738 lines
62 KiB
JSON
738 lines
62 KiB
JSON
[
|
|
{
|
|
"type": "HEADER",
|
|
"value": "Септе́мврїа ѳ҃і"
|
|
},
|
|
{
|
|
"type": "HEADER",
|
|
"value": "Преставле́нїе благовѣ́рнагѡ вели́кагѡ кнѧ́зѧ ѳео́дѡра, и҆ ча̑дъ є҆гѡ̀ благовѣ́рныхъ кнѧзе́й, даві́да и҆ кѡнстанті́на, смоле́нскихъ и҆ ꙗ҆росла́вскихъ чꙋдотво́рцєвъ."
|
|
},
|
|
{
|
|
"type": "HEADER",
|
|
"value": "Ве́черъ, Блаже́нъ мꙋ́жъ: На Гдⷭ҇и, воззва́хъ: стїхи̑ры пра́здника г҃: и҆ ст҃ы́хъ, є҃. Гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Что̀ ва́съ нарече́мъ:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е ѳео́дѡре, просвѣще́нный бл҃года́тїю, ст҃ы́ѧ и҆ пресла́вныѧ, и҆ є҆диносꙋ́щныѧ трⷪ҇цы, свѣ́томъ безнача́льнагѡ свѣ́та, и҆ тѣ́мъ всю̀ зе́млю просвѣтѝ, и҆ мнѡ́гїѧ на́шѧ грѣхѝ потребѝ, ѻ҆́ч҃е прпⷣбне, молѝ ѡ҆ спасе́нїи дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Свѣ́тлости дꙋхо́вныѧ ты̀ бы́лъ є҆сѝ и҆спо́лненъ, ѻ҆́ч҃е прпⷣбне ѳео́дѡре, проти́вꙋ трꙋдꙋ̀ твоемꙋ̀ вели́комꙋ, свѧ́те. Тѣ́мже ны́нѣ во тмѣ̀ сꙋ́щыѧ ны̀ грѣхо́внѣй просвѣтѝ, ꙗ҆́кѡ дерзнове́нїе и҆мѣ́ѧ къ бг҃ꙋ, и҆ сп҃сꙋ всѣ́хъ, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Бл҃года́тїю всест҃а́гѡ дх҃а, грѣхо́вный мра́къ ѿ серде́цъ на́шихъ ѿгна́въ, ѡ҆блегчѝ лежа́щїй грѣ́хъ на ра́мѣхъ на́шихъ прпⷣбне ѳео́дѡре: да всѝ твою̀ па́мѧть соше́дшесѧ воспои́мъ, ѡ҆чище́нїѧ просѧ́ще, молѝ ѡ҆ спасе́нїи дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ ѕвѣ́зды всесвѣ̑тлыѧ, дѣ́тельми за́повѣдей гдⷭ҇нихъ сїѧ́юще, пресла́внїи, мі́ръ ᲂу҆краси́сте, всечестні́и, лꙋча́ми просвѣща́юще велѣ́нїй благовѣ́рїѧ, и҆ є҆́реси тмꙋ̀ ѿго́ните, прпⷣбнїи, ѳео́дѡре и҆ даві́де съ кѡнстанті́номъ сла́внымъ. Моли́те ѿ тлѝ и҆ бѣ́дъ и҆зба́витисѧ, вѣ́рою творѧ́щымъ всечестнꙋ́ю па́мѧть ва́шꙋ."
|
|
},
|
|
{
|
|
"type": "HEADER",
|
|
"value": "И҆́ны стїхи̑ры, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Прпⷣбнїи ѻ҆тцы̀ премꙋ́дрїи, ѳео́дѡре и҆ даві́де съ кѡнстанті́номъ сла́внымъ, слѣпы̑мъ подаетѐ свѣ́тъ, и҆ болѧ́щымъ и҆сцѣле́нїе, и҆ хромы̑мъ здра́вїе, ми́лостивнѡ преклонѧ́ющесѧ, приходѧ́щымъ вѣ́рою къ хра́мꙋ ва́шемꙋ, и҆ просѧ́щымъ по́мощи ва́шеѧ. Ва́съ бо застꙋ́пники и҆ предста́тели и҆ храни́тели всѝ вѣ́рнїи ѡ҆брѣто́хомъ, восхвалѧ́юще ва́съ."
|
|
},
|
|
{
|
|
"type": "TEXT",
|
|
"value": "Прпⷣбнїи ѻ҆тцы̀ всечестні́и, ѳео́дѡре и҆ даві́де и҆ кѡнстанті́не, до́брыми дѣ́тельми возше́дше, а҆́ки на колесни́цꙋ, къ бг҃ꙋ востеко́сте, побѣ̑дныѧ по́чєсти прїе́млюще: и҆ ꙗ҆́кѡ ми́лѡсти тѣлеса̀ ва̑ша на́мъ положє́на во гро́бѣ, ѻ҆тцы̀, ѡ҆ста́висте, и҆сточа́ти и҆сцѣлє́нїѧ, и҆ прогони́ти дꙋ́хи лꙋка̑выѧ. Тѣ́мже блажи́мъ ва́съ прехва́льнїи."
|
|
},
|
|
{
|
|
"type": "TEXT",
|
|
"value": "Ликѡ́мъ по́стничєскимъ сочета́стесѧ, тѣ́хъ житїе́мъ ᲂу҆краси́вшесѧ, бл҃же́ннїи, ѳео́дѡре и҆ даві́де съ кѡнстанті́номъ сла́внымъ. И҆ ны́нѣ въ нбⷭ҇ныхъ селе́нїихъ живетѐ веселѧ́щесѧ, и҆дѣ́же ликꙋ́ютъ а҆́гг҃ли, свѣ́томъ бжⷭ҇твеннымъ ѡ҆божа́еми. Помина́йте вы́нꙋ блажа́щихъ ва́съ на землѝ, и҆ ст҃о́е ва́ше творѧ́щихъ ᲂу҆спе́нїе."
|
|
},
|
|
{
|
|
"type": "TEXT",
|
|
"value": "Сїѧ̑нїи дꙋхо́вными ѡ҆зари́вшесѧ, ст҃і́и, свѣтода́тельнаѧ зарѧ̀ ꙗ҆ви́стесѧ, бл҃же́ннїи. И҆ ꙗ҆́кѡ лꙋчѝ добродѣ́тєли во всѧ̑ концы̀ простира́ете, и҆ вѣ́рныхъ просвѣща́ете совокꙋплє́нїѧ, и҆ ѿго́ните тмꙋ̀ є҆ресе́й, прпⷣбнїи, си́лою ѿ дв҃ы возсїѧ́вшагѡ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃. Самогла́сенъ:"
|
|
},
|
|
{
|
|
"type": "TEXT",
|
|
"value": "Равноа́гг҃льное житїѐ пожи́вше, болѣ́зньми по́стническими, ѻ҆тцы̀ прпⷣбнїи, ѳео́дѡре и҆ даві́де съ кѡнстанті́номъ сла́внымъ, воздержа́нїемъ тѣ́ло порабо́тивше, покори́ли є҆стѐ дꙋ́хꙋ. Дѣ́лателє бы́вше за́повѣдей гдⷭ҇нихъ, и҆спе́рва подо́бнꙋю добро́тꙋ ѻ҆́браза сохрани́ли є҆стѐ, и҆ страда̑льныѧ по́двиги, ѿ по́стныхъ по́тѡвъ соверши́ли є҆стѐ, и҆ сꙋгꙋ́быми вѣнцы̑ ᲂу҆краси́вшесѧ, прилѣ́жнѡ сп҃са моли́те спасти́сѧ на́мъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника. Вхо́дъ. Прокі́менъ днѐ. Чтє́нїѧ г҃. Пи́саны сегѡ̀ мѣ́сѧца въ ѳ҃-й де́нь, і҆ѡ́сифꙋ волоцко́мꙋ."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "По́стническомꙋ житїю̀ поревнова́лъ є҆сѝ, прпⷣбне ѻ҆́ч҃е ѳео́дѡре, и҆ стра̑стныѧ прило́ги въ тече́нїихъ сле́зъ твои́хъ потопи́лъ є҆сѝ, и҆ благопрїѧ́тное житїѐ твоѐ лѣ́ствица бжⷭ҇твенна и҆ честна̀, возводѧ́ща на нб҃са̀ всѣ̑мъ показа́сѧ. Благоче́стїѧ бо плоды̀ въ себѣ̀ показа́въ, си́лою дх҃а ст҃а́гѡ ѿгонѧ̀ неможє́нїѧ страсте́й ѿ вѣ́рнѡ пою́щихъ тѝ: ра́дꙋйсѧ, восто́ка ѕвѣздо̀ свѣтоза́рнаѧ. Ра́дꙋйсѧ, мона́шествꙋющихъ свѣти́льниче приснопа́мѧтный, ра́дꙋйсѧ, цр҃кве до́брое воспита́нїе, и҆ непозы́блемое ᲂу҆твержде́нїе. Ра́дꙋйсѧ, заблꙋ́ждшихъ вели́кїй вождю̀. Ра́дꙋйсѧ, на́ша похвало̀, и҆ вселе́нныѧ ра́дованїе свѣ́тлое."
