ponomar-pwa/static/data/shared/menaion-daily/06-09/1.json

[
 {
  "type": "HEADER",
  "value": "І҆ꙋ́нїа ѳ҃"
 },
 {
  "type": "HEADER",
  "value": "И҆́же во ст҃ы́хъ, ѻ҆ц҃а̀ на́шегѡ кѷрі́лла, а҆рхїепі́скопа а҆леѯандрі́йскагѡ."
 },
 {
  "type": "HEADER",
  "value": "Стїхи̑ры ст҃и́телѧ, на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Сїѧ̑нїи дх҃о́вными просвѣти́въ тво́й ᲂу҆́мъ, свѣтолꙋ́чно сл҃нце бы́лъ є҆сѝ, ꙗ҆́коже лꙋчѝ ᲂу҆чє́нїѧ, во всѧ̑ концы̀ простира́ѧ, и҆ вѣ́рныхъ ѡ҆зарѧ́ѧ и҆сполне́нїе, пребл҃же́нне, и҆ ѿгонѧ́ѧ тмꙋ̀, бг҃оно́се, є҆ресе́й, си́лою ѿ дв҃ы возсїѧ́вшагѡ."
 },
 {
  "type": "TEXT",
  "value": "Благосказа́нїемъ слове́съ твои́хъ, свѧще́нне кѷрі́лле, цр҃ковь всѧ̀ ᲂу҆краша́етсѧ, и҆ благоче́стнѡ ᲂу҆добрѧ́етсѧ кра́сными добро́тами, и҆ почита́етъ свѧще́ннѡ твою̀ ст҃ꙋ́ю и҆ бл҃гонаро́читꙋю па́мѧть, правосла́вныхъ похвало̀, ѻ҆тцє́въ верхо́вниче, и҆́же на собо́рѣ всест҃ы́ѧ побо́рниче."
 },
 {
  "type": "TEXT",
  "value": "Ѻ҆́гненными твои́ми ᲂу҆чє́нїи є҆ресе́й всѧ́ка хвра́стнаѧ попалѧ́етсѧ ве́щь, премꙋ́дре, разꙋ́мными глꙋбина́ми погрꙋжа́етсѧ во́инство неповинꙋ́ющихсѧ ѕлочести́выхъ, сщ҃е́нне кѷрі́лле, ᲂу҆че́ньми ᲂу҆краша́етсѧ вѣ́рныхъ всегда̀ цр҃ковь, велегла́снѡ чтꙋ́щи тѧ̀."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Благі́й ра́бе и҆ вѣ́рный, дѣ́лателю вїногра́да хрⷭ҇то́ва, ты̀ и҆ тѧготꙋ̀ дневнꙋ́ю поне́слъ є҆сѝ, ты̀ и҆ да́нный тебѣ̀ тала́нтъ возрасти́лъ є҆сѝ, и҆ по тебѣ̀ прише́дшымъ не зави́дѣлъ є҆сѝ. Тѣ́мже врата̀ нбⷭ҇наѧ ѿверзо́шасѧ тебѣ̀, вни́ди въ ра́дость гдⷭ҇а твоегѡ̀, и҆ молѝ ѡ҆ на́съ, кѷрі́лле ѻ҆́ч҃е на́шъ."
 },
 {
  "type": "HEADER",
  "value": "И҆ ны́нѣ, пра́здника, и҆лѝ бг҃оро́диченъ. Крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Всѐ ѿло́жше:"
 },
 {
  "type": "TEXT",
  "value": "А҆́гнца своего̀ а҆́гница нескве́рнаѧ дре́вле, и҆ непоро́чнаѧ влⷣчца, на дре́вѣ крⷭ҇тнѣмъ ꙗ҆́кѡ ᲂу҆зрѣ̀, мт҃ерски восклица́ше, и҆ дивѧ́щисѧ вопїѧ́ше: ча́до сладча́йшее, что̀ зрѣ́нїе сїѐ, но́вое и҆ пресла́вное; ка́кѡ со́нмъ безблагода́тный сꙋди́щꙋ пїла́товꙋ предаде́ тѧ, и҆ ѡ҆сꙋжда́етъ на сме́рть, живота̀ всѧ́ческихъ; но воспѣва́ю твоѐ неизрече́нное, сло́ве, снизхожде́нїе."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ ѕ҃:"
 },
 {
  "type": "TEXT",
  "value": "Чл҃вѣ́че бж҃їй, и҆ вѣ́рный ра́бе, слꙋго̀ гдⷭ҇ень, мꙋ́жꙋ жела́нїй, сосꙋ́де и҆збра́нный, сто́лпе и҆ ᲂу҆твержде́нїе цр҃кве, црⷭ҇твїѧ наслѣ́дниче, не премолчѝ, вопїѧ̀ за ны̀ ко гдⷭ҇ꙋ."
