ponomar-pwa/static/data/shared/menaion-daily/05-15/1.json

[
 {
  "type": "HEADER",
  "value": "Ма́їа є҃і"
 },
 {
  "type": "HEADER",
  "value": "Прпⷣбнагѡ ѻ҆ц҃а̀ на́шегѡ пахѡ́мїа вели́кагѡ."
 },
 {
  "type": "HEADER",
  "value": "Стїхи̑ры пра́здника г҃: и҆ преподо́бнагѡ, г҃. Гла́съ ѕ҃."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "Всѐ твоѐ жела́нїе къ бг҃ꙋ просте́ръ, мїрскꙋ́ю красотꙋ̀, ꙗ҆́кѡ не пребыва́ющꙋю, ѡ҆ста́вилъ є҆сѝ, и҆ хрⷭ҇тꙋ̀, всемꙋ́дре, себѐ возложи́лъ є҆сѝ, всеѻбра́знѡ воздержа́нїемъ ѡ҆чища́ѧсѧ, и҆ терпѣли́вое показꙋ́ѧ противле́нїе, пахѡ́мїе, ко стра̑стнымъ разгорѣ́нїємъ, и҆ со́вѣсти мꙋче́нїе, бг҃омꙋ́дре, под̾е́мый, и҆ ꙗ҆́кѡ побѣдоно́сецъ прїѧ́лъ є҆сѝ вѣне́цъ неꙋвѧда́емый."
 },
 {
  "type": "TEXT",
  "value": "Тебѣ̀ ны́нѣ прибы́сть ѿ дѣ́ѧтельнагѡ видѣ́нїѧ, ѿложе́нїемъ тѣ́ла, дебе́лагѡ покрыва́ла, и҆ пристра́стїе плотско́е ѿве́ргшꙋ, бг҃ꙋ сраствори́тисѧ, ѿѻнꙋ́дными ѡ҆блиста́емь зарѧ́ми и҆ благода́тьми, и҆ бг҃одѣ́тельными сїѧ̑нїи, и҆ манове́нїемъ ѡ҆божа́емь, и҆ и҆́же къ лꙋ́чшемꙋ восхожде́нїю. И҆ ны́нѣ, бг҃оно́се, блаже́нъ бы́въ, хрⷭ҇та̀ со дерзнове́нїемъ молѝ ѡ҆ дꙋша́хъ на́шихъ."
 },
 {
  "type": "TEXT",
  "value": "Всѐ чꙋ́вство превозше́дъ, влⷣцѣ чи́стѡ бесѣ́довалъ є҆сѝ, пло́ти бы́въ внѣ̀, всече́стне, по́мысломъ лꙋ́чшимъ стра̑сти ᲂу҆держа́въ, и҆ дє́мѡнскаѧ шата̑нїѧ разори́въ, попра́лъ є҆сѝ, пахѡ́мїе. И҆ ны́нѣ живы́й въ нбⷭ҇ныхъ се́лѣхъ, всѧ̑ чтꙋ́щыѧ па́мѧть твою̀ помина́й, хрⷭ҇тꙋ̀ со дерзнове́нїемъ молѧ́сѧ ѡ҆ дꙋша́хъ на́шихъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Є҆́же по ѻ҆́бразꙋ соблю́дъ невреди́мѡ, ᲂу҆́мъ влⷣкꙋ на стра̑сти па̑гꙋбныѧ по́стнически поста́вивъ, во є҆́же по подо́бїю ꙗ҆́кѡ мо́щнѡ возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. Тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее: и҆ ны́нѣ на нб҃сѣ́хъ зерца́лѡмъ разрѣ́шшымсѧ, ѻ҆́ч҃е на́шъ пахѡ́мїе, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ вѣ́рою и҆ любо́вїю чтꙋ́щихъ тѧ̀."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "На стїхо́внѣ пра́здника, Сла́ва, гла́съ ѕ҃."
 },
 {
  "type": "TEXT",
  "value": "Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. Дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, пахѡ́мїе ѻ҆́ч҃е на́шъ, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Канѡ́нъ пра́здника со і҆рмосо́мъ на ѕ҃: и҆ ст҃а́гѡ на ѕ҃, гла́съ в҃, є҆гѡ́же краегране́сїе:"
 },
 {
  "type": "TEXT",
  "value": "Пахѡ́мїю похвалꙋ̀ любе́знѡ плетꙋ̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь сла́внѡ бо просла́висѧ."
