ponomar-pwa/static/data/shared/menaion-add/19.json

[
 {
  "type": "HEADER",
  "value": "Деке́мврїа г҃і"
 },
 {
  "type": "HEADER",
  "value": "Ст҃а́гѡ свѧщенномꙋ́ченика гаврїи́ла, патрїа́рха се́рбскагѡ."
 },
 {
  "type": "HEADER",
  "value": "На вели́цѣй вече́рни, Бл҃же́нъ мꙋ́жъ, а҆нтїфѡ́нъ а҃. На Гдⷭ҇и, воззва́хъ: стїхи̑ры на и҃, гла́съ ѕ҃. Самогла́сны:"
 },
 {
  "type": "TEXT",
  "value": "Безкро́внꙋю же́ртвꙋ приноси́лъ є҆сѝ бг҃ꙋ, ꙗ҆́кѡ зако́ннѣйшїй первопрⷭ҇то́льникъ се́рбскїѧ це́ркве хрⷭ҇то́вы, и҆ бы́лъ є҆сѝ предста́тель теплѣ́йшїй ро́да се́рбскагѡ, просвѣща́ѧ є҆го̀ свѣ́томъ непристꙋ́пнымъ, и҆ приводѧ̀ всѣ́хъ хрⷭ҇тꙋ̀ пастыренача́льникꙋ."
 },
 {
  "type": "TEXT",
  "value": "Водрꙋже́нъ на ка́мени тве́рдыѧ вѣ́ры хрⷭ҇то́вы, ника́коже поколеба́лсѧ є҆сѝ ласка̑нїи беззако́нныхъ а҆га̑рѧнъ, нижѐ прило́ги болѣ́зненными, но тве́рдымъ по́мысломъ и҆ ра́достнымъ се́рдцемъ бл҃годерзнꙋ́лъ є҆сѝ вои́стиннꙋ къ по́двигомъ, тѣ́мже и҆ вѣнцы̀ небє́сныѧ сла́вы воспрїѧ́лъ є҆сѝ, ѻ҆́тче гаврїи́ле приснопа́мѧтне."
 },
 {
  "type": "TEXT",
  "value": "Крѣ́постїю дх҃о́вною препоѧ́санъ, бг҃оно́се ѻ҆́тче гаврїи́ле, низложи́лъ є҆сѝ крѣ́пости льсти́вагѡ, не ᲂу҆боѧ́всѧ мꙋчи́тельныхъ болѣ́зней ни нꙋ́ждныѧ сме́рти, ꙗ҆́же безбо́жное со́нмище подви́же на тѧ̀, но со дерзнове́нїемъ хрⷭ҇та̀ и҆сповѣ́далъ є҆сѝ, и҆́же и҆ всели́ тѧ въ црⷭ҇тво нбⷭ҇ное, и҆дѣ́же ликꙋ́еши при́снѡ со всѣ́ми свѧты́ми."
 },
 {
  "type": "HEADER",
  "value": "И҆́ны стїхи̑ры, гла́съ в҃:"
 },
 {
  "type": "TEXT",
  "value": "Кі́ими дх҃о́вными похвала́ми восхва́лимъ бл҃же́ннаго гаврїи́ла, до́блѧ во ст҃и́телехъ, и҆́же бы́сть па́стырь до́брый и҆ ᲂу҆чи́тель те́плый, но и҆ страстоте́рпецъ за хрⷭ҇та̀, и҆́бо житїѐ своѐ мч҃нчески сконча̀, тѣ́мъ и҆ вѣнце́мъ цр҃скимъ ѿ бг҃а вѣнча́нъ бы́сть, и҆ ны́нѣ на нб҃сѝ мо́литъ ѡ҆ всѣ́хъ съ вѣ́рою и҆ любо́вїю чтꙋ́щихъ ст҃ꙋ́ю па́мѧть є҆гѡ̀."
 },
 {
  "type": "TEXT",
  "value": "Кі́ими достодо́лжными пѣ́сньми соста́вимъ бл҃гопрїѧ́тенъ ли́къ, къ прославле́нїю бг҃оно́снагѡ ѻ҆ц҃а̀ гаврїи́ла, правосла́вїѧ наста́вника, чистоты̀ и҆ бл҃гоче́стїѧ ᲂу҆чи́телѧ, до́блѧгѡ стрⷭ҇тоте́рпца хрⷭ҇то́ва, є҆го́же по сме́рти чꙋдесы̀ просла́ви хрⷭ҇то́съ бг҃ъ на́шъ, и҆мѣ́ѧй ве́лїю ми́лость."
