ponomar-pwa/static/data/shared/menaion-daily/01-31/1.json

[
 {
  "type": "HEADER",
  "value": "І҆аннꙋа́рїа л҃а"
 },
 {
  "type": "HEADER",
  "value": "Ст҃ы́хъ чꙋдотво́рцєвъ и҆ безсре́бренникѡвъ, кѵ́ра и҆ и҆ і҆ѡа́нна:"
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры безсре́бренникѡвъ на ѕ҃. Гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Чꙋде́съ лꙋча́ми ѡ҆блиста́вше вселе́ннꙋю всю̀, кѵ́ре и҆ і҆ѡа́нне, пресвѣ́тлїи свѣти́льницы, нб҃сѝ ᲂу҆подо́бистесѧ благода́тїю, высо́кагѡ жи́тельства добродѣ́тельми, ѕвѣ́зды предлага́еми. Два́жды."
 },
 {
  "type": "TEXT",
  "value": "Дождерѡ́дныѧ ѻ҆́блаки преизѧ́ществꙋющѧ многотекꙋ́щими благода́тей чꙋдесы̀, мꙋ́чєницы гдⷭ҇ни, всю̀ зе́млю мы́сленнѡ напаѧ́ете, здра̑ваѧ пѣснопѣ̑нїѧ бг҃ꙋ приноси́ти понꙋжда̑юща."
 },
 {
  "type": "TEXT",
  "value": "И҆сцѣлѧ́ти стра̑сти дꙋшѝ и҆ тѣлесѐ, хи́трость ѿ бг҃а и҆́стиннѡ прїе́мше, мꙋ́чєницы гдⷭ҇ни, преесте́ственнѡ и҆сцѣлѧ́ете всѧ̑ не человѣ́ческими лѣчба́ми враче́бными, но бжⷭ҇твенными вдохнове́ньми."
 },
 {
  "type": "TEXT",
  "value": "Нбⷭ҇ныѧ си̑лы ѡ҆бходѧ́ще, свѣтосїѧ́ннїи свѣти́льницы, кѵ́ре и҆ і҆ѡа́нне, до́блїи страда́льцы, сꙋ́щихъ на землѝ и҆сцѣлѧ́ете тѣлеса̀, и҆ дꙋшє́вныѧ ꙗ҆́звы, хрⷭ҇та̀ ра́ди. Є҆го́же моли́те спастѝ на́съ."
 },
 {
  "type": "TEXT",
  "value": "Ꙗ҆́кѡ пото́кꙋ сла́вы послѣ́дꙋюще хрⷭ҇тꙋ̀, и҆сто́чницы безсме́ртїѧ ꙗ҆ви́стесѧ всѣ̑мъ, сла̑дкїѧ и҆сточа́ете стрꙋи̑ тѣлє́сныѧ и҆ дꙋшє́вныѧ, цѣлє́бнаѧ врачева̑нїѧ, и҆̀же крове́й стрꙋи̑ за хрⷭ҇та̀ и҆злїѧ́вше ᲂу҆се́рднѣйше."
 },
 {
  "type": "HEADER",
  "value": "Сла́ва, гла́съ и҃."
