воскрⷭ҇нїѧ де́нь, / и҆ просвѣти́мсѧ торжество́мъ, / и҆ дрꙋ́гъ дрꙋ́га ѡ҆б̾и́мемъ. / рце́мъ бра́тїе, / и҆ ненави́дѧщымъ на́съ, / прости́мъ всѧ̑ воскрⷭ҇нїемъ, / и҆ та́кѡ возопїи́мъ: / хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "HEADER",
  "value": "Та́же настоѧ́щїй тропа́рь, во гла́съ є҃, три́жды:"
 },
 {
  "type": "TEXT",
  "value": "Х рⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Ѻ҆бы́чный ѿпꙋ́стъ. И҆ лїті́а внѣ̀ ѻ҆би́тели. Часы́ же по ѻ҆бы́чаю па́схи."
 },
 {
  "type": "HEADER",
  "value": "На лїтꙋргі́и."
 },
 {
  "type": "TEXT",
  "value": "Наче́ншꙋ дїа́конꙋ: Бл҃гословѝ влⷣко."
 },
 {
  "type": "TEXT",
  "value": "Настоѧ́телю же возгласи́вшꙋ: Бл҃гослове́но црⷭ҇тво ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ."
 },
 {
  "type": "TEXT",
  "value": "И҆ мы̀: А҆ми́нь. Настоѧ́тель пое́тъ съ про́чими слꙋжи́тели во ст҃о́мъ ѻ҆лтарѣ̀: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ. [Три́жды. И҆ ли́ки то́йжде, три́жды.]"
 },
 {
  "type": "HEADER",
  "value": "Настоѧ́тель глаго́летъ припѣ́вы:"
 },
 {
  "type": "TEXT",
  "value": "а҃-й сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀, / и҆ да бѣжа́тъ ѿ лица̀ є҆гѡ̀ ненави́дѧщїи є҆го̀."
 },
 {
  "type": "TEXT",
  "value": "И҆ на кі́йждо сті́хъ мы̀ пое́мъ тропа́рь: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ. [Ве́сь по є҆ди́ножды.]"
 },
 {
  "type": "TEXT",
  "value": "в҃-й сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, / ꙗ҆́кѡ та́етъ во́скъ ѿ лица̀ ѻ҆гнѧ̀. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "г҃-й сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "д҃-й сті́хъ: Се́й де́нь є҆го́же сотворѝ гдⷭ҇ь, / возра́дꙋемсѧ и҆ возвесели́мсѧ во́нь. Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Сла́ва: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "И҆ ны́нѣ: Х рⷭ҇то́съ воскре́се: є҆ди́ножды."
 },
 {
  "type": "TEXT",
  "value": "Та́же настоѧ́тель пое́тъ вы́шшимъ гла́сомъ: Хрⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ."
 },
 {
  "type": "TEXT",
  "value": "Мы́ же: И҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Посе́мъ глаго́летъ дїа́конъ є҆ктенїю̀ вели́кꙋю. По є҆ктенїи́ же и҆ по возгла́сѣ:"
 },
 {
  "type": "HEADER",
  "value": "А҆нтїфѡ́нъ пе́рвый, ѱало́мъ ѯ҃є, гла́съ в҃."
 },
 {
  "type": "TEXT",
  "value": "Сті́хъ а҃: Воскли́кните гдⷭ҇ви всѧ̀ землѧ̀."
 },
 {
  "type": "TEXT",
  "value": "Припѣ́въ: Мл҃твами бцⷣы, / сп҃се спасѝ на́съ."
 },
 {
  "type": "TEXT",
  "value": "И҆ дрꙋгі́й ли́къ то́йжде сті́хъ: Воскли́кните гдⷭ҇ви всѧ̀ землѧ̀, / по́йте же и҆́мени є҆гѡ̀, дади́те сла́вꙋ хвалѣ̀ є҆гѡ̀."
 },
 {
  "type": "TEXT",
  "value": "Припѣ́въ: Мл҃твами бцⷣы, / сп҃се спасѝ на́съ."
