ponomar-pwa/static/data/shared/menaion-daily/09-25/1.json

[
 {
  "type": "HEADER",
  "value": "Септе́мврїа к҃є"
 },
 {
  "type": "HEADER",
  "value": "Прпⷣбныѧ ма́тере на́шеѧ є҆ѵфросѵ́нїи."
 },
 {
  "type": "HEADER",
  "value": "Стїхи̑ры ѻ҆ктѡ́иха, г҃. И҆ ст҃ы́ѧ, г҃. Гла́съ є҃."
 },
 {
  "type": "TEXT",
  "value": "Подо́бенъ: Прпⷣбне ѻ҆́ч҃е:"
 },
 {
  "type": "TEXT",
  "value": "Ма́ти прпⷣбнаѧ є҆ѵфросѵ́нїе досточꙋ́днаѧ, сꙋ́щѡ весе́лїѧ. Возжелѣ́вши, того̀ хода́тайствꙋющꙋю ше́ствовала є҆сѝ стезю̀: бога́тство бо и҆змѣни́ла є҆сѝ нището́ю мно́гою: плотска́го ѡ҆брꙋ́чника, живꙋ́щимъ во вѣ́ки: пи́щꙋ тлѣ́ющꙋю, воздержа́нїемъ: поко́й болѣ́зньми сꙋ́щими въ страда́льчествѣ: сꙋ́щꙋю въ мі́рѣ, премі́рною жи́знїю, ю҆́же и҆ полꙋчи́ла є҆сѝ съ мꙋ́дрыми дѣ́вами, соблю́дши свѣщꙋ̀ твою̀ неꙋга́снꙋ, и҆ черто́гꙋ сподо́бившисѧ ꙗ҆́кѡ дѣ́ва, ꙗ҆́кѡ невѣ́ста хрⷭ҇то́ва всехва́льнаѧ."
 },
 {
  "type": "TEXT",
  "value": "Стрꙋѧ́ми сле́зъ напои́вши тво́й ра́зꙋмъ, ᲂу҆гобзи́ла є҆сѝ поще́нїемъ добродѣ́тєльныѧ плоды̀, и҆ лоза̀ ꙗ҆́коже краснѣ́йшаѧ, произнесла̀ є҆сѝ гро́зды кра̑сныѧ, честна́ѧ: и҆́хже бжⷭ҇твеннагѡ мста̀ ꙗ҆́вѣ насы́щше чꙋ̑вства дꙋшє́внаѧ, наслажда́емсѧ и҆́стиннѡ твои́мъ подо́бїемъ, и҆ весели́мсѧ бжⷭ҇твеннымъ весе́лїемъ, пїѧ́нство ѿрѣва́юще є҆́же ѿ грѣха̀, вопїю́ще тѝ всечⷭ҇тна́ѧ: хрⷭ҇та̀ молѝ всегда̀, дарова́ти вселе́ннѣй є҆диномы́слїе, ми́ръ и҆ ве́лїю ми́лость."
 },
 {
  "type": "TEXT",
  "value": "Видѣ́нїе стра́нное, и҆ є҆стествꙋ̀ неꙋдобопрїѧ́тное, ка́кѡ ᲂу҆таи́ласѧ є҆сѝ є҆́ѵина ста́рагѡ запина́телѧ, лю́тагѡ кова́рства, средѣ̀ мꙋже́й все́льшисѧ соверше́ннымъ ра́зꙋмомъ; ка́кѡ посредѣ̀ ѻ҆гнѧ̀ прошла̀ є҆сѝ не ѡ҆па́льшисѧ; ка́кѡ сокры́ла є҆сѝ же́нскꙋю не́мощь, ᲂу҆крѣплѧ́ема бжⷭ҇твенною си́лою, на́шꙋ не́мощь прїи́мшагѡ, и҆ возсїѧ́вшагѡ ѿ ѻ҆трокови́цы неискꙋсобра́чныѧ; є҆го́же молѝ со а҆́гг҃лы ликꙋ́ющи, дарова́ти вселе́ннѣй є҆диномы́слїе, ми́ръ и҆ ве́лїю ми́лость."
