ponomar-pwa/static/data/shared/menaion-daily/02-04/1.json

[
 {
  "type": "HEADER",
  "value": "Феѵрꙋа́рїа д҃"
 },
 {
  "type": "HEADER",
  "value": "Прпⷣбнагѡ ѻ҆ц҃а̀ на́шегѡ і҆сі́дѡра пилꙋсїѡ́тскагѡ:"
 },
 {
  "type": "HEADER",
  "value": "А҆́ще нѣ́сть поста̀, быва́етъ слꙋ́жба пра́здника, и҆ ст҃а́гѡ і҆сі́дѡра. А҆́ще ли є҆́сть по́стъ, то́чїю ст҃а́гѡ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры пра́здника г҃, и҆ ст҃а́гѡ г҃."
 },
 {
  "type": "HEADER",
  "value": "Стїхи̑ры пра́здника гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Зако́нъ, и҆́же въ писа́нїи, и҆сполнѧ́ѧ чл҃вѣколю́бецъ, въ це́рковь ны́нѣ прино́ситсѧ, и҆ сего̀ прїе́млетъ ста́рыми рꙋка́ми сѷмеѡ́нъ ста́рецъ: ны́нѣ ѿпꙋща́еши мѧ̀, вопїѧ̀, ко ѻ҆́номꙋ блаже́нствꙋ: ви́дѣхъ бо тѧ̀ дне́сь пло́тїю ме́ртвенною ѡ҆бложе́ннаго, живото́мъ гдⷭ҇ствꙋюща, и҆ сме́ртїю влⷣчествꙋюща."
 },
 {
  "type": "TEXT",
  "value": "Свѣ́тъ во ѿкрове́нїе ꙗ҆зы́кѡвъ ꙗ҆ви́лсѧ є҆сѝ, гдⷭ҇и, на ѻ҆́блацѣ сѣдѧ̀ ле́гцѣ, со́лнце пра́вды, зако́на сѣно́вное и҆сполнѧ́ѧ, и҆ нача́ло и҆з̾ѧвлѧ́ѧ но́выѧ благода́ти. Тѣ́мъ тѧ̀ ви́дѣвъ сѷмеѡ́нъ, взыва́ше: и҆зъ и҆стлѣ́нїѧ мѧ̀ разрѣшѝ, ꙗ҆́кѡ ви́дѣхъ тѧ̀ дне́сь."
 },
 {
  "type": "TEXT",
  "value": "Нѣ́дръ роди́телѧ не ѿлꙋ́чсѧ бжⷭ҇тво́мъ, вопло́щсѧ, ꙗ҆́коже и҆зво́лилъ є҆сѝ, ѡ҆б̾ѧ́тїѧми держи́мь приснодв҃ы, на рꙋ́ки пода́лсѧ є҆сѝ бг҃опрїи́мца сѷмеѡ́на, рꙋко́ю твое́ю держа́й всѧ́чєскаѧ: тѣ́мже ны́нѣ ѿпꙋща́еши мѧ̀, ра́достнѡ взыва́ше, въ ми́рѣ раба̀ твоего̀, ꙗ҆́кѡ ви́дѣхъ тѧ̀, влⷣко."
 },
 {
  "type": "HEADER",
  "value": "И҆́ны стїхи̑ры ст҃а́гѡ, гла́съ то́йже."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Видѣ̑нїи и҆ дѣѧ́ньми къ бг҃ꙋ возвыша́ѧсѧ, житїѐ, всемꙋ́дре, соверши́лъ є҆сѝ, видѣ́нїѧ восхожде́нїе дѣѧ́нїе водрꙋзи́въ, и҆ мꙋ́дре, жела́емыхъ возлюби́лъ є҆сѝ послѣ́днее: є҆гѡ́же бы́въ жела́нїѧ внꙋ́трь, ᲂу҆досто́илсѧ є҆сѝ блаже́ннагѡ ны́нѣ конца̀ и҆ трисо́лнечнагѡ сїѧ́нїѧ."
 },
 {
  "type": "TEXT",
  "value": "Наводне́нїемъ благода́ти, и҆ ѡ҆дожде́ньми слове́съ твои́хъ, напоѧ́еши всѧ̑ бг҃омꙋ̑дрыѧ, въ го́рнѣйшей мꙋ́дрости ча́ши ᲂу҆ста̀ твоѧ̑ поло́жъ, ꙗ҆́кѡ ѿ и҆сто́чника бога́тнѡ ты̀ поче́рплъ є҆сѝ, и҆ разда́лъ є҆сѝ всю́дꙋ лꙋчы̀ ᲂу҆че́нїй, посыла́ѧ и҆ ᲂу҆чѧ̀, и҆ наказꙋ́ѧ, досточꙋ́дне."
 },
 {
  "type": "TEXT",
  "value": "Воздержа́нїемъ мꙋдрова́нїе плотско́е ᲂу҆мертви́лъ є҆сѝ, въ живоно́снꙋю ме́ртвость ѡ҆дѣ́ѧвсѧ, и҆ дꙋше́вное ᲂу҆строе́нїе разшири́въ, прпⷣбне, ꙗ҆́вѣ, вмѣсти́тельное дарова́нїй дх҃а соверши́лъ є҆сѝ, и҆ прїѧ́телище бы́лъ є҆сѝ бг҃одохнове́нныхъ ᲂу҆че́нїй, и҆ премꙋ́дрости сꙋ́щїѧ па́че ᲂу҆ма̀ пребыва́нїе."
 },
 {
  "type": "HEADER",
  "value": "Сла́ва, и҆ ны́нѣ, пра́здника, гла́съ в҃."
