ponomar-pwa/static/data/shared/menaion-add/40.json

[
 {
  "type": "HEADER",
  "value": "Феѵрꙋа́рїа д҃і"
 },
 {
  "type": "HEADER",
  "value": "Прпⷣбнагѡ ѻ҆ц҃а̀ на́шегѡ кѡнстанті́на фїло́софа, во мні́сѣхъ претворе́ннагѡ и҆́менемъ кѷрі́лла, ᲂу҆чт҃лѧ слове́нскомꙋ ꙗ҆зы́кꙋ."
 },
 {
  "type": "HEADER",
  "value": "На вече́рни, на Гдⷭ҇и воззва́хъ, пое́мъ стїхи̑ры, гла́съ д҃."
 },
 {
  "type": "TEXT",
  "value": "Подо́бенъ: Дадѐ зна́менїе:"
 },
 {
  "type": "TEXT",
  "value": "Красотꙋ̀ пресвѣ́тлꙋю добродѣ́тель и҆мѣ́ѧ, ѻ҆́ч҃е, ве́сь мі́ръ проте́клъ є҆сѝ, ꙗ҆́кѡ пчела̀ бг҃оразꙋ́мїѧ, ме́дъ пречтⷭ҇ый въ срⷣца̀ влага́ѧ вѣ́рꙋющымъ во є҆ди́наго хрⷭ҇та̀, на зе́млю прише́дшаго, и҆ ѡ҆бж҃и́вшаго человѣ́ки за млⷭ҇ть безчи́сленнꙋю и҆ мно́гое снисхожде́нїе."
 },
 {
  "type": "TEXT",
  "value": "Кро́токъ мꙋ́дростїю, бж҃їѧ любвѐ и҆спо́лненъ, правовѣ́рными ᲂу҆чє́нїи преꙋкра́шенъ, кѷрі́лле бл҃же́нне, гра́ды же и҆ страны̑ ᲂу҆ловлѧ́ѧ бг҃омъ бл҃же́нне, прои́де просвѣща́ѧ блгⷣтїю не ᲂу҆̀ спаси́тельное прїе́мшѧ разꙋмѣ́нїе, сегѡ̀ ра́ди тѧ̀ чте́мъ ст҃ы́ми пѣ́снми."
 },
 {
  "type": "TEXT",
  "value": "Житїѐ твоѐ без̾ поро́ка, и҆ живо́тъ достохва́ленъ, и҆ сме́рть же честна̀ пред̾ бг҃омъ бы́сть всѧ́чєскимъ, є҆мꙋ́же въ рꙋ̑цѣ, ѻ҆́ч҃е, дꙋ́шꙋ предадѐ просвѣтле́ннꙋ и҆справле́нїемъ. Тѣ́мже тѧ̀ мо́лимъ ѡ҆ на́съ къ немꙋ̀, помоли́сѧ ѡ҆брѣстѝ млⷭ҇ть вѣ́рнѡ хва́лѧщымъ тѧ̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "На стїхо́внѣ, стїхи́ра ст҃о́мꙋ, гла́съ и҃."
 },
 {
  "type": "TEXT",
  "value": "Чтⷭ҇аѧ дх҃о́внаѧ ст҃ы́хъ па́мѧть, все́льшсѧ въ чи́стѣ срцⷣы твое́мъ, всебл҃же́нне кѷрі́лле, прпⷣбне ѻ҆́ч҃е, и҆ дꙋховѡ́мъ лꙋка̑вымъ стра́шна тѧ̀ прогони́телѧ показа̀, но и҆ сокровє́ннымъ недꙋ́гѡмъ врача̀: тѣ́мже дерзнове́нїе и҆мѣ́ѧ къ чл҃колю́бцꙋ бг҃ꙋ неѡсла́бнѡ моли́сѧ и҆ ѿ дꙋше́вныѧ на́съ скве́рны и҆ тѣле́сныѧ свободѝ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "По Ны́нѣ ѿпꙋща́еши:"
 },
 {
  "type": "HEADER",
  "value": "Тропа́рь, гла́съ д҃."
