ponomar-pwa/static/data/shared/menaion-daily/12-15/1.json

[
 {
  "type": "HEADER",
  "value": "Деке́мврїа є҃і"
 },
 {
  "type": "HEADER",
  "value": "Ст҃а́гѡ свѧщенномꙋ́ченика є҆леѵѳе́рїа."
 },
 {
  "type": "HEADER",
  "value": "И҆ прпⷣбнагѡ ѻ҆ц҃а̀ на́шегѡ па́ѵла, и҆́же въ ла́трѣ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры свѧщенномꙋ́ченика г҃: и҆ прпⷣбнагѡ г҃."
 },
 {
  "type": "HEADER",
  "value": "Стїхи̑ры свѧщенномꙋ́ченика, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Сосꙋ́дъ свѧще́ннѣйшїй дх҃а бжⷭ҇твеннагѡ бы́лъ є҆сѝ, дꙋ́шꙋ ѡ҆чи́стивъ ѿ страсте́й, свѧще́ннѣйше. Ѿсю́дꙋ бжⷭ҇твенное пома́занїе ст҃о́е прїѧ́лъ є҆сѝ, а҆рхїере́й бы́въ, и҆ наста́вникъ люде́й бг҃омꙋ́дрый, и҆ мꙋ́ченикъ непобѣди́мь, на́съ ра́ди стрⷭ҇ти претерпѣ́вшагѡ, и҆ безстра́стїе и҆сточи́вшагѡ, страда́льче є҆леѵѳе́рїе."
 },
 {
  "type": "TEXT",
  "value": "До́брѣ по́двигъ тѧ̀ ви́дѣвши сконча́вша, ꙗ҆́же до́брѣ тѧ̀ ро́ждшаѧ, ра́вное жела́ющи тебѣ̀ проитѝ тече́нїе, тебѐ ѡ҆б̾е́мши посредѣ̀ три́знища, мꙋ́дре, ꙗ҆́коже ю҆́ница закала́етсѧ. Съ не́юже мо́лимъ тѧ̀, ѡ҆ на́съ, є҆леѵѳе́рїе, сп҃са и҆ гдⷭ҇а ᲂу҆молѝ, преблаже́нне."
 },
 {
  "type": "TEXT",
  "value": "Тѣ́ло преѡби́дѣлъ є҆сѝ, ᲂу҆ранѧ́емо бїе́ньми, и҆ ѻ҆гню̀ приближа́ющеесѧ: ᲂу҆́мъ бо впери́лъ є҆сѝ непобѣди́мымъ жела́нїемъ, краснѣ́йшею добро́тою бжⷭ҇твеннагѡ рачи́телѧ. Є҆гѡ́же сла́дкимъ ᲂу҆ѧзви́лсѧ є҆сѝ жела́нїемъ, мч҃никѡвъ ᲂу҆добре́нїе, а҆рхїере́євъ ᲂу҆краше́нїе, страда́льче є҆леѵѳе́рїе, а҆́гг҃лѡвъ собесѣ́дниче."
 },
 {
  "type": "HEADER",
  "value": "Стїхи̑ры прпⷣбнагѡ, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Па́ѵле, мона́шествꙋющихъ добро́та, прозѧбе́нїе кра́сное пꙋсты́ни, прпⷣбныхъ хвала̀, ла́тра честносло́вїе, вѣ́рныхъ тве́рдь, любо́вїю соверша́ющыѧ твою̀ всечестнꙋ́ю па́мѧть, и҆ моще́й твои́хъ ѡ҆блобыза́ющыѧ ра́кꙋ, и҆зба́ви ѡ҆бстоѧ́нїѧ всѧ́кагѡ, и҆ ѻ҆́гненнагѡ ѡ҆сꙋжде́нїѧ, ко влⷣцѣ твои́ми моли́твами."
 },
 {
  "type": "TEXT",
  "value": "Хра́мъ трⷪ҇цы тебѐ сама́го содѣ́лавъ, ѻ҆́ч҃е бг҃облаже́нне, хра́мъ во и҆́мени сеѧ̀ воздви́глъ є҆сѝ, въ пꙋсты̑ни же непрохѡ́дныѧ ла́трскїѧ вше́дъ, ꙗ҆́кѡ мѡѷсе́й въ сїна́йскꙋю го́рꙋ, всели́лсѧ є҆сѝ: и҆дѣ́же прїе́мъ бжⷭ҇твенный зако́нъ, мона́шествꙋющихъ мно́жєства и҆́стиннѡ наꙋча́еши и҆зрѧ́днѣйшымъ, всечꙋ́дне."
 },
 {
  "type": "TEXT",
  "value": "И҆мѣ́ѧ дерзнове́нїе къ бг҃ꙋ, па́ствѣ, ю҆́же соста́вилъ є҆сѝ мно́гими пѡ́ты, прпⷣбне, молѝ сохрани́тисѧ ѿ и҆скꙋше́нїй врага̀, и҆ ꙗ҆зы́ческихъ нахожде́нїй, ѻ҆гнѧ́ же и҆ меча̀, и҆ всѧ́кагѡ прило́га навѣ́та лꙋка́вагѡ: тебе́ бо градоде́ржца и҆ покро́въ и҆мꙋ́ще, на тѧ̀ наде́ждꙋ съ бг҃омъ стѧжа́хомъ, блаже́нне."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ. Подо́бенъ то́йже:"
 },
 {
  "type": "TEXT",
  "value": "Є҆ди́на невмѣсти́маго бг҃а, нетѣсномѣ́стнѡ во чре́вѣ носи́ла є҆сѝ, чл҃вѣ́ка бы́вша за бла́гость, прест҃а́ѧ бг҃оневѣ́сто. Тѣ́мже молю́ тѧ: ᲂу҆тѣснѧ́ющихъ мѧ̀ страсте́й и҆змѣнѝ, ꙗ҆́кѡ да, тѣ́снꙋю и҆ пра́вꙋю стезю̀ ше́ствовавъ, дости́гнꙋ ю҆́же къ жи́зни, дв҃о, водѧ́щꙋю."
