ponomar-pwa/static/data/shared/menaion-add/14.json

[
 {
  "type": "HEADER",
  "value": "Ное́мврїа л҃"
 },
 {
  "type": "HEADER",
  "value": "Ст҃а́гѡ и҆ всехва́льнагѡ а҆пⷭ҇ла а҆ндре́а первозва́ннагѡ."
 },
 {
  "type": "HEADER",
  "value": "По предначина́тельномъ ѱалмѣ̀, пое́мъ: Блаже́нъ мꙋ́жъ: а҃-й а҆нтїфѡ́нъ."
 },
 {
  "type": "HEADER",
  "value": "На Гдⷭ҇и воззва́хъ: Стїхи̑ры на и҃, глаⷭ҇ д҃:"
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "И҆́же прⷣте́чевымъ свѣ́томъ воѡбраже́нъ, є҆гда̀ ѡ҆заре́нїе ѵ҆поста́сное сла́вы ѻ҆ч҃ескїѧ ꙗ҆ви́сѧ, человѣ́ческїй ро́дъ за бл҃гоꙋтро́бїе сп҃стѝ хотѧ̀: тогда̀ пе́рвый ты̀, сла́вне, къ немꙋ̀ прите́клъ є҆сѝ, ѡ҆заре́нъ бы́въ въ ра́зꙋмѣ соверше́ннѣйшею лꙋче́ю тогѡ̀ бж҃ества̀, ѿѻнꙋ́дꙋже и҆ проповѣ́дникъ и҆ а҆пⷭ҇лъ бы́въ хрⷭ҇та̀ бг҃а на́шегѡ, є҆го́же молѝ, сп҃стѝ и҆ просвѣти́ти дꙋ́шы на́шѧ. Три́жды."
 },
 {
  "type": "TEXT",
  "value": "И҆́же прⷣте́чевымъ гла́сомъ ѡ҆глаше́нъ, є҆гда̀ всест҃о́е сло́во воплоти́сѧ, жи́знь на́мъ подаѧ̀, и҆ сп҃се́нїе сꙋ́щымъ на землѝ бл҃говѣствꙋ́ѧ: тогда̀ томꙋ̀, премꙋ́дре, послѣ́довалъ є҆сѝ, и҆ себѐ кра́йнее и҆ всест҃о́е, ꙗ҆́кѡ нача́токъ томꙋ̀ ѡ҆свѧти́лъ є҆сѝ, є҆го́же и҆ позна́въ, и҆ возвѣсти́лъ є҆сѝ сро́дникꙋ твоемꙋ̀ бг҃а на́шего. Є҆го́же молѝ, сп҃стѝ и҆ просвѣти́ти дꙋ́шы на́шѧ. Три́жды."
 },
 {
  "type": "TEXT",
  "value": "И҆́же и҆з̾ непло́дове прозѧ́бшемꙋ ᲂу҆чени́къ бы́въ, є҆гда̀ дѣ́вственное ржⷭ҇тво̀ возсїѧ̀, бл҃гоче́стїѧ ᲂу҆чи́тель, и҆ цѣломꙋ́дрїѧ показꙋ́ѧ чистотꙋ̀: тогда̀ ты̀ теплѣ́йшїй добродѣ́тели рачи́тель, а҆ндре́е бл҃же́нне, бы́лъ є҆сѝ, восхождє́нїѧ въ се́рдцѣ твое́мъ полага́ѧ, и҆ ѿ сла́вы къ неизрече́ннѣй взѧ́лсѧ є҆сѝ сла́вѣ хрⷭ҇та̀ бг҃а на́шегѡ. Є҆го́же молѝ, сп҃стѝ и҆ просвѣти́ти дꙋ́шы на́шѧ. Два́жды."
 },
 {
  "type": "HEADER",
  "value": "Сла́ва, глаⷭ҇ д҃:"
 },
 {
  "type": "TEXT",
  "value": "Ры́бъ лови́твꙋ ѡ҆ста́вивъ, а҆пⷭ҇ле, человѣ́ки ᲂу҆ловлѧ́еши тро́стїю про́повѣди, низпꙋща́ѧ, ꙗ҆́коже ᲂу҆́дꙋ бл҃гоче́стїѧ льще́нїе, и҆ возводѧ̀ и҆з̾ глꙋбины̀ ле́сти ꙗ҆зы́ки всѧ̑, а҆ндре́е а҆пⷭ҇ле, верхо́внагѡ сы́й є҆динокро́вный, и҆ вселе́нныѧ кꙋ́пнѡ проповѣ́дниче велегла́сный, молѧ́сѧ не преста́й ѡ҆ на́съ, вѣ́рою и҆ любо́вїю бл҃гохва́лѧщихъ, всехва́льне, при́снѡ честнꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ то́йже:"
 },
 {
  "type": "TEXT",
  "value": "И҆са́їе, ликꙋ́й, сло́во бж҃їе воспрїимѝ, прорцы̀ ѻ҆трокови́цѣ марі́и, кꙋпинꙋ̀ горѣ́ти ѻ҆гне́мъ и҆ не сгара́ти заре́ю бжⷭ҇тва̀. Виѳлее́ме, бл҃гоꙋкраси́сѧ, ѿве́рзи врата̀, є҆де́ме: и҆ волсвѝ и҆ди́те, ви́дѣти сп҃се́нїе въ ꙗ҆́слѣхъ повива́емое, є҆го́же ѕвѣзда̀ показа̀ верхꙋ̀ верте́па, жизнода́вца гдⷭ҇а, сп҃са́ющаго ро́дъ на́шъ."
