694 lines
64 KiB
JSON
694 lines
64 KiB
JSON
[
|
|
{
|
|
"type": "HEADER",
|
|
"value": "Ѻ҆ктѡ́врїа а҃"
|
|
},
|
|
{
|
|
"type": "HEADER",
|
|
"value": "Покро́въ прест҃ы́ѧ влⷣчцы на́шеѧ бцⷣы и҆ приснодв҃ы мр҃і́и:"
|
|
},
|
|
{
|
|
"type": "HEADER",
|
|
"value": "И҆ а҆́ще хра́мъ є҆ѧ̀, и҆лѝ и҆зво́литъ настоѧ́тель соверши́ти всено́щное бдѣ́нїе, и҆ пое́мъ слꙋ́жбꙋ є҆ѧ̀ си́це:"
|
|
},
|
|
{
|
|
"type": "HEADER",
|
|
"value": "На ма́лѣй вече́рни стїхи̑ры самогла́сны, гла́съ а҃, на д҃:"
|
|
},
|
|
{
|
|
"type": "TEXT",
|
|
"value": "На вы́шнихъ прⷭ҇то́лѣхъ почива́ѧй є҆ди́нъ бг҃ъ, превы́ше земны́хъ по́далъ є҆́сть ви́дѣти своемꙋ̀ ᲂу҆го́дникꙋ, пребжⷭ҇твеннѣи рꙋ́цѣ моле́бнѡ простира́ющꙋ, ѡ҆ гра́дѣ и҆ ѡ҆ лю́дехъ молѧ́щꙋюсѧ тебѐ влⷣчце: покры́й и҆ ны́нѣ гпⷭ҇жѐ на́съ, ѡ҆мофо́ромъ ми́лости твоеѧ̀. Два́жды."
|
|
},
|
|
{
|
|
"type": "TEXT",
|
|
"value": "Гра́дъ почита́ющїй тѧ̀, и҆ по до́лгꙋ сла́вѧщїй, покрыва́еши пречⷭ҇таѧ, твои́мъ ѡ҆мофо́ромъ честны́мъ ѿ нахожде́нїѧ проти́вныхъ, ѿ гла́да же и҆ трꙋ́са и҆ междоꙋсо́бныѧ бра́ни, дв҃о, неискꙋсобра́чнаѧ бг҃оневѣ́сто, человѣ́кѡвъ покро́въ и҆ застꙋпле́нїе."
|
|
},
|
|
{
|
|
"type": "TEXT",
|
|
"value": "Пала́та ѡ҆дꙋшевле́ннаѧ хрⷭ҇то́ва, вѣ̑рнымъ же стѣна̀ и҆ покро́въ и҆ держа́ва: тобо́ю гра́дъ тво́й бг҃омт҃и, спаса́етсѧ: твое́ю по́мощїю правовѣ́рнїи ца́рїе вѣнча́ютсѧ: тобо́ю хва́лѧщїисѧ при́снѡ, побѣ̑ды на пога̑ныѧ но́сѧтъ: покрыва́еши бо ѡ҆мофо́ромъ ми́лости твоеѧ̀."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, празднолю́бныхъ собо́ри, прест҃ꙋ́ю дв҃ꙋ воспои́мъ: дне́сь бо а҆́гг҃ли со свѧты́ми пра́зднꙋютъ честны́й покро́въ бж҃їѧ мт҃ре, и҆ къ похвале́нїю на́съ земны́хъ призыва́ютъ вопи́ти непреста́ннымъ гла́сомъ: ра́дꙋйсѧ, цр҃кве чꙋ́дное ᲂу҆краше́нїе, и҆ всемꙋ̀ мі́рꙋ преди́вный покро́въ. Ра́дꙋйсѧ, вѣ̑рнымъ посо́бїе на бра́нехъ, и҆ во́инѡмъ соблюде́нїе. Ра́дꙋйсѧ, покро́ве и҆ застꙋпле́нїе на́ше: тебе́ бо хрⷭ҇тїа́нскїй ро́дъ непреста́ннѡ блажи́тъ."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "Сла́ва на нб҃сѣ́хъ, и҆ на землѝ весе́лїе, ꙗ҆́кѡ цр҃и́ца со всѣ́ми ст҃ы́ми, за всѧ̑ ны̀ въ цр҃кви мо́литсѧ."
|
|
},
|
|
{
|
|
"type": "TEXT",
|
|
"value": "Сті́хъ: Слы́ши дщѝ и҆ ви́ждь, приклонѝ ᲂу҆́хо твоѐ."
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи во ст҃ꙋ́ю це́рковь, та́мѡ бо бцⷣа ѡ҆мофо́ромъ покрыва́етъ лю́ди ѿ всѣ́хъ напа́стей вра́жїихъ."
|
|
},
|
|
{
|
|
"type": "TEXT",
|
|
"value": "Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи."
|
|
},
|
|
{
|
|
"type": "TEXT",
|
|
"value": "Пречⷭ҇таѧ бцⷣе, не забꙋ́ди на́съ твои́хъ рабѡ́въ: но за ны̀ моли́сѧ, вѣ́рою пою́щыѧ тѧ̀."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ г҃:"
|
|
},
|
|
{
|
|
"type": "TEXT",
|
|
"value": "Прїиди́те всѝ празднолю́бцы, честны́й покро́въ бж҃їѧ мт҃ре ᲂу҆блажи́мъ: къ сн҃ꙋ бо рꙋ́цѣ ми́лостивнѡ прострѐ, и҆ ст҃ы́мъ покро́вомъ є҆ѧ̀ мі́ръ ѡ҆гражде́нъ бы́сть. Тѣ́мже ᲂу҆сты̀ и҆ се́рдцемъ, и҆ пѣ́сньми и҆ пѣ̑нїи дх҃о́вными, со всѣ́ми притека́ющими пра́зднꙋимъ свѣ́тлѡ."
|
|
},
|
|
{
|
|
"type": "HEADER",
|
|
"value": "Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Дне́сь благовѣ́рнїи лю́дїе свѣ́тлѡ пра́зднꙋемъ, ѡ҆сѣнѧ́еми твои́мъ, бг҃ома́ти, прише́ствїемъ, и҆ къ твоемꙋ̀ взира́юще пречⷭ҇томꙋ ѻ҆́бразꙋ, ᲂу҆ми́льнѡ глаго́лемъ: покры́й на́съ честны́мъ твои́мъ покро́вомъ, и҆ и҆зба́ви на́съ ѿ всѧ́кагѡ ѕла̀, молѧ́щи сн҃а твоего̀ хрⷭ҇та̀ бг҃а на́шего, спастѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На вели́цѣй вече́рни, Блаже́нъ мꙋ́жъ: а҆нтїфѡ́нъ а҃."
|
|
},
|
|
{
|
|
"type": "HEADER",
|
|
"value": "Стїхи̑ры на и҃, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ ди́вное чꙋ́до:"
|
|
},
|
|
{
|
|
"type": "TEXT",
|
|
"value": "Ѽ вели́кое застꙋпле́нїе печа̑льнымъ є҆сѝ бцⷣе чⷭ҇таѧ, ско́раѧ помо́щнице, спасе́нїе мі́ра и҆ ᲂу҆твержде́нїе: ми́лости пꙋчи́на, бж҃їѧ мꙋ́дрости и҆сто́чниче, мі́рꙋ покро́въ, воспое́мъ вѣ́рнїи, свѣ́тлый ѡ҆мофо́ръ є҆ѧ̀ хва́лѧще неизрече́ннѡ: ѡ҆бра́дованнаѧ ра́дꙋйсѧ, съ тобо́ю гдⷭ҇ь, подаѧ́й мі́рꙋ тобо́ю ве́лїю ми́лость. Два́жды."
|
|
},
|
|
{
|
|
"type": "TEXT",
|
|
"value": "Ди́вный проречѐ и҆са́їа: бꙋ́детъ бо, речѐ, въ послѣ̑днѧѧ дни̑ ꙗ҆́вѣ гора̀ гдⷭ҇нѧ, и҆ до́мъ гдⷭ҇ень верхꙋ̀ горы̀, ᲂу҆ви́дѣхомъ же влⷣчце, ѡ҆ тебѣ̀ и҆́стинное сбытїѐ, го́ры бо и҆ хо́лми ᲂу҆краси́шасѧ многоимени́тыми цр҃квами твои́хъ пра́здникѡвъ. Тѣ́мъ ве́селѡ вопїе́мъ тѝ: ѡ҆бра́дованнаѧ ра́дꙋйсѧ, съ тобо́ю гдⷭ҇ь, подаѧ́й мі́рꙋ тобо́ю ве́лїю ми́лость."