 },
 {
  "type": "TEXT",
  "value": "Дво́ица мꙋ́ченикѡвъ дне́сь возсїѧ̀ на́мъ, дꙋшє́вныѧ болѣ̑зни на́шѧ и҆сцѣлѧ́юща, кѵ́ръ и҆ і҆ѡа́ннъ чꙋдодѣ́йственнїи. ѻ҆́въ ᲂу҆́бѡ равноа́гг҃льное ѡ҆блобыза́въ, є҆ди́нственное житїѐ да́же до конца̀ пожи́въ, кро́вїю мꙋ́ченическою присвоѧ́етсѧ хрⷭ҇тꙋ̀: ѻ҆́въ въ во́инскихъ просїѧ́въ сосло́вїихъ, нбⷭ҇нымъ воинствосло́вїѧмъ градописꙋ́етсѧ. Тѣ́мже и҆ въ па̑мѧти и҆́хъ и҆сцѣлє́нїѧ подаю́тъ, вѣ́рою соверша́ющымъ, молѧ́щесѧ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Не терплю̀, ча́до, ви́дѧщи тѧ̀ на дре́вѣ ᲂу҆снꙋ́вша, бо́дрость всѣ̑мъ даю́щаго, ꙗ҆́кѡ да и҆̀же дре́вле престꙋпле́нїѧ плодо́мъ, сно́мъ поги́бельнымъ ᲂу҆снꙋ́вшымъ, бжⷭ҇твеннꙋю и҆ спаси́тельнꙋю бо́дрость пода́си, дв҃а глаго́лаше пла́чꙋщи, ю҆́же велича́емъ."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ в҃:"
 },
 {
  "type": "TEXT",
  "value": "Прїиди́те, вѣ́рныхъ сосло́вїе дне́сь, пѣ́сньми вѣнча́имъ кѵ́ра со і҆ѡа́нномъ, ра́таи благода́ти, и҆ да́тели просѧ́щихъ ѻ҆би́льнѣйшыѧ: многоѻбра́знѣ бо всѣ̑мъ ꙗ҆ви́шасѧ вра́чеве пресвѣ́тлїи. Тѣ́мже и҆ мо́лѧтъ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Гро́здъ всезрѣ́лый, чⷭ҇таѧ, є҆го́же невоздѣ́ланнѡ во ᲂу҆тро́бѣ плодоноси́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ повѣ́шена, рыда́ющи восклица́ла є҆сѝ, и҆ взыва́ла є҆сѝ: ча́до, сла́дость и҆ска́пай, є҆́юже ѿи́метсѧ пїѧ́нство всѧ́кое страсте́й, благодѣ́телю, менє̀ ра́ди тебѐ ро́ждшїѧ, твои́мъ благоꙋтро́бїемъ ᲂу҆молѧ́емь."
 },
 {
  "type": "HEADER",
  "value": "Тропа́рь, гла́съ є҃:"
 },
 {
  "type": "TEXT",
  "value": "Чꙋдеса̀ ст҃ы́хъ твои́хъ мч҃никъ, стѣ́нꙋ неѡбори́мꙋ на́мъ дарова́вый, хрⷭ҇тѐ бж҃е: тѣ́хъ моли́твами совѣ́ты ꙗ҆зы́кѡвъ разорѝ, цр҃ковь ст҃ꙋ́ю ᲂу҆крѣпѝ, ꙗ҆́кѡ є҆ди́нъ бл҃гъ и҆ чл҃вѣколю́бецъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха: и҆ ст҃ы́хъ на ѕ҃. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Вла́сть на ле́сть воспрїѧ́лъ є҆сѝ, кѵ́ре бл҃же́нне, сострада́льца болѣ́зней и҆мѣ́въ і҆ѡа́нна сла́внаго, тѣ́мъ сла́дости лꙋ́чшїѧ на нб҃сѣ́хъ наслажда́етесѧ."
 },
 {
  "type": "TEXT",
  "value": "Во́инствомъ дх҃о́внымъ препоѧ́савсѧ, кѵ́ре всече́стне, земно́е же во́инство ѡ҆ста́вивъ, і҆ѡа́нне всехва́льне, на де́мѡны взѧ́сте ѿ хрⷭ҇та̀ побѣди́тєльнаѧ."
 },
 {
  "type": "TEXT",
  "value": "Ѳе́клинѣ добродѣ́тели поревнова́вше жєны̀ бжⷭ҇твєнныѧ, въ двⷭ҇твеннꙋю равноа́гг҃льнꙋю ѻ҆де́ждꙋ бл҃гоче́стнѡ ѡ҆дѣ́ѧшасѧ: мꙋ́ченическимъ же жела́нїемъ къ подвигѡ́мъ совлеко́шасѧ."