 },
 {
  "type": "TEXT",
  "value": "Кі́ими похва́льными добро́тами ᲂу҆вѧзе́мъ свѣ́тлаго свѧщенномꙋ́ченика гаврїи́ла, патрїа́рха се́рбскагѡ, и҆́же ѿ свои́хъ ѡ҆бо́лганъ бы́сть, ѿ а҆га̑рѧнъ же непра́веднѡ ѡ҆сꙋжде́нъ и҆ повѣ́шенъ, сегѡ̀ ра́ди нетлѣ́нное црⷭ҇тво на нбⷭ҇ѣ́хъ воспрїѧ́лъ є҆́сть, въ не́мже ны́нѣ ра́дꙋѧсѧ предстои́тъ хрⷭ҇тꙋ̀, є҆го́же мо́литъ дарова́ти дꙋша́мъ на́шымъ ми́ръ и҆ ве́лїю ми́лость."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Прїиди́те лю́дїе во свѧты́й хра́мъ се́й, и҆дѣ́же дне́сь возно́ситсѧ сла́ва бг҃ꙋ на нбⷭ҇ѣ́хъ, и҆ пое́тсѧ хвала̀ сщ҃енномꙋ́ченикꙋ гаврїи́лꙋ, патрїа́рхꙋ се́рбскомꙋ, є҆го́же ни грѡ́знаѧ прещє́нїѧ, ни льсти́тєльнаѧ ласка̑нїѧ мꙋчи́телева, ѿ хрⷭ҇та̀ разлꙋчи́ти возмого́ша, но де́рзостнѡ гл҃го́летъ къ мꙋчи́телю: а҆́зъ непови́ненъ є҆́смь, хрⷭ҇та́ же гдⷭ҇а моегѡ̀ не восхощꙋ̀ ѿрещи́сѧ до́ндеже є҆́смь, до́ндеже ра́зꙋмъ и҆мѣ́ю. Всѧ̑ по́чести ва́шѧ и҆ бога́тства возми́те себѣ̀, а҆́зъ не тре́бꙋю и҆́хъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Цр҃ь нб҃е́сный:"
 },
 {
  "type": "HEADER",
  "value": "Вхо́дъ. Прокі́менъ днѐ, и҆ чтє́нїѧ трѝ."
 },
 {
  "type": "HEADER",
  "value": "На лїті́и стїхи́ра хра́ма, и҆ свѧщенномꙋ́ченика, гла́съ а҃:"
 },
 {
  "type": "TEXT",
  "value": "Весели́тсѧ дне́сь це́рковь хрⷭ҇то́ва, торжествꙋ́етъ патрїархі́а се́рбскаѧ, пою́щи по́двиги твоѧ̑, ѱалмы̀ и҆ каждє́нїи чтꙋ́ще ᲂу҆́зы твоѧ̑, чествꙋ́юще пе́рсть моще́й твои́хъ, ꙗ҆́кѡ а҆рѡма́ты мѷропома́заннꙋю, свѧще́нными твои́ми страда́ньми, гаврїи́ле приснопа́мѧтне."
 },
 {
  "type": "TEXT",
  "value": "Любо́вїю хрⷭ҇то́вою вельмѝ горѧ̀, до́блественнѡ за хрⷭ҇та̀ ревнова́лъ є҆сѝ, мꙋчи́телей прещє́нїѧ ни во что́же вмѣни́въ мно́гїѧ бѣды̑ претерпѣ́лъ є҆сѝ, послѣди́ же непра́ведное ѡ҆сꙋжде́нїе и҆ нꙋ́жднꙋю сме́рть, свѧщенномч҃ниче гаврїи́ле досточꙋ́дне, но свѧще́нными страда́ньми твои́ми ѡ҆зарѧ́еши всю̀ странꙋ̀ се́рбскꙋю, и҆ просвѣща́еши всѧ̑ земны̑ѧ концы̀."
 },
 {
  "type": "HEADER",
  "value": "Сла́ва, гла́съ д҃:"
 },
 {
  "type": "TEXT",
  "value": "Преднаписа̀ свѧще́нный ѻ҆́бразъ свѧще́нныхъ нра́вѡвъ твои́хъ бг҃оглаго́ливый па́ѵелъ, є҆гда̀ речѐ: тако́въ на́мъ подоба́етъ а҆рхїере́й, прпⷣбенъ, вѣ́ренъ, неѕло́бивъ, нескве́рненъ, да си́ленъ бꙋ́детъ во здра́вѣмъ ᲂу҆че́нїи ᲂу҆тѣша́ти, проти́вѧщыѧсѧ же ѡ҆блича́ти. Ты́ бо самѣ́ми дѣ́лы сло́во сїѐ и҆спо́лнилъ є҆сѝ, на послѣ́докъ и҆ нꙋ́жднꙋю сме́рть воспрїѧ́въ, всели́лсѧ є҆сѝ въ црⷭ҇тво нбⷭ҇ное."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Вѣ́дѧще тѧ̀ всѣ́хъ бы́вшихъ цр҃и́цꙋ, сла́вимъ тѧ̀ при́снѡ, бг҃ома́ти всепѣ́таѧ, ра́дости вина̀ была̀ є҆сѝ на́мъ, и҆ весе́лїѧ и҆́стиннагѡ, бг҃а бо родила̀ є҆сѝ, ѿ не сꙋ́щихъ всѧ̑ сотво́ршаго, сегѡ̀ ра́ди ра́достное пѣсносло́вїе со а҆́гг҃ломъ гаврїи́ломъ тебѣ̀ зове́мъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ г҃:"
 },
 {
  "type": "TEXT",
  "value": "Свѣ́томъ соверше́ннымъ ѡ҆сїѧ́емь, и҆ ликѡ́мъ свѧщє́ннымъ сочинѧ́емь, и҆ мч҃нческимъ благосла́вїемъ ᲂу҆краша́емь, свѧщенномч҃ниче гаврїи́ле бл҃же́нне, безсме́ртныѧ сла́вы сподо́билсѧ є҆сѝ."
 },
 {
  "type": "TEXT",
  "value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ ᲂу҆мно́житсѧ."
 },
 {
  "type": "TEXT",
  "value": "Кро́токъ и҆ неѕло́бивъ бы́лъ є҆сѝ, ти́хъ же и҆ смиренномꙋ́дръ, и҆ бжⷭ҇твенныѧ любвѐ и҆спо́лненъ, при кончи́нѣ же и҆ мч҃нческими вѣнцы̀ ᲂу҆краси́лсѧ є҆сѝ."
