ponomar-pwa/static/data/shared/menaion-daily/03-17/1.json

[
 {
  "type": "HEADER",
  "value": "Ма́рта з҃і"
 },
 {
  "type": "HEADER",
  "value": "Преподо́бнагѡ ѻ҆ц҃а̀ на́шегѡ а҆леѯі́а, человѣ́ка бж҃їѧ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Всехва́льнїи мч҃ницы:"
 },
 {
  "type": "TEXT",
  "value": "Человѣ́ка тѧ̀ позна́хомъ бж҃їѧ, зва́нїемъ же и҆ ве́щїю: добродѣ́тельми бо просїѧ́лъ є҆сѝ, нищетꙋ̀ безмѣ́рнꙋю, и҆ тѣснотꙋ̀ на землѝ стѧжа́въ, и҆ чꙋдесы̀ вѣ̑рныѧ ᲂу҆вѣ́ривъ. Тѣ́мже моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость."
 },
 {
  "type": "TEXT",
  "value": "Жела́нїемъ ѡ҆роша́ющимъ пло́ть, по́хѡти палѧ́щыѧ ᲂу҆гаси́лъ є҆сѝ, а҆леѯі́е: черто́гомъ черто́гъ бл҃гоче́стнѡ и҆змѣни́лъ є҆сѝ, сла́дость же тѣле́снꙋю бжⷭ҇твеннымъ а҆́гг҃льскимъ подо́бїемъ. Съ ни́миже моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость."
 },
 {
  "type": "TEXT",
  "value": "Пребыва́лъ є҆сѝ невѣ́домъ, мꙋ́дре, предъ враты̀ ѡ҆скорблѧ́емь сщ҃е́нныхъ роди́телей твои́хъ, рꙋга́ющымсѧ тебѣ̀ твои̑мъ ѻ҆трокѡ́мъ, на вре́мени до́лзѣ: ᲂу҆́меръ же ꙗ҆ви́лсѧ є҆сѝ чꙋдесы̀, ꙗ҆̀же соверши́лъ є҆сѝ, и҆сцѣлѧ́ѧ недꙋ́ги, и҆ ѿгонѧ̀ лꙋка́вствїѧ дꙋ́хи."
 },
 {
  "type": "HEADER",
  "value": "А҆́ще сꙋббѡ́та, и҆лѝ недѣ́лѧ, пое́мъ и҆ самогла́сенъ. Сла́ва, гла́съ в҃:"
 },
 {
  "type": "TEXT",
  "value": "Ти́хое твоѐ, ѻ҆́ч҃е, и҆ молчали́вое, безѕло́бивое и҆ кро́ткое житїѐ возлюби́въ хрⷭ҇то́съ бг҃ъ, пребл҃же́нне а҆леѯі́е, ꙗ҆ви́лъ тѧ̀ є҆́сть свѣти́льника всемꙋ̀ мі́рꙋ, сїѧ́юща па́че со́лнца: и҆́бо сожи́тельницꙋ и҆ бога́тство вре́менное, ꙗ҆́кѡ пра́хъ вмѣни́лъ є҆сѝ, въ домꙋ̀ ѻ҆́тчи незна́емь, є҆ди́нагѡ жела́ѧ люби́магѡ тобо́ю хрⷭ҇та̀. Но помѧнѝ твоѧ̑ рабы̑, ᲂу҆ престо́ла всецр҃ѧ̀ хрⷭ҇та̀ бг҃а на́шегѡ, преподо́бне ѻ҆́ч҃е, не преста́й молѧ́сѧ за рабы̑ своѧ̑."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Подо́бенъ: Всехва́льнїи:"
 },
 {
  "type": "TEXT",
  "value": "Недꙋ́говавшꙋю, прест҃а́ѧ, лю́тѣ дꙋ́шꙋ мою̀ страстьмѝ лꙋка́выми и҆сцѣлѝ, ꙗ҆́же цѣли́телѧ и҆ сп҃са всѣ́хъ хрⷭ҇та̀ ро́ждшаѧ, всѧ́кꙋ ꙗ҆́зю и҆сцѣли́вшаго ᲂу҆ѧ́звленнаго дїа́вольскимъ ѕломы́слїемъ, и҆ сме́рти на́съ и҆змѣ́ншаго."
