ponomar-pwa/static/data/shared/menaion-daily/05-09/1.json

[
 {
  "type": "HEADER",
  "value": "Ма́їа ѳ҃"
 },
 {
  "type": "HEADER",
  "value": "Ст҃а́гѡ прⷪ҇ро́ка и҆са́їи."
 },
 {
  "type": "HEADER",
  "value": "И҆ ст҃а́гѡ мꙋ́ченика хрїстофо́ра."
 },
 {
  "type": "HEADER",
  "value": "Стїхи̑ры прⷪ҇ро́ка, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе."
 },
 {
  "type": "TEXT",
  "value": "Оу҆́глемъ бж҃ества̀ воплоще́нномꙋ ѡ҆чище́нъ, прⷪ҇ро́чествꙋ ᲂу҆вѣ́рисѧ вели́кїй и҆ сла́вный и҆са́їа, и҆ бжⷭ҇твеннꙋю сла́вꙋ ви́дѣти сподо́бльсѧ, мно́гимъ добродѣ́тели бога́тствомъ, и҆ чистото́ю, проповѣ́дникъ предполага́етсѧ, и҆ провозвѣща́етъ бꙋ́дꙋщее спасе́нїе ꙗ҆зы́кѡмъ, и҆ бжⷭ҇твенное ꙗ҆вле́нїе."
 },
 {
  "type": "TEXT",
  "value": "Оу҆́мъ же и҆ мы́сль ѡ҆чи́щь, досточꙋ́дне и҆са́їе, дх҃а благоꙋго́денъ ѻ҆рга́нъ, дѣ́йствы сегѡ̀ и҆ дохнове́ньми ᲂу҆дарѧ́емь при́снѡ, и҆ бг҃омꙋ́дреннѡ сложе́нъ бы́лъ є҆сѝ, пресла́вне, на престо́лѣ сѣдѧ́щаго превознесе́ннѣ зрѧ̀, и҆ бжⷭ҇твєннымъ наꙋча́ѧсѧ."
 },
 {
  "type": "TEXT",
  "value": "Є҆ди́но гдⷭ҇ьство трїѷпоста́снагѡ бжⷭ҇тва̀, трист҃ы́мъ ра́зꙋмомъ, непреста́ннѡ сла́вѧщыѧ серафі́мы бжⷭ҇твєнныѧ, блаже́нне, ви́дѣвъ и҆ наꙋчи́всѧ, прⷪ҇ро́честѣй ᲂу҆вѣ́рилсѧ є҆сѝ бл҃года́ти, чꙋ́дне: тѣ́мже твою̀ всесвѧще́ннꙋю соверша́юще па́мѧть, хрⷭ҇тꙋ́ тѧ приво́димъ, моли́твенника си́льнѣйшаго."
 },
 {
  "type": "HEADER",
  "value": "И҆́ны стїхи̑ры мч҃ника, гла́съ то́йже."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Хрїстофо́ре пресла́вне, хрⷭ҇тоимени́тый сто́лпе, честно́е ᲂу҆краше́нїе благода́ти, ты̀ си́льныхъ держа́вꙋ низве́ргъ мꙋчи́телей посрами́лъ є҆сѝ, и҆ хрⷭ҇та̀ ꙗ҆́кѡ и҆́стинна цр҃ѧ̀, и҆ зижди́телѧ твоего̀ проповѣ́далъ є҆сѝ: є҆гѡ́же бжⷭ҇твенною си́лою, съ небесѐ вѣне́цъ бжⷭ҇твенный прїѧ́лъ є҆сѝ, и҆ пребыва́ющꙋю сла́вꙋ."
 },
 {
  "type": "TEXT",
  "value": "Непристꙋ́пнымъ бжⷭ҇тво́мъ, неизрече́нною бла́гостїю, и҆ тве́рдою свѣ́тлостїю просвѣща́емь, мра́къ і҆́дѡльскїй разори́въ, беззако́нныхъ шата̑нїѧ низложи́лъ є҆сѝ свѣ́тлѡ: и҆ ѻ҆гне́мъ и҆ ра́нами ѡ҆держи́мь, сꙋпроти́внаго стрѣльца̀ на сꙋди́щи низло́жь, побѣдоно́сецъ и҆ побѣди́тель ꙗ҆ви́лсѧ є҆сѝ."
