754 lines
65 KiB
JSON
754 lines
65 KiB
JSON
[
|
|
{
|
|
"type": "HEADER",
|
|
"value": "А҆прі́ллїа з҃і"
|
|
},
|
|
{
|
|
"type": "HEADER",
|
|
"value": "Прпⷣбнагѡ ѻ҆ц҃а̀ на́шегѡ зѡсі́мы, и҆гꙋ́мена чⷭ҇тны́ѧ ѻ҆би́тели солове́цкїѧ."
|
|
},
|
|
{
|
|
"type": "HEADER",
|
|
"value": "Ве́черъ, на ма́лѣй вече́рни, на Гдⷭ҇и, воззва́хъ, стїхи̑ры, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆́кѡ до́блѧ:"
|
|
},
|
|
{
|
|
"type": "TEXT",
|
|
"value": "До́лꙋ влекꙋ́щагѡ мꙋдрова́нїѧ совле́клсѧ є҆сѝ, мꙋ́дре, на высотꙋ̀ простира́ѧсѧ, та́мѡ приѡбща́тисѧ сꙋ́щымъ жела́ѧ, ѻ҆́ч҃е зѡсі́мо, є҆́же и҆ полꙋчи́лъ є҆сѝ ны́нѣ, плотскі́ѧ тѧ́жести и҆зрѣши́всѧ: и҆ ѡ҆ на́съ моли́сѧ, вѣ́рою чтꙋ́щихъ честнꙋ́ю па́мѧть твою̀. Два́жды."
|
|
},
|
|
{
|
|
"type": "TEXT",
|
|
"value": "Пра́востїю смы́сла помышлѧ́ѧ и҆ разсмотрѧ́ѧ многомѧте́жнꙋю, ѻ҆́ч҃е, житїѧ̀ бꙋ́рю, ти́хое же и҆ невла́емое приста́нище безмо́лвїѧ, є҆́же и҆ предпоче́тъ па́че, ѻ҆́но же досто́йнѡ ѿве́рглъ є҆сѝ, и҆ и҆зрѣши́всѧ сѣ́тей многоплете́ннагѡ сладостра́стїѧ, молѝ спасти́сѧ на́мъ."
|
|
},
|
|
{
|
|
"type": "TEXT",
|
|
"value": "Цѣломꙋ́дръ и҆ кро́токъ ѿ ю҆́ности бы́лъ є҆сѝ, ѻ҆́ч҃е зѡсі́мо бл҃же́нне, пра́востїю се́рдца и҆ ᲂу҆ма̀ чистото́ю добродѣ́тєли ᲂу҆держа́въ, и҆́миже бг҃ꙋ прибли́жилсѧ є҆сѝ. Є҆го́же ны́нѣ молѝ, ѿ тлѝ и҆ бѣ́дъ и҆зба́вити вѣ́рою творѧ́щихъ честнꙋ́ю па́мѧть твою̀."
|
|
},
|
|
{
|
|
"type": "HEADER",
|
|
"value": "Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Стеце́мсѧ, мона́шеское мно́жество, соше́дшесѧ, пра́здникъ соста́вимъ: честна́ѧ бо па́мѧть ѻ҆ц҃а̀ на́шегѡ зѡсі́мы сердца̀ на̑ша ѡ҆зарѧ́етъ неви́димѡ до́брыми возсїѧ́ющи дѣ́лы. Сегѡ̀ ра́ди согла́снѡ воспѣва́юще рце́мъ: ра́дꙋйсѧ, вѣ́рный ра́бе хрⷭ҇та̀ бг҃а: ра́дꙋйсѧ, по́стникѡвъ свѣ́тлаѧ похвало̀: ра́дꙋйсѧ, мона́шествꙋющихъ наста́вниче: ра́дꙋйсѧ, и҆сцѣле́нїй и҆сто́чниче. Ѡ҆ на́съ, прпⷣбне, молѝ всѣ́хъ цр҃ѧ̀ хрⷭ҇та̀ бг҃а на́шего, и҆зба́витисѧ ѿ собла̑знъ льсти́вагѡ, и҆ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На стїхо́внѣ, въ трїѡ́ди. Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Прїиди́те, празднолю́бцы, ѱало́мскꙋю пѣ́снь воскре́сшемꙋ и҆зъ ме́ртвыхъ хрⷭ҇тꙋ̀ принесе́мъ: дне́сь бо разꙋ́мнаѧ весна̀ возсїѧ̀ на́мъ, подаю́щи цвѣ́ты словє́сныѧ, вселюбе́знаѧ па́мѧть ѻ҆ц҃а̀ на́шегѡ зѡсі́мы, ю҆́же досто́йнѡ почита́юще, прїе́млемъ и҆сто́чники и҆сцѣле́нїѧ, и҆злива́ющыѧсѧ на́мъ ѿ всечестны́ѧ ра́ки незави́стнѡ: подвиза́босѧ терпѣли́внѡ на землѝ, и҆ нбⷭ҇ныѧ да́ры прїѧ́тъ. Тѣ́мже того̀ ны́нѣ мо́лимъ, моли́тисѧ непреста́ннѡ хрⷭ҇тꙋ̀ бг҃ꙋ, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На вели́цѣй вече́рни, на Гдⷭ҇и, воззва́хъ поста́вимъ стїхи̑ры на и҃. Въ трїѡ́ди г҃, и҆ прпⷣбнагѡ є҃, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Ѻ҆́ч҃е прпⷣбне зѡсі́мо, впери́въ ᲂу҆́мъ тво́й къ бг҃ꙋ вѣ́рою, мїрска́гѡ смѣше́нїѧ возгнꙋша́лсѧ є҆сѝ непостоѧ́ннагѡ, и҆ крⷭ҇тъ тво́й взе́мъ, всеви́дцꙋ послѣ́довалъ є҆сѝ, тѣ́ло непокори́вое по́двиги воздержа́нїѧ, по́мыслы порабо́тивъ си́лою бжⷭ҇твеннагѡ дх҃а."
|
|
},
|
|
{
|
|
"type": "TEXT",
|
|
"value": "Ѻ҆́ч҃е бг҃омꙋ́дре зѡсі́мо, ты̀ ѿ ᲂу҆тро́бы ма́терни хрⷭ҇тꙋ̀ прибли́жилсѧ є҆сѝ, и҆ всѣ́мъ смы́сломъ томꙋ̀ прилѣжа́лъ є҆сѝ, и҆ ѿ твои́хъ пѡ́двигъ бг҃ꙋ вседержи́телю плоды̀ достѡ́йныѧ приносѧ̀, прпⷣбне, добродѣ́тельными цвѣты̀ ᲂу҆краша́емь: тѣ́мъ благи́хъ наслажде́нїе ѡ҆брѣ́лъ и҆ воспрїѧ́лъ є҆сѝ, досточꙋ́дне."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е премꙋ́дре зѡсі́мо, болѧ́щымъ ты̀ ꙗ҆ви́лсѧ є҆сѝ и҆сцѣле́нїе, и҆ хромы̑мъ хожде́нїе ми́лостивнѡ сотворѧ́еши, и҆ всѣ̑мъ притека́ющымъ съ вѣ́рою къ цѣльбоно́сномꙋ гро́бꙋ твоемꙋ̀, и҆ просѧ́щымъ по́мощи и҆ застꙋпле́нїѧ, ты́ же моли́твами твои́ми и҆сцѣле́нїе недꙋ́гꙋющымъ неѡскꙋ́днѡ подава́еши."