 },
 {
  "type": "HEADER",
  "value": "И҆ ны́нѣ, пра́здника, и҆лѝ бг҃оро́диченъ. Крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;"
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, вселе́нныѧ свѣти́льниче, а҆рхїере́ѡвъ бг҃одꙋхнове́нное ᲂу҆добре́нїе, кѷрі́лле премꙋ́дре, ᲂу҆че́ньми твои́ми всѧ̑ просвѣти́лъ є҆сѝ: цѣвни́це дꙋхо́внаѧ, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на ѕ҃, ѳеофа́ново, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Зрѣ́нїй кѷрі́ллъ бж҃е́ственныхъ цѣвни́ца."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Ѿ бг҃а свѣтода́тельнꙋ благода́ть, кѷрі́лле, прїе́мъ, и҆ свѣ́телъ свѣти́льникъ ꙗ҆́вльсѧ, словє́сныѧ ѡ҆блиста́лъ є҆сѝ на́мъ лꙋчы̀, па́мѧтїю твое́ю: ꙗ҆́кѡ да досто́йнѡ тѧ̀ воспое́мъ."
 },
 {
  "type": "TEXT",
  "value": "И҆спо́лнилсѧ є҆сѝ свѣтоѧвле́нїѧ, кѷрі́лле премꙋ́дре, дх҃о́внагѡ, ꙗ҆́кѡ за́повѣдей хрⷭ҇то́выхъ храни́тель, ѿ страсте́й ѡ҆чище́нъ, пребж҃е́ственныѧ бы́лъ є҆сѝ вои́стиннꙋ трⷪ҇цы жили́ще."
 },
 {
  "type": "TEXT",
  "value": "Ꙗ҆́кѡ ре́вности и҆ дерзнове́нїѧ и҆спо́лненъ, кѷрі́лле сла́вне, бг҃обѡ́рнаѧ всѧ̑ нело́жнѡ ѧ҆зыковрє́дїѧ и҆з̾ѡбличи́лъ є҆сѝ, ѕлочести́выхъ є҆ресе́й, по пра́вѣй вѣ́рѣ борѧ́сѧ."
 },
 {
  "type": "TEXT",
  "value": "Бг҃оро́диченъ: И҆сцѣли́ла є҆сѝ сокрꙋше́нїе, всенепоро́чнаѧ, человѣ́чества, творца̀ ро́ждшаѧ всѣ́хъ, возве́дшаго ны̀ низве́ржєнныѧ паде́нїемъ пра́ѻч҃имъ, бг҃оневѣ́сто."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "Оу҆крѣплѧ́емь ѡ҆ хрⷭ҇тѣ̀, кѡ́зни лꙋка́вагѡ ѕмі́ѧ, тве́рдымъ ᲂу҆мо́мъ, кѷрі́лле, ꙗ҆́коже тка́нїе паꙋчи́нное расто́ргнꙋлъ є҆сѝ."
 },
 {
  "type": "TEXT",
  "value": "Ти́нꙋ страсте́й ѿ дꙋшѝ ѿтрѧ́слъ є҆сѝ, кѷрі́лле, низло́жь всѧ́кагѡ по́мысла возноше́нїе, на хрⷭ҇та̀ превозноша́ющеесѧ."
 },
 {
  "type": "TEXT",
  "value": "Ꙗ҆́кѡ благополꙋ́ченъ страда́лецъ, ѻ҆́ч҃е, ᲂу҆клони́лсѧ є҆сѝ тве́рдѡ, всѧ́кагѡ плотска́гѡ сладостра́стїѧ, ꙗ҆́кѡ тще́тнагѡ и҆ пакостнотво́рнагѡ."
