ponomar-pwa/static/data/shared/akathists/panteleimon/full.json

[
 {
  "type": "HEADER",
  "value": "Канѡ́нъ ст҃а́гѡ великомч҃ника и҆ цѣли́телѧ пантелеи́мона."
 },
 {
  "type": "HEADER",
  "value": "Тропа́рь, гла́съ г҃:"
 },
 {
  "type": "TEXT",
  "value": "С трастоте́рпче ст҃ы́й и҆ цѣле́бниче пантелеи́моне, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ."
 },
 {
  "type": "HEADER",
  "value": "Канѡ́нъ ст҃а́гѡ, гла́съ в҃. Творе́нїе Ѳеофа́ново, є҆гѡ́же краегране́сїе: Пантелеи́мона всеизрѧ́днаго мꙋ́ченика пою̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "П ристꙋ́пль ᲂу҆се́рднѡ ко хрⷭ҇тꙋ̀, пре́жде сконча́нїѧ є҆́же ѡ҆ хрⷭ҇тѣ̀, мертвеца̀ пе́рвѣе воздви́глъ є҆сѝ, ны́нѣ же мѧ̀, пребога́те, ᲂу҆мерщвле́на грѣхо́внымъ ᲂу҆грызе́нїемъ, твои́ми моли́твами, ѽ пантелеи́моне, ѡ҆животворѝ."
 },
 {
  "type": "TEXT",
  "value": "В озсїѧ̀ ꙗ҆́коже ѕвѣзда̀, носѧ̀ во ю҆́ности ста́ростный и҆ бг҃омꙋ́дрый ра́зꙋмъ: добро́тою же тѣ́ла благолѣ́пїе дꙋшѝ стѧжа́въ, препросла́вленномꙋ сло́вꙋ ꙗ҆ви́лсѧ є҆сѝ прекра́сенъ."
 },
 {
  "type": "TEXT",
  "value": "Оу҆ мертви́всѧ мі́рꙋ, и҆ во хрⷭ҇та̀, блаже́нне, ѡ҆дѣ́ѧвсѧ ба́нею креще́нїѧ, бы́лъ є҆сѝ бг҃оно́сенъ ѻ҆рга́нъ, и҆ прїѧ́телище дѣ́йства дх҃ꙋ, всѣ̑мъ ᲂу҆гожда́ѧ, всѣ́хъ ᲂу҆врачꙋ́ѧ недꙋ́ги."
 },
 {
  "type": "TEXT",
  "value": "Сла́ва: Премꙋ́дрость сестрꙋ̀ себѣ̀ притвори́въ, и҆ прича́стникъ жи́зни ведо́мь, ѿ неѧ̀ почти́лсѧ є҆сѝ, и҆ вѣнце́мъ дарова́нїй ᲂу҆краси́лсѧ є҆сѝ, бжⷭ҇твенныѧ зарѝ, блаже́нне, ѡ҆блиста́ѧ свѣ́тлостїю."
 },
 {
  "type": "TEXT",
  "value": "И҆ ны́нѣ: Благослове́нми, прест҃а́ѧ чⷭ҇таѧ, є҆стество̀ ᲂу҆да́лено преслꙋша́нїемъ бы́вшее ѿ зижди́телѧ, хрⷭ҇та̀ ро́ждши вѣнча́ла є҆сѝ, и҆ тлѣ́нїѧ свободи́ла є҆сѝ. тѣ́мже ра́дꙋющисѧ, всѝ вѣ́рнїи тѧ̀ ᲂу҆блажа́емъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "С ловеса̀ дх҃а ᲂу҆слы́шавъ, бы́лъ є҆сѝ ꙗ҆́кѡ землѧ̀ до́браѧ и҆ благопло́днаѧ, прїе́мый сѣ́мѧ многоцѣ́нно, и҆ роди́вый, треблаже́нне, спасе́нїе дꙋша́мъ."
 },
 {
  "type": "TEXT",
  "value": "Оу҆ мертви́лъ є҆сѝ мꙋдрова́нїе ѕмїи́на ᲂу҆грызе́нїѧ, и҆ дꙋ́шꙋ ѡ҆живи́лъ є҆сѝ, бг҃одохнове́ннѡ возроди́всѧ, и҆ цр҃ю̀ всѣ́хъ предстоѧ̀."
