ponomar-pwa/static/data/shared/menaion-daily/11-06/1.json

[
 {
  "type": "HEADER",
  "value": "Ное́мврїа ѕ҃"
 },
 {
  "type": "HEADER",
  "value": "И҆́же во ст҃ы́хъ ѻ҆ц҃а̀ на́шегѡ па́ѵла, а҆рхїепі́скопа кѡнстанті́нѧ гра́да, и҆сповѣ́дника."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Па́ѵелъ бг҃оглаго́ливый тѧ̀ подо́бника рꙋкополага́етъ тезоиме́ннѡ зове́ма, и҆ нра́вы ᲂу҆краша́ема тогѡ̀, всебл҃же́нне, и҆ бг҃оче́стїемъ, и҆ мꙋ́жествомъ дꙋшѝ, и҆ терпѣ́нїемъ ѡ҆бстоѧ́нїй, и҆ ре́вностїю распала́ема, правосла́вїѧ побо́рниче: є҆мꙋ́же и҆ ны́нѣ спрославлѧ́ешисѧ въ нбⷭ҇ныхъ ѻ҆би́телехъ."
 },
 {
  "type": "TEXT",
  "value": "А҆́рїа безбо́жнаго и҆ ѕлочести́ваго македо́нїа, тве́рдыми догма́тѡвъ твои́хъ жи́лами ᲂу҆дави́лъ є҆сѝ: пра́вымъ же сло́вомъ ᲂу҆че́нїѧ правосла́вныхъ мно́жєства, свѧщенномч҃ниче ѻ҆́ч҃е, ᲂу҆тверди́лъ є҆сѝ. Тѣ́мъ твоѐ пресвѣ́тлое и҆сповѣ́данїе прїе́мъ, црⷭ҇твїѧ показа̀ ѻ҆́бщника чл҃вѣколю́бецъ."
 },
 {
  "type": "TEXT",
  "value": "Тече́нїе соверши́вша тѧ̀ и҆ вѣ́рꙋ соблю́дша, і҆ера́рше бл҃же́нне, хрⷭ҇то́съ вѣнча̀ свѣ́тлымъ вѣнце́мъ пра́вды, и҆ ᲂу҆красѝ твоѐ и҆сповѣ́данїе, досточꙋ́дне: тѣ́мъ нбⷭ҇ное наслѣ́дїе прїе́мъ, сп҃сꙋ моли́сѧ ѡ҆ воспѣва́ющихъ тѧ̀."
 },
 {
  "type": "TEXT",
  "value": "Па́ѵле всебл҃же́нне, и҆сповѣ́данїѧ тезоимени́те, те́плѣ благохва́лѧщихъ тѧ̀ предста́тель бы́въ, ѿ всѧ́кїѧ бѣды̀, всѧ́кагѡ грѣха̀, и҆ бꙋ́ри страсте́й, и҆ мꙋчи́тельства, ѻ҆́ч҃е, и҆зба́ви, ꙗ҆́кѡ мч҃никъ непобори́мь, и҆ і҆ера́рхъ бл҃гопрїѧ́тенъ: дерзнове́нїе бо стѧжа̀ ко хрⷭ҇тꙋ̀ бг҃ꙋ на́шемꙋ."
 },
 {
  "type": "HEADER",
  "value": "Сла́ва, гла́съ а҃."
 },
 {
  "type": "TEXT",
  "value": "Ге́рманово: А҆рхїере́йскою ѻ҆де́ждею ѡ҆дѣ́ѧвсѧ, прпⷣбне ѻ҆́ч҃е, тезоимени́томꙋ па́ѵлꙋ поревнова́лъ є҆сѝ: гонє́нїѧ претерпѣ́въ и҆ ѡ҆бстоѧ̑нїѧ, въ свои́хъ при́сныхъ болѣ́знехъ, вредослѡ́внаѧ мнѣ̑нїѧ а҆́рїєва посрами́лъ є҆сѝ: и҆ пострада́въ бо за безнача́льнꙋю и҆ є҆диносꙋ́щнꙋю трⷪ҇цꙋ, ѕлочести́ваго и҆ дꙋхобо́рца низложи́лъ є҆сѝ македо́нїа, и҆ правосла́внꙋю всѣ̑мъ ᲂу҆ѧсни́въ вѣ́рꙋ, съ невеще́ственными водворѧ́ешисѧ а҆́гг҃лы. Съ ни́миже и҆ ны́нѣ молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Всехва́льнїи мч҃ницы:"
 },
 {
  "type": "TEXT",
  "value": "Заколе́нїе твоѐ непра́ведное, хрⷭ҇тѐ, дв҃а зрѧ́щи, пла́чꙋщи, вопїѧ́ше тѝ: ча́до сладча́йшее, ка́кѡ безъ пра́вды ᲂу҆мира́еши; ка́кѡ на дре́вѣ ви́сиши, и҆́же всю̀ зе́млю повѣ́шей на вода́хъ; не ѡ҆ста́ви менѐ є҆ди́нꙋ, бл҃годѣ́телю многоми́лостиве, мт҃рь и҆ рабꙋ̀ твою̀, молю́сѧ."