 },
 {
  "type": "TEXT",
  "value": "Надѣ́ѧвсѧ бла́гости твои́хъ нра́вѡвъ, ᲂу҆се́рднѡ тебѣ̀ пѣ́снь ра́бски возглаша́ю: но мо́й, бг҃огла́се, ᲂу҆́мъ свѣтолꙋ́чными сїѧ́ньми, твои́ми мольба́ми просвѣтѝ, пахѡ́мїе преизрѧ́дне."
 },
 {
  "type": "TEXT",
  "value": "Безстра́стїѧ жела́нїемъ те́плымъ, ѻ҆́ч҃е, ѡ҆держи́мь, вє́щныѧ ᲂу҆вѧди́лъ є҆сѝ страсте́й во́лны, пахѡ́мїе, и҆ дости́глъ є҆сѝ, любо́вїю вперѧ́емь, сегѡ̀ текꙋ́щагѡ сїѧ́нїѧ, пребл҃же́нне, бжⷭ҇тва̀."
 },
 {
  "type": "TEXT",
  "value": "Ра́дости и҆спо́лнилъ є҆сѝ, мꙋ́дре, нбⷭ҇ныѧ чи́ны, творца̀ позна́въ всеѧ̀ тва́ри: во храни́лищи бо навы́клъ є҆сѝ и҆мꙋ́щагѡ неизрече́ннꙋю си́лꙋ, сегѡ̀, бг҃оно́се, вѣ́рнѡ ᲂу҆че́ньми наказꙋ́емь."
 },
 {
  "type": "TEXT",
  "value": "Бг҃оро́диченъ: Превы́шши была̀ є҆сѝ, чⷭ҇таѧ, всеѧ̀ неви́димыѧ и҆ ви́димыѧ, приснодв҃о, тва́ри, зижди́телѧ бо родила̀ є҆сѝ, ꙗ҆́коже благоизво́ли воплоти́тисѧ во ᲂу҆тро́бѣ твое́й: є҆го́же со дерзнове́нїемъ молѝ, спастѝ дꙋ́шы на́шѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Ꙗ҆́коже є҆ле́нь прите́клъ є҆сѝ къ водѣ̀, преподо́бне, и҆ ѡ҆кропле́нъ бы́въ креще́нїемъ ст҃ы́мъ, ро́сꙋ прїѧ́лъ є҆сѝ, є҆́юже ᲂу҆слади́сѧ се́рдце твоѐ."
 },
 {
  "type": "TEXT",
  "value": "Не терпѧ́ще тве́рдости зрѣ́ти твоеѧ̀, преподо́бне, де́мѡнстїи полцы̀, бг҃оно́се, воздержа́тельныѧ, и҆скꙋшє́нїѧ тебѣ̀ разли̑чнаѧ простро́ша."
 },
 {
  "type": "TEXT",
  "value": "Ꙗ҆́кѡ свѧще́нное стѧжа́въ житїѐ, бы́лъ є҆сѝ по́стникѡмъ, пахѡ́мїе, законополо́жникъ, и҆ пе́рвый во́ждь, хрⷭ҇тꙋ̀ сїѧ̑ приве́лъ є҆сѝ, сла́вне, въ не́мже ᲂу҆тверди́сѧ твоѐ се́рдце."
 },
 {
  "type": "TEXT",
  "value": "Бг҃оро́диченъ: Чи́ни ᲂу҆диви́шасѧ а҆́гг҃льстїи, пречⷭ҇таѧ, и҆ человѣ́чєскаѧ ᲂу҆страши́шасѧ сердца̀: ѡ҆ ржⷭ҇твѣ̀ твое́мъ: тѣ́мже тѧ̀, бцⷣе, вѣ́рою почита́емъ."
 },
 {
  "type": "HEADER",
  "value": "Конда́къ пра́здника и҆ і҆́косъ."
 },
 {
  "type": "HEADER",
  "value": "Та́же сѣда́ленъ, гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Сле́зъ тꙋ́чами твою̀ дꙋ́шꙋ напои́въ бога́тнѡ, ѻ҆́ч҃е мꙋ́дре, многопло́дный добродѣ́телей твои́хъ пожа́лъ є҆сѝ кла́съ: и҆ па́стырь ѻ҆вца́мъ преподѡ́бнымъ бы́въ, на ѕла́цѣ сїѧ̑ воздержа́нїѧ воспита́лъ є҆сѝ. Тѣ́мже разрѣ́шсѧ ѿ житїѧ̀ сла́внѡ, ѻ҆те́чєскимъ, пахѡ́мїе, ликѡ́мъ сочета́лсѧ є҆сѝ. Сегѡ̀ ра́ди вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ, и҆ ѡ҆скверне́нное моѐ се́рдце ѡ҆мы́й, потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ, да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й."
