ponomar-pwa/static/data/shared/menaion-daily/05-21/3.json

[
 {
  "type": "HEADER",
  "value": "Ма́їа к҃а"
 },
 {
  "type": "HEADER",
  "value": "Ст҃а́гѡ благовѣ́рнагѡ кн҃зѧ кѡнстанті́на и҆ ча̑дъ є҆гѡ̀: мїхаи́ла и҆ ѳео́дѡра, мꙋ́ромскихъ чꙋдотво́рцєвъ."
 },
 {
  "type": "HEADER",
  "value": "Соверша́етсѧ собо́ръ и҆́хъ въ мꙋ́ромѣ."
 },
 {
  "type": "HEADER",
  "value": "Стїхи̑ры, гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "Прїиди́те, всѝ вѣ́рнїи, дꙋхо́внѡ торжествꙋ́емъ, прїиди́те, и҆ ᲂу҆слы́шите, є҆́же мы̀ ѡ҆брѣто́хомъ пресла́внѡ, въ гли́нныхъ сосꙋ́дѣхъ благода́ть кипѧ́щꙋю, ѿ грѡ́бъ ꙗ҆́вльшꙋюсѧ, блаже́ннагѡ кнѧ́зѧ кѡнстанті́на съ ча́ды, мїхаи́ломъ и҆ ѳео́дѡромъ. Къ ни̑мже вкꙋ́пѣ си́це возопїи́мъ: бл҃же́ннїи и҆ треблаже́ннїи, хрⷭ҇тꙋ̀ моли́тесѧ ѡ҆ гра́дѣ сро́дствїѧ ва́шегѡ, спастѝ и҆ просвѣти́ти дꙋ́шы на́шѧ."
 },
 {
  "type": "TEXT",
  "value": "Кто̀ не почꙋди́тсѧ, и҆лѝ кто̀ не похва́литъ, слы́шавъ вели́кꙋю сла́вꙋ, во всѣ́хъ страна́хъ пресла́внꙋю, бг҃оспаса́емагѡ гра́да мꙋ́рома, велича́ющасѧ и҆ вы́сѧщасѧ па́че и҆нѣ́хъ градѡ́въ, и҆мѣ́юща въ себѣ̀ бога́тство неѡскꙋдѣва́емо, и҆ сокро́вище неги́блемо, но́выхъ чꙋдотво́рцєвъ, кнѧ́зѧ кѡнстанті́на прехва́льнаго, съ мїхаи́ломъ и҆ ѳео́дѡромъ; къ ни̑мже молѧ́щесѧ глаго́лемъ: хрⷭ҇тꙋ̀ моли́тесѧ, спастѝ и҆ просвѣти́ти дꙋ́шы на́шѧ."
 },
 {
  "type": "TEXT",
  "value": "Ѽ вели́кое и҆ несказа́нное та́инство, є҆́же на́мъ ѿкры́сѧ на похвале́нїе, во всѣ́хъ страна́хъ! А҆́ще бо гдѣ̀ ꙗ҆ви́сѧ є҆ди́нъ свѣти́льникъ, мы́ же свы́ше ѡ҆брѣто́хомъ трїе́хъ вкꙋ́пѣ, сїѧ́ющихъ ꙗ҆́кѡ со́лнце, и҆ чꙋдеса̀ точа̑ща де́нь и҆ но́щь. Тогѡ̀ ра́ди къ ни́мъ возопїи́мъ, си́це глаго́люще: моли́тесѧ хрⷭ҇то́ви, блаже́ннїи, со всѣ́ми свѧты́ми є҆гѡ̀, спастѝ и҆ просвѣти́ти дꙋ́шы на́шѧ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Всѧ́чєскаѧ дне́сь и҆спо́лнишасѧ ра́дости и҆ весе́лїѧ, слы́шавше но́вое и҆ пресла́вное чꙋ́до, ꙗ҆́кѡ гра́дꙋ мꙋ́ромꙋ ѡ҆брѣ́тесѧ сво́й просвѣти́тель и҆ наста́вникъ, и҆ ᲂу҆чи́тель, благовѣ́рный кнѧ́зь кѡнстанті́нъ, и҆ два̀ сы̑на є҆гѡ̀, мїхаи́лъ и҆ ѳео́дѡръ, и҆зба́вльше на́съ ѿ пре́лести і҆́дѡльскїѧ, просвѣти́ша ст҃ы́мъ креще́нїемъ: къ ни̑мже вкꙋ́пѣ рце́мъ сликовствꙋ́юще си́це: сѐ вре́мѧ благопрїѧ́тно, сѐ де́нь спасе́нїѧ, сѐ цѣльба́мъ рѣ́ки точа́хꙋсѧ непреста́ннѡ. Тѣ́мъ хрⷭ҇тꙋ̀ молѧ́щесѧ, та́кѡ вопїе́мъ: гдⷭ҇и, моли́твами ст҃ы́хъ твои́хъ поми́лꙋй на́съ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Вхо́дъ. Прокі́менъ днѐ. Чтє́нїѧ г҃."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе."