 },
 {
  "type": "TEXT",
  "value": "Ге́рманово: Дне́сь сѷмеѡ́нъ на рꙋ́ки гдⷭ҇а сла́вы прїе́млетъ, є҆го́же под̾ мра́комъ пе́рвѣе мѡѷсе́й ви́дѣ, на горѣ̀ сїна́йстѣй скрижа̑ли даю́ща є҆мꙋ̀. Се́й є҆́сть, и҆́же во прⷪ҇ро́цѣхъ глаго́лѧй, и҆ зако́на творе́цъ: се́й є҆́сть, є҆го́же дв҃дъ возвѣща́етъ, и҆́же всѣ̑мъ стра́шный, и҆мѣ́ѧй ве́лїю и҆ бога́тꙋю ми́лость."
 },
 {
  "type": "HEADER",
  "value": "А҆́ще є҆́сть по́стъ, Сла́ва, и҆ ны́нѣ, бг҃оро́диченъ. А҆́ще ли среда̀ и҆лѝ пѧто́къ, крⷭ҇тобг҃оро́диченъ:"
 },
 {
  "type": "TEXT",
  "value": "А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ, а҆́гница ро́ждшаѧ рыда́ше, и҆ мт҃рски тебѣ̀ вѣща́ше: сн҃е возжелѣ́нне, ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ка́кѡ рꙋ́цѣ и҆ но́зѣ твоѝ, сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ, влⷣко."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: До́ме Є҆ѵфра́ѳовъ:"
 },
 {
  "type": "TEXT",
  "value": "Воспрїимѝ, ѽ сѷмеѡ́не, гдⷭ҇а сла́вы, ꙗ҆́коже тѝ и҆звѣсти́сѧ ѿ дх҃а ст҃а́гѡ: се́ бо прїи́де."
 },
 {
  "type": "TEXT",
  "value": "Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ."
 },
 {
  "type": "TEXT",
  "value": "Носѧ́щи чⷭ҇таѧ и҆ пречⷭ҇таѧ дв҃а, содѣ́телѧ и҆ влⷣкꙋ ꙗ҆́кѡ млⷣнца на рꙋка́хъ, въ це́рковь вхо́дитъ."
 },
 {
  "type": "TEXT",
  "value": "Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ."
 },
 {
  "type": "TEXT",
  "value": "Ве́лїе и҆ стра́шное та́инство, и҆ стра́нное смотре́нїѧ, и҆́же всѧ̑ ѡ҆б̾е́млѧ, и҆ младе́нцы созида́ѧй, ꙗ҆́кѡ млⷣнецъ на рꙋка́хъ но́ситсѧ."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже: Самогла́сенъ:"
 },
 {
  "type": "TEXT",
  "value": "Сщ҃е́ннаго сщ҃е́ннаѧ дв҃а принесѐ во ст҃и́лище ст҃и́телю, просте́ръ же рꙋ́цѣ сѷмеѡ́нъ прїѧ́тъ сего̀ ра́дꙋѧсѧ, и҆ возопѝ: ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ, гдⷭ҇и."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Въ тебѣ̀, ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ, послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ, ве́щи безсме́ртнѣй: тѣ́мже и҆ со а҆́гг҃лы сра́дꙋетсѧ, прпⷣбне і҆сі́дѡре, дꙋ́хъ тво́й."
 },
 {
  "type": "HEADER",
  "value": "Сла́ва, и҆ ны́нѣ, пра́здника, гла́съ а҃:"
 },
 {
  "type": "TEXT",
  "value": "Ра́дꙋйсѧ, бл҃года́тнаѧ бцⷣе дв҃о, и҆зъ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскрⷭ҇нїе."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь пра́здника, два́жды."
 },
 {
  "type": "HEADER",
  "value": "Сла́ва, ст҃а́гѡ: И҆ ны́нѣ, пра́здника."
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ли́къ а҆́гг҃льскїй:"
 },
 {
  "type": "TEXT",
  "value": "Сы́й со ѻ҆ц҃е́мъ на прⷭ҇то́лѣ ст҃ѣ́мъ, прише́дъ на зе́млю ѿ дв҃ы роди́сѧ, и҆ младе́нецъ бы́сть лѣ́ты сы́й неѡпи́санъ, є҆го́же прїи́мъ сѷмеѡ́нъ на рꙋ́ки, ра́дꙋѧсѧ глаго́лаше: ны́нѣ ѿпꙋща́еши, ще́дре, возвесели́въ раба̀ твоего̀."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Пло́тїю младе́нствовавша ѿ неискꙋсомꙋ́жныѧ мт҃ре рꙋка́ми ста́рыми твои́ми ѡ҆б̾ѧ́лъ є҆сѝ, сѷмеѡ́не, хрⷭ҇та̀ бг҃а на́шего, прїѧ́лъ є҆сѝ и҆схо́да ѿвѣ́тъ сла́внѡ, ᲂу҆лꙋчи́лъ є҆сѝ чꙋде́съ непреста́ннꙋю благода́ть: тѣ́мъ тѧ̀ достодо́лжнѡ всѝ сла́вимъ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "Канѡ́нъ пра́здника со і҆рмосо́мъ на и҃, и҆ ст҃а́гѡ на д҃."
 },
 {
  "type": "HEADER",
  "value": "Канѡ́нъ пра́здника, гла́съ г҃. Пѣ́снь а҃."