 },
 {
  "type": "TEXT",
  "value": "Си̑лы вы́шнихъ во́инствъ тебѣ̀ ᲂу҆диви́шасѧ, и҆ мꙋ́ченичестїи чи́ни совозвесели́шасѧ, пра́ведныхъ собо́ри согла́снѡ возопи́ша, и҆ рꙋко́ю бг҃онача́льною бг҃ъ свы́ше вѣнча̀. Тѣ́мже зове́мъ: хрїстофо́ра моли́твами, ꙗ҆́кѡ ще́дръ, спасѝ всѧ̑ творѧ́щыѧ сегѡ̀ бжⷭ҇твенное торжество̀."
 },
 {
  "type": "HEADER",
  "value": "Сла́ва, и҆ ны́нѣ, пра́здника. Тропа́рь, гла́съ в҃:"
 },
 {
  "type": "TEXT",
  "value": "Прⷪ҇ро́ка твоегѡ̀ и҆са́їи па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ, спасѝ дꙋ́шы на́шѧ."
 },
 {
  "type": "HEADER",
  "value": "Дрꙋгі́й тропа́рь мч҃ника, гла́съ д҃:"
 },
 {
  "type": "TEXT",
  "value": "Ѻ҆де́ждами ѿ крове́й ᲂу҆краша́ѧйсѧ, гдⷭ҇еви предстои́ши цр҃ю̀ си́лъ, хрїстофо́ре приснопа́мѧтне, ѿѻнꙋ́дꙋже со безпло́тными и҆ мꙋ́чєники пое́ши трист҃ы́мъ и҆ стра́шнымъ сладкопѣ́нїемъ: тѣ́мже моли́твами твои́ми спаса́й ста́до твоѐ."
 },
 {
  "type": "HEADER",
  "value": "Канѡ́нъ ст҃ы́хъ, прⷪ҇ро́ка, и҆ мч҃ника. Творе́нїе ѳеофа́ново. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колєсни́цы фараѡ́нѡвы и҆ си́лꙋ."
 },
 {
  "type": "TEXT",
  "value": "Просвѣти́ мѧ, гдⷭ҇и бж҃е мо́й, и҆ наста́ви свѣ́тлѡ бжⷭ҇твеннагѡ прⷪ҇ро́ка твоегѡ̀ сла́вное и҆ честно́е восхвали́ти торжество̀."
 },
 {
  "type": "TEXT",
  "value": "Бг҃овѣща́ннаѧ трꙋба̀ и҆са́їина, ѡ҆гласи́вшаѧ зе́млю, церкѡ́вныѧ пита́тели созва̀, пра́здновати па́мѧть є҆гѡ̀."
 },
 {
  "type": "TEXT",
  "value": "Стра̑сти тѣлє́сныѧ, бг҃оно́се, помыслѡ́мъ дꙋшє́внымъ тве́рдѡ покори́въ, сла́вꙋ сподо́бисѧ ви́дѣти вседержи́телѧ."
 },
 {
  "type": "TEXT",
  "value": "Мꙋ́ченика: Прїиди́те, всѝ дне́сь хрⷭ҇тоно́сцы, хрїстофо́ра па́мѧть, и҆́стины свидѣ́телѧ бг҃омꙋ́драгѡ, благоче́стнѡ воспои́мъ."
 },
 {
  "type": "TEXT",
  "value": "Мꙋ́жески подвиза́всѧ на ле́сть, мꙋчи́телей прещє́нїѧ, мч҃ниче страстоно́сче, крѣ́постїю хрⷭ҇то́вою ᲂу҆твержда́емь, попра́лъ є҆сѝ."
 },
 {
  "type": "TEXT",
  "value": "Бг҃оро́диченъ: Же́злъ прозрѧ́ тѧ, бцⷣе, цвѣ́тъ же па́ки и҆зъ тебє̀ воплоще́нное сло́во, провозвѣстѝ сла́вный и҆са́їа, пречⷭ҇таѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ."
 },
 {
  "type": "TEXT",
  "value": "Всю̀ зарю̀ дꙋхо́внꙋю воспрїе́мь, провозгласи́лъ є҆сѝ, сла́вне, сло́ва смотре́нїѧ неизрече́нное та́инство."
 },
 {
  "type": "TEXT",
  "value": "Взѧ́лсѧ є҆сѝ къ высотѣ̀ нбⷭ҇нѣй, и҆ благоче́стїѧ свѣ́тлость показа́лъ є҆сѝ, і҆́дѡльскагѡ сꙋ́етїѧ ты̀ и҆з̾ѡбличи́въ не́мощь."