 },
 {
  "type": "TEXT",
  "value": "Возлю́бленнїи, а҆́ще се́рдце на́ше не за́зритъ на́мъ, дерзнове́нїе и҆́мамы къ бг҃ꙋ. И҆ є҆гѡ́же а҆́ще про́симъ, прїе́млемъ ѿ негѡ̀, ꙗ҆́кѡ за́пѡвѣди є҆гѡ̀ соблюда́емъ, и҆ ᲂу҆гѡ́днаѧ предъ ни́мъ твори́мъ. И҆ сїѧ̀ є҆́сть за́повѣдь є҆гѡ̀, да вѣ́рꙋемъ во и҆́мѧ сн҃а є҆гѡ̀ і҆и҃са хрⷭ҇та̀, и҆ лю́бимъ дрꙋ́гъ дрꙋ́га, ꙗ҆́коже да́лъ є҆́сть за́повѣдь на́мъ. И҆ соблюда́ѧй за́пѡвѣди є҆гѡ̀, въ не́мъ пребыва́етъ, и҆ то́й въ не́мъ: и҆ ѡ҆ се́мъ разꙋмѣ́емъ, ꙗ҆́кѡ пребыва́етъ въ на́съ, ѿ дх҃а, є҆го́же да́лъ є҆́сть на́мъ. Возлю́бленнїи, не всѧ́комꙋ дꙋ́хꙋ вѣ́рꙋйте, но и҆скꙋша́йте дꙋ́хи, а҆́ще ѿ бг҃а сꙋ́ть: ꙗ҆́кѡ мно́зи лжепроро́цы и҆зыдо́ша въ мі́ръ. Ѡ҆ се́мъ познава́йте дх҃а бж҃їѧ и҆ дꙋ́ха ле́стча: всѧ́къ дꙋ́хъ, и҆́же и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а є҆́сть. И҆ всѧ́къ дꙋ́хъ, и҆́же не и҆сповѣ́дꙋетъ і҆и҃са хрⷭ҇та̀ во пло́ти прише́дша, ѿ бг҃а нѣ́сть: и҆ се́й є҆́сть а҆нті́хрїстовъ, є҆го́же слы́шасте, ꙗ҆́кѡ грѧде́тъ, и҆ ны́нѣ въ мі́рѣ є҆́сть ᲂу҆жѐ. Вы̀ ѿ бг҃а є҆стѐ, ча̑дца, и҆ побѣди́сте тѣ́хъ, ꙗ҆́кѡ бо́лїй є҆́сть, и҆́же въ ва́съ, не́жели и҆́же въ мі́рѣ. Ѻ҆нѝ ѿ мі́ра сꙋ́ть, сегѡ̀ ра́ди ѿ мі́ра глаго́лютъ, и҆ мі́ръ тѣ́хъ послꙋ́шаетъ. Мы̀ ѿ бг҃а є҆смы̀: и҆́же зна́етъ бг҃а, послꙋ́шаетъ на́съ: и҆ и҆́же нѣ́сть ѿ бг҃а, не послꙋ́шаетъ на́съ."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе."
 },
 {
  "type": "TEXT",
  "value": "Возлю́бленнїи, а҆́ще си́це возлюби́лъ є҆́сть на́съ бг҃ъ, и҆ мы̀ до́лжни є҆смы̀ дрꙋ́гъ дрꙋ́га люби́ти. Бг҃а никто́же нигдѣ́же ви́дѣ: а҆́ще дрꙋ́гъ дрꙋ́га лю́бимъ, бг҃ъ въ на́съ пребыва́етъ, и҆ любы̀ є҆гѡ̀ соверше́нна є҆́сть въ на́съ. Ѡ҆ се́мъ разꙋмѣ́емъ, ꙗ҆́кѡ въ не́мъ пребыва́емъ, и҆ то́й въ на́съ, ꙗ҆́кѡ ѿ дх҃а своегѡ̀ да́лъ є҆́сть на́мъ. И҆ мы̀ ви́дѣхомъ и҆ свидѣ́тельствꙋемъ, ꙗ҆́кѡ ѻ҆ц҃ъ посла̀ сн҃а, сп҃си́телѧ мі́рꙋ. И҆́же а҆́ще и҆сповѣ́сть, ꙗ҆́кѡ і҆и҃съ є҆́сть сн҃ъ бж҃їй, бг҃ъ въ не́мъ пребыва́етъ, и҆ то́й въ бз҃ѣ. И҆ мы̀ позна́хомъ и҆ вѣ́ровахомъ любо́вь, ю҆́же и҆́мать бг҃ъ въ на́съ: бг҃ъ любы̀ є҆́сть, и҆ пребыва́ѧй въ любвѝ, въ бз҃ѣ пребыва́етъ, и҆ бг҃ъ въ не́мъ пребыва́етъ."
 },
 {
  "type": "HEADER",
  "value": "Собо́рнагѡ посла́нїѧ і҆ѡа́ннова чте́нїе."