 },
 {
  "type": "TEXT",
  "value": "Ѿ пеле́нъ приле́жнѡ премⷣрость сестрꙋ̀ себѣ̀ сотвори́въ, бг҃огла́се, пресвѣ́тлꙋю ви́дѣвъ, ꙗ҆́кѡ дв҃и́цꙋ чи́стꙋ, ю҆́же прїе́мь, приведѐ, ꙗ҆́кѡ мони̑сты златы́ми сею̀ ᲂу҆кра́сивъ свою̀ дꙋ́шꙋ и҆ ᲂу҆́мъ, и҆ ѡ҆брѣ́тесѧ ꙗ҆́кѡ дрꙋгі́й кѷрі́ллъ, бл҃же́нне, ра́зꙋмомъ и҆ и҆́менемъ мꙋ́дре."
 },
 {
  "type": "HEADER",
  "value": "На ᲂу҆́трени, На Бг҃ъ гдⷭ҇ь, тропа́рь ст҃о́мꙋ."
 },
 {
  "type": "HEADER",
  "value": "По а҃-мъ стїхосло́вїи сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ли́къ а҆́гг҃льскїй:"
 },
 {
  "type": "TEXT",
  "value": "Бж҃їими мольба́ми просвѣти́въ срⷣце твоѐ, просвѣтова̀ дꙋ́шꙋ бг҃одх҃нове́нными ᲂу҆чє́нїи, и҆ ны́нѣ же прїи́де на свѣ́тъ невече́рнїй. Тѣ́мъ дне́сь свѣтоно́снꙋю па́мѧть твою̀ пра́зднꙋемъ весе́лїемъ срⷣца, пресла́вне кѷрі́лле."
 },
 {
  "type": "HEADER",
  "value": "По в҃-мъ стїхосло́вїи, сѣда́ленъ въ ѡ҆кто́ихѣ."
 },
 {
  "type": "HEADER",
  "value": "На полѷеле́и велича́нїе:"
 },
 {
  "type": "TEXT",
  "value": "Велича́емъ ва́съ, ст҃і́и равноапⷭ҇льнїи меѳо́дїе и҆ кѷрі́лле, всѧ̑ словє́нскїѧ страны̀ ᲂу҆че́ньми свои́ми просвѣти́вшыѧ и҆ ко хрⷭ҇тꙋ̀ приве́дшыѧ."
 },
 {
  "type": "HEADER",
  "value": "Ѱало́мъ и҆збра́нный ст҃и́тельскїй."
 },
 {
  "type": "HEADER",
  "value": "По полѷеле́и сѣда́ленъ, гла́съ д҃:"
 },
 {
  "type": "TEXT",
  "value": "Прїиди́те, просвѣти́тєли на́шѧ велегла́снѡ хвала́ми почти́мъ: ті́и бо ꙗ҆зы́ки словє́нскїѧ, гла́домъ сло́ва бж҃їѧ погиба́вшыѧ, ма́нною ᲂу҆че́нїѧ бг҃омꙋ́драгѡ напита́ста, и҆ преложе́нїемъ бл҃говѣ́стїѧ сы́на гро́мова на сро́днꙋю и҆̀мъ бесѣ́дꙋ, ꙗ҆́кѡ лꙋче́ю со́лнечною просвѣти́ста. Ѿ неѧ́же и҆ мы̀ ѡ҆заре́нїе прїе́мше, бл҃года́рственнѡ воззове́мъ: ра́дꙋйтесѧ, кѷрі́лле и҆ меѳо́дїе присносла́внїи."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй."
 },
 {
  "type": "TEXT",
  "value": "Всѧ́кое дыха́нїе да хва́литъ гдⷭ҇а."