 },
 {
  "type": "TEXT",
  "value": "І҆рмо́съ: Сꙋ́шꙋ глꙋбороди́тельнꙋю зе́млю со́лнце наше́ствова и҆ногда̀, ꙗ҆́кѡ стѣна́ бо ѡ҆гꙋстѣ̀ ѻ҆бапо́лы вода̀, лю́демъ пѣшомореходѧ́щымъ, и҆ бг҃оꙋго́днѡ пою́щымъ: пои́мъ гдⷭ҇еви, сла́внѡ бо просла́висѧ."
 },
 {
  "type": "TEXT",
  "value": "Да ка́плютъ во́дꙋ ѻ҆́блацы, со́лнце бо на ѻ҆́блацѣ ле́гцѣ носи́мо наста́ло є҆́сть, на нетлѣ́ннꙋю рꙋкꙋ̀, хрⷭ҇то́съ въ це́ркви ꙗ҆́кѡ младе́нецъ. Тѣ́мже, вѣ́рнїи, возопїи́мъ: пои́мъ гдⷭ҇еви, сла́внѡ бо просла́висѧ."
 },
 {
  "type": "TEXT",
  "value": "Крѣпи́тѣсѧ, рꙋ́цѣ сѷмеѡ́ни ста́ростїю ѡ҆сла́бленнїи, лы́ста же претрꙋждє́нна ста̑рча, пра́вѡ бы́стрѡ дви́житасѧ хрⷭ҇тꙋ̀ на срѣ́тенїе, ли́къ со безпло́тными соста́вльше: пои́мъ гдⷭ҇еви, сла́внѡ бо просла́висѧ."
 },
 {
  "type": "TEXT",
  "value": "Ра́зꙋмомъ простє́ртаѧ нб҃са̀, весели́тесѧ, и҆ ра́дꙋйсѧ, землѐ: и҆зъ пребжⷭ҇твенныхъ бо нѣ́дръ хитре́цъ проше́дъ хрⷭ҇то́съ, мт҃рїю дв҃ою бг҃ꙋ ѻ҆ц҃ꙋ̀ прино́ситсѧ, младе́нецъ, и҆́же пре́жде всѣ́хъ, сла́внѡ бо просла́висѧ."
 },
 {
  "type": "HEADER",
  "value": "Канѡ́нъ ст҃а́гѡ, гла́съ ѕ҃, є҆гѡ́же краегране́сїе:"
 },
 {
  "type": "TEXT",
  "value": "Тѧ̀ мона́шествꙋющихъ сла́вꙋ пою̀, ѻ҆́ч҃е."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мь, вопїѧ́ше."
 },
 {
  "type": "TEXT",
  "value": "Сокрꙋше́ннагѡ се́рдца стена́нїе ᲂу҆слы́шавъ, влⷣко, дꙋшѝ моеѧ̀ лю́тое сокрꙋше́нїе и҆сцѣлѝ моли́твами преподо́бнагѡ твоегѡ̀, хрⷭ҇тѐ, ꙗ҆́кѡ всеси́ленъ."
 },
 {
  "type": "TEXT",
  "value": "Вше́дъ ты̀, бг҃оно́се, въ дѣ́тельнꙋю добродѣ́тель, і҆сі́дѡре, видѣ́нїемъ чи́стымъ, и҆ кра́снымъ ꙗ҆вле́нїемъ бг҃ꙋ бесѣ́дꙋѧ всегда̀, ꙗ҆́вѣ ѡ҆богати́лсѧ є҆сѝ."
 },
 {
  "type": "TEXT",
  "value": "Премꙋ́дрости ча́ши прине́съ твоѧ̑ ᲂу҆ста̀, премꙋ́дре, и҆́же ѿѻнꙋ́дꙋ дарова́нїй и҆сто́чникъ поче́рплъ є҆сѝ, бг҃ꙋ побѣ́днꙋю пѣ́снь воспѣва́ѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ на ле́гцѣмъ ѻ҆́блацѣ содѣ́тель на тебѣ̀ прїи́де, низложи́ти ꙗ҆́кѡ си́ленъ є҆гѵ́пєтскїѧ, влⷣчце чⷭ҇таѧ, рꙋкотворє́ннаѧ, хрⷭ҇то́съ ꙗ҆́кѡ всеси́льный."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твержде́нїе на тѧ̀ надѣ́ющихсѧ, ᲂу҆твердѝ, гдⷭ҇и, цр҃ковь, ю҆́же стѧжа́лъ є҆сѝ честно́ю твое́ю кро́вїю."
 },
 {
  "type": "TEXT",
  "value": "Перворожде́нъ и҆зъ ѻ҆ц҃а̀ пре́жде вѣ̑къ, перворожде́нъ младе́нецъ и҆зъ дв҃ы нетлѣ́нныѧ, а҆да́мꙋ рꙋ́кꙋ простира́ѧ ꙗ҆ви́сѧ."
 },
 {
  "type": "TEXT",
  "value": "Младоꙋ́мна бы́вша пре́лестїю первозда́ннаго, па́ки и҆справлѧ́ѧй бг҃ъ сло́во, младе́нствовавъ ꙗ҆ви́сѧ."
 },
 {
  "type": "TEXT",
  "value": "Землѝ и҆сча́дїе, па́ки поте́кшее въ ню̀, бж҃ества̀ соѻбра́зное є҆стество̀ зижди́тель, ꙗ҆́кѡ непрело́жнѣ, младе́нствовавъ ꙗ҆вѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Оу҆ма̀ ѻ҆строто́ю, мꙋ́дре, сꙋ́щихъ собра́въ, пресла́вне, є҆стество̀, и҆́мже нача́льнꙋю винꙋ̀, ꙗ҆́кѡ чи́стъ бг҃осло́въ, неле́стнѡ пости́глъ є҆сѝ."