 },
 {
  "type": "HEADER",
  "value": "Вхо́дъ. Прокі́менъ днѐ. И҆ чтє́нїѧ г҃."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе. (Зача́ло ѻ҃г.)"
 },
 {
  "type": "TEXT",
  "value": "Возлю́бленнїи, а҆́ще се́рдце на́ше не за́зритъ на́мъ, дерзнове́нїе и҆́мамы къ бг҃ꙋ: И҆ є҆гѡ́же а҆́ще про́симъ, прїе́млемъ ѿ негѡ̀: ꙗ҆́кѡ за́пѡвѣди є҆гѡ̀ соблюда́емъ, и҆ ᲂу҆гѡ́днаѧ пред̾ ни́мъ твори́мъ. И҆ сїѧ̀ є҆́сть за́повѣдь є҆гѡ̀, да вѣ́рꙋемъ во и҆́мѧ сн҃а є҆гѡ̀ і҆и҃са хрⷭ҇та̀, и҆ лю́бимъ дрꙋ́гъ дрꙋ́га, ꙗ҆́коже да́лъ є҆́сть за́повѣдь на́мъ. И҆ соблюда́ѧй за́пѡвѣди є҆гѡ̀, въ не́мъ пребыва́етъ, и҆ то́й въ не́мъ: и҆ ѡ҆ се́мъ разꙋмѣ́емъ, ꙗ҆́кѡ пребыва́етъ въ на́съ, ѿ дх҃а, є҆го́же да́лъ є҆́сть на́мъ. Возлю́бленнїи, не всѧ́комꙋ дꙋ́хꙋ вѣ́рꙋйте, но и҆скꙋша́йте дꙋ́хи, а҆́ще ѿ бг҃а сꙋ́ть: ꙗ҆́кѡ мно́зи лжепроро́цы и҆зыдо́ша въ мі́ръ. Ѡ҆ се́мъ познава́йте дх҃а бж҃їѧ, и҆ дꙋ́ха ле́стча: всѧ́къ дх҃ъ, и҆́же и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а є҆́сть. И҆ всѧ́къ дꙋ́хъ, и҆́же не и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а нѣ́сть: и҆ се́й є҆́сть а҆нті́хрїстовъ, є҆го́же слы́шасте ꙗ҆́кѡ грѧде́тъ, и҆ ны́нѣ въ мі́рѣ є҆́сть ᲂу҆жѐ. Вы̀ ѿ бг҃а є҆стѐ ча̑дца, и҆ побѣди́сте тѣ́хъ: ꙗ҆́кѡ бо́лїй є҆́сть и҆́же въ ва́съ, не́жели и҆́же въ мі́рѣ. Ѻ҆нѝ ѿ мі́ра сꙋ́ть, сегѡ̀ ра́ди ѿ мі́ра глаго́лютъ, и҆ мі́ръ тѣ́хъ послꙋ́шаетъ. Мы̀ ѿ бг҃а є҆смы̀: и҆́же зна́етъ бг҃а, послꙋ́шаетъ на́съ: и҆ и҆́же нѣ́сть ѿ бг҃а, не послꙋ́шаетъ ва́съ."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе. (Зача́ло ѻ҃г, ѿ полꙋ̀.)"
 },
 {
  "type": "TEXT",
  "value": "Возлю́бленнїи, а҆́ще си́це возлюби́лъ є҆́сть на́съ бг҃ъ, и҆ мы̀ до́лжни є҆смы̀ дрꙋ́гъ дрꙋ́га люби́ти. Бг҃а никто́же нигдѣ́же ви́дѣ. а҆́ще дрꙋ́гъ дрꙋ́га лю́бимъ, бг҃ъ въ на́съ пребыва́етъ, и҆ любы̀ є҆гѡ̀ соверше́нна є҆́сть въ на́съ. Ѡ҆ се́мъ разꙋмѣ́емъ, ꙗ҆́кѡ въ не́мъ пребыва́емъ, и҆ то́й въ на́съ, ꙗ҆́кѡ ѿ дх҃а своегѡ̀ да́лъ є҆́сть на́мъ. И҆ мы̀ ви́дѣхомъ и҆ свидѣ́тельствꙋемъ, ꙗ҆́кѡ ѻ҆ц҃ъ посла̀ сн҃а сп҃си́телѧ мі́рꙋ: И҆́же а҆́ще и҆сповѣ́сть, ꙗ҆́кѡ і҆и҃съ є҆́сть сн҃ъ бж҃їй, бг҃ъ въ не́мъ пребыва́етъ, и҆ то́й въ бз҃ѣ. И҆ мы̀ позна́хомъ, и҆ вѣ́ровахомъ, любо́вь, ю҆́же и҆́мать бг҃ъ въ на́съ. Бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ пребыва́етъ."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе. (Зача́ло ѻ҃д.)"