 },
 {
  "type": "TEXT",
  "value": "П осрами́лъ є҆сѝ безбо́жное мꙋчи́телей повелѣ́нїе, и҆ ко хрⷭ҇тꙋ̀ прите́клъ є҆сѝ: вмѣ́стѡ всѣ́хъ сего̀ стѧжа́въ, и҆ бы́лъ є҆сѝ, бг҃омꙋ́дре, вели́кїй кꙋпе́цъ."
 },
 {
  "type": "TEXT",
  "value": "Сла́ва: Ма́тере твоеѧ̀ благоче́стїе возлю́бль, сла́вне, ѻ҆́ч҃ее же возненави́дѣлъ є҆сѝ безбо́жїе многомѧте́жное, ꙗ҆́кѡ и҆мѣ́ѧ ра́зꙋмъ, лꙋ́чшее и҆збра́лъ є҆сѝ."
 },
 {
  "type": "TEXT",
  "value": "И҆ ны́нѣ: Носѧ́й бжⷭ҇твеннымъ манове́нїемъ всю̀ тва́рь гдⷭ҇ь, на рꙋкꙋ̀ но́ситсѧ твоє́ю, дв҃о. є҆го́же ны́нѣ молѝ, и҆зба́вити ѿ бѣ́дъ пою́щыѧ тѧ̀."
 },
 {
  "type": "TEXT",
  "value": "Г дⷭ҇и, поми́лꙋй. [Три́жды.]"
 },
 {
  "type": "HEADER",
  "value": "Сѣда́ленъ, гла́съ д҃: Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Д о́блѧго страда́льца благоче́стїѧ хрⷭ҇то́ва восхва́лимъ свѣ́тлѡ, пантелеи́мона вѣ́рнїи, ѱалмы̑ и҆ пѣ́ньми и҆ пѣ́сньми дꙋхо́вными, и҆́мже мꙋчи́тельство неви́димагѡ врага̀ си́лою бжⷭ҇твенною попра́сѧ, и҆ недꙋ́гѡвъ и҆сцѣле́нїе бога́тнѡ ѿ гдⷭ҇а дарова́сѧ творѧ́щымъ вѣ́рнѡ бжⷭ҇твенный и҆ честны́й пра́здникъ є҆гѡ̀."
 },
 {
  "type": "HEADER",
  "value": "Сла́ва, дрꙋгі́й, гла́съ и҆ Подо́бенъ то́йже:"
 },
 {
  "type": "TEXT",
  "value": "Є҆ рмола́а мꙋ́драгѡ, мꙋ́чениче, слове́съ послꙋ́шалъ є҆сѝ, и҆ ѡ҆ста́вилъ є҆сѝ а҆́бїе хꙋдо́жество земно́е, ꙗ҆́кѡ ме́рзско, ꙗ҆́кѡ некрѣ́пко, ꙗ҆́кѡ гꙋби́тельно, и҆мѣ́ѧ хрⷭ҇то́вы стра̑сти, ᲂу҆чє́нїѧ жи́зни въ се́рдцы твое́мъ, неисцѣ́льнѡ стра́ждꙋщымъ здра́вїе, пантелеи́моне, да́рꙋѧ. тѣ́мже моли́сѧ ѡ҆ творѧ́щихъ любо́вїю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ: Треволне́нїи страстны́ми, безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менѐ ѻ҆каѧ́ннаго поги́бнꙋти, бе́зднꙋ милосе́рдїѧ ро́ждши: ра́звѣ бо тебє̀ наде́жды не и҆́мамъ. да не врагѡ́мъ ᲂу҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ, и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а."
 },
 {
  "type": "HEADER",
  "value": "Пѣ́снь д҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "П ослѣ́дꙋѧ влⷣцѣ любо́вїю, расточи́лъ є҆сѝ бога́тство ни́щымъ, себѐ ѡ҆бнажа́ѧ къ страда́нїю, є҆́же и҆ проше́лъ є҆сѝ, вѣ̑чныѧ надє́жды прови́дѣвъ."
 },
 {
  "type": "TEXT",
  "value": "Х вале́нїѧ бг҃ꙋ же́ртвꙋ прине́слъ є҆сѝ, ꙗ҆́вѣ возгнꙋша́всѧ і҆́дѡльскихъ тре́бъ: все́ же шата́нїе нечести́выхъ, страстоте́рпче, попра́лъ є҆сѝ."
 },
 {
  "type": "TEXT",
  "value": "С нѣда́ємымъ за́вистїю, и҆ гнѣ́вомъ бори̑мымъ, непобори́мꙋю си́лꙋ си̑мъ предста́вилъ є҆сѝ, мꙋ́чениче, и҆ побѣди́лъ є҆сѝ ѕлочести́вое томле́нїе воѡрꙋжи́всѧ."