|
|
},
|
|
{
|
|
"type": "TEXT",
|
|
"value": "И҆́же на землѝ а҆́гг҃ла, и҆ на нб҃сѣ́хъ человѣ́ка бж҃їѧ, мі́рꙋ благо́е ᲂу҆краше́нїе, ѻ҆́бразъ благи́хъ дѣ́телей, по́стникѡвъ похвалꙋ̀, ѳео́дѡра почти́мъ: насажде́нъ бо въ домꙋ̀ бж҃їи процвѣтѐ пра́веднѡ, ꙗ҆́кѡ ке́дръ въ пꙋсты́ни, въ преподо́бствѣ и҆ пра́вдѣ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е ѳео́дѡре, и҆змла́да въ добродѣ́тели прилѣ́жнѣ пости́всѧ, ѻ҆рга́нъ бы́лъ є҆сѝ ст҃а́гѡ дх҃а, и҆ ѿ негѡ̀ прїи́мъ чꙋде́съ дѣ́тель, наꙋчи́лъ є҆сѝ человѣ́ки преѡби́дѣти сла̑дкаѧ, и҆ ны́нѣ бжⷭ҇твеннымъ свѣ́томъ чи́стѣ сїѧ́ѧ, просвѣтѝ на́шѧ ра́зꙋмы, ѻ҆́ч҃е прпⷣбне ѳео́дѡре."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е ѳео́дѡре, тве́рдагѡ поще́нїѧ страда́ньми ᲂу҆тверди́всѧ, и҆ въ незаходи́мый свѣ́тъ дꙋ́хомъ преложи́лсѧ є҆сѝ: пꙋсты̑ннымъ бо себѐ совокꙋпи́въ дꙋхо́внѡ, ѻ҆гнепа̑льныѧ стрѣ́лы де́мѡнскїѧ попра́лъ є҆сѝ, и҆ превы́ше всѧ́кїѧ добродѣ́тели бы́въ, соводворѧ́ешисѧ во црⷭ҇твїи нбⷭ҇нѣмъ съ го́рними чи́ны, съ ни́ми моли́сѧ хрⷭ҇тꙋ̀ бг҃ꙋ, спастѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Сла́ва, гла́съ є҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е ѳео́дѡре, гла́съ є҆ѵⷢ҇льскїй гдⷭ҇ень ᲂу҆слы́шавъ, мі́ръ ѡ҆ста́вивъ, бога́тство и҆ сла́вꙋ въ ничто́же вмѣни́въ, тѣ́мъ всѣ̑мъ возопи́лъ є҆сѝ, глаго́лѧ: возлюби́те бг҃а, и҆ ѡ҆брѧ́щете бл҃года́ть вѣ́чнꙋю, ничто́же предпочти́те па́че любвѐ є҆гѡ̀, да є҆гда̀ прїи́детъ въ сла́вѣ свое́й, ѡ҆брѧ́щете поко́й со всѣ́ми ст҃ы́ми. И҆́хже моли́твами хрⷭ҇тѐ, сохранѝ и҆ спасѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ по́стныхъ вои́стиннꙋ по́двигѡвъ благово́нный сосꙋ́де: крⷭ҇тъ бо на ра́мена взе́мъ, и҆ влⷣцѣ хрⷭ҇тꙋ̀, бл҃же́нне, возложи́въ себѐ, плотски́хъ покори́лъ є҆сѝ долѣре́тный смы́слъ добродѣ́тельми дꙋ́шꙋ преѡсїѧ́въ, и҆ къ бжⷭ҇твенномꙋ воскрили́лсѧ є҆сѝ раче́нїю. Тѣ́мъ всесвѧтꙋ́ю ва́шꙋ ѡ҆бстоѧ́ще, всехва́льнїи, ра́кꙋ, бжⷭ҇твеннагѡ чл҃вѣколю́бїѧ про́симъ полꙋчи́ти ва́шими моли́твами, и҆ мі́рꙋ дарова́ти ве́лїю ми́лость."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Оу҆́гль бг҃освѣ́тлый, ѻ҆гню̀ приѡбщи́всѧ бг҃оно́се дх҃а, показа́лсѧ є҆сѝ въ мі́рѣ ѳео́дѡре, просвѣща́ѧ дꙋ́шы вѣ́рнѡ и҆ благомы́сленнѡ пристꙋпа́ющихъ тѝ: къ свѣ́тꙋ бо вше́дъ невече́рнемꙋ, прпⷣбне, пꙋсты̑нныѧ ѡ҆роша́еши свы́ше бжⷭ҇твенною бл҃года́тїю, и҆ ᲂу҆вѧди́лъ є҆сѝ ᲂу҆́гли лю̑тыѧ. Тѣ́мъ и҆ побѣ́дный ꙗ҆́вственнѡ дарова̀ тебѣ̀ вѣне́цъ, ѻ҆́ч҃е прпⷣбне ѳео́дѡре, бжⷭ҇твенныѧ пра́вды строи́тель хрⷭ҇то́съ, є҆го́же молѝ дарова́ти на́мъ ве́лїю ми́лость."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Лѣ́ствица небовосхо́днаѧ, ꙗ҆́снѡ житїѐ твоѐ бг҃омы́сленнѣ бы́сть, є҆́юже къ высотѣ̀ взѧ́лсѧ є҆сѝ, и҆ влⷣцѣ хрⷭ҇тꙋ̀ бесѣ́довати, всебл҃же́нне ѳео́дѡре, сподо́билсѧ є҆сѝ. ᲂу҆́мъ просвѣща́ѧ сꙋ́щими ѿтꙋ́дꙋ сїѧ́нїй лꙋча́ми ѡ҆свѣща́емь, равноа́гг҃льнꙋю свѣ́тлость прїѧ́лъ є҆сѝ. Є҆мꙋ́же ны́нѣ предстоѧ̀, молѝ, прпⷣбне ѳео́дѡре, соверша́ющыѧ бжⷭ҇твеннꙋю и҆ свѧтꙋ́ю па́мѧть твою̀, съ тобо́ю предста́вити, и҆ мі́рꙋ дарова́ти ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ є҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е ѳео́дѡре, не да́лъ є҆сѝ сна̀ ѻ҆чесє́мъ твои̑мъ, нижѐ вѣ́ждѡмъ дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ дх҃а жили́ще себѐ содѣ́лалъ є҆сѝ: прише́дъ бо хрⷭ҇то́съ со ѻ҆ц҃е́мъ, ѻ҆би́тель въ тебѣ̀ сотворѝ, и҆ є҆диносꙋ́щныѧ трⷪ҇цы бл҃года́ть воспрїи́мъ великопроповѣ́дниче преподо́бне ѳео́дѡре, молѝ спасти́сѧ на́мъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ то́йже:"
|
|
},
|
|
{
|
|
"type": "TEXT",
|
|
"value": "Прїиди́те, лю́дїе, пресла́вное чꙋ́до ви́дѧще:"
|
|
},
|
|
{
|
|
"type": "HEADER",
|
|
"value": "Тропа́рь на преставле́нїе ст҃а́гѡ, гла́съ д҃:"
|
|
},
|
|
{
|
|
"type": "TEXT",
|
|
"value": "Ѿ ю҆́ности ва́шеѧ хрⷭ҇то́вѣ любвѝ прилѣпи́вшесѧ, ст҃і́и, ᲂу҆се́рднѡ зако́нъ и҆ ѡ҆правда̑нїѧ тогѡ̀ сохрани́сте, ѿѻнꙋ́дꙋже и҆ чꙋде́сными дарова́ньми ѡ҆богати́вшесѧ и҆сцѣлє́нїѧ и҆сточа́ете: ѳео́дѡре, даві́де и҆ кѡнстанті́не, ѡ҆ вѣ́рою ва́съ почита́ющихъ, моли́те хрⷭ҇та̀ бг҃а, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, тропа́рь пра́здника."
