ponomar-pwa/static/data/shared/menaion-daily/02-26/1.json

[
 {
  "type": "HEADER",
  "value": "Феѵрꙋа́рїа к҃ѕ"
 },
 {
  "type": "HEADER",
  "value": "И҆́же во ст҃ы́хъ ѻ҆ц҃а̀ на́шегѡ порфѵ́рїа, а҆рхїепі́скопа га́зскагѡ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Прпⷣбне ѻ҆́ч҃е порфѵ́рїе, ты̀ крⷭ҇тъ хрⷭ҇то́въ на ра́мо взе́мъ, ѡ҆ста́вилъ є҆сѝ всѧ̑, и҆ дости́глъ є҆сѝ пꙋсты́ню, и҆ бра́лсѧ є҆сѝ съ мїроде́ржцемъ, моли́твами и҆ посто́мъ воѡрꙋ́жсѧ: тѣ́мже низложи́лъ є҆сѝ съ си́мъ мꙋдрова́нїе плотско́е, хра́мъ бы́въ бжⷭ҇твеннагѡ дх҃а."
 },
 {
  "type": "TEXT",
  "value": "Ꙗ҆́коже трѝ дре́вле спа́слъ є҆́сть ѿ ѻ҆гнѧ̀ бг҃ъ а҆́гг҃ломъ, и҆ ны́нѣ тобо́ю ѻ҆́троки трѝ въ ро́въ попо́лзшыѧсѧ спасѐ: въ ко́шницѣ бо, ꙗ҆́коже носи́ми бѧ́хꙋ, свѣ́томъ ѻ҆́блака си́хъ ѡ҆сѣнѝ, трѝ воѡбрази́вша кресты̀ въ тѣлесѣ́хъ, на ѡ҆бличе́нїе проти́вѧщымсѧ тебѣ̀, порфѵ́рїе."
 },
 {
  "type": "TEXT",
  "value": "Кто̀ по достоѧ́нїю воспое́тъ напа̑сти и҆ болѣ̑зни, бѣды̑ и҆ скѡ́рби твоѧ̑, и҆̀же по вѣ́рѣ по́двиги твоѧ̑, порфѵ́рїе; мно́гое бо твоѐ сꙋ́щее, є҆́же по бз҃ѣ показа́лъ є҆сѝ дерзнове́нїе. Тѣ́мже мо́лимъ тѧ̀, дерзнове́нїе бо и҆́маши, ѡ҆ на́съ моли́сѧ ко гдⷭ҇ꙋ, спасти́сѧ на́мъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ: гла́съ и҆ подо́бенъ то́йже."
 },
 {
  "type": "TEXT",
  "value": "Пло́ть ѿ крове́й твои́хъ прїе́мъ первовѣ́чный бг҃ъ, тѧ̀ предста́тельницꙋ показа̀ человѣ́кѡмъ, чⷭ҇таѧ. Тѣ́мже и҆зба́ви рабы̑ твоѧ̑ ѿ всѧ́кїѧ бѣды̀ и҆ ѡ҆бстоѧ́нїѧ, и҆ сѣ́тей лꙋка́вагѡ врага̀, и҆ сїѧ́нїѧ причасти́тисѧ сподо́би и҆збра́нныхъ, всѧ̑ сла́вѧщыѧ и҆ покланѧ́ющыѧсѧ тебѣ̀."
 },
 {
  "type": "HEADER",
  "value": "Крⷭ҇тобг҃оро́диченъ. Подо́бенъ то́йже:"
 },
 {
  "type": "TEXT",
  "value": "Тѧ̀ ви́дѧщи пригвожда́ема на крⷭ҇тѣ̀, і҆и҃се, и҆ стрⷭ҇ти прїе́млюща во́лею, дв҃а и҆ мт҃и твоѧ̀, влⷣко, ᲂу҆вы̀ мнѣ̀, вопїѧ́ше, ча́до сла́дкое: ра̑ны непра́веднѡ ка́кѡ терпи́ши, врачꙋ̀, и҆сцѣли́вый человѣ́ческое неможе́нїе, и҆ ѿ тлѝ всѣ́хъ и҆зба́вивый милосе́рдїемъ твои́мъ;"
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Пра́вило вѣ́ры, и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е порфѵ́рїе, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Канѡ́нъ, творе́нїе геѡ́ргїево, гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Порфѵ́рою цр҃ковь дне́сь ꙗ҆́коже ца́рскою ᲂу҆кра́шена, ᲂу҆че́ньми твои́ми, ст҃и́телю порфѵ́рїе, си́ми ᲂу҆краша́етсѧ и҆ воспѣва́етъ всѣ́хъ гдⷭ҇а."