 },
 {
  "type": "TEXT",
  "value": "Сла́ва: И҆́же ста́рца сѷмеѡ́на рꙋка́ми держи́мый, ста́рца тѧ̀ глагѡ́лы, пантелеи́моне, ᲂу҆ловѝ къ бжⷭ҇твенномꙋ разꙋмѣ́нїю, и҆ ко мно́гихъ спасе́нїю, и҆ и҆збавле́нїю."
 },
 {
  "type": "TEXT",
  "value": "И҆ ны́нѣ: Ю҆́ныѧ и҆ дѣ̑вы во слѣ́дъ тебє̀ потеко́ша, дв҃ꙋ и҆ ѻ҆трокови́цꙋ тѧ̀ и҆ мт҃рь зрѧ́ще: є҆ди́на бо ѻ҆боѧ̑ во є҆ди́но собрала̀ є҆сѝ неска́заннѡ, бг҃оневѣ́сто."
 },
 {
  "type": "HEADER",
  "value": "Пѣ́снь є҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "Р а́достнѡ по́двиги под̾ѧ́лъ є҆сѝ мꙋче́нїѧ, ѡ҆гражде́нъ си́лою бжⷭ҇твенною, и҆ терпѣ́нїемъ тве́рдѡ мꙋчє́нїѧ под̾е́млѧ, ра́дꙋѧсѧ вопїѧ́лъ є҆сѝ: и҆но́гѡ бо ра́звѣ тебє̀ бг҃а не зна́емъ."
 },
 {
  "type": "TEXT",
  "value": "Ю҆́ ношеско ты̀ противле́нїе и҆мѣ́ѧ, и҆ тве́рдостїю дꙋшѝ возставле́нїе стѧжа́въ, всѧ́кꙋ ꙗ҆́звꙋ до́блественнѣ претерпѣ́лъ є҆сѝ, и҆ мꙋ́жескимъ, блаже́нне, ᲂу҆мо́мъ, благода́тїю бжⷭ҇твеннагѡ креста̀ ᲂу҆крѣплѧ́емь."
 },
 {
  "type": "TEXT",
  "value": "Сла́ва: Несогла́сное ѿри́нꙋ вѣща́нїе заблꙋ́ждшихъ, небе́снымъ ᲂу҆че́нїемъ страда́лецъ, и҆ мнѡ́гимъ спасе́нїю пресла́внꙋ бы́сть вино́вникъ, твои́мъ дѣ́йствомъ, хрⷭ҇тѐ, ᲂу҆крѣплѧ́емь."
 },
 {
  "type": "TEXT",
  "value": "И҆ ны́нѣ: Речє́нїѧ премꙋ́дрыхъ, и҆ гада̑нїѧ всѧ̑ препросла́влєнаѧ, и҆ прⷪ҇ро́кѡвъ проречє́нїѧ, тѧ̀ проѡбража́хꙋ проѧвле́ннѡ напослѣ́докъ бы́ти бж҃їю роди́тельницꙋ: и҆ны́ѧ бо ра́звѣ тебє̀ чⷭ҇тыѧ не зна́емъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "І҆́ дѡлы лє́стныѧ ѡ҆плева́лъ є҆сѝ, и҆ возноси́мꙋю пре́лесть ᲂу҆праздни́лъ є҆сѝ, чꙋдодѣ́йствꙋѧ ди̑внаѧ, и҆ творѧ̀ и҆сцѣлє́нїѧ, бг҃омꙋ́дре."
 },
 {
  "type": "TEXT",
  "value": "В ѣне́чникъ показа́лсѧ є҆сѝ, всеизрѧ́дне, сквозѣ́ бо ѻ҆́гнь ты̀ проше́лъ є҆сѝ и҆ во́дꙋ: и҆ на колесѝ протѧза́емь, пресла́внѡ погꙋби́лъ є҆сѝ безꙋ̑мныѧ."
 },
 {
  "type": "TEXT",
  "value": "Сла́ва: Мꙋчи́телей сꙋровство̀ низложи́въ, неꙋдо́бь носи̑маѧ бїє́нїѧ тѣлє́снаѧ дꙋше́вною крѣ́постїю пострада́лъ є҆сѝ, бг҃омꙋ́дре, благода́тїю."
