ponomar-pwa/static/data/shared/menaion-add/35.json

[
 {
  "type": "HEADER",
  "value": "І҆аннꙋа́рїа ѳ҃і"
 },
 {
  "type": "HEADER",
  "value": "Слꙋ́жба и҆́же во свѧты́хъ ѻ҆тцꙋ̀ на́шемꙋ ма́ркꙋ, митрополі́тꙋ є҆фе́сскомꙋ, и҆сповѣ́дникꙋ."
 },
 {
  "type": "HEADER",
  "value": "А҆́ще и҆зво́литъ настоѧ́тель, твори́мъ бдѣ́нїе и҆лѝ полѷеле́й."
 },
 {
  "type": "HEADER",
  "value": "На вече́рни, Блаже́нъ мꙋ́жъ: пе́рвый а҆нтїфѡ́нъ. На Гдⷭ҇и воззва́хъ: стїхи̑ры на и҃. Гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "І҆ѡа́нна є҆ѵге́нїка: Ѿ чре́ва ма́тернѧ бы́въ просвѣще́нъ, є҆гда̀ непостоѧ́нство мїрски́хъ ра́достей, тлѣ́нность же и҆ сꙋетꙋ̀ благоразꙋ́мнѡ позна́лъ є҆сѝ, тогда̀, возненави́дѣвъ мі́ръ и҆ всѧ̑ кра̑снаѧ и҆ весєлѧ́щаѧ є҆гѡ̀, прите́клъ є҆сѝ къ бж҃е́ственнѣй схи́мѣ, вмѣни́въ болѣ̑зни въ наслажде́нїе, бдѣ́нїе въ ра́дованїе и҆ ᲂу҆покое́нїе, на землѝ лега́нїе и҆ всено́щное стоѧ́нїе, вои́стиннꙋ, въ прїѧ́тное наслажде́нїе, по́стъ въ сла́дость, воздержа́нїе въ весе́лїе."
 },
 {
  "type": "TEXT",
  "value": "Це́ркве послѣ́днїй воево́да, трꙋба̀ великозвꙋ́чнаѧ, гро́мъ бж҃е́ственный, благоче́стїѧ ᲂу҆чи́тель, соверше́нства сщ҃е́нныхъ догма́тѡвъ вѣ́ры вѣ́датель и҆зѧ́щнѣйшїй, дх҃а ст҃а́гѡ и҆схожде́нїе бг҃осло́вивый ꙗ҆́кѡ влⷣка и҆ ᲂу҆чи́тели, собо́рѡвъ ст҃ы́хъ и҆ всест҃а́гѡ сѷмво́ла непобѣди́мый побо́рникъ и҆ предста́тель, по до́лгꙋ свѣ́тлѡ да восхва́литсѧ."
 },
 {
  "type": "TEXT",
  "value": "Вселе́нныѧ вели́кое свѣти́ло, є҆гда̀ возше́лъ є҆сѝ ѿ восто́ка свѣ́тлѡ ра́дꙋйсѧ, ꙗ҆́кѡ и҆споли́нъ, пꙋ́ть гдⷭ҇ень тещѝ, и҆ къ за́падꙋ приплы́лъ є҆сѝ, тогда̀ лꙋчѝ твоѧ̑ сщ҃є́ннаѧ и҆спꙋсти́лъ є҆сѝ, вѣ̑рныѧ ᲂу҆́бѡ просвѣща́ѧ, ѿпа́дшыѧ же въ беззако́нное и҆ противозако́нное но́вшество во всест҃ѣ́мъ и҆ всесщ҃е́ннѣмъ сѷмво́лѣ вѣ́ры, и҆ пока́ѧтисѧ не восхотѣ́вшыѧ, ꙗ҆́кѡ мо́лнїѧ попали́лъ є҆сѝ."
 },
 {
  "type": "HEADER",
  "value": "Гла́съ то́йже:"
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ въ мꙋ́ченицѣхъ:"
 },
 {
  "type": "TEXT",
  "value": "Манꙋ́илово: Сщ҃е́ннѣйшїй хра́мъ бы́лъ є҆сѝ ст҃а́гѡ дх҃а, ма́рко всехва́льне, добродѣ́телей блиста́нїй ве́сь просвѣти́въ ᲂу҆́мъ. Сегѡ̀ ра́ди ны́нѣ предстоѧ̀ со а҆́гг҃лы творцꙋ̀ твоемꙋ̀, молѝ ѿ тлѝ и҆ бѣ́дъ и҆зба́витисѧ вѣ́рою соверша́ющымъ всечестнꙋ́ю па́мѧть твою̀."
 },
 {
  "type": "TEXT",
  "value": "Оу҆мно́живъ тала́нтъ, є҆го́же прїѧ́лъ є҆сѝ, преподо́бне, ѿ рꙋкѝ всѣ́хъ творца̀, приснопѣва́еме, въ ра́дость вше́лъ є҆сѝ мꙋ́дрѣ гдⷭ҇а твоегѡ̀, ꙗ҆́кѡ ра́бъ до́брый и҆ слꙋга̀ вѣ́рнѣйшїй, и҆ ны́нѣ молѝ ѿ тлѝ и҆ бѣ́дъ и҆зба́витисѧ вѣ́рою соверша́ющымъ всечестнꙋ́ю па́мѧть твою̀."
 },
 {
  "type": "TEXT",
  "value": "Ма́рка восхва́лимъ, въ концы̀ мі́ра возвѣсти́вшаго ст҃а́го дх҃а ѿ ѻ҆те́ческїѧ ѵ҆поста́си бытїѐ и҆мꙋ́ща, но не ᲂу҆́бѡ, и҆ ѿ сн҃а: ꙗ҆́кѡ не двѣма̀ вина́ма бы́ти, но є҆ди́на вина̀ є҆́сть ѻ҆ц҃ъ ѻ҆бою̀, и҆́же и҆ всегѡ̀ бж҃ества̀ є҆́сть и҆сто́чникъ и҆ є҆ди́ный безвино́вный."
 },
 {
  "type": "HEADER",
  "value": "Сла́ва, гла́съ а҃"
 },
 {
  "type": "TEXT",
  "value": "І҆ѡа́нна є҆ѵге́нїка: Взира́юще на равноа́гг҃льное житїѐ твоѐ, бг҃оно́сне ма́рко, ꙗ҆́кѡ во ѻ҆́бразѣ тѧ̀ ви́димъ пе́рвагѡ человѣ́ка, пре́жде престꙋпле́нїѧ бы́вша ма́лымъ чи́мъ ме́ньша ѿ а҆́гг҃лъ: ꙗ҆́кѡ безче́стное пораже́нїе, є҆́же ѿ престꙋпле́нїѧ, и҆справлѧ́ѧ и҆ є҆́же по ѻ҆́бразꙋ ᲂу҆держа́въ соверше́ннымъ дѣ́ланїемъ за́повѣдей, ко є҆́же по подо́бїю бж҃їю, па́че и҆ны́хъ восте́клъ є҆сѝ, и҆ до́брымъ и҆сповѣ́данїемъ и҆ бг҃осло́вїемъ благочести́выѧ на́шеѧ вѣ́ры предъ царѝ и҆ мꙋчи́тели и҆ всѣ́мъ мі́ромъ соверше́ннѡ ᲂу҆краси́лсѧ є҆сѝ. Сегѡ̀ ра́ди человѣ́ческое є҆стество̀ хва́лѧщисѧ твои́ми добро́тами, и҆ вселе́ннаѧ чꙋдѧ́щисѧ твои́мъ и҆справле́нїємъ, це́рковь же хрⷭ҇то́ва ᲂу҆кра́шена сꙋ́щи всемꙋ́дрыми твои́ми бг҃онаставлє́нїи, вкꙋ́пѣ ны́нѣ прино́сѧтъ тѝ ра́дованїе, и҆ мы̀, ᲂу҆твержде́ннїи тобо́ю, ᲂу҆се́рднѡ вопїе́мъ тѝ: мо́ли сохрани́тисѧ на́мъ въ до́бромъ и҆сповѣ́данїи твое́мъ."