 },
 {
  "type": "TEXT",
  "value": "Возлю́бленнїи, а҆́ще кто̀ рече́тъ, ꙗ҆́кѡ люблю̀ бг҃а, а҆ бра́та своего̀ ненави́дитъ, ло́жъ є҆́сть: и҆́бо не любѧ́й бра́та своегѡ̀, є҆го́же ви́дѣ, бг҃а, є҆гѡ́же не ви́дѣ, ка́кѡ мо́жетъ люби́ти; И҆ сїю̀ за́повѣдь и҆́мамы ѿ негѡ̀, да любѧ́й бг҃а, лю́битъ и҆ бра́та своего̀. Всѧ́къ вѣ́рꙋѧй, ꙗ҆́кѡ і҆и҃съ є҆́сть хрⷭ҇то́съ, ѿ бг҃а рожде́нъ є҆́сть: и҆ всѧ́къ любѧ́й ро́ждшаго, лю́битъ и҆ рожде́ннаго ѿ негѡ̀. Ѡ҆ се́мъ вѣ́мы, ꙗ҆́кѡ лю́бимъ ча̑да бж҃їѧ, є҆гда̀ бг҃а лю́бимъ, и҆ за́пѡвѣди є҆гѡ̀ соблюда́емъ. Сїѧ́ бо є҆́сть любы̀ бж҃їѧ, да за́пѡвѣди є҆гѡ̀ соблюда́емъ, и҆ за́пѡвѣди є҆гѡ̀ тѧ̑жки не сꙋ́ть. Ꙗ҆́кѡ всѧ́къ рожде́нный ѿ бг҃а, побѣжда́етъ мі́ръ: и҆ сїѧ̀ є҆́сть побѣ́да побѣ́ждшаѧ мі́ръ, вѣ́ра на́ша. Кто́ є҆сть побѣжда́ѧй мі́ръ; то́кмѡ вѣ́рꙋѧй, ꙗ҆́кѡ і҆и҃съ є҆́сть сн҃ъ бж҃їй."
 },
 {
  "type": "HEADER",
  "value": "На стїхо́внѣ стїхи̑ры, гла́съ г҃."
 },
 {
  "type": "TEXT",
  "value": "Подо́бенъ: Ве́лїѧ крⷭ҇та̀."
 },
 {
  "type": "TEXT",
  "value": "Велича́вый паде́сѧ, и҆ рыда́ютъ всѧ̑ лꙋка̑ваѧ є҆гѡ̀ вѡ́инства, ви́дѧще вѣ́твь сꙋ́щꙋю, всели́чною си́лою бжⷭ҇твенною благоприсажда́емꙋ и҆ прославлѧ́емꙋ, и҆ свѣ́тлѡ вѣнчава́емꙋ ѿ бг҃а, вели́кагѡ кнѧ́зѧ кѡнстанті́на, нача́льника на́шегѡ."
 },
 {
  "type": "TEXT",
  "value": "Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Жестосе́рдїи бг҃а не разꙋмѣ́ша, и҆̀же вотщѐ шата́хꙋсѧ: ѿ лица́ же дне́сь мїхаи́ла и҆ ѳео́дѡра цр҃ковь и҆́хъ весели́тсѧ и҆ ра́дꙋетсѧ: хрⷭ҇то́съ бо поста́ви и҆́хъ кнѧ́зи землѝ свое́й."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь."
 },
 {
  "type": "TEXT",
  "value": "Вторы́й ты̀ бы́лъ є҆сѝ кѡнстанті́нъ ца́рь, дѣ́ломъ и҆ сло́вомъ и҆ и҆́менемъ, и҆ но́вомꙋ ᲂу҆подо́билсѧ є҆сѝ влади́мїрꙋ. Та́кожде и҆зрасти́лъ є҆сѝ на́мъ двѣ̀ ѻ҆́трасли, мїхаи́ла и҆ ѳео́дѡра: съ ни́миже молѝ ѡ҆ на́съ хрⷭ҇та̀, кнѧ́же кѡнстанті́не, чл҃вѣколю́бца."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Ꙗ҆́кѡ трⷪ҇цѣ побо́рницы, мїхаи́лъ и҆ ѳео́дѡръ, да похва́лѧтсѧ со ѻ҆тце́мъ и҆́хъ, со кнѧ́земъ кѡнстанті́номъ вкꙋ́пѣ, сицевы́ми глаго́лы: ра́дꙋйсѧ, мїхаи́ле, мꙋ́ромскаѧ похвало̀: ра́дꙋйсѧ, вѣ́рныхъ прави́телю, ѳео́дѡре блаже́нне: ра́дꙋйсѧ, кнѧ́же кѡнстанті́не, наста́вниче на́шъ, и҆ вѣ́ры на́шеѧ храни́телю, и҆ притека́ющихъ къ тебѣ̀ приста́нище ти́хое: ра́дꙋйсѧ, ко́реню вѣ́ры, и҆ моле́бниче молѧ́щихсѧ тебѣ̀, и҆ велича́ющихъ тѧ̀ вѣ́рнѡ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Кѡнстанті́нъ дне́сь ве́селѡ ликовствꙋ́етъ, предстоѧ̀ престо́лꙋ ст҃ы́ѧ трⷪ҇цы, ви́дѧ ѻ҆те́чествїе своѐ, ма́стїю дꙋхо́вною сїѧ́ющее: є҆мꙋ́же послѣ́доваша, мїхаи́лъ и҆ ѳео́дѡръ, сы́нове є҆гѡ̀, и҆ мо́лѧтсѧ всѝ трїѐ вкꙋ́пѣ ѡ҆ дꙋша́хъ на́шихъ."
 },
 {
  "type": "HEADER",
  "value": "На ᲂу҆́трени, по а҃-й стїхоло́гїи сѣда́ленъ, пра́здника. По в҃-й стїхоло́гїи сѣда́ленъ ст҃ы́хъ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й:"
 },
 {
  "type": "TEXT",
  "value": "Го́рдаго ѕмі́ѧ, на нб҃о положи́вшаго ᲂу҆ста̀, и҆ зе́млю потреби́ти хва́лѧщагосѧ, сла́вный кнѧ́зь кѡнстанті́нъ свѧты́мъ креще́нїемъ посрами́въ, вѣ́рꙋ ᲂу҆твердѝ, и҆ цє́ркви воздви́же въ сла́вꙋ хрⷭ҇та̀ бг҃а на́шегѡ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными моли́твами твои́ми."