 },
 {
  "type": "TEXT",
  "value": "Поꙋче́нїе положи́въ ꙗ҆́снѡ сме́рти житїю̀, бг҃оно́се треблаже́нне, страсте́й вє́щныѧ вины̑ ᲂу҆мертви́лъ є҆сѝ, безстра́стїѧ ѡ҆б̾ѧ́тъ бы́въ жела́нїемъ."
 },
 {
  "type": "TEXT",
  "value": "Въ слѣ́дъ ра́дꙋѧсѧ хрⷭ҇та̀ крⷭ҇тъ тво́й носи́въ послѣ́довалъ є҆сѝ, ѻ҆́ч҃е, въ постѣ̀ тве́рдѣмъ, и҆ семꙋ̀ ꙗ҆́кѡ мо́щно ᲂу҆подо́билсѧ є҆сѝ житїѧ̀ чистото́ю."
 },
 {
  "type": "TEXT",
  "value": "Бг҃оро́диченъ: Зако́нныхъ є҆стества̀ кромѣ̀ влⷣкꙋ ро́ждши, бцⷣе дв҃о, дре́внюю преслꙋша́нїѧ клѧ́твꙋ разори́ла є҆сѝ, благослове́нїѧ и҆сто́чникъ и҆сточа́ющи."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ:"
 },
 {
  "type": "TEXT",
  "value": "Денни́цꙋ дрꙋгꙋ́ю тѧ̀ цр҃ковь ѡ҆брѣ́тши, пресла́вне, твои́хъ слове́съ мо́лнїѧми ѡ҆свѣща́ема, взыва́етъ тѝ: ра́дꙋйсѧ, всеблаже́нне бг҃омꙋ́дре і҆сі́дѡре."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Бж҃е́ственныѧ вѣ́ры:"
 },
 {
  "type": "TEXT",
  "value": "Кни́га ра́зꙋма ᲂу҆че́нїѧ бога́тствомъ вѣ́ры сочинена̀, прест҃о́мꙋ ꙗ҆ви́лсѧ є҆сѝ дх҃ꙋ, ѿкрыва́ѧ бжⷭ҇твєннаѧ тре́бꙋющымъ, и҆ жи́знь сокро́вищствꙋѧ хотѧ́щымъ: ѻ҆́ч҃е прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Воскре́съ:"
 },
 {
  "type": "TEXT",
  "value": "Роди́лсѧ є҆сѝ на землѝ собезнача́льный ѻ҆ц҃ꙋ̀, прине́слсѧ є҆сѝ въ це́рковь непостижи́мый: ра́дꙋѧсѧ же ста́рецъ на рꙋ́ки тѧ̀ воспрїе́мъ, зовы́й: ны́нѣ ѿпꙋща́еши, є҆го́же посѣти́лъ є҆сѝ, по глаго́лꙋ твоемꙋ̀, благоизво́ливый спастѝ ꙗ҆́кѡ бг҃ъ ро́дъ человѣ́ческїй."
 },
 {
  "type": "TEXT",
  "value": "А҆́ще є҆́сть по́стъ, Сла́ва, и҆ ны́нѣ, бг҃оро́диченъ: а҆́ще среда̀ и҆лѝ пѧто́къ, крⷭ҇тобг҃оро́диченъ:"
 },
 {
  "type": "TEXT",
  "value": "Ѻ҆рꙋ́жїе, ꙗ҆́коже речѐ сѷмеѡ́нъ, се́рдце твоѐ про́йде, пречⷭ҇таѧ влⷣчце, є҆гда̀ ᲂу҆зрѣ́ла є҆сѝ и҆зъ тебє̀ возсїѧ́вшаго, неизрече́ннымъ сло́вомъ, ѿ беззако́нныхъ ꙗ҆́кѡ ѡ҆сꙋжде́на возноси́ма на крⷭ҇тъ, ѻ҆́цетъ и҆ же́лчь вкꙋша́юща, въ ре́бра же пробода́ема, и҆ рꙋ́цѣ и҆ но́зѣ пригвожда́ємы, и҆ рыда́ющи восклица́ла є҆сѝ, мт҃рски вопїю́щи: что̀ сїѐ, ча́до сладча́йшее, но́вое та́инство;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Покры́ла є҆́сть нб҃са̀ добродѣ́тель твоѧ̀, хрⷭ҇тѐ: и҆зъ кївѡ́та бо проше́дъ, ст҃ы́ни твоеѧ̀ нетлѣ́нныѧ мт҃ре, въ хра́мѣ сла́вы твоеѧ̀ ꙗ҆ви́лсѧ є҆сѝ, ꙗ҆́кѡ млⷣнецъ рꙋконоси́мь: и҆ и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "Ра́дꙋѧсѧ, сѷмеѡ́не, неизрече́нныхъ таи́нниче, бцⷣа вопїѧ́ше, є҆го́же ѿ ст҃а́гѡ дре́вле и҆звѣсти́сѧ тебѣ̀ дх҃а, младе́нствовавшаго сло́ва хрⷭ҇та̀ на рꙋ́ки прїимѝ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "На него́же ᲂу҆пова́лъ є҆сѝ, сѷмеѡ́не, во́зрастъ дѣ́тищный, ра́дꙋѧсѧ под̾имѝ хрⷭ҇та̀, і҆и҃лѧ бжⷭ҇твеннагѡ ᲂу҆тѣше́нїе, зако́на творца̀ и҆ влⷣкꙋ, и҆сполнѧ́ющаго зако́на чи́нъ, зовы́й є҆мꙋ̀: и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "TEXT",
  "value": "Ви́дѧ сѷмеѡ́нъ сло́во безнача́льное, съ пло́тїю ꙗ҆́кѡ на престо́лѣ херꙋві́мстѣмъ дв҃ою носи́мо, вино́внаго, є҆́же бы́ти всѧ́ческихъ, ꙗ҆́кѡ младе́нцꙋ дивѧ́сѧ, вопїѧ́ше є҆мꙋ̀: и҆спо́лнишасѧ всѧ̑ твоегѡ̀ хвале́нїѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Незави́стнѡ, прпⷣбне, хрⷭ҇тꙋ̀ повинꙋ́ѧсѧ, да́нное тебѣ̀ бога́тство, ꙗ҆́кѡ благопокори́въ ра́бъ разда́лъ є҆сѝ, и҆ несказа́нныѧ тѧ̀ ра́дости влⷣка сподо́би."
