ponomar-pwa/static/data/shared/menaion-daily/05-26/1.json

[
 {
  "type": "HEADER",
  "value": "Ма́їа к҃ѕ"
 },
 {
  "type": "HEADER",
  "value": "Ст҃а́гѡ а҆пⷭ҇ла ка́рпа, є҆ди́нагѡ ѿ ѻ҃."
 },
 {
  "type": "HEADER",
  "value": "Стїхи̑ры а҆пⷭ҇ла, гла́съ а҃."
 },
 {
  "type": "TEXT",
  "value": "Подо́бенъ: Всехва́льнїи:"
 },
 {
  "type": "TEXT",
  "value": "Прїѧ́тными сїѧ̑нїи ᲂу҆́мъ бжⷭ҇твенъ творѧ̀, просвѣти́лсѧ є҆сѝ, всебога́те, и҆ на про́повѣдь хрⷭ҇то́вꙋ и҆зше́лъ є҆сѝ, и҆ лю́ди наꙋчи́лъ є҆сѝ чти́ти є҆го̀, ꙗ҆́кѡ чл҃вѣколю́бца. И҆ ны́нѣ молѝ, дарова́ти дꙋша́мъ на́шымъ ми́ръ, и҆ ве́лїю ми́лость."
 },
 {
  "type": "TEXT",
  "value": "Ѕвѣзда̀ пресвѣ́тла ꙗ҆́вльсѧ, бжⷭ҇твенными сїѧ́ньми вселе́нныѧ концы̀ просвѣща́еши всегда̀ ᲂу҆чє́нїи, блаже́нне, и҆ разгонѧ́еши благода́тїю мра́къ недꙋ́жный комꙋ́ждо, и҆ ны́нѣ молѝ, дарова́ти дꙋша́мъ на́шымъ ми́ръ, и҆ ве́лїю ми́лость."
 },
 {
  "type": "TEXT",
  "value": "Же́ртвꙋ безкро́внꙋ бг҃ꙋ жрѧ̀ соверше́ннꙋю, за того̀, мꙋ́чениче, поже́рлсѧ є҆сѝ, и҆ прине́слсѧ є҆сѝ къ разꙋ́мнѣй трапе́зѣ, же́ртва благово́нна, а҆пⷭ҇ле ка́рпе всебога́те. И҆ ны́нѣ молѝ, дарова́ти дꙋша́мъ на́шымъ ми́ръ, и҆ ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ."
 },
 {
  "type": "TEXT",
  "value": "Всепѣ́таѧ влⷣчце, наде́жде вѣ́рныхъ и҆ ᲂу҆твержде́нїе,. Прибѣ́жище и҆ по́мощь, тѧ̀ мо́лимъ: ѿ всѧ́кїѧ бѣды̀ рабы̑ твоѧ̑ сохранѝ, вѣ́рою покланѧ́ющыѧсѧ ржⷭ҇твꙋ̀ твоемꙋ̀ є҆го́же молѝ, дарова́ти дꙋша́мъ на́шымъ ми́ръ, и҆ ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: Своего̀ а҆́гнца а҆́гница и҆ непоро́чнаѧ влⷣчца на крⷭ҇тѣ̀ ꙗ҆́кѡ ви́дѣ зра́ка не и҆мꙋ́ща нижѐ добро́ты, ᲂу҆вы̀ мнѣ̀, рыда́ющи гл҃го́лаше: гдѣ̀ добро́та твоѧ̀ за́йде, сладча́йшїй; гдѣ̀ благолѣ́пїе; гдѣ̀ благода́ть блиста́ющаѧ ѻ҆́браза твоегѡ̀, сн҃е мо́й любе́знѣйшїй;"
 },
 {
  "type": "HEADER",
  "value": "Тропа́рь, гла́съ г҃:"
 },
 {
  "type": "TEXT",
  "value": "А҆пⷭ҇ле ст҃ы́й ка́рпе, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ."