 },
 {
  "type": "TEXT",
  "value": "Бг҃оро́диченъ: Є҆ди́нꙋ въ жена́хъ тѧ̀ бл҃гослове́ннꙋю, ꙗ҆́кѡ бж҃їе селе́нїе, всебл҃голѣ́пнѡ всѝ ра́достїю просла́вимъ."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ дѣ́вства:"
 },
 {
  "type": "TEXT",
  "value": "Сто́лпъ и҆ же́ртва цр҃кве хрⷭ҇то́вы, ѻ҆́ч҃е, бы́въ, сїю̀ непоколеби́мꙋ ѿ и҆скꙋше́нїй лꙋка́вагѡ премꙋ́дрѡ соблю́лъ є҆сѝ: все́ бо нестѡ́рїево ѕлодѣ́йство разори́лъ є҆сѝ, и҆ бг҃ома́терь бцⷣꙋ проповѣ́далъ є҆сѝ. Тѣ́мже тѧ̀, соше́дшесѧ, почита́емъ, кѷрі́лле бг҃облаже́нне. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющь на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. Тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, бл҃года́тнаѧ."
 },
 {
  "type": "TEXT",
  "value": "Крⷭ҇тобг҃оро́диченъ: Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи глаго́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Побѣди́вша стра̑сти дꙋшетлѣ̑нныѧ, и҆ по́мыслъ ᲂу҆держа́вша плотскі́й, бг҃оно́сне кѷрі́лле, ви́дѣвъ хрⷭ҇то́съ, бж҃е́ственныѧ тѧ̀ цр҃кве предсѣда́телѧ, ѻ҆́ч҃е, поста́ви."
 },
 {
  "type": "TEXT",
  "value": "Наслѣ́довавъ, ꙗ҆́кѡ сн҃ъ возлю́бленъ, ѻ҆те́ческꙋю ма́рковꙋ добродѣ́тель, и҆ престо́ла бы́лъ є҆сѝ прее́мникъ, бжⷭ҇твеннагѡ стопа́мъ є҆ѵⷢ҇лі́ста послѣ́дꙋѧ."
 },
 {
  "type": "TEXT",
  "value": "Ѿ хрⷭ҇та̀ ᲂу҆́бѡ ꙗ҆́кѡ ѻ҆вча̀ ᲂу҆пасе́нъ бы́въ, ꙗ҆́коже па́стырь ᲂу҆па́слъ є҆сѝ ста́до, ѻ҆́ч҃е, словесы̀ дꙋшепита́тельными твои́ми, ꙗ҆́кѡ трава́ми и҆ цвѣты̑ бога́тнѡ напита́ѧ бл҃года́ти."
 },
 {
  "type": "TEXT",
  "value": "Бг҃оро́диченъ: Воплоще́нно безпло́тное пре́жде ро́ждши сло́во бж҃їе, всепѣ́таѧ ѡ҆бра́дованнаѧ, мі́ръ ѡ҆бнови́ла є҆сѝ. Тѣ́мже тѧ̀, бг҃оневѣ́сто, вѣ́рою правосла́вною проповѣ́дꙋемъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Тече́нїю вои́стиннꙋ ѕѣ́льномꙋ, наводнѧ́ющемꙋ рѣ́ки, твоѐ, ѽ кѷрі́лле, ᲂу҆подо́бисѧ сло́во, ѕлосла́вныхъ ѿвраща́ѧ ᲂу҆хищре́нїе."
 },
 {
  "type": "TEXT",
  "value": "Ра́внѣ ме́рзское а҆́рїево раздѣле́нїе, ѽ кѷрі́лле, скве́рное же саве́ллїево слїѧ́нїе, и҆зъ глꙋбины̀ и҆зве́рглъ є҆сѝ."
 },
 {
  "type": "TEXT",
  "value": "Словеса̀ богатотвѡ́рнаѧ, ꙗ҆́кѡ зла́то ѡ҆ста́вилъ є҆сѝ, ѽ кѷрі́лле, сокрѡ́вища же, ꙗ҆́коже ка́мєнїѧ честна̑ѧ твоѧ̑, цр҃кви хрⷭ҇то́вѣ."
 },
 {
  "type": "TEXT",
  "value": "Бг҃оро́диченъ: Да кропи́тъ нб҃о весе́лїе и҆ бл҃года́ть на землѝ: возда́стъ бо є҆́й ны́нѣ весе́лїе въ высотꙋ̀, є҆ди́нꙋ бг҃ома́терь."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Клеща́ми серафі́мъ прⷪ҇ро́кꙋ ᲂу҆́гль, цр҃кви же хрⷭ҇то́вѣ твои́ма рꙋка́ма подае́ши, свѧщеннотаи́нниче, є҆́же ѿ бж҃е́ственнагѡ ѻ҆гнѧ̀, ᲂу҆́глїе ѡ҆чище́нїѧ."
