ponomar-pwa/static/data/shared/menaion-add/51.json

[
 {
  "type": "HEADER",
  "value": "А҆́ѵгꙋста л҃а"
 },
 {
  "type": "HEADER",
  "value": "Слꙋ́жба ст҃и́телю генна́дїю, патрїа́рхꙋ царегра́дскомꙋ."
 },
 {
  "type": "HEADER",
  "value": "А҆́ще восхо́щетъ настоѧ́тель, твори́мъ бдѣ́нїе."
 },
 {
  "type": "HEADER",
  "value": "На Гдⷭ҇и воззва́хъ поста́вимъ стїхѡ́въ ѕ҃, и҆ гл҃го́летъ канѡна́рхъ:"
 },
 {
  "type": "HEADER",
  "value": "Гла́съ д҃:"
 },
 {
  "type": "TEXT",
  "value": "Гдⷭ҇и, воззва́хъ къ тебѣ̀, ᲂу҆слы́ши мѧ̀."
 },
 {
  "type": "HEADER",
  "value": "И҆ пое́тъ а҃ ли́къ:"
 },
 {
  "type": "TEXT",
  "value": "Гдⷭ҇и, воззва́хъ къ тебѣ̀, ᲂу҆слы́ши мѧ̀: вонмѝ гла́сꙋ моле́нїѧ моегѡ̀, внегда̀ воззва́ти мѝ къ тебѣ̀. Оу҆слы́ши мѧ̀ гдⷭ҇и."
 },
 {
  "type": "HEADER",
  "value": "Та́же в҃ ли́къ:"
 },
 {
  "type": "TEXT",
  "value": "Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю, воздѣѧ́нїе рꙋкꙋ̀ моє́ю, же́ртва вече́рнѧѧ. Оу҆слы́ши мѧ̀ гдⷭ҇и."
 },
 {
  "type": "HEADER",
  "value": "И҆ пое́тъ ли́къ по чи́нꙋ стїхѝ:"
 },
 {
  "type": "TEXT",
  "value": "а҃. Положѝ, гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ."
 },
 {
  "type": "TEXT",
  "value": "в҃. Не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ."
 },
 {
  "type": "TEXT",
  "value": "а҃. Съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ."
 },
 {
  "type": "TEXT",
  "value": "в҃. Нака́жетъ мѧ̀ пра́ведникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀."
 },
 {
  "type": "TEXT",
  "value": "а҃. Ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ."
 },
 {
  "type": "TEXT",
  "value": "в҃. Оу҆слы́шатсѧ гл҃го́ли моѝ, ꙗ҆́кѡ возмого́ша: ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ."
 },
 {
  "type": "TEXT",
  "value": "а҃. Ꙗ҆́кѡ къ тебѣ̀ гдⷭ҇и, гдⷭ҇и, ѻ҆́чи моѝ, на тѧ̀ ᲂу҆пова́хъ, не ѿимѝ дш҃ꙋ мою̀."
 },
 {
  "type": "TEXT",
  "value": "в҃. Сохрани́ мѧ ѿ сѣ́ти, ю҆́же соста́виша мѝ, и҆ ѿ собла́знъ дѣ́лающихъ беззако́нїе."
 },
 {
  "type": "TEXT",
  "value": "а҃. Падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀."
 },
 {
  "type": "TEXT",
  "value": "в҃. Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ."
 },
 {
  "type": "TEXT",
  "value": "а҃. Пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀."
 },
 {
  "type": "TEXT",
  "value": "в҃. Внегда̀ и҆счеза́ти ѿ менѐ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑."
 },
 {
  "type": "TEXT",
  "value": "а҃. На пꙋтѝ се́мъ, по немꙋ́же хожда́хъ, скры́ша сѣ́ть мнѣ̀."
 },
 {
  "type": "TEXT",
  "value": "в҃. Смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менѐ."
 },
 {
  "type": "TEXT",
  "value": "а҃. Поги́бе бѣ́гство ѿ менѐ, и҆ нѣ́сть взыска́ѧй дш҃ꙋ мою̀."
 },
 {
  "type": "TEXT",
  "value": "в҃. Воззва́хъ къ тебѣ̀ гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́сть моѧ̀ є҆сѝ на землѝ живы́хъ."
 },
 {
  "type": "TEXT",
  "value": "а҃. Вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менѐ."
 },
 {
  "type": "TEXT",
  "value": "в҃. И҆зведѝ и҆з̾ темни́цы дш҃ꙋ мою̀, и҆сповѣ́датисѧ и҆́мени твоемꙋ̀."