 },
 {
  "type": "TEXT",
  "value": "Крⷭ҇тобг҃оро́диченъ: Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе, ꙗ҆́кѡ чл҃вѣ́ка, во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ и҆зба́вителю всѧ́ческихъ, ѻ҆ба́че воспѣва́ю и҆ сла́вꙋ твою̀, ю҆́же па́че ᲂу҆ма̀ и҆ сло́ва кра́йнюю бл҃гость, чл҃вѣколю́бче."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "И҆ нра́вѡмъ прича́стникъ, и҆ прⷭ҇то́лѡмъ намѣ́стникъ, а҆по́столѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче є҆леѵѳе́рїе, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, прпⷣбнагѡ, гла́съ то́йже:"
 },
 {
  "type": "TEXT",
  "value": "Ꙗ҆́кѡ безпло́тныхъ є҆диновсе́льника, и҆ всѣ̑мъ прпⷣбнымъ соѻ́бщника, всесла́вне па́ѵле, пое́мъ тѧ̀, и҆ мо́лимъ тѧ̀: моли́сѧ всегда̀ ѡ҆ на́съ, ꙗ҆́кѡ да ѡ҆брѧ́щемъ ми́лость."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "HEADER",
  "value": "На ᲂу҆́трени є҆ди́нъ канѡ́нъ ѻ҆ктѡ́иха: И҆ ст҃ы́хъ два̀."
 },
 {
  "type": "HEADER",
  "value": "Канѡ́нъ свѧщенномꙋ́ченика. І҆ѡ́сифъ. Гла́съ а҃. Є҆гѡ́же краегране́сїе:"
 },
 {
  "type": "TEXT",
  "value": "Страсте́й свобо́дна мѧ̀ покажѝ, всебл҃же́нне."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ."
 },
 {
  "type": "TEXT",
  "value": "Страсте́й ѡ҆мраче́нїемъ порабоще́ннаго свѣ́тлыми моли́твами твои́ми, мꙋ́чениче є҆леѵѳе́рїе, ны́нѣ свободѝ: да ꙗ҆́кѡ раба́ тѧ хрⷭ҇то́ва бжⷭ҇твенными воспою̀ пѣ́сньми."
 },
 {
  "type": "TEXT",
  "value": "Страда́нїѧ возсїѧ́лъ є҆сѝ чистѣ́йшими зарѧ́ми, свѧще́ннѣйше, ѡ҆багри́лъ є҆сѝ кро́вїю свѧще́ннꙋю твою̀ ѻ҆де́ждꙋ, и҆ бы́лъ є҆сѝ свѣтови́дѣнъ дꙋ́хомъ."
 },
 {
  "type": "TEXT",
  "value": "Бг҃ꙋ прилѣплѧ́ѧсѧ чистѣ́йшимъ ᲂу҆мо́мъ ѿ ю҆́ности, плотска́гѡ мꙋдрова́нїѧ дꙋ́шꙋ ᲂу҆дали́лъ є҆сѝ, и҆ чꙋде́съ ѻ҆би́льною благода́тїю ѡ҆богати́лсѧ є҆сѝ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ прⷭ҇то́лъ ѻ҆гнезра́ченъ но́сиши зижди́телѧ, ꙗ҆́кѡ ѡ҆дꙋшевле́нъ черто́гъ, и҆ красна̀ пала́та цр҃ѧ̀ вмѣща́еши, бы́вшаго є҆́же є҆смы̀, кромѣ̀ преложе́нїѧ и҆ смѣше́нїѧ."
 },
 {
  "type": "HEADER",
  "value": "И҆́нъ канѡ́нъ прпⷣбнагѡ, гла́съ то́йже."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Хрⷭ҇то́съ ражда́етсѧ, сла́вите. Хрⷭ҇то́съ съ нб҃съ срѧ́щите. Хрⷭ҇то́съ на землѝ, возноси́тесѧ. По́йте гдⷭ҇еви всѧ̀ землѧ̀, и҆ весе́лїемъ воспо́йте лю́дїе, ꙗ҆́кѡ просла́висѧ."
 },
 {
  "type": "TEXT",
  "value": "Но́вое тебѣ̀ пѣ́нїе похва́льное привнестѝ во ѿверзе́нїе ᲂу҆́стъ, па́ѵле бг҃оно́се, тща́щꙋсѧ, пода́ждь мѝ глаго́лати твои́ми моли́твами, прпⷣбне, благода́ть, ꙗ҆́кѡ да по́двиги твоѧ̑ честны̑ѧ проповѣ́мъ."
 },
 {
  "type": "TEXT",
  "value": "Ѿ ю҆́ности, прпⷣбне, ꙗ҆ре́мъ гдⷭ҇ень воспрїе́мь, и҆ въ бразда́хъ твоегѡ̀ се́рдца пшени́цꙋ сѣ́ѧвъ дꙋхо́внꙋю, кла́съ пожа́лъ є҆сѝ, ᲂу҆твержда́ющь дꙋ́шы, бг҃облаже́нне."
 },
 {
  "type": "TEXT",
  "value": "Пѡ́ты мно́жайшими воспрїѧ́лъ є҆сѝ вы́шнее црⷭ҇тво, ꙗ҆́кѡ безпло́тенъ на землѝ жи́въ, и҆ тѣ́ломъ пожи́въ а҆́гг҃льское житїѐ. И҆ ны́нѣ ᲂу҆́бѡ въ высоча́йшихъ трⷪ҇цѣ предстоѧ̀, на́съ помина́й."
 },
 {
  "type": "TEXT",
  "value": "Бг҃оро́диченъ: Тлѣ́ннꙋю мою̀ пло́ть, бг҃оневѣ́сто, прїе́мъ ѿ твои́хъ крове́й безпло́тный, и҆ въ ꙗ҆́слехъ возлегі́й во́лею, сїю̀, ю҆́же прїѧ́тъ, ѡ҆божа́етъ пло́ть, бг҃ома́ти, ѿ соедине́нїѧ є҆ѧ̀ пребл҃гі́й."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне."