 },
 {
  "type": "TEXT",
  "value": "Возлю́бленнїи, а҆́ще кто̀ рече́тъ, ꙗ҆́кѡ люблю̀ бг҃а, а҆ бра́та своего̀ ненави́дитъ, ло́жъ є҆́сть: и҆́бо не любѧ́й бра́та своегѡ̀, є҆го́же ви́дѣ, бг҃а, є҆гѡ́же не ви́дѣ, ка́кѡ мо́жетъ люби́ти; И҆ сїю̀ за́повѣдь и҆́мамы ѿ негѡ̀, да любѧ́й бг҃а, лю́битъ и҆ бра́та своего̀. Всѧ́къ вѣ́рꙋѧй, ꙗ҆́кѡ і҆и҃съ є҆́сть хрⷭ҇то́съ, ѿ бг҃а рожде́нъ є҆́сть: и҆ всѧ́къ любѧ́й ро́ждшаго, лю́битъ и҆ рожде́ннаго ѿ негѡ̀. Ѡ҆ се́мъ вѣ́мы, ꙗ҆́кѡ лю́бимъ ча̑да бж҃їѧ, є҆гда̀ бг҃а лю́бимъ, и҆ за́пѡвѣди є҆гѡ̀ соблюда́емъ. Сїѧ́ бо є҆́сть любы̀ бж҃їѧ, да за́пѡвѣди є҆гѡ̀ соблюда́емъ, и҆ за́пѡвѣди є҆гѡ̀ тѧ̑жки не сꙋ́ть. ꙗ҆́кѡ всѧ́къ рожде́нный ѿ бг҃а, побѣжда́етъ мі́ръ: и҆ сїѧ̀ є҆́сть побѣ́да побѣ́ждшаѧ мі́ръ, вѣ́ра на́ша. Кто́ є҆сть побѣжда́ѧй мі́ръ, то́кмѡ вѣ́рꙋѧй, ꙗ҆́кѡ і҆и҃съ є҆́сть сн҃ъ бж҃їй;"
 },
 {
  "type": "HEADER",
  "value": "На лїті́и стїхи́ра хра́ма, и҆ а҆пⷭ҇ла, глаⷭ҇ а҃:"
 },
 {
  "type": "TEXT",
  "value": "Воспои́мъ вѣ́рнїи петро́ва сро́дника а҆ндре́а, хрⷭ҇то́ва ᲂу҆чн҃ка̀, то́й бо мо́ре мре́жами и҆спыта́въ и҆ногда̀, ры̑бы ᲂу҆ловѝ: ны́нѣ же вселе́ннꙋю тро́стїю ло́витъ крⷭ҇та̀, и҆ ꙗ҆зы́ки ѿ пре́лести ѡ҆браща́етъ ко креще́нїю: и҆ хрⷭ҇тꙋ̀ предстоѧ̀ про́ситъ ми́ра мі́рꙋ и҆ дш҃а́мъ на́шымъ ве́лїѧ млⷭ҇ти."
 },
 {
  "type": "TEXT",
  "value": "Ѻ҆́гнь ᲂу҆́мный просвѣща́ющь мы̑сли и҆ ѡ҆палѧ́ющь грѣхѝ, внꙋ́трь прїе́мъ въ се́рдцы а҆пⷭ҇лъ хрⷭ҇то́въ и҆ ᲂу҆чн҃къ, сїѧ́етъ ᲂу҆́бѡ та́инственными лꙋча́ми ᲂу҆че́нїй, во ꙗ҆зы́ческихъ непросвѣще́нныхъ сердца́хъ: сжига́етъ же па́ки хвра̑стнаѧ нечести́выхъ баснодѣѧ̑нїѧ, ѻ҆́гнь бо дх҃а таково́е и҆́мать дѣ́йство. Ѽ чꙋ́до стра́нно и҆ стра́шно! Бре́нный ѧ҆зы́къ, бре́нное є҆стество̀, тѣ́ло пе́рстное, ᲂу҆́мное и҆ невеще́ственное прїѧ́тъ зна́нїе: но, ѽ таи́нниче неизрече́нныхъ и҆ зри́телю нбⷭ҇ныхъ! Молѝ ѡ҆зари́тисѧ дш҃а́мъ на́шымъ."
 },
 {
  "type": "HEADER",
  "value": "Сла́ва, глаⷭ҇ и҃."
 },
 {
  "type": "TEXT",
  "value": "Мала́ѯа: Жела́емаго бг҃а во пло́ти ᲂу҆ви́дѣвъ на землѝ ходѧ́ща, бг҃ови́дче первозва́нне, є҆динокро́вномꙋ вопїѧ́лъ є҆сѝ ра́дꙋѧсѧ: ѡ҆брѣто́хомъ, ѽ сі́мѡне, жела́емаго! Сп҃сꙋ же дв҃дски возопи́лъ є҆сѝ: и҆́мже ѻ҆́бразомъ жела́етъ є҆ле́нь на и҆сто́чники во́дъ, си́це жела́етъ дш҃а̀ моѧ̀ къ тебѣ̀, хрⷭ҇тѐ бж҃е. Ѿѻнꙋ́дꙋже и҆ жела́нїю жела́нїе приложи́въ, крⷭ҇то́мъ прехо́диши, къ немꙋ́же возжелѣ́лъ є҆сѝ, ꙗ҆́кѡ и҆́стинный ᲂу҆чн҃къ, и҆ мꙋ́дрый подража́тель бы́въ крⷭ҇то́мъ тогѡ̀ стрⷭ҇те́й: тѣ́мже и҆ сла́вы ѻ҆́бщникъ є҆гѡ̀ бы́въ, прилѣ́жнѡ моли́сѧ ѡ҆ дш҃а́хъ на́шихъ."