|
|
},
|
|
{
|
|
"type": "HEADER",
|
|
"value": "И҆́ны стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: Кі́ими похва́льными:"
|
|
},
|
|
{
|
|
"type": "TEXT",
|
|
"value": "Кі́ими похва́льными вѣнцы̀ ᲂу҆вѧзе́мъ ѻ҆ц҃а̀ на́шего зѡсі́мꙋ, добродѣ́телей сокро́вище, сосꙋ́дъ чистоты̀, прїѧ́телище бл҃года́ти, и҆сто́чникъ и҆сцѣле́нїй, є҆гѡ́же ра́ди врагѡ́въ шата́нїе хрⷭ҇то́съ низложѝ, и҆мѣ́ѧй ве́лїю ми́лость;"
|
|
},
|
|
{
|
|
"type": "TEXT",
|
|
"value": "Кі́ими пѣ́сненными добро́тами похва́лимъ на́шего наста́вника, пꙋсты́ннаго граждани́на, цѣломꙋ́дрїѧ храни́телѧ, болѧ́щихъ врача̀ безме́здна, є҆гѡ́же ра́ди врагѡ́въ шата́нїе хрⷭ҇то́съ низложѝ, и҆мѣ́ѧй ве́лїю ми́лость;"
|
|
},
|
|
{
|
|
"type": "TEXT",
|
|
"value": "Кі́ими смире́нными ᲂу҆стна́ми ᲂу҆блажи́мъ до́брыхъ рачи́телѧ, по́стника и҆́стинна, бѣ̑днымъ помо́щника, въ мо́ри ѡ҆бꙋрева́емыхъ предста́телѧ, прибѣга́ющымъ приста́нище, є҆гѡ́же ра́ди врагѡ́въ шата́нїе хрⷭ҇то́съ низложѝ, и҆мѣ́ѧй ве́лїю ми́лость;"
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃. Самогла́сенъ:"
|
|
},
|
|
{
|
|
"type": "TEXT",
|
|
"value": "Прїиди́те, по́стническое сосло́вїе, дꙋхо́вный ли́къ соста́вимъ, пѣ̑нїѧ трꙋбо́ю возглаша́юще, бл҃года́рственными гла́сы ѻ҆ц҃ꙋ̀ на́шемꙋ возопїе́мъ, глаго́люще: ра́дꙋйсѧ, хрⷭ҇то́въ подви́жниче зѡсі́мо, любо́вїю бо сегѡ̀ ѡ҆ста́вилъ є҆сѝ мі́ръ, прпⷣбне. Ра́дꙋйсѧ, и҆́же тѣ́ло твоѐ посто́мъ и҆ трꙋды̀ и҆знꙋрѧ́ѧ, вѣ́чныѧ ра́ди и҆ бл҃же́нныѧ вои́стиннꙋ жи́зни. Ра́дꙋйсѧ, чи́стый тѣ́ломъ и҆ дꙋше́ю, ѡ҆зарѧ́ѧсѧ непреста́ннѡ сїѧ́нїемъ хрⷭ҇та̀ бг҃а: на́мъ же творѧ́щымъ честнꙋ́ю па́мѧть твою̀, молѝ и҆зба́витисѧ всѧ́кагѡ гнѣ́ва и҆ тлѝ, и҆ мꙋче́нїѧ, бл҃же́нне."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника. Вхо́дъ. Прокі́менъ днѐ, и҆ парємїѝ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, И҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ є҃.)"
|
|
},
|
|
{
|
|
"type": "TEXT",
|
|
"value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе бл҃голѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ бл҃гокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры самогла́сны, гла́съ а҃:"
|
|
},
|
|
{
|
|
"type": "TEXT",
|
|
"value": "Свѣ́тлаѧ па́мѧть ᲂу҆спе́нїѧ твоегѡ̀, прпⷣбне ѻ҆́ч҃е зѡсі́мо, на́мъ сердца̀ просвѣща́етъ: зрѧ́ще бо честнꙋ́ю твою̀ ра́кꙋ, врачевство̀ страсте́й неꙋдо́бь цѣли́мыхъ, прославлѧ́емъ просла́вльшаго тѧ̀ гдⷭ҇а, и҆ твоѧ̑ трꙋды̀ и҆ по́двиги вѣнча́вша бл҃года́тїю, ᲂу҆се́рднѡ и҆ мы̀ подвигѡ́въ и҆ трꙋдѡ́въ є҆́мшесѧ, твое́ю стезе́ю ходи́ти ко хрⷭ҇тꙋ̀ бг҃ꙋ, є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Гла́съ в҃:"
|
|
},
|
|
{
|
|
"type": "TEXT",
|
|
"value": "Во ᲂу҆спе́нїи твое́мъ, бл҃же́нне, ᲂу҆чи́тельница на́мъ быва́етъ твоѧ̀ ра́ка, при́снѡ бо и҆злива́ющимисѧ чꙋдесы̀ вопїе́тъ, возводѧ̀ къ трꙋдѡ́мъ и҆ подвигѡ́мъ, глаго́лѧ: возлюби́те гдⷭ҇а, да ѡ҆брѧ́щете бл҃года́ть вѣ́чнꙋю, и҆ ничто́же па́че є҆гѡ̀ почти́те, да є҆гда̀ прїи́детъ, ѡ҆брѧ́щете поко́й со и҆збра́нными є҆гѡ̀: є҆го́же да и҆ мы̀ ᲂу҆лꙋчи́мъ, твои́ми моли́твами."
|
|
},
|
|
{
|
|
"type": "TEXT",
|
|
"value": "Въ незаходи̑мыѧ заше́лъ є҆сѝ мо́рѧ ѡ҆то́ки, пристра́стїѧ мі́ра бѣ́гаѧ, до́блимъ ге́рманомъ наставлѧ́емь, въ чꙋ́днагѡ савва́тїа селе́нїе: и҆дѣ́же и҆ мона́шеское мно́жество собра́лъ є҆сѝ, наставлѧ́ѧ си́хъ посто́мъ и҆ трꙋды̀ на стєзѝ добродѣ́телей, возвыша́ѧ си́хъ къ бжⷭ҇твенномꙋ раче́нїю. И҆дѣ́же ны́нѣ въ незаходи̑маѧ вше́лъ є҆сѝ пресвѣ́тлагѡ свѣ́та прест҃ы́ѧ трⷪ҇цы, ѻ҆́ч҃е, рꙋководѧ̀ на́съ моли́твами твои́ми."
|
|
},
|
|
{
|
|
"type": "HEADER",
|
|
"value": "Гла́съ и҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е всече́стне зѡсі́мо, до́брыми дѣ́тельми возше́дъ, ꙗ҆́кѡ на колесни́цꙋ восте́клъ є҆сѝ, побѣ̑дныѧ по́чєсти ѿ негѡ̀ прїе́млѧ: тѣ́ло твоѐ трꙋдолю́бное, ꙗ҆́кѡ ма̑сти на́мъ во гро́бѣ ѡ҆ста́вилъ є҆сѝ, ѻ҆́ч҃е, и҆сточа́ти и҆сцѣлє́нїѧ и҆ прогони́ти дꙋ́хи лꙋка̑выѧ: тѣ́мже тѧ̀ ᲂу҆блажа́емъ, всече́стне."
