ponomar-pwa/static/data/shared/menaion-add/10.json

[
 {
  "type": "HEADER",
  "value": "Ное́мврїа к҃в"
 },
 {
  "type": "HEADER",
  "value": "Прпⷣбныхъ и҆ бг҃оно́сныхъ ѻ҆ц҃ъ на́шихъ сѷмеѡ́на и҆ са́ввы, кти́торѡвъ сщ҃е́нныѧ ѻ҆би́тели хиланда́рскїѧ на свѧтѣ́й горѣ̀ а҆ѳѡ́нстѣй."
 },
 {
  "type": "HEADER",
  "value": "Соверша́етсѧ въ то́йже ѻ҆би́тели наꙋ́трїе вхо́да во хра́мъ прест҃ы́ѧ влады́чицы на́шеѧ бцⷣы и҆ приснодв҃ы марі́и, вкꙋ́пѣ со слꙋ́жбою хра́ма."
 },
 {
  "type": "HEADER",
  "value": "На вели́цѣй вече́рни: Бл҃же́нъ мꙋ́жъ. На Гдⷭ҇и воззва́хъ, стїхи̑ры на и҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Добродѣ́телей бж҃е́ственною колесни́цею восходѧ̀, са́вво сла́вне, къ бг҃ꙋ, є҆го́же возлюби́лъ є҆сѝ, восте́клъ є҆сѝ все́ю дш҃е́ю и҆ се́рдцемъ твои́мъ, и҆ є҆гѡ̀ ѡ҆зарє́нїи ѡ҆сїѧ́емь, всегда̀, ѻ҆́гненный сто́лпъ показа́лсѧ є҆сѝ. Є҆го́же молѝ ѿ тлѝ и҆ бѣ́дъ и҆зба́вити сѧ вѣ́рою соверша́ющымъ всечⷭ҇тнꙋ́ю па́мѧть твою̀."
 },
 {
  "type": "TEXT",
  "value": "Просїѧ́въ ꙗ҆́кѡ со́лнце, лꙋча́ми слове́съ твои́хъ ѡ҆свѣти́лъ є҆сѝ всѧ̑ концы̀ землѝ, и҆ се́рбїю ѡ҆зари́лъ є҆сѝ лꙋча́ми благода́ти, догма́тствꙋѧ благочⷭ҇тнѡ и҆ ᲂу҆чѧ̀, приснохва́льне, є҆ди́наго гдⷭ҇а во двою̀ є҆стествꙋ̑ сего̀ почита́ти, ꙗ҆́кѡ влады́кꙋ всѧ́ческихъ со ѻ҆ц҃е́мъ и҆ дх҃омъ."
 },
 {
  "type": "TEXT",
  "value": "Просвѣще́нъ бжⷭ҇твеннымъ дх҃омъ, сѷмеѡ́не всебл҃же́нне, сынѡ́внимъ стопа́мъ послѣ́довалъ є҆сѝ, и҆ на свѧтѣ́й горѣ̀ бы́ли є҆стѐ, чꙋ́днїи, бж҃їй до́мъ и҆ бл҃гопрїѧ́тенъ въ не́й воздви́гше, въ не́мже нн҃ѣ пою́тъ мона́шествꙋющихъ мно́жєства, хва́лѧщїи нн҃ѣ ва́съ, ѻ҆тцы̀ бжⷭ҇твеннїи, и҆ хрⷭ҇та̀ велича́ющи."
 },
 {
  "type": "TEXT",
  "value": "Всѧ́кꙋю добродѣ́тель ᲂу҆се́рднѡ воздѣ́лавъ, бг҃одꙋхнове́нне, и҆ пома́завсѧ дх҃омъ пома́занїемъ ст҃ы́мъ, сщ҃е́нникъ свѧще́ннѣйшїй ꙗ҆́вѣ показа́лсѧ є҆сѝ и҆ па́стырь и҆́стиненъ и҆ вѣ́ры побо́рникъ. Сегѡ̀ ра́ди всѧ̀ це́рковь пра́зднꙋетъ па́мѧть твою̀, свѧще́ннѡ соверша́ющи и҆ сп҃са сла́вѧщи."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Є҆́же по ѡ҆́бразꙋ соблю́дше невреди́мѡ, ᲂу҆́мъ влады́кꙋ на стра̑сти па̑гꙋбныѧ по́стнически поста́вльше, на є҆́же по подо́бїю ꙗ҆́кѡ мо́щнѡ возшлѝ є҆стѐ: мꙋ́жески бо є҆стество̀ понꙋ́дивше, потща́стесѧ хꙋ́ждшее покори́ти лꙋ́чшемꙋ, и҆ пло́ть поработи́ти дꙋ́хꙋ. Тѣ́мже мона́шествꙋющымъ ꙗ҆ви́стесѧ ве́рхъ, жи́телїе пꙋсты́ннїи, бл҃готекꙋ́щихъ ѡ҆бꙋчи́телїе, пра̑вила добродѣ́тели и҆звѣ̑стнѣйшаѧ, и҆ нн҃ѣ на нбⷭ҇ѣ́хъ, зерца́лѡмъ разрѣши́вшымсѧ, ѻ҆тцы̀ на́ши бг҃омꙋ́дрїи, чи́стѣ зри́те ст҃ꙋ́ю трⷪ҇цꙋ, молѧ́щесѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ ва́съ."
 },
 {
  "type": "HEADER",
  "value": "И҆ нн҃ѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Кто̀ тебѐ не ᲂу҆блажи́тъ, прест҃а́ѧ дв҃о, кто́ ли не воспое́тъ твоегѡ̀ пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный: то́йже ѿ тебѐ чи́стыѧ про́йде, неизрече́ннѡ вопло́щсѧ: є҆стество́мъ бг҃ъ сы́й, и҆ є҆стество́мъ бы́въ чл҃вѣ́къ на́съ ра́ди, не бо двою̀ є҆стествꙋ̑ несли́тнѡ познава́емый, того̀ молѝ, чи́стаѧ всебл҃же́ннаѧ поми́ловатисѧ дꙋша́мъ на́шымъ."
