ponomar-pwa/static/data/shared/menaion-add/42.json

[
 {
  "type": "HEADER",
  "value": "Феѵрꙋа́рїа к҃д"
 },
 {
  "type": "HEADER",
  "value": "Слꙋ́жба пе́рвагѡ и҆ втора́гѡ ѡ҆брѣ́тенїѧ чⷭ҇тны́ѧ главы̀ прⷣте́чевы."
 },
 {
  "type": "HEADER",
  "value": "А҆́ще не є҆́сть по́стъ, на вели́цѣй вече́рни, по предначина́тельномъ ѱалмѣ̀, пое́мъ: Блаже́нъ мꙋ́жъ: а҃-й а҆нтїфѡ́нъ."
 },
 {
  "type": "HEADER",
  "value": "А҆́ще же є҆́сть по́стъ, стїхологисꙋ́емъ ѻ҆бы́чнꙋю каѳі́смꙋ, и҆ пое́тсѧ слꙋ́жба прⷣте́чи съ трїѡ́дїю."
 },
 {
  "type": "HEADER",
  "value": "На Гдⷭ҇и воззва́хъ: стїхи̑ры на ѕ҃, гла́съ є҃:"
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ра́дꙋйсѧ, сщ҃е́ннаѧ главо̀, и҆ свѣтоно́снаѧ, и҆ а҆́гг҃лѡмъ говѣ́йнаѧ, ꙗ҆́же мече́мъ ѿсѣ́чена дре́вле, и҆ ѻ҆́стрыми ѡ҆бличе́ньми нечистоты̀ стꙋ́дъ посѣ́кшаѧ, и҆сто́чникъ чꙋде́съ, вѣ̑рныѧ напаѧ́юща, и҆ ꙗ҆́же сп҃сово сп҃си́тельное прише́ствїе возвѣсти́вшаѧ, и҆ наи́тїе дх҃а дре́вле ᲂу҆ви́дѣвшаѧ, къ семꙋ̀ все́льшаѧсѧ, ве́тхой же и҆ но́вой хода́тайствовавшаѧ бл҃года́ти: хрⷭ҇та̀ ᲂу҆молѝ дꙋша́мъ на́шымъ дарова́ти ве́лїю млⷭ҇ть."
 },
 {
  "type": "TEXT",
  "value": "Въ сосꙋ́дѣ скꙋде́льнѣ сокрове́ннаѧ и҆ногда̀, прⷣте́чева глава̀ ꙗ҆ви́сѧ, ѿ земны́хъ нѣ́дръ и҆зда́вшаѧсѧ ꙗ҆́вственнѣ, и҆ чꙋде́съ стрꙋи̑ и҆сточа́ющаѧ: и҆́бо въ вода́хъ главꙋ̀ ѡ҆мы̀, превы́спрєннѧѧ ны́нѣ покрыва́ющагѡ вода́ми, и҆ ѡ҆дождѧ́ющагѡ чл҃вѣ́кѡмъ бж҃е́ственное ѡ҆ставле́нїе. Сїю̀ ᲂу҆̀бо ᲂу҆бл҃жи́мъ и҆́стиннѡ пресла́внꙋ, и҆ въ сеѧ̀ ѡ҆брѣ́тенїи ра́достнѡ пра́зднꙋемъ, хрⷭ҇та̀ молѧ́ще, дарова́ти дꙋша́мъ на́шымъ ве́лїю млⷭ҇ть."
