ponomar-pwa/static/data/shared/menaion-add/21.json

[
 {
  "type": "HEADER",
  "value": "Деке́мврїа и҃і"
 },
 {
  "type": "HEADER",
  "value": "Слꙋ́жба ст҃и́телю хрⷭ҇то́вꙋ моде́стꙋ, патрїа́рхꙋ і҆ерⷭ҇ли́мскомꙋ."
 },
 {
  "type": "HEADER",
  "value": "Ве́черъ, на Гдⷭ҇и воззва́хъ, стїхи̑ры, гла́съ в҃:"
 },
 {
  "type": "TEXT",
  "value": "Кі́ими похва́льными вѣнцы̀ ᲂу҆вѧзе́мъ свѧта́го моде́ста, преподо́бныхъ похвалꙋ̀, свѧти́телей бл҃голѣ́пїе, і҆ерⷭ҇ли́ма свѣти́льника, свѣтѧ́щаго вселе́нстѣй цр҃кви, ско́раго вѣ̑рнымъ помо́щника, є҆го́же безсме́ртныѧ сла́вы вѣнцы̀ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю млⷭ҇ть. Два́жды."
 },
 {
  "type": "TEXT",
  "value": "Кі́ими пѣ́сненными добро́тами ᲂу҆вѣнча́емъ ст҃и́телѧ моде́ста, и҆́стины побо́рника, правосла́вїѧ ревни́телѧ, ст҃а́гѡ гра́да бг҃оглаго́льника, цр҃кве столпа̀ и҆ ѕвѣздꙋ̀ свѣ́тлꙋю, тва́рь ѡ҆зарѧ́ющꙋю чꙋде́съ лꙋча́ми, и҆́мже мра́къ нече́стїѧ разсѣ́ѧ хрⷭ҇то́съ бг҃ъ на́шъ, и҆мѣ́ѧй ве́лїю ми́лость."
 },
 {
  "type": "TEXT",
  "value": "Кі́ими дꙋхо́вными пѣ́сньми похва́лимъ бг҃омꙋ́драго моде́ста, бл҃гонра́вїѧ ᲂу҆чи́телѧ, а҆́гг҃льски на землѝ пожи́вшаго, прїѧ́телище и҆ ѻ҆рга́нъ ст҃а́гѡ дх҃а, ѻ҆ц҃а̀ ѻ҆тцє́въ, па́стыремъ па́стырѧ, є҆го́же бл҃года́тїю и҆сцѣле́нїй ѡ҆богатѝ хрⷭ҇то́съ бг҃ъ на́шъ, и҆мѣ́ѧй ве́лїи ми́лость."
 },
 {
  "type": "TEXT",
  "value": "Кі́ими смире́нными ᲂу҆стна́ми воспои́мъ тѧ̀ вели́кїй моде́сте; ты́ бо высокотво́рное возлюби́въ смире́нїе, ѿ небе́снагѡ пастыренача́льника вознесе́нъ є҆сѝ, а҆рхїере́й бы́въ ма́тере церкве́й и҆ таи́нникъ бж҃їѧ бл҃года́ти, сострада́ѧ всѣ̑мъ и҆ молѧ́сѧ хрⷭ҇тꙋ̀, и҆мꙋ́щемꙋ ве́лїю ми́лость."
 },
 {
  "type": "TEXT",
  "value": "Прїиди́те вѣ́рнїи, ѱало́мски воспле́щемъ рꙋка́ми, воспѣва́юще і҆ера́рха моде́ста, похвалꙋ̀ ст҃а́гѡ гра́да, и҆сто́чникъ ми́лости неизсѧка́емый, печа̑льнымъ ᲂу҆тѣше́нїе, ѡ҆ грѣ́шныхъ непосты́дна хода́таѧ, молѧ́щасѧ ѡ҆ є҆́же спасти́сѧ на́мъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Весели́сѧ дне́сь гра́де ст҃ы́й, се́ бо честна́ѧ наста̀ па́мѧть а҆рхїпа́стырѧ твоегѡ̀ моде́ста, преподо́бна, неѕло́бива, ра́дꙋйсѧ и҆ всѧ̀ цр҃ковь вѣ́рꙋющихъ, и҆мꙋ́щи ст҃и́телѧ и҆ чꙋдотво́рца ко всѣ́мъ бл҃госострада́тельна, предстоѧ́ща прест҃ѣ́й трⷪ҇цѣ и҆ просѧ́ща ѡ҆ставле́нїѧ грѣ́хѡвъ, ми́ра и҆ сп҃се́нїѧ съ вѣ́рою къ немꙋ̀ притека́ющымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Кто̀ тебѐ не ᲂу҆блажи́тъ, прест҃а́ѧ дв҃о; кто́ ли не воспое́тъ твоегѡ̀ пречⷭ҇тагѡ ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный: то́йже ѿ тебѐ чи́стыѧ про́йде, неизрече́ннѡ вопло́щсѧ: є҆стество́мъ бг҃ъ сы́й, и҆ є҆стество́мъ бы́въ человѣ́къ на́съ ра́ди, не во двою̀ лицꙋ̑ раздѣлѧ́емый, но во двою̀ є҆стествꙋ̑ несли́тнѡ познава́емый. Того̀ молѝ, чи́стаѧ, всеблаже́ннаѧ, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ и҃:"
 },
 {
  "type": "TEXT",