 },
 {
  "type": "HEADER",
  "value": "Вхо́дъ. Прокі́менъ днѐ, и҆ чтє́нїѧ."
 },
 {
  "type": "HEADER",
  "value": "На лїті́и стїхи̑ры самогла́сны, гла́съ а҃:"
 },
 {
  "type": "TEXT",
  "value": "Да ра́дꙋетсѧ дне́сь не́бо свы́ше, и҆ ѻ҆́блацы весе́лїе да кропѧ́тъ, ѡ҆ ѕѣлѡ̀ пресла́вныхъ вели́чїихъ бг҃а на́шегѡ: се́ бо две́рь на восто́ки зрѧ́щаѧ, ро́ждшисѧ ѿ непло́дове безпло́дныѧ по ѡ҆бѣтова́нїю и҆ бг҃ꙋ ѡ҆сщ҃е́на бы́вши въ жили́ще, дне́сь въ хра́мъ, ꙗ҆́кѡ непоро́чное приноше́нїе приво́дитсѧ, да ра́дꙋетсѧ дв҃дъ брѧца́ѧ въ гꙋ́сли: приведꙋ́тсѧ, речѐ, цр҃ю̀ дѣ̑вы въ слѣ́дъ є҆ѧ̀, бли̑жнѧѧ є҆ѧ̀ приведꙋ́тсѧ внꙋ́трь ски́нїи бж҃їѧ, внꙋ́трь ѡ҆чисти́лища є҆гѡ̀, воспита́тисѧ въ жили́ще, пре́жде вѣ̑къ ѿ ѻ҆ц҃а̀ нетлѣ́ннѡ ро́ждшагѡсѧ, во сп҃се́нїе дꙋ́шъ на́шихъ."
 },
 {
  "type": "TEXT",
  "value": "Гла́съ д҃: Прпⷣбнїи ѻ҆тцы̀, добродѣ́тєли ᲂу҆се́рднѡ воздѣ́лавше, ѡ҆рга́ны свѧта́гѡ дꙋ́ха ꙗ҆ви́стесѧ, и҆ ѿ негѡ̀ прїи́мше чꙋде́съ дѣ́йство, наꙋчи́сте чл҃вѣ́ки презира́ти наслажде́нїѧ помышле́нїѧ, ѻ҆тцы̀ требл҃же́ннїи."
 },
 {
  "type": "TEXT",
  "value": "Въ премі̑рныѧ ски̑нїи дꙋ́хъ тво́й, ст҃и́телю са́вво ѻ҆́тче мꙋ́дре, хрⷭ҇то́съ бг҃ъ досто́йнѡ прїѧ̀: ты́ бо трⷪ҇цы проповѣ́дникъ показа́лсѧ є҆сѝ, є҆ди́ное бж҃ество̀ сїю̀ воспѣ́въ ꙗ҆́вѣ, дѣ́йственное хотѣ́нїе по є҆стествꙋ̀ є҆ди́номꙋ всемо́щномꙋ, подобѧ́сѧ а҆пⷭ҇лѡвъ и҆ ѻ҆ц҃є́въ ᲂу҆че́нїю въ мі́рѣ, тѣ́мже чꙋде́съ дѣ́йство хрⷭ҇то́съ нн҃ѣ тебѣ̀ да́рꙋетъ, ᲂу҆твержда́ѧ твоѐ дне́сь преставле́нїе, правосла́внѡ сла́вимъ просла́вльшагѡ тѧ̀ гдⷭ҇а."
 },
 {
  "type": "TEXT",
  "value": "Гла́съ ѕ҃: Пра́здникъ ра́достенъ въ концѣ́хъ дне́сь, свѧта́ѧ па́мѧть бг҃оно́сныхъ ѻ҆ц҃є́въ, сѷмеѡ́на и҆ са́ввы: сегѡ̀ ра́ди се́рбїа сора́дꙋетсѧ, пра́зднꙋѧ въ пѣ́снехъ и҆ въ пѣ́нїѧхъ. Пра́зднꙋимъ же и҆ мы̀, бра́тїе, ра́достнѡ всечⷭ҇тнꙋ́ю и҆́хъ па́мѧть соверша́юще во хвале́бныхъ пѣ́нїѧхъ, и҆ къ ни̑мъ возопїи́мъ: ра́дꙋйсѧ, сѷмеѡ́не сла́вне и҆ таи́нниче всѣ́хъ влады́ки хрⷭ҇та̀ бг҃а на́шегѡ, ра́дꙋйсѧ, са́вво бг҃одꙋхнове́нне, проповѣ́дниче вѣ́ры и҆ ᲂу҆чи́телю вселе́нныѧ. Ꙗ҆́кѡ и҆мꙋ́ще дерзнове́нїе, чето̀ свѣтоза́рнаѧ, хрⷭ҇та̀ бг҃а на́шегѡ, моли́те поми́ловати дꙋ́шы на́шѧ."
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "Преподо́бнїи ѻ҆тцы̀, гла́съ є҆ѵⷢ҇лїа гдⷭ҇нѧ ᲂу҆слы́шавше, мі́ръ ѡ҆ста́вили є҆стѐ, бога́тство и҆ сла́вꙋ въ ничто́же вмѣни́вше, тѣ́мже всѣ̑мъ вопїѧ́ли є҆стѐ: возлюби́те бг҃а, и҆ ѡ҆брѧ́щете благода́ть вѣ́чнꙋю: ничто́же предпочти́те па́че любвѐ є҆гѡ̀, да є҆гда̀ прїи́детъ въ сла́вѣ свое́й, ѡ҆брѧ́щете поко́й со всѣ́ми свѧты́ми. И҆́хже мл҃твами, хрⷭ҇тѐ, сохранѝ и҆ спасѝ дꙋ́шы на́шѧ."