 },
 {
  "type": "HEADER",
  "value": "На стїхо́внѣ во ѻ҆ктѡ́ихѣ."
 },
 {
  "type": "TEXT",
  "value": "Та́же сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "HEADER",
  "value": "Стїхи́ра, гла́съ а҃:"
 },
 {
  "type": "TEXT",
  "value": "Прпⷣбне ѻ҆́ч҃е па́ѵле, добродѣ́телїю ѡ҆дѣ́ѧвсѧ ѿ хрⷭ҇та̀ бг҃а, всѧ́кїй де́мѡнскїй и҆ ва́рварскїй до́блественнѣ побѣди́лъ є҆сѝ по́лкъ, вѣ́рою ᲂу҆крѣплѧ́емь, на ка́мени ᲂу҆тверди́лъ є҆сѝ твоѐ ста́до, ѿ всѧ́кїѧ є҆́реси ненавѣ́тно. Тѣ́мъ со а҆́гг҃лы ликовствꙋ́ѧ, сп҃сꙋ моли́сѧ, въ ми́рѣ сохрани́тисѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ в҃."
 },
 {
  "type": "TEXT",
  "value": "Вѷзанті́ево: По́стнꙋю пꙋчи́нꙋ преплы́въ воздержа́нїѧ вѣ́тромъ, страсте́й бꙋ́ри и҆збѣ́глъ є҆сѝ, прпⷣбне. Тѣ́мъ наименова́нїемъ тезоимени́тъ бы́въ бжⷭ҇твенномꙋ па́ѵлꙋ, гонє́нїѧ претерпѣ́лъ є҆сѝ и҆ ѡ҆бстоѧ̑нїѧ, ѡ҆ѕлоблѧ́емь въ є҆реті́чествꙋющихъ ѧ҆зыкобо́лїихъ. Тѣ́мъ а҆́рїєва низложи́лъ є҆сѝ мнѣ̑нїѧ, и҆ несто́рїєвы є҆́рєси побѣди́въ, цр҃кве хрⷭ҇то́вы ꙗ҆ви́лсѧ є҆сѝ ревни́тель: того̀ молѝ, і҆ера́рше блаже́нне, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва."
 },
 {
  "type": "TEXT",
  "value": "Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи гл҃го́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. Что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче."
 },
 {
  "type": "HEADER",
  "value": "Тропа́рь, гла́съ г҃:"
 },
 {
  "type": "TEXT",
  "value": "Бжⷭ҇твенныѧ вѣ́ры и҆сповѣ́данїемъ, дрꙋга́го па́ѵла тѧ̀ цр҃ковь ревни́телѧ во свѧще́нницѣхъ показа̀: свозопїе́тъ тѝ и҆ а҆́вель ко гдⷭ҇ꙋ, и҆ заха́рїина кро́вь пра́веднаѧ. ѻ҆́ч҃е прпⷣбне, хрⷭ҇та̀ бг҃а молѝ, дарова́тисѧ на́мъ ве́лїей ми́лости."
 },
 {
  "type": "HEADER",
  "value": "На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃а́гѡ канѡ́нъ на ѕ҃, ѳеофа́ново, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Тайноводи́телѧ па́ѵла пою̀ премꙋ́дрѡ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Вѣ́ры ᲂу҆твержде́нїе, цр҃кве ᲂу҆чи́телѧ, и҆ столпа̀ непоколеби́ма и҆сповѣ́данїѧ тѧ̀, и҆ многосвѣ́тлаго свѣти́льника бл҃года́ти, и҆ ᲂу҆ста̀ ѻ҆гнедохнове́нна, па́ѵле, проповѣ́дꙋемъ."
