634 lines
57 KiB
JSON
634 lines
57 KiB
JSON
[
|
|
{
|
|
"type": "HEADER",
|
|
"value": "Ѻ҆ктѡ́врїа к҃ѳ"
|
|
},
|
|
{
|
|
"type": "HEADER",
|
|
"value": "Прпⷣбнагѡ ѻ҆тца̀ на́шегѡ а҆вра́мїа а҆рхїмандрі́та, росто́вскагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "На ма́лѣй вече́рни стїхи̑ры на д҃, самогла́сны, гла́съ д҃:"
|
|
},
|
|
{
|
|
"type": "TEXT",
|
|
"value": "Вѣ́рою и҆ любо́вїю, празднолю́бцы, соше́дшесѧ, ѱалмы̑ и҆ пѣ́сньми восхва́лимъ дне́сь нбⷭ҇наго человѣ́ка и҆ земна́го а҆́гг҃ла, къ немꙋ́же возопїи́мъ: ѽ всебл҃же́нне и҆ прпⷣбне, по́стникѡвъ похвало̀! Ѡ҆ на́съ моли́сѧ ко гдⷭ҇ꙋ, а҆вра́мїе, ѻ҆́ч҃е на́шъ, поми́ловатисѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Честны́й и҆ свѣтоно́сный, прпⷣбне, тво́й пра́здникъ, и҆спо́лненъ ра́дости и҆ весе́лїѧ дꙋхо́внагѡ: тѣ́мже соше́дшесѧ мона́хѡвъ мно́жєства и҆ хрⷭ҇тоимени́тїи лю́дїе, любо́вїю восхвалѧ́юще, блажи́мъ бжⷭ҇твєннаѧ дѣѧ̑нїѧ твоѧ̑: ꙗ҆́кѡ бо крі́нъ во ᲂу҆до́лїи процвѣ́лъ є҆сѝ, и҆ благово́ниши дꙋшє́внаѧ на̑ша чꙋ̑вства. А҆вра́мїе, ѻ҆́ч҃е на́шъ, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ ᲂу҆ѧзви́лсѧ є҆сѝ жела́нїемъ бжⷭ҇твеннымъ, преподо́бне ѻ҆́ч҃е на́шъ а҆вра́мїе, взе́мъ бо крⷭ҇тъ тво́й, послѣ́довалъ є҆сѝ влⷣцѣ хрⷭ҇тꙋ̀, тогда̀ всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ и҆ наслѣ́довалъ є҆сѝ вои́стиннꙋ кро́ткихъ зе́млю, прича́стїемъ ѡ҆божа́емь, неизрече́ннагѡ ѻ҆́нагѡ весе́лїѧ наслажда́ѧсѧ, помина́й на́съ, творѧ́щихъ всесвѧтꙋ́ю и҆ пречестнꙋ́ю твою̀ па́мѧть."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃."
|
|
},
|
|
{
|
|
"type": "TEXT",
|
|
"value": "Прпⷣбне и҆ бг҃обл҃же́нне ѻ҆́ч҃е на́шъ а҆вра́мїе, вои́стиннꙋ сподо́билсѧ є҆сѝ бжⷭ҇твенныѧ жи́зни, посто́мъ бо и҆ бдѣ́нїемъ и҆знꙋри́лъ є҆сѝ тѣ́ло твоѐ, тѣ́мже и҆ ѻ҆́бразъ бы́лъ є҆сѝ мона́хѡвъ. А҆́ще бо и҆ тѣле́сный ѧ҆зы́къ ᲂу҆молчѐ, но чꙋдеса̀ свидѣ́тельствꙋютъ. Гра́дъ же росто́въ, проповѣ́дꙋѧ, хва́литсѧ: и҆мѣ́ю въ себѣ̀, глаго́лѧ, неистощи́мое сокро́вище: са́ми бо зрѧ́ще честнꙋ́ю ра́кꙋ моще́й твои́хъ, и҆ чꙋдеса̀ быва́єма, прославлѧ́ютъ просла́вльшаго тѧ̀ гдⷭ҇а, є҆мꙋ́же моли́сѧ дарова́ти вселе́ннѣй ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Дх҃а ст҃а́гѡ теплото́ю, мꙋ́дре, жела́нїе се́рдца твоегѡ̀, є҆́же къ бг҃ꙋ, согрѣ́ѧвъ, и҆ зи́мꙋ страсте́й ᲂу҆мертви́въ, многоко́зненнꙋю же си́лꙋ і҆́дѡла веле́са низложи́лъ є҆сѝ, въ коне́цъ не́мощна сего̀ показа́въ. Нбⷭ҇наѧ же вѡ́инства ᲂу҆диви́лъ є҆сѝ терпѣ́нїемъ твои́мъ, ꙗ҆́кѡ по́стникѡвъ подража́тель и҆ преподо́бныхъ сожи́тель, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Крⷭ҇тъ тво́й взе́мъ, прпⷣбне а҆вра́мїе, крѣ́пкѡ послѣ́довалъ є҆сѝ хрⷭ҇тꙋ̀, на́съ ра́ди на крⷭ҇тѣ̀ распе́ншемꙋсѧ: и҆ тогѡ̀ ра́ди любвѐ всѧ̑ ѡ҆ста́вилъ є҆сѝ, и҆ того̀ є҆ди́наго возлюби́лъ є҆сѝ: є҆мꙋ́же и҆ со а҆́гг҃лы предстоѧ̀, молѝ ᲂу҆ще́дрити мі́ръ и҆ спастѝ дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Ꙗ҆́кѡ прїе́мъ, ѻ҆́ч҃е, нбⷭ҇ное сѣ́мѧ, пло́дъ стори́чествꙋющь добродѣ́тели прине́слъ є҆сѝ, а҆вра́мїе, ѻ҆́ч҃е на́шъ, пита́ѧ благоче́стнѡ гла́домъ та́ющыѧ добродѣ́тели, ѿѻнꙋ́дꙋже и҆сцѣлє́нїѧ вѣ́рою приходѧ́щымъ подае́ши. Тѣ́мже, ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, молѝ, прпⷣбне ѻ҆́ч҃е на́шъ а҆вра́мїе, спасти́сѧ вѣ́рою и҆ любо́вїю чествꙋ́ющымъ па́мѧть твою̀."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Прїиди́те мона́хѡвъ мно́жєства дне́сь, ѱалѡ́мскаѧ пѣ̑нїѧ и҆ цвѣ́ты дꙋхѡ́вныѧ принесе́мъ, ꙗ҆́кѡ вои́стиннꙋ мона́шескомꙋ ᲂу҆добре́нїю и҆ прпⷣбныхъ сожи́телю. Є҆го́же хва́лѧще, си́це рце́мъ: ра́дꙋйсѧ, свѣти́льниче многосвѣ́тлый, приведы́й ко хрⷭ҇тꙋ̀ мона́хѡвъ мно́жєства. Ра́дꙋйсѧ, гра́да росто́ва похвала̀ и҆ ᲂу҆твержде́нїе, и҆ всѣ́хъ вѣ́рныхъ благоꙋти́шное приста́нище, и҆ ѡ҆чище́нїе болѧ́щихъ во грѣсѣ́хъ, на бжⷭ҇твєнныѧ ты́ѧ возвыша́ѧ рачє́нїѧ. Тѣ́мъ, въ пречестнꙋ́ю твою̀ па́мѧть, свѧтꙋ́ю и҆ а҆гг҃логовѣ́йнꙋю, ѡ҆бстоѧ́ще, ра́кꙋ любе́знѡ ѡ҆блобыза́емъ, прпⷣбне ѻ҆́ч҃е на́шъ а҆вра́мїе, и҆ бжⷭ҇твеннагѡ чл҃вѣколю́бїѧ про́симъ полꙋчи́ти твои́ми моли́твами, мі́рꙋ ми́ръ дарова́ти и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "Тропа́рь, гла́съ а҃:"
|
|
},
|
|
{
|
|
"type": "TEXT",
|
|
"value": "Просвѣти́всѧ бжⷭ҇твенною благода́тїю, невѣ̑рныѧ лю́ди наста́вилъ є҆сѝ къ свѣ́тꙋ бг҃оразꙋ́мїѧ: и҆ по сме́рти сїѧ́ѧ свѣ́тлостїю житїѧ̀ твоегѡ̀, и҆сточа́еши и҆сцѣлє́нїѧ притека́ющымъ съ вѣ́рою къ ра́цѣ моще́й твои́хъ, а҆вра́мїе ѻ҆́ч҃е на́шъ, хрⷭ҇та̀ бг҃а молѝ, дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ воскрⷭ҇нъ."