 },
 {
  "type": "HEADER",
  "value": "И҆ нн҃ѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Блажи́мъ тѧ̀, бцⷣе дв҃о, и҆ сла́вимъ тѧ̀, вѣ́рнїи, по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ є҃:"
 },
 {
  "type": "TEXT",
  "value": "Ра́дꙋйсѧ, пꙋтеводи́телю слѣпы́хъ, наста́вниче ю҆́ношества, сла́вне, ста́рыхъ же́зле, блꙋжда́ющихъ па́стырю, грѣ́шникѡвъ и҆справле́нїе, лꙋ́же бл҃гоꙋха́ннѣйшїй, мѷрополо́жниче дꙋ́ха, златострꙋ́йнаѧ рѣко̀, неѡбꙋрева́емое приста́нище, ст҃ы́ѧ трⷪ҇цы хра́ме, па́мѧтствовавшихъ пою́ще тѧ̀ и҆збавлѧ́ѧй ѿ скорбе́й и҆ болѣ́зней и҆ вѣ́чнагѡ мꙋче́нїѧ, хрⷭ҇та̀ молѧ́й да́рꙋющагѡ мі́рꙋ ве́лїю ми́лость."
 },
 {
  "type": "TEXT",
  "value": "Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Ра́дꙋйсѧ, бл҃гоче́стїѧ свѣти́льниче, це́ркве свѣ́тлое ѻ҆́тче со́лнце, сла́во мона́шествꙋющихъ, пра́вило молча́нїѧ, бг҃омы́слїѧ и҆ дѣ́ланїѧ ᲂу҆чи́телю и҆зрѧ́днѣйшїй, ст҃и́телю бг҃оглаго́ливе, премꙋ́дрости и҆ вѣ́дѣнїѧ сокро́вище, са́вво сла́вне, трⷪ҇цы селе́нїе, ѻ҆рга́не дх҃а, ѱалти́рю ѡ҆дꙋшевле́нне, ᲂу҆ста̀ гдⷭ҇нѧ, и҆зводѧ́щаѧ ѿ недосто́йнагѡ досто́йное. Хрⷭ҇та̀ ᲂу҆̀бо молѝ, дарова́ти дꙋша́мъ на́шимъ ве́лїю ми́лость."
 },
 {
  "type": "TEXT",
  "value": "Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Сто́лпъ свѣтѧ́щїйсѧ добродѣ́тельми ᲂу҆твержде́нный и҆ ѻ҆́блакъ ѡ҆сѣнѧ́ющїй ꙗ҆ви́лсѧ є҆сѝ сꙋ́щымъ въ пꙋсты́ни, къ нб҃ꙋ ѿ землѝ къ бг҃ꙋ взира́ющихъ предводѧ́ѧй, крⷭ҇та̀ жезло́мъ разве́рзый мо́ре стрⷭ҇те́й, ᲂу҆стремле́нїе же а҆мали́ка ѡ҆брати́вый въ бѣ́гство. Невозвра́тный нбⷭ҇ный пꙋ́ть ѡ҆брѣ́лъ є҆сѝ, бг҃облаже́нне, и҆ неизрече́ннꙋю ча́сть со безпло́тными престо́ла, є҆мꙋ́же сѷмеѡ́не предстоѧ̀, хрⷭ҇та̀ ᲂу҆̀бо молѝ, дарова́ти дꙋша́мъ на́шимъ ве́лїю ми́лость."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Мона́хѡвъ мно́жества наста́вники ва́съ почита́емъ, ѻ҆тцы̀ бжⷭ҇твеннїи, ва́шею бо стезе́ю вои́стиннꙋ пра́вѡ ходи́ти позна́хомъ. Блаже́ни є҆стѐ хрⷭ҇тꙋ̀ рабо́тавшїи, и҆ вра́жїю си́лꙋ ѡ҆бличи́вшїи, а҆́гг҃лѡвъ собесѣ̑дницы, прпⷣбныхъ соприча̑стницы и҆ првⷣныхъ. Съ ни́миже моли́тесѧ гдⷭ҇ꙋ, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "И҆ нн҃ѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Безневѣ́стнаѧ дв҃о, ꙗ҆́же бг҃а неизрече́ннѡ заче́нши пло́тїю, мт҃и бг҃а вы́шнѧгѡ, твои́хъ рабѡ́въ мѡльбы̀ прїимѝ, всенепоро́чнаѧ, всѣ̑мъ подаю́щи ѡ҆чище́нїе прегрѣше́нїй: нн҃ѣ на̑ша молє́нїѧ прїе́млющи, молѝ спасти́сѧ всѣ̑мъ на́мъ."
 },
 {
  "type": "HEADER",
  "value": "Тропа́рь прпⷣбныхъ, гла́съ а҃:"
 },
 {
  "type": "TEXT",
  "value": "Ѡ҆би́тели хиланда́рскїѧ свѧще́нныхъ строи́телей и҆ а҆дѡ́на свѣти́льники, се́рбїи похвалꙋ̀, сѷмеѡ́на велича́йшагѡ прпⷣбныхъ лѣ́потꙋ, и҆ ро́дъ є҆гѡ̀ чꙋ́дный, ст҃и́телѧ гл҃ю са́ввꙋ, прїиди́те согла́снѡ почти́мъ гл҃ѧ: моли́те хрⷭ҇та̀ бг҃а ѡ҆ па́ствѣ ва́шей, блаже́ннїи, и҆ ѡ҆ є҆́же цр҃кви свобо́днѣй бы́ти ѿ ѡ҆бстоѧ́нїй."