 },
 {
  "type": "TEXT",
  "value": "И҆ ны́нѣ: Содержа́й концы̀ землѝ ꙗ҆́кѡ бг҃ъ, твои́ми рꙋка́ми, чⷭ҇таѧ, держи́тсѧ, ѡ҆писа́нїемъ тѣ́ла, и҆́же бжⷭ҇твеннымъ зра́комъ неѡпи́санный."
 },
 {
  "type": "TEXT",
  "value": "Г дⷭ҇и, поми́лꙋй. [Три́жды.] Сла́ва, и҆ ны́нѣ:"
 },
 {
  "type": "HEADER",
  "value": "Конда́къ, гла́съ є҃:"
 },
 {
  "type": "TEXT",
  "value": "П одража́тель сы́й ми́лостивагѡ, и҆ и҆сцѣле́нїй благода́ть ѿ негѡ̀ прїе́мъ, страстоте́рпче и҆ мч҃ниче хрⷭ҇та̀ бг҃а, моли́твами твои́ми дꙋшє́вныѧ на́шѧ недꙋ́ги и҆сцѣлѝ, ѿгонѧ̀ при́снѡ борца̀ собла́зны ѿ вопїю́щихъ вѣ́рнѡ: спаси́ ны, гдⷭ҇и."
 },
 {
  "type": "TEXT",
  "value": "І҆́косъ: Безсре́бреника па́мѧть, до́блѧгѡ страда́льца, вѣ́рнагѡ цѣле́бника, благоче́стнѡ воспое́мъ хрⷭ҇толю́бцы, да прїи́мемъ ми́лость, па́че же ѡ҆скве́рнши, ꙗ҆́коже и҆ а҆́зъ своѧ̑ хра́мы: дꙋша́мъ бо и҆ тѣ́лѡмъ возлю́бленнїи и҆сцѣлє́нїѧ подава́етъ. потщи́мсѧ ᲂу҆̀бо, вѣ̑рнаѧ бра́тїѧ, въ сердца́хъ на́шихъ и҆мѣ́ти є҆гѡ̀ крѣ́пость, и҆збавлѧ́юща ѿ ле́сти вопїю́щыѧ: спаси́ ны, гдⷭ҇и."
 },
 {
  "type": "HEADER",
  "value": "Пѣ́снь з҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆́же ᲂу҆́стъ ва́шихъ моли́тва."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "З ако́ннѡ стражда̀, и҆ побѣди́въ врага̀, приста́нище благоꙋти́шно сꙋ́щымъ въ мо́ри, сла́вне, ѡ҆бꙋрева́ємымъ бы́лъ є҆сѝ, свѣ́тъ же сꙋ́щымъ во тмѣ̀ житїѧ̀, и҆ пѣ́ти наꙋчи́лъ є҆сѝ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Б лаже́нъ є҆сѝ и҆ добро̀ тебѣ̀ є҆́сть ны́нѣ, преблаже́нне, воспрїи́мшемꙋ пребога́тнꙋю и҆ бл҃же́ннꙋю наде́ждꙋ твою̀, ᲂу҆гото́ваннꙋю вѣ́рою гдⷭ҇еви зовꙋ́щымъ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Сла́ва: Ст҃ы́хъ дꙋ́шы, и҆ пра́ведныхъ ли́цы, и҆ безпло́тныхъ чи́ни а҆́гг҃льстїи прїѧ́ша, слико́вника тѧ̀, бл҃же́нне. мече́мъ бо ᲂу҆сѣ́ченъ бы́въ во главꙋ̀, пое́ши ра́дꙋѧсѧ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "И҆ ны́нѣ: Ѻ҆рꙋ́жїе є҆́же пре́жде дре́ва живо́тнагѡ на́съ ѿлꙋчи́вшее, ны́нѣ ѡ҆браща́емо прїе́млетъ, зна́менавшыѧсѧ кро́вїю, и҆зъ ре́бръ сн҃а твоегѡ̀ и҆зше́дшею, пренепоро́чнаѧ: бл҃гослове́на є҆сѝ бг҃а пло́тїю ро́ждшаѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "Б лагопрїѧ́тное твоеѧ̀ хи́трости, дꙋше́вное ѡ҆слѣпле́нїе ѻ҆́тчее и҆сцѣлѧ́етъ, подаю́щее свѣ́тъ вѣ́рою, преблаже́нне, притека́ющымъ, и҆ ко сп҃сꙋ хрⷭ҇тꙋ̀ наставлѧ́ющи."