  "value": "Ст҃и́телю ѻ҆́ч҃е моде́сте, тобо́ю бг҃ъ ᲂу҆красѝ цр҃ковь свою̀, дарова́въ тебѐ вѣ̑рнымъ милосе́рдїѧ сокро́вище, вдѡ́въ и҆ сиро́тъ пита́телѧ, в̾ разли́чныхъ недꙋ́зѣхъ врачева́телѧ чтꙋ́щихъ любо́вїю ст҃ꙋ́ю па́мѧть твою̀."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Преподо́бне ѻ҆́ч҃е моде́сте, і҆ерⷭ҇ли́ма до́льнѧгѡ па́стырь до́брый бы́лъ є҆сѝ, бл҃годѣ́тельствꙋѧ словє́снымъ и҆ безсловє́снымъ, и҆ го́рнѧгѡ гра́да є҆сѝ все́льникъ, и҆дѣ́же неизрече́ннымъ свѣ́томъ ѡ҆сїѧва́емъ просвѣща́й соверша́ющихъ вѣ́рою свѣтоза́рнꙋю па́мѧть твою̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ ꙗ҆̀же воздаде́ ми;"
 },
 {
  "type": "TEXT",
  "value": "Бл҃же́нне ѻ҆́ч҃е моде́сте, рѣкꙋ̀ по́лнꙋю живоно́сныхъ дарова́нїй ꙗ҆ви́ тѧ хрⷭ҇то́съ бг҃ъ, ѿ сїѡ́на ꙗ҆́кѡ и҆з̾ є҆де́ма текꙋ́щꙋю, цѣли́тельнꙋ дш҃а́мъ и҆ тѣлесє́мъ мо́щы твоѧ̑ лобыза́ющымъ и҆ пра́зднꙋющымъ бл҃госла́внꙋю па́мѧть твою̀."
 },
 {
  "type": "HEADER",
  "value": "Сла́ва, гла́съ д҃:"
 },
 {
  "type": "TEXT",
  "value": "Сострада́тельство безпредѣ́льное ко всѣ̑мъ ст҃е и҆мѣ́ѧ, є҆гда̀ ᲂу҆вѣ́дѣлъ є҆сѝ ѡ҆ ᲂу҆мерщвле́нїи безслове́сныхъ і҆ерⷭ҇ли́млѧнина ѿ ꙗ҆́да ѕмїи́на, во и҆сто́чницѣ набле́вана, дѣ́йствїемъ вра́жїимъ, прише́дъ та́мѡ а҆́бїе, мл҃твою ско́ты ѡ҆живи́лъ є҆сѝ, и҆ ѕмі́ѧ ᲂу҆мертви́въ сло́вомъ, неви́димаго вино́вника ѕла̀ ви́дима сотвори́лъ є҆сѝ, и҆́же и҆́менемъ бж҃їимъ заклѧ́тъ бы́сть непроходи́ти никогда́же, и҆дѣ́же твоѐ и҆́мѧ нарече́тсѧ. Тогѡ̀ и҆ на́съ и҆зба́ви вре́да твои́мъ моде́сте предста́тельство."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "И҆зба́ви на́съ ѿ нꙋ́ждъ на́шихъ, мт҃и хрⷭ҇та̀ бг҃а, ро́ждшаѧ всѣ́хъ творца̀, да всѝ зове́мъ тѝ: ра́дꙋйсѧ, є҆ди́но предста́тельство дꙋ́шъ на́шихъ."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Преподо́бнѡ пожи́въ бг҃омꙋ́дре моде́сте, и҆ ст҃и́тельскою ѻ҆де́ждою ᲂу҆кра́шенъ, па́стырю і҆ерⷭ҇ли́ма бл҃же́ннѣйшїй, въ весе́лїи ны́нѣ хрⷭ҇тꙋ̀ предстои́ши и҆ концы̀ ѡ҆зарѧ́еши чꙋдесы̀. Помо́щникъ ᲂу҆́бѡ бꙋ́ди тѧ̀ призыва́ющымъ, молѧ́сѧ ѻ҆́ч҃е, ѡ҆ всѣ́хъ на́съ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́нное:"
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь, тропа́рь ст҃а́гѡ, два́жды."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Є҆́же ѿ вѣ́ка ᲂу҆тае́нное:"
 },
 {
  "type": "HEADER",
  "value": "По а҃ стїхосло́вїи сѣда́ленъ; гла́съ, д҃:"
 },
 {
  "type": "TEXT",
  "value": "Па́мѧть твою̀ соверша́юще дне́сь, сщ҃е́нне моде́сте, любо́вїю сла́вимъ тѧ̀, а҆рхїере́євъ лѣ́потꙋ, свѧты́ѧ землѝ ᲂу҆краше́нїе, мона́шествꙋющихъ крѣ́пость, ѻ҆́бразъ цѣломꙋ́дрїѧ, є҆го́же просѝ чти́телємъ твои̑мъ приснопа́мѧтне. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Дѣ̑вы предначни́те дѣви́ческꙋю ра́дость, ма́тери восхвали́те провожде́нїе мт҃ре хрⷭ҇та̀ бг҃а на́шегѡ: волсвѝ со а҆́гг҃лы, съ на́ми па́стырїе: грѧде́тъ бо дв҃а во гра́дѣ виѳлее́мѣ, роди́ти сн҃а превѣ́чнаго бг҃а, спаса́ющаго мі́ръ ѿ тлѣ́нїѧ."