 },
 {
  "type": "TEXT",
  "value": "Є҆динопредѣ̑льныѧ ꙗ҆́кѡ самѱѡ́нъ и҆ноплеме́нники не потреби́лъ є҆сѝ, и҆норѡ́дныѧ же всѧ̑ и҆носла́вныхъ ᲂу҆чє́нїѧ низложи́лъ є҆сѝ, и҆ держа́вꙋ правосла̑внымъ да́лъ є҆сѝ, кѷрі́лле."
 },
 {
  "type": "TEXT",
  "value": "Собо́рꙋ бг҃оизбра́нномꙋ ꙗ҆́вѣ предводи́тельствовавъ, ѕлоче́стїе несто́рїево, хрїстобо́рнꙋю де́рзость, ѻ҆́ч҃е, низложи́лъ є҆сѝ, ре́вностїю дыха́ѧ по и҆́стиннѣй бг҃ома́тери."
 },
 {
  "type": "TEXT",
  "value": "Бг҃оро́диченъ: Ра́зꙋма нетлѣ́ннагѡ пло́дъ прозѧбла̀ є҆сѝ, бг҃ороди́тельнице, мі́рꙋ присноживо́тный хода́тай нетлѣ́нїѧ ꙗ҆влѧ́емь, вѣ́рою и҆ любо́вїю пою́щихъ тѧ̀."
 },
 {
  "type": "HEADER",
  "value": "Конда́къ, гла́съ ѕ҃."
 },
 {
  "type": "TEXT",
  "value": "Подо́бенъ: Є҆́же ѡ҆ на́съ:"
 },
 {
  "type": "TEXT",
  "value": "Бе́зднꙋ на́мъ ᲂу҆че́нїй бг҃осло́вїѧ и҆сточи́лъ є҆сѝ ꙗ҆́вѣ, ѿ и҆стѡ́чникъ сп҃совыхъ, є҆́рєси погрꙋжа́ющꙋю, бл҃же́нне кѷрі́лле, и҆ ста́до невреди́мо ѿ треволне́нїй спаса́ющꙋю, страна́мъ бо всѣ̑мъ наста́вникъ, преподо́бне, ꙗ҆́кѡ бжⷭ҇твєннаѧ ꙗ҆влѧ́ѧ."
 },
 {
  "type": "TEXT",
  "value": "І҆́косъ: Краснѡ̀ при ᲂу҆́трени показꙋ́етсѧ вельмѝ сл҃нце, сꙋ́що свѣтоно́сно, тма̀ ѿгонѧ́етсѧ, и҆ лꙋна̀ ѡ҆хꙋжда́етсѧ, но́щь бо не состои́тсѧ: ᲂу҆ѧснѧ́етъ де́нь, просвѣща́етъ во́здꙋхъ, нб҃о красно̀ показꙋ́етъ на́мъ, зе́млю ᲂу҆добрѧ́ѧ, цвѣтѡ́мъ творѧ̀ и҆зраще́нїе: мо́ре же ѡ҆блиста́етъ, и҆ вкꙋ́пѣ ве́сь ᲂу҆краша́етъ мі́ръ, є҆́же во все́мъ сегѡ̀ свѣтлѣ́йши кѷрі́ллъ, є҆гѡ́же мꙋ́драѧ ᲂу҆чє́нїѧ спаса́ютъ поднбⷭ҇нꙋю: ѡ҆зарѧ́етъ бо то́й вѣ́рныхъ дꙋ́шы, и҆ побѣжда́етъ бл҃гоче́стнѡ є҆́рєси при́снѡ: страна́мъ бо то́й наста́вникъ, ꙗ҆́кѡ бж҃е́ствєннаѧ ꙗ҆влѧ́ѧ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Въ сїна́йстѣй горѣ̀, во мра́къ дре́вле вше́дъ, зако́нъ прїѧ́тъ, бл҃же́нне кѷрі́лле, мѡѷсе́й, ᲂу҆бива́ющїй пи́сменемъ: ты́ же разгнꙋ́лъ є҆сѝ сокрове́ннꙋю добро́тꙋ дх҃а."