|
|
},
|
|
{
|
|
"type": "TEXT",
|
|
"value": "На пренесе́нїе моще́й ст҃а́гѡ, тропа́рь, гла́съ и҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ ѕвѣ́зды многосвѣ̑тлыѧ ѿ ю҆́ности возсїѧ́вше, ѡ҆свѧти́ли є҆стѐ сердца̀ вѣ́рныхъ пренесе́нїемъ честны́хъ моще́й ва́шихъ, во пло́ти ꙗ҆́кѡ а҆́гг҃лы на землѝ показа́стесѧ, поще́нїемъ насажде́ни бы́сте ꙗ҆́кѡ древа̀, при вода́хъ воздержа́нїѧ, напое́ни стрꙋѧ́ми сле́зъ ва́шихъ, и҆ скве́рнꙋ ѡ҆мы́сте. Сегѡ̀ ра́ди ꙗ҆ви́стесѧ прїѧ́тєлища бж҃їѧ дх҃а: ѳео́дѡре и҆ даві́де и҆ кѡнстанті́не, моли́те хрⷭ҇та̀ бг҃а, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "На ᲂу҆́трени, на Бг҃ъ гдⷭ҇ь: тропа́рь пра́здника два́жды. Сла́ва, ст҃а́гѡ: И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "По а҃-мъ стїхосло́вїи сѣда́ленъ, гла́съ а҃:"
|
|
},
|
|
{
|
|
"type": "TEXT",
|
|
"value": "Трисїѧ́ннагѡ свѣ́та зарю̀ въ дꙋшѝ стѧжа́въ, ѻ҆́ч҃е, прпⷣбне ѳео́дѡре, въ по́двизѣ твое́мъ посто́мъ и҆ моли́твами, и҆ бдѣ̑нїи при́снѡ дꙋ́шꙋ твою̀ просвѣща́ѧ. Тѣ́мъ прїѧ́лъ є҆сѝ дерзнове́нїе, и҆збавлѧ́ти ны̀ ѿ бѣ́дъ и҆ ѕѡ́лъ безчи́сленныхъ, моли́твами твои́ми, пребл҃же́нне ѻ҆́ч҃е. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "По в҃-мъ стїхосло́вїи сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Тве́рдостїю ра́зꙋма ᲂу҆краша́ѧ себѐ, и҆ плотскі̑ѧ тѧгѡты̀ ѿве́ргъ, горды́ню попра́лъ є҆сѝ, и҆ бы́лъ є҆сѝ ѻ҆би́телище и҆збра́нно прест҃а́гѡ дх҃а: неꙋкло́ннымъ ра́зꙋмомъ простира́ѧсѧ ко хрⷭ҇тꙋ̀ бг҃ꙋ, многоко́зненнагѡ стрѣ́лы притꙋпи́лъ є҆сѝ, и҆ лꙋ́къ врага̀, сокрꙋши́лъ є҆сѝ, пребл҃же́нне ѳео́дѡре. Молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ а҃:"
|
|
},
|
|
{
|
|
"type": "TEXT",
|
|
"value": "Жите́йское мо́ре воздержа́нїемъ безъ трꙋда̀ преплы́вше, и҆ въ приста́нище мы́сленное безстра́стїѧ приста́ли є҆стѐ: сосꙋ́ди воздержа́нїемъ бога́тства некра́дома благоче́стїѧ ꙗ҆ви́стесѧ, бл҃же́ннїи, ѳео́дѡре и҆ даві́де и҆ кѡнстанті́не, безстра́стїемъ житїѐ ва́ше просвѣти́вше, тре́бꙋющыѧ ми́лости ѡ҆богаща́ете, хрⷭ҇та̀ бг҃а молѧ́ще, дарова́ти на́мъ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ и҃:"
|
|
},
|
|
{
|
|
"type": "TEXT",
|
|
"value": "Прпⷣбнїи ѻ҆тцы̀ ст҃і́и, ѳео́дѡре и҆ даві́де, съ кѡнстанті́номъ сла́внымъ, поꙋчи́вшесѧ де́нь и҆ но́щь въ зако́нѣ гдⷭ҇ни, досто́йни бы́сте дре́ва живо́тнагѡ сады̀ бы́ти, и҆ пло́дъ ва́шъ добродѣ́тельными вѣнцы̑ цвѣте́тъ. Дерзнове́нїе и҆мꙋ́ще къ трꙋдополо́жникꙋ хрⷭ҇тꙋ̀ бг҃ꙋ, проси́те на́мъ ѡ҆чище́нїѧ и҆ ве́лїѧ ми́лости."
|
|
},
|
|
{
|
|
"type": "HEADER",
|
|
"value": "Канѡ́нъ пра́здника на ѕ҃: и҆ ст҃ы́хъ на и҃. Гла́съ и҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
|
|
},
|
|
{
|
|
"type": "TEXT",
|
|
"value": "Мра́къ грѣхо́вный ѿженѝ, свѣтода́вче хрⷭ҇тѐ, свы́ше просвѣтѝ ѡ҆каѧ́ннꙋю мою̀ дꙋ́шꙋ, моли́твами прпⷣбнагѡ ѳео́дѡра."
|
|
},
|
|
{
|
|
"type": "TEXT",
|
|
"value": "Просвѣще́нїемъ трисо́лнечнагѡ бжⷭ҇тва̀ ѡ҆зари́вшесѧ, мꙋ́дрїи, ѳео́дѡре и҆ даві́де, и҆ кѡнстанті́не, свѣти̑ла ꙗ҆ви́стесѧ, и҆ просвѣща́ете свѣтоно́снꙋю ва́шꙋ па́мѧть вѣ́рнѡ чтꙋ́щыѧ."
|
|
},
|
|
{
|
|
"type": "TEXT",
|
|
"value": "Свѣ́томъ бл҃года́ти ѡ҆зарѧ́еми, прпⷣбнїи ѳео́дѡре и҆ даві́де и҆ кѡнстанті́не сла́внїи, вѣ́рнѡ па́мѧть ва́шꙋ торжествꙋ́ющыѧ просвѣти́те, и҆ ѿ тмы̀ грѣхо́вныѧ моли́твами ва́шими и҆зба́вите."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пло́тїю ро́ждши безпло́тнаго, бг҃ороди́тельнице пречⷭ҇таѧ, тѣлє́сныѧ на́шѧ и҆ дꙋшє́вныѧ сквє́рны ѡ҆мы́й, ѡ҆кропле́нїемъ бжⷭ҇твенныѧ твоеѧ̀ моли́твы."
|
|
},
|
|
{
|
|
"type": "HEADER",
|
|
"value": "Дрꙋгі́й канѡ́нъ. Гла́съ д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
|
|
},
|
|
{
|
|
"type": "TEXT",
|
|
"value": "Всѝ вы̀ творцꙋ̀ возложи́сте себѐ, и҆ всѐ дꙋше́вное жела́нїе и҆злїѧ́сте къ немꙋ̀: сегѡ̀ ра́ди дꙋхо́внꙋю благода́ть воспрїѧ́сте, свѣ́томъ є҆ѧ̀ ѡ҆зарѧ́еми, прпⷣбне ѳео́дѡре и҆ даві́де, съ кѡнстанті́номъ сла́внымъ."