 },
 {
  "type": "HEADER",
  "value": "По в҃ стїхосло́вїи сѣда́ленъ, гла́съ д҃."
 },
 {
  "type": "TEXT",
  "value": "Сосꙋ́дъ прече́стенъ дх҃а ст҃а́гѡ бы́лъ є҆сѝ, дꙋ́шꙋ ѡ҆чи́стивъ ѿ страсте́й по́стническими по́двиги твои́ми. Ѿсю́дꙋ бж҃е́ственное пома́занїе свѧ́те, прїѧ́лъ є҆сѝ, и҆ наста́вникъ ꙗ҆ви́лсѧ є҆сѝ бг҃омꙋ́дръ, па́стырь сы́й і҆ерⷭ҇ли́ма, и҆ моли́твенникъ ѡ҆ чтꙋ́щихъ тѧ̀."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Просвѣти́сѧ житїѐ твоѐ добродѣ́тельными свѣтлостьмѝ свѣтоза́рне моде́сте, и҆́мже вѣ́рныѧ сїѡ́на ѡ҆зари́лъ є҆сѝ и҆ ны́нѣ ликꙋ́ѧ и҆дѣ́же сїѧ́етъ свѣ́тъ невече́рнїй, низпосыла́й ѿ хрⷭ҇та̀ бг҃а просвѣще́нїе пра́зднꙋющымъ свѣтоно́сное твоѐ преставле́нїе."
 },
 {
  "type": "HEADER",
  "value": "И҆ ны́нѣ, гла́съ, то́йже:"
 },
 {
  "type": "TEXT",
  "value": "Бг҃оро́диченъ: Ны́нѣ и҆сполнѧ́ютсѧ прⷪ҇ро́кѡвъ проречє́нїѧ: мр҃і́а бо грѧде́тъ роди́ти человѣ́кѡвъ ѡ҆бновле́нїе. Свы́ше предтекꙋ́тъ нбⷭ҇ныѧ си́лы, сла́вꙋ возсыла́юще на́съ ра́ди хотѧ́щемꙋ роди́тисѧ, ца́рїе предхо́дѧтъ персі́дстїи томꙋ̀ припа́сти веселѧ́щесѧ."
 },
 {
  "type": "HEADER",
  "value": "Ѻ҆́ба канѡ́на ѻ҆ктѡ́иха на и҃, и҆ ст҃а́гѡ на ѕ҃."
 },
 {
  "type": "HEADER",
  "value": "Канѡ́нъ, гла́съ ѕ҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ сꙋ́хꙋ, пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
 },
 {
  "type": "TEXT",
  "value": "Страсте́й ѡ҆мраче́нїемъ содержи́ма мѧ̀ і҆и҃се, просвѣти́въ ѡ҆чи́сти, свѣтоно́сными і҆ера́рха твоегѡ̀ моли́твами, и҆ сло́во вдохни́ ми сего̀ воспѣ́ти человѣколю́бче."
 },
 {
  "type": "TEXT",
  "value": "Ѿ пеле́нъ бг҃оизбра́нне, ꙗ҆́коже дре́вле самꙋи́лъ, возложи́лсѧ є҆сѝ бг҃ꙋ бл҃гочести́выми роди́тельми твои́ми, томꙋ̀ дꙋ́шы своѧ̀ въ темни́цѣ преда́вшими."
 },
 {
  "type": "TEXT",
  "value": "Оу҆дали́вшꙋсѧ тебѣ̀ ѿ нечести́выхъ гони́телей во а҆ѳи́ны, є҆гда̀ крести́ тѧ є҆пⷭ҇кпъ, сто́лпъ ѻ҆́гненъ ᲂу҆зрѣ̀, сходѧ́щь съ нб҃сѐ на главꙋ̀ твою̀, бг҃ꙋ прославлѧ́ющꙋ тѧ̀."
 },
 {
  "type": "TEXT",
  "value": "Ѻ҆́гнь бж҃е́ственный прїѧ́въ в̾ се́рдцѣ свое́мъ, вве́рженный на зе́млю, ѿ всѣ́хъ ца́рствꙋющагѡ, и҆ любо́вїю к̾ Немꙋ̀ горѧ̀, всѧ̑ житїѧ̀ кра̑снаѧ ни во что́же вмѣни́лъ є҆сѝ."
 },
 {
  "type": "TEXT",
  "value": "Бг҃оро́диченъ: И҆збавле́нїе клѧ́твы подава́ѧ мі́рꙋ и҆зба́витель и҆ ѻ҆́бразъ сво́й взыскꙋ́ѧ, погребе́нный страстьмѝ, и҆зъ тебѐ дв҃о, ражда́етсѧ, человѣ́къ бы́въ на́съ ра́ди."
