ponomar-pwa/static/data/shared/menaion-daily/10-29/1.json

[
 {
  "type": "HEADER",
  "value": "Ѻ҆ктѡ́врїа к҃ѳ"
 },
 {
  "type": "HEADER",
  "value": "Ст҃ы́ѧ прпⷣбномꙋ́ченицы а҆настасі́и ри́млѧныни:"
 },
 {
  "type": "HEADER",
  "value": "И҆ прпⷣбнагѡ ѻ҆тца̀ на́шегѡ а҆враа́мїа затво́рника:"
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры мч҃ницы, гла́съ и҃."
 },
 {
  "type": "TEXT",
  "value": "Подо́бенъ: Что̀ ва́съ нарече́мъ:"
 },
 {
  "type": "TEXT",
  "value": "Мч҃нице страстоте́рпице всехва́льнаѧ, воздержа́нїемъ стра̑сти низложи́вши плотскі̑ѧ, страда́нїемъ ѕмі́ѧ ᲂу҆мертви́ла є҆сѝ врага̀, а҆́гг҃лы ᲂу҆диви́вши болѣ́зньми твои́ми, человѣ́ки ѡ҆бвесели́вши страда̑нїи твои́ми, мона́шествꙋющихъ ᲂу҆добре́нїе, дѣ́вства сосꙋ́дъ. Молѝ спастѝ и҆ просвѣти́ти дꙋ́шы на́шѧ."
 },
 {
  "type": "TEXT",
  "value": "Что́ тѧ воз̾именꙋ́емъ, сла́внаѧ; дѣ́вства добро́тами невѣ́стꙋ просїѧ́вшꙋ хрⷭ҇то́вꙋ, дще́рь и҆збра́ннꙋ вы́шнѧгѡ і҆ерⷭ҇ли́ма, сожи́тельницꙋ а҆́гг҃лѡвъ и҆ собесѣ́дницꙋ, черто́га мы́сленнагѡ наслажда́ющꙋсѧ, а҆настасі́е многострада́льнаѧ, мона́шествꙋющихъ ᲂу҆добре́нїе. Молѝ спастѝ и҆ просвѣти́ти дꙋ́шы на́шѧ."
 },
 {
  "type": "TEXT",
  "value": "Терпѣ́ла є҆сѝ зꙋбѡ́въ и҆скорене́нїе, рꙋ́къ ѿсѣче́нїе, и҆ но́гъ и҆ сосцє́въ, ссѣка́ема на ᲂу҆́ды ѿ беззако́нныхъ мꙋчи́телей, къ добро́тѣ жениха̀ взира́ющи, и҆ болѣ̑зни па́че є҆стества̀ терпѧ́щи: а҆настасі́е многострада́льнаѧ, невѣ́сто хрⷭ҇то́ва нетлѣ́ннаѧ, молѝ спастѝ и҆ просвѣти́ти дꙋ́шы на́шѧ."
 },
 {
  "type": "HEADER",
  "value": "И҆́ны стїхи̑ры прпⷣбнагѡ, гла́съ то́йже."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Ѻ҆́ч҃е бг҃омꙋ́дре а҆вра́мїе, а҆враа́мꙋ подо́бникъ бы́въ дꙋ́хомъ, пресе́льникъ бы́лъ є҆сѝ землѝ ѻ҆те́ческїѧ, бл҃же́нне. Пло́ти пожела̑нїѧ ѿве́ргъ и҆ въ хи́жинѣ ма́лѣй заключи́въ ра́дꙋѧсѧ тѣ́ло твоѐ, дꙋ́шꙋ же впери́лъ є҆сѝ къ нб҃сѝ, и҆дѣ́же житїѐ ꙗ҆́вѣ стѧжа́лъ є҆сѝ."
 },
 {
  "type": "TEXT",
  "value": "Прпⷣбне ѻ҆́ч҃е а҆вра́мїе, а҆враа́мскꙋю дꙋ́шꙋ тезоиме́ннѡ стѧжа́въ, напа̑сти претерпѣ́лъ є҆сѝ вѣ́рою бжⷭ҇твенною ᲂу҆крѣплѧ́емь и҆ любо́вїю бг҃ꙋ соединѧ́емь, ѡ҆бѣтова́нїѧ зе́млю наслѣ́довалъ є҆сѝ, ᲂу҆краша́емь добродѣ́телей свѣтлостьмѝ. Тѣ́мже веселѧ́щесѧ, твою̀ па́мѧть торжествꙋ́емъ."