|
|
},
|
|
{
|
|
"type": "HEADER",
|
|
"value": "Сла́ва, гла́съ є҃:"
|
|
},
|
|
{
|
|
"type": "TEXT",
|
|
"value": "Возсїѧ̀ весна̀, прїиди́те, наслади́мсѧ: просїѧ̀ воскрⷭ҇нїе хрⷭ҇то́во, прїиди́те, возвесели́мсѧ: ѻ҆ц҃а̀ на́шегѡ па́мѧть чернори́зцы ѡ҆зарѧ́ющи показа́сѧ. Тѣ́мже, празднолю́бцы, прїиди́те, дꙋхо́внѣ торжествꙋ́емъ: се́й бо до́брѣ ра́това дїа́вола, и҆ сего̀ посрамѝ, крⷭ҇тъ хрⷭ҇то́въ на ра̑мꙋ носѧ̀, со страстьмѝ и҆ похотьмѝ тѣ́ло своѐ пропина́ѧ, бо́дростїю свѧще́нство своѐ ᲂу҆краша́ѧ, и҆ ны́нѣ свѧще́ннѡ въ незаходи̑маѧ заше́дъ, во свѣ́тѣ бг҃онача́льнагѡ свѧще́нства предста̀, сѣ́немъ є҆мꙋ̀ разрѣ́шшымсѧ. Тѣ́мже томꙋ̀ возопїе́мъ: прпⷣбне, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника. На стїхо́внѣ стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "На го́рꙋ добродѣ́телей восходѧ̀, до́лꙋ влекꙋ́щаѧ помышлє́нїѧ ѿтрѧса́ѧ, крⷭ҇тъ сп҃си́телевъ на ра́мо взе́мъ, ᲂу҆се́рднѡ томꙋ̀ послѣ́довалъ є҆сѝ. И҆ ны́нѣ добро́ты є҆гѡ̀ наслажда́ѧсѧ, помина́й на́съ чтꙋ́щихъ тѧ̀."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Нбⷭ҇ныхъ бла̑гъ жела́ѧ, мїрска̑ѧ сла̑дкаѧ ѿве́рглъ є҆сѝ, ненасы́тимыѧ сла́дости рачи́тель, а҆́лчбою и҆ жа́ждею томѧ̀ себѐ, є҆́же ны́нѣ вои́стиннꙋ ѡ҆брѣ́лъ є҆сѝ, ѻ҆́ч҃е зѡсі́мо."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Воздержа́нїемъ сла̑сти восхлаща́ѧ, и҆ сле́зными и҆сто́чники пла́мень погаша́ѧ страсте́й, тѣ́мже ны́нѣ зе́млю кро́ткихъ наслѣ́довалъ є҆сѝ, свеселѧ́сѧ прпⷣбнымъ и҆ пра́вєднымъ, ѻ҆́ч҃е на́шъ зѡсі́мо."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, мі́ра красоты̑ и҆ сла̑вы вре́мєнныѧ ѿню́дъ возненави́дѣлъ є҆сѝ, мона́шеское же житїѐ па́че возлюби́лъ є҆сѝ: и҆ а҆́гг҃лѡмъ собесѣ́дникъ бы́ти сподо́билсѧ є҆сѝ, и҆ свѣти́льникъ многосвѣ́тлый рѡссі́йскїѧ землѝ, чꙋдесы̀ ꙗ҆́коже второ́е со́лнце сїѧ́ѧ, всѣ́хъ на́съ помина́й, соверша́ющихъ свѧще́ннꙋю па́мѧть твою̀: мы́ бо, ча̑да твоѧ̑ и҆ ѻ҆́вцы слове́сныхъ твои́хъ ᲂу҆че́нїй, тѧ̀ на по́мощь призыва́емъ, просѧ́ще тобо́ю прїѧ́ти ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника. Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "И҆зволе́нїемъ бжⷭ҇твеннагѡ ра́зꙋма всели́лсѧ є҆сѝ въ пꙋсты́ню, и҆ та́мѡ впери́въ ᲂу҆́мъ тво́й въ нбⷭ҇ныѧ ѻ҆би́тєли, ра́внѡ а҆́гг҃лѡмъ житїѐ на землѝ пожи́въ, въ моли́твахъ и҆ трꙋдѣ́хъ и҆ поще́нїихъ, ѻ҆́бразъ бы́лъ є҆сѝ твои̑мъ ᲂу҆ченикѡ́мъ: ѿѻнꙋ́дꙋже бг҃ъ, ви́дѧ твоѐ благо́е и҆зволе́нїе, ᲂу҆мно́жи тебѣ̀ ча̑да въ пꙋсты́ни, сле́зъ твои́хъ тече́ньми напаѧ́емѣй: но ꙗ҆́кѡ и҆мѣ́ѧ дерзнове́нїе къ бг҃ꙋ, помина́й ста́до, є҆́же собра́лъ є҆сѝ мꙋ́дрѣ, и҆ не забꙋ́ди, ꙗ҆́коже ѡ҆бѣща́лсѧ є҆сѝ, посѣща́ѧ ча̑дъ твои́хъ, зѡсі́мо прпⷣбне ѻ҆́ч҃е на́шъ."
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-й стїхоло́гїи сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Во ѡ҆то́цѣ пꙋ́стѣ, ꙗ҆́коже во вселе́ннѣй пожи́лъ є҆сѝ, ѿню́дꙋже и҆ въ мо́ри пꙋсты́ню гра́дъ показа́лъ є҆сѝ: зѡсі́мо ѻ҆́ч҃е, молѝ спасти́сѧ на́мъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника. По в҃-й стїхоло́гїи сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Превозше́лъ є҆сѝ вра̑жїѧ прило́ги, бл҃года́тїю вжилѧ́емь, посто́мъ и҆ бдѣ́нїемъ ᲂу҆́мъ чи́стѧ, и҆ моли́твою бг҃ꙋ приближа́ѧсѧ, ѿню́дꙋже и҆ бѣсѡ́мъ прогони́тель ꙗ҆ви́лсѧ є҆сѝ, зѡсі́мо: молѝ спасти́сѧ на́мъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника. По полѷеле́и сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Постꙋ̀ прилѣжѧ̀ и҆ бдѣ́нїю, ѻ҆́ч҃е, безгнѣ́вїемъ и҆ кро́тостїю ᲂу҆краша́ѧсѧ, мона́хѡвъ чи́ни собра́лъ є҆сѝ, добродѣ́телей ѻ҆́бразы тѣ̑мъ предлага́ѧ, и҆ зако́ны воѡбража́ѧ, и҆́миже къ ра́зꙋмꙋ бжⷭ҇твенномꙋ возводѧ̀, прпⷣбне зѡсі́мо, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃ ѱалмѣ̀ стїхи́ра, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, слꙋ́хи твоѧ̑ прилѣ́жнѡ є҆ѵⷢ҇лїю вда́въ ᲂу҆слы́шалъ є҆сѝ бжⷭ҇твеннаго гла́са, зовꙋ́ща въ нбⷭ҇ное црⷭ҇тво, и҆ до́брѣ послѣ́довалъ є҆сѝ є҆мꙋ̀: мі́ра кра̑снаѧ ᲂу҆ме́ты вмѣни́лъ є҆сѝ, є҆ди́нагѡ добро́ты жела́ѧ хрⷭ҇та̀. Є҆мꙋ́же прилѣ́жнѡ моли́сѧ, мі́рꙋ посла́ти ми́ръ, це́рквамъ є҆диномы́слїе, странѣ̀ побѣ́дное ѡ҆долѣ́нїе, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Канѡ́нъ пра́здника въ трїѡ́ди, на ѕ҃: и҆ преподо́бнагѡ, на и҃: Канѡ́нъ. Гла́съ и҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ."