 },
 {
  "type": "TEXT",
  "value": "Премꙋ́дрости пꙋчи́нꙋ преплы́въ, до́брый би́серъ ꙗ҆́кѡ до́бръ кꙋпе́цъ прїѡбрѣ́лъ є҆сѝ, и҆ се́й то́кмѡ сокро́вище неѡскꙋ́днѡ стѧжа́лъ є҆сѝ."
 },
 {
  "type": "TEXT",
  "value": "Бжⷭ҇твеннымъ дх҃омъ ѡ҆сїѧ́емь, лꙋчы̀ слове́съ со́лнечнѡ всѣ̑мъ и҆спꙋсти́лъ є҆сѝ, спасе́нїѧ вѣ̑рнымъ, бг҃оѧвле́нне, жела́ѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ вои́стиннꙋ неизглагѡ́ланна и҆ непости̑жна твоегѡ̀, бцⷣе, бг҃олѣ́пнагѡ сꙋ́ть ржⷭ҇тва̀, сꙋ́щымъ на землѝ и҆ на нб҃сѝ, приснодв҃о, та̑инства."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ꙗ҆́кѡ ви́дѣ и҆са́їа ѻ҆бра́знѡ на престо́лѣ превознесе́на бг҃а, ѿ а҆́гг҃лъ сла́вы дѡрѷноси́ма, ѽ ѻ҆каѧ́нный, вопїѧ́ше, а҆́зъ: прови́дѣхъ бо воплоща́ема бг҃а, свѣ́та невече́рнѧ и҆ ми́ромъ влады́чествꙋюща."
 },
 {
  "type": "TEXT",
  "value": "Разꙋмѣ́въ бжⷭ҇твенный ста́рецъ проѧвле́ннꙋю дре́вле прⷪ҇ро́кꙋ сла́вꙋ рꙋка́ми сло́во зрѧ̀ ма́терними держи́мо, ѽ ра́дꙋйсѧ, вопїѧ́ше, чⷭ҇таѧ! Ꙗ҆́кѡ прⷭ҇то́лъ бо держи́ши бг҃а, свѣ́та невече́рнѧго и҆ ми́ромъ влады́чествꙋюща."
 },
 {
  "type": "TEXT",
  "value": "Покло́нсѧ ста́рецъ, и҆ стопа́мъ бжⷭ҇твеннѣ прикоснꙋ́всѧ неискꙋсобра́чныѧ и҆ бг҃омт҃ре, ѻ҆́гнь, речѐ, но́сиши, чⷭ҇таѧ: младе́нца бою́сѧ ѡ҆б̾ѧ́ти бг҃а, свѣ́та невече́рнѧго и҆ ми́ромъ влады́чествꙋюща."
 },
 {
  "type": "TEXT",
  "value": "Ѡ҆чища́етсѧ и҆са́їа, ѿ серафі́ма ᲂу҆́гль прїе́мъ, ста́рецъ вопїѧ́ше бг҃омт҃ри: ты̀ ꙗ҆́коже клеща́ми рꙋка́ми просвѣща́еши мѧ̀, пода́вши, є҆го́же но́сиши, свѣ́та невече́рнѧго и҆ ми́ромъ влады́чествꙋюща."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Оу҆мерщвле́нїемъ, всемꙋ́дре, страсте́й, внѣ̀ бы́въ пло́ти, любо́вїю бг҃ꙋ прибли́жилсѧ є҆сѝ, прест҃о́мꙋ и҆ пресвѣ́тломꙋ свѣ́тꙋ, є҆ди́номꙋ и҆стѧзꙋ́ющемꙋ чистотꙋ̀."
 },
 {
  "type": "TEXT",
  "value": "Бжⷭ҇твеннымъ сїѧ́нїемъ твои́мъ, бла́же, ᲂу҆́мъ бг҃оно́сецъ ѡ҆зари́въ, сто́лпъ всесвѣ́телъ бы́сть, всѣ̑мъ посыла́ѧ бж҃е́ственнагѡ свѣ́та бжⷭ҇твєнныѧ зари̑, и҆ мра́къ невѣ́дѣнїѧ ѿгонѧ̀."
 },
 {
  "type": "TEXT",
  "value": "Хотѧ́й всѣ̑мъ, ꙗ҆́кѡ бла́гъ, всемꙋ́дре, спасти́сѧ, наста́вника заблꙋ́ждшымъ тѧ̀ показа̀, мнѡ́гїѧ ѡ҆браща́ти ко спасе́нїѧ пꙋтѝ, і҆сі́дѡре треблаже́нне, ѻ҆́ч҃е пребога́те."