 },
 {
  "type": "TEXT",
  "value": "Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ."
 },
 {
  "type": "TEXT",
  "value": "Сїѧ́ѧ ѻ҆де́ждами, ꙗ҆̀же ѿ кро́вѣ, ѻ҆́тче гаврїи́ле свѧще́нне, восте́клъ є҆сѝ свѣ́тлѡ во ст҃а̑ѧ ст҃ы́хъ, сла́вою небе́сною вѣнча́емъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Ст҃и́тель сы́й и҆ пастыренача́льникъ, показа́лсѧ є҆сѝ до́блественный мч҃никъ, те́мъ бж҃е́ственне нбⷭ҇наѧ наслѣ́довалъ є҆сѝ, и҆ ны́нѣ престо́лꙋ зижди́телѧ въ сла́вѣ предстои́ши."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Подъ кро́въ тво́й, влⷣчцѣ, всѝ земноро́днїи прибѣга́юще, вопїе́мъ тѝ: бцⷣе, ᲂу҆пова́нїе на́ше, и҆зба́ви ны̀ ѿ безмѣ́рныхъ прегрѣше́нїй, и҆ спасѝ дꙋ́шы на́шѧ."
 },
 {
  "type": "HEADER",
  "value": "На бл҃гослове́нїи хлѣ́бѡвъ: Тропа́рь, гла́съ а҃:"
 },
 {
  "type": "TEXT",
  "value": "Непра́веднымъ сꙋдо́мъ ѡ҆сꙋжде́нъ бы́въ и҆ повѣ́шенъ, ꙗ҆́кѡ же́ртва свѧще́нна, жива̀ и҆ ѡ҆дꙋшевле́нна, влⷣце своемꙋ̀ хрⷭ҇тꙋ̀ пожре́нъ бы́лъ є҆сѝ, тѣ́мже и҆ же́ртвенникꙋ нб҃сномꙋ прїѧ́тъ бы́лъ є҆сѝ, свѧщенномч҃ниче гаврїи́ле приснопа́мѧтне. Два́жды."
 },
 {
  "type": "TEXT",
  "value": "И҆ Бцⷣе дв҃о: Є҆ди́ножды."
 },
 {
  "type": "HEADER",
  "value": "На ᲂу҆́трени По шестоѱа́лмїи, є҆ктенїа̀ и҆ посе́мъ Бг҃ъ гдⷭ҇ь: тропа́рь ст҃а́гѡ два́жды."
 },
 {
  "type": "HEADER",
  "value": "Сла́ва, и҆ ны́нѣ бг҃оро́диченъ:"
 },
 {
  "type": "TEXT",
  "value": "Гаврїи́лꙋ вѣща́вшꙋ:"
 },
 {
  "type": "HEADER",
  "value": "По а҃-мъ стїхосло́вїи, сѣда́ленъ, гла́съ а҃:"
 },
 {
  "type": "TEXT",
  "value": "Сщ҃е́ннꙋю ѻ҆де́ждꙋ твою̀ ѡ҆багри́въ кровьмѝ, съ не́юже вмѣсти́лсѧ є҆сѝ, бл҃же́нне, во ст҃а̑ѧ ст҃ы́хъ, и҆дѣ́же свѣ́тлѡ зри́ши бж҃е́ственнꙋю свѣ́тлость трⷪ҇ческꙋю, и҆ мо́лишисѧ непреста́ннѡ ѡ҆ дꙋша́хъ на́шихъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "Вели̑чїѧ тебѐ, всечи́стаѧ, сотворѝ хрⷭ҇то́съ бг҃ъ на́шъ, є҆го́же молѝ при́снѡ, возвели́чити и҆ въ на́съ бога́тꙋю ми́лость є҆гѡ̀, пренепоро́чнаѧ влⷣчцѣ."
 },
 {
  "type": "HEADER",
  "value": "По в҃-мъ стїхосло́вїи, сѣда́ленъ, гла́съ в҃:"
 },
 {
  "type": "TEXT",
  "value": "Прїиди́те воспои́мъ чтⷭ҇нꙋ́ю па́мѧть свѧти́телѧ гаврїи́ла, пѣсносло́вѧще того̀ свѣ̑тлыѧ по́двиги и҆ борє́нїѧ, и҆́миже многокова́рственнаго врага̀ пребори́въ, вѣне́цъ побѣдѝ и҆спле́лъ є҆́сть, и҆ ны́нѣ со а҆́гг҃лы трⷪ҇цѣ предстои́тъ, ю҆́же мо́литъ, спастѝ дꙋ́шы на́шѧ."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "И҆зба́ви на́съ ѿ всѣ́хъ напа́стей, и҆ ѿ мно́гихъ собла̑знъ ѕмі́евыхъ и҆ тмы̀, всенепоро́чнаѧ, ꙗ҆́же поро́ждшаѧ на́мъ свѣ́тъ невече́рнїй."
 },
 {
  "type": "HEADER",
  "value": "Полѷеле́й."
 },
 {
  "type": "TEXT",
  "value": "Велича́нїе: Велича́емъ тѧ̀ свѧщенномч҃ниче свѧты́й гаврїи́ле, и҆ чте́мъ ст҃ꙋ́ю па́мѧть твою̀, ты́ бо мо́лиши за на́съ хрⷭ҇та̀ бг҃а на́шего."