 },
 {
  "type": "TEXT",
  "value": "Бг҃оро́диченъ: Своего̀ а҆́гнца, а҆́гница и҆ непоро́чнаѧ влⷣчца, на крⷭ҇тѣ̀ ꙗ҆́кѡ ви́дѣвши зра́ка не и҆мꙋ́ща нижѐ добро́ты, ᲂу҆вы̀ мнѣ̀, рыда́ющи глаго́лаше: гдѣ̀ добро́та твоѧ̀ за́йде, сладча́йшїй; гдѣ̀ благолѣ́пїе; гдѣ̀ бл҃года́ть блиста́ющаѧ ѻ҆́браза твоегѡ̀, сн҃е мо́й любе́знѣйшїй;"
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Возвы́сивсѧ на добродѣ́тель, и҆ ᲂу҆́мъ ѡ҆чи́стивъ къ жела́нномꙋ и҆ кра́йнемꙋ дости́глъ є҆сѝ: безстра́стїемъ же ᲂу҆краси́въ житїѐ твоѐ, и҆ поще́нїе и҆зрѧ́дное воспрїи́мъ со́вѣстїю чи́стою, въ моли́твахъ ꙗ҆́кѡ безпло́тенъ пребыва́ѧ, возсїѧ́лъ є҆сѝ ꙗ҆́кѡ со́лнце въ мі́рѣ, преблаже́нне а҆леѯі́е."
 },
 {
  "type": "HEADER",
  "value": "Канѡ́нъ, кѵ́ръ і҆ѡ́сифа, гла́съ в҃, є҆гѡ́же краегране́сїе:"
 },
 {
  "type": "TEXT",
  "value": "Тѧ̀ бж҃їѧ чл҃вѣ́ка восхвалѧ́ю, блаже́нне."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "Тѣснѣ́йшїй ше́ствовалъ є҆сѝ пꙋ́ть, непоро́чное и҆ преподо́бное житїѐ, мꙋ́дре, проходѧ̀ ѿ ю҆́ности: тѣ́мже мою̀ тѣснотꙋ̀ разширѝ ᲂу҆ма̀, восхвали́ти тѧ̀, въ ра́йстѣй широтѣ̀ водворѧ́ѧсѧ, а҆леѯі́е."
 },
 {
  "type": "TEXT",
  "value": "Тебѐ сама́го весьма̀ бг҃ꙋ возложи́въ, блаже́нне, внѣ̀ пло́ти и҆ мі́ра бы́лъ є҆сѝ: бога́тствꙋ текꙋ́щꙋ небе́сное предпоче́лъ є҆сѝ и҆ пребыва́ющее, и҆ ѡ҆бѣща́нный гра́дъ сїѡ́нъ вѣ́чнꙋющїй."
 },
 {
  "type": "TEXT",
  "value": "Ложе́снъ ты̀ ма́тернихъ непло́дїе разрѣши́лъ є҆сѝ, ро́ждсѧ ꙗ҆́коже самꙋи́лъ, пребога́те: во чре́вѣ же се́рдца чи́стыхъ заче́нъ стра́хъ, роди́лъ є҆сѝ дх҃ъ спасе́нїѧ, бжⷭ҇твенныхъ добродѣ́телей вѣ́рою."
 },
 {
  "type": "TEXT",
  "value": "Бг҃оро́диченъ: Бж҃їй собезнача́льный сн҃ъ и҆мѣ̀ ꙗ҆́кѡ вино́внꙋ тѧ̀ къ на́мъ, дв҃о, подо́бїѧ є҆ди́нꙋ па́че всеѧ̀ тва́ри, чⷭ҇таѧ, чистꙋ́ тѧ ѡ҆брѣ́тъ. Тѣ́мъ тѧ̀ пое́мъ всѝ ро́ди и҆ ᲂу҆блажа́емъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Пронза́емь жела́нїемъ чистоты̀, черто́гомъ, и҆́же на землѝ, нбⷭ҇ный премѣни́лъ є҆сѝ, и҆ жены̀ любо́вїю, сладча́йшее а҆́гг҃льское подо́бїе."