 },
 {
  "type": "TEXT",
  "value": "Сті́хъ в҃: Рцы́те бг҃ꙋ: ко́ль стра́шна дѣла̀ твоѧ̀, / во мно́жествѣ си́лы твоеѧ̀ со́лжꙋтъ тебѣ̀ вразѝ твоѝ."
 },
 {
  "type": "TEXT",
  "value": "Припѣ́въ: Мл҃твами бцⷣы, / сп҃се спасѝ на́съ."
 },
 {
  "type": "TEXT",
  "value": "Сті́хъ г҃: Всѧ̀ землѧ̀ да покло́нитсѧ тебѣ̀, / и҆ пое́тъ тебѣ̀, да пое́тъ же и҆́мени твоемꙋ̀ вы́шнїй."
 },
 {
  "type": "TEXT",
  "value": "Припѣ́въ: Мл҃твами бцⷣы, / сп҃се спасѝ на́съ."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, / и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Кꙋ́пнѡ ѻ҆́ба ли́ка вы́шшимъ гла́сомъ: Мл҃твами бцⷣы, / сп҃се спасѝ на́съ."
 },
 {
  "type": "TEXT",
  "value": "Та́же, є҆ктенїа̀ ма́лаѧ."
 },
 {
  "type": "HEADER",
  "value": "А҆нтїфѡ́нъ вторы́й, ѱало́мъ ѯ҃ѕ, гла́съ то́йже."
 },
 {
  "type": "TEXT",
  "value": "Сті́хъ а҃: Бж҃е ᲂу҆ще́дри ны̀, и҆ бл҃гослови́ ны."
 },
 {
  "type": "TEXT",
  "value": "Припѣ́въ: Спаси́ ны сн҃е бж҃їй, / воскресы́й и҆з̾ ме́ртвыхъ, пою́щыѧ тѝ: / а҆ллилꙋ́їа. [Є҆ди́ножды.]"
 },
 {
  "type": "TEXT",
  "value": "Дрꙋга́ѧ страна̀, то́йже сті́хъ: Бж҃е, ᲂу҆ще́дри ны̀, и҆ бл҃гослови́ ны, / просвѣтѝ лицѐ твоѐ на ны̀, и҆ поми́лꙋй ны̀."
 },
 {
  "type": "TEXT",
  "value": "Припѣ́въ: Спаси́ ны сн҃е бж҃їй, / воскресы́й и҆з̾ ме́ртвыхъ, пою́щыѧ тѝ: / а҆ллилꙋ́їа."
 },
 {
  "type": "TEXT",
  "value": "Сті́хъ в҃: Да позна́емъ на землѝ пꙋ́ть тво́й, / во всѣ́хъ ꙗ҆зы́цѣхъ спасе́нїе твоѐ."
 },
 {
  "type": "TEXT",
  "value": "Припѣ́въ: Спаси́ ны сн҃е бж҃їй, / воскресы́й и҆з̾ ме́ртвыхъ, пою́щыѧ тѝ: / а҆ллилꙋ́їа."
 },
 {
  "type": "TEXT",
  "value": "Сті́хъ г҃: Да и҆сповѣ́дѧтсѧ тебѣ̀ лю́дїе бж҃е, / да и҆сповѣ́дѧтсѧ тебѣ̀ лю́дїе всѝ."
 },
 {
  "type": "TEXT",
  "value": "Припѣ́въ: Спаси́ ны сн҃е бж҃їй, / воскресы́й и҆з̾ ме́ртвыхъ, пою́щыѧ тѝ: / а҆ллилꙋ́їа."
 },
 {
  "type": "TEXT",
  "value": "С ла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, / и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь."
