ponomar-pwa/static/data/shared/menaion-daily/07-24/1.json

[
 {
  "type": "HEADER",
  "value": "І҆ꙋ́лїа к҃д"
 },
 {
  "type": "HEADER",
  "value": "Ст҃ы́ѧ мꙋ́ченицы хрїсті́ны."
 },
 {
  "type": "HEADER",
  "value": "Стїхи̑ры ст҃ы́ѧ, на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Хрⷭ҇тоиме́ннагѡ тѧ̀ зва́нїѧ по достоѧ́нїю сподо́би, стро́ѧй всѧ̑ про́мысломъ. Лꙋ́чшїй бо коне́цъ и҆мѣ́ла є҆сѝ во ѻ҆бои́хъ, зва́нїю дѣла̀ твоѧ̑, ᲂу҆невѣ́стившисѧ хрⷭ҇тꙋ̀, благоче́стнѡ вѣ́рою: бы́вши же дщѝ цр҃ѧ̀ нбⷭ҇нагѡ, ра́дꙋешисѧ съ ни́мъ, мꙋ́ченице, ѡ҆ на́съ молѧ́щисѧ."
 },
 {
  "type": "TEXT",
  "value": "Ѻ҆ц҃а̀ возжела́вши нбⷭ҇наго, сла́внаѧ, нечести́ва роди́телѧ преѡби́дѣла є҆сѝ: ма́терь же возлюби́вши, вы́шнїй і҆ерⷭ҇ли́мъ, пристра̑стїѧ ма́терни любвѐ ѿри́нꙋла є҆сѝ, и҆ ѡ҆богати́вшисѧ́ хрⷭ҇то́мъ вмѣ́стѡ всѣ́хъ, посе́мъ дꙋ́шꙋ положи́ла є҆сѝ, мч҃нице, не ᲂу҆боѧ́вшисѧ мꙋ́къ."
 },
 {
  "type": "TEXT",
  "value": "Ни роди́телей пристра́стїе, ни пи́щи наслажде́нїе, ни бога́тства и҆мѣ́нїе, сла́внаѧ, ни прещє́нїѧ, ни мꙋ̑ки, ни ѻ҆́гнь, ни ме́чь, ни глꙋбина̀, ни ко́ло, ни ѕвѣре́й стремлє́нїѧ возмого́ша тѧ̀ ѿ любвѐ зижди́телѧ разлꙋчи́ти, дѣ́во мч҃нице хрїсті́но, сла́ва мч҃никѡвъ и҆ похвала̀."
 },
 {
  "type": "HEADER",
  "value": "Сла́ва, гла́съ в҃:"
 },
 {
  "type": "TEXT",
  "value": "Ꙗ҆́коже многоцѣ́нное мѵ́ро, кро́вь твою̀ принесла̀ є҆сѝ женихꙋ̀ твоемꙋ̀ хрⷭ҇тꙋ̀, хрїсті́но мꙋ́ченице, страстоно́сице непобѣди́маѧ, возме́здїе же прїѧ́ла є҆сѝ вѣне́цъ нетлѣ́ненъ ѿ негѡ̀, досточꙋ́днаѧ: тѣ́мъ ᲂу҆ме́ршаго ᲂу҆грызє́нїи ꙗ҆дови́тыхъ ѕмі́євъ глаго́ломъ твои́мъ жи́ва воздви́гла є҆сѝ, призва́нїемъ прест҃а́гѡ дх҃а. Сегѡ̀ ра́ди и҆ нбⷭ҇ныхъ тѧ̀ черто́гѡвъ сподо́би і҆и҃съ чл҃вѣколю́бецъ, и҆ сп҃съ дꙋ́шъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Болѣ̑зни претерпѣ́вши мнѡ́гїѧ въ распѧ́тїи сн҃а и҆ бг҃а твоегѡ̀, пречⷭ҇таѧ, стенѧ́ше слезѧ́щи, и҆ восклица́ющи: ᲂу҆вы̀ мнѣ̀, ча́до сла́дкое! Безъ пра́вды ка́кѡ стра́ждеши, хотѧ̀ и҆зба́вити, ꙗ҆̀же ѿ а҆да́ма земнорѡ́дныѧ; тѣ́мже, пречⷭ҇таѧ дв҃о, тебѐ мо́лимъ вѣ́рою: ми́лостива на́мъ того̀ содѣ́лай."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ в҃:"