 },
 {
  "type": "TEXT",
  "value": "Законоположе́нїѧ гада́ньми, ꙗ҆́коже младе́нцємъ пе́рвѣе, ѻ҆́ч҃е, да́ннагѡ покрыва́лꙋ покрове́нїѧ, ꙗ҆́коже ши́пки разꙋмѣ́нїѧ ты̀ ѿкры́лъ є҆сѝ, сказа́въ ѻ҆́бразы ꙗ҆́вственнѣйше."
 },
 {
  "type": "TEXT",
  "value": "Въ несли́тномъ соедине́нїи бжⷭ҇твенномъ, и҆ несѣко́мѣмъ ꙗ҆́вѣ, ѻ҆́ч҃е, раздѣле́нїи, трѝ ᲂу҆́бѡ бг҃осло́вствꙋѧй ѵ҆поста̑си, ре́клъ є҆сѝ, кѷрі́лле, непремѣ̑нныѧ же въ сꙋществѣ̀ є҆ди́номъ и҆ бж҃ествѣ̀."
 },
 {
  "type": "TEXT",
  "value": "Бг҃оро́диченъ: Ви́дѣша а҆́гг҃ли, бг҃омт҃и, стра̑ннаѧ ржⷭ҇тво́мъ твои́мъ, є҆стество̀ тлѣ́нное ро́да земна́гѡ къ нетлѣ́нномꙋ па́ки текꙋ́ще житїю̀ и҆ сла́вѣ нбⷭ҇нѣй."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Ꙗ҆́кѡ волна̀ морска́ѧ вои́стиннꙋ, въ тебѣ̀ и҆стечѐ премꙋ́дрости и҆сто́чникъ: и҆́бо приснотекꙋ́щыѧ потеко́ша рѣ́ки ѿ чре́ва твоегѡ̀, ѻ҆́ч҃е, ᲂу҆че́нїй бл҃гочести́выхъ, ꙗ҆́коже проречѐ хрⷭ҇то́съ: прехо́дѧтъ бо песка̀ твоѧ̑ словеса̀ бг҃оизбра̑ннаѧ."
 },
 {
  "type": "TEXT",
  "value": "Па́стырь и҆ ᲂу҆чи́тель мꙋ́дръ цр҃кве ꙗ҆ви́лсѧ є҆сѝ, ѻ҆́ба, кѷрі́лле, ꙗ҆́вѣ разгнꙋ́лъ є҆сѝ, преподо́бне, завѣ́ты: ꙗ҆́кѡ бо а҆гкѵ́рꙋ, и҆ ѻ҆те́чєскаѧ наслѣ̑дїѧ твоѧ̑ и҆мꙋ́щи словеса̀, вопїе́тъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Сло́ва вопло́щшагѡсѧ на́съ ра́ди, всехитреца̀, ты̀ неизрече́нномꙋ наꙋча́еши соедине́нїю, кѷрі́лле, нераздѣ́льное, неслїѧ́нное, по ко́ейждо во́ли ра́внѣ ᲂу҆клони́лъ є҆сѝ, вопїѧ̀, бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Є҆стество́мъ непристꙋ́пный всю́дꙋ, сн҃ъ и҆ сло́во бж҃їе въ тѧ̀ всели́сѧ, чⷭ҇таѧ, и҆ ѡ҆бо́лксѧ, пречⷭ҇таѧ, въ на́ше сꙋщество̀, ꙗ҆́кѡ милосе́рдъ, ꙗ҆ви́сѧ бл҃гопристꙋ́пенъ пло́тїю, и҆ водвори́сѧ съ на́ми вопїю́щими: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Возноше́нїе на хрⷭ҇то́въ взе́млющеесѧ ра́зꙋмъ, и҆ сегѡ̀ бг҃ома́терь, кѷрі́лле, всѧ́кꙋ держа́вꙋ низложи́лъ є҆сѝ, нестѡ́рїа безбо́жнагѡ, сн҃о́внюю дво́ицꙋ, та́коже и҆ слїѧ́нїе безгла́вныхъ є҆сте́ствъ."
 },
 {
  "type": "TEXT",
  "value": "Си́лою ра́зꙋма, и҆ просвѣще́нїемъ бл҃года́ти, трⷪ҇цꙋ є҆диносꙋ́щнꙋю, сн҃а же воплоще́нна бг҃а бг҃осло́вилъ є҆сѝ, бл҃же́нне: ꙗ҆ви́вжесѧ бцⷣы побо́рникъ, въ вы́шнихъ ны́нѣ прославлѧ́ешисѧ."