 },
 {
  "type": "HEADER",
  "value": "Ѱало́мъ и҆збра́нный:"
 },
 {
  "type": "TEXT",
  "value": "Оу҆слы́шите сїѧ̑ всѝ ꙗ҆зы́цы:"
 },
 {
  "type": "HEADER",
  "value": "По полѷеле́и, сѣда́ленъ, гла́съ и҃:"
 },
 {
  "type": "TEXT",
  "value": "Безкрѡ́вныѧ жє́ртвы бг҃ꙋ приноси́лъ є҆сѝ, пострада́въ же крѣ́пкѡ, прине́слсѧ є҆сѝ же́ртва, на́съ ра́ди поже́ршемꙋсѧ, є҆го́же прилѣ́жнѡ молѝ, бг҃обл҃же́нне, ѻ҆́тче гаврїи́ле спастѝ всѧ̑ любо́вїю пою́щыѧ тѧ̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже."
 },
 {
  "type": "TEXT",
  "value": "Влⷣчцѣ дв҃о чи́стаѧ, и҆зба́ви на́съ лю́тыхъ всѣ́хъ, ᲂу҆молѧ́ющи сн҃а твоего̀ повѣ́шеннаго на дре́вѣ, и҆ сподо́би на́съ досто́йнѡ ѡ҆деснꙋ́ю є҆гѡ̀ ста́ти, є҆гда̀ прїи́детъ во сла́вѣ свое́й."
 },
 {
  "type": "HEADER",
  "value": "Степе́нна, а҃ а҆нтїфѡ́нъ, д҃ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ."
 },
 {
  "type": "TEXT",
  "value": "Сті́хъ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ це́ркви прпⷣбныхъ."
 },
 {
  "type": "TEXT",
  "value": "Та́же: Всѧ́кое дыха́нїе:"
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, зача́ло ѯ҃з."
 },
 {
  "type": "HEADER",
  "value": "По н҃ ѱалмѣ̀, стїхи́ра гла́съ ѕ҃:"
 },
 {
  "type": "TEXT",
  "value": "Прїиди́те дне́сь всѝ се́рбстїи собо́ри, пѣ́нїемъ и҆ пѣ́сньми дх҃о́вными, достодо́лжнѡ почти́мъ па́мѧть свѧщенномꙋ́ченика гаврїи́ла, и҆́же па́ствꙋ свою̀ многотрꙋ́днѡ па́слъ є҆́сть, вѣ́ры же ра́ди пострада̀ да́же до сме́рти, и҆ ко хрⷭ҇тꙋ̀ ра́дꙋѧсѧ пресели́сѧ, къ немꙋ́же возопїи́мъ: мл҃твами, хрⷭ҇тѐ, а҆рхїере́а твоегѡ̀, да́рꙋй на́мъ прегрѣше́нїй проще́нїе и҆ ве́лїю ми́лость."
 },
 {
  "type": "HEADER",
  "value": "Канѡ́нъ бцⷣы, со і҆рмосо́мъ на ѕ҃, и҆ свѧщенномꙋ́ченика на и҃."
 },
 {
  "type": "HEADER",
  "value": "Канѡ́нъ свѧщенномꙋ́ченика, гла́съ в҃, прѡ́та мирко, є҆гѡ́же краегране́сїе:"
 },
 {
  "type": "TEXT",
  "value": "До́блесть гаврїи́ловꙋ чествꙋ́ю, въ бг҃оро́дичнахъ же и҆ въ сѣда́льнѣ:"
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пои́мъ гдⷭ҇еви, въ мо́ри дре́вле лю́ди наста́вльшемꙋ, и҆ въ не́мъ фараѡ́на со всево́инствомъ погрꙋзи́вшемꙋ, пѣ́снь побѣ́днꙋю, ꙗ҆́кѡ просла́висѧ."
 },
 {
  "type": "TEXT",
  "value": "Дꙋ́шꙋ мою̀, и҆ се́рдце, и҆ ᲂу҆́мъ, просвѣтѝ, молю́сѧ, и҆ наста́ви мѧ̀, приснопа́мѧтне бл҃гоче́стнѡ пѣ́ти по́двиги твоѧ̑."
 },
 {
  "type": "TEXT",
  "value": "Ѻ҆де́ждами, ꙗ҆̀же ѿ кро́ве, ѡ҆бле́клсѧ є҆сѝ ѻ҆́тче гаврїи́ле, и҆ во ст҃а̑ѧ восте́клъ є҆сѝ вѣнча́емъ свѣ́тлѡ сла́вою ст҃ы́хъ."
 },
 {
  "type": "TEXT",
  "value": "Бл҃госло́вїемъ мч҃нческимъ ᲂу҆краша́емь, сохранѧ́й на́съ, и҆ всѧ̑ вѣ́рою пра́зднꙋющыѧ твою̀ па́мѧть, бл҃же́нне."
 },
 {
  "type": "TEXT",
  "value": "Бг҃оро́диченъ: Пре́жде тебѐ ро́ждшагосѧ и҆зъ ѻ҆ц҃а̀, родила̀ є҆сѝ, пребыла́ же є҆сѝ нетлѣ́нна, и҆ по ржⷭ҇твѣ̀ дв҃а: тѣ́мже тѧ̀ и҆́стиннꙋю бцⷣꙋ и҆сповѣ́дꙋемъ, препѣ́таѧ."
 },
 {
  "type": "TEXT",
  "value": "Катава́сїа: Хрⷭ҇то́съ ражда́етсѧ:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Непло́дствовавшїй мо́й ᲂу҆́мъ, плодоно́сенъ, бж҃е, покажѝ мѝ, дѣ́лателю до́брыхъ, насади́телю благи́хъ, благоꙋтро́бїемъ твои́мъ."
