ponomar-pwa/static/data/shared/menaion-daily/05-03/1.json

[
 {
  "type": "HEADER",
  "value": "Ма́їа г҃"
 },
 {
  "type": "HEADER",
  "value": "Ст҃ы́хъ мч҃никъ, тїмоѳе́а и҆ ма́ѵры."
 },
 {
  "type": "HEADER",
  "value": "Стїхи̑ры ст҃ы́хъ мч҃никѡвъ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Дѡ́блїѧ въ мч҃ницѣхъ крѣ́пкѡ пострада́вшыѧ, и҆ борца̀ ᲂу҆мори́вшыѧ, и҆ хрⷭ҇та̀ возлюби́вшыѧ, и҆ мі́ръ возненави́дѣвшыѧ, сїѡ́на мы́сленнагѡ достѡ́йныѧ жи́тели, ма́ѵрꙋ дне́сь и҆ тїмоѳе́а вѣ́рою соше́дшесѧ восхва́лимъ согла́снѡ, мч҃николю́бцы всѝ."
 },
 {
  "type": "TEXT",
  "value": "Вѧза̑нїѧ тѣлє́снаѧ, ѻ҆че́съ же и҆збоде́нїе, провертѣ́нїе ᲂу҆ше́съ, коле́сное ѡ҆ѕлобле́нїе, ка́мене тѧ́жкагѡ ѡ҆бѣ́шенїе под̾ѧ́лъ є҆сѝ, тїмоѳе́е, низло́жь врага̀, и҆ къ бжⷭ҇твеннѣй сла́вѣ возноси́мь, сла́вне. Сегѡ̀ ра́ди тѧ̀ вѣ́рою соше́дшесѧ моле́бнѡ восхвалѧ́емъ, сла́ва мч҃никѡвъ и҆ похвала̀."
 },
 {
  "type": "TEXT",
  "value": "Свѣтолꙋ́чными сїѧ́ньми врага̀ ѡ҆мрачи́ла є҆сѝ, чи́стѡ пострада́вши, ма́ѵро сла́внаѧ: конѡ́бнаѧ бо врѣ̑нїѧ, пе́рстѡвъ ѿѧ́тїе, свѣ́щное жже́нїе, вре́менное пропѧ́тїе претерпѣ́ла є҆сѝ, и҆ прешла̀ є҆сѝ къ бжⷭ҇твенномꙋ поко́ю, и҆дѣ́же ли́къ мч҃никъ всегда̀ весели́тсѧ."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Мч҃ницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немощны̑ѧ де́рзѡсти: тѣ́хъ моли́твами спасѝ дꙋ́шы на́шѧ."
 },
 {
  "type": "HEADER",
  "value": "Канѡ́нъ, творе́нїе і҆ѡ́сифово, гла́съ ѕ҃, є҆гѡ́же краегране́сїе:"
 },
 {
  "type": "TEXT",
  "value": "Тїмоѳе́а и҆ ма́ѵры болѣ́зни чествꙋ́ю."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ, пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
 },
 {
  "type": "TEXT",
  "value": "Свѧще́нныхъ страда́лєцъ свѧще́нное и҆ честно́е торжество̀, лю́дїе свѧще́ннїи, свѧще́ннѡ почти́мъ: ꙗ҆́кѡ да тѣ́хъ мольба́ми ѿ бѣ́дъ и҆зба́вимсѧ."
 },
 {
  "type": "TEXT",
  "value": "Свѧщеннопобѣ̑дныѧ вѣнцы̀ ѿ хрⷭ҇та̀ прїѧ́ти тща́щесѧ, ᲂу҆мре́ти па́че, не́же жи́ти до́блїи мꙋ́чєницы ꙗ҆́вѣ и҆зво́ливше: тѣ́мъ сла́вꙋ полꙋчи́ша."
 },
 {
  "type": "TEXT",
  "value": "Не ᲂу҆боѧ́вшесѧ болѣ́зней плотски́хъ, ни мꙋ́къ ᲂу҆страши́вшесѧ, ни ѻ҆гнѧ̀ гони́телей, страстоте́рпцы мꙋ́чєницы, хрⷭ҇та̀ на сꙋди́щи мꙋ́жески проповѣ́дасте."
 },
 {
  "type": "TEXT",
  "value": "Бг҃оро́диченъ: Пресꙋ́щное сло́во, сꙋщество̀ прїе́мъ ѿ чⷭ҇тыхъ крове́й твои́хъ, бг҃осодѣ́ла на́съ, и҆ тлѣ́нїѧ и҆зба́ви, чⷭ҇таѧ, сегѡ̀ ра́ди вѣ́рнїи тѧ̀ всегда̀ сла́вимъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Бж҃їѧ кни̑ги лю́демъ свѧще́ннѡ ѿверза́ѧ, и҆ просвѣща́ѧ сердца̀, во́ине хрⷭ҇то́въ тїмоѳе́е, въ честно́е мꙋче́нїе ра́дꙋѧсѧ вше́лъ є҆сѝ."