 },
 {
  "type": "TEXT",
  "value": "Прпⷣбне ѻ҆́ч҃е а҆вра́мїе, пре́лестьми лю́тѣ поглоще́ннꙋю ѕмі́емъ и҆ попо́лзшꙋюсѧ поги́бели въ ро́въ, про́мысломъ бжⷭ҇твеннымъ возвле́клъ є҆сѝ и҆ спаса́емꙋ бг҃ꙋ предста́вилъ є҆сѝ. Є҆ѧ́же покаѧ́нїю всѝ ᲂу҆диви́шасѧ, бл҃гоче́стнѡ гдⷭ҇а сла́вѧщїи пребл҃га́го."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ра́дꙋйсѧ, свѣ́та бж҃е́ственнагѡ носи́ло, пресвѣ́тлый свѣ́щниче, прест҃а́ѧ бг҃оневѣ́сто: свѣ́тъ на́мъ возсїѧ́ла є҆сѝ ѿ пречⷭ҇тѡю бокꙋ̀ твоє́ю, просвѣща́ѧ мі́ра концы̀ и҆ ѡ҆свѧща́ѧ свое́ю бл҃гостїю. Ра́дꙋйсѧ, нача́ло на́шегѡ спасе́нїѧ, чⷭ҇таѧ. Ра́дꙋйсѧ, стра́шное слы́шанїе и҆ глаго́ланїе надѣ́ющихсѧ на тѧ̀."
 },
 {
  "type": "TEXT",
  "value": "Крⷭ҇тобг҃оро́диченъ: Что̀ зри́мое видѣ́нїе, є҆́же мои́ма ѻ҆чи́ма ви́дитсѧ, ѽ влⷣко! Содержа́й всю̀ тва́рь, на дре́во воздви́женъ бы́въ, и҆ ᲂу҆мира́еши, всѣ̑мъ даѧ́й жи́знь; бцⷣа пла́чꙋщи глаго́лаше, є҆гда̀ ᲂу҆зрѣ̀ на крⷭ҇тѣ̀ возноси́ма, и҆зъ неѧ̀ неизрече́ннѡ возсїѧ́вшаго бг҃а и҆ чл҃вѣ́ка."
 },
 {
  "type": "HEADER",
  "value": "Тропа́рь ст҃ы́ѧ, гла́съ д҃:"
 },
 {
  "type": "TEXT",
  "value": "А҆́гница твоѧ̀, і҆и҃се, а҆настасі́а, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но, ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. Тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "HEADER",
  "value": "Сла́ва, прпⷣбнагѡ, гла́съ и҃:"
 },
 {
  "type": "TEXT",
  "value": "Въ тебѣ̀, ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй. Тѣ́мже и҆ со а҆́гг҃лы сра́дꙋетсѧ, прпⷣбне а҆вра́мїе, дх҃ъ тво́й."
 },
 {
  "type": "HEADER",
  "value": "На ᲂу҆́трени, канѡ́нъ прпⷣбныѧ, творе́нїе і҆ѡ́сифово, гла́съ и҃, є҆гѡ́же краегране́сїе:"
 },
 {
  "type": "TEXT",
  "value": "Мꙋ́жєскїѧ твоѧ̑, мꙋ́ченице, восхвалю̀ болѣ̑зни."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ."
 },
 {
  "type": "TEXT",
  "value": "Сїю̀ свѣтоно́снꙋю па́мѧть твою̀ почита́ющемꙋ, бг҃омꙋ́драѧ, просвѣще́нїе мѝ пода́ждь, дꙋшѝ моеѧ̀ тмꙋ̀ ѿгонѧ́щи."
 },
 {
  "type": "TEXT",
  "value": "Всю̀ ѿ пеле́нъ тебѐ самꙋ́ю возложи́ла є҆сѝ зижди́телю твоемꙋ̀, и҆ ѻ҆гне́мъ воздержа́нїѧ тѣлє́сныѧ стра̑сти попали́ла є҆сѝ."
 },
 {
  "type": "TEXT",
  "value": "Къ высотѣ̀ мꙋче́нїѧ, мч҃нице, возшла̀ є҆сѝ, непощадѣ́вши пло́ти, и҆ черто́гѡвъ мы́сленныхъ, ꙗ҆́кѡ дѣ́ва, сподо́биласѧ є҆сѝ."
 },
 {
  "type": "TEXT",
  "value": "Бг҃оро́диченъ: Тѧ̀, нб҃омѣ́рнꙋю лѣ́ствицꙋ, на не́йже бг҃ъ ᲂу҆тверди́сѧ, человѣ́ки нбⷭ҇ны содѣ́лавъ, ѻ҆трокови́це, почита́емъ."
 },
 {
  "type": "HEADER",
  "value": "И҆́нъ канѡ́нъ прпⷣбнагѡ. І҆ѡ́сифъ. Гла́съ то́йже. Є҆гѡ́же краегране́сїе:"
 },
 {
  "type": "TEXT",
  "value": "Твоѐ чествꙋ́ю всесвѣ́тлое житїѐ, бл҃же́нне."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Бжⷭ҇твенными сїѧ́ѧ блиста̑нїи, свѣтоно́сный тво́й соверша́ющыѧ пра́здникъ, страсте́й ѡ҆мраче́нїѧ, всебл҃же́нне, моли́твами твои́ми, а҆вра́мїе, и҆зба́ви."