 },
 {
  "type": "HEADER",
  "value": "По полѷеле́и сѣда́ленъ, гла́съ в҃."
 },
 {
  "type": "TEXT",
  "value": "Подо́бенъ: Бжⷭ҇твенныѧ вѣ́ры:"
 },
 {
  "type": "TEXT",
  "value": "Дне́сь а҆́гг҃ли бж҃їи ра́дꙋютсѧ на нб҃сѣ́хъ, въ пресвѣ́тлꙋю па́мѧть твою̀, кнѧ́же кѡнстанті́не сла́вне: спа́слъ бо є҆сѝ ѿ всѧ́кагѡ лꙋка́вствїѧ и҆ же́ртвъ де́мѡнскихъ гра́дъ и҆ лю́ди. И҆ ны́нѣ молѝ съ ча́ды хрⷭ҇та̀ бг҃а, дарова́ти на́мъ ве́лїю ми́лость. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ра́дꙋйсѧ, дв҃о мт҃и, горо̀ ст҃а́ѧ, є҆де́мскїй раю̀, и҆зъ неѧ́же роди́сѧ хрⷭ҇то́съ бг҃ъ безсѣ́менное сло́во, и҆́мже жи́знь мі́рови прозѧбѐ."
 },
 {
  "type": "HEADER",
  "value": "Степє́нна, а҃ а҆нтїфѡ́нъ д҃-гѡ гла́са."
 },
 {
  "type": "TEXT",
  "value": "Прокі́менъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь."
 },
 {
  "type": "TEXT",
  "value": "Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе і҆ѡа́нна, зача́ло л҃ѕ."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "Ве́тхꙋю пре́лесть бѣсо́вскꙋю прогна́въ, ꙗ҆́кѡ хрⷭ҇то́въ ᲂу҆го́дникъ, и҆ ѡ҆бнови́въ, просвѣти́лъ є҆сѝ всѣ́хъ на́съ ст҃ы́мъ креще́нїемъ, царю̀ кѡнстанті́нꙋ и҆ кнѧ́зю влади́мїрꙋ поревнова́въ. Сегѡ̀ ра́ди немо́лчнѡ вопїе́мъ тѝ си́це: ра́дꙋйсѧ, кнѧ́же кѡнстанті́не пресла́вне мꙋ́ромскїй, и҆зрасти́вый на́мъ двѣ̀ ѻ҆́трасли пречє́стны, кнѧ́зѧ мїхаи́ла и҆ кнѧ́зѧ ѳео́дѡра: съ ни́миже моли́сѧ ны́нѣ хрⷭ҇тꙋ̀ бг҃ꙋ ѡ҆ дꙋша́хъ на́шихъ."
 },
 {
  "type": "HEADER",
  "value": "Канѡ́нъ, творе́нїе господи́на мона́ха мїхаи́ла но́вагѡ. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ."
 },
 {
  "type": "TEXT",
  "value": "Воспою́ ти, гдⷭ҇и бж҃е мо́й, пѣ́снь дꙋхо́внꙋю, сла́вѧ кнѧ́зѧ кѡнстанті́на мꙋ́ромскаго съ ча́ды, мїхаи́ломъ и҆ ѳео́дѡромъ вкꙋ́пѣ."
 },
 {
  "type": "TEXT",
  "value": "И҆́же да́рꙋѧ сѣ́мена сѣ́ющемꙋ, ты̀ мнѣ̀ да́рꙋй благода́ти ра́зꙋмъ, и҆ разрѣши́въ сою́зъ ѧ҆зы́ка, ѡ҆бнови́ мѧ, сп҃се, къ славосло́вїю блаже́нныхъ твои́хъ."
 },
 {
  "type": "TEXT",
  "value": "И҆збра́лъ є҆́сть влⷣка своемꙋ̀ ста́дꙋ хрⷭ҇то́съ кро́ткаго царѧ̀ і҆и҃лю: то́йже и҆ тебѐ и҆збра́лъ є҆́сть вѣ́рнаго кнѧ́зѧ но́вомꙋ і҆и҃лю."
 },
 {
  "type": "TEXT",
  "value": "Бг҃оро́диченъ: Невѣ́стникъ свѣтови́дѣнъ показа́сѧ чре́во твоѐ, ѻ҆трокови́це, за милосе́рдїе и҆зъ тебє̀ вопло́щшагѡсѧ, и҆ всѣ́хъ бг҃оразꙋ́мїѧ заре́ю просвѣти́вшагѡ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ."
 },
 {
  "type": "TEXT",
  "value": "Прїиди́те, цѣломꙋ́дрїѧ рачи́тели, честнꙋ́ю тро́ицꙋ почти́мъ, мїхаи́ла и҆ ѳео́дѡра съ кѡнстанті́номъ вкꙋ́пѣ, ст҃ꙋ́ю трⷪ҇цꙋ возлюби́вшыѧ чи́стымъ се́рдцемъ, и҆ дꙋше́ю соверше́нною."
 },
 {
  "type": "TEXT",
  "value": "Ѿ ко́рене че́стна и҆зра́стше сла́внїи, бра́тїе благоро́днїи, мїхаи́ле и҆ ѳео́дѡре, помоли́тесѧ со ѻ҆тце́мъ ва́шимъ кнѧ́земъ кѡнстанті́номъ хрⷭ҇тꙋ̀ бг҃ꙋ ѡ҆ творѧ́щихъ па́мѧть ва́шꙋ."