 },
 {
  "type": "HEADER",
  "value": "Є҆ѵⷢ҇лїе ѻ҆́бщее ст҃и́телємъ."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "А҆пⷭ҇лѡмъ є҆динонра̑вныѧ, і҆ера́рхѡвъ ᲂу҆добре́нїе, ꙗ҆зы́кѡвъ слове́нскихъ просвѣти́тєли и҆ тє́плыѧ застꙋ́пники, прїиди́те, празднолю́бцы, похва́льными пѣ́нїи воспои́мъ, глаго́люще: ра́дꙋйсѧ, кѷрі́лле, бг҃осло́вїѧ трꙋбо̀ златокова́ннаѧ, та́инство ст҃ы́ѧ трⷪ҇цы подо́бїемъ со́лнечнымъ ᲂу҆ѧсни́вый, и҆ тѣ́мъ ѕлохꙋ̑льнаѧ ᲂу҆ста̀ а҆га̑рѧнскаѧ загради́вый: ра́дꙋйсѧ и҆ ты̀ съ ни́мъ, меѳо́дїе, є҆диномꙋ́дреннѡ подвиза́выйсѧ, мл҃твами и҆ зна́мєнїи томꙋ̀ споспѣшествꙋ́ѧ: и҆ ны́нѣ, ѻ҆тцы̀ всебл҃же́ннїи, не преста́йте молѧ́щесѧ ѡ҆ на́съ хрⷭ҇тꙋ̀ бг҃ꙋ, вѣ́рою и҆ любо́вїю ва́съ велича́ющихъ."
 },
 {
  "type": "HEADER",
  "value": "Канѡ́нъ въ ѡ҆кто́ихѣ, и҆ ст҃о́мꙋ, гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Въ ча́ши премꙋ́дрости бжⷭ҇твеннаѧ твоѧ̑ ᲂу҆ста̀ приложи́въ, напита́сѧ сп҃си́тельнагѡ питїѧ̀, ра́зꙋмомъ свѣ́тъ ꙗ҆влѧ́ѧ ꙗ҆зы́кѡмъ, и҆ сѣки́ра посѣка́ющаѧ непрїѧ́зненнꙋ всѧ́кꙋ ле́сть."
 },
 {
  "type": "TEXT",
  "value": "Просвѣти́въ тѧ̀ ꙗ҆́кѡ свѣти́ло, свѣтода́вецъ хрⷭ҇то́съ бг҃ъ на́шъ, всемꙋ̀ мі́рови ꙗ҆вѝ тѧ̀ ᲂу҆чт҃лѧ и҆ посла̀ ᲂу҆чи́ти тє́мныѧ кни́гами законоꙋ́чными ꙗ҆зы́ки за̑падныѧ."
 },
 {
  "type": "TEXT",
  "value": "Ст҃ы́мъ дх҃омъ ѿ пꙋчи́ны и҆звлечѐ бж҃їимъ сло́вомъ всемꙋ̀ мі́рꙋ ᲂу҆чт҃лѧ бл҃говѣ́рїѧ, мꙋ́дре, драгі́й би́серъ, бж҃їѧ зако́на кни́гами, бл҃же́нне, ꙗ҆зы́ки ѡ҆свѧтѝ."
 },
 {
  "type": "TEXT",
  "value": "Бг҃оро́диченъ: Кра́сный ᲂу҆́мъ преимѣ̀ нбⷭ҇нымъ си́ламъ, бж҃їй бо тво́й бы́сть хра́мъ дш҃е́вный, є҆гда̀ во чре́вѣ понесла̀ є҆сѝ бг҃а на́шегѡ, дв҃о, горо̀ прест҃а́ѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Съ высоты̀ вла́сти снизше́лъ є҆сѝ во́лею на зе́млю превы́шше всѧ́кагѡ нача́ла, и҆ смире́нное возне́слъ є҆сѝ, и҆з̾ а҆́да преиспо́днѧгѡ, є҆стество̀ человѣ́ческое: нѣ́сть бо ст҃ъ па́че тебє̀, чл҃колю́бче."
 },
 {
  "type": "TEXT",
  "value": "Сло́вомъ и҆ срⷣцемъ и҆ ѧ҆зы́комъ хрⷭ҇та̀, сн҃а бж҃їѧ, проповѣ́да, премⷣрость же и҆ си́лꙋ и҆ сло́во вопло́щшеесѧ, бл҃же́нне, стрꙋѧ́ми при́точными посрами́въ трїѧзы́чники."