|
|
},
|
|
{
|
|
"type": "HEADER",
|
|
"value": "На вели́цѣй вече́рни. На Гдⷭ҇и, воззва́хъ, стїхи̑ры, на и҃, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ ди́внагѡ чꙋдесѐ:"
|
|
},
|
|
{
|
|
"type": "TEXT",
|
|
"value": "Ѽ пресла́внагѡ чꙋдесѐ! И҆сто́чникъ благоче́стїѧ въ росто́вѣ ꙗ҆влѧ́етсѧ, и҆ лѣ́ствица къ нб҃сѝ а҆вра́мїй быва́етъ на́мъ: весели́тсѧ гра́дъ росто́въ, и҆мѣ́ѧ въ себѣ̀ мо́щи тогѡ̀. Ра́дꙋетсѧ правосла́вныхъ мно́жество, а҆вра́мїа и҆мꙋ́ще въ бѣда́хъ застꙋ́пника, и҆ къ немꙋ̀ вопїю́ще: прпⷣбне, ра́дꙋйсѧ, и҆ гдⷭ҇ꙋ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ѽ ди́внагѡ чꙋдесѐ! Вѣ́твь благода́ти въ рѡссі́и воспитова́етсѧ, и҆ кѷпарі́съ доброво́нный въ росто́вѣ возраста́етъ, и҆ сто́лпъ непоколе́блемь правосла̑внымъ ᲂу҆твержда́етсѧ, и҆ крѣ́пкїй а҆дама́нтъ дꙋше́ю быва́етъ а҆вра́мїй бг҃облаже́нный: тѣ́мъ бг҃омꙋ́дрыхъ собо́ри на высотꙋ̀ дх҃омъ вознеси́тесѧ, прпⷣбномꙋ вопїю́ще: ѻ҆́ч҃е а҆вра́мїе, ра́дꙋйсѧ, и҆ гдⷭ҇ꙋ помоли́сѧ, дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ди̑вны твоѧ̑ та̑йны, хрⷭ҇тѐ бж҃е, ꙗ҆́кѡ дарова́лъ є҆сѝ на́мъ такова́го свѣти́льника а҆вра́мїа предо́блѧго, правосла́вномꙋ ѻ҆те́чествꙋ на́шемꙋ на сопроти̑вныѧ побо́рника, веле́са погꙋби́вшаго и҆ хра́мъ и҆́мени твоемꙋ̀ ст҃о́мꙋ воздви́гшаго, въ не́мже и҆́мѧ твоѐ прославлѧ́етсѧ, и҆ вѣ́рнїи ᲂу҆крѣплѧ́емсѧ, припа́дающе къ тебѣ̀, всѣ́хъ влⷣцѣ, просѧ́ще, чл҃вѣколю́бче, дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ є҃:"
|
|
},
|
|
{
|
|
"type": "TEXT",
|
|
"value": "Добродѣ́тели подража́телѧ похва́лимъ дне́сь, а҆вра́мїа, похвалꙋ̀ рѡссі́йскꙋю, и҆ па́мѧть є҆гѡ̀ свѣ́тлѡ торжествꙋ́имъ, вѣ́рныхъ собо́ри соше́дшесѧ въ це́рковь гдⷭ҇ню, мо́щи тогѡ̀ ѡ҆блобыза́юще, и҆ къ немꙋ̀ си́це вопїю́ще: прїидѝ ны́нѣ, прпⷣбне, и҆ ѡ҆ на́съ непреста́ннѡ моли́сѧ, пра́зднꙋющихъ твоѐ торжество̀, да твои́ми моли́твами да́рꙋетъ на́мъ хрⷭ҇то́съ ве́лїю и҆ бога́тꙋю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Въ чермнѣ́мъ мо́ри:"
|
|
},
|
|
{
|
|
"type": "HEADER",
|
|
"value": "Вхо́дъ, Прокі́менъ днѐ. Чтє́нїѧ г҃."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ є҃ и҆ ѕ҃.)"