 },
 {
  "type": "TEXT",
  "value": "Прїиди́те, новокреще́ннїи рѡссі́йстїи собо́ри, цѣлꙋ́йте любе́знѡ честнꙋ́ю ра́кꙋ блаже́ннагѡ кѡнстанті́на кнѧ́зѧ, пе́рвагѡ просвѣти́телѧ пресла́внагѡ гра́да мꙋ́рома."
 },
 {
  "type": "TEXT",
  "value": "Бг҃оро́диченъ: Тѧ̀ предста́тельницꙋ тве́рдꙋ, бг҃ороди́тельнице, стѧжа́хомъ, и҆ ᲂу҆пова́нїе на тѧ̀ возло́жше спаса́емсѧ, и҆ къ тебѣ̀ прибѣга́юще ѡ҆гражда́емсѧ."
 },
 {
  "type": "HEADER",
  "value": "Сѣда́ленъ, гла́съ в҃."
 },
 {
  "type": "TEXT",
  "value": "Подо́бенъ: Вели̑чїѧ твоѧ̑:"
 },
 {
  "type": "TEXT",
  "value": "Спаса́ѧ пре́жде гдⷭ҇ь і҆и҃лѧ ѿ рабо́ты, то́йже и҆ ны́нѣ рꙋко́ю кнѧ́зѧ кѡнстанті́на съ ча́ды, всѣ́хъ на́съ ѿ пре́лести і҆́дѡльскїѧ и҆зба́ви. Тѣ́мже молѧ́щесѧ вопїе́мъ къ ни̑мъ си́це: моли́те, блаже́ннїи, спасти́сѧ на́мъ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Мт҃и ст҃а́ѧ неизрече́ннагѡ свѣ́та, а҆́гг҃льскими тѧ̀ пѣ́сньми почита́юще, благоче́стнѡ велича́емъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ сла́вное смотре́нїе твоѐ, хрⷭ҇тѐ бж҃е, ꙗ҆́кѡ роди́лсѧ є҆сѝ ѿ дв҃ы, да ѿ ле́сти и҆зба́виши зовꙋ́щыѧ: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Є҆ле́ны ты̀ но́выѧ и҆ кѡнстанті́на правовѣ́рнагѡ и҆ влади́мїра прехва́льнагѡ вожделѣ́въ добродѣ́тєли, кѡнстанті́не кнѧ́же досточꙋ́дне, ны́нѣ зове́ши съ ча́ды твои́ми: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Лю́тѡ двиза́шесѧ льсте́цъ хрⷭ҇тїа́ны воева́ти, превели́кїй же гдⷭ҇ь показа́ тѧ сла́вна ст҃ы́мъ креще́нїемъ: тобо́ю бо ѻ҆те́чество твоѐ просвѣти́вшисѧ ѿ негѡ̀, и҆́же тебѣ̀ црⷭ҇тво своѐ подадѐ."
 },
 {
  "type": "TEXT",
  "value": "Всеꙋсе́рднѡ послѣ́дꙋѧ ѻ҆те́чєскимъ стопа́мъ, ревни́телѧ и҆мꙋ́ща до́бромꙋ, мїхаи́ле сла́вне, ѳео́дѡра при́снаго бра́та твоего̀: благоче́стїемъ бо совокꙋ́плени дꙋша́ми и҆ тѣлесы̀ ꙗ҆ви́стесѧ."
 },
 {
  "type": "TEXT",
  "value": "Бг҃оро́диченъ: Воплоще́нна тѧ̀, гдⷭ҇и, ѿ неискꙋсобра́чныѧ ѻ҆трокови́цы возжелѣ́вше, въ воню̀ мѵ́ра твоегѡ̀ потеко́ша, ѻ҆те́цъ съ ча́ды, твои́мъ снѣда́еми бжⷭ҇твеннымъ любле́нїемъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ѿ свѣ́та пресѣкі́й перворо́дный свѣ́тъ, ꙗ҆́кѡ во свѣ́тѣ дѣла̀ пою́тъ тѧ̀, хрⷭ҇тѐ, содѣ́телѧ, во свѣ́тѣ твое́мъ пꙋти̑ на́шѧ напра́ви."
 },
 {
  "type": "TEXT",
  "value": "Ѿ безбо́жныхъ і҆́дѡлъ всѧ̑ и҆зба́вилъ є҆сѝ, и҆ ко хрⷭ҇тꙋ̀ бг҃ꙋ приве́лъ є҆сѝ, ѻ҆́ч҃е, вѣ̑рныѧ кнѧ́зи ча̑да твоѧ̑, мїхаи́ла и҆ ѳео́дѡра, и҆ всѧ̑ лю́ди нѡ́выѧ гра́да мꙋ́рома, кѡнстанті́не."
 },
 {
  "type": "TEXT",
  "value": "Ꙗ҆́кѡ ѻ҆тца̀ благочести́ва любо́вїю свѧ́зани, и҆ того̀ лю́бѧще благоче́стнѡ, свѣ́тлостїю въ ва́шемъ ѻ҆те́чествїи сїѧ́ете ꙗ҆́кѡ со́лнце, мїхаи́ле вкꙋ́пѣ и҆ ѳео́дѡре."
 },
 {
  "type": "TEXT",
  "value": "Кѡнстанті́нъ ты̀ но́вый ꙗ҆ви́лсѧ є҆сѝ, влади́мїрꙋ подо́бѧсѧ и҆звѣсти́лсѧ є҆сѝ вселе́ннѣй: ѿ всѣ́хъ бо родѡ́въ тѧ̀ бг҃ъ и҆збра́въ пре́жде вѣ̑къ въ послѣ̑днїѧ дни̑, кнѧ́же."