 },
 {
  "type": "HEADER",
  "value": "На ᲂу҆́трени. По а҃-мъ стїхосло́вїи, сѣда́ленъ, гла́съ и҃:"
 },
 {
  "type": "TEXT",
  "value": "Па́стырское разꙋмѣ́нїе воспрїѧ́въ, мона́шествꙋющихъ сто́лпе и҆ стѣно̀, до́брѣ ᲂу҆па́слъ є҆сѝ сꙋ́щїѧ разꙋ́мныѧ па́ствы твоеѧ̀: возлюби́въ бо хрⷭ҇то́во бжⷭ҇твенное ᲂу҆че́нїе, въ ни́хъ сло́во посѣ́ѧлъ є҆сѝ, всемꙋ́дре, ѿсю́дꙋ же и҆ поревнова́ти а҆́гг҃льскомꙋ жи́тельствꙋ подви́глъ є҆сѝ всѧ̑, є҆динодꙋ́шнѡ сла́вити бг҃а бг҃омꙋ́дреннѡ, са́вво ѻ҆́тче на́шъ, молѝ хрⷭ҇та̀ бг҃а грѣхѡ́въ проще́нїе дарова́ти всѣ̑мъ чтꙋ́щымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, то́йже: И҆ нн҃ѣ, бг҃оро́диченъ:"
 },
 {
  "type": "TEXT",
  "value": "Нбⷭ҇нꙋю две́рь, и҆ кївѡ́тъ, всесвѧтꙋ́ю го́рꙋ, свѣтоза́рный ѻ҆́блакъ воспои́мъ нбⷭ҇нꙋю лѣ́ствицꙋ, слове́сный ра́й, є҆́ѵино и҆збавле́нїе, вселе́нныѧ всеѧ̀ вели́кое сокро́вище, ꙗ҆́кѡ сп҃се́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. Сегѡ̀ ра́ди вопїе́мъ є҆́й: молѝ сн҃а твоего̀ и҆ бг҃а, прегрѣше́нїй ѡ҆ставле́нїе дарова́ти, благочⷭ҇тнѡ покланѧ́ющымсѧ прест҃о́мꙋ ржⷭ҇твꙋ̀ твоемꙋ̀."
 },
 {
  "type": "HEADER",
  "value": "По в҃-мъ стїхосло́вїи, сѣда́ленъ, гла́съ д҃:"
 },
 {
  "type": "TEXT",
  "value": "Ѡ҆бнови́ла є҆сѝ, чи́стаѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ: тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ."
 },
 {
  "type": "HEADER",
  "value": "По полѷеле́и, сѣда́ленъ, гла́съ г҃:"
 },
 {
  "type": "TEXT",
  "value": "Столпѝ непоколеби́мїи бл҃гоче́стїѧ, ѡ҆снова́нїе бг҃одꙋхнове́нное це́ркве ꙗ҆ви́стесѧ ѻ҆тцы̀ сла́внїи: всеѧ́ бо се́рбїи концы̀ просвѣти́сте сло́вомъ вѣ́ры, са́вво сла́вне, съ сѷмеѡ́номъ бг҃омꙋ́дрымъ, моли́те хрⷭ҇та̀ бг҃а дарова́ти на́мъ ве́лїю ми́лость."
 },
 {
  "type": "HEADER",
  "value": "Сла́ва, то́йже, И҆ нн҃ѣ, бг҃оро́диченъ гла́съ то́йже:"
 },
 {
  "type": "TEXT",
  "value": "Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ дв҃о мт҃и, чⷭ҇тото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чⷭ҇ти мл҃твъ твои́хъ бжⷭ҇твенными вода́ми, подаю́щи, чи́стаѧ, ве́лїю ми́лость."
 },
 {
  "type": "HEADER",
  "value": "Степе́нна: а҃-й а҆нтїфѡ́нъ, д҃ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Честна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ ꙗ҆̀же воздаде́ ми;"
 },
 {
  "type": "TEXT",
  "value": "Та́же: Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло м҃г."
 },
 {
  "type": "TEXT",
  "value": "Сла́ва: Мл҃твами прпⷣбныхъ твои́хъ:"
 },
 {
  "type": "TEXT",
  "value": "И҆ нн҃ѣ: Мл҃твами бцⷣы:"
 },
 {
  "type": "TEXT",
  "value": "Поми́лꙋй мѧ̀, бж҃е:"
 },
 {
  "type": "HEADER",
  "value": "Стїхи́ра самогла́сна, гла́съ ѕ҃:"
 },
 {
  "type": "TEXT",
  "value": "Прпⷣбнїи ѻ҆тцы̀, во всю̀ зе́млю и҆зы́де вѣща́нїе и҆справле́нїй ва́шихъ, тѣ́мже на нбⷭ҇ѣ́хъ ѡ҆брѣлѝ є҆стѐ мздꙋ̀ трꙋдѡ́въ ва́шихъ, де́мѡнскїѧ погꙋби́ли є҆стѐ полкѝ, и҆ а҆́гг҃льскїѧ погꙋби́ли є҆стѐ чи́ны, и҆́хже житїю̀ непоро́чнѡ поревнова́ли є҆стѐ, дерзнове́нїе и҆мꙋ́ще ко хрⷭ҇тꙋ̀ бг҃ꙋ, ми́ръ и҆спроси́те дꙋша́мъ на́шымъ."
 },
 {
  "type": "HEADER",
  "value": "Канѡ́нъ бцⷣы, со і҆рмосо́мъ на ѕ҃, и҆ ст҃ы́хъ, на и҃."
 },
 {
  "type": "HEADER",
  "value": "Канѡ́нъ ст҃ы́хъ, є҆гѡ́же краестро́чїе по а҆лфави́тꙋ. Гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́на погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крестоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ꙋ воспѣва́юща."