 },
 {
  "type": "HEADER",
  "value": "И҆ ны́нѣ, глаⷭ҇ то́йже:"
 },
 {
  "type": "TEXT",
  "value": "Влⷣчце, прїимѝ мл҃твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли."
 },
 {
  "type": "HEADER",
  "value": "На стїхо́внѣ стїхи̑ры, глаⷭ҇ є҃:"
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ра́дꙋйсѧ, слове́сное нб҃о, сла́вꙋ бж҃їю всегда̀ повѣ́дающе, пе́рвый хрⷭ҇та̀ зовꙋ́ща послꙋ́шавъ те́плѣ, и҆ безѿстꙋ́пнѡ съ ни́мъ пребыва́ѧ: ѿ негѡ́же просвѣща́емь ᲂу҆ви́дѣлъ є҆сѝ свѣ́тъ вторы́й, и҆ сꙋ́щыѧ во тмѣ̀ мо́лнїѧми твои́ми просвѣти́лъ є҆сѝ, бл҃гости тогѡ̀ подража́ѧ. Тѣ́мъ всест҃о́е твоѐ соверша́емъ торжество̀, и҆ моще́й ра́кꙋ ра́достнѣ цѣлꙋ́емъ: ѿ неѧ́же и҆сточа́еши сп҃се́нїе просѧ́щымъ и҆ ве́лїю млⷭ҇ть."
 },
 {
  "type": "TEXT",
  "value": "Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ гл҃го́лы и҆́хъ."
 },
 {
  "type": "TEXT",
  "value": "Пе́рвый добродѣ́телей ѡ҆брѣта́тель, бл҃гоꙋтро́бїѧ ра́ди, на́шимъ ѡ҆бложе́ннагѡ, а҆ндре́е бг҃омꙋ́дре, є҆стество́мъ, совокꙋпи́лсѧ є҆сѝ є҆мꙋ̀ разжже́нною любо́вїю, є҆динокро́вномꙋ вопїѧ̀: є҆го́же проповѣ́даша прⷪ҇ро́цы въ дс҃ѣ, ѡ҆брѣто́хомъ, грѧдѝ къ є҆гѡ̀ красотѣ̀, да привлече́ни бꙋ́демъ и҆ дꙋше́ю и҆ помышле́нїемъ, ꙗ҆́кѡ да свѣтово́дствꙋеми тогѡ̀ свѣтлостьмѝ, но́щь пре́лести и҆ тмꙋ̀ невѣ́дѣнїѧ ѿжене́мъ, хрⷭ҇та̀ бл҃гословѧ́ще, подаю́щаго мі́рꙋ ве́лїю млⷭ҇ть."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь."
 },
 {
  "type": "TEXT",
  "value": "Ꙗ҆зы́ки, невѣ́дꙋщыѧ бг҃а, ꙗ҆́кѡ и҆з̾ глꙋбины̀ невѣ́дѣнїѧ ᲂу҆лови́лъ є҆сѝ мре́жею твои́хъ слове́съ: и҆ возмꙋща́еши ꙗ҆́вѣ сла̑наѧ морѧ̀, ко́нь хра́брѣйшїй ꙗ҆ви́лсѧ є҆сѝ влады́чествꙋющагѡ мо́ремъ, приснопѣва́емый, и҆ гни́лость безбо́жїѧ и҆зсꙋши́лъ є҆сѝ, со́ль честнꙋ́ю вложи́въ мꙋ́дрость твою̀, є҆́йже и҆ ᲂу҆диви́шасѧ, а҆пⷭ҇ле сла́вне, ѡ҆бꙋѧ́вшей мꙋ́дрости безстꙋ́днѣ присвоѧ́ющїисѧ, хрⷭ҇та̀ не вѣ́дꙋще подаю́щаго мі́рꙋ ве́лїю млⷭ҇ть."
 },
 {
  "type": "HEADER",
  "value": "Сла́ва, глаⷭ҇ г҃."
 },
 {
  "type": "TEXT",
  "value": "Ге́рманово: Скро́вника петро́ва и҆ хрⷭ҇то́ва ᲂу҆ченика̀, ры́бъ лови́телѧ и҆ ловца̀ человѣ́кѡвъ въ пѣ́снехъ почти́мъ а҆ндре́а а҆пⷭ҇ла: і҆и҃совымъ бо ᲂу҆че́нїемъ всѧ̑ наказа́въ догма́ты, и҆ ꙗ҆́кѡ льще́нїе ры́бамъ плѡ́ти беззакѡ́ннымъ предадѐ, и҆ ты̑ѧ ᲂу҆ловѝ. Тогѡ̀ мл҃твами, хрⷭ҇тѐ, пода́ждь лю́демъ твои̑мъ ми́ръ и҆ ве́лїю млⷭ҇ть."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ то́йже:"
 },
 {
  "type": "TEXT",
  "value": "І҆ѡ́сифе, рцы̀ на́мъ: ка́кѡ ѿ ст҃ы́хъ, ю҆́же прїѧ́лъ є҆сѝ дв҃ꙋ непра́зднꙋ приво́диши въ виѳлее́мъ; а҆́зъ, гл҃го́летъ, прⷪ҇ро́ки и҆спыта́въ, и҆ ѿвѣ́тъ прїи́мъ ѿ а҆́гг҃ла, ᲂу҆вѣ́рихсѧ, ꙗ҆́кѡ бг҃а роди́тъ марі́а несказа́ннѡ, є҆гѡ́же на поклоне́нїе волсвѝ ѿ востѡ́къ прїи́дꙋтъ, съ да́ры честны́ми слꙋжа́ще. Воплоти́выйсѧ на́съ ра́ди, гдⷭ҇и, сла́ва тебѣ̀."
