ponomar-pwa/static/data/shared/menaion-daily/05-01/1.json

[
 {
  "type": "HEADER",
  "value": "Ма́їа а҃"
 },
 {
  "type": "HEADER",
  "value": "Ст҃а́гѡ прⷪ҇ро́ка і҆еремі́и."
 },
 {
  "type": "HEADER",
  "value": "Стїхи̑ры прⷪ҇ро́ка, гла́съ и҃."
 },
 {
  "type": "TEXT",
  "value": "Подо́бенъ: Гдⷭ҇и, а҆́ще и҆ на сꙋди́щи:"
 },
 {
  "type": "TEXT",
  "value": "Гдⷭ҇и, ты̀ пре́жде созда́тисѧ, проразꙋмѣ́лъ є҆сѝ і҆еремі́ю сла́внаго: и҆ пре́жде рожде́нїѧ и҆зъ ложе́снъ, прⷪ҇ро́ка ѡ҆свѧти́лъ є҆сѝ, ꙗ҆́кѡ провѣ́дый вои́стиннꙋ ра́зꙋма свобо́дное: є҆гѡ́же моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "TEXT",
  "value": "Гдⷭ҇и, а҆́ще и҆ въ ка́лъ вве́рженъ бы́сть і҆еремі́а ст҃ы́й, но кра́сное благово́нїе ᲂу҆́мнѡ воспрїима́ше, въ ра́йскихъ се́лѣхъ ꙗ҆́коже водворѧ́ѧсѧ: є҆гѡ́же моли́твами, ꙗ҆́кѡ бл҃годѣ́тель, всѣ́хъ на́съ сохранѝ."
 },
 {
  "type": "TEXT",
  "value": "Гдⷭ҇и, твои́ми пресвѣ́тлыми зарѧ́ми прⷪ҇ро́къ сїѧ́ѧ, и҆ сꙋпроти́вными зрѧ́шесѧ блаже́нъ и҆ че́стенъ: добродѣ́телей бо ꙗ҆́вѣ стыди́тсѧ и҆ сꙋпоста̑тъ, и҆ бꙋ̑дꙋщаѧ ꙗ҆́кѡ настоѧ̑щаѧ восхождє́нїѧ пред̾ꙋвѣ́дѣ."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ, гла́съ и҆ подо́бенъ то́йже:"
 },
 {
  "type": "TEXT",
  "value": "Ви́ждь моегѡ̀ сокрꙋше́ннагѡ се́рдца воздыха́нїе, бг҃оневѣ́сто, прїимѝ, дв҃о марі́е чⷭ҇таѧ, рꙋ́къ мои́хъ воздѣѧ́нїе, ꙗ҆́кѡ чл҃вѣколюби́ва, и҆ не ѿри́ни, всенепоро́чнаѧ: да пою̀ и҆ велича́ю тѧ̀, возвели́чившꙋю ро́дъ на́шъ."
 },
 {
  "type": "HEADER",
  "value": "Крⷭ҇тобг҃оро́диченъ. Подо́бенъ то́йже:"
 },
 {
  "type": "TEXT",
  "value": "Безнача́льное сло́во ѻ҆́ч҃ее, и҆ сн҃е мо́й, и҆ дх҃ꙋ сопресто́льное, ка́кѡ твоѝ пречⷭ҇тыѧ дла̑ни на дре́вѣ просте́рлъ є҆сѝ; что̀ толи́каѧ твоѧ̀ ны́нѣ нищета̀, пребл҃гі́й; предстоѧ́щи твоемꙋ̀ крⷭ҇тꙋ̀, вопїѧ́ше пренепоро́чнаѧ."
 },
 {
  "type": "HEADER",
  "value": "Тропа́рь, гла́съ в҃:"
 },
 {
  "type": "TEXT",
  "value": "Прⷪ҇ро́ка твоегѡ̀ і҆еремі́и па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ, спасѝ дꙋ́шы на́шѧ."
 },
 {
  "type": "HEADER",
  "value": "Канѡ́нъ, гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Пре́жде твоегѡ̀ созда́нїѧ проꙋвѣ́дѣннѡ, и҆зъ ма́тернѧ чре́ва ѡ҆свѧти́лсѧ є҆сѝ, и҆ ꙗ҆зы́кѡмъ прⷪ҇ро́къ пома́залсѧ є҆сѝ, взыва́ѧ: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Всѣ́хъ ра́зꙋмъ пре́жде прїе́мый, твоеѧ̀ мы́сли движє́нїѧ прозрѧ̀, ѽ і҆еремі́е бг҃оѧвле́нне, наста́вника тѧ̀ лю́демъ поставлѧ́етъ."