|
|
},
|
|
{
|
|
"type": "TEXT",
|
|
"value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те празднолю́бцы и҆ пѡ́стникъ сосло́вїе, вѣ́рою соше́дшесѧ, ꙗ҆́кѡ и҆́стиннаго по́стника почти́мъ а҆вра́мїа дне́сь, ше́ствовавшаго по стопа́мъ влⷣки своегѡ̀, ᲂу҆́зкїй пꙋ́ть, и҆ безстра́стнꙋю жи́знь, и҆ вѣ́рою возопїи́мъ: ѽ всеблаже́нне сожи́телю прпⷣбныхъ и҆ по́стникѡвъ похвало̀! Ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е бг҃оно́се а҆вра́мїе, ѿ ма́тернихъ пеле́нъ бг҃ꙋ возложе́нъ є҆сѝ, и҆ любвѐ ра́ди тогѡ̀ всѧ̑ ѡ҆ста́вилъ є҆сѝ, и҆ і҆́дѡла веле́са сокрꙋши́въ, кова̑рства є҆гѡ̀ всѧ̑ сте́рлъ є҆сѝ, и҆ ѻ҆би́тель соста́вивъ, мно́жество мона́хѡвъ собра́лъ є҆сѝ, сла́вити многопѣ́тꙋю трⷪ҇цꙋ, ю҆́же молѝ, бл҃же́нне, спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "И҆́же на землѝ а҆́гг҃ла и҆ на нб҃сѣ́хъ человѣ́ка бж҃їѧ, мі́ра благо́е ᲂу҆краше́нїе, пи́щꙋ благи́хъ добродѣ́телей, по́стникѡвъ похвалꙋ̀ а҆вра́мїа почти́мъ: насажде́нъ бо въ домꙋ̀ бж҃їи, процвѣтѐ пра́веднѡ, ꙗ҆́кѡ ке́дръ въ пꙋсты́ни, въ преподо́бствѣ и҆ пра́вдѣ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ а҆вра́мїе: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Безневѣ́стнаѧ дв҃о:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Нбⷭ҇ныхъ чинѡ́въ:"
|
|
},
|
|
{
|
|
"type": "TEXT",
|
|
"value": "Нбⷭ҇ныхъ чинѡ́въ ревни́тель, тѣ́хъ житїѐ пожи́въ, въ ме́ртвеннѣмъ тѣлесѝ, ꙗ҆́кѡ а҆́гг҃лъ, показа́лсѧ є҆сѝ. Сегѡ̀ ра́ди ѿ хрⷭ҇та̀ бг҃а да́ръ чꙋде́съ прїе́мъ, и҆ на́мъ ѡ҆би́льнѡ и҆сцѣлє́нїѧ подава́еши, и҆ ѿ всѧ́кихъ скорбе́й спаса́еши къ тебѣ̀ притека́ющыѧ, ꙗ҆́кѡ на тѧ̀ ᲂу҆пова́нїе возлага́емъ, и҆ твои́ми моли́твами ѿ бѣ́дъ и҆збавлѧ́емсѧ, ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀:"
|
|
},
|
|
{
|
|
"type": "TEXT",
|
|
"value": "Нбⷭ҇ныхъ чинѡ́въ ра́дованїе, твоѐ житїѐ, свѧ́те а҆вра́мїе, и҆ на землѝ человѣ́кѡмъ ско́рый въ бѣда́хъ застꙋ́пниче, моли́сѧ ѡ҆ на́съ, къ тебѣ̀ притека́ющихъ и҆ твоѐ преставле́нїе пра́зднꙋющихъ, ꙗ҆́кѡ на тѧ̀ ᲂу҆пова́нїе возлага́емъ, и҆ твои́ми моли́твами ѿ бѣ́дъ спаса́емсѧ."
|
|
},
|
|
{
|
|
"type": "TEXT",
|
|
"value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
|
|
},
|
|
{
|
|
"type": "TEXT",
|
|
"value": "Нбⷭ҇ный человѣ́къ ꙗ҆ви́сѧ на́мъ, и҆ земны́й а҆́гг҃лъ провѣ́дꙋетсѧ дне́сь а҆вра́мїй ѡ҆свѧще́нный, є҆гѡ́же житїю̀ ᲂу҆диви́шасѧ а҆́гг҃ли, и҆ вострепета́ша дꙋ́си лꙋка́вїи, то́й на́ми пра́зднꙋетсѧ дне́сь. И҆ тогѡ̀ торжество̀ ликовствꙋ́юще, вопїе́мъ: молѝ, прпⷣбне, хрⷭ҇та̀ бг҃а, да твои́ми моли́твами ѿ вра̑гъ свободи́мсѧ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Дне́сь вѣ́рныхъ собо́ри соше́дшесѧ, восхва́лимъ ѻ҆тца̀ на́шего, дꙋхо́внѡ веселѧ́щесѧ и҆ па́мѧть є҆гѡ̀ свѣ́тлѡ пра́зднꙋюще, ꙗ҆́кѡ вра̑жїѧ полкѝ прогна́вшаго и҆ де́мѡна посрами́вшаго, и҆ ѕла́го і҆́дѡла веле́са и҆скорени́вшаго, и҆ гра́дъ росто́въ кꙋпѣ́лїю ст҃а́гѡ дх҃а ѡ҆бно́вльшаго, и҆ ны́нѣ сїѧ́юща чꙋдесы̀, а҆вра́мїа предо́блѧго: ꙗ҆́кѡ да тогѡ̀ моли́твами да́рꙋетъ на́мъ хрⷭ҇то́съ ве́лїю и҆ бога́тꙋю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "Тропа́рь, гла́съ а҃:"
|
|
},
|
|
{
|
|
"type": "TEXT",
|
|
"value": "Просвѣти́всѧ бжⷭ҇твенною благода́тїю, невѣ̑рныѧ лю́ди наста́вилъ є҆сѝ къ свѣ́тꙋ бг҃оразꙋ́мїѧ: и҆ по сме́рти сїѧ́ѧ свѣ́тлостїю житїѧ̀ твоегѡ̀, и҆сточа́еши и҆сцѣлє́нїѧ притека́ющымъ съ вѣ́рою къ ра́цѣ моще́й твои́хъ, а҆вра́мїе ѻ҆́ч҃е на́шъ, хрⷭ҇та̀ бг҃а молѝ, дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "На ᲂу҆́трени тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "По а҃-мъ стїхосло́вїи сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Крѣ́пкїй дꙋше́ю а҆дама́нтъ ꙗ҆ви́лсѧ є҆сѝ, прпⷣбне, непоколе́блемо ѡ҆снова́нїе въ вѣ́рѣ и҆мѣ́ѧй, ѻ҆́ч҃е а҆вра́мїе. Сегѡ̀ ра́ди гнꙋ́снаго і҆́дѡла разори́лъ є҆сѝ и҆ въ не́мъ де́мѡнскїѧ полкѝ побѣди́лъ є҆сѝ, ꙗ҆́кѡ до́бръ во́инъ хрⷭ҇то́въ. Є҆мꙋ́же моли́сѧ, да спасе́тъ тебє̀ ра́ди дꙋ́шы на́шѧ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ, влⷣчце, нбⷭ҇наѧ цр҃и́це, бг҃а пло́тїю на́мъ ро́ждшаѧ, є҆ди́наго а҆́гнца, за на́съ во́лею поже́ршагосѧ. Того̀ молѝ, всеблаже́ннаѧ, да твои́ми моли́твами спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "По в҃-мъ стїхосло́вїи сѣда́ленъ, гла́съ в҃:"