|
|
},
|
|
{
|
|
"type": "TEXT",
|
|
"value": "Бжⷭ҇твенною, ѻ҆́ч҃е, любо́вїю прилѣпи́лсѧ є҆сѝ ѿ ю҆́ности хрⷭ҇тꙋ̀, плотскі̑ѧ стра̑сти ᲂу҆вѧди́лъ є҆сѝ воздержа́нїемъ, зѡсі́мо премꙋ́дре, бг҃омъ помога́емь. И҆ ны́нѣ на́мъ свѣ́та мы́сленнагѡ и҆спо́лнитисѧ помоли́сѧ гдⷭ҇еви, пою́щымъ: сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Претрꙋди́лъ є҆сѝ тѣ́ло, пребога́те, и҆ стра̑сти плотскі̑ѧ, ѻ҆́ч҃е, порабо́тилъ є҆сѝ, зѡсі́мо, ꙗ҆́снѡ прїѧ́лъ є҆сѝ свѣ́тлость бл҃года́ти, и҆ се́ю просвѣ́щсѧ бжⷭ҇твеннѣ, взыва́лъ є҆сѝ: гдⷭ҇еви пои́мъ, сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Крѣ́постїю дꙋ́ха возмо́гъ, держа́вꙋ низложи́лъ є҆сѝ, и҆ си́лꙋ вра́жїю, и҆ похвалꙋ̀ побѣ́днꙋю, и҆ по́чєсти прїе́мь, прпⷣбне, чꙋде́сными сїѧ̑нїи просвѣти́лсѧ є҆сѝ, гдⷭ҇еви поѧ̀: сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Закѡ́нъ кромѣ̀ є҆сте́ственныхъ родила̀ є҆сѝ законода́вца бг҃а, чл҃вѣ́ка бы́вша: того̀ ꙗ҆́кѡ бла́га молѝ, всенепоро́чнаѧ, на̑ша беззакѡ́нїѧ презрѣ́ти, вопїю́щихъ всегда̀: гдⷭ҇еви пои́мъ, сла́внѡ бо просла́висѧ."
|
|
},
|
|
{
|
|
"type": "HEADER",
|
|
"value": "Дрꙋгі́й канѡ́нъ прпⷣбнагѡ. Гла́съ ѕ҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ꙗ҆́кѡ по сꙋ́хꙋ, пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
|
|
},
|
|
{
|
|
"type": "TEXT",
|
|
"value": "Пребжⷭ҇твенный свѣ́те трисо́лнечне, страсте́й те́мностїю ѡ҆мраче́на всего́ мѧ просвѣти́въ, ѡ҆чи́сти моли́твами твоегѡ̀ раба̀, чл҃вѣколю́бче, и҆ сего̀ чтꙋ́щꙋ сло́во мѝ вдохнѝ."
|
|
},
|
|
{
|
|
"type": "TEXT",
|
|
"value": "Пою́щꙋ свѣтоно́снꙋю па́мѧть твою̀, свѣ́тъ мѝ низпослѝ, ꙗ҆́кѡ бг҃онача́льномꙋ свѣ́тꙋ предстоѧ̀, прпⷣбне зѡсі́мо, страсте́й мои́хъ тмꙋ̀ моли́твами твои́ми ѿгонѧ́ѧ."
|
|
},
|
|
{
|
|
"type": "TEXT",
|
|
"value": "Кро́токъ и҆ ми́лостивъ, и҆ чи́стъ бы́въ, кро́ткихъ зе́млю дости́глъ є҆сѝ, ѻ҆́ч҃е, ᲂу҆кротѝ настоѧ́щꙋю бꙋ́рю се́рдца моегѡ̀: да въ тишинѣ̀ бжⷭ҇твеннѣй бы́въ, пѣсносло́влю твоѧ̑ по́двиги."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Твоего̀ прїи́мши содѣ́телѧ, ꙗ҆́кѡ са́мъ восхотѣ̀, и҆з̾ безсѣ́менна чре́ва твоегѡ̀, па́че ᲂу҆ма̀ воплоще́нна, чⷭ҇таѧ, тва́рей вои́стиннꙋ ꙗ҆ви́ласѧ є҆сѝ влⷣчца."
|
|
},
|
|
{
|
|
"type": "HEADER",
|
|
"value": "Катава́сїа пра́здника."
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
|
|
},
|
|
{
|
|
"type": "TEXT",
|
|
"value": "Пло́ть твою̀ ᲂу҆мертви́лъ є҆сѝ воздержа́нїемъ, прпⷣбне, дꙋ́шꙋ же бжⷭ҇твенными дарова̑нїи просвѣти́лъ є҆сѝ."
|
|
},
|
|
{
|
|
"type": "TEXT",
|
|
"value": "Всѐ ᲂу҆̀бо жела́нїе ко влⷣцѣ твоемꙋ̀ ѡ҆брати́лъ є҆сѝ, ꙗ҆́рость же на бѣ́сы, бг҃оно́се, воѡрꙋжи́лъ є҆сѝ."
|
|
},
|
|
{
|
|
"type": "TEXT",
|
|
"value": "И҆мѣ́ѧ споспѣшествꙋ́ющꙋ тѝ бж҃їю си́лꙋ, премꙋ́дре, ꙗ҆́кѡ чꙋ́денъ чꙋдеса̀ и҆сточа́еши, и҆ ѿго́ниши недꙋ́ги."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Въ ложесна̀ твоѧ̑ съ потща́нїемъ, всенепоро́чнаѧ, всели́сѧ зижди́тель, на благодѣѧ́нїе вѣ́рнѡ воспѣва́ющымъ тѧ̀."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
|
|
},
|
|
{
|
|
"type": "TEXT",
|
|
"value": "Цѣломꙋ́дрїѧ, ѻ҆́ч҃е, притѧжа́въ, и҆́мже на бжⷭ҇твеннꙋю любо́вь возше́лъ є҆сѝ, прїе́мь да́ры и҆сцѣлѧ́ти недꙋ́ги дꙋ́шъ и҆ тѣле́съ на́шихъ."
|
|
},
|
|
{
|
|
"type": "TEXT",
|
|
"value": "Оу҆́мъ тво́й нбⷭ҇ныѧ добро́ты созерца́ти, ѿ земны́хъ ѿлꙋчи́въ, прилѣжа́ти наказа́лъ є҆сѝ, зѡсі́мо, и҆дѣ́же ны́нѣ водворѧ́ешисѧ."
|
|
},
|
|
{
|
|
"type": "TEXT",
|
|
"value": "Ѻ҆́бразъ бы́въ твои̑мъ ᲂу҆ченикѡ́мъ къ добродѣ́тели, ѻ҆́ч҃е, и҆̀хже возводѧ̀ въ высотѣ̀ бжⷭ҇твеннагѡ раче́нїѧ, добродѣ́тели прилѣжа́ти наказꙋ́ѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Бжⷭ҇твеннагѡ ржⷭ҇тва̀ твоегѡ̀, чⷭ҇таѧ, всѧ́кагѡ є҆стества̀ чи́нъ прехо́дитъ чꙋ́до: бг҃а бо присносꙋ́щна прїи́мши во чре́вѣ и҆ ро́ждши, пребыва́еши при́снѡ дв҃а."