 },
 {
  "type": "HEADER",
  "value": "И҆ ны́нѣ, догма́тїкъ:"
 },
 {
  "type": "HEADER",
  "value": "Вхо́дъ. Свѣ́те ти́хїй. Прокі́менъ и҆ чтє́нїѧ трѝ."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "Па́мѧть пра́веднагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ чл҃вѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́це є҆ѧ̀: въ шꙋ́йцѣ же є҆ѧ̀ бога́тство и҆ сла́ва. Ѿ ᲂу҆́стъ є҆ѧ̀ и҆схо́дитъ пра́вда, закѡ́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менѐ, ѡ҆ ча̑да, честна̑ѧ бо рекꙋ̀: и҆ бл҃же́нъ чл҃вѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ блгⷣть. Разꙋмѣ́йте ᲂу҆́бѡ неѕло́бивїи кова́рство, ненака́заннїи же, прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̀ лжи̑выѧ. Съ пра́вдою всѝ глагѡ́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а."
 },
 {
  "type": "HEADER",
  "value": "При́тчей чте́нїе."
 },
 {
  "type": "TEXT",
  "value": "Оу҆ста̀ пра́веднагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ благода̑ти, ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ, ме́рзость пред̾ господє́мъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мо и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрѡсти. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ смє́рти. Оу҆́меръ пра́ведный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Првⷣникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же првⷣныхъ бл҃госпѣ́шное. Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во благослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ."
 },
 {
  "type": "HEADER",
  "value": "Премꙋ́дрѡсти соломѡ́ни чте́нїе."
 },
 {
  "type": "TEXT",
  "value": "Пра́ведникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ жи́вый посредѣ̀ грѣ̑шникъ преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ: Сконча́всѧ вма́лѣ и҆спо́лни лѣ́та дѡ́лга: Оу҆гѡ́дна бо бѣ̀ гдⷭ҇еви дꙋша̀ є҆гѡ̀, сегѡ̀ ра́ди потща́сѧ ѿ сре́ды лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышлє́нїи таково́е, ꙗ҆́кѡ бл҃года́ть и҆ ми́лость въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "На стїхо́внѣ, стїхи̑ры гла́съ є҃."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "І҆ѡа́нна є҆ѵге́нїка: Ра́дꙋйсѧ, це́ркве ѕвѣздо̀, за ню́же и҆злїѧ̀ кро́вь свою̀ вели́кїй па́стырь и҆ пе́рвый а҆рхїере́й хрⷭ҇то́съ, є҆мꙋ́же до́брѣ па́че и҆ны́хъ ᲂу҆подоблѧ́ѧсѧ, мꙋ́дре, по си́лѣ дꙋ́шꙋ твою̀ готовѣ́йше полага́лъ є҆сѝ ѡ҆ па́ствѣ є҆гѡ̀ и҆ самагѡ̀ себѐ ѿда́лъ є҆сѝ проти́вꙋ бездве́рныхъ ᲂу҆́стъ: ᲂу҆хищрє́нїѧ виті́йствованїѧ соверше́ннымъ бг҃осло́вїемъ и҆ мꙋ́дростїю дх҃а, ѡ҆ не́мже и҆ боре́нїе бы́сть, постыди́лъ и҆ загради́лъ є҆сѝ, приснохва́льне."
 },
 {
  "type": "TEXT",
  "value": "Сті́хъ: Оу҆ста̀ моѧ̑ возглаго́лютъ премꙋ́дрость:"
 },
 {
  "type": "TEXT",
  "value": "Ра́дꙋйсѧ, вселе́нныѧ свѣти́льниче, пꙋтево́ждствꙋѧй хотѧ́щыѧ разꙋ́мный дꙋшѝ кора́бль въ небꙋ́рное и҆ ве́лне до́брое приста́нище ᲂу҆пра́вити и҆ правосла́внꙋю вѣ́рꙋ непоро́чнꙋ показꙋ́ѧй и҆ благода́тїю ᲂу҆слажда́ѧй и҆ веды́й ко спаси́тєльнымъ догма́тѡмъ ѻ҆снова́нїѧ вѣ́ры. Ра́дꙋйсѧ свѣти́льниче многосвѣ́тлый, и҆́мже неврежде́нны всѣ̑мъ показꙋ́ютсѧ ѻ҆тцє́въ словеса̀, не ѡ҆мраче́ннымъ внꙋ́тренними ѻ҆чесы̀, ꙗ҆́коже ᲂу҆ ѿпа́дшихъ."
 },
 {
  "type": "TEXT",
  "value": "Сті́хъ: Оу҆ста̀ пра́веднагѡ поꙋча́тсѧ премꙋ́дрости:"
 },
 {
  "type": "TEXT",
  "value": "Ра́дꙋйсѧ, премꙋ́дрости сосꙋ́де, ю҆́же возлюби́лъ є҆сѝ ѿ ю҆́ности, и҆ въ сꙋпрꙋ́жницꙋ и҆ подрꙋ́гꙋ до́брѣ стѧжа́лъ є҆сѝ: ра́дꙋйсѧ писа́нїй свѧще́нныхъ рѣко̀, вели́каѧ и҆ неиждива́емаѧ, и҆ предѣ́льнаѧ чистото̀ и҆ всѣ̑мъ ᲂу҆дободостꙋ́пнаѧ: ра́дꙋйсѧ мѷрополо́жнице слове́съ, ю҆́же вкꙋ́пѣ соста́виша ᲂу҆чи́тели ѡ҆ ст҃ѣ́мъ и҆схожде́нїи дх҃а, и҆ мечꙋ̀ ѻ҆боюдоѻ́стрый, и҆зъ ко́рене посѣца́ѧй но́вшескаѧ ѧ҆зы́ки благода́тїю бг҃осло́вїѧ: ра́дꙋйсѧ и҆скꙋплѣ́нїе сла́дкое и҆ нектароизлїѧ́нное."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Дх҃ъ всест҃ы́й, и҆́же и҆здѣ́тска всели́сѧ въ се́рдцѣ твое́мъ и҆ ѡ҆бита̀ въ тебѣ̀ ра́достнѡ, ꙗ҆́кѡ во хра́мѣ та́инственнѣмъ и҆ ᲂу҆крѣпи́ тѧ къ боре́нїю проти́вꙋ мїродержи́телей и҆ къ ѡ҆долѣ́нїю, се́й ᲂу҆гото́ва тѧ̀ посредѣ̀ вселе́нныѧ хра́брствовати ѿ ѻ҆ц҃а̀, и҆ побо́рствовати за свѧты́й сѷмво́лъ, и҆́же по бл҃года́ти тогѡ̀ ѿ ѻ҆тє́цъ преда́ннѣй, ѿпа́дшыѧ же ѿ на́съ и҆ пре́жде и҆ ны́нѣ, си́лою бг҃овѣща́нныхъ слове́съ твои́хъ ᲂу҆страши́ти и҆ постыди́ти. Тѣ́мже ѡ҆ це́ркви ᲂу҆се́рднѡ моли́сѧ, мо́лимсѧ, бг҃оно́сче ма́рко приснопѣва́еме."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "HEADER",
  "value": "Тропа́рь, гла́съ и҃."
 },
 {
  "type": "TEXT",
  "value": "І҆ѡа́нна є҆ѵге́нїка: Правосла́вїѧ наста́вниче, но́вшествъ противобо́рниче, степе́нь вѣ́ры, це́ркве свѣти́льниче, ᲂу҆чи́телей бг҃одꙋхнове́ннаѧ печа́те, ма́рко всемꙋ́дре, писа́нїи твои́ми всѧ̑ просвѣти́лъ є҆сѝ, цѣвни́це дꙋхо́внаѧ, молѝ хрⷭ҇та̀ бг҃а спасти́сѧ дꙋша́мъ на́шымъ."