 },
 {
  "type": "TEXT",
  "value": "а҃. Менѐ ждꙋ́тъ пра́вєдницы, до́ндеже возда́си мнѣ̀."
 },
 {
  "type": "TEXT",
  "value": "в҃. И҆з̾ глꙋбины̀ воззва́хъ къ тебѣ̀, гдⷭ҇и, гдⷭ҇и ᲂу҆слы́ши гла́съ мо́й."
 },
 {
  "type": "TEXT",
  "value": "а҃. Да бꙋ́дꙋтъ ᲂу҆́ши твоѝ, вне́млющѣ гла́сꙋ моле́нїѧ моегѡ̀."
 },
 {
  "type": "HEADER",
  "value": "На ѕ҃, стїхи̑ры положе́нїѧ честна́гѡ по́ѧса прест҃ы́ѧ бцⷣы, гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "А҆́ще беззакѡ́нїѧ на́зриши гдⷭ҇и, гдⷭ҇и кто̀ постои́тъ; ꙗ҆́кѡ ᲂу҆ тебѐ ѡ҆чище́нїе є҆́сть."
 },
 {
  "type": "TEXT",
  "value": "Ра́ка, содержа́щаѧ, бцⷣе, по́ѧсъ тво́й, кївѡ́тъ ѡ҆свѧще́нїѧ рабѡ́мъ твои̑мъ, и҆ свѧще́нное ѡ҆гражде́нїе, и҆ сла́ва и҆ похвала̀, и҆ и҆сцѣле́нїй и҆сто́чникъ, всегда̀ познава́етсѧ. И҆дѣ́же дне́сь сщ҃е́ннѡ собра́вшесѧ, воспѣва́емъ мнѡ́гаѧ твоѧ̑ вели̑чїѧ, и҆ чꙋде́съ пꙋчи́нꙋ."
 },
 {
  "type": "TEXT",
  "value": "И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дш҃а̀ моѧ̀ въ сло́во твоѐ, ᲂу҆пова̀ дш҃а̀ моѧ̀ на гдⷭ҇а."
 },
 {
  "type": "TEXT",
  "value": "Сѐ мѣ́сто пресла́вно, сѐ хра́мъ присносвѣ́телъ, въ не́мже сокро́вище положи́сѧ, бг҃оѻтрокови́цы по́ѧсъ чтⷭ҇ны́й бл҃года́тїю. Пристꙋпи́те чл҃вѣ́цы, просвѣще́нїе и҆ ѡ҆чище́нїе проѧвле́ннѡ почерпи́те, и҆ возопі́йте благода́рнымъ се́рдцемъ: прест҃а́ѧ, благослови́мъ тѧ̀, дв҃о, спаса́емїи ржⷭ҇тво́мъ твои́мъ."
 },
 {
  "type": "TEXT",
  "value": "Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ, да ᲂу҆пова́етъ і҆и҃ль на гдⷭ҇а."
 },
 {
  "type": "TEXT",
  "value": "Ст҃о́е положе́нїе, бцⷣе, по́ѧса твоегѡ̀, пра́здникъ стѧжа́хомъ веселѧ́щесѧ, ꙗ҆́кѡ гра́дꙋ твоемꙋ̀ дне́сь да́ти благоизво́ли сщ҃е́нное препоѧ́санїе, храни́лище некра́домо, да́ръ че́стенъ, неѿе́млемо бога́тство, и҆сцѣле́нїй рѣкꙋ̀, и҆спо́лненꙋ дарова́нїй дх҃о́вныхъ."
 },
 {
  "type": "HEADER",
  "value": "Та́же г҃ стїхи̑ры ст҃и́телѧ, гла́съ ѕ҃:"
 },
 {
  "type": "TEXT",
  "value": "Подо́бенъ: Всю̀ ѿложи́вше:"
 },
 {
  "type": "TEXT",
  "value": "Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀."
 },
 {
  "type": "TEXT",
  "value": "Ве́сь ѡ҆сщ҃е́нъ бг҃оно́сецъ показа́сѧ, пома́занїе бж҃їе ст҃о́е, ст҃ы́мъ дх҃омъ ѡ҆бложе́нъ: и҆ свѣ́тлѡ входѧ̀ вы́нꙋ во ст҃а̑ѧ ст҃ы́хъ, бг҃онача́льными свѣтлостьмѝ ѡ҆зарѧ́емь, бл҃года́ти причаща́ѧсѧ ст҃ы́хъ та̑инъ, ꙗ҆́кѡ и҆́стинный ст҃и́тель пресла́венъ, со дерзнове́нїемъ молѧ́сѧ ѡ҆ дꙋша́хъ на́шихъ."