|
|
},
|
|
{
|
|
"type": "TEXT",
|
|
"value": "Ѽ чꙋ́дное ᲂу҆краше́нїе всѣ̑мъ вѣ̑рнымъ є҆сѝ: прⷪ҇ро́ческое и҆́стинное сбытїѐ, а҆пⷭ҇лѡмъ сла́ва, и҆ мꙋ́ченикѡмъ ᲂу҆добре́нїе: дѣ́вствꙋ похвала̀, и҆ всемꙋ̀ мі́рꙋ преди́вный покро́въ: покры́й влⷣчце, ѡ҆мофо́ромъ ми́лости твоеѧ̀ всѧ̑ лю́ди вопїю́щыѧ: ѡ҆бра́дованнаѧ ра́дꙋйсѧ, съ тобо́ю гдⷭ҇ь, подаѧ́й мі́рꙋ тобо́ю ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆́ны стїхи́ры, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆́кѡ до́блѧ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ бг҃онасажде́нный ра́й, и҆ мѣ́сто живо́тнагѡ дре́ва, напаѧ́емо дх҃омъ ст҃ы́мъ, тебѐ бцⷣе свѣ́дꙋще, творца̀ всѣ́хъ ро́ждшꙋю, живо́тнымъ хлѣ́бомъ вѣ̑рныѧ пита́юща. Є҆мꙋ́же ѡ҆ на́съ съ прⷣте́чею моли́сѧ, честны́мъ ѡ҆мофо́ромъ покрыва́ющи лю́ди ѿ всѧ́кїѧ напа́сти. Два́жды."
|
|
},
|
|
{
|
|
"type": "TEXT",
|
|
"value": "Ѡ҆свѧща́етсѧ нб҃о и҆ землѧ̀, це́рковь же свѣ́титсѧ, и҆ лю́дїе всѝ веселѧ́тсѧ: се́ бо мт҃и бж҃їѧ, со а҆́гг҃льскими вѡ́инствы, съ прⷣте́чею и҆ бг҃осло́вомъ, съ прⷪ҇рѡ́ки же и҆ а҆пⷭ҇лы, неви́димѡ вше́дши, за хрⷭ҇тїа́ны мо́литсѧ хрⷭ҇тꙋ̀, поми́ловати гра́дъ и҆ лю́ди, сла́вѧщыѧ тоѧ̀ покро́ва пра́здникъ."
|
|
},
|
|
{
|
|
"type": "TEXT",
|
|
"value": "Добро́тꙋ тѧ̀ і҆а́кѡвлю, и҆ лѣ́ствицꙋ нбⷭ҇нꙋю, по не́йже гдⷭ҇ь сни́де на зе́млю: тѣ́хъ же тогда̀ ѻ҆́брази твою̀ че́сть и҆ сла́вꙋ бцⷣе, проѧвлѧ́хꙋ. Тѧ̀ ро́ждшꙋю бг҃а всѣ́хъ блажа́тъ нбⷭ҇нїи а҆́гг҃ли, и҆ земні́и человѣ́цы, ꙗ҆́кѡ за ве́сь мі́ръ мо́лишисѧ, покрыва́ющи ми́лостїю, тво́й честны́й соверша́ющихъ пра́здникъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ и҃:"
|
|
},
|
|
{
|
|
"type": "TEXT",
|
|
"value": "Сра́дꙋютсѧ съ на́ми ᲂу҆́мнаѧ всѧ̑ чинонача̑лїѧ, дꙋхо́внѡ совокꙋ́пльше чꙋ́вственный ли́къ, ви́дѧще цр҃и́цꙋ и҆ влⷣчцꙋ всѣ́хъ, многоиме́ннѣ вѣ́рными сла́вимꙋ: ра́дꙋютсѧ же и҆ дꙋ́си првⷣныхъ, сꙋ́щїи зри́телїе видѣ́нїѧ, на воздꙋ́сѣ моле́бнѡ простира́ющꙋ всечестнѣ́и своѝ рꙋ́цѣ, просѧ́щꙋ ᲂу҆мире́нїѧ мі́рꙋ и҆ спасе́нїѧ дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. И҆ чтє́нїѧ."
|
|
},
|
|
{
|
|
"type": "HEADER",
|
|
"value": "Бытїѧ̀ чте́нїе. (Глава̀ к҃и.)"
|
|
},
|
|
{
|
|
"type": "TEXT",
|
|
"value": "И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце, и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ: и҆ со́нъ ви́дѣ. И҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ, ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки. И҆ возблагословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀, ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ, нѣ́сть сїѐ, но до́мъ бж҃їй, и҆ сїѧ̑ врата̀ небє́снаѧ."
|
|
},
|
|
{
|
|
"type": "HEADER",
|
|
"value": "Прⷪ҇ро́чества і҆езекі́илева чте́нїе. (Глава̀ м҃г и҆ м҃д.)"
|
|
},
|
|
{
|
|
"type": "TEXT",
|
|
"value": "Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ере́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆̀хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ заключє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ до́мꙋ, и҆ ви́дѣхъ, и҆ сѐ и҆спо́лнь сла́вы до́мъ гдⷭ҇ень."
|
|
},
|
|
{
|
|
"type": "HEADER",
|
|
"value": "При́тчей чте́нїе. (Глава̀ ѳ҃.)"
|
|
},
|
|
{
|
|
"type": "TEXT",
|
|
"value": "Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ. Разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ г҃:"
|
|
},
|
|
{
|
|
"type": "TEXT",
|
|
"value": "Наста̀ дне́сь пресвѣ́тлый пра́здникъ пречⷭ҇таѧ дв҃о, честна́гѡ твоегѡ̀ покро́ва. Па́че со́лнца ѡ҆свѣща́еши лю́ди, вѣ́рою ѿ чи́ста се́рдца тебѐ и҆́стиннꙋю мт҃рь бж҃їю и҆сповѣ́дающыѧ, и҆ сн҃ꙋ твоемꙋ̀ вопїю́щыѧ: хрⷭ҇тѐ бж҃е, моли́твами приснодв҃ы, чи́стѡ и҆ безъ и҆стлѣ́нїѧ ро́ждшїѧ тѧ̀, не преда́ждь врагѡ́мъ ра́тꙋющымъ твоѐ достоѧ́нїе, но ꙗ҆́кѡ ми́лостивъ спасѝ въ ми́рѣ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Гла́съ д҃:"
|
|
},
|
|
{
|
|
"type": "TEXT",
|
|
"value": "Хвале́нїе тебѣ̀ є҆́же по достоѧ́нїю лю́дїе сн҃а твоегѡ̀ пречⷭ҇таѧ влⷣчце, жела́юще воспѣ́ти, но не возмо́гꙋтъ. Всегда́ бо всѣ́хъ вѣ́рныхъ застꙋпа́еши, и҆ покрыва́еши честны́мъ твои́мъ покро́вомъ, и҆ мо́лишисѧ спасти́сѧ всѣ̑мъ, вѣ́рою тебѐ чⷭ҇тꙋю и҆ и҆́стиннꙋю бцⷣꙋ почита́ющымъ."
|
|
},
|
|
{
|
|
"type": "HEADER",
|
|
"value": "Гла́съ в҃:"
|
|
},
|
|
{
|
|
"type": "TEXT",
|
|
"value": "Пренепоро́чнꙋю всѣ́хъ цр҃и́цꙋ пречⷭ҇тꙋю дв҃ꙋ, соше́дшесѧ вѣ́рнїи дне́сь ᲂу҆блажи́мъ мт҃рь хрⷭ҇та̀ бг҃а: при́снѡ бо къ сн҃ꙋ рꙋ́цѣ ми́лостивнѡ простира́етъ. ю҆́же и҆ преди́вный а҆ндре́й ви́дѣ на воздꙋ́сѣ, честны́мъ свои́мъ покро́вомъ лю́ди покрыва́ющꙋю, и҆ то́й ᲂу҆ми́льнѡ возопїи́мъ: ра́дꙋйсѧ, покро́ве и҆ застꙋпле́нїе, и҆ спасе́нїе дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ то́йже:"
|
|
},
|
|
{
|
|
"type": "TEXT",
|
|
"value": "Смы́слъ ѡ҆чи́стивше и҆ ᲂу҆́мъ, со а҆́гг҃лы и҆ мы̀ торжествꙋ́емъ, свѣ́тлѡ начина́юще дв҃дскꙋю пѣ́снь, ѻ҆трокови́цѣ, невѣ́стѣ всѣ́хъ цр҃ѧ̀ хрⷭ҇та̀ бг҃а на́шегѡ, воскреснѝ гдⷭ҇и, глаго́люще, въ поко́й тво́й, ты̀, и҆ кївѡ́тъ ст҃ы́ни твоеѧ̀: ꙗ҆́кѡ бо пала́тꙋ краснꙋ̀ сїю̀ ᲂу҆краси́въ, и҆ причтѐ ю҆̀ гра́дꙋ твоемꙋ̀ влⷣко, стро́ити и҆ покрыва́ти ѿ сопоста́тныхъ пога̑нъ держа́вною си́лою твое́ю, моли́твами є҆ѧ̀."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ всѣ́хъ вы́шши сꙋ́щи нбⷭ҇ныхъ и҆ земны́хъ, херꙋві̑мъ сла́внѣйши, и҆ всеѧ̀ тва́ри честнѣ́йши, тебѐ застꙋ́пницꙋ и҆ покро́въ держа́венъ хрⷭ҇тїа́нскомꙋ ро́дꙋ хрⷭ҇то́съ дарова̀, покрыва́ти и҆ спаса́ти лю́ди согрѣ́шшыѧ, къ тебѣ̀ притека́ющыѧ. Тѣ́мже прибѣ́жище всѣ̑мъ, тебѐ воспѣва́емъ влⷣчце, и҆ честны́й пра́здникъ твоегѡ̀ покро́ва пра́зднꙋемъ свѣ́тлѡ, хрⷭ҇та̀ молѧ́ще дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Гла́съ є҃."