 },
 {
  "type": "TEXT",
  "value": "Ликѡ́мъ свѧщє́ннымъ, бл҃же́нне, сочинѧ́емь, съ ни́миже ѡ҆ мі́рѣ моли́сѧ хрⷭ҇тꙋ̀, да и҆зба́витъ на́съ ѿ всѧ́кагѡ ѕла̀, и҆ сподо́битъ црⷭ҇твїѧ своегѡ̀ нб҃е́снаго."
 },
 {
  "type": "TEXT",
  "value": "Є҆диносꙋ́щное сло́во проповѣ́далъ є҆сѝ, є҆гѡ́же ра́ди мч҃ническꙋю сме́рть претерпѣ́лъ, є҆сѝ, тѣ́мже и҆ вѣне́цъ сла́вы ѿ негѡ̀ прїѧ́лъ є҆сѝ."
 },
 {
  "type": "TEXT",
  "value": "Соверше́ннымъ свѣ́томъ ѡ҆сїѧ́емь, любвѐ бжⷭ҇твенныѧ и҆спо́лненъ бы́лъ є҆сѝ, мч҃нческими же вѣнцы̀ ᲂу҆краси́всѧ, всели́лсѧ є҆сѝ въ црⷭ҇тво нбⷭ҇ное."
 },
 {
  "type": "TEXT",
  "value": "Бг҃оро́диченъ: Родила̀ є҆сѝ во́лею ѻ҆́тчее сло́во, наи́тїемъ бжⷭ҇твеннаго дх҃а, пресвѧта́ѧ дв҃о ма́ти, а҆рхїере́євъ сла́во: тѣ́мже тѧ̀ пое́мъ и҆ велича́емъ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Ѻ҆снова́нїе и҆мѣ́ѧ въ є҆ѵⷢ҇лїи, па́стырь наре́клсѧ є҆сѝ и҆ ст҃и́тель че́стенъ, бг҃обл҃же́нне гаврїи́ле, кро́вїю же мꙋче́нїѧ себѐ ᲂу҆краси́лъ є҆сѝ, и҆ къ невеще́ственнымъ ликѡ́мъ преста́вилсѧ є҆сѝ, съ ни́миже молѝ хрⷭ҇та̀ бг҃а, поми́ловати дꙋ́шы на́шѧ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Тебѣ̀ прибѣга́емъ всѝ, мт҃и бж҃їѧ, и҆зба́ви на́съ ѿ всѣ́хъ напа́стехъ, ѡ҆чище́нїе и҆спросѝ на́шымъ прегрѣше́нїємъ, є҆ди́на бо ты̀ человѣ́кѡмъ є҆сѝ и҆справле́нїе."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ диви́хсѧ, и҆ возопи́хъ: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Твою̀ па́мѧть пра́зднꙋющыѧ вѣ́рою сохранѧ́й, приснопа́мѧтне гаврїи́ле, млⷭ҇тива творѧ̀ хрⷭ҇та̀ бг҃а на́шегѡ."
 },
 {
  "type": "TEXT",
  "value": "Гее́нскагѡ ѻ҆гнѧ̀ потщи́сѧ и҆зба́вити на́съ, бг҃обл҃же́нне гаврїи́ле, свѣ́тлое же жили́ще добродѣ́телей совершѝ, и҆ свѣ́та невече́рнѧгѡ сподо́би."
 },
 {
  "type": "TEXT",
  "value": "А҆́гг҃льскимъ ликѡ́мъ сочта́всѧ, ст҃е, просвѣща́еши свы́ше чꙋде́съ зарѧ́ми дꙋ́шы пою́щихъ тѧ̀."
 },
 {
  "type": "TEXT",
  "value": "Бг҃оро́диченъ: А҆́лчꙋщыѧ лю́ди твоѧ̑ бжⷭ҇твенныхъ бла̑гъ и҆спо́лни, всесвѧта́ѧ дв҃о мт҃и, и҆ не ѡ҆ста́ви на́съ и҆̀же тѧ̀ ᲂу҆стна́ми и҆ дꙋше́ю проповѣ́дꙋемъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Мглꙋ̀ дꙋшѝ моеѧ̀, спасѐ мо́й, разгна́въ свѣ́томъ за́повѣдей твои́хъ, ѡ҆зари́ мѧ, ꙗ҆́кѡ є҆ди́нъ цр҃ь мі́ра."
 },
 {
  "type": "TEXT",
  "value": "Вѣ́мы тѧ̀ до́блественна мч҃нка и҆ и҆сцѣле́нїй и҆сто́чника, свѧти́телю гаврїи́ле бг҃омꙋ́дре, и҆ це́ркве ᲂу҆твержде́нїе."
 },
 {
  "type": "TEXT",
  "value": "Разжега́емь сла́достнѣ хрⷭ҇то́вымъ жела́нїемъ, пло́ть покори́лъ є҆сѝ дꙋ́хꙋ, пома́завсѧ ꙗ҆́кѡ мѵ́ромъ мч҃ническою кро́вїю, тѣ́мъ сла́вы безсме́ртныѧ сподо́билсѧ є҆сѝ."
 },
 {
  "type": "TEXT",
  "value": "І҆и҃са хрⷭ҇та̀, ѿ ѻ҆ц҃а̀ возсїѧ́вшаго пре́жде денни́цы, и҆сповѣ́даѧ, пострада́лъ є҆сѝ да́же до кро́ве, тѣ́мже тѧ̀ по до́лгꙋ сла́вимъ."