 },
 {
  "type": "TEXT",
  "value": "Ка́менѧ въ сїѡ́нѣ пречестна́го, краеꙋго́льнаго, вселе́ннꙋю содержа́щаго, влⷣкꙋ хрⷭ҇та̀, и҆са́їа прⷪ҇ро́чествꙋетъ, полага́ема."
 },
 {
  "type": "TEXT",
  "value": "Мꙋ́ченика: Ѻ҆рꙋ́жїемъ крⷭ҇та̀ ѡ҆гражда́емь, мч҃ниче хрїстофо́ре, ра̑ны претерпѣ́лъ є҆сѝ, присножела́емагѡ наслажда́ешисѧ ра́дꙋѧсѧ."
 },
 {
  "type": "TEXT",
  "value": "Пло́ть ᲂу҆́бѡ ра́нами ссѣца́шесѧ, бг҃олюби́ваѧ же твоѧ̀ дꙋша̀ любо́вїю пита́шесѧ, поꙋча́ющисѧ црⷭ҇твїѧ, хрїстофо́ре, наслажде́нїю."
 },
 {
  "type": "TEXT",
  "value": "Бг҃оро́диченъ: Рече́нїе вои́стиннꙋ и҆спо́лнисѧ и҆са́їино: дв҃а бо родѝ воплоще́нна жизнода́вца, и҆ сп҃са дꙋ́шъ на́шихъ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Ѿ страсте́й тѣле́сныхъ преѡчи́стивъ дꙋ́шꙋ, сла́вꙋ ви́дѣлъ є҆сѝ надъ всѣ́ми сꙋ́щагѡ бг҃а, прⷪ҇ро́че пребога́те: просїѧ́въ прⷪ҇ро́чества свѣтоно́сными зарѧ́ми, мла́до, ре́клъ є҆сѝ, ѻ҆троча̀ роди́тсѧ зижди́тель, спаса́ющїй на́съ ѿ тлѝ моли́твами твои́ми."
 },
 {
  "type": "HEADER",
  "value": "Сла́ва, сѣда́ленъ мч҃ника, гла́съ то́йже."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь:"
 },
 {
  "type": "TEXT",
  "value": "По́двигъ, сла́вне, мꙋче́нїѧ сконча́въ, прїѧ́лъ є҆сѝ вѣне́цъ побѣ́ды ѿ бг҃а, хрїстофо́ре блаже́нне: є҆го́же ᲂу҆молѝ, ѿ бѣ́дъ и҆зба́вити на́съ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Твоегѡ̀ на землѝ ꙗ҆вле́нїѧ, хрⷭ҇тѐ бж҃е, проповѣ́дꙋѧ прⷪ҇ро́къ прише́ствїе, съ весе́лїемъ вопїѧ́ше: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "На добродѣ́тельный возше́дъ ве́рхъ, чи́стѡ жела́емомꙋ бесѣ́довалъ є҆сѝ, и҆ ра́достнѡ пѣ́лъ є҆сѝ: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Прⷪ҇ро́честѣй и҆са́їа благода́ти ввѣ́ренъ бы́сть, и҆ бж҃їе жили́ще показа́сѧ, и҆ небе́сныхъ си́лъ сла́вы нетлѣ́нныѧ сподо́бисѧ."
 },
 {
  "type": "TEXT",
  "value": "Ѡ҆бнови́тисѧ ѻ҆стровѡ́мъ ре́клъ є҆сѝ при́точнѡ, ꙗ҆зы́чєскимъ цр҃квамъ, бжⷭ҇твеннагѡ дх҃а и҆спо́лненъ, сла́вне, таи́нникъ неизрече́нныхъ бы́въ."
 },
 {
  "type": "TEXT",
  "value": "Мꙋ́ченика: Нбⷭ҇ное наслѣ́дїе, мꙋ́чениче, воспрїѧ́лъ є҆сѝ, на землѝ по хрⷭ҇тѣ̀ подвиза́всѧ: і҆́дѡльскꙋю же погаси́лъ є҆сѝ пре́лесть мꙋ́жески лю́тагѡ де́мѡна."
 },
 {
  "type": "TEXT",
  "value": "Же́нское тебѣ̀ и҆скꙋше́нїе, мꙋ́чениче, приноша́ше, ꙗ҆́коже а҆да́мꙋ пра́ѻц҃ꙋ ѕмі́й пре́жде, но побѣжде́нъ бы́въ стыдѧ́шесѧ, ᲂу҆давлє́нїѧ на тѧ̀ простира́ѧ."