 },
 {
  "type": "TEXT",
  "value": "Катава́сїѧ: Хрⷭ҇то́съ рожда́етсѧ:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нѣ́сть ст҃ъ ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Пра́зднꙋемъ тебѣ̀ ны́нѣ во хра́мѣ се́мъ великоимени́те, хра́мъ себѐ творца̀ всѣ́хъ содѣ́лавша, ѡ҆чище́нїемъ се́рдца своегѡ̀ ѿ всѧ́кїѧ скве́рны пло́ти и҆ дꙋ́ха."
 },
 {
  "type": "TEXT",
  "value": "Оу҆мерщвле́нїе живоно́сно на землѝ бг҃омꙋ́дре и҆мѣ́ѧ, дꙋ́шꙋ безстра́стїемъ ᲂу҆краси́лъ є҆сѝ, и҆ и҆скꙋше́нїй приражє́нїѧ бл҃года́тїю бж҃їею побѣди́лъ є҆сѝ."
 },
 {
  "type": "TEXT",
  "value": "Ѿ ю҆́ности достосла́вне потща́лсѧ є҆сѝ просла́вити бг҃а свѣ́тлыми и҆справле́нїи житїѧ̀ твоегѡ̀, тѣ́мъ и҆ тебѐ просла́ви бг҃ъ разли́чными дарова́нїи."
 },
 {
  "type": "TEXT",
  "value": "Ꙗ҆́кѡ пото́къ бг҃ото́чный, и҆сточа́ѧ недꙋ̑жнымъ врачєва́нїѧ чꙋ́дне, бра́та среброкꙋзнеца̀ ѿ недꙋ́га смертоно́сна возста́вилъ є҆сѝ и҆ бѣснꙋ́ющасѧ и҆сцѣли́лъ є҆сѝ."
 },
 {
  "type": "TEXT",
  "value": "Бг҃оро́диченъ: Не терпѧ̀ гдⷭ҇ь свои́хъ рꙋ́къ созда́нїе зрѣ́ти ѿ льсти́вагѡ мꙋ́чимо, прихо́дитъ рабозра́чнымъ ѻ҆́бразомъ человѣ́ческїй ро́дъ и҆зба́вити, вопло́щсѧ ѿ тебѐ влⷣчце."
 },
 {
  "type": "HEADER",
  "value": "Гла́съ д҃, сѣда́ленъ:"
 },
 {
  "type": "TEXT",
  "value": "Да ра́дꙋютсѧ сы́нове сїѡ́ни дне́сь въ па́мѧти твое́й, ст҃и́телю моде́сте, ѡ҆брѣ́тше тѧ̀ те́плаго застꙋ́пника вдѡ́въ и҆ сиро́тъ и҆ всѣ́хъ предста́телѧ сегѡ̀ ра́ди мо́лимъ тѧ̀: моли́сѧ хрⷭ҇тꙋ̀ бг҃ꙋ прегрѣше́нїй ѡ҆ставле́нїе дарова́ти пра́зднꙋющымъ ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Да ра́дꙋетсѧ нб҃о, да весели́тсѧ землѧ̀ съ человѣ́ки, ѿ дв҃ы бо воплоща́етсѧ безпло́тный и҆ безнача́льный ѽ чꙋдесѐ! Начина́етсѧ, верте́пъ и҆ ꙗ҆́сли прїе́млютъ содержа́щаго всѧ̑, на ѡ҆бновле́нїе мі́ра и҆ спасе́нїе дꙋ́шъ на́шихъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Во а҆ѳи́нѣхъ жи́тельствꙋющꙋ тѝ преподо́бне, всѣ̑мъ че́стенъ ра́ди добродѣ́тели ꙗ҆ви́лсѧ є҆сѝ, бл҃гочести́въ, неѕло́бивъ, и҆́стиненъ, ᲂу҆далѧ́ѧйсѧ ѿ всѧ́кагѡ ѕла̀."
 },
 {
  "type": "TEXT",
  "value": "Рачи́тель сы́й нестѧжа́нїѧ, по кончи́нѣ прїѧ́вшихъ тѧ̀ всѧ̑ и҆́хъ и҆мѣ̑нїѧ дѣ́тємъ и҆́хъ врꙋчи́лъ є҆сѝ, са́мъ же въ безмо́лвныхъ мѣ́стехъ в̾ поще́нїи бг҃ꙋ слꙋжи́лъ є҆сѝ."
 },
 {
  "type": "TEXT",
  "value": "Сы́нове среброкꙋзнеца̀ и҆ бра́та є҆гѡ̀, не терпѧ́ще зрѣ́ти тебѐ всѣ́ми чти́ма, за́вистїю снѣда́еми, прода́ша тѧ̀, ꙗ҆́коже і҆ѡ́сифа бра́тїѧ, невѣ́рнꙋ и҆ лю́тꙋ мꙋ́жꙋ во є҆гѵ́петъ."