|
|
},
|
|
{
|
|
"type": "TEXT",
|
|
"value": "Моли́твъ твои́хъ тре́бꙋемъ, грѣ́шнїи, и҆ ты́ѧ на́мъ пода́ждь, ѻ҆́ч҃е а҆вра́мїе, ꙗ҆́кѡ да, наставлѧ́еми и҆́ми, пре́йдемъ къ небꙋ́рномꙋ приста́нищꙋ и҆ вѣнцы̀ небє́сныѧ ᲂу҆лꙋчи́мъ, и҆ тебѣ̀ воспѣва́емъ: ра́дꙋйсѧ, ѻ҆́ч҃е ѻ҆ц҃є́въ, похвала̀ на́ша и҆ ᲂу҆твержде́нїе. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Моли̑твы твои́хъ ра̑бъ прїимѝ, бцⷣе, застꙋ́пнице на́ша и҆ прибѣ́жище: къ комꙋ́ бо прибѣ́гнемъ ра́звѣ тебє̀, влⷣчце; ты̀ покро́въ на́шъ и҆ застꙋпле́нїе. И҆ ны́нѣ не ѡ҆ста́ви на́съ до конца̀ поги́бнꙋти, да твои́ми моли́твами ѿ бѣ́дъ сохранѧ́емсѧ: на тѧ́ бо ᲂу҆пова́нїе, съ бг҃омъ, бцⷣе, возложи́хомъ."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ є҃:"
|
|
},
|
|
{
|
|
"type": "TEXT",
|
|
"value": "А҆пⷭ҇лѡвъ ревни́тель бы́въ, прпⷣбне, сегѡ̀ ра́ди и҆ бг҃осло́вꙋ бесѣ́довати сподо́билсѧ є҆сѝ, и҆ сегѡ̀ же́злъ прїи́мъ, веле́са разрꙋши́лъ є҆сѝ, и҆ тогѡ̀ кѡ́зни до конца̀ и҆скорени́лъ є҆сѝ, и҆ невѣ̑рныѧ ко хрⷭ҇то́вѣ вѣ́рѣ приве́лъ є҆сѝ. Ны́нѣ же хрⷭ҇та̀ бг҃а молѝ ѡ҆ чтꙋ́щихъ па́мѧть твою̀, дарова́ти на́мъ ми́ръ и҆ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Храни́телище нело́жное содѣ́телѧ на́шегѡ, влⷣчце бцⷣе, сохранѝ гра́дъ и҆ лю́ди, и҆́мѧ твоѐ ст҃о́е сла́вѧщыѧ, и҆ покры́й покро́вомъ ми́лости твоеѧ̀: тѧ́ бо те́плꙋ предста́тельницꙋ и҆́мамы ко и҆зъ тебє̀ ро́ждшемꙋсѧ хрⷭ҇тꙋ̀, бг҃ꙋ на́шемꙋ, да твои́ми моли́твами спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Степє́нна а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ д҃:"
|
|
},
|
|
{
|
|
"type": "TEXT",
|
|
"value": "Прїиди́те мона́хѡвъ мно́жєства, прїиди́те пꙋсты́нное воспита́нїе, прїиди́те, и҆ ли́къ соста́вимъ, дне́сь бо трапе́за поставлѧ́етсѧ, и҆ па́че бл҃гово́нныхъ а҆рѡма̑тъ ѡ҆благоꙋха́етъ на́съ па́мѧть преблаже́ннагѡ а҆вра́мїа, прїиди́те, стеце́мсѧ къ ра́цѣ є҆гѡ̀, и҆ любе́знѡ цѣлꙋ́емъ пречестно́е ѻ҆́но тѣ́ло, нетлѣ́нно во гро́бѣ лежа́що, и҆ на́мъ ѻ҆би́льнѡ и҆сто́чникъ чꙋде́съ и҆сточа́ющо, и҆ къ немꙋ̀ возопїе́мъ: ѻ҆́ч҃е а҆вра́мїе, твои́ми моли́твами просѝ на́мъ ᲂу҆ хрⷭ҇та̀ ми́ра и҆ ве́лїѧ ми́лости."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы на ѕ҃: и҆ прпⷣбнагѡ на и҃: Гла́съ а҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Го́рькїѧ рабо́ты и҆зба́вльсѧ і҆и҃ль, непроходи́мое про́йде, ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь, ꙗ҆́кѡ бл҃годѣ́телю, пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Лю́тыми страстьмѝ побѣжда́емь є҆́смь, ѻ҆каѧ́нный, и҆ сегѡ̀ ра́ди молю́ тѧ, хрⷭ҇тѐ бж҃е, ѿ си́хъ и҆зба́вити мѧ̀, ꙗ҆́кѡ да по достоѧ́нїю возмогꙋ̀ воспѣ́ти твоего̀ ᲂу҆го́дника, а҆вра́мїа прпⷣбнаго."
|
|
},
|
|
{
|
|
"type": "TEXT",
|
|
"value": "Лю́тыхъ смꙋще́нїй свободи́ мѧ, ѻ҆́ч҃е, да, наставлѧ́емь твои́ми моли́твами, свѣ́тлѡ воспою̀ твоѐ торжество̀, бг҃оно́се а҆вра́мїе."
|
|
},
|
|
{
|
|
"type": "TEXT",
|
|
"value": "Лю́таго і҆́дѡла и҆скорени́лъ є҆сѝ, ѻ҆́ч҃е пребл҃же́нне, и҆ ко хрⷭ҇тꙋ̀ приве́лъ є҆сѝ невѣ́рныхъ собѡ́рища, и҆ ты́ѧ, ꙗ҆́кѡ ке́дръ, и҆́же въ лїва́нѣ, ᲂу҆мно́жилъ є҆сѝ твои́ми моли́твами, во сто̀ плодоносѧ́щыѧ и҆ врага̀ попира́ющыѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Лю́тыхъ напа́стей и҆ мно́гихъ прегрѣше́нїй свободи́ мѧ, влⷣчце, и҆ проще́нїе пода́ждь мѝ, ꙗ҆́кѡ дерзнꙋ́хъ написа́ти мое́ю скве́рною десни́цею ст҃о́е твоѐ и҆́мѧ."
|
|
},
|
|
{
|
|
"type": "TEXT",
|
|
"value": "Катава́сїа: Ѿве́рзꙋ ᲂу҆ста̀ моѧ̑:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне."
|
|
},
|
|
{
|
|
"type": "TEXT",
|
|
"value": "Да ᲂу҆тверди́тсѧ се́рдце моѐ моли́твами твои́ми, ст҃е, и҆ наꙋчи́ мѧ недосто́йнаго, похвали́ти по досто́инствꙋ пресла́внꙋю па́мѧть твою̀, бг҃оно́се ѻ҆́ч҃е на́шъ а҆вра́мїе."