 },
 {
  "type": "TEXT",
  "value": "Бг҃оро́диченъ: Вои́стиннꙋ ᲂу҆сты̀ и҆ дꙋше́ю, влⷣчце мі́ра бл҃га́ѧ, и҆сповѣ́даю тѧ̀, всенепоро́чнаѧ, воплоще́нна бг҃а ро́ждшꙋю, чи́стаѧ, и҆ житїѧ̀ тѧ̀ предста́тельницꙋ вѣ́рою предлага́ю."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Возопѝ къ тебѣ̀, ви́дѣвъ ста́рецъ ѻ҆чи́ма спасе́нїе, є҆́же лю́демъ прїи́де ѿ бг҃а, хрⷭ҇тѐ, ты̀ бг҃ъ мо́й."
 },
 {
  "type": "TEXT",
  "value": "Сїѡ́нꙋ ты̀ ка́мень возложи́лсѧ є҆сѝ, непокори̑вымъ претыка́нїе, и҆ собла́зна ка́мень, нерꙋши́мое вѣ́рныхъ спасе́нїе."
 },
 {
  "type": "TEXT",
  "value": "И҆звѣ́стнѣ носѧ̀ начерта́нїе, и҆́же пре́жде вѣ̑къ тѧ̀ и҆зрасти́вшагѡ, земны́хъ за милосе́рдїе ны́нѣ не́мощїю ѡ҆бложи́сѧ."
 },
 {
  "type": "TEXT",
  "value": "Сн҃ꙋ вы́шнѧгѡ, сн҃ꙋ дв҃ы, бг҃ꙋ ѻ҆троча́ти бы́вшемꙋ, покло́ншасѧ тебѣ̀ ны́нѣ ѿпꙋстѝ съ ми́ромъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Словесы̀ сꙋ́дными ᲂу҆кра́шсѧ ꙗ҆́кѡ і҆ере́й, слове́снѡ разсꙋди́лъ є҆сѝ, бг҃оно́се, и҆ тѣ́ломъ и҆ дꙋше́ю, и҆ го́ршее лꙋ́чшемꙋ повинꙋ́въ смы́сленнѡ, досточꙋ́дне."
 },
 {
  "type": "TEXT",
  "value": "Благомо́щнѡ є҆гѵ́пта страсте́й и҆ пи́щи, ты̀ мона́шествꙋющихъ похвало̀, воздержа́тельными, сла́вне, ꙗ҆́звами, и҆стѧзꙋ́ѧ ᲂу҆ѧзви́лъ є҆сѝ, вѣ̑рнымъ ᲂу҆глажда́ѧ прехожде́нїе."
 },
 {
  "type": "TEXT",
  "value": "Бг҃оро́диченъ: Носѧ́й всѧ́чєскаѧ си́лою бжⷭ҇твенною, и҆ содержа́й ꙗ҆́кѡ бл҃гоꙋтро́бенъ твои́ми ѡ҆б̾ѧ̑тїи, пречⷭ҇таѧ, вопло́щсѧ, ꙗ҆́кѡ младе́нецъ но́ситсѧ, и҆́же ѻ҆ц҃ꙋ̀ по сꙋществꙋ̀ соприсносꙋ́щный."
 },
 {
  "type": "HEADER",
  "value": "Конда́къ пра́здника, гла́съ а҃:"
 },
 {
  "type": "TEXT",
  "value": "Оу҆тро́бꙋ дв҃и́чꙋ ѡ҆ст҃и́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ благослови́вый, ꙗ҆́коже подоба́ше, предвари́въ, и҆ ны́нѣ спа́слъ є҆сѝ на́съ, хрⷭ҇тѐ бж҃е: но ᲂу҆мирѝ во бранѣ́хъ жи́тельство, и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не человѣколю́бче."
 },
 {
  "type": "TEXT",
  "value": "І҆́косъ: Къ бцⷣѣ притеце́мъ, хотѧ́щїи сн҃а є҆ѧ̀ ви́дѣти, къ сѷмеѡ́нꙋ носи́ма, є҆го́же съ нб҃сѐ безпло́тнїи ви́дѧще, дивлѧ́хꙋсѧ глаго́люще: чꙋ̑днаѧ зри́мъ ны́нѣ и҆ пресла̑внаѧ, непостижи̑маѧ, несказа̑ннаѧ: и҆́же бо а҆да́ма созда́вый, но́ситсѧ ꙗ҆́кѡ младе́нецъ: невмѣсти́мый вмѣща́етсѧ на рꙋка́хъ ста́рчихъ: и҆́же въ нѣ́дрѣхъ неѡпи́санныхъ сы́й ѻ҆ц҃а̀ своегѡ̀, во́лею ѡ҆писꙋ́етсѧ пло́тїю, а҆ не бжⷭ҇тво́мъ, є҆ди́нъ чл҃вѣколю́бецъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Тебѐ во ѻ҆гнѝ ѡ҆роси́вшаго ѻ҆́троки бг҃осло́вившыѧ, и҆ въ дв҃ꙋ нетлѣ́ннꙋ все́льшагосѧ, бг҃а сло́ва пои́мъ, благоче́стнѡ пою́ще: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "А҆да́мꙋ и҆звѣсти́ти хотѧ́й и҆дꙋ̀, во а҆́дѣ живꙋ́щꙋ, и҆ є҆́ѵѣ принестѝ бл҃говѣ́стїе, сѷмеѡ́нъ вопїѧ́ше, со прⷪ҇рѡ́ки ликꙋ́ѧ: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Ро́да зе́мна и҆збавлѧ́ѧй бг҃ъ, да́же до а҆́да прїи́детъ: плѣ̑ннымъ же пода́стъ всѣ̑мъ ѡ҆ставле́нїе, и҆ прозрѣ́нїе слѣпы̑мъ, ꙗ҆́кѡ и҆ нѣмы̑мъ вопи́ти: благослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "И҆ твоѐ се́рдце, нетлѣ́ннаѧ, ѻ҆рꙋ́жїе