 },
 {
  "type": "TEXT",
  "value": "Хвали́те гдⷭ҇а всѝ ꙗ҆зы́цы, похвали́те є҆гѡ̀ всѝ лю́дїе."
 },
 {
  "type": "TEXT",
  "value": "Просвѣти́сѧ житїѐ твоѐ добродѣ́тельными свѣтлостьмѝ, вѣ̑рныѧ просвѣти́лъ є҆сѝ, и҆ ле́сти тьмꙋ̀ разгна́лъ є҆сѝ, и҆́стинное бо ꙗ҆ви́лсѧ є҆сѝ свѣтоза́рное со́лнце, ст҃и́телю пребл҃же́нне генна́дїе, и҆ ны́нѣ, всели́лсѧ є҆сѝ, и҆дѣ́же сїѧ́етъ свѣ́тъ невече́рнїй, и҆ сы́нъ днѐ бл҃года́тїю дх҃а ст҃а́гѡ бы́въ. Тѣ́мже твою̀ бж҃е́ственнꙋю па́мѧть и҆ свѣтоно́снꙋю че́стнѡ соверша́юще приснопа́мѧтне, любо́вїю почита́емъ."
 },
 {
  "type": "TEXT",
  "value": "Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ."
 },
 {
  "type": "TEXT",
  "value": "Оу҆́мъ тво́й манове́нїемъ є҆́же къ бг҃ꙋ, бг҃омꙋ́дре, вѣ́рою ᲂу҆добрѧ́емь, свѣ́телъ ꙗ҆ви́сѧ всесла́вне, въ ме́ртвеннѣмъ тѣ́лѣ и҆ тлѣ́ннѣмъ, премꙋ́дре нетлѣ́нїю поꙋчи́всѧ, притѧжа́лъ є҆сѝ безпло́тныхъ свѣ́тлѡсти, и҆ страсте́й внѣ̀ бы́въ, безстра́стїемъ ᲂу҆краша́ѧсѧ, генна́дїе, ѻ҆́тче ст҃и́телю премꙋ́дре, свѣ́тлый свѣти́льниче, и҆ моли́твенниче ѡ҆ чтꙋ́щихъ любо́вїю па́мѧть твою̀."
 },
 {
  "type": "HEADER",
  "value": "Сла́ва, самогла́сенъ, гла́съ и҃:"
 },
 {
  "type": "TEXT",
  "value": "До́блестей твои́хъ, прпⷣбне ѻ҆́тче, пло́дъ просвѣти́лъ є҆́сть вѣ́рныхъ сердца̀: кто́ бо слы́ша безмѣ́рное твоѐ смире́нїе, терпѣ́нїю не ᲂу҆диви́сѧ, є҆́же къ ни́щымъ ти́хости, къ скорбѧ́щымъ ᲂу҆тѣше́нїю; всѧ̑ бг҃олѣ́пнѡ наꙋчи́лъ є҆сѝ ст҃и́телю, генна́дїе, и҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ: моли́сѧ ѡ҆ дш҃а́хъ на́шихъ."
 },
 {
  "type": "HEADER",
  "value": "И҆ ны́нѣ, положе́нїѧ честна́гѡ по́ѧса прест҃ы́ѧ бцⷣы, гла́съ в҃:"
 },
 {
  "type": "TEXT",
  "value": "Ꙗ҆́кѡ вѣнце́мъ пресвѣ́тлымъ, пречⷭ҇таѧ бцⷣе, по́ѧсомъ твои́мъ ст҃ы́мъ, цр҃ковь бж҃їѧ ѡ҆бложи́сѧ, и҆ свѣ́титсѧ ра́дꙋющесѧ дне́сь, и҆ та́йнѡ ликовствꙋ́етъ, влⷣчце, вопїю́щи тебѣ̀: ра́дꙋйсѧ, дїади́мо честна́ѧ и҆ вѣ́нче бжⷭ҇твенныѧ сла́вы: ра́дꙋйсѧ, є҆ди́на сла́вы и҆сполне́нїе и҆ вѣ́чное весе́лїе: ра́дꙋйсѧ, къ тебѣ̀ притека́ющымъ приста́нище и҆ предста́тельнице и҆ спасе́нїе на́ше."