 },
 {
  "type": "TEXT",
  "value": "Па́ѵелъ велича́йшїй, со́лнце вселе́нныѧ, требл҃же́нне. Предлага́етъ тѧ̀ па́ѵла втора́го, ꙗ҆́кѡ ѻ҆́гнь попалѧ́юща крѣ́пкѡ є҆́рєси, и҆ сѣки́рꙋ, сѣкꙋ́ща безбо́жїе."
 },
 {
  "type": "TEXT",
  "value": "Зако́ннѡ подвиза́лсѧ є҆сѝ предбѣ́дствꙋѧ, бг҃оглаго́ливе, бжⷭ҇твенномꙋ проповѣ́данїю, ꙗ҆́кѡ і҆ера́рхъ вѣ́ренъ, и҆ ᲂу҆дави́лъ є҆сѝ жи́лами твои́хъ догма́тѡвъ, ꙗ҆́кѡ ѕвѣ́рѧ, а҆́рїа сꙋемꙋ́дреннаго."
 },
 {
  "type": "TEXT",
  "value": "Бг҃оро́диченъ: Марі́ю пречⷭ҇тꙋю, прїиди́те, воспои́мъ всѝ, є҆ди́нꙋ ᲂу҆краси́вшꙋю человѣ́чество, и҆ ро́ждшꙋю бг҃а воплоще́ннаго, дв҃ꙋ же пребы́вшꙋ неврежде́нꙋ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "TEXT",
  "value": "Сыноположи́всѧ бл҃года́тїю бжⷭ҇твенною, є҆стество́мъ сн҃а є҆диноро́днагѡ въ тва́рь не сведѐ, ѻ҆ц҃ꙋ̀ собезнача́льна, па́ѵле, па́ѵла догма́тѡмъ бг҃оно́снагѡ послѣ́дꙋѧ."
 },
 {
  "type": "TEXT",
  "value": "Оу҆сты̀ и҆ се́рдцемъ и҆ ѧ҆зы́комъ, мꙋ́дрость и҆ си́лꙋ бж҃їю, сло́во ѵ҆поста́сное, ты̀ хрⷭ҇та̀ проповѣ́далъ є҆сѝ, па́ѵле бг҃омꙋ́дре прпⷣбне, ѕлочести́ваго ѡ҆бличи́въ а҆́рїа."
 },
 {
  "type": "TEXT",
  "value": "Пресꙋ́щественныѧ вла́сти, дх҃а ст҃а́го бж҃їѧ, и҆́мже бг҃отвори́мсѧ, сꙋдо́мъ пра́веднымъ, всемꙋ́дре, є҆стество́мъ бг҃а проповѣ́далъ є҆сѝ, и҆ вседѣ́тельна и҆ всеси́льна."
 },
 {
  "type": "TEXT",
  "value": "Бг҃оро́диченъ: Безнача́льна роди́телѧ сло́во, вы́шше всѧ́кагѡ нача́ла, нача́ло ны́нѣ воплоща́емо и҆зъ тебє̀, чⷭ҇таѧ, прїѧ́тъ, и҆ подъ лѣ́томъ бы́сть, лѣ́тъ всѣ́хъ превы́шши."
 },
 {
  "type": "HEADER",
  "value": "Сѣда́ленъ, гла́съ г҃:"
 },
 {
  "type": "TEXT",
  "value": "До́гмꙋ бжⷭ҇твеннꙋю придержа́въ, глаго́лъ безбо́жный и҆зве́рглъ є҆сѝ, па́ѵле бг҃омꙋ́дре, посрами́въ а҆́рїа. Ѻ҆ц҃ꙋ́ бо сн҃а є҆диносꙋ́щна проповѣ́далъ є҆сѝ, вѣ̑рныѧ ᲂу҆тверди́въ. ѻ҆́ч҃е прпⷣбне, хрⷭ҇та̀ бг҃а молѝ, дарова́тисѧ на́мъ ве́лїей ми́лости."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ꙗ҆́кѡ сосꙋ́да сы́й и҆збра́ннагѡ тезоимени́тъ, ѻ҆́ч҃е, и҆ подража́тель, бѣды̑ претерпѣ́лъ є҆сѝ за вѣ́рꙋ и҆ гонє́нїѧ, и҆ ꙗ҆́кѡ то́й въ ри́мъ прїи́де, прпⷣбне, всю́дꙋ проповѣ́дꙋѧ трⷪ҇цы равноче́стное: тѣ́мъ и҆ тече́нїе во а҆рме́нїи сконча́въ, досто́йнѡ прїѧ́лъ є҆сѝ ѿ гдⷭ҇а вѣне́цъ, посрами́въ македо́нїа и҆ безбо́жнаго а҆́рїа. Тѣ́мъ молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
 },
 {
  "type": "TEXT",
  "value": "Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стрⷭ҇ти твоѧ̑."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Че́сть многоцѣ́ннꙋю твоемꙋ̀ верхꙋ̀ и҆сповѣ́данїѧ вѣне́цъ, ꙗ҆́кѡ побѣдоно́сцꙋ, живоно́сною десни́цею зижди́тель возложѝ, па́ѵле бг҃оѧвле́нне блаже́нне."