 },
 {
  "type": "TEXT",
  "value": "Свы́ше ны̀ пѣвцы̀, приснопа́мѧтне, назира́еши, ѻ҆́ч҃е, мило́стивнѡ, побѣ̑ды во́инствꙋ подаѧ̀, и҆ возвыша́ѧ моли́твами твои́ми ро́гъ правосла́вныхъ, ᲂу҆ѧснѧ́ѧ же твою̀ па́мѧть велича́ющыѧ."
 },
 {
  "type": "TEXT",
  "value": "Бг҃оро́диченъ: Оу҆тѣснѧ́емь падє́нїи мно́гими, препѣ́таѧ, и҆ лю́тостїю бѣ́дъ, ны́нѣ тебѣ̀ хвале́нїй же́ртвꙋ приноша́ю, и҆ прилѣ́жнѡ взыва́ю тѝ: ст҃а́ѧ бцⷣе, помози́ ми, тѧ́ бо сла́вѧ, пѣ́снь скончава́ю."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Оу҆ченикѡ́мъ:"
 },
 {
  "type": "TEXT",
  "value": "Чꙋ́вство и҆ ра́зꙋмъ преминꙋ́вшаго, и҆ глꙋбинѣ̀ дх҃а наꙋ́чшасѧ, бжⷭ҇твеннаго тайнопи́сца пребжⷭ҇твенныѧ трⷪ҇цы воспое́мъ, ꙗ҆́кѡ ст҃и́телѧ гдⷭ҇нѧ, и҆ побо́рника благоче́стїѧ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, пра́здника, и҆лѝ бг҃оро́диченъ:"
 },
 {
  "type": "TEXT",
  "value": "И҆́же твоегѡ̀, непоро́чнаѧ бцⷣе, ѻ҆́браза не цѣлꙋ́етъ съ любо́вїю, во ѻ҆́гнь вмета́етсѧ гее́нскїй, ꙗ҆́коже безꙋ́мный нестѡ́рїй: мы́ же тѧ̀, прест҃а́ѧ, ѡ҆блобыза́емъ любо́вїю."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ ѕ҃:"
 },
 {
  "type": "TEXT",
  "value": "Наслѣ́дниче бж҃їй, соприча́стниче хрⷭ҇то́въ, слꙋжи́телю гдⷭ҇ень, кѷрі́лле ѻ҆́ч҃е на́шъ, по и҆́мени твоемꙋ̀ та́кѡ и҆ житїѐ твоѐ: спросїѧ́ бо сѣди́нѣ ра́зꙋмъ, свидѣ́тельствоваше свѣ́тлость лица̀ твоегѡ̀ дꙋше́вное неѕло́бїе, и҆звѣ́ствоваше кро́тость сло́во молчали́вое, жи́знь твоѧ̀ сла́вна, и҆ ᲂу҆спе́нїе со ст҃ы́ми, молѝ ѡ҆ дꙋша́хъ на́шихъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Предстоѧ́щи ᲂу҆ дре́ва и҆ногда̀ во вре́мѧ распѧ́тїѧ дв҃а, съ дѣ́вственнымъ ᲂу҆ченико́мъ, и҆ пла́чꙋщи, вопїѧ́ше: ᲂу҆вы̀ мнѣ̀, ка́кѡ стра́ждеши, всѣ́хъ, хрⷭ҇тѐ, сы́й безстра́стїе;"
 },
 {
  "type": "HEADER",
  "value": "На лїтꙋргі́и: Блажє́нна, пра́здника, и҆лѝ ѻ҆ктѡ́иха: и҆ ст҃а́гѡ, пѣ́снь г҃-ѧ."
 },
 {
  "type": "HEADER",
  "value": "Прокі́менъ, гла́съ а҃:"
 },
 {
  "type": "TEXT",
  "value": "Оу҆ста̀ моѧ̑ возглаго́лютъ премꙋ́дрость:"
 },
 {
  "type": "TEXT",
  "value": "Сті́хъ: Оу҆слы́шите сїѧ̑, всѝ ꙗ҆зы́цы:"
 },
 {
  "type": "HEADER",
  "value": "А҆пⷭ҇лъ ко є҆вре́ємъ, зача́ло тл҃д."
 },
 {
  "type": "TEXT",
  "value": "А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости:"
 },
 {
  "type": "TEXT",
  "value": "Сті́хъ: Зако́нъ бг҃а є҆гѡ̀ въ се́рдцѣ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло а҃і."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]