|
|
},
|
|
{
|
|
"type": "HEADER",
|
|
"value": "Конда́къ пра́здника. Сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Стра́стное порабо́тилъ є҆сѝ плотско́е мꙋдрова́нїе, дꙋ́хꙋ го́ршее покори́въ, ѻ҆́ч҃е пресла́вне, сокрꙋши́лъ є҆сѝ вы̑и бѣсѡ́мъ, и҆ посто́мъ возсїѧ́лъ є҆сѝ въ мі́рѣ, ꙗ҆́кѡ лꙋчы̀ со́лнечныхъ сїѧ́нїй, твоѧ̑ добродѣ́тєли показꙋ́ѧ: сегѡ̀ ра́ди тѧ̀ воспѣва́емъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Кро́тость и҆ любо́вь, преподо́бне, и҆мѣ́ѧ, добродѣ́тельми возше́лъ є҆сѝ на высотꙋ̀, ꙗ҆̀же и҆ твои̑мъ ᲂу҆ченикѡ́мъ воѡбрази́лъ є҆сѝ, предста́тель мона́хѡмъ, прїѧ́тъ ѿ бг҃а дѣ́йство бл҃года́ти, помога́ти бѣ́дствꙋющымъ, и҆ ны́нѣ притека́ющымъ и҆сцѣлє́нїѧ точѧ̀, здра́вїе подае́ши вопїю́щымъ тѝ: зѡсі́мо преподо́бне ѻ҆́ч҃е на́шъ, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
|
|
},
|
|
{
|
|
"type": "TEXT",
|
|
"value": "Премꙋ́дрости пе́рвѣе ты̀ рачи́тель ꙗ҆ви́лсѧ є҆сѝ, премꙋ́дре: житїе́ бо непоро́чно пожи́лъ є҆сѝ, ѡ҆чище́нъ и҆зрѧ́днѡ дꙋше́ю и҆ мы́слїю, согла́снѡ взыва́ѧ: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Ѡ҆чи́стивъ ᲂу҆́мъ тво́й ѿ стра́стныѧ молвы̀, сла́вне, и҆ чꙋ̑вства, мꙋ́дре, ᲂу҆пра́вивъ, къ немꙋ́тнѣй тишинѣ̀, ѻ҆́ч҃е, ᲂу҆стреми́лсѧ є҆сѝ въ морскі́й ѻ҆́стровъ, и҆ ᲂу҆се́рднѡ воспѣва́лъ є҆сѝ: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Земны̑ѧ печа̑ли воздержа́тельнѡ ѿтрѧ́съ: нбⷭ҇ныѧ надє́жды стѧжа̀ тво́й ᲂу҆го́дникъ, влⷣко, преподо́бный зѡсі́ма, со ᲂу҆се́рдїемъ поѧ̀: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆ви́сѧ въ мі́рѣ ѿ дв҃ы ꙗ҆́кѡ чл҃вѣ́къ, дарова̀ побѣ́дꙋ прпⷣбнымъ свои̑мъ, крⷭ҇то́мъ бо є҆гѡ̀ бѣ́сы прогна́ша, вѣ́рою зовꙋ́ще: сла́ва си́лѣ твое́й, гдⷭ҇и."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
|
|
},
|
|
{
|
|
"type": "TEXT",
|
|
"value": "Кро́тостїю, ѻ҆́ч҃е, навѣ́ты носѧ̀, терпѧ́ же и҆ ѿ твои́хъ на тѧ̀ востаю́щихъ, ѻ҆тє́ческимъ нра́вѡмъ послѣ́дꙋѧ, тѣ́хъ житїѐ въ себѣ̀ и҆мѣ́лъ є҆сѝ."
|
|
},
|
|
{
|
|
"type": "TEXT",
|
|
"value": "Терпѣ́нїе и҆ безгнѣ́вїе и҆мѣ́ѧ, ѿхо́диши и҆зъ кїнові́и гони́мь, возвраща́ѧсѧ же призыва́емь, смирѧ́лсѧ є҆сѝ ꙗ҆́кѡ ѻ҆троча̀, по хрⷭ҇то́вꙋ словесѝ."
|
|
},
|
|
{
|
|
"type": "TEXT",
|
|
"value": "Оу҆коре́нїе и҆ доса̑ды прїе́млѧ, подо́билсѧ є҆сѝ молча́нїю і҆и҃са моегѡ̀ бг҃а, младе́нєцъ безѕло́бїемъ црⷭ҇тво наслѣ́дꙋѧ, ᲂу҆ѧзвлѧ́ѧ же гордѧ́щасѧ врага̀."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆́кѡ вои́стиннꙋ неизречє́нна и҆ непостижи̑ма твоегѡ̀, бцⷣе, бг҃олѣ́пнагѡ сꙋ́ть ржⷭ҇тва̀, сꙋ́щымъ на землѝ и҆ нбⷭ҇нымъ, приснодв҃о, та̑инства."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебє̀ и҆но́гѡ не вѣ́мы."
|
|
},
|
|
{
|
|
"type": "TEXT",
|
|
"value": "Оу҆мо́мъ ѡ҆чище́ннымъ, пресла́вне, зри́ши добро́тꙋ неизрече́ннꙋю хрⷭ҇та̀, всѧ́ческихъ бг҃а на́шегѡ."
|
|
},
|
|
{
|
|
"type": "TEXT",
|
|
"value": "Оу҆мертвѝ на̑ша мꙋдрова̑нїѧ, чл҃вѣколю́бче, плотска̑ѧ и҆ взыгра̑нїѧ, бг҃опрїѧ́тными прпⷣбнагѡ твоегѡ̀ моли́твами."
|
|
},
|
|
{
|
|
"type": "TEXT",
|
|
"value": "Свы́ше на́съ назира́еши, пребл҃же́нне, и҆ ᲂу҆правлѧ́еши живо́тъ на́шъ, творѧ́щихъ любо́вїю, прпⷣбне, па́мѧть твою̀."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆сцѣлѝ недꙋ́гꙋющагѡ ᲂу҆ма̀ моегѡ̀ ѡ҆мраче́нїе, врача̀ ро́ждшаѧ хрⷭ҇та̀, всенепоро́чнаѧ влⷣчце."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
|
|
},
|
|
{
|
|
"type": "TEXT",
|
|
"value": "Но́сиши со ѻ҆́нагѡ по́лꙋ мо́рѧ, чꙋде́снагѡ савва́тїа мо́щи, и҆ твое́й ѻ҆би́тели сїѐ ца́рственное сокро́вище сниска́лъ є҆сѝ, є҆гѡ́же добродѣ́тєли въ себѣ̀ носѧ̀, зѡсі́мо прпⷣбне."
|
|
},
|
|
{
|
|
"type": "TEXT",
|
|
"value": "Ненаселе́ннаѧ населѧ́етсѧ, ѻ҆́ч҃е, тобо́ю, ꙗ҆́кѡ бо зарѧ̀ просїѧ́ша твоѧ̑ добродѣ́тєли: є҆́юже ѡ҆сїѧ́вшесѧ, въ пꙋсты́ню ꙗ҆́коже и҆ во гра́дъ, мона́шеское мно́жество сти́четсѧ."
|
|
},
|
|
{
|
|
"type": "TEXT",
|
|
"value": "Ѡ҆бѣща́нное дре́вле при савва́тїи чꙋ́днѣмъ, ны́нѣ тобо́ю и҆спо́лнисѧ, ѻ҆́ч҃е: пѡ́стникъ бо мно́жество къ тебѣ̀ прише́дше, и҆ добродѣ́телемъ прилѣжа́тъ, тобо́ю просвѣща́еми, зѡсі́мо."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Бцⷣꙋ тѧ̀ ѿ дꙋшѝ, влⷣчце мі́ра бл҃га́ѧ, и҆сповѣ́дающыѧ спаса́й: тебе́ бо застꙋпле́нїе непобѣди́мо и҆́мамы, и҆́стиннꙋю бг҃ороди́тельницꙋ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ сна̀ ѻ҆́бразъ тлѣ́нный, всегѡ̀ мі́ра сла́вꙋ зрѧ̀, є҆ди́нагѡ жива́гѡ бг҃а сла́вы возлюби́лъ є҆сѝ прича́стникъ бы́ти: ю҆́же, прпⷣбне, пра́веднѡ сподо́билсѧ є҆сѝ зрѣ́ти."