 },
 {
  "type": "TEXT",
  "value": "Цѣвни́ца при́точна ст҃а во и҆́стинꙋ ꙗ҆ви́сѧ, бл҃же́нне кѷрі́лле, гла́съ на́мъ сп҃се́нїѧ, ст҃ы́мъ звꙋ́комъ дх҃о́внымъ брѧца́ѧ прекра́снѡ, ле́сть прогна́лъ є҆сѝ."
 },
 {
  "type": "TEXT",
  "value": "Ѽ ᲂу҆́ме ѻ҆́гненный, ѽ доброгла́сна трꙋбо̀, ѽ сла́вїю пѣсни́вый, ѽ ла́стовице златогл҃го́ливаѧ, ѽ ꙗ҆зы́че сла́ждшїй ме́да въ при́тчахъ, кѷрі́лле премⷣре, всѣ́хъ на́съ помѧнѝ."
 },
 {
  "type": "TEXT",
  "value": "Бг҃оро́диченъ: Совѣ́томъ ѻ҆́ч҃имъ, безнача́льный сн҃ъ, ꙗ҆́кѡ сло́во въ ложесна̀ твоѧ̑ ѡ҆сѣне́нїемъ ст҃а́гѡ дх҃а, бг҃оро́дице, весели́сѧ и҆ пло́тїю роди́сѧ и҆з̾ тебє̀, спаса́ѧ дꙋ́шы на́шѧ."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости словесѝ:"
 },
 {
  "type": "TEXT",
  "value": "Ꙗ҆́кѡ зарѧ̀, просвѣти́въ всю̀ зе́млю, є҆ретїкѝ го́ниши, взыска́ѧ на восто́цѣ и҆ за́падѣ и҆ сѣ́верѣ и҆ ю҆́зѣ: трїѧзы́чники и҆справлѧ́еши, проповѣ́даѧ страна́мъ, ꙗ҆зы̑ки свои́ми и҆̀мъ гл҃го́лѧ и҆ кни̑ги предаѧ̀. Ри́ма же доше́дъ, тꙋ̀ тѣ́ло своѐ положѝ, бл҃же́нне, въ рꙋ́цѣ гдⷭ҇ни дꙋ́шꙋ свою̀ преда́въ: бл҃говѣ́рїѧ ᲂу҆чт҃лю, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю ст҃ꙋ́ю твою̀ па́мѧть."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃се зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Дрꙋгі́й а҆враа́мъ преселе́нїемъ, бл҃же́нне, бы́лъ є҆сѝ ѿ ѻ҆ч҃ества жела́нїемъ премⷣрости бо́льшїѧ, ꙗ҆́кѡ златы́ми мони̑сты ᲂу҆кра́силсѧ є҆сѝ, лꙋча́ми пресвѣ́тлыми ѕѣлѡ̀ ѡ҆блиста́ѧсѧ."
 },
 {
  "type": "TEXT",
  "value": "Копїе́мъ слове́съ твои́хъ ꙗ҆́кѡ за́мврїа пронзи́лъ є҆сѝ, мадїа́нстѣй є҆́реси приложи́вшасѧ го́рькѡ, тѣле́снагѡ ѻ҆́браза ѿмета́ющихсѧ ꙗ҆ви́вшагѡсѧ во пло́ти і҆и҃са."
 },
 {
  "type": "TEXT",
  "value": "Равносꙋ́щнꙋю проповѣ́далъ є҆сѝ ст҃а́го дх҃а си́лꙋ ѻ҆ц҃ꙋ̀ и҆ сн҃ꙋ тресо́лнечнагѡ свѣ́та, и҆́мже бж҃їи быва́емъ по пода́нїю сн҃ове свѣ́тꙋ и҆ и҆́стїи наслѣ̑дницы."
 },
 {
  "type": "TEXT",
  "value": "Бг҃оро́диченъ: И҆зба́вльшесѧ пе́рвагѡ ѡ҆сꙋжде́нїѧ а҆да́мова тобо́ю, дв҃и́це, ѡ҆брѣто́хомъ ра́дость неизгл҃го́ланнꙋю, бл҃гослове́нїе бо всѣ̑мъ родила̀ є҆сѝ, сн҃а бж҃їѧ въ на́шъ ѻ҆́бразъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ны́нѣ возста́нꙋ, прⷪ҇ро́чески речѐ бг҃ъ, ны́нѣ просла́влюсѧ, ны́нѣ вознесꙋ́сѧ, па́дшаго прїе́мь ѿ дв҃ы, и҆ къ свѣ́тꙋ ᲂу҆́мномꙋ возносѧ́й моегѡ̀ бжⷭ҇тва̀."