 },
 {
  "type": "TEXT",
  "value": "А҆нато́лїево: Хрⷭ҇тоимени́тномꙋ зва́нїю дѣ́ло сꙋгꙋ́бо показа́ла є҆сѝ, ꙗ҆́кѡ вои́стиннꙋ, дѣ́вства твоегѡ̀ чистото́ю ᲂу҆невѣ́стившисѧ хрⷭ҇тꙋ̀, благоволе́нїемъ ѻ҆ц҃а̀, и҆ дѣ́йствомъ дх҃а: мꙋче́нїѧ же боре́нми тве́рдыми ѡ҆блиста́ла є҆сѝ свѣтлѣ́е со́лнечныхъ лꙋ̑чь. Тѣ́мже ꙗ҆́кѡ же́ртва чи́стаѧ и҆ непоро́чнаѧ, на нбⷭ҇нꙋю принесла́сѧ є҆сѝ трапе́зꙋ, съ дѣви́ческими и҆ мч҃ническими ли̑ки во вѣ́ки веселѧ́щисѧ. Съ ни́миже просѝ, хрїсті́но тезоимени́таѧ, дарова́тисѧ чтꙋ́щымъ тѧ̀ ми́рꙋ и҆ ве́лїей ми́лости."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Є҆гда́ тѧ беззако́ннїи лю́дїе, сп҃се, жи́знь всѣ́хъ, на дре́во вознесо́ша, тогда̀ чⷭ҇таѧ и҆ пренепоро́чнаѧ мт҃и твоѧ̀ предстоѧ́ще, и҆ рыда́ющи взыва́ше: ча́до моѐ сла́дкое, свѣ́те мои́ма ѻ҆чи́ма, ᲂу҆вы̀ мнѣ̀, ка́кѡ посредѣ̀ ѕлодѣ̑ю на крⷭ҇тѣ̀ пригвозди́тисѧ претерпѣ́лъ є҆сѝ, и҆́же зе́млю повѣ́шей на вода́хъ."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "А҆́гница твоѧ̀, і҆и҃се, хрїсті́на зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю прїими́ мѧ, съ любо́вїю поже́ршꙋюсѧ тебѣ̀: тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "HEADER",
  "value": "Канѡ́нъ ст҃ы́ѧ, на ѕ҃, творе́нїе і҆ѡ́сифово, гла́съ и҃, є҆гѡ́же краегране́сїе:"
 },
 {
  "type": "TEXT",
  "value": "Хрⷭ҇то́вꙋ тѧ̀ пою̀ тезоиме́ннꙋю ѻ҆трокови́цꙋ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Благи́ми наде́ждами ᲂу҆тверди́всѧ ᲂу҆́мъ тво́й, хрїсті́но, впери́сѧ, и҆ къ бг҃ꙋ, мꙋ́ченице, вознесе́сѧ ѿ текꙋ́щихъ, и҆змѣни́всѧ во ѻ҆би́тєли пребыва́ющыѧ."
 },
 {
  "type": "TEXT",
  "value": "Разсѣ́дшасѧ и҆ лежа́ща предъ нога́ми ѻ҆трокови́цы страстоно́сицы зрѧ́ще ѕлочести́ваго, хвалꙋ̀ сп҃си́телю дади́мъ всѝ, побѣдоно́сицꙋ сїю̀ показа́вшемꙋ."