 },
 {
  "type": "HEADER",
  "value": "А҆́ще ли не пра́зднꙋеши, гл҃го́ли на сла́ва, и҆ ны́нѣ, бг҃оро́диченъ се́й, гла́съ ѕ҃:"
 },
 {
  "type": "TEXT",
  "value": "Ра́дꙋйсѧ, зако́на и҆сполне́нїе. Ра́дꙋйсѧ, хра́ме ст҃ы́ѧ трⷪ҇цы, невѣ́сто нетлѣ́ннаѧ. Ра́дꙋйсѧ, бж҃е́ственное носи́ло всѣ́хъ цр҃ѧ̀. Ра́дꙋйсѧ, ѻ҆гню̀ невеще́ственный, ꙗ҆́кѡ клеща̀ носѧ́щи на рꙋка́хъ твои́хъ ᲂу҆́глѧ: но́вый раю̀: вертогра́дъ затворе́нный: трапе́за бжⷭ҇твеннаѧ пресвѣ́тлаѧ: голꙋби́це нескве́рнаѧ: прⷭ҇то́ле вы́шнѧгѡ: ѻ҆́дръ бжⷭ҇твенный мы́сленный, ю҆́же дх҃ъ ст҃ы́й ѻ҆трокови́це ѡ҆сѣнѝ."
 },
 {
  "type": "HEADER",
  "value": "Вхо́дъ. Прокі́менъ днѐ. Чтє́нїѧ ст҃и́тєльскїѧ г҃."
 },
 {
  "type": "HEADER",
  "value": "На стїхо́внѣ стїхи̑ры ст҃и́телѧ, гла́съ и҃:"
 },
 {
  "type": "TEXT",
  "value": "Ст҃и́телю, генна́дїе, разꙋ́мнагѡ свѣ́та зарѐ, цр҃ко́вное свѣти́ло, ст҃и́тельскаѧ красото̀, и҆́ноческагѡ по́стнагѡ житїѧ̀ и҆́стовое пра́вило: на́мъ же застꙋ́пникъ ꙗ҆ви́лсѧ є҆сѝ, свобожда́ѧ ѿ гꙋби́телѧ врага̀ дꙋ́шы на́шѧ."
 },
 {
  "type": "TEXT",
  "value": "Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Ст҃и́телю, генна́дїе, вели́кꙋю вла́сть ѿ бг҃а прїѧ́лъ є҆сѝ, мно́жество лꙋка́выхъ бѣсѡ́въ мл҃твою твое́ю ѿгна́лъ є҆сѝ, и҆ си́хъ ѡ҆ѕлоблє́нїѧ ѿ всѣ́хъ вѣ́рою къ тебѣ̀ притека́ющихъ."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми."
 },
 {
  "type": "TEXT",
  "value": "Ст҃и́телѧ вели́каго, генна́дїѧ, ка́кѡ досто́йнѡ воспое́мъ, чⷭ҇тна́го ᲂу҆ма̀, бг҃оза́рнаго свѣ́та, ѡ҆свѣща́ющаго на́съ, и҆ бж҃е́ственный ра́зꙋмъ подаю́щаго, та̑инъ глꙋби́нныхъ и҆сповѣ́дателѧ; согла́снѡ всѝ рце́мъ: ра́дꙋйсѧ ѻ҆́тче ѻ҆тцє́въ, генна́дїе."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Ты̀ є҆сѝ па́стырь до́брый и҆ ᲂу҆чи́тель те́плый, ст҃и́телю, генна́дїе, тѧ̀ всегда̀ похвалѧ́юще вопїе́мъ: тобо́ю бг҃ъ ᲂу҆красѝ цр҃ковь свою̀, и҆ тѣ́ло твоѐ многолѣ́тнѡ покрове́нное въ землѝ, нетлѣ́нно ꙗ҆вѝ лю́демъ свои̑мъ. Тѣ́мже не преста́й молѧ́сѧ ѡ҆ хва́лѧщихъ тѧ̀, и҆ чтꙋ́щихъ па́мѧть твою̀, просѝ ѡ҆ставле́нїе грѣхѡ́въ, и҆ сп҃се́нїѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, положе́нїѧ честна́гѡ по́ѧса прест҃ы́ѧ бцⷣы, гла́съ д҃:"
 },
 {
  "type": "TEXT",
  "value": "Препоѧ́ши си́лою на́съ, дв҃о, по́ѧса твоегѡ̀, на врагѝ ᲂу҆крѣплѧ́ющи, стра́сти покарѧ́ющи при́снѡ мꙋ́чащыѧ и҆ борю́щыѧ, и҆ побѣди́тельное на́мъ безстра́стїе при́снѡ подаю́щи, чи́стѡ сла́вити тѧ̀, и҆ сн҃ꙋ твоемꙋ̀ вопи́ти прилѣ́жнѡ: і҆и҃се всеси́льне, сп҃сѝ всѣ́хъ, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Ны́нѣ ѿпꙋща́еши: Трист҃о́е. По Ѻ҆́ч҃е на́шъ:"
 },
 {
  "type": "HEADER",
  "value": "Тропа́рь ст҃и́телѧ, гла́съ д҃:"
 },
 {
  "type": "TEXT",
  "value": "Пра́вило вѣ́ры, и҆ ѡ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ. Ѻ҆́тче сщ҃еннонача́льниче, генна́дїе, молѝ хрⷭ҇та̀ бг҃а сп҃сти́сѧ дш҃а́мъ на́шымъ."