 },
 {
  "type": "HEADER",
  "value": "На ᲂу҆́трени, По а҃-мъ стїхосло́вїи сѣда́ленъ, гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрость и҆ сло́во:"
 },
 {
  "type": "TEXT",
  "value": "Манꙋ́илово: Ѿ и҆сто́чника премꙋ́дрости преиспо́лнивъ ᲂу҆ста̀ и҆ се́рдце и҆ ᲂу҆́мъ, мꙋ́дре, ѿѻнꙋ́дꙋже привле́клъ є҆сѝ ᲂу҆че́нїѧ стрꙋѝ, тѣ́ми дꙋ́ши напоѧ́ѧ, вѣ́рныхъ соверши́лъ є҆сѝ, и҆ догма́тѡвъ боже́ственныхъ пра́вило показа́лсѧ є҆сѝ: ѻ҆ц҃а̀ ꙗ҆́кѡ є҆ди́нагѡ вино́вника вѣ́далъ є҆сѝ и҆ дх҃а и҆ и҆сто́чникъ бж҃ества̀: ма́рко присноблаже́нне, молѝ хрⷭ҇та̀ бг҃а прегрѣше́нїй да́ти ѡ҆ставле́нїе любо́вїю пра́зднꙋющымъ свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "По в҃-мъ стїхосло́вїи сѣда́ленъ, гла́съ и҃:"
 },
 {
  "type": "TEXT",
  "value": "Подобе́нъ: Премꙋ́дрость и҆ сло́во:"
 },
 {
  "type": "TEXT",
  "value": "І҆ѡа́нна є҆ѵге́нїка: Премꙋ́дрость возлюби́въ, ꙗ҆́кѡ соломѡ́нъ, цѣломꙋ́дрїю поревнова́въ і҆ѡ́сифовꙋ, мѡѷсе́евꙋ неѕло́бїю, и҆лїинѣ̀ бж҃е́ственнѣй ре́вности, даві́довой кро́тости, па́ѵловꙋ проповѣ́данїю, і҆ѡа́нновꙋ свы́ше бг҃осло́вїю, ꙗ҆́кѡ мꙋ́дръ ᲂу҆́бѡ, вои́стиннꙋ, лжемꙋ̑дрыѧ постыди́лъ є҆сѝ, ꙗ҆́кѡ цѣломꙋ́дръ сохрани́лъ є҆сѝ себѐ чистѣ́йша, неѕло́бна и҆ кротча́йшаѧ, ре́вностїю и҆спепели́въ мы́сленнѡ преда́телей вѣ́ры и҆ проповѣ́далъ є҆ди́ное благоче́стїе."
 },
 {
  "type": "HEADER",
  "value": "По полѷеле́и сѣда́ленъ є҆ди́нъ ѿ ѻ҆бою̀ вы́ше."
 },
 {
  "type": "HEADER",
  "value": "Степє́нна. Прокі́менъ и҆ є҆ѵⷢ҇лїе ст҃и́тельское."
 },
 {
  "type": "HEADER",
  "value": "По н҃-мъ ѱалмѣ̀, стїхи́ра, гла́съ ѕ҃:"
 },
 {
  "type": "TEXT",
  "value": "Манꙋ́илово: И҆злїѧ́сѧ благода́ть и҆зъ ᲂу҆сте́нъ твои́хъ, ма́рко ѻ҆́ч҃е на́шъ, свѣти́льниче бг҃одꙋхнове́нне, и҆ бы́лъ є҆сѝ свѣти́льникъ хрⷭ҇то́вы це́ркве, ᲂу҆ча̀ словє́сныѧ ѻ҆́вцы вѣ́ровати въ трⷪ҇цꙋ є҆диносꙋ́щнꙋю во є҆ди́номъ бж҃ествѣ̀."
 },
 {
  "type": "HEADER",
  "value": "Канѡ́на ст҃и́телю два̀."
 },
 {
  "type": "HEADER",
  "value": "Пе́рвый канѡ́нъ. Гла́съ д҃. Творе́нїе кѵ́ръ і҆ѡа́нна є҆ѵге́нїка номофѵ́лаѯа, є҆гѡ́же краестро́чїе:"
 },
 {
  "type": "TEXT",
  "value": "Ꙗ҆зы́къ є҆диноро́дный да бꙋ́детъ по ѻ҆бы́чаю родны́й бра́тъ, пое́тъ кѵ́ръ і҆ѡа́ннъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Земна́гѡ и҆схитѝ и҆ веще́ственнагѡ пристра́стїѧ мо́й ᲂу҆́мъ, содержа́щѧ не́бо и҆ зе́млю ѵ҆поста́снаѧ бг҃а ѻ҆ц҃а̀ мꙋ́дросте, и҆ сло́во мѝ да́рꙋй вѣнча́ющемꙋ слꙋжи́телѧ твоегѡ̀."
 },
 {
  "type": "TEXT",
  "value": "Благода́ть слове́съ, сладча́йшихъ ме́да, бг҃одꙋхнове́ннѡ ѡ҆б̾е́мши сщ҃е́ннꙋю твою̀ дꙋ́шꙋ, совершѝ наслажде́нїе стра́нное, ѻ҆́бщее вѣ̑рнымъ ᲂу҆слажде́нїе, бра́шно спаси́тельное."
 },
 {
  "type": "TEXT",
  "value": "Ꙗ҆́кѡ вели́кое жи́зни свѣти́ло мїровожделѣ́нное возсїѧ́лъ є҆сѝ ѿ восто́ка и҆ восте́клъ є҆сѝ, ꙗ҆́кѡ и҆споли́нъ держа́внѣйшїй, и҆ просвѣти́лъ є҆сѝ концы̀ мі́ра лꙋча́ми слове́съ твои́хъ, ма́рко бж҃е́ственне."
 },
 {
  "type": "TEXT",
  "value": "Оу҆ста̀ благода́ти бы́ша бг҃оглаго́ливїи ᲂу҆стнѣ̀ твоѝ и҆ гла́съ медото́чный, ѧ҆зы́къ же сщ҃е́нный тво́й ꙗ҆́кѡ тро́сть писца̀ показа́сѧ, мꙋ́дрость соста́ви, благода́ть и҆злїѧ̀."
 },
 {
  "type": "TEXT",
  "value": "Бг҃оро́диченъ: Оу҆́мъ небе́сный, чи́стꙋю и҆ возвы́шеннꙋю дꙋ́шꙋ и҆ помышле́нїй и҆ та́инственныхъ писа́нїй ѿкрове́нїе, предѣ́лъ премꙋ́дрости, ли́къ ᲂу҆мѡ́въ прїѧ́тъ съ ма́терїю бж҃їею."
 },
 {
  "type": "HEADER",
  "value": "И҆́нъ канѡ́нъ, гла́съ и҃, творе́нїе вели́каго ри́тора вели́кой це́ркви манꙋ́ила, є҆гѡ́же краестро́чїе:"
 },
 {
  "type": "TEXT",
  "value": "А҆рхїере́а а҆сі́и знамени́тѣйшагѡ пою̀ ма́рка."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀, мѡѷсе́йскїй же́злъ крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща."
 },
 {
  "type": "TEXT",
  "value": "Добро́ты ра́ди добродѣ́телей сїѧ́нїѧ вы́шнѧгѡ прїѧ́телище бы́въ, па́ствꙋ хрⷭ҇то́вꙋ, ма́рко, просвѣти́лъ є҆сѝ. Сегѡ̀ ра́ди къ свѣ́тꙋ невече́рнемꙋ преста́вльсѧ, воспѣва́ющымъ бж҃е́ственнꙋю па́мѧть твою̀ вдохнѝ сло́вꙋ ѡ҆зарѧ́ющꙋю благода́ть, сла́вне."
 },
 {
  "type": "TEXT",
  "value": "Тща́щемꙋсѧ мѝ досто́йнѡ дости́гнꙋти похва́лъ твои́хъ, блаже́нне, глꙋбоча́йшїй зри́тсѧ бы́ти и҆сто́чникъ слове́съ бж҃е́ственныхъ твои́хъ и҆справле́нїи, но ѻ҆́ч҃е, моли́твами твои́ми любвѝ ра́внꙋю благода́ть и҆ си́лꙋ мѝ да́ждь."
 },
 {
  "type": "TEXT",
  "value": "Благода́тей бж҃е́ственныхъ всест҃ы́й хра́мъ, ѿ негѡ́же благовѡ́нїѧ та́инствєннаѧ всѣ̑мъ благоче́стнѡ живꙋ́щымъ раскры́шасѧ во сла́вꙋ и҆ хвалꙋ̀ несозда́нныѧ трⷪ҇цы, є҆ди́нагѡ є҆стество́мъ бг҃а на́шегѡ, да восхва́литсѧ ма́ркъ всечестны́й."
