ponomar-pwa/static/data/shared/menaion-daily/05-20/1.json

[
 {
  "type": "HEADER",
  "value": "Ма́їа к҃"
 },
 {
  "type": "HEADER",
  "value": "Свѧта́гѡ мꙋ́ченика ѳалале́а."
 },
 {
  "type": "HEADER",
  "value": "Стїхи̑ры мꙋ́ченика, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Вели́комꙋ ѡ҆бдержа́щꙋ поднбⷭ҇нꙋю волне́нїю, и҆ дꙋ́шꙋ ѡ҆бꙋрева́ющꙋ, всесла́вне, ѡ҆кормле́нїемъ вы́шнѧгѡ зва́нїѧ направлѧ́ѧсѧ, мꙋче́нїй невре́днѡ многоболѣ́зненнꙋю пꙋчи́нꙋ преше́лъ є҆сѝ: и҆ вы̑шнѧѧ приста̑нища дости́гъ, и҆спо́лнилсѧ є҆сѝ вѣ́чныѧ тишины̀, мꙋ́чениче ѳалале́е."
 },
 {
  "type": "TEXT",
  "value": "Воѡбража́лъ є҆сѝ страда́нїе влⷣки тва́ри, на дре́во сла́вне, воздви́женъ, и҆ въ ре́бра растерза́емь, мꙋчи́телей сꙋровство́мъ: и҆ ѡ҆блича́еши тѣ́хъ растерза́емꙋю мы́сль, і҆́дѡльскꙋю же ᲂу҆корѧ́ѧ ле́сть, и҆ проѧвле́ннѡ бл҃гоче́стїе ᲂу҆крѣплѧ́ѧ, великомч҃ниче ѳалале́е."
 },
 {
  "type": "TEXT",
  "value": "Повелѣ̑нїи мꙋчи́телѧ, глꙋбинѣ̀ преда́лсѧ є҆сѝ морстѣ́й, пребыва́еши же бж҃е́ственною благода́тїю неистопле́нъ, премꙋ́дре: тѡ́ки же кро́вными фараѡ́на мы́сленнаго и҆ сегѡ̀ во́инство потопи́лъ є҆сѝ, и҆ коне́чнѣй, бг҃омꙋ́дре, поги́бели пре́далъ є҆сѝ, вельмѝ ѿ хрⷭ҇та̀ ᲂу҆крѣплѧ́емь."
 },
 {
  "type": "HEADER",
  "value": "Стїхи̑ры бцⷣы, гла́съ и҆ подо́бенъ то́йже:"
 },
 {
  "type": "TEXT",
  "value": "Ѡ҆сꙋжде́нїѧ и҆зба́ви, прест҃а́ѧ бг҃оневѣ́сто, и҆ лю́тыхъ прегрѣше́нїй смире́ннꙋю мою̀ дꙋ́шꙋ, и҆ сме́рти и҆змѣнѝ мл҃твами твои́ми, и҆ да́рꙋй ѡ҆правда́нїе полꙋчи́ти въ де́нь и҆спыта́нїѧ, є҆́же полꙋчи́ша свѧты́хъ собо́ри: покаѧ́нїемъ ѡ҆чище́на мѧ̀ пре́жде конца̀ покажѝ, и҆ сле́зными и҆злїѧ̑нїи."
 },
 {
  "type": "TEXT",
  "value": "Тꙋ́чами дх҃а прест҃а́гѡ, пречⷭ҇таѧ, мою̀ мы́сль ѡ҆росѝ, ꙗ҆́же ка́плю ро́ждшаѧ хрⷭ҇та̀, неизче́тнѡ, безмѣ̑рнаѧ беззакѡ́нїѧ человѣ́кѡвъ щедро́тами и҆змы́вшꙋю: и҆зсꙋшѝ и҆сто́чникъ страсте́й мои́хъ, и҆ пото́ка мѧ̀ сподо́би пи́щи живы́ѧ при́снѡ, моли́твами твои́ми."