 },
 {
  "type": "TEXT",
  "value": "Бжⷭ҇твенное разжжѐ твою̀ дꙋ́шꙋ, бл҃же́нне, жела́нїе, ᲂу҆гасѝ плотска̑ѧ разжжє́нїѧ, ѻ҆́ч҃е, и҆ невеще́ственнѡ на земли́ тѧ жи́ти сотворѝ."
 },
 {
  "type": "TEXT",
  "value": "Оу҆мертви́въ ᲂу҆́ды, ꙗ҆̀же на землѝ, поще́нїемъ и҆ всѧ́кими ѕлострада̑нїи, ѻ҆́ч҃е мꙋ́дре, жи́зни сподо́билсѧ є҆сѝ лꙋ́чшїѧ на нб҃сѣ́хъ, бг҃оно́се а҆вра́мїе."
 },
 {
  "type": "TEXT",
  "value": "Бг҃оро́диченъ: Ѿ крове́й твои́хъ свѧще́нныхъ, бг҃а ѻ҆ц҃а̀ сло́во воплоти́сѧ преесте́ственнѡ, дв҃о марі́е: є҆го́же молѝ, плотска̑ѧ моѧ̑ ᲂу҆мертви́ти взыгра̑нїѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Стоѧ́ла є҆сѝ предъ сꙋди́щемъ мꙋчи́телѧ, хрⷭ҇та̀, сла́внаѧ, творца̀ всѣ́хъ и҆ влⷣкꙋ, бг҃а сло́ва проповѣ́дающи."
 },
 {
  "type": "TEXT",
  "value": "Добро́та серде́чнаѧ ви́димымъ зра́комъ, сла́внаѧ, и҆зда́вшисѧ, тѧ̀ краснѣ́йшꙋю зрѧ́щымъ ꙗ҆ви́ла є҆́сть."
 },
 {
  "type": "TEXT",
  "value": "Бога́тство неистощи́мо и҆сцѣле́нїй тебѣ̀ подадѐ, ѻ҆трокови́це, хрⷭ҇то́съ, є҆гѡ́же нищетꙋ̀ во́льнѡ возлюби́ла є҆сѝ."
 },
 {
  "type": "TEXT",
  "value": "Бг҃оро́диченъ: Ве́щь грѣхѡ́въ мои́хъ твои́хъ моли́твъ ѻ҆гне́мъ попалѝ, мт҃и свѣ́та, ро́сꙋ мѝ бжⷭ҇твеннꙋю ѡ҆ставле́нїѧ носѧ́щи."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
 },
 {
  "type": "TEXT",
  "value": "Всеѻбра́знѡ возжелѣ́въ жела́нїй коне́чное, мі́ра и҆ пло́ти, бг҃оно́се, внѣ̀ бы́лъ є҆сѝ. Тѣ́мъ воспрїѧ́лъ є҆сѝ премі́рнꙋю сла́вꙋ и҆ вѣ́чнꙋющее, ѻ҆́ч҃е, наслажде́нїе."
 },
 {
  "type": "TEXT",
  "value": "Хра́мъ жи́въ ꙗ҆ви́лсѧ є҆сѝ вседѣ́тельнагѡ дх҃а, ѻ҆́ч҃е, въ хи́жинѣ тѣ́ло заключи́въ, прпⷣбне. Тѣ́мже ѡ҆блиста́лъ є҆сѝ добродѣ́телей лꙋча́ми, свѧще́ннѡ ѡ҆божа́емь, бл҃же́нне а҆вра́мїе."
 },
 {
  "type": "TEXT",
  "value": "Дѣ́ланїемъ болѣ́зней, добродѣ́телей зрѣ́лъ, прпⷣбне, и҆зрасти́лъ є҆сѝ кла́съ стори́чествꙋющь, и҆́мже пита́ютсѧ че́стнѡ честно́е твоѐ ᲂу҆спе́нїе торжествꙋ́ющїи."
 },
 {
  "type": "TEXT",
  "value": "Бг҃оро́диченъ: Въ тебѣ̀, всест҃а́ѧ, всегѡ̀ вино́вный, за премно́гое милосе́рдїе, хотѧ̀ всели́сѧ и҆ ѡ҆свѧтѝ человѣ́ческое сꙋщество̀, престꙋпле́нїемъ пе́рвѣе попо́лзшеесѧ."