|
|
},
|
|
{
|
|
"type": "TEXT",
|
|
"value": "Сті́хъ: Слы́ши дщѝ и҆ ви́ждь, приклонѝ ᲂу҆́хо твоѐ."
|
|
},
|
|
{
|
|
"type": "TEXT",
|
|
"value": "Воспои́мъ лю́дїе свѣ́тлѡ дв҃дскꙋю пѣ́снь ѻ҆трокови́цѣ невѣ́стѣ, бж҃їи мт҃ри всѣ́хъ цр҃ѧ̀ хрⷭ҇та̀: предста̀ цр҃и́ца ѡ҆деснꙋ́ю тебѐ влⷣко, рѧ́сны златы́ми ѡ҆дѣ́ѧна, и҆ преꙋкра́шена бжⷭ҇твенными лѣ́потами: сїю́ бо и҆збра́ннꙋю въ жена́хъ, па́че всегѡ̀ мі́ра ᲂу҆добри́въ, благоизво́ли роди́тисѧ ѿ неѧ̀, вели́кїѧ ра́ди ми́лости: и҆ сїю̀ помо́щницꙋ лю́демъ свои̑мъ дарова̀, стро́ити, и҆ покрыва́ти ѿ всѧ́кїѧ бѣды̀ рабы̑ своѧ̑, є҆ди́нꙋ благослове́ннꙋю."
|
|
},
|
|
{
|
|
"type": "HEADER",
|
|
"value": "Гла́съ з҃:"
|
|
},
|
|
{
|
|
"type": "TEXT",
|
|
"value": "Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи."
|
|
},
|
|
{
|
|
"type": "TEXT",
|
|
"value": "Гора̀ є҆сѝ вели́ка и҆ пресла́вна, па́че горы̀ сїна́йскїѧ бцⷣе: ѻ҆на́ бо не терпѧ́щи сни́тїѧ сла́вы бж҃їѧ во ѻ҆́бразѣхъ и҆ сѣ́нехъ, ѻ҆гне́мъ возгара́шесѧ, и҆ гро́ми и҆ мѡ́лнїѧ та́мѡ бы́ша. Ты́ же всего̀ въ себѣ̀ бжⷭ҇твеннаго ѻ҆гнѧ̀ сꙋ́щи, бж҃їѧ сло́ва во чре́вѣ неѡпа́льнѡ носи́ла є҆сѝ, ма́нїемъ носѧ́щаго всѧ̑: и҆ мт҃рне дерзнове́нїе къ немꙋ̀ и҆мꙋ́щи, помозѝ влⷣчце, вѣ́рнѡ пра́зднꙋющымъ тво́й честны́й пра́здникъ, и҆ не забꙋ́ди ми́лостивнѡ посѣща́ющи: прїѧ́ла бо є҆сѝ ѿ бг҃а да́ръ стро́ити, и҆ покрыва́ти хрⷭ҇тоимени́тое твоѐ ста́до, рабы̑ твоѧ̑."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ в҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ вѣнце́мъ пресвѣ́тлымъ всечⷭ҇таѧ бцⷣе, покро́вомъ твои́мъ честны́мъ, цр҃ковь бж҃їѧ приѡдѣ́ѧсѧ: и҆ свѣ́титсѧ ра́дꙋющисѧ дне́сь, и҆ та́йнѡ ликовствꙋ́етъ влⷣчце, вопїю́щи тебѣ̀: ра́дꙋйсѧ ѡ҆дѣѧ́нїе честно́е, и҆ вѣ́нче бж҃їѧ сла́вы. Ра́дꙋйсѧ є҆ди́на сла́вы соверше́нїе, и҆ вѣ́чное весе́лїе: ра́дꙋйсѧ, къ тебѣ̀ притека́ющымъ приста́нище и҆ и҆збавле́нїе, и҆ спасе́нїе на́ше."
|
|
},
|
|
{
|
|
"type": "HEADER",
|
|
"value": "Та́же тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Дне́сь бл҃говѣ́рнїи лю́дїе:"
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-мъ стїхосло́вїи, сѣда́ленъ, гла́съ г҃:"
|
|
},
|
|
{
|
|
"type": "TEXT",
|
|
"value": "Бжⷭ҇твенными сїѧ̑нїи а҆́гг҃льскихъ во́инствъ ѡ҆бстꙋпа́ема, и҆ съ чи́нми прⷪ҇рѡ́къ и҆ а҆пⷭ҇лъ, че́стнѡ слꙋ́жбꙋ прїе́млющи, ꙗ҆́кѡ мт҃и бж҃їѧ, посѣтѝ на́съ твои́хъ ра̑бъ, молѧ́щи хрⷭ҇та̀ бг҃а на́шего, дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, то́йже."
|
|
},
|
|
{
|
|
"type": "HEADER",
|
|
"value": "По в҃-мъ стїхосло́вїи сѣда́ленъ, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Безпомѡ́щнымъ крѣ́пость ты̀ вои́стиннꙋ, пречⷭ҇таѧ бг҃ома́ти, ѿсю́дꙋ смире́ннїи тобо́ю возвыша́емсѧ, ѡ҆ тебѣ̀ высо́цѣ держи́мсѧ: всѣ̑мъ ты̀ є҆сѝ покро́въ и҆ къ бг҃ꙋ хода́таица."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ то́йже. По полѷеле́и сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дре́внѧгѡ вои́стиннꙋ пречестнѣ́е кївѡ́та, тво́й пречестны́й ѡ҆мофо́ръ, па́че и҆ле́ктра просвѣща́ѧсѧ, не веще́ственнѣ, но дꙋхо́внѣ, нетлѣ́нными твои́ми пречи́стыми рꙋка́ми простира́емь, соблюда́етъ ми́лостивнѡ чествꙋ́ющихъ благоꙋкраше́нный пра́здникъ твоегѡ̀ покро́ва, влⷣчце, въ ѻ҆́ньже соше́дшесѧ ᲂу҆се́рднѡ пра́зднꙋемъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, то́йже."
|
|
},
|
|
{
|
|
"type": "HEADER",
|
|
"value": "Степє́нна а҃ а҆нтїфѡ́нъ д҃-гѡ гла́са. Прокі́менъ, гла́съ д҃:"
|
|
},
|
|
{
|
|
"type": "TEXT",
|
|
"value": "Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ."
|
|
},
|
|
{
|
|
"type": "TEXT",
|
|
"value": "Сті́хъ: Лицꙋ̀ твоемꙋ̀ помо́лѧтсѧ:"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе лꙋкѝ, зача́ло д҃:"
|
|
},
|
|
{
|
|
"type": "TEXT",
|
|
"value": "Воста́вши марїа́мъ:"
|
|
},
|
|
{
|
|
"type": "HEADER",
|
|
"value": "Ѱало́мъ н҃."