 },
 {
  "type": "TEXT",
  "value": "Бжⷭ҇твеннымъ жела́нїемъ дꙋ́шꙋ распали́въ, мꙋ́чениче, ко ѻ҆гню̀ мꙋ́къ пристꙋпи́лъ є҆сѝ терпѣли́внѡ: тѣ́мже тѧ̀ хрⷭ҇то́ва бжⷭ҇твеннаѧ роса̀, блаже́нне, прохладѝ."
 },
 {
  "type": "TEXT",
  "value": "Оу҆́мъ тво́й воззрѣ́нїемъ къ бг҃ꙋ просвѣща́емь, мч҃ниче, не чꙋ́ѧше ѿню́дъ желѣ́зъ лю́тыхъ прикоснове́нїѧ разжже́нныхъ быва́ющихъ, сла́вне тїмоѳе́е."
 },
 {
  "type": "TEXT",
  "value": "Бг҃оро́диченъ: Сы́й є҆стество́мъ безстра́стенъ, сн҃ъ тво́й, дв҃о, прїѧ́тъ пло́ть ѿ крове́й твои́хъ чⷭ҇тыхъ, и҆ стрⷭ҇тїю крⷭ҇тною ѿ страсте́й мѧ̀, чⷭ҇таѧ, и҆зба́ви."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Многоѻбра̑зныѧ ꙗ҆́звы претерпѣ́вше, и҆ вѣнцы̀ ѿ бг҃а прїе́мше, ѡ҆ на́съ моли́тесѧ ко гдⷭ҇ꙋ, па́мѧть всесвѧще́ннꙋю ва́шꙋ соверша́ющихъ, превели́кїй тїмоѳе́е и҆ пресла́внаѧ ма́ѵро, є҆́же ᲂу҆мири́ти гра́дъ и҆ лю́ди: то́й бо є҆́сть вѣ́рныхъ ᲂу҆твержде́нїе."
 },
 {
  "type": "HEADER",
  "value": "Сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й, сп҃се:"
 },
 {
  "type": "TEXT",
  "value": "Поче́тше бг҃а, ѡ҆мрачи́ша пре́лесть, тїмоѳе́й мꙋ́дрый и҆ сла́внаѧ ма́ѵра, и҆ всѧ́ко претерпѣ́вше прехва́льнїи мꙋче́нїе, просвѣти́шасѧ па́че лꙋ̑чъ со́лнечныхъ, и҆ бы́ша сослꙋжи́тели а҆́гг҃лѡмъ, и҆̀хже вѣ́рою сла́вимъ."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Вели́кагѡ благосла́вїѧ возжелѣ́вше, сподо́бистесѧ сегѡ̀, ча̑да свѣ́та бжⷭ҇твеннагѡ бы́вше, великомꙋ́чєницы хрⷭ҇тѡ́вы, а҆́гг҃лѡмъ равностоѧ́тели."
 },
 {
  "type": "TEXT",
  "value": "Ст҃ы́хъ чинѡ́мъ сочета́всѧ, и҆ благопослꙋшли́вѣ ᲂу҆́ши къ бжⷭ҇твєннымъ зако́нѡмъ и҆мѣ́ѧ, сла́вне, провертѣ̑нїѧ крѣ́пкѡ претерпѣ́лъ є҆сѝ, тїмоѳе́е."
 },
 {
  "type": "TEXT",
  "value": "Воздви́гше тѧ̀ на дре́во сꙋемꙋ́дреннїи, ѡ҆тѧгчава́ютъ ка́менемъ главꙋ̀, сла́вне тїмоѳе́е: но ᲂу҆крѣплѧ́ше тѧ̀ хрⷭ҇то́съ, бжⷭ҇твенною стрⷭ҇тїю ᲂу҆краша́ема."
 },
 {
  "type": "TEXT",
  "value": "Текꙋ́щихъ непостоѧ́ннагѡ, блаже́ннїи, возгнꙋша́стесѧ вои́стиннꙋ тече́нїѧ, и҆ са́ми себѐ болѣ́знемъ ѿда́сте: сегѡ̀ ра́ди ꙗ҆̀же ѿ вѣ́ка блага̑ѧ воспрїѧ́сте."