 },
 {
  "type": "TEXT",
  "value": "Твоеѧ̀ мы́сли зри́тельное, мꙋ́дре, ѡ҆чи́стивъ ѿ скве́рнъ плотски́хъ, и҆́стины свидѣ́тель показа́лсѧ є҆сѝ, творцꙋ̀ твоемꙋ̀ превозлю́бленъ."
 },
 {
  "type": "TEXT",
  "value": "Бг҃оро́диченъ: Всели́вшеесѧ въ тѧ̀ сло́во ѻ҆́ч҃ее, на землѝ, дв҃о бцⷣе, па́че є҆стества̀ пло́тїю ро́ждши, ꙗ҆ви́ласѧ є҆сѝ тва́рей всѣ́хъ влⷣчца."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Ты̀ ѡ҆свѧти́въ прⷪ҇ро́ка твоегѡ̀, влⷣко, пе́рвѣе рождества̀, блꙋдѧ́щымъ наста́вника посла́лъ є҆сѝ."
 },
 {
  "type": "TEXT",
  "value": "Бл҃года́ть дх҃а, все́льшаѧсѧ во ᲂу҆стнѣ̀ твоѝ, ꙗ҆́коже пресвѣ́тло свѣти́ло, сꙋ́щымъ во тмѣ̀ возсїѧ̀."
 },
 {
  "type": "TEXT",
  "value": "Мѵ́ра благово́нїѧ твоегѡ̀ не терпѧ́щи, собо́ръ тѧ̀ і҆и҃левъ скве́рный въ ро́вѣ затворѝ."
 },
 {
  "type": "TEXT",
  "value": "Бг҃оро́диченъ: Тобо́ю, пречⷭ҇таѧ, пресꙋ́щественный, безнача́льный сн҃ъ бж҃їй спожи́ти человѣ́кѡмъ благоизво́ли."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Воскр҃се ѿ гро́ба:"
 },
 {
  "type": "TEXT",
  "value": "Приложѝ тебѣ̀ ᲂу҆́хо бг҃ъ, ᲂу҆слы́шавати словеса̀ є҆гѡ̀, бг҃огла́сный прⷪ҇ро́че. Тѣ́мже ꙗ҆́кѡ настоѧ̑щаѧ не сꙋ̑щаѧ всѣ̑мъ ᲂу҆ѧсни́лъ є҆сѝ: рыда́ньми же ѡ҆ лю́дехъ твои́хъ, ᲂу҆да́льшихсѧ ѿ гдⷭ҇а, пла́калъ є҆сѝ. И҆ ны́нѣ сы́й на небесѣ́хъ, мо́лишисѧ спасти́сѧ на́мъ."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "Въ пꙋчи́нꙋ лю́тагѡ впадо́хъ ᲂу҆ны́нїѧ, ѿ мно́жества лꙋка́выхъ и҆ нечи́стыхъ мои́хъ дѣ́лъ прїидо́хъ въ недоꙋмѣ́нїе, и҆ ѿча́ѧнїемъ ны́нѣ ѡ҆держи́мь є҆́смь. Влⷣчце бцⷣе, сама́ мѧ спасѝ бл҃гоꙋтро́бїемъ твои́мъ: грѣ́шныхъ бо ты̀ є҆сѝ по́мощь и҆ ѡ҆чище́нїе спаси́тельное."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница а҆́гнца и҆ па́стырѧ ви́сѧща на крⷭ҇тѣ̀ зрѧ́щи, вопїѧ́ше: ча́до моѐ, что̀ стра́нное ᲂу҆́бѡ и҆ ненаде́жное сїѐ зрѣ́нїе; ка́кѡ жи́знь всѣ́хъ сме́ртїю ѡ҆сꙋжда́етсѧ, земны̑мъ подо́бнѣ; но воскреснѝ тридне́внѡ и҆зъ ме́ртвыхъ, сло́ве, ꙗ҆́коже ре́клъ є҆сѝ, да ра́дꙋющисѧ сла́влю тѧ̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
 },
 {
  "type": "TEXT",
  "value": "Пресвѣ́тлое сїѧ́нїе прест҃а́гѡ и҆ бжⷭ҇твеннагѡ дх҃а се́рдце твоѐ ѡ҆блиста́вшее, сꙋ́щымъ во тмѣ̀ просвѣще́нїе содѣ́ла."
 },
 {
  "type": "TEXT",
  "value": "Прⷪ҇ро́кѡвъ спострада́тельнѣе всѣ́хъ бы́въ, всеблаже́нне бг҃опрїѧ́тне, ми́лости мѧ̀ сподо́би, ѿча́ѧннаго мно́гими прегрѣше́ньми."