 },
 {
  "type": "TEXT",
  "value": "Молвы̑ житє́йскїѧ и҆ тѧ́жесть бога́тства ѡ҆ста́вилъ є҆сѝ, и҆ пресе́льникъ бы́въ ѻ҆те́чества, бл҃же́нне а҆леѯі́е, хрⷭ҇то́вѣ нищетѣ̀ подо́бѧсѧ."
 },
 {
  "type": "TEXT",
  "value": "Слеза́ми и҆ болѣ́зньми, и҆ воздержа́нїемъ, всемꙋ́дре, благо́е взыска́лъ є҆сѝ, когда̀ прїи́детъ свѣ́тъ ра́зꙋма, безстра́стїе даѧ̀ се́рдцꙋ твоемꙋ̀."
 },
 {
  "type": "TEXT",
  "value": "Бг҃оро́диченъ: Горѣ̀ неви́димый а҆́гг҃лѡмъ, чⷭ҇таѧ, до́лѣ и҆зъ тебє̀ ражда́емь зри́тсѧ соверше́нъ чл҃вѣ́къ, погиба́ющїй мі́ръ ѡ҆бновлѧ́ѧ."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀:"
 },
 {
  "type": "TEXT",
  "value": "Мі́ра красотꙋ̀, преподо́бне, ѡ҆ста́вилъ є҆сѝ, премѣни́въ бога́тствомъ текꙋ́щимъ, непреходи́мое ꙗ҆́вѣ и҆ пребыва́ющее, а҆леѯі́е. Тѣ́мже со всѣ́ми тѧ̀ ст҃ы́ми сла́вимъ, и҆ торжествꙋ́емъ свѣ́тлѡ въ па́мѧти твое́й, просѧ́ще ѡ҆брѣстѝ моли́твами твои́ми, блаже́нне, ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Недомы́сленно и҆ непости́жно є҆́сть, влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство: и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ."
 },
 {
  "type": "TEXT",
  "value": "Крⷭ҇тобг҃оро́диченъ: Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃ерски пла́чꙋщи глаго́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Претерпѣ́лъ є҆сѝ нищетꙋ̀, проси́тель бы́въ, ни́щь ꙗ҆́коже ла́зарь: жела́нїе бо бжⷭ҇твенное ᲂу҆тѣша́ше, блаже́нне, се́рдце твоѐ, пожела́вшее бога́тства нбⷭ҇нагѡ."
 },
 {
  "type": "TEXT",
  "value": "Безпеча́льнагѡ и҆ ти́хагѡ житїѧ̀ возжела́лъ є҆сѝ, є҆ди́нощи ꙗ҆ды́й въ седми́цѣ, а҆леѯі́е, жела́нїемъ ѡ҆жида́ющагѡ тѧ̀, не мимотекꙋ́щагѡ, всеблаже́нне, наслажде́нїѧ."
 },
 {
  "type": "TEXT",
  "value": "Хра́мъ бг҃ꙋ се́рдце и҆ща́й содѣ́лати, въ домꙋ̀ возлюби́лъ є҆сѝ бг҃омт҃ре, сла́вне, всегда̀ сѣдѣ́ти, и҆ небє́сныѧ добрѡ́ты созира́ти."
 },
 {
  "type": "TEXT",
  "value": "Бг҃оро́диченъ: Воздои́вши да́телѧ, дв҃о, млека̀, а҆́лчꙋщее и҆ ᲂу҆тѣснѧ́емое ны́нѣ се́рдце моѐ насы́ти всѧ́кагѡ ра́зꙋма, и҆ ᲂу҆миле́нїѧ бжⷭ҇твеннагѡ, молю́ тѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы."