 },
 {
  "type": "TEXT",
  "value": "Крⷭ҇тобг҃оро́диченъ: А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Ꙗ҆́кѡ и҆зрѧ́денъ прави́тель бы́лъ є҆сѝ, пахѡ́мїе, мона́шескихъ собо́рѡвъ: видѣ́нїемъ бо, премꙋ́дре ѻ҆́ч҃е, и҆звѣсти́лсѧ є҆сѝ, добродѣ́тели воздви́гнꙋти попече́нїе."
 },
 {
  "type": "TEXT",
  "value": "Дх҃а ст҃а́гѡ зарю̀ прїе́мъ, ѕвѣзда̀ пресвѣ́тлаѧ, сїѧ́ющаѧ благода́тїю бы́лъ є҆сѝ всѣ̑мъ, и҆̀хже наста́вилъ є҆сѝ ко спасе́нїѧ приста́нищꙋ твои́ми ᲂу҆че́ньми."
 },
 {
  "type": "TEXT",
  "value": "Житїѐ твоѐ, бг҃оно́се, пребл҃же́нне пахѡ́мїе, пра́вило и҆звѣ́стно мона́шествꙋющихъ бы́сть, и҆́мже ны́нѣ живꙋ́тъ, твои́мъ послѣ́дꙋющїи, ѻ҆́ч҃е, бжⷭ҇твєннымъ ᲂу҆че́нїємъ."
 },
 {
  "type": "TEXT",
  "value": "Оу҆ѧзвлѧ́емь влⷣчнею любо́вїю, погаси́лъ є҆сѝ пло́ти пристра́стїе воздержа́нїемъ, пахѡ́мїе: всѐ житїѐ твоѐ, ꙗ҆́кѡ благово́ннꙋ же́ртвꙋ ѡ҆свѧти́лъ є҆сѝ."
 },
 {
  "type": "TEXT",
  "value": "Бг҃оро́диченъ: Тѧ̀ приста́нище спасе́нїѧ, и҆ стѣ́нꙋ недви́жимꙋ, бцⷣе влⷣчце, всѝ вѣ́мы вѣ́рнїи: ты́ бо моли́твами твои́ми ѿ бѣ́дъ и҆збавлѧ́еши дꙋ́шы на́шѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы."
 },
 {
  "type": "TEXT",
  "value": "Любо́вїю бж҃їею, ᲂу҆че́нїемъ бесѣ́довалъ є҆сѝ дх҃а: и҆зъ ни́хже просвѣща́емь, добродѣ́тели соверше́нїе прїѧ́лъ є҆сѝ, ѿ страсте́й и҆змѣни́въ дꙋше́вное ᲂу҆строе́нїе."
 },
 {
  "type": "TEXT",
  "value": "Моли́твенника твоего̀ по́стника приво́димъ тебѣ̀, влⷣко, тогѡ̀ ра́ди просѧ́ще, просвѣще́нїемъ бл҃года́ти просвѣти́тисѧ, и҆ твои́мъ всеѻрꙋ́жїемъ всегда̀ сохрани́тисѧ."
 },
 {
  "type": "TEXT",
  "value": "Оу҆крѣпи́въ ᲂу҆́мъ за́повѣдей соблюде́ньми, пахѡ́мїе, пло́ти взыгра́нїе твои́мъ воздержа́нїемъ ᲂу҆вѧди́лъ є҆сѝ, и҆ па́стырь показа́лсѧ є҆сѝ бг҃олюбе́знагѡ со́нма."
 },
 {
  "type": "TEXT",
  "value": "Бг҃оро́диченъ: Молѝ твоего̀ сн҃а и҆ гдⷭ҇а, дв҃о чⷭ҇таѧ, плѣ̑ннымъ и҆збавле́нїе ѿ проти́внагѡ ѡ҆бстоѧ́нїѧ, и҆ на тѧ̀ ᲂу҆пова́ющымъ ᲂу҆мире́нїе дарова́ти."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Всегꙋби́тєльнаѧ дє́мѡнскаѧ попра́лъ є҆сѝ, ѻ҆́ч҃е, кова̑рства, влⷣки твоегѡ̀ ѡ҆дѣ́ѧнъ си́лою, и҆ крⷭ҇то́мъ честны́мъ ѡ҆гражда́емь."
 },
 {
  "type": "TEXT",
  "value": "Оу҆́мнѡ па́че вре́менныхъ проразсꙋди́въ вѣ̑чнꙋющаѧ, болѣ̑зни воздержа́нїѧ претерпѣ́лъ є҆сѝ, преподо́бне, и҆ дꙋша́мъ строи́тель бы́лъ є҆сѝ."