 },
 {
  "type": "TEXT",
  "value": "Бг҃оро́диченъ: Дре́вле прⷪ҇ро́кѡвъ сщ҃є́нныѧ прови́дѣша взо́ры, чⷭ҇таѧ, тѧ̀ ᲂу҆́мною го́рꙋ, кꙋпинꙋ̀ неѡпали́мꙋю и҆ врата̀ непроходи́маѧ, ста́мнꙋ и҆ маннопрїе́мницꙋ: мы́ же вѣ́рою возвѣща́емъ тѧ̀ бцⷣꙋ вои́стиннꙋ, бг҃оневѣ́сто."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "TEXT",
  "value": "Ѿве́рзъ бж҃е́ственныѧ хлѧ́би мꙋ́дрости и҆ вѣ́дѣнїѧ твоегѡ̀, всю̀, зе́млю наводни́лъ є҆сѝ, правосла́внѣйше бг҃осло́ва бытїѐ ст҃а́гѡ дх҃а то́чїю ѿ ѻ҆ц҃а̀."
 },
 {
  "type": "TEXT",
  "value": "Ре́вность до́мꙋ гдⷭ҇нѧ, ре́вность догма́тѡвъ ѻ҆те́ческихъ, сщ҃е́нное се́рдце твоѐ ѡ҆б̾е́мъ, согрѣ̀ и҆ честны́й ѧ҆зы́къ тво́й на но́вшества и҆з̾ѻстрѝ."
 },
 {
  "type": "TEXT",
  "value": "Велича́йшаѧ борє́нїѧ и҆ нꙋ́жды благодꙋ́шнѡ, преблаже́нне, под̾е́мъ, и҆ добродѣ́тель и҆збра́въ и҆ ѻ҆те́ческое благоче́стїе, велича́йшꙋю сла́вꙋ на небесѣ́хъ ны́нѣ наслѣ́довалъ є҆сѝ."
 },
 {
  "type": "TEXT",
  "value": "Ве́лїй свѣти́льникъ, и҆́же въ мо́ри сꙋ́щымъ, ве́лїѧ въ мі́рѣ жива́ѧ ѕвѣзда̀, свѣ́тъ сла́дкїй и҆ всеꙋслади́тельный, со́ль землѝ крѣ́пкаѧ, дре́во бж҃е́ственнагѡ зна́нїѧ, чꙋ́дный ма́ркъ да вѣнча́етсѧ."
 },
 {
  "type": "TEXT",
  "value": "Бг҃оро́диченъ: Состарѣ́вшеесѧ є҆стество̀ человѣ́ческое, ꙗ҆́кѡ ро́ждши всѣ́хъ творца̀, ѡ҆ всѣ́хъ преесте́ственнѡ человѣ́ка бы́вшаго по є҆стествꙋ̀ невеще́ственномꙋ ты̀ бцⷣе, ѡ҆бнови́ла є҆сѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Небе́снагѡ крꙋ́га верхотво́рче гдⷭ҇и, и҆ це́ркве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не человѣколю́бче."
 },
 {
  "type": "TEXT",
  "value": "Зерца́ло сїѧ́нїй всетво́рческагѡ дх҃а, блаже́нне, показа́лсѧ є҆сѝ, просвѣща́ѧ вѣ́рныхъ и҆сполнє́нїѧ, незаблꙋ́дными твои́ми ᲂу҆чє́нїи и҆ ᲂу҆вѣрѧ́ѧ воспѣва́ти трⷪ҇цꙋ несозда́ннꙋю."
 },
 {
  "type": "TEXT",
  "value": "Ри́торствꙋѧ посредѣ̀ собо́рнаго рѧ́да, ᲂу҆тверди́лъ є҆сѝ бытїѐ дх҃а ст҃а́гѡ ѿ ѻ҆ч҃ескїѧ ѵ҆поста́си происходѧ́щее, и҆ вѣ́рныхъ составле́нїѧ, ма́рко, возвесели́лъ є҆сѝ."
 },
 {
  "type": "TEXT",
  "value": "Всесли́чнаѧ трꙋба̀, мꙋсїкі́йскїй ѻ҆рга́нъ, дх҃одви́жимый ѧ҆зы́къ и҆ сладкозвꙋ́чный, и҆спо́лненный бл҃года́ти и҆сто́чникъ и҆́стинныѧ премꙋ́дрости, да похвали́тисѧ дне́сь ма́ркъ всечестны́й."
 },
 {
  "type": "TEXT",
  "value": "Бг҃оро́диченъ: Неиз̾ѧсни́мое чꙋ́до є҆́же на тебѣ̀, всечи́стаѧ! Ꙗ҆́кѡ всѣ́хъ бг҃а неизрече́ннѡ родила̀ є҆сѝ и҆ по рождествѣ̀ дв҃а сꙋ́щи ꙗ҆ви́ласѧ є҆сѝ, сегѡ̀ ра́ди бцⷣꙋ тѧ̀ и҆́стиннꙋю почита́емъ."
 },
 {
  "type": "HEADER",
  "value": "Конда́къ, гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆ви́ласѧ є҆сѝ:"
 },
 {
  "type": "TEXT",
  "value": "Манꙋ́илово: Премꙋ́дрыми слове́съ твои́хъ и҆сплете́нїи, всеблаже́нне, всѧ́каѧ ᲂу҆ста̀ хꙋ̑льнаѧ загради́лъ є҆сѝ и҆ вѣ̑рныѧ бг҃овѣща̑нїи просвѣти́лъ є҆сѝ честѝ трⷪ҇цꙋ въ то́ждествѣ є҆стества̀."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрость и҆ сло́во:"
 },
 {
  "type": "TEXT",
  "value": "І҆ѡа́нна є҆ѵге́нїка: Ѡ҆блета́ѧ лꙋ́гъ свѧще́нный и҆ ра́й, вои́стиннꙋ благоцвѣтꙋ́щїй, ꙗ҆́кѡ нѣ́каѧ пчела̀, ѿ писа́нїй дх҃а и҆ ст҃ы́хъ ѻ҆тє́цъ пе́рвыхъ, вѣ́ры ѡ҆снова́нїй возвѣсти́телей и҆ ᲂу҆чи́телей, преподо́бне, ро́сꙋ поче́рпалъ є҆сѝ прїѧ́тнꙋю и҆ благово́ннꙋю, ѿ неѧ́же содѣ́лалъ є҆сѝ со́ты вѣ́ры и҆ ме́дъ вѣ́дѣнїѧ, є҆го́же ца́рїе и҆ простецы̀ во здра́вїе прїе́млюще, благода́рствєннаѧ всѝ восписꙋ́ютъ тебѐ, всемꙋ́дре: молѝ хрⷭ҇та̀ бг҃а прегрѣше́нїй да́ти ѡ҆ставле́нїе пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Ѡ҆долѣ́тель и҆зѧ́щнѣйшїй трепобѣди́тельный проти́вꙋ лꙋка́вагѡ мїроде́ржца и҆здѣ́тска мꙋ́жественнѡ ꙗ҆ви́лсѧ є҆сѝ, проти́вꙋ же пре́лести но́вшества послѣдѝ ра́товалъ є҆сѝ."
 },
 {
  "type": "TEXT",
  "value": "Крѣ́пкое благобо́рственное кре́стное ѻ҆рꙋ́жїе и҆ зна́менїе носѧ̀ на пре́лесть, ꙗ҆́кѡ мѡѷсе́й разсѣ́клъ є҆сѝ мо́ре страсте́й, та́же сꙋпоста́ты твоѧ̑ потопи́лъ є҆сѝ."
 },
 {
  "type": "TEXT",
  "value": "Всѐ твоѐ жела́нїе ко хрⷭ҇тꙋ̀ просте́ръ и҆здѣ́тска, приснохва́льне, къ неѻбы́чномꙋ наслажде́нїю, къ сла́дости дꙋше́внѣй, къ добро́тѣ неизрече́ннѣй, сла̑дкаѧ мі́ра возненави́дѣлъ є҆сѝ."