 },
 {
  "type": "TEXT",
  "value": "Тѡ́ки свѧще́нными напаѧ́ѧ всегда̀ сле́зъ твою̀ дꙋ́шꙋ, содѣ́лалъ є҆сѝ кла́съ вои́стиннꙋ стори́чествꙋющь, дѣ́лателю безсме́ртномꙋ до́брѣ соблюда́емь."
 },
 {
  "type": "TEXT",
  "value": "Ви́дѣнъ бы́лъ є҆сѝ на землѝ, житїѐ безпло́тныхъ подража́ѧ, премно́гимъ твои́мъ, ѻ҆́ч҃е, воздержа́нїемъ, досточꙋ́дне, и҆ въ моли́твахъ прилѣжа́нїемъ, и҆́мже ꙗ҆́кѡ свѣ́томъ просвѣти́лсѧ є҆сѝ."
 },
 {
  "type": "TEXT",
  "value": "Ѻ҆гне́мъ моли́твъ грѣха̀ попали́лъ є҆сѝ ве́щь, мꙋ́дре: бдѣ́нными же стоѧ́ньми всѧ́кое сладостра́стїе ᲂу҆спи́лъ є҆сѝ, ᲂу҆снꙋ́въ же, къ сїѧ́нїю преста́вилсѧ є҆сѝ невече́рнемꙋ."
 },
 {
  "type": "TEXT",
  "value": "Бг҃оро́диченъ: И҆́же во свѣ́тѣ живы́й, во ст҃о́е чре́во твоѐ всели́сѧ, чⷭ҇таѧ, мі́ръ поги́бшїй тмо́ю неразꙋ́мїѧ, па́ки назида́ѧ: є҆го́же молѝ, всѧ̑ просвѣти́ти пою́щыѧ тѧ̀."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ, ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Ꙗ҆́кѡ хра́мъ жи́въ бж҃їй, тѧ̀ бы́вша хрⷭ҇то́во селе́нїе, неискꙋсобра́чнаѧ, проѧвлѧ́етъ кры́ющасѧ, и҆ прославлѧ́етъ ᲂу҆таи́тисѧ тща́щагосѧ."
 },
 {
  "type": "TEXT",
  "value": "Моли̑твы твоѧ̑ бг҃ꙋ, ꙗ҆́кѡ кади́ло, блаже́нне, прїѧ̑тны бы́ша: ѿсю́дꙋ житїе́мъ твои́мъ вѣ́рныхъ ра́зꙋмы ѡ҆благово́нилъ є҆сѝ дх҃а благода́тїю."
 },
 {
  "type": "TEXT",
  "value": "Свѧще́ннымъ житїе́мъ ᲂу҆краша́ема, па́ки хрⷭ҇то́съ не хотѧ́ща, сла́вне, тѧ̀ ѻ҆те́чествꙋ дае́тъ, ѿбѣга́юща сла́вы привре́менныѧ."
 },
 {
  "type": "TEXT",
  "value": "Бг҃оро́диченъ: Зако́ны є҆стества̀, чⷭ҇таѧ влⷣчце, зижди́тель новосодѣ́лавый созда́нїѧ, и҆зъ тебє̀ неизрече́ннѡ ражда́етсѧ, и҆ ѡ҆божа́етъ мѧ̀ безмѣ́рною ми́лостїю."
 },
 {
  "type": "HEADER",
  "value": "Конда́къ, гла́съ в҃:"
 },
 {
  "type": "TEXT",
  "value": "До́мъ роди́телей твои́хъ ꙗ҆́кѡ чꙋ́ждь и҆мѣ́въ, водвори́лсѧ є҆сѝ въ не́мъ нищеѻбра́знѡ: и҆ по преставле́нїи вѣне́цъ прїе́мъ сла́вы, ди́венъ на землѝ ꙗ҆ви́лсѧ є҆сѝ, а҆леѯі́е, человѣ́че бж҃їй, а҆́гг҃лѡмъ и҆ человѣ́кѡмъ ра́дованїе."