 },
 {
  "type": "TEXT",
  "value": "Бг҃оро́диченъ: Тѧ̀ ѻ҆рꙋ́жїе непобѣди́мое на врагѝ предлага́емъ, тѧ̀ ѡ҆снова́нїе и҆ наде́ждꙋ на́шегѡ спасе́нїѧ, бг҃оневѣ́стнаѧ, и҆́мамы."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Внегда̀ скорбѣ́ти мѝ, возопи́хъ ко гдⷭ҇ꙋ, и҆ ᲂу҆слы́ша мѧ̀ бг҃ъ спасе́нїѧ моегѡ̀."
 },
 {
  "type": "TEXT",
  "value": "Цр҃ю̀ вѣ́чномꙋ ны́нѣ ты̀ предстои́ши, кнѧ́же кѡнстанті́не, десни́цею є҆гѡ̀ вѣнча́нъ є҆сѝ, помоли́сѧ є҆мꙋ̀ за ны̀ недостѡ́йныѧ."
 },
 {
  "type": "TEXT",
  "value": "Ю҆́ношески хра́бровавше, мꙋ́жески пре́лесть возненави́дѣсте мра́чныхъ і҆́дѡлѡвъ, ѻ҆́ч҃ее наказа́нїе прїи́мше, веселите́сѧ ны́нѣ."
 },
 {
  "type": "TEXT",
  "value": "Кѡнстанті́нъ кнѧ́зь пѣ́тъ да бꙋ́детъ съ мїхаи́ломъ сла́внымъ, и҆ съ ѳео́дѡромъ чꙋ́днымъ: ꙗ҆ви́шасѧ бо просвѣти́тели и҆ храни́тели гра́дꙋ на́шемꙋ."
 },
 {
  "type": "TEXT",
  "value": "Бг҃оро́диченъ: Всю̀ тѧ̀ голꙋби́цꙋ предобрꙋ̀, и҆ свѣ́телъ крі́нъ ѡ҆брѣ́тъ, и҆ ᲂу҆до́льный цвѣ́тъ, ѽ бг҃ома́ти! Жени́хъ мы́сленный въ тѧ̀ всели́сѧ."
 },
 {
  "type": "HEADER",
  "value": "Конда́къ, гла́съ и҃."
 },
 {
  "type": "TEXT",
  "value": "Подо́бенъ: Взбра́нной:"
 },
 {
  "type": "TEXT",
  "value": "И҆зрѧ́дномꙋ воево́дѣ, и҆ правовѣ́рномꙋ кнѧ́зю кѡнстанті́нꙋ, съ сыно́ма є҆гѡ̀ вкꙋ́пѣ, ѻ҆те́чество є҆гѡ̀ хва́лѧщесѧ вопїе́тъ, и҆мѣ́ющее є҆го̀ нача́льника и҆ застꙋ́пника, ꙗ҆́кѡ и҆зба́вльшесѧ и҆́мъ ѿ пре́лести и҆ скве́рны і҆́дѡльскїѧ. Сегѡ̀ ра́ди вопїе́мъ є҆мꙋ̀ си́це: ра́дꙋйсѧ, кнѧ́же кѡнстанті́не пребл҃же́нне."
 },
 {
  "type": "TEXT",
  "value": "І҆́косъ: А҆́гг҃лъ пло́тїю ѡ҆дѣ́ѧнъ на землѝ ꙗ҆ви́сѧ, по́сланъ ѿ бг҃а ᲂу҆гото́вати бжⷭ҇твенный пра́вый пꙋ́ть, и҆́же совершѝ си́лою гдⷭ҇нею. Дивлѧ́хꙋсѧ бо и҆ ра́довахꙋсѧ нбⷭ҇нїи чи́нове, и҆ вопїѧ́хꙋ съ земны́ми си́це: ра́дꙋйсѧ, є҆гѡ́же ра́ди вѣ́ра гдⷭ҇нѧ провозсїѧ̀: ра́дꙋйсѧ, пра́выѧ вѣ́ры ᲂу҆крѣпи́телю: ра́дꙋйсѧ, беззако́нныѧ ле́сти потреби́телю: ра́дꙋйсѧ, высото̀ добродѣ́тели, до нб҃сѐ досѧза́ющаѧ: ра́дꙋйсѧ, позна́вый ст҃ꙋ́ю бцⷣꙋ мр҃і́ю: ра́дꙋйсѧ, ꙗ҆́кѡ є҆сѝ вѣ̑рнымъ кнѧ́зь: ра́дꙋйсѧ, ми́лостынею бг҃а ѡ҆должи́вый: ра́дꙋйсѧ, свѣщѐ, тмꙋ̀ просвѣща́ющаѧ: ра́дꙋйсѧ, со́лнце ѡ҆сꙋша́ющо невѣ́рїе: ра́дꙋйсѧ, ꙗ҆́кѡ тобо́ю наставлѧ́еми, покланѧ́емсѧ своемꙋ̀ творцꙋ̀: ра́дꙋйсѧ, кнѧ́же кѡнстанті́не преблаже́нне."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Ꙗ҆́сныѧ ѕвѣ́зды, на тве́рди нбⷭ҇нѣй водрꙋзи́вшесѧ, трⷪ҇цы равночи́сленнїи, кнѧ́зь кѡнстанті́нъ съ ча́ды, зе́млю чꙋдесы̀ неле́стнѡ просвѣща́ютъ."