 },
 {
  "type": "TEXT",
  "value": "Ви́дѣти жениха̀ цр҃ѧ̀ добро́тꙋ кра́снꙋю вожделѣ́ла є҆сѝ чи́стѡ: тѣ́мже бжⷭ҇твенными, страстоте́рпице, страда́ньми свѣ́тлѡ себѐ ᲂу҆краси́ла є҆сѝ."
 },
 {
  "type": "TEXT",
  "value": "Бг҃оро́диченъ: Зачала̀ є҆сѝ сло́во ѻ҆́ч҃ее, пло́ти соедини́вшеесѧ по ѵ҆поста́си и҆зъ тебє̀, па́че сло́ва, мт҃и чⷭ҇таѧ: є҆го́же возжела́вши хрїсті́на, мꙋче́нїѧ сла́вꙋ стѧжа́ла є҆́сть."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Просте́рши ѻ҆́чи и҆ мы́сль, сла́внаѧ, на нб҃о, тва́рьми твоего̀ зижди́телѧ позна́ла є҆сѝ."
 },
 {
  "type": "TEXT",
  "value": "Бога́тство неѿе́млемо, є҆́же къ бг҃ꙋ и҆мѣ́ла є҆сѝ вѣ́рꙋ, честна́ѧ, тѣ́мже нищетꙋ̀ і҆́дѡльскꙋю ѡ҆ста́вила є҆сѝ,"
 },
 {
  "type": "TEXT",
  "value": "Пѣ́нїе благода́рственно творцꙋ̀ хрⷭ҇тꙋ̀ пѣ́ла є҆сѝ, къ дре́вꙋ лю́тѣ, мч҃нице, привѧ́зана, и҆ строга̑нїѧ претерпѣва́ющи."
 },
 {
  "type": "TEXT",
  "value": "Бг҃оро́диченъ: Оу҆ста́ви моѐ смꙋще́нїе помышле́нїй, чи́стаѧ влⷣчце, и҆ ᲂу҆ти́ши дꙋшѝ всѧ́кꙋ печа́ль, хрⷭ҇та̀ ро́ждшаѧ."
 },
 {
  "type": "HEADER",
  "value": "Сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й."
 },
 {
  "type": "TEXT",
  "value": "Кро́вь твою̀, честна́ѧ, ꙗ҆́коже а҆лава́стръ мѵ́ра, принесла̀ є҆сѝ хрⷭ҇тꙋ̀ женихꙋ̀ твоемꙋ̀ любо́вїю: возме́здїе же прїѧ́ла є҆сѝ ѿ негѡ̀, досточꙋ́днаѧ, вѣне́цъ бжⷭ҇твенный и҆ нетлѣ́ненъ, мꙋ́ченице. Тѣ́мже прїѧ́ла є҆сѝ и҆сцѣле́нїй благода́ть си́лою дꙋхо́вною. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Безневѣ́стнаѧ чи́стаѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѣ́хъ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щихъ: и҆ дꙋ́шы на́шѧ спасѝ бжⷭ҇твенными моли́твами твои́ми."
 },
 {
  "type": "TEXT",
  "value": "Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречи́стыхъ рꙋ́къ твои́хъ, ще́дре, созда́нїе;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
 },
 {
  "type": "TEXT",
  "value": "Пита́ласѧ є҆сѝ ра́нами бжⷭ҇твенными наслажда́ема, мꙋ́ченице хрⷭ҇тоимени́та, видѣ́нїи жениха̀ твоегѡ̀, и҆ на тогѡ̀ добро́тꙋ взира́ющи."
 },
 {
  "type": "TEXT",
  "value": "Велича́ю тѧ̀, гдⷭ҇и, мч҃нице, привѧ́зана бы́вши къ колесє́мъ, возопи́ла є҆сѝ, и҆ сла́влю и҆́мѧ твоѐ, ᲂу҆крѣплѧ́ющагѡ лю́бѧщыѧ тѧ̀."