 },
 {
  "type": "TEXT",
  "value": "Въ плѣ́нѣ сы́й, мꙋ́жественнѣ терпѧ̀ ѕла̑ѧ, смире́нїѧ ра́ди нра́ва своегѡ̀ кꙋпи́вша тѧ̀ в̾ кро́тость преложи́лъ є҆сѝ, и҆ недꙋ́ги є҆гѡ̀ и҆сцѣли́въ, вѣ́рою просвѣти́лъ є҆сѝ сла́вне."
 },
 {
  "type": "TEXT",
  "value": "Бг҃оро́диченъ: Не ѡ҆ста́вивъ нбⷭ҇ныхъ пречи́стаѧ, бг҃ъ и҆стощава́етсѧ ны́нѣ во ᲂу҆тро́бѣ твое́й, и҆ мѣ́ритсѧ безмѣ́рный, безмѣ̑рнаѧ мі́ра разрѣши́въ прегрѣшє́нїѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Сщ҃е́ннагѡ и҆ а҆гг҃лоподража́тельнагѡ чи́на мона́хѡвъ возжелѣ́вшꙋ тѝ, ᲂу҆дали́лъ є҆сѝ себѐ в̾ пꙋсты́ню ст҃а́гѡ сїна́ѧ, и҆ равноа́гг҃ленъ ꙗ҆ви́лсѧ є҆сѝ бг҃оно́се."
 },
 {
  "type": "TEXT",
  "value": "На высотꙋ̀ добродѣ́телей ꙗ҆́коже и҆ на го́рꙋ возше́дъ, и҆ бж҃е́ственнымъ, ꙗ҆́коже мѡѷсе́й, покры́всѧ мра́комъ, ѿ бг҃а догма́тѡвъ скрижа̑ли прїѧ́лъ є҆сѝ пребога́те."
 },
 {
  "type": "TEXT",
  "value": "Всѣ́хъ бл҃ги́хъ ѻ҆́бразъ бы́лъ є҆сѝ, къ вы́шнемꙋ житїю̀ ведꙋ́щь, тѣ́мже всече́стне, бж҃їимъ манове́нїемъ призыва́ешисѧ во і҆ерⷭ҇ли́мъ, да стѧ́жеши смире́нїемъ высо́каѧ."
 },
 {
  "type": "TEXT",
  "value": "Ѡ҆сщ҃е́нный собо́ръ и҆ со́нмъ вѣ́рныхъ тѧ̀ бг҃освѣ́тле, и҆збра́ша сщ҃е́нствовати къ сїѡ́нѣ ст҃ѣ́мъ, ꙗ҆́кѡ и҆́стиннаго ᲂу҆ченика̀ и҆ подража́телѧ началопа́стырѧ і҆и҃са."
 },
 {
  "type": "TEXT",
  "value": "Бг҃оро́диченъ: Восто́кꙋ свы́ше ꙗ҆́вльшꙋсѧ на землѝ, показа́лсѧ є҆сѝ всесвѣ́тлаѧ две́рь прⷭ҇нодв҃о, мі́ръ ѡ҆зарѧ́ющи лꙋча́ми чистоты̀, и҆ вѣ́рнымъ лꙋчѝ чꙋде́съ низпосыла́ющи."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Мѵ́ромъ ѡ҆ст҃и́лсѧ є҆сѝ бл҃года́ти, сщ҃еннодѣ́тель бы́въ сщ҃е́ннѣйшїй и҆ чꙋдодѣ́латель пречꙋ́дный, и҆дѣ́же ꙗ҆ви́сѧ свѣ́тъ во ѿкрове́нїе ꙗ҆зы́кѡвъ и҆ сла́ва і҆и҃лѧ."
 },
 {
  "type": "TEXT",
  "value": "Ꙗ҆́кѡ а҆́гг҃лъ бл҃госла́вне, слꙋжи́лъ є҆сѝ во хра́мѣ воскрⷭ҇нїѧ, и҆мꙋ́щемъ живоно́сный гро́бъ хрⷭ҇та̀, воста́нїемъ свои́мъ воздви́гшагѡ паде́нїе ро́да на́шегѡ."
 },
 {
  "type": "TEXT",
  "value": "Честны́ѧ ꙗ҆́сли и҆ крⷭ҇тъ всѣ́хъ влⷣки неꙋкло́нною любо́вїю созерца́ѧ, бг҃овидѣ́нїѧ поче́рплъ є҆сѝ тайноꙋчє́нїѧ, и҆ па́ствѣ препо́далъ є҆сѝ сїѧ̑ всеизѧ́щне."
 },
 {
  "type": "TEXT",
  "value": "Патрїа́рха а҆враа́ма до́блестємъ подо́бникъ бы́лъ є҆сѝ, а҆́лчныѧ пита́ѧ, жа́ждꙋщыѧ напаѧ́ѧ, неимꙋ́щымъ нескꙋ́дна тре́бѡванїѧ подава́ѧ и҆ скоты̀ врачꙋ́ѧ ст҃е."