 },
 {
  "type": "HEADER",
  "value": "Тропа́рь, глаⷭ҇ д҃:"
 },
 {
  "type": "TEXT",
  "value": "Ꙗ҆́кѡ а҆пⷭ҇лѡвъ первозва́нный и҆ верхо́внагѡ сꙋ́щїй бра́тъ влⷣцѣ всѣ́хъ, а҆ндре́е, моли́сѧ, ми́ръ вселе́ннѣй дарова́ти, и҆ дш҃а́мъ на́шымъ ве́лїю млⷭ҇ть."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ воскрⷭ҇ный, глаⷭ҇ то́йже:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́нное, и҆ а҆́гг҃лѡмъ несвѣ́домое та́инство: тобо́ю бцⷣе сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ ра́ди воспрїи́мъ, и҆́мже воскр҃си́въ первозда́ннаго, сп҃сѐ ѿ сме́рти дꙋ́шы на́шѧ."
 },
 {
  "type": "HEADER",
  "value": "На ᲂу҆́трени, по а҃-мъ стїхосло́вїи, сѣда́ленъ, глаⷭ҇ а҃,"
 },
 {
  "type": "TEXT",
  "value": "Подо́бенъ: Гро́бъ тво́й:"
 },
 {
  "type": "TEXT",
  "value": "Ꙗ҆́кѡ бжⷭ҇твеннаго ᲂу҆чн҃ка̀ и҆ первозва́ннаго всѣ́хъ хрⷭ҇то́выхъ ᲂу҆чн҃кѡ́въ похвалѧ́емъ тѧ̀ любо́вїю, а҆ндре́е а҆пⷭ҇ле, и҆ вѣ́рнѡ вопїе́мъ тѝ: и҆зба́ви па́ствꙋ твою̀, є҆́йже ѿ бг҃а ввѣ́рилсѧ є҆сѝ, всѧ́кїѧ ско́рби и҆ нꙋ́ждъ, и҆ собла́знѡвъ, и҆ всѧ́кагѡ ѡ҆ѕлобле́нїѧ."
 },
 {
  "type": "HEADER",
  "value": "Велича́нїе а҆пⷭ҇лꙋ а҆ндре́ю:"
 },
 {
  "type": "TEXT",
  "value": "Велича́емъ тѧ̀, а҆пⷭ҇ле хрⷭ҇то́въ, а҆ндре́е первозва́нне, и҆ чти́мъ болѣ̑зни и҆ трꙋды̀ твоѧ̑, и҆́миже трꙋди́лсѧ є҆сѝ во бл҃говѣ́стїи хрⷭ҇то́вѣ."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "И҆сповѣ́дѧтъ небеса̀ чꙋдеса̀ твоѧ̑, гдⷭ҇и. Вмѣ́стѡ ѻ҆тє́цъ твои́хъ бы́ша сы́нове твоѝ. Бг҃ъ богѡ́въ гдⷭ҇ь гл҃го́ла, и҆ призва̀ зе́млю. Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀. То́й да́стъ си́лꙋ и҆ держа́вꙋ лю́демъ свои̑мъ: бл҃гослове́нъ бг҃ъ."
 },
 {
  "type": "HEADER",
  "value": "По полѷеле́и, сѣда́ленъ, глаⷭ҇ є҃,"
 },
 {
  "type": "TEXT",
  "value": "Подо́бенъ: Собезнача́льное сло́во:"
 },
 {
  "type": "TEXT",
  "value": "А҆пⷭ҇ла всѝ восхва́лимъ, ꙗ҆́кѡ самови́дца сло́ва, и҆ бж҃е́ственнаго проповѣ́дника, и҆ ꙗ҆зы́кѡвъ дꙋхо́внаго ловца̀, ꙗ҆́кѡ вои́стиннꙋ: и҆́бо приведѐ ны̀ въ позна́нїе хрⷭ҇то́во а҆ндре́й бг҃огл҃го́ливый, ве́лїй и҆́стиннѡ на́шъ предста́тель: и҆ ны́нѣ мо́литсѧ непреста́ннѡ, во є҆́же сп҃стѝ дш҃ы на́шѧ."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ, глаⷭ҇ д҃."
 },
 {
  "type": "HEADER",
  "value": "Прокі́менъ, глаⷭ҇ д҃:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ гл҃го́лы и҆́хъ."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, заⷱ҇ ѳ҃."