|
|
},
|
|
{
|
|
"type": "TEXT",
|
|
"value": "Сла́ва: Моли́твами бцⷣы:"
|
|
},
|
|
{
|
|
"type": "TEXT",
|
|
"value": "И҆ ны́нѣ: Моли́твами бцⷣы:"
|
|
},
|
|
{
|
|
"type": "TEXT",
|
|
"value": "Поми́лꙋй мѧ̀, бж҃е:"
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ и҃:"
|
|
},
|
|
{
|
|
"type": "TEXT",
|
|
"value": "Сра́дꙋютсѧ съ на́ми ᲂу҆́мнаѧ всѧ̑ чинонача̑лїѧ, дꙋхо́внѡ совокꙋ́пльше чꙋ́вственный ли́къ, ви́дѧще цр҃и́цꙋ и҆ влⷣчцꙋ всѣ́хъ, многоиме́ннѣ вѣ́рными сла́вимꙋ. Ра́дꙋютсѧ же и҆ дꙋ́си пра́ведныхъ, сꙋ́щїи зри́телїе видѣ́нїѧ, на воздꙋ́сѣ моле́бнѡ простира́ющꙋ всечестнѣ́и своѝ рꙋ́цѣ, просѧ́щꙋ ᲂу҆мире́нїѧ мі́рꙋ и҆ спасе́нїѧ дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы на в҃і: і҆рмо́съ по два́жды. Гла́съ д҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
|
|
},
|
|
{
|
|
"type": "TEXT",
|
|
"value": "Съ чи́нми ст҃ы́хъ а҆́гг҃лъ, и҆ съ собѡ́ры прⷪ҇рѡ́къ и҆ а҆пⷭ҇лъ, въ сла́вѣ вели́цѣй, ꙗ҆́кѡ мт҃и бж҃їѧ дне́сь въ це́рковь вше́дши за хрⷭ҇тїа́ны мо́лишисѧ, ѿ напа́сти и҆ печа́ли и҆збавлѧ́еши всѧ̑, покрыва́ющи твое́ю ми́лостїю."
|
|
},
|
|
{
|
|
"type": "TEXT",
|
|
"value": "Ски́нїю тѧ̀ мѡѷсе́й, и҆ же́злъ а҆арѡ́новъ и҆менова̀: ты́ бо живо́тное дре́во хрⷭ҇та̀ процвѣла̀ є҆сѝ, къ немꙋ́же дерзнове́нїе и҆мꙋ́щи, за ны̀ чествꙋ́ющыѧ тѧ̀ цр҃и́це, помоли́сѧ, и҆зба́вити на́съ ѿ всѧ́кагѡ ѕла̀: да твоегѡ̀ покро́ва пра́здникъ сла́вимъ."
|
|
},
|
|
{
|
|
"type": "TEXT",
|
|
"value": "Не ꙗ҆́кѡ предъ кївѡ́томъ дре́вле собра́въ дв҃дъ ли́ки, и҆гра́етъ, но па́че ны́нѣ съ чи́нми ст҃ы́хъ предъ тобо́ю текꙋ́ще въ цр҃ковь, тебѣ̀ кла́нѧющесѧ глаго́лютъ: молѝ за чествꙋ́ющыѧ тѧ̀ лю́ди, да тво́й сла́вѧще покро́въ, че́стнѡ пра́зднꙋемъ."
|
|
},
|
|
{
|
|
"type": "TEXT",
|
|
"value": "Пою́тъ тѧ̀ бцⷣе, а҆́гг҃льстїи чи́ни, и҆ сла́вѧтъ патрїа́рси со ст҃и́тєли, предъ лице́мъ тѝ текꙋ́ще въ це́рковь. Съ ни́миже тѧ̀ тогда̀ ст҃ы́й а҆ндре́й ви́дѣ за ны̀ грѣ̑шныѧ къ бг҃ꙋ молѧ́щꙋюсѧ поми́ловати лю́ди, сла́вѧщыѧ твоегѡ̀ покро́ва пра́здникъ."
|
|
},
|
|
{
|
|
"type": "HEADER",
|
|
"value": "Катава́сїа, і҆рмо́съ то́йже."
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би."
|
|
},
|
|
{
|
|
"type": "TEXT",
|
|
"value": "Кла́съ прозѧ́бшаѧ бжⷭ҇твенный, ꙗ҆́кѡ ни́ва неѡра́ннаѧ ꙗ҆́вѣ. Ра́дꙋйсѧ ѡ҆дꙋшевле́ннаѧ трапе́зо, хлѣ́бъ живо́тный вмѣ́щшаѧ. Ра́дꙋйсѧ, живо́тныѧ воды̀ и҆сто́чниче неистощи́мый, влⷣчце."
|
|
},
|
|
{
|
|
"type": "TEXT",
|
|
"value": "Твоѝ рабѝ влⷣчце, въ це́ркви твое́й вѣ́рою предстоѧ́ще, твоеѧ̀ ѡ҆жида́емъ ми́лости: посѣтѝ на́ше смире́нїе, и҆ твои́мъ ст҃ы́мъ покро́вомъ защитѝ лю́ди ѿ всѧ́кагѡ ѕла̀."
|
|
},
|
|
{
|
|
"type": "TEXT",
|
|
"value": "Многоимени́таѧ дв҃о, прⷪ҇рѡ́ки проѡбражена̀ че́стнѡ, и҆̀же тебѣ̀ ны́нѣ со а҆́гг҃лы слꙋ́жатъ. Съ ни́миже ѡ҆ на́съ къ бг҃ꙋ моли́сѧ, да твоегѡ̀ покро́ва ст҃ы́й де́нь ра́дꙋющесѧ всѝ свѣ́тлѡ пра́зднꙋемъ."
|
|
},
|
|
{
|
|
"type": "TEXT",
|
|
"value": "Гедеѡ́нъ тѧ̀ рꙋно̀ проѡбразѝ, на тѧ́ бо ꙗ҆́кѡ роса̀ хрⷭ҇то́съ бг҃ъ сни́де, къ немꙋ́же бцⷣе, моли́сѧ, побѣ́дꙋ да́ти во́инствꙋ на́шемꙋ на врагѝ, да ꙗ҆́кѡ мадїа́мы низложи́въ, просла́витъ ст҃ы́й тво́й пра́здникъ."
|
|
},
|
|
{
|
|
"type": "TEXT",
|
|
"value": "Па́че со́лнечныхъ лꙋ̑чь, твои́мъ блиста́ющимъ ѡ҆мофо́ромъ, ѡ҆свѣща́еши це́рковь и҆ лю́ди, и҆ тмꙋ̀ грѣхѡ́въ на́шихъ ѿго́ниши посѣще́нїемъ твои́мъ бцⷣе, къ сн҃ꙋ твоемꙋ̀ и҆ бг҃ꙋ за ны̀ молѧ́щисѧ."
|
|
},
|
|
{
|
|
"type": "HEADER",
|
|
"value": "По г҃-й пѣ́сни сѣда́ленъ, гла́съ є҃:"
|
|
},
|
|
{
|
|
"type": "TEXT",
|
|
"value": "Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рꙋ, и҆ спасе́нїе, и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, то́йже."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
|
|
},
|
|
{
|
|
"type": "TEXT",
|
|
"value": "Во гла́сѣхъ пѣ́нїй, дв҃о, тебѣ̀ вопїе́мъ всепѣ́таѧ: ра́дꙋйсѧ, тꙋ́чнаѧ горо̀, и҆ ᲂу҆сыре́ннаѧ дх҃омъ. Ра́дꙋйсѧ, свѣ́щниче, и҆ ста́мно ма́ннꙋ носѧ́щаѧ, ᲂу҆слажда́ющаѧ всѣ́хъ благочести́выхъ чꙋ̑вства."
|
|
},
|
|
{
|
|
"type": "TEXT",
|
|
"value": "Па́че а҆арѡ́нѧ кївѡ́та, всю́ тѧ бг҃ъ ѡ҆свѧти́лъ є҆́сть дх҃омъ бцⷣе, ст҃ы̑мъ, и҆ а҆́гг҃лѡмъ слꙋжи́ти тебѣ̀ повелѣ̀, съ ни́миже за гра́дъ и҆ лю́ди моли́сѧ, тво́й сла́вѧщихъ честны́й пра́здникъ."
|
|
},
|
|
{
|
|
"type": "TEXT",
|
|
"value": "Прїидѝ ны́нѣ въ сла́вѣ въ твою̀ бцⷣе, це́рковь съ собѡ́ры всѣ́хъ ст҃ы́хъ, ꙗ҆́коже и҆ногда́ тѧ ст҃ы́й а҆ндре́й ви́дѣ на воздꙋ́сѣ свѣ́тлѣ за хрⷭ҇тїа́ны молѧ́щꙋюсѧ, и҆ пода́ждь на́мъ твою̀ ми́лость."