 },
 {
  "type": "TEXT",
  "value": "Вкꙋ́пѣ два̀ ли́ка: Є҆диноро́дный сн҃е и҆ сло́ве бж҃їй, безсме́ртенъ сы́й, / и҆ и҆зво́ливый сп҃се́нїѧ на́шегѡ ра́ди / воплоти́тисѧ ѿ ст҃ы́ѧ бцⷣы, и҆ приснодв҃ы мр҃і́и, / непрело́жнѡ вочл҃вѣ́чивыйсѧ: / распны́йсѧ же, хрⷭ҇тѐ бж҃е, сме́ртїю сме́рть попра́вый, / є҆ди́нъ сы́й ст҃ы́ѧ трⷪ҇цы, / спрославлѧ́емый ѻ҆ц҃ꙋ̀, и҆ ст҃о́мꙋ дх҃ꙋ, сп҃сѝ на́съ."
 },
 {
  "type": "TEXT",
  "value": "Та́же, є҆ктенїа̀."
 },
 {
  "type": "HEADER",
  "value": "А҆нтїфѡ́нъ г҃-й, ѱало́мъ ѯ҃з, гла́съ є҃."
 },
 {
  "type": "TEXT",
  "value": "Сті́хъ а҃: Да воскре́снетъ бг҃ъ, и҆ расточа́тсѧ вразѝ є҆гѡ̀."
 },
 {
  "type": "HEADER",
  "value": "Тропа́рь, гла́съ є҃:"
 },
 {
  "type": "TEXT",
  "value": "Х рⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "TEXT",
  "value": "Дрꙋга́ѧ страна̀, то́й же сті́хъ: Да воскре́снетъ бг҃ъ, и҆ расточа́тсѧ вразѝ є҆гѡ̀, / и҆ да бѣжа́тъ ѿ лица̀ є҆гѡ̀ ненави́дѧщїи є҆го̀."
 },
 {
  "type": "TEXT",
  "value": "Тропа́рь: Хрⷭ҇то́съ воскре́се и҆з̾ ме́ртвыхъ:"
 },
 {
  "type": "TEXT",
  "value": "Сті́хъ в҃: Ꙗ҆́кѡ и҆счеза́етъ ды́мъ, да и҆сче́знꙋтъ, / ꙗ҆́кѡ та́етъ во́скъ ѿ лица̀ ѻ҆гнѧ̀."
 },
 {
  "type": "TEXT",
  "value": "Тропа́рь: Хрⷭ҇то́съ воскре́се и҆з̾ ме́ртвыхъ:"
 },
 {
  "type": "TEXT",
  "value": "Сті́хъ г҃: Та́кѡ да поги́бнꙋтъ грѣ́шницы ѿ лица̀ бж҃їѧ, / а҆ пра́вєдницы да возвеселѧ́тсѧ, да возра́дꙋютсѧ пред̾ бг҃омъ."
 },
 {
  "type": "TEXT",
  "value": "Тропа́рь: Хрⷭ҇то́съ воскре́се и҆з̾ ме́ртвыхъ:"
 },
 {
  "type": "HEADER",
  "value": "И҆ быва́етъ вхо́дъ."
 },
 {
  "type": "TEXT",
  "value": "И҆ возглаша́етъ дїа́конъ, а҆́ще є҆́сть, а҆́ще же нѝ, і҆ере́й: Премꙋ́дрость, про́сти."
 },
 {
  "type": "TEXT",
  "value": "Мы́ же вхо́дное: Въ це́рквахъ благослови́те бг҃а, гдⷭ҇а ѿ и҆стѡ́чникъ і҆зра́илевыхъ."
 },
 {
  "type": "HEADER",
  "value": "И҆ пое́мъ тропа́рь, гла́съ є҃:"
 },
 {
  "type": "TEXT",
  "value": "Х рⷭ҇то́съ воскре́се и҆з̾ ме́ртвыхъ, / сме́ртїю сме́рть попра́въ, / и҆ сꙋ́щымъ во гробѣ́хъ живо́тъ дарова́въ."