 },
 {
  "type": "TEXT",
  "value": "За хрⷭ҇та̀ страда́ти и҆зво́ливый, ꙗ҆́звы терпи́ши тѣлє́сныѧ, ᲂу҆слажда́ѧсѧ, мꙋ́дре, болѣ́зньми и҆ скорбьмѝ: сегѡ̀ ра́ди неболѣ́зненнꙋ жи́знь ны́нѣ воспрїѧ́лъ є҆сѝ."
 },
 {
  "type": "TEXT",
  "value": "Те́плымъ жела́нїемъ сотво́ршагѡ, страда́льче бг҃омꙋ́дре, держи́мь, разжже́ннѣй тебѐ сама́го поверга́еши хи́трости, ѡ҆роша́емь дх҃а ѻ҆гне́мъ, є҆леѵѳе́рїе."
 },
 {
  "type": "TEXT",
  "value": "Въ свѧще́нницѣхъ свѧще́ннѣйшїй и҆ въ мч҃ницѣхъ мꙋ́ченикъ твердѣ́йшїй ꙗ҆́вльсѧ, вѣне́цъ сꙋгꙋ́бъ прїѧ́лъ є҆сѝ, блаже́нне, лицѐ бж҃їе вы́нꙋ ви́дѧ."
 },
 {
  "type": "TEXT",
  "value": "Бг҃оро́диченъ: Же́злъ крѣ́пости прозѧбла̀ є҆сѝ хрⷭ҇та̀, и҆́мже ᲂу҆твержда́емсѧ: тѧ́ бо воѡбража́ше а҆арѡ́новъ же́злъ и҆ногда̀ прозѧ́бшїй, недѣ́ланнаѧ землѐ, чⷭ҇таѧ голꙋби́це приснодв҃о."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и."
 },
 {
  "type": "TEXT",
  "value": "Ѽ твоегѡ̀ мꙋ́жества! Ѽ дꙋше́вныѧ до́блести, сла́вне! Ты́ бо членѡ́вныѧ львѡ́въ сокрꙋши́ти неви́димыхъ жела́ѧ, два̀ ка́менѧ носи́лъ є҆сѝ превели́ка во вре́мѧ но́щи, тѧготꙋ̀ на ра́менахъ."
 },
 {
  "type": "TEXT",
  "value": "Кто̀ твоѧ̑ по́двиги и҆зрещѝ по достоѧ́нїю возмо́жетъ; ты́ бо пꙋти̑ жестѡ́кїѧ въ пꙋсты́ни ше́ствꙋѧ, сꙋрѡ́выѧ же́лꙋди ѣ҆́лъ є҆сѝ, вкꙋше́нїе навыца́ѧ твоѐ ᲂу҆слажда́ти болѣ́зньми воздержа́нїѧ."
 },
 {
  "type": "TEXT",
  "value": "Бг҃ови́децъ дре́вле мѡѷсе́й въ кꙋпинѣ̀ сподо́бисѧ та́инственнагѡ видѣ́нїѧ: всечестны́й же па́ѵелъ, ѻ҆гню̀ ꙗ҆́вльшꙋсѧ свы́ше, са́мъ позна̀ ꙗ҆́вѣ себѐ сама́го, неѡпа́льнѡ распалѧ́ема."
 },
 {
  "type": "TEXT",
  "value": "Бг҃оро́диченъ: Безнача́ленъ сы́й є҆стество́мъ ꙗ҆́кѡ бг҃ъ, и҆ ѻ҆ц҃ꙋ̀ сло́во равноче́стное, є҆́же по́дъ лѣ́томъ прїѧ́лъ є҆сѝ ро́ждсѧ ѿ дв҃ы нача́ло, є҆стество́мъ ꙗ҆́вльсѧ чл҃вѣ́къ, и҆ младе́нствовавъ, ꙗ҆́кѡ ѻ҆троча̀ ты̀, хрⷭ҇тѐ, ꙗ҆ви́лсѧ є҆сѝ пелена́ми пови́тъ."
 },
 {
  "type": "HEADER",
  "value": "Конда́къ прпⷣбнагѡ, гла́съ и҃."
 },
 {
  "type": "TEXT",
  "value": "Подо́бенъ: Взбра́нной:"
 },
 {
  "type": "TEXT",
  "value": "Ѿ ю҆́ности, мꙋ́дре, ꙗ҆̀же па́че смы́сла вожделѣ́лъ є҆сѝ мꙋ́жески, мїрскі́й мѧте́жъ ѡ҆ста́вилъ є҆сѝ, и҆ бы́лъ є҆сѝ бжⷭ҇твеннагѡ ра́ди жи́тельства трⷪ҇цы жили́ще и҆ просвѣти́лъ є҆сѝ вѣ́рою пристꙋпа́ющыѧ тебѣ̀. Тѣ́мъ зове́мъ: ра́дꙋйсѧ, па́ѵле пребога́те."
 },
 {
  "type": "HEADER",
  "value": "Сѣда́ленъ сщ҃енномꙋ́ченика, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й, сп҃се."
 },
 {
  "type": "TEXT",
  "value": "Свобо́денъ ᲂу҆́мъ ѿ страсте́й стѧжа́въ, бы́лъ є҆сѝ бж҃їй и҆́скреннѣйшїй ра́бъ, и҆ ѿ ле́сти свободи́лъ є҆сѝ до́брѣ послꙋ́шавшыѧ тебѐ: пострада́въ же, ꙗ҆́кѡ і҆ере́й и҆ мꙋ́ченикъ, є҆леѵѳе́рїе, сꙋгꙋ́бъ прїѧ́лъ є҆сѝ вѣне́цъ: молѝ спасти́сѧ на́мъ."
 },
 {
  "type": "HEADER",
  "value": "Сла́ва, прпⷣбнагѡ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ѡ҆кормлѧ́емь си́лою вседѣ́тельною, и҆ вѣ́триломъ вкрилѧ́емь крⷭ҇тнымъ, легкѡ̀ преплы́лъ є҆сѝ жите́йскꙋю бꙋ́рю, и҆ къ бжⷭ҇твєннымъ и҆́стиннѡ приста́нищємъ дости́глъ є҆сѝ, добродѣ́телей кꙋ́плю мно́гꙋ стѧжа́въ, ю҆́же влⷣцѣ всѣ́хъ прине́слъ є҆сѝ, и҆ є҆́же благі́й ра́бе, слы́шалъ є҆сѝ, и҆ си̑мъ послѣ̑дꙋющаѧ. Тѣ́мже па́ѵле блаже́нне, молѝ хрⷭ҇та̀ бг҃а грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. Тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀."