 },
 {
  "type": "TEXT",
  "value": "Прилѣпи́хсѧ къ тебѣ̀, жела́нїемъ ᲂу҆ѧзвлѧ́ема твоеѧ̀ любвѐ: побѣдоно́сицꙋ мѧ̀ покажѝ въ страда́нїи, мꙋ́ченица взыва́ше."
 },
 {
  "type": "TEXT",
  "value": "Бг҃оро́диченъ: Во прⷪ҇ро́цѣхъ тѧ̀, сла́вный дре́вле и҆са́їа, же́злъ и҆менова̀, цвѣ́тъ носѧ́щꙋ гдⷭ҇а, бцⷣе мт҃и приснодв҃о."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы."
 },
 {
  "type": "TEXT",
  "value": "Ꙗ҆́кѡ а҆́гг҃лъ во пло́ти, мꙋ́ченице, бы́вши, нбⷭ҇нїи а҆́гг҃ли пи́щею а҆́гг҃льскою тѧ̀ пита́хꙋ."
 },
 {
  "type": "TEXT",
  "value": "Ка́менѧ жи́зни не ѿве́ргласѧ є҆сѝ, хрїсті́но: тѣ́мже къ ка́меню тѧ̀ привѧза́вше вразѝ, въ во́дꙋ верго́ша."
 },
 {
  "type": "TEXT",
  "value": "Восхи́тиласѧ є҆сѝ къ высотѣ̀, возлетѣ́вши ꙗ҆́коже го́рлица, крилы̀ бжⷭ҇твеннагѡ дх҃а, и҆ ᲂу҆ зижди́телѧ почи́ла є҆сѝ."
 },
 {
  "type": "TEXT",
  "value": "Бг҃оро́диченъ: Ме́ртва грѣхо́мъ бы́вша ѡ҆живи́ мѧ, жи́знь безсме́ртнꙋю, дв҃о мт҃и, ро́ждшаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ."
 },
 {
  "type": "TEXT",
  "value": "Оу҆слади́сѧ твоѐ добро́тами се́рдце пресла́дкагѡ рачи́телѧ, страстоте́рпице, и҆ въ воню̀ тогѡ̀ стрⷭ҇те́й спѣ́шнѡ текла̀ є҆сѝ, зовꙋ́щи: женишѐ мо́й, твоеѧ̀ ра́ди закала́юсѧ ны́нѣ любвѐ."
 },
 {
  "type": "TEXT",
  "value": "Ѻ҆ц҃а̀ нбⷭ҇нагѡ тѧ̀, мꙋ́ченице, роди́тель ви́дѣвъ лю́бѧщꙋ, ва́рварскїй показа̀ нра́въ, и҆ многоѻбра́зными ѡ҆бложѝ мꙋ́ками; предѣ́ла бо ѕлочести́вый своегѡ̀ не разꙋмѣ̀ є҆стества̀."
 },
 {
  "type": "TEXT",
  "value": "Ꙗ҆́кѡ крі́нъ въ мꙋ́ченическихъ ᲂу҆до́лїѧхъ, ꙗ҆́кѡ сладково́нный процвѣла̀ є҆сѝ шипо́къ, мѵ́рнꙋ и҆ска́пающи благода́ть и҆ вѣ́рныхъ сердца̀ пома́зала є҆сѝ, хрⷭ҇тоимени́таѧ мꙋ́ченице честна́ѧ, ст҃ы́хъ а҆́гг҃лъ соприча́стнице."