 },
 {
  "type": "HEADER",
  "value": "Ѵ҆пакоѝ, гла́съ д҃:"
 },
 {
  "type": "TEXT",
  "value": "П редвари́вшыѧ ᲂу҆́тро ꙗ҆̀же ѡ҆ марі́и, / и҆ ѡ҆брѣ́тшыѧ ка́мень ѿвале́нъ ѿ гро́ба, / слы́шахꙋ ѿ а҆́гг҃ла: во свѣ́тѣ присносꙋ́щнѣмъ сꙋ́щаго, / съ ме́ртвыми что̀ и҆́щете ꙗ҆́кѡ человѣ́ка; / ви́дите грѡ́бныѧ пелєны̀, тецы́те, и҆ мі́рꙋ проповѣ́дите, / ꙗ҆́кѡ воста̀ гдⷭ҇ь, ᲂу҆мертви́вый сме́рть, / ꙗ҆́кѡ є҆́сть сн҃ъ бг҃а, спаса́ющагѡ ро́дъ человѣ́ческїй."
 },
 {
  "type": "HEADER",
  "value": "Сла́ва, и҆ ны́нѣ: конда́къ, гла́съ и҃:"
 },
 {
  "type": "TEXT",
  "value": "А҆́ ще и҆ во гро́бъ снизше́лъ є҆сѝ безсме́ртне, / но а҆́довꙋ разрꙋши́лъ є҆сѝ си́лꙋ, / и҆ воскре́слъ є҆сѝ ꙗ҆́кѡ побѣди́тель хрⷭ҇тѐ бж҃е, / жена́мъ мѷроно́сицамъ вѣща́вый: ра́дꙋйтесѧ, / и҆ твои́мъ а҆пⷭ҇лѡмъ ми́ръ да́рꙋѧй, / па́дшымъ подаѧ́й воскресе́нїе."
 },
 {
  "type": "HEADER",
  "value": "Вмѣ́стѡ же трист҃а́гѡ:"
 },
 {
  "type": "TEXT",
  "value": "Є҆ ли́цы во хрⷭ҇та̀ крести́стесѧ, / во хрⷭ҇та̀ ѡ҆блеко́стесѧ: / а҆ллилꙋ́їа."
 },
 {
  "type": "TEXT",
  "value": "Прокі́менъ а҆пⷭ҇ла, гла́съ ѕ҃: Помѧнꙋ̀ и҆́мѧ твоѐ / во всѧ́комъ ро́дѣ и҆ ро́дѣ. Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ."
 },
 {
  "type": "HEADER",
  "value": "Дѣѧ̑нїѧ ст҃ы́хъ а҆пⷭ҇лъ, зача́ло є҃."
 },
 {
  "type": "TEXT",
  "value": "В о днѝ ѻ҆́ны, речѐ пе́тръ къ лю́демъ: мꙋ́жїе і҆и҃льстїи, послꙋ́шайте слове́съ си́хъ: і҆и҃са назѡре́а, мꙋ́жа ѿ бг҃а и҆звѣ́ствованна въ ва́съ си́лами, и҆ чꙋдесы̀, и҆ зна́менїи, ꙗ҆̀же сотворѝ тѣ́мъ бг҃ъ посредѣ̀ ва́съ, ꙗ҆́коже и҆ са́ми вѣ́сте: сего̀ нарекова́ннымъ совѣ́томъ и҆ проразꙋмѣ́нїемъ бж҃їимъ пре́дана прїе́мше, рꙋка́ми беззако́нныхъ пригво́ждьше, ᲂу҆би́сте: є҆го́же бг҃ъ воскресѝ, разрѣши́въ болѣ̑зни смє́ртныѧ, ꙗ҆́коже не бѧ́ше мо́щно держа́нꙋ бы́ти є҆мꙋ̀ ѿ неѧ̀. даві́дъ бо глаго́летъ ѡ҆ не́мъ: предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ. сегѡ̀ ра́ди возвесели́сѧ се́рдце моѐ, и҆ возра́довасѧ ѧ҆зы́къ мо́й: є҆ще́ же и҆ пло́ть моѧ̀ всели́тсѧ на ᲂу҆пова́нїи. ꙗ҆́кѡ не ѡ҆ста́виши дꙋшѝ моеѧ̀ во а҆́дѣ, нижѐ да́си преподо́бномꙋ твоемꙋ̀ ви́дѣти и҆стлѣ́нїѧ. сказа́лъ мѝ є҆сѝ пꙋти̑ живота̀, и҆спо́лниши мѧ̀ весе́лїѧ съ лице́мъ твои́мъ. мꙋ́жїе бра́тїе, досто́итъ рещѝ съ дерзнове́нїемъ къ ва́мъ ѡ҆ патрїа́рсѣ даві́дѣ, ꙗ҆́кѡ и҆ ᲂу҆́мре, и҆ погребе́нъ бы́сть, и҆ гро́бъ є҆гѡ̀ є҆́сть въ на́съ да́же до днѐ сегѡ̀. проро́къ ᲂу҆̀бо сы́й, и҆ вѣ́дый, ꙗ҆́кѡ клѧ́твою клѧ́тсѧ є҆мꙋ̀ бг҃ъ, ѿ плода̀ чре́слъ є҆гѡ̀, по пло́ти воздви́гнꙋти хрⷭ҇та̀, и҆ посади́ти є҆го̀ на прⷭ҇то́лѣ є҆гѡ̀: предви́дѣвъ глаго́ла ѡ҆ воскрⷭ҇нїи хрⷭ҇то́вѣ, ꙗ҆́кѡ не ѡ҆ста́висѧ дꙋша̀ є҆гѡ̀ во а҆́дѣ, ни пло́ть є҆гѡ̀ ви́дѣ и҆стлѣ́нїѧ. сего̀ і҆и҃са воскресѝ бг҃ъ, є҆мꙋ́же всѝ мы̀ є҆смы̀ свидѣ́тели. десни́цею ᲂу҆̀бо бж҃їею вознесе́сѧ, и҆ ѡ҆бѣтова́нїе ст҃а́гѡ дх҃а прїе́мъ ѿ ѻ҆ц҃а̀, и҆злїѧ̀ сїѐ, є҆́же вы̀ ны́нѣ ви́дите и҆ слы́шите. не бо̀ даві́дъ взы́де на небеса̀, глаго́летъ бо са́мъ: речѐ гдⷭ҇ь гдⷭ҇ви моемꙋ̀, сѣдѝ ѡ҆деснꙋ́ю менѐ, до́ндеже положꙋ̀ врагѝ твоѧ̀ подно́жїе но́гъ твои́хъ. тве́рдѡ ᲂу҆̀бо да разꙋмѣ́етъ ве́сь до́мъ і҆и҃левъ, ꙗ҆́кѡ и҆ гдⷭ҇а и҆ хрⷭ҇та̀ є҆го̀ бг҃ъ сотвори́лъ є҆́сть, сего̀ і҆и҃са, є҆го́же вы̀ распѧ́сте."
 },
 {
  "type": "TEXT",
  "value": "А҆ллилꙋ́їа, гла́съ в҃: Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆блажа́тъ мѧ̀ всѝ ро́ди."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, зача́ло д҃."