 },
 {
  "type": "HEADER",
  "value": "Сла́ва, глаⷭ҇ ѕ҃:"
 },
 {
  "type": "TEXT",
  "value": "Мл҃твами ст҃а́гѡ всехва́льнагѡ а҆пⷭ҇ла а҆ндре́а первозва́ннагѡ, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "И҆ ны́нѣ, глаⷭ҇ то́йже:"
 },
 {
  "type": "TEXT",
  "value": "Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "Та́же, глаⷭ҇ ѕ҃:"
 },
 {
  "type": "TEXT",
  "value": "Поми́лꙋй мѧ̀, бж҃е:"
 },
 {
  "type": "HEADER",
  "value": "Стїхи́ра по н҃-мъ ѱалмѣ̀, глаⷭ҇ а҃, творе́нїе а҆ндре́а і҆ерꙋсали́мскагѡ:"
 },
 {
  "type": "TEXT",
  "value": "Первозва́нный ᲂу҆чени́къ, и҆ подража́тель стрⷭ҇ти, соѡбразꙋ́ѧ тѧ̀, гдⷭ҇и, а҆ндре́й а҆пⷭ҇лъ, и҆́же во глꙋбинѣ̀ невѣ́дѣнїѧ прельща́ємыѧ и҆ногда̀, ᲂу҆́дицею крⷭ҇та̀ твоегѡ̀ возвле́къ, приведѐ тебѣ̀. Тѣ́мже и҆ сп҃сшесѧ вѣ́рнїи вопїе́мъ тѝ: моли́твами є҆гѡ̀, пребл҃гі́й, жи́знь на́шꙋ ᲂу҆мирѝ и҆ сп҃сѝ дш҃ы на́шѧ."
 },
 {
  "type": "HEADER",
  "value": "Канѡ́нъ бцⷣы со і҆рмосо́мъ на ѕ҃, и҆ а҆пⷭ҇ла два̀ канѡ́на, на и҃."
 },
 {
  "type": "TEXT",
  "value": "Катава́сїа: Хрⷭ҇то́съ ражда́етсѧ:"
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ, глаⷭ҇ а҃: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ."
 },
 {
  "type": "TEXT",
  "value": "Катава́сїа, глаⷭ҇ а҃: Хрⷭ҇то́съ ражда́етсѧ, сла́вите: хрⷭ҇то́съ съ нб҃съ, срѧ́щите: хрⷭ҇то́съ на землѝ, возноси́тесѧ. По́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне."
 },
 {
  "type": "TEXT",
  "value": "Катава́сїа: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ гдⷭ҇и."
 },
 {
  "type": "HEADER",
  "value": "Сѣда́ленъ, глаⷭ҇ и҃,"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ꙗ҆́кѡ первозва́ннаго всѣ́хъ ᲂу҆чн҃кѡ́въ, и҆ самови́дца сло́ва и҆ слꙋжи́телѧ, а҆ндре́е а҆пⷭ҇ле, по до́лгꙋ чти́мъ тѧ̀: а҆́гнцꙋ бо, взе́млющемꙋ грѣхѝ мі́ра, несомнѣ́нною вѣ́рою те́плѣ послѣ́довалъ є҆сѝ: ѿѻнꙋ́дꙋже и҆ стрⷭ҇ти є҆гѡ̀ ѻ҆́бщникъ показа́лсѧ є҆сѝ, пло́тїю претерпѣ́вшагѡ на́съ ра́ди во́льнѡ сме́рть. Сегѡ̀ ра́ди вопїе́мъ тѝ: моли́сѧ хрⷭ҇тꙋ̀ бг҃ꙋ, грѣхѡ́въ ѡ҆ставле́нїе пода́ти, пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Дх҃омъ прови́дѧ прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Катава́сїа: Же́злъ и҆з̾ ко́рене і҆ессе́ова, и҆ цвѣ́тъ ѿ негѡ̀ хрⷭ҇тѐ, ѿ дв҃ы прозѧ́блъ є҆сѝ и҆з̾ горы̀ хва́льный, прїѡсѣне́нныѧ ча́щи, прише́лъ є҆сѝ вопло́щьсѧ ѿ неискꙋсомꙋ́жныѧ невеще́ственный и҆ бж҃е, сла́ва си́лѣ твое́й, гдⷭ҇и."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Тво́й ми́ръ да́ждь на́мъ, сн҃е бж҃їй, и҆но́гѡ бо ра́звѣ тебѐ бг҃а не зна́емъ: и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ."
 },
 {
  "type": "TEXT",
  "value": "Катава́сїа: Бг҃ъ сы́й ми́ра, ѻ҆ц҃ъ щедрѡ́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃сѝ мѧ̀ сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Катава́сїа: И҆з̾ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ньшее нетлѣ́ннꙋ: є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ."
 },
 {
  "type": "HEADER",
  "value": "Конда́къ, глаⷭ҇ в҃,"
 },
 {
  "type": "TEXT",
  "value": "Подо́бенъ: Въ мл҃твахъ:"
 },
 {
  "type": "TEXT",
  "value": "Мꙋ́жества тезоимени́таго бг҃огл҃го́льника, и цр҃кве возслѣ́дователѧ верхо́внаго, петро́ва сро́дника восхва́лимъ: занѐ ꙗ҆́коже дре́вле семꙋ̀, и҆ ны́нѣ на́мъ воззва̀: прїиди́те, ѡ҆брѣто́хомъ жела́емаго."