 },
 {
  "type": "TEXT",
  "value": "Бг҃оро́диченъ: Разꙋмѣ́вше бг҃огла́снїи прⷪ҇ро́цы та́инства твоегѡ̀, дв҃о, глꙋбинꙋ̀, прⷪ҇ро́чески провозвѣсти́ша, бжⷭ҇твеннымъ просвѣща́еми и҆здале́ча дх҃омъ, мт҃рь тѧ̀ всеи́стиннꙋ всѣ́хъ влⷣки бы́ти."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Свѣтови́днаѧ голꙋби́ца позна́ласѧ є҆сѝ, крилѣ̀ и҆мꙋ́щи зла́тѣ, и҆ къ высотѣ̀ нбⷭ҇нѣй возлетѣ́ла є҆сѝ, хрїсті́но честна́ѧ. Тѣ́мже тво́й сла́вный пра́здникъ соверша́емъ, вѣ́рою покланѧ́ющесѧ твои́хъ моще́й ра́цѣ: и҆зъ неѧ́же и҆стека́етъ всѣ̑мъ ѻ҆би́льнѡ и҆сцѣле́нїе бжⷭ҇твенное, дꙋша́мъ же и҆ тѣ́лѡмъ."
 },
 {
  "type": "TEXT",
  "value": "І҆́косъ: Пѣсносло́вѧщи благоче́стнѡ трⷪ҇цꙋ ст҃ꙋ́ю, честна́ѧ дѣ́во мч҃нице, показа́ла є҆сѝ сꙋ́щымъ тогда̀ ѡ҆мрачє́ннымъ мгло́ю лю́тагѡ гнѣ́ва, ка́кѡ сїѧ́нїе тоѧ̀ просвѣща́етъ вѣ̑рныѧ. Мꙋчи́телѧ же ѿ рꙋкѝ и҆збѣ́гла є҆сѝ, ꙗ҆́коже дрꙋга́ѧ ѳе́кла и҆збѣ́гши ѿ беззако́нныхъ. Произшла́ же є҆сѝ посредѣ̀ сѣте́й. Тѣ́мже вои́стиннꙋ пою́ще почита́емъ преставле́нїе твоѐ, благодарѧ́ще є҆ди́наго бг҃а, тебє̀ ра́ди дарова́вшаго и҆сцѣле́нїе бжⷭ҇твенное дꙋша́мъ же и҆ тѣ́лѡмъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Пѣ́нїе всѣ́хъ бл҃годѣ́телю, клоко́щꙋщемꙋ ѻ҆гню̀ прибли́жившисѧ, взыва́ла є҆сѝ, твоѐ ѡ҆роша́ющемꙋ се́рдце: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Є҆ди́наго бг҃а полꙋчи́ти возжела́вши, неради́ла є҆сѝ ᲂу҆дѡ́мъ ѡ҆палѧ́ємымъ, не ѿве́ргласѧ є҆сѝ хрⷭ҇та̀, дѣви́це, пою́щи: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Тꙋ́чами крове́й твои́хъ, стрꙋи̑ и҆зсꙋши́ла є҆сѝ і҆дѡлонеи́стовства, ѡ҆дождѧ́еши же ны́нѣ и҆сцѣле́нїй пꙋчи́нꙋ, дѣ́во мꙋ́ченице, ᲂу҆ста́вила є҆сѝ пла́мень страсте́й."