|
|
},
|
|
{
|
|
"type": "TEXT",
|
|
"value": "И҆змла́да хрⷭ҇та̀ возлюби́лъ є҆сѝ, всебл҃же́нне ѳео́дѡре, новоѧвле́нне чꙋдотво́рче, и҆ пречⷭ҇тꙋю є҆гѡ̀ мт҃рь: и҆ ны́нѣ просвѣща́еши чꙋдесы̀ ꙗ҆́кѡ мо́лнїѧ всю̀ вселе́ннꙋю."
|
|
},
|
|
{
|
|
"type": "TEXT",
|
|
"value": "Ны́нѣ, пребл҃же́нне ѳео́дѡре, дꙋша̀ твоѧ̀ почива́етъ на нб҃сѝ со хрⷭ҇то́мъ во црⷭ҇твїи нбⷭ҇нѣмъ: здѣ́ же честны̑ѧ твоѧ̑ мо́щи даю́тъ и҆сцѣлє́нїѧ приходѧ́щымъ съ вѣ́рою."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ра́дꙋйсѧ, пречⷭ҇таѧ бцⷣе, а҆́гг҃лѡвъ ᲂу҆дивле́нїе, прⷪ҇ро́кѡвъ про́повѣдь, и҆ а҆пⷭ҇лѡвъ немѡ́лчнаѧ ᲂу҆ста̀, моли́сѧ сн҃ꙋ твоемꙋ̀ и҆ бг҃ꙋ на́шемꙋ, да сохрани́тъ гра́дъ и҆ мѣ́сто сїѐ прпⷣбныхъ моле́нїемъ."
|
|
},
|
|
{
|
|
"type": "TEXT",
|
|
"value": "Катава́сїа пра́здника: Крⷭ҇тъ начерта́въ:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
|
|
},
|
|
{
|
|
"type": "TEXT",
|
|
"value": "Непреста̑нныѧ моли̑твы при́снѡ приносѧ́ще къ бг҃ꙋ, бл҃же́нне ѳео́дѡре и҆ даві́де съ кѡнстанті́номъ, за ве́сь мі́ръ, и҆ трисвѣ́тлою заре́ю ѡ҆зари́вшесѧ, просвѣща́ете ꙗ҆́кѡ мо́лнїѧ вселе́ннꙋю."
|
|
},
|
|
{
|
|
"type": "TEXT",
|
|
"value": "Предстоѧ́ще гдⷭ҇ꙋ со безпло́тными си́лами, неизрече́нною сла́вою блиста́юще, пребл҃же́нне ѳео́дѡре и҆ даві́де и҆ кѡнстанті́не, за ны̀ моли́тесѧ, творѧ́щыѧ честнꙋ́ю и҆ пресла́внꙋю па́мѧть ва́шꙋ."
|
|
},
|
|
{
|
|
"type": "TEXT",
|
|
"value": "Напои́вше дꙋ́шы сле́зными потѡ́ки, содѣ́ѧсте и҆̀хъ, прпⷣбнїи, плодонѡ́сны добродѣ́тельми, всѧ̑каѧ и҆зносѧ́ще чꙋдеса̀, на показа́нїе, пресла́внїи."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ни́ва дꙋхо́внаѧ, ꙗ҆́коже и҆зъ бразды̀ кла́съ и҆знесла̀ є҆сѝ, всю̀ тва́рь пита́ющаго всѧ́чески, приснодв҃о."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би."
|
|
},
|
|
{
|
|
"type": "TEXT",
|
|
"value": "Ꙗ҆́кѡ свѣтоза́рное со́лнце ꙗ҆ви́стесѧ трїѷпоста́снагѡ бжⷭ҇тва̀, ѳео́дѡре бл҃же́нне, съ даві́домъ бг҃омꙋ́дрымъ, и҆ кѡнстанті́номъ пресла́внымъ, ѡ҆мраче́нныхъ дꙋ́шы просвѣща́юще моли́твами ва́шими."
|
|
},
|
|
{
|
|
"type": "TEXT",
|
|
"value": "И҆змла́да во́зрастъ воспрїѧ́лъ є҆сѝ во гра́дѣ смоле́нскѣ, по хрⷭ҇то́вꙋ велѣ́нїю на ᲂу҆спе́нїе твоѐ прише́лъ є҆сѝ въ сла́вный гра́дъ ꙗ҆росла́вль, и҆ сїѧ́еши ꙗ҆́кѡ со́лнце блиста́нїемъ добродѣ́телей, прпⷣбне ѳео́дѡре."
|
|
},
|
|
{
|
|
"type": "TEXT",
|
|
"value": "Крⷭ҇та̀ гдⷭ҇нѧ си́лою ᲂу҆крѣпи́всѧ, бл҃же́нне ѳео́дѡре, и҆ поще́нїемъ и҆ моли́твами воѡрꙋжи́всѧ, стремлє́нїѧ де́мѡнскаѧ на землѝ побѣди́лъ є҆сѝ бж҃їею си́лою."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ра́дꙋйсѧ, влⷣчце дв҃о, цр҃кве́й красота̀, вѣ́рныхъ держа́ва и҆ похвала̀: непреста́ннѡ моли́сѧ хрⷭ҇тꙋ̀ бг҃ꙋ, да сохрани́тъ гра́дъ се́й и҆ лю́ди моли́твами твои́ми."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ а҃:"
|
|
},
|
|
{
|
|
"type": "TEXT",
|
|
"value": "Жите́йское мо́ре воздержа́нїе безъ трꙋда̀ преплы́вше, и҆ въ приста́нище мы́сленное безстра́стїѧ приста́ли є҆стѐ, сосꙋ́ди воздержа́нїемъ бога́тства некра́дома благоче́стїѧ ꙗ҆ви́стесѧ, бл҃же́ннїи, ѳео́дѡре и҆ даві́де и҆ кѡнстанті́не, безстра́стїемъ житїѐ ва́ше просвѣти́вше, и҆ тре́бꙋющыѧ ми́лости ѡ҆богаща́ете, хрⷭ҇та̀ бг҃а молѧ́ще дарова́ти на́мъ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Ты̀ на землѝ дрꙋгі́й а҆́гг҃лъ наре́клсѧ є҆сѝ чистото́ю, ѻ҆́ч҃е прпⷣбне ѳео́дѡре, полкѝ всѧ̑ де́мѡнскїѧ и҆ є҆́рєси попалѧ́ѧ дꙋхо́вною бл҃года́тїю. Тѣ́мъ соше́дшесѧ въ па́мѧть ва́шꙋ, прославлѧ́емъ сп҃са и҆ бг҃а на́шего."
|
|
},
|
|
{
|
|
"type": "TEXT",
|
|
"value": "Ꙗ҆́кѡ хрⷭ҇то́во смире́нїе возлюби́вше, возвы́систесѧ безстра́стїемъ, смири́вше де́мѡнскꙋю горды́ню, возсїѧ́вше ꙗ҆́кѡ со́лнце ѿ восто́ка, чꙋде́съ лꙋча́ми просвѣща́ете всю̀ подсо́лнечнꙋю."
|
|
},
|
|
{
|
|
"type": "TEXT",
|
|
"value": "Кади́ло благово́нїѧ всеви́дцꙋ, прпⷣбнїи, ѳео́дѡре и҆ даві́де съ кѡнстанті́номъ бг҃омꙋ́дрымъ, ва́шѧ моли̑твы принесо́сте, ꙗ҆̀же ѡ҆бонѧ̀ и҆ прїѧ́тъ, и҆ въ по́стнѣмъ кꙋ́пнѡ пра́здницѣ ᲂу҆строѧ́етъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Безъ сѣ́мене зачала̀ є҆сѝ во чре́вѣ творца̀ и҆ гдⷭ҇а, безъ поро́ка ꙗ҆́вльшисѧ мт҃и бж҃їѧ, ве́сь мі́ръ крила́ми твои́ми покрыва́еши, непоро́чнаѧ гпⷭ҇жѐ пречⷭ҇таѧ, пречⷭ҇тыѧ твоѧ̑ рꙋ́ки возносѧ́щи къ немꙋ̀, и҆зба́ви ны̀ ѿ бꙋ́дꙋщагѡ гнѣ́ва."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Сѣдѧ́й въ сла́вѣ, на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
|
|
},
|
|
{
|
|
"type": "TEXT",
|
|
"value": "На землѝ степе́нь и҆мѣ́лъ є҆сѝ, всебл҃же́нне ѳео́дѡре, но твои́ми моли́твами и҆ го́рнее црⷭ҇тво воспрїѧ́лъ є҆сѝ, прпⷣбне, и҆ ны́нѣ на нб҃сѝ со хрⷭ҇то́мъ црⷭ҇твꙋеши."