 },
 {
  "type": "TEXT",
  "value": "Ꙗ҆́кѡ хода́тай бы́въ ꙗ҆вле́ннымъ и҆ бжⷭ҇твеннымъ сїѧ́нїемъ, хода́тайствомъ твои́мъ ᲂу҆мирѝ многомѧте́жнагѡ моегѡ̀ житїѧ̀ бꙋ́рю."
 },
 {
  "type": "TEXT",
  "value": "Бг҃оро́диченъ: Бг҃а, є҆го́же родила̀ є҆сѝ, пречⷭ҇таѧ дв҃о, сего̀ молѝ, моли́твами твои́ми дарова́ти согрѣше́нїй проще́нїе."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче."
 },
 {
  "type": "TEXT",
  "value": "Ꙗ҆́коже мо́лнїю, прⷪ҇ро́ка твоего̀ посла́лъ є҆сѝ, і҆еремі́ю ѡ҆свѧще́ннаго, сꙋ́щымъ во тмѣ̀ свѣ́та тѧ̀, хрⷭ҇тѐ, возвѣща́юща."
 },
 {
  "type": "TEXT",
  "value": "Стрѣлꙋ̀ и҆збра́ннꙋ, въ тꙋ́лѣ тѧ̀ сокрове́ннꙋ, і҆еремі́е, проразꙋмѣ́нїемъ свои́мъ, тво́й влⷣка, въ ни́хже подоба́ше вре́менѣхъ показа̀."
 },
 {
  "type": "TEXT",
  "value": "Оу҆́ши чи́стѣ ᲂу҆́мнїи и҆мѣ́ѧ, сла́вне, бесѣ́дꙋющꙋ тебѣ̀ дх҃ꙋ сподо́билсѧ є҆сѝ, прⷪ҇ро́че, послꙋ́шати."
 },
 {
  "type": "TEXT",
  "value": "Бг҃оро́диченъ: Ве́лїе и҆ стра́шное дв҃ы та́инство: и҆́бо ꙗ҆́вльшагосѧ на землѝ є҆́ю бг҃а человѣ́кѡмъ, милосе́рдїѧ ра́ди, мт҃рски воспита̀."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю, и҆ спасѝ."
 },
 {
  "type": "TEXT",
  "value": "Привле́клъ є҆сѝ просвѣще́нїе, и҆ благода́ть бога́тнѡ, бг҃оно́се, дꙋхо́внѡ ᲂу҆ста̀ дꙋшє́вныѧ разшири́въ, и҆ и҆спо́лньсѧ, ѻ҆́бщно всѣ̑мъ по́далъ є҆сѝ, ѽ прⷪ҇ро́че, хотѧ́щымъ сїѧ́нїе."
 },
 {
  "type": "TEXT",
  "value": "Мо́ре мїрско́е, возвыша́емое напа́стей треволне́нїемъ, ᲂу҆зрѣ́въ, послѣ̑днѧѧ дворы̀ возжела́лъ є҆сѝ, и҆ и҆сто́чникъ рѣко́ю точа́щъ сле́зы, люде́й твои́хъ ѕлобы́тства го́рцѣ рыда́ти."
 },
 {
  "type": "TEXT",
  "value": "Сме́рть и҆зба́вителѧ предска́зовалъ є҆сѝ та́йнѡ, бг҃огла́се, ꙗ҆́коже бо а҆́гнѧ, на дре́во хрⷭ҇та̀ воздвиго́ша, живота̀ нача́льника, собо́ръ беззако́нный і҆ꙋде́йскїй, бл҃годѣ́телѧ всеѧ̀ тва́ри."