 },
 {
  "type": "TEXT",
  "value": "Бг҃оро́диченъ: Ликовствꙋ́йте всѧ̑ дꙋ́шы и҆ взыгра́йте: ны́нѣ землѧ̀ плодороди́тъ неѡра́ннѣ кла́съ жизноно́сный, ѿ негѡ́же ꙗ҆́дше не вза́лчꙋтъ бл҃госты́ню тогѡ̀ велича́ющїи."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Свѣ́тлыхъ по́двигѡвъ твои́хъ тве́рдость и҆ сострада́нїѧ ко всѣ́мъ бога́тство ви́дѧ всебл҃гі́й подвигополо́жникъ бг҃ъ, бога́тыхъ дарова́нїй свои́хъ сподо́би тѧ̀, моде́сте сла́вный і҆ера́рше и҆ чꙋдотво́рче. Тѣ́мъ молѧ́щесѧ тебѣ̀ вопїе́мъ: свобожда́й на́съ ѿ лю́тыхъ ѡ҆бстоѧ́нїй, и҆ недꙋ́гѡмъ на́шымъ пода́ждь и҆сцѣле́нїе."
 },
 {
  "type": "TEXT",
  "value": "І҆́косъ: Прїиди́те мы́сленнѡ ст҃ы́ѧ землѝ дости́гнемъ да ᲂу҆́зримъ в̾ не́й дш҃е́вными ѻ҆чесѝ ст҃и́телѧ и҆ чꙋдотво́рца моде́ста. И҆дѣ́же бо нбⷭ҇ный началопа́стырь сп҃се́нїѧ ра́ди на́шегѡ вочеловѣ́чисѧ, та́мѡ тогѡ̀ и҆зволе́нїемъ і҆ера́рхъ бѣ̀ ст҃ы́й се́й, пасы́й лю́ди є҆гѡ̀ и҆ цѣлѧ̀ всѧ́къ недꙋ́гъ и҆́хъ. Ѻ҆троча́ же мла́до бы́вшее на́съ ра́ди проповѣ́да всѣ̑мъ превѣ́чнаго бг҃а. Пра́зднꙋюще ᲂу҆́бѡ преставле́нїе бл҃же́ннагѡ возопїи́мъ: свобожда́й на́съ свѧ́те ѿ лю́тыхъ ѡ҆бстоѧ́нїй и҆ недꙋ́гѡмъ на́шымъ пода́ждь и҆сцѣле́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы в̾ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Почита́емъ па́мѧть твою̀ приснопа́мѧтне, пꙋтеводи́вый но́ваго і҆зра́илѧ ѿ земна́гѡ і҆ерⷭ҇ли́ма къ нбⷭ҇ный, є҆го́же ᲂу҆лꙋчи́ти на́мъ моли́сѧ любо́вїю сла́вѧщымъ тѧ̀."
 },
 {
  "type": "TEXT",
  "value": "Недре́млющее ѻ҆́ко сїѡ́на бы́вый достосла́вне, па́ствꙋ свою̀ стрегꙋ́щее ѿ волкѡ́въ гꙋби́тельныхъ, тѣ́хъ вре́да соблюда́й на́съ воспѣва́ющихъ тѧ̀."
 },
 {
  "type": "TEXT",
  "value": "Собо́ръ бг҃обо́рный і҆ꙋде́євъ разорѧ́юща тѧ̀ бж҃е́ственнаѧ землѧ̀ и҆мѣ̀, хрⷭ҇тїа̑нскаѧ же составлє́нїѧ ᲂу҆множа́юща и҆ ᲂу҆твержда́юща бг҃оно́сне і҆ера́рше."
 },
 {
  "type": "TEXT",
  "value": "Ѿ грѣха̀ къ добродѣ́тели, ѿ і҆ꙋде́йскагѡ и҆ ꙗ҆зы́ческагѡ мра́ка ко свѣ́тꙋ бл҃гоче́стїѧ хрⷭ҇тїа́нскагѡ ѡ҆брати́лъ є҆сѝ мно́жєства, па́стырю бг҃освѣ́тлый."
 },
 {
  "type": "TEXT",
  "value": "Бг҃оро́диченъ: Сл҃нце пра́вды, возсїѧ́вшее ѿ тебѐ бцⷣе, ѕвѣздо́ю созыва́етъ волхвы̀ съ да́ры поклони́тисѧ младе́нствовавшемꙋ, є҆го́же а҆́гг҃лъ мно́жества воспѣ́ша сла́вѧще."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆з̾ пла́мене прпⷣбнымъ: ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "Свѧ́тъ є҆сѝ гра́де і҆ерⷭ҇ли́ме, ѡ҆сщ҃е́нный по́двигами ст҃ы́хъ твои́хъ, поне́сшихъ бл҃го́е и҆́го хрⷭ҇то́во, ѿ ни́хже є҆́сть моде́стъ первопресто́льникъ тво́й."
 },
 {
  "type": "TEXT",
  "value": "Кто̀ твоѧ̀ по́двиги нб҃оѧвле́нне, по достоѧ́нїю воспѣ́ти возмо́жетъ, бѣды̑ же и҆ скѡ́рби ѿ невѣ́рныхъ и҆́хже пре́лесть сло́вомъ и҆ дѣ́ломъ и҆з̾ѡблича́лъ є҆сѝ."