 },
 {
  "type": "TEXT",
  "value": "Бг҃оро́диченъ: Безсѣ́меннѡ ѻ҆́ч҃ею во́лею, ѿ бжⷭ҇твеннагѡ дх҃а бж҃їѧгѡ зачала̀ є҆сѝ сн҃а, и҆ пло́тїю породила̀ є҆сѝ, и҆з̾ ѻ҆ц҃а̀ безмт҃рнѧ, на́съ ра́ди и҆зъ тебє̀ безѻ́ч҃а."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "Плотско́ю не́мощїю, ᲂу҆крѣплѧ́еми хрⷭ҇то́выми страстьмѝ, бл҃госла́внїи мꙋ́чєницы человѣкоꙋбі́йцꙋ низложи́ша."
 },
 {
  "type": "TEXT",
  "value": "Болѣ́зней пло́ти, и҆ нетлѣ́нныѧ сла́дости дх҃омъ хрⷭ҇тѡ́вы мꙋ́чєницы прїе́млюще, ра́довахꙋсѧ."
 },
 {
  "type": "TEXT",
  "value": "Оу҆крѣпи́сѧ немощно́е же́нскагѡ кресто́мъ є҆стества̀: тѣ́мже врага̀ ѕмі́ѧ мꙋ́жески побѣди́ша."
 },
 {
  "type": "TEXT",
  "value": "Бг҃оро́диченъ: Ты̀ є҆ди́на земны̑мъ па́че є҆стества̀ бл҃ги́хъ хода́таица, мт҃и бж҃їѧ, была̀ є҆сѝ: тѣ́мже тѝ, ра́дꙋйсѧ, взыва́емъ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "До́лꙋ влекꙋ́щыѧ сла̑сти попра́вше, къ мꙋче́нїѧ страда́льцы бж҃е́ственнѣй высотѣ̀ свѣ́тлѡ взѧ́стесѧ бл҃года́тїю, кѵ́ре и҆ і҆ѡа́нне, вселе́нныѧ свѣти́льницы. Тѣ́мже мо́лимсѧ, ѡ҆мраче́нїѧ грѣха̀ и҆ недꙋ́гѡвъ и҆зба́вите ны̀, сꙋ́щаго над̾ всѣ́ми бг҃а молѧ́ще. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "По бз҃ѣ въ тво́й, бцⷣе, прибѣ́гъ смире́нный, покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́къ и҆ трепе́щꙋ, моле́нїе сотворѝ, чⷭ҇таѧ, къ сн҃ꙋ твоемꙋ̀ ѿ си́хъ и҆зба́вити мѧ̀."
 },
 {
  "type": "TEXT",
  "value": "Крⷭ҇тобг҃оро́диченъ: И҆з̾ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Невече́рнїѧ бл҃года́ти свѣтозаре́нїе, врагѝ низложѝ любомра́чныѧ льстѝ, сеѧ̀ ратобо́рцы, свѣти́льники сїѧ́ющыѧ, кѵ́ра и҆ і҆ѡа́нна показа́вши."
 },
 {
  "type": "TEXT",
  "value": "Оу҆слади́шасѧ трⷪ҇ческимъ раче́нїемъ, и҆ ѿ неѧ̀ мꙋ́чєницы ѕѣлѡ̀ возлю́блени бы́вше, кѵ́ръ же и҆ і҆ѡа́ннъ, соедине́нїемъ лꙋ́чшимъ ѻ҆рга́ни бж҃їи показа́стесѧ."
 },
 {
  "type": "TEXT",
  "value": "Ꙗ҆́кѡ че́стенъ ва́шъ хра́мъ, ѿгони́теленъ лꙋка́выхъ дꙋхѡ́въ, ѿгонѧ́етъ недꙋ́ги всѣ́хъ болѧ́щихъ, непобѣди́мїи мꙋ́чєницы, бл҃года́ть и҆сцѣле́нїѧ подава́етъ."