 },
 {
  "type": "TEXT",
  "value": "І҆́косъ: Житїе́мъ и҆ словесы̀ ᲂу҆краси́лсѧ є҆сѝ, и҆ хрⷭ҇то́вꙋ цр҃ковь возвели́чилъ є҆сѝ твои́мъ житїе́мъ, ѻ҆тца̀ и҆ ма́терь, царѧ̀ и҆ лю́ди торжествова́ти ᲂу҆стро́ивъ: дѣ́лы же соблю́дъ є҆́же по ѻ҆́бразꙋ бж҃їю, а҆леѯі́е преподо́бне: возсїѧ́лъ бо є҆сѝ въ мі́рѣ твои́мъ цѣломꙋ́дрїемъ. Тѣ́мже благода́ть добродѣ́телей твои́хъ ѡ҆блистава́етъ всѧ̑ вѣ́рою пра́зднꙋющыѧ, ѻ҆́ч҃е, па́мѧть твою̀: ꙗ҆ви́лбосѧ є҆сѝ а҆́гг҃лѡмъ и҆ человѣ́кѡмъ ра́дованїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ."
 },
 {
  "type": "TEXT",
  "value": "Претерпѣ́лъ є҆сѝ, преподо́бне, предъ роди́тельными враты̀ сѣдѧ̀, и҆ весьма̀ непознава́емь, и҆ ѿ ѻ҆́трѡкъ рꙋга̑нїѧ под̾е́млѧ, и҆ нарꙋга́емь лю́тѣ, и҆ нището́ю мно́гою ѡ҆скорблѧ́емь."
 },
 {
  "type": "TEXT",
  "value": "Пло́ти твоеѧ̀ мꙋдрова́нїе ᲂу҆мертви́въ, зрѧ̀ роди́тели, и҆ си́ми непознава́емь, є҆стества̀ покрыва́лъ є҆сѝ нꙋ́ждꙋ, преподо́бне, и҆ презрѣ́нїе твои́хъ неискꙋ́сныхъ ѻ҆́трѡкъ, ѡ҆скорблѧ́ющихъ тѧ̀."
 },
 {
  "type": "TEXT",
  "value": "Ѽ чꙋдесѐ! Ка́кѡ пребы́лъ є҆сѝ при́снѡ ни́щетствꙋѧ, въ бога́тствѣ, а҆леѯі́е, безмѣ́рнагѡ смире́нїѧ; ка́кѡ претерпѣ́лъ є҆сѝ рꙋга̑нїѧ и҆ ᲂу҆кори̑зны ѿ ѻ҆́трѡкъ, премꙋ́дре, твои́хъ, не вѣ́дѣвшихъ житїѧ̀ твоегѡ̀;"
 },
 {
  "type": "TEXT",
  "value": "Бг҃оро́диченъ: Вели́кагѡ слꙋжи́тельница ты̀ та́инства была̀ є҆сѝ, всенепоро́чнаѧ: бг҃а бо воплоти́ла є҆сѝ, вели́кихъ ѕѡ́лъ на́съ и҆зба́вльшаго, тѧ̀ велича́ющыѧ, чⷭ҇таѧ, благослове́ннаѧ, бг҃ора́дованнаѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Невѣ́домъ пре́жде роди́телємъ сы́й, во вре́мѧ ѿше́ствїѧ твоегѡ̀ си̑мъ та́йнꙋ ѿкрыва́еши ꙗ҆влѧ́емь, въ сла́вꙋ бг҃а на́шегѡ, сла́вне, вельми́ тѧ и҆ досто́йнѣ просла́вльшагѡ."
 },
 {
  "type": "TEXT",
  "value": "Гдⷭ҇ь гла́сомъ ве́лїимъ ꙗ҆влѧ́етъ тѧ̀ всемꙋ̀ ри́мꙋ, сокрове́нное сокро́вище, пребога́те, въ ни́щетнѣ ѻ҆́бразѣ лежа́ща, и҆ да́ры врачева́нїй всѧ̑ вѣ́рою къ тебѣ̀ приходѧ́щыѧ ѡ҆богаща́юща."