 },
 {
  "type": "HEADER",
  "value": "Канѡ́нъ, творе́нїе і҆ѡ́сифово, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Сла́внаго хвалю̀ ка́рпа бжⷭ҇твенною любо́вїю."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колєсни́цы фараѡ́нѡвы и҆ си́лꙋ."
 },
 {
  "type": "TEXT",
  "value": "Любо́вїю соверша́ющыѧ твою̀ свѣтоно́снꙋю и҆ свѧще́ннꙋю, сла́внꙋю и҆ всечестнꙋ́ю па́мѧть, свѣ́та бжⷭ҇твеннагѡ и҆спо́лни, а҆пⷭ҇ле, моли́твами твои́ми."
 },
 {
  "type": "TEXT",
  "value": "Ве́сь возложи́всѧ влⷣцѣ, сегѡ̀ зако́ны честны̑ѧ невре́дны соблю́лъ є҆сѝ: беззакѡ́нныѧ же благозако́нїю наꙋчи́лъ є҆сѝ, а҆пⷭ҇ле."
 },
 {
  "type": "TEXT",
  "value": "Оу҆́мъ преꙋ́мный возлюби́въ въ зрѣ́нїи та́йномъ, ᲂу҆мо́мъ ѡ҆зари́всѧ, всебл҃же́нне свѧще́нне, свѣ́тъ ꙗ҆ви́лсѧ є҆сѝ вторы́й."
 },
 {
  "type": "TEXT",
  "value": "Бг҃оро́диченъ: Ро́ждши, дв҃о, несказа́ннѡ, є҆сте́ствєнныѧ зако́ны ѡ҆бнови́ла є҆сѝ: тѣ́мже тѧ̀ блажи́мъ, марі́е бг҃оневѣ́сто."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ."
 },
 {
  "type": "TEXT",
  "value": "Цѣвни́ца брѧца́ющаѧ дх҃омъ бы́лъ є҆сѝ, всебл҃же́нне, бг҃одви́жимый ѧ҆зы́къ тво́й, вѣща́ющь вели̑чїѧ сн҃а и҆ бг҃а на́шегѡ."
 },
 {
  "type": "TEXT",
  "value": "И҆мѣ́ѧ сло́во пребезнача́льное направлѧ́ющее тѧ̀, и҆ ꙗ҆́вѣ ᲂу҆крѣплѧ́ющее, безбѡ́жнымъ спаси́тєльныѧ стєзѝ, ка́рпе, показа́лъ є҆сѝ."
 },
 {
  "type": "TEXT",
  "value": "Ка́рпе, спаси́тельное проповѣ́данїе тва́ри, ꙗ҆́кѡ свѧти́тель бг҃опрїѧ́тенъ, возвѣсти́въ, мнѡ́га под̾ѧ́лъ є҆сѝ гонє́нїѧ и҆ скѡ́рби, сла́вне."
 },
 {
  "type": "TEXT",
  "value": "Бг҃оро́диченъ: Но́во ꙗ҆́кѡ ѻ҆троча̀ родила̀ є҆сѝ, пре́жде вѣ̑къ и҆зъ ѻ҆ц҃а̀ возсїѧ́вшее, неизглаго́ланнѡ, бг҃ороди́тельнице: сегѡ̀ ра́ди тѧ̀ сла́вимꙋ."
 },
 {
  "type": "HEADER",
  "value": "Сѣда́ленъ гла́съ г҃."
 },
 {
  "type": "TEXT",
  "value": "Подо́бенъ: Бжⷭ҇твенныѧ вѣ́ры:"
 },
 {
  "type": "TEXT",
  "value": "Бжⷭ҇твенное сїѧ́нїе воспрїи́мъ, ка́рпе премꙋ́дре, ᲂу҆тѣ́шителево, ѡ҆мрачє́нныѧ невѣ́дѣнїемь просвѣти́лъ є҆сѝ: и҆ преста́вльсѧ къ вы́шнемꙋ ца́рствїю, цр҃ю̀ всѣ́хъ предстои́ши, молѧ̀ хрⷭ҇та̀ бг҃а всегда̀, дарова́ти на́мъ ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по ржⷭ҇твѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь. Того̀ прилѣ́жнѡ молѝ, дарова́ти на́мъ ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Любвѐ ра́ди, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе."