про́йдетъ, сѷмеѡ́нъ бцⷣѣ провозгласѝ, на крⷭ҇тѣ̀ зрѧ́щи твоего̀ сн҃а, є҆мꙋ́же вопїе́мъ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "На тве́рди вѣ́ры поста́ви, ѻ҆́ч҃е, ꙗ҆́коже со́лнце влⷣка тѧ̀, просвѣща́ти сїѧ́нїемъ мы́сленнымъ дꙋ́шы вопїю́щихъ прилѣ́жнѡ: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Сквє́рны плотскі̑ѧ и҆ дꙋхѡ́вныѧ ѿмы́лъ є҆сѝ, блаже́нне, сле́зъ и҆злїѧ́ньми, и҆ бы́въ, бг҃оно́сне, свѣ́тъ сꙋ́щымъ на землѝ, всѧ̑ наꙋчи́лъ є҆сѝ вопи́ти: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: На недви́жимѣмъ вѣ́ры стоѧ́ще ѡ҆снова́нїи, тѧ̀, бг҃омт҃рь чⷭ҇таѧ, и҆сповѣ́дꙋемъ бцⷣꙋ: сло́во бо бж҃їе безъ сѣ́мене родила̀ є҆сѝ на́мъ: благослове́нъ, пречⷭ҇таѧ, пло́дъ чре́ва твоегѡ̀."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Нестерпи́момꙋ ѻ҆гню̀ соедини́вшесѧ, благоче́стїѧ предстоѧ́ще ю҆́ноши, пла́менемъ же неврежде́ни, бжⷭ҇твеннꙋю пѣ́снь поѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Лю́дїе і҆и҃лєвы твою̀ сла́вꙋ є҆мманꙋ́ила, зрѧ́ще ѻ҆троча̀ и҆зъ дв҃ы, предъ лице́мъ бжⷭ҇твеннагѡ ковче́га ны́нѣ ликꙋ́йте, благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Сѐ сѷмеѡ́нъ вопїѧ́ше, прерѣка́емое зна́менїе се́й бꙋ́детъ, бг҃ъ сы́й и҆ ѻ҆троча̀, семꙋ̀, вѣ́рнїи, возопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Живо́тъ сы́й, се́й бꙋ́детъ паде́нїе непокори̑вымъ, младе́нствовавъ бг҃ъ сло́во, ꙗ҆́кѡ воста́нїе всѣ̑мъ вѣ́рою пою́щымъ: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "Ꙗ҆́кѡ слове́снꙋ же́ртвꙋ, ѻ҆́ч҃е, всѐ житїѐ твоѐ въ воню̀ благово́нїѧ прине́слъ є҆сѝ, на крⷭ҇тѣ̀ тебє̀ ра́ди повѣ́шенномꙋ хрⷭ҇тꙋ̀: є҆го́же превозно́симъ во всѧ̑ вѣ́ки."
 },
 {
  "type": "TEXT",
  "value": "Мно́жиши бога́тство и҆ по сме́рти, ѡ҆дꙋшевлє́на словеса̀ твоѧ̑, ꙗ҆́коже многоцѣ́нно всѣ̑мъ вѣ̑рнымъ наслѣ́дїе ѡ҆ста́вль, превозносѧ́щымъ хрⷭ҇та̀ во всѧ̑ вѣ́ки."
 },
 {
  "type": "TEXT",
  "value": "Оу҆краси́лсѧ є҆сѝ, преблаже́нне, добро́тою слове́съ твои́хъ: ст҃а́гѡ бо дх҃а ꙗ҆ви́лсѧ є҆сѝ тро́сть, пишѧ̀ благоче́стнѡ ра́зꙋмъ бж҃е́ственъ, превозносѧ́щымъ гдⷭ҇и во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Къ твоемꙋ̀ кро́вꙋ прибѣга́ю, всенепоро́чнаѧ, и҆ предста́тельницꙋ жи́зни моеѧ̀ тѧ̀ ны́нѣ предлага́ю, тѧ̀ па́че ᲂу҆ма̀ бг҃а сло́ва ро́ждшꙋю, є҆го́же превозно́симъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Въ зако́нѣ сѣ́ни и҆ писа́нїй, ѻ҆́бразъ ви́димъ, вѣ́рнїи: всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. Тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ."
 },
 {
  "type": "TEXT",
  "value": "И҆́же дре́внимъ новорожде́нныхъ го́рличищъ сꙋпрꙋ́гъ, дво́ица же бѧ́ше птенцє́въ, въ ни́хже мѣ́сто бжⷭ҇твенный ста́рецъ, и҆ цѣломꙋ́дреннаѧ а҆́нна проро́чица, ѿ дв҃ы рожде́нномꙋ, и҆ сн҃ꙋ є҆диноро́дномꙋ ѻ҆́ч҃ꙋ, въ це́рковь приноси́мꙋ, слꙋ́жатъ велича́юще."
 },
 {
  "type": "TEXT",
  "value": "Возда́лъ є҆сѝ мнѣ̀, вопїѧ́ше сѷмеѡ́нъ, спасе́нїѧ твоегѡ̀, хрⷭ҇тѐ, ра́дованїе: воспрїимѝ твоего̀ слꙋжи́телѧ сѣ́нїю претрꙋжде́ннаго, но́выѧ благода́ти сщ҃еннопроповѣ́дника та́йнаго, во хвале́нїи велича́юща."