 },
 {
  "type": "HEADER",
  "value": "Сла́ва, гла́съ в҃. Стꙋді́тово:"
 },
 {
  "type": "TEXT",
  "value": "Чи́стое чистоты̀ твоеѧ̀ сокро́вище безъ поро́ка ѿ мꙋже́й сохрани́ла є҆сѝ, невѣ́ста хрⷭ҇то́ва бы́вши, є҆ѵфросѵ́нїе всебл҃же́ннаѧ: тѣле́снꙋю бо добро́тꙋ, по́стническими трꙋды̑ ᲂу҆вѧди́вши, дꙋ́шꙋ же ᲂу҆краси́вши доброзра́чїемъ бл҃года́ти: въ мꙋ́жествѣ бо же́нство ꙗ҆́вѣ ᲂу҆кры́вши, ᲂу҆таи́ласѧ є҆сѝ велїа́ровыхъ ловле́нїй, а҆́гг҃льски пожи́вши: но просѝ ми́ра любо́вїю благохва́лѧщымъ тѧ̀, ꙗ҆́кѡ весе́лїѧ тезоимени́таѧ бг҃обл҃же́ннаѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Гро́здъ всезрѣ́лый, чⷭ҇таѧ, є҆го́же невоздѣ́ланнѡ во ᲂу҆тро́бѣ младоноси́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ ви́сѧща, рыда́ющи восклица́ла є҆сѝ, взыва́ющи: ча́до, сла́дость и҆ска́пай, є҆́юже пїѧ́нство всѧ́кое страсте́й ѿе́млетсѧ, бл҃годѣ́телю, менє̀ ра́ди тебѐ ро́ждшїѧ, бжⷭ҇твенными ᲂу҆тѣше́ньми, ꙗ҆́кѡ бл҃гоꙋтро́бенъ."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ ѕ҃:"
 },
 {
  "type": "TEXT",
  "value": "Прїиди́те любодѣ́вственнїи всѝ, и҆ чистоты̀ рачи́телїе, прїиди́те мона́шескаѧ чета̀, и҆ прпⷣбныхъ же́нъ ли́къ, всѝ согла́снѡ вѣ́рою воспои́мъ є҆ѵфросѵ́нїю пребл҃же́ннꙋю: ра́дꙋйсѧ, ꙗ҆́же въ же́нстѣмъ тѣ́лѣ мꙋ́жески до́блествовавши, ра́дꙋйсѧ, цѣломꙋ́дрїемъ врага̀ посрами́вши, и҆ хрⷭ҇та̀ возлюби́вши. Ра́дꙋйсѧ, ка́мене честны́й, весе́лїѧ тезоимени́таѧ. Но, ѽ ма́ти прпⷣбнаѧ! Молѧ́щи не преста́й ѡ҆ чтꙋ́щихъ па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "А҆́гнца своего̀ а҆́гница нескве́рнаѧ дре́вле, и҆ непоро́чнаѧ влⷣчца, на крⷭ҇тъ воздвиза́ема, ꙗ҆́кѡ ви́дѣ, ма́терски восклица́ше, и҆ ᲂу҆дивлѧ́ющисѧ вопїѧ́ше: что̀ видѣ́нїе сїѐ, ча́до сла́дкое, но́вое и҆ пресла́вное; ка́кѡ лю́дїе небл҃года́тнїи, сꙋди́щꙋ пїла́товꙋ предаю́тъ тѧ̀, и҆ ѡ҆сꙋжда́ютъ сме́ртїю живота̀ всѣ́хъ; но пою̀ твоѐ неизрече́нное сло́ве, схожде́нїе."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Въ тебѣ̀ ма́ти, и҆звѣ́стнѡ спасе́сѧ є҆́же по ѻ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ, ве́щи безсме́ртнѣй. Тѣ́мже и҆ со а҆́гг҃лы сра́дꙋетсѧ, прпⷣбнаѧ є҆ѵфросѵ́нїе, дх҃ъ тво́й."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха: и҆ ст҃ы́ѧ на д҃, гла́съ є҃, є҆гѡ́же краегране́сїе:"
 },
 {
  "type": "TEXT",
  "value": "Пѣ́сньми тѧ̀ пою̀ подо́бнꙋю весе́лїѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни, мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща."