 },
 {
  "type": "TEXT",
  "value": "Бг҃оро́диченъ: Мно́гихъ прегрѣше́нїй зно́емъ и҆ста́ѧвшꙋю дꙋ́шꙋ мою̀, прохладѝ хода́тайствомъ твои́мъ, дв҃о чи́стаѧ, и҆ ѡ҆чи́сти ѿ всѧ́кїѧ нечистоты̀, ты́ бо є҆сѝ вои́стиннꙋ двⷭ҇твꙋ и҆ чистотѣ̀ вмѣсти́лище."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бе́здна мѧ̀ мно́га грѣхо́внаѧ ѡ҆крꙋжа́етъ, и҆ вопїю̀ тѝ, прⷪ҇ро́ка подража́ѧй: ѿ тли́ мѧ гдⷭ҇и возведѝ."
 },
 {
  "type": "TEXT",
  "value": "И҆спо́лненъ бы́въ любвѐ бжⷭ҇твенныѧ, хрⷭ҇та̀ де́рзостнѡ и҆сповѣ́далъ є҆сѝ, и҆ вѣнцы̀ мч҃нческими ᲂу҆краси́лсѧ є҆сѝ."
 },
 {
  "type": "TEXT",
  "value": "Ласка̑нїѧ безбо́жныхъ тꙋ́ркѡвъ ѡ҆плева́лъ є҆сѝ, не ᲂу҆боѧ́всѧ мꙋчи́телей, нижѐ сме́рти, но за хрⷭ҇та̀ до́блественнѡ пострада́лъ є҆сѝ."
 },
 {
  "type": "TEXT",
  "value": "Ѻ҆гнепа́льною любо́вїю прилѣпи́всѧ хрⷭ҇тꙋ̀, ᲂу҆крѣпи́лсѧ є҆сѝ дꙋ́хомъ, мꙋчи́тельское свирѣ́пство низложи́лъ є҆сѝ, и҆ вѣне́цъ ѿ бг҃а досто́йнѡ прїѧ́лъ є҆сѝ."
 },
 {
  "type": "TEXT",
  "value": "Бг҃оро́диченъ: И҆зъ ᲂу҆тро́бы твоеѧ̀ вопло́щшагосѧ пѣсносло́вѧще, тѧ̀ славосло́вимъ, ꙗ҆́кѡ мт҃рь бж҃їю, и҆ ра́достнѡ вопїе́мъ тѝ: ра́дꙋйсѧ ѡ҆бра́дованнаѧ, препѣ́таѧ."
 },
 {
  "type": "HEADER",
  "value": "Конда́къ, гла́съ д҃:"
 },
 {
  "type": "TEXT",
  "value": "Первопрⷭ҇то́льникъ и҆ і҆ера́рхъ и҆́стинный бы́лъ є҆сѝ, и҆́стинѣ хрⷭ҇тꙋ̀ послѣ́довалъ є҆сѝ, мꙋче́нїѧ вѣнце́мъ и҆ сщ҃е́нства ма́стїю и҆́стинно просїѧ́лъ є҆сѝ, за и҆́стинꙋ до́блественнѡ пострада́въ, и҆́стинное и҆ бг҃ови́дное наслѣ́дїе полꙋчи́лъ є҆сѝ."
 },
 {
  "type": "TEXT",
  "value": "І҆́косъ: Ꙗ҆́кѡ ра́бъ вѣ́рный и҆ свѧще́нный, вше́лъ є҆сѝ въ ра́дость гдⷭ҇а твоегѡ̀, ты́ бо тала́нтъ вѣ́ры страда́нїемъ твои́мъ многосꙋгꙋ́бѡ и҆зрасти́лъ є҆сѝ, и҆мѣ́ѧ крѣ́пость непобѣди́мꙋ, держа́вꙋ неизмѣ́ннꙋ и҆ непретво́рнꙋ, процвѣ́лъ є҆сѝ страда́нїй плоды̀ ѻ҆би̑льны, те́мъ за и҆́стинꙋ до́блественнѡ пострада́въ, и҆́стинное и҆ бг҃ови́дное наслѣ́дїе полꙋчи́лъ є҆сѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Пе́щь дре́вле всегремѧ́щꙋю ᲂу҆гаси́вый, и҆ ѻ҆́троки тꙋ́чею дх҃о́вною ѡ҆роси́вый, бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Вои́стиннꙋ ве́сь ликꙋ́ѧ, бг҃обл҃же́нне гаврїи́ле, съ мч҃нческими собо́ри ра́дꙋѧсѧ пое́ши: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Оу҆ма̀ чистото́ю и҆ дꙋшѝ свѣ́тлостїю сїѧ́ѧ, ꙗ҆ви́лсѧ є҆сѝ на землѝ хра́мъ хрⷭ҇то́въ, премꙋ́дрости сокро́вище, ны́нѣ же на нбⷭ҇ѣ́хъ ца́рствꙋеши со влады́кою тва́ри, є҆мꙋ́же пое́мъ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Че́стна пред̾ гдⷭ҇емъ сме́рть твоѧ̀ вои́стиннꙋ, и҆́бо за хрⷭ҇та̀ пострада́лъ є҆сѝ, не ѡ҆ста́ви ста́до, є҆́же стѧжа́лъ є҆сѝ трꙋды̀ твои́ми, но молѝ ᲂу҆лꙋчи́ти дерзнове́нїе въ де́нь сꙋда̀ и҆ на́мъ пою́щымъ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Ро́ждшꙋю пло́тски мі́рови свѣ́тъ и҆́же ѿ свѣ́та, свѧще́нными гла́сы тѧ̀ добро́тꙋ і҆а́кѡвлю пое́мъ бцⷣе всенепоро́чнаѧ, ты́ бо на́мъ є҆сѝ стѣна̀, и҆ по́мощь