 },
 {
  "type": "TEXT",
  "value": "І҆́косъ: Дре́вле ᲂу҆́бѡ дв҃дъ возстѧ́гаетъ грѣ́шнаго, ꙗ҆́кѡ менѐ, повѣ́дати бж҃їѧ бл҃госло́внѣ ѡ҆правда̑нїѧ: ѻ҆ба́че къ вѣ́рѣ ᲂу҆чи́тъ па́ки, и҆ слеза́ми мно́жайшими и҆згл҃го́льствꙋетъ: дне́сь бо гла́съ є҆гѡ̀ а҆́ще ᲂу҆слы́шите, серде́цъ не ѡ҆жесточи́те, ꙗ҆́кѡ нѣ́когда і҆и҃ль преѡгорчѝ. Наво́дитъ же про́чее во ѱалмѣ̀: гдⷭ҇еви всѧ̑ землѧ̀ воспо́йте, прїиди́те, ѡ҆брѣто́хомъ жела́емаго."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ нижѐ стꙋжѝ ѻ҆́гнь. Тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Катава́сїа: Ѻ҆́троцы бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Катава́сїа: Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѡ҆́бразъ: не бо̀ ꙗ҆̀же прїѧ́тъ пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. Тѣ́мъ воспѣва́юще воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чтⷭ҇ꙋю."
 },
 {
  "type": "TEXT",
  "value": "Катава́сїа: Та́инство стра́нное ви́жꙋ и҆ пресла́вное: нб҃о, верте́пъ: прⷭ҇то́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же воспѣва́юще велича́емъ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Дх҃омъ во ст҃и́лищи:"
 },
 {
  "type": "TEXT",
  "value": "Сло́во пребезнача́льное ѡ҆брѣ́тъ тѧ̀, всебл҃же́нне, первозва́нна показа̀ всѣ́хъ а҆пⷭ҇лѡвъ, а҆ндре́е приснопа́мѧтне: и҆ сегѡ̀ стопа́мъ возслѣ́дꙋѧ, показа́лсѧ є҆сѝ пꙋтево́ждь заблꙋ́ждшихъ, къ нбⷭ҇номꙋ сїѧ̑ возводѧ̀ бжⷭ҇твенномꙋ ше́ствїю."
 },
 {
  "type": "HEADER",
  "value": "Сла́ва, глаⷭ҇ в҃:"
 },
 {
  "type": "TEXT",
  "value": "Подо́бенъ: Жены̀ ᲂу҆слы́шите:"
 },
 {
  "type": "TEXT",
  "value": "Петро́ва скро́вника, ᲂу҆чн҃кѡ́въ пе́рвѣйшаго, самови́дца и҆ слꙋгꙋ̀ бы́вшаго сло́ва, а҆ндре́а а҆пⷭ҇ла пресла́внѡ восхва́лимъ: ꙗ҆зы́ки бо просвѣтѝ, и҆ ра́спѧтъ бы́въ, кончи́нꙋ под̾е́млетъ, ꙗ҆́кѡ ᲂу҆чн҃къ влⷣки."
 },
 {
  "type": "HEADER",
  "value": "И҆ ны́нѣ, глаⷭ҇ то́йже, бг҃оро́диченъ:"
 },
 {
  "type": "TEXT",
  "value": "Бг҃а, є҆го́же родила̀ є҆сѝ, дв҃о всенепоро́чнаѧ, молѝ ѡ҆ всѣ́хъ, бл҃гоче́стнѡ тѧ̀ чтꙋ́щихъ, съ первозва́ннымъ а҆ндре́емъ, ᲂу҆лꙋчи́ти бжⷭ҇твеннагѡ ѡ҆сїѧ́нїѧ твоегѡ̀ сн҃а, и҆ стоѧ́нїѧ и҆збра́нныхъ и҆ ст҃ы́хъ: и҆́бо мо́жеши, ꙗ҆́кѡ хо́щеши."
 },
 {
  "type": "HEADER",
  "value": "На хвали́техъ стїхи̑ры на д҃, глаⷭ҇ а҃:"
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Виѳсаі́до, ны́нѣ весели́сѧ: въ тебѣ́ бо процвѣто́ша ѿ ма́тернѧ ᲂу҆до́лїѧ бл҃гово́ннѣйшїи крі́ни пе́тръ и҆ а҆ндре́й, мі́рꙋ всемꙋ̀ про́повѣдь вѣ́ры бл҃гово́инствꙋюще бл҃года́тїю хрⷭ҇то́вою: є҆го́же и҆ стрⷭ҇тє́мъ прїѡбщи́шасѧ."
 },
 {
  "type": "TEXT",
  "value": "А҆ндре́е, ра́дꙋйсѧ и҆ и҆гра́й, ꙗ҆́кѡ прїѧ́лъ є҆сѝ ꙗ҆́вѣ во словесѝ сїѧ́нїи, сл҃нце сла́вы хрⷭ҇та̀ жизнода́вца, є҆го́же и҆ держа́сѧ вѣ́рою проповѣ́далъ є҆сѝ. Того̀ молѝ непреста́ннѡ ѡ҆ на́съ, вѣ́рою воспѣва́ющихъ тѧ̀."
 },
 {
  "type": "TEXT",
  "value": "Тайноꙋчи́тель бжⷭ҇твеннагѡ строе́нїѧ хрⷭ҇то́ва, и҆збра́нный пе́рвыхъ, ᲂу҆чн҃къ бы́ти сло́ва, а҆ндре́й бг҃ови́децъ, вопїѧ̀ гл҃го́летъ, є҆динокро́внаго петра̀ ᲂу҆ви́дѣвъ, ѡ҆брѣто́хомъ мессі́ю, є҆го́же писа́нїе и҆ прⷪ҇ро́цы предпроповѣ́даша."