|
|
},
|
|
{
|
|
"type": "TEXT",
|
|
"value": "Лꙋка́вый ᲂу҆мертви́сѧ ѕмі́й свѧще́нными твои́ми моли́твами, бг҃облаже́нне, и҆ тогѡ̀ рѣша́ютсѧ ѕлѡ́бы, и҆̀же зна́менїе ѿ тебє̀ и҆спроси́вше, и҆ ᲂу҆го́дникъ свѣ́телъ бж҃їй позна́нъ бы́лъ є҆сѝ вѣ́ренъ."
|
|
},
|
|
{
|
|
"type": "TEXT",
|
|
"value": "Бг҃омꙋ́дрымъ по́мысломъ ᲂу҆краси́всѧ, ꙗ҆̀же на землѝ преѡби́дѣлъ є҆сѝ всѧ̑, и҆ нбⷭ҇ное, преблаже́нне ѻ҆́ч҃е, наслѣ́дїе, премꙋ́дре, разсꙋди́лъ є҆сѝ, зѡсі́мо, и҆ ны́нѣ ꙗ҆́вѣ на небесѣ́хъ живе́ши ра́дꙋѧсѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Гдⷭ҇ь съ тобо́ю, пречⷭ҇таѧ, ꙗ҆́коже и҆зво́лилъ є҆́сть, и҆ всѣ́хъ на́съ ѿ ѻ҆́бласти льсти́вагѡ хода́тайствомъ твои́мъ и҆зба́вилъ є҆́сть. Тѣ́мже тѧ̀ ны́нѣ по до́лгꙋ ро́дове родѡ́въ ᲂу҆блажа́ютъ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве."
|
|
},
|
|
{
|
|
"type": "TEXT",
|
|
"value": "Слеза́ми твои́ми, ѻ҆́ч҃е, потопи́лъ є҆сѝ ᲂу҆́мныѧ є҆гѵ́птѧны, и҆́миже ѡ҆чи́стивсѧ, чи́стомꙋ прибли́жилсѧ є҆сѝ, и҆ бл҃года́ть привлечѐ и҆сцѣле́нїѧ, благоꙋтро́бне, бѣ́дствꙋющыѧ ны̀ ѕлѣ̀, тре́бꙋющыѧ твоеѧ̀ по́мощи, спасѝ."
|
|
},
|
|
{
|
|
"type": "TEXT",
|
|
"value": "Сла́ное, ѻ҆́ч҃е, невѣ́рїѧ мо́ре и҆стека́ющими ѿ тебє̀ си́лами и҆ зна́меньми возмꙋща́етсѧ, и҆ ѕлоче́стїе благоче́стїемъ ло́пи и҆змѣнѧ́етсѧ, и҆ тма̀ невѣ́дѣнїѧ бг҃оразꙋ́мїемъ просвѣща́етсѧ, зѡсі́мо."
|
|
},
|
|
{
|
|
"type": "TEXT",
|
|
"value": "Предста́тельствовати стра́ждꙋщымъ, благода́ть, ѻ҆́ч҃е, и҆мѣ́ѧ, ника́коже ме́дли: но предварѝ, и҆ рꙋ́кꙋ по́мощи пода́ждь на́мъ, ѕлѣ̀ страстьмѝ ѡ҆держи̑мымъ: вси́ бо призыва́ющїи тѧ̀ вѣ́рнѡ ѿ бѣ́дъ спаса́ютсѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пречⷭ҇таѧ влⷣчце, ро́ждшаѧ земны̑мъ ѡ҆корми́телѧ и҆ гдⷭ҇и, страсте́й мои́хъ непостоѧ́нное и҆ лю́тое разженѝ смꙋще́нїе, и҆ тишинꙋ̀ пода́ждь се́рдцꙋ моемꙋ̀."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃:"
|
|
},
|
|
{
|
|
"type": "TEXT",
|
|
"value": "Хрⷭ҇то́вою любо́вїю ᲂу҆ѧзви́всѧ, прпⷣбне, и҆ тогѡ̀ крⷭ҇тъ сла́вный на ра́мо взе́мъ, поне́слъ є҆сѝ, бжⷭ҇твеннѣ воѡрꙋжи́всѧ, и҆ непреста̑нныѧ моли̑твы ꙗ҆́кѡ копїѐ въ рꙋцѣ̀ и҆мы́й, крѣ́пкѡ ссѣ́клъ є҆сѝ бѣсѡ́вскаѧ ѡ҆полчє́нїѧ. Тѣ́мъ зове́мъ тѝ: ра́дꙋйсѧ, преподо́бне ѻ҆́ч҃е зѡсі́мо, мона́хѡвъ ᲂу҆добре́нїе."
|
|
},
|
|
{
|
|
"type": "TEXT",
|
|
"value": "І҆́косъ: Оу҆слы́шавъ хрⷭ҇то́въ гла́съ, ѡ҆ста́вилъ є҆сѝ плотска̑ѧ мꙋдрова̑нїѧ, бога́тство же и҆ сла́вꙋ ꙗ҆́кѡ пра́хъ вмѣни́въ, на стра̑сти ꙗ҆́кѡ безпло́тенъ подвиза́лсѧ є҆сѝ, и҆ безпло́тныхъ ликостоѧ́нїю чистото́ю ᲂу҆подо́билсѧ є҆сѝ, и҆ ра́зꙋма дарова́нїе прїѧ́лъ є҆сѝ, є҆́же пода́ждь въ пѣ́снехъ пою́щымъ тѝ си́це: ра́дꙋйсѧ, зѡсі́мо прпⷣбне и҆ бг҃оно́се, нбⷭ҇ный человѣ́че и҆ земны́й а҆́гг҃ле: ра́дꙋйсѧ, ꙗ҆́кѡ кромѣ̀ мі́ра сꙋ́етнагѡ пꙋсты́ню содѣ́лавъ въ морско́мъ ѻ҆́стровѣ, въ не́мъ ѻ҆би́тель соста́вилъ є҆сѝ: ра́дꙋйсѧ, ꙗ҆́кѡ въ не́й мно́жество мона́хѡвъ собра́сѧ, и҆ ѿ ни́хъ слы́шиши си́це глаго́лемое: ра́дꙋйсѧ, мона́шествꙋющымъ спасе́нїѧ хода́тай: ра́дꙋйсѧ, ᲂу҆ныва́ющихъ ѻ҆́бразъ ᲂу҆тѣше́нїѧ: ра́дꙋйсѧ, мона́хѡмъ ѿ навѣ̑тъ вра́жїихъ и҆зба́вителю: ра́дꙋйсѧ, скорбе́й гꙋби́телю на́шегѡ є҆стества̀, ꙗ҆́кѡ ѿго́ниши по́мыслы ѕлѡ́бныѧ: ра́дꙋйсѧ, скорбѧ́щихъ дꙋше́ю сла́дкое ᲂу҆тѣше́нїе, и҆ ра́дости бжⷭ҇твенныѧ пода́телю: ра́дꙋйсѧ, на́шъ предста́телю и҆ и҆зба́вителю: ра́дꙋйсѧ, прпⷣбне ѻ҆́ч҃е зѡсі́мо, мона́хѡвъ ᲂу҆добре́нїе."