 },
 {
  "type": "TEXT",
  "value": "Ма́стїю своею̀ ᲂу҆краси́вшꙋсѧ тебѐ, бл҃же́нне, до́брѣ, бл҃года́ть и҆злїѧ́сѧ во ᲂу҆стна́хъ твои́хъ, дх҃овномꙋ́дре, и҆ нече́ствꙋющихъ глꙋбинꙋ̀ и҆зсꙋшѝ наводне́нꙋ словесы̀ твои́ми."
 },
 {
  "type": "TEXT",
  "value": "Стоѧ́ше крѣ́пкѡ, посо́бствꙋѧ по вѣ́рѣ, мⷣре льстѝ претыка́нїѧ посѣка́ѧ сло́вомъ твои́мъ, равнѧ́ѧ вѣ́рнымъ бжⷭ҇твеннꙋю стезю̀, наставлѧ́ѧ во гра́дъ хрⷭ҇то́въ послꙋ̑шливыѧ."
 },
 {
  "type": "TEXT",
  "value": "Преплыва́юще ди́внѡ бе́зднꙋ твои́мъ сло́вомъ и҆ при́тчами, кѷрі́лле бл҃же́нне, ѿ зимы̀ мра́зныѧ бл҃го́ю вѣ́рою въ тишинꙋ̀ вы́шнихъ ѡ҆би́телей вше́лъ є҆сѝ."
 },
 {
  "type": "TEXT",
  "value": "Бг҃оро́диченъ: Спаса́ѧ чл҃вѣ́ки, ѻ҆ц҃е́ви ра́венъ сн҃ъ чл҃вѣ́къ быва́етъ: и҆з̾ тебє̀, пречтⷭ҇аѧ, пло́ть прїе́мь и҆ земна̑ѧ бг҃ови сотвори́въ и҆ нбⷭ҇номꙋ црⷭ҇твїю человѣ́ки содѣ́лалъ є҆́сть."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прїидо́хъ въ глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве."
 },
 {
  "type": "TEXT",
  "value": "Со́нмъ мертви́тсѧ приложи́вшсѧ а҆гарѧ́нѡмъ ꙗ҆́кѡ ѕмі́и живꙋ́щымъ, въ при́тчахъ твои́хъ трисо́лнечнагѡ и҆ є҆ди́нагѡ бжⷭ҇тва̀ си́лою ᲂу҆́бѡ и҆знемога́ѧ."
 },
 {
  "type": "TEXT",
  "value": "Ꙗ҆́кѡ и҆збра́нна стрѣла̀ ꙗ҆ви́сѧ є҆ретїкѡ́мъ врагѡ́мъ, ꙗ҆́таѧ въ тѣ́лѣ ст҃ѣ́мъ, ꙗ҆́коже прⷪ҇ро́чески пи́шетсѧ, хранѧ́щаѧсѧ бж҃ество́мъ и҆ сострѣлѧ́ющаѧ врагѝ."
 },
 {
  "type": "TEXT",
  "value": "Возлюби́въ и҆змла́да премⷣрость, сестрꙋ̀ себѣ̀ прїѧ́лъ ю҆̀ є҆сѝ и҆ ᲂу҆мꙋдри́всѧ бг҃омъ, бл҃же́нне, ꙗ҆ви́лсѧ є҆сѝ фїло́софъ."