 },
 {
  "type": "TEXT",
  "value": "Зна́мєнїѧ бж҃е́ственнагѡ внꙋтрьꙋ́дꙋ и҆ а҆́гг҃льскагѡ нра́ва свѣтлѣ́йшїѧ и҆ ст҃ы́ѧ твоеѧ̀ дꙋшѝ лѣ́пота и҆ бж҃е́ственность лица̀ твоегѡ̀ и҆з̾ѡбразѝ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Ѿве́рзла є҆сѝ, ю҆́же заключѝ преслꙋша́нїе, ра́йскꙋю две́рь, всечⷭ҇таѧ, ᲂу҆гото́вавъ себѐ къ те́пломꙋ послꙋша́нїю за́повѣдей творца̀ твоегѡ̀ и҆ жи́зни пꙋ́ть показа́лсѧ є҆сѝ, влⷣчце."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Въ твои́хъ, всеблаже́нне, ᲂу҆стна́хъ благода́ть и҆злїѧ́сѧ и҆ просвѣтѝ це́ркве тве́рдь сла́достїю разсꙋжде́нїй бж҃е́ственныхъ."
 },
 {
  "type": "TEXT",
  "value": "Сщ҃е́ннѣйшїй хра́мъ ст҃а́гѡ дх҃а бы́лъ є҆сѝ, бж҃е́ственное благоꙋха́нїе бг҃осло́вїѧ всѣ̑мъ и҆спꙋска́ѧ, сщ҃е́ннѣйшїй."
 },
 {
  "type": "TEXT",
  "value": "Свѣ́тлаѧ твоѧ̀ возсїѧ̀ па́мѧть и҆ просвѣтѝ мы́сли любо́вїю восхвалѧ́ющихъ твоегѡ̀ бг҃осло́вїѧ соверше́нство."
 },
 {
  "type": "TEXT",
  "value": "Бг҃оро́диченъ: Во́инство невеще́ственныхъ ᲂу҆мѡ́въ превзошла̀ є҆сѝ, чⷭ҇таѧ, ро́ждши всѧ̀ ѡ҆сꙋществова́вшаго и҆ на́съ ѿ пре́лести и҆зба́вившаго."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й, ты̀ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ роди́ла є҆сѝ безлѣ́тнагѡ сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Всегѡ̀ себѐ сама́го же́ртвꙋ возноси́лъ є҆сѝ благопрїѧ́тнꙋю бг҃ꙋ, за ны̀ погребе́нномꙋ, хра́мъ ᲂу҆краси́въ бж҃е́ственный тѣ́ло твоѐ и҆ же́ртвенникъ ст҃ы́й чи́стое се́рдце твоѐ, ꙗ҆́кѡ заколе́нїе свѣтоза́рное дꙋ́шꙋ твою̀."
 },
 {
  "type": "TEXT",
  "value": "И҆збѣ́глъ є҆сѝ до́блѣйше житїѧ̀ волне́нїѧ, всѧ̑ благоразꙋ́мнѡ, блаже́нне, ѿве́ргъ, ꙗ҆́кѡ да прїѡбрѧ́щеши є҆ди́ное многоче́стное, є҆ди́ный би́серъ хрⷭ҇та̀, и҆ возсокро́виществꙋеши бж҃е́ственное просвѣще́нїе и҆ вѣ́дѣнїе бг҃а."
 },
 {
  "type": "TEXT",
  "value": "Ма̑лаѧ и҆ недостѡ́йнаѧ ны́нѣшнѧгѡ вѣ́ка страда́нїѧ къ и҆мꙋ́щей ꙗ҆ви́тисѧ свѣ́тлѣй и҆ бж҃е́ственнѣй сла́вѣ непрестаю́щей разсꙋжда́ѧ, всѧ̑ и҆скꙋшє́нїѧ крѣ́пкѡ и҆ до́блѣ претерпѣ́лъ є҆сѝ съ па́ѵломъ, блаже́нне."
 },
 {
  "type": "TEXT",
  "value": "Крѣ́пость неѡбори́мꙋю и҆ си́лꙋ тебѣ̀ дадѐ є҆ди́ный си́льный и҆ влⷣка, ꙗ҆́кѡ всецѣ́лѡ проти́вꙋ ѕмі́ѧ, та́кѡ и҆ коне́чнѣ проти́вꙋ лꙋка́вагѡ смѣше́нїѧ вѣ́ры и҆ догма́тѡвъ нарꙋше́нїѧ."
 },
 {
  "type": "TEXT",
  "value": "Бг҃оро́диченъ: Ст҃ы́нѧ ѡ҆скꙋдѣва́вшаѧ ст҃ы́ѧ невѣ́сты сн҃а бж҃їѧ, це́ркве хрⷭ҇то́вы, ст҃а́ѧ дв҃о всечⷭ҇таѧ, и҆справлѧ́етсѧ и҆ возстановлѧ́етсѧ свѣ́тлѡ въ сла́вѣ ѻ҆те́ческой по благода́ти твое́й, ма́ркомъ твои́мъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго. Но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Посредѣ̀ це́ркве пѣ́снь бг҃одꙋхнове́ннꙋю сла́дкѡ воспѣ́лъ є҆сѝ: ѻ҆ц҃а̀ то́чїю бж҃ества̀ ᲂу҆ча̀ вино́вника бы́ти, роди́телѧ ᲂу҆̀бо сн҃а и҆ и҆зводи́телѧ ст҃а́гѡ, всесла́вне, дх҃а."
 },
 {
  "type": "TEXT",
  "value": "Словесє́мъ ѻ҆тє́цъ и҆ бж҃е́ствєннымъ разсꙋжде́нїємъ, блаже́нне, послѣ́дꙋѧ, сн҃а и҆ дх҃а ѻ҆ц҃ꙋ̀ равночє́стна бы́ти возгласи́лъ є҆сѝ, ꙗ҆́кѡ бытїѐ и҆́ма ѿ ѻ҆ц҃а̀, ꙗ҆́кѡ ѿ вины̀, ѿ негѡ́же вкꙋ́пѣ и҆ происхо́дѧтъ ѻ҆боѧ̀."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ лѣ́ствице і҆а́кѡвлѧ, є҆́юже сни́де бг҃ъ и҆ привлечѐ сме́ртное є҆стество̀ въ небе́снꙋю сла́вꙋ, бг҃оневѣ́сто, ра́дꙋйсѧ а҆́гг҃лѡвъ ра́досте, вѣ́рныхъ же всѣ́хъ ᲂу҆пова́нїе и҆ тве́рдое прибѣ́жище."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бж҃е́ственное сїѐ и҆ всечⷭ҇тно́е соверша́юще пра́зднество бг҃омꙋ́дрїи бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Бл҃года́тїю є҆ди́нагѡ, ᲂу҆крѣплѧ́ющагѡ ᲂу҆пова́ющыѧ на него̀, сокрꙋши́лъ є҆сѝ главы̑ беззако́нныхъ наси́льникѡвъ человѣконенави́стныхъ, и҆ мече́мъ дх҃а посѣ́клъ є҆сѝ ѧ҆зы́ки вводѧ́щихъ но́вшества."
 },
 {
  "type": "TEXT",
  "value": "Всѧ̀ землѧ̀ пое́тъ и҆ мо́ре чꙋди́тсѧ, и҆ возвѣща́етъ це́рковь чꙋдеса̀ твоѧ̑ и҆ побѣди́тєльнаѧ, и҆ ра́дꙋетсѧ, сꙋпоста́ты всѧ̑ ѡ҆браща́ющи въ бѣ́гство, всемꙋ́дре."
 },
 {
  "type": "TEXT",
  "value": "Пото́цы ні́ловы златострꙋ̑нныѧ и҆ сладча́йшыѧ ме́да ꙗ҆ви́шасѧ то́ки нектароизлїѧ̑нныѧ бг҃оглаго́ливагѡ ѧ҆зы́ка твоегѡ̀, правосла́вїѧ всѣ́мъ и҆ска́пающыѧ догма́ты."
 },
 {
  "type": "TEXT",
  "value": "Рѣка̀ приснотекꙋ́щаѧ ᲂу҆стремле́нїи весели́тъ лицѐ бж҃їѧгѡ гра́да, цр҃кве и҆сполне́нїе, бг҃оглаго́ливый ма́рко, пра́выми догма́ты."