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Всѣ́мъ жела́нїемъ прилѣпи́лсѧ є҆сѝ, воздержа́нїемъ тве́рдымъ твоемꙋ̀ влⷣцѣ, тогѡ̀ ны́нѣ пита́ешисѧ сїѧ̑нїи, зовы́й: ѻ҆тє́цъ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Просвѣти́въ твоѐ се́рдце, свѧщеннонача́льникъ бы́сть ѻ҆́ч҃а соста́ва, наказꙋ́ѧ и҆ ᲂу҆ча̀ всѧ̑, и҆зводѧ̀ всѧ́къ ᲂу҆́мъ къ бж҃їимъ во́лѧмъ, поѧ̀: ѻ҆тє́цъ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Пло́дъ бжⷭ҇твенъ влⷣцѣ прине́слъ є҆сѝ, житїѐ, требл҃же́нне, и҆ же́ртвꙋ прїѧ́тнꙋ, и҆ непоро́чнꙋ, зовы́й: ѻ҆тє́цъ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Сѐ, дв҃а бжⷭ҇твенное ѻ҆троча̀ породѝ, є҆го́же ны́нѣ бг҃оно́снїи ѻ҆ц҃ы̀ позна́вше бг҃а и҆ гдⷭ҇а, вопїѧ́хꙋ: ѻ҆тє́цъ на́шихъ бж҃е, бл҃гослове́нъ є҆сѝ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Въ мо́ри ꙗ҆влѧ́ѧсѧ, ѿ бѣ́дъ спаса́еши, зѡсі́мо прпⷣбне, призыва́юще бо тѧ̀ на по́мощь, и҆ те́пла помо́щника всѣ̑мъ вѣ́дѧще быва́юща, и҆ бы́стра застꙋ́пника стѧжа́вше, зовꙋ́тъ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆́же ѿ лю́тагѡ бѣ́са наси́лꙋемаѧ, жена̀ пра́веднѣ тобо́ю запреща́етсѧ, безꙋ́мнѣ и҆зба́вителѧ не призва́вшаѧ, и҆ тѧ̀ къ немꙋ̀ моли́твенника, зѡсі́мо. Та́ѧ и҆сцѣле́нїе ѿ напа́сти полꙋчѝ, пою́щи: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "И҆̀же ѕлы́ми при́снѡ ѡ҆бꙋрева́емїи, и҆ страстьмѝ содержи́мїи, къ тебѣ̀ прибѣга́емъ, бг҃ови моли́твенника тѧ̀ предлага́юще, зѡсі́мо прпⷣбне. Тѣ́мже ми́лостивнѡ посѣща́й на́съ, ѻ҆́ч҃е, да тобо́ю спасе́ни пое́мъ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѡ҆чисти́лище є҆стествꙋ̀ ты̀ є҆сѝ, є҆ди́на бг҃облаже́ннаѧ, на ра́мѣхъ бо херꙋві́мскихъ сѣдѧ́щаго бг҃а дла́ньма носи́ла є҆сѝ, вопїю́щи: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃оглаго́ливїи ѻ҆́троцы, въ пещѝ со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Съ похвала́ми быва́етъ, бг҃оно́се, па́мѧть твоѧ̀: пра́вды бо ꙗ҆ви́лсѧ є҆сѝ показа́тель, мꙋ́жества и҆ мꙋ́дрости, и҆ цѣломꙋ́дрїѧ, ѻ҆́ч҃е прпⷣбне зѡсі́мо, содѣ́телю и҆ и҆зба́вителю взыва́ѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Невозвра́тнѡ ше́ствовалъ є҆сѝ ведꙋ́щими къ небесѝ бжⷭ҇твенными стезѧ́ми, ѻ҆́ч҃е прпⷣбне зѡсі́мо досточꙋ́дне, ѿ ѕлы́хъ ведꙋ́щихъ до конца̀ ᲂу҆крѣпи́лсѧ є҆сѝ, поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оно́снаго всѝ хвала́ми почти́мъ, ꙗ҆́кѡ и҆спо́лнена ꙗ҆́вѣ бл҃года́ти, и҆ бжⷭ҇твенными сїѧ́ньми просвѣще́на, и҆зрѧ́днѣ содѣ́телю и҆ и҆зба́вителю вопїѧ́ше: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Вода̀ є҆сѝ неисчерпа́емаѧ, дв҃о, ѿ неѧ́же всѝ пїю́ще, бл҃года́ти и҆сполнѧ́емсѧ, и҆ дꙋше́ю, и҆ тѣ́ломъ ѡ҆свѧща́еми пое́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Лоза̀ плодови́та, ѻ҆́ч҃е, дꙋша̀ твоѧ̀ бы́сть, вїно̀ ᲂу҆миле́нїѧ и҆ска́пающи на́мъ, стра̑сти ѡ҆чища́ющее и҆ дꙋ́шы бжⷭ҇твеннѣ веселѧ́щее, ѿ малодꙋ́шїѧ возставлѧ́ющее. Тѣ́мже и҆ бл҃годꙋ̑шны бы́вше, ᲂу҆се́рднѡ пое́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Подобонра́вное добродѣ́телей, ѻ҆́ч҃е зѡсі́мо, ѻ҆ц҃ꙋ̀ савва́тїю, и҆ равноподви́жное и҆справле́нїе, совокꙋпи́ тѧ въ премі́рныхъ є҆мꙋ̀. Ѿѻнꙋ́дꙋже ꙗ҆влѧ́ющесѧ вкꙋ́пѣ, спаса́ете пою́щыѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Дво́ице бг҃оꙋго́днаѧ, равноче́стнїи ѻ҆ц҃ы̀, є҆ди́но достоѧ́нїе вѣ́чныѧ сла́вы стѧжа́вше, ѿ лю́тыхъ на́съ и҆зима́ти, не преста́йте, вопїю́щихъ, ꙗ҆́кѡ равномо́щно дерзнове́нїе и҆мꙋ́ще ко всѣ́хъ влⷣцѣ: по́йте, бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Златоза́рный тѧ̀, дв҃о, свѣ́щникъ предвоѡбразѝ: прїѧ́ла бо є҆сѝ несказа́ннѡ свѣ́тъ непристꙋ́пный, и҆ сїѧ́нїемъ твои́мъ ѡ҆зарѧ́еши концы̀. Тѣ́мже тѧ̀ пое́мъ, чⷭ҇таѧ, и҆ превозно́симъ во вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. Тѣ́мже пречⷭ҇тꙋю бцⷣꙋ, вѣ́рнїи, велича́емъ."
|
|
},
|
|
{
|
|
"type": "TEXT",
|
|
"value": "Стрꙋѧ́ми твои́хъ сле́зъ ѡ҆чи́щсѧ, ны́нѣ свѣ́та наслажда́ешисѧ, ѻ҆́ч҃е прпⷣбне, трисїѧ́ннагѡ: томꙋ̀ предстоѧ̀ ꙗ҆́вѣ, свѣтоза́рными просвѣща́емь лꙋча́ми, свы́ше назира́еши на́съ, твою̀ па́мѧть творѧ́щихъ, всебл҃же́нне."
|
|
},
|
|
{
|
|
"type": "TEXT",
|
|
"value": "Ꙗ҆́кѡ вели́кое со́лнце, на́мъ вели́чїемъ пѡ́двигъ твои́хъ ѡ҆сїѧ́лъ є҆сѝ, бг҃омꙋ́дре, всѧ̑ земны̑ѧ концы̀, къ свѣ́тꙋ ѿ свѣ́та возсїѧ́вшемꙋ, ᲂу҆́меръ преше́лъ є҆сѝ. Тѣ́мъ вопїе́мъ тѝ: просвѣтѝ на̑ша помышлє́нїѧ, ѻ҆́ч҃е прпⷣбне."