 },
 {
  "type": "TEXT",
  "value": "Покаѧ́нїѧ и҆зрѧ́дное и҆ спаси́тельное врачевство̀, ꙗ҆́же бг҃а ро́ждшаѧ сп҃са моего̀, и҆ сле́зъ то́ки, и҆ часа̀ по́мыслъ гро́знагѡ и҆ стра́шнагѡ, и҆ сꙋда̀ неꙋмы́тнагѡ, ты́ ми да́рꙋй и҆збѣжа́ти моли́твами твои́ми, ѽ дв҃о, мꙋче́нїѧ тре́петнагѡ, и҆ бжⷭ҇твеннꙋю ᲂу҆лꙋчи́ти бл҃года́ть."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Тма́ми, пречⷭ҇таѧ, ѡ҆бѣща́хсѧ покаѧ́нїе сотвори́ти ѡ҆ мои́хъ согрѣше́нїихъ: но не ѡ҆ставлѧ́етъ мѧ̀ люби́мый ѕѡ́лъ мои́хъ ѻ҆бы́чай. Сегѡ̀ ра́ди тебѣ̀ вопїю̀, и҆ припа́даю молѧ́сѧ: ты́ мѧ, влⷣчце, и҆змѝ такова́гѡ мꙋчи́тельства, наставлѧ́ющи мѧ̀ къ лꙋ́чшымъ, и҆ спасе́нїѧ бли́зъ сꙋ́щымъ."
 },
 {
  "type": "TEXT",
  "value": "Крⷭ҇тобг҃оро́диченъ: А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ, а҆́гница ро́ждшаѧ рыда́ше, и҆ мт҃рски тѝ вѣща́ше: сн҃е возжелѣ́нне, ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ка́кѡ рꙋ́цѣ и҆ но́зѣ твоѝ, сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ, влⷣко;"
 },
 {
  "type": "HEADER",
  "value": "Канѡ́нъ. Гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Ѡ҆мо́ченою багрѧни́цею страда́льческими кровьмѝ, благоꙋкра́шеннѡ цр҃ковь хрⷭ҇то́ва ѡ҆дѣ́ѧна хва́литсѧ въ страстоно́сцѣхъ, и҆ краси́тсѧ."
 },
 {
  "type": "TEXT",
  "value": "Си́лꙋ непобѣди́мꙋ ѿ бг҃а прїе́мъ, страстоте́рпче, во тма́хъ врагѡ́въ воева́лъ є҆сѝ є҆ди́нъ, въ по́двизѣхъ страда́нїѧ, ѳалале́е."
 },
 {
  "type": "TEXT",
  "value": "Ве́щь ѿве́ргъ плотскꙋ́ю, и҆ невеще́ственныхъ житїѐ на землѝ пожи́въ, ѳалале́е, а҆́гг҃льскимъ ликостоѧ́нїємъ счи́слилсѧ є҆сѝ."
 },
 {
  "type": "TEXT",
  "value": "Бг҃оро́диченъ: Земноро́днїи ржⷭ҇тво́мъ твои́мъ ѿ землѝ къ нбⷭ҇нѣй высотѣ̀ вознесо́хомсѧ вои́стиннꙋ, чⷭ҇таѧ бцⷣе, и҆ а҆́гг҃льскимъ ликостоѧ́нїємъ причто́хомсѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Ма́сть пома́за главꙋ̀ твою̀, сла́вне, хрⷭ҇то́ва, сегѡ̀ ра́ди пре́лести не прине́слъ є҆сѝ ма́сти, цѣле́нїе кро́вь твоѧ̀ всѣ̑мъ человѣ́кѡмъ и҆сточѝ и҆ ѿ землѝ кро́вь нече́стїѧ ѡ҆мы́ла є҆́сть, ѳалале́е."