 },
 {
  "type": "HEADER",
  "value": "По г҃-й пѣ́сни конда́къ а҆настасі́и, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Дѣ́вства вода́ми ѡ҆чище́нна, прпⷣбнаѧ, мч҃ничества кровьмѝ, а҆настасі́е, вѣнча́вшисѧ, подае́ши сꙋ́щымъ въ нꙋ́ждахъ недꙋ́гѡвъ и҆сцѣле́нїе и҆ спасе́нїе, пристꙋпа́ющымъ ѿ се́рдца: крѣ́пость бо тебѣ̀ подае́тъ хрⷭ҇то́съ, и҆сточа́ѧ бл҃года́ть приснотекꙋ́щꙋю."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Воздержа́нїѧ росо́ю страсте́й погаси́ла є҆сѝ пла́мень ю҆́ношески, ѻ҆гне́мъ же крове́й твои́хъ всю̀ пре́лесть попали́ла є҆сѝ: и҆ женихꙋ̀ сло́вꙋ, ꙗ҆́кѡ да́ръ, принесла̀ є҆сѝ честно́е дѣ́вство и҆ до́блественное страда́нїе. Тѣ́мже въ черто́гъ введе́ тѧ сла́вы, свѣ́тлѣ до́бльствовавшꙋю, и҆ ѕмі́ѧ попра́вшꙋю, а҆настасі́е многострада́льнаѧ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, прпⷣбнагѡ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й:"
 },
 {
  "type": "TEXT",
  "value": "И҆́же дре́внемꙋ а҆враа́мꙋ подо́бѧсѧ, ѻ҆́ч҃е, ᲂу҆дали́лсѧ є҆сѝ сро́дникѡвъ по пло́ти, повинꙋ́ѧсѧ, а҆вра́мїе, глаго́лꙋ бг҃а на́шегѡ. Тѣ́мже, пости́всѧ, и҆ дꙋ́шꙋ свѣтлѣ́йшꙋ показа́лъ є҆сѝ со́лнечныхъ лꙋ̑чь, бг҃омꙋ́дре всебл҃же́нне."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїемъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ, бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе ѻ҆бита́лище."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Тѧ̀, и҆́го легча́йшее хрⷭ҇то́во, мч҃нице, поне́сшꙋю ѿ ю҆́ности, желѣ́зное ᲂу҆́же носи́ти пребеззако́ннꙋющїи ѡ҆сꙋди́ша."
 },
 {
  "type": "TEXT",
  "value": "Ка̑пли крове́й твои́хъ, многобо́жїѧ ᲂу҆гаси́ша ᲂу҆́глїе: лꙋчи́ же чꙋде́съ твои́хъ страсте́й ве́щь попали́ша."
 },
 {
  "type": "TEXT",
  "value": "Не ѡ҆бнажѝ благода́ти, тѣ́ло твоѐ ѡ҆бнажи́въ лꙋка́внѣйшїй: и҆стка́нꙋ же па́че свы́ше нераздра́нꙋ ри́зꙋ и҆схода́таи тебѣ̀."
 },
 {
  "type": "TEXT",
  "value": "Бг҃оро́диченъ: По ржⷭ҇твѣ̀ пребыла̀ є҆сѝ нетлѣ́нна дв҃а, ꙗ҆́коже пре́жде ржⷭ҇тва̀, ю҆́на бо млⷣнца родила̀ є҆сѝ, пре́жде вѣ̑къ познава́ема."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Стрꙋѧ́ми, ѻ҆́ч҃е, сле́зъ твои́хъ дꙋшє́вныѧ сквє́рны ѡ҆мы́въ, бжⷭ҇твенное бы́лъ є҆сѝ дх҃а и҆ честно́е, всебл҃же́нне, жили́ще."
 },
 {
  "type": "TEXT",
  "value": "Бдѣ́нїе всено́щно, моли́твꙋ непреста́ннꙋ, безпристра́стїе и҆ любо́вь нелицемѣ́рнꙋ, и҆ соверше́ннꙋ вѣ́рꙋ ᲂу҆держа́лъ є҆сѝ."
 },
 {
  "type": "TEXT",
  "value": "И҆сцѣлѧ́ти стра̑сти и҆ ѿгони́ти, прпⷣбне, дꙋ́хи, бл҃года́ть прїѧ́лъ є҆сѝ, а҆вра́мїе, ꙗ҆́кѡ бж҃їй ᲂу҆го́дникъ и҆́стиннѣйшїй."
 },
 {
  "type": "TEXT",
  "value": "Бг҃оро́диченъ: Оу҆ны́нїемъ ѡ҆держи́ма и҆ грѣхо́мъ ны́нѣ погрꙋже́на, мольбо́ю твое́ю и҆зба́ви мѧ̀, бцⷣе мт҃и приснодв҃о."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆́тренююще, вопїе́мъ тѝ: гдⷭ҇и, спаси́ ны: ты̀ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы."
 },
 {
  "type": "TEXT",
  "value": "Не и҆знꙋре́на ѻ҆гне́мъ веще́ственнымъ ꙗ҆ви́ласѧ є҆сѝ, мч҃нице а҆настасі́е: ѻ҆́гнь бо тѧ̀ серде́чный бжⷭ҇твенныѧ любвѐ ѡ҆роша́ше."
 },
 {
  "type": "TEXT",
  "value": "Оу҆даре́ньми лица̀, мч҃нице а҆настасі́е, ᲂу҆краси́вшисѧ, врагѡ́въ ѿрази́ла є҆сѝ ме́рзское неразꙋ́мїе."