|
|
},
|
|
{
|
|
"type": "TEXT",
|
|
"value": "Да ᲂу҆тверди́ши ны̀, бг҃омꙋ́дре, на безплѡ́тныѧ врагѝ, є҆́же прогони́ти ты́ѧ, твою́ же па́мѧть велича́ти и҆ хрⷭ҇та̀ прославлѧ́ти тебѐ просла́вльшаго, ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Да ᲂу҆тверди́мсѧ на ка́мени непоколеби́мѣмъ твои́хъ мл҃твъ, да не поколе́блютъ на́съ прило́зи льсти́вагѡ, и҆ ᲂу҆́мъ на́шъ просвѣтѝ свѣ́томъ за́повѣдей хрⷭ҇то́выхъ, ꙗ҆́кѡ да вѣ́рою воспѣва́емъ тѧ̀, преблаже́нне а҆вра́мїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Да ᲂу҆твержде́нъ бꙋ́дꙋ ми́лостїю твое́ю, влⷣчце, и҆ покрове́нъ кро́вомъ кри́лъ твои́хъ, бцⷣе, и҆ и҆збѣ́гнꙋ сѣте́й лꙋка́вагѡ, воспѣва́ѧ пресла́вное твоѐ торжество̀."
|
|
},
|
|
{
|
|
"type": "HEADER",
|
|
"value": "По г҃-й пѣ́сни сѣда́ленъ, гла́съ є҃."
|
|
},
|
|
{
|
|
"type": "TEXT",
|
|
"value": "А҆пⷭ҇лѡвъ ревни́тель, бы́въ, прпⷣбне, сегѡ̀ ра́ди и҆ бг҃осло́вꙋ бесѣ́довати сподо́билсѧ є҆сѝ, и҆ сегѡ̀ же́злъ прїи́мъ, веле́са разрꙋши́лъ є҆сѝ, и҆ тогѡ̀ кѡ́зни до конца̀ и҆скорени́лъ є҆сѝ, и҆ невѣ̑рныѧ ко хрⷭ҇то́вѣ вѣ́рѣ приве́лъ є҆сѝ. Ны́нѣ же хрⷭ҇та̀ бг҃а молѝ ѡ҆ чтꙋ́щихъ па́мѧть твою̀, дарова́ти на́мъ ми́ръ и҆ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Побѣ́дꙋ и҆мꙋ́ще крѣ́пкїѧ си́лы на тѧ̀ любо́вїю вѣ́рнѡ надѣ́ющїисѧ, чⷭ҇таѧ цр҃и́це дв҃о бцⷣе, врагѝ покарѧ́юще, побо́рницꙋ и҆мꙋ́щи тѧ̀, весели́мсѧ."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се."
|
|
},
|
|
{
|
|
"type": "TEXT",
|
|
"value": "Разꙋмѣ́хъ, прпⷣбне, моѐ недосто́инство, и҆ со стра́хомъ коснꙋ́хсѧ къ твоемꙋ̀ хвале́нїю: но ты̀, свѧ́те, прїимѝ, ꙗ҆́кѡ ᲂу҆бо́гїѧ двѣ̀ ца̑тѣ, съ вѣ́рою тебѣ̀ приноси́мое хвале́нїе, всехва́льне ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Разꙋмѣ́лъ є҆сѝ, ѻ҆́ч҃е пребл҃же́нне, кова̑рствїѧ лꙋка́вагѡ веле́са, и҆ сего̀ до конца̀ низложи́лъ є҆сѝ: на́съ на моли́твꙋ воздви́гни дне́сь, да вѣ́рнѡ ликовствꙋ́емъ, пребл҃же́нне, въ па́мѧти твое́й, ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Разꙋмѣ́лъ є҆сѝ, свѧ́те, де́мѡна во ᲂу҆мыва́льницꙋ твою̀ вше́дша и҆ па́кость тебѣ̀ сотвори́ти хотѧ́ща, сосꙋ́дъ крⷭ҇то́мъ покры́въ, того̀ ѡ҆пали́лъ є҆сѝ: ны́нѣ же на́съ спасѝ ѿ є҆гѡ̀ ловле́нїѧ твои́ми моли́твами, ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Разꙋмѣ́ла є҆сѝ, влⷣчце, воплоти́вшагосѧ и҆зъ тебє̀ хрⷭ҇та̀ бг҃а на́шего, того̀ молѝ, бг҃облаже́ннаѧ, да твои́ми моли́твами сохрани́тъ на́съ ѿ всѧ́кагѡ навѣ́та льсти́вагѡ."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿ но́щи ᲂу҆́тренююще, воспѣва́емъ тѧ̀, хрⷭ҇тѐ бж҃е, ѡ҆бнища́вшаго на́съ ра́ди, и҆ крⷭ҇тъ и҆ сме́рть пло́тїю претерпѣ́вшаго."
|
|
},
|
|
{
|
|
"type": "TEXT",
|
|
"value": "И҆зъ но́щи тмы̀ глꙋбо́кїѧ возве́лъ є҆сѝ лю́ди твоѧ̑, и҆ покаѧ́нїѧ свѣ́томъ просвѣти́въ, ко хрⷭ҇тꙋ̀ приве́лъ є҆сѝ, бг҃оно́се а҆вра́мїе: и҆ на́съ просвѣтѝ, блаже́нне, сїѧ́нїемъ твоеѧ̀ бл҃года́ти, ꙗ҆́кѡ да при́снѡ тѧ̀ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "И҆зъ но́щи і҆дѡлонеи́стовства и҆звле́клъ є҆сѝ, ѻ҆́ч҃е, мно́жество люде́й, и҆ си́хъ погрꙋже́нїемъ благода́ти ѡ҆зари́лъ є҆сѝ дꙋхо́вныѧ: и҆ ны́нѣ на́съ ѡ҆зарѝ свѣ́томъ невеще́ственнымъ, и҆ моли́твами твои́ми просвѣтѝ, ꙗ҆́кѡ да по до́лгꙋ велича́емъ тѧ̀."
|
|
},
|
|
{
|
|
"type": "TEXT",
|
|
"value": "И҆зъ но́щи страсте́й мои́хъ возведи́ мѧ, свѧ́те, и҆ да́рꙋй мѝ свѣ́тъ мы́сленный, да возмогꙋ̀ недосто́йный, ѿ грꙋ́багѡ ᲂу҆ма̀ моегѡ̀ хꙋдо́е сїѐ плете́нїе принестѝ къ похвале́нїю чꙋде́съ, пресла́внагѡ твоегѡ̀ торжества̀, бг҃оно́се а҆вра́мїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆зъ но́щи а҆́да преиспо́днѧгѡ и҆зведе́ ны сн҃ъ тво́й, пречⷭ҇таѧ, и҆ раѧ̀ жи́тели па́ки содѣ́лавъ: сегѡ̀ ра́ди, покланѧ́ющесѧ є҆мꙋ̀, тебѐ, дв҃о, ᲂу҆блажа́емъ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ спа́слъ є҆сѝ мѧ̀, сп҃се, ѿ рабо́ты сме́ртныѧ, и҆ разрѣши́лъ є҆сѝ ᲂу҆́зы беззако́нїй мои́хъ."