 },
 {
  "type": "TEXT",
  "value": "Глава̀, ꙗ҆́же а҆́гнца бж҃їѧ проповѣ́давшаѧ пло́тїю ꙗ҆́вльшагосѧ, и҆ всѣ̑мъ покаѧ́нїѧ сп҃сє́нныѧ пꙋти̑ бж҃е́ственными за́повѣдьми и҆звѣсти́вшаѧ, ꙗ҆́же пре́жде и҆́рѡдово законопрестꙋпле́нїе ѡ҆бличи́вшаѧ, и҆ сегѡ̀ ра́ди ѿсѣ́чена ѿ тѣлесѐ, и҆ на вре́мѧ под̾е́мшаѧ сокрове́нїе, ꙗ҆́коже свѣтоѧвле́нное на́мъ возсїѧ̀ со́лнце: пока́йтесѧ, вопїю́щаѧ, и҆ ко хрⷭ҇тꙋ̀ ны́нѣ предложи́тесѧ во ᲂу҆миле́нїи дꙋше́внѣмъ, подаю́щемꙋ мі́рꙋ ве́лїю млⷭ҇ть."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Сокро́вище бж҃е́ственныхъ дарѡ́въ, бг҃охрани́маѧ глава̀ твоѧ̀, прⷣте́че, ѿ земны́хъ нѣ́дръ возсїѧ̀, ю҆́же мы̀ вѣ́рнѡ прїе́млюще, и҆ покланѧ́ющесѧ, сла́вне, ѡ҆богаща́емсѧ ѿ тебѐ, хрⷭ҇то́въ крⷭ҇ти́телю, чꙋдесы̑ пресла́вными, и҆ согрѣше́нїй проще́нїемъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Кто̀ тебѐ не ᲂу҆бл҃жи́тъ, прест҃а́ѧ дв҃о; кто́ ли не воспое́тъ твоегѡ̀ пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, то́йже ѿ тебѐ чⷭ҇тыѧ про́йде, неизрече́ннѡ вопло́щьсѧ, є҆стество́мъ бг҃ъ сы́й, и҆ є҆стество́мъ бы́въ чл҃вѣ́къ на́съ ра́ди, не во двою̀ лицꙋ̑ раздѣлѧ́емый, но во двою̀ є҆стєствꙋ̀ несли́тнѡ познава́емый. Того̀ молѝ, чⷭ҇таѧ, всебл҃же́ннаѧ, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "Вхо́дъ. Прокі́менъ днѐ. Чтє́нїѧ прⷣте́чи, г҃."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃:"
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Прїиди́те, чⷭ҇тнꙋ́ю главꙋ̀ ѿсѣ́ченнꙋю мече́мъ крⷭ҇ти́телевꙋ, вѣ́рнїи, дне́сь почти́мъ, во ѡ҆брѣ́тенїи є҆ѧ̀ срѣта́юще пѣ́сньми, чтꙋ́ще ѿ любвѐ, бл҃года́ть пролива́ющꙋю и҆сцѣле́нїй на́мъ, ю҆́же бꙋесло́вѧщїй и҆́рѡдъ дре́вле пред̾ѿсѣчѐ, неи́стовствомъ и҆рѡдїа́дѣ спле́тсѧ."
 },
 {
  "type": "TEXT",
  "value": "Сті́хъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Ꙗ҆́коже ѿ рꙋды̀ зла́то, та́кѡ ѿ землѝ прⷣте́чева глава̀ просїѧва́етъ, въ сосꙋ́дѣ скꙋде́льнѣмъ свѣтѧ́щисѧ, и҆ вѣща́ющи ꙗ҆́снѡ, и҆́рѡдово ѡ҆блича́ющи прелюбодѣ́йство и҆ ᲂу҆бі́йство, зарю́ же просвѣща́ющꙋю помышлє́нїѧ на̑ша: ю҆́же ѡ҆блобыза́юще, вѣ́рнїи, дне́сь почти́мъ пѣ́сньми, ꙗ҆́кѡ ѡ҆ на́съ бг҃ꙋ молѧ́щꙋюсѧ."
 },
 {
  "type": "TEXT",
  "value": "Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
 },
 {
  "type": "TEXT",
  "value": "Дре́вле ꙗ҆́коже бж҃е́ственное сокро́вище, въ сосꙋ́дѣ сокрове́ннаѧ глава̀ крⷭ҇ти́телева въ землѝ, дне́сь концє́мъ ѿкрыва́етсѧ: ꙗ҆́коже бога́тство пролива́ющаѧ и҆сто́чники и҆сцѣле́нїй, болѣ̑зни и҆сцѣлѧ́ющаѧ, дꙋ́шы просвѣща́ющаѧ. Тѣ́мже ᲂу҆тѣше́нїѧ всѧ́кагѡ бл҃года́ть воспрїе́млюще, пѣ́сньми сїю̀ бл҃гоговѣ́йнѡ похва́лимъ."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Ꙗ҆́коже бж҃е́ственныхъ ᲂу҆мышле́нїй всечⷭ҇тна́ѧ ра́ка, неизрече́ннагѡ сꙋщества̀, ꙗ҆́снѡ прови́дѣвшаѧ та́инство глава̀ твоѧ̀, ꙗ҆́кѡ ѿ ложе́снъ ма́тернихъ, ѿ сокро́вищъ земны́хъ дне́сь возсїѧ̀, і҆ѡа́нне всехва́льне, и҆ ѡ҆бл҃гово́ни всю̀ подсо́лнечнꙋю, ѡ҆сщ҃е́нїѧ пролива́ющаѧ мѵ́ро, и҆ мы́сленнѡ проповѣ́дающаѧ пꙋ́ть покаѧ́нїѧ, и҆ сп҃сꙋ всѣ́хъ молѧ́щаѧсѧ ѡ҆ дꙋша́хъ на́шихъ."