 },
 {
  "type": "HEADER",
  "value": "Тропа́рь положе́нїѧ честна́гѡ по́ѧса прест҃ы́ѧ бцⷣы, гла́съ и҃:"
 },
 {
  "type": "TEXT",
  "value": "Бцⷣе приснодв҃о, чл҃вѣ́кѡвъ покро́ве, ри́зꙋ и҆ по́ѧсъ пречтⷭ҇агѡ твоегѡ̀ тѣлесѐ, держа́вное гра́дꙋ твоемꙋ̀ ѡ҆бложе́нїе дарова́ла є҆сѝ, безсѣ́меннымъ ржⷭ҇тво́мъ твои́мъ, нетлѣ́нна пребыва́ющи: ѡ҆ тебѣ́ бо и҆ є҆стество̀ ѡ҆бновлѧ́етсѧ и҆ вре́мѧ. Тѣ́мже мо́лимъ тѧ̀, ми́ръ гра́дꙋ твоемꙋ̀ дарова́ти, и҆ дш҃а́мъ на́шымъ ве́лїю ми́лость."
 },
 {
  "type": "HEADER",
  "value": "На Бг҃ъ гдⷭ҇ь тропа́рь положе́нїѧ честна́гѡ по́ѧса прест҃ы́ѧ бцⷣы два́жды, Сла́ва: тропа́рь ст҃и́телѧ, И҆ ны́нѣ: бцⷣы."
 },
 {
  "type": "HEADER",
  "value": "Полѷеле́й ст҃и́телѧ."
 },
 {
  "type": "TEXT",
  "value": "Велича́нїе: Велича́емъ тѧ̀, ст҃и́телю ѻ҆́тче, генна́дїе, и҆ чти́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. Бл҃говѣсти́хъ пра́вдꙋ в̾ цр҃кви вели́цѣй. Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. Бл҃же́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Оу҆ста̀ моѧ̀ возгл҃го́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
 },
 {
  "type": "TEXT",
  "value": "Сті́хъ: Оу҆ста̀ првⷣнагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возгл҃го́летъ сꙋ́дъ."
 },
 {
  "type": "HEADER",
  "value": "Є҆ѵⷢ҇лїе ст҃и́тельское."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "Наслѣ́дниче бж҃їй, соприча́стниче хрⷭ҇то́въ, слꙋжи́телю гдⷭ҇нь, ст҃е, генна́дїе, по и҆́мени твоемꙋ̀ та́кѡ и҆ житїѐ твоѐ: просїѧ́ бо сѣди́нѣ ра́зꙋмъ, свидѣ́тельствоваше свѣ́тлость лица̀ твоегѡ̀ дꙋше́вное неѕло́бїе, и҆звѣ́ствоваше кро́тость, сло́ва молчали́вое. Жи́знь твоѧ̀ сла́вна, и҆ ᲂу҆спе́нїе со ст҃ы́ми: молѝ ѡ҆ дш҃а́хъ на́шихъ."
 },
 {
  "type": "HEADER",
  "value": "Канѡ́нъ положе́нїѧ честна́гѡ по́ѧса прест҃ы́ѧ бцⷣы на ѕ҃, и҆ ст҃и́телѧ на и҃. А҆́ще же восхо́щетъ настоѧ́тель ѻ҆бы́чай держа́ти, ꙗ҆́же въ соборѣ̀ чю́днагѡ бг҃оѧвле́нїѧ въ кита́й-гра́де на москвѣ̀ ѡ҆брѣта́емъ, гл҃го́ли і҆рмо́съ канѡ́на бцⷣы и҆ тропарѝ на в҃, и҆ тропарѝ ст҃и́телѧ на в҃, а҆ послѣдѝ катава́сїѧ пра́здничнаѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща."