 },
 {
  "type": "TEXT",
  "value": "Пло́ть покори́лъ є҆сѝ, тебє̀ ра́ди крⷭ҇тъ прїе́мшемꙋ, мꙋ́чениче хрⷭ҇то́въ, и҆ жи́зни нетлѣ́нныѧ сподо́билсѧ є҆сѝ, бл҃же́нне."
 },
 {
  "type": "TEXT",
  "value": "Паде́сѧ мꙋчи́тель подъ но́зѣ твоѝ, сла́вне, низложе́нъ бы́въ твои́мъ терпѣ́нїемъ и҆ сопротивле́нїемъ, ѳалале́е."
 },
 {
  "type": "TEXT",
  "value": "Бг҃оро́диченъ: Разрѣшѝ ржⷭ҇тво̀ твоѐ согрѣше́нїй на́шихъ до́лги, и҆ пра́вдѣ всѧ̑ вѣ̑рныѧ привѧза̀."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Свѣтови́дѣнъ показа́всѧ, страстоте́рпче, безбо́жїѧ ѡ҆мраче́нїе ѿри́нꙋлъ є҆сѝ, и҆ ка́знемъ, и҆ сме́рти ѿлꙋчи́лсѧ є҆сѝ. Тѣ́мже сконча́въ твоѧ̑ вели̑кїѧ по́двиги, вели́кое прїѧ́лъ є҆сѝ наслѣ́дїе, и҆ сла́вꙋ ника́коже мимоходѧ́щꙋю, до́блїй страда́льче, ѳалале́е сла́вне."
 },
 {
  "type": "HEADER",
  "value": "Сла́ва и҆ ны́нѣ, бг҃оро́диченъ:"
 },
 {
  "type": "TEXT",
  "value": "По бз҃ѣ во тво́й, бцⷣе, прибѣга́ю, смире́нный, покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки и҆ трепе́щꙋ, моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀."
 },
 {
  "type": "TEXT",
  "value": "Крⷭ҇тобг҃оро́диченъ: Ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
 },
 {
  "type": "TEXT",
  "value": "Просвѣще́на тѧ̀, сла́вне, заре́ю добродѣ́телей, хрⷭ҇то́съ прїѧ́тъ на сꙋди́щи страда́нїѧ, ꙗ҆́коже въ черто́зѣ, и҆ просла́вилъ є҆́сть."
 },
 {
  "type": "TEXT",
  "value": "И҆сцѣле́нїе тѧ̀ дадѐ влⷣка всѣ̑мъ вѣ̑рнымъ, ѳалале́е, и҆ твои́ми бж҃е́ственными моли́твами цѣли́ши стра̑сти дꙋ́шъ на́шихъ."
 },
 {
  "type": "TEXT",
  "value": "Пото́цы крове́й твои́хъ мѵ́ро и҆сцѣле́нїѧ всѣ̑мъ и҆сточа́ютъ, и҆ ѿгонѧ́ютъ смра́дъ недꙋ́гѡвъ, ѳалале́е, и҆ скорбе́й."
 },
 {
  "type": "TEXT",
  "value": "Бг҃оро́диченъ: Ꙗ҆́коже неистощи́мое, влⷣчце, тѧ̀ дарова́нїй сокро́вище и҆мꙋ́ще, незави̑стныѧ да́ры ѿ тебє̀ чꙋде́съ всѝ прїе́млемъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче."
 },
 {
  "type": "TEXT",
  "value": "Ѻ҆́блакъ болѣ́зней и҆ мꙋ́къ не покры̀ свѣ́тлости терпѣ́нїѧ твоегѡ̀: просїѧ́лъ бо є҆сѝ, страстоте́рпче, па́че со́лнца."
 },
 {
  "type": "TEXT",
  "value": "Расты́й мы́сленнѡ въ лїва́нѣ вѣ́ры, благово́нїе всѧ́ко дхнꙋ́лъ є҆сѝ мꙋче́нїѧ, пресла́вне ѳалале́е."