 },
 {
  "type": "TEXT",
  "value": "Бг҃оро́диченъ: Зако́ны, дв҃о, превозше́дши є҆стества̀ бж҃е́ственнымъ твои́мъ зача́тїемъ, па́че є҆стества̀ бг҃а родила̀ є҆сѝ, вопїю́щи: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Волнꙋ́ющеесѧ мо́ре напа́стей мꙋ́къ, бжⷭ҇твеннымъ ѡ҆кормле́нїемъ невре́днѡ преплыла̀ є҆сѝ, ѕмі́ѧ погрꙋзи́вши твои́хъ пѡ́двигъ, мꙋ́ченице, глꙋбино́ю, тѣ́мже ра̑йскаѧ небꙋ́рнѡ приста̑нища дости́гла є҆сѝ, вопїю́щи: свѧще́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Ѕмі́ѧ лю́таго ᲂу҆мертви́ла є҆сѝ животво́рными пѡ́двиги, и҆ моли́твъ твои́хъ стоѧ́нїи неꙋкроти́мыѧ ѕвѣ́ри ᲂу҆спи́ла є҆сѝ, и҆ ѿ си́хъ вре́да кромѣ̀ пребыла̀ є҆сѝ, зижди́телю пою́щи, хрїсті́но: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Глаго́ломъ живы́мъ воздви́гла є҆сѝ ᲂу҆ме́ршаго ᲂу҆грызе́нїемъ, мꙋ́ченице страстоно́сице, ꙗ҆́да ѕмїи́на: бг҃ъ бо сме́рть попра́вый бжⷭ҇твеннымъ погребе́нїемъ, твои́хъ моли́твъ послꙋ́ша, хрїсті́но. Къ немꙋ́же вопїе́ши непреста́ннѡ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Тве́рдаѧ помо́щнице вѣ̑рнымъ, приснодв҃о, и҆зба́ви мѧ̀ ле́сти лꙋка́вагѡ ѕмі́ѧ, лю́тѣ борю́щагѡ, и҆ смири́ти тща́щагѡсѧ. Ты́ бо неле́стна на тѧ̀ надѣ́ющымсѧ є҆сѝ наста́вница, вопїю́щымъ непреста́ннѡ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще."
 },
 {
  "type": "TEXT",
  "value": "Ви́дѣти сподо́биласѧ є҆сѝ ᲂу҆кра́шена, и҆ мꙋче́нїѧ ѻ҆де́ждами блиста́ющи, твоего̀ жениха̀, хрїсті́но, мꙋ́ченице многострада́льнаѧ."
 },
 {
  "type": "TEXT",
  "value": "Кра́снаѧ твоѧ̀ добро́та, ꙗ҆́коже возлюби́ла є҆сѝ, и҆́же па́че всѣ́хъ добрѡ́тъ краснѣ́йши хрⷭ҇то́съ, нбⷭ҇ныхъ черто́гѡвъ тѧ̀ сподо́би."
 },
 {
  "type": "TEXT",
  "value": "Совокꙋпи́ласѧ є҆сѝ со безпло́тными, сла́внаѧ, ли̑ки, и҆ со страда́льческими собѡ́ры причла́сѧ є҆сѝ, ѡ҆ на́съ молѧ́щи всеще́драго."
 },
 {
  "type": "TEXT",
  "value": "Со́лнца свѣтлѣ́йши ꙗ҆ви́сѧ твоѧ̀ па́мѧть, блиста́нїи бл҃года́тными дх҃а, тѧ̀ чтꙋ́щыѧ, хрїсті́но, просвѣща́ющи."
 },
 {
  "type": "TEXT",
  "value": "Бг҃оро́диченъ: Благолюби́ваѧ дв҃о, ѡ҆ѕло́бленнꙋю грѣхмѝ дꙋ́шꙋ мою̀ ᲂу҆блажѝ, и҆ вѣ́чнагѡ пла́мене мѧ̀ и҆зба́ви моли́твами твои́ми."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Ꙗ҆́кѡ шипо́къ краснѣ́йшїй ѿ терно́вагѡ прозѧбла̀ є҆сѝ ко́рене, дѣ́во хрїсті́но, ѡ҆броще́нїемъ мч҃нице, свѧще́ннагѡ страда́нїѧ ѡ҆багри́вшисѧ кро́вїю, и҆ ны́нѣ бжⷭ҇твеннꙋю твою̀ па́мѧть творѧ́щыѧ любо́вїю спаса́й ѿ бѣ́дъ."
 },
 {
  "type": "TEXT",
  "value": "Бг҃оро́диченъ: Стоѧ́ще ѻ҆́крестъ тебє̀ дѣ̑вы бг҃омꙋ̑дрыѧ, бг҃ороди́тельнице марі́е, ꙗ҆́коже цари́цы ро́домъ, твоемꙋ̀ сн҃ꙋ приведо́шасѧ невѣстолѣ́пнѡ, пречⷭ҇таѧ, ꙗ҆́кѡ цр҃ю̀ всѧ́ческихъ, є҆го́же, мт҃и дв҃о ѻ҆трокови́це, ѡ҆ на́съ молѝ."