 },
 {
  "type": "TEXT",
  "value": "Восто́къ добродѣ́телей бы́въ, со́лнце незаходи́мое, ст҃и́телю ѻ҆́тче, нн҃ѣ восхвалѧ́ющемꙋ тѧ̀ и҆ просѧ́щемꙋ воспѣ́ти тѧ̀, твои́ми мл҃твами да́рꙋй мѝ досто́йнѡ да воспою́ тѧ, са́вво ст҃и́телю, ѻ҆́тче на́шъ."
 },
 {
  "type": "TEXT",
  "value": "Ца́рское презрѣ́въ бл҃горо́дїе, бога́тство и҆ сла́вꙋ, мꙋ́дре, и҆ взе́мъ крⷭ҇тъ, ѻ҆́тче, на ра́мена, хрⷭ҇тꙋ̀ послѣ́довалъ є҆сѝ, чи́стымъ по́мысломъ є҆мꙋ̀ слѣ́дꙋѧ, прпⷣбне са́вво ст҃и́телю и҆зрѧ́днѣйшїй."
 },
 {
  "type": "TEXT",
  "value": "Земледѣ́лавъ добродѣ́тельми и҆ трꙋды̀, сѣ́мѧ бжⷭ҇твенное въ дꙋша́хъ, ѻ҆́тче, вѣ́рныхъ посѣ́ѧлъ є҆сѝ, и҆ нн҃ѣ стори́чествꙋющїй кла́съ бж҃е́ственныхъ дѣ́лъ возда́лъ є҆сѝ земледѣ́лателю и҆ творцꙋ̀, сѷмеѡ́не, вѣ́рныхъ похвало̀."
 },
 {
  "type": "TEXT",
  "value": "Бг҃оро́диченъ: Бг҃оѧвле́нїѧ тебѐ ра́ди ᲂу҆досто́исѧ, бг҃облагода́тнаѧ, сме́ртное є҆стество̀, неѡдержи́маго бо во чре́вѣ твое́мъ ѡ҆бита́вшаго, па́че ᲂу҆ма̀ и҆ сло́ва, благослове́ннаѧ, родила̀ є҆сѝ, пребыва́ющи дв҃а чи́стаѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Небе́снагѡ крꙋ́га верхотво́рче гдⷭ҇и, и҆ це́ркве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не человѣколю́бче."
 },
 {
  "type": "TEXT",
  "value": "Да́ры свѣтода́тельными ѡ҆заре́нъ, прпⷣбне, де́мѡнскїй мра́къ всецѣ́лѡ ѿгна́лъ є҆сѝ и҆ свѣ́тъ возсїѧ́лъ є҆сѝ въ сѣ́ни сме́ртнѣй сѣдѧ́щымъ."
 },
 {
  "type": "TEXT",
  "value": "На гдⷭ҇а всю̀ бжⷭ҇твеннїи прпⷣбнїи, возложи́вше наде́ждꙋ ника́коже поколеба́стесѧ є҆́же ѿпа́сти ѿ лꙋ́чшаго стоѧ́нїѧ, но зако́ннѡ соверши́сте бжⷭ҇твенное тече́нїе ᲂу҆ма̀ пра́востїю."
 },
 {
  "type": "TEXT",
  "value": "Житїѧ̀ чⷭ҇таго ᲂу҆лꙋчи́ти потща́вшесѧ, пло́ть на землѝ, бг҃оно́снїи, ᲂу҆мертви́ли є҆стѐ, и҆ нн҃ѣ безсме́ртнꙋю ча́сть наслѣ́довали є҆стѐ, хрⷭ҇тꙋ̀, блаже́ннїи, соца́рствꙋюще."
 },
 {
  "type": "TEXT",
  "value": "Бг҃оро́диченъ: Въ сѣ́нь сме́ртнꙋю впа́въ, чи́стаѧ, тѧ̀ призыва́ю, бж҃е́ственнꙋю по́мощь твою̀ ско́рѡ посли́ ми, ꙗ҆́кѡ да спасе́нъ бы́въ, досто́йнѡ любо́вїю ᲂу҆блажа́ю тѧ̀, ꙗ҆́коже прорекла̀ є҆сѝ."
 },
 {
  "type": "HEADER",
  "value": "Сѣда́ленъ, гла́съ и҃:"
 },
 {
  "type": "TEXT",
  "value": "Дꙋ́шꙋ преда́вше любвѝ хрⷭ҇то́вы, земна̑ѧ всѧ̑ ѡ҆ста́вивше мꙋ́дре, всели́стесѧ, прпⷣбнїи, въ пꙋсты́нехъ и҆ гора́хъ: вкꙋси́вше бо ѿ дре́ва вѣ́дѣнїѧ, сла́внїи, а҆́ки ѿ во́дъ таи̑нницы, а҆́гг҃льски возсїѧ́ли є҆стѐ. Тѣ́мже тмꙋ̀ плотскꙋ́ю превозше́дше, мра́къ де́мѡнскїй ѿгна́ли є҆стѐ, блаже́ннїи сѷмеѡ́не и҆ са́вво сла́внїи: моли́те хрⷭ҇та̀ бг҃а прегрѣше́нїй ѡ҆ставле́нїе дарова́ти любо́вїю пра́зднꙋющымъ ст҃ꙋ́ю па́мѧть ва́шꙋ."