 },
 {
  "type": "TEXT",
  "value": "Сщ҃еннолѣ́пнѡ и҆сповѣ́дашесѧ а҆́нна прорица́ющи, цѣломꙋ́дреннаѧ и҆ преподо́бнаѧ и҆ ста́рица, влⷣцѣ, въ це́ркви ꙗ҆́вственнѡ: бцⷣꙋ же проповѣ́дающи всѣ̑мъ сꙋ́щымъ, велича́ше."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ."
 },
 {
  "type": "TEXT",
  "value": "Ꙗ҆́коже зарѧ̀ свѣ́та ѡ҆блиста̀ въ твою̀ дꙋ́шꙋ благода́ти сло́во, преподо́бне, тобо́ю же всѧ̀ землѧ̀ и҆спо́лнисѧ тогѡ̀ сїѧ́нїѧ: є҆мꙋ́же причаща́ющїисѧ, твоеѧ̀ мꙋ́дрости сокро́вищꙋ, ѻ҆́ч҃е, ᲂу҆дивлѧ́емсѧ."
 },
 {
  "type": "TEXT",
  "value": "Тре́мъ ли́цамъ во є҆ди́нствѣ є҆стества̀, ѻ҆ч҃єскимъ послѣ́дꙋѧ ᲂу҆че́нїємъ, бг҃омꙋ́дреннѡ покланѧ́тисѧ наꙋчи́лъ є҆сѝ, чти́ти бг҃осло́вѧщыѧ несозда́ннꙋю безнача́льнꙋю трⷪ҇цꙋ, всѣ̑мъ вѣ̑рнымъ просвѣще́нїе и҆сточа́ющꙋю."
 },
 {
  "type": "TEXT",
  "value": "Ѡ҆брѣ́тъ трꙋдѡ́въ твои́хъ воздаѧ̑нїѧ на нб҃сѣ́хъ, жи́знь безконе́чнꙋю прїе́мъ, пою́щымъ, премꙋ́дре, па́мѧть твою̀, и҆спросѝ спасе́нїе, блаже́нне і҆сі́дѡре, престо́лꙋ бж҃їю со а҆́гг҃лы ны́нѣ предстоѧ̀."
 },
 {
  "type": "TEXT",
  "value": "Бг҃оро́диченъ: Тлѣ́ненъ, сло́во бж҃їе нетлѣ́нное, ѻ҆́бразъ прїе́мъ, человѣ́ки въ нетлѣ́нїе ѡ҆блечѐ, благоволе́нїемъ ѻ҆́ч҃имъ все́льсѧ въ тѧ̀, ѡ҆бра́дованнаѧ: тѣ́мже, пречⷭ҇таѧ, съ нбⷭ҇ными вѡ́и тѧ̀ велича́емъ."
 },
 {
  "type": "HEADER",
  "value": "Свѣти́ленъ пра́здника:"
 },
 {
  "type": "TEXT",
  "value": "Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ и҆ і҆зра́илю спасе́нїе."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "На стїхо́внѣ стїхи̑ры пра́здника, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Скве́рны кромѣ̀ хрⷭ҇то́съ ражда́етсѧ ѿ дв҃ы, ꙗ҆́кѡ ѿ ѻ҆ц҃а̀ нетлѣ́ннѡ, сн҃ъ пре́жде денни́цы, и҆́же а҆да́ма и҆збавлѧ́ѧй."
 },
 {
  "type": "TEXT",
  "value": "Сті́хъ: Ны́нѣ ѿпꙋща́еши раба̀ твоего̀, влⷣко, по глаго́лꙋ твоемꙋ̀, съ ми́ромъ."
 },
 {
  "type": "TEXT",
  "value": "Двє́ри нбⷭ҇ныѧ, ѿве́рзитесѧ: хрⷭ҇то́съ бо въ це́рковь́ ꙗ҆́кѡ младе́нецъ, мт҃рїю дв҃ою, бг҃ꙋ и҆ ѻ҆ц҃ꙋ̀ прино́ситсѧ."
 },
 {
  "type": "TEXT",
  "value": "Сті́хъ: Свѣ́тъ во ѿкрове́нїе ꙗ҆зы́кѡвъ, и҆ сла́вꙋ люде́й твои́хъ і҆и҃лѧ."
 },
 {
  "type": "TEXT",
  "value": "Оу҆́гль проѧвле́йсѧ бжⷭ҇твенномꙋ и҆са́їи хрⷭ҇то́съ, ꙗ҆́кѡ клеща́ми, рꙋка́ми бцⷣы, ны́нѣ ста́рцꙋ дае́тсѧ."
 },
 {
  "type": "HEADER",
  "value": "Сла́ва, и҆ ны́нѣ, гла́съ з҃:"
 },
 {
  "type": "TEXT",
  "value": "Свѣ́тъ во ѿкрове́нїе ꙗ҆зы́кѡвъ, прише́лъ є҆сѝ на зе́млю съ нб҃сѐ, сп҃се на́шъ, и҆ произше́дъ и҆з̾ дв҃ы, почи́лъ є҆сѝ на ѡ҆б̾ѧ́тїихъ пра́веднагѡ сѷмеѡ́на: подоба́ше бо тѝ, жизнода́вче всѣ́хъ, ѿ ста́рца позна́тисѧ, ꙗ҆́кѡ прїи́де ѿпꙋсти́ти є҆го̀, по глаго́лꙋ твоемꙋ̀, и҆мѣ́ѧй ве́лїю ми́лость."
 }
]