 },
 {
  "type": "TEXT",
  "value": "Ꙗ҆́коже предподвиза́всѧ благочести́выхъ ра́ди, всемꙋ́дре, догма́тѡвъ, прїѧ́лъ є҆сѝ воздаѧ̑нїѧ: ны́нѣ дре́ва жи́зни полꙋчи́въ, бл҃же́нне, па́ѵле бг҃оѧвле́нне чꙋ́дне."
 },
 {
  "type": "TEXT",
  "value": "На нбⷭ҇нѣй землѝ ликоходи́ти, и҆дѣ́же но́ги кро́ткихъ ликовствꙋ́ютъ, сподо́билсѧ є҆сѝ, ꙗ҆́кѡ свѣ́телъ подви́жникъ, и҆ и҆́стины, всече́стне па́ѵле, бы́въ побо́рникъ."
 },
 {
  "type": "TEXT",
  "value": "Бг҃оро́диченъ: Є҆диносꙋ́ществомъ, ѻ҆́ч҃имъ, сп҃се, ꙗ҆́кѡ сн҃ъ ви́димь, и҆зъ дв҃ы є҆диносꙋ́щенъ на́мъ воплоти́всѧ, бы́лъ є҆сѝ, спастѝ восхотѣ́въ человѣ́чество."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ́мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Па́жить є҆́реси и҆ гни́лость ᲂу҆ста́вилъ є҆сѝ, приложи́въ и҆зѧ́щнѣйшее, бг҃омꙋ́дре, врачева́нїе, ѻ҆́ч҃е, и҆сповѣ́данїе твоѐ, и҆ твои́хъ догма́тѡвъ свѣ́тлое, ᲂу҆ма́ же чистѣ́йшее, и҆ ре́вность бжⷭ҇твеннꙋю."
 },
 {
  "type": "TEXT",
  "value": "Бога́тнѡ и҆злїѧ́сѧ ст҃а́гѡ дх҃а благода́ть твои̑мъ ᲂу҆стна́мъ, всеблаже́нне, побо́рника и҆́стиннѡ правосла́вїѧ крѣ́пка ѡ҆брѣ́тши тѧ̀, преизѧ́щна вѣ́рныхъ: тѣ́мъ просвѣти́лъ є҆сѝ бжⷭ҇твєнныѧ собо́ры."
 },
 {
  "type": "TEXT",
  "value": "А҆́рїево безбо́жное, и҆ македо́нїево вредосло́вїе, па́ѵле, бг҃одꙋхнове́нныхъ твои́хъ догма́тѡмъ и҆ ᲂу҆че́нїй и҆спращева́лъ є҆сѝ плетє́нїѧ, ꙗ҆́кѡ дв҃дъ и҆ноплеме́нника, пре́жде сїѧ̑ ᲂу҆дави́въ, и҆ тве́рдѡ низве́рглъ є҆сѝ."
 },
 {
  "type": "TEXT",
  "value": "Бг҃оро́диченъ: Сы́й превѣ́чный, ны́нѣ подъ лѣ́ты бы́сть, пло́ть прїе́мъ, дв҃о, ѡ҆дꙋшевле́нꙋ и҆ ᲂу҆́мнꙋ, сло́во безнача́льное, и҆зъ тебє̀, неискꙋсобра́чнаѧ чⷭ҇таѧ, всѣ̑мъ пою́щымъ тѧ̀ ми́ръ да́рꙋѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве."
 },
 {
  "type": "TEXT",
  "value": "Глаго́лавый на высотꙋ̀ вредосло́вїе, и҆ сн҃а, и҆ сло́ва бж҃їѧ а҆́рїй въ тва́рь низведы́й, ѿ тебє̀ ѻ҆каѧ́нный, бг҃омꙋ́дре, ѡ҆сꙋди́сѧ."
 },
 {
  "type": "TEXT",
  "value": "Безꙋ́мный и҆ несмы́сленный и҆ безбо́жный ѿве́ргъ, ѻ҆́ч҃е, македо́нїй бжⷭ҇твеннаго дх҃а, твои́мъ крѣ́пкимъ противле́нїемъ, бг҃оѧвле́нне, низве́ржесѧ."
 },
 {
  "type": "TEXT",
  "value": "Оу҆мерщвлѧ́етсѧ плѣ́жꙋщїй ѕмі́й живи́тельными твои́ми словєсы̀, приложи́вый є҆ресе́й по́лкъ, ст҃и́телю бж҃їй всебл҃же́нне, бг҃оглаго́льниче свѧще́ннѣйше."
 },
 {
  "type": "TEXT",
  "value": "Бг҃оро́диченъ: Пое́мъ, дв҃о бг҃ома́ти, па́че є҆стества̀ ржⷭ҇тво̀, и҆ твою̀ нескве́рнꙋю чистотꙋ̀: и҆́бо въ тебѣ̀ ди́внѡ стече́сѧ дѣ́вство и҆ ржⷭ҇тво̀ нетлѣ́нно."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Ѡ҆блиста́вый на землѝ, ꙗ҆́кѡ ѕвѣзда̀ небосвѣ́тлаѧ, каѳолі́ческꙋю просвѣща́еши цр҃ковь ны́нѣ, ѡ҆ не́йже и҆ страда́льчествовалъ є҆сѝ, дꙋ́шꙋ твою̀, па́ѵле, предложи́въ: и҆ ꙗ҆́коже заха́рїина и҆ а҆́велева, ꙗ҆́снѡ вопїе́тъ твоѧ̀ кро́вь ко гдⷭ҇ꙋ."
 },
 {
  "type": "TEXT",
  "value": "І҆́косъ: Свы́ше и҆мѣ́лъ є҆сѝ, па́ѵле, зва́нїе, рождество́ же до́лѣ ѿ землѝ, ꙗ҆́кѡ са́дъ красе́нъ и҆спо́лнь сꙋ́щи, ꙗ҆́кѡ ѿ раѧ́ бо процвѣ́лъ є҆сѝ посто́мъ, всѐ благово́нствꙋѧ ѿ вонѝ мно́гихъ твои́хъ трꙋда̀ по́двигѡвъ, по́тѡвъ, заточе́нїѧ, гла́да, жа́жды и҆ всѧ́кїѧ тѣсноты̀: въ ни́хже проше́лъ є҆сѝ благоискꙋ́снѡ, и҆ вѣнце́мъ побѣ́ды ᲂу҆краша́емь, вопїе́тъ бо твоѧ̀ кро́вь ко гдⷭ҇ꙋ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ."
 },
 {
  "type": "TEXT",
  "value": "Преше́лъ є҆сѝ, бг҃омꙋ́дре, къ нбⷭ҇нымъ, па́ѵле, ски́нїамъ, и҆ прибли́живсѧ бг҃ꙋ, прича́стїемъ ѡ҆божа́емь, бжⷭ҇твенъ бы́лъ є҆сѝ, поѧ̀, прпⷣбне: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ."
 },
 {
  "type": "TEXT",
  "value": "Воꙋмлѧ́еми твои́ми словєсы̀, ᲂу҆́чимсѧ, па́ѵле всехва́льне, ꙗ҆́кѡ въ со́лнцѣхъ тре́хъ нераздѣ́льное, несѣко́мо почита́ти бжⷭ҇тво̀, є҆мꙋ́же и҆ пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ."
 },
 {
  "type": "TEXT",
  "value": "Ꙗ҆́кѡ всесвѧще́нное бжⷭ҇твенное и҆ бг҃оꙋго́дное и҆сповѣ́данїе твоѐ: ꙗ҆́кѡ зла́то бо ѡ҆чи́стивсѧ, бг҃ꙋ прине́слсѧ є҆сѝ же́ртва благопрїѧ́тна, веселѧ́сѧ, прпⷣбне, подража́нїемъ стрⷭ҇те́й сп҃са на́шегѡ."