 },
 {
  "type": "TEXT",
  "value": "[И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Ѽ чꙋдесѐ но́вагѡ всѣ́хъ дре́внихъ чꙋде́съ! Кто́ бо позна̀ мт҃рь без̾ мꙋ́жа ро́ждшꙋю, и҆ на рꙋкꙋ̀ носѧ́щꙋю, всю̀ тва́рь содержа́щаго; бж҃їе є҆́сть и҆зволе́нїе, ро́ждшеесѧ. Є҆го́же ꙗ҆́кѡ млⷣнца пречⷭ҇таѧ, твои́ма рꙋка́ма носи́вшаѧ, и҆ мт҃рне дерзнове́нїе къ немꙋ̀ и҆мꙋ́щаѧ, не преста́й молѧ́щи ѡ҆ чтꙋ́щихъ тѧ̀, ᲂу҆ще́дрити и҆ сп҃стѝ дꙋ́шы на́шѧ."
 },
 {
  "type": "HEADER",
  "value": "Тропа́рь прⷣте́чи, гла́съ д҃:"
 },
 {
  "type": "TEXT",
  "value": "Ѿ землѝ возсїѧ́вши прⷣте́чева глава̀, лꙋчы̀ и҆спꙋща́етъ нетлѣ́нїѧ вѣ̑рнымъ и҆сцѣле́нїй: свы́ше собира́етъ мно́жество а҆́гг҃лъ, до́лѣ же созыва́етъ чл҃вѣ́ческїй ро́дъ, є҆диногла́снꙋю возсыла́ти сла́вꙋ хрⷭ҇тꙋ̀ бг҃ꙋ."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́нное, и҆ а҆́гг҃лѡмъ несвѣ́домое та́инство, тобо́ю, бцⷣе, сꙋ́щымъ на землѝ ꙗ҆ви́сѧ бг҃ъ, въ несли́тномъ соедине́нїи воплоща́емь, и҆ крⷭ҇тъ во́лею на́съ ра́ди воспрїи́мъ, и҆́мже воскр҃си́въ первозда́ннаго, сп҃сѐ ѿ сме́рти дꙋ́шы на́шѧ."
 },
 {
  "type": "HEADER",
  "value": "На ᲂу҆́трени, велича́нїе прⷣте́чи:"
 },
 {
  "type": "TEXT",
  "value": "Велича́емъ тѧ̀, крⷭ҇ти́телю сп҃совъ і҆ѡа́нне, и҆ почита́емъ всѝ чтⷭ҇ны́ѧ твоеѧ̀ главы̀ ѡ҆брѣ́тенїе."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ, ᲂу҆мно́житсѧ. Въ ни́хже посѣтѝ на́съ восто́къ съ высоты̀: Ꙗ҆ви́тисѧ во тьмѣ̀, и҆ сѣ́ни сме́ртнѣй сѣдѧ́щымъ: Напра́вити но́ги на́шѧ на пꙋ́ть ми́ренъ."
 },
 {
  "type": "HEADER",
  "value": "По полѷеле́и, сѣда́ленъ, гла́съ и҃:"
 },
 {
  "type": "TEXT",
  "value": "Подо́бенъ: Повелѣ́нное та́йнѡ:"
 },
 {
  "type": "TEXT",
  "value": "Крⷭ҇ти́телева глава̀ кры́ѧшесѧ ꙗ҆́кѡ би́серъ въ землѝ вла́жнѣй, и҆ ꙗ҆́кѡ свѣ́щникъ бг҃освѣ́телъ ᲂу҆кра́шена, ѡ҆зарѧ́етъ чꙋдотворѧ́щи мі́ръ ве́сь: ꙗ҆́кѡ ᲂу҆́тро возсїѧ̀ всебл҃голѣ́пнѡ сл҃нцꙋ прⷣте́ча, и҆ невече́рнимъ свѣ́томъ возвѣща́ѧ па́ки на́мъ: сѐ, взыва́ѧ, а҆́гнецъ бж҃їй."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ, д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Та́мѡ возращꙋ̀ ро́гъ дв҃дꙋ, ᲂу҆гото́вахъ свѣти́льникъ пома́занномꙋ моемꙋ̀."