 },
 {
  "type": "TEXT",
  "value": "Ꙗ҆́кѡ но́ваѧ вѣ́твь ко́рене бг҃онасажде́нна, кнѧ́зь кѡнстанті́нъ, но́вый влади́мїръ ꙗ҆ви́сѧ: ꙗ҆́коже ко ѻ҆́нъ и҆зрастѝ двѣ̀ ѻ҆́трасли, рѡма́на и҆ даві́да: се́й же мїхаи́ла и҆ ѳео́дѡра."
 },
 {
  "type": "TEXT",
  "value": "Пресла́внѡ просла́висѧ бж҃їѧ благода́ть, самобра́тнею любо́вїю мїхаи́ла и҆ ѳео́дѡра, ꙗ҆́кѡ и҆ по сме́рти неразлꙋ́чни бѣ́хꙋ: но и҆ дꙋ́шы и҆ тѣлеса̀ вкꙋ́пѣ и҆мꙋ́ща лежа́тъ."
 },
 {
  "type": "TEXT",
  "value": "Бг҃оро́диченъ: Преꙋкра́шена бж҃їею сла́вою ꙗ҆ви́ласѧ є҆сѝ чⷭ҇таѧ є҆ди́на ѿ вѣ́ка, сло́во бж҃їе прїе́мши, дв҃о мт҃и. Тѣ́мже бл҃гослове́нна ты̀ въ жена́хъ, пренепоро́чнаѧ влⷣчце."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Во ѻ҆́бразѣ а҆́гг҃ла, ꙗ҆́вльшагосѧ въ пещѝ ѻ҆́гненнѣй пѣсносло́вцємъ, хрⷭ҇та̀ бг҃а по́йте ѻ҆́троцы, свѧще́нницы благослови́те, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Разꙋ́мнѡ житїѐ соверша́ѧ, ца́рскимъ вѣнце́мъ ѿ ю҆́ности ᲂу҆кра́шенъ, всесла́вный кнѧ́же кѡнстанті́не: ве́лїѧ сла́ва є҆сѝ твоемꙋ̀ ѻ҆те́чествꙋ и҆ похвала̀."
 },
 {
  "type": "TEXT",
  "value": "Со́лнца свѣтлѣ́йши ꙗ҆ви́сѧ па́мѧть ва́ша, блаже́ннїи, блиста́ющи благода́тїю ст҃а́гѡ дх҃а, ва́съ пою́щихъ, мїхаи́ле и҆ ѳео́дѡре, со ѻ҆тце́мъ кѡнстанті́номъ вкꙋ́пѣ."
 },
 {
  "type": "TEXT",
  "value": "На землѝ ᲂу҆́бѡ положе́ни бы́сте ꙗ҆́кѡ ме́ртви: но на нб҃сѝ ликовствꙋ́ете со а҆́гг҃лы, вели́кихъ дарѡ́въ ѿ хрⷭ҇та̀ сподо́бльшесѧ, дꙋ́хи нечи̑стыѧ и҆ бѡлѣ́зни прогони́ти."
 },
 {
  "type": "TEXT",
  "value": "Бг҃оро́диченъ: И҆зба́ви страсте́й дꙋшепа́гꙋбныхъ, и҆ плєни́цы прегрѣше́нїй расто́ргни, и҆́миже соплето́хомсѧ: вси́ бо согрѣ́шшїи ѡ҆чище́нїѧ про́симъ, пода́ти, бцⷣе, мольба́ми твои́ми свобо́дꙋ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бжⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. Тѧ̀, бцⷣе, тѣ́мъ всѝ велича́емъ."
 },
 {
  "type": "TEXT",
  "value": "Ли́цы люде́й рѡссі́йскихъ предстоѧ́тъ тѝ ны́нѣ, молѧ́щесѧ прилѣ́жнѡ, кнѧ́же кѡнстанті́не премꙋ́дре, помоли́сѧ ѡ҆ всѣ́хъ на́съ вседержи́телю бг҃ꙋ, въ трⷪ҇цѣ того̀ велича́ющихъ."
 },
 {
  "type": "TEXT",
  "value": "Сы́нове рѡссі́йстїи, прїиди́те, стеце́мсѧ къ пречестнѣ́й цр҃кви но́выхъ чꙋдотво́рцєвъ, кнѧ́зѧ кѡнстанті́на, ᲂу҆го́дника хрⷭ҇то́ва, и҆ сынѡ́въ є҆гѡ̀ мїхаи́ла и҆ ѳео́дѡра, и҆ похва́льными пѣ́сньми си́хъ возвели́чите."
 },
 {
  "type": "TEXT",
  "value": "Возше́дъ ны́нѣ, къ немꙋ́же возжелѣ́лъ є҆сѝ, ѡ҆чи́стивъ лю́ди твоѧ̑ ѿ і҆дѡлослꙋже́нїѧ, и҆ просвѣти́въ ст҃ы́мъ креще́нїемъ, хвалѧ́сѧ пое́ши, кнѧ́же кѡнстанті́не съ ча́ды, си́це глаго́лѧ: сѐ а҆́зъ, гдⷭ҇и, и҆ дѣ́ти моѧ̑."