неѡбори́маѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѿ не сꙋ́щихъ во є҆́же бы́ти приве́дшаго сло́вомъ всѧ̑, по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Є҆диноро́днаго сн҃а бж҃їѧ и҆сповѣ́далъ є҆сѝ, є҆мꙋ̀ є҆ди́номꙋ слꙋжи́лъ є҆сѝ, ѡ҆ не́мже непреста́ннѡ взыва́ѧ: по́йте и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Свѣ́томъ бг҃опозна́нїѧ просвѣти́ мѧ, свѧщенномч҃ниче гаврїи́ле приснопа́мѧтне, да вы́нꙋ хрⷭ҇та̀ сла́влю и҆ глаго́лю: по́йте и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Тезоимени́те крѣ́пости бж҃їѧ, крѣ́покъ бы́лъ є҆сѝ во страда́нїи, и҆ сме́рть под̾ѧ́лъ є҆сѝ взыва́ѧ: по́йте и҆ превозноси́те хрⷭ҇та̀ во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Кꙋпина̀, ꙗ҆́же пре́жде проѡбразова́ше стра́нное та́инство ржⷭ҇тва̀ твоегѡ̀, неѡпа́льна пребы́вши, пренепоро́чнаѧ: и҆́бо ѻ҆́гнь бжⷭ҇тва̀ родила̀ є҆сѝ, и҆ неѡпа́льна пребыла̀ є҆сѝ, ѻ҆трокови́це, тѣ́мже тѧ̀ всѝ ро́ди пое́мъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Преесте́ственнѡ пло́тїю заче́ншꙋю во чре́вѣ, ѿ ѻ҆ц҃а̀ безлѣ́тнѡ предвозсїѧ́вшее сло́во, въ пѣ́снехъ немо́лчныхъ велича́емъ вѣ́рнїи."
 },
 {
  "type": "TEXT",
  "value": "Вѣне́цъ благода́тей положи́сѧ на главѣ̀ твое́й, бг҃обл҃же́нне гаврїи́ле, ꙗ҆́кѡ сконча́вшемꙋ тече́нїе, и҆ соблю́дшемꙋ вѣ́рꙋ некра́домꙋ, и҆ пра́ведныхъ чи́нове краснѡ́ тѧ прїѧ́ша."
 },
 {
  "type": "TEXT",
  "value": "Оу҆ста̀, глагѡ́лющаѧ беззако́ннѡ на тѧ̀, загради́шасѧ, ты́ же возвы́шенъ на дре́во, хрⷭ҇тꙋ̀ ᲂу҆подо́билсѧ є҆сѝ, є҆го́же молѝ да спасе́тъ дꙋ́шы на́шѧ."
 },
 {
  "type": "TEXT",
  "value": "Ю҆до́ль плаче́внꙋю ѡ҆ста́вилъ є҆сѝ, и҆ въ нбⷭ҇ныхъ черто́зѣхъ всели́лсѧ є҆сѝ, прїе́млющи же бж҃їю свѣ́тлость, неви́димыхъ добрѡ́ты ꙗ҆́вственнѡ смотрѧ́еши."
 },
 {
  "type": "TEXT",
  "value": "Бг҃оро́диченъ: Ѻ҆трокови́це чи́стаѧ, мт҃и пренепоро́чнаѧ, дꙋшѝ моеѧ̀ ѡ҆ѕлобле́нїе и҆сцѣлѝ, и҆ се́рдце ᲂу҆крѣпѝ, ро́ждшаѧ преблага́го сло́ва хрⷭ҇та̀, всѣ́хъ ᲂу҆блажа́юща и҆ ᲂу҆крѣплѧ́юща."
 },
 {
  "type": "TEXT",
  "value": "Свѣти́ленъ: Трисо́лнечнаго бжⷭ҇тва̀ свѣ́тъ невече́рнїй просїѧ̀ въ тебѣ̀, гаврїи́ле преблаже́нне, содѣ́ла тѧ̀ чⷭ҇тое прїѧ́телище бж҃е́ственныхъ дарова́нїй, сегѡ̀ ра́ди и҆ всели́лсѧ є҆сѝ въ нбⷭ҇ныхъ черто́зѣхъ, и҆дѣ́же мо́лишисѧ ѡ҆ всѣ́хъ на́съ."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ:"
 },
 {
  "type": "TEXT",
  "value": "Пое́мъ тѧ̀ свѧще́нными гла́сы добро́тꙋ і҆а́кѡвлю, ро́ждшꙋю пло́тски мі́рови и҆́же ѿ свѣ́та свѣ́тъ, просвѣща́ющь всю̀ подсо́лнечнꙋю."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ и҃:"
 },
 {
  "type": "TEXT",
  "value": "Что́ тѧ нарекꙋ̀, свѧти́телю, правосла́вныхъ ᲂу҆твержде́нїе, ꙗ҆́кѡ пастыренача́льника це́ркве се́рбскїѧ, и҆́стины побо́рника, ꙗ҆́кѡ за и҆́стинꙋ до́блественнѡ пострада́лъ є҆сѝ, свѧщенномꙋ́ченика, и҆́бо мꙋче́нїѧ вѣнце́мъ вѣнча́лсѧ є҆сѝ, но ꙗ҆́кѡ предстоѧ̀ престо́лꙋ ст҃ы́ѧ трⷪ҇цы, моли́сѧ прилѣ́жнѡ, спасти́сѧ дꙋша́мъ на́шымъ."