 },
 {
  "type": "TEXT",
  "value": "Бг҃оро́диченъ: Всѣ̑мъ хода́таица человѣ́кѡмъ є҆ди́на ꙗ҆ви́ласѧ є҆сѝ бжⷭ҇твеннагѡ и҆збавле́нїѧ, и҆зба́вителѧ всѣ́хъ ро́ждши, всенепоро́чнаѧ. Є҆мꙋ́же всѝ пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Текꙋ́тъ и҆стѡ́чницы твои́хъ догма́тѡвъ, и҆ всю̀ цр҃ковь напаѧ́ютъ: кро́вїю же честно́ю твое́ю, ѻ҆́ч҃е, всѧ̑ ѡ҆свѧти́лъ є҆сѝ, правосла́вною вѣ́рою тебѣ̀ послѣ́довавшыѧ, гдⷭ҇а по́йте, вопїю́щыѧ, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Приста́нищꙋ ти́хомꙋ ны́нѣ приста́лъ є҆сѝ, житє́йскаѧ треволнє́нїѧ ѿри́нꙋвъ: и҆мѣ́лъ бо є҆сѝ направлѧ́юща всѐ ше́ствїе твоѐ корми́телѧ гдⷭ҇а, па́ѵле всехва́льне, ма́нїемъ всѧ̑ творѧ́щаго, є҆го́же превозно́симъ во всѧ̑ вѣ́ки."
 },
 {
  "type": "TEXT",
  "value": "Свѣ́тъ трисїѧ́ненъ пребжⷭ҇твенныѧ трⷪ҇цы въ тѧ̀ всели́всѧ, свѣ́тъ тѧ̀ вторы́й показа̀, просвѣща́юща собо́ръ правосла́вныхъ, є҆реті́ческїй же по́лкъ, ѻ҆́ч҃е, ѡ҆мрача́юща, и҆ гдⷭ҇а по́йте, вопїю́ща, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Глаго́лѡмъ прⷪ҇ро́чєскимъ послѣ́дꙋюще, дв҃о, тѧ̀ бцⷣꙋ возвѣща́емъ: родила́ бо є҆сѝ ѻ҆троча̀ всѣ́хъ дре́внѣйша, є҆мманꙋ́илъ нарица́ема, є҆мꙋ́же ны́нѣ зове́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о."
 },
 {
  "type": "TEXT",
  "value": "Всего̀ менѐ сама́го приношꙋ̀, бг҃оглаго́ливе, бжⷭ҇твенномꙋ покро́вꙋ твоемꙋ̀, ꙗ҆́кѡ свѧщенномꙋ́ченикъ вла́сть рѣши́ти прегрѣшє́нїѧ ѿ хрⷭ҇та̀ прїе́мъ, мои́хъ согрѣше́нїй плени̑цы растерза́въ, спаси́ мѧ моли́твами твои́ми, и҆ бжⷭ҇твеннымъ свѣ́томъ просвѣтѝ."
 },
 {
  "type": "TEXT",
  "value": "Но́въ ꙗ҆ви́лсѧ є҆сѝ ре́вностїю разжига́емь, па́ѵле преизѧ́щне, и҆́же въ раѝ ны́нѣ неизречє́ннаѧ словеса̀, ѻ҆́ч҃е, ᲂу҆слы́шалъ є҆сѝ: ꙗ҆́кѡ ѻ҆́бщникъ бо нра́вѡвъ, нарече́нїѧ бо сопричасти́лсѧ є҆сѝ, и҆ вѣне́цъ прїе́мъ црⷭ҇твїѧ хрⷭ҇то́ва благолѣ́пнѣйшїй."
 },
 {
  "type": "TEXT",
  "value": "Ꙗ҆́кѡ нѣ́кїй хра́мъ ꙗ҆ви́лсѧ є҆сѝ ѡ҆глаго́льникъ всѧ́кїѧ є҆́реси, правосла́вїѧ же, свѧщенномꙋ́чениче, бжⷭ҇твенный побо́рникъ, лꙋча́ми бл҃года́ти просвѣще́нъ ꙗ҆́вѣ, и҆ свѣ́томъ, па́ѵле всесла́вне, несозда́нныѧ трⷪ҇цы ѡ҆блиста́емь."