 },
 {
  "type": "TEXT",
  "value": "Во́льнѣ ѡ҆бнища́въ дꙋ́хомъ, ѻ҆́ч҃е, безсме́ртное и҆ непрее́мное на нб҃сѣ́хъ наслажде́нїе, и҆ несказа́нное бога́тство воспрїѧ́лъ є҆сѝ."
 },
 {
  "type": "TEXT",
  "value": "Бг҃оро́диченъ: Неискꙋсомꙋ́жнѡ, дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бжⷭ҇тва̀, сн҃а и҆ бг҃а твоегѡ̀ ѻ҆́бразы."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Свѣти́льникъ свѣ́телъ показа́лсѧ є҆сѝ въ концѣ́хъ, пꙋсты́ню же гра́ды сотвори́лъ є҆сѝ мно́жествы мона́шескими: са́мъ себѐ распе́нъ, кре́стъ тво́й на ра́мо взе́мъ, и҆ воздержа́нїемъ тѣ́ло и҆знꙋри́лъ є҆сѝ, молѧ̀ непреста́ннѡ ѡ҆ всѣ́хъ на́съ."
 },
 {
  "type": "TEXT",
  "value": "І҆́косъ: Пресвѣ́тлаѧ блаже́ннагѡ па́мѧть, дрꙋгі́й ꙗ҆ви́сѧ де́нь спасе́нїѧ на́мъ, свѣ́тлостїю воздержа́нїѧ, но́щь глꙋбокꙋ̀ страсте́й ѿгонѧ́щи, и҆ вседобродѣ́тельнымъ дѣѧ́нїемъ свѣ́тлѡ ѡ҆блиста́ющи, въ не́йже ꙗ҆сна̀ ѕвѣзда̀ и҆ свѣтла̀ ꙗ҆ви́сѧ. Вѣ́рнѡ пѣ̑сни съ весе́лїемъ пахѡ́мїю бжⷭ҇твенномꙋ принесе́мъ: съ высоты́ бо зрѧ̀ просвѣща́етъ на́съ, и҆ дае́тъ ми́ръ неѡскꙋ́денъ, молѧ̀ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ."
 },
 {
  "type": "TEXT",
  "value": "Крѣ́постїю ѡ҆дѣ́ѧсѧ влⷣчнею, ꙗ҆́кѡ пра́хъ сладостра̑стїѧ житїѧ̀ попра́лъ є҆сѝ, любо́вїю побѣжда́емь нетлѣ́нныѧ жи́зни, є҆́йже ны́нѣ и҆ причасти́лсѧ є҆сѝ, съ ли̑ки а҆́гг҃лъ, ѻ҆́ч҃е, водворѧ́ѧсѧ."
 },
 {
  "type": "TEXT",
  "value": "Се́рдце стѧжа́въ чи́сто, ви́дѣти сподо́билсѧ є҆сѝ всѣ́ми неви́димаго: ѿсю́дꙋ ꙗ҆́коже блаже́нъ слꙋжи́тель, ѻ҆́ч҃е, бы́лъ є҆сѝ, поѧ̀ бл҃годѣ́телѧ и҆ препросла́вленнаго."
 },
 {
  "type": "TEXT",
  "value": "Правосла́внꙋю мꙋ́дрость ты̀ стѧжа́въ, є҆ди́ницꙋ тричи́сленнꙋю, трⷪ҇цꙋ є҆диносꙋ́щнꙋю, пребл҃же́нне, проповѣ́далъ є҆сѝ, и҆ сло́ва стра́шное воплоще́нїе, наꙋчи́лъ є҆сѝ пѣ́ти бл҃годѣ́телѧ, ꙗ҆́кѡ препросла́вленна во вѣ́ки."