 },
 {
  "type": "TEXT",
  "value": "Созда́въ ꙗ҆́кѡ ка́менїе вѣ́рныхъ мно́жество, на благоче́стїи ка́мени хра́мы содѣ́лалъ є҆сѝ ст҃а́гѡ дх҃а, бг҃омꙋ́дре а҆пⷭ҇ле."
 },
 {
  "type": "TEXT",
  "value": "Нѡ́вы содѣ́лавъ креще́нїемъ, бг҃облаже́нне, ѡ҆бветша́вшыѧ нра́вомъ тлѣ́ннымъ человѣ́ки спа́слъ є҆сѝ, сла́вѧщыѧ хрⷭ҇та̀ бг҃а на́шего."
 },
 {
  "type": "TEXT",
  "value": "Ꙗ҆влѧ́ѧ та́инство покры́вшагѡ добродѣ́телїю, бг҃омꙋ́дре, небеса̀, привле́клъ є҆сѝ ꙗ҆зы́ки къ позна́нїю, тмꙋ̀ ѿгонѧ̀."
 },
 {
  "type": "TEXT",
  "value": "Съ па́ѵломъ свѣти́льникомъ вселе́нныѧ, пꙋ́ть ше́ствꙋѧ мно́жицею, пꙋти̑ ведꙋ́щыѧ, ка́рпе, показа́лъ є҆сѝ лю́демъ ко благоче́стїю."
 },
 {
  "type": "TEXT",
  "value": "Бг҃оро́диченъ: Оу҆́мнѡ бг҃оно́сный, бг҃ороди́тельнице, го́рꙋ тѧ̀ ви́дѣвъ ве́лїю, и҆ присѣ́ннꙋю, ѻ҆трокови́це, ѿ неѧ́же прїи́де пло́тїю бг҃ъ на́шъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣще́нїе твоѐ, гдⷭ҇и, низпослѝ на́мъ и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй."
 },
 {
  "type": "TEXT",
  "value": "Ꙗ҆́кѡ садодѣ́латель и҆зрѧ́денъ показа́лъ є҆сѝ лю́демъ живо́тное дре́во: ѿ негѡ́же ꙗ҆ды́й жи́въ бꙋ́детъ про́чее во вѣ́ки, хрⷭ҇топроповѣ́дниче а҆пⷭ҇ле."
 },
 {
  "type": "TEXT",
  "value": "Проповѣ́дникъ ꙗ҆зы́кѡвъ а҆пⷭ҇лъ, и҆ ᲂу҆чи́тель че́стенъ свѧщеннотаи́нникъ, и҆ свѧщенносло́въ, ка́рпе, бы́въ, въ весе́лїи влⷣцѣ предстои́ши."
 },
 {
  "type": "TEXT",
  "value": "Ѿ восто́ка прише́лъ є҆сѝ ꙗ҆́кѡ незаходи́маѧ ѕвѣзда̀, вселе́ннꙋю зарѧ́ми твои́хъ слове́съ, и҆ свѧще́нными просвѣща́ѧ ѻ҆́бразы, і҆ера́рше а҆пⷭ҇ле."
 },
 {
  "type": "TEXT",
  "value": "Бг҃оро́диченъ: Скве́рнꙋ дꙋшѝ тѣлесѐ ѡ҆чи́сти мѝ ны́нѣ, бл҃гослове́ннаѧ, милосе́рдымъ твои́мъ воззрѣ́нїемъ: ꙗ҆́кѡ да тѧ̀ пою̀ и҆ велича́ю по до́лгꙋ, всепѣ́таѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ."