|
|
},
|
|
{
|
|
"type": "TEXT",
|
|
"value": "Ѿверго́шасѧ неразꙋ́мнїи твоегѡ̀ ᲂу҆че́нїѧ, бл҃же́нне, и҆ къ веле́сꙋ, глꙋ́хꙋ і҆́дѡлꙋ, нижѐ глаго́лющꙋ, нижѐ ѡ҆сѧза́ющꙋ притека́хꙋ. И҆ є҆гда̀ сего̀ пробо́лъ є҆сѝ тро́стїю бг҃осло́вовою, тогда̀ и҆ си́хъ къ ра́зꙋмꙋ благоче́стїѧ наста́вилъ є҆сѝ, ѻ҆́ч҃е а҆вра́мїе."
|
|
},
|
|
{
|
|
"type": "TEXT",
|
|
"value": "Ѿве́рженъ є҆́смь въ ро́въ неча́ѧнїѧ многостра́стный, но ты̀ возведи́ мѧ, свѧ́те, на стезю̀ покаѧ́нїѧ, ꙗ҆́кѡ да ѿве́ргꙋ всѧ̑ моѧ̑ ѕла̑ѧ дѣѧ̑нїѧ, и҆ ѡ҆блекꙋ́сѧ свѣ́томъ моли́твъ твои́хъ, ѻ҆́ч҃е а҆вра́мїе бл҃же́нне."
|
|
},
|
|
{
|
|
"type": "TEXT",
|
|
"value": "Ѿве́рженъ бы́въ ѻ҆каѧ́нный де́мѡнъ, восхотѣ̀ спо́нꙋ тебѣ̀ сотвори́ти, преѡбразꙋ́етсѧ въ во́ина лꙋка́вый: и҆ предстае́тъ тогда̀ владꙋ́щемꙋ благовѣ́рномꙋ кнѧ́зю влади́мїрꙋ, и҆ того̀ на тѧ̀ воѡрꙋжа́етъ: ты́ же, сего̀ прогна́въ, вѧ́щше прославлѧ́ешисѧ, и҆ кнѧ́зѧ въ вѣ́рѣ ᲂу҆твержда́еши."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѿве́рзи мнѣ̀, влⷣчце, двє́ри ми́лости твоеѧ̀, ꙗ҆́коже сн҃ъ тво́й ѿве́рзе разбо́йникꙋ и҆ блꙋдни́цѣ и҆ блꙋ́дномꙋ двє́ри милосе́рдїѧ: ꙗ҆́кѡ да и҆ а҆́зъ твои́ми моли́твами ᲂу҆лꙋчꙋ̀ жи́знь вѣ́чнꙋю, воспѣва́ѧ твою̀ бл҃гость."
|
|
},
|
|
{
|
|
"type": "HEADER",
|
|
"value": "Конда́къ, гла́съ в҃:"
|
|
},
|
|
{
|
|
"type": "TEXT",
|
|
"value": "И҆́го хрⷭ҇то́во прїе́мъ, а҆вра́мїе, и҆ тогѡ̀ крⷭ҇тъ на ра́мо взе́мъ, послѣ́довалъ є҆сѝ є҆мꙋ̀: насажде́нъ бы́въ въ домꙋ̀ гдⷭ҇ни, и҆ процвѣ́лъ є҆сѝ, ꙗ҆́кѡ фі́нїѯъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́жилъ є҆сѝ ча̑да твоѧ̑, мꙋ́жъ жела́нїй дꙋхо́вныхъ: ѿ возлю́бленнагѡ же а҆пⷭ҇ла і҆ѡа́нна бг҃осло́ва бл҃года́ть воспрїи́мъ, жезло́мъ сокрꙋши́лъ є҆сѝ і҆́дѡла, и҆ разсы́палъ є҆сѝ є҆го̀, ꙗ҆́кѡ пра́хъ, и҆ чꙋдотво́рецъ ᲂу҆́бѡ ве́лїй ꙗ҆ви́лсѧ є҆сѝ, прпⷣбне: тѣ́мже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ."
|
|
},
|
|
{
|
|
"type": "TEXT",
|
|
"value": "І҆́косъ: А҆вра́мїе бг҃омꙋ́дре, житїѐ непоро́чно стѧжа́лъ є҆сѝ. И҆ кі́й ѧ҆зы́къ человѣ́чь довлѣ́етъ когда̀ къ похвалѣ̀ повѣ́дати ꙗ҆̀же ѡ҆ тебѣ̀; ѻ҆ба́че воспое́мъ бж҃їю мꙋ́дрость и҆ твоѧ̑, прпⷣбне, стра̑сти и҆ по́двиги, ꙗ҆̀же на землѝ, ꙗ҆́кѡ свѣти́льника тѧ̀, ꙗ҆́вльшасѧ всѣ̑мъ человѣ́кѡмъ, и҆ мно́гимъ терпѣ́нїемъ въ ли́цѣ а҆́гг҃льстѣмъ возсїѧ́вша. Тѣ́мъ въ пѣ́снехъ вопїе́мъ тѝ си́це: ра́дꙋйсѧ, а҆вра́мїе прпⷣбне и҆ бг҃оно́се, нбⷭ҇ный человѣ́че и҆ земны́й а҆́гг҃ле. Ра́дꙋйсѧ, дх҃а ст҃а́гѡ ѻ҆би́телище. Ра́дꙋйсѧ, ꙗ҆́кѡ и҆зъ мла́да послѣ́довалъ є҆сѝ ст҃ѣ́й трⷪ҇цѣ. Ра́дꙋйсѧ, цѣломꙋ́дрїѧ сто́лпе, низложи́вый де́мѡна многокова́рственнаго. Ра́дꙋйсѧ, ꙗ҆́кѡ ѿ млады́хъ ногте́й послѣ́довалъ є҆сѝ хрⷭ҇тꙋ̀. Ра́дꙋйсѧ, свѣти́льниче многосвѣ́тлый, приведы́й ко хрⷭ҇тꙋ̀ мона́хѡвъ мно́жєства. Ра́дꙋйсѧ, разори́вый і҆́дѡла и҆ воздви́гнꙋвый хрⷭ҇то́вꙋ це́рковь. Ра́дꙋйсѧ, и҆́же і҆дѡлопокло́нники сотвори́лъ є҆сѝ прест҃ѣ́й трⷪ҇цѣ покло́нники. Ра́дꙋйсѧ, ꙗ҆́кѡ моли́твами твои́ми де́мѡни побѣжда́ютсѧ. Ра́дꙋйсѧ гра́дꙋ росто́вꙋ похвала̀, ꙗ҆́кѡ пе́рвꙋю ѻ҆́бщꙋю ѻ҆би́тель воздви́глъ є҆сѝ, и҆ въ не́й мнѡ́гїѧ мона́хи, ꙗ҆́кѡ вїногра́дъ хрⷭ҇то́въ, насади́лъ є҆сѝ, и҆ трⷪ҇цꙋ сла́вити наꙋчи́лъ є҆сѝ. Ра́дꙋйсѧ, правосла́вномꙋ ѻ҆те́чествꙋ на́шемꙋ похвала̀ и҆ ᲂу҆твержде́нїе, є҆го́же соблюдѝ моли́твами твои́ми ѿ вра̑гъ ненавѣ́тно, да зове́мъ тѝ: ра́дꙋйсѧ, ѻ҆́ч҃е а҆вра́мїе бл҃же́нне, и҆ хрⷭ҇та̀ бг҃а молѝ непреста́ннѡ ѡ҆ всѣ́хъ на́съ."