|
|
},
|
|
{
|
|
"type": "TEXT",
|
|
"value": "Процвѣ́лъ є҆сѝ въ по́стническихъ по́двизѣхъ, прехва́льне ѻ҆́ч҃е на́шъ, ꙗ҆́кѡ ши́покъ бл҃гоꙋха́ненъ, и҆ ꙗ҆́кѡ ке́дръ ѡ҆бл҃гоꙋха́лъ є҆сѝ со́вѣсти вѣ́рныхъ сердца̀, добродѣ́тельми и҆ чꙋдесы̀: тѣ́мъ ѿженѝ стра̑сти смердѧ́щыѧ, прпⷣбне."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Просвѣтѝ, пречⷭ҇таѧ дв҃о, сѣ́тꙋющее се́рдце моѐ при́снѡ престꙋплє́нїи и҆ жите́йскими мно́гими молва́ми, и҆ не ѡ҆ста́ви мѧ̀ врагѡ́мъ бы́ти въ ра́дость, ꙗ҆́кѡ да сла́влю тѧ̀, и҆ ꙗ҆́кѡ да тѧ̀ любо́вїю пою̀, препѣ́таѧ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "Предста́вилъ є҆сѝ себѐ же́ртвꙋ чи́стꙋ бг҃ꙋ, прпⷣбне ѻ҆́ч҃е, всѐ жела́нїе добродѣ́тельми возложи́въ, и҆́миже сїѧ́ѧ, просвѣща́еши приближа́ющихсѧ къ прославлѧ́ющемꙋ тѧ̀ по ᲂу҆спе́нїи гдⷭ҇еви, предста́телѧ показа́вшемꙋ сꙋ́щымъ въ нꙋ́ждахъ."
|
|
},
|
|
{
|
|
"type": "TEXT",
|
|
"value": "Высото́ю дѣ́ланїѧ къ нб҃сѝ взѧ́тсѧ, ѻ҆́ч҃е вселюбе́зне, ко ѻ҆́номꙋ бл҃же́нствꙋ преложи́лсѧ є҆сѝ, є҆гѡ́же въ житїѝ болѣ́зненнѣ не преста́лъ є҆сѝ взыскꙋ́ѧ: и҆ трꙋда́ми поко́й ѡ҆брѣ́тъ, та́мѡ пѣвцы̀ твоѧ̑ хода́тайствомъ твои́мъ возведѝ."
|
|
},
|
|
{
|
|
"type": "TEXT",
|
|
"value": "Прїимѝ съ любо́вїю тѝ пѣ́снь приноси́мꙋю, прпⷣбне ѻ҆́ч҃е, и҆ пода́ждь ѡ҆ставле́нїе прегрѣше́нїй, и҆ страсте́й премѣне́нїе, и҆ бжⷭ҇твеннагѡ свѣ́та ѡ҆сїѧ́нїѧ сподо́би, та́мѡ ᲂу҆правлѧ́ѧ, и҆дѣ́же ты̀ во свѣ́тлыхъ се́лѣхъ трⷪ҇чныѧ зарѝ, зѡсі́мо, пребыва́еши."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Мє́ртвымъ воскрⷭ҇нїе ны́нѣ дарова́сѧ твои́мъ несказа́ннымъ и҆ неизрече́ннымъ ржⷭ҇тво́мъ, бцⷣе всечⷭ҇таѧ: жи́знь бо ѿ тебє̀ пло́тїю ѡ҆бло́жшисѧ, всѣ̑мъ возсїѧ̀, и҆ сме́ртное смѣше́нїе ꙗ҆́вѣ разрꙋшѝ."
|
|
},
|
|
{
|
|
"type": "TEXT",
|
|
"value": "Свѣти́ленъ: Насажде́нꙋ тѝ въ домꙋ̀ бж҃їи, вои́стиннꙋ ꙗ҆́кѡ фі́нїѯъ ѱало́мски процвѣта́ѧ твоѧ̀ ѻ҆би́тель, ᲂу҆множа́ѧ тебѣ̀ ча̑да, и҆̀же твою̀, ѻ҆́ч҃е зѡсі́мо, па́мѧть пра́зднꙋютъ свѣ́тлѡ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры пра́здника г҃: и҆ преподо́бнагѡ г҃, гла́съ и҃:"
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "И҆мѣ́ѧ бжⷭ҇твеннꙋю бл҃года́ть ᲂу҆чи́телѧ, цѣлоꙋ́мїемъ тѧ̀ наставлѧ́ющꙋ къ жела́нїю бжⷭ҇твенномꙋ, ѿѻнꙋ́дꙋже мїрска́гѡ мѧте́жа ѿре́ксѧ, къ ра́зꙋмꙋ и҆́стинномꙋ возве́лсѧ є҆сѝ, болѣ́зненными себѐ трꙋды̀ ᲂу҆мꙋдрѧ́ѧ, повинꙋ́ѧ же лꙋ́чшемꙋ го́ршее, зѡсі́мо прпⷣбне, молѝ спасти́сѧ на́мъ."
|
|
},
|
|
{
|
|
"type": "TEXT",
|
|
"value": "Добродѣ́тєли ᲂу҆держа́ти тща́сѧ, и҆́миже бг҃ꙋ присво́итисѧ разꙋмѣва́ѧ, къ немꙋ́же восте́клъ є҆сѝ, є҆гѡ́же и҆ свѣтоли́тїе прїе́млѧ, хода́тайствꙋй ѡ҆ на́съ, ми́рнѡ житїѐ прейтѝ, спасти́сѧ ѿ собла̑знъ льсти́вагѡ, и҆ ст҃ы́хъ ра́дости ѻ҆́бщникѡмъ бы́ти, твои́ми моли́твами."
|
|
},
|
|
{
|
|
"type": "TEXT",
|
|
"value": "Цѣльбоно́сномꙋ твоемꙋ̀ гро́бꙋ предстоѧ́ще, ѻ҆́ч҃е на́шъ зѡсі́мо, прїе́млемъ ѻ҆би́льнѡ бл҃года́ть: всѧ́къ бо приходѧ́й съ вѣ́рою не посрами́тсѧ, прїе́млетъ бо, и҆̀хже тре́бꙋетъ, прославлѧ́ющꙋ тѧ̀ гдⷭ҇ꙋ, ꙗ҆́кѡ бл҃гоꙋго́дна раба̀ бы́вша твоемꙋ̀ влⷣцѣ, и҆ тогѡ̀ за́пѡвѣди сохра́нша. Тѣ́мже тѧ̀ чти́мъ и҆ ᲂу҆блажа́емъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Мона́хѡвъ мно́жество, наста́вника тѧ̀ чте́мъ, ѻ҆́ч҃е зѡсі́мо: твое́ю бо стезе́ю пра́вѡ ходи́ти позна́хомъ, бл҃же́нъ є҆сѝ хрⷭ҇тꙋ̀ рабо́тавъ, и҆ вра́жїю низложи́въ си́лꙋ, а҆́гг҃лѡмъ собесѣ́дниче и҆ прпⷣбнымъ є҆динокро́вне, и҆ савва́тїю соприча́стниче. Съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника. Славосло́вїе вели́кое. И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и, бл҃жє́нна, ѿ канѡ́на ст҃а́гѡ пѣ́снь г҃, на д҃: И҆ в҃-гѡ канѡ́на, пѣ́снь ѕ҃, на д҃."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ:"
|
|
},
|
|
{
|
|
"type": "HEADER",
|
|
"value": "А҆пⷭ҇лъ, зача́ло сг҃і."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло і҃."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
|
|
}
|
|
] |