 },
 {
  "type": "TEXT",
  "value": "Ѻ҆рꙋ́жїемъ, мꙋ́дре, ѡ҆дѣ́ѧнъ страда́нїѧ, воздꙋ́шнымъ ше́ствїемъ возше́лъ є҆сѝ къ бжⷭ҇твеннѣй высотѣ̀ благода́ти, ѳалале́е."
 },
 {
  "type": "TEXT",
  "value": "Бг҃оро́диченъ: Скве́рнꙋ страстны́хъ помышле́нїй ѡ҆чи́щши дꙋ́шꙋ мою̀, бг҃оневѣ́сто, твои́ми моли́твами, чи́ста мѧ̀ бг҃ꙋ предста́ви."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀."
 },
 {
  "type": "TEXT",
  "value": "Слꙋжѧ̀ живо́мꙋ бг҃ꙋ, и҆ творцꙋ̀ всеѧ̀ тва́ри, слꙋжє́нїѧ мїрски́хъ ѿри́нꙋлъ є҆сѝ, ѳалале́е. Тѣ́мъ тѧ̀ просла́ви подвигополо́жникъ во страда́нїихъ и҆ чꙋдесѣ́хъ."
 },
 {
  "type": "TEXT",
  "value": "Просте́рлъ є҆сѝ прозѧбє́нїѧ, ꙗ҆́коже ма́слина плодови́та, терпѣ́нїѧ, мꙋ́дре, на высотꙋ̀ разꙋмѣва́емь. Тѣ́мже и҆сточи́лъ є҆сѝ є҆ле́й чꙋде́съ вѣ̑рнымъ, мꙋ́чениче ѳалале́е."
 },
 {
  "type": "TEXT",
  "value": "Свѣщꙋ̀ дꙋше́внꙋю, є҆ле́емъ, мꙋ́чениче ѳалале́е, добродѣ́телей разꙋ́мнѡ ᲂу҆кра́шь, сла́вне, ѻ҆гне́мъ страда́нїѧ возже́глъ є҆сѝ. Тѣ́мже въ черто́гъ бжⷭ҇твенный дости́глъ є҆сѝ."
 },
 {
  "type": "TEXT",
  "value": "Бг҃оро́диченъ: Бы́хомъ ме́ртвїи безсме́ртни, бжⷭ҇твенною благода́тїю ржⷭ҇тва̀ твоегѡ̀: и҆ тлѣ́нїѧ пе́рвагѡ и҆зба́вихомсѧ, бцⷣе пречⷭ҇таѧ, и҆ нетлѣ́нїѧ ѻ҆де́ждею ᲂу҆краси́хомсѧ."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Мꙋ́ченикѡмъ сострада́лецъ ꙗ҆́вльсѧ и҆ ѻ҆рꙋ́жникъ, во́инъ и҆зрѧ́дный цр҃ѧ̀ сла́вы бы́лъ є҆сѝ, и҆скꙋше́ньми и҆ мꙋ́кою, возвыше́нїе і҆дѡлослꙋжи́телей попра́лъ є҆сѝ: сегѡ̀ ра́ди честнꙋ́ю твою̀ пое́мъ па́мѧть, мꙋ́дре ѳалале́е."