 },
 {
  "type": "TEXT",
  "value": "Бг҃оро́диченъ: Но́во ѻ҆троча̀ родила̀ є҆сѝ, безлѣ́тнагѡ сн҃а ѻ҆́тча, всечⷭ҇тѣ́йшаѧ, и҆ была̀ є҆сѝ честнѣ́йшаѧ тва́ри, ꙗ҆́кѡ всѣ́хъ творца̀ тва́ри ꙗ҆ви́ла є҆сѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀."
 },
 {
  "type": "TEXT",
  "value": "Проповѣ́дателей хрⷭ҇то́выхъ вѣ́рꙋ наслѣ́довавъ неꙋма́леннꙋю, невре́днꙋ соблю́лъ є҆сѝ, сла́вне, пред̾ власти́тєли, ничто́же страша́сѧ і҆талі́йскихъ ко́зней."
 },
 {
  "type": "TEXT",
  "value": "Оу҆дали́въ себѐ скве́рнагѡ смѣше́нїѧ, всеблаже́нне, къ дꙋхо́вномꙋ и҆ ра́достномꙋ ѿше́лъ є҆сѝ стоѧ́нїю, и҆дѣ́же трисо́лнечный зри́ши свѣ́тъ, на́мъ благода́ть просѧ̀."
 },
 {
  "type": "TEXT",
  "value": "Догма́тѡвъ благочести́выхъ смы́слъ на́мъ и҆з̾ѧсни́лъ є҆сѝ и҆ мнѧ́щихъ то́ежде бы́ти сꙋщество̀ и҆ дѣ́йство, до́блестнѡ ѿгна́лъ є҆сѝ, ꙗ҆́кѡ сꙋ́щагѡ присꙋ́щее є҆́сть, блаже́нне, разли́чїе."
 },
 {
  "type": "TEXT",
  "value": "Бг҃оро́диченъ: Сотворѝ тебѣ̀ вели́чїѧ си́льный, всечⷭ҇таѧ, посредѣ̀ те́рнїй крі́нъ ѡ҆брѣ́тъ тѧ̀, и҆́мже и҆спо́лни всю̀ тва́рь благоꙋха́нїи бж҃ества̀."
 },
 {
  "type": "HEADER",
  "value": "Конда́къ, гла́съ и҃,"
 },
 {
  "type": "TEXT",
  "value": "Подо́бенъ: Взбра́нной воево́дѣ:"
 },
 {
  "type": "TEXT",
  "value": "І҆ѡа́нна є҆ѵге́нїка: Бг҃осло́вѡвъ богомꙋ̑драѧ писа́нїѧ, ꙗ҆́кѡ бг҃оглаго́льникъ и҆́стиненъ, прїе́мъ въ се́рдцы, и҆схожде́нїе дх҃а ст҃а́гѡ возвѣсти́лъ є҆сѝ ꙗ҆́кѡ до́лжно є҆́сть, приснохва́льне, и҆ всест҃ы́й запечатлѣ́лъ є҆сѝ сѷмво́лъ: сегѡ̀ ра́ди пое́мъ: ра́дꙋйсѧ, ма́рко бг҃оглаго́ливе."
 },
 {
  "type": "TEXT",
  "value": "І҆́косъ: А҆́гг҃лъ ᲂу҆̀бо преста́въ, ра́доватисѧ благовѣстѝ и҆ногда̀ бцⷣѣ со стра́хомъ: а҆́зъ же є҆ди́нъ ѿ зрѧ́щихъ тѧ̀ вы́ше є҆стества̀ ꙗ҆́вльшасѧ ꙗ҆́кѡ а҆́гг҃ла, ꙗ҆́кѡ человѣ́къ ᲂу҆дивлѧ́юсѧ и҆ пою̀ тѝ съ любо́вїю такова́ѧ: Ра́дꙋйсѧ, чистоты̀ ст҃ы́ѧ прїѧ́телище: ра́дꙋйсѧ, премꙋ́дрости бж҃їѧ сокро́вищнице: ра́дꙋйсѧ, бг҃осло́вѡвъ ст҃ы́хъ печа́те: ра́дꙋйсѧ, ᲂу҆чи́телей ѻ҆тцє́въ предѣ́ле: ра́дꙋйсѧ, пꙋчи́но неизмѣ́римаѧ мышле́нїй дꙋхо́вныхъ: ра́дꙋйсѧ, мо́ре простра́нное та́инственныхъ писа́нїй: ра́дꙋйсѧ, ꙗ҆́кѡ показа́лсѧ є҆сѝ цр҃кве свѣ́тъ ве́лїй: ра́дꙋйсѧ, ꙗ҆́кѡ до ны́нѣ постыжда́еши противомы́слѧщыѧ: ра́дꙋйсѧ, и҆сто́чниче догма́тѡвъ вѣ́ры: ра́дꙋйсѧ, закола́телю но́вшескихъ ᲂу҆хищре́нїй: ра́дꙋйсѧ, и҆́мже ᲂу҆тверди́хомсѧ всѝ: ра́дꙋйсѧ, и҆́мже и҆́стина сїѧ́етъ. Ра́дꙋйсѧ, ма́рко бг҃оглаго́ливе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Не поколеба̀ столпа̀ нерꙋши́магѡ крѣ́пости твоеѧ̀ и҆скꙋше́нїй тѧ́жкаѧ зима̀, нижѐ въ нача́лѣ, нижѐ по́здѣ: ꙗ҆́кѡ на ка́мени тве́рдѡ ѡ҆снова́ни бы́ша благочєсти́выѧ дѣѧ̑нїѧ и҆ словеса̀."
 },
 {
  "type": "TEXT",
  "value": "Ѡ҆скверне́нꙋ зрѧ̀ неприкоснове́ннꙋ и҆мꙋ́щꙋю сохрани́тисѧ чⷭ҇тꙋю ри́зꙋ хрⷭ҇то́вꙋ, ю҆́же хрⷭ҇то́съ кровмѝ свои́ми ᲂу҆добрѝ и҆ дадѐ цр҃кви, возстена́лъ є҆сѝ и҆ великодꙋ́шнѡ побо́рствовалъ є҆сѝ."
 },
 {
  "type": "TEXT",
  "value": "Непревра́тенъ по́мыслъ стѧжа́въ, и҆спыта́нїю бы́вшꙋ ѡ҆ бз҃ѣ и҆ ст҃ы́хъ догма́тахъ вѣ́ры, ꙗ҆́кѡ ле́въ ѡ҆брати́лъ є҆сѝ въ бѣ́гство и҆ порази́лъ є҆сѝ ца́рскимъ ры́канїемъ но́вшествꙋющихъ полкѝ."
 },
 {
  "type": "TEXT",
  "value": "Весе́лостїю и҆ нра́ва ᲂу҆добре́нїемъ, слове́съ лѣ́потою и҆ житїѧ̀ ст҃остїю, всѧ́каго человѣ́ка ꙗ҆́вѣ привле́клъ є҆сѝ, ꙗ҆́кѡ си́ла магни́та желѣ́зо, богомꙋ́дре, и҆ къ сла́вѣ подви́глъ є҆сѝ бж҃їей."