 },
 {
  "type": "TEXT",
  "value": "З а хрⷭ҇та̀ закла́нъ бы́въ, къ вѣ́чнѣй жи́зни преминꙋ́лъ є҆сѝ, и҆ бг҃озва́ненъ ꙗ҆ви́лсѧ є҆сѝ и҆менова́нїемъ бж҃їимъ, бг҃омꙋ́дре. тѣ́мъ почита́емъ тѧ̀, и҆ превозно́симъ хрⷭ҇та̀ во вѣ́ки."
 },
 {
  "type": "TEXT",
  "value": "Сла́ва: Виті́йское ѿложи́въ лю́тое мꙋ́дрыхъ глꙋмле́нїе, хрⷭ҇то́вымъ призыва́нїемъ, болѣ́зненныхъ страсте́й корє́нїѧ посѣка́еши, и҆сцѣлѧ́ѧ превозносѧ́щыѧ хрⷭ҇та̀ во вѣ́ки."
 },
 {
  "type": "TEXT",
  "value": "И҆ ны́нѣ: Безсме́ртїѧ зарю̀ вѣ́мы и҆сто́чника тѧ̀, бцⷣе, ꙗ҆́кѡ ро́ждшꙋю сло́ва безсме́ртнагѡ ѻ҆ц҃а̀, всѣ́хъ сме́рти и҆збавлѧ́ющаго, превозносѧ́щихъ є҆го̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "HEADER",
  "value": "І҆рмо́съ:"
 },
 {
  "type": "TEXT",
  "value": "Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "Припѣ́въ: Ст҃ы́й великомч҃ниче и҆ цѣле́бниче пантелеи́моне, молѝ бг҃а ѡ҆ на́съ."
 },
 {
  "type": "TEXT",
  "value": "П реста́вилсѧ є҆сѝ ра́дꙋѧсѧ къ жела́нїю коне́чномꙋ, и҆дѣ́же все́льсѧ, преблаже́нне, блаже́нный коне́цъ прїѧ́ти вои́стиннꙋ сподо́билсѧ є҆сѝ, сы́й со влⷣкою твои́мъ во вѣ́ки безконє́чныѧ."
 },
 {
  "type": "TEXT",
  "value": "Ж ела́нїе полꙋчи́лъ є҆сѝ, и҆ любвѐ твоеѧ̀ и҆сполне́нїе, ка́плющей є҆щѐ те́плѣй кро́ви, за хрⷭ҇та̀ и҆злїѧ́вшейсѧ: ѿ негѡ́же ра́дꙋѧсѧ прїѧ́лъ є҆сѝ вѣнцы̀ по́двигѡвъ твои́хъ."
 },
 {
  "type": "TEXT",
  "value": "Л ьвѡ́въ ᲂу҆ста̀, и҆ ѕвѣре́й зїѧ̑нїѧ, ꙗ҆́коже данїи́лъ дре́вле ты̀ ѡ҆бꙋзда́лъ є҆сѝ: вѣ́сть бо стыдѣ́тисѧ, мꙋ́чениче, добродѣ́тели и҆ безслове́сное є҆стество̀. тѣ́мже тѧ̀, пресла́вне, соше́дшесѧ ᲂу҆блажа́емъ."
 },
 {
  "type": "TEXT",
  "value": "Сла́ва: Бога́тнꙋю бла́гость тебѣ̀ хрⷭ҇то́съ да́рꙋетъ, сокро́вище и҆сцѣле́нїй на́мъ да́рꙋѧ, и҆ всеми́лостива и҆зволе́нїемъ, тѧ̀ пода́въ всѧ́комꙋ скорбѧ́щемꙋ и҆ приста́нище ти́хое, и҆ предста́телѧ и҆ защи́тителѧ."
 },
 {
  "type": "TEXT",
  "value": "И҆ ны́нѣ: Ꙗ҆́кѡ рꙋно̀, всенепоро́чнаѧ, до́ждь нбⷭ҇ный во ᲂу҆тро́бѣ заче́нши на́мъ родила̀ є҆сѝ, тишинꙋ̀ даю́щаго, ꙗ҆́кѡ бг҃а того̀ пою́щымъ, и҆ тѧ̀ всепѣ́тꙋю бцⷣꙋ проповѣ́дающымъ."
 },
 {
  "type": "HEADER",
  "value": "Свѣти́ленъ. Подо́бенъ: Оу҆ченикѡ́мъ:"
 },
 {
  "type": "TEXT",
  "value": "М и́лостивнꙋю твою̀ дꙋ́шꙋ прови́дѣ бг҃ъ, пантелеи́мона тѧ̀ проповѣ́да: безсре́бреннѡ бо тре́бꙋющымъ и҆сцѣле́нїе и҆сточа́еши, свѧ́те, мꙋчи́телей свирѣ́пство терпѣ́пїемъ твои́мъ побѣди́вый."