 },
 {
  "type": "TEXT",
  "value": "Пѣ́сньми бг҃окра́сными пою́щаго дне́сь свѧтꙋ́ю твою̀ па́мѧть, и҆ и҆́стиннѡ достохва́льнꙋю, свѣ́томъ мѧ̀ ѡ҆зарѝ моли́твъ твои́хъ всечестна́ѧ, весе́лїѧ бжⷭ҇твеннагѡ тезоимени́таѧ."
 },
 {
  "type": "TEXT",
  "value": "Є҆ди́нꙋ бжⷭ҇твеннꙋю добро́тꙋ хрⷭ҇то́вꙋ возлюби́вши, и҆ тогѡ̀ распа́льшисѧ невеще́ственными красота́ми, добро́тою тѣле́сною возгнꙋша́ласѧ є҆сѝ, сла́внаѧ, видѣ̑нїи бжⷭ҇твенными ᲂу҆пражнѧ́ющисѧ."
 },
 {
  "type": "TEXT",
  "value": "Невѣ́ста ᲂу҆кра́шенаѧ добродѣ́телей красота́ми, ѡ҆брꙋчи́ласѧ є҆сѝ и҆́стиннѡ кра́сномꙋ добро́тою хрⷭ҇тꙋ̀, ѡ҆ста́виши привре́меннаго, є҆ѵфросѵ́нїе, ѡ҆брꙋ́чника, и҆ житїѧ̀ всю̀ красотꙋ̀."
 },
 {
  "type": "TEXT",
  "value": "Бг҃оро́диченъ: Всѐ пожела́нїе и҆ сла́дость и҆ жи́знь, и҆зъ тебє̀ возсїѧ́вый премно́жествомъ бл҃гости, дв҃о всенепоро́чнаѧ: є҆го́же молѝ спастѝ непреста́ннѡ тѧ̀ блажа́щыѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче."
 },
 {
  "type": "TEXT",
  "value": "Вєли́кїѧ претерпѣ́вши по́двиги, вра̑жїѧ низложи́ла є҆сѝ ᲂу҆хищрє́нїѧ: побѣди́ла є҆сѝ де́мѡнскїѧ прило́ги: а҆́гг҃лѡмъ ᲂу҆подо́биласѧ є҆сѝ, безсме́ртїю поꙋчи́вшисѧ ма́ти, въ ме́ртвеннѣмъ твое́мъ тѣлесѝ."
 },
 {
  "type": "TEXT",
  "value": "Весели́тъ мона́шествꙋющихъ сердца̀ житїѐ твоѐ, ᲂу҆твержде́нїе сꙋ́ще и҆ наказа́нїе ко спаси́тельнымъ за́повѣдемъ, и҆ къ стезѧ́мъ нетлѣ́нїѧ, къ любвѝ кра́йнѣйшемꙋ предѣ́лꙋ, є҆ѵфросѵ́нїе, созда́вшагѡ."
 },
 {
  "type": "TEXT",
  "value": "Просвѣща́етъ вѣ́рныхъ бжⷭ҇твєннаѧ собра̑нїѧ свѣ́тлаѧ твоѧ̀ па́мѧть и҆ достосла́внаѧ, ᲂу҆слажда́етъ прпⷣбныхъ ли́ки, а҆́гг҃лы весели́тъ. Съ ни́миже водворѧ́ешисѧ, ꙗ҆́кѡ равноа́гг҃льномꙋ житїю̀, є҆ѵфросѵ́нїе, ревнова́вши."
 },
 {
  "type": "TEXT",
  "value": "Бг҃оро́диченъ: Страсте́й мѧ̀ лю́тое ѡ҆бꙋрева́етъ волне́нїе, лꙋка́выхъ дꙋхѡ́въ глꙋбина̀ ѡ҆держи́тъ мѧ̀, грѣхо́вный ви́хоръ коле́блетъ моѐ се́рдце: бг҃ороди́тельнице, ты́ мѧ ᲂу҆твердѝ, чи́стѣ тѧ̀ восхвалѧ́юща."