 },
 {
  "type": "TEXT",
  "value": "Бг҃оро́диченъ: Неискꙋсобра́чнѡ родила̀ є҆сѝ, ѽ дв҃о, и҆ по ржⷭ҇твѣ̀ ꙗ҆ви́ласѧ є҆сѝ двⷭ҇твꙋющи па́ки: тѣ́мже немо́лчными гла́сы, ра́дꙋйсѧ, тебѣ̀, влⷣчце, вѣ́рою несомнѣ́нною взыва́емъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Тѧ̀, сп҃се, дво́ица мч҃никѡвъ возжелѣ̀, ты̀ ст҃ы́й во ст҃ы́хъ кѵ́ра и҆ і҆ѡа́нна досто́йнѡ поче́лъ є҆сѝ."
 },
 {
  "type": "TEXT",
  "value": "Твоѐ дѣ́ло, бл҃же, врага̀ потребле́нїе, ты̀ мꙋ́ченики бл҃гоче́стїѧ, кресто́мъ содѣ́лалъ є҆сѝ, и҆ сла́вою вѣнча́лъ є҆сѝ."
 },
 {
  "type": "TEXT",
  "value": "Тѧ̀ є҆ди́наго люби́ти небоѧ́зненнымъ мꙋдрова́нїемъ, пома́завшесѧ дѣ́вствомъ, і҆ѡа́ннъ и҆ кѵ́ръ, мꙋ́жество содѣ́лаша."
 },
 {
  "type": "TEXT",
  "value": "Бг҃оро́диченъ: Тѧ̀ ѻ҆рꙋ́жїе непобѣди́мое на врагѝ предлага́емъ: тѧ̀ тве́рдость и҆ наде́ждꙋ на́шегѡ спасе́нїѧ, бг҃оневѣ́сто, и҆́мамы."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Пожре́тисѧ мꙋ́чєницы за хрⷭ҇та̀ и҆зво́лиша, не́жели і҆́дѡлѡмъ пожре́ти: лꙋка́ваго же мꙋчи́телѧ привестѝ, за милосе́рдїе за ны̀ поже́ршагѡсѧ ꙗ҆́кѡ ѻ҆вча̀."
 },
 {
  "type": "TEXT",
  "value": "И҆знемого́ша и҆̀же неща́днѡ мꙋ́ченики стрꙋ́жꙋщїи, стрꙋ́жємымъ же стрѣ́лы ꙗ҆́звы младе́нєцъ быва́хꙋ: пресла́внѡ бо ᲂу҆твержда́хꙋсѧ бж҃е́ственнымъ дх҃омъ."
 },
 {
  "type": "TEXT",
  "value": "Гдⷭ҇а и҆ цр҃ѧ̀ всеѧ̀ тва́ри и҆сповѣ́давшаѧ вѣ́рою, дво́ица є҆диномꙋ́дреннаѧ и҆ є҆динострада́льнаѧ, беззакѡ́ннымъ да́же до кро́ве сопроти́вишасѧ."
 },
 {
  "type": "TEXT",
  "value": "Бг҃оро́диченъ: Ѽ чꙋ́до всѣ́хъ чꙋде́съ новѣ́йшее! Ꙗ҆́кѡ дв҃а во ᲂу҆тро́бѣ всѧ́чєскаѧ содержа́щаго, неискꙋсомꙋ́жнѡ заче́нши, не тѣсновмѣстѝ."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Ѿ бж҃е́ственныѧ благода́ти да́ръ чꙋде́съ прїе́мше, ст҃і́и, чꙋдодѣ́йствꙋете непреста́ннѡ, всѧ̑ на́шѧ стра̑сти рꙋкодѣ́йствомъ сѣкꙋ́ще неви́димымъ, кѵ́ре бг҃омꙋ́дре со і҆ѡа́нномъ сла́внымъ: вы́ бо бж҃е́ственнїи вра́чеве є҆стѐ."