 },
 {
  "type": "TEXT",
  "value": "В о вре́мѧ ѻ҆́но, стоѧ́ше і҆ѡа́ннъ, и҆ ѿ ᲂу҆ч҃нкъ є҆гѡ̀ два̀. и҆ ᲂу҆зрѣ́въ і҆и҃са грѧдꙋ́ща, глаго́ла: сѐ а҆́гнецъ бж҃їй. и҆ слы́шаста є҆го̀ ѻ҆́ба ᲂу҆ченика̀ глаго́люща, и҆ по і҆и҃сѣ и҆до́ста. ѡ҆бра́щсѧ же і҆и҃съ, и҆ ви́дѣвъ ѧ҆̀ по себѣ̀ и҆дꙋ́ща, глаго́ла и҆́ма: чесѡ̀ и҆́щета; ѻ҆́на же рѣ́ста є҆мꙋ̀: равві̀, є҆́же глаго́летсѧ сказа́емо, ᲂу҆чи́телю, гдѣ̀ живе́ши; и҆ глаго́ла и҆́ма: прїиди́та, и҆ ви́дита. прїидо́ста же и҆ ви́дѣста гдѣ̀ живѧ́ше, и҆ ᲂу҆ негѡ̀ пребы́ста де́нь то́й: бѣ́ же ча́съ ꙗ҆́кѡ десѧ́тый. бѣ́ же а҆ндре́й бра́тъ сі́мѡна петра̀, є҆ди́нъ ѿ ѻ҆бою̀ слы́шавшею ѿ і҆ѡа́нна, и҆ по не́мъ ше́дшею. ѡ҆брѣ́те се́й пре́жде бра́та своего̀ сі́мѡна, и҆ глаго́ла є҆мꙋ̀: ѡ҆брѣто́хомъ мессі́ю, є҆́же є҆́сть сказа́емо, хрⷭ҇то́съ. и҆ приведѐ є҆го̀ ко і҆и҃сови. воззрѣ́въ же на́нь і҆и҃съ речѐ: ты̀ є҆сѝ сі́мѡнъ, сн҃ъ і҆ѡ́нинъ: ты̀ нарече́шисѧ ки́фа, є҆́же сказа́етсѧ пе́тръ. во ᲂу҆́трїй же восхотѣ̀ и҆зы́ти въ галїле́ю, и҆ ѡ҆брѣ́те фїлі́ппа, и҆ глаго́ла є҆мꙋ̀: грѧдѝ по мнѣ̀. бѣ́ же фїлі́ппъ ѿ виѳсаі́ды, ѿ гра́да а҆ндре́ова и҆ петро́ва. ѡ҆брѣ́те фїлі́ппъ наѳана́ила, и҆ глаго́ла є҆мꙋ̀: є҆го́же писа̀ мѡѷсе́й въ зако́нѣ и҆ проро́цы, ѡ҆брѣто́хомъ і҆и҃са сн҃а і҆ѡ́сифова, и҆́же ѿ назаре́та. и҆ глаго́ла є҆мꙋ̀ наѳана́илъ: ѿ назаре́та мо́жетъ ли что̀ добро̀ бы́ти; глаго́ла є҆мꙋ̀ фїлі́ппъ: прїидѝ и҆ ви́ждь. ви́дѣ же і҆и҃съ наѳана́ила грѧдꙋ́ща къ себѣ̀, и҆ глаго́ла ѡ҆ не́мъ: сѐ вои́стиннꙋ і҆и҃льтѧнинъ, въ не́мже льстѝ нѣ́сть. глаго́ла є҆мꙋ̀ наѳана́илъ: ка́кѡ мѧ̀ зна́еши; ѿвѣща̀ і҆и҃съ, и҆ речѐ є҆мꙋ̀: пре́жде да́же не возгласѝ тебѐ фїлі́ппъ, сꙋ́ща под̾ смоко́вницею ви́дѣхъ тѧ̀. ѿвѣща̀ наѳана́илъ и҆ глаго́ла є҆мꙋ̀: равві̀, ты̀ є҆сѝ сн҃ъ бж҃їй, ты̀ є҆сѝ цр҃ь і҆и҃левъ. ѿвѣща̀ і҆и҃съ, и҆ речѐ є҆мꙋ̀: занѐ рѣ́хъ тѝ, ꙗ҆́кѡ ви́дѣхъ тѧ̀ под̾ смоко́вницею, вѣ́рꙋеши: бѡ́льша си́хъ ᲂу҆́зриши. и҆ глаго́ла є҆мꙋ̀: а҆ми́нь а҆ми́нь глаго́лю ва́мъ, ѿсе́лѣ ᲂу҆́зрите нб҃о ѿве́рсто, и҆ а҆́гг҃лы бж҃їѧ восходѧ́щѧ, и҆ нисходѧ́щѧ над̾ сн҃а человѣ́ческаго."