 },
 {
  "type": "TEXT",
  "value": "Бг҃оро́диченъ: Чистоты̀ селе́нїе, жили́ще влⷣки всѣ́хъ, и҆ прⷪ҇ро́кѡвъ всѣ́хъ сбытїѐ, бг҃ора́дованнаѧ чⷭ҇таѧ, пою́щыѧ тѧ̀ ᲂу҆ще́дри."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Сꙋпрꙋ́жника своегѡ̀, ма́ѵро, свѣтови́дныхъ слове́съ послꙋ́ша любе́знѡ, и҆ ѡ҆мраче́нїе ѕло́е ѿве́ргши, свѣ́тъ была̀ є҆сѝ мꙋче́нїемъ, бг҃облаже́ннаѧ."
 },
 {
  "type": "TEXT",
  "value": "Бжⷭ҇твеннымъ дх҃омъ себѐ, ма́ѵро, воѡрꙋжи́вши, честна́ѧ, къ боре́нїю льсти́вагѡ, ра́дꙋѧсѧ, и҆зошла̀ є҆сѝ: и҆ сего̀ побѣ́ждши, побѣ̑дныѧ вѣнцы̀, мꙋ́ченице, прїѧ́ла є҆сѝ."
 },
 {
  "type": "TEXT",
  "value": "Є҆ди́наго тѧ̀ гдⷭ҇а і҆и҃са и҆сповѣ́давши честна́ѧ, рꙋко́ю человѣ́ка созда́вшаго, посѣка́етсѧ пє́рстъ рꙋчны́хъ, непра́ведное томле́нїе мꙋ́жески терпѧ́щи."
 },
 {
  "type": "TEXT",
  "value": "Бг҃оро́диченъ: Бꙋ́рю помышле́нїй, воста̑нїѧ страсте́й, напа́стей волне́нїе, ᲂу҆тишѝ, дв҃о бг҃ора́дованнаѧ, и҆ спаси́ мѧ, пою́ща вели̑чїѧ твоѧ̑."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Свѧті́и мꙋ́чєницы, ꙗ҆́дриломъ крⷭ҇та̀ дꙋхо́внѡ ѡ҆крилѧ́еми, напа́стей пꙋчи́нꙋ безъ вре́да вѣ́рою претеко́сте, и҆ въ бжⷭ҇твенныхъ приста́нищахъ почи́ша."
 },
 {
  "type": "TEXT",
  "value": "Разже́гше коно́бъ, въ то́й тѧ̀ хрⷭ҇та̀ и҆сповѣ́дающꙋ вверго́ша ѕлочести́вїи: но пребыла̀ є҆сѝ неврежде́на, росо́ю дх҃а ѡ҆брѣ́тше тѧ̀, ма́ѵро, похлажде́нꙋ."
 },
 {
  "type": "TEXT",
  "value": "Свѧза́еми мꙋ́чєницы, всѧ̑ вѧза̑нїѧ вра̑жїѧ мꙋ́жески разрѣши́сте, и҆ любо́вїю до конца̀ хрⷭ҇тꙋ̀ дꙋ́шы привѧза́сте, пло́ти ѿложе́нїемъ, всеприснопа́мѧтнїи."
 },
 {
  "type": "TEXT",
  "value": "Бг҃оро́диченъ: Всебл҃га́ѧ влⷣчце, ꙗ҆́же пребл҃га́го бг҃а пло́тїю ро́ждши, ѡ҆ѕло́бленное страстьмѝ моѐ се́рдце ᲂу҆блажѝ, да вѣ́рою и҆ любо́вїю велича́ю тѧ̀."
 },
 {
  "type": "HEADER",
  "value": "Конда́къ и҆ і҆́косъ пра́здника."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Не чꙋ́ѧше свѣща́ми пресла́внаѧ ѡ҆палѧ́ема всю́дꙋ, ѻ҆́гнь въ се́рдцы любвѐ носѧ́щи хрⷭ҇то́въ и҆ семꙋ̀ вопїю́щи прилѣ́жнѡ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Дрема́нїе ѿ ѻ҆́чїю ѿри́нꙋвъ ѕло́бное, ѽ тїмоѳе́е! Претерпѣ́лъ є҆сѝ ѻ҆́чїю ѡ҆слѣпле́нїе, хрⷭ҇та̀ серде́чныма ѻ҆чи́ма зрѧ̀, и҆ поѧ̀: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Дѡ́льнаѧ презрѣ́вше бжⷭ҇твеннїи мꙋ́чєницы, вы́шнее же жили́ще наслѣ́доваша, свѧще́нными да почтꙋ́тсѧ пѣ́сньми, пою́ще непреста́ннѡ съ на́ми: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Препѣ́таѧ дв҃о, препѣ́таго бг҃а поро́ждшаѧ, пою́щыѧ тѧ̀ прича́стники покажѝ свѣ́та, и҆ и҆зба́ви гее́нны и҆ ѻ҆гнѧ̀, и҆ всѧ́кагѡ вре́да вра́жїѧ, моли́твами твои́ми."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "Соблюда́юще зако́ны вседержи́телѧ, беззако́ннꙋющихъ держа́вѣ не приклони́стесѧ, че́сти лꙋка̑вымъ де́мѡнѡмъ не принесо́сте, мꙋ́чєницы до́блїи, гдⷭ҇ни наслѣ̑дницы."