|
|
},
|
|
{
|
|
"type": "TEXT",
|
|
"value": "И҆сцѣле́нїе содѣва́етъ бжⷭ҇твенный хра́мъ ва́шъ, ѳео́дѡре и҆ даві́де и҆ кѡнстанті́не, ѿго́ните недꙋ́ги ѿ человѣ́кѡвъ, и҆ ᲂу҆крѣплѧ́ете мꙋдрова̑нїѧ и҆́хъ, восхвали́ти трꙋды̀ ва́шѧ, всечестні́и."
|
|
},
|
|
{
|
|
"type": "TEXT",
|
|
"value": "Со враго́мъ дре́вле бра́вшесѧ воздержа́нїемъ, крѣ́пости поста́висте побѣ́дꙋ, прпⷣбнїи, ѳео́дѡре и҆ даві́де съ кѡнстанті́номъ сла́внымъ, мꙋ́жески низложи́вше де́мѡнскаѧ ѡ҆полчє́нїѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Хрⷭ҇та̀ на́мъ родила̀ є҆сѝ, пречⷭ҇таѧ влⷣчце, бг҃ора́дованнаѧ дв҃о, спасѝ гра́дъ и҆ лю́ди къ тебѣ̀ ᲂу҆пова́ющыѧ, бцⷣе всенепоро́чнаѧ."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Просвѣтѝ твоѐ житїѐ всю̀ вселе́ннꙋю, прпⷣбне ѻ҆́ч҃е ѳео́дѡре, правовѣ́рными словесы̀ сїѧ́ющее, ꙗ҆́кѡ со́лнце, трили́чнагѡ бжⷭ҇тва̀ заре́ю просвѣща́емь."
|
|
},
|
|
{
|
|
"type": "TEXT",
|
|
"value": "Цр҃кве ты̀ бы́лъ є҆сѝ проповѣ́дникъ, свѧ́те, всѧ́кꙋ є҆́ресь и҆ ле́сть де́мѡнскꙋю разорѧ́ѧ: тѣ́мже со а҆́гг҃лы ны́нѣ ликꙋ́еши."
|
|
},
|
|
{
|
|
"type": "TEXT",
|
|
"value": "Є҆ди́ной любвѝ хрⷭ҇то́вѣ вы̀ приложи́вше дꙋ́шы своѧ̑, ѳео́дѡре и҆ даві́де съ кѡнстанті́номъ сла́внымъ, и҆ и҆сполни́телїе бж҃їихъ за́повѣдей бы́вше, мно́гихъ чꙋде́съ прїѧ́сте бл҃года́ть всехва́льнїи."
|
|
},
|
|
{
|
|
"type": "TEXT",
|
|
"value": "Неѕло́биви и҆ кро́тцы, всѧ̑ ѕлѡ́бы вра̑жїѧ погꙋ́бльше, и҆ ми́лостиви до конца̀ ꙗ҆́вльшесѧ, бл҃же́ннїи, ѿ є҆ди́нагѡ ми́лостивагѡ бл҃года́ть прїѧ́сте и҆́стиннꙋю и҆ спаси́тельнꙋю."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Воспо́йте всѧ̀ землѧ̀, по́йте же возсїѧ́вшемꙋ и҆зъ чре́ва бг҃олѣ́пнѡ неискꙋсобра́чныѧ, и҆ сїю̀ вѣ̑рнымъ показа́вшемꙋ тве́рдꙋ наде́ждꙋ и҆ похвалꙋ̀."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
|
|
},
|
|
{
|
|
"type": "TEXT",
|
|
"value": "Зако́ннѡ моли́твами и҆ посто́мъ, всегда̀ претерпѣва́сте, въ безстра́стїе ѡ҆дѣ́ѧвшесѧ, пло́тскїй ра́зꙋмъ смири́вше крѣ́постїю бжⷭ҇твеннагѡ дх҃а."
|
|
},
|
|
{
|
|
"type": "TEXT",
|
|
"value": "Ѿ ю҆́ности возжада́лъ є҆сѝ ѻ҆́браза мона́шескагѡ, и҆ ѿ хрⷭ҇та̀ воспрїѧ́тъ вѣне́цъ неꙋвѧ́дный, и҆ ри́зꙋ нетлѣ́ннꙋю, и҆ ны́нѣ, бл҃же́нне ѳео́дѡре, со а҆́гг҃лы ра́дꙋетсѧ дꙋ́хъ тво́й."
|
|
},
|
|
{
|
|
"type": "TEXT",
|
|
"value": "Гро́бъ честна́гѡ твоегѡ̀ тѣлесѐ, показа́лъ є҆сѝ вѣ̑рнымъ лю́демъ, дꙋ́шъ ѡ҆свѧще́нїе, и҆ тѣле́съ и҆сцѣле́нїе, и҆ страсте́й и҆збавле́нїе, ѿ твои́хъ моще́й цѣльбы̑ почерпа́ющымъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Всесвѣ́тлымъ ᲂу҆кра́шена свѣ́томъ, бг҃ора́дованнаѧ мт҃и: ты́ бо породила̀ є҆сѝ честнѣ́йшаѧ всѣ́хъ хрⷭ҇та̀ бг҃а на́шего. Є҆го́же молѝ, да и҆зба́витъ ны̀ ѿ всѧ́кихъ напа́стей."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ."
|
|
},
|
|
{
|
|
"type": "TEXT",
|
|
"value": "Вѣ́рою и҆ любо́вїю прилѣпи́всѧ влⷣцѣ вы́шнихъ си́лъ, премꙋ́дре ѳео́дѡре, возсїѧ́въ на землѝ ꙗ҆́кѡ со́лнце, мглꙋ̀ і҆́дѡльскꙋю всю́дꙋ потреблѧ́ѧ, вѣ̑рныѧ же просвѣща́ѧ моли́твами твои́ми."
|
|
},
|
|
{
|
|
"type": "TEXT",
|
|
"value": "Моли́твами предварѧ́ѧ къ бг҃ꙋ, и҆ томꙋ̀ предстоѧ̀ со а҆́гг҃лы, за ве́сь мі́ръ моли́сѧ, бра́нь непрїѧ́зненнꙋю всю̀ потреби́ти, и҆ побѣ́дꙋ и҆звѣ́стнꙋ да́ти на сопоста́ты во́инствꙋ на́шемꙋ."
|
|
},
|
|
{
|
|
"type": "TEXT",
|
|
"value": "Благи́ми нра́вы ᲂу҆краси́всѧ, хрⷭ҇тꙋ̀ прилѣпи́лсѧ є҆сѝ ѿ ю҆́ности, и҆ плотскі̑ѧ стра̑сти ᲂу҆мори́въ воздержа́нїемъ, и҆ къ жи́зни, прпⷣбне ѳео́дѡре, преста́вилсѧ є҆сѝ."