 },
 {
  "type": "TEXT",
  "value": "И҆ быва́етъ по чи́нꙋ бж҃е́ственнаѧ лїтꙋргі́а златоꙋ́стагѡ."
 },
 {
  "type": "HEADER",
  "value": "Вмѣ́стѡ же Досто́йно: пое́мъ:"
 },
 {
  "type": "TEXT",
  "value": "А҆́ гг҃лъ вопїѧ́ше бл҃года́тнѣй, / чи́стаѧ дв҃о ра́дꙋйсѧ, / и҆ па́ки рекꙋ̀, ра́дꙋйсѧ: / тво́й сн҃ъ воскре́се / тридне́венъ ѿ гро́ба, / и҆ мє́ртвыѧ воздви́гнꙋвый, / лю́дїе весели́тесѧ."
 },
 {
  "type": "TEXT",
  "value": "Та́же і҆рмо́съ: Свѣти́сѧ, свѣти́сѧ / но́вый і҆ерꙋсали́ме: / сла́ва бо гдⷭ҇нѧ / на тебѣ̀ возсїѧ̀. / ликꙋ́й ны́нѣ, / и҆ весели́сѧ сїѡ́не. / ты́ же чи́стаѧ красꙋ́йсѧ бцⷣе, / ѡ҆ воста́нїи рождества̀ твоегѡ̀."
 },
 {
  "type": "HEADER",
  "value": "Прича́стный:"
 },
 {
  "type": "TEXT",
  "value": "Т ѣ́ло хрⷭ҇то́во прїими́те, / и҆сто́чника безсме́ртнагѡ вкꙋси́те. / А҆ ллилꙋ́їа, три́жды."
 },
 {
  "type": "TEXT",
  "value": "Є҆гда́ же настоѧ́тель глаго́летъ: Со стра́хомъ бж҃їимъ и҆ вѣ́рою пристꙋпи́те. Мы̀ вмѣ́стѡ, Бл҃гослове́нъ грѧды́й во и҆́мѧ гдⷭ҇не: пое́мъ: Хрⷭ҇то́съ воскре́се: є҆ди́ножды. Настоѧ́тель глаго́летъ: Спасѝ бж҃е лю́ди твоѧ̀: И҆ мы̀: Хрⷭ҇то́съ воскре́се: є҆ди́ножды. Є҆гда́ же и҆зглаго́летъ і҆ере́й: Всегда̀ ны́нѣ и҆ при́снѡ: И҆ мы̀: Хрⷭ҇то́съ воскре́се: є҆ди́ножды. Посе́мъ є҆ктенїа̀. Вмѣ́стѡ же, Бꙋ́ди и҆́мѧ гдⷭ҇не: и҆ вмѣ́стѡ ѱалма̀, Бл҃гословлю̀ гдⷭ҇а: пое́мъ: Хрⷭ҇то́съ воскре́се: двана́десѧть, и҆ мно́жае: до́ндеже а҆нафо́ра ѿ и҆гꙋ́мена разда́стсѧ. Та́же настоѧ́тель, Бл҃гослове́нїе гдⷭ҇не на ва́съ: Ли́къ: А҆ми́нь. Посе́мъ настоѧ́тель вмѣ́стѡ, Сла́ва тебѣ̀ хрⷭ҇тѐ бж҃е: пое́тъ: Хрⷭ҇то́съ воскре́се и҆з̾ ме́ртвыхъ сме́ртїю сме́рть попра́въ. И҆ ли́къ: И҆ сꙋ́щымъ во гробѣ́хъ живо́тъ дарова́въ. Посе́мъ настоѧ́тель глаго́летъ ѿпꙋ́стъ со крⷭ҇то́мъ по ѻ҆бы́чаю."
 }
]