 },
 {
  "type": "TEXT",
  "value": "Житїе́мъ просїѧ́въ, прпⷣбне, и҆ словесы̀ бжⷭ҇твенными твои́ми, свѣти́льникъ ꙗ҆ви́лсѧ є҆сѝ всѣ̑мъ человѣ́кѡмъ, при́снѡ сїѧ́ѧ дѣ́лы и҆ ᲂу҆че́ньми, и҆ ѡ҆зарѧ́ѧ концы̀."
 },
 {
  "type": "TEXT",
  "value": "Кропле́нїемъ прест҃а́гѡ дх҃а, порфѵ́рїе, ѡ҆чи́щсѧ, и҆ бж҃е́ственныхъ добродѣ́телей во ѻ҆де́ждꙋ ѡ҆дѣ́ѧвсѧ, вше́лъ є҆сѝ въ незаходи̑маѧ свѧщеннодѣ́йствовати тебѐ пома́завшемꙋ."
 },
 {
  "type": "TEXT",
  "value": "Бг҃оро́диченъ: Сказа́ти сꙋ́щымъ на землѝ неизрече́нное, и҆ па́че ᲂу҆ма̀ чл҃вѣколю́бїе, хотѧ̀ сн҃ъ бж҃їй, бг҃оневѣ́сто, и҆зъ тебє̀, пло́тїю роди́сѧ, вѣ̑рнымъ подаѧ̀ порожде́нїе."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "Покори́лъ є҆сѝ подъ но́зѣ ѕлочести́выхъ мꙋдрова̑нїѧ, и҆̀же на самаго̀ бг҃а всѧ́ческихъ вѣща̑ющаѧ."
 },
 {
  "type": "TEXT",
  "value": "Глагѡ́лъ твои́хъ ѻ҆гне́мъ хвра́стїе ма́нентово мꙋ́дрѣ попали́лъ є҆сѝ, и҆ вѣ̑рнымъ просвѣще́нїе ᲂу҆че́нїѧ просте́рлъ є҆сѝ."
 },
 {
  "type": "TEXT",
  "value": "Водрꙋзи́въ на тве́рдѣмъ ка́мени но́ги вѣ́рныхъ, поколеба́лъ є҆сѝ ѿ ѡ҆снова́нїѧ самогѡ̀ ѡ҆снова́нїе нече́ствꙋющихъ, порфѵ́рїе."
 },
 {
  "type": "TEXT",
  "value": "Бг҃оро́диченъ: И҆спо́лнисѧ всѧ̀ землѧ̀, сн҃а твоегѡ̀ и҆ бг҃а, чⷭ҇таѧ, и҆́стиннагѡ ра́зꙋма и҆ сла́вы неизрече́нныѧ, и҆ бл҃года́ти."
 },
 {
  "type": "HEADER",
  "value": "Сѣда́ленъ гла́съ г҃."
 },
 {
  "type": "TEXT",
  "value": "Подо́бенъ: Бжⷭ҇твенныѧ вѣ́ры:"
 },
 {
  "type": "TEXT",
  "value": "Дѣ́лы просїѧ́лъ є҆сѝ ꙗ҆́кѡ денни́ца, всю̀ є҆́ресь ѿгна́лъ є҆сѝ ѿ цр҃кве, ст҃и́телю порфѵ́рїе: и҆ вѣ́рныхъ сердца̀ просвѣти́лъ є҆сѝ, воспѣва́ти и҆ сла́вити гдⷭ҇а. Тѣ́мже дне́сь па́мѧть творѧ́ще вопїе́мъ тѝ: молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ, но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Пресвѣ́тлагѡ вѣ́ры сїѧ́нїѧ, въ дꙋшѝ сл҃нце пра́вды и҆мѣ́ѧ, просвѣти́лъ є҆сѝ словесы̀, порфѵ́рїе, цр҃ко́вное всѐ и҆сполне́нїе."
 },
 {
  "type": "TEXT",
  "value": "Оу҆тве́рждсѧ въ любвѝ бж҃їѧ сло́ва, ви́димыхъ, порфѵ́рїе, пристра́стїѧ всѧ́кагѡ возгнꙋша́лсѧ є҆сѝ: тѣ́мже тѧ̀ почита́емъ, ꙗ҆́кѡ равноа́гг҃льна и҆ ст҃и́телѧ че́стна."
 },
 {
  "type": "TEXT",
  "value": "Въ прича́стїи та̑инъ неизрече́нныхъ, ꙗ҆́коже бы́въ, порфѵ́рїе, сїѧ̑ чи́стыми соблю́лъ є҆сѝ дѣѧ́ньми, чи́стѡ и҆ неизрече́ннѡ, ꙗ҆́кѡ таи́нникъ си̑мъ досто́инъ."