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ꙗ҆вле́йсѧ въ кꙋпинѣ̀ законополо́жникꙋ ѻ҆гне́мъ, и҆ ржⷭ҇тво̀ дв҃ы проѡбраже́й въ не́й, бл҃гослове́нъ є҆сѝ гдⷭ҇и, бж҃е ѻ҆ц҃ъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆ви́лсѧ є҆сѝ въ рѡссі́и свѣти́льникъ пресвѣ́тлый, ѻ҆́ч҃е а҆вра́мїе, трисо́лнечными свѣтосїѧ̑нїи къ бг҃озна́нїю на́съ приводѧ̀ и҆ пѣ́ти наꙋча́ѧ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆ви́лсѧ є҆сѝ рѣка̀ медото́чныхъ ᲂу҆че́нїй, бг҃оно́се, вѣ̑рныѧ напаѧ́ѧ, грѣхи́ же потоплѧ́ѧ, и҆ къ позна́нїю благоче́стїѧ всѣ́хъ возводѧ̀, и҆ наꙋча́ѧ пѣ́ти: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆́вльсѧ тебѣ̀ ᲂу҆чени́къ хрⷭ҇то́въ бг҃ослове́снѣйшїй, и҆ дѣ́вственникъ возлю́бленный, тро́сть тебѣ̀, блаже́нне, дарова̀, є҆́юже дїа́вола пробо́лъ є҆сѝ, и҆ ктомꙋ̀ неви́дима сего̀ сотвори́лъ є҆сѝ, и҆ человѣ́ки наꙋчи́лъ є҆сѝ вопи́ти. Бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆вле́йсѧ, ꙗ҆́кѡ чл҃вѣ́къ, сн҃ъ, тво́й, бг҃оневѣ́сто, на́съ ѡ҆божѝ и҆ къ ра́зꙋмꙋ ми́лости возведѐ, и҆ во свѣ́тѣ непристꙋ́пнѣмъ ликова́ти ᲂу҆стро́и воспѣва́ющыѧ и҆ глаго́лющыѧ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Пѣ́снь тебѣ̀ прино́симъ безпло́тныхъ, ꙗ҆́коже ѻ҆́троцы въ пещѝ, и҆, пою́ще, глаго́лемъ: бл҃гослови́те всѧ̑ дѣла̀ гдⷭ҇нѧ гдⷭ҇а."
|
|
},
|
|
{
|
|
"type": "TEXT",
|
|
"value": "Пѣ́снь тебѣ̀ приношꙋ̀, ѻ҆́ч҃е бг҃оно́се а҆вра́мїе, є҆́юже проповѣ́даю твоѧ̑ по́двиги и҆ чꙋдеса̀, и҆ прославлѧ́ю твоѐ вели́чество, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Пѣ́снь прино́сиши хрⷭ҇тꙋ̀, ликꙋ́ѧ со а҆́гг҃лы, ѻ҆́ч҃е а҆вра́мїе: тѣ́хъ бо житїю̀ поревнова́лъ є҆сѝ, и҆ на́съ въ па́мѧть твою̀ ликова́ти ᲂу҆стро́илъ є҆сѝ, пою́щихъ: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Пѣ́снь пое́ши херꙋві́мскꙋю, и҆̀мже и҆ подо́бникъ бы́лъ є҆сѝ, кри́ла ѻ҆́гнєннаѧ воспрїе́мъ, и҆́миже го́рнѧгѡ і҆ерⷭ҇ли́ма дости́гъ, ѡ҆ на́съ моли́сѧ, ѻ҆́ч҃е а҆вра́мїе, пою́щихъ вѣ́рнѡ: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пѣ́снь прїимѝ, влⷣчце, ѿ несоверше́ннагѡ ᲂу҆ма̀ на́шегѡ, и҆ моли́сѧ сн҃ꙋ твоемꙋ̀ и҆ бг҃ꙋ на́шемꙋ, пода́ти на́мъ ѡ҆ставле́нїе грѣхѡ́въ, ꙗ҆́кѡ да воспѣва́емъ тѧ̀ во всѧ̑ вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Живопрїе́мный и҆сто́чникъ приснотекꙋ́щїи, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ."
|
|
},
|
|
{
|
|
"type": "TEXT",
|
|
"value": "Живоно́сный и҆сто́чникъ бл҃года́тныхъ во́дъ ꙗ҆ви́лсѧ є҆сѝ, а҆вра́мїе бг҃облаже́нне: пода́ждь мѝ и҆сто́чникъ сле́зъ, да ѡ҆мы́ю дꙋшє́вныѧ моѧ̑ стра̑сти, и҆ ᲂу҆бѣлю̀ свѣ́томъ покаѧ́нїѧ ѡ҆чернѣ́вшꙋю дꙋ́шꙋ мою̀."
|
|
},
|
|
{
|
|
"type": "TEXT",
|
|
"value": "Живоно́сный крⷭ҇тъ на ра́мо взе́мъ, прпⷣбне, распе́ншемꙋсѧ на не́мъ хрⷭ҇тꙋ̀ послѣ́довалъ є҆сѝ, ѻ҆́ч҃е а҆вра́мїе, и҆ вра̑жїѧ полкѝ прогна́лъ є҆сѝ, и҆ на́мъ просѝ ми́лости, торжествꙋ́ющымъ твоѐ пра́зднество, бг҃оно́се."
|
|
},
|
|
{
|
|
"type": "TEXT",
|
|
"value": "Живоно́снымъ крⷭ҇то́мъ врага̀ ѡ҆пали́лъ є҆сѝ, и҆ сего̀ въ сосꙋ́дѣ запеча́тавъ, ᲂу҆ченикѡ́мъ рабо́тати ѿше́лъ є҆сѝ, показꙋ́ѧ смире́нїѧ ѻ҆́бразъ, и҆ си́хъ наꙋча́ѧ любомꙋ́дреннѡ послѣ́довати тебѣ̀."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆сто́чникъ ро́ждши на́мъ, влⷣчце, житїѐ ми́рно рабѡ́мъ твои̑мъ и҆спросѝ, и҆ правосла́вномꙋ во́инствꙋ на́шемꙋ на и҆ноплеме́нники посо́бствꙋй, ꙗ҆́кѡ ты̀ є҆сѝ спасе́нїе на́ше, бг҃оневѣ́стнаѧ."