 },
 {
  "type": "TEXT",
  "value": "Бг҃оро́диченъ: Ѻ҆троча̀ на́мъ даде́сѧ ѿ прⷪ҇ро́чицы, рожде́нное безъ болѣ́зни бг҃ома́тере: є҆гѡ́же нача́льство на ра́мѣ бжⷭ҇твенный и҆са́їа проповѣ́да."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣще́нїе твоѐ, гдⷭ҇и, низпослѝ на́мъ и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй."
 },
 {
  "type": "TEXT",
  "value": "Сокрове́нное свы́ше та́инство зрѧ̀, и҆ дре́внїй совѣ́тъ вы́шнѧгѡ, є҆́же ѡ҆ на́съ смотре́нїе, бг҃оглаго́ливе, возвѣсти́лъ є҆сѝ."
 },
 {
  "type": "TEXT",
  "value": "Страсте́й твои́хъ, гдⷭ҇и, приснотекꙋ́щїй и҆сто́чникъ, страсте́й на́съ ѿмыва́етъ: прише́лъ бо є҆сѝ, сп҃се, ꙗ҆́коже и҆са́їа прⷪ҇ро́къ наꙋчѝ."
 },
 {
  "type": "TEXT",
  "value": "Бг҃очести́вый и҆са́їа, ѿ бг҃а и҆зше́дъ ѻ҆ц҃а̀, сло́ва и҆ ст҃а́го дх҃а, въ є҆стествѣ̀ є҆ди́номъ, трⷪ҇цꙋ є҆ди́нꙋ, невѣ́дꙋщымъ проповѣ́да."
 },
 {
  "type": "TEXT",
  "value": "Мꙋ́ченика: Просвѣще́нїемъ бл҃года́ти ᲂу҆лови́лъ є҆сѝ лю́ди, и҆ неи́стовство безбо́жныхъ мꙋчи́телей разори́лъ є҆сѝ ꙗ҆́вѣ, на землѝ, мꙋ́дре, ѡ҆дѣ́ѧнъ свы́ше дѣ́йствомъ."
 },
 {
  "type": "TEXT",
  "value": "Нбⷭ҇ное и҆зво́ливъ наслажде́нїе ꙗ҆́вѣ, па́че земна́гѡ, мꙋ́дре хрїстофо́ре, претерпѣ́лъ є҆сѝ крѣ́пкѡ мꙋче́нїѧ болѣ́зни, крⷭ҇то́мъ ᲂу҆крѣплѧ́емь."
 },
 {
  "type": "TEXT",
  "value": "Бг҃оро́диченъ: На ѻ҆́блацѣ, гдⷭ҇и, сѣдѧ́щаго чи́стѣ, всепѣ́тыѧ мт҃ре, и҆са́їа ви́дѣ тѧ̀ ꙗ҆́снѡ, є҆гѵ́пєтскїѧ низлага́юща і҆́дѡлы."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ."
 },
 {
  "type": "TEXT",
  "value": "Дх҃омъ воѡбраже́нъ и҆са́їа, ᲂу҆зрѣ̀ на престо́лѣ гдⷭ҇ьства сла́вꙋ блеща́щꙋсѧ, пѣсносло́вимꙋю трист҃ы́мъ гла́сомъ, тричи́сленнꙋю."
 },
 {
  "type": "TEXT",
  "value": "Ко ᲂу҆стѡ́мъ боѧ́щымсѧ твои̑мъ прино́ситъ ᲂу҆́гль, и҆са́їе, серафі́мъ, клеща́ми взе́мъ, и҆ бг҃ꙋ прⷪ҇ро́ка соверша́етъ, та́йнѡ ѡ҆свѧще́нна."
 },
 {
  "type": "TEXT",
  "value": "Сбытїѐ и҆здале́ча зрѧ̀ прорече́нїй и҆са́їа, ᲂу҆́мнѡ со а҆́гг҃лы ра́дꙋетсѧ, и҆ и҆гра́ѧ сла́витъ, и҆спо́лнившаго є҆гѡ̀ проповѣ̑данїѧ."
 },
 {
  "type": "TEXT",
  "value": "Мꙋ́ченика: Не къ кро́ви, ни къ пло́ти бра́нь взе́мъ до́блїй, но нача̑ла побѣжда́ше и҆ де́мѡны, неви́димою си́лою сн҃а бж҃їѧ ᲂу҆крѣплѧ́емь."