|
|
},
|
|
{
|
|
"type": "TEXT",
|
|
"value": "Оу҆крѣпѝ влⷣчце сла́вѧщее тѧ̀ во́инство на́ше на проти̑вныѧ врагѝ, ꙗ҆́кѡ дв҃да на голїа́ѳа: да тебѣ̀ веселѧ́щесѧ вопїе́мъ: ра́дꙋйсѧ покро́ве ст҃ы́й, и҆ застꙋ́пнице гра́дꙋ на́шемꙋ."
|
|
},
|
|
{
|
|
"type": "TEXT",
|
|
"value": "Тебѣ̀ припа́даемъ гпⷭ҇жѐ, вѣ́рою, и҆ покланѧ́ющесѧ благода́рнѡ вопїе́мъ тѝ: ра́дꙋйсѧ бг҃облагода́тнаѧ дв҃о, покро́ве и҆ ѡ҆гражде́нїе на́ше, и҆ помо́щнице въ бѣдѣ̀ сꙋ́щымъ, спасѝ на́съ къ тебѣ̀ прибѣга́ющихъ, на тѧ́ бо надѣ́емсѧ."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ."
|
|
},
|
|
{
|
|
"type": "TEXT",
|
|
"value": "Ѻ҆́дръ тѧ̀ дре́вле соломѡ́нъ написа̀, и҆ ло́жницꙋ нбⷭ҇нагѡ цр҃ѧ̀, ѡ҆бстꙋпа́емꙋ серафі́мы, є҆́же ѡ҆ тебѣ̀ рече́сѧ бцⷣе. Тѣ́мъ тѧ̀ ны́нѣ мо́лимъ, мт҃и бж҃їѧ всест҃а́ѧ: покры́й: на́съ ѿ всѣ́хъ бѣ́дъ."
|
|
},
|
|
{
|
|
"type": "TEXT",
|
|
"value": "Тебѣ̀ а҆́гг҃лѡвъ старѣ̑йшины, и҆ честні́и прⷪ҇ро́цы со а҆пⷭ҇лы ꙗ҆́кѡ мт҃ри бж҃їи че́стнѡ слꙋ́жатъ, ви́дѧще тѧ̀ за мі́ръ моли́твꙋ творѧ́щꙋ: твоѧ̑ же прошє́нїѧ послꙋ́шавъ гдⷭ҇ь, спаса́етъ гра́дъ и҆ лю́ди на тѧ̀ надѣ́ющыѧсѧ."
|
|
},
|
|
{
|
|
"type": "TEXT",
|
|
"value": "Вели́кїй тѧ̀ во прⷪ҇ро́цѣхъ и҆са́їа проречѐ, глаго́лѧ, бг҃а роди́ти неискꙋсобра́чнѡ: ты́ бо чⷭ҇таѧ марі́е, ст҃ѣ́йши всѣ́хъ была̀ є҆сѝ, бг҃а бо во ᲂу҆тро́бѣ и҆ на рꙋкꙋ̀ носи́ла є҆сѝ. Є҆мꙋ́же за ны̀ моли́сѧ, твои́мъ ѡ҆сѣнѧ́ющи покро́вомъ вѣ́рою тѧ̀ сла́вѧщихъ."
|
|
},
|
|
{
|
|
"type": "TEXT",
|
|
"value": "Дꙋхо́вными парѧ́ще кри́лы ст҃ы́хъ собо́ри та́йнѡ прїидо́ша тебѣ̀ послꙋжи́ти бцⷣе, ви́дѧще тѧ̀ на ле́гцѣ ѻ҆́блацѣ сла́вы, ко сп҃сꙋ хрⷭ҇тꙋ̀ молѧ́щꙋюсѧ, пода́ти побѣ́дꙋ во́инствꙋ на́шемꙋ, погꙋби́ти вою́ющихъ на́съ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
|
|
},
|
|
{
|
|
"type": "TEXT",
|
|
"value": "І҆ере́є бг҃омꙋ́дрїи, въ це́ркви твое́й съ людьмѝ благочести́выми предстоѧ́ще, твоеѧ̀ ѡ҆жида́ютъ, бцⷣе, ми́лости: премѣнѝ на ра́дость на́шꙋ печа́ль, ра́дость бо родила̀ є҆сѝ, всѣ́хъ человѣ́кѡвъ грѣхѝ ѿпꙋсти́вшаго."
|
|
},
|
|
{
|
|
"type": "TEXT",
|
|
"value": "Тебѣ̀ всѧ̀ землѧ̀ да́ры прино́ситъ, ꙗ҆́кѡ цр҃и́цѣ бж҃їи мт҃ри: а҆рхїерє́и кла́нѧютсѧ, и҆ лю́дїе всѝ веселѧ́тсѧ, покрыва́еми ѿ всѧ́кагѡ ѕла̀ твои́ми, бцⷣе, моли́твами."
|
|
},
|
|
{
|
|
"type": "TEXT",
|
|
"value": "Го́рꙋ тѧ̀ вели́кꙋ данїи́лъ пронаписа̀: и҆зъ тебє́ бо без̾ сѣ́мене роди́сѧ хрⷭ҇то́съ, и҆ сокрꙋшѝ всю̀ де́мѡнскꙋю ле́сть, и҆ всю̀ своеѧ̀ вѣ́ры и҆спо́лни зе́млю. Къ немꙋ́же за ны̀ бцⷣе моли́сѧ, сла́вѧщыѧ твоегѡ̀ покро́ва пра́здникъ."
|
|
},
|
|
{
|
|
"type": "TEXT",
|
|
"value": "А҆́гг҃льскїй гла́съ взыва́емъ тѝ, пречⷭ҇таѧ: ра́дꙋйсѧ прⷭ҇то́ле бж҃їй, на не́мже і҆езекі́иль ви́дѣ гдⷭ҇а, въ подо́бїи чл҃вѣ́ка, носи́ма херꙋві́мы. Съ ни́миже за ны̀ бцⷣе моли́сѧ, да спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Конда́къ, гла́съ г҃."
|
|
},
|
|
{
|
|
"type": "TEXT",
|
|
"value": "Подо́бенъ: Дв҃а дне́сь:"
|
|
},
|
|
{
|
|
"type": "TEXT",
|
|
"value": "Дв҃а дне́сь предстои́тъ въ це́ркви, и҆ съ ли̑ки ст҃ы́хъ неви́димѡ за ны̀ мо́литсѧ бг҃ꙋ: а҆́гг҃ли со а҆рхїерє́и покланѧ́ютсѧ, а҆пⷭ҇ли же со прⷪ҇рѡ́ки ликовствꙋ́ютъ: на́съ бо ра́ди мо́литъ бцⷣа превѣ́чнаго бг҃а."
|
|
},
|
|
{
|
|
"type": "TEXT",
|
|
"value": "І҆́косъ: Тоѧ̀ пресла́вныхъ чꙋде́съ прїиди́те лю́дїе наслади́мсѧ: се́ю бо а҆да́мъ ѿ тлѝ и҆зба́висѧ. Та́ бо и҆ ковче́гъ, не нѡ́емъ, но бг҃омъ сотворе́нъ бы́сть. Дре́вле ᲂу҆́бѡ мѡѷсе́й въ кꙋпинѣ̀ ѻ҆́гненнѣй бг҃а ви́дѣти не возмо́же: ны́нѣ же ѿ тоѧ̀ ро́ждшагосѧ, всѧ̀ землѧ̀ зна́етъ сн҃а бж҃їѧ, къ немꙋ́же за ны̀ мо́литсѧ. Сегѡ̀ ра́ди прославлѧ́емъ ю҆̀, ꙗ҆́кѡ бж҃їю мт҃рь: на́съ бо ра́ди бцⷣа мо́литъ превѣ́чнаго бг҃а."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Не послꙋжи́ша тва́ри бг҃омꙋ́дрїи, па́че созда́вшагѡ: но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Неиспи́санаѧ мно́гими прⷪ҇рѡ́ки, несвѣ́дома же бы́сть, дв҃о, нбⷭ҇ными слꙋжа́щими бг҃ꙋ а҆́гг҃лы: ны́нѣ же всѝ вѣ́мы тѧ̀ бцⷣꙋ, и҆ твоеѧ̀ тре́бꙋемъ по́мощи и҆ застꙋпле́нїѧ, благослове́ннаѧ."
|
|
},
|
|
{
|
|
"type": "TEXT",
|
|
"value": "Гора̀ ᲂу҆сыре́ннаѧ дх҃омъ, ю҆́же а҆ввакꙋ́мъ ви́дѣ точа́щꙋ вѣ̑рнымъ цѣле́бнꙋю сла́дость, бцⷣе дв҃о, и҆сцѣли́ ны, сн҃ꙋ твоемꙋ̀ вопїю́щыѧ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Преклони́вый нб҃са̀ въ тѧ̀ дв҃о всели́сѧ, и҆ ны́нѣ на моли́твꙋ твою̀ зри́тъ, бцⷣе чⷭ҇таѧ, твоѐ, цр҃и́це, и҆сполнѧ́ѧ проше́нїе: є҆мꙋ́же за ны̀ ᲂу҆се́рднѡ помоли́сѧ, на тѧ́ бо надѣ́емсѧ, бл҃гослове́ннаѧ."