 },
 {
  "type": "TEXT",
  "value": "Бг҃оро́диченъ: Пло́тїю прїитѝ восхотѣ́въ, ᲂу҆краси́вый сло́вомъ всѧ̑, и҆ тѧ̀ є҆ди́нꙋ ст҃ѣ́йшꙋ всѣ́хъ ѡ҆брѣ́тъ, бцⷣꙋ показа̀ и҆́стиннꙋю, мт҃и дв҃о: є҆го́же съ тобо́ю всѝ велича́емъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Посѣти́лъ ны̀ є҆́сть:"
 },
 {
  "type": "TEXT",
  "value": "Прїиди́те, всѝ вѣ́рнїи, похвала́ми соше́дшесѧ возвели́чимъ кнѧ́зѧ кѡнстанті́на съ мїхаи́ломъ и҆ ѳео́дѡромъ. Сі́и бо ꙗ҆ви́шасѧ трⷪ҇цы равночи́сленнїи, и҆ а҆́гг҃лѡмъ ссе́льницы: съ ни́миже мо́лѧтсѧ ны́нѣ є҆́й ѡ҆ дꙋша́хъ на́шихъ. Два́жды."
 },
 {
  "type": "HEADER",
  "value": "На хвали́техъ стїхи̑ры, на д҃, гла́съ ѕ҃."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Крⷭ҇тъ ꙗ҆́кѡ ѻ҆рꙋ́жїе держа́внѡ рꙋка́ма носѧ̀, вѣ́рꙋ ꙗ҆́кѡ щи́тъ, наде́ждꙋ ꙗ҆́кѡ бронѧ̀, любо́вь ꙗ҆́кѡ лꙋ́къ, воѡрꙋжи́лсѧ є҆сѝ на пре́лесть мꙋ́жески, и҆ всѧ̑ лю́ди твоѧ̑ наꙋчи́лъ є҆сѝ, покланѧ́тисѧ є҆ди́номꙋ бг҃ꙋ въ трⷪ҇цѣ. Є҆мꙋ́же со дерзнове́нїемъ, кнѧ́же кѡнстанті́не, съ ча́ды моли́сѧ ѡ҆ дꙋша́хъ на́шихъ. Два́жды."
 },
 {
  "type": "TEXT",
  "value": "Бога́тство ѡ҆ста́вльше земно́е, ѻ҆те́ческомꙋ послѣ́довасте благоче́стїю, мїхаи́ле бл҃же́нне съ ѳео́дѡромъ сла́внымъ, и҆ сла́вꙋ тлѣ́ющꙋю нивочто́же вмѣни́вше, вы́шнѧгѡ наслѣ́дїѧ сподо́бистесѧ, и҆ та́мѡ со а҆́гг҃лы предстоитѐ ст҃ѣ́й трⷪ҇цѣ: є҆́йже со дерзнове́нїемъ моли́тесѧ ѡ҆ дꙋша́хъ на́шихъ."
 },
 {
  "type": "TEXT",
  "value": "А҆пⷭ҇лѡмъ є҆диноревни́телѧ, сего̀ кнѧ́зѧ кѡнстанті́на прехва́льнаго, ѻ҆тца̀ и҆ ᲂу҆чи́телѧ гра́да мꙋ́рома, соше́дшесѧ восхва́лимъ, ѿ тмы̀ къ свѣ́тꙋ прибли́жившесѧ, ѻ҆́чи и҆ сердца̀ ѡ҆чи́стивше, па́мѧть є҆гѡ̀ воспое́мъ, ѡ҆брѣ́тше того̀ съ ча́ды, правовѣ́рна вожда̀ въ црⷭ҇тво нбⷭ҇ное."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Ра́достнѡ всѝ пра́зднꙋюще дне́сь па́мѧть блаже́нныхъ, пѣ́сньми си́хъ и҆ хвала́ми просла́вимъ, и҆ сп҃са хрⷭ҇та̀ бг҃а возвели́чимъ, и҆́же на землѝ ᲂу҆дивѝ си́хъ чꙋдесы̀ и҆ цѣльба́ми пресла́вными. Къ ни́мже взыва́юще си́це глаго́лемъ: ра́дꙋйтесѧ, блаже́ннїи, бл҃года́ть ѿ бг҃а прїе́мше, всѧ̑ стра̑сти и҆ болѣ̑зни и҆сцѣлѧ́ти. Ра́дꙋйсѧ, кѡнстанті́не чꙋ́дне, съ мїхаи́ломъ сла́внымъ и҆ ѳео́дѡромъ вели́кимъ хрⷭ҇тꙋ̀ бг҃ꙋ молѧ́щесѧ, и҆зба́витисѧ на́мъ ѿ вра̑гъ ви́димыхъ и҆ неви́димыхъ, и҆ спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "HEADER",
  "value": "На лїтꙋргі́и блажє́нна, пра́здника пѣ́снь рѧдова́ѧ: и҆ ст҃ы́хъ пѣ́снь ѕ҃, на д҃."
 },
 {
  "type": "HEADER",
  "value": "Прокі́менъ, гла́съ и҃:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю:"
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло с҃."
 },
 {
  "type": "TEXT",
  "value": "А҆ллилꙋ́їа, гла́съ а҃: Вознесо́хъ и҆збра́ннаго ѿ люде́й мои́хъ."
 },
 {
  "type": "TEXT",
  "value": "Сті́хъ: Гдⷭ҇и, си́лою твое́ю возвесели́тсѧ ца́рь."
 },
 {
  "type": "HEADER",
  "value": "Є҆ѵⷢ҇лїе і҆ѡа́нна, зача́ло л҃є ѿ полꙋ̀."
 },
 {
  "type": "TEXT",
  "value": "Прича́стенъ: Во всю̀ зе́млю:"
 }
]