 },
 {
  "type": "TEXT",
  "value": "І҆́косъ: Хра́бра хрⷭ҇то́ва и҆́стины слꙋжи́телѧ, ꙗ҆́кѡ тве́рда страда́льца, и҆ проповѣ́дника вѣ́ры, низложи́вшаго вра́жїю ро́знь, і҆́дѡлѡвъ ѡ҆бличи́вшаго всѐ неи́стовство дꙋшегꙋ́бное, пѣ́сньми и҆ хвала́ми всѝ воспое́мъ ны́нѣ, и҆ благоче́стнѡ похва́лимъ: ꙗ҆́кѡ бо а҆́гнецъ посредѣ̀ волкѡ́въ пребеззако́нныхъ предста́въ, проповѣ́даетъ благоче́стнѡ гдⷭ҇ень зако́нъ, є҆го́же творѧ́ще є҆диномы́сленнѡ, честнꙋ́ю пое́мъ па́мѧть премꙋ́драгѡ ѳалале́а."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Возше́дъ на высотꙋ̀ хрⷭ҇то́ва благоче́стїѧ, мꙋ́чениче ѳалале́е, і҆́дѡльскїѧ возгнꙋша́лсѧ є҆сѝ, до́лꙋ влекꙋ́щїѧ ле́сти, и҆ непреста́ннѡ взыва́еши: ѻ҆тє́цъ на́шихъ бж҃е, благослове́нъ є҆сѝ."
 },
 {
  "type": "TEXT",
  "value": "Водрꙋ́жсѧ на ка́мени зижди́телѧ любвѐ, мꙋ́чениче ѳалале́е, мꙋче́нїй треволнє́нїи ника́коже поколеба́лсѧ є҆сѝ, сегѡ̀ бжⷭ҇твенныѧ вѣ́ры, и҆ благода́рнѡ того̀ пое́ши, ꙗ҆́кѡ благодѣ́телѧ."
 },
 {
  "type": "TEXT",
  "value": "Ѿ незави́стныхъ во́дъ, дꙋхо́вныѧ благода́ти поче́рпъ чꙋде́съ, просѧ́щымъ незави́стнѡ сїѧ̑ всѣ̑мъ раздава́еши, ѳалале́е, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Ди́венъ ꙗ҆́кѡ сы́й во ст҃ы́хъ всѣ́хъ, є҆ди́не чл҃вѣколю́бче, ᲂу҆дивѝ, ще́дрый, моли́твами ѳалале́а бога̑тыѧ ми́лѡсти твоѧ̑, пою́щымъ, хрⷭ҇тѐ, твоѐ смотре́нїе."
 },
 {
  "type": "TEXT",
  "value": "Бг҃оро́диченъ: Да всѧ̑ привлече́тъ къ нбⷭ҇нѣй сла́вѣ творе́цъ всѧ́ческихъ, и҆зъ тебє̀, бцⷣе, благоизво́ли роди́тисѧ, и҆ на́мъ ꙗ҆́кѡ чл҃вѣколю́бецъ, и҆ бл҃годѣ́тель бг҃ъ пло́тїю примѣси́тисѧ"
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Ѿло́жь непостоѧ́ннꙋю мꙋ́дрость, мꙋ́чениче сла́вне, хва́лѧщихсѧ є҆́ллинъ въ плете́нїихъ, ра́зꙋмъ непа́дающїй, и҆ сло́во непоколе́блемое влⷣки всѣ́хъ и҆ бг҃а привле́клъ є҆сѝ, вопїѧ̀ є҆мꙋ̀ непреста́ннѡ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Превзе́мьсѧ, ѳалале́е, ѿ земны́хъ дꙋ́хомъ, творца̀ и҆ и҆зба́вителѧ зрѧ̀ ᲂу҆ма̀ чистото́ю, и҆ болѣ̑зни претерпѣ́лъ є҆сѝ, стражда̀ до́блественною дꙋше́ю, посе́мъ и҆ зовы́й: благослови́те, свѧще́ннїи, влⷣкꙋ, лю́дїе, превозноси́те є҆го̀ во вѣ́ки."