 },
 {
  "type": "TEXT",
  "value": "Протѧже́на на дре́вѣ, бг҃омꙋ́драѧ а҆настасі́е, любо́вїю жениха̀ твоегѡ̀, бжⷭ҇твеннꙋю стрⷭ҇ть ѡ҆бразова́ла є҆сѝ."
 },
 {
  "type": "TEXT",
  "value": "Бг҃оро́диченъ: Пое́мъ тѧ̀, всепѣ́таѧ влⷣчце, бцⷣе: бг҃а бо препѣ́таго пло́тїю родила̀ є҆сѝ, пречⷭ҇таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго. Но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Ꙗ҆́кѡ плодови́таѧ розга̀, гро́зды и҆зрасти́лъ є҆сѝ, ѻ҆́ч҃е а҆вра́мїе, добродѣ́телей бжⷭ҇твенныхъ, ᲂу҆миле́нїѧ вїно̀ точа́щыѧ, и҆ страсте́й пїѧ́нство ѿ дꙋ́шъ ѿгонѧ́щыѧ, и҆ сердца̀ вѣ́рныхъ веселѧ́щыѧ."
 },
 {
  "type": "TEXT",
  "value": "Напа̑сти тебѣ̀ разли̑чны ѕмі́й вселꙋка́вый, ѻ҆́ч҃е, воздви́же, но того̀ ѻ҆рꙋ́жїемъ креста̀, бг҃оно́се, ᲂу҆мертви́лъ є҆сѝ: и҆ побѣ́ды вѣне́цъ ѿ бг҃а пра́веднымъ сꙋдо́мъ прїѧ́лъ є҆сѝ, бг҃омꙋ́дре а҆вра́мїе."
 },
 {
  "type": "TEXT",
  "value": "Ст҃ы́ни до́мъ, ѻ҆́ч҃е, бжⷭ҇твеннагѡ дх҃а вѣ́рою бы́въ, созда́лъ є҆сѝ до́мъ свѧще́нный, и҆ несвѧще́нный собо́ръ несвѧще́нныѧ ле́сти преложи́въ наказа́ньми, всѣ́хъ бг҃ꙋ ѡ҆свѧти́лъ є҆сѝ."
 },
 {
  "type": "TEXT",
  "value": "Бг҃оро́диченъ: Мт҃рь, дв҃ꙋ ѻ҆трокови́цꙋ, бжⷭ҇твеннымъ просвѣща́еми дх҃омъ, пречⷭ҇таѧ, свѧще́ннїи прⷪ҇ро́цы свѧще́нными тѧ̀ гла́сы провозвѣсти́ша, и҆зъ неѧ́же бг҃ъ сло́во, па́че вины́ же и҆ сло́ва, воплоти́сѧ за милосе́рдїе безчи́сленное."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ, бж҃е на́шъ."
 },
 {
  "type": "TEXT",
  "value": "Сокрꙋша́емо тѣ́ло ра́нами ꙗ҆влѧ́ше пра́вость твоеѧ̀ со́вѣсти, страстоте́рпице, ко хрⷭ҇тꙋ̀ бг҃ꙋ на́шемꙋ."
 },
 {
  "type": "TEXT",
  "value": "Ви́сѧщи высокѡ̀, ра̑ны, мч҃нице, терпѧ́щи, и҆ не ᲂу҆ѧ́звлено хранѧ́щи дꙋшѝ благоро́дїе, достохва́льнаѧ."
 },
 {
  "type": "TEXT",
  "value": "Претерпѣ́ла є҆сѝ зꙋбѡ́въ и҆ рꙋ́къ и҆ но́гъ ѿѧ́тїе, мч҃нице многострада́льнаѧ, взира́ющи ко хрⷭ҇тꙋ̀ женихꙋ̀ твоемꙋ̀."
 },
 {
  "type": "TEXT",
  "value": "Бг҃оро́диченъ: Чл҃вѣколю́бца ро́ждши бг҃а, бл҃голюби́ваѧ влⷣчце: того̀ молѝ, гее́нны ѻ҆гнѧ̀ и҆зба́витисѧ на́мъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ."
 },
 {
  "type": "TEXT",
  "value": "Свѣти́льника тѧ̀ сꙋ́щїи во тмѣ̀ пре́лести, неле́стнѡ наставлѧ́юща, ѡ҆брѣ́тше къ пꙋтє́мъ жи́зни, бг҃оно́се, невѣ́дѣнїѧ тмꙋ̀ ѿложи́ша, и҆ ꙗ҆ви́шасѧ свѣтови́дни вѣ́рою бжⷭ҇твенною, а҆вра́мїе."
 },
 {
  "type": "TEXT",
  "value": "Бо́дреннѡ, ᲂу҆моли́въ бг҃а, посыла́еши просвѣще́нїе спасе́нїѧ сꙋ́щымъ въ нощѝ і҆дѡлонеи́стовства ѡ҆держи̑мымъ, бг҃омꙋ́дре а҆вра́мїе: и҆ показа́лъ є҆сѝ всѧ̑ сы́ны свѣ́та и҆ днѐ бл҃года́тїю."