 },
 {
  "type": "HEADER",
  "value": "Катава́сїѧ, гла́съ и҃:"
 },
 {
  "type": "TEXT",
  "value": "Крⷭ҇тъ начерта́въ мѡѷсе́й въ прѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ, то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе: тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
 },
 {
  "type": "TEXT",
  "value": "Катава́сїѧ: Же́злъ во ѡ҆́бразъ та́йны прїе́млетсѧ, прозѧбе́нїемъ бо предразсꙋжда́етъ сщ҃е́нника: неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе."
 },
 {
  "type": "HEADER",
  "value": "Конда́къ ст҃и́телѧ, гла́съ в҃:"
 },
 {
  "type": "TEXT",
  "value": "Подо́бенъ: Вы́шнихъ:"
 },
 {
  "type": "TEXT",
  "value": "Бж҃е́ственный гро́мъ, трꙋба̀ дх҃о́внаѧ, вѣ́ры насади́телю, и҆ ѿсѣка́телю є҆ресе́й, трⷪ҇цы ᲂу҆го́дниче, вели́кїй ст҃и́телю, генна́дїе, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ."
 },
 {
  "type": "TEXT",
  "value": "І҆́косъ: Лѣ́ностїю ѻ҆каѧ́нный а҆́зъ ѿпадо́хъ, и҆ въ сме́рть ᲂу҆снꙋ́хъ: но ꙗ҆́кѡ па́стырь до́бръ воздви́гни мѧ̀ ѻ҆́тче, и҆ стра̑сти моѧ̑ ᲂу҆спѝ, ѕлѣ̀ мꙋ́чащыѧ мѧ̀: ꙗ҆́кѡ да воста́въ чи́стѣ воспою̀ твоѐ свѣтоно́сное торжество̀, є҆́же влⷣка вселе́нныѧ просла́ви досто́йнѡ, ꙗ҆́кѡ раба̀ вѣ́рнѣйша, и҆ ꙗ҆́кѡ строи́телѧ свои́хъ преда́нїй, ꙗ҆̀же до́брѣ сохрани́лъ є҆сѝ, пома́занїе нескве́рное, генна́дїе, премꙋ́дре, При́снѡ молѝ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла: ты̀ мо́й бг҃ъ, ты̀ моѐ ра́дованїе: не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ̀ тѝ: си́лѣ твое́й сла́ва, чл҃вѣколю́бче."
 },
 {
  "type": "TEXT",
  "value": "Катава́сїѧ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Катава́сїѧ: Ѽ требл҃же́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь, и҆́мже падѐ дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю! И҆ сп҃сѝ."
 },
 {
  "type": "TEXT",
  "value": "Катава́сїѧ: Во́днагѡ ѕвѣ́рѧ во ᲂу҆тро́бѣ, дла́ни і҆ѡ́на крⷭ҇тови́днѡ распросте́ръ, сп҃си́тельнꙋю стрⷭ҇ть проѡбража́ше ꙗ҆́вѣ. Тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ."
 },
 {
  "type": "HEADER",
  "value": "Конда́къ бцⷣы, гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь:"
 },
 {
  "type": "TEXT",
  "value": "Чⷭ҇тна́го по́ѧса твоегѡ̀ положе́нїе, пра́зднꙋетъ дне́сь тво́й, препѣ́таѧ, хра́мъ, и҆ приле́жнѡ взыва́етъ тѝ: ра́дꙋйсѧ дв҃о, хрⷭ҇тїа́нъ похвало̀."
 },
 {
  "type": "TEXT",
  "value": "І҆́косъ: Твои́мъ мѧ̀ просвѣтѝ свѣ́томъ, дв҃о бцⷣе, и҆ разрꙋшѝ мою̀ тьмꙋ̀ во ᲂу҆мѣ̀ лежа́щꙋю лю́тѣ, ꙗ҆́кѡ да воспою̀ тво́й, всенескве́рнаѧ и҆ непоро́чнаѧ, бж҃е́ственный по́ѧсъ, свѣтлѣ́йшїй со́лнца, є҆го́же мі́ръ се́й и҆́мать ꙗ҆́кѡ тве́рдъ покро́въ и҆ наде́ждꙋ, побѣжда́ющъ совѣ́ты врагѡ́въ беззако́нныхъ, и҆ си́хъ кова̑рства разорѧ́ющъ, и҆ всегда̀ сохранѧ́ющъ твоѧ̑ рабы̑: Ра́дꙋйсѧ дв҃о, хрⷭ҇тїа́нъ похвало̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сего̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Катава́сїѧ: Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзкое: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Катава́сїѧ: Бл҃гослови́те ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ чл҃вѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ."