 },
 {
  "type": "TEXT",
  "value": "Возлюби́въ благолѣ́пнѡ жела́нїй кра́й, страстоте́рпче, не чꙋ́лъ є҆сѝ болѣ́зней стрꙋ́жемь, мы́сль твою̀ возвыша́ѧ всегда̀ ко влⷣцѣ твоемꙋ̀."
 },
 {
  "type": "TEXT",
  "value": "Бг҃оро́диченъ: Дв҃ꙋ во ᲂу҆тро́бѣ заче́ншꙋю зрѧ̀, и҆ ро́ждшꙋю, и҆са́їа проро́къ сла́вный, воплоще́нна сло́ва сн҃а бж҃їѧ, ны́нѣ ра́дꙋетсѧ."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Въ моли́твахъ:"
 },
 {
  "type": "TEXT",
  "value": "Прⷪ҇ро́чества дарова́нїе прїе́мъ, прⷪ҇рокомꙋ́чениче, и҆са́їе бг҃опроповѣ́дниче, всѣ̑мъ и҆з̾ѧсни́лъ є҆сѝ вочл҃вѣ́ченїе гдⷭ҇не, возгласи́въ велегла́снѡ концє́мъ, сѐ дв҃а во чре́вѣ прїи́метъ."
 },
 {
  "type": "TEXT",
  "value": "І҆́косъ: Всѝ сни́демсѧ, и҆̀же во страна́хъ, воспѣ́ти досто́йнѡ и҆са́їю, вѣ́рнїи, во прⷪ҇ро́цѣхъ ди́внаго: то́й бо коне́цъ прⷪ҇ро́чества воспрїи́мъ, мі́ръ просвѣща́етъ, всѣ̑мъ вкꙋ́пѣ та́йнꙋ бжⷭ҇твеннагѡ соедине́нїѧ провозвѣсти́въ, съ тѣ́ми всѣ́ми возопи́въ: съ на́ми бг҃ъ неви́димый, сѐ дв҃а во чре́вѣ прїи́метъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Спаси́тельное на́мъ приходѧ́щее зрѧ̀ и҆са́їа и҆збавле́нїе, прїи́детъ, возопѝ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Прⷪ҇ро́чества бл҃года́тїю, и҆ мꙋче́нїѧ вѣнце́мъ, и҆са́їа ᲂу҆вѧзе́сѧ, крѣ́пость моѧ̀ и҆ пѣ́нїе. Моѐ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Благоче́стїѧ предѣ́лы, и҆ житїѧ̀ зако́ны, бг҃оно́снымъ ꙗ҆зы́комъ положи́лъ є҆сѝ, прⷪ҇ро́че бг҃одꙋхнове́нне: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Мꙋ́ченика: Мꙋче́нїѧ пꙋ́ть терпѣ́нїемъ текі́й хрїстофо́ръ, въ нбⷭ҇ныхъ. Живе́тъ се́лѣхъ, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Нече́стїѧ пла́мень, благоче́стїѧ росо́ю хрїстофо́ръ ᲂу҆вѧдѝ, въ пѣ́снехъ зовы́й: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Дѣ́вства ви́дѣвъ, пачеесте́ственное ржⷭ҇тво̀, и҆ чистоты̀ свѣ́тлость, и҆са́їа возопѝ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Въ вавѷлѡ́нѣ ѻ҆́троцы бжⷭ҇твенною распала́еми ре́вностїю, мꙋчи́телѧ и҆ пла́мене преще́нїе мꙋ́жески попра́ша, и҆ посредѣ̀ ѻ҆гнѧ̀ вве́ржени, ѡ҆роша́еми поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Весе́лїѧ ри́зою женихо́вою ѡ҆бложе́нъ ѻ҆бра́знѡ, ра́дꙋетсѧ ны́нѣ ве́селѡ и҆са́їа сла́вный, и҆ бжⷭ҇твенныѧ пи́щи наслажда́ѧсѧ, со а҆́гг҃лы вѣща́етъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃а пе́рвѣе ѿлꙋчи́вшїисѧ, де́мѡнскими прельще́ннїи словесы̀, пра́веднѡ ѿстꙋпи́ша землѝ чи́стыѧ ѻ҆каѧ́ннїи, прⷪ҇ро́ка гласовѡ́мъ послѣ́дованнѡ, и҆ пѣ́ти не мо́гꙋтъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Пре́лесть ѡ҆ста́вивше, къ бжⷭ҇твенномꙋ притеко́ша сїѧ́нїю, мно́жєства ꙗ҆зы̑къ, и҆ хрⷭ҇то́вѣ цр҃кви ѡ҆брꙋчи́шасѧ, ꙗ҆́коже дре́вле речѐ и҆са́їа, и҆ пѣ́сньми ны́нѣ пою́тъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Мꙋ́ченика: І҆дѡлонеи́стовства, на́глѡ приража́ема волна̀, мꙋ́ченическими ѿсѣка́шесѧ тве́рдыми сꙋпротивоѻбра́зными противлє́нїи, за хрⷭ҇та̀ прїе́млющихъ бѣды̑, и҆ вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Въ ца́рскꙋю багрѧни́цꙋ, ѡ҆багре́ннꙋю ѿ крове́й твои́хъ, мꙋ́чениче, краснѡ̀ ѡ҆дѣ́ѧнъ ны́нѣ, хрїстофо́ре непобѣди́ме, со а҆́гг҃льскими ли̑ки ликꙋ́еши, и҆ пое́ши содѣ́телю твоемꙋ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Дв҃а бг҃ома́ти ѻ҆трокови́ца, ꙗ҆́кѡ млⷣнца держи́тъ сло́ва, всѣ̑мъ даю́щаго жи́знь, и҆ всѧ̑ сотво́ршаго, ꙗ҆́коже речѐ пре́жде и҆са́їа, и҆ ра́дꙋѧсѧ взыва́ше: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. Тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Прⷭ҇то́лꙋ предста́лъ є҆сѝ свѣ́тлѡ, бг҃опрїѧ́тне, влⷣки си́лъ: сла́вы же тогѡ̀ наслади́всѧ, твоегѡ̀ благоче́стїѧ собира́ѧ плоды̀, всеблаже́нне сла́вне. Тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Прїиди́те, ны́нѣ, свѣ́та прⷪ҇ро́ческагѡ дарова́нїѧ жела́ющїи, прїѧ́ти кни́гꙋ ᲂу҆се́рднѡ и҆са́їи, бг҃оразꙋ́мїѧ и҆спо́лненꙋ: тве́рдымъ жела́нїемъ внима́емъ, да бжⷭ҇твенныѧ зарѝ и҆спо́лнимсѧ."
 },
 {
  "type": "TEXT",
  "value": "Дх҃омъ свѣ́тлости ꙗ҆́вѣ ѡ҆сїѧ́емь, и҆са́їе бг҃оно́се, всѧ̑ вѣ́рою творѧ́щыѧ честнꙋ́ю твою̀ и҆ свѣтоно́снꙋю па́мѧть, молѝ спасе́нїе полꙋчи́ти: да тѧ̀ всѝ велича́емъ."
 },
 {
  "type": "TEXT",
  "value": "Мꙋ́ченика: Вѣне́цъ свѣ́телъ, ꙗ҆́кѡ побѣди́тель, прїе́мъ, хрїстофо́ре всесла́вне, сца́рствꙋеши влⷣцѣ, тѧ̀ въ мꙋ́кахъ ᲂу҆крѣ́пльшемꙋ, и҆ рꙋ́кꙋ живоно́снꙋ пода́вшемꙋ, ѡ҆долѣ́ти ѕлонача́льника."
 },
 {
  "type": "TEXT",
  "value": "Кро́вїю мꙋ́ченическою свѣ́тлѡ ѡ҆мы́всѧ, ѡ҆зари́лсѧ є҆сѝ, пречꙋ́дне, ны́нѣ же въ дѣ́вственнѣмъ черто́зѣ, съ женихо́мъ ра́дꙋѧсѧ вше́лъ є҆сѝ: ми́ра же мі́рꙋ просѧ̀, не преста́й, мꙋ́чениче сла́вне."
 },
 {
  "type": "TEXT",
  "value": "Бг҃оро́диченъ: Оу҆́глѧ мы́сленнаго, чⷭ҇таѧ бг҃оневѣ́сто, и҆са́їа є҆го́же ви́дѣ, но́сиши на рꙋкꙋ̀, бг҃омт҃и, зра́кꙋ на́шемꙋ соединѧ́ема, и҆ мі́рꙋ спасе́нїе свѣ́тлѡ подаю́ща: тѣ́мъ тѧ̀ всѝ велича́емъ."
 }
]