 },
 {
  "type": "TEXT",
  "value": "І҆́косъ: Са́ми себѐ бг҃ꙋ возло́жше, ст҃і́и, всѧ́кое и҆скꙋше́нїе лю́тыхъ є҆гѡ̀ ра́ди претерпѣ́сте, ᲂу҆ме́рше ᲂу҆се́рднѡ, мꙋ́чєницы до́блїи, и҆ по кончи́нѣ всѣ̑мъ и҆сточа́ете бжⷭ҇твєннаѧ дарова̑нїѧ, сꙋ́щымъ въ разли́чныхъ недꙋ́зѣхъ, и҆ ѿ мно́гихъ и҆сцѣлѧ́юще ѕѡ́лъ, ѿ ни́хже є҆ди́нъ и҆ пе́рвый є҆́смь а҆́зъ ѻ҆каѧ́нный. Тѣ́ломъ бо и҆ дꙋше́ю ѿ ꙗ҆́звъ лю́тыхъ болѣ́знꙋю, и҆ вѣ́рою ва́мъ вопїю̀: и҆сцѣли́те мѧ̀, вы́ бо бжⷭ҇твеннїи вра́чеве є҆стѐ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: благослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "И҆звѣ́сивше ꙗ҆́кѡ въ преклоне́нїи мѣ́рила мꙋдрова́нїе, тѧгото́ю пречи́стыѧ сла́вы, страда́льцы возвыша́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Не невѣ́дꙋще сꙋпоста́тнагѡ ᲂу҆мышле́нїй, всѧ́къ ра́нъ ви́дъ и҆ ласка́нїй поплева́вше мч҃ницы, бл҃гослове́нъ є҆сѝ, вопїѧ́хꙋ, въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Терпѣ́нїемъ ра́нъ вѣнча́еми, і҆ѡа́ннъ же и҆ кѵ́ръ, защи̑тницы, трⷪ҇цѣ взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Бг҃оро́диченъ: Вы́шнѧгѡ ѡ҆сщ҃е́нное бжⷭ҇твенное селе́нїе, ра́дꙋйсѧ. Тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Ко ѿверже́нїю ᲂу҆́бѡ, нечести́вїи, є҆стество́мъ сꙋ́щаго бг҃а, призыва́хꙋ лю́тѣ: но непобѣ́днїи мꙋ́чєницы, тва́рїю ꙗ҆влѧ́хꙋ всѣ́хъ зижди́телѧ сꙋ́ща, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Неи́стовствꙋющїисѧ ле́стїю гнѣ́внѡ, земна̑ѧ мꙋ́дрствꙋющїи мꙋчи́телїе, и҆̀же житїѐ и҆мꙋ́щыѧ на небесѣ́хъ неразори́мо, сме́ртїю къ жи́зни ѿсыла́хꙋ, взыва́ющыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Мѡ́щи мч҃никѡвъ блиста̑нїѧ чꙋде́съ ꙗ҆ви́шасѧ вселе́ннѣй, хрⷭ҇тѐ, ѕлоде́мѡна мечта́ннꙋю ле́сть посрамлѧ́юще, вопїю́щымъ же бл҃голѣ́пнѡ и҆сцѣлє́нїѧ подава́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Без̾ мт҃ре и҆з̾ ѻ҆ц҃а̀ сло́во сы́й пе́рвѣе, без̾ ѻ҆ц҃а̀ бы́сть и҆з̾ тебє̀ второ́е, всечⷭ҇таѧ, вопло́щсѧ пе́рвѣе безпло́тный, за бл҃гоꙋтро́бїе восхотѣ́въ спастѝ пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Послꙋшли́ва до сме́рти дво́ица непобѣди́мыхъ мꙋ́ченикѡвъ ꙗ҆ви́сѧ, і҆ѡа́нна и҆ кѵ́ра, влⷣчнимъ бж҃е́ствєннымъ велѣ́нїємъ: тѣ́мже въ рꙋ́цѣ зижди́телѧ своѧ̑ дꙋ́шы преда́ша."
 },
 {
  "type": "TEXT",
  "value": "Свѣти̑ла сїѧ́ютъ два̀, чꙋде́съ сїѧ̑нїѧ, ѿ и҆сто́чника є҆ди́нагѡ свѣтоно́снагѡ, немощны̑мъ и҆сточа́юще нетлѣ́ннꙋю бл҃года́ть: ꙗ҆̀же досто́йнѡ велича́емъ."