 },
 {
  "type": "TEXT",
  "value": "Безмо́лвнѡ твою̀ жи́знь соверши́въ, ꙗ҆̀же въ житїѝ треволнє́нїѧ, всебл҃же́нне, бж҃їими наде́ждами преше́лъ є҆сѝ, и҆ къ ти̑химъ приста́нищємъ дости́глъ є҆сѝ, а҆вра́мїе, нбⷭ҇нагѡ црⷭ҇тва и҆ бжⷭ҇твенныѧ свѣ́тлости."
 },
 {
  "type": "TEXT",
  "value": "Бг҃оро́диченъ: Ѡ҆тѧгче́на мѧ̀ дрема́нїемъ ᲂу҆ны́нїѧ, возста́ви твои́мъ хода́тайствомъ, мт҃и бж҃їѧ, и҆ не да́ждь ᲂу҆снꙋ́ти въ сме́рть грѣха̀, дв҃о, предста́тельницꙋ бо и҆ пꙋтевожда̀ моеѧ̀ жи́зни написꙋ́ю тѧ̀."
 },
 {
  "type": "HEADER",
  "value": "Конда́къ а҆вра́мїа, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Во пло́ти, ꙗ҆́кѡ а҆́гг҃лъ, на землѝ ꙗ҆ви́лсѧ є҆сѝ, и҆ поще́нїемъ бы́лъ є҆сѝ ꙗ҆́кѡ дре́во насажде́нное, водо́ю воздержа́нїѧ до́брѣ возврати́всѧ, и҆ тече́ньми твои́хъ сле́зъ скве́рнꙋ ѡ҆мы́въ: сегѡ̀ ра́ди ꙗ҆ви́лсѧ є҆сѝ прїѧ́телище бжⷭ҇твенное, а҆вра́мїе, дх҃а."
 },
 {
  "type": "TEXT",
  "value": "І҆́косъ: Тлѣ̑ннаѧ презрѣ́въ, нетлѣ̑нныѧ воспрїѧ́лъ є҆сѝ красѡты̀: сла̑сти плотскі̑ѧ возненави́дѣлъ є҆сѝ, мꙋ́дре, и҆змла́да возлюби́въ чистотꙋ̀. Тѣ́мъ, черто́га мїрска́гѡ ѿбѣжа́въ, сопрꙋ́жницы же благосла́вныѧ и҆ роди́телей ᲂу҆клони́всѧ, є҆ди́наго бг҃а ꙗ҆́снѡ рачи́телѧ возжела́въ и҆ возлюби́въ ѿ всеѧ̀, ѻ҆́ч҃е, дꙋшѝ и҆ се́рдца и҆́стиннѡ: сегѡ̀ ра́ди показа́лсѧ є҆сѝ дѣ́вства и҆ чистоты̀ прїѧ́телище бжⷭ҇твенное, а҆вра́мїе, дх҃а."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Шꙋ́мъ гла́са пра́зднꙋющихъ и҆дѣ́же є҆́сть ликꙋ́еши, страстоте́рпице съ дѣ́вами бг҃ꙋ зижди́телю пѣснопою́щи: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Оу҆́ды сокрꙋша́емы зрѧ́щи и҆ ногте́й и҆стерза́нїе терпѧ́щи, принесла́сѧ є҆сѝ бг҃ꙋ же́ртва, пѣснопою́щи: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Ꙗ҆ви́ласѧ є҆сѝ, ꙗ҆́кѡ лоза̀, бг҃омꙋ́драѧ, рꙋ́цѣ и҆ но́зѣ, ꙗ҆́кѡ вѣ̑тви, рѣ́жемы, и҆ на́мъ мы́сленно вїно̀ и҆сточа́ющее, сердца̀ ᲂу҆тѣша́ющее, и҆ страсте́й ѿрѣва́ющее пїѧ́нство."
 },
 {
  "type": "TEXT",
  "value": "Бг҃оро́диченъ: Во всего̀ человѣ́ка ѡ҆бле́ксѧ нескве́рный кромѣ̀ грѣха̀, и҆зъ ᲂу҆тро́бы твоеѧ̀, чⷭ҇таѧ, про́йде плотоно́сецъ: є҆го́же ᲂу҆молѝ, вѣ́рою тѧ̀ чествꙋ́ющыѧ спастѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Да вы́шнее црⷭ҇тво полꙋчи́ши и҆ сла́вꙋ неизрече́ннꙋю, сла́вꙋ же попира́емꙋю, мꙋ́дре, и҆ тлѣ́ннꙋю, ꙗ҆́кѡ смы́сленъ и҆ разꙋ́менъ преѡби́дѣлъ є҆сѝ мꙋ́дреннѡ."