 },
 {
  "type": "TEXT",
  "value": "Бг҃оро́диченъ: Оу҆грызе́нїемъ ѕмі́ѧ и҆стлѣ́вшїй человѣ́ческїй ро́дъ, кла́съ ро́ждши живота̀, всѣ̑мъ да́рꙋюща дыха́нїе, ѡ҆живи́ла є҆сѝ и҆ назда́ла и҆ раѧ̀ ѻ҆́бщника содѣ́лала є҆сѝ, бцⷣе."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще поѧ́хꙋ: блгⷭ҇ве́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Возше́лъ є҆сѝ ра́дꙋѧсѧ къ трисо́лнечномꙋ свѣ́тꙋ и҆ прича́стїемъ тогѡ̀ наслажда́ешисѧ, ꙗ҆́кѡ правосла́внѡ на землѝ, ᲂу҆ча̀, ꙗ҆влѧ́лъ є҆сѝ всѣ̑мъ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Ѿ є҆ди́ныѧ ѵ҆поста́си ѻ҆ч҃ескїѧ безвре́меннѡ возсїѧ́ша сн҃ъ и҆ дх҃ъ: ѻ҆́въ ᲂу҆́бѡ рожде́нїемъ, се́й же и҆схожде́нїемъ, догма́тствовалъ є҆сѝ и҆ вѣ̑рныѧ пѣ́ти ᲂу҆тверди́лъ є҆сѝ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Возвѣсти́лъ є҆сѝ всѣ̑мъ ᲂу҆тѣ́шителѧ бж҃е́ственное и҆схожде́нїе сꙋ́щее то́кмѡ ѿ ѻ҆ц҃а̀, ꙗ҆́кѡ ѿ вины̀, мꙋ́дре, и҆ постыди́лъ є҆сѝ богокꙋ́пцевъ гнила́ѧ мнѣ̑нїѧ, не вѣ́дꙋщихъ вопи́ти: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Свободи́сѧ плодо́мъ твои́мъ, бг҃ороди́тельнице, є҆стество̀ сме́ртное ѿ дре́внїѧ клѧ́твы и҆ бл҃гослове́нїѧ ᲂу҆досто́исѧ ст҃а́гѡ, сегѡ̀ ра́ди сла́витъ и҆ воспѣва́етъ зовꙋ́ще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочєсти́выѧ въ пещѝ, ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Вели́кїѧ домострои́тель всегѡ̀, всѧ̑ содержа́ѧй же и҆ промыслѧ́ѧй, се́й пред̾ꙋмы́сливый ѻ҆́бщее, блаже́нне, всеблагоче́стное и҆сповѣ́данїе, ѻ҆́бщагѡ тѧ̀ ᲂу҆чи́телѧ, ѻ҆тца̀, па́стырѧ всѣ̑мъ ᲂу҆строѧ́етъ и҆ побо́рника крѣ́пкаго."
 },
 {
  "type": "TEXT",
  "value": "Младе́нцєвъ стрѣлѧ́нїѧ противомы́слѧщихъ догма́тѡвъ софисти́чєскаѧ ᲂу҆хищрє́нїѧ показа́шесѧ, дѣ́тское и҆гра́лище, паꙋчи́нное тка́нїѧ и҆сплете́нїе, и҆ си́ла ѧ҆зы́кѡвъ тѣ́хъ ѡ҆слабѣ̀, проти́вꙋ твоегѡ̀, бг҃оглаго́ливе, бг҃одви́жимагѡ и҆ бг҃осло́вскагѡ ѧ҆зы́ка."
 },
 {
  "type": "TEXT",
  "value": "Возве́дъ ѻ҆́чи по́мысла и҆ всего̀ себѐ спросте́ръ ко гдⷭ҇ꙋ, во є҆́же сокрꙋши́ти ᲂу҆́бѡ си́льнаго, спасти́ же благочєсти́выѧ, сего̀ неѡбори́маго ѡ҆брѣ́лъ є҆сѝ спобо́рника, сло́ве тѝ да́рꙋюща, ꙗ҆́кѡ досто́йномꙋ и҆ мно́гою си́лою благовѣствꙋ́ющемꙋ."
 },
 {
  "type": "TEXT",
  "value": "Бг҃ꙋ взаимода́въ любо́вь къ бли́жнемꙋ и҆ благодѣѧ́нїе, многокра́тное, ꙗ҆́коже то́й ѡ҆бѣща̀, ѡ҆брѣ́лъ є҆сѝ воздаѧ́нїе въ настоѧ́щемъ и҆ въ бꙋ́дꙋщемъ вѣ́цѣ, бога́тство небе́сное и҆ сла́вꙋ и҆ наслажде́нїе неиждива́емое и҆ живо́тъ во вѣ́ки и҆ ца́рство."
 },
 {
  "type": "TEXT",
  "value": "Бг҃оро́диченъ: И҆зри́нꙋ за́висть дре́внѧгѡ льстеца̀ и҆ ѿстꙋ́пника и҆зрѧ́дное творе́нїе творца̀, ро́дъ человѣ́ческїй, въ тмочи́слєнныѧ пре́лєсти, и҆ пре́жде и҆ ны́нѣ, ѿ ни́хже ны́нѣ спасе́ни є҆смы̀ твои́мъ, влⷣчце, споборе́нїемъ бг҃овѣща́нномꙋ ма́ркꙋ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Ѿ главы̀ до сто́пъ ѡ҆зарѧ́емь, бг҃оно́сче блаже́нне, ст҃и́тельства честно́е и҆ ст҃о́е є҆ѵⷢ҇лїе чи́стѡ сщ҃еннодѣ́йствовалъ є҆сѝ и҆ вѣ̑рныѧ ᲂу҆ча̀ є҆мꙋ̀, ᲂу҆вѣрѧ́лъ є҆сѝ пѣ́ти: дѣ́ти благослови́те, сщ҃е́нницы воспо́йте лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Ꙗ҆́кѡ со́лнце ѿ восто́ка возсїѧ́лъ є҆сѝ, прпⷣбне, и҆ бг҃осло́вїѧ блиста́нїи ѡ҆сїѧ́лъ и҆ просвѣти́лъ є҆сѝ вселе́ннꙋю, и҆ вѣ̑рныѧ наꙋчи́лъ є҆сѝ трⷪ҇цѣ воспѣва́ти со стра́хомъ: дѣ́ти благослови́те, сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Не дрꙋ́гъ ѿ дрꙋ́га и҆мѣ́ютъ бытїѐ, ꙗ҆̀же ѿ є҆ди́ныѧ вины̀ происхо́дѧтъ, сла́вне, всѣ̑мъ возвѣща́лъ є҆сѝ: ꙗ҆́кѡ сн҃ъ и҆ дх҃ъ ꙗ҆́вѣ ѻ҆боѧ̀ ѿ ѻ҆ц҃а̀, не дрꙋ́гъ ѿ дрꙋ́га всѧ́кѡ, ꙗ҆́коже ѿрасли ѿ ко́рене є҆ди́нагѡ неꙋвѧда́емагѡ: сегѡ̀ ра́ди ᲂу҆̀бо па́мѧть твою̀ че́ствꙋемъ во вѣ́ки."
 },
 {
  "type": "TEXT",
  "value": "Бг҃оро́диченъ: Всесвѣ́тлаѧ пала́то всѣ́хъ влⷣчествꙋющагѡ, ѡ҆мраче́ннꙋю страстьмѝ дꙋ́шꙋ мою̀ и҆спра́ви къ добродѣ́тельнымъ стезѧ́мъ, чⷭ҇таѧ, да спасе́нъ бы́въ ми́лостїю твое́ю, пою̀: дѣ́ти благослови́те, сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ дꙋ́хомъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере: и҆ да вопїе́тъ, ра́дꙋйсѧ всебл҃же́ннаѧ бцⷣе чи́стаѧ приснодв҃о."
 },
 {
  "type": "TEXT",
  "value": "Сѐ ны́нѣ да соберꙋ́тсѧ хрⷭ҇тоимени́тїи лю́дїе ра́дꙋющесѧ, и҆ правосла́вныхъ ст҃а́ѧ непоро́чнаѧ цр҃ковь да возвесели́тсѧ дне́сь и҆ благода́рствєннаѧ да воспое́тъ хрⷭ҇тꙋ̀, и҆сто́ргшемꙋ лови́тельство но́вшества чре́зъ є҆ди́наго мꙋ́драго."
 },
 {
  "type": "TEXT",
  "value": "Знамени́тость нело́жнꙋю и҆ сла́вꙋ небе́снꙋю, блаже́нне, наслѣ́довалъ є҆сѝ, сла́вꙋ бо ги́бнꙋщꙋю со и҆ны́мъ всѧ́кимъ житїѧ̀ ᲂу҆гожде́нїемъ, ѿ дꙋшѝ, ꙗ҆́кѡ не сꙋ́щаѧ ѿтрѧ́съ, съ чи́нми бг҃осло́вѡвъ ᲂу҆чи́телей, ꙗ҆́кѡ є҆динонра́вный, сора́дꙋешисѧ."
 },
 {
  "type": "TEXT",
  "value": "Голꙋби́ца, свобожде́нїе ѿ бѣ́дствованїѧ на́мъ возвѣсти́вшаѧ, напа́ствꙋємымъ тѧгча́йшимъ волне́нїемъ но́выѧ пре́лести, ᲂу҆тѣ́шителѧ бл҃года́тїю добродѣ́телей кри́лы позлаще́нными прелетѣ́вши, предварѝ во ст҃ы̑ѧ ски́нїи ст҃ы́хъ."