|
|
},
|
|
{
|
|
"type": "HEADER",
|
|
"value": "Свѣти́ленъ."
|
|
},
|
|
{
|
|
"type": "TEXT",
|
|
"value": "Подо́бенъ: Жєны̀ ᲂу҆слы́шите:"
|
|
},
|
|
{
|
|
"type": "TEXT",
|
|
"value": "По́стнически пожи́въ, ѻ҆́ч҃е а҆вра́мїе, и҆ на врагѝ вла́сть прїи́мъ, ꙗ҆́кѡ и҆ въ сосꙋ́дѣ ты́ѧ затворѧ́ти и҆ крⷭ҇то́мъ ѡ҆палѧ́ти: и҆ человѣ́ки ѿ недꙋ̑гъ и҆сцѣлева́еши, притека́ющыѧ съ вѣ́рою къ ра́цѣ моще́й твои́хъ и҆ почита́ющыѧ, бг҃оно́се, всечⷭ҇тнꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Зачала̀ є҆сѝ во ᲂу҆тро́бѣ бг҃а, є҆гѡ́же трепе́щꙋтъ всѧ̑ нбⷭ҇ныѧ си̑лы: сего̀, дв҃о, родила̀ є҆сѝ пло́тїю, на́ше є҆стество̀ ѡ҆божи́вшаго. Є҆го́же молѝ, бг҃облаже́ннаѧ, съ прпⷣбнымъ а҆вра́мїемъ, да спасе́тъ тебє̀ ра́ди дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры, на д҃. Гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: Є҆гда̀ ѿ дре́ва:"
|
|
},
|
|
{
|
|
"type": "TEXT",
|
|
"value": "Терпѣ́лъ є҆сѝ гонє́нїѧ ѿ невѣ́рныхъ, ра́довалсѧ є҆сѝ надѣ́емыми, ꙗ҆̀же ᲂу҆гото́ва бг҃ъ лю́бѧщымъ є҆го̀. Сегѡ̀ ра́ди, преподо́бне, ве́тхагѡ совле́клсѧ є҆сѝ человѣ́ка, и҆ ве́тхаго и҆скорени́въ і҆́дѡла, благода́тїю же креще́нїѧ просвѣти́лъ є҆сѝ гра́дъ росто́въ, и҆ въ не́мъ, ꙗ҆́кѡ сл҃нце, сїѧ́ѧ чꙋдесы̀, рѡссі́йскꙋю странꙋ̀ ѿ бѣ́дъ спаса́еши, и҆ ѿ ва́рварскагѡ нахожде́нїѧ. Сегѡ̀ ра́ди мо́лимъ тѧ̀, ѻ҆́ч҃е а҆вра́мїе, молѝ хрⷭ҇та̀ бг҃а, спасти́сѧ дꙋша́мъ на́шымъ. Два́жды."
|
|
},
|
|
{
|
|
"type": "TEXT",
|
|
"value": "Терпѣ́лъ є҆сѝ ѿ і҆дѡлопокло́нникѡвъ гонє́нїѧ, и҆ ра́довалсѧ є҆сѝ ѿ влⷣки хрⷭ҇та̀ воздаѧ́нїємъ, и҆ къ невѣ̑рнымъ вопїѧ́лъ є҆сѝ: нꙋ́ждно страда́нїе, но ра́достно возме́здїе: мнѡ́ги скѡ́рби, но сла́докъ ра́й. И҆ сегѡ̀ ра́ди ѻ҆нѝ, ѡ҆ста́вльше ѻ҆каѧ́ннаго веле́са, къ тебѣ̀ притека́хꙋ, глаго́люще: молѝ хрⷭ҇та̀ бг҃а, ѻ҆́ч҃е а҆вра́мїе, да твои́ми моли́твами спасе́тъ дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Терпѣ́лъ є҆сѝ ѿ врага̀ скѡ́рби, и҆ ра́дꙋѧсѧ, вѣне́цъ ѿ хрⷭ҇та̀ прїе́млеши, престо́лꙋ сла́вы предстоѧ̀, со а҆́гг҃лы ликꙋ́еши. Ѡ҆ на́съ непреста́ннѡ моли́сѧ, прпⷣбне, да твои́ми моли́твами ѿ бѣ́дъ и҆ скорбе́й и҆зба́вимсѧ. Тѧ́ бо те́пла предста́телѧ къ бг҃ꙋ и҆́мамы. Ꙗ҆́кѡ да тебє̀ ра́ди, ѻ҆́ч҃е а҆вра́мїе, спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Прїиди́те, празднолю́бныхъ собо́ри, прїиди́те правосла́вныхъ торжество̀, прїиди́те мона́хѡвъ бг҃осочета́нный ли́че: прїиди́те, насы́титесѧ ны́нѣшнѧгѡ пра́зднства. Прїиди́те ѻ҆вча́та гдⷭ҇нѧ дꙋхо́вныѧ ѡ҆гра́ды. Прїиди́те, да ликꙋ́имъ свѣ́тлѡ въ па́мѧть ѻ҆тца̀ на́шегѡ: дне́сь бо бг҃оно́сный а҆вра́мїй ликꙋ́етъ со безпло́тными си́лами, предстоѧ̀ прⷭ҇то́лꙋ всѣ́хъ цр҃ѧ̀ хрⷭ҇та̀ бг҃а, и҆ мо́литсѧ ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Влⷣчце, прїимѝ моли̑твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли."
|
|
},
|
|
{
|
|
"type": "HEADER",
|
|
"value": "Славосло́вїе вели́кое. И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и: бл҃жє́нна ст҃а́гѡ ѿ канѡ́на, пѣ́снь г҃-ѧ и҆ ѕ҃-ѧ."
|
|
},
|
|
{
|
|
"type": "HEADER",
|
|
"value": "Прокі́менъ, гла́съ з҃:"
|
|
},
|
|
{
|
|
"type": "TEXT",
|
|
"value": "Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "HEADER",
|
|
"value": "А҆пⷭ҇лъ къ гала́тѡмъ, зача́ло сг҃і."
|
|
},
|
|
{
|
|
"type": "TEXT",
|
|
"value": "А҆ллилꙋ́їа: Бл҃же́нъ мꙋ́жъ, боѧ́йсѧ гдⷭ҇а."
|
|
},
|
|
{
|
|
"type": "TEXT",
|
|
"value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло і҃."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю:"
|
|
}
|
|
] |