 },
 {
  "type": "TEXT",
  "value": "И҆сточа́етъ ра́ка твои́хъ моще́й тре́бꙋющымъ и҆сцѣлє́нїѧ, ст҃и́телю, то́ки благода́тїю бжⷭ҇твенною, и҆ ѿе́млетъ стра̑сти, и҆ потоплѧ́етъ нечи̑стыѧ дꙋ́хи."
 },
 {
  "type": "TEXT",
  "value": "Сло́во твоѐ ѿ безслове́сїѧ и҆збавлѧ́ѧ человѣ́ки, и҆ чꙋде́съ вели́кое показа́нїе, сла́вне, заблꙋ́ждшихъ ко благоче́стїю, ка́рпе, наста́ви."
 },
 {
  "type": "TEXT",
  "value": "Вжилѧ́емь си́лою бжⷭ҇твенною, ѕмі́ѧ на высотꙋ̀ хꙋлꙋ̀ глаго́лавшаго погꙋби́въ, ѿ ѻ҆́нагѡ поглощє́нныѧ, а҆пⷭ҇ле, спа́слъ є҆сѝ."
 },
 {
  "type": "TEXT",
  "value": "Бг҃оро́диченъ: Родила̀ є҆сѝ безъ болѣ́зни зижди́телѧ, всенепоро́чнаѧ, болѣ̑зни и҆ трꙋды̀ на́шѧ ѿе́млющаго, и҆ неболѣ́зненнѣй сподоблѧ́юща пи́щи человѣ́чество."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ:"
 },
 {
  "type": "TEXT",
  "value": "Ꙗ҆́кѡ ѕвѣздꙋ̀ пресвѣ́тлꙋю це́рковь всегда̀ стѧжа́ тѧ, а҆пⷭ҇ле ка́рпе, чꙋде́съ твои́хъ многоподава́нїемъ просвѣща́ема, спасѝ вѣ́рою чтꙋ́щихъ па́мѧть твою̀."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Недꙋ́ги ѿгонѧ̀ вѣща́нїемъ, и҆сцѣлѧ́ѧ стра̑сти зна́менїемъ то́кмѡ є҆ди́нымъ, спаси́тельное возвѣсти́лъ є҆сѝ проповѣ́данїе, свѧщеннотаи́нниче ка́рпе, просвѣща́ѧ сꙋ́щыѧ во тмѣ̀."
 },
 {
  "type": "TEXT",
  "value": "Ꙗ҆́рости кнѧзе́й, мꙋ́дре, ника́коже ᲂу҆боѧ́всѧ, до́блественнѣ ѿлꙋчи́лсѧ є҆сѝ къ страда́нїю болѣ́зненныхъ трꙋдѡ́въ, взыва́ѧ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Посѣще́на тѧ̀ ѿ гдⷭ҇а, ка́рпе, ве́ррїи бжⷭ҇твенна поста́ви посѣти́телѧ, и҆зрѧ́днѡ посѣща́юща сего̀ посѣщє́нїи бжⷭ҇твенными."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ простра́ннѣйши сꙋ́щи небе́съ, въ ложесна̀ прїѧ́тъ сло́во невмѣсти́мое, дв҃о, и҆збавлѧ́ющаго тѣсноты̀ всѧ́кїѧ ро́дъ человѣ́ческїй."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: На крⷭ҇тѣ̀ пло́тїю пригвожде́ннаго, и҆ показа́вшаго на́мъ ѻ҆рꙋ́жїе во спасе́нїе, ѻ҆́троцы, превозноси́те хрⷭ҇та̀ бг҃а на́шего во вѣ́ки."
 },
 {
  "type": "TEXT",
  "value": "Па́ѵлꙋ мꙋ́дромꙋ наста́вникꙋ въ посла́нїихъ слꙋжѧ̀ бж҃е́ственныхъ, ст҃и́телю, спаси́тєльнаѧ ᲂу҆чє́нїѧ всѣ̑мъ разда́лъ є҆сѝ спаса́ємымъ."