 },
 {
  "type": "TEXT",
  "value": "Є҆ди́ницꙋ ᲂу҆́бѡ бжⷭ҇твеннагѡ сꙋщества̀, но ѵ҆поста́сьми трⷪ҇цꙋ, непобѣди́мыхъ мꙋ́чєникъ дво́ица мꙋ́жески бг҃осло́вѧше: воплоще́ннаго же сло́ва, є҆ди́наго хрⷭ҇та̀ во двою̀ є҆стєствꙋ̀."
 },
 {
  "type": "TEXT",
  "value": "Бг҃оро́диченъ: Пощади́ мѧ, хрⷭ҇тѐ, є҆гда̀ прїи́деши сꙋди́ти мі́ръ со сла́вою, разрѣшѝ мглꙋ̀ страсте́й мои́хъ, мольба́ми ро́ждшїѧ тѧ̀, и҆ честны́хъ мꙋ́чєникъ твои́хъ, ꙗ҆́кѡ бл҃гъ и҆ многомлⷭ҇тивъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "Чꙋдодѣ́йственнїи свѣти́льницы, кѵ́ре со і҆ѡа́нномъ, дꙋшє́вныѧ на́шѧ недꙋ́ги и҆ тѣлє́сныѧ и҆сцѣли́те, ѿ гдⷭ҇а прїе́мше благода́ть и҆сцѣле́нїй."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ѿ бг҃а мі́рови пода́нныхъ благи́хъ ты̀ вина̀ была̀ є҆сѝ, бцⷣе: но и҆ ны́нѣ молѝ ѡ҆ ѻ҆́бщемъ спасе́нїи благопремѣ́ннаго бг҃а."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ д҃:"
 },
 {
  "type": "TEXT",
  "value": "Достохва́льными пѣ́сньми, вѣ́рнїи, возвели́чимъ кѵ́ра и҆ і҆ѡа́нна, въ дꙋ́сѣ є҆динокрѡ́вныѧ, и҆ по пло́ти братомꙋ̑дрыѧ: съ ни́миже а҆ѳана́сїю до́блюю похвалѧ́юще, и҆ прозѧбе́нїе є҆ѧ̀, ѳеодо́тїю, є҆ѵдоѯі́ю и҆ ѳеокті́стꙋ, страстотє́рпицы и҆ приснодѣ̑вы, молѧ́щыѧ хрⷭ҇та̀ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "Не рыда́й менє̀, мт҃и, зрѧ́щи на дре́вѣ повѣ́шена твоего̀ сн҃а и҆ бг҃а, на вода́хъ повѣ́сившаго зе́млю неѡдержи́мѡ, и҆ всю̀ тва́рь созда́вшаго: и҆́бо воскреснꙋ̀ и҆ просла́влюсѧ, и҆ а҆́дѡва ца̑рствїѧ сокрꙋшꙋ̀ крѣ́постїю, и҆ погꙋблю̀ тогѡ̀ си́лꙋ, и҆ свѧ̑занныѧ и҆зба́влю ѿ ѕлодѣ́йства є҆гѡ̀, ꙗ҆́кѡ благоꙋтро́бенъ, и҆ ѻ҆ц҃ꙋ̀ моемꙋ̀ приведꙋ̀, ꙗ҆́кѡ чл҃вѣколю́бецъ."
 },
 {
  "type": "HEADER",
  "value": "На лїтꙋргі́и: Блажє́нна ѻ҆ктѡ́иха на д҃: и҆ ст҃ы́хъ ѿ канѡ́на пѣ́снь г҃-ѧ, на д҃."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ."
 },
 {
  "type": "TEXT",
  "value": "Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ."
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рн҃г."
 },
 {
  "type": "TEXT",
  "value": "А҆ллилꙋ́їа, гла́съ в҃: Сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ."
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло л҃д, ѿ полꙋ̀."
 },
 {
  "type": "TEXT",
  "value": "Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:"
 }
]