 },
 {
  "type": "TEXT",
  "value": "И҆збавле́нїе всегѡ̀ мі́ра чⷭ҇тнꙋ́ю кро́вь творца̀ твоегѡ̀, блаже́нне, предлага́ѧ въ ско́рбныхъ и҆спыта́нїѧхъ вѣ́ры, хода́тай бг҃ꙋ и҆ чина́мъ вѣ́рныхъ поста́вленъ бы́лъ є҆сѝ, благопрїѧ́тными моли́твами ᲂу҆милостивлѧ́ѧ и҆́же по сꙋществꙋ̀ сꙋ́щаго человѣколю́бца."
 },
 {
  "type": "TEXT",
  "value": "Бг҃оро́диченъ: Оу҆крѣпи́сѧ зїѧ́вый, ѽ всечⷭ҇таѧ влⷣчце, а҆́дскїй льсти́вый ѕмі́й началоѕло́бный, и҆́же ꙗ҆́кѡ младе́нца поразѝ человѣ́ка. Но́ваго же, ꙗ҆́кѡ новорожде́нна младе́нца неизмѣ́римаго бг҃а сло́ва ты̀ ро́ждши, землѐ неѡра́ннаѧ, и҆зба́вила є҆сѝ ро́дъ человѣ́ческїй, всехва́льнаѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́нїи тобо́ю дв҃о чи́стаѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Благода́ть слове́съ и҆ бг҃осло́вїѧ твоегѡ̀ цр҃ковь хрⷭ҇то́вꙋ возвеселѝ, є҆́йже сохрани́тисѧ въ ми́рѣ не преста́й моли́тисѧ всегда̀."
 },
 {
  "type": "TEXT",
  "value": "До́брѣ ны́нѣ наслажда́ешисѧ жела́ннагѡ, всеблаже́нне, кра́йнѧгѡ и҆ бж҃е́ственнагѡ просвѣще́нїѧ, є҆гѡ́же ᲂу҆ча́стники моли́твами твои́ми и҆ на́съ сотворѝ."
 },
 {
  "type": "TEXT",
  "value": "Ре́вность правосла́вїѧ, воспыла́въ въ твое́й чⷭ҇тѣй дꙋшѝ, и҆спепелѝ є҆ретїкѡ́въ ѧ҆зыкобо́лїѧ, ма́рко блаже́нне."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ вы́сшаѧ ᲂу҆мѡ́въ и҆ бг҃ꙋ бли́жнѧѧ, дѣви́це чⷭ҇таѧ, ᲂу҆́мъ просвѣтѝ, и҆зъ глꙋбины̀ многови́дныхъ нꙋ́ждъ и҆з̾има́ющи мѧ̀."
 },
 {
  "type": "HEADER",
  "value": "Є҆ѯапостїла́рїй, гла́съ ѕ҃."
 },
 {
  "type": "TEXT",
  "value": "Подо́бенъ: Свѣ́те неизмѣ́нный:"
 },
 {
  "type": "TEXT",
  "value": "Манꙋ́илово: Оу҆тѣ́шителева благода́ть въ тебѣ̀ ѡ҆бита́вши, ма́рко. Бж҃е́ственнѣйшихъ догма́тѡвъ ꙗ҆ви́ тѧ рѣкꙋ̀, є҆ретїкѡ́въ потоплѧ́ющꙋю полкѝ, вѣ̑рныѧ же всѧ̑ веселѧ́щꙋю."
 },
 {
  "type": "TEXT",
  "value": "Бг҃оро́диченъ: Тѧ̀ гпⷭ҇жꙋ̀ всѣ́хъ ꙗ҆́вѣ воспѣва́ѧ, мо́лимъ, бцⷣе, бꙋ́ди на́мъ бж҃е́ственный покро́въ, ѿгонѧ́ющи дале́че ѿ на́съ мра̑чныѧ стрѣлы̀ велїа́ра."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ а҃."
 },
 {
  "type": "TEXT",
  "value": "Подо́бенъ: Небе́сныхъ чинѡ́въ:"
 },
 {
  "type": "TEXT",
  "value": "Пребж҃е́ственныѧ трⷪ҇цы бы́въ жили́ще, всемꙋ́дре ст҃и́телю, добродѣ́телей сїѧ̑нїи и҆ твои́хъ ᲂу҆че́нїй свѣ́томъ хрⷭ҇то́вꙋ цр҃ковь ѡ҆зари́лъ є҆сѝ и҆ происхожде́нїе дх҃а ст҃а́гѡ то́чїю ѿ ѻ҆ц҃а̀ проповѣ́далъ є҆сѝ."
 },
 {
  "type": "TEXT",
  "value": "Сꙋщество̀ бж҃е́ственное и҆ дѣ́йствїе то́ежде бы́ти и҆сповѣ́дающыѧ, ѻ҆́гненными твои́ми словесы̀ посрами́лъ є҆сѝ, всеблаже́нне, ꙗ҆́кѡ сꙋщество̀ разли́чно є҆́сть ѿ сво́йства, а҆́ще и҆ ѻ҆боѧ̀ несотворє́нна, и҆́стинна и҆ присносꙋ́щна сꙋ́ть."
 },
 {
  "type": "HEADER",
  "value": "Гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Ѽ пресла́внагѡ чꙋдесѐ! И҆сто́чникъ жи́зни хрⷭ҇то́съ бг҃ъ на́шъ, и҆сто́чника тѧ̀ сщ҃е́нныхъ догма́тѡвъ ꙗ҆вѝ, веселѧ́ща вѣ̑рныѧ жизното́чными словесы̀, ꙗ҆́кѡ стрꙋѧ́ми напоѧ́ющи сердца̀ благочести́выхъ, непоколеби́мѡ соблюда́ющихъ до́брое и҆сповѣ́данїе ѻ҆ц҃є́въ, всемꙋ́дре, ѡ҆ не́мже ре́вность и҆ вѣ́рꙋ показа́лъ є҆сѝ бж҃е́ственнѣйше."
 },
 {
  "type": "HEADER",
  "value": "Сла́ва, гла́съ а҃:"
 },
 {
  "type": "TEXT",
  "value": "І҆ѡа́нна є҆ѵге́нїка: Ꙗ҆́кѡ въ златоистка́ннꙋю ѻ҆де́ждꙋ и҆ многочⷭ҇тны́й вѣне́цъ и҆ несокрꙋши́маѧ брѡнѧ̀, въ свѣ́тлѣйшее житїѐ твоѐ и҆ бг҃овѣ́щанное сло́во хрⷭ҇то́ва цр҃ковь ѡ҆блекі́йсѧ, свѣ́тлѡ ра́дꙋющисѧ и҆ крѣ́пкѡ ѡ҆гражда́ющисѧ проти́вꙋ сꙋпоста̑тъ, приснохва́льне, несе́тъ побѣди́тельнаѧ врагѝ мо́щнѡ побѣди́вшемꙋ во хрⷭ҇тѣ̀, да́вшемъ вла́сть и҆ си́лꙋ, пра́веднѡ побѣ́дꙋ восписꙋ́ющи, пѣ́нїе тѝ, ꙗ҆́кѡ мздꙋ̀ за боре́нїе по си́лѣ прино́ситъ и҆ вѣ́рою и҆ любо́вїю вопїе́тъ тѝ: непреста́ннѡ молѝ, къ немꙋ́же ѿше́лъ є҆сѝ, трїѷпоста́снаго бг҃а, ѻ҆ц҃а̀ и҆ сн҃а и҆ ѿ ѻ҆ц҃а̀ и҆сходѧ́щаго дх҃а всест҃а́го, въ правосла́вномъ и҆сповѣ́данїи твое́мъ сохрани́тисѧ во вѣ́ки, и҆ ѿ лови́тельства мы́сленныхъ волкѡ́въ соблюстѝ па́ствꙋ хрⷭ҇то́вꙋ бѣ́дствꙋющꙋю."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "HEADER",
  "value": "Славосло́вїе вели́кое, и҆ прѡ́чаѧ."
 },
 {
  "type": "HEADER",
  "value": "На лїтꙋргі́и слꙋ́жба ст҃и́тельскаѧ."
 }
]