|
|
},
|
|
{
|
|
"type": "TEXT",
|
|
"value": "Глаго́лѡвъ зако́нныхъ и҆спо́лнитель бж҃їихъ бы́лъ є҆сѝ, и҆спо́лнилсѧ є҆сѝ, ѻ҆́ч҃е премꙋ́дре даві́де, бжⷭ҇твенныхъ дарѡ́въ, и҆ чꙋде́съ лꙋчы̀ всѣ̑мъ и҆спꙋсти́лъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Дꙋшѝ моеѧ̀ стра̑сти и҆сцѣлѝ, безстра́стїѧ бы́вшаѧ и҆сто́чникъ, и҆ просвѣти́вшаѧ ли́ки прпⷣбныхъ ѻ҆тцє́въ ржⷭ҇тво́мъ свои́мъ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
|
|
},
|
|
{
|
|
"type": "TEXT",
|
|
"value": "Молѧ̀ прилѣ́жнѡ гдⷭ҇а, недви́жꙋщагосѧ ѻ҆́трока цѣ́ла сотворѧ́еши, и҆ безгла́сна пре́жде, бж҃їимъ про́мысломъ, многоглаго́лива показа́лъ є҆сѝ, ѻ҆́ч҃е на́шъ чꙋдотво́рче ѳео́дѡре, мона́шествꙋющихъ свѣти́льниче пресвѣ́тлый."
|
|
},
|
|
{
|
|
"type": "TEXT",
|
|
"value": "Оу҆диви́сѧ, бл҃же́нне, чꙋдесє́мъ твои̑мъ ве́сь мі́ръ, премꙋ́дре даві́де, и҆ воспрїѧ́лъ є҆сѝ ѿ хрⷭ҇та̀ вѣне́цъ нбⷭ҇ный: є҆го́же сподо́би и҆ на́мъ полꙋчи́ти твои́ми моли́твами, всече́стне."
|
|
},
|
|
{
|
|
"type": "TEXT",
|
|
"value": "Лꙋ́къ си́льныхъ сокрꙋши́лъ є҆сѝ, и҆ бра́нь всѧ́кꙋ непрїѧ́зненꙋ и҆стреби́лъ є҆сѝ, всебл҃же́нне ѳео́дѡре, дѣ́йствомъ ꙗ҆́кѡ вѣща́нїемъ и҆спꙋсти́лъ є҆сѝ чꙋдеса̀ во всю̀ вселе́ннꙋю."
|
|
},
|
|
{
|
|
"type": "TEXT",
|
|
"value": "Всебл҃же́нне ѳео́дѡре, ᲂу҆го́дниче хрⷭ҇то́въ, на нб҃сѣ́хъ предстои́ши хрⷭ҇тꙋ̀, молѧ́сѧ, здѣ́ же честны̑ѧ мо́щи твоѧ̑ болѧ́щихъ и҆сцѣлѧ́ютъ, и҆ ѿ грѣ̑хъ и҆з̾има́ютъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆зсꙋши́ла є҆сѝ сады̀ безбо́жныхъ человѣ́кѡвъ, всенепоро́чнаѧ дв҃о, твои́мъ прозѧбе́нїемъ, прозѧ́бшꙋю во мнѣ̀ ѕло́бꙋ и҆скоренѝ, бг҃оневѣ́стнаѧ."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃:"
|
|
},
|
|
{
|
|
"type": "TEXT",
|
|
"value": "Ꙗ҆ви́стесѧ, свѣти́льницы всесвѣ́тлїи, во пло́ти ꙗ҆́кѡ а҆́гг҃ли, и҆ ꙗ҆́кѡ жи́зни древеса̀ ра̑йскаѧ, поще́нїемъ, бдѣ́нїемъ, и҆ вѣ́рою возраща́еми, процвѣлѝ є҆стѐ, моли́твами ва́шими нбⷭ҇ныѧ бл҃года́ти прїе́мше, вра́чеве крѣ́пцы ꙗ҆́вльшесѧ, и҆сцѣлѧ́ете недꙋ́гꙋющихъ дꙋ́шы, съ вѣ́рою прибѣга́ющихъ къ ра́цѣ моще́й ва́шихъ, чꙋдотво́рцы сла́внїи, ѳео́дѡре, даві́де и҆ кѡнстанті́не: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти вѣ́рою и҆ любо́вїю чтꙋ́щымъ па́мѧть ва́шꙋ."
|
|
},
|
|
{
|
|
"type": "TEXT",
|
|
"value": "І҆́косъ: Свы́ше зва́нїе прїе́мше пресла́внѡ, безсме́ртнꙋю жи́знь наслѣ́довасте: съ пло́тїю бо на землѝ безпло́тныхъ житїѐ проше́дше, бы́сте страсте́й непрїѧ́тни. Тѣ́мже восхвалѧ́емъ вы̀, ѻ҆тцы̀ прпⷣбнїи, сицєва́ѧ глаго́люще: ра́дꙋйтесѧ, свѣ̑тлаѧ свѣти̑ла, и҆ правосла́вныхъ сла́ва. Ра́дꙋйтесѧ, цѣломꙋ́дрїѧ столпѝ неѡбори́мїи. Ра́дꙋйтесѧ, премꙋ́драгѡ ра́зꙋма ꙗ҆вле́нїе. Ра́дꙋйтесѧ, пра́вды рачи́телїе и҆звѣ́стнїи. Ра́дꙋйтесѧ, ꙗ҆́кѡ по́стническими пѡ́двиги ᲂу҆мертви́вше плотски́хъ дѣѧ́нїй стремлє́нїѧ. Ра́дꙋйтесѧ, ᲂу҆мы̑ наслажда́ющесѧ нбⷭ҇ныхъ неизрече́нныхъ. Ра́дꙋйтесѧ, всю̀ тва́рь благоче́стнѡ ᲂу҆дивлѧ́юще чꙋдесы̀, и҆́миже посрами́шасѧ де́мѡни. Ра́дꙋйтесѧ, ѻ҆рꙋжено́сцы дꙋхо́внїи, и҆́миже всѧ́ка стра́сть ᲂу҆мертви́сѧ. Ра́дꙋйтесѧ, и҆сто́чницы жизненото́чныхъ во́дъ. Ра́дꙋйтесѧ, помѡ́щницы вѣ́рнѡ восхвалѧ́ющымъ ва́съ. Ра́дꙋйтесѧ, чꙋдотво́рцы достохва́льнїи, ѳео́дѡре и҆ даві́де и҆ кѡнстанті́не, ра́дꙋйтесѧ, помѡ́щницы вѣ́рою и҆ любо́вїю чтꙋ́щымъ па́мѧть ва́шꙋ."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Прилѣ̑жныѧ твоѧ̑ по́двиги и҆ трꙋды̀ почита́юще, и҆ сла́дость ᲂу҆че́нїѧ твоегѡ̀, прпⷣбне ѻ҆́ч҃е ѳео́дѡре, и҆́миже просвѣти́ ны, и҆ наꙋчѝ воспѣва́ти трїѷпоста́сное бжⷭ҇тво̀: ѻ҆тцє́въ на́шихъ бж҃е бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Ѻ҆рꙋ́жїемъ ва́шихъ моли́твъ, ѳео́дѡре и҆ даві́де съ кѡнстанті́номъ сла́внымъ, побѣди́сте де́мѡны, и҆ съ нб҃сѐ бл҃года́ть прїѧ́сте и҆сцѣлѧ́ти болѣ̑зни, и҆ прогони́ти дꙋ́хи лꙋка̑выѧ ѿ взыва́ющихъ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Посто́мъ и҆ моли́твою и҆ бдѣ́нїемъ, прпⷣбне ѳео́дѡре просвѣти́всѧ, вше́лъ є҆сѝ на высотꙋ̀ добродѣ́телей, и҆ наꙋчи́лъ є҆сѝ житїе́мъ твои́мъ ве́сь мі́ръ вѣ́рнѡ воспѣва́ти: ѻ҆тцє́въ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѻ҆рꙋ́жїе, чⷭ҇таѧ, хранѧ́щее пре́жде врата̀ є҆де́мскаѧ, плещѝ, дв҃о, всѣ̑мъ дае́тъ, низложи́вшымъ по́стнически бори́телѧ врага̀, при́снѡ взыва́ющымъ: ѻ҆тцє́въ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Не послꙋжи́ша тва́ри, бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ благослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Блаже́нно житїѐ твоѐ, и҆ кончи́на безсме́ртна, прпⷣбне ѳео́дѡре: сегѡ̀ ра́ди тѧ̀ хрⷭ҇то́съ свы́ше ᲂу҆красѝ вѣнце́мъ, и҆ просвѣща́еши ве́сь мі́ръ чꙋдесы̀, всечꙋ́дне."