 },
 {
  "type": "TEXT",
  "value": "Кто̀ ѿ сынѡ́въ сїѡ́на не ᲂу҆блажи́ тѧ ви́да твоѐ, сщ҃е́нне, неѕло́бїе, и҆́мже низложи́лъ є҆сѝ всеѕло́бнаго мїродержи́телѧ и҆ ᲂу҆кроти́лъ і҆ꙋде́й на тѧ̀ ѕло́бство."
 },
 {
  "type": "TEXT",
  "value": "Ви́дѧ хрⷭ҇то́съ вели́кое терпѣ́нїе твоѐ мꙋ́дре, непобѣди́мꙋю си́лꙋ свою̀ низпосыла́ше тебѣ̀, бл҃года́тїю свое́ю ᲂу҆крѣплѧ́ѧ тѧ̀ на бо́льшее терпѣ́нїе."
 },
 {
  "type": "TEXT",
  "value": "Бг҃оро́диченъ: Ѱалти́рь съ гꙋ́слїю воспрїимѝ даві́де и҆ пѣсновоспо́й: сѐ ѡ҆дꙋшевле́нный кївѡ́ть ꙗ҆влѧ́етсѧ во гра́дѣ твое́мъ виѳлее́мѣ, носѧ́й ст҃ы́хъ прест҃а́го всѣ̑мъ во ѡ҆сщ҃е́нїе."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. Є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ."
 },
 {
  "type": "TEXT",
  "value": "И҆мѣ́ѧ дꙋ́шꙋ ми́лостивꙋ и҆ се́рдце чи́сто и҆ любо́вь нелицемѣ́рнꙋ, патрїа́ршества же і҆ерⷭ҇ли́мскагѡ досто́инство, ликѡ́мъ ст҃и́телей дне́сь сопричта́лсѧ є҆сѝ на нб҃сѣ́хъ."
 },
 {
  "type": "TEXT",
  "value": "Престо́лꙋ предстоѧ̀ всѣ́хъ влⷣки, пѣ́снь трист҃ꙋ́ю возглаша́еши сщ҃еннотаи́нниче ра́достнѡ, со и҆збра́нными ᲂу҆покоева́ѧсѧ и҆ молѧ́сѧ ѡ҆ почита́ющихъ тѧ̀."
 },
 {
  "type": "TEXT",
  "value": "Бл҃года́ть дх҃а, все́льшаѧсѧ въ тѧ̀, ꙗ҆ви́ тѧ бг҃оно́сна па́стырѧ ст҃о́мꙋ гра́дꙋ, и҆ чꙋдотво́рца сла́вна вѣ̑рнымъ, є҆́же показꙋ́еши ѻ҆ста́нками тѣ́ла твоегѡ̀."
 },
 {
  "type": "TEXT",
  "value": "Сщ҃є́нныѧ мо́щы твоѧ̑ то́чатъ и҆сцѣлє́нїѧ съ вѣ́рою приходѧ́щымъ, врачꙋ́ѧ всѧ́кїѧ болѣ̑зни, ѡ҆палѧ́ютъ же и҆ прогонѧ́ютъ де́моны, чꙋдодѣ́йственниче сла́вне."
 },
 {
  "type": "TEXT",
  "value": "Бг҃оро́диченъ: Бл҃гословѧ́щїи тѧ̀ бл҃гослове́ннаѧ, ѿ гдⷭ҇а бл҃гословлѧ́ютсѧ: ражда́еши бо въ верте́пѣ влⷣкꙋ, ѿ не́мже бл҃гословлѧ́ютсѧ всѧ̑ племена̀ земна̑ѧ."
 },
 {
  "type": "TEXT",
  "value": "Свѣти́ленъ: Во ст҃и́телехъ сїѧ́еши свѣтоза́рне моде́сте, ꙗ҆́кѡ со́лнце во днѝ, и҆ вх преподо́бныхъ свѣ́тиши ꙗ҆́кѡ лꙋна̀ в ѕвѣзда́хъ. Тѣ́мъ воспѣва́емъ твоѐ ᲂу҆спе́нїе, свѣти́льниче сїѡ́на и҆ вѣ́рныхъ ᲂу҆твержде́нїе. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Чи́стшаѧ свѣ́тлостей со́лнечныхъ, влⷣчце, лꙋча́ми и҆́стиннагѡ свѣ́та, неизрече́ннѡ и҆з̾ тебѐ возсїѧ́вшагѡ, дꙋ́шы на́шѧ просвѣтѝ, и҆ бл҃года́тїю твое́ю ѽ бл҃года́тнаѧ, сердца̀ ѡ҆свѧтѝ, къ го́рнѧгѡ свѣ́та раче́нїю наставлѧ́ющи ны̀."