 },
 {
  "type": "TEXT",
  "value": "Бг҃оро́диченъ: І҆езекїи́ль тѧ̀ врата̀ ви́дѣ, и҆́миже про́йде є҆ди́нъ бг҃ъ вы́шнїй, ложесна̀ ст҃а́ѧ твоѧ̑ проше́дъ пло́тїю, пречⷭ҇таѧ, и҆ не ѿвє́рста ѡ҆ста́вилъ є҆́сть и҆́хъ."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Тве́рдыѧ и҆ бг҃огла́сныѧ:"
 },
 {
  "type": "TEXT",
  "value": "Тве́рдымъ и҆ бг҃одх҃нове́ннымъ ᲂу҆че́нїемъ просвѣща́ѧ мі́ръ пресвѣ́тлыми зарѧ́ми, ѡ҆бтечѐ, ꙗ҆́кѡ мо́лнїѧ вселе́ннꙋю, кѷрі́лле бл҃же́нне, разсѣва́ѧ пресвѣ́тлое бж҃їе сло́во, на за́падѣ и҆ сѣ́верѣ и҆ ю҆́зѣ мі́ръ просвѣща́ѧ чꙋдєсы̀."
 },
 {
  "type": "TEXT",
  "value": "І҆́косъ: Пресвѣ́тлое житїѐ возлюби́въ, мꙋ́дре, зарѧ́ми трисо́лнечнагѡ бжⷭ҇тва̀ ѡ҆свѣще́нъ прои́де, ꙗ҆́кѡ мо́лнїѧ, вселе́ннꙋю, сѣ́вернꙋю и҆ ю҆́жнꙋю просвѣти́въ странꙋ̀, за̑паднымъ же свѣ́тъ незаходи́мъ возсїѧ̀. Тѣ́мже и҆ мнѣ̀, мра́къ грѣхо́вный прогна́въ, бл҃же́нне, свы́ше и҆спросѝ посла́ти блгⷣть дх҃о́внꙋю: и҆́маши бо дерзнове́нїе къ бг҃ꙋ непреста́ннѡ моли́тисѧ за всѧ̑."
 },
 {
  "type": "TEXT",
  "value": "Лю́дїе: Мі́ръ просвѣща́ѧ чꙋдєсы̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Слове́сными пища́льми, бл҃же́нне, призыва́ѧ ѻ҆́вцы въ ѻ҆гра́ды ст҃ы́ѧ, мꙋ́дрыми при́тчами, красото́ю и҆ сла́стїю слове́съ твои́хъ."
 },
 {
  "type": "TEXT",
  "value": "Не ᲂу҆страши́сѧ, ᲂу҆чт҃лю, во́ински є҆ди́нъ вни́ти въ по́лкъ жидо́вскїй, всѣ́хъ же нарѡ́дъ и҆́хъ сто́лпъ мꙋ́дростїю разве́рзе, ꙗ҆́кѡ и҆ ѻ҆́нъ ханаа́нскїй прⷪ҇ро́ческими при́тчами."
 },
 {
  "type": "TEXT",
  "value": "Тебѐ дарова̀ и҆сто́чника зна́менана всѣ̑мъ пра́вѣй вѣ́рѣ, бл҃же́нне, воды̀ сладото́чныѧ напаѧ́юща всегда̀ сн҃ы̀ бл҃говѣ́рїѧ и҆ и҆сполнѧ́юща, ꙗ҆́кѡ рѣкꙋ̀, тече́нїемъ цр҃ковь гдⷭ҇ню."
 },
 {
  "type": "TEXT",
  "value": "Бг҃оро́диченъ: Небе́съ ши́ршꙋю содѣ́ѧ бг҃ъ, браконеискꙋ́снаѧ, въ ложесна̀ твоѧ̑ всели́всѧ, пречⷭ҇таѧ, тѣ́мже молю́тисѧ стꙋжа́юща мѧ̀ прегрѣше́нїѧ и҆зба́ви широто́ю покаѧ́нїѧ моегѡ̀."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочєсти́выѧ въ пещѝ, ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Къ свѣ́тꙋ приложи́всѧ свѣ́тъ ꙗ҆ви́сѧ внѧ́тїю є҆́же ѿ бг҃а, ѽ фїло́софе, и҆́нъ бо ѡ҆брѣ́тесѧ па́ѵелъ добродѣ́телми прете́къ всю̀ зе́млю въ ꙗ҆зы́цѣхъ, со́лнца свѣ́тлѣе сїѧ́ѧ, сло́вомъ ᲂу҆че́нїѧ твоегѡ̀ вопїѧ̀: гдⷭ҇а по́йте дѣла̀."