 },
 {
  "type": "TEXT",
  "value": "Мч҃ническими кровьмѝ ѡ҆багри́въ ѻ҆де́ждꙋ, ѳалале́е, се́ю ѡ҆дѣ́ѧлсѧ є҆сѝ мы́сленнѡ, ца́рское ꙗ҆́кѡ ᲂу҆краше́нїе, и҆ со всѣ́ми страда̑льцы и҆ мꙋ́ченики въ нбⷭ҇ныхъ кро́вѣхъ ликꙋ́еши, вопїѧ̀ непреста́ннѡ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: И҆́же ѿ не сꙋ́щихъ всѧ̑ сло́вомъ составле́й, пло́ть человѣ́чꙋ ѿ тебє̀ прїѧ́тъ, є҆ди́нъ безсме́ртный, за милосе́рдїе, чⷭ҇таѧ, да ѡ҆бнови́тъ, ꙗ҆́кѡ бг҃ъ бл҃годѣ́тель, всѧ̑ пою́щыѧ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти ѿ дв҃и́ческагѡ чре́ва бы́въ чл҃вѣ́къ. Тѣ́мже пречⷭ҇тꙋю бцⷣꙋ, вѣ́рнїи, велича́емъ."
 },
 {
  "type": "TEXT",
  "value": "Цвѣ́ты ны́нѣ добродѣ́телей, страстоте́рпче, мы́сленный и҆сплете́нный вѣне́цъ страда́нїѧ, ꙗ҆́коже ка́менїемъ сего̀ ᲂу҆краси́лъ є҆сѝ, и҆ ᲂу҆добри́лъ є҆сѝ кра́сными, ѳалале́е, ра́нами. И҆́мже ѡ҆бложе́нъ, въ нбⷭ҇ный черто́гъ вше́лъ є҆сѝ."
 },
 {
  "type": "TEXT",
  "value": "Оу҆ѧзви́лсѧ є҆сѝ стрѣло́ю мы́сленною терпѣ́нїѧ, и҆ ᲂу҆ѧзвлѧ́ѧй тѣ́ло твоѐ вра́гъ ѕлонача́льный, и҆знемо́гъ, на землѝ паде́сѧ: ты́ же ᲂу҆крѣплѧ́емь дꙋше́ю, къ высотѣ̀, ѳалале́е, взѧ́лсѧ є҆сѝ нбⷭ҇нѣй, воспѣва́ѧ ᲂу҆крѣ́пльшаго тѧ̀ гдⷭ҇а."
 },
 {
  "type": "TEXT",
  "value": "Ꙗ҆ви́шасѧ и҆сцѣле́нїе вѣ̑рнымъ крове́й твои́хъ ка̑пли, ѳалале́е, недꙋ́ги ѿмыва́юще, и҆ и҆сцѣлє́нїѧ чꙋде́съ точа́ще, и҆ ѻ҆гнепалє́нїѧ лю̑таѧ ᲂу҆гаша́юще, благода́тїю вѣнцеда́вца хрⷭ҇та̀, и҆ тѧ̀ пѣ́сненнѡ сла́вѧщыѧ ѡ҆роша́юще."
 },
 {
  "type": "TEXT",
  "value": "Позна̑на бы́ша всѣ̑мъ земнорѡ́днымъ, страда́нїємъ возда̑нїѧ твоѧ̑, ѳалале́е: преимꙋ́ща бо па́че наде́жды дарова̑нїѧ и҆сточа́ютъ: и҆́миже и҆ на́съ, благоче́стнѡ и҆ вѣ́рнѡ чтꙋ́щыѧ твоѧ̑ борє́нїѧ, ѿ се́рдца просѧ́щыѧ посѣтѝ."
 },
 {
  "type": "TEXT",
  "value": "Бг҃оро́диченъ: Возвы́си, влⷣчце чⷭ҇таѧ, дꙋшѝ моеѧ̀ до́лꙋ влекꙋ́щее мꙋдрова́нїе, къ пресвѣ́тломꙋ и҆ бжⷭ҇твенномꙋ жела́нїю твоегѡ̀ сн҃а и҆ бг҃а: да любо́вїю є҆гѡ̀ при́снѡ ѻ҆гнепале́нъ и҆ плѣнѧ́емь, къ немꙋ̀ добродѣ́телїю прибли́жꙋсѧ."
 }
]