 },
 {
  "type": "TEXT",
  "value": "Кнѧ́зи лю́дстїи, и҆ ца́рїе снидо́шасѧ, и҆ свѧще́нницы, блаже́нне, погребсти́ тѧ, бж҃їимъ манове́нїемъ: и҆ ви́дѧще ве́лїе видѣ́нїе, диви́шасѧ чꙋдесє́мъ, преподо́бне, ꙗ҆̀же твори́лъ є҆сѝ бжⷭ҇твенною си́лою дх҃а."
 },
 {
  "type": "TEXT",
  "value": "Бг҃оро́диченъ: И҆стлѣ́вшыѧ ны̀ дре́вле престꙋпле́нїемъ ѡ҆бновлѧ́ѧ, человѣколю́бецъ нетлѣ́ннѡ воплоти́сѧ ѿ нетлѣ́нныѧ твоеѧ̀, всенепоро́чнаѧ, ᲂу҆тро́бы: и҆ и҆зба́ви всѣ́хъ грѣхо́вныѧ тлѝ, бг҃оневѣ́стнаѧ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "И҆сцѣлє́нїѧ и҆сточи́лъ є҆сѝ ко гро́бꙋ несо́мь, бг҃ꙋ тѧ̀, блаже́нне, вельмѝ сла́вѧщꙋ: свѣ́тъ бо неви́дѧщїи ви́дѣша, и҆ глаго́ланїе прїѧ́ша пре́жде сꙋ́ще нѣмі́и, всесла́вне а҆леѯі́е."
 },
 {
  "type": "TEXT",
  "value": "Ви́дѣнъ бы́лъ є҆сѝ предлежа́щь, и҆ къ погребе́нїю несо́мъ ꙗ҆́кѡ со́лнце, ѻ҆́ч҃е, и҆спꙋща́ѧ и҆сцѣле́нїй зари̑ пресла́внѡ, и҆ тє́мныѧ стра̑сти ѿгонѧ̀, и҆ ѡ҆палѧ́ѧ де́мѡны, и҆ просвѣща́ѧ бг҃омꙋ̑дрыѧ."
 },
 {
  "type": "TEXT",
  "value": "Прїи́де погребсти́ тѧ патрїа́рхѡвъ пе́рвѣйшїй: ца́рь же вельмѝ хрⷭ҇толюби́вѣйшїй, кнѧ́зи, ста́рцы, и҆ ю҆́нїи, и҆ мона́шествꙋющихъ ли́цы, бжⷭ҇твеннымъ манове́нїемъ ѡ҆свѧща́ющесѧ прикоснове́нїемъ твои́мъ, блаже́нне."
 },
 {
  "type": "TEXT",
  "value": "Восхище́нъ бы́лъ є҆сѝ на колесни́цѣ добродѣ́телей несо́мъ: и҆ почива́еши и҆дѣ́же преподо́бныхъ чи́ни, собо́ръ а҆пⷭ҇лъ и҆ мꙋ́ченикѡвъ, патрїа́рхѡвъ и҆ всѣ́хъ пра́вєдникъ: съ ни́миже на́съ помѧнѝ, почита́ющыѧ тѧ̀, а҆леѯі́е."
 },
 {
  "type": "TEXT",
  "value": "Бг҃оро́диченъ: Гла́съ тебѣ̀ прино́симъ гаврїи́ловъ, всенепоро́чнаѧ, ра́дꙋйсѧ, глаго́люще, ни́во недѣ́ланнаѧ: ра́дꙋйсѧ, клѧ́твы разрѣше́нїе, ра́дꙋйсѧ, и҆сто́чниче воды̀ живо́тныѧ, преподо́бныхъ похвало̀, бцⷣе приснодв҃о."
 }
]