 },
 {
  "type": "TEXT",
  "value": "Катава́сїѧ: Та́инъ є҆сѝ бцⷣе ра́й, невоздѣ́ланнѡ возра́стившїй хрⷭ҇та̀, и҆́мже крⷭ҇тное живоно́сное на землѝ насади́сѧ дре́во: тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ."
 },
 {
  "type": "HEADER",
  "value": "На хвали́техъ поста́вимъ стїха̑ в҃, и҆ гл҃го́летъ канѡна́рхъ:"
 },
 {
  "type": "HEADER",
  "value": "Гла́съ и҃:"
 },
 {
  "type": "TEXT",
  "value": "Всѧ́кое дыха́нїе да хва́литъ гдⷭ҇а."
 },
 {
  "type": "HEADER",
  "value": "И҆ пое́тъ а҃ ли́къ:"
 },
 {
  "type": "TEXT",
  "value": "Всѧ́кое дыха́нїе да хва́литъ гдⷭ҇а. Хвали́те гдⷭ҇а съ нб҃съ, хвали́те є҆го̀ въ вы́шнихъ. Тебѣ̀ подоба́етъ пѣ́снь бг҃ꙋ."
 },
 {
  "type": "HEADER",
  "value": "Та́же в҃ ли́къ:"
 },
 {
  "type": "TEXT",
  "value": "Хвали́те є҆го̀ всѝ а҆́гг҃ли є҆гѡ̀, хвали́те є҆го̀ всѧ̑ си̑лы є҆гѡ̀. Тебѣ̀ подоба́етъ пѣ́снь бг҃ꙋ."
 },
 {
  "type": "HEADER",
  "value": "Та́же в҃ стїхи̑ры ст҃и́телѧ, гла́съ и҃, подо́бенъ:"
 },
 {
  "type": "TEXT",
  "value": "Ѽ пресла́внагѡ чꙋдесѐ:"
 },
 {
  "type": "TEXT",
  "value": "Хвали́те є҆го̀ въ тѷмпа́нѣ и҆ ли́цѣ, хвали́те є҆го̀ во стрꙋ́нахъ и҆ ѻ҆рга́нѣ."
 },
 {
  "type": "TEXT",
  "value": "Ѻ҆́тче чꙋ́дный, генна́дїе, свѣтовидѣ́нїемъ ᲂу҆ма̀ чи́стѡ ѡ҆блиста́емь, страсте́й ᲂу҆спи́лъ є҆сѝ многово́лненное мо́ре. И҆ безстра́стїемъ лета́ѧ, чи́стыми кри́лы, дости́глъ є҆сѝ, и҆дѣ́же добро́та неизрече́нна и҆ недомы́сленна, ѡ҆ на́съ всегда̀ молѧ̀ хва́лѧщихъ тѧ̀."
 },
 {
  "type": "TEXT",
  "value": "Хвали́те є҆го̀ въ кѷмва́лѣхъ доброгла́сныхъ, хвали́те є҆го̀ въ кѷмва́лѣхъ восклица́нїѧ. Всѧ́кое дыха́нїе да хва́литъ гдⷭ҇а."
 },
 {
  "type": "TEXT",
  "value": "Ѻ҆́тче ѻ҆тцє́въ, генна́дїе, сщ҃е́нства пра́вило, цѣломꙋ́дрїѧ ѡ҆́бразъ, мона́шествꙋющихъ крѣ́пость, цр҃кве ᲂу҆твержде́нїе, любвѐ свѣти́льникъ, прⷭ҇то́лъ чꙋ́вства, и҆сто́чникъ чꙋде́съ, и҆ ѧ҆зы́къ ѻ҆гнедохно́венный: ᲂу҆ста̀ сладкоглагѡ́лива, сосꙋ́дъ бж҃е́ственнагѡ дх҃а, и҆ разꙋ́мный бы́лъ є҆сѝ ра́й бг҃облаже́нне."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Прпⷣбне и҆ треблаже́нне, ст҃ѣ́йшїй ѻ҆́тче, па́стырю до́брый, началопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ за ѻ҆́вцы, ты̀ и҆ ны́нѣ, всехва́льне, генна́дїе, ст҃и́телю, просѝ мл҃твами твои́ми, дарова́ти на́мъ ве́лїю млⷭ҇ть."