 },
 {
  "type": "TEXT",
  "value": "Па́трскїй тѧ̀ гра́дъ па́стырѧ стѧжа̀, и҆ градоде́ржца бжⷭ҇твеннаго, и҆ бѣ́дъ всѧ́ческихъ и҆зба́вителѧ и҆ храни́телѧ тѧ̀, а҆ндре́е мꙋ́дре, бл҃года́рнѡ чтꙋ́щїй тѧ̀: но молѝ непреста́ннѡ ѡ҆ не́мъ, сп҃сти́сѧ неврежде́ннꙋ."
 },
 {
  "type": "HEADER",
  "value": "Сла́ва, глаⷭ҇ и҃:"
 },
 {
  "type": "TEXT",
  "value": "Проповѣ́дника вѣ́ры и҆ слꙋгꙋ̀ сло́ва, а҆ндре́а восхва́лимъ: то́й бо и҆з̾ глꙋбины̀ человѣ́ки ᲂу҆ловлѧ́етъ, вмѣ́стѡ тро́сти крⷭ҇тъ въ рꙋка́хъ держа̀, и҆ ꙗ҆́кѡ ᲂу҆́же низпꙋща́ѧ си́лꙋ, возво́дитъ дꙋ́шы ѿ ле́сти вра́жїѧ, и҆ прино́ситъ бг҃ꙋ да́ръ бл҃гопрїѧ́тенъ при́снѡ. Того̀, вѣ́рнїи, въ ли́цѣ ᲂу҆чн҃къ хрⷭ҇то́выхъ восхва́лимъ, да мо́литсѧ съ ни́ми: ꙗ҆́кѡ да млⷭ҇тивъ бꙋ́детъ на́мъ въ де́нь сꙋ́дный."
 },
 {
  "type": "HEADER",
  "value": "И҆ ны́нѣ, предпра́зднства, глаⷭ҇ то́йже:"
 },
 {
  "type": "TEXT",
  "value": "Воспрїимѝ, виѳлее́ме, бж҃їю митропо́лїю: свѣ́тъ бо незаходи́мый въ тебѣ̀ роди́тисѧ прихо́дитъ. А҆́гг҃ли, ᲂу҆диви́тесѧ на нб҃сѝ: человѣ́цы, просла́вите на землѝ: волсвѝ, и҆з̾ персі́ды пресла̑вныѧ да́ры принеси́те: па́стырїе свирѧ́юще, трист҃о́е пѣ́нїе пѣсновоспо́йте: всѧ́кое дыха́нїе да хва́литъ вседѣ́телѧ."
 },
 {
  "type": "HEADER",
  "value": "Славосло́вїе вели́кое. И҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: бл҃же́нны ѿ канѡ́нѡвъ а҆пⷭ҇ла, пѣ́снь г҃-ѧ и҆ ѕ҃-ѧ на д҃."
 },
 {
  "type": "HEADER",
  "value": "Прокі́менъ, глаⷭ҇ и҃:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ гл҃го́лы и҆́хъ."
 },
 {
  "type": "HEADER",
  "value": "А҆по́столъ къ корі́нѳѧнѡмъ, заⷱ҇ рл҃а."
 },
 {
  "type": "HEADER",
  "value": "А҆ллилꙋ́їа, глаⷭ҇ а҃."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна, заⷱ҇ д҃."
 },
 {
  "type": "TEXT",
  "value": "Прича́стенъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ гл҃го́лы и҆́хъ. А҆ллилꙋ́їа, три́жды."
 },
 {
  "type": "HEADER",
  "value": "Тропа́рь, глаⷭ҇ д҃:"
 },
 {
  "type": "TEXT",
  "value": "Ꙗ҆́кѡ а҆пⷭ҇лѡвъ первозва́нный и҆ верхо́внагѡ сꙋ́щїй бра́тъ влⷣцѣ всѣ́хъ, а҆ндре́е, моли́сѧ, ми́ръ вселе́ннѣй дарова́ти, и҆ дш҃а́мъ на́шымъ ве́лїю млⷭ҇ть."
 },
 {
  "type": "HEADER",
  "value": "Конда́къ, глаⷭ҇ в҃:"
 },
 {
  "type": "TEXT",
  "value": "Подо́бенъ: Въ мл҃твахъ:"
 },
 {
  "type": "TEXT",
  "value": "Мꙋ́жества тезоимени́таго бг҃огл҃го́льника, и҆ цр҃кве возслѣ́дователѧ верхо́внаго, петро́ва сро́дника восхва́лимъ: занѐ ꙗ҆́коже дре́вле семꙋ̀, и҆ ны́нѣ на́мъ воззва̀: прїиди́те, ѡ҆брѣто́хомъ жела́емаго."
 },
 {
  "type": "HEADER",
  "value": "Велича́нїе а҆пⷭ҇лꙋ а҆ндре́ю:"
 },
 {
  "type": "TEXT",
  "value": "Велича́емъ тѧ̀, а҆пⷭ҇ле хрⷭ҇то́въ, а҆ндре́е первозва́нне, и҆ чти́мъ болѣ̑зни и҆ трꙋды̀ твоѧ̑, и҆́миже трꙋди́лсѧ є҆сѝ во бл҃говѣ́стїи хрⷭ҇то́вѣ."
 }
]