 },
 {
  "type": "HEADER",
  "value": "Сѣда́ленъ, гла́съ є҃."
 },
 {
  "type": "TEXT",
  "value": "Подо́бенъ: Собезнача́льное сло́во:"
 },
 {
  "type": "TEXT",
  "value": "Же́нскꙋю сла́бость ᲂу҆крѣпи́вши нбⷭ҇ными наде́ждами, посредѣ̀ всели́ласѧ є҆сѝ, несомнѣ́нною мы́слїю, мꙋже́й, бг҃одохнове́ннаѧ, є҆́ѵина льсти́телѧ покори́вши твои́мъ говѣ́нїемъ, ѽ є҆ѵфросѵ́нїе! Во бдѣ́нїихъ и҆ поꙋче́нїихъ: тѣ́мъ вѣ́рою тѧ̀ блажи́мъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Тѧ̀ приста́нище, и҆ стѣ́нꙋ, и҆ прибѣ́жище, и҆ наде́ждꙋ, и҆ покро́въ, и҆ предста́тельницꙋ те́плꙋ ѡ҆брѣ́тше вѣ́рнїи, къ тебѣ̀ прибѣга́емъ, и҆ вопїе́мъ прилѣ́жнѡ, и҆ взыва́емъ вѣ́рнѡ: поми́лꙋй, бцⷣе, на тѧ̀ ᲂу҆пова́ющыѧ, и҆ ѿ прегрѣше́нїй и҆зба́ви."
 },
 {
  "type": "TEXT",
  "value": "Крⷭ҇тобг҃оро́диченъ: На крⷭ҇тѣ́ тѧ зрѧ́щи, хрⷭ҇тѐ, мт҃и твоѧ̀, во́льнѡ средѝ разбо́йникѡвъ повѣ́шена, терза́ющи мт҃рски ᲂу҆тро́бꙋ, гл҃го́лаше: безгрѣ́шне сн҃е, ка́кѡ непра́веднѡ ꙗ҆́кѡ ѕлодѣ́й на крⷭ҇тѣ̀ повѣ́силсѧ є҆сѝ, ро́дъ человѣ́чь ѡ҆живи́ти хотѧ̀, ꙗ҆́кѡ пребл҃гі́й;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ помаза̑нныѧ твоѧ̑ прише́лъ є҆сѝ."
 },
 {
  "type": "TEXT",
  "value": "Ѻ҆ц҃ꙋ́ тѧ нбⷭ҇номꙋ вне́млющꙋю дꙋ́шъ невѣстово́дцꙋ ѻ҆́ч҃а любо́вь не возбранѝ, нижѐ привре́меннагѡ жениха̀, ше́ствовати пꙋ́ть спаси́тельный."
 },
 {
  "type": "TEXT",
  "value": "Ꙗ҆́кѡ фі́нїѯъ бг҃омꙋ́дреннѡ процвѣла̀ є҆сѝ пра́вды сла́дость, и҆ ꙗ҆́кѡ ке́дръ при вода́хъ воздержа́нїѧ, бг҃омꙋ́драѧ, плоды̀ добродѣ́тєльныѧ ᲂу҆мно́жила є҆сѝ."
 },
 {
  "type": "TEXT",
  "value": "Ѻ҆гне́мъ воздержа́нїѧ и҆спепели́ла є҆сѝ хвра̑стныѧ сла̑сти, и҆ разгорѣ́вшисѧ ᲂу҆́глемъ гдⷭ҇ни любвѐ, чꙋде́съ лꙋчы̀ возсїѧ́ла є҆сѝ."
 },
 {
  "type": "TEXT",
  "value": "Растерза́нъ ви́дитсѧ, и҆ лежа́щь, предъ кра́сными твои́ми нога́ми, пре́жде є҆́ѵинъ ра́тникъ, и҆зъ дв҃ы ро́ждшагѡсѧ си́лою, є҆ѵфросѵ́нїе, и҆ благода́тїю."