|
|
},
|
|
{
|
|
"type": "TEXT",
|
|
"value": "Тво́рче сп҃се на́шъ хрⷭ҇тѐ бж҃е, прїимѝ моли́твꙋ твоеѧ̀ мт҃ре, ю҆́же тебѣ̀ за ны̀ грѣ̑шныѧ прино́ситъ, да тебѣ̀ ра́дꙋющесѧ пое́мъ: препѣ́тый ѻ҆тє́цъ на́шихъ бж҃е бл҃гослове́нъ є҆сѝ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Съ чи́нми а҆́гг҃лъ, влⷣчце, съ честны́ми и҆ сла́вными прⷪ҇рѡ́ки, съ верхо́вными а҆пⷭ҇лы, и҆ со сщ҃енномꙋ́чєники, и҆ со а҆рхїерє́и, за ны̀ грѣ̑шныѧ бг҃ꙋ помоли́сѧ, твоегѡ̀ покро́ва пра́здникъ въ рѡссі́йстѣй землѝ просла́вльшыѧ."
|
|
},
|
|
{
|
|
"type": "TEXT",
|
|
"value": "Горды́ню и҆ шата̑нїѧ низложѝ, и҆ совѣ́ты непра́ведныхъ разорѝ, зачина́ющихъ ра̑ти погꙋбѝ, ѽ бж҃їѧ мт҃и цари́це всечⷭ҇тна́ѧ! Правосла́вныхъ ро́гъ возвы́си, да тво́й пра́здникъ сла́вимъ, пречⷭ҇таѧ бцⷣе дв҃о, зовꙋ́ще: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Оу҆сты̀ приносѧ́ще тебѣ̀ пѣ́нїе, и҆ дꙋше́ю вѣ́рнѡ покланѧ́емсѧ: и҆́бо внꙋ́трь сердца̀ на́шѧ горѧ́тъ: мт҃и бж҃їѧ пречⷭ҇таѧ, поми́лꙋй на́съ молѧ́щихсѧ тебѣ̀, и҆ гдⷭ҇а воспѣва́ющихъ, и҆ превозносѧ́щихъ є҆го̀ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Мно́гими ѡ҆тѧгчи́хсѧ грѣхи̑, недоꙋмѣ́ю по достоѧ́нїю написа́ти твоегѡ̀ покро́ва, бцⷣе, похвалы̀: но ꙗ҆́кѡ мт҃и бж҃їѧ, ᲂу҆красѝ тво́й пра́здникъ чꙋдесы̀, да всѝ ра́дꙋющесѧ пое́мъ гдⷭ҇а, и҆ превозно́симъ є҆го̀ во всѧ̑ вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о."
|
|
},
|
|
{
|
|
"type": "TEXT",
|
|
"value": "Высо́кїй цр҃ю̀, со ѻ҆ц҃е́мъ сѣдѧ́й, и҆ ѿ серафі̑мъ воспѣва́емый, при́зри на моли́твꙋ мт҃рню, ю҆́же тебѣ̀ за ны̀ грѣ̑шныѧ прино́ситъ, и҆ ѡ҆чи́сти грѣхѝ на́шѧ. Спасѝ гра́дъ, и҆ лю́ди ᲂу҆мно́жи: да́ждь на́мъ здра́вїе тѣлесѐ, и҆ на пога̑ныѧ побѣ̑ды, моли́твами ро́ждшїѧ тѧ̀."
|
|
},
|
|
{
|
|
"type": "TEXT",
|
|
"value": "А҆́гг҃льскїй гла́съ вопїе́мъ тебѣ̀, дв҃о бг҃оизбра́ннаѧ: ра́дꙋйсѧ, ꙗ҆́же а҆да́ма па́ки въ ра́й вве́дшаѧ, ра́дꙋйсѧ, де́мѡны прогонѧ́щи твои́мъ и҆́менемъ. Ра́дꙋйсѧ, наде́жде хрⷭ҇тїа́нъ. Ра́дꙋйсѧ, ѡ҆свѧще́нїе дꙋ́шъ. Ра́дꙋйсѧ, храни́тельнице гра́да на́шегѡ."
|
|
},
|
|
{
|
|
"type": "TEXT",
|
|
"value": "Помѧнѝ на́съ во твои́хъ мл҃твахъ, гпⷭ҇жѐ дв҃о бцⷣе, да не поги́бнемъ за ᲂу҆множе́нїе грѣхѡ́въ на́шихъ. Покры́й на́съ ѿ всѧ́кагѡ ѕла̀ и҆ лю́тыхъ напа́стей: на тѧ́ бо ᲂу҆пова́емъ и҆ твоегѡ̀ покро́ва пра́здникъ чествꙋ́юще, тѧ̀ велича́емъ."
|
|
},
|
|
{
|
|
"type": "TEXT",
|
|
"value": "Да́ръ ѿ бг҃а прїѧ́ла є҆сѝ, ꙗ҆́кѡ мт҃и бж҃їѧ, всѣ́хъ хрⷭ҇тїа́нъ недꙋ́ги и҆сцѣлѧ́ти, и҆ ѿ бѣ́дъ и҆збавлѧ́ти, и҆ грѣхѝ ѿпꙋща́ти, и҆ ѿ плѣне́нїѧ спаса́ти, и҆ всѧ́кїѧ нꙋ́жды. Но и҆ на́съ не пре́зри, гпⷭ҇жѐ: вѣ́си бо, и҆́хже тре́бꙋемъ, здра́вїѧ тѣлесє́мъ, и҆ дꙋша́мъ спасе́нїѧ."
|
|
},
|
|
{
|
|
"type": "HEADER",
|
|
"value": "Свѣти́ленъ."
|
|
},
|
|
{
|
|
"type": "TEXT",
|
|
"value": "Подо́бенъ: Жєны̀ ᲂу҆слы́шите:"
|
|
},
|
|
{
|
|
"type": "TEXT",
|
|
"value": "Ѽ прест҃а́ѧ гпⷭ҇жѐ дв҃о бцⷣе! Покры́й на́съ чꙋде́снымъ твои́мъ ѡ҆мофо́ромъ, сохранѧ́ѧ гра́дъ и҆ лю́ди ѿ всѧ́кагѡ ѕла̀, ꙗ҆́коже тѧ̀ пречꙋ́дный а҆ндре́й ви́дѣ во влахе́рнстѣй це́ркви молѧ́щꙋюсѧ: и҆ ны́нѣ на́мъ, гпⷭ҇жѐ, послѝ вели́кꙋю твою̀ ми́лость. Три́жды."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры на д҃, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Тебѣ̀ припа́даемъ, гпⷭ҇жѐ, ᲂу҆ми́льнѡ кла́нѧющесѧ мо́лимъ тѧ̀: ра́дꙋйсѧ бг҃облаже́ннаѧ влⷣчце, многоимени́таѧ дв҃о, прⷪ҇рѡ́ки проѡбраже́ннаѧ че́стнѡ: въ тѧ́ бо ꙗ҆́кѡ роса̀ хрⷭ҇то́съ бг҃ъ сни́де, и҆ родила̀ є҆сѝ браконеискꙋ́снаѧ чⷭ҇таѧ, и҆ на рꙋкꙋ̀ носи́ла є҆сѝ всѣ́хъ творца̀ и҆ гдⷭ҇а. Є҆мꙋ́же ны́нѣ ѡ҆ на́съ моли́сѧ, сла́вѧщихъ вѣ́рнѡ твоегѡ̀ покро́ва пра́здникъ. Два́жды."
|
|
},
|
|
{
|
|
"type": "TEXT",
|
|
"value": "Пою́тъ тѧ̀, дв҃о бцⷣе, а҆́гг҃льстїи чи́ни, и҆ сла́вѧтъ патрїа́рси со а҆рхїерє́и, и҆ ст҃і́и а҆пⷭ҇ли, ꙗ҆́кѡ мт҃ри бж҃їи че́стнѡ слꙋ́жатъ тебѣ̀, ви́дѧще тѧ̀ за мі́ръ моли́твꙋ творѧ́щꙋю ко сп҃сꙋ всѣ́хъ хрⷭ҇тꙋ̀ бг҃ꙋ. Є҆мꙋ́же помоли́сѧ, и҆зба́вити гра́дъ и҆ лю́ди, сла́вѧщыѧ тѧ̀ вѣ́рнѡ, и҆ твоегѡ̀ покро́ва пра́здникъ чествꙋ́ющыѧ."