 },
 {
  "type": "TEXT",
  "value": "Ꙗ҆́коже прето́ржесѧ со́нмъ є҆вре́йскїй ѻ҆строто́ю слове́съ твои́хъ бл҃же́нне, въ градѣ́хъ сѣ́верскихъ въ коза́рѣхъ приложи́сѧ къ тебѣ̀. Ты̀ бо мно́жество посѣчѐ, ᲂу҆ч҃тлю ст҃ы́й, ꙗ҆́кѡ голїа́ѳа даві́дъ, въ пога́нѣхъ."
 },
 {
  "type": "TEXT",
  "value": "Вели́ка тѧ̀ ѻ҆пло́та и҆ тве́рдь землѧ̀ панно́нскаѧ и҆мꙋ́щи, бл҃же́нне, заблꙋждє́нїѧ є҆реті́чєскаѧ рꙋ́шить кни́гами и҆ трїѧзы́чникѡвъ крѣ́пкѡ наꙋче́на тобо́ю, тѣ́мже тѧ̀, ᲂу҆чт҃лѧ мꙋ́драго, помина́юще при́снѡ хрⷭ҇та̀ прославлѧ́емъ."
 },
 {
  "type": "TEXT",
  "value": "Бг҃оро́диченъ: Кни́гами ᲂу҆че́нїй ст҃ы́хъ прⷪ҇рѡ́къ, дв҃о, бг҃оро́дицꙋ тѧ̀ вѣ́рою проповѣ́даемъ, ты̀ бо родѝ ѻ҆троча̀ ве́тхагѡ де́нми, ꙗ҆́кѡ но́ва чл҃вѣ́ка, тѣ́мже тѧ̀, прест҃а́ѧ, пое́мъ и҆ превозно́симъ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бг҃оро́дице, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ, тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Ꙗ҆́кѡ свѣти́ло тѧ̀ чⷭ҇тно хрⷭ҇то́съ возложѝ, бле́щꙋщасѧ въ конца́хъ, мꙋ́дре, въ вѣнцѝ церко́внѣмъ, є҆гѡ́же ра́ди до сме́рти подвиза́сѧ, ᲂу҆множа́ѧ вѣ́рныхъ воспита́нїе ра́зꙋмомъ и҆ говѣ́нїемъ."
 },
 {
  "type": "TEXT",
  "value": "Па́ѵлꙋ бжⷭ҇твенномꙋ ᲂу҆чн҃къ бы́лъ є҆сѝ, є҆гѡ́же дѣ́тели послѣ́дꙋѧ, про́йде до кра̑й за́падныхъ, сло́во разсѣва́ѧ въ ꙗ҆зы́цѣхъ (въ као́нѣ) и҆ въ ри́мѣ дх҃ъ сво́й въ рꙋ́цѣ бг҃ꙋ своемꙋ̀ предадѐ."
 },
 {
  "type": "TEXT",
  "value": "Ꙗ҆́кѡ со́лнце на землѝ возсїѧ̀, ᲂу҆чт҃лю, всю́дꙋ при́тчами лꙋча́ми бг҃огла́сїѧ просвѣща́ѧ, пою́щыѧ тѧ̀ вѣ́рою и҆ ѡ҆ ра́цѣ стоѧ́щихъ твоегѡ̀ тѣ́ла, помѧнѝ, бл҃же́нне, своѧ̑ ᲂу҆ченикѝ."
 },
 {
  "type": "TEXT",
  "value": "Бг҃оро́диченъ: Лꙋча́ми твоегѡ̀ свѣ́та, пречⷭ҇таѧ, дꙋ́шꙋ мою̀ ны́нѣ просвѣтѝ лежа́щꙋ въ ро́вѣ ги́бельнѣмъ, воздви́гни, врагѝ сокрꙋша́ющи ѡ҆скорблѧ́ющѧ при́снѡ дꙋшѝ мое́й и҆ на грѣхѝ мѧ̀ побꙋжда́ющѧ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Ꙗ҆́кѡ свѣти́льника тѧ̀ хрⷭ҇то́съ мі́рови показа̀ и҆ ᲂу҆чт҃лѧ вселе́ннѣй, пребл҃же́нне кѷрі́лле, солꙋ́нскаѧ ѿра́сле, тѣ́мъ и҆ на́мъ, помина́ющымъ чⷭ҇тнꙋ́ю твою̀ па́мѧть, ѿ негѡ̀ про́симъ млⷭ҇ть."