 },
 {
  "type": "TEXT",
  "value": "Бг҃оро́диченъ: Оу҆ще́дри, ще́драѧ сꙋ́щи, преѻкаѧ́ннꙋю мою̀ дꙋ́шꙋ, бг҃ороди́тельнице всенепоро́чнаѧ, ѿ страсте́й грѣха̀ лю́тѣ ѡ҆мрачи́вшꙋюсѧ и҆ стеню́щꙋ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ."
 },
 {
  "type": "TEXT",
  "value": "Заре́ю бжⷭ҇твенныхъ дѣѧ́нїй, ꙗ҆́кѡ ка́мень смара́гдъ, чи́стаѧ, ви́дѣна была̀ є҆сѝ посредѣ̀ мꙋже́й, мꙋ́жєскаѧ борє́нїѧ показꙋ́ющи и҆ веселѧ́щи гдⷭ҇а."
 },
 {
  "type": "TEXT",
  "value": "Точа́щи сле́зы, ꙗ҆́кѡ а҆рѡма́ты ѡ҆благово́ниласѧ є҆сѝ, возвели́чиласѧ є҆сѝ, ꙗ҆́кѡ мѵ́ро многоцѣ́нное, и҆ бг҃ꙋ принесла́сѧ є҆сѝ дѣ́ва нерастлѣ́нна."
 },
 {
  "type": "TEXT",
  "value": "Всѐ твоѐ жела́нїе бг҃ꙋ принесла̀ є҆сѝ, тогѡ̀ жела́ющи, тогѡ̀ и҆́щꙋщи, тогѡ̀ послѣ́дствꙋющи законоположе́нїю, дв҃о, спаси́тельномꙋ."
 },
 {
  "type": "TEXT",
  "value": "Бг҃оро́диченъ: Мла́да родила̀ є҆сѝ ꙗ҆́кѡ млⷣнца, чⷭ҇таѧ, пре́жде вѣ̑къ и҆зъ ѻ҆ц҃а̀ безнача́льна безлѣ́тнѡ возсїѧ́вшаго, є҆го́же ѡ҆ мі́рѣ молѝ, бг҃оневѣ́сто."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Ꙗ҆́кѡ чиста̀ и҆ непоро́чна, ꙗ҆́кѡ красна̀, ꙗ҆́кѡ предобра̀, женихꙋ̀ сло́вꙋ ты̀ ᲂу҆невѣ́стиласѧ є҆сѝ, во вѣ́ки соблюда́ющемꙋ тѧ̀ нетлѣ́ннꙋ."
 },
 {
  "type": "TEXT",
  "value": "Стена́ньми и҆ слеза́ми взыскꙋ́ющи содѣ́телѧ, ѻ҆́нагѡ видѣ́нїѧ сподо́биласѧ є҆сѝ ꙗ҆́кѡ и҆збра́ннаѧ со и҆збра́нными, досточꙋ́днаѧ."
 },
 {
  "type": "TEXT",
  "value": "Воздержа́нїѧ ѻ҆́бразъ, цѣломꙋ́дрїѧ ѡ҆дꙋшевле́нное подо́бїе вѣ̑рнымъ ꙗ҆ви́ласѧ є҆сѝ, благохва́лѧщымъ твою̀ свѧще́ннꙋю, ѽ є҆ѵфросѵ́нїе, па́мѧть."
 },
 {
  "type": "TEXT",
  "value": "Бг҃оро́диченъ: Па́че ᲂу҆ма̀ безлѣ́тнаго, па́че сло́ва созда́телѧ, всечⷭ҇таѧ, родила̀ є҆сѝ, и҆збавлѧ́ющаго всѧ́кїѧ тлѝ, бцⷣꙋ пою́щыѧ тѧ̀."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Вы́шнюю жи́знь возжелѣ́вши полꙋчи́ти, до́льнюю сла́дость тща́тельнѡ ѡ҆ста́вила є҆сѝ, и҆ самꙋ́ю себѐ смѣси́ла є҆сѝ посредѣ̀ мꙋже́й, краснѣ́йшаѧ: хрⷭ҇та́ бо ра́ди жениха̀ твоегѡ̀ ѡ҆ ѡ҆брꙋ́чницѣ привре́менномъ небрегла̀ є҆сѝ."