 },
 {
  "type": "TEXT",
  "value": "Бг҃оро́диченъ: Оу҆краша́етсѧ сла́внѡ твои́ми цр҃ковь вели́чєствїи, пречⷭ҇таѧ, бжⷭ҇твенными: и҆ ᲂу҆добрѧ́етсѧ си́ми ꙗ҆́снѡ, и҆ любо́вїю сла́витъ тѧ̀, пѣсносло́вѧ твоѐ ржⷭ҇тво̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Вѣті́ѧмъ плени̑цы разорѧ́ѧ, порфѵ́рїе, словесы̀ и҆́стинными, вѣ́ры держа́вꙋ ᲂу҆твержда́ѧ всѧ́чески."
 },
 {
  "type": "TEXT",
  "value": "Поче́рпъ на землѝ ᲂу҆тѣ́шителѧ, прпⷣбне, ᲂу҆че́нїй незави̑стныѧ рѣ́ки бл҃гоче́стїѧ и҆сточи́лъ є҆сѝ, порфѵ́рїе."
 },
 {
  "type": "TEXT",
  "value": "И҆зсꙋши́въ ѻ҆гне́мъ слове́съ твои́хъ, порфѵ́рїе, пото́ки нече́стїѧ, бл҃гоче́стїѧ вѣща́нїемъ человѣ́ки просвѣти́лъ є҆сѝ."
 },
 {
  "type": "TEXT",
  "value": "Бг҃оро́диченъ: Оу҆крѣ́пльшесѧ тобо́ю, си́лою дꙋхо́вною сꙋпоста́ты проти̑вныѧ хрⷭ҇то́вы и҆́стины побѣжда́емъ, пречⷭ҇таѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Дꙋхо́внѡ тѧ̀, ѡ҆дꙋшевле́нъ добродѣ́телей ѻ҆́бразъ, порфѵ́рїе, и҆ при́снѡ сїѧ́ющъ и҆мꙋ́ще, въ дѣла̀ бжⷭ҇твєнна всѝ вои́стиннꙋ: сегѡ̀ ра́ди тѧ̀ почита́емъ."
 },
 {
  "type": "TEXT",
  "value": "Си́лою ᲂу҆тѣ́шителѧ ѡ҆дѣ́ѧвсѧ, ꙗ҆́коже самови́дцы сло́ва, врагѝ непобѣди́мь ꙗ҆ви́лсѧ є҆сѝ, ѿгонѧ̀ и҆ посѣка́ѧ си́хъ нечє́стїѧ."
 },
 {
  "type": "TEXT",
  "value": "Водо́ю сыноположе́нїѧ креще́нїѧ ѡ҆бновлѧ́ѧ человѣ́ки, сы́ны творѧ́щаго си́хъ приве́лъ є҆сѝ, и҆ пре́далъ є҆сѝ чи̑сты, непорѡ́чны, порфѵ́рїе."
 },
 {
  "type": "TEXT",
  "value": "Бг҃оро́диченъ: Разꙋмѣ́вше твоѧ̑, ꙗ҆̀же па́че сло́ва бжⷭ҇твєннаѧ та̑инства, и҆ неизрече́ннꙋ сла́вꙋ, и҆̀же ѡ҆ тебѣ̀ хва́лѧщїисѧ, пречⷭ҇таѧ, вои́стиннꙋ тѧ̀ бцⷣꙋ непреста́ннѡ сла́вимъ."
 },
 {
  "type": "HEADER",
  "value": "Конда́къ, гла́съ."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Свѧще́ннѣйшими твои́ми нра́вы ᲂу҆краша́емь, свѧще́нства ѻ҆де́ждею ѡ҆зари́лсѧ є҆сѝ, всебл҃же́нне бг҃омꙋ́дре порфѵ́рїе: и҆ и҆сцѣле́нїй ᲂу҆добрѧ́еши возвыше́ньми, молѧ́сѧ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Коле́блемꙋю проти́вными вѣ́тры и҆ прило́ги, ѻ҆́ч҃е, хрⷭ҇то́вꙋ водрꙋзи́лъ є҆сѝ держа́внѡ цр҃ковь, семꙋ̀ пою́щꙋю: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Собо́ры до́блественнѣ є҆реті́чєскїѧ побѣди́лъ є҆сѝ, ѻ҆́ч҃е мꙋ́дре, ѻ҆рꙋ̑жїи слове́сными ѡ҆дѣ́ѧвсѧ, и҆ хрⷭ҇тꙋ̀ бл҃года́рнѡ взыва́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Въ ра́й мы́сленныхъ вше́лъ є҆сѝ добродѣ́телей, ѿ ни́хже цвѣ́ты пожа́лъ є҆сѝ и҆́стинныѧ и҆ кра̑сныѧ, ѻ҆́ч҃е порфѵ́рїе, и҆́миже въ мі́рѣ бл҃гоꙋха́лъ є҆сѝ."