 },
 {
  "type": "HEADER",
  "value": "Сла́ва, то́йже: И҆ нн҃ѣ, бг҃оро́диченъ:"
 },
 {
  "type": "TEXT",
  "value": "Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ всепѣ́таѧ, беззако́нїю мѧ̀ сꙋ́щи скве́рно жили́ще, и҆ де́мѡнѡвъ и҆гра́лище, въ ра́зꙋмѣ бы́вша, потщи́сѧ ѿ си́хъ ѕлодѣ́йствїѧ мѧ̀ и҆зба́вити, свѣ́тло жили́ще добродѣ́тельми содѣ́лавши, свѣтода́тельнаѧ и҆ нетлѣ́ннаѧ, прича́стїѧ сподо́би, и҆ свѣ́та невече́рнѧго мл҃твами твои́ми."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотрѣ́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Наи́тїе бж҃е́ственнагѡ дꙋ́ха ꙗ҆вѝ вы̀ свѣти́льники, чꙋдесы̀ сїѧ́ющыѧ, сѷмеѡ́не и҆ са́вво всехва́льнїи."
 },
 {
  "type": "TEXT",
  "value": "Бжⷭ҇твеннымъ ѡ҆заре́нїємъ ввѣрѧ́еми, ꙗ҆ви́стесѧ а҆́ки ѻ҆гнѝ просвѣща́юще вѣ́рныхъ всѣ́хъ по́мыслы, всебл҃же́ннїи."
 },
 {
  "type": "TEXT",
  "value": "Врачева́нїй благода́ть влады́ка всѣ́хъ ва́мъ дарова̀ и҆ вла́сть и҆згонѧ́ти нечи̑стыѧ дх҃и, ѻ҆тцы̀ досточꙋ́днїи."
 },
 {
  "type": "TEXT",
  "value": "Бг҃оро́диченъ: Въ нѣ́дрѣхъ сѣдѧ́й, чи́стаѧ, ѻ҆́тчихъ, нн҃ѣ въ твои́хъ нѣ́дрѣхъ, чи́стаѧ, почѝ, тлѣ́нное є҆стество̀ и҆справлѧ́ѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Благода̑тныѧ стрꙋи̑ и҆згонѧ́ющыѧ недꙋ́ги, и҆ вла́сть на дꙋ́хи нечи̑стыѧ дарова̀ тебѣ̀ хрⷭ҇то́съ, мꙋ́дре, є҆стество́ бо, ѻ҆́тче, побѣди́въ, па́че є҆стества̀ дарѡ́въ дꙋ́ха прича́стникъ бы́лъ є҆сѝ."
 },
 {
  "type": "TEXT",
  "value": "Чи́стымъ ᲂу҆мо́мъ и҆ дꙋшѝ крѣ́постїю, бг҃облаже́нне, вра̑жїѧ всѧ̑ навѣ́ты на зе́млю низве́рглъ є҆сѝ, крⷭ҇тъ ꙗ҆́кѡ ски́петръ, воспрїи́мъ на ра́мена со са́ввою, всебл҃же́ннїи."
 },
 {
  "type": "TEXT",
  "value": "Со безпло́тными, съ прпⷣбными же и҆ ст҃и́тели, со а҆пⷭ҇ли соверша́емъ ва́ше торжество̀, бг҃оно́се са́вво со ѻ҆тцє́мъ твои́мъ сѷмеѡ́номъ, согла́снѡ всегда̀ ва́съ ᲂу҆бл҃жа́юще."
 },
 {
  "type": "TEXT",
  "value": "Бг҃оро́диченъ: Молѧ́щи не преста́й ѡ҆ воспѣва́ющихъ тѧ̀, свѧта́ѧ влады́чицѣ, сы́на твоегѡ̀ и҆ бг҃а и҆ влады́кꙋ и҆ гдⷭ҇а, ꙗ҆́кѡ да да́сть всѣ̑мъ на́мъ ѻ҆ставле́нїе грѣхѡ́въ и҆ ра́йскихъ бла́гъ наслажде́нїе."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀, спасѐ, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀."
 },
 {
  "type": "TEXT",
  "value": "И҆сто́чникъ и҆сцѣле́нїй животворѧ́щїй вои́стиннꙋ гро́бъ тво́й содѣ́ласѧ, сѷмеѡ́нѣ, є҆мꙋ́же предстоѧ́ще всѝ вѣ́рнїи, и҆сцѣлє́нїѧ воспрїе́млемъ."
 },
 {
  "type": "TEXT",
  "value": "Житїѐ твоѐ знамени́то, сла́ва ѻ҆́тче вѣ́чна, пꙋ́ть же тво́й свѣ́телъ, кончи́на че́стна, пред̾ гдⷭ҇емъ бг҃омъ твои́мъ, са́вво сла́вне."
 },
 {
  "type": "TEXT",
  "value": "Ѿве́рглъ є҆сѝ сꙋ́щꙋю на землѝ че́сть и҆ сла́вꙋ легкоги́бнꙋщꙋю, вѣ́чный же живо́тъ и҆ достоѧ́нїе непоколеби́мое, всебл҃же́нне, воспрїѧ́лъ є҆сѝ, въ нбⷭ҇ныхъ селе́нїѧхъ водвори́вшись незы́блемѣйше."
 },
 {
  "type": "TEXT",
  "value": "Бг҃оро́диченъ: Вседержи́телевою си́лою, всѧ̑ носѧ́й, во ѡ҆б̾ѧ́тїѧхъ твои́хъ, ꙗ҆́кѡ сме́ртный носи́мь бѣ̀, дв҃о всенепоро́чнаѧ, и҆збавлѧ́ѧ на́съ ѿ рꙋкѝ вра́жїѧ."
 },
 {
  "type": "HEADER",
  "value": "Конда́къ, гла́съ в҃:"
 },
 {
  "type": "TEXT",
  "value": "Го́рнюю жи́знь возлюби́вше, сла́внїи, жи́знь сꙋ́щꙋю на землѝ презрѣ́сте. Сегѡ̀ ра́ди въ вы́шнихъ со а҆́гг҃лы всегда̀ ликꙋ́юще, моли́те ѡ҆ всѣ́хъ на́съ."