|
|
},
|
|
{
|
|
"type": "TEXT",
|
|
"value": "Па́че а҆арѡ́нѧ кївѡ́та, всю́ тѧ бг҃ъ ѡ҆свѧтѝ дх҃омъ, бцⷣе, ст҃ы́мъ: и҆ па́че со́лнечныхъ лꙋ̑чь твои́мъ свѣтѧ́щимсѧ ѡ҆мофо́ромъ, ѡ҆свѣща́еши це́рковь и҆ лю́ди, и҆ тмꙋ̀ грѣхѡ́въ на́шихъ ѿгонѧ́еши: и҆збавлѧ́еши же ѿ бѣ́дъ и҆ скорбе́й, вѣ́рою чествꙋ́ющыѧ твоегѡ̀ честна́гѡ покро́ва пра́здникъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ ви́дѣ тѧ̀ пречꙋ́дный а҆ндре́й на воздꙋ́сѣ, со а҆рха́гг҃льскимъ мно́жествомъ, со а҆пⷭ҇лы и҆ прⷪ҇рѡ́ки, и҆ мно́жествомъ мч҃никѡвъ, сн҃ꙋ твоемꙋ̀ и҆ бг҃ꙋ на́шемꙋ ѡ҆ гра́дѣ и҆ лю́дехъ молѧ́щꙋюсѧ, влⷣчце, и҆ честны́мъ твои́мъ покро́вомъ покрыва́ющꙋю: не ѡ҆скꙋдѣ́й и҆ ны́нѣ, пречⷭ҇таѧ, спастѝ и҆зрѧ́дное достоѧ́нїе твоегѡ̀ сн҃а, пречестны́й пра́здникъ тво́й пра́зднꙋющее, многопѣ́таѧ."
|
|
},
|
|
{
|
|
"type": "HEADER",
|
|
"value": "Славосло́вїе вели́кое. И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и бл҃жє́нна ѿ канѡ́на, пѣ́снь г҃-ѧ и҆ ѕ҃-ѧ."
|
|
},
|
|
{
|
|
"type": "HEADER",
|
|
"value": "Прокі́менъ, пѣ́снь бцⷣы, гла́съ г҃:"
|
|
},
|
|
{
|
|
"type": "TEXT",
|
|
"value": "Вели́читъ дꙋша̀ моѧ̀ гдⷭ҇а:"
|
|
},
|
|
{
|
|
"type": "TEXT",
|
|
"value": "Сті́хъ: Ꙗ҆́кѡ призрѣ̀ на смире́нїе рабы̀ своеѧ̀:"
|
|
},
|
|
{
|
|
"type": "HEADER",
|
|
"value": "А҆пⷭ҇лъ ко є҆вре́ємъ зача́ло т҃к:"
|
|
},
|
|
{
|
|
"type": "TEXT",
|
|
"value": "И҆мѣ́ѧше пе́рваѧ ски́нїѧ:"
|
|
},
|
|
{
|
|
"type": "TEXT",
|
|
"value": "А҆ллилꙋ́їа, гла́съ и҃: Слы́ши, дщѝ, и҆ ви́ждь:"
|
|
},
|
|
{
|
|
"type": "TEXT",
|
|
"value": "Сті́хъ: Лицꙋ̀ твоемꙋ̀ помо́лѧтсѧ:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе лꙋкѝ, зача́ло н҃д:"
|
|
},
|
|
{
|
|
"type": "TEXT",
|
|
"value": "Вни́де і҆и҃съ въ ве́сь нѣ́кꙋю:"
|
|
},
|
|
{
|
|
"type": "TEXT",
|
|
"value": "Прича́стенъ: Ча́шꙋ спасе́нїѧ:"
|
|
},
|
|
{
|
|
"type": "HEADER",
|
|
"value": "(Зрѝ) Вѣ́домо же бꙋ́ди и҆ сїѐ, ꙗ҆́кѡ а҆́ще слꙋчи́тсѧ пра́здникъ покро́ва прест҃ы́ѧ бцⷣы въ де́нь седми́чный, кромѣ̀ недѣ́ли, и҆ и҆зво́литъ кто̀ пѣ́ти кꙋ́пнѡ съ покро́вомъ а҆пⷭ҇лꙋ а҆на́нїи, и҆ прпⷣбномꙋ рѡма́нꙋ, да пое́тъ си́це."
|
|
},
|
|
{
|
|
"type": "TEXT",
|
|
"value": "На ма́лѣй вече́рни: Стїхи̑ры покро́ва на д҃, гла́съ а҃. Самогла́сны. Сла́ва, и҆ ны́нѣ, гла́съ в҃: Прїиди́те, празднолю́бныхъ собо́ри: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Сла́ва, и҆ ны́нѣ, гла́съ г҃: Прїиди́те, всѝ празднолю́бцы: Тропа́рь покро́ва, гла́съ д҃: Дне́сь благовѣ́рнїи лю́дїе: Та́же є҆ктенїа̀ ма́лаѧ. И҆ ѿпꙋ́стъ."
|
|
},
|
|
{
|
|
"type": "TEXT",
|
|
"value": "На вели́цѣй вече́рни: Блаже́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ, стїхи̑ры покро́ва, на д҃, и҆ а҆пⷭ҇ла, г҃, и҆ рѡма́на, г҃: Сла́ва, а҆пⷭ҇ла: И҆ ны́нѣ, покро́ва, гла́съ и҃: Сра́дꙋютсѧ съ на́ми: Вхо́дъ. Прокі́менъ днѐ. Чтє́нїѧ г҃, покро́ва. а҃-е: Бытїѧ̀: И҆зы́де і҆а́кѡвъ: в҃-е: Прⷪ҇ро́чества і҆езекїи́лева: Бꙋ́детъ ѿ днѐ ѻ҆сма́гѡ: г҃-е: При́тчей: Премꙋ́дрость созда̀ себѣ̀: Є҆ктєнїѝ ѻ҆бы́чныѧ. На лїті́и стїхи̑ры покро́ва бцⷣы, гла́съ г҃: Наста̀ дне́сь: Сла́ва, а҆пⷭ҇ла: И҆ ны́нѣ, покро́ва бцⷣы, гла́съ в҃-й: Смы́слъ ѡ҆чи́стивше и҆ ᲂу҆́мъ: На стїхо́внѣ, стїхи̑ры бцⷣы, гла́съ в҃, самогла́сны. Ꙗ҆́кѡ всѣ́хъ вы́шши сꙋ́щи: Сла́ва, прпⷣбнагѡ: И҆ ны́нѣ, покро́ва, гла́съ в҃-й: Ꙗ҆́кѡ вѣнце́мъ пресвѣ́тлымъ: На благослове́нїи хлѣ́бѡвъ, тропа́рь покро́ва, гла́съ д҃: Дне́сь благовѣ́рнїи лю́дїе: три́жды. И҆ Бꙋ́ди и҆́мѧ гдⷭ҇не: три́жды, съ пѣ́нїемъ, и҆ ѱало́мъ л҃г: Благословлю̀ гдⷭ҇а: И҆ чте́нїе."