 },
 {
  "type": "TEXT",
  "value": "Сті́хъ: Помѧнѝ, гдⷭ҇и, дв҃да и҆ всю̀ кро́тость є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, заⷱ҇ л҃а."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Мл҃твами ст҃а́гѡ прⷪ҇ро́ка, и҆ прⷣте́чи, и҆ крⷭ҇ти́телѧ сп҃сова і҆ѡа́нна, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "И҆ ны́нѣ, гла́съ то́йже:"
 },
 {
  "type": "TEXT",
  "value": "Мл҃твами бцⷣы, млⷭ҇тиве, ѡ҆чи́сти мно́жєства согрѣше́нїй на́шихъ."
 },
 {
  "type": "HEADER",
  "value": "Та́же, гла́съ ѕ҃:"
 },
 {
  "type": "TEXT",
  "value": "Поми́лꙋй мѧ̀, бж҃е:"
 },
 {
  "type": "HEADER",
  "value": "Стїхи́ра по н҃-мъ ѱалмѣ̀, гла́съ ѕ҃:"
 },
 {
  "type": "TEXT",
  "value": "Ꙗ҆́же пе́рвѣе на блю́дѣ, и҆́рѡдовꙋ беззако́ннꙋю нечистотꙋ̀ ѡ҆бличи́вшаѧ, покаѧ́нїе же всѣ̑мъ проповѣ́давшаѧ вѣ̑рнымъ, чⷭ҇тна́ѧ глава̀ крⷭ҇ти́телѧ хрⷭ҇то́ва, ѿ сокро́вищъ земны́хъ ꙗ҆́вльшаѧсѧ предлежи́тъ, вѣ́рнѡ притека́ющымъ къ не́й, и҆ прикаса́ющымсѧ со стра́хомъ, и҆ покланѧ́ющымсѧ любо́вїю дꙋше́вною, да́рꙋющаѧ разрѣше́нїе прегрѣше́нїй, проше́нїємъ подае́тъ потрє́бнаѧ, и҆ ве́лїю млⷭ҇ть."
 },
 {
  "type": "HEADER",
  "value": "Канѡ́нъ бцⷣы со і҆рмосо́мъ на ѕ҃, гла́съ и҃, и҆ канѡ́нъ прⷣте́чи, на и҃, гла́съ ѕ҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "HEADER",
  "value": "Катава́сїа, гла́съ д҃:"
 },
 {
  "type": "TEXT",
  "value": "Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
 },
 {
  "type": "TEXT",
  "value": "Катава́сїа: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Катава́сїа: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребж҃е́ственный нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче."
 },
 {
  "type": "TEXT",
  "value": "Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дш҃а̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведѝ мѧ̀."
 },
 {
  "type": "TEXT",
  "value": "Катава́сїа: Бж҃е́ственное сїѐ и҆ всечⷭ҇тно́е соверша́юще пра́зднество бг҃омꙋ́дрїи бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "HEADER",
  "value": "Конда́къ, гла́съ в҃:"
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Прⷪ҇ро́че бж҃їй, и҆ прⷣте́че бл҃года́ти, главꙋ̀ твою̀ ꙗ҆́кѡ ши́покъ сщ҃е́ннѣйшїй ѿ землѝ ѡ҆брѣ́тше, и҆сцѣлє́нїѧ всегда̀ прїе́млемъ: и҆́бо па́ки, ꙗ҆́коже пре́жде, въ мі́рѣ проповѣ́дꙋеши покаѧ́нїе."
 },
 {
  "type": "TEXT",
  "value": "І҆́косъ: Ѿ гдⷭ҇а свидѣ́тельство прїе́мъ, і҆ѡа́нне, па́че всѣ́хъ чл҃вѣ̑къ вы́шшїй бы́лъ є҆сѝ: ѿѻнꙋ́дꙋже похвалы̑ пѣ́сней принестѝ тебѣ̀ ᲂу҆жаса́юсѧ, но любо́вїю понꙋжде́нъ, пѣ́снь нача́ти дерзнꙋ́хъ. Тѣ́мже да не ᲂу҆недосто́иши споспѣ́шникъ мнѣ̀ бы́ти, всехва́льне, да возмогꙋ̀ вѣнча́ти тво́й ве́рхъ ст҃ы́й, требога́те: и҆́бо ты̀ въ мі́рѣ проповѣ́дꙋеши покаѧ́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Катава́сїа: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Катава́сїа: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть. Тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Катава́сїа: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ д҃:"
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Ѿве́рзе преддвє́рїѧ воздержа́нїѧ всечⷭ҇тна́ѧ глава̀ твоѧ̀, всехва́льне, и҆ пи́щꙋ предложѝ сладча́йшꙋю всѣ̑мъ бж҃е́ственныхъ дарова́нїй: и҆́хже причаща́ющесѧ вѣ́рнѡ, поста̀ те́рпкое ᲂу҆слажда́емъ, и҆ вѣ́рою восхвалѧ́емъ тѧ̀, и҆ вопїе́мъ хрⷭ҇тꙋ̀ бг҃ꙋ: і҆и҃се всеси́льне, сп҃се дꙋ́шъ на́шихъ."