 },
 {
  "type": "TEXT",
  "value": "Бг҃оро́диченъ: Сло́во, є҆́же ѿ ѻ҆ц҃а̀ пре́жде вѣ̑къ ро́ждшеесѧ безпло́тнѡ, и҆зъ тебє̀, чⷭ҇таѧ, въ лѣ́то пло́тски ражда́етсѧ: и҆ въ сѣ́ни тогѡ̀ всѝ поживе́мъ, ꙗ҆́коже дре́вле і҆еремі́а проречѐ."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Ѡ҆чи́стивъ дх҃омъ, вели́кїй прⷪ҇ро́че и҆ мꙋ́чениче, твоѐ свѣтоза́рное се́рдце, сла́вне і҆еремі́е, прⷪ҇ро́чествїѧ да́ръ свы́ше прїѧ́лъ є҆сѝ, и҆ возопи́лъ є҆сѝ велегла́снѡ во страна́хъ: сѐ бг҃ъ на́шъ, и҆ не приложи́тсѧ и҆́нъ къ немꙋ̀, и҆́же вопло́щсѧ на землѝ ꙗ҆ви́лсѧ є҆́сть."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Ты̀ ны́нѣ не ктомꙋ̀ въ наде́ждахъ, но ве́щїю, прⷪ҇ро́че, проречє́ннаѧ и҆сполнѧ́єма твоѧ̑ зрѧ̀, взыва́еши: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Ѻ҆рга́нъ бжⷭ҇твенный ꙗ҆ви́сѧ, ᲂу҆дарѧ́емь рꙋко́ю ᲂу҆тѣ́шителевою, нбⷭ҇ныѧ гла́сы вѣща́ѧ, и҆ поѧ̀: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Рыда̑нїѧ списꙋ́ѧ, ѽ прⷪ҇ро́че, не помрачѝ бжⷭ҇твеннагѡ весе́лїѧ, є҆гѡ́же ѿ младе́нства ꙗ҆́снѡ наслади́лсѧ є҆сѝ, зовы́й: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "TEXT",
  "value": "Бг҃оро́диченъ: Во чре́во дв҃ы вни́ти, ꙗ҆́коже бл҃говоли́лъ є҆сѝ, человѣ́ки хотѧ̀ спастѝ, прⷪ҇ро́ки ꙗ҆́вѣ наꙋчи́вый чꙋдесѝ: бл҃гослове́нъ є҆сѝ, гдⷭ҇и бж҃е, во вѣ́ки."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "На небеса̀ возше́лъ є҆сѝ веселѧ́сѧ, бг҃одꙋхнове́нне і҆еремі́е, и҆ со безпло́тными прⷭ҇то́лꙋ всѣ́хъ цр҃ѧ̀ предстои́ши, бл҃гослови́те, поѧ̀, дѣла̀, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бл҃гочє́стїѧ проповѣ́дникъ бы́въ, прехва́льне, ѡ҆свѧще́нъ, и҆ нече́стїѧ ѡ҆бличи́лъ є҆сѝ не́мощь, і҆еремі́е, бл҃гослови́те, поѧ̀, дѣла̀, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бжⷭ҇твенныѧ зарѝ свѣ́томъ сїѧ́ѧ, ѡ҆блиста̑нїѧ лю́бѧщымъ посыла́еши, зерца́ло многосвѣ́тло ꙗ҆́кѡ прїи́мъ, бл҃гослови́те, вопїѧ̀, всѧ̑ дѣла̀, гдⷭ҇а, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Моѐ сꙋщество̀ и҆зъ тебє̀ воспрїѧ́тъ животода́вецъ, и҆ пре́жднихъ скве́рнъ сїѐ ѡ҆чи́сти, ѽ бг҃ома́ти! Є҆го́же пое́мъ: бл҃гослови́те, всѧ̑ дѣла̀, гдⷭ҇а, и҆ превозноси́те є҆го̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Свѣ́тꙋ сраствори́всѧ пречⷭ҇томꙋ, бжⷭ҇тва̀ за́ри, бл҃же́нне сла́вне, є҆гѡ́же на землѝ ꙗ҆влє́нїѧ ꙗ҆́снѡ стѧжа́лъ є҆сѝ."
 },
 {
  "type": "TEXT",
  "value": "И҆сто́чника нетлѣ́ннагѡ доше́дъ, ѡ҆зарє́нїи же сегѡ̀, бг҃одꙋхнове́нне, жела́емый тебѣ̀ коне́цъ ꙗ҆́вѣ полꙋчи́лъ є҆сѝ."
 },
 {
  "type": "TEXT",
  "value": "Заре́ю свѣтоно́сною, є҆ѧ́же ны́нѣ наслажда́ешисѧ, воспѣва́ющихъ твою̀ па́мѧть просвѣща́ти, і҆еремі́е бл҃же́нне, всѣ́хъ сподо́би."
 },
 {
  "type": "TEXT",
  "value": "Бг҃оро́диченъ: Приста́нище спасе́нїѧ, вѣ́рꙋющїи пречⷭ҇томꙋ твоемꙋ̀ ржⷭ҇твꙋ̀ свѣ́дꙋще, ѿ бѣ́дъ и҆зба́витисѧ тѧ̀ мо́лимъ."
 },
 {
  "type": "HEADER",
  "value": "На лїтꙋргі́и, прокі́менъ, гла́съ д҃:"
 },
 {
  "type": "TEXT",
  "value": "Ты̀ і҆ере́й во вѣ́къ, по чи́нꙋ мелхїседе́ковꙋ."
 },
 {
  "type": "TEXT",
  "value": "Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе но́гъ твои́хъ."
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рн҃ѕ."
 },
 {
  "type": "TEXT",
  "value": "А҆ллилꙋ́їа, гла́съ є҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло д҃і."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]