 },
 {
  "type": "HEADER",
  "value": "И҆ны́й конда́къ, гла́съ д҃:"
 },
 {
  "type": "TEXT",
  "value": "Дне́сь сѷмеѡ́нъ съ са́ввою, блаже́ннїи, въ дс҃ѣ прише́дше, спаса́ютъ ѿ ѡ҆бстоѧ́нїй па́ствꙋ и҆́хъ: сі́и бо трⷪ҇цꙋ проповѣ́даша є҆ди́наго бг҃а, це́ркве ꙗ҆ви́шасѧ ᲂу҆твержде́нїе, въ прпⷣбныхъ мѷроточи́вый и҆ во ст҃ы́хъ чꙋдотво́рецъ: сі́и бо показа́шасѧ, цр҃е́й похвала̀ и҆ наро́да и҆́хъ крѣ́пость."
 },
 {
  "type": "TEXT",
  "value": "І҆́косъ: Кто̀ возмо́жетъ досто́йнѡ похвали́ти твои́хъ натрижне́нїй и҆ подвигѡ́въ и҆ трꙋдѡ́въ мно́гихъ сла́вꙋ и҆ вели́чїе; но мл҃твами твои́ми спомози́ ми, и҆ да́ждь мѝ благода́ть дꙋ́ха, ꙗ҆́кѡ да и҆зрекꙋ̀ твоѧ̑ борє́нїѧ вѣ́рнѡ, и҆ воспою̀ па́че сло́ва си́лꙋ твою̀ и҆ крѣ́пость, всебл҃же́нне, є҆́юже кова́рнаго врага̀ посрами́лъ є҆сѝ, са́вво бг҃оно́се съ сѷмеѡ́номъ бг҃омꙋ́дрымъ, не преста́йте моли́ти ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "И҆зба́вите ѿ всѧ́кагѡ вре́да и҆ плѣне́нїѧ вра́жескагѡ ва́рварскагѡ, прибѣга́ющыѧ къ ва́шей бжⷭ҇твеннѣй защи́тѣ ѡ҆ сѷмеѡ́не хва́льне съ са́ввою во вѣ́ки."
 },
 {
  "type": "TEXT",
  "value": "Тѣ́ло, дꙋ́шꙋ же и҆ срⷣце, и҆ помы́слъ и҆ ᲂу҆́мъ ѡ҆чи́стивше, въ нбⷭ҇ный нн҃ѣ преста́вистесѧ бра́чный черто́гъ, ѽ сѷмеѡ́не хва́льне съ са́ввою во вѣ́ки."
 },
 {
  "type": "TEXT",
  "value": "Же́злъ си́лы держа̀ спаси́тельный крⷭ҇тъ, са́вво до́блѣ, и҆спыта̑нїѧ терпѣли́вѡ под̾е́млеши, великодꙋ́шнѡ воспѣва́ѧ: благослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Бг҃оро́диченъ: Ты́ мѧ спасѝ, дв҃о, и҆ и҆схитѝ и҆зъ рꙋкѝ борю́щагѡ и҆ кова́рнагѡ врага̀ человѣкоꙋбі́йцы, ꙗ҆́кѡ да пою̀, спаса́емый, твою̀ сла́вꙋ во вѣ́ки."
 },
 {
  "type": "HEADER",
  "value": "Пѣ́снь и҃:"
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы благослови́те, свѧще́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Подви́жническомꙋ жи́тельствꙋ предава́ѧ себѐ, прїѧ́телище показа́вшесѧ вмѣсти́тельное дх҃а животворѧ́щагѡ, пою́ще непреста́ннѡ: лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Преста́вившисѧ, предвари́лъ є҆сѝ во гра́дъ сїѡ́нъ, во ѡ҆би́тєли же вѣ̑чныѧ приспѣ́лъ є҆сѝ, и҆ нбⷭ҇нꙋю ча́сть за трꙋды̀ ѡ҆брѣ́тъ, со а҆́гг҃льскими ликостоѧ̑нїи воспѣва́еши: ѻ҆́троцы благослови́те, свѧще́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Всесвѣ́телъ ꙗ҆́кѡ со́лнце, пꙋсты̑ни просвѣти́лъ є҆сѝ, мра̑чныѧ ѿгна́въ де́мѡны, и҆ сто́лпъ всесвѣ́телъ досѧза́ющь до нб҃а бы́лъ є҆сѝ, чꙋдотвѡ́рнаѧ сїѧ̑нїѧ и҆спꙋска́ѧ, взыва́лъ є҆сѝ непреста́ннѡ: свѧще́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: Невѣ́сто бж҃їѧ всенепоро́чнаѧ, прибѣга́ющыѧ къ тебѣ̀ и҆схитѝ ѿ плѣ́на стрⷭ҇те́й, и҆ самовлады́чнюю свобо́дꙋ, чи́стаѧ, цр҃кви правосла́вныхъ пода́ждь, вѣ́рою пою́щымъ: свѧще́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́нїи тобо́ю дв҃о чи́стаѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Ра́дости и҆ весе́лїѧ дх҃о́внагѡ всѣ́хъ ва́ша па́мѧть и҆сполнѧ́етъ, сла́внїи, вѣ́рою и҆ любо́вїю сїю̀ пра́зднꙋющихъ."
 },
 {
  "type": "TEXT",
  "value": "Ѱалмы̀ и҆ пѣ̑нїи нн҃ѣ ва́съ похвалѧ́емъ и҆ ᲂу҆блажа́емъ въ пѣ́снехъ дне́сь, къ бжⷭ҇твенномꙋ хра́мꙋ ва́шемꙋ прибѣга́юще."