 },
 {
  "type": "HEADER",
  "value": "На хвали́техъ стїхи̑ры, на д҃, гла́съ д҃: Самогла́сны."
 },
 {
  "type": "TEXT",
  "value": "Крⷭ҇тъ, ꙗ҆́кѡ ѻ҆рꙋ́жїе держа́вно, хрїсті́но мꙋ́ченице, держа́щи рꙋка́ми, вѣ́рꙋ, ꙗ҆́кѡ щи́тъ, наде́ждꙋ, ꙗ҆́кѡ бронѧ̀, любо́вь, ꙗ҆́кѡ лꙋ́къ, мꙋчи́телей томлє́нїѧ побѣди́ла є҆сѝ мꙋ́жески, де́мѡнѡвъ кова̑рствїѧ ᲂу҆праздни́ла є҆сѝ бжⷭ҇твеннѣ: во главꙋ́ же ᲂу҆сѣкнове́на бы́вши, ликꙋ́еши со хрⷭ҇то́мъ, непреста́ннѡ молѧ́щи ѡ҆ дꙋша́хъ на́шихъ."
 },
 {
  "type": "TEXT",
  "value": "Бога́тство ѡ҆ста́вльши ѻ҆те́ческое, хрⷭ҇та́ же жела́ющи и҆́стиннѡ, сла́вꙋ ѡ҆брѣ́те мꙋ́ченица и҆ бога́тство нбⷭ҇ное, и҆ при́сною моли́твою ѡ҆гражде́на благода́тною, ѻ҆рꙋ́жїемъ крⷭ҇та̀ попра̀ мꙋчи́телѧ. Тѣ́мже а҆́гг҃ли подвигѡ́мъ чꙋдѧ́щесѧ глаго́лахꙋ: паде́сѧ вра́гъ, жено́ю побѣжде́нъ бы́въ, вѣнцено́сица ꙗ҆ви́сѧ мч҃ница. И҆ хрⷭ҇то́съ во вѣ́ки ца́рствꙋетъ ꙗ҆́кѡ бг҃ъ, подаѧ́й мі́рови ве́лїю ми́лость."
 },
 {
  "type": "TEXT",
  "value": "Сла́вимъ твоѐ, хрⷭ҇тѐ, мно́гое милосе́рдїе, и҆ бла́гость, є҆́же на на́съ бы́вшꙋю, ꙗ҆́кѡ и҆ жєны̀ ᲂу҆праздни́ша пре́лесть і҆дѡлонеи́стовства си́лою крⷭ҇та̀ твоегѡ̀, человѣколю́бче, мꙋчи́телѧ не ᲂу҆боѧ́шасѧ, льсти́ваго попра́ша: возмого́ша же во слѣ́дъ тебє̀ прїитѝ, въ воню̀ мѵ́ра твоегѡ̀ теча́хꙋ, молѧ́щесѧ ѡ҆ дꙋша́хъ на́шихъ."