 },
 {
  "type": "TEXT",
  "value": "Є҆гда̀ во́лкъ лꙋка́вый а҆́гницꙋ твою̀ расто́ргне льсти́внѣ, тогда̀ сегѡ̀, мꙋ́дре, чє́люсти сокрꙋши́лъ є҆сѝ: сїю́ же, ꙗ҆́кѡ па́стырь и҆зрѧ́днѣйшїй, къ жи́зни приве́лъ є҆сѝ."
 },
 {
  "type": "TEXT",
  "value": "Зако́нѡмъ повинꙋ́ѧсѧ влⷣчнимъ, заблꙋ́ждшее взыска́лъ є҆сѝ и҆ ѡ҆брѣ́лъ є҆сѝ, и҆ на ра́мена твоѧ̑ взе́мъ, всебл҃же́нне, ꙗ҆́кѡ па́стырь, вве́лъ є҆сѝ во ѡ҆гра́дꙋ покаѧ́нїѧ."
 },
 {
  "type": "TEXT",
  "value": "Бг҃оро́диченъ: Є҆ди́на є҆ди́нагѡ ѿ трⷪ҇цы родила̀ є҆сѝ во двꙋ̀ сꙋществꙋ̑, ѵ҆поста́си же є҆ди́нѣй ви́димаго, дв҃о. Є҆мꙋ́же пѣснопое́мъ: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Ю҆́ношски до́бльствовавши, страстоно́сице всехва́льнаѧ, и҆ на пре́лесть воздви́гла є҆сѝ побѣ̑ды: рꙋ́къ бо лише́нїѧ и҆ но́гъ терпѣ́ла є҆сѝ, сосцє́въ же и҆ зꙋбѡ́въ твои́хъ и҆скорене́нїе, мч҃нице, претерпѣ́ла є҆сѝ, въ ра́дости пѣснопою́щи: лю́дїе, превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Всесвѣтла̀, ꙗ҆́кѡ со́лнце, дѣ́вства свѣ́тлостьми, и҆ мꙋче́нїѧ добро́тами ѡ҆блиста́ла є҆сѝ, и҆ мі́ръ просвѣти́ла є҆сѝ свѣтолꙋ́чными сїѧ̑нїи твоегѡ̀ терпѣ́нїѧ, страстоте́рпице, вопїю́щи: ѻ҆́троцы, благослови́те, свѧще́нницы, воспо́йте, лю́дїе, превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Ѡ҆скверне́ннꙋю страстьмѝ дꙋ́шꙋ мою̀, бг҃оневѣ́сто, и҆ ѡ҆черне́ннꙋю прилѡ́ги ѕмі́ѧ, твои́ми мольба́ми ѿ лю́тыхъ ѡ҆чи́сти, и҆ свѣ́тлымъ ѡ҆сѣне́нїемъ твои́мъ, мꙋ́ченице а҆настасі́е, ѡ҆зарѝ вопи́ти: свѧще́нницы по́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: Тѧ̀ чи́стꙋю и҆ непоро́чнꙋю дѣ́ва жела́ющи, непоро́чно и҆ тѣ́ло и҆ дꙋ́шꙋ соблюдѐ, страсте́й подпалє́нїѧ терпѣ́нїемъ и҆спепели́вши, и҆скꙋше́нїе же мно́гихъ претерпѣ́вши мꙋ́къ, и҆ ны́нѣ въ нбⷭ҇ныхъ черто́зѣхъ ликꙋ́етъ съ тобо́ю, веселѧ́щисѧ во всѧ̑ вѣ́ки."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Побѣди́тели мꙋчи́телѧ и҆ пла́мене, благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Въ поги́бели ро́въ чи́стꙋю све́рже голꙋби́цꙋ твою̀ ѕлодѣ́йственный ѕмі́й, но сїю̀ и҆зве́лъ є҆сѝ, ѻ҆́ч҃е, всемꙋ́дреннѡ, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "И҆ въ житїѝ ѡ҆бходѧ̀, ѻ҆́ч҃е а҆вра́мїе, и҆ по кончи́нѣ вра́чь болѧ́щихъ ꙗ҆ви́лсѧ є҆сѝ, дх҃а бл҃года́тїю бжⷭ҇твенною, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Неѕло́бїемъ, бл҃же́нне, пра́вдою же и҆ цѣломꙋ́дрїемъ и҆ вѣ́рою просїѧ́въ, а҆́гг҃лѡмъ, прпⷣбне, счи́слилсѧ є҆сѝ, благослови́те, поѧ̀, дѣла̀ гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Стрꙋѝ живы́ѧ ꙗ҆ви́ласѧ є҆сѝ всест҃о́е селе́нїе, ѿ неѧ́же пїю́ще, ᲂу҆мертви́вшїисѧ, жи́знь наслѣ́дꙋемъ, вопїю́ще: благослови́те дѣла̀ всѧ̑ гдⷭ҇а, и҆ превозноси́те є҆го̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ."