|
|
},
|
|
{
|
|
"type": "TEXT",
|
|
"value": "На ᲂу҆́трени: На Бг҃ъ гдⷭ҇ь: Тропа́рь покро́ва бцⷣы. Та́же, а҆пⷭ҇ла: Сла́ва, рѡма́на: И҆ ны́нѣ, покро́ва. И҆ ѻ҆бы̑чныѧ каѳі̑смы: По каѳі́смахъ, сѣда́льны покро́ва. И҆ чте́нїе. По полѷеле́и сѣда́ленъ покро́ва. И҆ чте́нїе. Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ: Сті́хъ: Лицꙋ̀ твоемꙋ̀ помо́лѧтсѧ: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃: Воста́вши марїа́мъ: ѱало́мъ н҃. Сла́ва, Моли́твами бцⷣы: И҆ ны́нѣ, то́йже. Поми́лꙋй мѧ̀ бж҃е: По н҃-мъ ѱалмѣ̀ стїхи́ра, гла́съ и҃: Сра́дꙋютсѧ съ на́ми: Канѡ́нъ покро́ва бцⷣы со і҆рмосо́мъ на ѕ҃: и҆ а҆пⷭ҇ла на д҃: и҆ преподо́бнагѡ, на д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни конда́къ а҆пⷭ҇ла, и҆ прпⷣбнагѡ: и҆ сѣда́ленъ а҆пⷭ҇ла, Сла́ва, прпⷣбнагѡ: И҆ ны́нѣ, покро́ва. И҆ чте́нїе. По ѕ҃-й пѣ́сни конда́къ покро́ва, гла́съ г҃: Дв҃а дне́сь предстои́тъ въ це́ркви: и҆ і҆́косъ. И҆ про́логъ. По ѳ҃-й пѣ́сни свѣти́ленъ покро́ва: Сла́ва, а҆пⷭ҇ла: И҆ ны́нѣ, покро́ва. На хвали́техъ, стїхи̑ры покро́ва, на д҃: Сла́ва, а҆пⷭ҇ла. И҆ ны́нѣ, покро́ва. Славосло́вїе вели́кое. По Трист҃о́мъ, тропа́рь а҆пⷭ҇ла: Сла́ва, прпⷣбнагѡ: И҆ ны́нѣ, покро́ва: Є҆ктєнїѝ. И҆ ѿпꙋ́стъ. И҆ ча́съ а҃-й. На а҃-мъ часѣ̀ тропа́рь покро́ва: Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Трист҃о́мъ конда́къ покро́ва. И҆ соверше́нный ѿпꙋ́стъ. Та́кожде и҆ на про́чихъ часѣ́хъ, въ нача́лѣ глаго́лемъ тропа́рь покро́ва: ст҃ы́хъ же тропарѝ премѣнѧ́емъ. Конда́къ же на всѣ́хъ часѣ́хъ глаго́лемъ покро́ва."
|
|
},
|
|
{
|
|
"type": "TEXT",
|
|
"value": "На лїтꙋргі́и: Бл҃жє́нна ѿ канѡ́на покро́ва, пѣ́снь г҃-ѧ, на д҃: и҆ а҆пⷭ҇ла ѕ҃-ѧ, на д҃. По вхо́дѣ тропа́рь покро́ва, и҆ а҆пⷭ҇ла, и҆ преподо́бнагѡ. Конда́къ а҆пⷭ҇ла: Сла́ва, прпⷣбнагѡ: И҆ ны́нѣ, покро́ва. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: И҆ а҆пⷭ҇ла, Во всю̀ зе́млю: А҆пⷭ҇лъ покро́ва, ко є҆вре́ємъ, зача́ло т҃к: И҆мѣ́ѧше пе́рваѧ ски́нїѧ: Дрꙋгі́й, дѣѧ́нїй, зача́ло к҃а, ѿ полꙋ̀: Бѣ̀ нѣ́кто ᲂу҆ч҃ни́къ въ дама́сцѣ. А҆ллилꙋ́їа, гла́съ и҃: Слы́ши дщѝ и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ: И҆ а҆пⷭ҇ла: И҆сповѣ́дѧтъ нб҃са̀ чꙋдеса̀ твоѧ̑: Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: И҆ а҆пⷭ҇ла, лꙋкѝ, зача́ло н҃а: Слꙋ́шаѧй ва́съ: Прича́стенъ: Ча́шꙋ спасе́нїѧ: Дрꙋгі́й, Во всю̀ зе́млю: Рѧ́дъ, а҆пⷭ҇лъ, и҆ є҆ѵⷢ҇лїе, вычита́емъ напредѝ."
|
|
},
|
|
{
|
|
"type": "HEADER",
|
|
"value": "(Зрѝ) Подоба́етъ вѣ́дати: а҆́ще слꙋчи́тсѧ пра́здникъ прест҃ы́ѧ бцⷣы, честна́гѡ є҆ѧ̀ покро́ва, и҆ ст҃а́гѡ а҆пⷭ҇ла а҆на́нїи, въ недѣ́лю."
|
|
},
|
|
{
|
|
"type": "TEXT",
|
|
"value": "Въ сꙋббѡ́тꙋ ве́чера, на ма́лѣй вече́рни: На Гдⷭ҇и воззва́хъ, стїхи̑ры воскрⷭ҇ны гла́са, на д҃: Сла́ва, и҆ ны́нѣ, покро́ва. На стїхо́внѣ стїхи́ра воскрⷭ҇на, а҃-ѧ. И҆ покро́ва стїхо́вна вели́кїѧ вече́рни, съ припѣ́вы и҆́хъ: Сла́ва, и҆ ны́нѣ, покро́ва, ма́лыѧ вече́рни. По Трист҃о́мъ тропа́рь воскрⷭ҇нъ: Сла́ва, и҆ ны́нѣ, покро́ва. Є҆ктенїа̀ ма́лаѧ. И҆ ѿпꙋ́стъ."
|
|
},
|
|
{
|
|
"type": "TEXT",
|
|
"value": "На вели́цѣй вече́рни: На Гдⷭ҇и, воззва́хъ, стїхи̑ры воскрⷭ҇ны г҃: и҆ восто́ченъ а҃: и҆ покро́ва, г҃: и҆ а҆пⷭ҇ла а҆на́нїи, г҃. Сла́ва, покро́ва: И҆ ны́нѣ, бг҃оро́диченъ гла́са. Чтє́нїѧ покро́ва, г҃. На лїті́и стїхи̑ры покро́ва. Сла́ва, а҆пⷭ҇ла: И҆ ны́нѣ, покро́ва. На стїхо́внѣ стїхи̑ры воскрⷭ҇ны: Сла́ва, а҆пⷭ҇ла: И҆ ны́нѣ, покро́ва. На благослове́нїи хлѣ́бѡвъ, тропа́рь покро́ва, три́жды. (Зрѝ) А҆́ще ли нѣ́сть бдѣ́нїѧ, глаго́лемъ тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ, покро́ва."
|
|
},
|
|
{
|
|
"type": "TEXT",
|
|
"value": "На ᲂу҆́трени: На Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, а҆пⷭ҇ла: И҆ ны́нѣ, покро́ва. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ. Та́же полѷеле́й: И҆ тропарѝ. А҆́гг҃льскїй собо́ръ: ѵ҆пакоѝ гла́са, и҆ сѣда́льны покро́ва. Степє́нны и҆ прокі́менъ, гла́са. Є҆ѵⷢ҇лїе воскрⷭ҇но: и҆ прѡ́чаѧ. Канѡ́нъ воскрⷭ҇нъ на д҃: и҆ покро́ва на ѕ҃, и҆ а҆пⷭ҇ла на д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни конда́къ покро́ва, и҆ а҆пⷭ҇ла, и҆ сѣда́ленъ а҆пⷭ҇ла. Сла́ва, и҆ ны́нѣ, покро́ва. По ѕ҃-й пѣ́сни конда́къ воскрⷭ҇нъ. На ѳ҃-й пѣ́сни пое́мъ, Честнѣ́йшꙋю: Свѣти́ленъ воскрⷭ҇нъ. Сла́ва, а҆пⷭ҇ла: И҆ ны́нѣ, покро́ва. На хвали́техъ стїхи̑ры воскрⷭ҇ны, д҃: и҆ покро́ва, г҃ подѡ́бны: и҆ самогла́сенъ, и҆́же на Сла́вꙋ, съ припѣ́вы вече́рними. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По Трист҃о́мъ тропа́рь воскрⷭ҇нъ. Є҆ктєнїѝ: И҆ ѿпꙋ́стъ. И҆ ча́съ а҃-й. На а҃-мъ часѣ̀, тропа́рь воскрⷭ҇нъ: Сла́ва, покро́ва: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ покро́ва. На г҃-мъ часѣ̀, тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ. Та́кожде и҆ на про́чихъ часѣ́хъ глаго́лемъ конда́къ воскрⷭ҇нъ, и҆ покро́ва, премѣнѧ́юще."
|
|
},
|
|
{
|
|
"type": "TEXT",
|
|
"value": "На лїтꙋргі́и: Бл҃жє́нна гла́са, на д҃: и҆ бцⷣы пѣ́снь г҃-ѧ, на д҃. И҆ а҆пⷭ҇ла пѣ́снь ѕ҃-ѧ, на д҃. По вхо́дѣ тропа́рь воскрⷭ҇нъ, и҆ покро́ва, и҆ а҆пⷭ҇ла. Конда́къ воскрⷭ҇нъ: Сла́ва, конда́къ а҆пⷭ҇ла: И҆ ны́нѣ: покро́ва. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе, и҆ прича́стенъ, пре́жде воскрⷭ҇нъ: и҆ пото́мъ бцⷣы."
|
|
},
|
|
{
|
|
"type": "HEADER",
|
|
"value": "Преподо́бнагѡ же рѡма́на слꙋ́жба ѡ҆ставлѧ́етсѧ, и҆ пое́тсѧ на повече́рїи."
|
|
}
|
|
] |