 },
 {
  "type": "HEADER",
  "value": "На хвали́техъ, стїхи̑ры пра́здника г҃: и҆ ст҃ы́хъ г҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Кѷрі́лле и҆ меѳо́дїе бг҃омꙋ́дрїи, а҆пⷭ҇льскимъ стопа́мъ послѣ́дꙋюще, ко взыска́нїю люде́й заблꙋ́ждшихъ є҆диномꙋ́дреннѡ подви́гшесѧ, ꙗ҆́кѡ ѻ҆рлѝ скоропарѧ́щїи страны̑ словє́нскїѧ ѡ҆блетѣ́ли є҆стѐ, ꙗ҆̀же свѣ́томъ бг҃опозна́нїѧ ѡ҆зари́вше, приведо́сте ко і҆и҃сꙋ чл҃вѣколю́бцꙋ и҆ сп҃сꙋ дꙋ́шъ на́шихъ."
 },
 {
  "type": "TEXT",
  "value": "Вїногра́да хрⷭ҇то́ва дѣ́лателїе, бл҃гоче́стїѧ насади́тєли, лю́ди словє́нскїѧ ꙗ҆́кѡ дра́хмꙋ поги́бшꙋю со тща́нїемъ взыска́вше ѡ҆брѣлѝ є҆стѐ, бг҃оно́снїи ѻ҆тцы̀, ю҆́же въ сокро́вищницꙋ жи́зни вѣ́чныѧ прїѧ́тъ ра́дꙋѧсѧ со а҆́гг҃лы і҆и҃съ чл҃вѣколю́бецъ и҆ сп҃съ дꙋ́шъ на́шихъ."
 },
 {
  "type": "TEXT",
  "value": "Ст҃ы́ѧ трⷪ҇цы побѡ́рницы и҆ заблꙋ́ждшихъ наста̑вницы, ѕлохꙋле́нїе а҆га́рѧнское препрѣ́вши и҆ нече́стїе і҆ꙋде́йское посрами́вшїи, цр҃ковь, ю҆́же стѧжа́ли є҆стѐ бг҃оꙋго́дными трꙋды̀ и҆ пѡ́ты ва́шими, сохрани́ти потщи́тесѧ ѿ навѣ́тѡвъ вра́жїихъ неврежде́нꙋ и҆ бл҃гопрїѧ́тнꙋ і҆и҃сꙋ чл҃вѣколю́бцꙋ и҆ сп҃сꙋ дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Просвѣти́телей на́шихъ бл҃гоче́стнѡ па́мѧть соверша́юще, лю́дїе, бл҃года́рственнѡ возопїи́мъ: ра́дꙋйтесѧ, свѣти́льницы пресвѣ́тлїи, свѣ́томъ бг҃опозна́нїѧ страны̀ словє́нскїѧ ѡ҆зари́вшїи: ра́дꙋйтесѧ, па́стырїе до́брїи, словє́сныѧ ѻ҆́вцы, въ де́брехъ невѣ́рїѧ разсѣ̑ѧнныѧ, во є҆ди́но собра́вшїи и҆ къ пастыренача́льникꙋ хрⷭ҇тꙋ̀ приве́дшїи. Є҆го́же велича́юще, ва́съ ᲂу҆блажа́емъ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Славосло́вїе вели́кое, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и: Бл҃жє́нна ѿ канѡ́на ст҃ы́хъ, пѣ́снь г҃-ѧ и҆ ѕ҃-ѧ."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Честна̀ пред̾ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ є҆вре́ємъ, зача́ло ти҃і."
 },
 {
  "type": "TEXT",
  "value": "А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло а҃і."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ првⷣникъ:"
 }
]