 },
 {
  "type": "TEXT",
  "value": "Крⷭ҇тобг҃оро́диченъ: Дв҃а и҆ мт҃и и҆зба́вителѧ, крⷭ҇тꙋ̀ предстоѧ́ще, болѣ́зненнѡ со слеза́ми рыда́ющи, мт҃рски вопїѧ́ше, что̀ стра́нное сїѐ и҆ пресла́вное, сн҃е; и҆сточа́ѧй всѣ̑мъ человѣ́кѡмъ безстра́стїе, посредѣ̀ ѡ҆сꙋждє́нною на крⷭ҇тѣ̀ распѧ́тсѧ, въ ре́бра пробода́емь, и҆ же́лчїю напоѧ́емь ѿ рꙋ́къ, ꙗ҆̀же созда́лъ є҆сѝ. Но воста́ни, и҆ да́рꙋй прегрѣше́нїй ѡ҆ставле́нїе вѣ́рою пою́щымъ бжⷭ҇твєннаѧ твоѧ̑ страда̑нїѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Ни зїѧ̑нїѧ львѡ́въ, ни врѣ̑нїѧ ѻ҆гнѧ̀, ни лю́тыхъ прещє́нїѧ, крѣ́пости твоегѡ̀, свѧщеннотаи́нниче, разсла́биша терпѣ́нїѧ: но ꙗ҆́кѡ а҆дама́нтъ, мꙋ́ками ᲂу҆слажда́лсѧ є҆сѝ, ре́вностїю бжⷭ҇твенною распалѧ́емь."
 },
 {
  "type": "TEXT",
  "value": "Во́дъ живото́чныхъ ᲂу҆ста̀ твоѧ̑ и҆спо́лнєна, рѣ́ки и҆сточи́ша бжⷭ҇твенныхъ ᲂу҆че́нїй, свѧщенномꙋ́чениче, потоплѧ́ющыѧ беззако́ннꙋющихъ рꙋга̑нїѧ, и҆ напаѧ́ющыѧ сердца̀ позна́вшихъ хрⷭ҇та̀ бг҃а."
 },
 {
  "type": "TEXT",
  "value": "Вельми́ тѧ прославлѧ́ѧ тво́й содѣ́тель, за него́же ᲂу҆се́рдствовалъ є҆сѝ страда́ти, страстоте́рпче, го́лꙋбѧ тебѣ̀ посыла́етъ приноша́юща пи́щꙋ а҆́гг҃льскꙋю, равноа́гг҃льнꙋ бы́вшꙋ страда́нїй свѣтлѣ́йшими сїѧ́ньми."
 },
 {
  "type": "TEXT",
  "value": "Бг҃оро́диченъ: Оу҆жасо́шасѧ зрѧ́ще а҆́гг҃льскаѧ вѡ́инства, ка́кѡ неви́димый зра́комъ сꙋ́щимъ по на́мъ и҆зъ тебє̀ ви́дѣнъ бы́сть, дв҃о бг҃ороди́тельнице: є҆го́же молѝ, спасе́нїѧ сподо́бити всѧ̑, вѣ́рнѡ тѧ̀ сла́вѧщыѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Сно́мъ побѣди́вшꙋсѧ тебѣ̀ и҆ногда̀ во вре́мѧ ю҆́ности, и҆ ко всено́щномꙋ ѡ҆сла́бившꙋсѧ стоѧ́нїю, тво́й ви́дѣвъ честны́й ᲂу҆чи́тель пе́тръ, по лицꙋ̀, ѻ҆́ч҃е, ᲂу҆дарѧ́етъ: и҆ тебѣ̀ заꙋше́нїе да́въ, дае́тъ а҆́бїе и҆сцѣле́нїе."
 },
 {
  "type": "TEXT",
  "value": "Бг҃ꙋ ѻ҆со́бь бесѣ́дꙋѧ, и҆ семꙋ̀ прибли́живсѧ несре́дственнѣ па́ѵелъ, ѻ҆ц҃ъ на́шъ, никогда́же побѣди́всѧ ѿ сна̀ пребы́сть по ꙗ҆́звѣ ᲂу҆чи́телевѣ: но ꙗ҆́коже безпло́тенъ сы́й, бо́дръ при́снѡ бы́сть."
 },
 {
  "type": "TEXT",
  "value": "Сосꙋ́дъ свѧще́ннѣйшїй ꙗ҆́вльсѧ, мѵ́ро нбⷭ҇ное хрⷭ҇та̀ прїѧ́лъ є҆сѝ се́рдцемъ твои́мъ, и҆ свѣщꙋ̀ твоегѡ̀ терпѣли́внагѡ воздержа́нїѧ жи́тельствомъ добродѣ́тельнымъ вже́гъ свѣ́тлѡ, къ невѣ́стникꙋ бжⷭ҇твенномꙋ восте́клъ є҆сѝ."
 },
 {
  "type": "TEXT",
  "value": "Бг҃оро́диченъ: И҆мѣ́ѧ, сло́ве, прⷭ҇то́лъ нб҃о, зе́млю же подно́жїе, въ ложесна̀ дв҃ы воплоща́ѧсѧ вше́лъ є҆сѝ, и҆ во ᲂу҆бо́гъ верте́пъ всели́лсѧ є҆сѝ: ѿ волхвѡ́въ же, царе́й персі́дскихъ, ꙗ҆́кѡ цр҃ь да́ры и҆ бг҃очеловѣ́къ прїѧ́лъ є҆сѝ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Тво́й ми́ръ да́ждь на́мъ, сн҃е бж҃їй: и҆но́гѡ бо, ра́звѣ тебє̀, бо́га не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ."
 },
 {
  "type": "TEXT",
  "value": "Ле́стными ᲂу҆хищрѧ́ѧй ᲂу҆кра́сти тѧ̀ словесы̀, мꙋ́чениче, вра́гъ вселꙋка́вый, смѣ́хъ зри́тсѧ, мꙋ́дростїю твое́ю мꙋдре́цъ ѕло́бы прехищрѧ́емь."