|
|
},
|
|
{
|
|
"type": "TEXT",
|
|
"value": "Ꙗ҆ви́лсѧ є҆сѝ ны́нѣ гра́да ꙗ҆росла́влѧ, даві́де бг҃обл҃же́нне, сто́лпъ неколе́бленъ, и҆ стѣна̀ нерꙋши́ма, вели́кое прибѣ́жище притека́ющымъ, и҆ прїе́млющымъ и҆сцѣле́нїй бл҃года́ть неѡскꙋ́днꙋю."
|
|
},
|
|
{
|
|
"type": "TEXT",
|
|
"value": "Хотѣ́нїемъ ѿ мїрски́хъ сла́достей ѿлꙋча́ющесѧ, стра́ннѡ человѣ́кѡмъ ꙗ҆́вльшемꙋсѧ пло́тїю присво́ившесѧ, и҆ бꙋ̑дꙋщаѧ нетлѣ̑ннаѧ стѧжа́сте, ст҃і́и, пою́ще: бл҃гослове́нъ бг҃ъ ѻ҆тцє́въ на́шихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Безсѣ́меннѡ заче́нши творца̀ всѣ́хъ хрⷭ҇та̀ бг҃а, неизрече́ннѡ родила̀ є҆сѝ, є҆го́же молѝ дерзнове́нїе и҆мꙋ́щи къ немꙋ̀, да спасе́тъ ны̀ вопїю́щыѧ: бл҃гослове́нъ бг҃ъ ѻ҆ц҃є́въ на́шихъ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Седмери́цею пе́щь халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею, спасе́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Сле́зъ ва́шихъ ка̑пли погаси́ша собла́зны грѣхѡ́вныѧ, рѣкꙋ́ же чꙋде́съ показа́сте всѣ̑мъ на́мъ, всѧ̑кїѧ стра̑сти потоплѧ́ющꙋю притека́ющихъ къ ва́мъ, пресла́внїи ѻ҆тцы̀ ст҃і́и, ѳео́дѡре и҆ даві́де съ кѡнстанті́номъ сла́внымъ."
|
|
},
|
|
{
|
|
"type": "TEXT",
|
|
"value": "Вѣ́рꙋ и҆ наде́ждꙋ неразори́мꙋ, и҆ любо́вь и҆́стиннꙋю и҆мѣ́ли є҆стѐ ѻ҆тцы̀, и҆ ми́лостивное прилѣжа́нїе, терпѣ́нїе бла́го, и҆ поꙋче́нїе слове́съ дꙋхо́вныхъ, смиренномꙋ́дрїе, и҆ соверше́нное безѕло́бїе."
|
|
},
|
|
{
|
|
"type": "TEXT",
|
|
"value": "Подвиза́вшесѧ до́брѣ, побѣди́сте вра́жїѧ всѧ̑ дѣ̑йства, и҆ но концѣ̀ житїѧ̀ вѣнча́стесѧ, мꙋ́дрїи, ко всѣ̑мъ прпⷣбнымъ приче́тшесѧ. Съ ни́миже чти́мъ вы̀, превозносѧ́ще хрⷭ҇та̀ во вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Мт҃и бж҃їѧ чⷭ҇таѧ, страсте́й мои́хъ ᲂу҆́зы грѣхѡ́вныѧ, и҆ молвы̑ и҆ недꙋ́ги ѿженѝ: и҆́маши бо къ немꙋ̀ дерзнове́нїе и҆ ѻ҆́бласть, поми́ловати ны̀, гпⷭ҇жѐ милосе́рдаѧ, сп҃са поро́ждши пло́тїю, є҆го́же непреста́ннѡ молѝ спасти́сѧ на́мъ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Ликꙋ́ютъ на нб҃сѣ́хъ чи́ни а҆́гг҃льстїи, всебл҃же́нне ѳео́дѡре, и҆ вѣ́рныхъ собо́ри на землѝ, твою̀ па́мѧть похвалѧ́юще, вопїю́тъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Помоли́сѧ хрⷭ҇тꙋ̀ бг҃ꙋ, пребл҃же́нне ѳео́дѡре, ѡ҆ приходѧ́щихъ къ тебѣ̀ съ вѣ́рою, и҆ хотѧ́щихъ ѿ тебє̀ почерпстѝ и҆сцѣле́нїѧ неѡскꙋ́днꙋю бл҃года́ть, пою́щихъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Со безтѣле́сными си́лами, прпⷣбнїи ѻ҆тцы̀, хрⷭ҇тꙋ̀ предстоитѐ, моли́твами ва́шими ст҃і́и, дꙋшє́вныѧ на́шѧ болѣ̑зни и҆сцѣли́те, и҆ ѿ безчи́сленныхъ ѕѡ́лъ и҆зба́вите на́съ вопїю́щихъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆зъ пречⷭ҇тагѡ твоегѡ̀ чре́ва, бг҃омт҃и, нбⷭ҇нагѡ дождѧ̀ ка́плѧ на́мъ ᲂу҆ка́не, на ѡ҆мове́нїе скве́рнъ, на здра́вїе тѣле́съ, на прогна́нїе лꙋка́вагѡ. Тѣ́мже тѧ̀ бл҃жи́мъ, чⷭ҇таѧ, во вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ: тѣ́мъ тѧ̀, бцⷣꙋ а҆́гг҃лѡвъ и҆ человѣ̑къ, чинонача̑лїѧ велича́ютъ."
|
|
},
|
|
{
|
|
"type": "TEXT",
|
|
"value": "Є҆стество̀ тлѣ́нное премѣни́вше, въ вѣ̑чныѧ ѡ҆би́тєли взыдо́сте, бл҃же́ннїи, житїе́мъ чи́стымъ послѣ́довавше влⷣцѣ бг҃ꙋ. Тѣ́мже чествꙋ́юще ᲂу҆спе́нїе ва́ше, ст҃і́и, непреста́ннѡ хрⷭ҇та̀ велича́емъ."
|
|
},
|
|
{
|
|
"type": "TEXT",
|
|
"value": "Сѐ ѿве́рзесѧ ва́мъ, ѻ҆тцы̀, нбⷭ҇ное црⷭ҇тво, сконча́вшымъ до́брое тече́нїе, и҆ ви́дите, ꙗ҆̀же ви́дѧтъ а҆́гг҃лы, воздаѧ́нїе трꙋдѡ́въ подае́тъ ва́мъ по́чєсти бг҃ъ. Тѣ́мже ᲂу҆блажа́емъ вы̀."
|
|
},
|
|
{
|
|
"type": "TEXT",
|
|
"value": "Вы́спрь къ бг҃ꙋ мы́сль и҆мꙋ́ще, прпⷣбнїи, земна̑ѧ ѡ҆ста́висте, трꙋда̀ ра́ди воздержа́нїемъ за неѡсла́бное ѡ҆блегча́еми, и҆ со а҆́гг҃лы ны́нѣ водворѧ́етесѧ, хрⷭ҇та̀ велича́юще."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пощади́ мѧ, гдⷭ҇и, пощадѝ є҆гда̀ хо́щеши сꙋди́ти мѝ, не ѡ҆сꙋдѝ менѐ во ѻ҆́гнь, нижѐ ꙗ҆́ростїю твое́ю ѡ҆бличи́ мѧ, мо́литъ тѧ̀ дв҃а ро́ждшаѧ тѧ̀, хрⷭ҇тѐ, и҆ а҆́гг҃лѡвъ собо́ри, и҆ прпⷣбныхъ соста́вы."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о."
|
|
},
|
|
{
|
|
"type": "TEXT",
|
|
"value": "Оу҆диви́сѧ во все́мъ мі́рѣ, ѳео́дѡре, твоѧ̀ па́мѧть, чꙋдесы̀ сїѧ́ющи ꙗ҆́коже со́лнце, и҆ ѕлы̑ѧ болѣ̑зни и҆сцѣлѧ́ющи всѣ́хъ. Тѣ́мже на́шѧ стра̑сти разженѝ, мо́лимсѧ тебѣ̀, просѧ̀ на́мъ ѿпꙋще́нїѧ, чꙋдотво́рче хрⷭ҇то́въ, и҆ просвѣти́ ны твои́ми моли́твами, да тѧ̀ всѝ велича́емъ."