 },
 {
  "type": "HEADER",
  "value": "И҆ ны́нѣ, положе́нїѧ честна́гѡ по́ѧса прест҃ы́ѧ бцⷣы, гла́съ д҃:"
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Ты̀, пречтⷭ҇аѧ влⷣчце, держа́вное ѡ҆гражде́нїе, незы́блемо же ᲂу҆твержде́нїе и҆ сп҃се́нїе, твои̑мъ лю́демъ и҆ гра́дꙋ твоемꙋ̀ сꙋ́щи, дала̀ є҆сѝ ꙗ҆́кѡ свѣ́тло ѡ҆дѣѧ́нїе, пречⷭ҇тны́й по́ѧсъ тво́й, сп҃са́ющь ѿ всѧ́кихъ ѕлоключе́нїй, вѣ́рою и҆ те́плымъ ᲂу҆се́рдїемъ сего̀ чтꙋ́щихъ бг҃оневѣ́сто."
 },
 {
  "type": "HEADER",
  "value": "Та́же славосло́вїе вели́кое. По трист҃о́мъ тропа́рь ст҃и́телѧ є҆ди́ножды. Сла́ва и҆ ны́нѣ: тропа́рь бцⷣы. Є҆ктєнїѝ и҆ ѿпꙋ́стъ."
 },
 {
  "type": "HEADER",
  "value": "На часѣ́хъ: тропа́рь бцⷣы, Сла́ва: тропа́рь ст҃и́телѧ, И҆ ны́нѣ: бг҃оро́диченъ часа̀. Кондакѝ гл҃го́лемъ бцⷣы и҆ ст҃и́телѧ премѣнѧ́юще."
 },
 {
  "type": "HEADER",
  "value": "На лїтꙋргі́и: бл҃жє́нна, ѿ канѡ́нѡвъ бцⷣы, пѣ́снь г҃-ѧ на в҃, и҆ ст҃и́телѧ, пѣ́снь ѕ҃-ѧ на в҃."
 },
 {
  "type": "HEADER",
  "value": "Прокі́менъ, гла́съ г҃, пѣ́снь бцⷣы:"
 },
 {
  "type": "TEXT",
  "value": "Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ."
 },
 {
  "type": "TEXT",
  "value": "Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆бл҃жа́тъ мѧ̀ всѝ ро́ди."
 },
 {
  "type": "HEADER",
  "value": "Прокі́менъ ст҃и́телѧ, гла́съ а҃:"
 },
 {
  "type": "TEXT",
  "value": "Оу҆ста̀ моѧ̀ возгл҃го́лютъ премꙋ́дрость, и҆ поꙋче́нїе срⷣца моегѡ̀ ра́зꙋмъ."
 },
 {
  "type": "HEADER",
  "value": "А҆по́столъ бцⷣы ко є҆вре́ємъ, заⷱ҇ т҃в, та́же ст҃и́телѧ, заⷱ҇ ти҃і."
 },
 {
  "type": "TEXT",
  "value": "А҆ллилꙋ́їа, гла́съ и҃: Слы́ши дщѝ и҆ ви́ждь, и҆ приклонѝ ᲂу҆́хо твоѐ."
 },
 {
  "type": "TEXT",
  "value": "Сті́хъ: Зако́нъ бг҃а є҆гѡ̀ въ се́рдцѣ є҆гѡ̀, и҆ не за́пнꙋтсѧ стѡпы̀ є҆гѡ̀."
 },
 {
  "type": "HEADER",
  "value": "Прича́стенъ бцⷣы:"
 },
 {
  "type": "TEXT",
  "value": "Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀."
 },
 {
  "type": "HEADER",
  "value": "Прича́стенъ ст҃и́телѧ:"
 },
 {
  "type": "TEXT",
  "value": "Въ па́мѧть вѣ́чнꙋю бꙋ́детъ пра́ведникъ, ѿ слꙋ́ха ѕла̀ не ᲂу҆бои́тсѧ."
 },
 {
  "type": "TEXT",
  "value": "А҆ллилꙋ́їа, три́жды."
 }
]