 },
 {
  "type": "TEXT",
  "value": "І҆́косъ: Въ весе́лїи и҆ ра́дости дꙋ́шы возвесели́вше, воста́немъ тща́тельнѡ ᲂу҆слы́шати сло́во пресла́вное: прехо́дитъ бо ᲂу҆́мъ всѧ́къ повѣ́данїе сїѐ, и҆ ᲂу҆дивлѧ́етъ, ꙗ҆́кѡ жена̀ посредѣ̀ мꙋже́й пребыва́ющи побѣдѝ велїа́ра, и҆ ѻ҆́гнь попра̀ сласте́й, и҆ неѡпали́сѧ ѿню́дъ: хрⷭ҇та́ бо вожделѣ́вши нескве́рнаѧ, ѡ҆брꙋ́чника привре́меннаго небрегла̀ є҆́сть."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ."
 },
 {
  "type": "TEXT",
  "value": "Свѣ́тъ тебѣ̀ возсїѧ̀, тогѡ̀ сопрꙋ́зѣ, є҆ѵфросѵ́нїе сла́внаѧ, пра́вый бо и҆мѣ́ла є҆сѝ ра́зꙋмъ, пѣснопою́щи: бж҃е, бл҃гослове́нъ є҆сѝ."
 },
 {
  "type": "TEXT",
  "value": "Же́злъ ᲂу҆крѣплѧ́ющь тѧ̀, крⷭ҇тъ и҆мꙋ́щи, де́мѡнскаѧ зїѧ̑нїѧ прешла̀ є҆сѝ невре́дна, прпⷣбнаѧ, пѣснопою́щи: бж҃е, бл҃гослове́нъ є҆сѝ."
 },
 {
  "type": "TEXT",
  "value": "До́мъ се́рдце твоѐ ст҃а́гѡ дх҃а, прпⷣбнаѧ, соверши́ла є҆сѝ, тѧ̀ ᲂу҆крѣ́пльшагѡ, и҆ показа́вшагѡ дꙋхѡ́въ лꙋка́выхъ си́льнѣйшꙋ."
 },
 {
  "type": "TEXT",
  "value": "Бг҃оро́диченъ: Тѣ́ломъ ѡ҆бложе́ннаго, бг҃а безтѣле́снаго, всенепоро́чнаѧ, родила̀ є҆сѝ, на́съ и҆збавлѧ́ющаго стра́хомъ пѣснопою́щыѧ: бж҃е, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Тебѣ̀ вседѣ́телю, въ пе́щи ѻ҆́троцы, всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Ти́нꙋ страсте́й ѿтрѧсла̀ є҆сѝ, ѻ҆трокови́це, а҆́гг҃лѡвъ невеще́ственномꙋ житїю̀ поревнова́вши. Съ ни́миже и҆ воспѣва́еши: гдⷭ҇а по́йте, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Дае́тъ тебѣ̀ жи́зни храни́тель, тогѡ́ бо стопа́мъ послѣ́довала є҆сѝ, тогѡ̀ добро́ты вожделѣ́вши бжⷭ҇твенныѧ: съ ни́мже и҆ весели́шисѧ во всѧ̑ вѣ́ки."
 },
 {
  "type": "TEXT",
  "value": "Вознесла́сѧ є҆сѝ ко ѻ҆би́телемъ присножи́тєльнымъ и҆́стиннѡ, жела́нїе полꙋчи́вши, є҆го́же возлюби́ла є҆сѝ дре́ва, дѣ́во, жи́зни наслажда́ющисѧ, и҆ превозносѧ́щи хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: Всѧ̀ и҆збра́нна, ᲂу҆кра́шена всѧ̀, бг҃ъ ю҆́же возлюбѝ, ю҆́же и҆збра̀, ꙗ҆ви́ласѧ є҆сѝ, дв҃о препросла́вленнаѧ при́снѡ: тѣ́мъ тѧ̀ пое́мъ всегда̀ ꙗ҆́кѡ бцⷣꙋ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ."