 },
 {
  "type": "TEXT",
  "value": "Мѵ̑ра ꙗ҆́коже во́ды, глава̀ и҆ска́пающи прⷣте́чева приснотекꙋ́ща, и҆ на трапе́зѣ дне́сь возло́жшисѧ та́йнѣй и҆ бж҃е́ственнѣй, бл҃гоꙋха́етъ мы́сленнѣ, и҆ го́ресть ѿгонѧ́етъ скорбе́й, и҆ весе́лїѧ всѧ̑ и҆сполнѧ́етъ, любо́вїю зовꙋ́щыѧ, і҆и҃се всеси́льне, сп҃се дꙋ́шъ на́шихъ."
 },
 {
  "type": "TEXT",
  "value": "Посѣчѐ глава̀ твоѧ̀, ꙗ҆́коже ме́чь ѻ҆стрѣ́йшїй, главы̑ беззако́ннꙋющихъ вра̑гъ: и҆ и҆сцѣлє́нїѧ и҆сточѝ въ бл҃гозако́нїи сꙋ́щымъ всѣ̑мъ, бж҃е́ственныхъ дарова́нїй. И҆ сегѡ̀ ра́ди тѧ̀ вѣ́рнѡ восхвалѧ́емъ, дрꙋ́га и҆ прⷣте́чꙋ, і҆ѡа́нне, зижди́телева, и҆ вопїе́мъ є҆мꙋ̀ прилѣ́жнѡ: і҆и҃се всеси́льне, сп҃се дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Всечⷭ҇тнꙋ́ю главꙋ̀ крⷭ҇ти́телѧ твоегѡ̀, гдⷭ҇и, ꙗ҆́вльшꙋюсѧ дне́сь ѿ землѝ, со гла́сомъ хвале́нїѧ прїе́мшїи вѣ́рнѡ, въ мл҃твꙋ, чл҃вѣколю́бче, грѣ́шнїи рабѝ твоѝ приводѧ́ще, мо́лимсѧ, тоѧ̀ ра́ди ᲂу҆лꙋчи́ти въ де́нь сꙋда̀ ѿ тебѐ ѡ҆чище́нїе, и҆ ве́лїю млⷭ҇ть."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Бл҃голюби́вый бж҃е и҆ сп҃се, рабы̑ твоѧ̑ сп҃са́й ѿ всѧ́кагѡ ѡ҆бстоѧ́нїѧ лю́тагѡ, мл҃твами прⷣте́чи твоегѡ̀ и҆ всѣ́хъ ст҃ы́хъ, и҆ мт҃ре твоеѧ̀ мольба́ми."
 },
 {
  "type": "HEADER",
  "value": "Славосло́вїе вели́кое. И҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: прокі́менъ, гла́съ з҃:"
 },
 {
  "type": "TEXT",
  "value": "Возвесели́тсѧ првⷣникъ ѡ҆ гдⷭ҇ѣ и҆ ᲂу҆пова́етъ на него̀."
 },
 {
  "type": "TEXT",
  "value": "Сті́хъ: И҆́стина ѿ землѝ возсїѧ̀, и҆ пра́вда съ нб҃сѐ прини́че."
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, заⷱ҇ рѻ҃ѕ."
 },
 {
  "type": "TEXT",
  "value": "А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ, ᲂу҆мно́житсѧ."
 },
 {
  "type": "TEXT",
  "value": "Сті́хъ: И҆́стина ѿ землѝ возсїѧ̀, и҆ пра́вда съ нб҃сѐ прини́че."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, заⷱ҇ м҃."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ, ѿ слꙋ́ха ѕла̀ не ᲂу҆бои́тсѧ."
 },
 {
  "type": "TEXT",
  "value": "А҆ллилꙋ́їа, три́жды."
 }
]