 },
 {
  "type": "TEXT",
  "value": "Бг҃оро́диченъ: Ст҃ы́хъ ст҃ѣ́йшꙋю тѧ̀ разꙋмѣ́емъ, ꙗ҆́кѡ є҆ди́нꙋ ро́ждшꙋю бг҃а непремѣ́ннаго, дв҃о нескве́рнаѧ, мт҃и безневѣ́стнаѧ: всѣ̑мъ бо и҆сточи́ла є҆сѝ вѣ̑рнымъ нетлѣ́нїе бжⷭ҇твеннымъ ржⷭ҇тво́мъ твои́мъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "По́стныхъ ꙗ҆́вѣ воѡбраже́нїѧ, ѿ а҆́гг҃ла наꙋчи́всѧ, мꙋ́дре, ѿ бжⷭ҇твеннагѡ повелѣ́нїѧ, и҆́миже ны́нѣ пита́еми благоче́стїѧ пито́мцы, пѣ́сньми зовꙋ́ще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Ꙗ҆́коже мо́лнїѧ вели́кими блиста̑нїи, житїѐ сїѧ́ющее всѣ̑мъ возсїѧ̀, воздержа́нїѧ твоегѡ̀, всемꙋ́дре, благоче́стнѡ зижди́телю зовꙋ́щымъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Тѧ̀ па́че ᲂу҆ма̀ и҆зъ нерожде́нна ѻ҆ц҃а̀, пре́жде вѣ̑къ рожде́нна, хрⷭ҇тѐ, сла́вѧ проповѣ́да пахѡ́мїй сла́вный, и҆ дх҃а всест҃а́го, є҆ди́но трⷪ҇цы є҆стество̀ вѣ́дый и҆ бжⷭ҇тво̀."
 },
 {
  "type": "TEXT",
  "value": "Бг҃оро́диченъ: Две́рь тѧ̀ свѣ́та, дв҃о бг҃ома́ти, благоче́ствꙋюще и҆менꙋ́емъ, ѻ҆́ч҃ее бо сїѧ́нїе, соеди́ншеесѧ пло́ти дебельствꙋ̀, па́че є҆стества̀ родила̀ є҆сѝ, пречⷭ҇таѧ: є҆го́же пое́мъ всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "Лꙋча́ми благода́ти ѡ҆зари́всѧ, пахѡ́мїе, ꙗ҆́кѡ вѣ́ренъ слꙋжи́тель бг҃ꙋ предстои́ши, и҆ наслади́тисѧ сла́вы сподо́бльсѧ неразрꙋши́мыѧ. Тѣ́мже честны́й пра́здникъ тво́й велича́емъ."
 },
 {
  "type": "TEXT",
  "value": "И҆сплете́сѧ тебѣ̀ вѣне́цъ, ꙗ҆́кѡ побѣди́телю, пахѡ́мїе, десни́цею живоно́сною и҆ вседержи́тельною: и҆ ны́нѣ пою́щыѧ твою̀ па́мѧть сла́внꙋю, сподо́би, блаже́нне, ᲂу҆лꙋчи́ти ѡ҆ставле́нїе согрѣше́нїй, всеприснопа́мѧтне."
 },
 {
  "type": "TEXT",
  "value": "Плоды̀ ны́нѣ ѡ҆б̾е́мъ болѣ́зней твои́хъ, пахѡ́мїе, ра́дости наслажда́ешисѧ, ꙗ҆́же па́че ᲂу҆ма̀: но хода́тайствꙋѧ и҆зба́вити твоѧ̑ ᲂу҆ченикѝ, хрⷭ҇та̀ ᲂу҆молѝ, тѧ̀ ны́нѣ сла́вѧщыѧ и҆ чтꙋ́щыѧ, достосла́вне."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ рꙋно̀, пренепоро́чнаѧ, до́ждь нбⷭ҇ный во ᲂу҆тро́бѣ прїе́мши, на́мъ родила̀ є҆сѝ пи́щꙋ даю́щаго, благоче́стнѡ того̀ воспѣва́ющымъ, и҆ тѧ̀ всепѣ́тꙋю бцⷣꙋ и҆сповѣ́дающымъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ въ пꙋсты́нѧхъ, и҆ стра̑сти покори́лъ є҆сѝ плотскі̑ѧ, равноа́гг҃ленъ показа́всѧ, пахѡ́мїе бг҃оно́се. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "На стїхо́внѣ, Сла́ва, гла́съ и҃:"
 },
 {
  "type": "TEXT",
  "value": "Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ пахѡ́мїе: твое́ю бо стезе́ю вои́стиннꙋ пра́вѡ ходи́ти позна́хомъ. Бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "HEADER",
  "value": "На лїтꙋргі́и блажє́нна пра́здника, пѣ́снь рѧдова́ѧ: и҆ ст҃а́гѡ, пѣ́снь г҃."
 },
 {
  "type": "HEADER",
  "value": "Прокі́менъ гла́съ з҃:"
 },
 {
  "type": "TEXT",
  "value": "Честна̀ пред̾ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рѻ҃ѕ."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Блаже́нъ мꙋ́жъ, боѧ́йсѧ гдⷭ҇а:"
 },
 {
  "type": "TEXT",
  "value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло ѻ҃з."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю:"
 }
]