 },
 {
  "type": "TEXT",
  "value": "На колесни́цѣ взима́емь бжⷭ҇твенныхъ добродѣ́телей, сла́вне, высотꙋ̀ дости́глъ є҆сѝ мꙋче́нїѧ, и҆ низложи́лъ є҆сѝ лꙋка́выхъ бѣсѡ́въ превознесе́ннꙋю горды́ню."
 },
 {
  "type": "TEXT",
  "value": "Ви́дѣти красотꙋ̀ жела́ѧ і҆и҃совꙋ, прпⷣбне, тебѐ сама́го ᲂу҆краси́лъ є҆сѝ мꙋче́нїѧ красото́ю: и҆ къ немꙋ̀ прише́лъ є҆сѝ, вѣнча́всѧ свѣ́тлымъ вѣнце́мъ."
 },
 {
  "type": "TEXT",
  "value": "Бг҃оро́диченъ: Оу҆дивлѧ́етъ всѧ́къ ᲂу҆́мъ чꙋ́до твоѐ, чⷭ҇таѧ: ражда́еши бо бг҃а пло́тїю, и҆ пита́телѧ пита́еши млеко́мъ, и҆скꙋше́нїѧ мꙋ́жеска не позна́вши, са́мъ ꙗ҆́кѡ вѣ́сть є҆ди́нъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. Тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче."
 },
 {
  "type": "TEXT",
  "value": "Ѿ ка́ла страсте́й ѡ҆чи́стивъ ᲂу҆́мъ, нескве́рно зерца́ло бы́лъ є҆сѝ, ѡ҆сїѧ́нїѧ дх҃а прїе́мъ при́снѡ. Тѣ́мже тебѣ̀ и҆скꙋси́тель посрами́сѧ прирази́всѧ, и҆́же сада̀ ѕло́бы не́мощь и҆з̾ꙋчи́вый."
 },
 {
  "type": "TEXT",
  "value": "Мꙋ́дрость сꙋ́щѡ, хрⷭ҇та̀ бг҃а во твое́мъ се́рдцы стѧжа́въ ѡ҆бита́ющꙋю, немꙋ́драго низложи́лъ є҆сѝ ѕло́бы мꙋдреца̀, нога́ми твои́ми кра́сными, мꙋдростьмѝ разли́чными прельсти́ти тѧ̀, па́ѵле бг҃омꙋ́дре, покꙋша́ющасѧ."
 },
 {
  "type": "TEXT",
  "value": "Свѣ́та сы́й прїѧ́телище, днѐ сы́нъ, тмы̀ прельсти́лъ є҆сѝ нача́льника ꙗ҆́коже льва̀, на тѧ̀ навѣ́тꙋюща, земны́ми трꙋ́сы и҆ колеба̑нїи ка́менїй, безстꙋ́дїемъ ᲂу҆страша́юща, па́ѵле, и҆ мечта̑нїи свирѣ́пствꙋюща."
 },
 {
  "type": "TEXT",
  "value": "Бг҃оро́диченъ: И҆зве́рженна пе́рваго а҆да́ма и҆зъ є҆де́ма, приснодв҃о ѻ҆трокови́це бг҃оневѣ́сто, сло́во пребезнача́льное и҆зъ тебє̀ вопло́щсѧ, и҆ въ ꙗ҆́сли безслове́сныхъ восклони́всѧ, ꙗ҆́кѡ млⷣнецъ, на́шъ ро́дъ ѿ безслове́сїѧ и҆зба́ви."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Наро́читый ѻ҆ве́нъ па́ствъ хрⷭ҇то́выхъ, па́стырь слове́снѣйшїй, по́двигѡвъ стезѧ̀ прославлѧ́етсѧ, бг҃а просла́вивъ свои́ми ᲂу҆десы̀."
 },
 {
  "type": "TEXT",
  "value": "Вжи́ливсѧ къ бг҃ꙋ воззрѣ̑нїи, мꙋ́дре, ѡ҆безжи́лилъ є҆сѝ врага̀ многоко́зненнаго тве́рдѡ, приснопа́мѧтне, мꙋ́ченикѡвъ сла́во, свѧще́нства пра́вило."
 },
 {
  "type": "TEXT",
  "value": "Къ ра́намъ терпѧ̀, ко ѻ҆гню̀ самоидѧ̀, ᲂу҆спи́лъ є҆сѝ ѕвѣре́й свирѣ́пыхъ стремлє́нїѧ, неꙋсы́пнꙋ къ зижди́телю и҆мѣ́ѧ любо́вь."
 },
 {
  "type": "TEXT",
  "value": "Бг҃оро́диченъ: Свѧще́нїѧ сѣ́нь ꙗ҆́вльшисѧ, марі́е, ѡ҆скверне́ннꙋю сластьмѝ ѻ҆каѧ́ннꙋю мою̀ дꙋ́шꙋ ѡ҆свѧтѝ, и҆ бжⷭ҇твенныѧ сла́вы прича́стницꙋ сотворѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. Є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ."
 },
 {
  "type": "TEXT",
  "value": "Ꙗ҆́коже сп҃съ, хрⷭ҇то́съ бг҃ъ на́шъ ма́лыми хлѣ̑бы наро́дъ насы́ти многочи́сленъ, та́кожде и҆ па́ѵелъ таи́нникъ хрⷭ҇то́въ, скꙋде́ла малѣ́йшагѡ ма́лою водо́ю мно́жєства до сы́тости возвеселѝ: и҆ сы́тость ꙗ҆влѧ́етъ ѻ҆би́лїе."
 },
 {
  "type": "TEXT",
  "value": "Оу҆ставлѧ́еши зно́й моли́твами твои́ми, чꙋ́дне, и҆ рѣши́ши гла́дъ прети́мый: вода́ми же свы́ше пролїѧ́вшимисѧ ᲂу҆паѧ́еши зе́млю, и҆ напаѧ́еши сꙋхі̑ѧ сеѧ̀ бразды̑, прозѧба́ѧ и҆ богатѧ̀ дарова̑нїи, и҆ ᲂу҆множа́ѧй сеѧ̀ дѣ́ланїе."