 },
 {
  "type": "TEXT",
  "value": "Сла́ва, и҆ ны́нѣ, бг҃оро́диченъ: Бцⷣꙋ пѣ́сньми немо́лчными благоче́стнѡ пое́мъ, вопїю́ще: ра́дꙋйсѧ, горо̀ ст҃а́ѧ: ра́дꙋйсѧ, престо́ле ѻ҆гнено́сный всѣ́хъ цр҃ѧ̀: ра́дꙋйсѧ, похвало̀ а҆́гг҃лѡвъ, и҆ ст҃ы́хъ сла́во."
 },
 {
  "type": "HEADER",
  "value": "Мл҃тва ст҃о́мꙋ великомч҃нкꙋ и҆ цѣли́телю пантелеи́монꙋ."
 },
 {
  "type": "TEXT",
  "value": "Ѽ вели́кїй хрⷭ҇то́въ ᲂу҆го́дниче и҆ пресла́вный цѣле́бниче, великомч҃нче пантелеи́моне, дꙋше́ю на нб҃сѝ прⷭ҇то́лꙋ бж҃їю предстоѧ́й и҆ трїѷпоста́сныѧ є҆гѡ̀ сла́вы наслажда́ѧйсѧ, тѣ́ломъ же и҆ ли́комъ ст҃ы́мъ на землѝ въ бж҃е́ственныхъ хра́мѣхъ пребыва́ѧй и҆ да́нною тѝ свы́ше бл҃года́тїю разли̑чнаѧ и҆сточа́ѧй чꙋдеса̀! При́зри ми́лостивымъ твои́мъ ѻ҆́комъ на предстоѧ́щыѧ лю́ди и҆ честнѣ́й твое́й і҆кѡ́нѣ ᲂу҆ми́льнѡ молѧ́щыѧсѧ и҆ просѧ́щыѧ ѿ тебє̀ цѣле́бныѧ по́мощи и҆ застꙋпле́нїѧ: прострѝ ко гдⷭ҇ꙋ бг҃ꙋ на́шемꙋ тє́плыѧ твоѧ̑ мл҃твы и҆ и҆спросѝ дꙋша́мъ на́шымъ ѡ҆ставле́нїе согрѣше́нїй. Се́ бо мы̀, за беззакѡ́нїѧ на̑ша не смѣ́юще возвестѝ ѻ҆че́съ на́шихъ къ высотѣ̀ нбⷭ҇нѣй, се́рдцемъ сокрꙋше́ннымъ и҆ дꙋ́хомъ смире́ннымъ тебѐ хода́таѧ ми́лостива ко влⷣцѣ и҆ мл҃твенника за ны̀ грѣ̑шныѧ призыва́емъ, ꙗ҆́кѡ ты̀ прїѧ́лъ є҆сѝ бл҃года́ть ѿ негѡ̀ недꙋ́ги и҆сцѣлѧ́ти и҆ стра̑сти ѿгонѧ́ти. Тебѐ ᲂу҆̀бо про́симъ: не пре́зри на́съ недосто́йныхъ, молѧ́щихсѧ тебѣ̀ и҆ твоеѧ̀ по́мощи тре́бꙋющихъ. Бꙋ́ди на́мъ въ печа́лехъ ᲂу҆тѣ́шитель, въ недꙋ́зѣхъ лю́тыхъ стра́ждꙋщымъ вра́чь, напа́ствꙋємымъ ско́рый покрови́тель, ѻ҆чесы̀ недꙋ́гꙋющымъ прозрѣ́нїѧ пода́тель, ссꙋ́щымъ и҆ младе́нцємъ въ болѣ́знехъ ско́рый предста́тель и҆ и҆сцѣли́тель: и҆схода́тайствꙋй всѣ̑мъ всѧ̑ ко сп҃се́нїю полє́знаѧ, ꙗ҆́кѡ да твои́ми ко гдⷭ҇ꙋ бг҃ꙋ мл҃твами полꙋчи́вше бл҃года́ть и҆ ми́лость, просла́вимъ всѣ́хъ бл҃ги́хъ и҆сто́чника и҆ даропода́телѧ бг҃а, є҆ди́наго въ трⷪ҇цѣ ст҃ѣ́й сла́вимаго, ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь."
 }
]