 },
 {
  "type": "TEXT",
  "value": "Бг҃оро́диченъ: Пло́тїю и҆зъ тебє̀ сло́во, всенепоро́чнаѧ, ѡ҆дѣ́ѧвсѧ, воплоти́всѧ же, поживѐ въ мі́рѣ, ꙗ҆́кѡ бл҃гоꙋтро́бенъ, пребы́въ не хꙋ́ждше, ꙗ҆́кѡ пре́жде безтѣле́сенъ, и҆ дре́вле всѧ̑ мꙋ́чащаго бжⷭ҇твенною си́лою низложѝ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Дх҃омъ во ст҃и́лищи:"
 },
 {
  "type": "TEXT",
  "value": "Ре́вностїю распалѧ́емь ѿ те́плагѡ се́рдца, дх҃о́вный побо́рникъ бл҃года́ти ꙗ҆ви́лсѧ є҆сѝ, собо́рище є҆реті́ческое мече́мъ разсѣ́клъ слове́съ твои́хъ, ст҃и́телю: тече́нїе же соверши́въ, равностоѧ́тель бы́лъ є҆сѝ мч҃ническомꙋ мно́жествꙋ."
 },
 {
  "type": "TEXT",
  "value": "Бг҃оро́диченъ: Неизрече́ннагѡ чревоноше́нїѧ была̀ є҆сѝ пренепоро́чнаѧ невѣ́ста, и҆ ꙗ҆́кѡ сꙋ́щи честнѣ́йшїй хра́мъ, бцⷣе: свѣ́тъ бо превѣ́чный въ тѧ̀ всели́сѧ, и҆ родила̀ є҆сѝ бг҃а сло́ва: пою́ще твоѐ ржⷭ҇тво̀, велича́емъ досто́йнѡ, всенепоро́чнаѧ ѻ҆трокови́це."
 },
 {
  "type": "HEADER",
  "value": "На стїхо́внѣ во ѻ҆ктѡ́ихѣ. Сла́ва, гла́съ з҃:"
 },
 {
  "type": "TEXT",
  "value": "Вни́кнꙋлъ є҆сѝ во глꙋбины̑ дх҃а, и҆ ꙗ҆́кѡ безпло́тенъ на землѝ пожи́въ, и҆ ѿтꙋ́дꙋ поче́рплъ бога́тство бж҃е́ственнагѡ зна́нїѧ, правосла́вїемъ человѣ́ки ѡ҆богати́лъ є҆сѝ, ᲂу҆чє́нїи твои́ми, прпⷣбне ѻ҆́ч҃е."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "TEXT",
  "value": "Ви́дѧщи на дре́вѣ просте́рта а҆́гнца, а҆́гница, и҆ дв҃а посредѣ̀ двою̀ разбѡ́йникꙋ, ᲂу҆вы̀ мнѣ̀, вопїѧ́ше, сла́дкое ча́до. Что̀ сѐ стра́нное и҆ пресла́вное та́инство; ка́кѡ тѧ̀ беззако́нный собо́ръ на крⷭ҇тѣ̀ пригвоздѝ и҆ же́лчїю напоѝ, ма́нною напита́вшаго человѣ́ки;"
 },
 {
  "type": "HEADER",
  "value": "На лїтꙋргі́и, блажє́нна ѻ҆ктѡ́иха, на д҃: и҆ ѿ канѡ́на ст҃а́гѡ пѣ́снь г҃-ѧ, на д҃."
 },
 {
  "type": "HEADER",
  "value": "Прокі́менъ гла́съ з҃:"
 },
 {
  "type": "TEXT",
  "value": "Восхва́лѧтсѧ прпⷣбнїи:"
 },
 {
  "type": "TEXT",
  "value": "Сті́хъ: Воспо́йте гдⷭ҇еви:"
 },
 {
  "type": "HEADER",
  "value": "А҆пⷭ҇лъ, къ є҆вре́ємъ, зача́ло ти҃і, ѿ полꙋ̀:"
 },
 {
  "type": "TEXT",
  "value": "Всѧ́къ первосвѧще́нникъ:"
 },
 {
  "type": "TEXT",
  "value": "А҆ллилꙋ́їа, гла́съ в҃: Свѧще́нницы твоѝ:"
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло ѯ҃д."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю:"
 }
]