 },
 {
  "type": "TEXT",
  "value": "Неболѣ́зненнꙋю жи́знь въ болѣ́знехъ воспрїѧ́лъ є҆сѝ, и҆ болѣ́зней лю́тыхъ ᲂу҆ставлѧ́еши ѡ҆ѕлобле́нїе, вѣ́рою просѧ́щымъ прїѧ́ти врачева̑нїѧ ѿ тебє̀, всече́стне, ѻ҆тцє́въ добро́то. Тѣ́мже разрѣшѝ болѣ̑зни моѧ̑ дꙋшє́вныѧ и҆ тѣлє́сныѧ, молю́сѧ."
 },
 {
  "type": "TEXT",
  "value": "Бг҃оро́диченъ: Сло́во ѻ҆́ч҃ее, сн҃е бж҃їй безлѣ́тне, и҆ порожде́нїе мт҃ре чⷭ҇тыѧ бг҃оѻтрокови́цы превѣ́чное, ꙗ҆́кѡ бг҃ъ, и҆ ꙗ҆́кѡ человѣ́къ млⷣнецъ сы́й, въ верте́пѣ вмѣсти́сѧ невмѣсти́мый. Тѣ́мже всѝ дивѧ́щесѧ покланѧ́емсѧ вели́комꙋ та́инствꙋ."
 },
 {
  "type": "HEADER",
  "value": "Конда́къ свѧщенномꙋ́ченикꙋ, гла́съ в҃."
 },
 {
  "type": "TEXT",
  "value": "Подо́бенъ: Твє́рдыѧ:"
 },
 {
  "type": "TEXT",
  "value": "Ꙗ҆́кѡ ᲂу҆добре́нїе свѧще́нникѡвъ, прпⷣбне, и҆ пред̾ꙋвѣща́нїе страстоте́рпцєвъ всѝ восхвалѧ́емъ, и҆ про́симъ тѧ̀, свѧщенномꙋ́чениче є҆леѵѳе́рїе: любо́вїю па́мѧть твою̀ пра́зднꙋющыѧ бѣ́дъ многоѻбра́зныхъ свободѝ, молѧ̀ непреста́ннѡ ѡ҆ всѣ́хъ на́съ."
 },
 {
  "type": "TEXT",
  "value": "І҆́косъ: Пре́зри, бл҃гоꙋтро́бне жизнода́вче, ꙗ҆́кѡ чл҃вѣколю́бецъ є҆ди́нъ и҆ ще́дрый бг҃ъ, дꙋшѝ моеѧ̀ ѡ҆мраче́нїе, и҆ всемо́щною десни́цею твое́ю, сло́ве, страсте́й свободѝ стꙋже́нїѧ, ꙗ҆́кѡ да твоего̀ і҆ера́рха воспою̀ є҆леѵѳе́рїѧ, то́й бо и҆́стиннѡ и҆зъ ᲂу҆тро́бы позна́сѧ тебѣ̀, и҆ ѡ҆свѧти́сѧ, и҆ возложе́нъ бы́сть ꙗ҆́кѡ самꙋи́лъ, ѿ ма́тере свѧще́нныѧ тебѣ̀ зижди́телю, молѧ̀ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ, нижѐ стꙋжѝ ѻ҆́гнь. Тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆ц҃ъ на́шихъ."
 },
 {
  "type": "TEXT",
  "value": "Да велича́етсѧ, взыва́лъ є҆сѝ, мꙋ́дре, раздроблѧ́емь, ны́нѣ во пло́ти мое́й хрⷭ҇то́съ, не ᲂу҆жаса́юсѧ распале́нїй коно́бѡвъ, не бою́сѧ сме́рти, ни ѕвѣре́й стремле́нїй, сꙋ́щїѧ ра́ди жи́зни."
 },
 {
  "type": "TEXT",
  "value": "Є҆ди́нагѡ бг҃а добро́ты и҆скі́й, є҆ди́нꙋ тогѡ̀ сла́вꙋ полꙋчи́ти жела́ю: да раздроблѧ́етсѧ и҆ ѡ҆палѧ́етсѧ всѐ тѣ́ло моѐ, взыва́лъ є҆сѝ, сла́вне: свобожде́нїѧ и҆щꙋ̀, порабоща́ющагѡ хрⷭ҇тꙋ̀."
 },
 {
  "type": "TEXT",
  "value": "Смотрѧ́ѧ бꙋ́дꙋщꙋю жи́знь, блаже́нне, мі́рꙋ ᲂу҆мертви́лсѧ є҆сѝ и҆́стиннѡ, и҆ ꙗ҆́кѡ зла́то, ꙗ҆́звенными и҆скꙋшє́нїи разже́гсѧ, просїѧ́лъ є҆сѝ, и҆ положи́лсѧ є҆сѝ въ сокро́вищахъ нбⷭ҇ныхъ ѻ҆би́телей."
 },
 {
  "type": "TEXT",
  "value": "Бг҃оро́диченъ: Чистѣ́йшꙋ тѧ̀ є҆ди́нꙋ ѡ҆брѣ́тъ, всенепоро́чнаѧ, сло́во чистѣ́йшее бж҃їе, и҆зъ чре́ва твоегѡ̀ роди́всѧ, вѣ̑рныѧ ѡ҆чища́етъ ѡ҆сквернє́нїѧ, бг҃оневѣ́сто, прибы̑вшаѧ на́мъ ѿ неꙋдержа́нїѧ страсте́й."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Ꙗ҆́кѡ со́лнце возсїѧ́въ, восто́къ а҆́бїе просвѣти́лъ є҆сѝ, на сто́лпъ же возше́дъ, ꙗ҆́кѡ посредѣ̀ нб҃сѐ стоѧ̀, вселе́ннꙋю всю̀ ᲂу҆чє́нїи возвесели́лъ є҆сѝ, ѻ҆тцє́въ, вопїѧ̀, бж҃е, бл҃гослове́нъ є҆сѝ."