 },
 {
  "type": "HEADER",
  "value": "На хвали́техъ стїхи̑ры, гла́съ а҃:"
 },
 {
  "type": "TEXT",
  "value": "Привре́мєннаѧ наслаждє́нїѧ презрѣ́лъ є҆сѝ ѿ ю҆́ности преподо́бне, и҆ къ нбⷭ҇ным любо́вїю прилѣпи́лсѧ є҆сѝ, нестѧжа́нїе ѡ҆блобыза́въ и҆ цѣломꙋ́дрїе, тѣ́мже бл҃года́тїю бж҃їею ѡ҆богати́всѧ, стра̑сти ѿгонѧ́еши и҆ скѡ́рби ѿе́млеши, молѧ́сѧ ѡ҆ всѣ́хъ ко гдⷭ҇ꙋ. Два́жды."
 },
 {
  "type": "TEXT",
  "value": "Въ ра́бствѣ тебѣ̀ моде́сте бы́вшꙋ, смире́ннагѡ ра́ди и҆ терпѣли́вагѡ нра́ва твоегѡ̀, кꙋпи́вша тѧ̀ лю́та и҆ невѣ́рна въ кро́тость преложи́лъ є҆сѝ, и҆ недꙋ́ги тогѡ̀ и҆сцѣли́въ, вѣ́рою просвѣти́лъ є҆сѝ, молѧ́сѧ ѡ҆ не́мъ ко гдⷭ҇ꙋ."
 },
 {
  "type": "TEXT",
  "value": "И҆сполни́тель сы́й повелѣ́нїѧ влⷣчнѧ, є҆́же добро̀ твори́ти ненави́дѧщымъ на́съ, прода́вшыѧ тѧ̀ во є҆гѵ́птѣ кꙋ́пли же ра́ди во і҆ерⷭ҇ли́мъ прише́дшыѧ прїѧ́лъ є҆сѝ бл҃же́ннѣйшїй ѻ҆́ч҃е, съ бг҃олюбе́знымъ цѣлова́нїемъ, ᲂу҆чреди́въ и҆ ѡ҆дари́въ ще́дрѡ и҆ молѧ́сѧ ѡ҆ ни́хъ ко гдⷭ҇ꙋ."
 },
 {
  "type": "HEADER",
  "value": "Сла́ва, гла́съ з҃:"
 },
 {
  "type": "TEXT",
  "value": "Подража́тель бы́въ здѣ̀ всебл҃га́гѡ сп҃са, и҆ по ѿше́ствїи ѿсю́дꙋ вожделѣва́ѧ тако́въ бы́ти, сїѧ̑ и҆зглаго́лалъ є҆сѝ въ моли́твѣ, предъ кончи́ною твое́ю моде́сте: гдⷭ҇и і҆и҃се хрⷭ҇тѐ, ᲂу҆слы́ши мѧ̀ раба̀ твоего̀: и҆́же моѐ призыва́ти бꙋ́детъ и҆́мѧ, и҆ па́мѧть менѐ смире́ннагѡ твори́ти, помо́щникъ томꙋ̀ бꙋ́ди, и҆ неѡста́ви є҆го̀ менѐ ра́ди, но и҆спо́лни бл҃ги́хъ твои́хъ, и҆ да́рꙋй є҆мꙋ̀ бога̑тыѧ твоѧ̑ ми́лѡсти, ѿжени́ же ѿ до́мꙋ є҆гѡ̀ и҆ ѿ скота̀ є҆гѡ̀ всѧ́кꙋ болѣ́знь, ꙗ҆́кѡ бла́гъ и҆ человѣколю́бецъ."
 },
 {
  "type": "HEADER",
  "value": "И҆ ны́нѣ, гла́съ з҃:"
 },
 {
  "type": "TEXT",
  "value": "Бг҃оро́диченъ: Безпло́тный воплоща́етсѧ и҆ безлѣ́тный в̾ лѣ́то быва́етъ, и҆ пелена́ми повива́етсѧ на́съ ра́ди, и҆́же зе́млю повива́ѧй гдⷭ҇ь мгло́ю, пло́тъ са́мъ па́че постиже́нїѧ неизмѣ́ннѡ ꙗ҆ви́лсѧ ѿ неискꙋсобра́чныѧ. Тѣ́мже дивѧ́щесѧ поклони́мсѧ вели́комꙋ та́инствꙋ."
 },
 {
  "type": "HEADER",
  "value": "Славосло́вїе вели́кое и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, Бл҃же́нна ѿ канѡ́на ст҃а́гѡ пѣ́снь г҃, и҆ ѕ҃."
 },
 {
  "type": "HEADER",
  "value": "Прокі́менъ гла́съ з҃:"
 },
 {
  "type": "TEXT",
  "value": "Возвесели́тсѧ пра́ведникъ ѡ҆ гдⷭ҇ѣ и҆ ᲂу҆пова́етъ на него̀."
 },
 {
  "type": "TEXT",
  "value": "Сті́хъ: Оу҆слы́ши бж҃е гла́съ мо́й, внегда̀ моли́тимисѧ къ тебѣ̀."
 },
 {
  "type": "HEADER",
  "value": "А҆пⷭ҇лъ къ тїмоѳе́ю зача́ло сч҃в, є҆вре́ємъ зача́ло т҃и."
 },
 {
  "type": "HEADER",
  "value": "Є҆ѵⷢ҇лїе ѿ і҆ѡа́нна зача́ло н҃в."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ."
 }
]