 },
 {
  "type": "TEXT",
  "value": "Бг҃оро́диченъ: Крѣ́пость и҆ держа́вꙋ тѧ̀ немѡщны́мъ всѣ̑мъ, си́льное сло́во бж҃їе, дв҃о, и҆зъ тебє̀ ро́ждшеесѧ дарова̀ взыва́ющымъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Воѡрꙋжи́лъ є҆сѝ словесы̀ твои́ми, мꙋ́дре, цр҃ковь хрⷭ҇то́вꙋ, и҆ ᲂу҆тверди́лъ є҆сѝ: тѣ́мже побѣжда́етъ всегда̀ наше́ствїе є҆ресе́й и҆ побѣдоно́снѡ хрⷭ҇тꙋ̀ пое́тъ взыва́ющи: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆́мъ на нб҃са̀ вы́нꙋ и҆мѣ́ѧ, порфѵ́рїе, бжⷭ҇твеннагѡ ᲂу҆лꙋчи́лъ є҆сѝ премѣне́нїѧ неизрече́ннѡ, и҆ чꙋ́вствомъ непости́жна, ви́дѧ та̑инства хрⷭ҇тѡ́ва, и҆ вѣ́рою взыва́лъ є҆сѝ є҆мꙋ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆ста̀ львѡ́въ мы́сленныхъ, ѕлѣ̀ хꙋ́лѧщихъ, загради́лъ є҆сѝ моли́твами твои́ми, порфѵ́рїе, и҆ чє́люсти сокрꙋши́лъ є҆сѝ стрѣла́ми тве́рдыми бжⷭ҇твенныхъ слове́съ твои́хъ, семꙋ̀ взыва́ѧ прилѣ́жнѡ, ᲂу҆крѣплѧ́ющемꙋ тѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: И҆́же на прⷭ҇то́лѣ сла́вы ѻ҆ц҃а̀ сѣдѧ́й, сн҃ъ и҆ сло́во є҆гѡ̀, тѧ̀ бжⷭ҇твенно носи́ло, чⷭ҇таѧ, и҆ сѣда́лище пресла́вно, и҆зъ тебє̀ рожде́йсѧ пло́тїю, є҆ди́нꙋ содѣ́ла, ю҆́же всѝ земні́и воспѣва́ютъ, ꙗ҆́кѡ влⷣчцꙋ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Честны̑ѧ прине́слъ є҆сѝ да́ры, бл҃гопрїѧ̑тныѧ добродѣ́тєли твоѧ̑, великодарови́томꙋ влⷣцѣ, и҆зба́вльшыѧсѧ ѿ ле́сти є҆ресе́й тобо́ю, ѻ҆́ч҃е прпⷣбне, зижди́телѧ всѣ́хъ велича́ющыѧ."
 },
 {
  "type": "TEXT",
  "value": "Тꙋ́чами сле́зъ твои́хъ страсте́й ᲂу҆гаси́лъ є҆сѝ пла́мень, и҆ безстра́стїемъ зижди́телю послꙋжи́лъ є҆сѝ, и҆ сла́вы лꙋ́чшїѧ сподо́билсѧ є҆сѝ, порфѵ́рїе, сего̀ поѧ̀ и҆ велича́ѧ при́снѡ."
 },
 {
  "type": "TEXT",
  "value": "Съ вы́шними ликꙋ́ѧ а҆́гг҃лы и҆ ст҃ы́ми, и҆ прпⷣбными, ѡ҆ и҆̀же вѣ́рою чтꙋ́щихъ тѧ̀, и҆ восхвалѧ́ющихъ, ѻ҆́ч҃е порфѵ́рїе, бл҃годѣ́телѧ гдⷭ҇а непреста́ннѡ молѝ."
 },
 {
  "type": "TEXT",
  "value": "Бг҃оро́диченъ: Ѡ҆ на́шемъ спасе́нїи вочл҃вѣ́чивсѧ влⷣка, тѧ̀ хода́таицꙋ всѣ̑мъ и҆ покро́въ, и҆ врачева́нїе, чⷭ҇таѧ, дарова̀ вѣ́рнѡ тѧ̀ сла́вѧщымъ, и҆ сего̀ любо́вїю велича́ющымъ."
 }
]