|
|
},
|
|
{
|
|
"type": "TEXT",
|
|
"value": "Да вхо́дѧтъ ны́нѣ во ст҃ы́й хра́мъ, честны̑мъ твои̑мъ моще́мъ, прпⷣбне ѳео́дѡре, благоче́стїѧ держа́тели, и҆ всѧ́къ во́зрастъ припа́дающе, про́сѧтъ ѿ тебє̀ почерпстѝ и҆сцѣле́нїѧ, здра́вїѧ и҆ спасе́нїѧ, хрⷭ҇та̀ велича́юще."
|
|
},
|
|
{
|
|
"type": "TEXT",
|
|
"value": "И҆ ны́нѣ моли́тесѧ ко хрⷭ҇тꙋ̀ бг҃ꙋ, всечꙋ́днїи, ѳео́дѡре и҆ даві́де и҆ кѡнстанті́не, да ва́ши честны̑ѧ мо́щи всегда̀ подаю́тъ слѣпы̑мъ прозрѣ́нїе, и҆ хромы̑мъ хожде́нїе, больны̑мъ и҆сцѣле́нїе, и҆ всѣ̑мъ здра́вїе и҆ спасе́нїе, да ва́съ всѝ велича́емъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Прест҃а́ѧ дв҃о бцⷣе марі́е, со а҆́гг҃лы и҆ а҆рха́гг҃лы и҆ со всѣ́ми нбⷭ҇ными си́лами, и҆ со прⷪ҇рѡ́ки, и҆ а҆пⷭ҇лы, и҆ съ ли̑ки прпⷣбныхъ ѻ҆тцє́въ, и҆ свѧще́нныхъ мꙋ́чєникъ, и҆ со бл҃же́ннымъ ѳео́дѡромъ, моли́сѧ сн҃ꙋ твоемꙋ̀ хрⷭ҇тꙋ̀ бг҃ꙋ на́шемꙋ, да и҆зба́витъ ны̀ ѿ всѣ́хъ бѣ́дъ, тѧ̀ велича́ющыѧ."
|
|
},
|
|
{
|
|
"type": "TEXT",
|
|
"value": "Свѣти́ленъ: Ꙗ҆́коже со́лнце блиста́ѧ, зарю̀ и҆спꙋща́еши чꙋде́съ, просвѣща́ѧ всѣ́хъ сердца̀, твою̀ сла́внꙋю па́мѧть творѧ́щихъ вѣ́рнѡ, пребл҃же́нне ѳео́дѡре, и҆ спаса́еши ѿ бѣ́дъ и҆ бꙋ́дꙋщагѡ гнѣ́ва. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры, гла́съ и҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, досточꙋ́дне ѳео́дѡре, ѡ҆брѣ́тши дꙋ́шꙋ твою̀ ѿ скве́рны всѧ́кїѧ чи́стꙋ, дх҃а бл҃года́ть всест҃а́гѡ въ тѧ̀ всели́сѧ, ꙗ҆́кѡ незаходи́мый свѣ́тъ: є҆гѡ́же дѣ́йствомъ дꙋ́хи лꙋка̑выѧ ѿго́ниши всегда̀, и҆ и҆сцѣлѧ́еши недꙋ́ги и҆ болѣ̑зни приходѧ́щихъ къ тебѣ̀ просты́мъ се́рдцемъ, и҆ соверша́ющихъ твою̀ па́мѧть свѧтꙋ́ю, и҆ кла́нѧющихсѧ моще́мъ твои̑мъ, и҆ вопїю́щихъ: бг҃оно́се хрⷭ҇то́въ ᲂу҆го́дниче, молѝ спасти́сѧ на́мъ. Два́жды."
|
|
},
|
|
{
|
|
"type": "TEXT",
|
|
"value": "Чꙋ̑вства всѧ̑ пло́ти ѡ҆бꙋзда́въ, и҆ нака́занъ зако́номъ бы́въ, мꙋ́дре, бжⷭ҇твеннагѡ зна́нїѧ, ѿтꙋ́дꙋ просла́вилсѧ є҆сѝ сла́вою, и҆ ѿ сла́вы, сла́вне, въ сла́вꙋ преше́лъ є҆сѝ: и҆ ꙗ҆́кѡ и҆сто́чникъ, дх҃а ст҃а́гѡ си́лою, чꙋдеса̀ ди̑вна содѣ́ѧлъ є҆сѝ, прпⷣбне ѻ҆́ч҃е ѳео́дѡре, дѣѧ́нїѧ да́ръ равноапⷭ҇ленъ прїи́мъ ѿ вы́шнѧгѡ про́мысла, и҆ щито́мъ и҆́стиннымъ ѡ҆гра́ждсѧ, си́лою крⷭ҇та̀ ᲂу҆крѣпи́всѧ, полкѝ проти́вныхъ побѣжда́ѧ, и҆ человѣ́ки ꙗ҆́снѡ наꙋчѝ, просвѣща́ѧ чꙋдесы̀ мно́гими, ѳео́дѡре бл҃же́нне, молѝ спасти́сѧ на́мъ."
|
|
},
|
|
{
|
|
"type": "TEXT",
|
|
"value": "Всѧ̑ чтꙋ́щыѧ вѣ́рою па́мѧть твою̀ свѣ́тлѡ, сподо́би твои́ми моли́твами, лю́тыхъ напа́стей и҆ стра́стныхъ бꙋ́рь всѣ́хъ гонзнꙋ́ти при́снѡ, и҆ грѣхѡ́въ проще́нїе прїѧ́ти, и҆ доитѝ ми́лости и҆ ра́дости неизрече́нныѧ, пребл҃же́нне ѳео́дѡре, молѝ спасти́сѧ на́мъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ то́йже:"
|
|
},
|
|
{
|
|
"type": "TEXT",
|
|
"value": "Прїиди́те всѝ вѣ́рнїи, согла́снѡ воспои́мъ пребл҃же́ннаго ѳео́дѡра, благоче́стїѧ свѣ́тлость, воздержа́нїѧ пра́вило, терпѣ́нїѧ сто́лпъ, чистоты̀ сокро́вище, смире́нїѧ рѣкꙋ̀ ѻ҆би́льнꙋю, ни́щихъ ᲂу҆тѣше́нїе, стра́нныхъ страннопрїи́мника, и҆́стинныѧ любвѐ хрⷭ҇то́вы дѣ́лателѧ и҆́стиннѡ и҆́скреннѧго, и҆ семꙋ̀ ᲂу҆́бѡ жи́въ предстои́тъ, человѣ́кѡвъ застꙋ́пникъ и҆ спаси́тель показа́сѧ, болѣ́зней и҆ страсте́й неисцѣ́льныхъ, и҆ всѧ́кихъ напа́стей и҆сцѣли́тель, и҆ мо́литъ спасти́сѧ на́мъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ то́йже:"
|
|
},
|
|
{
|
|
"type": "TEXT",
|
|
"value": "Є҆го́же дре́вле мѡѷсе́й:"
|
|
},
|
|
{
|
|
"type": "HEADER",
|
|
"value": "На лїтꙋргі́и: Бл҃жє́нна пра́здника, пѣ́снь з҃-ѧ, на д҃: и҆ ст҃ы́хъ пѣ́снь г҃-ѧ, на д҃."
|
|
},
|
|
{
|
|
"type": "HEADER",
|
|
"value": "Прокі́менъ, гла́съ з҃:"
|
|
},
|
|
{
|
|
"type": "TEXT",
|
|
"value": "Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "HEADER",
|
|
"value": "А҆пⷭ҇лъ, къ гала́тѡмъ, зача́ло сг҃і."
|
|
},
|
|
{
|
|
"type": "TEXT",
|
|
"value": "А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а:"
|
|
},
|
|
{
|
|
"type": "TEXT",
|
|
"value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло і҃."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю бꙋ́детъ првⷣникъ:"
|
|
}
|
|
] |