 },
 {
  "type": "TEXT",
  "value": "Ѽ ѻ҆́тче бг҃оно́се, са́вво і҆ера́рше съ сѷмеѡ́номъ ѻ҆тце́мъ твои́мъ, моли́тесѧ ѡ҆ на́съ, почита́ющихъ ст҃ꙋ́ю па́мѧть ва́шꙋ."
 },
 {
  "type": "TEXT",
  "value": "Бг҃оро́диченъ: Бл҃голюби́ваѧ дв҃о, ѡ҆ѕло́бленнꙋю грѣхо́мъ дꙋ́шꙋ мою̀ ᲂу҆добрѝ, всебл҃го́е сло́во пло́тїю носи́вшаѧ."
 },
 {
  "type": "TEXT",
  "value": "Свѣти́ленъ: Чꙋдотво́рцы свѣти́льницы, сѷмеѡ́не со са́ввою, ᲂу҆врачꙋ́йте дꙋ́шы на́шѧ и҆ тѣлесѐ недꙋ́ги, ѿ гдⷭ҇а прїи́мше благода́ть и҆сцѣле́нїй."
 },
 {
  "type": "TEXT",
  "value": "Бг҃оро́диченъ: Сꙋ́щихъ ѿ бг҃а дае́мыхъ мі́рꙋ бла̑гъ, ты̀ причи́ною была̀ є҆сѝ, пречⷭ҇таѧ, но и҆ нн҃ѣ ᲂу҆ми́лостиви сн҃а твоегѡ̀, бцⷣе, ѡ҆ ѻ҆́бщемъ спасе́нїи."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ и҃:"
 },
 {
  "type": "TEXT",
  "value": "Ѽ пресла́внагѡ чꙋдесѐ! Свѣтосїѧ́нный и҆ ра́достный ѻ҆тцє́въ пра́здникъ нн҃ѣ на́мъ возсїѧ̀, сѷмеѡ́на и҆ са́ввы: тѣ́мже прїиди́те вѣ́рою сни́демъ вкꙋ́пѣ въ па́мѧти и҆́хъ веселѧ́щесѧ, и҆ возопїи́мъ: молє́нїи и҆́хъ спасѝ ны̀, гдⷭ҇и человѣколю́бче, ꙗ҆́кѡ всебл҃гі́й. Два́жды."
 },
 {
  "type": "TEXT",
  "value": "Ѻ҆́тче сѷмеѡ́не бг҃омꙋ́дре, свѣтосїѧ́нїй ᲂу҆́мъ, чи́стѡ ѡ҆зарѧ́емъ, и҆мѣ́ѧй, стрⷭ҇те́й ᲂу҆мири́лъ є҆сѝ и҆дѣ́же неизречє́ннаѧ добро́та неѡписꙋ́емаѧ, ѡ҆ на́съ всегда̀ моли́сѧ, хва́лѧщихъ тѧ̀."
 },
 {
  "type": "TEXT",
  "value": "Са́вво бг҃оглаго́льниче всемꙋ́дре, свѧще́нства пра́вило, цѣломⷣрїѧ ѡ҆́бразъ, мона́хѡвъ ᲂу҆крѣпле́нїе, це́ркве ᲂу҆твержде́нїе, любвѐ свѣти́ло, престо́лъ чꙋ́вства, и҆сто́чникъ чꙋде́съ, ѧ҆зы́къ ѻ҆́гненный, ᲂу҆ста̀ сладкоглаго́ливаѧ, сосꙋ́дъ бж҃їѧгѡ дх҃а и҆ ра́й ᲂу҆́мный бы́лъ є҆сѝ, бг҃облаже́нне."
 },
 {
  "type": "HEADER",
  "value": "Сла́ва, гла́съ в҃:"
 },
 {
  "type": "TEXT",
  "value": "Добродѣ́телей лѣ́ствица и҆ ѡ҆́бразъ показа́шасѧ на землѝ та́инственнѡ, свѧті́и, и҆̀хже восхва́лимъ ꙗ҆́кѡ по́стникѡвъ ᲂу҆краше́нїе, подвиза́шасѧ бо вои́стиннꙋ ꙗ҆́кѡ вели́кїй а҆нтѡ́нїй, безмѣ́рное ᲂу҆̀бо смире́нїе ꙗ҆ви́ша и҆ ᲂу҆па́сше наро́дъ и҆́хъ благочⷭ҇тнѡ, во ѡ҆гра́дꙋ ст҃ꙋ́ю введо́ша, и҆дѣ́же ли́къ а҆́гг҃лѡвъ пребыва́етъ. Сегѡ̀ ра́ди вопїе́мъ прилѣ́жнѡ: не забꙋ́дите па́ствы ва́шеѧ, са́вво и҆ сѷмеѡ́не всебл҃же́ннїи, спаса́ти дꙋ́шы на́шѧ."
 },
 {
  "type": "HEADER",
  "value": "И҆ нн҃ѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ подъ кро́вомъ твои́мъ."
 },
 {
  "type": "HEADER",
  "value": "Славосло́вїе вели́кое. Тропа́рь ст҃ы́хъ. Сла́ва, и҆ нн҃ѣ, пра́здника. Є҆ктєнїѝ, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Блаже́нна ѿ канѡ́на пра́здника, пѣ́снь а҃: и҆ ст҃ы́хъ пѣ́снь ѕ҃."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ."
 },
 {
  "type": "TEXT",
  "value": "Сті́хъ: Воспо́йте гдⷭ҇еви пѣ́снь но́вꙋ."
 },
 {
  "type": "HEADER",
  "value": "А҆пⷭ҇лъ, ко гала́тѡмъ, зача́ло сг҃і."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆го̀ восхо́щетъ ѕѣлѡ̀."
 },
 {
  "type": "HEADER",
  "value": "Є҆ѵⷢ҇лїе, ѿ матѳе́а, зача́ло м҃г."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ."
 }
]