 },
 {
  "type": "TEXT",
  "value": "Чꙋдодѣ́йствова, хрⷭ҇тѐ, крⷭ҇та̀ твоегѡ̀ си́ла, ꙗ҆́кѡ и҆ хрїсті́на мꙋ́ченица страда́льческимъ по́двигомъ подвиза́сѧ, ѿѻнꙋ́дꙋже немощно́е є҆стества̀ ѿве́ргши, до́блественнѣ сопроти́висѧ мꙋчи́телємъ: тѣ́мже и҆ вѣне́цъ побѣ́ды прїе́мши, мо́литсѧ ѡ҆ дꙋша́хъ на́шихъ"
 },
 {
  "type": "HEADER",
  "value": "Сла́ва, гла́съ є҃:"
 },
 {
  "type": "TEXT",
  "value": "Дѣ́вства твоегѡ̀ красоты̀ восхотѣ̀ цр҃ь сла́вы хрⷭ҇то́съ, ꙗ҆́кѡ непоро́чнꙋ тѧ̀ невѣ́стꙋ себѣ̀ ѡ҆брꙋчѝ совокꙋпле́нїемъ нетлѣ́ннымъ: и҆́бо во́лею свое́ю пода́въ добро́тѣ твое́й си́лꙋ, на враги́ же и҆ стра̑сти непобѣди́мꙋ показа̀, претерпѣ́вшꙋю ра̑ны гѡ́рькїѧ, и҆ мꙋ̑ки свирѣ̑пыѧ, сꙋгꙋ́бымъ вѣнце́мъ ᲂу҆вѧзе́ тѧ, и҆ поста́ви ѡ҆деснꙋ́ю себє̀ ꙗ҆́кѡ цр҃и́цꙋ и҆спещре́нꙋ: того̀ молѝ, мч҃нице честна́ѧ и҆ многострада́льнаѧ хрїсті́но, пѣвцє́мъ твои̑мъ спасе́нїе и҆ жи́знь пода́ти, и҆ ве́лїю ми́лость."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "И҆збавле́нїе, на́съ ра́ди, и҆ цѣ́нꙋ вели́кꙋю, пречⷭ҇тꙋю кро́вь твою̀ и҆зво́лилъ є҆сѝ да́ти, безгрѣ́шне хрⷭ҇тѐ мо́й, всѣ̑мъ хотѧ̀ спасе́нїе полꙋчи́ти. Тѣ́мже тѧ̀ зрѧ́щи пригвожде́на мт҃и твоѧ̀, рыда́ющи власы̀ терза́ше сѝ, глаго́лющи: ча́до, а҆́гнче всенепоро́чный, мі́ръ хотѧ̀ и҆зба́вити честно́ю твое́ю кро́вїю, ѿ ѻ҆́чїю моє́ю ка́кѡ заше́лъ є҆сѝ, сп҃се, незаходи́мое сл҃нце, и҆́же всѣ̑мъ подаѧ́й просвѣще́нїе, и҆ ми́ръ, и҆ ве́лїю ми́лость;"
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ а҃:"
 },
 {
  "type": "TEXT",
  "value": "Съ вы́шними си́лами причла́сѧ є҆сѝ, сла́внаѧ, мі́ръ ѡ҆ста́вльши, и҆ хрⷭ҇та̀ возжела́вши, хрїсті́но, ѽ всечестна́ѧ! Просѝ на́мъ ве́лїѧ ми́лости."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Оу҆ крⷭ҇та̀ предстоѧ́щи сн҃а и҆ бг҃а твоегѡ̀, и҆ долготерпѣ́нїе тогѡ̀ смотрѧ́ющи, гл҃го́лаше пла́чꙋщи мт҃и чи́стаѧ: ᲂу҆вы̀ мнѣ̀, ча́до сладча́йшее, что̀ сїѧ̑ стра́ждеши непра́веднѡ, сло́ве бж҃їй, да спасе́ши человѣ́чество;"
 },
 {
  "type": "HEADER",
  "value": "На лїтꙋргі́и, бл҃жє́нна ѻ҆ктѡ́иха на д҃: И҆ ст҃ы́ѧ пѣ́снь г҃, на д҃."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Ди́венъ бг҃ъ во ст҃ы́хъ свои́хъ, бг҃ъ і҆и҃левъ."
 },
 {
  "type": "TEXT",
  "value": "Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ."
 },
 {
  "type": "HEADER",
  "value": "А҆пⷭ҇лъ корі́нѳѧнѡмъ зача́ло рн҃а."
 },
 {
  "type": "TEXT",
  "value": "А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло л҃г."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]