 },
 {
  "type": "TEXT",
  "value": "Что́ тѧ и҆менꙋ́емъ, сла́вне, сщ҃е́нникѡвъ ра́дованїе, стрⷭ҇тоте́рпцєвъ добро́тꙋ, бл҃гоче́стїѧ пода́телѧ, свѧти́телѧ и҆́стинна и҆ свѧще́нна ᲂу҆чи́телѧ, и҆́же кро́вїю мꙋче́нїѧ себѐ ᲂу҆краси́въ, къ невеще́ствєннымъ преста́вилсѧ є҆сѝ ликѡ́мъ, съ ни́миже молѝ ѡ҆ на́съ хрⷭ҇та̀ бг҃а, поми́ловати дꙋ́шы на́шѧ."
 },
 {
  "type": "TEXT",
  "value": "Что̀ тебѐ воспою̀, бл҃же́ннѣйше гаврїи́ле, ꙗ҆́кѡ ꙗ҆ви́лсѧ є҆сѝ ст҃и́тель и҆ мч҃никъ, тѣ́мже нб҃снаѧ бж҃е́ственне наслѣ́довалъ є҆сѝ, и҆ ны́нѣ престо́лꙋ зижди́телѧ предстои́ши. Мы́ же воспѣва́юще сщ҃е́ннꙋю па́мѧть твою̀, мо́лимъ тѧ̀: молѝ ѡ҆ на́съ хрⷭ҇та̀ бг҃а, дарова́ти дꙋша́мъ на́шымъ ми́ръ, и҆ ве́лїю ми́лость."
 },
 {
  "type": "TEXT",
  "value": "Что́ тѧ нарече́мъ, свѧще́ннѣйше ѻ҆́тче, вѣ́мы бо тѧ̀ правосла́вїѧ столпа̀ и҆ це́ркве ᲂу҆твержде́нїе, мꙋче́нїѧ пꙋ́ть проше́дша, и҆ пред̾ безбо́жными а҆га́рѧны, хрⷭ҇та̀ до́блественнѡ и҆сповѣ́давша, тѣ́мже мо́лимъ тѧ̀, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ, молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ а҃:"
 },
 {
  "type": "TEXT",
  "value": "Прїиди́те се́рбстїи лю́дїе, ра́достенъ ли́къ соста́вимъ, восхвалѧ́юще ѻ҆тца̀ на́шего, свѧщенномꙋ́ченика гаврїи́ла, патрїа́рха се́рбскагѡ, кропле́нїемъ чⷭ҇тны́хъ крове́й свои́хъ, порфѵ́рꙋ ца́рскꙋю себѐ ѡ҆багри́вшаго, и҆ вмѣсти́вшагосѧ съ весе́лїемъ въ бж҃е́ственное црⷭ҇тво, и҆ возопїе́мъ є҆мꙋ̀: па́стырю вѣ́рный и҆ мч҃ниче за вѣ́рꙋ, моли́твениче теплѣ́йшїй моли́сѧ вы́нꙋ хрⷭ҇тꙋ̀ бг҃ꙋ на́шемꙋ, ѡ҆ спасе́нїи ста́да твоегѡ̀."
 },
 {
  "type": "HEADER",
  "value": "И҆ ны́нѣ, бг҃оро́диченъ, гла́съ то́йже:"
 },
 {
  "type": "TEXT",
  "value": "Ѽ всеми́лостиваѧ ма́ти бж҃їѧ, застꙋ́пнице ᲂу҆се́рднаѧ, предста́тельнице всегѡ̀ ро́да чл҃вѣ́ческагѡ, ᲂу҆крѣпѝ на́съ на дѣѧ̑нїѧ бж҃е́ствєннаѧ, да́ждь на́мъ ненавѣ́тнѡ нбⷭ҇нꙋю ше́ствовати стезю̀, да твои́мъ застꙋпле́нїемъ, ᲂу҆кло́ншесѧ пꙋте́й ѕлоко́зненнагѡ, дости́гнемъ въ нбⷭ҇наѧ жили̑ща, и҆ ѻ҆́бщницы бꙋ́демъ сла́вы присносꙋ́щныѧ."
 },
 {
  "type": "HEADER",
  "value": "Славосло́вїе вели́кое. Тропа́рь свѧщенномꙋ́ченика."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Гаврїи́лꙋ вѣща́вшꙋ:"
 },
 {
  "type": "HEADER",
  "value": "Є҆ктєнїѝ, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Бл҃же́нна ѿ канѡ́на свѧщенномꙋ́ченика, пѣ́снь г҃-ѧ, и҆ ѕ҃-ѧ."
 },
 {
  "type": "HEADER",
  "value": "Прокі́менъ, гла́съ и҃:"
 },
 {
  "type": "TEXT",
  "value": "Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ."
 },
 {
  "type": "TEXT",
  "value": "Сті́хъ: Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ це́ркви прпⷣбныхъ."
 },
 {
  "type": "HEADER",
  "value": "А҆пⷭ҇лъ, ко є҆вре́ємъ, зача́ло тл҃д."
 },
 {
  "type": "TEXT",
  "value": "А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "HEADER",
  "value": "Є҆ѵⷢ҇лїе, ѿ лꙋкѝ, зача́ло к҃д."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ."
 }
]