 },
 {
  "type": "TEXT",
  "value": "Оу҆дали́лсѧ є҆сѝ, бѣ́гаѧ мїрски́хъ во́лнъ, и҆ въ пꙋсты́ни ѱало́мски водвори́всѧ, бг҃облаже́нне, прїѧ́лъ є҆сѝ бг҃а въ се́рдцы твое́мъ, а҆́гг҃льскимъ хране́нїемъ тебѐ соблюда́юща."
 },
 {
  "type": "TEXT",
  "value": "Зрѣ́лъ є҆сѝ мꙋчє́нїѧ та́мѡшнѧѧ мы́сленными ѻ҆чесы̀, и҆ чл҃вѣколю́бною твое́ю дꙋше́ю се́рдцемъ болѣ́знꙋѧ, слеза́ми себѐ при́снѡ ѡ҆мака́лъ є҆сѝ, не ꙗ҆́кѡ дв҃дъ во вре́мѧ но́щи посте́лю."
 },
 {
  "type": "TEXT",
  "value": "Бг҃оро́диченъ: Безпло́тный воплоща́етсѧ, и҆ безлѣ́тный въ лѣ́то быва́етъ, и҆ пелена́ми повива́етсѧ на́съ ра́ди, и҆́же зе́млю повива́ѧй гдⷭ҇ь мгло́ю, пло́ть са́мъ па́че постиже́нїѧ неизмѣ́ннѡ ꙗ҆ви́всѧ ѿ неискꙋсомꙋ́жныѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите, ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Процвѣ́тъ, прозѧ́блъ є҆сѝ са́дъ красе́нъ мꙋче́нїй свѣ́тлостьми, мꙋ́ченикѡвъ добро́то, и҆ ны́нѣ раѧ̀ цвѣ́ти ꙗ҆ви́стесѧ, бжⷭ҇твенно благово́нїе и҆спꙋща́юще бжⷭ҇твеннѣ."
 },
 {
  "type": "TEXT",
  "value": "Кропле́ньми крове́й твои́хъ, рожде́ннаго и҆зъ неѧ̀, кро́вь свою̀ ма́ти приѡбща́етъ: твоемꙋ́ бо тѣлесѝ ѡ҆б̾е́мшисѧ, мꙋ́дре, мече́мъ скончава́етсѧ, и҆ живе́тъ во вѣ́ки."
 },
 {
  "type": "TEXT",
  "value": "И҆сцѣле́нїй во́ды, чꙋде́съ рѣ́ки и҆злива́етъ тре́бꙋющымъ ра́ка твоѧ̀, мꙋ́дре, ѿмыва́юще сквє́рны дꙋшетлѣ́нныхъ страсте́й, мꙋ́чениче і҆ера́рше, во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ до́ждь, во ᲂу҆тро́бꙋ твою̀ сни́де хрⷭ҇то́съ, и҆ всю̀ напоѝ тва́рь вои́стиннꙋ, и҆зсꙋши́въ, дв҃о, мꙋ̑тныѧ рѣ́ки і҆дѡлонеи́стовства, є҆ди́нъ бл҃годѣ́тель."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. Тѣ́мъ, воспѣва́юще, воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки."
 },
 {
  "type": "TEXT",
  "value": "Спротѧже́нꙋ съ дв҃домъ благогла́снꙋ пѣ́снь всестро́йнꙋ пѣ́лъ є҆сѝ, глаго́лѧ: ꙗ҆́кѡ ᲂу҆тѣшє́нїѧ твоѧ̑ дꙋ́шꙋ мою̀ бг҃олѣ́пнѡ чл҃вѣколю́бнымъ манове́нїемъ, всецр҃ю̀, возвесели́ша. Тѣ́мже ра́дꙋѧсѧ взыва́лъ є҆сѝ: да благослови́тъ тва́рь всѧ̀ гдⷭ҇а, и҆ превозно́ситъ є҆го̀ во вѣ́ки."
 },
 {
  "type": "TEXT",
  "value": "Подава́ѧй тебѣ̀ ꙗ҆̀же проти́вꙋ любвѝ зижди́тель, ѿ ю҆́ности соблюда́ѧ тѧ̀ десни́цею, и҆ тремѝ пита́етъ тѧ̀ сала́тами бг҃олѣ́пнѡ, ꙗ҆́кѡ ѿ младе́нства всѧ́ко похотѣ́нїе попра́вша: рꙋко́ю же а҆́гг҃ла сїѧ̑ дае́тъ, ꙗ҆́кѡ а҆́гг҃льскомꙋ житїю̀ ревнꙋ́ющꙋ, препросла́вленномꙋ тебѣ̀, па́ѵле бг҃оно́се."
 },
 {
  "type": "TEXT",
  "value": "Возмого́ша ᲂу҆бѣжа́ти ѡ҆сꙋжде́нїѧ трїѐ ѡ҆сꙋжде́ннїи свѧ́зани мꙋ́жїе, ꙗ҆́кѡ ᲂу҆кло́ншесѧ слꙋже́нїѧ ѻ҆́бщагѡ: ᲂу҆́зъ бо неви́димѡ и҆́менемъ разрѣ́шшесѧ твои́мъ, ѻ҆́ч҃е всесла́вне, свѧ́занныхъ ѿ бѣ́дъ и҆зба́ви, и҆ є҆ди́ною носи́мы рꙋко́ю содержа́щагѡ."
 },
 {
  "type": "TEXT",
  "value": "Бг҃оро́диченъ: Сл҃нце пра́вды ро́ждшаѧ, ѕвѣздо́ю созыва́етъ волхвы̀ со зла́томъ, и҆ смѵ́рною же и҆ лїва́номъ, новолѣ́пнѡ покланѧ́ющесѧ невра́щнѡ млⷣнствовавшемꙋ: є҆го́же па́стырїе возвели́чиша, и҆ а҆́гг҃лъ мно́жество воспѣ́ша сла́вѧще, ꙗ҆́кѡ и҆ по сꙋществꙋ̀ бг҃а, и҆ чл҃вѣ́ка є҆стество́мъ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи велича́емъ."