 },
 {
  "type": "TEXT",
  "value": "Свѧще́нное торжество̀ мона́шествꙋющихъ собо́ръ хва́литъ, па́мѧть твою̀ соверша́ѧ бг҃освѣ́тлꙋю, ли́къ ра́дꙋетсѧ мона́хинь: ꙗ҆ви́сѧ бо чи́стаѧ всѣ́хъ свѣ́тлость, є҆ѵфросѵ́нїе досточꙋ́днаѧ."
 },
 {
  "type": "TEXT",
  "value": "Ꙗ҆́кѡ че́стно возложе́нїе нбⷭ҇нагѡ была̀ є҆сѝ хра́ма, ꙗ҆́кѡ крі́нъ во дво́рѣхъ процвѣла̀ є҆сѝ бж҃їихъ, ꙗ҆́кѡ шипо́къ сладково́нный принесла́сѧ є҆сѝ всецр҃ю̀, ꙗ҆́кѡ честно́е мѵ́ро, є҆ѵфросѵ́нїе всебл҃же́ннаѧ."
 },
 {
  "type": "TEXT",
  "value": "Тебѐ самꙋ́ю просвѣти́ла є҆сѝ добродѣ́телей твои́хъ ᲂу҆краше́нїемъ свѣ́тлымъ, и҆ привела́сѧ є҆сѝ къ мы́сленномꙋ черто́гꙋ, чи́стаѧ, и҆ ны́нѣ недомы́сленнꙋю смотрѧ́еши добро́тꙋ хрⷭ҇то́вꙋ, и҆ ѡ҆боже́нїе прїе́млеши соверше́ннѣйшее."
 },
 {
  "type": "TEXT",
  "value": "Ст҃а́ѧ твоѧ̀ па́мѧть ѡ҆свѧща́етъ дне́сь вѣ̑рныѧ, точа́щи просвѣще́нїе и҆ ст҃ы́ню, въ не́йже тѧ̀ мо́лимъ, ꙗ҆́кѡ и҆збра́ннꙋю невѣ́стꙋ хрⷭ҇то́вꙋ: спасѝ моли́твами твои́ми є҆ѵфросѵ́нїе, на́съ всегда̀."
 },
 {
  "type": "TEXT",
  "value": "Бг҃оро́диченъ: Свѣ́томъ лица̀ твоегѡ̀, во тмѣ̀ лежа́щаго страсте́й, ѡ҆зарѝ свѣ́та две́ре мы́сленнаѧ, да не но́щь пости́гнетъ мѧ̀ сме́ртнаѧ, влⷣчце чⷭ҇таѧ, спасе́нїѧ моегѡ̀ неча́ѧнїе ѿсѣка́ющи."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Дх҃омъ во ст҃и́лищи:"
 },
 {
  "type": "TEXT",
  "value": "Кнѧ́зѧ ᲂу҆таи́вшисѧ стꙋда̀, и҆ сего̀ въ любомꙋ́дромъ ѻ҆́бразѣ показа́ла є҆сѝ безꙋ́мна, дѣ́ва сꙋ́щи дꙋше́ю и҆ тѣ́ломъ, была̀ є҆сѝ мꙋ́жъ ра́зꙋмомъ и҆ вѣ́рою, є҆ѵфросѵ́нїе прпⷣбнаѧ, дѣ́вственникѡвъ добро́та, и҆ мона́хинь красота̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Де́нь мнѣ̀ возсїѧ́й ᲂу҆́мнагѡ весе́лїѧ: ты́ бо є҆сѝ, чⷭ҇таѧ, свѣ́тъ и҆ жи́знь сꙋ́щымъ во тмѣ̀: хотѣ́нїю бо мощна̀ є҆сѝ, и҆ є҆́же твори́ти и҆́маши, ꙗ҆́кѡ сꙋ́щи всѣ́хъ влⷣчца, и҆зба́ви всѧ̑ ѿ бѣ́дъ, и҆ скорбе́й, и҆ собла̑знъ чꙋжда́гѡ."
 }
]