 },
 {
  "type": "TEXT",
  "value": "Сопрѧже́нїемъ и҆зрѧ́днымъ ꙗ҆́вѣ совокꙋплѧ́еми, и҆́го гдⷭ҇не ле́гкое взѧ́сте кꙋ́пнѡ на вы́ю, мꙋ́чєницы, и҆ мꙋ́ченичєскимъ сопричто́стесѧ стадѡ́мъ."
 },
 {
  "type": "TEXT",
  "value": "На дре́вѣ пострада́вше кре́стнѣмъ, прехва́льнїи, на мнѡ́ги дни̑, и҆з̾ѡбрази́сте стра́сть честнꙋ́ю, на́съ ра́ди пострада́вшагѡ во́лею: є҆го́же превозно́симъ во всѧ̑ вѣ́ки."
 },
 {
  "type": "TEXT",
  "value": "Нꙋ́жднѣйшꙋю вои́стиннꙋ сме́рть, свѧті́и, просте́ртїемъ болѣ̑зни претерпѣ́сте: тѣ́мже къ неболѣ́зненнѣй жи́зни преста́вистесѧ, воспѣва́юще хрⷭ҇та̀ во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Оу҆краси́ласѧ є҆сѝ, дв҃о, поро́ждши прекра́снаго добро́тою хрⷭ҇та̀ гдⷭ҇а, бжⷭ҇твенными вѣ̑рныѧ зарѧ́ми просвѣща́ющаго: є҆го́же превозно́симъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и, тѧ̀ ᲂу҆блажа́емъ."
 },
 {
  "type": "TEXT",
  "value": "Ви́дѣти сла́вꙋ сподо́бистесѧ себѐ и҆злїѧ́вшагѡ за милосе́рдїе, прехва́льнїи: тогѡ́ бо зако́ны сохрани́сте, и҆ ѻ҆́бщницы сегѡ̀ стрⷭ҇те́й бы́сте. Тѣ́мже, соше́дшесѧ, благоче́стнѡ ва́съ почита́емъ."
 },
 {
  "type": "TEXT",
  "value": "Часѡ́мъ равночи́сленнꙋ мѣ́рꙋ сотвори́сте, мꙋ́дрїи, нѡ́щи и҆ дни̑ пригвожде́ни, є҆́же за милосе́рдїе ко хрⷭ҇тꙋ̀ прибли́жшемꙋсѧ: є҆го́же и҆сповѣ́дающе всѣ́ми влⷣчествꙋющаго, въ рꙋ́цѣ сегѡ̀ ва́шѧ дꙋ́хи преда́сте."
 },
 {
  "type": "TEXT",
  "value": "Во́инство а҆́гг҃лъ, ли́къ блаже́нный прⷪ҇рѡ́къ, а҆пⷭ҇тѡлъ, мꙋ́чєникъ и҆ преподо́бныхъ, во и҆схо́дъ ва́шъ собра́шасѧ: всѣ́хъ же влⷣка вѣнцы̀ ᲂу҆вѧзѐ, мꙋ́чєницы, ва́съ побѣ́дными, ꙗ҆́кѡ пребл҃гі́й."
 },
 {
  "type": "TEXT",
  "value": "На́мъ любо́вїю ва́съ почита́ющымъ, и҆ честно́е ва́ше соверша́ющымъ торжество̀, страда́льцы хрⷭ҇тѡ́вы до́блїи, разрѣше́нїе грѣхѡ́въ, житїѧ̀ и҆справле́нїе, и҆ всѣ́хъ лю́тыхъ премѣне́нїѧ, мꙋ́дрїи, и҆спроси́те."
 },
 {
  "type": "TEXT",
  "value": "Бг҃оро́диченъ: Свѣ́томъ твои́мъ мѧ̀, бг҃ора́дованнаѧ въ жена́хъ дв҃о, просвѣтѝ, молю́сѧ, и҆ ѻ҆гнѧ̀ вѣ́чнагѡ мѧ̀ и҆зба́ви, ꙗ҆́кѡ да велича́ю тѧ̀, ꙗ҆́кѡ да сла́влю тѧ̀, ꙗ҆́кѡ да по до́лгꙋ воспою̀ вели̑чїѧ твоѧ̑."
 }
]