 },
 {
  "type": "TEXT",
  "value": "Оу҆ста̀ бж҃їѧ бы́въ, ѿ ᲂу҆́стъ чꙋжда́гѡ лю́ди сꙋемꙋ́дрєнныѧ восхи́тивъ, показа́лъ є҆сѝ наслѣ́дники благода́ти, и҆ пострада́въ крѣ́пкѡ, со і҆ерє́и и҆ страда̑льцы живе́ши, є҆леѵѳе́рїе."
 },
 {
  "type": "TEXT",
  "value": "Чи́стаѧ мѷрополо́жница дх҃а, добродѣ́телей кра́сное жили́ще, а҆́гнецъ неѕло́бивый, свѣти́льникъ незаходи́мый, і҆ера́рхѡвъ степе́нь и҆ мч҃никѡвъ, да восхва́литсѧ вѣ́рнѡ є҆леѵѳе́рїй."
 },
 {
  "type": "TEXT",
  "value": "Во свѣ́тѣ живе́ши и҆́стиннѡ невече́рнѣмъ, свѣ́тъ бы́въ со́лнца свѣтлѣ́йшїй. Тѣ́мъ па́мѧть твою̀ свѣтоно́снꙋю дне́сь соверша́ющыѧ, страсте́й мглы̀ и҆зба́ви къ бг҃ꙋ твои́ми моли́твами, є҆леѵѳе́рїе."
 },
 {
  "type": "TEXT",
  "value": "Бг҃оро́диченъ: Пощадѝ на́съ пою́щихъ твоѐ, гдⷭ҇и, є҆́же и҆зъ дв҃ы, неизрече́нное ржⷭ҇тво̀, ѿ напа́стей и҆збавлѧ́ѧ и҆ страсте́й и҆ скорбе́й, мольба́ми є҆ѧ̀ твоѧ̑ рабы̑, ꙗ҆́кѡ бл҃годѣ́тель, и҆ є҆ди́нъ чл҃вѣколю́бецъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Та́инство стра́нное ви́жꙋ и҆ пресла́вное: нб҃о, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ, є҆го́же воспѣва́юще, велича́емъ."
 },
 {
  "type": "TEXT",
  "value": "Повѣ́дꙋетъ є҆́же къ бг҃ꙋ дерзнове́нїе твоѐ, и҆ ꙗ҆̀же соверши́лъ є҆сѝ, по є҆́же къ немꙋ̀ ѿше́ствїи, чꙋ̑днаѧ дѣла̀: мно́гихъ бо є҆ле́емъ твоегѡ̀ свѣтовожде́нїѧ, ѿ недꙋ̑гъ разли́чныхъ свободи́лъ є҆сѝ."
 },
 {
  "type": "TEXT",
  "value": "Всесвѣ́тлꙋ твою̀ дꙋ́шꙋ и҆мѣ́ѧ, прпⷣбне, ꙗ҆́кѡ мѵ́ромъ благода́ти ве́сь напои́всѧ, є҆ле́емъ де́мѡны ѿго́ниши, прокажє́нныѧ ѡ҆чища́ѧ и҆ ᲂу҆грызє́нныѧ главы̑, и҆ кра́стъ лю́тыхъ ᲂу҆ставлѧ́ѧ болѣ̑зни."
 },
 {
  "type": "TEXT",
  "value": "Распа́дсѧ па́даетъ сатана̀ вселꙋка́вый, ѻ҆́бразомъ всесвирѣ́па ѕвѣ́рѧ, зрѧ̀ просте́рша тебѐ є҆ле́й канди́ла твоегѡ̀, ꙗ҆́кѡ мѵ́ро, на и҆сцѣле́нїе разли́чныхъ недꙋ́гѡвъ, и҆ стра́хомъ ѡ҆держи́мь и҆счезѐ."
 },
 {
  "type": "TEXT",
  "value": "Бг҃оро́диченъ: Зачала̀ є҆сѝ въ послѣ̑днѧѧ лѣ̑та въ ложесна́хъ твои́хъ, є҆го́же ѻ҆ц҃ъ родѝ сн҃а пре́жде вѣ̑къ нетлѣ́ннѡ, неискꙋсомꙋ́жнаѧ мт҃и. Сего̀ ѕвѣздо́ю небеса̀ показꙋ́ютъ, и҆ землѧ̀ пеще́рою земно́ю."
 },
 {
  "type": "HEADER",
  "value": "Свѣти́ленъ ѻ҆ктѡ́иха: Сла́ва, прпⷣбнагѡ."
 },
 {
  "type": "TEXT",
  "value": "Подо́бенъ: Со ᲂу҆ченики̑ взы́демъ:"
 },
 {
  "type": "TEXT",
  "value": "Дв҃дски процвѣ́лъ є҆сѝ въ домꙋ̀ гдⷭ҇ни, ꙗ҆́кѡ фі́нїѯъ, ѻ҆́ч҃е прпⷣбне, плоды̀ твои́хъ трꙋдѡ́въ во сто̀ ны́нѣ ᲂу҆мно́живъ. Тѣ́мже по́лкъ де́мѡнѡвъ тꙋ́чами сле́зъ твои́хъ, па́ѵле блаже́нне, погрꙋ́жь, ѿ хрⷭ҇та̀ по́честь и҆ вѣне́цъ побѣ́ды прїѧ́лъ є҆сѝ, и҆ чꙋде́съ, премꙋ́дре, независтнобога́тꙋю бл҃года́ть."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "И҆́же горѣ̀ сла́вимый бж҃ески ѿ а҆́гг҃лъ, нѣ́дръ ѻ҆те́ческихъ не ѿстꙋпи́въ, чⷭ҇таѧ, неизрече́ннѡ, съ до́льними поживѐ: ты́ же сегѡ̀ была̀ є҆сѝ спасе́нїѧ вино́вна, ѿ чⷭ҇тыхъ твои́хъ крове́й семꙋ̀, чⷭ҇таѧ, па́че сло́ва пло́ть заимода́вши. Є҆го́же молѝ, рабѡ́мъ твои̑мъ и҆збавле́нїе да́ти прегрѣше́нїй."
 },
 {
  "type": "HEADER",
  "value": "На стїхо́внѣ ѻ҆ктѡ́иха."
 }
]