 },
 {
  "type": "TEXT",
  "value": "На дре́вѣ повѣ́шена была̀ є҆сѝ, сло́ва бж҃їѧ ѡ҆бразꙋ́ющи стрⷭ҇ть бл҃же́ннꙋю, и҆ ѿсѣче́нїе терпѣ́ла є҆сѝ рꙋ́къ твои́хъ и҆ но́гъ, зꙋбѡ́въ и҆скорене́нїе, ѧ҆зы́ка же ѿрѣ́занїе и҆ сосцє́въ, чи́стаѧ а҆настасі́е, мона́шествꙋющихъ сла́во и҆ мч҃никѡвъ ᲂу҆краше́нїе."
 },
 {
  "type": "TEXT",
  "value": "Ꙗ҆́кѡ невѣ́ста ᲂу҆краси́ласѧ є҆сѝ добро́тою, ѡ҆брꙋчи́вшисѧ женихꙋ̀ страда́ньми добротво́рными, внꙋ́трь же черто́гѡвъ свѣтови́дныхъ, ꙗ҆́кѡ и҆збра́ннаѧ, всели́ласѧ є҆сѝ, носѧ́щи свѣщꙋ̀ дѣ́вственнꙋю. И҆ ны́нѣ црⷭ҇твꙋеши съ живꙋ́щимъ во вѣ́ки, а҆настасі́е, сїѧ́ющи."
 },
 {
  "type": "TEXT",
  "value": "И҆ска́паютъ болѣ̑зни твоѧ̑ сла́дость, грѣха̀ го́ресть ѿе́млющꙋ: ра́ка же то́читъ и҆сцѣле́нїй рѣ́ки, и҆ потоплѧ́етъ всѧ̑ стра̑сти и҆ недꙋ́ги лю̑тыѧ, въ сла́вꙋ сп҃совꙋ, честна́ѧ а҆настасі́е, и҆̀же по достоѧ́нїю тѧ̀ сла́вѧтъ."
 },
 {
  "type": "TEXT",
  "value": "До́блествоваша жєны̀ твои́мъ крⷭ҇то́мъ ᲂу҆крѣ́пльшесѧ, хрⷭ҇тѐ всеси́льне, и҆ вра́жїю главꙋ̀ многоко́зненнꙋю мꙋ́жески, сло́ве бж҃їй, сокрꙋши́ша, и҆ раѧ̀ ра́достно селе́нїе полꙋчи́вше, ѡ҆боже́нїе прїѧ́ша ди́вное, воспѣва́юще тѧ̀."
 },
 {
  "type": "TEXT",
  "value": "Бг҃оро́диченъ: Поне́сшаго тѧ̀ пло́ть ѿ жены̀ ꙗ҆́кѡ позна̀ мч҃ница твоѧ̀, гдⷭ҇и, дѣ́вственными ᲂу҆кра́шена лꙋча́ми, и҆ мꙋче́нїѧ кро́вїю ѡ҆багрена̀, тебѣ̀ бг҃ꙋ, во слѣ́дъ мт҃ре твоеѧ̀, сла́внѡ приведе́сѧ, ꙗ҆́кѡ црⷭ҇твꙋющемꙋ тва́рїю."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чи́стаѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Ви́дѣти сподо́билсѧ є҆сѝ, ѻ҆́ч҃е бг҃оно́се, чрезъ наде́ждꙋ тебѣ̀ дре́вле жела́ємаѧ, и҆́хже ѻ҆́ко не ви́дѣ, и҆ ᲂу҆́хо не слы́ша."
 },
 {
  "type": "TEXT",
  "value": "Красе́нъ ꙗ҆ви́лсѧ є҆сѝ бжⷭ҇твенными добродѣ́телей лꙋча́ми сїѧ́ѧ, а҆вра́мїе, и҆ кра́сномꙋ влⷣцѣ ра́дꙋѧсѧ предстои́ши."
 },
 {
  "type": "TEXT",
  "value": "Совокꙋпи́лсѧ є҆сѝ ликѡ́мъ всѣ́хъ преподо́бныхъ, и҆ съ ни́ми ѡ҆боже́нїѧ, прпⷣбне, полꙋчи́въ, молѝ є҆́же спасти́сѧ всѣ̑мъ на́мъ."
 },
 {
  "type": "TEXT",
  "value": "Де́нь весе́лїѧ приво́дитъ ра́достнѡ, свѧще́нное твоѐ, а҆вра́мїе, ᲂу҆спе́нїе, цр҃ковь чествꙋ́ющи житїѐ твоѐ."
 },
 {
  "type": "TEXT",
  "value": "Бг҃оро́диченъ: Благолюби́ваѧ дв҃о, ѡ҆ѕло́бленнꙋю грѣхо́мъ дꙋ́шꙋ мою̀ ᲂу҆блажѝ, и҆ бла̑гъ нбⷭ҇ныхъ прича́стника сотворѝ."
 },
 {
  "type": "HEADER",
  "value": "На лїтꙋргі́и прокі́менъ, гла́съ з҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло сг҃і."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Блаже́нъ мꙋ́жъ:"
 },
 {
  "type": "TEXT",
  "value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло м҃г."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю."
 }
]