 },
 {
  "type": "TEXT",
  "value": "Оу҆́тро свѣ́тлое, ѡ҆зарѧ́ѧй вселе́ннꙋю свѣ́томъ, проповѣ́дникъ показа́лсѧ є҆сѝ, и҆ неразꙋ́мїѧ тмꙋ̀ глꙋбо́кꙋю ѿгна́лъ є҆сѝ, досточꙋ́дне."
 },
 {
  "type": "TEXT",
  "value": "Чꙋдеса̀ соверша́ѧ призыва́нїемъ ѻ҆ц҃а̀, и҆ дх҃а, мꙋ́дре, сло́ва воплоще́ннагѡ, ᲂу҆вѣ́рилъ є҆сѝ є҆́ллины мꙋ̑дрыѧ, трїѷпоста́сное сꙋщество̀ чти́ти."
 },
 {
  "type": "TEXT",
  "value": "Бг҃оро́диченъ: Ꙗ҆ви́ласѧ є҆сѝ нб҃о, бг҃ороди́тельнице, возсїѧ́вшее на́мъ пра́вды сл҃нце, просвѣща́ющи всѧ̑ ны̀, въ ра́зꙋмъ бг҃оразꙋ́мїѧ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ржⷭ҇тво̀ твоѐ нетлѣ́ннѡ ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. Тѧ̀, бцⷣе, тѣ́мъ всѝ велича́емъ."
 },
 {
  "type": "TEXT",
  "value": "Ви́дѣвъ со сла́вою бг҃а восходѧ́ща, съ пло́тїю въ вы̑шнѧѧ, седми́десѧтимъ, ка́рпе, ᲂу҆ч҃никѡ́мъ соприче́лсѧ є҆сѝ, и҆зше́лъ є҆сѝ вкꙋ́пѣ съ ни́ми, проповѣ́дникъ бжⷭ҇твенъ ꙗ҆влѧ́ѧсѧ."
 },
 {
  "type": "TEXT",
  "value": "Ꙗ҆́кѡ ѻ҆вча̀ посредѝ волкѡ́въ по́сланъ бы́лъ є҆сѝ, претворѧ́ѧ тѣ́хъ, ка́рпе, къ разꙋмѣ́нїю, сло́вомъ и҆́стиннымъ на спасе́нїе, и҆ прелага́ѧ си́хъ нра́въ, бг҃оглаго́ливе, ко благоче́стїю."
 },
 {
  "type": "TEXT",
  "value": "Собесѣ́дникъ ꙗ҆ви́лсѧ є҆сѝ а҆́гг҃лѡвъ, а҆пⷭ҇ле ка́рпе бг҃оглаго́ливе, а҆пⷭ҇лѡмъ же и҆ мꙋ́ченикѡмъ, ди́внѡ во благоче́стїи сконча́вшымсѧ. Съ ни́миже ликꙋ́ѧ ве́селѡ, и҆ на́съ помина́й."
 },
 {
  "type": "TEXT",
  "value": "Ѡ҆свѧти́лъ є҆сѝ, ка́рпе, ше́ствꙋѧ зе́млю, и҆ ст҃о́е проповѣ́далъ є҆сѝ є҆ѵⷢ҇лїе вѣ́рою, и҆ дꙋ́шы живода́тельномꙋ сло́вꙋ приве́лъ є҆сѝ. Тѣ́мже тебѣ̀ да́рꙋетъ наслѣ́дїе нбⷭ҇ное."
 },
 {
  "type": "TEXT",
  "value": "Бг҃оро́диченъ: Гла́съ тѝ прино́симъ, дв҃о, гаврїи́ломъ, вопїю́ще: ра́дꙋйсѧ, ле́гкїй ѻ҆́блаче, ра́дꙋйсѧ, землѐ недѣ́ланнаѧ, кла́съ красе́нъ плодоносѧ́щи, пита́телѧ все́й тва́ри."
 }
]